رواية قمع المشاعر الفصل الحادي عشر 11 - بقلم Rozaya1122

قمع المشاعر.... البارت الثاني عشر..
للكاتبة زهراء ( روزايه)....

قبس..ما اتحملت بس طلعت كتله هاي البليده اسمهه فرح هي هاي حبيبتك؟؟؟؟؟؟
بشار... رفع راسه عليه بنظره مدري شلونهه حسسني سابه العنب الاسود كال منيلج هالحجي شنو حبيبتك مو كتلج بنت عمتج...

قبس.. هااا اعتذر بس عبالي تحبهه لان مره سمعتك تحجي وياهه اعنذر..
بشار.. وليش تخلين نفسج بمواقف بايخه وبعدين تعتذرين ؟؟

لو السانج موالج وافرضي مثل مادكولين ليش هيج عصبيه وضايجه حجه هيج ورفعلي طرف حاجبه بنظره مكر ..

قبس.. كتلك اعتذر سوء فهم ممكن تشوف البيانات استاذ؟؟
بشار.. شفتهم روحي انتي واني اصححهم وادزهن وراج..

قبس... فشلني كل كلمه يردهه عليه باكبر عفت السجل يمه واريد اطلع وصلت للباب حجيت بيني وبين نفسي كلت شايف نفسه بس بصوت اقرب للهمس ..

وما احس غير صوته وهو يكلي وتاليتهه ويه السانج اني حارك دمي يوميه ليش ما افصلج من الوظيفه واخلص ولااذن التسمع ولاعين التشوف...

قبس.. بسرعه كتلك موعليك من رخصتك استاذ وطلعت وسديت الباب اني ليش هيج صايره جنت محترمه نفسي باي عمل اشتغله هسه شبيه لو لان ابن عمي لوشنو فلمي ؟؟؟

رجعت ع شغلي ورا شويه اجت السكرتيره جابت البيانات وكمت ادخل بيهم بالحاسبه جنت مندمجه بالشغل واجتني ريحه الاكل كباب عروك وطماطه وريحه الصمون الحار ...

قبس.. سناء تشتمين الاكل لوبس اني منو هذا الجايب اكل؟؟
سناء.. خشم لو قاطره شبسرعه شميتي الاكل وهو بعده برا ..
قبس.. ليش هيج ريحه اكو واحد يكدر مايشمهه اصلا تخلي الواحد من وحده يشبع ..

سناء.. دكومي عوفي البيدج وتعالي عاليه جايبه وياهه راحت تحمي يم ام حسن ... كمت من المكتب وكعدنه كلنه يم مكتب نضال واجت عاليه جايبه حافظات الاكل جنت حيل جوعانه والله جابه بوقته...

ناكل ونضحك وسوالف سناء تخلي الواحد حته اداب الطعام ينساهه...

سناء.. ولجن خلص العمر ومااشتمينه ريحه الرجال شسويت ياربي وهيج حرمتنه ...

عاليه... غير اشبع قهر واني يوميه معزومه ع حنه وعرس هذني الذاك اليوم صارن ومن حركه كلبي اكل لامي ما اروح وهي دكلس هسه يكولون غيرانه ..

سناء.. ذاك اليوم بنت اخوي عرست عمرهه ٢٢ اخذتلهه هديه ورحت اباركلهه جان تسلم عليه ودكلي عمه يوم الالج ولو فات القطار وتضحك بيومهه شكد انقهرت كلت لامي امشي يوم نرجع لا احط ع نفسي نفط واحركهه هاي الجنت حايره بيهه وماخليت شي ما اشتريته الهه تالي تعيرني...

دخل يجي المشعول الا اكله وين جنت داده طول هالسنين موحته بيضاتي خلصن خلي الحكلي ع طفل طفلين...

قبس.. من كالت هيج ما اتحملت بسرعه ضحكت وهن يضحكن وسناء تحشش ع هاي السوالف واني ميته ضحك وصوتي جهوري بسرعه يبين حتلو اهمس همس ينسمع...

