رواية قمع المشاعر الفصل السادس والعشرون 26 - بقلم Rozaya1122

قمع المشاعر.... البارت السابع والعشرون..
للكاتبة زهراء ( روزايه)...

( بارت طويل تعويض واني اعتذر حيل لان صارت عندي شغله وماكدرت ابلغكم احبكم)

كلشي يوجع أنته والدنيا وشتا الله
وخبصة الوادم وحضي
والضياع الماد رجله بوجه عمري
والأماني المدري ياهو الباگ بيهن
كلها تركتني وحيد اشماله دهري؟؟

قبس...ماكدرت استوعب السمعته وماعرفت شسوي غير اطلع من الغرفه وشجن تصيح وراي لاقبس واني واكفه يم الدرج واصيح. عمو عمر بكل صوتي

لازمتني شجن من ايدي وتتوسل بيه الله عليج لاتحجين اباوع لايدهه الترجف شنو هالضعف العدهه نزل عمر بس الفانيله الداخليه ورا مرته  وطلع عمو وجدو كلهم وهم مفزوعين من صوتي

شجن كعدت بالكاع مثل الجابو ابنهه شهيد دك ع راسهه وصدرهه ورجليهه بحيث من هول المنظر مالتهه ارتديت لليورا جانت تشلع بشعرهه وكانو مشكل حيله كل خصله تسحبهه ع طولهه وتشمرهه

ماتدري بنفسهه شجاي تسوي انهارت تماما امهه حاضنتهه بس تريد تبعد اديهه ماتكدر دنك عمو عادل عليهه ولزم اديهه وهي تهز براسهه وتصرخ بعلو صوتهه وتبجي وعبالك طلعت الكتمان مال السنين كله

لهدرجه ضعيفه والموضوع مأثر بيهه بسبب جُبنهه التفت عليه عمر سالني شبيهه شجن؟؟ ليش تصيحين شصار؟؟ ضاع الحجي بحلكي كتله هي هيج صارت وصحتكم اباوعلهه حلكهه يابس وكل جسمهه يرجف

عادل.. كوم عمر خلي ناخذهه للمستشفى اختك راح تموت؟؟
بسمه.. عمه قبس منو وياهه ليش هيج حالهه
قبس.. مادري هي وحدهه هيج صارت مثل بلاع الموس صرت لا اكدر ااحجي. ولا اكدر اسكت اشوف فاديه الحاضنه اختهه وتبجي وماتدري اي شي عن اليصير ورا ظهرهه

بسرعه لبسوهه الشال وعبايه اسلاميه وهي تون اخذوهه للمستشفى وكلساع واحد سائلني شبيهه بيبي وجدو ناس كبار حته من الصوت ضغطهم ارتفع ومحد يعرف شجاهه

طبيت للغرفه كعدت خليت ايدي ع كصتي مدنكه طبت فاديه تخابر ببشار كالهه راح اروح وراهم لان هو طالع ماموجود كعدت كدامي وانطت ظهرهه للكنتور وبجت

قبس.. لاتبجين هسه ينطوهه مهدء
فاديه.. قبس اني اختهه ومايوم كعدت حجتلي التمر بي شفتي حالتهه شلون منهاره يعني جاي تعاني من شي وماتحجي شايفه الاخوات شلون يفرحن لاخواتهن واني ماسمعت منهه كلمه ع خطبتي وعبالك من غير ناس

قبس.. لاتلوميهه تدرين بيهه حالتهه النفسيه صفر وتتاثر بسرعه
فاديه.. اي هي هاي المشكله تتاثر بالحجي وموضوع رجلهه سببلهه عقده نفسيه

قبس.. اباوع لفاديه المحروك دمهه ع اختهه ليش هيج ياشجن ظلمتي اختج بسكوتج غيث مستحيل راح يحب فاديه وراح ادخلين اختج بنص هيج عائله وتعرفين وائل احتمال يأذيهه ياربي ساعدني شسوي خاف احجي وتسوي بنفسهه شي واظل عايشه بالندم واخاف اسكت وتنظلم فاديه وهم اظل بروحي...

