رواية قمع المشاعر الفصل السابع وأربعون 47 - بقلم Rozaya1122

قمع المشاعر.... الثالث والاربعون
للكاتبة زهراء ( روزايه)...

(بارت طويل .. اعذروني تأخرت لان يمنه خطار )

قبس.. من الهبطه الصرت بيهه رجليه ماشالني كعدت ع الدرج ودكات گلبي سريعه احس نفسي راح اتخربط كمت شويه شويه اشوف الدنيا تفتر بيه ونفسي صار ثگيل

حسيت الخبر مثل الضربه ع راسي
بسببي راح تموت بسببي انحرمت من ابنهه
اني مسامحتهه والله مسامحتهه...

فاديه.. قبس بيج شي وجهج اصفر كومي مددي ارتاحي صحت شجن تعالي لقبس لان اني شايله الطفل..

قبس.. احس نفسي متخربطه شجن خليني
امدد وارفع رجليه خاف ضغطي هابط..
شجن.. تعالي مددي ورفعت رجليهه كعدت يم راسهه وجهه اصفر وشفايفهه ترجف

اعرف صعبه عليهه وتحمل نفسهه المسوؤليه
والماتخاف من الله فرح نايمه ليلهه استغفر الله ياربي
شوكت تبين حوبتنه بيهه ...

فاديه.. ولكم محد رجع وطلعت برا هدوء الظاهر راحوا للمستشفى شكالت روحج ياصابرين..

شجن.. مرات الانسان من يخسر شي عزيز يحس
نفسه عاجز عن كلشي ويقرر ينتحر وينسى
عذاب رب العالمين وشنو عقاب قتل النفس

عمر قسه عليهه حيل وهي بعدهه صغيره وكلنه نعرف
تفكيرهه طايش وحست نفسهه خسرت ابنهه ورجلهه
ساعه شيطانيه الله يغفرلهه..

فاديه.. عبالك گلبه يعلم اروح فدوه لوجهك
دشوفنه شلون يون ومايكدر يغمض عيونه
حبيبي حته مارضع لان ع صدرهه
والله عمر دخل بخطيه ابنه

شجن.. شفتي شصار بي ركض حافي ولج فاديه اني بالمطبخ
ونزل يركض حته مالحك يلبس ركض بشارع حافي

فاديه.. كل الزلم هيج كرامتهم اهم شي ميخالف احنه
وياك ادبهه وعلمهه بس موبهالقساوه ويدري بيهه
مخبله

تذكرين من جانو ع علاقه ومتعاركين ورايد يعوفهه
هم رايده تنتحر!!
شجن.. منو كالج؟؟ ماسمعت؟؟

فاديه.. هي سولفت دكول قبل الخطوبه صايره مشكله بيناتهم
وابوهه جان مقرر مايزوجهه لان صغيره
وكايلهه عمر خلي كل واحد يروح بطريقه
وهي شاربه حبوب مدري شنو ومتخربطه

وسامع من بنت خالتهه ودكول ورا ماصرت زينه
رجع يحاجيني وكايلهه اريد اشوفج!!
وطالعتله بالباب وضاربهه راشدي
كايلهه من تكبرين وتبطلين رعونيه اخطبج

شجن.. عمر شكد هادىء ونكول مومثل بشار
بس والله بهاي الاحداث اكتشفنه شكد قاسي

فاديه.. الله يستر عينج على علوش راح اروح لاهلهه
شو لاهدى ولاماما حته بيبي راحت ومااجتي بعد..

شجن.. تروحين وحدج ولج دنيا ب١٢ بليل
مخبله الشارع فارغ
فاديه.. يمعوده هن بيتين بيناتنه والشارع مضوي ماخاف
شجن.. اكعدي واسكتي مابينه مشكله ثانيه...

شجن.. بعدهه تريد تروح سمعنه صوت الباب كمنه كلنه حته قبس الجان وضعهه موتمام ..

اجت هدى وبيبي وكعدوا جهال هدى ع الهوسه والصوت
شلون ليله اليوم شراح يخلصهه!!

