رواية قمع المشاعر الفصل الثاني وسبعون 72 - بقلم Rozaya1122

قمع المشاعر.... الثامن والعشرون من الجزء الثاني...
للكاتبة زهراء ( روزايه)...

لمن تخليتو عني؟!
وانا چنت بعازة چفوف التلمني
بطرگ حزني ولوعتي وليوجعني
بطرگ ليش ؟ وليش ودموع اعلة ردني
وجدمي كل ما ينوي يوصل بابكم
گلبي يعتني !ليش ؟ ياما چنت احبكم
واسند الحبني وكرهني
ومن طحت وتراكمن حزني اعله حزني
محد ادنة وهمس موجود متني
وهو ليش ؟ ليش ما ظل بالة يمي ؟
ولا اشتاگ ! ولا فگدني !
مو چنت لمن حزن بعيونة يطفح
نسهر انا وگلبي وعيونة ونغني
وهيَ هاي الـ ليش وأنتم والـ وروحي
كلهن يوجعني
ليش محد صدگ حبني ؟!
....

قبس.. سناء تحجي واني عبالك واحد غططني
بالمي وخنكني كمت وكفت ع وكفتهه وهي ارتبكت
بس تصيح شلون استاذ؟!

اشرلهه بقوه ايدي لااا لااا لتحجين
حيل خايفه جنت مااريد ارجع
مااريد احترك بنارهم مره ثانيه..

سناء.. لا استاذ اني هم زعلانه عليهه
لان اتصل عليهه راح يصير سنه وماترد عليه
واستاذ اني بتركيا

قبس.. ماادري شيحجي وياهه بس هي
تسويله ان شاء الله اكيد بدون متوصي
وانت هم اذا شفتهه كلهه تخابرني

سدته منه واني وصلت حدهه كعدت
بالكاع وبجيت وحجيت بتوسل
سناء لاتخلي يندل مكاني الله عليج
انتي كلتي احميج لاتخلي ياخذني..

سناء.. حبيبه قبوسه كومي بنيتي
لتخافين شلون انطي بيج كومي يا امي
موهاي كدامج كتله مااعرف شي عنهه

قبس.. كمت كعدت بصفهه ومسحت دموعي
وكتلهه شكالج وشلونه؟ صوته خوماتعبان؟

سناء.. كال ماخابرتج قبس زعلانه عليه
وهي ماعدهه صديقة بس انتي وردت اسالج
وماخذ رقمي من عاليه..

قبس.. همزين ماحجيتي لعاليه اني يمج
جان كالتله يمه مااريد اتخيل يوم التقي
بي ..

سناء.. والله مااعرف شكول بس ياحبيبه
محد يدوملج واضمني مستقبلج
ارجعي وخلي يحطلج بيت ويشوفلج
شغل عنده معارف هوايه وعيشي لنفسج

قبس.. شلون ارجع ويقسم ايامه علينه
تريد اليوم اليجي يمي احضر نفسي
ويجيني من عدهه بايسهه وحاضنهه
وكايلهه احبج شلون فهميني؟

لو اموت لو تصير روحي معلكه بي
احركهه لروحي ومااقبل يتقسم على اثنين

سناء.. اطلبي الطلاك خلي يطلكهه
وارجعي لبيتج ورجلج

قبس.. يابيت هذا انداس بيتي من الغريبه
يارجل ورجلي شاركتني وحده بي
بيوم منهن عيرتني اني مريضه نفسيا
يابيت ورجل يابيت سناء...

دنكت وخليت راسي بين اديه
مااريد اسمع اي شي
لاتحجين بروح ابوج بشار احرك روحي
وماارجعله...

مااكدر محد يحس بناري مااكدر افهموني
الحجي سهل بس اني مااكدر احبه ومااريد
احد يشاركني بي
وبكد حبي اله مجروحه منه

شلون ارجع لهذيج العائله الرفعت اصابع
الاتهام بوجهي شلون ارجع وهم اشوف نفس
الوجوه البيوم شككت بشرفي راح تطلب مني اسامحهم

لو اموت ياسناء الموت اهون اليه
من اشوف اشكالهم يوم واحد
كل واحد بيهم غرس خنجر بكلبي
شطيب جرح لوجرحين؟!

