رواية قمع المشاعر الفصل الخمسون 50 - بقلم Rozaya1122

قمع المشاعر.... السادس من الجزء الثاني...
للكاتبة زهراء ( روزايه)...

حضي سيئ. ك رجل اعمئ جلس يحكي قصة حياته البائسه لااحدهم ..
ليكتشف بعد ذالگ باان المستمع كان أصم!!!
....

بشار.. تعالي يمي تعالي!!
قبس.. تقربت علي كعد كدامي صرنه وجه بوجه
جان شعري مفتوح ونازله شكم خصله على وجهي..
باصبعه السبابه بعدهن وخلاهن ورا اذني..

جانت عيني بعينه البدت ترمش اكثر من مره
ماادري شحسيت عبالك بموعد رومانسي
غمضت عيني وبدت دكات كلبي تسرع اكثر
اني وين افكر ووين سحبني؟؟

حجه بصوت قريب على الهمس تشكين بيه؟؟

فتحت عيني على وسعهه كتله لا لاااا وكمت اشر بيدي
اني مااشك بيك!! بس انت ماحاجيلي عليهه
وهي شلون تتجرأ وادز هيج رساله وعبالك تأمرك..

سكت وهو يباوعلي وضام شفته الجوه وعاضهه
بروده مستفز وهدوءه يخبلني اكثر

شمنتظر ليش مايفسرلي ؟؟ ليش مايحجيلي
ظليت مركزه بعينه
بدون ماانتبه نتيجه افكاري رفعت تك حاجب
بس ماجنت منتبهه على نفسي!!

بشار.. شكد افكار سيئه براسج وتباوعيلي بهيج نظره وتك حاجب؟؟
قبس.. رمشت وضحكت هسه ماتحجيلي عنهه؟؟

بشار.. راح احجيلج بس توعديني الكلام مايطلع
من الغرفه !!
قبس.. طبعا مايطلع ..

بشار.. اني مااعرف الرقم المن؟؟ هسه عرفت من عندج
لان هوايه ارقام مرات تتصل الي غلطان وحته تجي رسائل
اليعرفني يتصل مره ثانيه يعني حته ماادوخ نفسي واظل ابحث عنه
لذلك هسه تفاجأت من كلتي اسراء واخوهه ماحجه شي ..

ماكو داعي اوضحلج قصتهه !!
بس اني من خلال كلام سامر جان هواي يحجي بيهه
وشايل همهه وشلون خاف ياخذوهه بيت عمهه!!

يعني بين قوسين عرض زواج بس بصوره غير
مباشرة هذا الحجي شوكت؟؟ قبل لاتصير سالفه ساجده..

سامر اقرب واحد الي ويعرف بيه شكد احبج
لذلك جان حاير شلون يفتح الموضوع وياي
بس من شافني سكتت وماعلقت على الموضوع افتهم..

وخاصه من شافني دخلت السجن وماقبلت تنذكرين
بيومهه كال شكد تحبهه لعد؟
وهي مو بس مسأله حب كايله هي عرضي سواء
هي او اختي اتصرف نفس التصرف..

البنيه ماشايفهه مجرد مره  اومرتين يمكن وهيج خطف
هسه لو تتلكاني مااعرفهه!!
وحته مااروح لسامر الا هو بالبيت لايوم فتحتلي باب ولاسمعت صوتهه..

بس احتمال سامر حاجيلهه او فديوم فاتح موضوع
وياهه وهي مراهقه ظلت تفكر..
شفت هوايه بنات باي حجه وباي طريقه
حته يتقربن للمقابل ..

قبس.. يعني سامر يريدك تزوجهه حته يخلص من عمامهه؟!!
بشار .. بالضبط

قبس.. هاااا زين سامر مايدري انت جنت خاطب
وهالشي مستحيل وحده تتقبله !
بشار.. هو ماحجه وكال تعال اتزوجهه
بس لمح بان اذا صار شي علي
او عمامه اجو اخذوهه بالقوه لان عشائر
كال اريدك توكف وياي!!

قبس.. هي من اجتنه انتبهت عليهه هوايه تصفن بوجهي
واول مااجت حجت باستغراب انتي قبس؟!!
ومن سالتهه ليش؟؟ كالت لا بس اسمع بيج من سامر..

