رواية قمع المشاعر الفصل الخامس والعشرون 25 - بقلم Rozaya1122

قمع المشاعر.... البارت السادس والعشرون..
للكاتبة زهراء ( روزايه)...

‏أهم بيمن ..؟  وأحن ألمن ..؟
ياهو يبلل عيوني
و احضنه بـ شوف
أغني ألمن ..؟  وأصيب ألمن ..؟
أشو عشرين من گلبي
أنگضن بالخوف
....

قبس.. مجرد ما اتذكر هاي اللحظه لا اراديا ابتسم وترجع تتسلل الفرحه لداخلي حته لو جنت ضايجه جانت فرحتي بهذيج اللحظه ماتنوصف اول شي تفاجأت بكلام عمو رغم بشار ماباوعلي من حجه ابو والعيون كلهه اتجهت عليه واني من الخجل ماكدرت اشيل راسي من الكاع..

الحجي.. بابتسامه حلوه كال والله ياعادل يابويه قبس بنتي وعزيزه عليه وهاي كدامكم ووجه كلامه الي يابه قبس شنو رأيج بالسمعتي؟؟

قبس.. بصفي فاديه ضغطت ع ايدهه حيل ماكدرت اشيل راسي ابد الخجل موتني والمشكله كلهه تباوعلي تريدني احجي

فاديه.. جدو خطيه دشوفهه شلون خجلت هسه حته الي يريد يقبل من نظراتكم الواحد يرفض بدون مايفكر ترى تخجل..

ام بشار.. كامت من مكانهه كومي قبس وكمت بدون ما ارفع راسي وبوجهي للغرفه ليش هيج خجلت مواني اريد يخطبني حطيت ايدي على وجهي احسه نار

ام بشار.. اكعدي حبيبه ليش هيج خجلانه واني اكول عليج سباعيه!! حالي من حالج تفاجات شوكت متفق هو وابو ماادري وشوكت بشار حبج ورادج هم ماادري
فاديه.. يله ماما بعدين عرفي وازعلي علي ليش ماكالج بس بلاول اخذي الموافقه من عدهه وروحي  بشريهم لان تلگين بشار كاعد ع نار ..

ام بشار.. ها امي قبس موافقه لو تفكرين؟
قبس.. شويه بس انطوني مجال ردت احس باحساس البنات من يجوهن خطابه وتفكر اي احساس اعيشه هسه هو اول واحد جاي اعيشه ويه بشار ...

ام بشار.. اخذي راحتج فكري زين وبعد ما اكعد امدحلج بابني هاي حياتج ماما قرري ورجعينه الجواب طلعت من الغرفه وفاديه وراهه تريد تشوف شكو بسرعه رجعت كالت بشار طلع وماما كالتلهم تفكر انفتح الباب شجن ونرجس ...

شجن.. قبس الله عليج لا اطوليهه ماتتخيلين رغم ضوجتي شكد فرحتلج
نرجس.. يله قبس اليوم لاتنامين ظلي فكري للصبح وبعدين شتفكرين اشو ابن عمي مابي لوله يأبر البي كامل مكمل والكمال لله حلو وشخصيه وشهاده ومتعين ومدير وعنده بيت بعد هم عوزج ترفضين

فاديه.. اسمعي الفطيره ولج شترفض بس بعدهه مصدومه ترى قبقب هي الجابته للدرب وعايشه علاقه حب وانتي ماتدرين
نرجس.. كولي والله!!!

