رواية قمع المشاعر الفصل الحادي وخمسون 51 - بقلم Rozaya1122

قمع المشاعر.... السابع من الجزء الثاني...
للكاتبة زهراء ( روزايه)...

ونين إلليل يكسر خاطر إلمشتاك
وصفنات إليحب ماتعرف إلبسمه
آنه إلمشتاك إلك حتى بصلاة إلليل
خذك مني إلنصيب ورحت للقسمه
معروف إليحب بعيونه تلكه أشعار
وآنه إلعاشك هواك وماشفت نسمه.....
...

قبس.. بدون وعي واصلا بعدني باثر الصدمه
نفضت نفسي وكمت وصحت بصوت شبه عالي
ماانزله ولو اموت لونعيش سوه لونموت سوه..

سرور.. اهدي قبس خليني انسولف وانتي احكمي بس اهدي
والتفتت على بشار هاي ليش كامت ترجف؟؟

تقرب عليه بس شكله مذهول حته مايعرف
شيحجي وبياطريقه يهديني
بس يطبطب ع كتفي ويكول اهدي !!

سرور.. بشار راح اكتبلك العنوان وفكر وخابرني
تلكوني كدامكم حالات التشوه كثرانه واغلبهه
اذا مو وراثيآ احتمال من علاج سابق..

بشار.. صحيح هي جانت تاخذ علاج حاله نفسيه
واحنه نسينه هالشي !! المفروض تتعالج وتطلع
السموم الي بجسمهه يله نفكر بالحمل...

سرور.. شنو العلاج شنو اسمه؟؟
بشار.. كاله الهه بالانكليزي بسرعه شهكت تحجي صدك؟
لوماانت الدارس وتعرف هالشي اي علاج
حاله نفسيه مدمر وخاصه هذا العلاج ماينطوا غير
الي عدهم انفصام شلون ماتتعالج..

بشار.. هسه بعدين نحجي بهالموضوع راح انروح واني
اتصل عليج بس مااريد احد يعرف!!

قبس.. طلعنه من العياده واثنينه مصدومين ومذهولين
اجينه فرحانين ونضحك ونتشاقه
رجعنه بحزن وفرحه مكسوره..

بس حرك السياره ولزم الطريق العام بجيت
كمت اضرب ع وجهي حسيت بحجم الخساره
هو يسوق ويجر باديه ويصيح موهيج ولج!!

طفلي يوم يوم انتظره .. سمعت نبضات كلبه
الهادئه ومرتاح بداخلي
تريدون تقتلو واطلعوا قطع قطع ..

بشار.. شلون لعد اتجيبي وتحملين ذنبه
تخيلي لا احد يصادقه ولا اطلعي من البيت
بالعكس تجنين علي اذا بقيتي

قبس مثل مامحترك گلبج هسه اني مثلج
مااريدج تتأذين ولاسامح الله يصير
شي موزين واحتمال يجي بصحه وتتعلقين بي
سنه ويموت

الله محلل هالشي طفل مشوه وماتفيده اي عمليه
بالمستقبل تنزلي وتتعالجين ونرجع نسوي..

قبس.. ماانزله احتمال جهازهه جذب
هوايه اسمع قصص يكولون مشوه ومن يجي
يطلع مابي شي ماانزله الطفل طفلي تريد
موتني يله تنزله..

بشار.. ضرب الستيرن بقوه وعاط بيه لاول
مره حجه بعصبيه موبكيفج لاتعاندين
الطفل ينزل مخبله انتي جاي نكول مشوه
اجيبه للدنيا يتعذب

اختصري الطريق مدامه بعده صغير وماكامل
قبس احس بيج واعرف شعورج
بس هالتمسك غلط هو هم ابني وروحي
محتركه علي بس مااريد اصير سبب تعاسته بيوم..

قبس.. كتلك ماانزله لوتنگلب الدنيا وهاي سرور
احتمال جذابه تريد تضربني تريد تصيح عليه
شتريد سوي ابني ابطني ماانزله

حتلو مشوه حتلو معوق اني اتحمله
لاتفرض عليه بالقوه لوتسحلني سحل
ماانزله

جنت ضامته ومحاوطته باديه اخاف لاياخذو
مني ماجنت اعرف شدا احجي بس
كل الجان براسي ابني مااعوفه

بشار سكت لان شافني منفعله والنقاش
مابي حل بس عصبي حيل
بس ضجت لان جان متمسك انزله واحتمال السونار جذب

مسحت دموعي وعيني ع الطريق انتبهت موطريق
البيت بسرعه صحت ولزمت ايده بخوف
وين موديني بشااار؟؟

بشار.. ع كيفج وين موديج انروح لبيتنه!!
قبس.. هذا موطريق البيت تريد تاخذني بالقوه انزله؟؟

بشار.. شبيج قبس مااكدر اخذج للبيت بهاي الحاله
واهلي بعدهم كاعدين شويه نفتر ونرجع
بين ماتهدأين..

