رواية قمع المشاعر الفصل التاسع وخمسون 59 - بقلم Rozaya1122

قمع المشاعر.... الخامس عشر من الجزء الثاني...
للكاتبة زهراء ( روزايه)...

لقد رأيتُ روحي تتهشمُ أمام عينيّ
مثل تُحفة زُجاجٍ ثقيلة، ولكنني لم أختبِئ ،
خرجتُ إلى العالم بوجهِ هادئ
كأنَ بمقدورهِ أن يُسند الجميع.!
....

قبس.. مديت راسي بالشارع باوعت ماكو احد
احنه بيتنه ثاني بيت اول مانفوت الفرع
كل بيت ببابه سياره بس هاي الطفله وين اختفت
مالهه اي اثر اني شفتهه بعيني شوكت لحكت تروح..

سديت الباب وقفلته ورجعت للمطبخ
بس الطفله ظلت براسي متاكده اني شفتهه
ومتاكده اني بالطرمه وهي ادك بالباب وصحت منوو؟؟

مر اليوم واني بالي صار كله بالكاميرا
اذا سمعت طكه اركض اشوف خاف رجعت
لان هوايه تكررت هاي الحاله..

من اجه بشار كتله وهم. راجع الكاميرات
باوع باستغراب ودقق هوايه
كمت اذكر الايام التجي بيهه ويراجع التصوير
شافهه مرتين والباقي ماكو يكلي وينهه؟؟

بشار طلع تصوير اليوم اني متاكده شفتهه
وصحت منو؟؟
جاوبني وينهه حبيبتي موهذا التصوير كدامج
صح اجت مرتين هاج شوفي التسجيل
بس هاي الايام التكولين عليهه وينهه
هاي الكاميرا ماكو احد بالباب...

قبس.  شنو قابل يتخيلي اني اسمع الباب يندك ومن اروح
ع الكاميرا اشوفهه طفله صغيره بس لان بعيده
مااميز الوجه

بشار.. حبيبتي انتي ماكو متوهمه هاي ظلت براسج
واحتمال موهي غيرهه هوايه مگديات ويفترن.

قبس.. ظل التفكير ياكل براسي
متاكده مثل مامتاكده من نفسي اكو وحده ادك الباب
اكتفيت بالصمت وقررت اني اراجع الكاميرات باجر..

بليل بشار جان يدقق اوراق واني جنت كاعده يمه
اشوف فلم بالفون حسيت كمت انعس حاجيته
حبيبي ماكملت نعست اني!!

بشار.. هاي خلصت اخر ورقه كومي غسلي
وتعالي لاتنامين!!
قبس.. اجيبلك شي تشربه؟
بشار.. لا مااريد بس غسلي حته لاتغفين..

قبس.. كمت غسلت وبدربي رحت للغرفه بدلت
لبست دشداشه قصيره وفتحت شعري
جريت قلم الحمره خليت شويه ورشيت عطر وطلعت
لكيته مكمل دايلم بالاوراق..

عوفهن اني المهن وكوم غسل صار هوايه مدنك
هسه تهيج عليك ركبتك!!
بشار.. لا كملت والا اكلج عوفيهن ع التخم الصبح
المهن وتعالي وياي!!

قبس.. ممممم شو مستعجل شكو؟
بشار.. وين مستعجل؟ بس لاتغفين انتي خطيره
مثل ذاك اليوم حسيت روحي نايم ويه خشبه
اهز بيج طلعتي غافيه!!

قبس.. هو انت تلعب بشعري وجنت مامنعسه
بس كايلتلك بس تمد ايدك ع شعري اغفه يعني
مشكلتك مومشكلتي!!

بشار.. هو انتي يايوم كلتي الصوج بيه دائما تشمريهه براسي دتعالي عندي سالفه وياج..

قبس.. زينه لوموزينه واذا سالفه مشروع ممنوع !!
بشار.. اني ماعندي شي موزين!! وسالفه المشروع شئتي
ام ابيتي انفذه وبلمليم ..

قبس.. نعسانه مقدرش!!!
بشار.. النعسان يلف نفسه وينام مو مطلعه السيقان
ومطوخه الحمره وتعال يابشار غمض عيونك..
قبس.. قصدك اسويلك اغراء؟؟

بشار.. لا اني اسويلج!! دتعالي وبلا سوالف
عندي هواي مشاريع واريد اهندس عليج ..

قبس.. ضحكت بصوت عالي جنه واكفين بنص
الصاله سحبني علي وحضن وجهي واخذ شفايفي
بكل حنيه صرنه نمشي واحنه نقبل ببعض
لحدما وصلنه للجربايه

ايدي تفتح بازرار قميصه وادري بي
يحب هاي الحركه حيل حته مرات من
يجي من الدوام وافتحهن بسرعه
يسحبني علي ومايقاوم بعد..

تعانقت ارواحنه وانفاسنه عاليه
كلساع يخلي راسه ع كصتي وياخذ نفس من انفاسي
ويهمسلي يم اذاني احبج اعشقج..

مخليه راسي ع صدره
واحرك اصبعي ع ملامحه واحدد بلحيته
من يوصل اصبعي لشفايفي يبوسه
بوسه هادئه  همست يم اذنه..

بشااااااري اني منو؟؟
رد عليه انتي روحي ونصفي الثاني..

قبس.. اذا نصفك الثاني ليش ماتشاركني
بتفكيرك اني احس بيك مهموم واكو شي صاير
ومتحجي؟

بشار.. اندار عليه صرنه وجه بوجه
وكال اذا حجيتلج ماراح تحليهه بس راح
ينشغل بالج اكثر ..

قبس.. حتلو اني حبيبتك وزوجتك وواجبي
اشاركك همك وافرح لفرحك واحزن لحزنك

بشار.. هممممم واذا كتلج الموضوع ميامين!!

قبس.. عزه العزاهه هاي ماتوب شتريد من عندك
بشار.. ماادري شتريد !!
قبس.. سولفلي حبيبي..

