رواية قمع المشاعر الفصل الثلاثون 30 - بقلم Rozaya1122

قمع المشاعر.... البارت الثلاثون
للكاتبة زهراء ( روزايه)...

قبس... عمري عشته محارب ويه خوالي ويه ساجده ومايوم واحد كدر يضربني جان اليمد ايده عليه اضربه لو اشيل سجين بوجهه بس الخوف البي هسه مااتمنى للعدو احس كلبي راح يوكف واني انتظر سراي وبس اسمع صوته وصياحه جوه كفيل يخليني انهار كلساع اريد انزل واخاف يصيح بيه

هدى.. بشار موهيج لاتخليني اتندم حجيتلك كتلك حاسبهن لان ضمن مو تاذيهن شوف شسويت بشجن وهي مريضه؟؟؟
بشار.. انتي اسكتي ما اعوفهن اذا ماتحجي وين ولت ويا اليوم يله عرفت تدرين باختج ٤ ساعات ويه وائل الكلب واجتنه مغمي عليهه وحاولت تنتحر والتفت على فاديه احجي انتي شتعرفين بس بصياح؟؟

فاديه.. والله والنبي مااعرف شجن ماحجتلي بس سالفه غيث هو جان يحبهه ووائل وامه مايقبلون بسبب الاعاقه واجه عناد بيهه خطبني والقران بشار ماادري وراهه فسخت الخطبه وهاهي كلشي ماادري!!

بشار.. ومن دريتي شسويتي؟؟ سترتيلهه بعلاقتهه مو عندج ام واخت جبيره لاتحجلي مارحتن حجيتجن لامجن شمنتظرات يلعب عليجن وادنكن روسنه يله تحجن؟؟

فاديه.. هو عصبي ويصيح ومااحس غير الراشدي طير خدي ماكدرت حته اجاوب وابرر موقفي لزمت خدي وانتظر العقوبه حته دموعي مانزلت بس شجن حيل قسه وياهه

شعرهه ماتركه ابد وسحلهه سحل من الغرفه للمطبخ كمت اصيح واتوسل وهدى تجر بيده بس هو هذا بشار كلنه نتجنب عصبيته حته مره ضرب عمي عامر لويرجع ع نفسه يأذيهه

شجن راح تخرب بين اديه وهو كل راشدي يضربهه والله كل لحظه اكول راح تموت وحلكهه يجري دم ويسالهه وماتجاوب لحدما سحلهه للمطبخ كامت تصيح لااا بشار والله احجيلك كلشي والله اني مالي ذنب يله هدى سحبتهه من ايده ووكعت بالكاع...

واكف مثل الاعصار ولو حرف واحد ننطق يضربنه كلنه وهمزين مابيده سلاح جان سوولنه فاتحه جماعيه

شجن.. الله عليك لاتضربني اني غلطت فاديه وقبس ماعليهن اني اكلهن اكتل روحي اذا حجيتن
بشار.. وين وليتي ويه وائل حجاهه وهو ياشر بايده بتهديد؟؟

شجن.. هو اخذني من الجامعه مادري شيريد بس يهدد واني كمت اغلط واصيح علي وراد يضربني وانغمى عليه وماادري بنفسي ومن كعدت لكيت نفسي ابيت مادري المن وبعدين جابني لهنا ومادري بروحي

فاديه.. سوده بوجهج شجن هي كالت الكلمه الاخيره لو واحد جاب تيزاب ورشه ع بشار ضربهه دفره ببطنهه كلت هاهي ماتت من الشهكه مالتهه وظلت بس فاتحه حلكهه وعيونهه ماتكدر تاخذ نفس كمت ادك ع راسي وهدى تفرفح وماقبل ندخل

هدى.. مجرم انت ولك راح تموت شوفهه موهيج بشار اختك هاي
بشار.. ولج صار شهر ع سالفتهه ودكلي مادري بروحي ٤ ساعات مغمي عليهه يم هذا القذر ودكليلي خطيه ليش مسترتله اذا مامهدده وخايفه احجي شسوالج؟؟ ليش انتحرتي شمسويلج هالنذل

شجن.. يهددني يفضحني لان غيث اخو يريد يخطبني وكمت احجيله كلشي من ضربني برجلي لمكالماته بس الاعتداء ماكدر اكوله لان بشار شخص ثاني كدامي وبعدهه ماحسيت بشي...