انتبهت ع فرح واختهه كل هاي الهوسه ماطلعن ومن يوم ماخطبوا فاديه وهن حته مايكعدن ع الاكل ويانه احس هذا البيت مشتعل بس مشاكل وحقد ومؤامرات

لحد الساعه ب١ بليل يله اجو بس سمعت الباب انفتح ركضنه كلنه عمر فوت السياره جوه وبشار عاف سيارته برا ركضت حافيه بس بالجواريب الشتويه واخذتهه من ايد امهه والمغذي بيدهه

نومناهه ع الجربايه وهي مغمضه عيونهه ياربي شكد جبانه حته ماتريد تواجه الواقع تريد تنهزم من كلشي..

ام بشار.. تعالي قبس
قبس.. طلعت وراهه للهول كاعد عمو وبشار وجدو صاحني عمو عادل تعالي بنتي رحت كعدت بصفه
عادل.. شبيهه شجن ليش جنتي تصيحين؟؟ الطبيب يكول عدهه انهيار عصبي اثر صدمه قويه

قبس.. بلعت ريگي ماادري عمو بس هي فجئه هيج صارت واني طلعت صحتكم
عادل.. غير اكو سبب حجت وياج
قبس.. شجن ماتحجي هي ضايجه سالتهه شبيج ماحجت ظليت الح عليهه انهارت

عادل.. راح تموتني هاي البنيه من دون اخواتهه تتاثر هاي يجوز موضوع رجلهه مأثر عليهه وهيج صارت بنتي مااوصيج عينج عليهه واذاصار شي صيحيلنه ...

كام عمو وام بشار راحت للبنات وجدو خطيه راح للغرفته وبس بشار ظل كاعد كمت وكفت كالي تعالي اكعدي وطبطب ع المكان البصفه..

رحت كعدت بصفه جنت حيل يأسانه واحس نفسي مذنبه لان ضامه هيج موضوع واخاف احجي لبشار لان عرفت طبعه شكاك وخاف يأذي شجن..

بشار.. وجهج اصفر ؟؟
قبس.. ااي انهبطت من حالتهه عبالي بيهه شي والتفتت عليه شكد تعبان بهاي الايام حته جوه عيونه اسود  كتله وانت هم حيل تعبان ماتنام ليش هيج عيونك

بشار.. اي والله ياقبس صار ٣ ايام مانايم للصبح تخيلي مجموع الساعات النايمهه ٤ ساعات بهذني الايام ..
قبس.. عزاا بعيني ليش هيج مسوي بروحك بيمن تفكر؟؟

بشار.. اسم الله عينج شاغلتني الشركه بحيث مااهون انام خاف يصير شي
قبس.. شبيهه قصدك سالفه الوزاره
بشار.. موكتلج رحت ندوه للعماره اني جنت مدير بالفاو ومدير ببغداد وكل ندوه احضرهه يمدحون بنظامي هسه بهاي الندوه تفاجات من كام تطلع ملفات مادري منين اجت اخطاء مصيبه ياقبس والمشكله موقع عليهه اني حته ماكدرت احجي واتهم احد

قبس.. شلون هيج انت ادقق كلشي يله توقع؟؟
بشار.. والله ياقبس شاك بميامين مرات استاذ حسين يدقق وياي وهاي الايام ملاحظهه هوايه تحتك بي واعتقد مامتاكد يا اما تبدل بالاوراق او متفقه ويا ماكدر احكم علي..

قبس.. وهسه شراح تسوي؟؟
... صار ٣ ايام كتلج اراجع واقارن بين الملفات من يوم الي اجت بيه وقبل جيتهه بشهر اريد اشوف السالفه شنو وشلون وصلت لوزاره لازم الهه ايد بيهه لان هي اجت عن طريق الوزير..

قبس.. اساعدك اني ادقق وياك حته نخلص بسرعه
بشار.. هو هم هيج اني اليوم انطيتهه اجازه اجباريه مده اسبوع ولازم اسبوع واكمل تتدقيق حته اشوف خلال هذا الاسبوع يصير خطأ لولا

قبس.. مثلا شنو الاخطاء الصايره؟؟
بشار.. اكو اخطاء مثلا تصدير كذا كميه مكتوب رقم خيالي وداخل بالحاسبه شلون دخل لازم اكو اطراف متعاونه اذا موبالصباحي بالمسائي؟؟

قبس.. اني اساعدك باجر علمني شلون وادقق وياك
بشار.. قبس خطبه فاديه الجمعه تريدين وياهه لو قبلهه نسويهه
قبس.. اني ماريد حفله ولاصالون بس نعقد ونلبس حلقات؟؟
بشار.. ليش ؟؟
قبس.. ماادري لان قلقه ع شجن وانت منا ضايج وماريد اسمع كلمه من فرح لذلك اتجنب هالشي اذا الله سهل عود اعوض الحفله بالحنه