بشار.. موكتلج اجت مجموعه اسماء ترقت ومن ضمن
الاسماء ميامين وطبعا كل الترقيات شهادات عليا
ماجستير ودكتوراه ماعدا هي بكالوريوس وشلون
ترقت ماادري..

المشكله موهنا اني حته اكتفيت بالصمت رغم اكو
ماجستير ومارقوهم والي نزلوهم من منصبهم
حجه واحد اعرفه ،وبوقتهه حته قدم طعن وماصار شي

المشكله ياحبيبتي سامعه اول ماشطح نطح
وابتسم.. ميامين تحول شغلهه بالوزاره
تخيلي اللجنه التركض وراي هي المديره مالتهم
شكو واحد جان وياهه بالكليه
ومنافس الهه تروح تنبش ورااا..

قبل فتره اجت للشركه وجانت تحجي بصيغه
امر وياي..
اني رديتهه والا شويه اتعارك وياهه
وطردتهه من الشركه وماقبلت ادقق ورايحه
رافعه دعوه عليه يم الوزير بان اني مااصلح
للاداره عديم الاسلوب وذاكره دخولي للسجن

بيومهه اتحلفت بيهه وخابرتهه حته نلتقي واجتني
للشركه ومن كدما جنت عصبي ردت اضربهه وكوه
لازم اعصابي تدرين شتجاوبني!!

خاف عبالك ترفع خشمك بمنصبك اني وراك
وراك لحدما ارجعك ع شهادة البكالوريس
واتوقع كلشي من عندي حته سمعتك اخليهه بالكاع
واكيد راح تسأل عن السبب!!

السبب لان اكرهك وصديتني من رجعتلك واحجيهه
الك بوضوح موبس انت اي واحد جان بدفعتي وصار
مثلك ارجعه لبدايته لان اني جنت المتفوقه عليكم
وهسه انتم صرتوا اعلى

قبس هيج وحده خطيره عادي عدهه تشتغل
بالتزوير تسوي صفقات تتهم كلشي يطلع
منهه وانروح بيهه
ميامين من النوع ارضيك بس نفذلي الاريده..

وطبعا اكو بنيه جانت ويانه وهسه تدرس ماستر
وهم الهه سمعتهه  وبنت نفسهه..
سمعت من واحد من جماعتي
يكول حته تاهمتهه بشرفهه ومطروده البنيه من الدراسات
لان ملبستلهه تهمه ويه مشرف البحث

قبس.. الله ينتقم منهه جنهه حيه ام كعب شتريد منك
موجانت تحبك ليش هسه تكرهك؟؟

بشار.. شمدريني شتريد هي كح.....
قبس.. اششش لاتحجي ماعدنه بخت..

بشار.. مامجذب هي من هذا النوع هسه لوتريدني
اطلع وياهه ليله عمي قابل بس خلي تفوت حالي..

قبس.. تطلع وياهه مووو ؟؟ وكمت ادغ بي ببطنه
حيل بكل مكان وبكل قوتي حته لوه اديه
يله عفته..

بشار.. هيييي طايحة الحظ اكوم املص اذانج هسه
اكسر اديج وارتاح شكم مره متوبج من هاي العاده السزز

قبس.. والله فوكاهه يريد يطلع وياهه وتريدني
اصفكلك ع تفكيرك احمد ربك ماجبت السجينه وكطعتك
تكطع..

بشار.. دخيل الله شكد هجوميه انتي ليش عنيفه
وين الانوثه مالتج شو شوفيني وينهه؟؟

قبس.. لعد قبل شويه جنت نايم ويه جبار
لو ماشفت الانوثه مالتي بعدك؟؟
اكوم اشوفهه الك

بشار.. هاي الانوثه مو واندار انطاني ظهره شوفي
الخراميش شوفي ظهري مايلحك يطيب من وراج..

قبس.. لاتلوفهه عليه وتنسيني الموضوع ازرف
بطنك تزرف واسويك وصل وصل بس تفكر
تخطي خطوه بهيج درب..

بشار.. دنامي ماسويتهه من جنت اعزب اسويهه
هسه لسه ماتفرقين بين الشقه وبين الجد
شكول عليج شوفي الكرصات نايم ويه زنبور..

قبس.. وينهن تعال ابوسهن هسه يروحن
بشار.. وخرري مااريد
قبس.. لاتريد فوك ما ابوسك ..

بشار.. قبس ملاحظه طبعج راجع ازيد من قبل
بابا خففي من العنف العندج شلون البس درع واجيج
هم ما اخلص..

قبس.. خليني اخذ علاجي اني هم تعبت
من ضبط اعصابي .
بشار.. تعالي نامي وانسي العلاج من تجيج الحاله
اقري قران لهي نفسج باي شي..

قبس.. ااااي ..
بشار.. زعلتي ؟
قبس.. اااي

بشار.. هههههه اروح فدوه للبريئه شوف
شلون تنكط برائه ام الخباثه وسوت نفسهه عاقله
شو خلي اشوف شلون انفخن شفايفج..

قبس.. وخر عني دكول عليه عنيفه..
بشار.. اتقبلي الحقيقه لان انتي عنيفه واني
مجاريج رغم احس تشلعين لحمي بس شسوي
احبج بكل حالاتج..

قبس.. مممممم لعد رضيني لو اعضك!!
بشار.. يله بله صار ساعه شلغي تكلي اعضك
قبس.. لعد رضيني!!

بشار.. سهله هاي ارضيج تعالي ابوسج وكام يبوس
بيه وباوعلي وحجه الاسبوع الجاي تعرفي شنو؟؟

قبس.. اااي عيد ميلاد زواجنه
بشار.. عفيه ببنيتي جنت اريدهه اسويهه مفاجأه بس
مدام زعلتي راح اكلج
قبس.. شنوووو؟

بشار.. انسافر لتركيا قدمتلج معامله جواز باجر اخذج تبصمين
واطلعه فوري واني رتبت اجازه مده اسبوع
وانسافر ..