فاديه.. ساعه وليله گشره شلنه شجن للغرفه نمسح بوجهه ونبجي شلون ضيعت روحهه وضيعت مرت اخوهه وياهه اخر سؤال سالهه وجان ضاغط ع حلكهه كالهه قبس تدري من خوفهه وهلعهه بهاي اللحظه هزت راسهه لو تخبل حته خفت علي يصير بي شي...

هدى.. سوده بوحهي وبوجوهجن ليش سكتن وصلتنه لهنا ولج ابن خالنه اكل من خير ابوي لحدما وصل والله جان ابوي يجيب الراتب يقسمه بينه وبينهم وتالي هيج جازانه ...

شنو من مصيبه ياربي لوحاجيات بلحظتهه جان اخذوا حقهه هسه من ورطت روحهه وضربت ع خدهه  ولج خاف معتدي عليهه والله بشار يروح شبابه بسجن يمه لحكيلي شلون بينه...

ربي لطفك ورحمتك شنحجي والشماته عايشه ويانه ولجن تصيرن علج بحلك فرح واختهه لو بابا شيصير بي وهو عنده ضغط وسكر لو جدو ولكم ياناس اخوتي مايسكتون ويروحون بيهه تالي عمرنه ناس مستورين تكوم الناس تسولف بينه

لو نزوج شجن لوائل بحجه الستر ويروح شبابج ليش يا اختي مواني موجوده تخافين من امي تعالي احجيلي اني اختج سترج اني والله جان هسه عايشه بطولج وتمشين بزودج شلون تباوعين بعيون اخوتج لو بابا المسكين شلعبتي بروحج ياشجن...

فاديه.. روحي شوفي  بشار يريد يبرد مايكدر باكيت دخن بنص ساعه ولسه ماصعد لقبس والله اليوم تروح بيهه وهو سائلهه ومجذبه علي

هدى.. مااكدر اطلعله عصبي حيل حته ضرب ايده بلباب واخاف احاجي لايرجع علينه راح اخابر عمه بشرى تاخرهم شويه لايجون ويروح بيهه بابا المسكين...

قبس.. ختمت القران بهاي الساعه من صوت العياط واعتراف شجن ومن سالهه عليه بعد كل حيل ماعندي ماكو صوت وهدوء واني راح اتخبل عبالك متعمد يعذبني بهاي الطريقه مال الانتظار والقلق...

شويه واسمعه يكح صدره مقبط وقريب ع الباب لو دخيلك يامحمد اوكفلي والله احس ماخذيني للاعدام انفتح الباب وطب وقفله ورا..

كمت وكفت ع حيلي وجذب لوعندي حيل رجليه مثل السعفه تهتز اريد احجي اريد اتوسله الساني انعكد هيج ضعف ماحاسه بي ولاراح احس تقرب عليه بس ماكدرت اباوعله مبين من نبرته واصل لاقصى مرحله

بشار.. عبالي تختلفين عن البنات ما اصدك كلبي ابد دائما امشي ورا عقلي وكالي عقلي لاتتقربلهه بس ماسمعته ليش جذبتي عليه  بس اريد اصدكج ؟؟

متخيله الوضع البي اني اختي مااعرف معتدين عليهه لولا؟؟ ومرتي تدري وتسترلهه والمسوي هاي الدكه يمشي بطوله ويحجي بالدين وابوي يروح يعتذر من شيخهم لان هديت علي وماادري باليصير وراي تالي عمرنه اندك روسنه وننلدغ من اقرب واحد النه