سناء.. الله يعين كلبج صحيح مانكدر انطيب
الكلام بالحجي بس لازم تنتبهين ع صحتج
لشوكت راح تظلين حزينه ومنطويه ع نفسج ..

انتي لسه ع ذمته قبس انتي لسه مرته
يعني كل تصرف يبدر منج هو حرام
حته هاي طلعتج بدون علمه الله يحاسبج
عليهه انتي ع ذمة رجال ياحبيبتي..

قبس.. الله يدري ليش طلعت اني انسانه
مو حجر واتحمل هلكد اني انسانه عندي مشاعر
واحاسيس وانجرحت وتكسرت مااكدر امثل
اني طبيعيه

اني اصون بشار حته بغيابه عيني
عميه اذا بيوم رفعت راسي ع واحد
رجليه عساهن بالشلل اذا بيوم خطن خطوه
لمكان يبغض الله ..

سناء.. الله يهدي سركم ياحبيبتي
كومي ارتاحي وباجر انروح لطبيب ابو الاذن
انشوفه شيكول ..

قبس.. ثاني يوم رحنه لطبيب اني وسناء
الفلوس العندي بدت تخلص رغم مقتصده بيهن
بس مابقه غير شكم فلس وبهاي الحاله
شلون اكمل ويه سناء شلون اسمح لنفسي تصرف عليه..

عايني الدكتور وسوالي ناظور هز راسه بأسى
وحجه جان اكو مترجم ترجم النه كال اذنج منتهيه
الطبله منخوره ولازم نشكل سماعه

قبس... ماقبلت اسوي عمليه انطاني علاج وطلعت
سناء.. شنو رأيج نتمشى شويه وانشوف
نعم رب العالمين وهاي الزلم الصاكه مال تركيا

قبس.. ههه شعندج سوالف سناء
سناء..ادري انتي ماتباوعين غير للمدير العام
بس اني لاعندي مدير ولافراش خليني اكحل عيني..

قبس.. وين انروح مااندل خاف نضيع
سناء.. امشي وين تضيعين عود نخابر ابوسيف
يجينه اكو كوفي دائما انروحله اغلبهم عراقين
وعرب اليجونه هسه يعجبج..

قبس.. هزيت راسي الهه ومشينه اني وياهه
دخلنه للكوفي اكو عوائل والي كاعد وحده
كعدنه اني وسناء ع طاوله تصير مقابيل
الشارع نباوع للماره ..

طلبت كهوه واني مااريد شي نفسي
مسدوده صافنه على الناس هذا يروح
وهذا يجي !!

هذا يتغزل بحبيبته
وهذولي مبين عدهم خلاف لان يتعاركون
اجت عيني ع طفل بحضن امه
لو ظال ابني هسه وياه نفس العمر..

هدوء بس صوت الاغاني مالي المكان
شفت الواكف يم السماعات بيده جهاز
صغير يتحكم بالاغاني فجأه غير الاغنيه
وبدت اغنيه وكانما يكول هاي الج..

تعال انطش زعلنه ويه الرياح
ونمشي اثنينه راح اشبكك راح
ضگنه الحزن خلي انضوگ الافراح
ونبشر عيونه ليل الدمع راح
يافيض!!
يهل طيفك يمر باليقضه والنوم
ويمن حبك امر من كل الهموم
واني ادري بيك وفي ومايخذك لوم
مثل طبع الگمر ماتاخذه غيوم..
يافيض!!!

قبس.. اضم بشفتي لبطن حلگي
حته اضيع دموعي وانكساري
حته اضغط ع جرحي بقوه حته
لاينزف !!

ماكدرت اظل كاعده كلت لسناء خلي انكوم
ماكالت شي طلعنه للشقه اريد
اظل وحدي اريد ابجي بدون محد يشوفني..

طبيت للغرفه واطلقت العنان لدموعي
ولگلبي ولعقلي خليتهم يتصارعون
بيناتهم منو الاقوى!!

گلبي يحث عيوني ع البجي ويذكرني
بشكو كلمة غزل ويوم حلو
وعقلي يمنعهه ويكلهه نسيتي جرحه
نسيتي شلون صفيتي بشارع
من ورا حبه ..