قبس.. هاهدى شصاير بشري خوماماتت؟؟
هدى.. لا اخذوهه للمستشفى حاركه نفسهه وملحك عليهه ابوهه ومطفيهه النار بعدهه هستوهه شابه برجليهه..

قبس.. شلون كدرت تجازف بحياتهه هاي روح منو يستاهل حته تاذيهه
هدى.. امهه دكول هي حالتهه النفسيه صار شهرين هيج
حته قبل الولاده وولدت وزادت بحيث يوميه تكعد تبجي للصبح وامهه مكابلتهه

واليوم انضغط عليهه اكثر انفجرت حست نفسهه
خسرانه دائما الضعيف يختار ابسط الحلول ...

فاديه.. شوفي الطفل ماجاي يهدا عبالك مصخن بس يون
هدى.. راح اخذه لغرفه ماما انومه وجهالي نوميهم يمكم وروحي شوفي بيبي خطيه ضغطهه مرتفع

فاديه.. سولفينه عمر شسوه؟؟
هدى.. شسوه ؟؟ حضنهه واخذهه للمستشفى حته سوده عليه حافي ولبس من ابوهه

قبس.. بشار راح ويااا؟؟
هدى.. اي راحوا بسياره ابوهه شلون هبطه وانتي عروس موزين عليج..

قبس.. خلي تطلع سالمه وترجع لابنهه اني راح اصعد لغرفتي امدد تعبانه!!

عفتهن يسولفن وصعدت اخذت ملابس ورحت للحمام سبحت وغسلت الملابس مال بشار وملابسي ومددت بفراشي

تليفونه ع الميز شلون اخابره وكلهه رايحه بدون تليفونات
ظليت اتگلب بفراشي وادعي الله يبعد عني سوء البشر وكيد فرح

اريد اغمض عيني مااكدر لحد الساعه ب٢ وربع
حسيت ع الباب ينفتح بهدوء عباله نايمه
كمت بسرعه وهو فتح الضوه

هااا بشار بشر شلونهه صابرين؟؟
بشار.. مانايمه!! ليش هيج حالتج وجهج اصفر.
قبس.. كلي شلونهه ؟؟

بشار.. زينه منتبهه بس وحده من رجليهه متأذيه وباجر
يغسلولهه
قبس.. كزبر جلدي بسرعه اخاف حيل اخاف من النار
اخاف من الحرك من جنت صغيره بس يهددنه بابا بالسجين اجويكم اظل خالسه ايام مايطلع صوتي ..

حط ايده ع ظهري تعالي حبيبتي مكتوبلنه الهبطات
ليش شفايفج ترجف؟؟

قبس.. مادري خفت حيل هسه تروح!! وخليت راسي ع صدره وهو واكف..
بشار.. خليني اسبح واجي انام لان تعبان
قبس.. موهسه سبحت؟؟
بشار.. مااحب المستشفيات احس نفسي مترب اسبح واجي مددي ارتاحي..

قبس.. ظليت بفراشي اسبح باصابيعي
وادعيلهه تشفه وترجع سالمه
وبشار سبح واجه افتر من الجهه الثانيه شال الغطه ومدد

فتحلي ايده ونمت ع صدره بس خليت راسي غفيت
هذا اماني ووطني لو جنت بعز القلق ولو مگلوبه
الدنيا ع راسي بس اشم عطره ويحضني
وايده تمسد ع شعري اغط بنوم عميق...

ثاني يوم بشار راح للمستشفى وغير الخطار وكالعاده بسمه وبناتهه وبشرى وبتهه ونفس الهوسه وبيت عامر بحيث نسيت نفسي عروس خاله بالمستشفى واني واكفه بالمطبخ..

للظهر يله رجعوا طمنونه عليهه كالو زينه بس رجلهه متاذيه حيل بحيث مصلوخه صلخ حظرت الحمام لبشار سبح وطلع كال عنده شغل..

ايام مرت كلهه اعصابهه مشحونه البيت متكهرب
حته عمر صاير اعصاب وخاله دكول كل هذا ومشبعهه
رزايل شلون هيج سوت لوميته..