قبس.. بشار بس الله عليك اهدء خليني افهمك ؟؟
بشار.. مااريد افتهم اني افتهم من وحدي!! بس اريد اشوف شنو من صلافه عندج وتباوعين بنص عيني وتجذبين عبالج ماادري ؟؟ ترى جنت حاس بيج لذلك كل مره اعيد عليج نفس السؤال حته انطيج فرصه وانتي بعدج مصره يعني هالشي عاده عندج مال الجذب

قبس.. والله وروح اهلي مامجذبه ابد بس اضطريت علمودهه لان خفت تنتحر وبيومهه طلعت اريد احجي لعمو وبيوم الصار عدهه انهيار كامت تضرب نفسهه وخفت تصير بسببي 

بشار.. من يمته تدرين بعلاقتهه بغيث واياج ياقبس اتجذبين؟؟
قبس.. م م م حجيت بخوف من صارت سالفه الخط مال فرح بس كلت هاي الكلمه هي سحله من شعري هي ضرب بكل مكان...

اريد احمي المكان اليضربني بيدي مااكدر كل راشدي يخليني اوكع بالكاع ويرجع يرفعني ويكمل عليه الدفرات الاجت ابطني حسيت معدتي انشلعت من مكانهه

جر شعري حيل وضرب راسي بالكنتور جنت واكعه بالكاع ومااشوف من غواش عيوني ويعت بشعري حيل نزل راسي للكاع ويحجي

بشار... من جيتج لسه ومستره ع هيج بلوه؟؟ ولوماسائلج اكول ميخالف ولج شكم مره حجيت انعل ابوج لا ابو تربيه امج السكط منين تجين متعلمه الادب من ساجده لو من البيوت الخدمتي بيهه ردت اسوي براسج خير بس عوجه مايرهملج جاره...

قبس.. كلامه مثل السم صح غلطت وصح ضربني واستاهل بس ماله حق يطعني حطيت ايدي بصدره حيل ودفعته وكمت وكفت بس مامتوازنه وخرت شعري ورا اذني

قبس.. باي حق تتهمني وتسب اهلي كل الضمت وجذبت معناتهه ساقطه لعد اخواتك هم ضمن عليك!!  والله موبنيتي اعيره بتربيته لو اقلل من شأنهن اني هم احبهن بس من الالم البجسمي وبروحي طلع مني هيج كلام

ولا اكدر اوصف كميه الوحشيه الشفتهه من عنده خلاني كعدت بالكاع ومااكدر احرك لا ايد ولا رجل من الكتل من شافني بديت اخرب وبعد بي حركه وعصبيه ضرب مرايه الميز اكثر من ضربه واشوف ايده تجري دم وماحاس بيهه..

بكد اذيتي تأذيت علي لان ماكدر يتحكم باعصابه حسيته راح يوكع وطلع وسد الباب حيل ورا واني ع كعدتي ماكدرت اتحرك خطوه ارتجيت ع الكنتور والوم بنفسي

صدك لوكالو من تتدخل فيما يعنيه لقيه مالايرضيهه اني اجيت هنا حته ارتاح موحته انذل من يوم جيتي واني لا ادخل ولا اسمع من احد وحته من يحجن اطلع حته مايشهدوني بيوم شجاني وصرت اسمع اسرار ولازم احتفظ بيهن وياريت سر لو مصايب...

مدنكه راسي وابجي ع حظي ع حياتي الماشفت بيهه راحه ابجي علي هو بشار شكد تأذه بهذا اليوم وهو رجال شلون يتجاوز الشك بخصوص اخته

انفتح الباب هدى ركضت عليه دخيل الله عساني ميته كتله علمهن لو انهيهن ع ايدك ولجن شمسويات كلتن بس سالفه غيث طلعت بلاوي كومي خلي اغسلج لايجن ويشمتن بيج

هاي جبتلج ملابس تعالي واخذتني للحمام اني سبحت لو المي ملح وينزل ع جرحي كمت اموت جوه المي من الالم كوه لبست وطلعت وهي واكفتلي بالباب اخذتني لغرفته جففتلي شعري ورفعته ومنين ماتلزمه يوجعني مكطعه تكطع....

