رواية قمع المشاعر الفصل السادس وأربعون 46 - بقلم Rozaya1122

قمع المشاعر.... الثاني والاربعون
للكاتبة زهراء ( روزايه)...

قبس.. اشرلي بشار مااطلع هو كعد نص كعده وصاح منووووو؟؟ اجانه صوتهه اني فرررح بس تحجيهه وهي تجر باسمهه

بشار.. هسه شويه وننزل
فرح.. اوك خالو يكول اجه خطار خلي يجي

اسمع خطواتهه ابتعدت من الباب واني لبست الروب ورجعت كعدت ع الجربايه وبشار رجع ذب نفسه ع المخده

قبس.. يله كوم هم يله لان تاخرنه الساعه ب١١
بشار.. تعبان والله صارلي بحدود ٣ اشهر نومتي مخربطه وتعال شراح يخلصهه ويه خطار ابوي

قبس.. كوم حبيبي اسبح وانزل للخطار
واني وراك ارتب الغرفه وانزل احنه نايمين متأخرين

كام من فراشه واني اخذتله ملابس والخاولي ورحت خليتهم بالحمام هو اول ماكام اخذله جكاره يدخن بين ماجهزت الحمام..

سبح وبدل ونزل واني هم سبحت ولفيت شعري وخليت مكياج خفيف ونزلت بيني وبين نفسي انزل ع الدرج واكول هي فرح شعدهه جايه هيج قويه وتكدر تشوفه وين تريد توصل هاي البنيه..

ماكو غريب بس عماتي والخطار جماعه عمو عادل
وبشار يمهم بلاستقبال تقريبا الغده كامل
مااحس نفسي خجلانه ولاغريبه لان عشت بنصهم
عادي اشتغلت وشي طبيعي بس كلما التفت اشوف
نظره بعين فرح متروسه غل وحقد

مااهتميت الهه وصبينه الغده واجه عمر وامجد
شالو عمر ماشايفته من يوم الحنه سلم عليه وباركلي..

احنه هم تغدينه لا انتظرت بشار ولا سوالف العرسان لان ادري بي راح يظل خطار يجر خطار لليل..

ورا الغده رحت بغرفه البنات غرفتنه سابقا حوراء وفاديه وشجن كاعدات بنات بسمه بغرفه بيبي ع سالفه ع ضحكه ماحسيت بالوقت شلون مر

باوعت للساعه ب٣ كلت اصعد لغرفتي ارتاح ويه طلعتي طب بشار بس شافني ابتسم محد اكو بالصاله بس الجهال تلعب خله ايده ورا ظهري وصعدنه لغرفتنه..

بس طبينه حضني ومخلي راسه برگبتي يبوس بيهه
واني ادغدغ منه كلساع اكش من لحيته واضحك..

لحدماوصلنه للجربايه ادري بي تعبان واكفين ولازمته من قميصه العب بالدكم مالاته وهو محاوطني من خصري..

سالته تغديت حبيبي؟؟
اي الحمدلله سالت امي عليج كالت تغدت ويه البنات
لعد ليش مانمتي الظهر شعندج جوه؟؟

قبس.. مانمت التهيت بالسوالف ويه البنات تنام انت شويه ؟؟
بشار.. تريدين تخلصين مني ؟؟

قبس.. حجيت بدلع شلون اخلص منك واني اريدك
وياي بكل لحظه بس انت تعبان وماشابع نوم
بشار.. مممم ام اللسان بيج بخت تعبان لان احس راسي راح ينفجر

قبس.. ناملك فد ساعه واكعدك
بشار.. لاتكعديني منا للعشا اذا مااجه خطار
قبس.. ماشي.. بوسته من خده وهو بدل ونام واني هم بدلت غير لبس ونزلت جوه

جنت كاعده بالهول كلساع تجي وحده خطار بس مدري
ليش عيني تراقب فاطمه الموبايل ماوكع من ايدهه
بس تراسل وكل ماتراسل تباوع لشجن بشماته او حقد هيج شي

شجن جانت ملتهيه ويه ابن هدى يرسمون بدفتر الرسم
وحته موبالهه ولامنتبهه بس هاي الحيه فاطمه مدري شعدهه ..

ام بشار.. اكول يمه قبس صديقاتج سناء وعاليه ليش مااجن شنو ماعزمتيهن؟؟
قبس.. لا عزمتهم بس سناء متكدر تطلع من اخوهه وابنه عمره اشهر دكول وين اخلي وعاليه ماتجي الا ويه سناء ماتندل كالن ورا العرس يجن..

