رواية قمع المشاعر الفصل الستون 60 - بقلم Rozaya1122

قمع المشاعر.... السادس عشر من الجزء الثاني...
للكاتبة زهراء ( روزايه)...

(شكرآ من القلب على تفاعلكم .. البارت طويل احاول اختصر المواقف الحزينه مراعاة لمشاعركم
بس الاحداث مترابطه الي اكدر علي اسوي استمتعوا بالقراءه)
...

احنه وين انعيش؟ لياعالم ننتمي؟ عالم الوحوش!!
عالم الذم والنميمه!! من تهدمين عائله سعيده
وتشتتين شملهم!! شلون الج عين تغمض وانتي مأذيه
وظالمه انسان بريء ويتيم!!

من توكفين بصلاتج ترفعين ايدج بالدعاء لحاجه لنفسج
شدكولين لربج ؟؟ ماخفتي من حسبي الله ونعم الوكيل
ماخفتي من دمعه يتيم شلون راح تنزل عليج مثل شرار
النار وحته لو بعد حين!!

السويتي كله بدافع الغيره! وبدافع الحب الكلام موجه لكل وحده تحب متزوج وهم مايحبهه وماكو قصور بمرته
هوايه كثرت هاي النماذج بمجتمعنه تاخذه من مرته وتسوي المستحيل من سحر ! من مكيده! من طعن بالشرف!
ومن تجي تناقشهه دكول احبه بس هي الغيره ماليه نفسهه
لاتطغين لان الله بالمرصاد مواليوم باجر ! موباجر
لو بعد حين لازم تطلع حوبتهه ولوعتهه...
..

قبس.. كاعده بالصاله بالكاع وهو كاعد ع التخم التليفون
بيده متردد يفتحه لولا؟؟
عيني مانزلت من عينه دموعي تجري واحسهه تحرك خدي
من اللوعه البيه وهو ناره مو اقل من ناري..

نصه ع التليفون وفتحه طافي شحن كام جاب الشاحنه
وشكله زحفت وارتجيت ع التخم اريد شي يسندني
احس نفسي راح اتخربط دكات كلبي سريعه حيل..

هو ساكت وحاضن راسه منصي بالكاع
كلساع اريد احجي بس احس الساني
مايجمع الكلام بس لوعة كلبي حارگتني..

شويه وفتح التليفون كام يتصفح بي
ماكدر يظل هادىء كام من مكاني افتر بالصاله
عيني علي شلون ايده ترجف ترعش بحاله موطبيعيه!!

بدت علي علامات الغضب يقره ويفشر
بكلام اول مره اسمعه ينطق بهيج كلام
ضرب ايده بقوه بالحايط كل هذا
وهو منطيني ظهره!!

كمت وكفت كدامه !! اريد اهدي اريد الزم ايده
اريد اخذه بحضني حته يسكن روعه وتهدء عصبيته
اريد اضمه بصدري واخلي يسمع صوت گلبي..

ماعرفت افسر تصرفاته!!! سحبني من ايدي حييييل
حسيتهه انخلعت وشمرني بنص الغرفه وصاح
بصوت مخنوك كوه يطلع اقفلي الباب علييييج!!

ادري بي يحميني من نفسه !!
ادري وهو بعز عصبيته مايفكر غير بيه وبسلامتي!!
قفلت الباب عليه وكعدت بالكاع ابجي..

افرك بكلبي احسه نار ومشتعله بي
نفسي لعبت من الخوف بطني مغصتني حييل
عيوني غوشت من دمعي
مااعرف شلون ابرر لنفسي ومااعرف شبي التليفون!!

يمكن ساعه اني وحدي بس هاي الساعه
خلتني بمعنى الكلام انهار فقدت
كرفصت بالزاويه واشلع شعرايه شعرايه من راسي
ماانتبهت شكد شلعت وشلون صار هلكد كدامي

مااحس بالم احس بانهيار تام وعقلي نمل
احتاجيت اي شخص حتلو عدوي
بس خلي اسمع صوت بالبيت كمت ادك بالباب
واصيح بشاااار ....

صوتي يتكطع راح اتخبل ساعدوني كمت اضرب
حيل واصيح ساعدوني عقلي يوجعني بشاااار
بشاااااااااار..

دقايق واجه دك الباب من حالتي نسيت القفل
يمي واني قافلته هو يدك بالباب بصوت مكسور
وكال افتحي يمج القفل لاتخافين..

بسرعه فتحت الباب صار كدامي شمرت نفسي
بحضنه بس بعدني ودار ظهره عني يفرك بوجهه..

افتريت ورا مثل المجنونه واردد بكلمات متواصله
حته ماانطي مجال لروحي تاخذ نفس..
افتر بشكل دائري واحجي اني بريئه
اني بريئه!! اني ماخنتك! اني احبك ! اني مريضه
لاتشمرني بالشارع!! اني بريئه ..