فاديه.. اي والله متشوفي خطبهه كدام الكل بس خطيه ماما ماتدري متفق ويه بابا حته تفاجات
نرجس.. يمه طلعتي موهينه ع كولت عمه بشرى قبيسان هسه المفروض اغنيلج اجيبك للدرب كتلك اجيبك

فاديه.. هسه اسمعني منو بيكم شافت فريحه اني من فرحتي عبالك خطبوني نسيت اباوعلهه
نرجس .. ولج اني ظليت اباوعلهه بس انقهرت عليهه انصدمت وجهه صار اصفر ويمكن كوه مسيطره ع حالهه حته شفتهه فركت عينهه وكامت للمطبخ

فاديه.. حرامات ماشفتهه جان ضحكت عليهه
نرجس.. شو انقهرت اني !! لاتنسين بشار حبهه الاول وحب طفولتهه شكد صار تنتظر تريد خيط امل من عنده
فاديه.. هيج وحده ما يصير ننقهر عليهه هاي امثالهه الي خلن الزلم مايحترمون المره ويكولون ساحلات رواحتهن ليش عبالج بشار هسه ماماخذ نظره بان البنات ينطن مجال بسببهه من كدما سحلت روحهه ولو شويه يحترمهه ويحترم مشاعرهه ويعذر حبهه جان ماخطب كدامهه بس يدري بيهه بدون كرامه..

شجن.. فاديه الحب موبالكيف هي حبته وتعلقت بي وتريده الهه تحاول تجذب نظره باي طريقه
فاديه.. انتي صمت دهرا ونطقه كفرا بله ماتسكتين هوايه بنات عاشن الحب من طرف واحد بس احترمن كرامتهن واكو بنات كدرن يجذبن الرجال بادبهن واخلاقهن مو مثل فرح حارت شسوت وخاصه دكتهه الاخيره

قبس.. اشو كاعدات كدامي وتحجن نسيتن ما اقبل مامسموح الهن تحبهه هو الي
فاديه.. لعد شكو تفكرين؟؟
قبس.. خليني اعيش الشعور شويه شبيكم اذا بسرعه اكول موافقه شيكولون عمامي بينهم شي غير شويه الانسان يحس بقيمه المقابل..

فرح.. انفتح الباب وفاتت هي واختهه هاي انتم مجموعين هنا جنت بالمطبخ تكابر بس مبينه عليهه الحركه هذيج وينهه حته عينهه حمره

فاديه.. اي والله كاعدين انقنع بقبس يوم عيد وتصير مرت اخويه الجبير
نرجس.. يله قبس لاتفكرين بشار ماكو وحده ماتتمنى وماتصدكين شكد فرحانه هسه لان ماعدنه اخ وتربينه سوه لا اطوليهه وتشلعين گلبه موهو يحبج

فاطمه.. عليمن هالجر ياقبس ترى الوحده مثلج تكوم هسه تسجد سجده شكر انتي مطلگه وخطبج زينه الزلم

قبس.. ليش المطلگه مالهه حق تعيش بكرامه واذا اطلكت غير تجربه فاشله مرت بيهه شنو هاي النظره مالتكم ؟؟ راح اكلج هاي الحجايه واحفظيهه ابد لاتنسيهه لاتشمتين ولا تذمين لامطلقه ولا ارمله لان يجي يوم واحتمال توكعين بنفس الموقف

فاطمه... هههه شبيه ناقصني شي حته اتزوج واطلك لا عيوني اني عزيزه اهلي ومن اريد اتزوج اتزوج رجال حقيقي مو اركض ورا الزلم

قبس.. حلو كلامج ياريت الموجودين هنا كلهم يسمعون عيب على ابنيه تركض ورا الزلم وتخبث وتحقر حته تحصل مرادهه

فاديه.. اكلج فاطمه شو جايه حاميه خيرج ان شاء الله عم ولد خال بنيه البشار بشارنه وقبس بنت عمنه وهوست وبت عمنه واختنه تصير جنتنه مانريد الغريبه ادوس عتبتنه

كامت تصفك ونرجس ادك ع باب الكنتور وع الصوت اجت مروه وكومي فاديه قفلي الباب وفرح تريد تطلع وفاديه تجر بيدهه دكلهه لا ابقي خلي نفرح اعرفج تفرحين لبشار ...

اليوم سهره للصبح نرجس وكفت اطبل ع باب الكنتور وفاديه تكمز بالنص نزعت القمصله مال التراك وتهوس بيهه وبشار رايد رادته وعايف بنات ولايته...