بسمه.. وانتي راح تظلين اداومين لو تبطلين؟؟
قبس.. اني من دخول بشار للسجن مامداومه بس مااعرف بعد اشوفه شيكول واذا قبل اداوم

بسمه.. شعندج مداومه اكعدي وانتبهي ع بيتج ورجلج
قبس.. الله كريم ماظليت اخذ وياهه بالحجي لان تنرفزني..

بس هي البيهه مايخليهه شكد جنت احبهه واكول خطيه عمه الله رزقهه بهيج خلفه موخوش طلعت هي اساس الخراب..

كل هذا وماسكتت شويه وجان دكول اكلج داده ام بشار ليش هيج مقاطعه بيت اخوج خطيه وهم يحبوج؟؟

ام بشار.. بسمه تعرفين السالفه ماكو داعي نحجي بيهه
ابن اخوي اني ربيته وهيج سوه بينه مااريد هالخوه

بسمه.. هو شسوه؟ غير من حرصه ع شجن نبهكم قابل يكرهه
ام بشار.. شنو نبهنه بنتي شمسويه وينبهني اصلا هو تهمهه بسمع تعرفيهه وتحرفيهه مو الرسائل جانت بين وائل وبنتج وشمرتو التهمه براس بنتي

بسمه.. لا لا انتي ماتعرفين شي وهسه خلينه ساكتين احسن لاينزل بشار يدافع عن المسعده

بس اني اكول ماتسوه خراب وهم يريدون يجون يرضوكم ويكول عمتي احبهه

ام بشار.. غيث ويه الولد وصديقهم ويحبو بس وائل وامه ابد مابريهم الذمه ع لوعه بنتي واتهامه الهه

بسمه.. هو غيث حباب ويخاف الله شلون شاب والله حرامات تاخذه الغربه هيج فاديه عافته شبي بيت وسياره ومتعين

فاديه.. اكلج عمه موصايره هوايه تمدحين بيهم وعلاقتج قويه بيهم تعالي من الاخير تريد دكولين ليش ماانطي وحده من البنات؟؟

بسمه... عمة عينج وين كلت هيج غير جاي نسولف
فاديه.. اني هم دااسولف عمه الامانه لله غيث خوش ولد واني عفته بارادتي لان مااحب اهله وماتفاهمنه ابد

بسمه.. هو شكول يعمه لو علاقتكم زينه بيهم ماجان انطيته فطومه لان الله يستر علي كامل مكمل

فاديه.. الكمال لله عمه بسمه!! الله كال الطيبيون لطيبات والخبيثون للخبيثات ويجوز فاطمه يصيرلهه نصيب وتكسب سليمه خاله الهه ووائل حماهه بيت خالي يخبلون

قبس.. مااعرف فاديه تمدح لوتذم لو تبسمر بيهن وهن مكيفات بس اني حاصره ضحكتي حته شجن مدنكه راسهه وتضحك تسوي نفسهه تلون بالرسمه

وبسمه مابطلت مدح بيهم بس عوزهه دكول تعالو اخذوهه بملابسهه وفاطمه مبتسمه بخجل والله يالله هي توالم هاي العائله..

تغير الموضوع وتحول لصابرين وحده دكول خطيه وحده دكول تستاهل ام بشارماقابله ع عمر ودكول خطيه

وهدى وفاديه يكولون هي لو ماالله ستر جان قبس اطلكت وتفركشت علاقتهم

بشرى.. البارحه خابرتني امهه ورحتلهه بدون محد يدري
والله انكسر گلبي عليهه صايره جلد ع عظم وبس تبجي
دكول ماريد اخسر بيتي غلطت احجو علي خلي يسامحني

هدى.. وين جان عقلهه من مشت بحجي فرح
فرح.. شدخلني اني!! اصلا انتي فبركتي كلشي حته تذبيهه براسي بس الله بالمرصاد

هدى.. كدام امج اكلج من اشوفج نفسي تلعب من عندج
تعرفيني شلون جنت صديقتج
بس هيج تصرفات وانحطاط وصلتي اله
والله العظيم اشمئز من عندج

بعيني اشوفج تصعدين لغرفتهه وباذني سمعتج
والكل سمع كلامج وبعدج تكذبين وفوكاهه بعين وقح

بسمه.. شنو هالحجي هدى ا.....
هدى.. قاطعتهه خلي اكمل كلامي حته تعرفين
بنتج من يانوع

اسمعي فرح اذا ادخلين لبيت فهو لخاطر امج
ولومابيبي وجدو موجودين اني احط ايدي بايدج واطردج