لحدماصاح عليه بصوت عالي كاااااافي كاااافي
اكعدي ولزمني من اكتافي يهز بيه يريد
يصحيني ..
اني صاحيه اني استوعب الصار بس مااستوعب
العواقب..

دفعني كعدت ع التخم وهو كعد بالجهه الثانيه
كلساع يريد يكوم يهجم عليه ويفرغ ناره بيه
بس مانع نفسه بالقوه..

صاح بيه جاوبيني ع كل سؤال هسه اني
مااحكم ع اي شي بس اريد اسمع منج ..

مثل المتهم كاعده مكرفصه ورفعت رجليه
لصدري كلما يباوعلي يفرك وجهه ويستغفر
وياخذ نفس ..

بشار.. ليش اخذتي حب مانع وضحكتي عليه وتماشيني
بالكلام من اكلج اريد طفل وتكليلي رزق ..

قبس.. احجي بصعوبه بس هدوءه خلاني اخاف
بس اخاف مااكدر احزر تصرفاته ..

جاوبته واني ابجي اني غلطت اني مااتحملت وكمت
اخذ علاج نفسي وماكتلك لان ماتقبل
وانت تريد طفل وخفت لايطلع مشوه

بشار.. ليش ماحجيتيلي يايوم اني مفضل مصلحتي
ع حسابج يايوم فضلت اذيتج ع حساب راحتي؟؟

قبس.. خفت منك والله خفت تسوي بيه مثل بابا
بشار اعذر حالتي والله موبيدي خفت دكول عليه مجنونه
وتتخلى عني.

بشاار..عاط بيه بصوت عالي عذرج اقبح من فعلج
عقل مابراسج كل هالاهتمام والحب المنطي الج واكول
بعدني مقصر وياهه لان حالتهه تختلف
لوحاجيتلي جان اخذتج لطبيب نفسي وتعالجتي

مواحسن من هدم الثقه شلون الج عين
تسويهه واني اكول عليج بريئه
شلون نفسج اطاوعج من اتقربلج واكلج اريد طفل
وانتي تقشمريني مثل الزعطوط وادبريلي اعذار
يوم التهابات يوم رزق ليش هيج ؟؟

قبس. نصيت راسي وامسح دموعي ماعندي
جواب اله ..
بشار.. هاج اقري وشمر التليفون وكال اني لحد هاي اللحظه
وياج لان اعرف اكو من يضدج بس اذا مالكيت دليل
واذا ماثبتي برائتج بعدهه لاتلوميني!!

قبس .. سحبت التليفون مفتوح ع محادثات فايبر
طبعا الفايبر مو ع خطي رقم غريب هو بالجهاز
ونفسه الرقم حفظت نهايته نفسه السوه فايبر قبل
مده ..

المحادثات مااعرف شلون اوصفهه يعجز الساني
عن الوصف يومياتي بالتفصيل شلبست اليوم
وشوكت داومت وشوكت اجه بشار
وكلهن بوقت الظهر والصبح قبل لايجي بشار
من دوامه وبعدهه اكله لاتراسل راح اضم التليفون فوك
من يطلع الصبح نتراسل..

رحت ع الواتساب صوري بالجمله شكو صوره ماخذتهه
ودازتهه لشجن موجوده اساله حبيبي تقبل البس هذا
جابه اللزكه ويلح عليه؟؟
وهو يرد عليه مدام جابه لاتلبسي روحي لبسي غيره

واني بالحقيقه مرات اخذ رأي شجن بالملابس
صوري بالسفره بتركيا وتفاصيلهه كلهه مراسلات
توكف العقل!!

المصيبه الاكبر صورة الفستان لابسته ودازتله صوره
حبيبي هذا جابه المايسمى ويريدني البسه
اله واني اريده بس الك..
وهو يرد عليه لاتلبسي وكولي مادري بي وين!! وجيبي يمي
اشم عطرج بي اااوف ع جسمج يخبل اشتعلت
عشيرتك بشار حارمني من هالكيك..

ماكدرت اكمل ضاق نفسي شمرت الموبايل
صاح بيه كمليهن كلهن اريد جواب عليهن
بس بلحظه حسيته راح ينفجر..

البرامج فيس نفسه هو فيسي مفتوح بالجهاز والماسنجر
وكل محادثاتي الحقيقه يعني المصيبه حسابي
متهكر وماادري ..

كلامي ويه شجن واني اكلهه اخذ مانع
وغير شكم صوره دازتهن الهه
ايدي ترجف مااسيطر ع اعصابي..

اخر موضوع هو موضوع الطفله والكاميرات
وع اساس الطفله حلقة وصل بيني وبينه
يدزلي التليفون بيدهه والرصيد
واني عود متفقه ويا ع سالفتهه واكله راح اكول لبشار
دااتخيل حته يلغي الكاميرات وتكدر تجيني...