فاتت السكرتيره كالت يابنات المدير والمعاون جاي يفترون ع الشركه بسرعه لمينه الاكل وكعدنه كل وحده على شغلهه...

شويه وفاتو هو واستاذ محمد وواحد ما اعرفه مثل المسوؤل جانو يحجون ويه سناء بخصوص الشغل واحنه واكفين بس ساكتين كل غلط يوكع براس سناء..

هذا الضيف الجديد يطلع عمره ب٥٠ من هذوله المعتنين بنفسهم صابغين اللحيه والشوارب ومشط فد ٥ شعرات عنده والباقي اصلع ...

جان يكول اعرفكم واشيد بشغلكم ست سناء وعاليه ونضال بس الجديده ماتعرفت عليهه...

نبزت من يني واريد اكله اني موظفه جديده واسمي هيج !! بس بشار قاطعه كاله موجديده وعدنه موظفين هوايه يتنقلون بين الصباحي والمسائي ومد ايده يدلي بي الطريق وكاله تفضل استاذ نكمل باقي الشركه...

بس من طلع باوعلي بنظره حاده وكانو يكلي اني اعلمج اني شمسويه حته ماحجيت واكفه وساكته...

خربو علينه الكعده ورجعت لشغلي فد جره لحد ماصار موعد انتهاء الدوام كمت اخذت جنطتي وطلعت بس بالباب اتلكاني هم طالع بس ماشافني جان مندمج ويه التليفون ....

بالسياره واندب بروحي هم راح ارجع لعزيز وخبالاته والكه البيت مضروبه بي عبوه ...

شجن... ايام بطيئه تمر عليه واني حابسه نفسي بالغرفه رغم اهلي شكد حاولو يطلعوني وياخذوني لاماكن بس ما اريد اشوف اي بشر حته الطبيب كمت ما اروح واستسلمت للامر الواقع وكعدت وسكتت...

مرات تجي هدى واتونس ع جهالهه لو خبالات فاديه ورسائل وغزل غيث هيج يخلص اليوم ...

بيوم جنت احجي ويه غيث وكال بعدماكو عذر باجر ادز اهلي يخطبوج..

شجن.. غيث انت متاكد ترى اني بتك رجل تتحمل كل عمرك وياي موباجر تعذبني وتصيح اريد مره كامله وتزوج عليه وتكسرني كسرتين..

... شجن تعبت واني اعيد واصقل براسج يابنت الناس اني احبج اني حبيتج مو ع شكلج ولا بيوم باوعت لجسمج اني حبيتج حب فطره وهالشي موبكيفي حته اجي هسه الغي حبج والله شنو رجلج معاقه ...

هاي الافكار السوده تلغيهه نهائيا عبالج كاعد اني اكو دكتور بتركيا يسوي عمليه ويخليلج مساند وتكدرين تمشين ببطء بس احسن من ماكو بس شويه مكلفه بس خلي اخطبج حته اكدر اجي اشوفج واكعد واياج والباقي سهل...

شجن.. طلعت من عندي الكلمه لا ارادي وكتله وائل اخوك شلون؟؟
... شبي وائل ترى اني من اجيت لدنيا ماعندي اب رباني وائل موبس اخوي هو ابوي وصديقي وينتظر يوم عن يوم يفرح بيه ..

شجن.. انت كتله اني اريد شجن جنت احجي والالم يعصر بكلبي...

غيث.. يدري بيه احب وناوي اخطب ودائما يسالني منو هي؟؟ بس ماكتله شجن لان ادري بوائل مايضم على امي وامي خاف تحجيهه كدام احد وتسببلج مشكله لذلك ماكتله بس اليوم راح افتح الموضوع وياهم وباجر يجون..

شجن.. ردت اكله وائل ماراح يقبل بس ماحجيت ردت اقنع نفسي حتلو جذب وماردت اخرب فرحته...

سديت التليفون من عنده ورحت اصلي وادعي ياربي راضيه بكلشي. هاي حالتي بس لاتنكسر خواطرنه واجمعنه على حبك..

