رواية قمع المشاعر الفصل السادس وخمسون 56 - بقلم Rozaya1122

قمع المشاعر.... الثاني عشر من الجزء الثاني...
للكاتبة زهراء ( روزايه)...

( بارت طويل اكثر من ٤ الالف كلمه بمقدار بارتين
اتمنى لكم قراءه ممتعه)
....

شجن.. بهاي الفتره صرنه اني واسراء صديقات حيل
بس هذا الشي ماخلاني اطرق لأي شي خاص بيه
جانت تحجيلي عن نفسهه واخوهه الله يرحمه
بس اني جنت احجي مجرد سوالف عابره

ماحجيت الهه عن اي سر يخصني
او يخص العائله بيومهه جنه كاعدين بالحديقه
وماما تقره قران جوه احنه مخلين حبل بالباب
الي من عدنه موغريب يسحب الحبل ويفوت

انفتح الباب جانت هدى وجهالهه وتسحب بالجنط
اول ماشفتهه فزيت من منظرهه عبالي زعلانه
ولو هي ولا مره اجتنه زعلانه دائما دكول غلط المره
تطلع من بيتهه لان الرجال يتفرعن ..

كمت اني واسراء تلكيناهه وسلمنه عليهه
عيوني قلقه انتبهت عليه ضحكت كالت
شبيج مفزوعه عبالج زعلانه؟؟

شجن.. جنطج ماتبشر
هدى.. لا ولج حمزه اليوم بليل يسافر للهند ويه عمه
يسوي عمليه فتح قلب واني اجيت احسن
مااظل وحدي اتبهذل كلساع اخابر عيالي واشغلهم..

شجن.. تعالي نكعد هنا وصحت ع جهالهه ركضوا
لليجوه يندلون العابهم
اسراء.. انطيني الجنط ادخلهم جوه
هدى.. لا حبيبه شكرا عوفيهن هسه من ندخل اخذهن
تعالن نكعد الجو حلو..

شجن.. نزلنه بالحديقه كعدنه سألتهه ع فاديه شلونهه لان راحت وياهه لطبيبه
هدى.. زينه وحملهه زين بس كالتلهه ارتاحي
وغرفتهه فوك كالتلهه حاولي تقللين من الصعده ..

اااي انتم شلونكم شكو ماكو ؟؟
شجن.. ماكو شي على حطة ايدج
هدى.. صابرين شلونهه مانحلت السالفه اتصل عليهه مغلق

شجن.. من حجت هيج اسراء دنكت كتلهه زينه علوش يوميه يجي يمنه وهي مونجحت من السادس عمه بشرى كالت
السنه ترجع لدوامهه..

هدى.. اي احسن شي تسوي .. اكول حبيبه اسراء لاتزعلين مني
اني هم اختج الجبيره
اسراء.. لاما ازعل..

هدى.. انتي راضيه بالصار عائله كامله انهدت الابن بعيد
عن ابو وصابرين تكوم تكعد تتحسب عليج..
اسراء.. واني شنو بيدي ؟؟ اني ماعندي احد بس انتم

هدى.. صح واحنه وياج ومستحيل نقبل تتأذين بس
احنه بهاي الحاله حميناج واذينه صابرين

اسراء.. والله عمر مثل سامر وحته مااشوفه اسألي
شجن والقران. حته من يجي اركض للغرفه...
هدى.. ان شاء الله تظلين هيج..

شجن.. هدى من تحجي تشمر حجيهه دفعه وحده خلت البنيه مدنكه ومااهتمت كلساع اباوع لاسراء
ترفع ايدهه لعينهه تمسحهه وهدى مااهتمت خلت وكامت..

التفتت عليهه لزمت ايدهه لاتبجين اسراء
هدى هذا طبعهه ..
اسراء.. الكالته صح اني بنيت حياتي ع حساب حياة
صابرين شجن ساعديني خليني احجي ويه عمر..

شجن.. وليش اساعدج من يجي حاجي
اسراء.. ميقبل اكثر من مره طلعت اريد احاجي يرفع ايده
بمعنى اسكتي ويكول لاتحجين واصلا مايلتفت ولايوكف وياي

شجن.. لعد اكعدي واسكتي عمر اذا راد يسوي
شي مايجي ياخذ رايج وحته اذا حجيتيله هم ماراح يسمعج..

سكتت وظلينه كاعدين شويه انسولف وشويه نسكت
شفت سياره وكفت بالباب الشال يمي بسرعه خليته ع راسي
انسحب الحبل طلعت عمه بسمه وفرح وهي تصيح وينكم...

دخلن واني كمت استند ع العكازه ودخل وراهن امجد
متغير حيل صار هوايه ماشايفته

شجن.. هلو عمه
بسمه.. هله بشجونه شلونج يمه اسراء
اسراء.. هلو خاله الحمدلله
بسمه.. شو وحدجن وين البقيه
شجن.. تعالو تفضلوا جوه
بسمه لاخلينه نكعد هنااا حلو الجو..