وياريت لو ذره كرامه وذره اخلاق تلتزمين بيهن
لان راح تخسرين الاول وتالي مثل مابسببج
تهدمت عائله عمر صدكي طول عمرج تظلين تعانين
لان وحده مريضه حقوده الغيره كاتلتج

ام بشار.. كافي هدى سدو الموضوع
هدى.. هو هم كافي اصلا مااريد اكعد واشوف خلقتهه كدامي

كامت هدى للغرفه وعمه بسمه انهدت بواجي وعتب
واني لان ماعندي احد كل اليجي يشمر عليه حجي
بنتي مسكينه والماتخاف من الله خلتكم تحقدون علينه

هي منو الماتخاف من الله قصدهه اني!! بس ظليت ساكته ماحجيت ابد شحجي اذا گابله وافكس عينه مثل اليكول ذبت سمهه كله واخذت بناتهه وطلعت

جانت عمه بشرى طابكه المخده ونايمه صفح
وبس تتفرج من طلعت بسمه تحجي ويانه وهي نايمه

بشرى.. يمه ماتحجين شو بسمه صايره جنهه بهيمه
لاتعرف تأدب بناتهه ولاتكف لسانهه

الحجيه.. تعبت واني احجي صغيرونه بسمه
والله لوماخاف من الله احرمهه من طبت البيت

ذيج الايام حطتني وتزن براسي واني اصدك من كون خفه هالشكل مره شكبراتني حاجه بيت الله واسوي خطط وياهن وشلون اقنع بشار ع فرح

فاديه.. بيبي حسيت بيج هذيج الايام موطبيعيه
الحجيه.. ولج غير رحت لبشار كتله يمه اتزوج قبس واخطب فرح خطيه تحبك

بشرى.. استفاد اذا امي تخطط
الحجيه.. كالي والله لوماحجيه جان عرفت شجاوبج والحجي هجني هجه زينه يله كعدت

بشرى.. صدك تحجين يمه؟؟
الحجيه.. غير انقهرت عليهه ولجن هي من تجي تسوي نفسهه مامهتمه بس ابيتهم اكابلهه وابجي

لاتاكل ولاتشرب وبس تبجي وامهه تسكت بيهه
تصيح اخذه اخذه تحبه من صغره شتسوي

فاديه.. والله كاعدات وتناقشن والعروس كاعده شنو شعورج عروستنه

قبس.. مامصدومه لان اعرفهه صدك هيج حالتهه وماادري وين تريد توصل عبالك الحب بالغصب حبيتك لازم تحبني...

شنو من نفسيات ياربي الانسان بدون كرامه
شنو قيمته زين هذا الجذب والنفاق وين يوصل
لكلشي حد ولكل طريق نهايه
وخاصه طرق الحيل والكذب لازم يجي
يوم وتوكع بشر اعمالهه مابيدي
غير اتحسب عليهه ..

صار المغرب صعدت كعدت بشار جان شابع نوم حته منتعش بوسط الدلع والبوسات نزلنه تعشينه بعد ماصلينه وكالو اجو خطار طلع هو واحنه وحدنه

جنت كاعده ويه شجن تسولفلي ع نيشان حوراء لان عرسهه عن قريب وطب عمر يصيح يمه !!

ردت علي ام بشار تعال يمه محد اكو !! فات للهول
شايل ابنه بيده والممه كلهه كمزت فاديه ركضت اخذته من عنده وتبوس بي

واني وياهه ماشاء الله يخبل دبدوب بس
اسمر البشره جان نايم وكلساع يعكمش عيونه

كعد عمر ع التخم وشرب مي وارتجى سالته امه شنو هاي عمر وين امه لوجبته نشوفه؟؟

عمر .. لا ابني ومصيره الي جنت ملتهي ويه بشار
هسه فرغت راح اطلك وعلاوي يعيش يمي مالهه ابن عندي!!

ضربت ع صدرهه امه تحجي صدك؟؟
امه هاي ولك عمر امه روحهه معلقه بهذا
الطفل تريد تعاقبهه اكتلهه كسرهن بس
لاتحرمهه من ضناهه

عمر.. مافكرت من جانت حامل بي شنو ذنبه؟
وعنده هيج ام

اسمعي يمه اي كلمه ماريد واذا ظليتوا تحجون
براسي اخذه واجر بيت واطلع صابرين ماترجع
ولا انطيهه الولد خليهه تفيدهه سوالفهه

ام بشار.. ماارضى عليك والله وروح ابويه
ياعمر اغضب عليك ولا اعرفك ولاتعرفني
ماتحرمهه من ابنهه والطفل ع صدرهه شلون
انطاك كلبك تأذيهه وانت تحبهه؟؟