ماكدرت اكمل شمرت الموبايل حيل
بقوة ايدي.. هنا اني جنت منهاره كمت اصرخ
بصوت عالي وشكو شي محبوس بداخلي
عبرت عنه بالصياح

كعدت بالكاع وادك ع صدري بقبضة
ايدي واصيح حسبي الله ونعم الوكيل
حسبي الله ونعم الوكيل..

لك بشااااار اني قبس الجنت دكول عني انتي
تختلفين عن البنات لان عشتي ببيئه قذره
وحافظتي ع نفسج
لك اني الكتلت نفس حته لاواحد يلمسني
واتلوث

بشاااار اني قبس الحبيتهه وامنتهه ع بيتك
اني اخونك؟ اني بالنظره مااكدر اخونك
مايوم كلت ع واحد حلو مايوم باوعت لغيرك
وانت مصدك هذا الاتهام..

صدك مايهمني بس اريد برائتي عشت اتعس
عيشه اكل من الزايد مال ساجده
اخدم بعزيز والم بطالة العرك وانظف مكانه
وماانطيت نفسي!! اخدم بالبيوت حته بيوم
ارجعلكم واكلكم اني بنت سميه الحجيتوا عنهه

اني ماسويت شي ليش عذبتني ياربي
اني بس ردت مكان امين انام بي
بس ردت اعيش مثل البنات ليش
اتهم بشرفي وينهدم بيتي اللللللهي
تسمعني اني مظلومه !!

جنت اصرخ واضرب صدري
اريده يتهشم اريد كلبي يوكف كافي مااريد اعيش
مااريد حبك مااريد عائله كلشي مااريد
اريد ارتاح ..

ع كعدته وهو يباوعلي احس حبالي
الصوتيه اتمزقت لحدماتعبت وهو كاعد
مااكدر اوصف حالته لان اني بنفسي
مستغربه من تصرفه وهدوءه

جنت خايفه يكوم يضربني خايفه
يأذيني وياريت كام صيح غلط عليه
ع الاقل اعرف ردة فعله
مو بهذا الهدوء الكدامي فوك حالتي
حسيت نفسي مااكدر بعد..

رجعت راسي ع التخم واني اشهك من البجي
وهو جكاره ورا جكاره  تمنيت مثل مايطفي
الجكاره يطفي نار كلبي..

عافني وكام للغرفه شفته طلع راح للحمام
وبيده ملابسه صوت المي وترني
كمت اسد باذاني احسه ينخر بجسمي..

ركضت بسرعه للمطبخ مااريد اسمع اي صوت
بس صوت البراسي يكول
قبس انتي بريئه ويتيمه الله مايعوفج وحدج
مو اليوم باجر تطلع برائتج !!

طلع من الحمام يدور عليه عباله
انهزمت لكاني كاعده ع الكرسي ومخليه راسي
ع الميز حجه بنفس النبره كومي اسبحي
مايظل سر مضموم كلشي ينكشف ..

باوعتله واني امسح دموعي شوكت ينكشف
من تدفني بيدك بين انقاض الحياة
عبالك قبس القديمه وتتحمل لااا يابشار
تحملت بمافيه الكفايه..

من حبيتك لسه اكوم من مشكله توكعني
الاكبر وكل تهمه تكسر الظهر شسويت اني
موحالي حال البنات حبيت ابن عمي وحبني
وتزوجته شنو السويته !؟

لامشيت بدرب الحرام ولا تملقت الك
ولا ذبيت نفسي عليك ليش هلكد عانيت بعشرتك

بس انت بهاي الدنيا ومستقتلات عليك البنات؟؟
بس انت مدير وعندك فلوس وهيج يريدنك؟؟
ولازم اني اتحمل العواقب

بشار.. ومنو كالج يريدني تقصدين فرح منو يريدني
غير فرح؟؟

قبس.. كل المصايب الي وكعت ع راسي
بسببك انت!! فرح غيرهه ..ميامين تكرهك تحبك
ماادري بس كل الي اعرفه كل هاي التهم والطعن البشرفي
بسببك انت لان اكو وحده تريدك ولازم تحصلك..

بشار.. امشي كدامي للحمام وسحبني من ايدي
وادفع بي ومايسمعني كتلك عوفني مااريد اسبح
تريد تهديني روح اخذ حقي وخر عني عوفني

شمرني بالحمام وكال بسرعه اسبحي
واطلعي خابرت على عمر راح يجيب شجن
اريد اشوف هاي مراسلاتج ويه شجن والصور
شلون طلعت موكلما احاجيج تكليلي ويه شجن!!

شكم مره محذرج مادزين صوره بالتليفون
ترى تهجم بيوت هذا البراسج شنو ؟؟
ليش اله تكسرين الكلمه ؟؟

اشر باصبعه ع راسي حيل كليلي ليش ماتسمعين
الكلام محذرج اني؟؟ كتلج ترى ابيوت انهجمت من
سوالف التليفونات وراحت ابرياء بيهه
ليش تتصرفين العكس ..

