رواية قمع المشاعر الفصل الخامس وخمسون 55 - بقلم Rozaya1122

قمع المشاعر.... الحادي عشر من الجزء الثاني...
للكاتبة زهراء ( روزايه)...

كنت أحاول البقاء بجانبك باي طريقة
ولكنك لم تفهم ذلك بالشكل الصحيح
كنت اقاتل من أجلك حتئ وجدت
انا من قتل...
...

قبس.. بيومهه رجعت من الدوام بس ماادري ليش
هالشخص اخذ حيز من تفكيري
بحيث الطريق كله صافنه وهو مجرد شخص عابر

مرتين شفته بباب الشركه مره عرض عليه
يوصلني ومره شفته يمشي ورا سيارتنه
وام حسن كاعده وياا

اتذكر حجيت لبشار وراح دز عليهه
كالتله بيتهم بنفس منطقتنه
ويدزون عليه انظفلهم ومتعرفه علي
عن طريق ميامين..

كامت الاحداث تتشابك عليه ام حسن
مره شكت من عنده وكالت انطاني فلوس
لعمليه بنتي مدري ابنهه وبعدين مهدده
لوتدفع فوائد عليهه لو يذبهه بالسجن

وصلت للبيت فتحت الباب وطبيت
جنت اي شي يصير ويايه من مشكله
من سوء مزاج مجرد مااخلي رجليه
بالبيت اترك كلشي ورا الباب

ابد مااخلي يأثر عليه وينعكس ع تصرفاتي
ويتعكر يومي بسبب حدث عابر..

بسرعه بدلت وصليت رتبت الجربايه لان من
طلعت مالحكت ارتبهه شلت شعري ذيل حصان
ورحت للمطبخ باوعت للساعه ب١ وربع

فتحت الثلاجه شسوي غده بشار ب٢ ونص
يجي طلعت نص دجاجه ونكعتهه بخل بين
ماسويت التمن الاحمر اشتهيت مقلوبه

بس اني مااطبكهه ويه الدجاج لان بشار
ماياكل الدهون الانادرا وخاصه الدجاج ابد
ماياكله اذا گلي اضطريت اشويهه
وبعدين من اصب المقلوبه اخليهه عليهه..

التهيت بالطبخ لحدما كملتهه وعفتهه ع نار
هادئه تتهدر وكمت اغسل بالمواعين
الوكعت اثناء الشغل لان المقلوبه تخبص
الجو ماكو ماعون مااوسخه..

الساني دندن باغنيتي المفضله مع العلم
كم مره سمعني بشار ومنعني يكول ماحبهه
انتي مو وحيده حته تغنين بيهه هاي سابقا
جنتي بس هسه لاا..

بس اخذتني الصفنه واني اغني
لا ام تحن لبجاي ولاخاله وياي
داده حسن لاخاله وياي..
كل الوجوه اثكال من يگبل اهوواي
داده حسن من يگبل هوواي
حيل وبعد وياي هاي الردتهه
داده حسن هاي الردتهه
موگالت الشمات ماحسبتهه وداده حسن ماحسبتهه

انتبهت من صفنتي ع دكة الباب
محد يدكه عليه رحت للكاميرا باوعت بيهه
مااعرف منو طفله صغيره اعتقد هذني
اليطلبن من البيوت مافتحته دكت وراحت..

رحت للكنتور اخذتلي تراك بهاري
لان جان نهايه شهر ١٢ وبيتي دافي
ماالبس شتوي ابد بس من اطلع ..

سبحت وبدلت وكعدت لازمة تليفوني انتظر
جيته كلت خلي اتصل ع صابرين طلعت رقمهه
كل مره اتصل مغلق بس هالمره اتصل..

جاوبتني سلمت عليهه سالتهه عن علوش
صابرين.. زين الحمدلله انتي شلونج
قبس.. والله اسال عليج وكل مره اتصل مغلق
صابرين.. هسه فتحته قبل نص ساعه وراح اسده

قبس.. ماكو اخبار جديده ؟؟
صابرين.. لاماكو مدام. متمسك بيهه لهذا الحد
ماريده بعد راح ارجع لدراستي وخلي وياهه خلي تفيده
حرامات تركت دراستي ومستقبلي علموده ..

