رواية قمع المشاعر الفصل التاسع والعشرون 29 - بقلم Rozaya1122

قمع المشاعر.... تكمله بارت 29..
للكاتبة زهراء ( روزايه)

....

ام بشار.. شنو هاي فاديه
فاديه.. ماما مااريد اكمل اريد افسخ وياريت يستعجلون
عادل.. ليش بنتي غير اكو سبب وهسه مومناسب لا الوقت ولا المكان

فاديه.. لا بابا مدام وائل هنا لان تعرف ميكدر يفوت بيتنه بشار ميقبل لذلك هنا احسن شي والسبب اني وغيث مامتفاهمين

وائل.. ميصير هيج فاديه بعدكم ماصار شهر اكعدو وحلوهن وتفاهموا
فاديه. . ومنو كال عدنه مشكله حته نحلهه اني مااريد اكمل ويه غيث والتفتت ع بابا فدوه بابا مااريد استمر

عادل.. بنتي خلي نرجع للبيت ونتفاهم وانشوف اخوتج وانت ابني غيث ليش ساكت شنو رايك

غيث.. صح عمي مامتافهمين واحسن نفسخ
عادل.. لا اله الا الله الصبر يارب العالمين شجاجن يابويه منا اختج ومنا انتي انطني مجال اخذ نفس هاهي ابني نرجع للبيت ويصير خير

غيث.. اني اترخص عندي شغل طلع غيث وامه والعار ينفاخون هم شويه وراحو وام بشار اكلت راس فاديه ليش وليش بس فاديه جوابهه واحد ما متفاهمين...

عمو راح لدوامه واخذ فاديه ويا كالهه حتلو ماتلحكين ع المحاظره الاولى عدهه امتحان وبس اني وام بشار شفتهه تعبت حيل ووجهه صار اصفر اخذتهه للطواىء حقهه بناتهه اثنينهن راح يخبلنهه

من طلعنه نمشي بالممر تلكانه غيث راد يساعدنه بس كالتله قبس وياي شجن وحدهه شكد فقيره ياربي المفروض ترجعني يم شجن ويروح وهو وياهه بس هي ماشيتهه ع نيتهه والعالم ماشيتهه عوجه وياهه

كتبولهه فحص مال سكر وقاسوا ضغطهه عدهه هبوط خلولهه مغذي واني كعدت يمهه خلي ياخذ ويه شجن لعلى وعسى يكدر يخليهه تحجي..

شجن.. ماردت اعيش يوم واحد بهاي الدنيا واحس صرت عاله ع الكل حته اختي كامت تدعي عليه وصرت اتحلم بكوابيس وائل وهو يعتدي عليه والشك اخذ روحي ومرات اخلي ايدي ع بطني واكول هنا اكو طفل تقريبا بديت افقد حته عقلي وما اريد اشوف احد ولا اسمع اي صوت

وبيوم شفت الشماته بعين فرح واختهه وبجن فاديه بسببي وهي دكلي الله لايوفقج جانن اكو ٣ اشرطه كامله من حبوب الاعصاب بلعتهه ودقايق واطرافي ثلجت وغابت روحي وماحسيت غير بالمستشفى

قبس اخذت ماما مالهه خلك واني ظليت وحدي اندك الباب عبالي وحده من الممرضات بس تفاجات بي هو نفسه هو غلطه حياتي موحب حبيته لو انكلب عليه ودمرني

جر كرسي وكعد كدامي واني دايره وجهي عنه حرامات هلكد حبيتك وطعنتني باختي ودمرتهه ودخلت بخطيتهه

غيث.. ماتريدين تشوفيني موو؟؟
شجن.. شعندك جاي ماكفاك السويته بيه وباختي؟؟
غيث.. ماسويت مثل سوايتج صعبه مو ياشجن صعب الخذلان وصعب الغدر جربتي؟؟

شجن.. غيث حالتي ماتسمح اناقشك اطلع برا
غيث.. دومج تنهزمين وجبانه وتختارين ابسط طريق حته لو هذا الطريق يدمرج ويدمر غيرج بس اهم شي تنهزمين مثل ماتركتيني مرتين وترجعين وارجع اسامحج

يجوز تسالين نفسج ليش غيث سوه هيج ليش طلع مو كدهه وغدرني باختي بس ضكتي نفس الكاس شفتي شلون مر ؟؟