صرت مااطيق وجود عمه بسمه ولابناتهه لان بصلافه البنيه
بالمستشفى وهن بوميه يومنه ولاكانما مسويه المصيبه..

عمر يجي بليل لذلك مايشوفهن ليش مابيوم منهن جانن يمنه العصر واحس نفسي راح تگلب من اللواگه مالتهن وبيبي يم بيت عامر ووكعت براسنه لازم نكعد يمهن

صدفه ودخل عمر جان جايب حليب لابنه مخلص وفاديه مخابرته يبجي بدون رضاعه بس فات شاف فرح وعبالك اعصار وثار

بدون سابق انذار ولا حجه هجم على فرح جر من شعرهه هي ماتلبس حجاب كدامهم اني ماتقربت ابد بس فاديه وامه

يجرون بي وعمه بسمه تصيح بس هو طلع حرگته كله بيهه
اول مره اشوف رجال هيج يضرب مو راشديات بوكس ودفرات
لحدماوكعت بالكاع يله عافهه

وهو ع نفس الغلط والسب حرگ عشيرتهه حرگ ورفع اصبعه بتهديد وحجه ويه عمه!!

عمر.. اذا ماتعرفين تربين وماتكدرين لوحده بكد النعال اني اربيهه!!

قسما بلله اذا شفتهه فاتت بيتنه احركهه وهي عايشه
هيج وحده قذره ماتعرف التربيه شنو مااريد تختلط حته باخواتي ولا اتشرف اكول بنت عمتي..

بسمه.. بصياح وهي ادك ع راسهه وفاطمه حاضنه اختهه
انت صدك ماتستحي حاسب نفسك رجال ع بناتي
لوبيك خير روح اكدر لمرتك التكو.... من وراك

الفزه الفزيتهه والصوت الصاح بي عمر جفلت من مكاني
وحسيت كلبي راح يوكف رفع ايده على عمتي وامه صارت بوجهه

وحجه بعصبيه ودنك على فاطمه ضربهه دفره برجله
وجر شعر فرح حيل وهي ماتقاوم من الكتل ..

عمر.. اريد اعلمج منو الرجال !! مدام موبعينج
وواكفه ادافعين عنهه اريد اعلمج انتي وياهه
منو الرجال؟؟

شحطهه شحط وهن يصيحن عبالك عدنه مصيبه وقفل عليهه غرفه عمو وطلع تخبلت عمه بسمه حته تخربطت ووكعت وتصيح بنتي راح يكتلهه!!

مااعرف شسوي صاحت خاله خابرن بشار بسرعه
رجليه ماتساعدني اصعد فوك اجيب تليفوني
ركضت فاديه خابرته وماجاوب دكينه ع عمو ومارد

بهاي اللحظه كل الطرق انسدت وكلهه تعرف عمر مخبل
والمشكله سالفه شرف وعمه خوش ابدال ماتعتذر وكفت بعينه
ودكله انت مورجال ؟؟

فاطمه كاعده بباب الغرفه تحجي ويه اختهه ودكلهه اني اعلمهن الكح... شسوي بيهن والله مااكون بنت ابوي اذا مافرقت العائله

واحنه واكفين نسمع وعبالك انشوف فلم عن القذاره والغيره والمكر اليتمتعن بي بنات عمتي .

ام بشار تحاول تهدي الوضع وماتكدر وبسمه كومي اركضي بدون عبايه وطلعت بشارع وتصيح الا افضحكم

تركض وراهه فاديه وام بشار ومالزمنهه وتصيح اليوم اشهركم اني اعلمكم تسوون ببناتي هيج علمود الكح... قبس..

ظليت لا اخذ ولا انطي شجن خابرت عمه بشرى تجينه
وبشار مايجاوب ردت اصعد بغرفتي ومااسمع كلمه وانغث
بس كلت اني شمسويه فوك ماهي اذتنه ومحد خلص
من شرهه راجعه علينه امهه ماتعرف تربي...