بشار.. واني اكعد احجي لصديقي عليج؟ حجاهه بصيغه سؤال وكمل كلامه هو حته من نحجي بموضوعج يكول المدام مايلفظ اسمج..

المهم ياحبييتي اني جدا صريح وتعرفيني اكره الجذب
يعني اذا اريد اسوي شي اجي واكلج !!
والخطوه الي اخطيهه كون واثق منهه
مااسوي شي بالخفيه ..

وهسه خلي ادك ع الرقم كدامج واشوفهه تجاوب
مااريد تبقين بشك وانتي طول هاي المده والرقم براسج
والا عرفتي ..

قبس.. جر تليفونه واتصل نفس الحاله دك دكه كامله وماجاوبت!! هاا شوف ماترد شنو غايتهه؟

بشار.. شكم يوم ويجيبهه اخوهه وادري بيج سباعيه
انتي عرفي من نفسج شتريد؟؟
قبس.. شلون اعرف؟؟

بشار.. من تجي كليلهه ذاك اليوم دزيتي رساله
وعبالنه اكوشي ظل بالنه يمج وجريهه بالحجي
اني هم اريد اعرف شتريد؟؟

قبس... هااا اي خلي تجي واسالهه بس خليني احجيلك
البداخلي؟؟
بشار.. اي احجي اسمعج!!

قبس.. لاتزعل عليه!! اعرف انت شنو وصدكتك انت ماتعرف
بالرقم..
بس هذا التصرف مادخل عقلي يعني ادز رساله وبوقت متأخر
ومابررت اذا غلط جان تكدر دكول لاخوهه ترى غلطت بالرقم؟
وشغله ثانيه رقمك شيسوي عدهه ؟؟

بشار.. حقج بتفكيرج بس والله العظيم حالي من حالج
قبس كبري عقلج اني ماالحك احك راسي من الشغل
ارجع اراهق من جديد !!

لومافشله اخابر اخوهه واكله  بس خاف يكول
شعرفك برقمهه وسامر عنده صعوبه مايتقبل
وخاف تصير مشكله!!

اني مثلج مستغرب والله لاشايف شي منهه
ولاملتقي بيهه مااعرف غايتهه شنو
او احتمال مثل ماكتلج اكو هوايه نماذج ادور حجج
حته تتقرب ..

قبس.. مممم!!زين شنو الحجي كتلي مايطلع وعبالي سر جبير؟؟
كرصني من خدودي اثنينهم جان يكول انتي شنوو؟
لاتنسين لاتعبريلج كلمه !!

قبس.. دحجي بشاار شكوو؟؟
بشار.. من جانت صابرين زعلانه وعمر جان ضايج والسالفه باولهه ومن حجه سامر وشرح وضع اخته
كاله لاتهتم اذا فدمره صارت حته لو اني اعقد عليهه
ونحمي اختك يعني عمر الغبي مثل الي انطه امل لسامر..

قبس.. لطمت ع صدري عزاااا العزااا !!
جر ايدي حيل لااا ولج موهيج لاتضربين صدرج شكم مره محذرج..

شمدريني غير انصدمت غير اذا سواهه صدك لان
انطه كلمه صابرين مخبله من صدك تحرك نفسهه..
شلون هيج يحجي بدون مايفكر؟؟

بشار.. مرات الانسان من ينصدم بشي ويتأذه من المقابل
يحاول يثبت نفسه باي طريقه
وعمر عباله راح تظل الحرگه بداخله ويطلگ
استعجل بالحجي ومن يومهه سامر امن ع اخته
بس سمع عمر رجع صابرين مامعقوله
يتامل سعاده اخته ع حساب تعاسه غيرهه..

قبس.. لااا ان شاء الله ماتصير واذا كلش خلي يزوجهه
عليمن متحمل المسوؤليه وتكمل دراستهه يم زوجهه
هو مصعب الامور..

بشار.. اني مااحجي ويا بموضوع اخته هو حر
مره وحده كتله احسب اذا زوجت اختك لواحد متزوج
بسبيل تنقذهه راح تهدم عائلته واختك ماترتاح لان
الزوجه الاولى شنو ذنبهه..