سد الباب حيل ودار وطهه واني طبيت جوه المي
دموعي تنزل ويه المي وافرك براسي
اريد اهدء ماجايبه ملابس لفيت نفسي
بالمنشفه وطلعت للغرفه بدلت وهو مادري وين..

لزمت السبحه بيدي استغفر وادعي الله
ينجيني من هاي المصيبه الوكعت بيهه
شويه واسمع صوت شجن بالصاله وهو يصيح
عليه..

طلعت مهدود حيلي شافتني فزت كامت
سلمت عليه وعينهه تتنقل من بشار الي
وتريد تسأل وخايفه..

شجن.. بشار شبيهه قبس ليش هيج حالتهه؟؟
بشار.. منو يفتح تليفونج؟
شجن..جاوبت باستغراب محد يفتحه هو بي رمز ومحد يعرفه
بشار.. اسراء؟؟

شجن.. ابد مايوم مدت ايدهه علي البنيه حته موبايلهه
بدون رمز ماعدهه شي ..
بشار.. متاكده؟؟
شجن.. طبعا متاكده اني وياهه ليل نهار وحته اراقبهه
لان وصتني قبس اخذ حذر منهه بس ابد ماتمد ايدهه..

بشار.. قبس من ادزلج الصور تحفظيهن لوتمسحيهن بسرعه؟؟
شجن.. لا امسحهم بنفس اللحظه وهاك شوف طلعت
تليفونهه دور المحادثات كلهه مابيهه ولاصوره

يحجي ويباوعلي اني ساكته انتظر فرج الله
ع ياساعه يبين..

بشار.. ومن اجيتو يمنه اكو احد لعب بغراض قبس
اكو احد صعد فوك تذكري؟؟

شجن.. اذا قصدك ع اسراء حته لغرفتكم مادخلت ولا صعدت ع الدرج واسأل ماما البنيه مثل النمله ماتحس
عليهه كافي تاخذون بغيبتهه

قبس.. وليش ادافعيلهه بسببج حياتي خربت
ادزلج الصور مأمنه بيج اختي تالي تطلع صوري بكل
مكان

بشار.. قبس اسكتي خلينه نفتهم!!
قبس.. مااسكت ليش تسكتني خليهه اطلع دليل برائتي
صوري عدهه المن انطتهه لواني مطلعه صورهه
موهسه جان ذبحتني...

شجن.. شتحجين انتي صورج امسحهم بنفس اللحظه
ليش ماتعرفيني اني شنو قبس انتي اختي
شلون اغدر بيج بشار حاجيهه الله عليك اني مامطلعه صورهه....

قبس.. لعد شطلعهن فهميني اذا تمسحيهن بنفس اللحظه
شطلعهم وكل كلامي وياج طالع
كليلي المن تسولفين ؟؟عبالج غبيه وما افتهم شوفي
من ياخذ تليفونج مااسكت اني الا اشوف برائتي

شجن.. ماتحملت اتهام قبس اليه وهي بمعزة فاديه
كمت وكفت واحجي وياهه بعصبيه
تماديتي هواي جاي اكلج مواني والقران مواني
مثل ما اخاف ع نفسي اخاف عليج! انتي قبل لاتكونين
مرت اخويه انتي بنت عمي واختي الوكفتلي بالصعبات
شلون اغدر بيج..

قبس.. مادري شبيه حجايه منهه وحجايه مني
واني اريد افتهم شطلع الصور
مااتحملت اصلا فقدت وهجمت ع شجن
نسيت وضعهه ودفعتهه حيييل

ماسيطرت ع وكفتهه لان وكعت العكازات منهه
والتوت رجلهه الصاحيه ووكعت بالكاع وكامت تصرخ..

من صرخت يله حسيت ع نفسي بشار انخبص بيهه
وهي تبجي من الالم وتصيح مواني والله اني مااغدرهه!!
واني وكفت بالزاويه اكل بروحي شسويتلهه
ماجنت حاسه ع نفسي!!

بسرعه ركض ع تليفونه بعد مامدد رجلهه وبس تبجي
يمكن انكسرت خابر ع عمر صاح بي تعال بسرعه
كتلك !!

التفت عليه شافني شلون خالسه بمكاني
عاف شجن واجه باتجاهي عبالي
راح يضربني باب المطبخ وراي
بسرعه ركضت..

لزمني من زندي بنص المطبخ
طخيت بصدره بس حجه من بين اسنانه
تعالي للغرفه اخذي علاج ونامي..

امشي ورا حته ماباوعت لشجن بس اسمعهه تبجي
لوبيه خير اخذ حقي من السوه هيج
مواجيت ع شجن وادري بيهه ماتسويهه

طببني للغرفه طلعلي حبايه خلاهه
بين شفايفي حته بدون مي وصاح
ابلعيهه وتعالي نامي ..