ونرجس ترد عليهه هو الشافهه وهو انعجب بيهه وهو الكال لامه روحي خطبيهه
فاديه.. وعمامه وانطو مره والشامت يرجع ليورا شعر شعر..

قبس.. اريد اسكت من الضحك ما اكدر لان فرح ابدهه تكسر الحايط وتطلع من عنده وهاي فاطمه تتمنى تكوم تشلع شعر فاديه ونرجس واني بس اضحك

فاديه.. كافي ولج تعبنه يمه شلون فرحه متاكده بخطوبتي ما افرح هلكد
فاطمه.. شدعوه مالاحظتي نفسج بالغتي ترى هي خطبه؟؟

فاديه.. عيوني انتي اذا بشار وخطب قبس اعيدهه عليج بشار خطب قبس!! فطومه شبيج شو محسستني جنتي تحبينه وضجتي غير تفرحين لابن خالج شجاج مبوزه

فاطمه.. شلون ما افرحله بس لان تمنيتله بنيه مو مطلقه؟؟
قبس.. التفتت عليهه وع فرح الماحجت ولاحرف وماكو داعي تحجي لان اختهه استلمتنه كتلهه فاطمه ترى هذيج وينهه الغيره مبينه عليج ليش ما اطلعين احسنلج لان ما احب وحده حقوده مثلج تشاركني الفرحه

فرح.. كامت يله فاطمه تعالي نكعد يم ماما فتحن الباب وطلعن بعد ماطلعتلهن گرون اثنين ..
فاديه.. ولن امهات دوده راح يموتن ياربي فرحانه فرحه موطبيعيه بس شلون انركعت على وجهه فريحه ام الخطوط ..

ام بشار.. نرجس مروه وينجن يله اهلجن راح يرحون
نرجس.. يله راح نروح دنكت ع قبس باستهه لاطولين حبابه انريد نركص وناكل لحم

راحو بيت عمو عامر واني قررت باجر يله ارجع الجواب وهو هم ماحجه وياي ولاشفته بهاي الليله انام والفرحه تكعدني ليش انام خلي اعيش هذا الشعور الحلو...

ثاني يوم رحت للدوام كالعاده كلشي طبيعي ومن رجعت انطيت موافقتي لام بشار وباستني وكالت الله يتمم عليكم بالخير شكد عجبتني وكبرت بعيني احتمال وحده غيرهه جان ماقبلت بحكم مطلقه او بسبب اهلي بس ابد ماحسستني بشي وجانت فرحانه حيل خابرت اخواتهه وعمه بشرى تبشرهم...

من رجع عمو عادل كالتله وباسني من راسي واشوف الحنيه البعيونه وهو يكلي والله يابنتي هاي امنيتي كلما يجون خطابه عليج انقهرت ومااكدر افاتح بشار واكله ليش ماتخطبهه احتراما الج حته ما اقلل من شأنج كدامه بس من اجه وكالي حضنته وكتله الله يرضى عليك لان حققت هاي الامنيه العندي...

قبس.. شكرا عمو والله انت بمعزه بابا واكثر دنكت ع ايده وبستهه اني اعتذر عن كلشي بدر من عندي وخليتكم بمواقف موحلوه ماعندي اي تبرير لتصرفي بس سامحني وان شاء الله اكون عند حسن ضنكم...

عادل.. لا بنيتي موعيب الانسان يغلط بس عيب على الانسان مايتعلم من غلطه معذوره غلطتي وصححتي غلطج واني وياج وضد ابني ما اسمحله بيوم يستغل ضعفج وبحكم انتي يتيمه اني ابوج وام بشار هي امج ..

قبس.. احس نفسي طايره من الفرح هيج اريد اسمع الناس كلهه دكات كلبي شلون جنت فرحانه صاحتني بيبي وبوستني اشوف الفرحه بعينهم واحد واحد شنو من عائله طيبه ومايعرفون شنو الحقد وشنو الغل...

فرح واختهه حته مايكعدن ويانه ع العشه حابسات نفسهن بالغرفه هم خلصانه من عدهن خفه وراحه ...