قبس.. كول والله
بشار.. يايوم مجذب عليج
قبس.. عليك الله
بشار.. ولللللججججج

قبس.. من فرحتي ساعه ابوسه ساعه اعضه
دغيت بطنه صرت فوكا لعبت لعب
وهو صافن عليه من كدما ملخته تملخ حته اثار
اسناني طبعن بكتفه..

تالي صاح بيه بصوت عالي يله انتبهت ع نفسي
كومي من يمي كومي.. نزلي جوه انعل ابو
الياخذج ع هالدكه

قبس.. اسفه ودنكت مو فرحت وماعرفت شلون
اعبر عن فرحي
بشار.. لعد هيج !! كومي جيبي السجينه ودچيني
وجيبي كهرباء وكهربيني

بربج انتي صاحيه شوفي شسويتي
اليشوفني يكول مرتك لو شنووو!؟؟

قبس.. اباوعله ركبته بيهه اثر واضح وكتفه احمر والعضه
مطيرته بطنه من الكرصات زركه
شعره مهوس وفوكاهه جان لابس بس بجامه
حته صدره عاضته منه

شبيه اني عبالك مجلوبه وهدوني
انقهرت علي حيل هو من النوع يضوج يبين اثر
بركبته واني مسويتله ختم..

كعدت كدامه ومدنكه خجلانه وكتله اسفه
بشار.. استغفر الله دكومي خلي نسبح
واذا عدتيهه بعد والله ياقبس منين ماتعضيني اعضج
واطيح حظج ..

قبس.. لا مااعيدهه اكلك اني عندي طاقه زايده
شسوي وين اوديهه هسه ابدي اشلع لحمك كله..

بشار.. هاي موطاقه هذا خبال دكومي كدامي
خلي نسبح هسه ترتاحين...

قبس.. كمت اخذت الملابس وسبحنه ورجعنه
نمنه ثاني يوم كعدت سويتله ريوك وهو يبدل
اجاني للمطبخ مامدكم القميص ويصيح
تعالي ست الحسن شوفيلج جاره لهاي الطركاعه
المبينه باليوم التقي بالف واحد شيكولون..

تقربت علي كمت ادكم بقميصه ذبلن عيونه
ونصه راسه عليه يشم بركبتي
واني احجي بدلع حبيبي البس قاط اليوم
حته الرباط مايخليهه تبين..

بشار.. يحجي وعيونه ذابله انتي تشوفين هيج
قبس... مممممم

مد ايده ع خصري راد يلزمني وابتعدت كتله
راح الوقت عليك بعد متلحك ومشيت كدامه للكنتور
طلعتله الرباط والستره
يلبس وعيونه وكحه يتغزل ويتشاقه
كوه طلع كلساع وكال اظل واداوم ويه المسائي

رغم حنيته وتعامله ويايه زين
بس الشك بعده بداخلي خاصه
من اجي والكا صافن ومن اساله يكول ماكو شي!!

الشك بعده مسيطر عليه
احسه مرات يجبر نفسه حته يعاملني
طبيعي ومايخليني اللاحظ..

طلع للدوام واني اليوم ماداومت
لان اجتماع اولياء الامور وماكو داعي
اروح اخذت اذن من الاداره كملت شغلي
واخذت التليفون خابرت شجن

ادري بيهه بالكليه بس مرات يصير عدهه
مجال نسولف اكثر تواصلي وياهه
نتراسل هوايه ع الواتساب والماسنجر
يوميه هي تشوفني شراح تلبس واني هم
اشوفهه
بس دكيت جاوبت
شجن.. هلو قبس شلونج
قبس.. الحمدلله شلونج كلت يجوز بالدوام

شجن.. لا اليوم بالبيت باجر عدنه امتحان ومارحت
لان ماالحك اقره
قبس.. اسراء مداومه
شجن.. اي مداومه تدرين البارحه اجتنه عمه بسمه
ولا ذكرت سالفه فرح وتكول جاي ادور ع تعين حتلو اهلي
لان ملت من كعدت البيت..

قبس.. وماذكرت امجد شلونه؟
شجن.. تدرين شدكول وحده بنت حرام تحرض بي ع اخته
ماتستحي هم سكط وهم لازمتله التليفون
وكاتلتهه الغيره من فروحه وتخلي يتعارك وياهه..

قبس.. هاي بسمه ولاينفع بيهه الحجي
والله واحد ولاينقهر عليهه عساهه بحرگة كلوبنه
شجن.. يمعوده ولا اهتم لكلامهه المهم عرف حقيقه
اخواته بس انقهرت علي لان عايش وحده برا البيت
وهي عدهه بس هالولد وحايره تخطط ويه بناتهه..

قبس... اي عفيه لاتهتمين يله حبيبتي سلميلي
على خاله .. سديته منهه وكمت للغرفه
ناويه اعزل وارتب ملابسي ...

عندي هواي ملابس ومرات بشار يجيبلي
وحته ماالحك البسهن فتحت الكنتور رتبت قسم
منهن لكيت ملابس جديده ماملبوسه واكو منهن ملابس نوم
رتبتهم

اتذكرت اخر مره قبل لايصير عندي اسقاط
بشار جابلي فستان سهره جان خدمة توصيل
ومالحكت البسه واصلا ناسيته
لان عندي هواي حيل بس هو تذكره قبل
مده وكال وينه وكتله موجود

دورت علي ماكو رجعت ادور وفتحت الخانات كلهه
ماكو هو بباكيت وبعده بالجيس وينه؟؟

شكد دورت علي ماكو اني اتذكر
شوفته لشجن من اجتني ولبسته واخذت بي
صور ودزيته لشجن شافته حته وصيت لفاديه
واحد نفسه

ما اهتميت للموضوع ومن سألني بشار
كتله ماكو دورته بس احتمال اني شايلته
ويه الملابس الشتويه فوك وماادري واتعاجزت
اصعد ادوره لان قبل فتره شلت الملابس الشتويه
واحتمال صار وياهن..