بشار.. ممم بكيفج اني علمودج خاف تريدين حفله؟؟
قبس.. لا مااريد
بشار.. لعد باجر لا اداومين والعصر نعقد
قبس.. دنكت وكتله ان شاء الله احس فرحتي ضاعت من ورا شجن

حيل ضايجه ومقهوره من باب فاديه وكعت ضحيه انتقام ومن باب شلون راح تعيش ويه هيج عائله ماعدهه مخافه الله ومن جهه شجن الخسرت كلشي وبعدهه مصره وساكته عقلي مشوش لدرجه حته فرحتي بخطبتي اختفت ومنا بشار ووضع الشركه

ثاني يوم الصبح طلعت اني وام بشار اشتريت حلقات بس هدى وعمه بشرى اجن عقدلنه الشيخ واني لابسه قفطان مغربي باركولي وكالعاده فرح واختهه مختفيات نسيت اسال عليهن..

شويه طب بشار هلهلت عمه بشرى وتلكته بالجكليت لبسنه الحلقات وباسني من راسي كلهه تقريبا ساعه والكل راح لبيته ..

طبيت للغرفه بدلت فاديه كاعده يم شجن وتحجي وياهه وهي ماتجاوب ساكته
فاديه.. الله عليج عندي عشر اخوات اني مواختج الصغيره لافرحتيلي ولا اهتميتي خاف ضايجه من عندي؟؟

شجن.. لا عليمن اضوج؟؟
فاديه.. لان راح اتزوج قبلج؟؟ هيج تحسسيني حته ماسالتيني شلبس وششتريتي ذهب وشوكت الحفله ؟؟
شجن.. اي حقج التهيت عنج لان مالي خلك بس لاتزعلين

فاديه.. موقصه ازعل بس صدكي ياشجن مقهوره يعني صابرين مرت عمر هي الي قايمه بكلشي وتحضر وتختار صالون وانتي بالجذب ماكلفتي نفسج وكلتي اختي معيشه نفسج بهالوضع عليمن واليقهر حته فرح وفاطمه راحن لبيت عمهن وهم محد باركلي وعبالك مدري شصاير

شجن.. هسه اصير زينه واكوم
فاديه.. وانتي شبيج مثلا بس كله هذا ضعف من عندج وتتحسسين من كلشي الناس اشكال بيهه احمدي الله واشكري

ويايه طالبه مريضه بالسرطان ومايوم اختفت ضحكتهه تخيلي تضرب جرعه وتجي تمتحن وتضحك وتشاقه حته الواحد من يشوفهه يستحي ع نفسه اذا يحزن والله ناعم علي بكلشي

هوايه ناس بيهم المرض الموزين وكافحوا وجاهدو بهذا المرض وصارو رمز والناس الله منطيهه كلشي وبعدهه تتذمر احمدي الله واشكري تكدرين تمشين واهلج ويوميه تنامين بدون الم شحال هاي الناس الكاعدين يعدون ايامهم

قبس.. فاديه لاتعبين نفسج مايفيد ترى الحجي ويه شجن يطب منا يطلع منا
فاديه.. صحيح والله اصلا هذا استهلاك طاقه لان اصلا احجي وهي بالهه مدري وين كامت فاديه واني باوعت لشجن وهزيت راسي باسى

اكو مثل يگولونه اهلنه اليجي من ايده عسى الله يزيده وشجن هي دمرت نفسهه وجاي تخلص ع روحهه شويه شويه خاف باقي من ذاتهه قطره تريد تنهيهه كلهه...

وضع البيت مابي راحه حته من كعدنه ع العشه الكل ساكت صارت ب٩ تقريبا صاحني بشار تعالي وياي حته ادققيين الاوراق ...

صعد هو واني رحت للغرفه عدلت شويه وخليت عطر وصعدت ورا دكيت الباب ودخلت جان كاعد بالكاع الاوراق داير مدايره والحاسبه مفتوحه وبصفه باكيت الجكاير والجداحه..

بشار.. تعالي اكعدي وسوالي مكان بصفه وظل يعلمني بلبدايه شلون ادقق والجكاره بحلكه تيهت ساعه اباوعله وريحه الجكاره سطرتني كلساع يكلي افتهمتي اكله ااي ...