بس ابن عمهه ناهي عليهه ومن رفع دعوه علي واخذو تعهد
سوالف شيوخ وحجه عمه الثاني وذاك متحلف وهذا مدري شنو
يعني سوالف تعبانه ..

قبس..بس اعتقد عمر الموضوع ناسي ومجرد حجايه حجاهه مواكثر..
بشار.. هو طبعا ناسي ولوتصير صدك جذاب عمر
مايتزوجهه لا ع ورق ولاهم يحزنون
مثل مااني احبج ومااكدر اذيج هو نفس
الشي يحب صابرين ومايريد يشتت عائلته

اني كلت لسامر يشوف حل لاخته احسن اله
لو يحلهه ويه عمامه لو يزوج اخته
والافضل يتنازل عن الورث الهم ويخلص !!

قبس.. مممم اعذرني فكرت بافكار موحلوه وكلت
خاف بحجه ماعدهه احد يجيبهه عليه..

بشار... يجوز سويتي عرس براسج واني كلشي
ماادري !!
انتي تتوقعين اكدر اذيج واكسر خاطرج؟؟

قبس.. امور دنيا والرجال ماعلي امان وخاصه هو صديقك
وتريد ترد الجميل اله
بشار... ارد الجميل لعد اتزوج عليج؟؟

ووولج انتي روحي اكو واحد يأذي روحه
الج حالي ومالي وعمري الباقي ولا اشوفج
مكسورة خاطر..

قبس.. ممممم انت ابرودك خليتني اشك!!
بشار.. ماتعودتي عليه هذا طبعي وبعدين اني مااعرف الرقم
اكعد اصفط جذب عليج..

قبس.. تدري شفكرت؟ كلت هو اتفق وياهه كالهه ادك عليج
ولاتجاوبين
بشار.. ع كولتج بليييده!! شلتي ذنبي واني رجال
مكتفي ومقبط بيج..

سحبني علي وباسني من خدي الايمن ورجع
باس خدي الايسر احس نفسي اطمئنيت
وارتاحيت من فهمت السالفه مالتهه المليوصه!!

حجيت بتذمر يعني اني اظل حايره بمعجباتك
يوميه وحده شطلعت هاي ؟؟

بشار.. منيلي معجبات والله محد تحبني بس انتي؟
قبس.. ليش ميامين وفرح وهاي ع الطريق؟؟

بشار.. هوب هوب اسراء لاناخذ ذنبهه الا نتاكد
وما اعتقد عدهه شي وحته اذا عدهه شي اعتبرهه
مراهقه راح تتدخل جامعه والله يوفقهه!!

وفرح مامحسوبه ع البنات هاي حبت ماحبت
مشكلتهه !

وميامين ماتحبني!!

قبس.. لا والله ميامين موعندك علاقه بيهه سابقا
شلون ماتحبك؟؟
بشار.. ماتحبني علاقه عابره وخانت وراحت وتزوجت واطلكت ورجعت تزوجت وترملت هذا ياحب تحجين عنه...

التحبني بس انتي!! وفرح هاي موصاحيه عوفينه منهه!!

قبس.. رجعنه مدده واحنه حضن بحضن اخذتنه السوالف
لحدما هدئنه جنت مغمضه عيوني بس ماغافيه
افكر بكلامه واعيد بي براسي

اتذكرت من جنه مخطوبين ودك عليه الرقم وصعدته اله
وهو رجال بوقتهه لاصيح عليه ولا شك بيه
بالعكس اخذني بحضنه وطلعنه برا بيومهه وهو يطمن بيه

واني بسرعه شكيت بي وظليت اكل بروحي طول
هذني الاسبوعين بس لازم انتبه ع كلشي
مااريد تخرب حياتي واني هسه شفت خيط الفرح..

رفعت راسي شفته مغمض مشيت اصبعه ع لحيته
عبالي نايم همست بشااار بشااار!!