قبس.. مااجاج محاول يرجعج؟؟
صابرين .. اجه قبل يومين وجان عمو اخو بابا يمنه
واجه هو وجدو وعمو عامر وعمو عادل وكعدوا وحجوا
بابا كال اني بنتي الوحيده ومايهون اشوفهه مكسورة خاطر

بس راح اصيحهه كدامكم وهي تختار بكيفهه
تريد ترجع تريد تظل هالشي راجع الهه..

قبس ماطلعتله ولاخليته يشوفني
وكفت ورا الباب وحاجيتهم كلما افتح التليفون
الكه مسج من عنده كاتبلي بس خليني اشوفج
مشتاقلج بس يحلم يشوفني والله الا اخلي
للموت مايلمح طرف ذيالي

تالي وكفت ورا الباب وحجيت كتلهم ماعندي
اي كلام ويه عمر يروح يطلكهه يله يجي
اتفاهم ويا واذا مايطلكهه اني ارفع دعوه علي
وحضانة الطفل من حقي ما انطي اله
وخلي يروح مايربطنه شي بعد..

قبس.. وشكال هو؟؟
صابرين.. ماما سولفتلي اني ماردت حته اسمع صوته
كال اني اطلكهه سيد حته تحرم عليه وخاف صابرين
عبالهه اني بيوم راح اتمم زواجي بيهه
اطلكهه سيد واخليهه بس عقد محكمه علمود عمامهه

قبس.. اي اذا هيج خلي يطلكهه ورجعي
صابرين.. مستحيل!! اني مرته بس اني
محد تشاركني بي وتصير باسمه يطلك نهائيا وتطلع من البيت لو يطلعني حته مااشوف خلقتهه
يله هذيج الساعه افكر ارجعله

ماتتخيلين شكد متعذبه علي وشكد مشتاقتله
ومحتاجته وليل نهار ابجي علي مااريد اربي ابني
وحدي بس عمر كسرني وجرحني ياقبس

لوجاي وحاجيلي احتمال اقتنع بس مثل
المغفله وانطعن بكلبي وهي تجي يمنه
وتطلع عاقد عليهه واني اكثر من مره سالته
عمر شلون اخوهه يأمن يجيبهه يمنه
ويكول لان يعرفنه شنو.. طلعت مرته واني غبيه مادري

قبس.. الله يهدي ومايفرقكم ظلي لحي بسالفه الطلاق
لان سمعت من بشار بان عمامهه انتهت سالفتهم
وحته الورث المتعاركين علي اخذوا
لان سامر قبل لايموت متنازل بي الهم علمود اخته
متفق وياهم يتنازل ويعوفوهه ومتنازل عن كلشي

صابرين.. هو مادري شنو السبب المخلي يتمسك
بيهه الله لايشوفج نار الغيره..
احترك ع البطىء واني اتذكرهه حلاله
ماتقنعني سالفة ع ورق وهو هسه وحده واني
بعيده والساحه الهه..

قبس.. الله كريم اهتمي بنفسج وبصحتج
والكاتبه الله يصير يله حبيبه خلي اكوم اجهز الغده
بشار ع جيه
صابرين .. سلميلي علي يله مع السلامه

قبس.. سديته منهه وكمت للمطبخ رتبت الميز وطلعت اللبن
شفته بالكاميرا اجه وكف السياره بالباب ونزل
شايل علاكه بيده  خليته فتح الباب  وتمشه بالطرمه

فتحت باب المطبخ وركضت علي حضنته
لف ايده ع ظهري وحضني همستله يم اذنه
مشتاقتلك حبيبي!!

بشار.. واني هم مشتاقلج ليش طالعه بدون حجاب منا ناس وكلهه كاميرات تعالي فوتي
دخلنه سوه واني محاوطه اديه على خصره
وهو ايده ع كتفي ...

خله العلاكه ع الكاونتر جانت فواكه حاجيته حبيبي
تصلي؟؟ رد عليه وهو يشرب مي لا صليت بالشركه
بس اروح اسبح واجي..

بين ماصله صبيت وكعدت انتظره شويه واجه
بلشنه ناكل واني احجيله عن دوامي بس مادري
ليش ماذكرت ابو غدير مع العلم اني يوميه احجيله
حته عن العامله ..

بشار..اليوم وقعت على كتاب تقاعد سناء وعاليه
قبس.. لاااااا طلعن تقاعد والله مشتاقتلهن

بشار.. اي طلعن واجت سناء سالت عليج كالت جهازهه
عطلان بس تصلحه تخابرج وهن راغبات التقاعد يكولن
تعبنه ..