بديت ادقق شكم ورقه وكلساع اسأله بس جدي بالشغل بحيث مركز حيل النقطه ماتفوته مرت تقريبا نص ساعه دققت العندي مابيهن غلط واخذت شكم ورقه بعد بس الجكاير سطرتني وحده ورا وحده جان مدنك ع الورقه واباوعله يدخن من وصلهه لحلكه بسرعه سحبتهه من عنده وطفيتهه ...

بشار... ولج قبس
قبس.. موتتني بيهه سطرتني من كعدت لسه احسبهن شكم وحده طيرت نص الباكيت راح تهلك نفسك بيهه
بشار.. ذب الاوراق من ايده واندار عليه جان يكول ليش تتحارشين بيه

قبس.. ما اتحارش بس والله اختنكت
بشار.. عندي حل مو اختنكتي خليني افتحلج مجرى للتنفس حته ماتختنكين بعد

قبس.. مافهمت!!!
بشار.. صار يتقرب اكثر واني ادنى شويه وهو يحجي ليش كلشي احجي ماتفهمي ؟؟
قبس.. بشار شبيييييك جريتهه من حجيت؟؟

ايده انمدت ع خصري وسحبني علي حيل وكعت بحضنه وهو كاعد ايدي صار ع صدره وعيني بعينه جنت شايله شعري كعكه العاديه مد ايده ع القراصه فتحهه نزل شعري ع اكتافي..

هنا دكات كلبي علنت الخطر وبدت ادك بصوره سريعه وبصوت عالي اريد اظل بحضنه واباوع بعيونه ومااريد اضعف مثل ماباسني وظليت يومين احس نفسي مبنجه...

سحبني اكثر علي جان ثاني رجل ورجل مدده خلاني كاعده بالكاع بس راسي صار ع رجله الثانيهه الواكفه ورجليه عبرهن ع الممدوده وايده تلعب بشعري ويباوع بعيوني...

فهميت واني بحضنه واتمنى ادخل بنص صدره قربه موبس يوترني لا تعديت هاي المرحله وصرت اتمنى لمسه من عنده ولان هسه احنه بالحلال لذلك جنت مطمئنه حجيت بصوت ناعم

قبس.. خلي نكمل
بشار.. خليني اشوف هاي العيون؟؟
قبس.. تحبهن
بشار.. حييييل اعشقهن سبني سبي؟؟
قبس.. بس عيوني؟؟

بشار.. لا كلج من راسج لرجلج تعجبيني بس عيونج اخذن حيلي احبهن حيل ودنك عليه غمضت بسرعه وباسني من عيوني اثنينهن ومن بيناتهن بوسات خفيفه وهوايه

فتحت عيوني وايدي مخليتهه ع كلبي احس بي يريد يكسر الحواجز ويطلع يحضنه ايده اداعب شعري واحس باصابيعه وهي تلامس كل خليه احساس بداخلي...

قبس... شكد تحبني؟؟
بشار.. ماينوصف بالحجي بس اني احبج حيل واحتمال يجي ابالج اني قبلج هم حبيت بس مومثل هالحب لان ذاك جان طيش وخاصه اول سنه كليه بس حبيتج بعقلي قبل گلبي وبهيج عمر صعب الانسان يحب بسهوله ...

قبس.. احب اسمع كلامه وخاصه نبرته الهادئه وعطره استنشقه بكل احساس بحيث احسه يلامس اصغر خليه بداخلي

مد ايده جوه راسي ورفعه ليفوك وشفايفه لامست شفايفي غمضت عيوني وبادلته بكل لهفه وحب رغم تجربتي الاولى بهذيج بالمكتب مابادلته بس هنا اختلفت ورغم قله خبرتي بس هو احتواني بالكامل...

ضمني لصدره حيل وهو يحس بنبضاتي ويسألني ليش احسج مامجربه هالشي وبعدج خام؟؟

كلساع اريده اكله اااي اني بعدني بنيه وماسمحت لاحد يلمسني اتحملت الضيم واشتغل واجيب لعزيز بس حته لايلمسني لان ردت بيوم الي احس نفسي مره ويدخل عليه رجال بمعنى الكلمه وردت احس باحساس اني انثى ماردت عزيز يلوثني

بس ماحجيت عفتهه للزمن هو كفيل يخبره وهذيج الساعه اباوع بعيونه واشوف ردة فعله شنو بعد ماجان يفكر باسوء الامور ...