قبس.. كلبي مشتعل نار ومااعرف اخذ قرار
جنت متمسكه بي بكل قوتي رغم محاولات بشار للاقناع
بس جنت اعصب وانهار من يحجي..

مااعرف المكان اول مره اجي بس طبك السياره ونزلنه نتمشى ع حافه الشط يمه متنزه للعوائل وصوت الاطفال وهم يلعبون
كطع كلبي..

حجه هواي بشار وحاول يقنعني ماجان عندي حل
ظليت ساكته ودموعي تنزل ليش اني هيج ماعندي حظ
بكلشي رفعت راسي للسما ياربي مالحكت افرح
والله بس هذني الشهرين حسيت بفرح وتالي هيج
تنكسر فرحتي..

استغفرت ربي لا اعتراض ع حكمك انت تنطي
وانت تاخذه وكلنه مرجعنه الك مايدوم الا وجهك الكريم..

رضيت بنصيبي وخابر بشار على سرور
واتفقنه باجر ب١٠ اروح للمستشفى الاهلي
ويسقطوا وبعدين اتعالج ..

من رجعنه لكينه الكل نايم لان فوك ١٢ بس
صوت التلفزيون جاي من غرفه البنات
مباشرة بس صعدت ذبيت الجنطه والحذاء
وبوجهي للحمام حته مااخذت ملابس

فتحت المي احاول يغسل حزني
مثل مايغسل جسمي ظليت هوايه جوه المي
لحدمااندكت الباب صوت بشاار
وهو يصيح قبس تاخرتي ؟؟

سديت المي وحاجيته حبيبي ماجايبه ملابس
جيبلي من الكنتور!! بس جنت احجي واني مخنوكه

راح جابلي بجامه وقميصهه مال نوم بدلت وطلعت
وهو فات سبح بين مامشطت ومددت بفراشي..

اول ليله انام بحزن وضيق بحضنه ومامرتاحه
كلساع افز وافززه وياي

حلمت احلام موحلوه مثل الكوابس
تخيلي صوت طفلي وهو يحجي ويكول لاتكتلوني
اني اقل موقف ارجع انتكس من جديد..

بيومهه بشار لونايم ساعه لوماكو كلساع يكعد
وياي يهديني ويلعب بشعري ونغفه وشويه وافز
بس ردت الصبح يطلع صارت الليله جحيم

فزيت قبله باوعتله غافي اليوم مايروح للدوام
ظليت العب بلحيته كرمش عيونه وابتسم..

بسته من خده كتله صباح الخير!!
رد عليه صباح الورد شلونج اليوم؟؟

قبس.. الحمدلله المكتوب مامنه مهروب ..
سحبني بحضنه صار راسي بركبته وهو يبوس بشعري
واني حاضنته من خصره..

بشار..هسه نتريك وانروح بس اني وياج مااريد احد يعرف !!
قبس.. شنكول؟؟
بشار.. اني اكلهم حولونه للمستشفى ومن نرجع انكلهم الطفل مابي نبض ميت ابطنهه

ماتحجين ولا اتذكرين سالفه مشوه بس اني وياج ندري
وسرور ماتحجي ولاعدهه علاقه باهلي!!
حته مايوم وحده تسمعج حجايه ولايحملوج المسوؤليه
ماشي حبيبي؟؟

قبس.. بسته من صدره وكمت كتله الله يخليك اليه
ومايحرمني منك دومك تفكر براحته قبل كلشي
بشار.. شعندي غيرج اهم شي اشوفج مرتاحه..

قبس.. بوسته وكمت بدلت ونزلت تفاجات خالتي
ليش بشار مارايح للدوام كتلهه استراحه!!
سالتني شكالتلج الطبيبه كتلهه هسه انراجع المستشفى نسوي سونار ملون مدري شلون رهمت الجذبه
حته ماخليت عيني بعينهه

تريكنه وبدلنه وبس اني ويااا رحنه
بالطريق وصافنه لواني عندي ام موهسه
هي واكفه بجانبي وتصبرني وتحس بالمي

لوعندي اخت ماهسه كلساع تخابرني
وبالهه يمي وقلقانه عليه وتبجي
على بجي وتفرح لفرحي!!