شجن.. نزلوا للحديقه الكراسي متكفي راحت اسراء
جابت فراش وفرشته الهم طلعت ماما وبيبي ع الصوت

صارت هوسه والجهال تكمز وتشلع بالورد
وفرح لاحجت ولافتحت حلكهه احسهه
صايره مؤدبه..

بسمه.. والله جنه يم فطومه مالهه خلك جنهه حامل
وكتلهم خلي انمر على اهلي..
ام بشار.. كل الهلا ام امجد شلونهه فاطمه ويه سليمه مرتاحه؟؟

بسمه.. خير من الله طايره بيهه دكلهه الله يحبني
ورزقني بيج..
شجن.. رفعت راسي باوعتلي ماما بخزره شتت نظري
وسويت نفسي اضحك ويه اسراء وهن يسولفن..

انتبهت ع امجد باوعلي من حجت بسمه ورفضت
بعد ابد ماحجه وياي ولاحاول يفتح موضوع
حته ماجاينه من ذاك اليوم..

بيبي تسولف والتهينه اجه ابن هدى يركض شايل
تليفون امه ويصيح خالو بشار يخابر ويصيح

هدى.. ياا ليش يصيح وحطته ع اذنهه
جان تليفونهه مسكرب من جهالهه يحجي بالسماعه الخارجيه..

بس كالت الو صاح بيهه مدكللي انتن وين؟؟ لا امي
لا شجن عليمن منطيجن تليفونات

هدى..اعصابك يمعود كاعدين برا وعمه بسمه يمنه
والتليفون بيد الجهال اكلك علي صوتك ترى فاتحه
مايك تليفوني عاطل
حسيتهه من كالت هيج مثل النبهته خاف يحجي شي!!

بشار.. هسه المهم ابوي وعمر وجدي يمي يتعشون
وراح ادزلكم ابو حسين يجيبكم !!
هدى.. يعني معزومين يمك؟؟

بشار.. لعد تجون شتسوون ؟؟ اكلج جيبوا اسراء
وياكم !!

جان تصيح عمه بسمه وعمتك مالهه عزيمه؟؟
من حجت هيج خزرهه امجد وهي ضحكت

بشار.. لاطبعا كلت كلكم ماحددت هلا بيج عمه
هدى.. ماشي راح انكوم نتحضر بين مايجي ابو حسين..

شجن.. سدته من عنده وبسرعه كمت اسراء
ماقبلت تجي بس ماما لحت عليهه كالتلهه
شلون تظلين وحدج بلبيت

امجد ماقبل يروح وحته ماقبل ع عمه بسمه
بس بيبي لزكت وكالتله ازعل عليك
اخر شي كالهه من تكملون خابروني..

كلهه طبت جوه واني بدلت وكملت وطلعت
للمغسله البرا غسلت اسناني
نسيت وجود امجد لان يوصل امه
من تمشيت بالطرمه شفته كاعد رجل ع رجل
وصافن عليه..

ارتبكت من عنده مشيت سريع ردت اوكع
بس اجاني صوته شجن اوكفي بس دقيقه
تذكرت اني عاهدت نفسي اواجه الكل
وما انهزم ومااخاف ..

التفتت علي هو كام يريد يجيني
اني تقدمت باتجاهه ونزلت للحديقه
كتله رايد شي؟؟

امجد.. اريد احجي وياج تكدرين هسه؟؟
شجن.. شتحجي؟؟
امجد .. بس هالمره اسمعيني واسمعج واوعدج
ماتشوفيني بعد..

شجن.. احجي اسمعك وجريت الكرسي وكعدت واني
احفر بالكاع بالعكازه..

امجد.. ليش رفضتيني؟؟
شجن.. اول شي لان مامفكره اتزوج حاليا!!
والشي الثاني لان انت امجد

امجد.. بس بوقتهه جان صديق عمر متقدملج وانتي قابله
افهم من هالشي انتي كارهتني؟؟
شجن.. ما اكره احد بس انت مااتقبلك...

امجد.. فرك وجهه ورجع شعره ليورا وحجه بنبره
حاده بس اني اريدج..

شجن.. شوكت صرت تريدني مو جنت كلما تجي
تعيرني برجلي وبعدين انت بنفسك كلت
تك وتك يعني اني ماافيدك بعد ليش جاي تكول اريدج

امجد.. شجن اني من جنت بالكليه عيني عليج
وكل جيه اجي بيهه احبج اكثر واعترف جنت اغثج
بس لان ماتنطيني مجال واسمع عليج غير حجي
ومن يمي ماتقبلين حته تباوعين بوجهي..

