رواية قمع المشاعر الفصل الحادي وسبعون 71 - بقلم Rozaya1122

قمع المشاعر.... السابع والعشرون من الجزء الثاني...
للكاتبة زهراء ( روزايه)...

(قبس)
انه موذيــج الحــديقه.
الجانـت اتلم النــسايم
والفراشات البريئـــــــه
وكـل عصافير الصبـــح
انـه هسه مرايــه مكســـوره
وجـــرح يعـكـ ـس جــــرح
وكاع مطعونه بعطش... تنزف ملح!!!

( بشار)
يالوردج جميل وريحتج نعناع
شلون اصبر عليج وطالت المدة
كلبي يريد جيتج وميت  عليج
وغيرج هالكلب يا عمري ما عندة
من تزعل احس علية شدة تصير
واضل ادعي الهي تزول هالشدة
عود انه قوي وما دير بال عليج
وبس اصفن يسيل الدمع من وحدة
والهم الجبير اليجي بتالي الليل
اتعارك معارك وية المخدة ......
....

شجن.. هاي السنه من بدايتهه مشاكل ومرض
ماارتاحينه بيهه ولا يوم دائما انكول كون يصير
نمسح ٢٠١٧ من حياتنه كلهه..

مراقبين التليفون ولحد المغرب يله اتصل
عمر بعد ماما انتهت انكومهه ترجع توكع
كال طلع الدكتور ووضعه مستقر بس
راح يظل ٧٢ ساعه بالانعاش يله يسمحونه
انشوفه

ماما تخبلت كامت تصيح معناتهه بي شي
ومحد يقبل يحجي ليش هلكد يظل؟؟

مسحت دموعهه سرور وحجت لاخاله هاي
اجراءات طبيعيه تعتبر عملية القلب فوق الكبرى
وميصير يتحرك راح يظل نايم كلما ينتبه
ينطو منوم علمود يثبت صدره لان موهينه
حته عظام الصدر انفتحت..

لتخافين خاله كومي ادعيله بشار قوي
وان شاء الله يطلع منهه سلامات ..

ام بشار.. سوده عليه يا امي انت المعتني
بنفسك وصحتك من جان بالاعداديه وهويلعب
رياضه وحديد ويكول اهم شي الصحه

حته اكله معتدل تالي ياخذون من رجلك شريان
لصدرك ولجن شظل بي صدره مفتوح ورجله
مفتوحه شلون وهو بعز شبابه!!

بشرى.. الله لاينطي المايخافن الله هجمن بيته
كله من هذا عميران هو جابهه صار سبع البرمبه
ودك صدره موتالي هذيج صابرين بيتهه ومستقله
وقبس انهجم بيتهه ..

من كون انهجم بيتج يااسراء طابوكه طابوكه
وحته من يدفنوج ينهجم كبرج عليج
يا الماعندج مخافة الله

كله منج سرور كتلج خلي ابرد كلبي
واسويهه وصل بالمقص لسه كلبي مابرد

سرور.. عمه شتسوين مناك بشار يمكن سوه
بيهه اعاقه متشوفيهه حته متكدر توكف وفاتحه
رجليهه

بشرى.. اي لو اني مكمله جان كلبي
ارتاح شعدهه هي هاي السوته كله علمود غيرتهه
حته اريحهه هالعايقه..

هدى.. خلي ندعيله يطلع سلامات
وبعدين نكعد نتحسب عليهه

بشرى.. انجبي انتي امداج وغمتهه هم الج عين
وتحجين رجلج العار مصفكلهه ومسوي علاقه
وياهه ويتهم قبس مشعول الصفحه مو عرف
قبس ماعدهه تليفون ليش ظل يراسلهه لحد مانكشفت
وهو عده علاقه بيهه

كومي منا لا اكوم اكسر عوده الماسحه عليج
وهذا حمزه اذا اشوفه اغسله غسل مايستحي
مو مرت خال جهاله شلون يراسلهه معناتهه رجلج
هم منحط وقليل اصل

هدى.. عمه.....
بشرى.. وغمه تغم عيونج المثلج ماتفتح حلكهه بكلمه

بنت عمج ومرت اخوج ويتيمه ومابدر منهه
اي غلط من سمعتي هيج اجي واكعد وياهه
واكلهه قبس هيج وهيج السالفه افتهمي منهه
روحي احجي لاخوج حته يفتهم شسويتي انتي
حاربتيهه حرب البسوس ..