اخذت مسكن الم ونزلت وياهه لكيت شجن منطيهه علاج نايمه واني نمت بفراشي وللصبح اني ابجي شلون انهانيت واحس كرامتي انداست...

ثاني يوم الالم زاد مااكدر اكوم بس همزين هدى موجوده وماخلتهم يشكون بحجه مريضات افلاونزا بس اعظامي مكسره تكسر موايد عبالك بلوكه وتوكع عليه...

ماطلعنه ابد لحد الساعه تقريبا ب١ ونص وكل وحده نايمه بمكانهه سمعت الباب انفتح وانقفل وهي عيطه وبواجي بصوت مخنوك رفعت راسي ام بشار ولااكدر انسه هذاك اليوم

كعدت بالباب دكت ع صدرهه وخرمشت وجهه هيج تشلع بشعرهه وماتحس هدى لازمتهه وفاديه ركضت حضنتهه ومن صدمتهه كامت تضرب براسهه بالحايط

ام بشار.. ولج ليش شجن شحجي ولج جبت طول عمري محافظه عليجن وربيتجن احسن تربيه مايوم عيرو اخوتجن ولا ابوجن وتالي اخوتج يدنكون راسهم وين ضيعتي شبابج ليش يبنتي مافكرتي عندج اخ لو يشلع من لحمج مايهدأ مافكرتي بابوج المريض

شجن.. ماما اني مالي ذنب والله هو وائل يهدد بيه واني اخاف احجي والله بس حبيت غيث وماقبلوا يخطبوني اني ماعليه ماما لاتسووين هيج بروحج تعالي ضربيني كلشي سوي بس لايصير بيج شي!!

ام بشار.  ليش سكتي شكم مره اخذج بحضني واكلج سولفيلي ودكليلي ضايجه من رجلي ولج اني امج يايوم قسيت عليجن وضربتجن مثل الامهات حته تنفرن مني مواني هاي اختج الجبيره احجيلهه ورطتي مرت اخوج وياج ليش من طلعت بذاك الليل تريد تحجيلنه ليش منعتيهه وحرنه بيج

خايفه تخسرين شو خسرتي صحتج ومستقبلج وغيث اليحبج شتخسرين بعد؟؟ فهمني كومن شحجي وهذولاك اخوتجن من البارحه ماغمضت عينهم وينتظرون وائل يجي لان ملتحق كتلو شكول ياناس ولدي كتلو ابن اخوي ويتمو جهاله ونامو بالسجن...

ماستحيتي ماخليتي حق تعبنه كدامج تشوفينه نطب ونطلع عليهم وهم هيج مسوين بيج وفوكاهه خطبوا اختج وانتي ساكته لو متزوجه شلون تأمنين عليهه بنصهم هيج مابيج خير

اااخ يمه شحجي وشكول ذاك اخوج يكلي روحي ساليهه ماخذيهه ليش ولج تالي عمرنه يروح شرفنه وضربت ع خدهه وهدى لازمتهه

ام بشار.. اسمعني وحق الله وروح ابوي احط نفط عليجن واحركجن اذا طلعت طرف حجايه ماعوزي شماته بسمه وبناتهه اخوتجن يتصرفون وديربالج تحجن بهاي السالفه اكص السانهه التفتح حلكهه

قبس.. ضغطت ع نفسي كوه وكمت من فراشي غسلت وصليت سالتني بيبي شبيج كتلهه مريضه فرح واختهه كاعدات وبس فتت من يمهن كامن يشمرن بحجيهن مالس خلك اردهن بس سمعتهن هدى ورزلتهن

للعصر اجت عمه بشرى اخذت بسمه وبناتهه بحجه ضايجه وحدي رجلي بالدوام بس اكيد هدى الكالتلهه تاخذهن وبيبي وجدو اجه عمو عامر اخذهم ومارضوا يرحون بس كالهم البنات خبصني واجيتكم وراحو