قبس.. خطيه ومالكن عريس يله سناء عدهه اخوهه
محتاجهه لان ابنه صغير وبعد وفاة مرته ماقبل يتزوج..
بشار.. الله يوفقهن حبابات يستاهلن كل خير..

نزل الخاشوكه وشرب كلاص اللبن ورجع نفسه
ع الكرسي واني اكل واباوعله بعدني ماشبعت

بشار.. كملي ع راحتج حبيبتي وتعالي ورايه للغرفه
قبس.. تخرب واهسي بلاكل ماريد بعد تعوفني وحدي
مااشتهي..

بشار.. اكلي مستحيه!! اني ب١٢ شربت كهوه ومن اشربهه
نفسي تنسد وهاي اكلت شوفي ورفعلي الماعون
عاشت ايدج حبييتي..

قبس.. بالعافيه كوم مدد خلي اشبع واجي
كام للغرفه وهو يكرصني من خدي واني ظليت اكل
طيرت المقلوبه كلهه صايره اكل اكل مو بانصاف
لوحامل اكول ميخالف واني بعدني ممنوعه من الحمل..

كمت لميت المواعين وغسلتهم ورحت ورا لكيته مدد
وفاتح التلفزيون فتحلي ايده نمت عليهه
الساعه ب٣ والجو مال شته مومال انام هيج وقت..

سولفتله ع صابرين ماعلق لان بالنسبه اله
موضوع عمر انتهى ولايدخل بي..
ايده تمسح بشعري رفع حنكي بايده الثانيه..

باوع بعيوني وكال حجزتلج اليوم عند نفس المركز
مال التجميل شويه وانروح اول جلسه!!

قبس.. فتحت عيني ع وسعهه وابتسمت صدددك حبيبي؟
بشار.. ااي شفتج لحيتي هوايه اريد اخلصج من هاي
العقده العندج مريت عليهه نفسهه الطبيبه خازنه
معلوماتج وكالت ماكو داعي للمعاينه مباشرة نبدي..

قبس.. يوجع الليزر؟؟
بشار.. مامسوي حته اكلج اي لولا !! روحي وجربي
قبس.. بليييييد .. وردت ادغه لزم ايدي سبقني..

بشار.. والله لو واحد غيرج يطخني هيج الا اعلك
ايده بركبته بس ااااخ انت ااااخ الماكدرلج..

قبس.. طبعا متكدرلي لان تحبني ومايهون عليك تأذيني
بشار.. همزين تعرفين لعد صيري حبابه وعوفي هاي الحركه..

قبس.. خلي اكوم ابدل حته الحك مو تصيح عليه
والشال من يسمع صوتك مايترتب..

كمت من يمه للكنتور فاتحته وصافنه شلبس
طلعتلي بنطرون قماش والتفتت علي كتله البسه؟؟
رد عليه بكيفج بس ماجان عندي شي طويل فوكا كله
ع الخصر ماترهم لان القماش عريض..

رجعته وطلعت فستان كتله البس هذا؟؟
بشار.. لا حبيبتي البسي بنطرون وقميص طويل لان
اذا فتسان راح ترفعه كله عاد ترفع بس القميص..

قبس.. اكول عود انت ليش هلكد تفتهم!
بشار.. طاحظج شكالولج غبي ولج انتي ليش السانج فالت
قبس.. لا والله مرات احسك ملعب !!
بشار.. ووولج مو اكوملج هسه واشوفج الملعب
لاعب عليج قبل اشو امشي جنب الحيط

قبس.. شحدك هم عوزك تصير ملعب غير ماتعرف خبالي
بعدك ماشايفه
بشار.. هو انتي تحجين عليه وبعدين تسويهه قصه وترجعين
تحمليني السالفه دبدلي لا اكوملج !!

قبس.. فتحت باب الكنتور صار حاجز بيناتنه مايشوفني
وكمت ابدل لحد الان استحي ابدل كدامه
مرات يجبرني ابدل ومره حلف بس اطفي الضوه يضربني
بس مرات يغلس ع السالفه..

هستوني البس بالقميص ماحسيته غير كدامي ومرتجي ع الباب
بسم الله شنو جني حته ماسمعت حركه الجربايه من كام
لفيت نفسي بالقميص وكتله غمض عيونك !!