تدرن شكد يحبهه ولومايحبهه ماانفجر كلبه
ولجن كلبه مااتحمل لا افراكهه ولا اذيتهه
وهاي حالته ..

ام بشار.. اوف يابشرى هم اشوفهه وادنك على
ايدهه وابوسهه واكلهه سامحينه احنه موخوش
اوادم

قبس الله يحبهه وطلعهه من عدنه الله يريدلهه
الزينه واحنه موزينين اكيد دعت بيوم الله يبعد
عنهه كل شر واول مابعدنه عنهه لان احنه شر

فاديه.. خلي ترجع والله ابوس اديهه ورجليهه
حته تبرينه الذمه اني حياتي جحيم من اليوم
البديت اذيهه بكلامي

قبل فتره قبل لا يجي امير حلمت حلم كعدت
مفزوعه ومن هذا الحلم تاكدت ولا واحد
راح يرتاح بينه والله وهسه تشوفون

شجن.. شحلمتي؟؟
فاديه.. حلمت احنه كلنه فد مكان هيج شلون
البستان المتروك كل عائلتنه واكفين ننتظره تجي
واجت من بعيد تمشي وجهه حزين ويمشي
واحد بصفهه متوسط بالعمر لابس دشداشه بيضه
وعرقجين ع راسه..

ومن وصلت يمنه محد حجه ولاهي حجت بس جانت
تأشر باصبعهه علينه اشرت ع هدى وعليه وع بسمه
وبناتهه وع اسراء وحته ع رجل عمه بشرى كلنه اشرت علينه

بس تأشر والبصفهه يهز راسه ومن وصلت
لبشار ابتسمت ونزلت اصبعهه مااشرت علي
وهذا الرجال مدنك يكتب باسمائنه احنه الي اشرت
علينه كل واحد اسمه واسم امه وفزيت!!

من كعدت كلت اكيد شكتنه لرب العالمين
ويجوز هذا الوياهه العمل الصالح مالتهه
لو الحوبه لو حارس لان جان يباوعلنه بغضب...

شجن.. والله ماتتعدى حوبتهه شكد سامعين
عن الحوبه بس هسه راح انشوفهه بعينه

بشرى.. بس كلوبنه مابردت يعني اسراء
اخذوهه عمامهه وراح يزوجوهه وهم
تتحمر وتتكحل حتلو تنكتل مره اثنين وتنسي
ليش ماخليتني العب بيهه فلق..

ام بشار.. لا اني عندي يقين قوي ايام ونسمع
اخبار عنهه موزينه عمهه من طالع منطي الرقم
مالته ومالت مرته لعادل وكايله خلي ام بشار
تخابرنه واني منتظره وضع بشار واخابرهم اشوف..

شجن.. كلهه تسولف اموري بجه كامت سرور
جابته وسوتله ممه مخليته بحضنهه وتحاجي بي
حبيبي ماماتي الحلو صح النوم اشتاقيتلك..

اني كاعده بصف عمه بشرى ضربتني بعكسهه
حيل عود شوفي !!

بشرى.. اموري السبع طالع ع ابوك باليوم
الي اجيت بي خليت طشارهم ماله والي
حبيب امك وين راحت عنك اذا عندك بخت
الله يجمعك بيهه!!

ام بشار.. بشرى سبحان الله شكد يشبهه من عيونه وفوك
حته شعره احنه جهالنه يطلعون بدون شعر
وهو دشوفي شلون كفشه عنده

بشرى.. شبيج داده من المحبه يكولون اهلنه
الرجال من يتقرب لمرته وين يركز او هي وين تركز
اكثر شي يطلع يشبهه لو شيجي شخص ع باله بهاي اللحظه

وبشار الظاهر بليلتهه مركز بعيونهه حيل
وعبالك راسمهن رسم حته نفس الرموش والحواجب

شجن.. عمه داست بالحجي ونست سرور
مدنكه ومبينه انقهرت دغيت عمه عود تسكت

جان تشاورني وجع شبيج شتدري قابل اجه
من فطر الكاع غير من ليله حميمه ومتعوب
بي اموري...

شجن.. احنه بوضع مااكدر اضحك بي
بس عمه بشرى من تحجي حته بدون ماتضحك
هي طبيعتهه هيج ..