شجن.. شتسمع؟؟
امجد.. خليني اكون صريح وياج
اني حبيتج وحجيت لامي عليج من قبل لا اتخرج وامي ماعارضت وكالت اتخرج ونحاجي اهلهه
ورا فتره من اجيت صدمتني امي واخواتي وهن يحجلي
على مشكلة وائل وبشار والسبب شنو؟؟

شجن.. سالتهن شنو السبب؟؟
امجد.. اي سالتهن وحجلي ووائل هم حجالي لان ماصدكتهن
ومن يومهه ماعرفت شسوي لذلك اذيتج بالكلام

شجن.. وشنو الخلاك تغير رايك وترجع تخطبني؟؟
امجد.. لان احبج شجن اني اريدج والله حتخ مانويت بيوم
اسوي علاقه لان اعرفج ماعندج احد وكلت بس اتخرج اخطبهه بس انصدمت بسالفه وائل..

شجن.. مدام انفتح الموضوع احجيلي شنو سمعت من اهلك ووائل؟؟

جنت احجي بس ماانكر رجفه شفايفي
مجرد مااذكر اسم العار كلشي يختل عندي
انتبهت ع امجد صافن عليه وعينه مركزه على
كل ملامحي قرب راسه اكثر وحجه بهمس
اهدئي ليش شفايفج ترجف..

شجن.. غمضت عيني وفتحتهه بملل وكتله
احجي امجد اريد اسمع الينگال عني..

امجد.. كتلج ورا ماكلت لامي وافقت سولفتلي ع المشكله
بالتفصيل بأن وسكت.. جانت رجله تهتز بتوتر

كمل كلامه دفعه وحده وبسرعه بأن انتي
عندج علاقه بوائل ولزمكم بشار
وانتي ماناكره وشايف الرسائل عندج
وقبس جانت الوسيط مالتكم..

شجن... هو يحجي واني كوه لازمه اعصابي
بس خليته يكمل اريد اخلي النقط على الحروف..

امجد.. وبيومهه تعاركت ويه امي وماصدكت
بس كالن روح اسال وائل ورحت سالته مو شك بيج
بس رحت بحجة اتعارك وياا ليش يتهمج
وصدمني شجن من طلع الرسائل ومن خطج
وكله كلام رومانسي والاكثر من هذا دكليله
طلك مرتك وتعال اخطبني..

شجن. وانت اكيد صدكت؟
امجد.. طبعا اصدك الرسائل من خطج وحته متواعده ويا
بالكليه شفت بعيني لذلك كمت اذيج بالكلام
حسيتج رخيصه حبيتي واحد متزوج

شجن.. هسه انت حجيت العندك اذا احجي تسمعني
وتوعدني يا امجد مولان مخليني ابالك
لاااا اريد وعدك وعد اخ واطلع برائتي ..

امجد.. ضيق عيونه وكال احجي شجن
اوعدج انتي بنت خالي وعرضي..
شجن.. هسه مااكدر لان راح انروح من ارجع من بيت
بشار اخابرك بليل انتظرني بس انت وعدتني
مايطلع الكلام وبنفسك تعرف برائتي

امجد.. اوعدج اخذيهه مني
شجن.. كمت من يمه ويه ماكمت حسيت
بدوخه موطبيعيه ارتديت ليورا ردت اوكع
بس ايده سندتني وهو لازمني من زندي
اول مره اكون بهالقرب وعيني بعينه
بسرعه درت وجهي وهو دنك انطاني العكاز ومشيت..

طبيت للمطبخ شربت مي وداخلي
يغلي مااسكت بعد وكافي اتهام باطل بحقي
بس خلي ارجع واني اعرف شلون راح اكلب الموازين من جديد..

شويه واجه ابو حسين السياره ماتكفي هدى وجهالهه واسراء وبيبي وماما راحوا ويه ابوحسين واني ماادري ليش
اختاريت اروح ويه امجد..

طول الطريق عينه بالمرايه بس جنت فاصله
نهائيا بس الشاغل فكري
الحجي الي راح اكوله بليل ..

وصلنه لبيت بشار هو نزلنه وراح بس
ماجان راضي على جية امه بس استحى
من موقفهه ومن ملحة بيبي..

طبينه هجوم على قبس جانت تشاقه ويه بابا
وهو يكلهه شفت بشار مصعد وحده بالصدر
عيونهه حلوه تكتل كتل
وهي تضحك ودكله غير اني هاي !!!

وكفنه وياهه بالمطبخ وبشار ماموجود حجيت وياهه شنو
المناسبه مال العزيمه؟؟

قبس.. ذاك اليوم مو سوينه موقف ارعن ويه صابرين
وجبناهه للبيت وبيومهه من رجعت للبيت تندمت حسيت
نفسي اذيتهه بس رب ضارة نافعه..

عمر مااتحمل شوفة صابرين وخبص نفسه
صار ايام وقرر راح يطلك اسراء وتبقه
يمكم بس مو ع ذمته لان عمامهه اصلا يكولون
شايلين بهاي الاحداث مال داعش..

شجن.. يعني صابرين تدري
قبس.. طبعا هي هاي العزيمه الهه راح تجي وكدام
الكل يعتذرلهه ويطلك اسراء بس لاتحجين هسه لان فرح
موجوده..