شجن.. اني....
غيث.. اسكتي ابد لاتحجين وخليني اني احجيلج وحته شكد توسلتلج احجيلي شكد بوست اديج شجن اني وياج وما اعوفج واني اضحي واني واني شكد حجيت ؟؟ اتمنيت من عندج تفتحيلي كلبج وتحجيلي بشنو تحسين ومنو شنو خايفه وشوفي منو الماياخذ حقج؟؟

مره بمره عشرات المرات تعاركت ويه وائل علمودج جابلي ادله تشيب الراس واجذبه واكول شجن حبيتهه ع برائتهه مستحيل تسوي هيج ولان وائل يضوج من عندج وهذا السبب الماعرفه لا انتي حجيتيلي ولاهو سبب كره الج بالذات شنو وهم كلت ميخالف وظليت ادوس ع كلبي رغم ماكسرتي ورجعتلج

تالي بليله دزيلي رساله ما اعرف المغزى منهه شنو لا اريدك وانتهى كلشي زين اني شنو ذنبي السويته الج شنو دللتج وحبيتج وانطيتج روحي والله تفوت من يمي بنيه واكول لا ما اباوع مثل ماهي صاينه حبي اني هم اصونهه لا خنتج لا بعيني ولابكلبي

ايام وليالي ابجي مثل المره بس اريد سبب واحد اقنع نفسي بي سبب واحد ياشجن اكعد اراجع نفسي شنو قصرت بي بشنو اذيتهه حته تعوفني وادير ظهرهه عني اريد ابررلج بداخلي شلون ابرر ادك جهازج مغلق اجيكم ماطلعيلي حسستيني اني عديم الاهميه عندج والتخلي موجديد عندج...

وكل هذا والله وروح ابوي ما انطيت بيج كدام احد والله شاهد عليه جنت يوميه عركه ويه وائل اكول ادري بيهه تخاف بس اقنعهم اروح اخطبهه واكيد ماترفضني احتاجيتج هواي بس ردت اخذ منج كلمه وحده ليش درتي ظهرج اليه ؟؟؟

يعني تقبلين احجي وياج قبل يوم وثاني يوم ادزلج رساله انتهى كلشي وما اريدج مو راح دكولين عليه خاين وعنده غيري ودكولين طعني شحال اني رجال ويوميه جايتني سالفه عليج واجذبهه

من اول يوم داومتي ياشجن واني عيني وراج من كدما اشتاقلج وروحي تفرفح عليج واحس نفسي جاهل ويريد لعبته ما احس نفسي غير راكب السياره وجاييج للكليه اشوفج من بعيد يله ترد روحي وارجع الوم بنفسي لان جاي اعلقهه بيج بدون فائده ولو من اشوفج تضحكين احترك حرك معناتهه ناسيتني..

اكثر من مره اجي واشوفج واكفه انتي وابنيه وولد وهم افتح تبرير بداخلي لا شجن ماتخون بس هذا زميل وشجن من عندي تخاف مستحيل تسويهه واظل انطي اعذار بداخلي بس حته لا اطلعج غلطانه

وبيوم خفت لا اخسرج اجيت تعاركت ويه وائل وكتله لو تخطبوهه لو من باجر اعوف بغداد كلهه واهج وبعده وائل مصر بان ماتفيدك وكال اني سمعت من امهه اكو طالب وياهه يريد يتقدملهه وامي ايدته وكالت صح امهه اكثر من مره كالتلي...

كالي وائل اتاكد من عدهه اذا ماعدهه شي ويه الولد الوياهه نخطبهه بكد ماجنت فرحان ضيعتيهه جنت جاي عليج اريد اسألج اكعد وياج واحجي واكلج هذا زميل شوفي شجن ماكو رجال يتحمل هلكد بس علمودج تحملت ادوس ع كرامتي لان فكره شجن بريئه ونقيه هاي هي الي تخليني ادافعلج بكل جوارحي...