ثاني يوم عيني على الباب كلما يندك اكول راح يجون كلما اسمع صوت اكول هاي امه بس للاسف لحد ما غمضت عيني الساعه ب١١ بليل وماكو اي وعد من الواعدني بيهم واتصل علي يطلعلي مغلق...

ثاني يوم كعدت محمله هموم الدنيا وين كلامه غيث وليش ما اجه وحته مابررلي برساله..

ساعه ب١٠ تقريبا واسمع الباب يندك راحت فاديه فتحتهه كالت ام وائل مدري ليش فرحت وعذرتهم بكلبي كلت يجوز صار عدهن شغل..

لبست تراك جديد وسويت شعري ذيل حصان وطلعت امشي ع العكازات وكل فرحه وامل بان غيث وفه بوعده ...

سلمت عليهه ردت السلام من ورا خشمهه وحته ماما انتبهت عليهه ظلت كاعده بحدود الساعه ومافتحت اي موضوع ولابينت شي وكامت كالت اني اترخص مرت وائل وحدهه بالبيت ...

طلعت واني احس بخيبه امل موطبيعيه ماما تواسيني عبالهه ضجت لان سلمت عليه هيج ماتدري عليمن رحت للغرفه اخذت التليفون اريد ادك ع غيث..

بعدني اكتب رساله جان يتصل بسرعه سديت الباب وفتحت خط بس كتله الو كال ها حبيبتي شلونج..
شجن.. وينك غيث البارحه شكد دكيت عليك مغلق ..
غيث.. هسه عوفج من عندي امي جانت يمكم خوماحاجتج شي..
... لا ماحاجتني بس وجهه ثكيل وحته كوه ردت السلام عليه شصاير غيث..
.. اخذ نفس واسمع طكه الجداحه وكال اااوووف ياشجن اي كلمه تنكال لاتسمعيهه وبالذات من امي لاتنطين مجال واحد يعبي افكار موحلوه براسج ابد ياشجن اسمعي الكلام من عندي وبس..

شجن..خوفتني غيث احجي شصاير ماقبلو غ الخطوبه موو؟؟
...  يقبلون يقبلون غصبا عنهم بس ما اريد توصل لاهلج انتي الج الصافي بس ديربالي ع نفسج واني اعتذر خاف زرعت فرحه بداخلج وخذلتهه...

... ما اعرف شيقصد بس جان بين كل كلمه يجر نفس ماردت اضغط علي لذلك سكتت وادري بي ماراح يحجي واصلا اعرف شبي اكيد وائل ماقبل ماجنت خايفه خاف يعرف غيث لان ماعندي شي اخسره وادري بوائل مايحجي ...

للعصر واني روحي ذايبه حته ماتغديت بس اريد اعرف شصاير الله جاب بنت وائل صغيره اجتنه وكتلهه روحي كلي لامج شجن تريدهه بس بدون ماتدري بيبي...

صدك ورا ربع ساعه اجت ساره حبابه بشكل حرامات هاي الانسانه تنغدر من هيج واحد وضيع كعدت يمي بالغرفه بحجه جايه تشوف شجن...

شجن.. ساره بروح خالتي احجي شصاير بعائلتكم ادري ماتدرين بس راح اكلج شي اني وغيث واحد يحب الثاني بس امانه لاتحجين لوائل...

ساره.. سوده عليه شجونه ادعي ع وائل اخاف الله يعاقبني هاج شوفي طلعت زندهه ازرك من الكتل ولج محد حاس بيه تعبت والله امي راحت وعافتني واخواتي مستقرات واني بيد وائل الله لاينطي وبجت..

شجن.. غير افتهم شبي شعنده وياج شو تحملتي المر من عنده..
ساره.. اول البارحه بليل جنت اغسل مواعين واسمع غيث يحجي بطاري خطوبه وبعده خطيه ماكايل منو بس كالهم اريد تروحون تخطبون الي احبهه ووائل كام يصيح الي ابالك تحلم تصيرلك ..