اجه بشار المغرب جنت اغسل يم المغسله سلم وصعد ماشافني بس من كعدنه ع العشه عمو عادل فتح الموضوع وكاله اتوكل ابني خير البر عاجلهه ماكال شي بس باوعلي بنظره سريعه وكال ان شاء الله

لميت المواعين وكفت اغسلهن هن ع فاديه بس عدهه امتحان واني اغسل بمكانهه طبت صابرين هستوهه جايه من اهلهه سلمت وصعدت  كملت المواعين واريد اروح للغرفه صاح عمر قبس صيحي فاديه وتعالن...

صحت فاديه واجينه كعدنه ومرته هم كاعده وبشار بيبي وجدو وعمه وبناتهه بالغرفه حجه عمو عادل خير مومن عوايدك اللمه
عمر.. لا يابه سوالف نسوان وحجه ويه امه يمه هذني كاعدات كدامج قسمي الشغل هسه

ام بشار.. ليش يمه منو شاكيلك ع الشغل ترى ماتغير شي هو احنه نفسنه ومامقسمينه نساعد بيناتنه
عمر.. هاي قبل بس هسه اختلف صابرين شنو شغلهه؟؟ بس جان يحجي وهو صاك ع اسناني

ام بشار.. مالهه شغل شغلهه وياك بس لا اشوفهه ولاتنزل حته ملابسهه تشرهه فوك
صابرين.. ليش خاله مو اساعد البنات اني احجي قبس مو اسوي عشه وياج؟؟

قبس.. ظليت ساكته اكعد اجذب هي وين تشتغل ماجاوبت
فاديه.. عمر تسمحلي احجي؟؟
عمر.. احجي فاديه لاتضمين شي
فاديه.. عمر تعرفنه احنه اخواتك وهاي قبس اجت غريبه وتاقلمت ويانه وصارت اختنه ونحبهه بس مرتك من عرسكم لسه مايوم شالت ماعون ولا لزمتلهه مكناسه
ام بشار.. اسكتي فاديه

عمر.. لاليش تسكت اني رجال ياخذني الليل ومادري شيصير اريد اوكع ع العله اجي الكاهه تون ليش يابه شبيج؟؟ كالت جنت اشتغل والشغل هواي اني اريد اعرف الصدك والجذب وين يمه اعرف كلبج طيب ومستعده تشيلين الشغل كله حته لا نحجي بس كلشي اله حدود والي يتجاوز الحدود من ما اجه يرد

بشار.. عمر ع كيفك اذا عندك مشكله ويه مرتك لاتجمع الشغل وياهه
عمر.. بشار مرتي دكول الشغل عليه وامي مااخذ منهه حجايه
ام بشار.. عمر البنيه مالهن خلك اني اشيل شغلهه ماتسوه تتعاركون علمود هالشي

عمر.. محد يشيل شغلهه هسه تقسمينه كدامي انتي شايفه الفوك امشي ادوس ع زباله والمخزن ماتكدرين تفوتيله
فاديه.. هو الفوك ع مرتك اني بس انظف غرفه بشار بس غرفتهه والصاله والحمام عليهه هي تستخدمهن مو احنه

طلعت عمه بسمه الظاهر سمعتنه جان دكول حجي عمر صح داده قسمي الشغل البيت جبير واني جاي اشوفج اتعبين اكعدي قسمي وكلنه نشترك حته بناتي...

ام بشار.. ماعليه اني تالي عمر اقسم شغل مايموت الشغل اني اشيله
عمر.. انتي ليش ماجاي تفتهميني يمه قسمي رحمه لابوج

قبس.. جان عصبي بكلامه وموطبيعتهم يدخلون بالشغل بس بعدين عرفنه صابرين اتجذب عليه وتشكه من يجي بان هي لازمه الشغل وهو يدري بسوالفهه وخلاهه امام الامر الواقع

بسمه.. اني اقسم حته مايصير زعل الريوك عليه والغده عليج ام بشار التنظيف مال البيت الجوه على فاديه وفاطمه ومواعين الغده على فرح والعشا على قبس ومواعين العشا والطابق الفوك على صابرين وغرفه بشار ع فاديه وقبس يتعاونن عليهه

ام بشار.. والله ياعمر ماادري شجاك تسوه بله اكو واحد مات من الشغل
بسمه.. هاهي عمه مابيهه زعل وكل واحد اله شغله وانتي داده خليهن يتعلمن قابل زغار...