اجيتج للكليه واكو واحد اعرفه من معارفنه تلكاني بالباب وطبينه سوه وكال اني اداوم بنفس قسمج ماكتله بنت هالي بس كتله جاي اسال عن طالبه وياكم اسمهه شجن؟؟؟

كال منا وروح هي خوش بنيه وحبابه بس اذا ناويه ت خطبه هي عدهه علاقه بواحد ويانه اسمه احمد وع اساس هاي الايام يخطبهه هيج سمعت من الطلاب بس تخيلي موقفي اني الي اخاف عليج من روحي وهذا واكف يحجي عليج كوه لازم نفسي عنه وعفته وظليت كول اليوم اراقب بيج ومصر اجذب نفسي واجذب غيري بس شفتج بعيني شلون اجه شايل بيده كلاصات وانطاج واحد وعادي شجن كاعده ويا واجذب عليج لوكلت ظليت واكف ماتحملت اشوف هيج منظر ولاكدرت اروح عليج واتعارك وياج حفاظا ع سمعتج

ورجعت خايب وشكو دليل جذبته مامتندم علي بس هيج موقف كدامي شفتج والولد ماله مصلحه بكلشي وكال هيج ماكو دخان بدون نار

واعرف خطوبتي لفاديه اكبر غلط بس من حرگه كلبي ماعرفت شصرف بس ردت احسسج بناري تصرفي مال زعاطيط بس بوقتهه وظليت ايام ما احس باي تصرف يبدر من عندي وظلمت فاديه والا هي اعزهه حالهه حال اختي

شجن.. يحجي واني اطب بصدمه واطلع باقوى صحت انت شتحجي احمد ماعندي شي وياي وكعد يمي ينتظر بنت عمه وماحجه شي ووائل اخوك فضحني بنص الكليه

غيث.. من ايدج انتي تسترين اله موعندج اخوان ماتحجيلهم شكو ساكته وسالفه احمد تاكدت عندج شي من اجه خطبج وهاي اني اعتذر الج وراح اعتذر لفاديه لان سويت هيج تصرف بس ابد ما اسامحج ع السويتي بيه...

شجن.. كمت ابجي واني اتوسله مو اريده يرجعلي بس ماريد يكول عليه خاينه اني ماخنتك والله كله من وائل اخوك هو دمرني الله لاينطي هو يهددني اعوفك لو يفضحني اني ماعليه

غيث.. ادري بي نذل ويهددج بس ماحجيتي الي ولا خليتيني اساعدج ولا وكفتي وياي وصبرتي ولج هنا ودك بايده ع كلبه هنا حبج مثل النار جمره ومشتعله وماتنطفي

كام كعد ع حافه الجربايه وجر راسي لزمه باثنين ادي وخله راسه ع كصتي وكام يبجي كدامي ياربي غيث يبجي بين اديه وهو يصيح ما اكدر انساج ولا اكدر ارجعلج اني موبس احبج اني تعلقت بيج وماجاي اكدر افاركج واصبر

بعد هذا الصار وخطوبتي لفاديه صار حبنه مثل الحلم خلينه عايشين بي بس بالواقع هيهات يتحقق ودموعه تجري اني ابجي وهو يبجي

شجن.. غيث والله احبك للموت ما انساك ولحدما مااندفن بالتراب وما اخلي مخلوق يلمسني اني احبك وضيعتك اني من غبائي وخوفي لاتسامح وائل ابد هو سبب فراكنه تهمني انواع التهم واني ضعيفه اني مومثل البنات واكدر اواجه كله مني

غيث.. اني هم احبج وثقي بالله ياشجن حبج راح يظل بكلبي لاخر نفس لاتنتظريني ولا انتظرج شوفي حياتج لان هيهات ننجمع بعد سالفه فاديه روحي بحال سبيلج

باسني من راسي واحس بدموعه وهي تنزل ع كصتي وبعدهه تركني وكام بدون حته مايلتفت ولهنا وانطوت قصتنه اني وغيث وراح تظل بس حلم عايشه بي ومستحيل يترجم للواقع...