شجن.. هاي العزيمه بتفكيرج لو تفكير بشار
قبس.. كومي لج عود بس اخوهه يفكر
طبعا تفكيري لان حسيت بالذنب ذاك اليوم لان شفتهه
تبجي بضعف بس الدفع من اخوج

شجن.. عابتلج اكول كال جيبوا اسراء وياكم
قبس.. ايي عمر كاله خلي تجي  حته يصير الحجي
كدام الكل اكلج فرح شعدهه يمكم

شجن.. قبل شويه اجو وخابر بشار وعمه عزمت نفسهه
حته امجد ماقبل بس بيبي لحت..
قبس.. تعالي نروح نكعد يمهن ماعندي شي بس سويت
حلاوه ودولمه الباقي كله جاهز هسه يجيبه

شجن.. لو ماانتي ام الطبخ شعجب جاهز
قبس.. اليوم جمعه اخوج يمي ماانطاني مجال كعدنه ب١١ ورجعنه نمنه ب١ ومن خابركم جان عمر هستوه جاي وكعدنه
على دكة الباب..

شجن.. حملج شلونه
قبس.. زين الحمدلله اول البارحه رحت لطبيبه وكالت تمام
حبيبي حته نبضاته قويه
شجن.. يعني بين بالسونار ولد؟؟
قبس.. ااي ولد خابرنه خاله بشرناهه
شجن.. الله يكومج بالسلامه وتفرحون بي..

شجن.. رحنه كعدنه بالصاله جانت اللمه حلوه
كلهه تضحك وتسولف اشوف فرح شلون مركزه
على تفاصيل البيت ومن تباوع لقبس تنگلب
لحقد وكره وكل انواع الخباثه ترسم ع وجهه

هدى.. ماما شوفي قبس شلون طايره جنهه فراشه
ام بشار.. الله يسعدهه تستاهل عانت هوايه والله عوضهه
هدى.. والله مولان اخوي بس بشار مدللهه
وهي عرفت شلون تكسبه  ليش قليله البنات الويا بس حبهه مات عليهه..

شجن.. هدى جنت اكول بشار بس انعجب بيهه ماحبهه
هدى.. لا ولج جان يسولفلي يكول من اجت وهي عمرهه ١٣ سنه جنت ناوي بس تكبر اتزوجهه
ومن كبرت ورجعت يكول ماادري شلون حبيتهه
وتعلقت بيهه

شجن.. الله يسعدهم ويبعد عنهم عيون الحساد
هدى.. امين
ام بشار.. امين يارب ويملي البيت اطفال..

شجن.. اذن الاذان وكلهه كامت صلت وصابرين بعدهه ماجتي
كالو تجي ويه بشار من يجيب الاكل
اسراء ماتحركت ولا انطخت بفرح وعازله نفسهه
تحس نفسهه غريبه..

جنت واكفه يم قبس اني وهدى بالمطبخ
وسمعنه هورن السياره اجه
باوعنه من الشباك نزل فتح الباب ودخل السياره للطرمه
نزلت صابرين شايله علوش وعمه بشرى نزلت شايله
السمج..

وقبس ركضت. لبشار مدري شهمس يم
اذنهه وهي تضحك وظلوا برا وعمه بشرى تصيح
وكتهه ولك حبكت الا هسه تتغزل

بشرى.. هااا ولجن بر.... محد بيجن كالت عمتنه نعزمهه
هدى.. والله المغرب خابرنه موتدرين روحه طويله

بشرى.. هسه اجاني واني اصلي وابو حوراء يم اهله
كتله كل واحد ياكل يم اهله
هدى.. لعد وينه بشار شو ماطبوا

بشرى.. فتحت الباب وصاحت ولك يالسبع تحجي صدك
هاي ام عيون موكفتك وتتغزل بيهه برا
والناس كاعده تنتظر العشه

بشار.. عندج مثل عيونهه دشوفيهه جنهه العافيه
قبس.. سويتلهه بايدي موتي قهر
بشرى.. اي والله محد تغزل بيه شلون ماموت قهر

شجن.. طبوا شايلين الاكل وهو دخل للصاله واحنه بالمطيخ
تشاقت وياهه هدى كالتلهه بله الا هسه الغزل مالته..

قبس.. لعد شنو الغزل اله اوقات ترى اخوج بكل
الاوقات تلكي نزار قباني

هدى.. اي عمي حقه تدرين خالتي ام حمزه دكول
مرت بشار احبهه جنهه نسمه دافيه

قبس.. الله يخليهه خجلتوني
هدى.. صار ساعه اخوي يتغزل ماخجلتي
قبس.. لا تعديت مرحلة الخجل وياااا ..

هدى.. دكومي خلي انصب جدو يتعشه من وقت هسه
يكوم يحجي ..
شجن.. بلشنه انصب وفرح كامت وياهن بس ساكته
مانطقت حرف عجيب امرهه اجينه وراح نتعشه وهي
ع الصامت..

فرشنه السفره وكلهه كعدت صابرين كعدت بصف عمر
وقبس بصف بشار باوعتلهم دعيتلهم بكلبي
الله يسعدهم ويديم لمتهم..