جنت مسيره مثل الاله نمت بفراشي
جانت حبايه منوم غفيت ماادري
بنفسي!!

كعدت بليل وهذا الحجي احنه بدون غده
ولاعشه لكيت شجن ماموجوده وهو كاعد
وحده بالصاله وصافن بالفراغ..

من شافني كال روحي اكلي يمج الاكل بالمطبخ
سالته واني منصيه راسي !!
شلونهه شجن؟؟

بشار.. رجلهه مكسوره وابشرج جابوهه بكرسي
هي رجل وحده وصاحيه وانتي كسرتيهه

قبس.. ماادري انفعلت!
بشار.. روحي قبس اكلي وارجعي للغرفه واخذتلج اجازه لا اداومين باجر

قبس..وانت وين تنام؟
بشار.. رفع راسه عليه ورجع نصه وسكت

رحت للمطبخ اني بيا حال واكل
بس شربت مي وكعدت مخليه ايدي ع خدي
شراح يصير وشنو مصيري!!

منو سوه هيج اذا فرح؟؟ منيلهه هلكد معلومات
عني !!
معقوله اسراء ساعدتهه محد انطه بيهه كلهه تكول فقيره
وماكو دليل عليهه.

ظلت كاعده شويه وكمت للغرفه اخذت علاجي
وين ماتوصل خلي توصل عسما تاليتي
افتر بالشوارع مخبله كافي زهكت روحي..

نمت بفراشي وبشار مااجه
ماحسيت غير الساعه ب١٠ الصبح كمت مفزوعه
باوعت لمكانه نفسه مامتخربط معناتهه مانام يمي

طلعت ادور علي بالبيت ماكو اكيد راح للدوام
زين اني هسه شسوي ادور ع تليفوني
اريد اخابره ماكو تليفوني ومبين ماخذه

لهنا وصلت يابشار رغم ماضربتني
بس راح تحاربني نفسيا وهذا الشي
هو اليدمرني..

لحد الساعه ب١٢ اني كاعده بالمطبخ
مستحيل اتحمل هاي العيشه
مااكدر اتخبل رسمي اذا ظليت بين ٤ حيطان..

سمعت صوت الاذان كمت توضيت وقريت
قران وصليت سمعت صوت الباب ينفتح..

كمت وكفت باب الغرفه شفته شكد تعبان
عيونه حمر مانايم حته دكم قميصه مفتوحه
وعبالك مختنك والرباط مفتوح وسترته بيده
شمرهه ع التخم ..

ماكدر يظل واكف بسرعه كعد ع الكرسي
مثل الدايخ ركضت علي بخوف
لزمت رجله واحجي ويا بدموع بشااار شبيك؟؟

باوعلي وهو منصي راسه حجه بصوت تعبان
كليلي شوكت ابطل ضعف كدام عيونج؟؟

من حجه هيج باوعتله بعيوني الهلكانه
من البجي وكتله لاتبطل الله عليك لاتبطل !!

خله ايده ع شعري ورفعه من وجهي
حسيته حاير مايعرف يتصرف شفت بشار
ضعيف حيل شكد مرينه بصعوبات
سالفه السجن مااثرت بي لهدرجه..

بشار.. كومي جمعي ملابسج المهمه لاتنسين شي
قبس.. حجيت بفزع راح تشمرني بالشارع!!

بشار.. خنزر عليه شنو هالحجي ؟؟ راح اوديج يم اهلي
مدة اسبوعين راح اسافر عندي شغل

قبس.. لا عليك الله لاتسوي هيج شلون تفاركني
بشار والله اني مامسويه شي
اعرف بيك مامصدكني بس ميخالف لاتروح اظل بالبيت
بس مااسوي اي حركه بس لاتروح

بشار.. قبس اهدي عندي شغل والله
موبس اني احنه ٤ مدراء واجتنه دعوه فجأه
نشارك بمؤتمر لان اكو شركه صينيه ولازم نكون موجودين

قبس.. اوعدني ترجع
بشار.. وين اروح لعد؟؟ صدفه صارت السفره ويه
المشكله كومي يله. 
قبس.. باجر تروح لعد ليش توديني اليوم؟؟

بشار.. اريد اظل وحدي خليني ارتاح احسن الج والي
ماجاي اتحكم باعصابي وخاف اذيج خليني وحدي!!

قبس.. كمت من يمه امسح بدموعي جمعت ملابسي
وطلعت كتله يله طلعنه من البيت بوسط هدوء تام
بالسياره وكتله وين تليفوني!!

ماجاوبني اني هم سكتت وصلت لبيت عمي
وعدهم علم بالسفره لان مخابر خاله
اسراء بالدوام وشجن نايمه وصابرين يم اهلهه
هو كعد شويه وراح حته بدون مايودعني !!