قبس..  كام عمر ومرته ورا الظاهر متعاركين وعمه بسمه هم كامت فاديه صاحت امهه للمطبخ واني ظليت كاعده بس اني ويا حسيت نفسي متوتره قطع الصمت والهدوء وكال الاسبوع الجاي نحدد موعد الخطبه باجر راح اروح للعماره اكو ندوه ولازم احضرهه

قبس.. رفعت راسي علي جان مدد رجله ع التخم ومعبر ايده ورا التكيه كتله شكد تظل؟؟
بشار.. يوم واحد انتي ظلي ع دوامج وبمكاني المعاون تحتاجين شي خاف السايق مايجي خابري عمر

اجه عمو وبعد ماحجينه ظل يسولف هو وابو ع امور الشغل اني كمت حضرت ملابسي وخليت راسي ع المخده غمضت عيوني وما اعرف الطريق الماشيه بي سعاده لوحزن...

شجن... غيث ماراح من بالي ابد بس احاول اتناسه خاصه م سمعت بي جاي يحضر للخطوبه حاولت شكد ما افكر بي واعتبر حبه انتهى بس ارجع الكه نفسي مربوطه بحبال حبه من جديد...

جان ويايه طالب مرحله اخيره بنت عمه ويانه بالمرحله ولمحتلي اكثر من مره اسمه احمد كالت معجب بيج ويريد يتقدملج بس جنت ارفض مستحيل اسمح لنفسي احب واحد غير غيث رغم الولد ماناقصه شي

اكثر من مره اني وبنت عمه لونكعد بالنادي لو برا بالحدايق يجي بحجه بنت عمه يظل يسولف اني ما احجي التهي لو بالملازم لو اكوم

مره من عدهن جنت وحدي انتظر البنات يطلعن من الامتحان وهو جريء بشكل ما احسه غير واكف ع راسي سلم عليه سالني على بنت عمه جاوبته ع كد السؤال شو هذا اكعد بصفي بس بيناتنه كتب وملازم..

رغم الولد ماحجه اي شي بس ماكدرت اكوم لان جان المسند مال رجلي مفتوح ومنتظره البنات يطلعن حته يسوولي مجال واعدله مااكدر ادنك كدام الكل

تقريبا ربع ساعه كاعد هوساكت بس سال ع الامتحان وبخصوص الماده لان هو مرحله رابعه سؤال وجواب وبس اجت بنت عمه كام اخذهه ع جهه يحجون واني اجن البنات وسويت المسند

بس بيوم ٢٠١٣/١/١٥ الساعه ب٤ العصر كلنه كاعدين داير مداير بيبي انسولف ونحضر شراح نلبس بالخطوبه مال بشار الا فرح ماكاعده ويانه لاهي ولا اختهه بين سالفه وضحكه اندك الباب كامت فاديه فتحته واجتي

جانت ام وائل وبنتهه ساره ومرت وائل رحبت بيهم ماما وكعدو  ما اتحملهم بس كاعده ع اعصابي قبس ماخلتني اكوم وهنا جانت تحجي ام وائل

ام وائل.. همزين مجتمعين ولو احنه اهل اليوم جاييكم خطابه
الحجيه.. هلا بيج ام وائل عزيزه علينه انتي
ام بشار.. كل الهلا بس المن خطابه

ام وائل.. انتم اهلنه وياما اكلنه سوه ولدي تعرفوهم وتربو وياكم وتدرين صار شكد انلح ع غيث انريده يتزوج وهاي كمل كلشي ومكون نفسه بعد ماكو عذر

واليوم اني جايه اطلب ايد فاديه بنيتنه لغيث!!!