كعدت ع التخم ودنكت راسي ومخليه ايدي ع كصتي
ومااحس غير الجره من دشداشتي وانشك الزيج مالتهه

رفعت راسي فاطمه تعت بيه وتفشر فشار ماينلبس
علي ثوب حته استحي احجي بيني وبين نفسي

حطيت ايدي بصدرهه ودفعتهه حيل رادت تهجم عليه
بعد بس اني وكفت بوجهه وضربتهه راشدي وفاديه تسحب بيهه

قبس.. عمري ماشايفه هيج انحطاط مثلجن لاتربيه ولا اسلوب
شبيجن محتركات غيرتجن كاتلتجن عليمن فهميني
انتي منو داسلج ع طرف

فاطمه.. ام الزلم الساقطه لفيتي ع بشار وتتختلين يمه
وورا ماشبعتي جبرتي ياخذج

تعرفي يحب فرح وانتي فرقتيهم الله ياخذج
بنت سميه بنات ال.... اني اعلمكم واحد واحد

قبس.. امشي لج ماعليه غير فاطمه العرمه وحق الله الزمج
هنا اكسر راسج ولا امج ولا اخوج خاف عبالج قليله شر اني

احترمي نفسج احسن ما اطلعج مدمايه مناا رادت تحجي
وماانطيتهه مجال وشافت فاديه هم حجت بحديه وياهه
ردت كعدت يم الباب وتحجي باختهه

وهذيج تبجي وتحلف اني مالي ذنب
هاي انتم دمرتوني الله ينتقم منكم خلي يجي
امجد الله اخلي يشتكي عليكم..

لعبت نفسنه من نفس الخرط وهالمره المشاكل ماناويه تخلص استغفرت ربي وصعدت لغرفتي..

ياربي معقوله اني هيج كصتي فگر وكل بيت اطبله اهجمه
قبل عزيز رجعته قرن ومن طلگني عزيز تحسن حاله
وهسه بشار بس خليت رجلي ابيتهم خليت المشاكل
مايعرفون منين يتلگوهه..

تعوذت من الشيطان خاف الله يحاسبني على هالحجي
الحمدلله على كل حال

رفعت تليفوني واني مخليه ايدي ع كصتي
وخابرت ع بشار دكتين ورد عليه..

بس كال الووو كتله وينك بشار مو نخابرك من فاديه؟؟
بشار.. هاحبيبتي جان تليفوني بسياره وهسه شفت مكالماتهه وخابرتهه سولفتلي!!

قبس.. بشار تعال الله عليك احس نفسي موتمام
بشار.. ظلي بغرفتج لاتنزلين ابد اني جاي بالطريق ولاتخافين حبيبتي هذني فارغات ومالاكيات منو يأدبهن وعمتي بسمه حسابهه يمي!!

قبس.. سديته من عنده وكعدت اسمع صوت جوه عمه بشرى اجت وام بشار تحجي هجمن بيتي اني بيش مطلوبه يوميه مشكله بسببهن والسان فاطمه شطوله سمعت عمه بشرى صاحت بيهه وسكتت..

كمت رفعت البرده وفتحت الشباك احس نفسي مختنكه اجت عيني ع الشارع شفت بسمه طلعت من بيت ام وائل..

عزا العزاهه هاي عمتي تخبلت عايشه بالحيل والمكر شتريد وين توصل راحت اشتكتنه يمهه حته تشمت بينه ..

عفت الشباك مفتوح ورجعت البرده فتحت باب الغرفه اسمع العياط بين عمه بشرى وبسمه وحته عمه بشرى غلطت ع بسمه وع تربيتهه وبعدهه مصره ادافع للغلط...

اذن الاذان كمت توضيت وصليت سمعت صوت سياره
بشار بالباب جنت محتاجته حيل ماادري شجاني
احس نفسي مذنبه ولومااني بحياتهم ماصارت هاي المشاكل

تاخر جوه يله صعد بس فتح الباب بعده مدنك بيده علاكه يريد يخليهه بالكاع ركضت مثل الطفل تعلكت بركبته

حضني حيل وايده ضاغطه ع خصري
وهو يهمسلي ماكو شي حبيبتي ليش قلقه
بس كلامه جان هادئء حيل حته اني سكتت

نزلنه من ركبته واخذني للجربايه كعد واني بصفه
لازمه ايده وبايده الثانيه يحرك بيهه ع خدي ورفع كذلتي النازله ع وجهي وباسني من ورا اذاني بوسه رقيقه..