تفاجات بخالتي اخذتني للغرفه وتسالني
ع الصار لان شجن مسولفتلهه كلشي

ضجت حيل يعني شكد مرت مشاكل محد عرف بيهه
وشجن ماكدرت اله تحجي من سالفه وائل
ضمتهه ماكدرت تسولف بس اني راحت سولفتهه
وطلعت خاله وهدى وفاديه كلهم يدرون

ظليت ساكته وهي تحجي
وتبرر لشجن بوقتهه اختنكت شلون اظل اسبوعين
هنا والكل يعرف بالصار من كلامهه عرفتهه مثل ابنهه
بين المصدكه وبين ممصدكه..

شجن ماتحاجيني البيت متكهرب مني
بس خاله تجاملني اجن هدى وفاديه
سوالف عاديه بس اني احس الكل مايريدني..

كلام بيبي يأذي وكل شويه وكالت مابيج خير
ماحويتي الرجال مثل امج مال مكفخه لمن كرفت ابني

مالي طاقه اجاوبهه واليقهر موكلامهه اليقهرني
تحجي كدام الكل ومحد تردهه يسمعن ويسكتن..

صادفت عطلة نصف السنه دوام ماكو اسراء
مثل ماكالت شجن محد يسمعلهه
صوت تعبت من التفكير والقلق

بشار ماخابر ولاسال عليه ابد
شكد بجيت وشكد استهظمت وين حبه
اليكول احبج هو هذا ؟؟

بيوم منهن اجت عمه بشرى ماتجي مثل قبل
لان رجلهه متقاعد وكاعد بالبيت
وصادفت هدى وفاديه كلهه موجوده!!

بشرى.. شبيهه وجهجن مغبره شصاير؟؟
ام بشار.. ماكو شي من حجنهه توجهت الانظار عليه..
بشرى.. عزموكم بيت عامر باجر عرس نرجس!!

قبس.. كلهن كالن اي ومشتريات ملابس
ويدرن بس اني صار اسبوع يمهم ومحد يحجي كدامي
ابلع بريكي هيج غصه خانكتني محتاجه بشار حيل..

شجن.. اني مااروح
اسراء.. ليش ترى هو بالقاعه حتلو رجلج اكعدي لاتتحركين
شجن.. مااريد
فاديه.. قبس تروحين؟
قبس.. لااا مالي خلك
فاديه.. لعد منو يروح بس اني شكد عيب بكل مناسبه
البنيه يمنه

بشرى.. احنه كلنه انروح نتونس نغير جو
اسراء.. اذا هيج اني وياج عمه بشرى

بشرى.. قبوسه شبيج عمه؟؟ هيج مشتاقه لبشار
والدمعه بعينج
قبس.. مامتعوده افاركه؟

بشرى.. هسه يجي ويعوضج افراكه بس خلي
يرجع بسلامه
قبس.. اشرت لعمه بشرى اريدهه تكوم
احجيلهه افتهمتني صاحت تعالي قبس نطلع برا شويه.

كعدنه برا احجي وابجي وامسح بدموعي لحد
يشوفني وعمه تدري لان البنات مسولفات الهه
شكد حفظت اسرارهن مايوم طلعت كلمه عليهن
وهن ماوحده بيهن كالت مظلومه بالعكس
احسهن يتجنبني بكلشي!!

بشرى.. مااعرف شكول يابنتي بس بشار ضايع
متشوفي سافر يلهي نفسه بالشغل
يوميه يخابرني يسال عليج مايعرف شيسوي
وشلون يتصرف قبس اذا ماانكشف المضموم
تخسرين بشار..

قبس.. اصلا خسرته
بشرى.. كولي يالله الله ينتقم منهن بس ماكو دليل ع اي وحده
حته الداز البصمه حساب ع الفيس دازهه ولاغي الحساب

الخط مامسجل بأسم ونفسه السويتي بي فايبر
شي مايشبه شي لاتلومين بشار هو رجال
واكو منهم من كلمه يكتلون ويطلكون
لحدالان هو يدور ع دليل...

قبس.. موذنبي بس هو رجال وهلكد يحبنه
كرهني بحياتي ماكو شباب بس بشار

بشرى.. ولج هي منو التحبه بس فرح ونكول هاي عمايلهه
ترى ميامين تكرهه واذا الهه ايد بالسالفه فهو انتقام
منه مو حب

وخاف تشكين باسراء ترى اني بيومهه خابرني
بشار واجيت سحبت تليفونهه بدون ماتدري جانت بالحمام
لج قبس جاي نشيل ذنبهه

البنيه ماعدهه رسائل غير شنو التحضير
واليوم مااداوم واليوم شنو الامتحان حته دورت الاسماء
خاف عدهه تواصل ويه فرح ماكو
وحته فيس ماعدهه بس تقره وطالعه من الاوائل

قبس.. هو الكل يدافعلهه تدرين خاله دكول لامانسمحلج
اتهمين بنيه يتيمه ماسمعنه صوتهه
والكل صار ضدي..