سويت الجواز وحجزنه لتركيا صادف يوم خميس
وجانت الرحله موبس احنه ٤ من جماعة بشار
هم وعوائلهم بس احنه ماعدنه طفل..

اخذنه عمر للمطار واول مره اصعد طيارة
جنت خايفه حيل اول ماانقلعت هبط ضغطي
وشويه يله استقر حته ماباوعت لحدما هبطت

اول ماوصلنه تعبانين حيل خلصناهه نوم
وثاني يوم يله بدينه نطلع تونست ونسه
تخبل بشار سابقا جاي ويندل
ونطلع مرات ويه جماعته حسيت هذا الاسبوع
شهر العسل ...

شكد اشتريت ملابس ششتري اركض للفندق البسه
واصوره وادزه لشجن تختار ويايه
جنت ٢٤ ساعه نحجي اني وياهه حته افتحلهه
كاميرا ونسولف من يطلع بشار ويه جماعته..

خلص الاسبوع ورجعنه لحياتنه الطبيعيه
اني جنت ماخذه اجازه ورجعت لدوامي
وبشار رجع لشغله وبيوم الرجعنه
اجو بليل بيت عمو وشجن وانطيتهم الهدايا
حته لاسراء جبتلهه..

دوامي كله صباحي ارجع ب١٢ ونص
اسوي غده لان بشار ب٢ ونص يجي
ويرجع ب٤ للمسائي..
مثل كل مره واكفه اسوي غده الساعه ب١ تقرييا
واندك الباب

مجرد ماندك حسيت بشعور غريب
باوعت بالكاميرا نفسهه الطفله
طلعت اركض اريد الحك عليهه ماكووو
طلعت نصي للشارع ادور وينهه

رجعت ركضت ع الكاميرات اعيد بالتسجيل
ماكوو اي طفله ماكو اصلا ولاطير فايت بالشارع
بهيج وقت

تخبلت حسيت نفسي مجنونه لازمه راسي
وانفض بي احس نفسي راح اوكع
راسي نمل اني جاي اتخيل لو شنو ؟؟
مره شافهه بشار وكال مگديه وهسه ادور عليهه
ماكو وينهه ليش ماطلعتهه الكاميرا..

كوه كملت الغده بس اعصابي ترعش
اردد بايات قرانيه احاول اشغل دماغي
حته لا اسمع الصوت اليجيني
هالمره احس نفسي موطبيعيه شكد مريت بحاله
نفسيه وكالو مرحله خطيره بس جان العلاج يهديني

مااعرف شلون خلص الوقت واجه بشار
جنت خايفه حيل كمت اخاف اطلع من المطبخ اتخيلهه
بالبيت وجهه مااشوفه ماادري شجاي يصير وياي..

بس انفتح الباب ركضت حضنته وتعلكت بركبته
يريد يفتهم مني مايكدر من كدما ارتعش جسمي
بين اديه ..

كعدني ع الكرسي وكعد بالكاع ولازم اديه
وهو يهدي بيه واني اكله اني شفتهه
والله شفتهه بس ماموجوده بالكاميرا
بشار اني شفتهه اني مو مجنونه !!

بشار.. ع كيفج ابويه انتي شوفي شلون ترجفين
هسه احلهه هسه ادور الكاميرات انتي شفتيهه
بس هي الكاميرا ماصورت انتي صح حبيبتي..

قبس.. فوك النص ساعه يهدي بيه
وظل يردد براسي انتي شفتيهه
صحيح اكو طفله بس بوقتهه ماجنت اعرف
هو يجاريني ع كد عقلي ..

كام يبدل اني واكفه وياا
راح يغسل. امشي ورا
فرش السجاده يصلي كمت اصلي وياا ورغم اني مصليه
وعدت صلاتي ماجنت اعرف شجاي اسوي..

حته من صبيت الاكل هو واكف ويايه
لان شاف حالتي فدمره صرت
صوت براسي يكول انتي تتخيلين انتي مجنونه..

ورا الغده كعد يدور بالتسجيلات
وماخلاني اباوع جان حاضني وضام راسي
بصدره وايد لازمه الريمونت وايد تمسح ع شعري..

تركهن وكام شالني للغرفه ومدد بصفي
وهمس حبيبي الخايف!! ماكو شي صح اكو ابنيه
تجي ادك الباب وتشرد اني شفتهه تفتر ع بيوت المنطقه

قبس.. لعد ليش ماسجلتهه الكاميرا
بشار.. لا حبيبتي مسجلتهه بس انتي ماعرفتي اطلعيهه
اني شفتهه هسه  انسي الموضوع

قبس.. بشار شيل الكاميرات من الباب مااكدر
صارت عاده عندي كلساع اركض ادور التسجيلات
الغي كلشي وحته اذا اندك الباب ماافتحه وشيل الجرص
مااريد اسمع اي شي..

بشار.. هاهي هسه الغي كاميرة الباب لاتخافين
شكو منطقه امينه والابواب مقفوله شو صايره
جبانه وينهه قبس السباعيه..

قبس.. بيومهه حته ماخليته يروح للدوام المسائي
وبس حاضنته ومن صار العشا كال نطلع نتعشه برا
وطلعنه للمطعم شويه ارتاحيت..

من رجعت خابرت شجن وسولفتلهه
ظلت تحجي عليه وكالت هاي لان تعبانه نفسيتج
اقري عن هاي المواضيع بالكوكل
لاتخافين..

وصدك كمت ابحث عن مرضي واكو مرض نفسي
اسمه التخيل الوهمي قريت هوايه
لحدما قريت تقرير نفس اعراضي بالكامل
وناتج عن علاج نفسي سابق او عقدة نفسيه
جان اسمه مرض الشيزوفرينيا
هذا نوع من انواع الانفصام العقلي..