سحبت نفسي من حضنه وكعدت بصفه وبسته من خده يله بشار خلي انكمل باجر ورانه دوام!!
بشار.. تعالي خليج يمي عوفي الدوام اني مديرج وانطيج اجازه

قبس.. لا ميصير مو اليوم ماداومت واني هم ضجت من البيت كئيب
بشار.. اي صح البيت ماينطاق حته امي اجتني قبلج دكول احس نفسي مختنكه وحجزتلهه ع باجر لطبيب
قبس.. شو هي كلهه صارت بسرعه عمتي بسمه وبناتهه اجن يمنه وحاله شجن وخطبه فاديه..

بشار.. والله ياقبس ماقصرنه ويه شجن اني اخوهه والف مره كتلهه شاركيني واحجيلي موضوع رجلهه مأثر عليهه وعمليتهه جانت مكلفه حيل وربطولهه مسند كله دفعته من عندي حته لاتحس بنقص بس هي ماجاي تساعد نفسهه وتتاثر بكلشي..

قبس.. هو يحجي واني اكول بكلبي انت منا شكاك واذا عرفت بسالفه شجن شتسوي يجوز تكتل وائل واخسرك نفضت الافكار من راسي ورجعت ويا ندقق لحدما صارت ب١٢ نعست حيل هو ارتجى ع الجربايه واني لميت الهوسه ورتبت المكان وكتله راح اروح تصبح ع خير باسني من خدي وطلعت...

من سديت الباب بعدني بصاله كلت اغسل وانزل اسمع الصوت من غرفه عمر مدري تبجي مدري شنو مدري يكتلهه صوت مااعرف اميزه سمعتهه تون ودكله لاعمر ع كيفك بلحظه تخيلي تبجي ماردت اسمع بسرعه نزلت ...

حضرت ملابسي ونمت ثاني يوم رحت للدوام اول ماطبيت سلمت ع سناء انتبهت ع ايدي
سناء.. انخطبتي!!!
قبس... ااااي
سناء.. كللللوووووش ولج تعالي ابوسج كامن بوسني وصدك فرحانات وكعدت احجيلهن منو خطيبي وكلما اكول بشار دكلي ولج الاستاذ بشار...

راحت عاليه اشترت علبه جكليت ووزعتهه ع الموظفات حسيتهن شاركني الفرحه اكثر من اهل البيت وراحن لبشار باركله وعاليه دكول عينج لاتشوفين ميامين حته جكليت مااخذت وطشت الخطبه بكل الشركه وكلساع وحده جايه تباركلي بس بالحقيقه جايات يشوفن منو خطيبه المدير لان اكو منهم ماعرفهن ...

اليوم جمعه وبيتنه هوسه عماتي وخالات بشار كلهه جايه ع الخطبه فاديه بصالون راحت وياهه صابرين وفرح واختهه يم بيت عمهن ولحد الان ماعرفنه الاسباب شنو عرفت فرح ع بشار فاطمه شبيهه وهن ماتفوتهن حفله هالمره شلون فاتتهن

اني مارحت للصالون بس لبست فستان ٩٠ وتلث ارباع ردنه بسيط مابي شي ويجي قالب ع الجسم لونه فيروزي  رحت ع شجن دايره وجهه ع الحايط قفلت الباب وسحلتهه سحل من الفراش لبستهه المسند وهي تدفع بيه بوحشيه وتصيح ماريد

قبس.. موبكيفج تكومين هسه لا اطلع اخرب فرحه اختج واسويهه هوسه شنو ماتريدين ماتستحين هيج تصرفين استحي من اختج خطيه شكم اخت عدهه غير تشاركيهه الفرحه هدى لازمه البيت وراحت وياهه صابرين وعينهه مدمعه ليش خطيه تعاقبين فاديه شعليهه

شجن مصختيهه فدمره وبسببج لااني فرحت بخطوبتي ولا امج فرحت بخطوبه بشار لان بس تبجي عليج ودكول بنتي بيهه شي بسببج ضيعتي فرحتنه كلنه وهسه اختج هم انتي سكتي انتي تتحملين النتيجه مو تعاقبين غيرج

شجن.. شتريدين من عندي ابدل واطلع كدامه واشوفه يلبس اختي الذهب
قبس.. من ايدج تتحملين انتي انتي بعتي غيث بسبيل ترضين وائل وتخضعين لتهديده لذلك تتحملين وحدج مدام ماتقبلين احد يساعدج وحدج تتحملين الذنب..