بجيت لطمت اذيت نفسي دعيت الله ياخذني بس ماكو حل طلعت من المستشفى ومكسوره من كل جانب مرايه وتحطمت وصارت قطع زغار لا اكدر اجمعهم لان راح يجرحني ولا اكدر اعبرهه واعوفهه ورا ظهري

قبس... طلعت شجن للبيت وجدو سوه عشه ووزعه ع الفقراء وهدى ظلت يمنه رجلهه شغله بغير محافظه والغت الكعده مال عشيره وائل هو سد السالفه مال ضرب بشار وتهجمه لبيتهم نوعا ما كدرنه ناخذ نفس بعد هاي الايام الطاحنه

صابرين مرت عمر طلعت حامل وبثت فرحه بلبيت شجن رجعت اداوم وهالمره ع كرسي متحرك جانت رافضه تواجه المجتمع بس بعد حجي وتقنيع يله كدرت تقوي نفسهه وداومت وتقريبا فاديه رجعت طبيعيه بعد مافسخت الخطوبه رغم عمو شكد حاول يفتهم منهه بس بشار متحمل عليهم ورادهه حجه وفسخوا الخطبه...

رحت للدوام وبعدنه هستونه استلمنه الشغل ومانحس غير لجنه التفتيش فوك روسنه واشوف الحيه ميامين وياهم فتشوا وعبالك يدورون الزله بس هالمره مالكو شي وراحو ...

سناء.. قبس روحي للمدير تلكي معصب بلكي من يشوف خلقتج يهدء اليوم الرواتب وخاف يعاقبنه
قبس... ليش معصب مالكو شي اللجنه وسجلو جيد
سناء.. موهاي ميامين مسويه نفسهه مديره وتفتر وياهم يكولون المدير حته ماضيفهم ولا افتر وياهم عنده اجتماع

قبس.. كمت عدلت شالي وكلت خلي اروح اشوف شكو ماكو لكيت السكرتيره استأذنت منهه ودخلت بس شافني ابتسم

بشار.. هسه كلت اكمل البيدي واخابرج حته نطلع شويه
قبس.. وين؟؟
بشار.. الفتره الراحت ماحسينه مخطوبين لان مهوسين ونطب بمشكله ونطلع من وحده

قبس.. شكالو اللجنه
بشار.. ماكالو شي بس كاتبين تقرير بان الشغل جيد وماكو خطأ
قبس.. اي زين لعد استاهل طلعه جان يندك الباب كال تفضل

ميامين.. استاذ صحتني؟؟
بشار.. اي ست ميامين تعالي اكعدي
قبس.. كعدت كدامي وباوعتلي بطرف عينهه والتفتت علي عندي شغل استاذ ممكن تستعجل

بشار.. ميمونه!! حجاهه ورفع طرف حاجبه اني استغني عن خدماتج وهذا كتابج رجعي لشركتج او شوفي غير مكان

ميامين... شنووو؟؟ ليش شنو السبب؟؟
بشار.. اسباب هوايه مكتوبه ب CV مالتج حته الشركه الي توضفج يكون الهه علم

ميامين.. باي حق تكتب بCV مالتي احتاج نقل ميصير
بشار.. ليش ضجتي يجوز كاتب خير عنج ليش فكرتي اكتب شي سيء

وجهه صار احمر ع اخضر وانطاهه الفايل تقره بي وهي مبينه اعصابهه نار بس استاذ انت من الاول كتلي ع الموارد وخلاص وافقت

بشار.. ماعندي اي مجال وعندي فائض وموبس انتي نقلتج شكم واحد من معاونيج وشدد ع هاي الكلمه

ولاتجيبيلي امر من الوزير لان اني جبتلج نقلج هالمره بموافقه الوزير وشركتج الاصليه محتاجتج اكثر من عندي وهسه اني اريد اطلع يله قبس ست ميامين استلمي راتبج وشكرا ع خدماتج

طلعت كدامنه صايره نار وهو اخذ سترته والموبايل والمفاتيح واني ركضت قبله جبت جنطتي وانطيت بوسه لسناء وعاليه

سناء.. الله ربج ومحمد نبيج ناس تاكل دجاج وناس تتلكه العجاج اشبعي ولج بس مودجاج غير شي

قبس.. فضحتيني كلهه درت
سناء.. اشتريهه بروح هاي الفضيحه وينهه

قبس.. تلكيته مبتسمه واحسه اليوم رايق الى درجه صعدت يمه وحرك السياره افترينه شويه وتغدينه بالمطعم ورجعنه بالطريق اشوفه مو طريق البيت