ام بشار.. غيوثي بمعزة عمر والله ويوم المنى هاي فاديه اذا تقبل شكو بيهه
ام وائل... احنه اجينه وع كيفهه خلي تفكر وتاخذ راحتهه بس هو غيوثي كال يمه بنت عمتي ومؤدبه وحلوه ليش ادور غريبه

شجن.. دخيلك ربي شنو هذا الالم العصر كلبي مثل واحد واجا ملك الموت لا اكدر اظل كاعده ولا اكوم وهن يحجن تحجي وياي قبس تريد تلهيني بس ارمش بعيوني ما مستوعبه الجاي اسمعه

اكيد غلطت هي جايه تخطبني غيث دزهه عليه مو ع اختي بس هي سوت هيج لا غيث مايأذيني هيج حتلو عفته مايأذيني ابد اني حبيبته وهو يكول اذي نفسي وما اذيج

بس اريدهه تكوم ما اتحملت حجيت بغصه قبس كومي وياي بسرعه كمت وعفتهه تسولف وفاديه كاعده بعدهه مانزلت دمعه وحده من عندي من اثر الصدمه اريد ابجي اريد اضرب نفسي ما اريد اظل ساكته اريد اطلع النار البداخلي...

قبس.. فدوه شجن سيطري ع حالج شوفي نفسج شلون صرتي حلكج يابس ووجهج اصفر
شجن.. ترجف وتحجي لاقبس هي جايه تخطبني بس غلطت مستحيل غيث يسويهه ويجي ع فاديه مو قبس هي غلطانه

قبس.. جانت تحجي بعدم وعي وكلساع اكول راح ينغمى عليهن اتمنيتهه تضرب نفسهه تصيح تبجي بس اثر الصدمه خلتهه ماتعرف شسوي بس عيونهه مفتوحه حته ماترمش

شجن.. لا قبس طلعي كليلهه لاتجذبين غيث رجال ومايسوي هيج شلون تنطي نفسه يباوع لاختي هو موكال اني احبج واني اريدج مستحيل يكسرني باختي خلي يروح يخطب اي وحده بس مو اختي ..

قبس.. بسرعه طلعت علاجهه بي منوم جبرتهه تاخذهه هاي تفضح نفسهه خلي نفتهم السالفه ظليت كاعده يمهه وهي كل جسمهه يرجف وماتبجي شكد صدمه قويه لعد لحدماغفت وطلعت

لكيتهن رايحات وكاعدات يقنعن بفاديه ساكته كالت افكر اخذتهه للمطبخ اريد افتهم من عدهه شنو رايهه
فاديه.. والله ياقبس اني فارغه وماعندي حبيب وغيث ابن خالي صح مايوم باوعتله بنظره ولاهو باوعلي واصلا متعجبه بي شلون داز اهله بس اعتبرهه تقليدي

قبس.. يعني توافقين؟؟
فاديه.. مادري افكر هو ماناقصه شي احتمال اقبل
قبس.. اني ازيد من حال شجن كلبي مثل الطياره كلساع اريد اكلهه فاديه ترى شجن تحبه واكول حرام عليه

لليل اجه عمو وجدو وخابرو بشار وعمر صديقه اصلا اول واحد كال يمه انطو ولاتفكرون غيث بمعنى الكلمه رجال ومابيهه شي زواج تقليدي بنت عمته وصارت القسمه

نوعا ما جانت فاديه قابله ومن حجو وياهه اشوف علامات القبول بعيونهه يومين ورجعوا الجواب البنيه قابله

محد يدري بالمكسوره الضامه راسهه لادوام ولا تحجي واهلهه مايستغربون الوضع لان هي كل مده وصارت هيج اجبرهه تاكل وبس تشوفني تكوم ادموعهه تجري وايدهه ترجف

صعبه حيل صح شجن تخلت عنه بس صعبه اختهه راح تروح لحبيبهه مقهوره ع فاديه اكثر من شجن لان فاديه المظلومه الاكثر وراح تصير ضحيه نار انتقام غيث وغباء شجن...