كومتهه فتحت الكنتور طلعتلهه لبس بنطرون وبلوز طالع الكتف من عنده ع الكمر لان هي ماتلبس قصير علمود رجلهه عفتهه تبدل وطلعت شويه ورجعت سويت شعرهه وحطيتلهه شويه مكياج بس وجهه طافي من اي فرحه

ماالومهه وحقهه بس الجاي تسوي غلط خطيه فاديه ولازم توكف ويه اختهه بهاليوم بدلت وكعدت سمعت صوت الهلاهل اجت فاديه بوجهه للغرفه بس شافت شجن مبدله وكاعده ركضت هي وبدلتهه وحضنتهه وهذيج الفطيره شجن بس تبجي..

نرجس واخواتهه ماقصرن بحيث وكفن وكفه لفاديه عوضنهه اختهه ولو الاخت ماتتعوض وطلعنه كلنه واشتغلت الاغاني والركص بنات خالاتهه وحوراء بنت عمه بشرى بس شجن كاعده وتباوع ...

شويه واجو اهل العريس جانت فرحه جبيره بحيث عماتي وخالات فاديه ماوكفن هلاهل وهم هوسلي لان ماسويت حفله بس عيني تتنقل بين فاديه وبين شجن...

اخذو فاديه عقدت وامه تهلهل وتبوس بيهه هالحيه المنافقه هاي ماعدهه ضمير دمرت شجن هالمسكينه شسوت حته هيج اطعنيهه بظهرهه وباعز وحده عدهه اختهه...

مرات اصفن واكول رب العالمين قادر ع كل شي يكدر بعد اسنين ويجمع غيث وشجن واحتمال يموت وائل بس بهاي الدكه وخطبته لفاديه صارت جمعتهم شي فوق المستحيل قصه حبهم موبس انتهت لا بمرور السنين تتلاشى وحته الواحد عيب يذكرهه ...

جنت اركص اني ونرجس وحوراء واشوف ام وائل تزحف من مكانهه كلساع وتريد تدنى ع شجن اكيد تريد تذب سمهه كام ماكملت تريد تنهي هاي البنيه ...

ظليت اراقب بيهه من شفتهه ادنت حيل وصارت قريبه بسرعه رحت كعدت بصف شجن ومديت راسي الهه كتلهه خير ام وائل اكوشي ؟؟

ام وائل.. لاماكو بس اريد اشوف شجن من بعيد مااشوفهه
قبس.. صوت الدي جي عالي تقربت صار راسي بحضن شجن وكتلهه تسمعيني موو اعرف سوالفج كلهه واعرف انتي مره مامرحمنه وحته نور محمد مابوجهج

ام وائل.. هاي تحجين عليه وين منال شنو هالتربيه هستوهه رادت تصيح لزمت ايدهه
قبس.. عايفه التربيه الج اسمعيني زين وحق الله وروح اخوتي اذا ما احترمتي شيباتج هسه اكلب حفله ابنج عزاا عليج بس تقدير لفاديه ساكته

خاف عبالج ماادري كلي لابنج الثور الجبير العار وائل اذا هو رجال اذا ذره رجوله عنده يحترم نفسه ويعوف شجن ادري بي واحد طايح حظه وجبان وراح يهدد مثل ماهدد المسكينه بس لا مايعرفني بعده ورا ورا لحدما انومه بمكبره النجف وهااا نسيت اكلج وانتي خاف الج نيه تحجين كدام احد لو اتبعين خطط ابنج وتريدين توكعين بين الاخوات ترى عندي تسجيل الج بيوم الجيتي وتفشرين ع شجن هسه اخليهم يطلعوج سحل منا ...

سحبت ايدهه حيل وكامت للمطبخ خلصت منهه باوعتلي شجن كمت اكمل ركص وشويه وكالو راح يفوت غيث رحت لبست عبايه اسلاميه وشال لان تعليمات بشار هاي قبل ماتبدي الحفله كالي..