الله رزقني ببشار اريده ام الكاه بحنيتهه وخوفهه عليه
اريده اب يعلمني الصح والغلط الكا موجود
اريده اخت اشكيلهه يفتحلي صدره ويتقبل كلشي مني..

قاطع صفنتي وهو يكلي حبيبي وين سارحه؟؟
قبس... وياك حبيبي..
بشار.. راح اخذج للامام الكاظم ع انزور ونروح للمستشفى
حته ماتخافين..

قبس.. وحدي مااندل اول مره اجي
بشار.. اني وياج بس من تفوتين اعوفج لان قسم للنساء
وقسم للرجال..

قبس.. بشار شلون يسقطوا يعني عمليه ويفتحون بطني
لو شنو؟؟
بشار.. لا موعمليه يسمو داخلي بس مااعرف
تخدير بدون تخدير..

قبس.. اني اخاف الله عليك وصيهم حتلو تدفع فلوس
خلي يبنجوني اخاف اني !!
بشار.. لاتخافين هسه نوصل ونحجي ويه الطبيبه وانشوف

قبس.. وصلنه للامام كلشي مااندل امشي ورا
هو راح لتفتيش الرجال واني طبيت بنص الهوسه
مال تفتيش النساء

اني عندي فوبيا من الامكان المغلقه والظلمه
ومنا ازدحام وكلساع تجيني دفعه احس روحي راحت تطلع
وفوكاهه صيف وحاره بس اريد اوصل متت!!

من وصلت للمفتشه فتشتني جان دكلي وين جايه لحفله
لو استعراض وانطتني عبايه!!

انصدمت بطريقه كلامهه وهي مره جبيره كتلهه عفوآ
اشفتيني شلابسه وهاي عبايه هسه البسهه..

كامت تحاجي بصاحبتهه لاتخليهه تتدخل قبل ماتغسل
وجهه وتبدل جواريبهه..

باوعت ع لبسي لابسه فستان طويل
وجواريب شفافه وحذاء كعب شويه موعالي
مكياج مامخليه بس كحل ومن البارحه مال طلعه العصر..

التفتت عليهه روحي بخشمي والله جابهه
اليوم الا اسحلهه سحل اذا اتجاوزت

كتلهه مكياج مامخليه وجواريبي مابيهن شي!!
ردت عليه بنتر وهي تفتش لاتلغين مالنه خلكج
عرايس جايات للامام..

كلبي يغلي عليهه كون اشيل الطابوكه النصعد عليهه
واضربهه براسهه كتلهه اول شي لاتعلين صوتج
موتايهين الج

والشي الثاني قبل ماتحجين بالقيم علمي نفسج
اني حره والذنب عليه اذا جنت مسويه شي
وهسه غصبا ماعليج افوت واذا اتجاوزتي مره ثانيه
هسه الم الناس عليج

اشو ماتستحن لازمات الناس كوه شوفي روحج
ولبسج الكصيف يله تعلمين الاخلاق بسرعه رفعت البرده
وطلعت والتفتت عليهه كتلهه بكلن رياء
واكعدن ببيوتجن صلن احسن ماتبيعين مثاليات براس الناس

كلبي فاير طلعت واسمعهه تحجي وطلعت وراي
تصيح اني اعلمج بس المهم ريحت كلبي بيهه
سمعت صوتهه وراي وهي تصيح ع ابو الامن ودكله
طردوهه !!

التفتت عليهم وهم لاحكيني كتله مو الامام بس الكم
غصبا ع راسكم افوت والا اروح اشتكي عليكم

بعدني احجي الله جابلي بشار يمه متت لزمت ايده واجر
بي وهو يكلي مشاكلج ماتخلص ولج ليش
ماتبطلين هالطبع!!

التفتت صاح بيه لاتلتفتين خلي يولون هذني
بطرانات وظل يحجي عليه واني ساكته

طبيت للامام زرت وصليت وبجيت ودعيت
الله يرزقني بتمام الخلقه
وطلعنه للسياره ورحنه للمستشفى..

لكينه سرور وهي اخذتني ع دكتوره جبيره
وطبعا بشار انقط قط من الزين كله جيب وادفع هلكد
وهلكد عبالك وحوش حته بطل المي بالف

اخذتني للصاله وهي تسولف وياي
تحاول تهديني واني مااسمعلهه بس
اقره ايات قرانيه بكلبي وادعي  ..