مد ايده سحبني علي بسرعه واخذني لجربايه
والقميص انشمر ومد ايده ع القراصه فتح شعري
هاي العاده العنده يبوس بشفايفي وايده تغلغل بوسط
شعري ..

نايمه بحضنه والساعه ب٥ وهو يكلي خلي ناجل الروحه
بس اصريت الا انروح ع السريع ركضت للحمام سبحت
وطلعت ابدل وهو راح سبح واجه لكاني شبه مكمله

سد الاضويه وقفل الابواب وطلعنه بالطريق
خابر ع السكرتير كاله موجودين
دخل وهو ويايه تفاهم ويه الطبيبه ودفع فلوس الجلسه
وطلع وكال من تكملين رمشيلي اجيج..

جانت اول جلسه ووصتني اهم شي ما اكون
يائسه واثق بنفسي وعبالهه لحد الان عندي عقده منهه

ماتوقعت بيوم تروح عقدتي من اللوحمه وهي
اساس حالتي النفسيه واطورت بس من اتزوجت
وشفت بشار جنت اتوقع اليتزوجني تلعب نفسه
من عندي لو يعيرني

بس بشار جان يوميه يبوسهه والهه نصيب
من البوسات مثل شفايفي وكلما احجي
وكال اني احب كلشي بيج..

كملت ورمشتله لكيته بباب العياده
بيومهه تعشينه برا ونزلنه تمشينه
ببغداد واني اشتم هواهه رغم تربيت اطراف بغداد
بس من اجيت عشقتهه احبهه حيل وخاصه من
اسنشق هواهه احسه يحي كل جزء بيه..

بالطريق فتحت موضوع الحمل كتله مو صار الوقت
نسوي حمل؟؟
بشار.. اخر مراجعه هاي ونسالهه مااريد تنعاد نفس اللوعه
اذا كالت جاهزه نسوي

قبس.. انت ماتتمنى اصير حامل من وقت اشو ساكت؟؟
بشار.. يعني برأيج شسوي غير مريضه وتتعالجين
ومن البدايه كالت ترى العلاج يتأخر وهاي صارلنه ٥ اشهر
خلي يكمل علاجج ونسوي ...

قبس.. وصلنه للبيت وكالعاده يوميه نسهر ع فلم
واحظر لو فواكه لوكرزات مرات بوشار بشار ماياكل
شي قليل بس اني امسح الماعون مسح بس وزني زايد كيلو
يعني حته مامأثر بيه ...

شجن.. فاديه ملتهيه ويه خطيبهه لو مخابرات لويجيهه
لو يطلعون سوه تجي نرجس ونتوسل بيهه تسولف
ماتحجي دكول قحط هي بوسه شبيجن راكضات وراي..

اسراء مااعرف شكول عليهه ماتطلع ابد ولاتتصادم ويه عمر
وحته ماتطلع للاكل الا نصيحهه ولاتطلب شي
يعني وجودهه وعدم وجودهه لاشيء
حته ماما كالت اخذنه غيبتهه..

ساره مرت وائل تجينه دائما وتحجي ع فاطمه
دكول موتتنه يوميه تجي تشكي لام وائل من غيث
وماجاي تصير حامل ومتخبله حته عمه بسمه
ماخذتهه لشيخ يقرا ع راسهه خاف مسويلهه شي..

كولت ماما التمشي بهذا الدرب عبالهه الكل مثلهه
ومايؤمنن بالنصيب اقل شي وكالن سحر ..

قبس.. مرت الشهور واللوحمه بدت تختفي
شي قليل ظل منهه بس الجلسات مكلفه حيل

رجعت اتواصل ويه سناء وعاليه وانسولف ساعات
مكالمه جماعيه لان اخلص شغلي واظل صافنه التهي
وياهن ..

خلصت الامتحانات وعطلت وباجر عرس فاديه
بس مالي خلك حته ملابس مااشتريت
بيومهه رجع بشار المغرب لكاني كاعده شافني ضايجه

سألني شبيج كتله ماادري احس نفسي تعبانه؟؟
اني بالاشهر الاخيره تركت العلاج لان كالت اذا تريدين
تسوين حمل سوي بس تاخرت بسبب جلسات الليزر
الا كملتهن نهائيا يله بديت افكر بالحمل..