دائما بهيج معارك يطلع عقلي خسران
وكلبي يركض للتليفون ومباشرة على
حسابه بلكي الكه شي جديد!!

يجي الليل واشمر نفسي تعبانه
من كلبي وعقلي من كلشي
من شوگي
من حنيني
من غربتي !!
انام وعلى امل اكعد والكه الصار حلم..
..
شجن... خلصت السنه الدراسيه ونجحت
بس مشاكلنه يوم تخمد يوم تشتعل من جديد
هالمره هدى واصله ويه رجلهه لطلاق

بشار ماادخل نهائيا شكد بجت وتوسلت
يوكفلهه كالهه حمزه اذا اشوفه ابتلي
بي حته شكله مااريد اشوفه بيوم

بابا تعب حيل وعدهه جهال ٣وين تروح
وشتسوي حماتهه دكلهه ازوج اخوي واكسر
خشمج شلون اخوج بشار طرد اخوي كدام
الزلم والشيوخ اله اكسر خشمج..

وهدى تصيح اذا يتزوج يطلكني وحمزه
يكلهه مااطلك اطلبج لبيت الطاعه واذا
كلش عاندتي انشزج وظلي انتي لامتزوجه
ولا مطلقه...

اخر شي استسلمت وكالتله ابعد اخواتك
عني واني اظل ابيتي وانت وين ماتروح روح

وهاي حال هدى حمزه هاجرهه يسمع كلام اهله
يوميه تعيش اللوعه مو مره لا صارت عاده
كل اسبوع واجاهه كالهه راح اخطب

اذا قبس عاشت اللوعه مره وحده
هدى مرات تكعد تبجي دكول مااعرف اوصف
كميه الالم التذبحني

حمزه يجي اسبوع يحضر ويقرر يخطب
ومن ماتصير يرجع يعتذرلي ورا ايام يرجع
نفس الشي صرت ماافرح لا بغزل
ولا بشوفته وهو مبدل..

اما فاديه هاي نفس وضعهه كل شهر
لازم تجي زعلانه يجي رجلهه وعيالهه
يحلف هو مايشرب واذا يشرب
برا البيت بس بتكم مامهتمه بيه ومخليه حياتي جحيم

ونفس الكلام يكوله بشار صفك اديه
وحده بوحده وكالهن مالي علاقه بيجن
فاديه نصحتج وكلتي اني اتحمل اختياري

وهدى وكفتي بجانب رجلج وشهرتي
بقبس وبدون ماادري لان ماحجتلي قبس
ولاكالت هدى تعاملني هيج ورا ماوكع الفاس
بالراس يله حجتلي امي
كل وحده بيجن تجازى هي واغلاطهه ..

اما اني لحدالان ادفع ثمن غلطي وهو
حبي لغيث لان اختاريت الانسان الغلط
ماحسبت تهديدات وائل ولا حسبت ينتهي
بيه المطاف اعيش يوم زواجه ع غيري

كل واحد بينه مشاعره محترگه مقموعه
داخل گلبه
كلل واحد بينه يكابر ويبين نفسه هو ممهتم
بس بداخله نيران ومشتعله..

عمه بسمه انتهت من حياتنه بعد مافلشتهه
وماخلت شي عامر بيهه
فرح محبوسه بالبيت لاتليفون ولاطلعه
ونسمع من عمه بشرى الحجي

دكول امجد مسوي وياهه جدول يوم خفر
ويوم تنكتل بي فرح لحد ماتوكع يكلهه
من وراج دفنت حب طاهر بكلبي لشجن
ومااكدر اخلي عيني بعين خالي وولده

امجد يمكن الانسان الوحيد الي انقمعت
مشاعره وهي بعدهه بالبدايه
لاعاشهه بصوره حلوه ولاكدر يعبر عنهه
لان غشته امه واخواته ...

اموري هذا ملاك البيت الوحيد الي
من انشوفه نبتسم لا ارادي عمره حاليا
٥ اشهر صوته وهو يناغي مثل الموسيقى
تطرب مسامعنه..

بشار يوميه يجي علينه يشيله ويلعبه
ومايلعب اله ع صدره وماما تصيح
صدرك مفتوح موزين عليك ...