عمر..وهي شلون انطاهه گلبهه تسحب من فراشي
وتخابر ولد غريب بسبيل تهدم حياة اخوي الوحيد

خلينه نحجي بالمعقول لو بشار مصدك وكلنه
نعرفه شلون شكاك منو الخسران؟ موقبس جان
هسه دكوم وتكعد تدعي ع الكان السبب

ضحكت عليهه فرحت هي ضحكت على
فرح المهم صابرين ماتستحق تكون زوجه

قبس.. جان طول مايحجي والجكاره بيده
ويحجي بحرگه والدخان تارس الهول

والطفل اخذته فاديه نومته بالغرفه
ردت احجي واكله اني مسامحتهه وغلطت
رجعهه لخاطر ابنهه بس ماكدرت احجي
مبين عصبي حيل..

تقريبا مرت نص ساعه هوصعد لغرفته وام بشار
ادك وتنوح وتلوم بهدى ليش كالتله
الضحيه الطفل المسكين يتربى بدون ام

همزين محد اكو حته عمه بشرى راحت
بس احنه لوهنا بسمه جان تشمتن بيهه
كل مره وكالت يخطبون الغربه المايعرفون
شي عنهن ويعوفون بناتي مثل الورد

جنت كاعده اهدي بخاله ومانحس
غير باب المطبخ
يندك حيل ركضت فاديه
فتحته وصوت ام صابرين تصيح راح تموتين يمه ع كيفج

صدمني المنظر ويجوز اني لان ماصرت ام
بعدني مااعرف شعورهه
مثل الطفل الضاعت حاجته هيج حالتهه

تفرفح وكاعده يم رجلين خاله تتوسل
بيهه رجعولي ابني ابوس اديكم لاتحرموني منه
اكتلوني موتوني ولاتحرموني منه

امهه تجر بيهه بس مره جبيره تعبانه وكفت ع جهه وتبجي ع بجيهه ام تحس بمعاناة ام وشلون اذا الام المتعذبه هي بتهه

دنكت عليهه خاله وحضنتهه وتبجي وياهه
لان خاله وعمو ماعدهم سلطه ع ولدهم
البراسهم يسوو ومايهتمون لكلام اهلهم

كعدت وياهه بالكاع وخلتهه ترتجي ع التخم
عشت الاحساس واللوعه وياهه وبجيت
شكد متأذيه

صابرين زغيره هسه يله عمرهه ٢٠ سنه
وجانت ليل نهار مبدله ومرتبه وحليوه جمالهه عادي
بس هسه وحده عمرهه ٤٠ سنه

حته صايره سمره وبعدهه اثار الولاده واضحه
عليهه وصدرهه يدر حليب وتتوسل بخاله وبالحجيه
كلوله خلي يرجعه والله مااتزوج للموت بس لايعاقبني بابني

ظلن يحجن ويه امهه وخاله تمسح ع راسهه
التفتت عليه بدموع كالت قبس سامحيني
والله غلطت اني بشر ياناس غلطت ارحموني

احجي وياا خلي بشار يحاجي انتي هم تصيرين
ام تقبلين يحرموج من عنده؟؟
والله غلطت فرح ورطتني هي زرعت الكره بداخلي
والله جنت خايفه وكالت بس مره

الله عليج قبس اصيرلج خدامه بس لاتاخذون ابني
هاج شوفي صدري يدر حليب وهو ماياخذ ممه بس ع صدري لاتعذبو بسببي هو شنو ذنبه

قبس.. قهرتني واني دموعي تنزل وياهه كعدت بصفهه
كتلهه كولي يالله بس هدي حالج لازم اكو حل

الحجيه.. يمه صابرين موزين عليج الحركه وانتي
ترضعين وهستوج طلعتي الاربعين
كلنه ماقابلين علي لاتخافين..

كاعدين نهدي بيهه والطفل فوك نخاف نجيبه
وهي بس تبجي شويه وجان انشوف عمر نزل
هي بس شافته كامت تركض لزمت اديه ع الدرج

شكد حلفته وشكد توسلت بي بس هيج
گلب قاسي عنده فضيع
عيونه دكول شي وتصرفاته شي

عيونه تريد تحضنهه وبطبطب ع ظهرهه
بس تصرفاته شي ثاني وهو يبعدهه ويكلهه
مالج يمي لا ولد ولا عشره روحي شوفي حياتج..