شفت شجن ابتعدت عن مكانهه وكفت باب غرفه امهه وهو طب واخته تلكته تهلهل هي وخالته اخت ام بشار الجبيره شلون هيئه رغم الحزن ينقره بعيونه بس انيق حيل ومرتب شعره وابتسم بوجه الكل وكعد بصفهه

امه اختفت بس مرت ساره مرت وائل واخته موجودات وكام يلبسهه الذهب بس لاحظته ابد ماباوع لفاديه جان يشتت نظره حته لا يشوفهه واكثر من مره عينه تفتر  بس والله سبع كدر يوكف بهاي الوكفه ويلبس ذهب لاخت حبيبته ليش هيج الزلم بالخيانه تطلع كلهه اسباع...

التفتت ع مكان شجن ماشفتهه رحت وراهه لغرفه اهلهه لكيتهه كاعده وتهز برجلهه  رغم ماتبجي بس محتقنه من الالم ردت احجي ماخلتني بس كالت هاهي كلشي انتهى وهو زوج اختي هسه..

عفتهه وطلعت وهو هم طلع ما اتاخر خلصت الحفله وكل واحد راح لبيته وفاديه فرحانه وتحجي لشجن عن الشعور وتشوفهه الذهب وهي بس دكلهه اي حلو بالعافيه تالي فاديه ضاجت وكامت...

شجن... من هاي اللحظه وحياتي عباره عن متاهه وصارت مثل بيت العنكبوت شي مرتبط بشي بس ينسحب خيط تنفتح كل السالفه وموطرف واحد يتأذى راح الاذيه توصل للكل داخلي انكسر مثل كسرة المرايه وتهشم وصار حطام

مااكدر اعبر عن اي شي لان الالم البكلبي يفوق الكلام الي اكوله غيث حبيبي وحبيته حب موطبيعي ومن خوفي علي لايتاذه من اخو تركته وجنت مهيئه نفسي لخطبته بس ماتوقعت توصل لاختي هو بس كسر كلبي كسر ظهري وانقسم نصين شلون اباوع بوجه فاديه وشلون تكعد تحجيلي عنه واكدر اسمعهه...

انتهت اجازتي وضغطت ع نفسي حته اداوم بس جسد بدون روح تعبت نفسي وتعبت اهلي بيومهه رحت للكليه والكل يتحمدلي ع السلامه لان جنت مريضه واشوف الولد احمد باليوم يجي كل ريست بحجه بنت عمه بس يوكف بعيد ويشوفني

مافكرت ابد اقبل بخطبته ولاردت اصلح شي انكسر بكسره ثانيه لذلك كلما تفتح الموضوع بنت عمه اسده هذا الحجي بعد مرور اسبوع خطبه فاديه وغيث لايخابرهه ولايجي...

اعالج بكلبي شويه بالكليه التهي بس ارجع للبيت مااتحمل اكعد ويه احد بسرعه اخذ علاجي وانام وهيج مشت الايام لحد يوم جان اكو امتحان بس اني ماامتحنت لان ماماخذه المحاظره والدكتور عنده علم بحالتي وكال غير يوم امتحنج..

طلعت برا كعدت جنت لابسه زي جامعة قميص ابيض وستره طويله وبنطرون اسود وشال تفاحي مكياجي بسيط بس حته اغطي السواد الجوه عيوني  مااحس غير احمد يكعد يمي وبيده كوبين نسكافيه قربلي واحد وتحمدلي ع السلامه باوعت للساعه ب١٠ ونص واحمد ماحجه غير ع الامتحان

مدنكه واحضر بنفسي حته اكوم اروح اكعد بغير مكان احسنلي لاتجيني حجايه من ورا بس الصوت الجاني فززني من مكاني مااحس غير وائل واكف ع راسي بزيه العسكري وهو يخزر بيه وياشر ع احمد ويكلي منو هذا؟؟

بعدني مامجاوبه وماانكر الخوف انرسم ع وجهي جاوبه احمد العفو من حضرتك اني زميلهه تفضل رايد شي؟؟ بسرعه وائل هجم ع احمد وضربه بوكس  دفعت وائل واحمد هم كام ضربه بس وائل اضخم واقوى بحيث حته قميص احمد شكه وادخلو ولد موجودين وائل يغلط ويفشر واحمد اخذو جماعته صرت فرجه للكل من ورا وكل مجموعه واكفين يسولفون ويباوعلنه..  

التفت عليه  جرني من ايدي  امشي واتعثر واكله اترك ايدي فضحتني الله لاينطيك بس لان نجماته ومسدسه محد حاجاه والمصيبه حته الامن بالباب يعرفو جريت ايدي من عنده حيل حته ردت اوكع وكتله انت صدك ماتستحي بصفتك شنو وجاي هاد عليه...