صدفه جانت عمه بشرى يمنه
اثناء الحديث كالت عمه بشرى
اكول بشار انت ماتشوف حساب سرور

بشار.. كعد اموري بحضنه عدله وكالهه
لا مااشوفه لان موصديقتي ليش شبي؟!

بشرى.. قبس عدله موميته وتلكاهه لابد مادخلت
ع حساباتكم تريد ادوس عليهه خاف باقي منهه شي

بشار.. غير افتهم شبي حساب سرور
بشرى.. روح شوفه اني صديقتهه ويوميه تنشر
صور اموري وحبيب ماما وحبيب بابا
والله يخليك النه واللوكيات مالاتهه يدرن مو ابنهه
ويعلقلهه يتربى بعزكم

ليش ولك وين امه ياظلام هم اجت ع رجلهه
وداست بيتهه واخذت ابنهه وهي ماتخلف ليش
بشار طول عمرك رزن وثكيل ونبه شجاك هسه
ماتدري شيصير مايصير

بشار.. دنك ع اموري وحجه ماادري لان بالي يم
امه وسرور موصديقتي حته اشوف حسابهه
قبل فتره هم علقت هيج تعليق بحسابي
وحاجيتهه وحذفته اني قليل افتح فيس ..

بشرى.. احنه مانكرهه بس هذا حق يقال لو امه
ميته بعدهه عمه ماكملت كلامهه كالهه اسم الله
عليهه

هو اكلك لو امه لاسامح الله ميته نكول حقهه
بس هذا تصرفهه متعمده لان تدري بقبس
لازم تشوف حسابكم خاف عدهه امل بيوم
حته تكطعه للابد

بشار.. هسه من ارجع احاجيهه اني محذرهه
واذا منتبهه كدامي مادكول ماما ابد
اني ماحارمهه من الامومه حالتهه هيج

بشرى.. ميخالف ياعمه انت تعرف قبس زين
تعرفهه شكد رقيقه تخيل من شافت الصور
شكال كلبهه ولك تلكاهه انجرحت ضعفين ...

بشار..خابرت سناء صديقتهه بلكي تعرف
شي عنهه بس كالت مااعرف عمه وين الكاهه
وين راحت ؟!

بشرى.. ااوف يابشار تذكرهه من عمرهه ١٤ وماخافت
وانهزمت من عدنه وخلتنه اسنين اندور عليهه

لك بشار قبس من كدماشافت لوعات
عدهه قدرة تحمل تفوق اكبر رجال
كتلك مره لاتشوفهه فراشه ترى بلحظه
تأذيهه تأذيك .

بشار.. كالتهه انت رجال واني مره وكول بيوم
مره كسرت كلمتي وسوتهه صدك

موبس كسرتهه انتهيت وراهه بكل زاويه
بالبيت اشوف صورتهه كلشي ع حطيته
البيت مملي تراب مايهون عليه اجيب وحده
تنظفه وتختفي لمساتهه من عنده..

عطرهه اشتمه واني صاحي واني غافي
دمرتني بغيابهه راح يصير سنه واني
ماشايف طولهه ولاشايف عيونهه

بشرى.. ويجوز السنه تجر سنتين واكثر
ويجوز للابد واحتمال حته اذا لكيتهه
راح تلكاهه ازيد من قبل

تذكر شكد تعبت يله روضتهه لصالحك
تذكرهه شلون جانت توكف بوجهك وتردلك الحجايه
عشره ومن كدما حبتك صارت وياك مهره اصيله..

ام بشار.. لاتذكريني كلبي ينزف عليهه
يمه كلما اكعد الف الدولمه اتذكرهه من تكعد
تسويهه اكلهه خلي اساعدج دكلي السفينه
من تكثر ملاليحه تغرك

ااوف ياقبس مادامتلج الفرحه يابنتي
اسأل الله وين ماتكوني يريح بالج
ويجمعج ويه ابنج وتخمد نار گلبج..

ولك اموري اذا شافتك امك ودرت بيك
عايش شيصير بيهه حاجيني يوليدي
خاف ماتتحمل يوم اللقاء ..

شجن.. بشار يبلع بريگه ومنصي راسه ع اموري
شويه وكام ومبين علي مااتحمل الكلام ..