مع العلم مر شهر ع شهر وكلما تتاخر اكول حامل
ويطلع ماكو حمل بس هالمره تختلف احس بتعب مثل حملي
الاول حجيت لبشار كالي كومي بدلي
هم اشتري ملابس وهم حللي..

وبيومهه رحنه لنفس المختبر وبشرنه بالحمل
رغم فرحتي بس جنت خايفه حيل خاف نفس
الشي ينعاد

ماافتريت هوايه اشتريت فستان هالمره جوه الركبه
ولاول مره راح البس شي مكشوف وتطلع اديه
محد يعرف سويت ليزر

اكو طبيعه عند بشار وهو الكتمان كل شغله يخلصه
وهو ساكت مايحجي ولايطرق للموضوع
حته علمني على طبعه وصرت مااحجي..

بالطريق وجنت ناويه اروح لبيت عمو بس
ماحبيت يظل وحده وغيرت رأي كتله انروح للبيت
وباجر الصبح اروح

طبعا حفلة فاديه بالقاعه وهو يوم واحد حنه عرس
بس قبل العرس حجزت ساعه للحنه علمود ناخذ راحتنه..

بيومهه رحت لبيت عمو الصبح نفس هوسة عرسنه
وصديقات فاديه موجودات انتبهت ع اسراء عازله نفسهه
وماتحجي ويه اي مخلوق لابسه اسود وكاعده

فرح موجوده وحليانه اكثر وفاطمه اللواكه مالتهه
ترفع الضغط ماحجيت ع حملي ابد حته اليسالني
اكول رزق لان البارحه حللت خلي يتعده شهر واحجي..
بس خاله وعمه بشرى كتلهم وفرحولي

الاغلبيه راحن للصالون انب مارحت لان مومن النوع
اليخلي مكياج مال حفلات مجرد مكياج خفيف
ولبست الفتسان جان بنفسي غامق وبي كصه ع الاكتاف

شفت علامات الاستغراب بعيون فرح وامهه وعبالك
يتسائلن وين اللوحمه مااعرف هاي نظره الحقد والغيره
شنو سببهه لحد الان..

تفاجات بوجود صابرين بالقاعه لابسه فستان مال سهرات
وعبالك دكول مامهتمه بيومهه عمر اتوسل بس خلوني اشوفهه
وصلت بي يبوس بعمه بشرى الله عليح بس صورة وحده

بس صابرين ماقبلت تاخذ اي صوره ولا اني اخذت
لان بشار وصاني اخذي بتليفونج بس لاتاخذين بغير تليفون..

خلصت الحفله وراحت فاديه ويه رجلهه وبده
مشوار حياتهه وشجن خلصتهه بواجي لان ظلت وحدهه
اسراء مااجت للحفله لان حزينه..

كل واحد رجع لبيته واني رجعت لبيتي وهناك
عدت ليله عرسي وخلصتهه دلع ودلال ع بشار
وكلما حجه وكتله اني اليوم عروس واضحك

مرت الايام طبيعيه حيل اروح لبيت عمو ماكو شي جديد
صابرين ظلت معلگه لاهي الرجعت ولاهي المطلكه
جانت مصره يطلك الاثنين محكمه وسيد يله ارجع
وعمر ماطلك محكمه خوفا من عمامهه خاف يسمعون..

جان يتوسل ع شوفتهه تقريبا هاي ٤ اشهر مرت وهو
ماشايفهه بيوم منهن دز عمه بشرى كالهه باي طريقه جيبيهه للبيت بس خليني اشوفهه..

اني جنت يم بيت عمو وصينه شجن ماتخلي اسراء
تطلع من الغرفه وهي فعلا ماتطلع ابد الا نصيحهه
وبيبي يم بسمه وبس اني وعمه بشرى
خالتي راحت لاختهه ...

بيومهه شكد ضحكنه ع عمر وعمه بشرى اداهر بي دكله
ولك مثل المتواعد ويه صاحبته شجاك راح تموت

حته نسه وجودي وهو يكلهه مشتاقلهه حيل روحي
جاي تتكطع ع شوفتهه دزيت كرايبهه كلهم وماقبلت ترجع
وحرمتني من شوفتهه..

راحت عمه بشرى عليهه واني خابرتهه اتوسللهه تعالي الله عليج
وحدي وعمر ماموجود مشتاقه لعلوش
كلساع تحلفني عمر موجود؟؟ واسد الخط مااكدر احلف..