فتح عيونه كتله شنو مانايم؟؟
بشار.. موجاوبتج شلون نايم؟؟

قبس.. بيمن تفكر وهيج هادئ؟؟
بشار.. بميامين!!!!!
قبس.. شنووووو؟ وفوكاهه تحجيهه بوجهي

بشار.. لعد تريدين اجذب عليج؟ والله جنت افكر بميامين ؟؟
قبس.. دغيته ابطنه وحجيت بزعل لاتحجي هيج اشو عينك
عينك دكولهه

بشار.. لزم ايدي ولج الف مره كايلج عوفي بطني موزرفتيهه شوفيهه شلون زركه من الضرب مالتج!!

قبس.. عوف بطنك لاتفر السالفه شلون تفكر بيهه والله زعلت عليك؟
بشار.. احب هدوئج واحب هاي العيون
سبحان الخالقهم وجمع القوه والخوف بيهن !!

قبس.. عوف عيوني !! احجي بشااااار
بشار.. نصي صوتج من اجيت لسه وانتي لازمتني تحقيق
يابه افكر بميامين وهالايام هوايه افكر بيهه موبس هسه

لان اجت ترقيه النه اثنينه ومااريد اشتغل وياهه ابد
ولااريد اشوف وجهه وافكر شلون ابعدهه عن طريقي!!
هسه ارتاحيتي!!

قبس.. وانت شعليك بيهه تترقى ع نفسهه وانت شهادتك اعلى منهه يعني منصبك اعلى!!

بشار... اي صح بس احتمال نشتغل سوه هي عدهه واسطات
قويه وخاف تختار نفس المكان مالتي للقرب
وحاير شلون اتعامل وياهه مع الاسف ميامين من الجنس اللطيف...

قبس.. شبيهه قويه وسباعيه وبنت نفسهه والهه مركزهه
بشار.. واخلاقهه!! مااريد احجي عليهه ترى ماحصلت منصب بتعبهه والا هي ماعدهه اي مؤهلات بس علاقاتهه كلهه ويه البرلمان ..

قبس.. ااااوف شلون بيه مادا اتحمل تفكر بغيري
حته اذا بشغل مااتحمل افتهم!!

بشار.. متأكده ماتتحملين؟؟ وغمزلي
قبس.. اني جنت احجي ع نيتي ولامفكره مثل تفكيره المنحرف
كتله اي والله اني مااتحمل لاتشوفني هيج!!

بشار.. زين خلي نجرب وانشوف شكد قدرتج على
التحمل ؟؟ واعتلاني اني بسرعه فتحت عيني
افتهمت اني وين احجي وهو ووين؟؟

خليت ايدي ع صدره وادفع بي ابتعد بشار
موزين ع الطفل واني مااقصد تفكيرك المنحرف
بس جنت احجي واني اضحك !!

بشار.. هو بس اتاكد قدرة التحمل شكد خاف تعطلين
من وقت حته ابدلج !!
ماكدرت اقاوم لمساته ومثل كل مره
كل واحد بينه يعبر عن حبه بطريقته بدون قيود

شجن.. ايام صعبه مريت بيهه حاولت بكل جهدي
اوكف ع رجليه وانفض تراب الماضي وانتبه ع نفسي..

اكو احساس بداخلي آمنت بي بأن بيوم راح اصير
قويه واعيش لنفسي واثبت ذاتي
غيث اعتبره من الماضي!!

راح تبقى غصته بداخلي بس اصريت ع نفسي
قاومت بكل قوتي دائما اباوع ع قبس
واكول موهاي عاشت متنقله بين البيوت
وحته اكل ماجانت شبعانه
بس كدرت تثبت نفسهه

درست واشتغلت وحافظت ع نفسهه
رغم المرت بي وهي يتيمه وماعدهه لا اخ ولا اخت
لا بيوم حضنتهه ام ولا نصحتهه صديقه
وكدرت تكمل دراسه وحبت وتوفقت وراح تكون عائله

اني مثلهه هم لازم ابني نفسي وانسه
كل الماضي الاليم المريت بي
وانت ياغيث روح لا ادعي عليك ولا اتحسب
الله يهنيك ويسعدك بحياتك..