حسيت جسمي ارتخى اريد احجي ع الصار سكتت
حاوطني اكثر بايده وهو غامر راسه برگبتي
انسلبت ارادتي ونسيت المشكله
وعشت ويا باحساسه بدون لا كلام يهديني
لمساته وحركاته هي الهدتني...

نايمه ع صدره ورفعت راسي باوعتله وحجيت
بشار شراح يصير ترى والله خايفه ؟؟

بشار... مايصير شي عمر حجيت ويا ومن حقه ينفعل
مهما يكون غلط مرته بس المكيده الدبرتهه هي فرح

اني ابتليت اليوم حجيتله؟؟
شحجيتله؟؟
بشار.. رحت اريد اشوفه بالمستشفى ولكيته يرزل بصابرين
صح يرجعهه بس بعده گلبه ملجوم منهه وهي ساكته!!

اخذته برا وحجيت ويا ماكو انسان مايغلط وهي بعدهه
طايشه احتمال تضوج من قبس !! او احتمال قنعتهه فرح
بس. تبقى مرتك وام ابنك مايصير تسوي هيج

جان يسمعني وساكت وظل يسال ع الرقم عباله باسم صابرين وحلفتله الرقم باسم ساجده وهو هذا الشي المافهمته ؟؟

بس اعتقد اكو تواصل بين فرح وساجده ووائل هذولي
حلقه وصل واحد يدبر للثاني فرح وساجده غايتهم انتي
ووائل ماكدرلي بس راحد يستغلج لان يدري احبج

لذلك الرقم باسم ساجده وعند فرح شلون تواصلت وياهه؟؟
ماكو غير اكو منو يساعدهه وهو وائل بس هذا الاحتمال

ومن سمع عمر هيج عرف حجم الحقاره العد فرح وبعدهه
تفتر بنصنه واليقهر ابوي كل شهر يدز راتب لبسمه
وامجد يشتغل وعنده راتب وتاخذ من ابوي ومادكله ترى خالك جابلنه فلوس

صدفه ابوي بيوم العرس منطي لامجد كايله انطيهن لامك
وسائل ابوي خالي مال شنو هذني؟؟

كايله ابوي هاي اني مخصص راتب لامك كل شهر
وماقابل ياخذهن مرجعهن بيد ابوي وكايله
اني تعينت بالصحه واداوم العصر بمختبر يعني
شايل الايجار والمصرف ولو احتاج اني اجي اكلك!!

وحسب ماسمعت رايح لامه ومتعارك وياهه وبسمه ناكره
الفلوس كايلتله من جنت بالكليه شكم مره دزلنه !!
وهسه تعجبت من دز بيدك هو مايدز كاطع من زمان

تخيلي حته عمتي مره جبيره المفروض تقدم لاخرتهه
وهيج تجذب وتخدع ابنهه

رغم تصرف عمر غلط وحجيت علي ماله حق
يمد ايده عليهه لان تعتبر غريبه ابوهه من غير
عشيره!!

بس انقهر ع رجل صابرين بس العظم والدكتور كاله
ننتظر فد ٥ سنين تسمن ونسويلهه عمليه ترقيع
وهو منا الصبح حاجيله ع الرقم وطب شافهه ماتحمل..

قبس.. اني مانزلت بعد راحوا
بشار.. اي راحوا وامجد اليوم خفر مايدري وكالعاده هم راح تسترهه عمه ولحد سمع ولحد شاف

قبس.. تدري حملوني المسوؤليه وفاطمه حته فشرت عليه
بشار.. سولفتلي فاديه خلي تولي هاهي عمر خلالهن حد
اني خلصت عمري استحي من عمتي ومرات استخطيهه اكول موبيدهه الله انطاهه هيج بنات بس على الدكات مالتهن وحده ازيد من الثانيه هاهي عاشت ايده!!