بس عفتهه ورا عمه بشرى كالت اني اجيبهه
بطريقتي وعمر يروح ويجي وكلساع وكال خابري
بشرى وين صارت ؟؟

شفتهن اجن كتله روح بلاستقبال راح هو واني استقبلت
صابرين بوستهه واباوعلهه سمنانه وعلوش صاير يخبل
ويحجي بابا وماما اخذتهه منهه وطبينه للصاله..

بشرى.. شو كومن خلي انروح بالهول حته ماينسمع صوتنه اذاكعدنه بالصاله جان الهول مهزول باب وشباب عن الصاله وباب الاستقبال طالع على الهول..

كعدنه انسولف واني اخذت علوش بحضني وعمه بشرى تغمزلي
اكوم بس الظاهر عمر مااتحمل يسمع صوتهه وضحكتهه
بسرعه فتح الباب هي كمزت..

اول ماعاتبتنه ليش قشمرتني مااريد اشوفه!!
بس عمه بشرى دفعتني وطلعنه من الهول واحنه نضحك

شفته شلون ركض حضنهه بقوه وهي تدفع بي بس
ماانطاهه مجال جان حاضنهه حيل وهي تضرب بصدره

اكول لعمه حرام انباوع دكول عود نستغفر بصلاة
الليل وخلتني انباوع من الشباك ع الصاله
لان عمر نسه نفسه

جان عطشان ولكه بركه مي مايعرف شلون يحضنهه
لو يبوسهه كلشي جان يسوي بشغف وهي بعدهه تقاوم..

بشرى.. امشي ولج السالفه حمت رحنه للمطبخ وهي تحجي
ياملعون عمر خلي البنيه تاخذ نفس..

قبس.. خطيه والله يحبهه شفتي شلون مشتاقلهه
بشرى.. سباعيه صابرين خلت شوفتهه حسره علي دشوفي
كلبه راح يوكف مايعرف يحضنهه لو يبوسهه..

ظلينه هوايه كاعدين وحدنه وهم بالهول
وعلوش يلعب يمنه نسخه من عمر
جانت دائما دكول اني احبه اكثر وطلع ابنه يشبهه..

لمحنه عمر طلع برا من الاستقبال والجكاره بيده
رحنه يمهه بالهول جانت تعدل بنفسهه
وحاجتنه بغضب لاتباوعن هيج

هو شنباوع غير البنيه متفرهده بس
جانت باجيه يمكن مسولفين ظلت تحجي علينه
ليش قشمرتني اني مااريد اشوفه واضعف ..

شكد حجت وياهه عمه بشرى ونصحتهه بس
كامت اخذت ابنهه وطلعت كالت ابد لاتخلوني اشوفه
لخاطر ابني اسمع باسمه ...

ماعرفنه شصاير بس بعدين عرفت منهه
نفس الشي طلكهه وتعالي وهو يكلهه اطلكهه بس سيد
وهي تريد محكمه..

رجعت للبيت سولفت لبشار ضحك كال كوه هي
البنيه مجروحه ليش تلحن وياهه
طبه مرض يشتاقلهه يتحمل نتيجه افعاله
حته ماانقهر علي...

حملي زين وراجعت من اول شهر كالت حاليا زينه
خلي يكمل نموه وانشوف شيبين ..
بس اني ملتزمه بعلاجي وحته نفسيتي زينه..

اليوم جنت كاعده اتصفح بالفيس بشار سوالي
واحد كال اتلهي بي ماعندي اصدقاء مجرد اتصفح وبس
حته ماسنجر مامنزله مااحتاجه ..

دك عليه رقم غريب ماجاوبته وبعد مادك من اجه
من الدوام كتله اخذ الرقم انطا حظر
كل الامور ماشيه تمام

حياتي جدا طبيعيه وهادئه ومرتاحه الى ابعد حد
يوميه اصلي ويه كل صلاه ركعتين شكر لرب العالمين
على هاي النعمه الي اني بيهه..

بس نسيت نفسي نسيت اني قبس بنت سميه
العانت حياة مريره ..الراحه الي اني بيهه خلتني
ارتفع واحلق للبعيد... بس ماادري راح يجي
يوم وقبس تروح وتبقى بس جسد بدون روح.....

.
.

يتببببببع.... احبكم