تقريبا الدوام قرب ودائما نطلع لو ويه هدى لو ويه عمه
بشرى نشتري ملابس اني مرحله ثانيه وفاديه
مرحله اخيره

الوضع تقريبا هادىء بسمه وبناتهه ماشفناهن ابد
حته بيبي ماتروح بس مرات تروح لبيت عمو عامر
ومناك تشوفهه حته من ينفتح موضوع فاطمه بسرعه اكوم
لا اريد اسمع ولا اريد افكر..

نرجس بنت عمو عامر انخطبت لسلام ابن خالهه نفسه
الحبته وبيومهه قبس ماقبلت تروح كالت لا اشوف فرح
واني مااريد اشوف فاطمه
صابرين ماراحت اخذهه عمر لاهلهه
بس فاديه كالت خاف تزعل نرجس

راحن للحفله واجن ماحجن شي واصلا اني اتجنب الكلام
بالموضوع حته ماترجعلي الافكار السوده ..

اليوم اجت اخت سامر يمنه بعد ماكملت امتحانات
البنيه فقيره حيل وتستحي ومتعلقه باخوهه بشكل
واحنه هم مامحسسيهه هي غريبه تعاملنه وياهه طبيعي...

جنه كاعدين بالغرفه انشوفهه صورنه مال الكليه
ونسولف حسيتهه صارت صديقه النه وخاصه
اني لان دائما بالغرفه صرنه قريبات حيل ..

اجت قبس لازمه بيدهه كلاص عصير
تشرب بي وكعدت يمنه
قبس ع الحمل صايره حلوه حيل
حته ماما كالت ماشاء الله كلما تكبر وتحلى اكثر..

فاديه.. اكول قبس شو مارحتي لطبيبه متشوقين
نشوفه ولد لو بنيه
قبس.. بعد يومين وادخل بالثالث واروح حملس زين
حته وحام قليل بس لازم اطمئن..

اكول حبيبتي اسراء قبل شهر تقريبا
بليل اجتي رساله من عندج على تليفون بشار
دكولين تعال اخذني للامتحان واني اعرف رقمج خازنته عندي
ودكيت عليج مغلق!! ظل بالي يمج خاف احتاجيتي شي .

تعمدت احجي وبكل هدوء شفتهه ارتبكت حيل بشكل
ماينوصف حته فاديه تباوعلهه وعاكده حواجبهه
واني اباوعلهه منتظرتهه تحجي ..

جان دكول لااا دزيتهه بالغلط!! وسكتت
اني ماتحملت اسكت كتلهه لعد منيلج رقم بشار
شنو هو موصلج سابقآ؟؟

اسراء.. لااا اصلا ماشايفته بس اريد ادزهه لابو الخط
اسمه بسام وغلطت بلارسال حته استحيت وغلقت التليفون
ورقم بشار سامر خازنه بالتليفون كال خاف بيوم
ماتلكيني اتصلي بي..

قبس.. على العموم حبيبه اذا احتاجيتي شي اتصلي بيه
اخذي رقمي من البنات لان بشار راد يخابر سامر
كال خاف اكو شي وكتله اني اسالهه!!

جنت احجي وهي مدنكه واضح عليهه الارتباك
مع العلم اول ماطبيت تسولف وتضحك بس هسه
ماتعرف حته تتصرف بس فاتحه الالبوم مال الصور
وصافنه ع صوره من حجيت لسه..

اني غيرت الموضوع وكمنه نسولف سوالف عاديه
واجت خاله يمنه وبيومهه خلصت الليل يمهن وصعدت لغرفتي..

من اجه بشار حجيتله ضحك بضحكه عاليه واني
مبتسمه ويااا عليمن تضحك؟؟

بشار... اااخ من كيد النساء !!!

اضحك ع جذبتهه واضحك على استفزازج منين جايبه
هذا الهدوء بالتعامل واحسج كبرتي موهذيج قبس !!

قبس.. تقصد قبس الرعنه جنت دكولهه!!
بشار.. اي والله تعبتيني بس هسه ابوس عقلج ع التفكير..

المهم اسراء جذابه ابو الخط مالتهه نفسه ابوحسين
سايق البيت مالتنه والجان يوصلج !!

يعني رهمت اسم بسام عود قريب ع اسمي هاي
تخوف اسرااء اخذي حذر منهه!!