هنا ولاول مره اتخذ قرار وخطوه بدون علم بشار
من كدما تأذيت كمت اخذت علاجي النفسي
الضامته ويه ملابسي للاحتياط وبدون مايدري..

حسيت نفسي هدأت وكدرت انام وثاني يوم
كدرت امارس حياتي طبيعيه
وكالعاده بنفس الوقت يندك الباب بس هالمره ماكو كاميرات
لان لغاهن علمودي

اسمع دكه خفيفه واني بين الوهم وبين الحقيقه
ركضت للغرفه اخذت حبايه
وهكذا استمريت يوميه اخذ العلاج النفسي
يله كدرت اسيطر واتحكم باعصابي..

بشار مايدري بس فاجأني بيوم فتح موضوع
الحمل وكال خلينه انراجع هاهي صار مده ارتاحيتي
ونفسيتج تعدلت..

جنت خايفه اكله اني اخذت العلاج لان مايقبل
ووحده من حالات المرض هذا هو الخوف
من تبوح بكلشي من تحس نفسك مسوي غلط
تخاف تحجي لان تخاف من العقوبه..

جنت انتظره بليل احجي ويا واصارحه اني
حالتي النفسيه تعبانه واخذت علاج
اكيد راح يساعدني بس فجأه اجت براسي
تخيلات واوهام ماصايره
وتذكرت خاف يعاقبني مثل بابا من اسمع
صريخ ماما بنص الليل..

وهاي الغلطه العمري ماراح اسامح نفسي عليهه
ماحجيت لبشار واتخذت درب بدون علمه
طلعت من المدرسه واشتريت حب مانع من صيدليه
ع الشارع وضميته بملابسي

جنت اكول لبشار موافقه نسوي حمل
وهو يحس نفسيتي طبيعيه مايدري ع العلاج..

رغم شكد جان يسالني وهو يكلي
قبس اكو شي مااعرفه؟؟
واني جنت اجاوبه بوقاحه واكله لاااا اطمئن..

شك بموضوع الحمل وكال اخذج لسرور
نجيك وطلعت حجتي اكره سرور لان مرتين
طفلي مات واني اراجعهه وبيومهه رحنه لدكتورة صابرين

وهو مايدخل وياي وماعرفت شكله
من طلعت كتله دكول ماكو شي بس هاي
مثل الصدمه الباقي يم الله..

جنت احس بتأنيب الضمير
من اخذ المانع جنت خايفه حيل خاف بيوم
يكشفني واروح بيهه

مااكدر اسوي حمل لان ملتزمه بعلاج النفسي
يعني ميه بالميه يطلع الطفل مشوه
هو هذا العلاج ماينصرف الا بوصفه طبيب
واني من جنت عند عزيز كتبه الي طبيب نفسي
وظليت محتفظه بالوصفه وكل مره اشتري
واضمه واخذ نص حبايه ..

هذا كله جانت شجن تعرف بي اسولفلهه
بالتفصيل وتحجي عليه لايكشفني بشار
وكل شهر اكلهه هذا الشهر ابطل بس تعلقي
بالعلاج خلاني مدمنه..

بيوم منهن اني بالدوام ومدنكه ع الحاسبه
اشتغل ومااسمع غير السلام عليكم
رديت السلام ورفعت راسي ابوغدير
جاي يسأل عن بنته..

كتله الاداره موهنا هاي حسابات فقط
رد عليه شدعوه هلكد رافعه خشمج انطينه مجال نحجي

قبس.. انت ملاحظ نفسك قليل ادب والشوارب
العندك ديكور

موفق.. ماراح اجاوبج واقسي عليج لان حرامات
الورده مثلج نقسي عليهه
بس اسالج سؤال انتي ليش هلكد حلوه؟؟

قبس.. اطلع برا قبل مااصيح عليك الحارس
واخليك فرجه كدام الطالبات

موفق.. زين بعد سؤال انتي مرتاحه ويه المدير
العام ؟؟

قبس.. شنو رأيك تظل واكف بمكانك واني راح اخابرلك
المدير العام يجي يجاوبك ياعديم الذوق..

موفق.. يابه وحق الله لبوه وانحني للمدير
العام شلون معلمج وشلون عنده بخت ومحصل وحده
مثلج ..

بس قبل لا اروح احفظي شكلي زين
لان راح تشوفي هواي وراح تدعين عليه هواااي ..

عافني وطلع للاداره شكد ناقص ومنحط ياكلب
يا ابن الكلب ياعار حرك دمي حرك..

من طلعت من الدوام اخذني السايق لبيت عمو
لان اتفقت ويه بشار هو معزوم واني كتله من المدرسه
واروح لبيت عمو وتعالي بليل..

ظليت لليل واجه بشار وهو واكف كال يله انروح
صاح عمو اكعد بويه عندي حجي وياك..

حجه عمو بشار بويه راح افلش البيت للكاع
وانطي حصة عمر حته يبني ويبقه نص كافي علينه

بشار.. ليش شنو السبب؟
عادل.. ماكو سبب عمر راتبه يادوب يكفي لابنه
ومصرف كليه لمرته هاي السنه اداوم وهو لوبعد عشر اسنين
مايكدر يبني طابوكه وحده براتبه

بشار.. لعد ليش تهد البيت كله انطي قسم من الحديقه
عادل.. اني عندي انطوني مال التقاعد مالتي
وكلت احسن نبني خريطه جديده وعمر هم يستقر..

بشار.. بكيفك يابه اذا مقررين اتوكلوا
عادل.. اريد اوزع الحصص ع اخواتك وانت تعرف حصة قبس
بعدهه بهذا البيت لازم ننطيهه ..

بشار.. هاهي توكل وسوي وقبس حصتهه
يمي اني اسجل
مقدار حصتهه من البيت نص من بيتي

وحصتي من البيت مااريدهه ضيف حصتي ع عمر
اني متنازل عنهه..