قبس.. ننزل جوه؟؟
بشار.. لا خليج بحضني ماكو شي جوه هدوء والموضوع انسد حته بشرى راحت وصلهه عمر تلكتني بالباب

قبس.. حبيبي كل مره اريد اسالك ع الدوام شوكت اداوم
بشار.. باجر اول يوم هو اسبوع خلصت اجازتي
قبس.. زين دوامك خومااثرت عليك سالفه السجن؟؟

بشار.. لا الحمدلله زين واحتمال اكو ترقيه بالطريق اذا
الله سهل
قبس... ممممم ان شاء الله حبيبي

زين اني ارجع اداوم لو ابطل؟؟
بشار.. اني برأي تبطلين لان اول شي هي عقد وع ساعه يجي مدير بمكاني ويكول مااحتاجكم
والشي الثاني قبل وافقت اداومين لان تضوجين وخاف دكولين حارمني وحاكمني ومرات تحتاجين فلوس وتستحين اطلبين ردتج تعتمدين ع نفسج

بس هسه ماكو داعي اني وياج واحد اخذي بدون ماتساليني بس فكره الدوام انسيهه
قبس.. ماكو امل؟؟

بشار.. امل تزوجت!!! لاتحجين بلامل احجي لمصلحتج وبعدين اني تعبت ٢٤ ساعه فاتح الكاميرا ع قسمكم واخاف عليج خليني ارتاح حته بيوم الماداوم اظل قلق عليج

قبس.. تراقبني!! شعليه قابل صغيرونه
بشار.. لا انتي موصغيره بس عقلج هلكده وهجوميه بالكلام واخاف واحد موخوش ادامي يوكف بوجهج مثل فلاح العار ويفلت السانج

قبس.. دغيته ابطنه هو يغار منهه بسرعه لزم ايدي!! وصاح
وووولج..

لعد لاتحجي عليه وين تلكه وحده مثلي مطيعه وتحبك وتسمع الكلام!!
بشار.. لا ما الكه شو تعالي وباسني بوسه قويه من شفايفي

قبس.. سؤال اخير؟
بشار.. اليوم لازمتني تحقيق؟؟
قبس.. مو افكر بيهن ومن تجي انسى اسالك شنو سالفه المحكمه والادله..

بشار.. ماكو شي ابو الولد المات سحب الدعوه عني وكال ابني مو اخوش ادمي لان سامر رايح وحاجيله السالفه كلهه والرجال الله ينطي يعرف سوالف ابنه عنده سوابق لذلك كال يستاهل وماقدم بلاغ عن الحادثه..

وسالفه ساجده فادنه حيل التسجيل مال هدى والقاضي تهمهه بالتهديد وهم الرقم الجان يدز رسائل طلع باسمهه هاي هم من ضمن الادله الي بصالحنه

والدليل الاكبر والله ينطي سامر لو شما اسوي ما اجازي
الاخ مومثله يفتر ليل نهار وشكد خسر فلوس حته يعرف
منو الجان وياا وهو الساعدتج وكالج انهزمي !!

وعرفه عن طريق مرت المات ورايحله سامر ومقنعه يشهد
وخايف من ساجده بس سامر مواعده بمبلغ وجاي يشتغل حته يضيف شهاده الولد وان شاء الله خير والقرار لصالحي

وهسه ياحبيبتي الحلوه السابيتني بعيونهه
والي اعشقهن عمري ماحبيت انسان بهالحب
ولافكرت لهدرجه اتعلق بس الج انطي روحي وحالي ومالي
ولاتنزل دمعه من عيونج لو اشوف الخوف بيهن...

قبس.. ياروحي انت اني مااعرف اعبر بس تعال ابوسك
طكهه ضحكه واني ابوس بركبته ...

كام يسبح وطلع يصلي واني سبحت ونزلت جوه حظرت العشا اني ويا تعشينه بالمطبخ وهو طلع شويه ورجع .

مرت الايام عاديه وتقريبا صار اسبوعين ع زواجنه وصابرين طلعت من المستشفى بس تعبانه
صعدت بغرفتهه وحته الاكل نصعده فوك ماتكدر تنزل

بيوم الطبت باستني وبجت وظلت تعتذر مني كتلهه مسامحتج..