٣ ايام يله كدرنه ناخذ نفس طمنونه ع بشار
زين وطلعوا للشقه وحته فتح عمر كاميرا
وشفنا يله كدرنه نغمض عينه براحه..

ظلو هناك تقريبا ١٥ يوم واجو وبيوم الي اجو
بابا ذبح طليان اثنين ووزعهن للفقراء
رجعنه لنفس الهوسه وناس رايحه وناس جايه
يتحمدون بالسلامه ..

حركته قليله صدره لابس حزام من يريد يكوم
اذا عمر موجود يساعده لازم ميضغط ع صدره

واذا ماكو تركض سرور لان اخذت اجازه
بيوم من عدهن صاح عمر عمر جان نايم ع ظهره
وراد يكوم وعمر جان مموجود..

كمت اني اساعده بس انطي ايدي هو يستند
مو فدمره مايكدر هستوني وصلت وجان تجي
سرور طايره هاا ابو امير عمر مموجود تعال اساعدك..

هو ساكت واني واكفه اباوع دنكت علي رادت تكومه
كالهه ميحتاج قابل معوق بس انطيني شي الزمه
واكوم

مدت ايدهه وايد الثانيه ورا كتفه لزم حافه الجربايه
وكام وهي واكفه اكلته اكل بعيونهه مع العلم هي
مرته بس اني مدري ليش استصعبهه لان اشوف
متلوكله غير قبس..

كام شويه يفتر بالحديقه مامتعلم ع كعده
اصلا جنه مانشوفه غير وقت النوم
كلساع يطلع تليفونه يباوع بي ويرجع يسده..

ماما كالت الجو حلو طلعونه ماعون فواكه وخلي انروح
نكعد بالحديقه يمه وبدلت لاموري وسرور حضرت
الفواكه وطلعنه برااا

خله اموري بحضنه وكلساع يبوسه
وهو يناغي صاير ودبدوب مال عض
وبوس ..

سألته عمه بشرى شكالك الطبيب شكد وترجع
تمارس حياتك طبيعي؟؟

بشار.. كال اذا شغلك مكتب مدة شهر
واذا اعمال شاقه ٣ اشهر بس كدوام عادي
شهر وارجع  والتزم بالعلاج

بشرى..وحياتك الزوجيه؟؟
بشار .. شبيهه،؟؟
بشرى..تكدر ترجع طبيعي
بشار.. شعندج سوالف هسه الحياة واكفه بس
على هاي الشغله..

بشرى.. مواني اعرفك ورفعت حاجبهه
بشار.. ابتسم ودنك ع امير وكال شدكولين
انتي ؟

بشرى.. ادري بيك تنتظر ام امير
شجن.. سكت ماجاوبهه والحجايه اجت ويه سرور
مادري سمعت وغلست لو مسمعتهه

مرت الايام وبشار رجع طبيعي
رجع للدوام ورفض رفض قاطع بخصوص امير
وعافه يمنه شكد حاولت سرور وماقبل

سمعته يحجي ويه ماما كالهه مااريد
يتعلق بيهه وينسى امه!!

لازم يجي يوم وترجع موتلكا يصيح لغيرهه
ماما لاتعلمي على كلمه ماما مايكولهه لاي شخص
وحته اذا شفتي سرور تلح وياه كليلي
هسه هو صغير بس خاف يكبر وامه ماجايه..

اما اني غيث مابزع ابد احنه ملينه
من الناس الي يدزهم وبشار وعمر يرفضون
واني نهائيا مااناقش ولا طلبوا رأي

فاطمه يم اهلهه وماترضى تطلك
ويكلوله حرام اطلكهه مدام هي رافضه
الطلاك ومابيهه قصور انت اختاريتهه
وتتحمل غلطك...

مشاكل اخواتي ماخلصت كل اسبوع وحده
وهدى بعد الصار صارت اكثر مشاكلهه
رجلهه طرده بشار بالكعده وبعد مايجي

اما قبس مستمرين اندور عليهه بس
فص ملح وذاب ..
...

قبس.. نزلنه بالمطار بين ماكملنه
الاجراءات ظلينه كاعدين ننتظر
سناء شويه وصاحت رنا اجتي خاله..

شفتهه من بعيد احس الروح ردت اليه
وكانو شفت ماما دموعي لا ارادي نزلت
جانت تمشي هي واخوهه وابن اخوهه يركض كدامهه..