ومن هاي اللحظه عمه بشرى دكول سرور حاذفه كل الصور
وماتنشر بعد الظاهر شاد عليهه

سالت عمه ليش هي ماتخلف لوقصدهه لان مامتقربلهه
بشرى.. لااا يحبابه متشوفيهه لزكت واخذته من مرته
المثلهه دكتوره ومثقفه واصله ماتقبل بهيج زواج

بس سرور من هي بالكليه صايره عدهه اكياس
ع المبيض وهاملتهه ورا مامتخرجه معالجتهه
ومن شايلتهن متأذي المبيض وورا فتره ظاله بشك
مسويه تحليل وطالع عدهه عقم اصلا هم عدهم وراثه
خالاتهه مايخلفن واختهه الجبيره..

وهسه دكول اني صديقه لبشار لان تدري
ماراح تحصل منه شي دكلك ع الاقل عندي رجال
وسمعه وشخصيه لان هي بالحالتين ماراح تخلف...

شجن.. عمه تتوقعين بيوم ترجع قبس؟
بشرى..اذا درت بابنهه ترجع علموده
ومااعتقد يابنتي ترجع لبشار شوفي شكد مجروحه
من عنده وهيج عافت كلشي وراهه وراحت...

شجن.. اتمنى ترجع وخلي لاتسامحنه
بس ابنهه يتربى بحضنهه
بشرى..الله يسمع منج

شجن.. مرت الايام وسرور تجي طبيعيه
تلاعب اموري اذا بشار موجود متذكر ماما
واذا وحدنه كله ماما وحبيب امك..

بيوم الي اجتنه سولفت ع ام احمد القابله
كالت بشار موسحب الدعوه عنهه حته تعترف
خلاهه تأمن ومن رجع لدوامه رجع من جديد
حرك الدعوه

وطالعه عليهه الشرطه وماخذيهه
ومعترفه ع الممرضات الوياهه فاصليهن
من الوضيفه وحته الدكتوره وياهن بالدعوه
مع العلم ماعدهه شي

وحجيت ويه بشار كالي لتدخلين هي طبيبتهه
شلون جابت ولاده مبكره وحته ماوكفت يمهه
لو معسره بالولاده وصاير شي عليهه
منو يتحمل النتيجه

واجتني الدكتوره للعياده تتوسل دكول كتابي واصل
لصحه بغداد ودازين عليهه وخاف تخسر
مكانهه هي مالهه ذنب جانت بالاستشاريه
وبشار قافل

خاله احجي وياه الدكتوره انسانه نزيهه
ماتطلع من عدهه هيج شي؟!

ام بشار..هي مودكتورتهه من اول ماوصلت للمستشفى
وموبس قبس هاي الالف من العدهن ولاده يعوفهن
بدون دكتوره بيد الممرضات

خلي تصير عبره للبقيه والله محد يتعض
مدام اكو فلوس ورشاوي لاتخافين عليهه
هسه تطلع منهه وترجع لعيادتهه
والله اعلم شكم وحده عد هاي الدكتوره انحرمت
من ضناهه لان ام احمد موجوده..

شجن.. وهسه ام احمد بالسجن
سرور..اي ومايرضى يتنازل البارحه اجو اهلهه يتوسلون
وشتريد وشتطلب ماقبل كالهم اني والقانون

وهي ميت رجلهه وعيالهه اخذوا جهالهه
واهلهه يتوسلون يكولون بس خلي تطلع ونحبسهه
من البيت ..

شجن.. وشنو الفائده ماسمعتيهه دكول هذا شغلي
هوايه بدلت اطفال وهاي مستعده تقتل الطفل
تخنكه ودكول مات ابطن امه ..

سرور.. بشار بادي بيهم بالسره بس بالقانون
هسه ام احمد وراهه ميامين ...

شجن.. ووين يكدر لميامين السوت هيج
وعدهه فلوس وكله علاقات بالوزاره..

سرور.. اكو بنيه جيرانه اني مااعرفهه
بس بشار كال من صارت السالفه رحت
عليهم طلبت التصوير من عدهم وماقبلوا
كالوا عاطله الكاميرات..