عادل.. مايصير عمر ماموجود لويسمع مايقبل هذا حقك
بشار.. اني خير من الله ومامحتاج وراتبي زين
وهاي الحصه حتلو تنطيهه الي اوزعهه لدور الايتام
لذلك متنازل بيهه لاخوي

عادل.. خلي احجي لعمر وبعد شغله ثانيه من الاسبوع الجاي
نفلش البيت نجي يمك اني وامك وشجن واسراء
وامي وابوي يم عامر وصابرين وعمر يم اهلهه
علمود يشرف ع البناء..

بشار.. هله بيكم سوو التشوفو صح وبلغوني
يله قبس ورانه دوام سلمنه عليهم وطلعنه
بالطريق فتحت موضوع الورث وحصتي..

كتله بشار اني مااريد حصتي اريد اتبرع بيهه
لدار الايتام الكلت علي
بشار.. لاحبيبتي هاي حصتج ضمان الج من الزمن

قبس.. بشار حققلي امنيتي هي موحصتي اساسا
هي حصة بابا واني متنازله عنهه سوي الاجراءات وشوفهه
شكد واتبرع بيهه

وعود اذا تخاف عليه من الزمن انت عندك املاك هوايه
اعيش بيهن
بشار.. الله كريم هسه راسي راح ينفجر حته مابيه افكر واناقش..

قبس.. بس وصلنه للبيت سبح ونام
واني تبدي الرحله الطويله ويه معاناتي
اظل اعاني ايام واقوي بنفسي حته مااخذ العلاج
بس للاسف تنهار قواي

ويرجع عندي التخيل مره الطفله ادك بالباب
مره مره جبيره كمت اتخيل حته بلبيت من اظل
وحدي لذلك اختصر الطريق واخذ العلاج ..

رغم بليل ورا مايتقربلي بشار
اركض للحمام اشبع بجي ضميري يأنبني
ع الداسوي هو يسالني ليش ماكو حمل
وخلينه انراجع واني اتهرب منه اخاف احجي ..

كل انسان يغلط بحياته وهي هاي غلطتي
الاكبر وشلون طاوعت نفسي اجذب علي..

ظليت الح ع بشار ع سالفه التبرع
وقدروا البيت وعمو انطه كل واحد حصته
وحصتي تبرعت بيهه بعد ماتعبت من التواسيل
جان رافض يكول باجر عكبه اموت يظل ضمان الج

بس هو مامخليني محتاجه حته رواتبي مااصرف منهه
كلما يستلم راتب يشيل فلوس مصرف مال شهر
يخلي ع الميز والخط هو يدفعه

جان المبلغ يزود عندي واجمعه مرات
ومرات اشتري ملابس الي ولشجن لو فاديه
اي شي اشوفه يعجبني اوصي منه قطعتين ..

اليوم انتقلو بيت عمو يمنه وعمر وصابرين يم اهلهه
علمود يكون قريب على البيت ويشرف ع البناء
عمو طلع تقاعد وظل لازم محلات الخياطه يروح
يشرف ع العمل ويرجع..

اسراء ماالهه صوت نهائيا حته حجيت ع نفسي
شلون بيوم شكيت بيهه عجيبه هاي البنيه
تجي من الدوام مباشرة للغرفه وماتطلع منهه غير للدوام
ووقت الاكل..

عمو وخاله اخذوا الفوك علمود شجن متكدر تصعد
لان هي واسراء اخذن الغرفه الي بصف غرفتنه..
وغراضهم وزعناهه ع البيت وبالغرفه الفوك..

بهاي الفتره اختفه عندي التخيل ومايوم سمعت
الباب اندك لو شفت طفله تاكدت من نفسي
اني جنت اتوهم وقنعت نفسي السبب بحالتي النفسيه..

بيوم من عدهن صادفت جمعه وخاله سوت دولمه
واحنه كلنه بالمطبخ وبشار وعمو راحوا يشوفون
جدو يم بيت عامر..

اندك الباب وهالمره مااتخيل لان الكل سمعه
طلعت خاله تشوف منو؟؟
شويه واجت وهي تصيح تفضلي حبيبتي

شفت بنيه تقريبا بعمري لابسه عبايه مال
راس اسم عبايه مخليتهه نص راسهه وشعرهه
مخصل طالع وكلساع تبعده عن عيونهه
ولابسه تراك مال بيت وشايله العبايه..

حجت خاله واشرت عليه هاي ام البيت يمه
احنه خطار يمهه!!

ردت عليه البنيه كالت اكيد متعرفيني احنه نازلين جديد
بالمنطقه هياتنه بصفكم ..

قبس.. اهلا وسهلا
..الصراحه مستغربه الناس هنا عبالك اموات عكس منطقتي القديمه واستحيت واترددت ادك الباب عليج
بس والله مجبوره

قبس.. كولي حبيبتي محتاجه شي؟
.. اي والله زوجي عسكري وبس اني وامه بالبيت مره جبيره
وخلص الغاز عندي وظليت حايره شسوي
كلت ادك الباب عليكم واشوف

قبس.. والله اني عندي بس اثنين وحده فرغت البارحه
ووحده هسه دنبطبخ عليهه
بس يجي زوجي وياخذهن يبدلهن ادزلج وحده اعذريني..

.. لاحبيبتي ماتقصرين راح اشوف
بلكي اجر سياره اعذريني ع دكة الباب ..
ام بشار.. لايمه اهلا وسهلا واعذرينه ..

قبس.. راحت البنيه واحنه التهينه بالغده
وحته ماسولفنه لبشار لان صارت عادي
يندك الباب مگدي جيران ناس تسال وين بيت فلان
خاله تشوف منوو؟؟

مرت ايام طبيعيه بين الدوام وبين
البيت والهوسه بهاي الفتره قللت علاج النفسيه
لان يمر الوقت وماالحك حته افكر واصفن لان
اكو صوت بالبيت ..