اني ياشجن ما ادري انتي طلعت ع صوتهم وغيث عصب بسرعه وكاله صح انت اخوي الجبير ومعتبرك ابوي بس لاتنسه نفسك وتروح زايد مامحتاج اخذ موافقتك باي شي بس من باب الاحترام لاغير ..

وهذا وائل تخبل زنك غيث من ركبته وخالتي تصيح وهو يكله اكتلك بس تعاندني لوتموت ما اخطبلك شجن لوتظل بس هي ..

غيث.. لاول مره راح اتمادى عليك واكلك غصبا عنك وعن عشيرتك اخطبهه جان استحيت وقدرت عمرك من تدري بيهه كلش زين شنو من بنيه وتربت بنصنه واكف ترفضهه ودكلي ماتصيرلك مره ...

تعال انطيني سبب واحد يقنعني بان شجن مامناسبتني والك حق ترفع صوتك وتحجي والتفت على امه وكالهه اسمعي يمه هاي البنيه اريدهه ومستعد اطلع من عدكم وماتشوفوني واخذهه ...

وائل.. تعاندني والله احط طلقه براسك وما اخليهه اطب البيت هاي العائله ماريدهه ..

ام وائل.. كافي ياوائل شبيهه شجن لان رجلهه اني مثلك مامقتنعه بس دا تشوفه رايدهه شنو المخليك توكف بوجه اخوهه..

وائل.. ماعندي شي ويه البنيه بس اني اكره بشار وما اريد اناسبه ولج شجن شويه وغير كلامه وكال شمدريكم شنو السبب الي تعوقت بي وشمسويه بالكليه..

وبس حجه هيج وغيث گلب الدنيا ع وائل حته ادافعوا ورفع اصبعه بتهديد بوجهه وكاله اياك تعيد هالحجي لان الي اخلي طلقه براسك...

واني اجيت اريد اهدي وائل كتله شجن حبابه وحلوه وربيتوهه ع ايدكم ليش تحجي عليهه وجان يكوملي كدام بناتي دك بوكسيات وضربني فرفحت روحي بذاك الليل ردت اطلع اروح لبيت اختي بس صوت بناتي مرعوبات ويبجن ورجعت ...

مكسور كلبي وصايره نار منا وائل ومنا غيث لان عمره ماقصر ويانه بشي وكلنه نعرف عنده حبيبه كسرو فرحته ..

وائل اناني طول عمره مايحب واحد يريد بس هو وبس وبشار اكثر من مره مسمع وائل كلام وخاصه من فتح الدعوه من جديد وخلا يشهد بالمحكمه هيج حقد علي..

شجن.. حسبي الله ونعم الوكيل بي خاف تزعلين بس من حرگه كلبي ..
ساره... لاوالله ما ازعل واني مثلج اتحسب لان تعبت ياشجن عيشتي ويا قهر يتيمه وماعندي اخ ومستقوي عليه ولاعندي وظيفه واكدر انفصل واعيش روحي وجهالي وظالين جوه ايده ...

يله حبيبتي لاتضوجين موزين ع صحتج غيث يحبج وياخذج غصبا عنهم بس انطي وقت تهدء الامور خلي اروح لا دكوم تحجي خالتي والله عليج شتحتاجين بس رمشيلي اجيج
ركض....

شجن.. ياربي شنو من امتحان هذا وشيريد من عندي وائل مودمرني كافي توصل بيه اريد احجي واسكت هو بس كاله اخطبهه يكله احط طلقه براسك خوفي ع غيث هو المانعني...

رجعت علاقتنه اني وغيث بس ماكتله ساره حجتله لان احس بي متاذي وحته من يجينه اشوفه شلون حزين حته ماما كالت لعمر شو غيث متغير مومثل قبل صاير شي ويا؟؟ محد يدري بالمضموم وشبي غيث اذا اخو والي اعتبره ابو هيج يسوي بي

مر شهر كامل صادف شهر العاشر ٢٠١٢  وهاي اني كملت 5 اشهر ضبط على حالتي وبدء عام دراسي جديد وفاديه اشترت ملابس وطلع قبولهه كليه تربيه وفرحانه الا اني جنت حايره شلون اداوم ووين اكو اعلام وحده معوقه حته حلمي راح وتلاشى كدامي...