ليش ماقبل شهر تقريبا اندك الباب نزلت فتحته
صادفت العصر وجمعه وبشار راح يتسوك
طلعت بنيه شابه من شافتني مثل التفاجات

سالت ع ام البيت كتلهه اني تفضلي!!
كالت بس اني من اجيت موانتي بنيه اصغر منج
كتلهه هاي ضرتي وماموجوده

كعدت يمي بالحديقه وكالت ابونه دزني عليكم
بيوم من الايام طلب من عدنه تصوير واحنه
خفنه تصير كارثه واحنه نازلين جدد ورفضنه
وهسه ابونه صار ايام يلح عليه
يكول خلي يجون انطيهم التصوير..

وصدك اجه بشار كتله وراحلهم ومنطي التصوير
شجن.. شبي التصوير؟!

سرور.. ماخلاني اشوفه بس صار عصبي
وكام يضرب اي شي كدامه وطلع ل١٢ يله رجع
وماقبل احجي باي موضوع..

شجن.. ظليت افتر شلون اعرف التصوير شبي
اكيد ع قبس وعصب خابرت لعمه بشرى
كالت هسه اخابره ..

ورا ساعه خابرتني كالت هذا العار اسمه
ابو غدير من هاجم ع البيت مصورته كاميرات
الجيران شلون مقاومته قبس وضاربته
ومنهزمه بي وبشار تهمهه هي عدهه علاقه بي..

شجن.. يمه الله يساعد كلبه شكال من شافه
بشرى.. شكال بعد مايفيد الندم ولج يمعزايه كالي
شوصل الحجي الج كتله سرور حاجيه لاهلك
وهذا مخبل مايفوتهه الهه..

شجن.. وفعلا ورا نص ساعه دك تليفون سرور
ابتسمت كالت بشار جاوبته بس كالت الو نسمع صوته
عالي يرزل بيهه بس مانسمع شيكول..

وهي اخذت تليفونهه وكامت ساكته وهو
انهد بيهه بلعتهه وسكتت من رجعت مبين
عليهه بس تكابر بس الرزاله مبينه قويه
لان ماحجت ولاكلمه بعد...
...

قبس.. اليوم الي انكتب عليه العذاب بي
اليوم الطلعت مهزومه ورحت للمصح النفسي
اليوم الواجهت شكم واحد تحارش بيه

اليوم طلعت من بيتي وكصيت شعري
وعفته ع الميز
اليوم فاركت بشار وفاركت بيتي
اليوم الي كسر كلبي وحطمه ..

اليوم زواج بشار من سرور
اليوم الكرهت نفسي وكرهت حبي
اله
كلبي ينزف راسي مصدع روحي
تتكطع ...

انعادت عليه كل الذكريات
وكعدت افكر واكول اليوم نفسه
اليوم التقربلهه بي ونفسه صارت
حامل وجابت ولد واخذت بيتي
واخذت حبيبي

هي نفسهه العيرتني بمرضي النفسيي
نفسهه الجانت توجه السؤال لبشار
ومن حجيت دكلي انتي مريضه
نفسيا مااخذ جواب من عندج

انتي نفسج اخذتي بيتي
وصرتي الكل بالكل وام امير
واني وين؟؟ وووووين اني؟؟

اني انفيت بالغربه لا ام ولا اخت
وياي لاسند ولا واحد يطيب خاطري
اذا متت هنا اندفن ويضيع اثري ..

خليت راسي بين رجليه وبجيت
ربي ارحمني تعبت حيييل تعبت
اخذ امانتك انطي روحي لواحد محتاج
عنده جهال اني ماعندي شي اعيش علموده..

مااتحملت هاي سنه كامله بساعاتهه
وايامهه وشهورهه عشتهه بالم وحدي
وحدي يابشار وانت عندك مرتك وابنك

ماكدرت اتحمل كمت للتليفون فتحته
رحت ع حسابه فتحت الماسنجر
ومن حسابي راسلته كتبتله رساله

تذكر هذا اليوم ؟؟تذكر كسرتي؟!
انت عريس زفوك واني افتر بالشوارع
اريد مكان انام بي !!
تذكر يا ابو امير؟؟ حبيت اذكرك بعيد
زواجك واهنيك ؟!!

.
.
يتببببببع.......... متابعه ممتعه