طبيت للمطبخ لكيت ام بشار كاعده تبجي كعدت بصفهه وحضنتهه مااعرف اطيب خاطرهه بس اعتذرت منهه سالتهه ع بشار

ام بشار.. سوده عليه هسه يصير بي شي من الحركه ابني ياقبس مايهدا اعرفه اذا ماياخذ حقه ويروح سجن ويخسر شبابه

قبس.. لادكوليهه خاله عمو عادل عرف بالسالفه؟؟
ام بشار.. اي عرف بس مايدري بسالفه البيت بس عرف وائل مصوب رجلهه مانكدر نكله رجال جبير ويروح بيهه مات شكول هم اخسره واخسر ولدي

هدى.. يمه صيري قويه ترى اخوتي يتقون بيج شوفي عمر شصار بي ع الاقل بشار عصبي نعرفه وضربهن بس عمر شوفي وهو اقرب واحد الهم وصديق غيث وتالي هيج يجازون الخوه ع كيفج ويه صحتج وروحي اوكفي بجانبهم..

بعدهه تحجي هدى وطبت بشرى تركض كعدت بالمطبخ ودك دك ع وجهه هي وام بشار هستوهه درت مع العلم شجن ماكالت اعتده عليه بس من كالت مغمي عليه ابيته تخبلو

ام بشار... شفتي بشرى بناتي فقيرات وع نياتهن شفتي مرت اخوي شلون جازتنه
بشرى.. مرت اخوج البرب... هي اساس البله هي المنعت غيث من شجن وهي اتجيب وتودي حجي براس العار الجبير

اسمعي لادكولين ابن اخوي والله اني الكتله وخلي يكولون مره كتلته وعبالج اكتله لا اجرم بي هذا الشايب يريد ينام ويه وحده بكد بنته الا اخلي طول عمره يتحسر  وخلي يكولون مره سوت هيج

بيش مطلوبين ولد اخوي يفرفحون ويخسرون شبابهم سولفلي من ورا واحد عار سكط الله لايرضه عليك يا وائل ابن سليمه اااخ يانار كلبي

هدى.. منو كالج عمه؟؟
بشرى.. اني جنت حاسه اكوشي ومن خابرتيني اخذ بسمه وابوي يم عامر كلت صاير شي شفت عادل تعبان دكيت ع فاديه وحجتلي هسه وين بشار وعمر؟؟

هدى.. عمر هد عليهم وتضاري هو وغيث ووائل بالجيش ملتحق وامه الحيه مخابرته وداك ع عمر يكله كل لبشار اذا رجال وبي زود انزل الخميس وخلي يوكفلي بالباب

بشرى.. اعفطله ابن اسليمه !! وشكال بشار
هدى.. كال لعمر عوفه وتدرين بابن اخوج مايحجي ومانعرف شيخطط بس كتل البنات

بشرى..حاجت قبس كتلج مووو ؟؟
قبس.. اااي
بشرى... حيييل لو ....... جان تبتي موكتلج احجيله عليمن سكتي

ام بشار.. بشرى فهميني بشار متخبل ع شجن وحالتهه النفسيه ماتسمح اخذهه للفحص وسالتهه دكول مادري شوفي مصيبتي وشوفيلي حل

بشرى.. شنو ماتدري حتلو مغمي عليهه ماتحس ليش هو كرزات وهي بعدهه ابنيه وراهه من انتبهت ماحست بالم بصخام شو جنج مثل بنتج انتي !!!

قبس.. حجيتلهن اني كلشي شفت وسمعته من شجن وعمه بشرى كالت اخذهه لدكتورتي تفحصهه حته مانظل ناكل برواحنه صار المغرب وراحت

ظلينه ع هذا الحال ٣ ايام لا دوام ولا كعده مثل الناس ولا اجتمعنه ع اكل ولاشفت بشار من هذيج الليله..