جنه مندمجين بلاكل مانحس غير قبس
تكمز من مكانهه وايدهه ع حلكهه وركضت للحمام

صاحت ماما هااا لعبت نفسج هي بالشهر الرابع
بس وحامهه مزعج هالمره بشار ترك الاكل وكام
وراهه ..

من كام شفت عمه بسمه شلون اشرت لفرح
بعينهه عود شوفي شلون كام وراهه
وهي توجه الخزره لامهه ودنكت تاكل..
رجعت قبس للاكل بس مااكلت ظلت
بس تاكل مقبلات 

ام بشار.. ماخلص وحامج راح تخلصين الرابع
قبس.. طول النهار مابيه شي بس من اتعشه معدتي
تتخربط

بشرى.. كل بنيه يكولون نساتهه ع امهه  يجوز ع امج
قبس.. شمدريني واني شتذكر من امي
ام بشار.. الله يرحمهه كلما اشوفج تجي كبالي نسخه
منهه انتي ...

الحجيه.. كلهم يشبهون سميه حته الولد الراحو الله
يرحمهم ع امهم ولا واحد طالع ع رضا الله يرحمه

بشرى.. يكولون من المحبه
الحجيه.. طبعا غير يحب سميه اكثر من اهله وعافنه وراح وراهه مره اتذكر جنت بحيلي
وتعاركت ويا عليهه وسمعته يخابر  بيهه  ع الارضي يكلهه
يابعد امي انتي..

زعلت وبجيت لعد هو يحبهه اكثر مني طلع ويكلهه
يابعد امي ويابعد ابوي..

عادل.. يمه اني هم سمعت بشار يكل لقبس
يابعد ابوي هسه لازم ازعل علي ؟؟

صار الضحك وجدو ظل يداهر ببيبي يكلهه
انتي بيش كيلوا كلمن مرته عنده تسوه امه وابو..

كملنه ولمينه السفره اسراء هي غسلت المواعين
وقبس سوت الجاي وانطته لماما هي تكعد بالكاع
تصب هاي طبيعتهه ماتصبه بالمطبخ وتوزعه..

ورا ماشربوا الجاي وغسلنه المواعين كلنه
اتجمعنه وكعدنه حجه بابا يابه بشار سفره دايمه
وانتي عمي قبس يوم ولادتج وتكومين بالسلامه

ردوا علي جان يكول هسه خلوني احجي!!
بهاي اللمه الحلوه ورجعة صابرين بنصنه
لازم نحجي ومانأذي طرف ع حساب طرف ثاني..

عمي اسراء الله شاهد عليه انتي بمعزة بناتي
وبامانتي وامانة ولدي بس شوفة عينج
الصار وصابرين ماتقبلت الموضوع

عمر قرر يطلك سيد ومحكمه وتظلين معززه
مكرمه يمنه ومحد يكول على عينج حاجب

واذا ع سالفة عمامج انتهت وهسه التهوا
وتهجروا خطيه الوضع يمهم موزين واخذوا
اليريدو وحته اذا اجوا وسالوا انكول بعدج على ذمته

واني كدام الكل السنه اقدملج كليه وتكملين
دراستج حسب الاصول اذا مولخاطرج لخاطر
المرحوم افضاله هواي ..

اسراء.. وهي مدنكه بكيفكم عمو واني اعتذر
عن كلشي..
عادل.. لاتعتذرين بويه ماسويتي غلط

صابرين.. عمو اني هم اريد احجي؟؟
عادل.. انتي تأمرين امر وعمر ينفذ غصبآ على الخلفوا..

كلهه ضحكت كالت عمو اني شروطي اثنين وهذا واحد
نفذه الثاني اريده هسه كدامكم يكول موافق
عادل.. خير بويه ؟؟

صابرين.. اني من اتزوجنه خلاني اترك دراستي كال
بس هاي السنه لان صرت حامل وصار الصار
وتاجلت وكامت تمر الاشهر وهاي سنتين واني تاركتهه

حقي هذا عمو وشفت بعينك هسه هاي المشكله
الصارت طلعت اني خسرانه من كلشي
اني اريد ارجع لدراستي

عمر.. موكلنه اي ليش تلحين انطيتج وعد
صابرين.. تخليني هاي السنه
عمر.. يابه اخليك والله وهاي كدام الكل صابرين
ترجع لدراستهه واطلك سيد ومحكمه بعد ..

بشرى.. ههههه يابه ماتجيبهه الانسوانهه عفيه بصابرين
خلص عمره شايلنه بعصبيته
شوخلي ااشوفك عمر انا لا ارى عمر...

عمر.. تقلدين عليه بشرى ..
بشرى.. شسوي من كدما اتابع دورا اين عمر لا ارى عمر..
عمر.. عمه!!!

بشرى.. وجعه جد عمه شلعت كلب البنيه ابتلت حبتك
يوميه مسويلك عقوبه جنك ضابط قديم

عادل.. شوفي ولدي مثل ابوهم من يحبون
مايتنازلون عن حبهم
ام بشار.. عااادل اخذك الواهس..