قبس.. احتمال صدك غلطت واستحت اوعدهه احد
بشار .. ماادري المهم هي جذابه ..

قبس.. عوفنه من اسراء مشتهيه بقلاوه!!
بشار.. بهالوقت ماحجيتي من جنت طالع؟؟
قبس.. هسه اشتهيت واكفه بين عيوني !!

بشار.. اني بقلاوة كلي كدامج !!!!

قبس.. دغيته ببطنه بسرعه صاااح طايحه الحظ
اكسر اديج

زرفتي بطني!!! هاج شوفي ورفع التشيرت
خطيه جهه خاصرته مسويتهه زركه بليوم
مدري شكم مره ادغه لان يغار منهه...

قبس.. لاتصيح عليه ولاتغلط!! وبقلاوه ماريد
وفوكاهه يكلي اني بقلاوه هم مصدك روحك عود شوفوني!!

ودرت وجهي بزعل!! جان يكول لاتريدين حلوه هاي
لو ازرف بطنك لو ازعل ظلي زعلانه وماتنامين بحضني
شوفيلج صرفه اليوم..

قبس.. والله يالله واحد مغرور شايف روحك عود اني
ثلاثيني وحلو وعندي جاذبيه!!
مانام بحضنك وانت ديربالك اطخني

بشار.. ماشي اتفقنه وكومي هسه اريد انام تعبان
وانتي مامنعسه انزلي جوه شوفي تلفزيون!!

قبس.. صدك ضوجني ونرفزني مستفززز مستفززز
اركع باب الكنتور واسوي صوت وهو مخلي ايده
جوه راسي ويباوعلي ولامهتم

طلعت وضربت الباب حيل شكد مستفز ببروده
لواني واحد هيج متصرف وياي مثل حركاتي جان
صرت اعصاب وهو ولايمه!!

نزلت جوه رحت يم البنات مخليات كرزات
كتلهن بشار نايم تعبان ماكدر اسوي صوت
سدينه الباب وكعدنه نتابع فلم مصري قديم

باوعت للساعه ب١٢ اكيد هسه بسابع نومه
شلون طردني من الغرفه  اني اعلمه هاي بطنك
الا اسويهه منخل ...

جنه مندمجين بالفلم وسمعنه صوت الباب انفتح
كلهه نايمه منو هذا؟؟ كمت اريد اشوف منوووو؟؟

وانصدم بي جان يقفل بباب المطبخ هستوه جاي
وبيده العلاكه والسويج ..
قفله والتفت شافني واكفه قريب ع المطبخ..

سالته وين جنت مو ع اساس نمت؟؟
بشار.. كلبي ماينطيني ابني يشتهي واعوفه ومد العلاكه الي
الريحه تموت كمت ابلع بريگي

كتله يعني علمود ابنك مو علمود امه؟؟؟
بشار.. امه بيش كيلووو .. طبعا علموده..

ادري بي يتشاقه ظليت مبتسمه
تقرب باسني من ورا اذني واني ع وكفتي
وكال يله خلي نصعد...

قبس.. خلي اجيب ماعون واجي رحت للمطبخ طلعت ماعون خليت شكم قطعه بالماعون ع كدنه والباقي فتحت الباب وانطيته للبنات لان سهرانات..

صعدت لكيته مدد ماقبل ياكل كال معدتي تأذيني بليل
وجذاب هو ماياكل علمود لايسمن ويصير عنده كرش..

كملت وغسلت واجيت اريد انام فتحلي ايده
بيومهه شكد حسيت بقيمتي عنده
وحسيت بحبه الي بحيث ادري بي تعبان ونعسان
وطلع نص الليل جابلي واجه ..

اليوم عندي موعد عند الطبيبه وهاي اول مره
اراجع دكتوره نسائيه وكلساع اسأله
بشار خاف تفحصني استحي؟؟
وهو يكلي لا بس سونار
اكلت راسه لحدما وصلنه..

بالطريق تشاقه وياي كال اني اريدهه بنيه ؟؟
قبس.. وعود ليش تريد بنيه..

بشار.. يكولون البنيه حبيبه!! واريدهه تشبهج
لان ماشفت طفولتج اريد اشوفهه ببنتي...