قبس.. خلصن الاسبوعين واجه بشار
بيومهه عاملني طبيعي كدام اهله حته شفتهن
واحد يباوع بوجه الثاني مستغربات

جمعت ملابسي ورجعنه للبيت بس طبيت
للبيت انفجرت بالبجي اريد اسكت مااكدر
حته كمت اشهك..

لزم اديه سحبهن من وجهي ويسال شبيج منو وياج؟؟
ماكدرت اجاوبه لان جنت شايله راسي بي
وبس راح صرت علج بحلوكهن

عاملني معامله اسوء من السوء
اسراء بنصهن وكاعدات يسولفن من اجي يسكتن
من اكوم يحجن يعني اني الغريبه الصرت واسراء
بنت عمهن

لوماخاله تذكرني ع الاكل وتصيحني محد كلفت نفسهه
وتسالني اكلتي عجيب امرهن شلون تغيرن
وخلن اسراء اختهن واني طلعني خارج قوس..

حته ردت اخابر من عدهن لبشار كتلهن ناسيه
تليفوني محد انطتني كل وحده دبرت عذر
معقوله صدكوا اني اسوي هيج؟؟

بعد مابدل وسبح جنت كاعده بالصاله طلع الخاولي
ع كتفه وكعد كدامي جان يكول مستعده تسمعيني!!

هزيت راسي بقبول!!
بشار.. هذا بيتج وهذا مكانج!!
ماراح اسال شصار بغيابي بس الظاهر متأذيه
يم اهلي..

يحجي واني امسح بدموعي كمل كلامه وكال
مااكدر اكون طبيعي وياج ابد
ولااكدر امثل عليج واتصنع اني طبيعي
الي اريد اكوله الج كل واحد من عدنه الا كيانه وحياته
الخاصه!!

اني وياج بنفس البيت بس مااوعدج اكون الج
بشار القديم منا لمن تظهر برائتج وهذيج الساعه
اني اتحمل العواقب ..

قبس.. ظليت صافنه علي ماكدرت احجي
ماعندي جواب بس كتله براحتك وكمت..

من هذا اليوم كدام الناس احنه اسعد اثنين
وبالبيت واحد مايعرف الثاني
وصلنه لمرحله حته اكل ماناكل سوه

ماينام يمي اني انام بالغرفه وهو ينام بالصاله
كام يكره وجودي يامكان اكعد بي يعوفه
ويكعد بغير مكان ..

كام من يروح يقفل الابواب عليه
ومايرجع غير لليل واني وحدي
اخذ بالعلاج كل اثنين سوه حته انام ومااحس بشي!!

صرت مدمنه علاج صرت مريضه نفسيه
من الدرجه الاولى اتعجب ع القساوه
الشايلهه وشلون بده يشطبني من حياته

ردة فعله اذتني لو ضاربني لو غالط عليه
ولا محاربني هاي الحرب النفسيه
اللهفه والاهتمام التعودت علي اختفه..

خلال عشر ايام انتهيت بعد مااكدر
مااعرف شنو اسوي حته يخلص يومي
المشكله علاجي النفسي خلص ومااطلع حته اجيب منه
تليفون ماعندي محد سأل عني ابد ...

هاي راح يصير شهر ع رجعة بشار
ومحد شال تليفون وكال عدله ميته
ليش هيج البشر ؟ وين شجن؟ وين فاديه ؟
هدى الحقانيه وينهه؟؟

بس عمه بشرى وخاله صدفه تخابر ع بشار
تسال شلونكم ومحد طلب يحاجيني

كمت اكره اهلي ادعي عليهم لان عافوني
للمذله وراحوا
اكره الكل حته نفسي كرهتهه ...

بيومهه من رجع تلكيته عيوني حمر اريد علاجي
اتوسل بي الله عليك ارحمني جيب علاجي
بشااار ابوس اديك كلبي ضعيف مااتحمل  اريد علاجي..

رد عليه ببرود ماكو علاج قاومي نفسج
وبطلي تمرضين نفسج اي علاج ما اجيب
وعافني وراح للحمام

بيومهه ماكدرت كعدت بباب المطبخ الي ع الصاله
احك بجسمي اكرص بنفسي
اريد علاجي جسمي ينتفض اعصابي
ترعش عيوني احسهه تنزف من الداخل..

شعري صار عباره عن شعرايتين
من كدما اشلع بي ماتت الرحمه
بگلوبهم اريد واحد عنده مخافة الله يساعدني..

اني لوعندي اهل ام لو اب ماجان هذا حالي
لو عندي اخت توكف بجانبي
ماوصلت لهاي المواصيل..

طلع من الحمام شافني شلون كاعده اكرص بنفسي
وهاي لاول مره من صارت السالفه ركض عليه
لمني بحضنه حيل !!