عافهه وطلع!! واخذتهه امهه تسحل بيهه
شكد انقهرت عليهه وع ابنهه ياترى يحس
بلوعه امه وحرگتهه

ام بشار.. ياربي حته بفرحتنه مانتهنى هسه هاي
المسكينه شيصبرهه والطفل ماصار عمره شهرين

الحجيه.. هم هذوله ولدج راسهم يابس
وگلوبهم جلده!!

ام بشار.. هسه سبحانه المايغلط اعرف تصرفاتهه رعنه
وشكد اذت شجن وعيرتهه برجلهه
ونسمع ونسكت ومانوصل لعمر
لان بعرسه شفتن شسوه!!

وكتله الف مره قبل لا اخطبهه ولك ماتوالمك
هي بعدهه صغيره وطايشه
وتصرفاتهه مال مراهقه
وهو يكلي ماعليج عود تتربى يمي من جديد

كومي قبس اصعدي لغرفتج خوش
مكتوبلج بايام عرسج بس القهر
واني يجي عادل واحجيله
امشي فاديه نزلي الطفل يمي..

قبس.. صعدت للغرفه بدلت وكلبي صاير نار عليهه
خطيه شنو ذنبهه مسكينه غلطت بس شلون قساوه شايلهه!!

اجه بشار ومثل كل ليله يغمرني بحنانه
حس عليه وهو يبوس بيه رفع نفسه
ومدد بصفي وسالني صاير شي!؟

يمكن حس عليه لان منظرهه مافارقني ابد
خله ايده جوه راسه واندار عليه وهو يرفع خصلات
شعري برقه ويسالني شصاير حبيبتي؟؟

بديت احجيله والظاهر عنده علم بس
ماتوقعني ضايجه علمودهه!!

بشار... عبالي شو شبيج وكرصني من خدي
لاتخافين عمر يحب صابرين بس كرصة اذن الهه

قبس.. ياكرصه اذن انت ماشفتهن شلون فرفحت
شنو ذنب الطفل

بشار.. ذنبه امه غبيه خلي يأدبهه حته ماتغلط بعد
قبس.. والله گلوبكم قاسيه فوكاهه يكول يحبهه
ماانقهر عليهه من شافهه هيج متلوعه؟؟

بشار.. وشمدريج ما انقهر بس صدكي مايطلكهه
عمر يدري بيهه زعطوطه ينضحك عليهه لذلك خلي
يلقنهه درس

وهسه اني شنو ذنبي عريس اكعد احل مشاكل
اخوي وفوكاهن مرته داكه الدكه وياي!!

قبس.. مو اخذت حقك بعد شكو خلينه نسولف
بشار.. وينه حقي ماعجبني لان حسيتج متوتره
قبس.. اني نعست!!
بشار.. منو معلمج هاي الدروب؟؟

قبس.. ضحكت بصوت وبسرعه لمني بحضنه بس هالمره
بادلته بكل لهفتي كل احساس اعيشه ويا
وعبالك انولد جديد وكل حركه من عنده
تخليني اعرف مدى حبه واشتياقه الي...

ذبيت نفسي تعبانه واني اباوع ع السكف وهو بالحمام
هوايه اسئله اريد اكعد واحاجي بيهن

اولهن سالفه ساجده والحكم شلون؟
ولازم تنحل سالفه عمر؟
وسالفه دوامي؟؟

نفضت الافكار من راسي وكمت لبست ملابسي
ورتبت الجربايه وهو طلع من الحمام بس اسمعه
يحجي ويه عمو عادل ..

جنت فاتحه الكنتور احظر بملابسي اريد اسبح
وسمعت صوت خاله وهي تصيح عمرررررر الحك!!

ماكدرت انزل لان لابسه قصيره بس سمعت خطوات
الركض ع الدرج ماادري شسوي ركضت ع البرده فتحتهه شويه لان صار الصوت برا

شفت عمر يركض ع بيت اهل صابرين والصياح يمهم
احس حيلي انهد وكلبي يدك سريع

مادري شلون لبست طويل ونزلت اركض تلكتني فاديه حاضنه الطفل وتسكت بي وتبجي ويه بواجيه

بس شافتني كالت ولج قبس كلهم راحو يكولون
صابرين حارگه نفسهه !!!

يتبببببع...... متابعه ممتعه

بنات انطو لايك للبيج مالتي لان بديت انشر بي قبل الواتباد هوايه بنات ميطلع عدهم البارت والي دكول مجاني هذا البيج بس ابحثوا عنه يطلعلكم
اعرفكم ماتفشلوني رفعوليا بالتعليقات الرابط مالته مخليته ع المنصه ... احبكم