قويت نفسي ونويت اتركه نهائيا وهاي صار
اسبوعين مااخذه بس مستمره ع المانع
ع الاقل شهرين اترك العلاج يله اسوي حمل..

مثل كل يوم لبست سيت نوم جديد
ولبست الروب علي اجه بشار اخذني بحضنه
وهو يشم بشعري وركبتي
سمعت حركة برا ابتعد عني وكال كومي شوفي منو؟؟

جريت الروب الطويل لبسته ورفعت شعري
بقراصه وطلعت ضوه غرفه شجن مفتوح بس
ماكو احد بالصاله فتحت الباب جانت اسراء كاعده تقره
وشجن ماكو..

رحت للمطبخ لكيتهه تسوي ماعون فواكه
فززتني عبالي اسراء اني حذره منهه
وارجع استغفر اكول اشيل بذنبهه..

ظليت شويه احجي ويه شجن لان جانت تحجيلي
ع امجد كالت صدفه شفته من رجعت من الدوام
متغير حيل ولاذاك امجد المعتني بستايله
حيل متغير..

كملت سوالف وياهه ورحت للغرفه فتحت
الباب لكيت بشار كاعد ع الجربايه ومنزل رجليه
ويدخن

قفلت الباب ونزعت الروب وكعدت ع رجليه
حاوطت ركبته بعدني بسرعه وكام طفه الجكاره
وكال تعالي انام!!

استغربت من تصرفه حيل سالته شبيك حبيبي
رد بنتر مابيه شي نعسان!!

قبس.. هسه جان مابيك شي بين ماشفت منو
برا واجيت لكيتك معصب شكو؟؟

نتر بيه بصوت خفت احد يسمعنه وكال
لاتلحين شكو مثلا كومي طفي الضوه اريد انام

قبس.. كاعده يمه مذهوله ليش هيج شصار
هسه جان يتغزل بيه ويكلي مشتاقلج
ومن العصر خابرني يكلي بس نتعشه انروح لغرفتنه
كلبي طاك عليج واريدج
هسه شبي تغير بسرعه؟؟

طفيت الضوه ونمت بصفه وهاي اول ليلى انام
بدون حضنه حته اذا تعاركنه وزعلنه يحضني
ونصبح نكمل زعلنه

بس هالمره تختلف دار ظهره للصبح ماالتفت عليه
ظليت افكر شبي شصاير؟
نص الليل ومديت ايدي صارت ع بطنه وحضنته
ادري بي كاعد ومابادلني بس مارفضني..

للصبح ماغفيت مامتعوده على هيج تصرف منه
ظليت اكل بروحي شكووو؟؟
كعدته الصبح للدوام وكمت سويتله ريوك
وهو ساكت تريك وطلع بدون مايلتفت بوجهي..

رحت لدوامي واني حسبه تاخذني وحسبه ترجعني
ورجعت للبيت خابرته مارد عليه ومن اجه بعد اكثر
من البارحه يحاول يكون طبيعي بس اعرفه
اكثر من نفسي بشار موطبيعي..

اجه ابالي الحب المانع خاف شافه
بسرعه كمزت للكنتور لكيته بنفس مكانه وحته مامتحرك
معناتهه اكو شي ثاني..

كلما اساله وكال ماكو شي يعاملني
طبيعي كدام اهله بس بالغرفه يختلف
صح انام بحضنه بس نهائيا ماحاول يتقربلي
ولاتغزل بيه ..

اني هم سكتت قابل شريد اساله ليش ماتتقربلي؟
هو تعامله طبيعي بس بهاي الشغله ابتعد
صارت حته بوسته مو بهذيج اللهفه..

شهر ونص تقريبا وكمل بيت عمو وظل بيت عمر
بس بعد اكو شغلات بسيطه كال عمو احنه وكاعدين
انرتبهه ورجعوا لبيتهم

فرح نهائيا مالهه صوت وممنوعه عليهه
الطلعه وفاطمه كالو صار عدهه اسقاط وهو
اصلا غيث غلط ويدفع ثمن غلطته..

رجعت وحدي بالبدايه حسيت بصعوبه
لان تعودت عليهم وشويه شويه تماشيت
ويه الوضع وهاي صارلي شهر رجعت للوحده..

بشار راح يصير شهر كامل مامتقربلي
يبوسني يحضني بس نهائيا ماحاول لايتغزل
بيه ولا كال مشتاقلج
كلساع اريد احجي ويا وابطل وماعرفت السبب شنو؟؟

لحد ما اجه اليوم الي قلب الموازين!!
اليوم الي انتهت قبس بي وصارت حياتي مثل
اسمي
قبس معناته شعله من النار وفعلا حياتي
فاقت وصف الجحيم..

جنت كاعده وحدي بيدي الفون
واتصفح بالفيس جانت الساعه ب٣ الظهر
غداي جاهز بس انتظره يجي ونتغده..

سمعت صوت سيارته وكمت تلكيته
بس فتح الباب شمر السويج حيل والموبايل
وسحبني من ايدي للغرفه!!

يجر بيه واصيح شكووو بشار
وهو صاك ع اسنانه وعبالك جان بمعركه
وطلع خسران منهه..

شمرني حيل للكاع وصاح بصوووت
حسيت الجيران سمعووو
وهو يعيط بعلو صوته!!

اذا جذبتي بحرف واحد!! واذا ماانطيتي
دليل هسه اذبحج بيدي ومايرفلي جفن!!

قبس.. عطت بي شبيك بشاااار فضحتني يوميه نفس
المنوال يوميه مكربسين سالفه براسي
وانكتل عليهه وراهه تجي تعتذر ويروح حقي
هسه شنو الجديد هم رقم غريب ..

بشار.. يعني متوقعه تنكشفين وبشار الاثول
راح يبرللج من خوفه عليج ومايصدك اي كلمه
تنكال بحقج واجذب نفسي حته اصدكج..

هسه هاي كدامج اني مابيدي شي عليج
غير هاي بصمة الصوت اسمعيهه وانطيني
العكس واطلع كلب ابن كلب اذا سمعتي حرف مني..