حاولت وياهه قدر المستطاع ماتنكشف وتخرب فرحه اختهه لان اشوف فاديه فرحانه وتحجي ويه نرجس وصديقاتهه ومنتظرين شوكت يحددون الموعد..

بيومهه جانت الساعه تقريبا ب١١ وربع فاديه برا متابعه مسلسل اني اطلعهه علمود حاله شجن الدايره وجهه للحايط وبس النفس يصعد وينزل

دك تليفونهه اكثر من مره وماقبلت اترد كمت كعدت يمهه كتلهه جاوبي خاف غيث جاوبي شجن ماقبلت!!

ما ادري شلون وهاي موطبيعتي جريت الموبايل من راسهه وفتحت خط كلت خاف غيث ويريد يحجي وياهه وكل ضني يطلع الصار كله جذبه

بس فتحت خط بسرعه فتحت سبيكر هي تاشرلي ماتريد تحجي بس اني حطيته كدام حلكهه اجانه صوت مال واحد تعبان مدري سكران..

شجن احجي اعرفج تسمعيني!! بس كال هيج شجن فتحت عينهه ع وسعهه وعبالك سمعت صوت شبح جرت التليفون من عندي رادت تسده وماخليتهه عبالي غيث

ركضت قفلت الباب وكعدت يمهه والخط مفتوح واشرلهه ماتحجي حته لزمت اديهه لاتاخذه من عندي جنت اسمع بالحجي واحس كل جسمي كزبر ...

صوت واحد يحجي ومبين سكران جان يكول شجن بنيتي اني  احبج والله وحق ملكه وسمواته احبج اعشقج مريض بيج كولي عني كلشي اني انسان سيء بس احبج مااتحمل ازف اخوي ع بنت روحي وابني الربيتة ردتة اليوم قبل باجر ازوجة بس مو عليج شلون ينام ع ريحتج وانتي بحضانة وع صدرة والاريدة يصير بينا يصير ببنج وبين غيث...

انتي بصغرج وانومح بحضني واشم ريحتج ودكات گلبج وانتي طفله جنت اضمج بحضني وانتي نايمه اعرف خنت امانه اهلج وحطيت عيني ع طفله وكبرت كدامي وعيني عليهه بس موبيدي حاولت ويه نفسي هواي امنعهه وماكدرت وانتظر يوم يوم تكبرين وتصيرين الي بس ملكي محد اله حق يحضنج غيري ولا يستنشق ريحتج شجن للموت ما اخليج تصيرين مرت اخوي عوقت رجلج وبعد مستعد اسوي الاكثر بيج وبي وباهلج اذا تمردتي ...

قبس .. ما اتحملت اسمع اي كلمه زايده سديت الخط واباوعلهه مخليه راسهه بالمخده وتكتم شهكاتهه جريتهه حيل ردت اوكعهه اعت بيهه واكلهه احجي هذا وائل ولج هذا هو الدمرج وساكته...

ما اتحملت ضعفهه ابد وجسمي مكزبر من كلام هذا الوسخ ضربتهه راشدي بكل قوتي وكعت ع الجربايه ورجعت جريتهه من شعرهه اعت بي واحجي انفعلت كلش

جبانه ولج ساكته عليمن وين عقلج انتي موبشر ماعندج عقل هالضعف والجبن ليش معوق رجلج وحرمج من حبيبج وبعدج ساكته دفعتهه حيل وهي تبجي

خليت ايدي ع كصتي والتفتت عليهه شلت التليفون مالتهه رافعته واحجي شوفي لو اني لو هو اليوم اذا ما اخلي الصبح مايطلع علي اليوم

حطيت شالي ع راسي وهي تصيح وراي وكامت تريد تلزمني واني طلعت فتحت الباب وصحت عمووو عمر وينكم....

يتببببع... متابعه شيقه...

جانب من تعليقاتكم🤣