اجت عمه بشرى وكوه سحلن شجن خطيه شكد انقهرت عليهه وهي دكلهن استحي ويقنعن بيهه جانت ظهريه وماخذه موعد من دكتورتهه لعمه ويقنعن بيهه لخاطر اخوتج وابوج

بدلت وهي تبجي من طلعن من الغرفه صار كدامهن بشار جان هستوه جاي وبهاي الايام صار يداوم لحد ٢ لان تعبان او يمكن عنده شي باله محد يعرفه...

بشار.. شكو صوتج ليبرا ؟؟
بشرى.. ماكو شي عمه بس حته لانظل بشك لازم نتاكد البنيه مغمي عليهه بيد واحد نذل!!

جان مسافه قليله واكفه فرك وجهه بعصبيه وشجن مدنكه طلع صوتهه وحاجته بشار كلهن لاياخذني والله استحي !!

تقرب عليهه وجرهه من ايد عمه الساندتهه وضمهه بحضنه وباسهه من راسهه

ماكدر كلشي يحجي وعبالك الحجي ضاع عنده تعداني جنت واكفه يم الدرج وصعد وشجن اخذنهه بالتقنيع ظلينه بقلق لحدما اجن بس طبت عمه بشرى هلهلت ع صوت هلهولتهه كلنه طلعنه

شجن تبجي ومستحيه واحنه نبوس بيهه والله حته الكتله نسيتهه من الفرحه هسه عسما يموت العار طبه مرض اهم شي انتي مامسويلج شي

طبينه للغرفه ونحسهه شويه احسن حته وجهه رجع الدم بي هدوء وكلنه ساكتين ومانحس غير ضحكه فاديه وعبالك كدامهه مسرحيه

نسال بيهه شبيج عليمن تضحكين بس خربانه ضحك وماتكدر تحجي واحنه نضحك ع ضحكهه

فاديه.. ولجن اتذكرت الكتله مالتنه
قبس.. عوبه هي هاي تضحك
فاديه... لاماتضحك بس هسه اتخيلت موقفنه تلاثتنه مثل الارانب يكفخ بينه
قبس.. شكد فطيره

فاديه.. سوده عليه بله احنه اخواته بس انتي خطيبته من حصلتي كتله من ورانه
قبس.. اطلعهه من عنده بعدين
فاديه.. ايبااا شتسوين تكتلي بالليل ؟؟

قبس.. منحرفه كومي منا مابيه حيل اضحك
فاديه.. اكلجن شوكت يموت وائل واطب اهلهل بفاتحته
قبس.. ولج حرااام اسكتي

عفتهه هي وشجن يسولفن واني طلعت عمه بشرى رايحه وام بشار تقره قران وهدى تسبح فتحت الثلاجه اخذت تفاحه غسلتهه واكلتهه وحدي بالمطبخ نسيت هو بالبيت ما احسه غير فوك راسي لابس تشيرت ربع ردن والجو بارد تذكرته من كال مااحس بالبرد لان نار كلبي اقوى...

درت وجهي عنه وعفته يشرب مي ورحت للغرفه دقايق موهواي وكلنه طلعنه ع صوت الدبج ع الدرج بشار سلاحه بيده وعمر ورا يكلي انطيني اني اكتله

ركضت امهم وراهم بس طلعوا قفلوا باب المطبخ من برا نفتر انريد باب مفتوح كلهه مقفله ووحدنه بالبيت وبس عمر وبشار راحو لوائل

اديه ورجليه كامت ترجف وهدى خابرت ع رجلهه وع عمو عامر ورجل بشرى وتصيح الحكو بشار راح يكتل وائل من هوستنه وصياحنه نسمع صوت طلقات هواي وبس صياح الزلم وهم يصيحون لااااا استهدي بالرحمن...

زاد صريخنه وام بشار تضرب بجام واجه صوت رجال عالي  وهو يصيح  لاااا لاااا كتلته ماااات

يتبببببع... متابعه ممتعه