شجن..لاول مره انجتمع هيج ونضحك والكل مرتاح بس
ناقصتنه فاديه ماكدرت تجي
من هاي اللحظه صابريت رجعت ويانه

صارت الساعه ب١١ رجعنه عمر وصل عمه بسمه لبيتهه
ورجعنه للبيت هو وصابرين صعدوا لغرفتهم
واني واسراء كالعاده نتابع فلم اجنبي..

جنت متردده اتصل على امجد لو اخلي ع باجر
بس قررت اخابره اخذت التليفون ورحت للاستقبال
دكيت علي وعبالك جان ينتظرني بسرعه كال الووو

شجن.. هلو امجد خاف نايم تاخرت عليك
امجد.. لااا انتظرج وسمعت طكة الجداحه واخذ نفس عالي حته بعدت التليفون عن اذني

امجد.. احجيلي كلشي احسبيني صديق الج واحجيلي
شجن.. توعدني ماتكول اني خابرتك
امجد.. وعد..

شجن.. بديت احجيله كلشي من يوم الجتي قبس
وفرح عيرتني برجلي وبعدهه طلعت سالفه الرسائل
ماخليت كلمه ماحجيتهه
حجيت كلشي بداخلي وكانو هذا الانسان مو امجد
واعرفه من زمان..

تجرأت وحجيتله عن اتهامه عندي علاقه بوائل
بس ماذكرت الحادث مال الاعتداء
بس وضحتله السبب الاساسي والخله وائل يتمادى
هي فرح من كامت تراسل من تليفوني
ومره اشترت خط وكالت هاي قبس

جنت احجي وهو بس يسمع بس من صوته انفاسه
العاليه عرفت ردة فعله كملت كلامي وسكتت
وهو ساكت ثواني وكال امي تدري بهاي السوالف..

شجن.. اي وكدامهه صارت سالفه الخطوط ورغم هذا
تدري غيث خطب فاديه بعنادي وتدري وائل اذاني
وتهمني بشرفي وراحت سوت علاقه ويه امه
وانطته فاطمه

امجد.. شنو الخلاج تحجيلي هسه؟
شجن.. حته ماتاخذ نظره اني اكرهك ..
اني مااكرهك ولا احبك وسبب رفضي الك بعيدا عن كلشي
بعيدا عن تجربتي السابقه لان هسه لو يجيني شخص
غريب مثل مؤهلاتك اوافق بس انت لاااا

لان ابن عمه بسمه الاذتني ببناتهه وماوكفتهن عند حدهن
اني ماجايه افتن عليهن ولا اذمن بس
اذني هوايه ولا عبالك اني احجي هيج لان فاطمه اخذت غيث
اصلا لايقين لبعض

بس احجي اساس المشكله واساس كلشي هي فرح
هي بدت دزت رسائل وع اساس عندي علاقه بوائل
وام وائل صدكت وفوك كل هذا اهلي عرفوا
ولومايثقون بيه هم جان صدكوا عندي علاقه بي..

امجد.. جر نفس وكال تدرين اني هسه مصدوم بكلامج
شجن التحجين عنهن اخواتي تعرفين شنو اخواتي
معناتهه امي ماعرفت تربي

عوفج عن هذا كله ليش غشني اني اخوهن الوحيد
ليش اذني بكلامهن ويدرن بيه احبج

والله من المرحله الثانيه واني عيني عليج
واجيت حجيت لامي واملتني وكالت حجيت ويه خالك
وكال يتخرج وشجن اله

شجن شحجي اني وصار صوته عالي وكوه يحجي
انذميت وانحجه عليه وكالوا عايف امه وكعدت يمكم
تدرين ليش جنت ماانزل ؟؟

امي واخواتي كالن خالك وبشار مايقبلون تنزل وتجي
للبيت لان حجيت بشجن منا لمن تتخرج يله تكدر تجيهم
وماانكر اني جنت طالب وماعندي ادفع ايجار لامي

وظليت بايام العطل اشتغل عماله بالكوفه ويه واحد مناك
لان مصرف ماعندي وماجنت اعرف ابوج مخصص لامي
راتب شهري من المحلات

جان يحجي واحس بحرگة كلبه وهو بين كلمه
وكلمه وكال ليش هيج اذوني ليش استغفلني
هذا السونه شنو المبرر مالته

صدكتهن هن وامي يكعدن يحجن عليج ويسولفلي
سوالف توكف العقل وشوفني الرسائل شلون
تراسلين بوائل وخلني بكدما احبج كمت اكرهج..

شجن.. امجد ع كيفك لاتنفعل الشي صار وانتهى
واني هسه حجيتلك لان شفتك محملني المسوؤليه
وعمه وين متكعد دكول رفضت ابني
اني من رفضت بسببهه هي واخواتك..