اجه بابا يريد ياخذنه لسوك وكتله ما اداوم هاي السنه كعد وياي وحجه هواي بس ماغيرت راي ماريد اشوف شفقه بعين اي شخص وقررت انهي دراستي وما اطلع من البيت...

حته غيث زعل عليه يومين بس مايحسون بيه ما اكدر اطلع والله ماكدر اشوف الطلاب الي وياي ويكولون خطيه وتتذمر عليه الناس..

بيومهه اجه بشار وبابا حاجيله كعد وياي كال اي رفض مامقبول من عندج شجن واني جنت اكول على اختي قويه وسباعيه طلعتي جبانه محد ينفعج غير شهادتج لا اني ادوملج ولا اهلج حاربي علمود نفسج ..

وبعدين كعدة البيت شراح تسوي بيج ترجعين اداومين وتتخرجين وان شاء الله نلكه حل لرجلج ...
شجن.. شلون اداوم بعكازات يابشار..

بشار.. اكو دكتور تواصلت وياا كال يخليلج مسند واكو صاحب غيث مسوي عنده ويعرفه لنهايه الشهر اطلعج لتركيا واسويهه الج؟؟

... مكلفه مو ؟؟؟ مايغلى عليج فلوس شعندي غيرجن بس انتي وفاديه وهدى مستقره بس انتن الا اشوفجن خريجات يله ارتاح هسه الاعلام كرهتي وماتريدي بكيفج اقدملج اهلي اي كليه تختاريهه ...

شجن.. بجيت على حنية بشار وبجيت ع غبائي الي خلاني اضم علي جان اخذ حقي باسني من راسي وطلع وكدر يغير تفكيري شويه...

شجن.. رجعت من الدوام على نفس الروتين كملت شغلي وصعدت اريد انام جانت الساعه ب٩ بليل انام من وقت لان اتعب وحته تلفزيون ماعدنه لان محد يتابع ...

لبست دشداشه جوه الركبه ومددت بعد ماقفلت الباب هاي اسنين متعوده اقفل الباب وعزيز برا صدفه اعوفه مفتوح...

بعدني مدده والعب لعبه الحيه بالموبايل اسمع طكطه بالباب وكانو يحاول يفتح باب الغرفه...

كمت عدلت نفسي واشوف عزيز يفتح الباب ويطب بسرعه جريت الفرشه غطيت نفسي بيهه كتله شعندك عزيز وليش ماادك الباب؟؟

... مرتي ليش ادك الباب عليهه اريد حقي ياقبس وانتي مقصره وياي..

... عزيز اطلع برا كل حق ما الك يمي امشي اطلع عزيز..
.. موبكيفج ست قبس ... يحجي ويتقرب ومبين علي هستوه سكران يعني ماخربان فدمره...

كمت من فراشي واني لافه نفسي بالفرشه واصيح اطلع برا وما احسه غير يهجم عليه بكل قوته كمت اعيط بصوت عالي محد يسمعني ...

يبوس بيه بكل قذاره واني روحي فرفحت لا ياربي جبت طول عمري وكل هالتعب والمرار حته احافظ ع نفسي..

دفعته حييييل وهو ماجان بي حيل يكوم بسرعه اخذت تليفوني وركضت للحمام وقفلت الباب عليه اسمعه يغني ويحجي كلام مامفهوم...

طلعت رقم بشار وايدي ترجف دكيت علي تاخر يله جاوبني بس كال الووو كتله الحكلي الله عليك تعال اخذني من بيتي...

بشار...قبس شصاير؟؟ ورجلج وين؟؟

قبس... تعال بشار اني حابسه نفسي بالحمام تعال اخذني لبيتكم ما اريد اظل هنااا...

بشار.. ربع ساعه وجاييج لاتخافين....

يتبببببع....