قبس.. مممم اني اريده ولد؟؟
بشار.. وليش؟؟
قبس.. اريده سند الي اني عشت يتيمه طول عمري
ولاعندي اخت ولاصديقه لحدما الله رزقني بيك وباهلك
اريده يسندني ويحميني من اكبر...

جر ايدي وباسهه وكال واني وين رحت؟؟
قبس.. هو يحمينه اثنينه وضحكت..

وصلنه للعياده الطبيبه يعرفهه لان بنت عم صديقه
وهم اختهه جانت ويا بنفس الكروب
ويكول جانت تجي للجامعه واعرفهه..

حته بدون حجز لان كايلتله شوكت ماتوصلون
بس كولوا لسكرتيره باسم قبس وادخلوا..

طبعا العياده متروسه نسوان واحنه طبينه
حته ماكعدنه بس كال لسكرتيره كالتله ثواني
تطلع المريضه وفوتو..

ماتاخرنه بعدنه واكفين طلعت المريضه ودخلنه
الكاعدات سمعتهن يحجن مايصير واحنه من زمان كاعدين
تالي السكرتيره كالت اخو الدكتوره هذا يله سكتن..

سلم عليهه وهي تشاقه وياا تقريبا بكد عمره
ومبينه علاقتهم طيبه اسمهه سرور التفتت عليه كالت
ممكن عيونج شكم يوم ؟؟

ضحكت اني !! دمهه خفيف ولطيفه حجيتلهه
ع حملي كالت اصعدي اخذلج سونار..
اول ماخلت الجل كشيت وهو كدامي بجهه الثانيه ابتسم..

كالت ماراح اصور راح اسمعكم دكات كلبه استمتعوا
بي وبعدين انشوفه خلي انشوف الحلو حاس بوجودكم!!

شعور ماينوصف واني اسمع دكات كلبه شلون منتظمه
وعبالك اسمع لحن موسيقى
بشار كدامي مبتسم واني الابتسامه شاكه حلكي..

سرور.. هسه سمعتوا هاي دائما اني اسمع النبض للام
يله اركز ع الصوره حته يحس بفرحتهه
ويكوم يسويلنه حركات وهو بداخل بطنهه!!

كامت تحرك بالسونار وعينهه مركزه ع الشاشه
واني اباوع لملامحهه ساعه تعكد حواجبهه
وساعه تهز راسهه قلقتني!!

طولت هوايه وهي تفحص لحدماكالهه
بشري !!!...

انطتني كلينس وساعدتني اكعد وفرت الكرسي
والتفتت علينه!!

جان دكول مااعرف شكول اريدكم تكونون اقوياء
للأسف الطفل مشوه والاطراف عنده شبه معدومه..

كلامهه مثل السجين ونبت بكلبي بسرعه خليت
ايدي ع بطني وكانو احمي خاف ياخذوا مني..

كام بشار واني حته ماباوعت بعيونه
ولاشفت ردة فعله لان اني بعدني مامستوعبه الصار
بس الي اعرفه ابني مريض ويريدون ياخذو مني..

حسيت ايده على اكتافي وهو يحجي وياهه بس بنبره
لاول مره اسمعهه وكانو الغصه مسيطره علي
وضحي ام كرار شنو نوعه التشوه ومابي امل!!

سرور.. للاسف بشااار لازم تنزلو باقرب وقت
حته لايكبر ويأذيهه صحته تمام بس مثل ماكتلكم
اطرافه شبه معدومه وراسه اكبر من جسمه باربع مرات

هسه اكتبلكم تحويل لمستشفى اهلي تحت اشراف
دكتوره راقيه وتنزلو اليوم قبل باجر..

قبس.. تخبلت من سمعت كلامهه تريدني اقتله
يريدون يكصون اديه بالمكص ورجلي ويلمو قطع
وهو دكات كلبه لسه براسي..

بدون وعي واصلا بعدني باثر الصدمه
نفضت نفسي وكمت وصحت بصوت شبه عالي
ماانزله ولو اموت لونعيش سوه لونموت سوه

يتبببببع.... متابعه ممتعه