وراحت باست شجن وباست خاله من راسهه اعتذرت من الكل ووعدتنه مانسمعلهه صوت والصار درس الهه..

مرات اكول خطيه خلي اروح اساعدهه لان رجلهه ماتكدر تمشي عليهه دكيت الباب عليهه طبيت لكيتهه ترضع بابنهه..

حجيت وياهه شويه وكتلهه محتاجه شي خاف حمام او ملابس بين ماتصيرين زينه!!

صابرين.. لا تسلمين يوميه عمر من يجي هو يغسلي ويغير الضماد وهو ياخذني للحمام والملابس خاله تغسلهن

قبس.. ان شاء الله تكومين بالسلامه غرفتي كدامج بس صيحي اجيج مو اله تنتظرين عمر تشكرت مني وطلعت...

قبطت شهر كامل ع زواجنه وبشار بالدوام نفس قبل ومن يجي بليل ماانزل ونظل سهرانين بحب ويوميه احس بلهفه جديده وحركات احس اليوم حبيته ...

احس بتعب والشهريه ماكو شكيت خاف حامل بس ماحجيت لان بس اسبوع تاخرت كلت يصير عشر ايام واروح احلل...

بيوم منهن مخليه راسي ع صدره ونتابع فلم اجنبي سوه جان يكول اليوم اجاني سامر للشركه

ومتعارك ويه عمامه خطيه صار سنين مايعرفونه وين
اخذ اخته وانهزم وهسه جايين علي لان طالع ورث لابو ومتعاركين ويه سامر يريدون اخته لابن عمهه وسامر ماقابل وكايليله ننهي عليهه ورايح رافع دعوه عليهم وساحلهم بالمحكمه ومعتذرين منه..

بس بعده خايف عليهه خاف من يروح للدوام يجون ياخذوهه لو يخطفوهه وماعرفت شجاوبه من طلب مني

كال بلكي اجيبهه يمكم حته محد يندل مكانهه لان سامر مثل مانكول مكطوع من شجره..

قبس.. خطيه من انت بالسجن سمعت بقصته وخاله دكول اعز اصدقاء بشار
بشار.. اي صحيح جاب عمره يركض ويربي باخته ولسه بدون زواج علمودهه ينتظرهه تكمل السادس يله يرتاح

قبس.. هي ياصف؟
بشار.. سادس علمي السنه تمتحن وكال ازوجهه بس تنجح وتكمل دراستهه حته مايخاف عليهه بعد

قبس.. حجيت لخاله؟
بشار.. اي حجيتلهه وامي تعرفهه لان اول ماشردو جانت طفله بالروضه واجو يمنه شهر ..

قبس.. شكو بيهه تكعد يم البنات بين مايدبر روحه
بشار.. اي جاي يدور ع بيت يريد ينتقل لغير مكان حته مايندلو...

ظلينه نسولف بمواضيع عامه لحدما نعست
ظل هو يتابع الفلم ويلعب بشعري بسرعه غفيت..

ثاني يوم الصبح هو مايكعدني ابد يعوفني نايمه
شكد الح علي اسويله ريوك يكول لا تخرب نومتج

مرات يتريك ويروح ومرات مستعجل يتريك
بالدوام..

الساعه تقريبا ب١٠ وصابرين نزلناهه يمنه وكلنه كاعدين بالمطبخ وخاله تطبخ باميا اندك الباب راحت خاله فتحته وشويه واجت تصيح تفضلي يوم ...

طبت بنيه مانكول ناعمه زينه جمالهه عادي بس بيضه حيل وعينهه بيهن لون خفيف ومستحيه كالت السلام عليكم وظلت واكفه

احنه ردينه السلام كالت خاله هاي اخت سامر صديق بشار خطار لان اخوهه مو بالبيت...

رحبنه بيهه وكعدت مدنكه استلمتهه فاديه تسال بيهه
وهي ع كد السؤال تحجي وخاله عرفتهه علينه

من وصل السره الي رفعت راسهه بعلامات استفهام وكالت انتي قبس!!!!

يتبببببع.... احبكم