طلعت من الصاله  وبشار ساندني
احس بالم قوي جزء من عندي انتزع
وفعلا الطفل مشوه بشار موصيهم مااشوفه
بس هو شايفه كال احسن شي سوينا لان يتعذب بسببنه..

رجعت للبيت بس الالم يعصر بروحي
كلهه عرفت سقطت الطفل وبشار
كعد يشرح الهم ويكلهم مابي نبض وميت بطنهه

ايام مرت واني كئيبه بس ابجي
كلما يجي يلكاني مغطيه راسي
وابجي حته نزله يم البنات ماانزل احس حالتي النفسيه
صفر ..

اسراء تجي يوم يومين وتروح بس من يروح
لديالى لو عنده شغل بغير مكان يجيبهه يمنه

واني اخذني بشار لطبيبه خاصه وبديت رحله
العلاج كالت جسمج متشبع بهاي الحبوب
ويراد فتره طويله حته تكونين جاهزه للحمل

رضيت بالمقسوم ودائما احمد الله واشكره
على كل حال..

اليوم محاكمه بشار لان قربوهه بالواسطه
من راح جان كلبي نار وهو يضحك يكول ماكوشي

كلساع اخابره يكول بعدنه ول١ لحدما كلبي خلص
يله جاوبني كال براءه وساجده مذنبه
بيومهه من رجع كال عفتهه بالمحكمه مادري يسجنوهه
عدهه ظهر قوي يطلعهه بقت هي والدوله..

شويه هذا الخبر خلاني استعيد توازني
وطلعت من قعوقعتي ورحت للصالون اني وهدى
شويه عدلت شعري وسوتلي تقشير ومساج
ردت اصبغ بس ماقبل بس عنايه بلبشره ...

بيومهه هو تاخر يله رجع واني عاجبني اعيد
ايام عرسي ولبست السيت الابيض
وكفت كدام المرايه هو مفتوح من الظهر وكله كيبور
الوحمه مبينه وصاير نشاز جزء اسود وجزء ابيض..

ترددت ردت انزعه واغيره بشي مستور
بس قويت نفسي يله هو يوميه يشوفهه
بس ماادري ليش ضجت منهه

لبست الروب وظليت فاتحه التلفزيون
انتظره كلساع اباوع لساعه تاخر
اتصل بي يرفض حته بديت امل

لحد الساعه ب١٢ يله اجه اول ماطب راد يحضني
دفعته بزعل ليش تاخرت؟؟

بشار.. حقج والله بس كاعد يم الولد وكلما اريد
اكوم كالو بعد وقت هالمره كلهم موجودين صدفه نجتمع كلنه.

جان يحجي ويبوس بركبتي واني سويت
نفسي زعلانه بس اني ادري بيهم موجودين جماعته
وبالشهر مره ينجمعون هيج جمعه لان كلهم شغل وبغير اماكن..

مد ايده ع حزام الروب يريد ينزعه
لزمت ايده ورفعتله حاجبي عوفه سقط حقك نعست!!

بشار.. منين متعلمه هالدرب مبدله وطالعه حلوه اليوم
وتريديني انام واني ماضايك هالعسل..

بسرعه رفعني واني معلكه بركبته اضحك
السيت صار بكل مكان قطعه ونسيت سالفه الوحمه
عود جنت مستحيه منهه بس هاي كل مره
ياخذني بلهفته وانسه كلشي...

شجن... اليوم عيد الاضحى وعمه بسمه خابرت قبل يوم ورايحه لاخو جدو الجبير وكايلتله اريد اروح ارضي بيت عادل

وكالعاده طيبة اهلي ولا موطيبه تسمى هاي غباء
كالو حرام ومايصير نرجعهه بالعيد
خلي تجي تسلم ونكلهه مانريد مثل قبل
وبهالحجي ..

سوه جدو غده والكل اجه ع الغده واجت بسمه
وبناتهه اني ماكدرت اواجه ابد ولاردت اشوف فاطمه

ظليت كاعده بالغرفه بس قبس
اجت سحلتني سحل وطلعتني
وظلت تحجي عليه شنو حابسه نفسج
اطلعي واتونسي واقهريهه هي اخذت فضالتج

بدلت وطلعت جنت اتصنع القوه احاول
قدر الامكان ماابين ع نفسي وسويت نفسي
مامهتمه

شكد حاولت تغيضني وحجه غيث وكال غيث
بس ابد ماباوعتلهه واضحك واتشاقه ويه نرجس
بس النار تسعر بكلبي

حبه راح وانتهى بس اذيتي مومن حبه
لااا.. من طعنته مالكه غير فاطمه يخطبهه
شنو من انسان مااكول غير الله يسعده..