من وصلت قريب عليه فتحتلي ايدهه
عافت اختهه واجت عليه ضمتني بحضنهه
محتاجه سند محتاجه احد اذب همومي
يمه واشكيله

اثنينه نبجي وام رنا تصيح مو هنا
بالشقه اشبعن بجي عافتني وسلمت
ع اختهه وبوست بنات اختهه

شالن الجنط ورحنه للسياره من صعدت
سلم عليه اخوهه شلونج اختي الحمدلله ع السلامه

جانت العبره خانكتني وبس اشهك
كتله الله يسلمك وشهكت سناء كعدت بصفي ولازمه
ايدي اطبطب عليهه..

مختنكه روحي تريد تطلع هذا مومكاني
ولا اعرف احد هنا اني وين ؟
ووين نزلني قطار العمر وراح!؟

وصلنه للشقه واخذتني من ايدي
لغرفتهه كالت ارتاحي هنا لاتتقيدين
شوفي وفتحتلي الكنتور
قبل اسبوع جهزتلج كلشي هاي الخانتين
الج وهذني الي

هذا الحمام فوتي اسبحي
وارتاحي لان عندي سوالف بكد بغداد
ماتخلصين مني اليوم..

ابتسمت وكمت بوستهه مااعرف
شلون اشكرج يعجز الساني
سناء.. لاتشكريني انتي موبس صديقتي
انتي بنتي الماجبتهه كومي ارتاحي وغسلي
تعب السفر..

طلعت واني فتحت الكنتور رغم جايبه
ملابسي بس ظلت الجنطه برا اخذت تراك طويل
وخاولي ورحت للحمام ..

جان الجو بارد بس الحمام دافي
سبحت ودموعي ماترضى توكف
مستمره ابجي بحرگه اختلطت دموعي
ويه المي لحدما احس كلبي كام يصيح
ارحميني!!

لبست وطلعت شعري قصير بس صار
ينشال شلته ليفوك واكو تعلاكه بالحايط
علكت بيهه الخاولي

اباوع لنفسي وين اني ؟ وشلون راح اعيش؟
ياقبس شكد تعبتي روحج من ماتو اهلج
لليوم انتي مشرده يوميه بمكان !!

ماتعبتي ياروحي مامليتي؟!
بسرعه اجه ابالي بشار بجيت
وخليت ايدي ع كلبي ممرتاحه
ياترى حسيت بيه ؟!

بشار ابنه راح ع الاقل انت ماتدري ولاسمعت
صوته بس اني مده ٨ اشهر اسولف وياه
ويسمعني حته ابنك مثلك من اول يوم عافني ..

خليت ايدي ع بطني اتلمس بيهه
حبيبي لو ظال ببطني ولاطالع لهاي
الدنيا لو بس شايفتك ومشتمه ريحتك؟!

شويه وانفتح الباب ام رنا بدلت وبدلت لبناتهه
اجت سناء جايبه عصير انطتني

ام رنا.. احنه ٥ ايام ونرجع مانكدر اخذت اجازه
للبنات مده اسبوع عدهن دوام واني دوامي
مانكدر نظل بس اجينه علمود قبس حته تتعود
ذذذ
سناء.. دكومن خلي ناكل واليوم
السهره صباحيه قبس افندي
اريد اسمع صوت وصوره...ط

قبس.. شويه كدرت التهي وياهن
رغم الالم البداخلي بس هوسه ولمه
كدرت اطلع من الجو الجنت حابسه نفسي بي..

من صار وقت النوم هاج الحنين
وهاجت شكو ذكرى مؤلمه
كمت افرك بصدري احسه نار
ومشتعله بكل جزء بجسمي ...

مخليه راسي ع المخده وعيني ع السكف
جربايتي ام نفر بس عريضه كلش تاخذ اثنين
جنت صافنه ممنتبهه حسيت ع سناء اجت بصفي

ام رنا نامت هي وبناتهه بالكاع تعبانه
من السفر وسناء خلت ايدهه جوه راسهه
واني نايمه ع ظهري وهي ملتفته عليه..