جر تليفونه وهو يحاول يصدك
يحاول يضبط اعصابه
مثل كل مره بس هالمره تختلف..

سحب تليفونه فتح البصمه
واني مركزه وكاعده بالكاع صوت
رجال مو بنيه  جان هذا نصهه بالضبط

السلام عليكم استاذ بشار
الي راح اكوله ماالي بي فائده بكد الشعره
بس انت معروف باخلاقك وسمعتك الحلوه
ولازم تعرف شيصير وراك لان راح تنفضح
ودكول ياريت واحد كايلي..

زوجتك تخونك بمعنى الكلمه بس لحد الان ماوصلت
للفراش بعدهه بالرسائل والمخابرات
زوجتك مريضه نفسيآ وماتكدر تثبت ع واحد
والدليل راجع حياتهه السابقه

انت رجال وانت تعرف شلون تكشفهه
راح تنكر وراح تبجي كدامك لاتصدكهه
لان الادله الي راح تلكاهن عليهه
تخلي اكبر رجال ينهار واتمنى ماتغلط

وبالاخير اكلك اذا نكرت زوجتك
تلكا المكايد مالتهه الراح توكف شعرك راسك
بالملابس الفوك هاي عادتهه تضمهن هناك
لان تدري بيك ماتصعد وانت ثاق بيهه 

لاتصدكهه باي كلمه حته سالفه الطفله
افتعلتهه هي حته تكسب عطفك وتلغي الكاميرات
ومن تروح للدوام تفتح الباب وتلتقي
ويااا ...

سد البصمه وماكملتهه بس هو نار
لو يوكع بيده يكوم
يذبحني ومايشفى غليله
اني مصدومه اريد ابلع ريكي
مااكدر
من اثر الصدمه عيوني مفتوحه
ولا اكدر انطق حرف واحد..

شمر التليفون ع الجربايه
وحجه بعصبيه مكتومه
ولا انسه خوفه عليه بهذيج اللحظه
وشكد حاول يضبط اعصابه..

نتر بيه كومي اصعدي كدامي
طلعيلي الملابس قطعه قطعه
كومي قبس حجاهه وهو يفرك وجهه ويستغفر..

كمت واني ارجف اني بريئه
بس الحجه هيج اكيد مسوي المكيده ومتاكد منهه
مشيت كدامه واني كل جسمي يرجف..

واكف فوك راسي وافتح بالجنط واكلب بالملابس
شعور صعب مااعرف اوصفه
اني بريئه بس ادري بنفسي موجود دليل اتهامي..

تمنيت لو يطلع كل هذا حلم
تمنيت لو اني ظليت يم عزيز
واخدم بالبيوت ولاطمحت بحياة العز..

رفعت تليفون حديث من بين الملابس
وكمت وكفت كدامه
وسلمته بيدي عيوني حاجته قبل الساني
بشااار اني بريئه اني مظلومه
بس دموعي نزلت قبل كلشي..

ماكدر يحجي وهو يباوع بعيني
اشوفه شلون يبلع بريگه
ويفتح ويسد بيده والنار شابه بي..

جرني من ايدي بهدوء
ونزلني جوه واني دموعي تنزل مثل المطر
كعدت بالكاع وبس هاي الكلمه
النطقتهه بشااار اني بريئه!!

رد عليه وهو يفتح بالتليفون
مااحكم عليج الا اتاكد
بس ماراح اصدكج حته اذا حلفتي
تدرين ليش؟؟

لان صار ٤ اشهر معيشتني بكذبه
ومستغفلتني وتحطين عينج بعيني
وتكذبين بكل صلافه...

ماتريدين طفل مني لحد واصله
بيج تاخذين مانع من ورا ظهري
وغيرتي سرور ورحتي لغير وحده حته تستر
ع عملتج..

قبس.. بشاااار بس اسمعني ......

بشار.. مااريد اسمع اي شي منج فاض صبري
بس مااظلمج تعرفيني من يانوع  اني
واذا مظلومه اخذ حقج بس اذا طلع الحجي صح
شسوي كليلي فهميني؟؟

قبس.. جان يحجي بهدوء مصطنع
يحاول مايظلمني تعامل بهدوء
رغم عصبيته لو اكبر رجال يسمع هالكلام
يضرب بدون مايسمع بس بشار بهاي اللحظه
اختلف..

يمكن مراعاة لحالتي النفسيه!!
يمكن جان مصدوم اكثر مني!!
ويمكن هذا الهدوء القبل العاصفه

متردد يفتح التليفون لولا كلساع
ياخذ نفس ويباوعلي كاعده بالكاع
ماعندي اي احساس ولاشعور بس ابجي
وارعش..

عبالي مثل كل مره يلكه رساله وهو يعرف
منو اليكرهني
عبالي مثل كل مره بشار يحضني
ويطبطب ع ظهري ويكول اني وياج لاتخافين..

تأملت هواااايه وخابت امالي
.
.

يتببببببع... اعذروني ماكدرت اكمل البارت وقفلته لهنا
لان الاحداث متسلسله حدث يجر حدث
البارت بحدود ٥٠٠٠ الالف كلمه استغرق مني ٧ ساعات
واني اكتب بي وكل مااريد اتوقف يبدي حدث جديد ..

الاحداث الجايه متشعبه حيل وحته اصفن بيهه يله
اكتبهه حته اوصلهه الكم بالصوره والاحساس المطلوب
الاحداث حقيقيه ١٠٠٪
وشفتهن بعيني مااكتب قصه بدون دليل
الي اريد اوصله الكم من كلمه حقيقيه تاخذون العبره
منهه وماتغلطون نفس الغلط لان صدكوا ماكتبت القصه الا شفت العبره مالتهه وراح تشوفون بعينكم
شكد بنات مظلومات وشكد عوائل تهدمت من المايخافن من الله ...... احبكم..