جنت محتاجته حيييل شمرت نفسي بحضنه
واني ارتعش اكو فرحه بداخلي بس
ادماني ع العلاج هلك اعصابي..

كومني من الكاع ماكدرت اكوم شالني وكعدني ع التخم وبعد
شعري من وجهي وتلمس كصتي
يشوف حرارتي!!

لزمت ايده بخوف باوعتله بنظره انكسار
دنك ع وجهي مسح دموعي وباسني من عيوني
اثنينهم حسيت نفسي بديت اهدء..

حجه ويايه بهدوء ترجعين اداوم بالمدرسه
بس شرط تعوفين العلاج؟؟

قبس..رغب مستغربه قبل شويه عاملني بجفاء
وهسه اخذني بحضنه..
جاوبته مااكدر اريد العلاج مااكدر بشار!!
كلبي احسه ضعف..

بشار.. لاتكدرين ..اطلعج يوميه الصبح بالمدرسه والعصر
اطلعج افتر بيج بس اتركي العلاج
وامانه بركبتج اذا اخذتي من دون علمي..

تريدين اوديج لطبيب نفسي بس كولي
حته تعوفين هذا السم الدمرتي نفسج بي؟؟

قبس.. لاااا ارجع للمدرسه اذا ظليت ع حالتي اخذني
للطبيب اكره الطبيب!!

ترك ايدي بسرعه وعبالك انتبه ع نفسه
رجع نفسه ع التخم وكلساع يلتفت يباوعلي
ايدي بعدهه ترعش مامسيطره عليهه..

ماعرفت غايته شنو؟؟ بس كل الي اعرفه
هذا بشار اليحبني ويخاف عليه
بس ماتوقعت اليسوي هو اختبار الي...

ظليت كاعده بصفه واني احس بالامان
اكو خيط فرح بداخلي بلكي كدر يعرف
منو سوه هيج بلكي عرف اني بريئه..

جانت الساعه ب٩ التفت عليه
ظل مركز بعيوني حرك اصبعه ع حواجبي
غمضت عيني حسيت اصبعه افتر ع ملامحي
بالسره لحدماوصل لشفتي رجفت لاارادي
وهو يحرك اصبعه على الشفه الجوه واني مغمضه

ايده انمدت ع خصري وسحبني ع صدره
بحنيه حاضنته من بطنه واشتم بعطره الصار
مده مفاركني ..

خلاني ع راحتي وهو يلعب بشعري
احس بحركه اصبعه على فروة راسي
محتاجته !! محتاجته وطني جنت ضايعه
واحس الروح ردت الي...

غفيت وماادري بنفسي رغم مماخذه علاج
فتحت عيني شفت نفسي نايمه بفراشي
ع الجربايه بس هو ماكو!!

كمت من مكاني فتحت الضوه الساعه ب٢ بليل
طلعت صار كبالي نايم بالصاله ومتغطي كرفصت يمه بالكاع
صافنه على ملامحه غاط بالنوم ويم راسه
باكيت الجكاير وتليفونه..

كمت احجي وياا بهمس مشتاقتلك حبيبي
محتاجه حضنك ليش تحرمني منه
مامشتاقلي انت موتكول مااكدر افاركج يوم واحد
شلون فاركتني هلكد؟!

جريت ايده وحشكت نفسي بحضنه ولزمت
تشيرته بقوه بسرعه فز من شافني
حجه وهو كوه مفتح قبس!!

شددت لزمة تشيرته وضامه راسي برگبته
حس بيه محتاجه حضنه
رفع الغطه ولفني بيهه وحضني اكثر
احس روحي ردت الي
كلساع احضنه اكثر وهو يمسح ع راسي..

بس اثنينه ساكتين كمت احس بلمساته
صارت جريئه مستسلمه ومغمضه عيوني
طبع بوساته ع ركبتي ويه كل بوسه ياخذ نفس
طويل ويرجع يحضني..

اخذ شفايفي عبالك جوعان وانطوا اكله دسمه
باسني بوسات عميقه لحدما كمت اخذ النفس من عنده..

ظليت نايمه بحضنه ماتقربلي !!بس معاملته
بحنيه وكلساع يبوسني خلاني ارتاح وغطيت
بالنوم واني اتمنى مايطلع الصبح ويرجع لحالته...

فزيت على صوت تليفونه وهو يدك يم راسي فتح
عينه بملل وكال شو شوفي منو؟؟
رفعت نفسي من عنده ومديت ايدي اخذت التليفون

قريت الاسم فرح كعدت ع حيلي وانطيته اله
واني احجي بعصبيه هاي شعدهه متصله ؟؟

جاوبني وهو يفرك بعيونه رفعلي طرف حاجبه
وكال جاوبيهه انتي؟؟؟

فتحت الخط بدون مااسمع شي منهه
كتلهه هااا فرح اكوشي......
.
.
يتببببببع... متابعه ممتعه