امجد.. يله روحي لا احد يجي ويسمعج وامسحي المكالمه
وان شاء الله يصير خير

شجن.. شراح تسوي الله عليك لادكول شجن كالتلي
امجد.. لاتفكرين اطمئني انطيتج وعد روحي ارتاحي
واني اعتذر عن كلشي بدر مني ومااعرف شلون اعتذر
عن تصرف امي واخواتي

شجن.. لاتعتذر اني انتظر العداله الالهيه ربي ياخذ
حقي
امجد.. يله تصبحين على خير
شجن.. وانت من اهلو

سديته من عنده ومسحت رقمه ماخفت ابد
ولاترددت بشي كافي اليشوفهن بس هن وبس
خلي يعرف بيهن اخوهن ..

رحت لفراشي لكيت اسراء نايمه
فرشت سجادتي صليت وقريت شويه قران
وبعدهه نمت..

قبس.. دخلت بالشهر الخامس وكلما ادخل شهر
اروح اراجع واسوي فحوصات كامله حته اتاكد
بشار هاي الايام حيل ملتهي بالدوام
لان اترقى وصار مايلحك كلما اساله يكول اجتماع

صار يجي للبيت بوقت متأخر مرات حته ورا اذان المغرب
اظل احجي واتعارك وياخذني بالصياح
يكلي فوك تعبي وتجين انتي تزوديهه ..

بيوم من عدهن طلع من ٧ وخابرته ب١٢ مارد عليه ورا ساعه كامله يله جاوب وبس فتح خط ماكال الو بسرعه صاح شتردين
بيومهه تخبلت علي كتله ماريد وسديت التليفون

رجع دك ماجاوبته فوك الخمس مكالمات يدك ومارديت
وهو بطل مادك بعد واجت ال٢ ومااجه
واجت ال٤ ولحد المغرب اني احمي بلاكل وارجع اطفي
اشوف شوكت راح يجي ولا كلف نفسه وخابرني..

كعدت بيني وبين نفسي صافنه شبي
بشار ليش هيج متغير معقوله لان يتعب
زين هو اترقى لمنصب اعلى المفروض يرتاح مو يتعب

وهو مدير مو عامل حته يشتغل ليل نهار
موجان قبل كل الشركه علي واجتماعات بس
جان بين كل ساعه يخابرني
يطمن عليه ماانكر خفت وظليت افكر

كمت اربط المواقف حته غزله مومثل قبل
صاير مايسهر ينام من وقت ومن اساله يكول تعبان
انطيته اعذار بداخلي حملت نفسي المسوؤليه
وكلت اني بسبب حملي ومن توحمت صرت نفسيه
وبس ازعل واتعارك معقوله هالشي سوه فراغ
بيناتنه؟؟

زين ليش احسه مهموم؟؟ ومرات الكا صافن عليه
ومن اضحكله يقابلني بابتسامه حزينه
احاوط ركبته بديه واساله يغمر راسه بركبتي
ويكلي تعبان هاي الكلمه الوحيده الجنت اسمعهه باستمرار..

احسه راسي صدع نفضت الافكار وكمت اتعوذ
من الشيطان ماعنده شي اصلا تليفونه اعرف الرمز مالته
ومرات اكنك بي وهو نايم
مايخوني ولاهو من هذا النوع بس ليش هيج احسه متغير..

بيومهه ظليت بدون غده واذن المغرب وصليت
وهو ماجاي جنت كابه نار بس يجي اتعارك
وشيصير خلي يصير..

حته عشه ماسويت لان طبخت الغده وظل مثل ماهو
المن اسوي واني عايفني بهذا البيت اليوحش
طابقين لاصوت لاحركه بي حته احس حالتي النفسيه
بدت تنهار

صارت الساعه ب٨ ضبط واني احسب الساعات
سمعت صوت السياره وهو يدخلهه للبيت ماتحركت
ولاكمت لحد ماحسيت على حركة السويج والتليفون
ع الطبله

جنت دايره وجهي ومرجعه راسي ع التخم
كال اني شكم مره دكيت عليج ماتعرفين تكولين الووو

قبس.. التفتت علي وليش اكول الووو مودكولين
شتردين ماريد شي بعد شكو اكول الو

بشار.. احجي عدل ولاتنترين بكلامج انزعجتي جنت
مشغول لازم اخذلج تحيه

قبس.. مااتحملت بسرعه كمت حته حسيت بطني اذتني
وكفت كدامه كتله منتبه ع نفسك شلون تعاملني
منو كالك اني هنا للخدمه والنومه بس..

بشار.. لججج شنو هالحجي شو صايره ماتعرفين
تسولفين الشغل واصل لراسي ومن هاي حكمتي انتي
للخدمه والنومه

قبس.. هسه شتريد ادري بيك تعبان واجتماعاتك ماتخلص
اني فايته انام ذاك الحمام جاهز وعشه ماكو لان الغده ظل

حجيت هيج وطبيت للغرفه سمعت يستغفر وحته مادخل للغرفه وراي ظليت الوب بمكاني شلون مطنشني
اسمع صوت باب الحمام سبح واسمع حركته بالهول
وكل هذا ماحجه وياي حته ماحجه ع العشا وادري بي جوعان..