مدت ايدهه لعبت بخصلات شعري
وكالت اعرف حجم الالم البداخلج
بس بهاي الحاله تأذين نفسج وكل واحد
عايش لروحه وانتي تعانين

قبس.. مااكدر انسى بكل رمشة عين
اشوفه صارلي ٨ اشهر مفاركته
واني الجنت من يجي من الدوام احسه
شهر اركض احضنه

سناء.. ااوف المدير العام شلون دگه ناقصه
ماالومج بس السويتي غلط بهزيمتج الاخيره
هو يكدر يفتحلج بيت واطلبي الطلاق من عنده

قبس.. ماتحملت سناء ماتحملت التهم التكسر
الظهر ماتحملت كلام رجل بشرى وهو يكول
عليه موخوش ويكدر يدبرلي تهمه اكبر
ماكدرت اعيش واشوفهم ينهشون بلحمي واني
ساكته

سناء تعذبت حيل محد يريدني
اروح وياه لاهلهه محد يحجي وياي
تخيلي يكعدن البنات وحدهن واني مالي مكان
يمهن اكعد بصفه ويه الزلم

تخيلي سناء الذله الشفتهه بيوم
الضحكن عليه وهو خاطب ولج كسرني
حطم گلبي كسر روحي وبعد محد يكدر يلمني..

جنت قطع صغيره بكسرته
بس بموتت ابني تهشمت بعد ماانجمع
ولا راح ارجع قبس من جديد..

سناء.. بعد مايفيد اللوم اني وياج
لادكولين وحدي وماعندي احد
اني وياج وسرج هو سري منا لمن ترجع نفسيتج
طبيعيه ...

قبس.. سولفيلي شلون راح تستقرين هنا؟!
سناء.. هاهي مااعتقد النه رجعه للعراق
اشفنه بس الضيم اخويه ابو سيف من صار الحادث
فقراته انتهت..

راجعنه بالعراق صار زين اخر شي طبيب
من البصره كال لازم عملية وانصحكم بالخارج
واخر شي اتخذنه قرار

بعنه البيت واني طلعت تقاعد وهو هم تقاعد
واجينه هنا سوه العمليه وقررنه نستقر
شعدنه هناك هي بس ام رنا وتكدر تجينه

قبس.. اخذتنه السوالف تالي غفيت
وكعدت ع صوت سيف يلعب يم راسي
كمت من مكاني اجه وكف كدامي وكال
صباح الخير خاله

رديت علي ودنكت كرصته من خده
صباح النور جبيبي الحلو؟!

طلعت غسلت وتريكت اخوهه مموجود
روحي تلوب مدري شبيهه
احسهه مطحونه طحن ..

هن يسولفن واني بعالم ثاني
كلبي يوجعني مدري شجاي يصير
صدري نار صاير ومورم ..

جنت صافنه فززني صوت ام رنا وهي
تحجي قبس ولو مو وقته الحجي بس
اريدج تسمعيني؟!

قبس.. شنو ام رنا..
ام رنا.. اني برأي انتي اختاريتي حياتج
ولازم تعيشين واطلعين من هذا الحزن
لان بعدج بعز شبابج والايام كفيله تعالج
جرحج..

لاتعتبرين كلامي والله مااعرف شكول
بس اني برأي استقري هنا واتزوجي
ابو سيف واخذي اقامه وانسي كلشي
ماضي بحياتج..

قبس... شتحجين ام رنا سناء هاي شتحجي
سناء.. ع كيفج حبيبتي هاي تخوط بصف الاستكان

ولج معزايه متسكتين نمتي وكعدتي بقنبله
عبالج الحب البينهه وبين رجلهه حب عادي

بله هسه شحجي كوم هنا المدير العام جان
شمرج من هذا الطابق وكسر اعظامج
لعد ماغزر بيه الريوك جنت شبعانه بحجه يجيب
لقبس واني اكل وهسه ادك الناقصه وياه

ام رنا.. شبيج هو اقتراح كلت حته ابو سيف
يكون سند الهه وهي تعبت
سناء.. سندهه رب العالمين اسكتي سدي الموضوع..

قبس.. عفتهن وكمت مالي خلك اناقش
شتحجي هاي كل عقلهه !!

مرت الايام واني نفس حالتي تزود
ماتقل ام رنا رجعت وهاي راح يصيرلي
شهر اني بتركيا

ابو سيف مااشوفه ابد وهو رجال محترم
سناء خلت برده عزلت غرفته والصاله واحنه البقيه
حته اخذ راحتي

مرات سناء تشاقه وتضحك
ومرات تكعد وياي تبجي
لحدما ينشف دمعي..