بعدنه كاعدين قريب الغده مانحس غير ساره
مرت وائل وغيث بس شفته ركضت للغرفه
ظليت افتر بالغرفه ونرجس راحت تشوف شعدهم؟؟

شويه واجتني كالت ساره جايه خطار وائل
سامحلهه ولان ماعدهه اهل وتحسبنه اهلهه
وغيث اكيد موغريب

ابتسمت باستهزاء لا موغريب ماجاي يعايد
عمته حبيبة الگلب فطومه هنااا واجه يشوفهه..

جنت حايره اطلع لوابقه هنا
اتخذت قرار اطلع ومااهتم ولا اريد حته اشوفك
ولا اسمع صوتك بس لخاطر نفسي
الهه حق عليه هوايه ذليتهه لازم اواجهك واكلك
شوف بعدني بحيلي..

طلعت من الغرفه تمشيت بالممر صار باب الصاله كدامي
مااعرف منين اجتني القوه بهذيج اللحظه
واني خلصت عمري اتهرب منه
واصلا بهيج مناسبات مااطلع حته محد يكول خطيه رجلهه معاقه..

بس هسه اكتشفت شجن القديمه ماتت
وتولدت شجن جديده قويه
ماتهتم بس لنفسهه

حتلو احبه وحتلو حبه يحرك داخلي
بس لازم اواجه ولازم اتعود على الوضع

طبيت كلت السلام عليكم
جنت مامسلمه ع عمو عامر وسلمت
ع الكل لحدماوصلته ابتسمت بوجهه
وعايدته ورحت كعدت بصف عمر

جان كلبي يدك سريع بس حسيت ايد
عمر تخلت ع اكتافي وكانو يكول عفيه
بالسباعيه

التفتت علي ابتسملي بعلامة رضا
حسيت مدلي قوه وتقويت اكثر
حته بشار من باوعتله هزلي راسه
بابتسامه حسيتهم كلهم يكلولي عفيه

ع الرغم ماسويت شي جبير بس اول
مره اجازف واطلع بعكازاتي كدام الكل
واسولف واضحك رغم سعير النار البداخلي...

امجد كاعد كدامي وكلما ارفع راسي
الكا صافن عليه ...

جنت ابعد نظري عن فاطمه بس ماترتاح
اذا ماتغثني وكامت كعدت بصف غيث
وتسحب بتليفونه وتشاقه

شكد جنت اصبر بروحه بس موبيدي
حسيت بغيري موطبيعيه حسيت الدمع وكف بعروقي

جان كلساع يخزرهه حته تبتعد وهي ساعه
تخلي ايدهه ع رجله ويوخرهه
لو ساعه تشاوره حته مااستحت من خوالهه

مااعرف شلون اوصف الشعور
شعور غيره ..شعور تملك
اريد اصرخ واكول هذا مالتي
لاتتقربيله

اريد اكوم اضربهه واكلهه انتي بحيلتج
اخذتي ..
لاااا اريد اساله هو معقوله كل كلامك جذب

اليحب من گلبه شلون يكدر
يحب مره ثانيه؟؟
موهاي اني حبيتك وكبرت بروحي لحد
مااستوطنت بكل خليه بداخلي

بس انت نفيتني وخليت الغربه
والشماته تستوطن بداخلك
وعيشتني ابشع شعور من
فراگ .. من غيره ... من حقد صار بي ومايكبر..

ماتحملت حقارتهه وعوزهه تبوسه
وكل حركه تسويهه جانت تباوعلي
رفعت راسي باوعتله بهاللحظه

حسيت واحد شلع كلبي من نص ضلوعي
حسيت شي تكسر بصدري
ساعتهه حسيت بنغزات شي اعمق من الگلب
يمكن صدك تگطعت نياط گلبي!!!

بعدت نظري عنهم وحاولت التهي
بعلوش والعب بي ماردت
اكوم بسرعه ويكولون انقهرت..
جنت ملتهيه وحاولت اشتت فكري
ويه ضحكه علوش وسوالف جدو

هنا جان تقاطعهم عمه بسمه بضحكه
ودكول اليوم مدام متجمعين اريد احجي وياكم
كلهه كالت خير ان شاء الله..

جان دكول  اني اريد اطلب ايد شجن
لامجد ونفرح بيهم ....

.
.
يتبببببع..... احبكم