رفعت الغطه وطلعت بسرعه مثل الهاده علي لكيته
مدد ع القنفه مال التخم وايده ع عيونه حس بحركتي رفع
ايده ورجع خلاهه

قبس.. بشاااار
بشار.. خير
قبس.. اكعد احجيلي شبيك ليش متغير عليه مسويه شي
واني ماادري

بشار.. ماادري اني مويمج حته ادري بيج شتسوين
الف مره كتلج تعبان عوفيني لاتسألين

قبس.. كوم احجي وياي شبيك منهزم مني حاسه بيك
حته بوساتك وغزلك مومن كلبك واسقاط فرض عليك

بشار.. من شوكت حسيتي
قبس.. انت ماجنت هيج بس حسيت بيك هذا الشهر تغيرت
هوايه احجيلي شبيك خاف مزعلتك ومادري

كام من مكانه ورجع نفسه ليورا وسوالي مكان
كدامه طبطب علي تعالي اكعدي هنااا !!!

اجيت كعدت واني اباوعله عينه بعيني
ماحجه بس مركز بعيوني واني مانزلتهه

غمض عينه بقلة صبر وحجه قبس اكو شي اني مااعرفه؟؟

استغربت من سؤاله كتله مثل شنو؟؟
بشار.. اني اسالج موتردين عليه بسؤال..
قبس.. ماكو شي النهار كله وحدي  قابل شيصير

بشار.. شو باوعيلي؟؟
قبس.. باوعتله ودنك كال هاهي مدام ماكو شي
بعد عليمن هالحجي اني اتعب بالدوام وماجاي الحك
اجي للبيت ..

قبس.. بس انت نفس دوامك ليش بهاي الفتره هيج
بشار شبيك مليت مني احسك بطلت تحبني

بشار.. ليش هو الحب بالكيف وشوكت مايعجبنه
نحب ونبطل لاتلحين كل واحد يمر بهيج حاله
قابل ع طول نفس طبعي اتحمليني..

قبس .. سكتت وهو سكت كمت سويت عشه وتعشينه
وهو ساكت نرفزني سكوته
كوه متحمله ع اعصابي اتمنيت اخذ علاجي حته مااحس بشي
بس ماكدرت..

الساعه ب١٠ كملت المطبخ طبيت للغرفه
لكيته نايم استغربت مومن عوايده ينام
وهاي اول مره ينام وماياخذني بحضنه

حسيت باحساس غريب وبشع بنفس الوقت
تقربت علي ردت ارفع ايده وانام عليهه
بس ماكدرت وهاي لاول مره اكون بعيده عنه

حسيت كلبه بعيد حسيته موبشار حبيبي
ابد كمت اشوفه انسان ثاني
انفض راسي من الافكار وترجع تسيطر عليه..

مانمت بصفه لان بعدني مانعسانه مددت ع القنفه الي
بالغرفه يمكن نص ساعه وفز رفع راسه شافني مدده
كال ليش نايمه هناك تعالي هنااا..

مدري شلون طلعت مني واني ماجنت انام بعيد
عنه بس كتله لاهنا مرتاحه جان يكلي براحتج ورجع
دار وجهه ..

اباوعله مصدومه نزلت دمعتي بسرعه
ياربي هذا بشار معقوله؟؟ بين يوم وليله يتغير

هذا موحبيبي .. وين خوفه عليه ماينام اذا مااغفه
وين اهتمامه وبوساته لبطني واكعده نص الليل اتقيء
وهو مكابلني وكاعد

مرت ايام بس اخلي راسي ع المخده اركض للحمام
وكام ينومني ع صدره للصبح وهو مكسور ظهره
لان مايكدر يغفى

شصاير؟ وليش هيج مهموم ؟
ليش مايشاركني
حته مااعرف شحجي وياا وشكول !!

ظليت مدده بمكاني حسيت بحركة طفلي
رف حيل حته خليت ايدي ع بطني اريده يهدء
وعبالك مثل السمجه وتلبط
كمت اقره ايات على بطني يله هدء...

صافنه وافكر ببشار دك تليفونه ماكمت دكتين وشفته تحرك
رفعه باوعله وعقد حواجبه عدل كعدته وكعد نص كعده
وفتح خط..

اني عيني علي وهو يخابر بس كال الووو وسكت
ثواني وسده بس كالهه دقايق واني يمكم..
بسرعه كام من مكانه كمت وياا مفزوعه فتحت الضوه
سالته شكو شصاير؟؟

كال بسرعه البسي اي شي اخذج لاهلي
عمتي بسمه خابرتني ودكول امجد كاتل فرح
ومأذيهه ومكسره وهسه فاقده بالمستشفى....

لطمت ع صدري وصحت عزاااا ليش شصاير
جر ايدي بقوه وخزرني ...

هو يلبس بقميصه وتليفونه يدك عمه بسمه وانطاهه
رفض وصاح بسرعه قبس البنيه بالانعاش...

.
.
يتبببببع... متابعه شيقه