وائل.. امشي كدامي لا افضحج واخابر اخوج
شجن.. خابر اخوي مامسويه شي والا اكلك اني اخابره واكله تهجم عليه مايصرفله الحجي شلون ارادد بي سحلني سحل اتمنيت بيومهه لوميته ولاهاي الفشله الصارت بالكليه رجلي ماتساعدني وخدرت كمت اسحل بيهه سحل

لحدما وصلني لسيارته وهو يدفع بيه اصعدي رجلي عبالك فات بيهه شيش من نار اريد احاجي دموعي من الالم كامت تجري الله لايوفقك وائل عوفني والله الم الناس عليك

فتح باب السياره ودفعني اريد انزل بس طبك الباب ع اصبع ايدي وهو متعمد وشاف اصبعي شاغت روحي بحيث صرخت وعبالي واحد يساعدني بس مادري الناس كلهه وحوش كمت ادك بالباب افتحه وهو واكف فرفحت روحي حسيته راح ينشلع من مكانه فتح الباب لو انتهيت اريد الزمه مااكدر كمت اصرخ بعلو صوتي ساعدوني ومحد مهتملي يفوتون من يم السياره يباوعون ويروحون وابو الامن صافن علينه وماسوه شي....

حرك السياره واني اعيط وهو سحب جنطتي واخذ تليفوني حطه بجيبه احس صوتي طبك من الصياح بس بدون جدوى كمت اتوسل لافاد كمت اغلط يزود وين ماخذني وائل

وائل... منو هذا العار الكاعدة ادكين فج تريدين تموتيني ماخلصتج من غيث جبتي هذا اكتله والله اكتله
شجن.. شعليك انت شكو تدخل ماكفاك السويته بيه حقير انت ماعندك ذره غيره ماتخاف الله غيث وعفته شتريد من عندي

وائل.. اريدج انتي لو اخر يوم بعمرج ماخليج تروحين لغيري اخذج اخذج
شجن.. لوتموت ماتحقق هاي امنيتك وحته هذا الولد شوفه راح يخطبني واركع راسك بالحايط بس ارجع اسولف لبشار لان ماتستاهل واحد يكول عليك خطيه وخاف يكتلوك

وائل.. مايهم احجي لبشار ولمرت اخوج هاي اذا مااخليهه تتمنى الموت كليلهه يكول وائل يوميه اخليهه تحلم بمكبره النجف

شجن.. ماعليك عتب لان انت واحد خسيس وكلشي يطلع من عندك بس هاي الاوهام العايش بيهه انساهه لوتموت ماتحصلني..

وائل... تريدين تزوجين شجونه مو؟؟  اني الج اذا مستعجلة ع زواج هسة اخذج وادللج بقمة الرومانسية ادري بيج ترفه وماتتحملين واليوم راح ادللج مثل ماتريدين

شجن.. صرخت وضربت الجامه اتمنيت اكدر اطلع منهه كلبي مفرفح من الم اصبعي ورجلي وروحي بدت تذوب كن الالم مثل الشمعه لحدماوصلني لنفس البيت الاخذني بي هنا انهاريت كلشي انعاد عليه خسرت صحتي ماريد اخسر الاكبر عوفني وائل واتوسل بي

وين راحت الناس وين اهل الرحم محد سمع صوتي كلهه ساده الباب وحته اليباوع لسياره مايسوي شي عبالهم مرته والمصيبه نجماته ومسدسه تخلي الواحد لو ينذبح كدامهم مايتدخلون...

نزلني من السياره وهو مخلي ايده ع حلكي ودفعني بنص الهول وقفل الباب صرخت صرخه حسيت بكل بغداد سمعتهه بلاعيمي طبكن واحتاجيت حمام من الخوف

ازحف بالكاع وارجع ليورا وهو ينزع بملابسه ويكلي اجيتج بكل الطرق مافاد هاي راح تنفعج حيل

انتهيت بهذا اليوم واندفنت شجن وكلشي حلو بحياتي مر مثل السراب وحل المر بمكانه .....

يتببببع... متابعه شيقه

اغنيه البارت من ساره عاش الذوق حب حبايبي اكثركم يطالب بغش ترى اي غش انزله مو بالواتباد ع حسابي بالفيس لان منا وجاي الاحداث نار وغير متوقعه