هسه احنه بشهر الخامس سنه ٢٠١٧
كمت اطلع ويه سناء نتمشه
طلبت من عندي اراجع دكتور نفسي
ورفضت لان مااخذ علاج حاليا
وهاي العزله من القهر الشفته

بس جنت محتاجه اراجع طبيب
ع اذني لان الصاحيه بده يقل سمعهه
ومرات مااسمع اله يحجون بصوت عالي...

ايدي ضامتهه دائما الفهه بشاش
حته متخوف سيف لو تلعب نفس
سناء منهه من نكعد ناكل ..

الالم البداخلي مستمر مااعرف
يايوم راح يخف ويايوم
تخمد ناري ولو ساعات..

بشاااار ياوجع كلبي يوميه بليل
تنزل دموعي واني اتخيله هسه
يمهه ..

كل هاي الفتره اني مافتحت تليفوني
اصلا جان طافي كمت خليته ع شحن
انتظرته يشحن وكنكت اول مارحت ركض
ع حسابه ...

شفت مغير صورته الشخصيه ومخلي صورة
طفل اول ماشفته مدري شصار بيه
لحدالان اتذكر الموقف

ايدي رعشت مثل قبل كلبي زاد
نبضه افتح واسد بعيوني
شفايفي يبست وكلساع ابللهم بلساني..

اكبر واصغر بصوره الطفل مبتسم
عيونه رصاصي نسخه من عيوني
خدوده ع شجن وتقاسيم وجهه ع عمو عادل..

دموعي تجري كامت وكعت ع الشاشه
امسح بيهم ومااشوف من غواش عيوني
هذا ابنه؟!

لك ياظالم هذا ابنك؟! شوكت صارت حامل
وشوكت جابت والطفل مبين عمره بحدود
٣ اشهر مااعرف بالضبط

شمرت التليفون وكعدت احسب هو تزوج بشهر
السادس بسنه ٢٠١٦ وهسه شهر الخامس ٢٠١٧
يعني اول ماتزوج صارت حامل وهاي جابت
صارلهه شهرين ويجوز اكثر

يعني من جنت ادور عليه انت متقربلهه
من اجيت يمي بشقة غيث انت متقربلهه
انت من كتلي احبج بس انتي
انت كذاب متقربلهه..

افتر بالغرفه وادك ع صدري موت ياكلبي
موت كافي اوكف لاتنبض مااريدك
ومااريد اعيش

بشااار شلون انطاك كلبك ولك شكم كسرة
كسرتني اريد احسبهم وحده اقوى من الثانيه

اخذت نفس مايكمل عندي بسرعه
ينكطع مسحت دموعي ورجعت ع التليفون
ليش الطفل يشبه عيوني وكلبي فز بس شافه؟!

فتحت التعليقات كلهه كاتبه الله يحفظه
وشفت شكم تعليق ع عيونه وماشاء الله
عيون لو مرايه ..

لفت انتباهي مجموعه من التعليقات واحد كايله
الحمدلله ع السلامه استاذ بشار ماعندك غير
العافيه

واحد كايله شلون صارت صحتك ان شاء الله
ترجع باقرب وقت..

كمت اتقدم بالتعليقات لكيت صفحه اسمهه
دكتوره سرور بالانكليزي ومعلقه اروح
فدوه لهاي العيون حبيب ماما !!!

بعد بعد اقري ياقبس حته تشيلي من راسج
وتكرهي بعد اقري حته شوفي شلون عايش
حياته وانتي شلون عايشه؟!

سالت نفسي شبي مريض ويتحمدوله ع السلامه
ربي ورفعت راسي ليفوك
الهي ليش ٣ اطفال ماعاشوا يوم واحد ومافرح
وليش فرح ويه غيري..

استغفرت ربي لاتحسبني من الحاسدين
الله يحفظه الهم بس اتسائل ع حظي
وع قسمتي ..

التغليقات هوايه واني اقره واحد واحد
لفت انتباهي تعليق من بنيه مكتوب زهرة النرجس
مااعرفهه..

كاتبه اموري الحلو نسخه من امه الله
يخلي بشار ويفرحك الفرحه الجبيره ..

شتقصد نسخه من امه هو وين يشبه
سرور؟! وشتقصد الفرحه الجبيره؟!

بكلشي فكرت بس مستحيل افكر هذا
ابني لان ابني مات والظاهر رجعت عليه الاوهام
من جديد سديت الموبايل وسكتت..

حته لسناء ماحجيت بس صارت بيه عاده
كل شويه ادخل للصوره وحفظتهه وصافنه
بملامحه

لو اقره التعليقات دورت ع حساب شجن ماكو
فاديه وهدى ماكو ولاحساب الهن ويمكن لاغياته
لو ميطلعلي بس ع الاقل اكو اعجاب ع الصوره
ليش بس سرور وهاي زهرة النرجس خاف نرجس
بنت عامر ؟!

مدري شصار بيه اريد اعرف اخبارهم
اريد اشوف شلون عايشين
دعواتي وين راحت ؟! مابينت حوبتي؟!

صار كل وقتي ويه سيف عمره ٥ سنوات تقريبا
والسانه يخبل يجي يكعد يمي
ويكلي انتي ليش ماعندج ام؟!
اكله ماتت

سيف.. مثل امي بابا يكول بالجنه بعد هلكد
ونروحلهه ويشر باصابعه يسويهن رقم ٣

كرصته من خده وكتله عمرك طويل
وهي تنتظرك شوكت ماتجي

سيف.. عمه سناء كالت لاتصير وكح ويه خاله
قبس لان ابنهه مات وهي حزينه

قبس.. اي بعده صغيرون وراح يم امك
سيف.. لعد خلي انروح اني وياج انتي شوفي ابنج
واني اشوف ماما..

قبس.. ياربي مااعرف شجاوبه كمت الهي
بالالعاب وهو يسولفلي ع لعبته شلون يلعبهه
ويعلمني بس صورة الطفل ادك براسي...

مدري شلون اجتني كمت فتحت التليفون
وركضت ع حساب سرور جانت مخليته صورة
غلاف وكل التعليقات دكول الله يحفظه الج
دكتوره ويتربى بعزكم!!!

خابت امالي وخابت مساعيي
الحب البداخلي لازم يندفن
لازم ياقبس ادفنين كلشي وترجعين
اقوى من قبل

بشار اختار حياته وكدر يعاشر مره غيرج
ولج جان يكول ماتحلى بعيني مره غير هاي العيون
وهسه حلت سرور
وصار عنده ولد منهه شمنتظره انتي؟!

جان حساب سرور مملي صور
الطفل وعرفت اسمه امير من التعليقات
وكمت انزل الصور واحفظهم مادري شجنت احس
وحده من الصور خليتهه خلفيه شاشه ..

حساب بشار حساب خاص
بس صوره شخصيه وغلاف تطلعلي
صار عندي فضول اشوفه هم ينشر شي
او بالاحرى ردت اشوفه هو لان ماكو اله
صور جديده..

سويت حساب باسم ولد اسمه بهاء علي
بالانكليزي ومعلومات كامله ويشتغل مهندس
كلت حته يشوفه ويقبل..

دزيتله طلب صداقه وايدي ع كلبي
هسه يوافق خاف يعرفني؟!
وخاف وخاف؟! لحد الليل يله اجاني
وافق بشار عادل ع طلب الصداقه..

ركض وعبالك عندي سباق دخلت لحسابه
جان اكو منشور ورا صورة الطفل عباره عن
كتاب ومحدد بقلم اصفر...

صباح الشوق لعينيكِ
التي تستيقظ باحثه عني
لقلبك الذي يذكرني
عند كل نبضه!!

نزلت ادور بعد ماكو نفسهن القديمات
الجديد بس هذا الكلام وصورة الطفل
بس بالتعليقات هوايه يتحمدوله ع السلامه

سديت التليفون وكمت يم سناء انسولف
جانت تحجيلي عن عاليه وسيف يلعب يمنه..

دك تليفون سناء بصفهه رفعته
رقم غريب مامسجل اسم كالن خاف بيت عمي
لوخالة سيف

فتحت خط وكالت الووو
بهتت ملامحهه وكامت وكفت
وهي ودكول اهلا استاذ بشار
اهلا وسهلا....

.
.
يتبببببببع ... متابعه شيقه

مجموعه تصاميم اغلفه من متابعتي المبدعه
طبعا العيون مال الطفل بهاي الصوره نسخه من عيون قبس وابنهه