وين رايحين؟؟
بشار.. اشوفج شي؟؟
قبس.. بشار ليش طردت ميامين؟؟
بشار.. ماطردتهه الا تاكدت من نيتهه هي اساس التخريب وجابلي ادله عليهه استاذ حسين وتاكدرت منهه يله من اجت لسه يوميه شكوه وتطلع هي مسويتهن

قبس.. شنو غايتهه
ميامين.. غايتهه تصير بمكاني
قبس.. والله داخلي خايف من الهدوء العنده رغم طبيعي بس بداخلي اكول اكو شي او اني يتخيلي هيج

وصلنه لمنطقه ما اعرف شسمهه كلهه بيوتهه جديده واكو عمارات يبنون بيهه وكف السياره اباب بيت ونزلنه امشي واسال وين رايحين طلع المفاتيح من جيبه فتح الباب وطبينه

بيت كامل بناء جديد طابق واحد بدون اثاث بس نظيف امشي واتلفت هاي غرفه هاي مطبخ معقوله هذا بيتنه

قبس.. المن هذا بشار
بشار.. بيتنه
قبس.. من كدما جنت فرحانه كمزت بسرعه وحضنته هو يضحك وضمني لصدره حيل

بشار.. عجبج
قبس.. حيل وفرحتني انت شكد غامض وضربت خفيف ع صدره لزم ايدي
بشار.. انتي ليش تتحرشين ماتخافين ع روحج

قبس.. مدامك انت ويايه ما اخاف
بشار.. شو نزعيلي الحجاب محنطه بي
قبس.. ضحكت نزعت شالي بسرعه مد ايده ع قراصتي شمرهه انفتح شعري همزين جنت امشطه وسبحانه البارحه

ماكو شي نكعد علي ظلينه واكفين جر خصله من شعري شمهه وايده تتحرك ع خصري بهدوء نزل راسه ع ركبتي وباسني من عدهه غمضت عيوني وفكري بس يمه فصلت عن كلشي بس اديه وشفايفه تلامسني

رفع راسي واخذ شفايفي ببوسات متقطعه وبعدهه التهمهن بقوه حته ردت ادفعه بس خفت لايزعل لان جان يتعامل بقوه اندمجت وعشت ويااا بكل احساسي ومشاعري ...

جنت لابسه تنوره وعليهه ستره طويله تغطي الورك وجواهه بلوز خفيف من كدماجنت مندمجه مادري شلون الستره انزعت وظليت بس بلبلوز

فزيت من بين اديه وارتديت ليورا من حسيت ايده تسللت ع ظهري من جوه البلوز حته هو تفاجىء من الفزه مالتي وجان مخلي ايده الامستني كدام عينه وعبالك حس بخشونه المنطقه..

بشار.. شبيج فزيتي
قبس.. مابيه شي بس مايصير ؟؟
بشار.. تعالي شبيج خفتي وفتحلي ايده رحت حضنته وكلبي يدك سريع شلون راح اواجهه بالوحمه وخاف ينفر من عندي

كعد بالكاع ومدد رجله وارتجى ع الحايط الكاع نظيفه وخلاني بحضنه بس كلبي مدري شجاا شلون جنت مندمجه وشلون فزيت من ايده

رفعت راسي علي وهو مدنك اخذ شفايفي ببوسه سريعه وظل يباوع بعيوني وكلساع يضمني لصدره حيل احس اظلاعي راح اطك بين اديه

مبين حس بشي بس ماراد يحرجني لذلك سكت شويه ودك تليفونه من الشغل كال يله خلي اوصلج وارجع للمسائي

بكد ماجنت فرحانه ضجت شلون افتح موضوع ويا واحجيله عنهه ونص جسمي مشوه منهه شي مامعقول صدري وبطني وجانب من ظهري لحد نص من الفخذ حته اهلي راجعوا بيه عبالهم مرض مو وحمه واتذكر الطبيب كال هاي نادره ...

رجعت للبيت وهدى لازمه البيت بحيث امشيه الكل ع السراط حته شجن تكعد وتحجي وتاكل ويانه وفرح حس من عدهه ماكو والله اتمناهه تظل يمنه

مر شكم يوم نفس الروتين وبشار زين ويوميه من يجي لونكعد بالحديقه لو اصعدله لغرفته شويه بس مايسوي شي حده البوسه وبس...

بيوم من عدهن جنه كاعدين بليل واجتنه هدى قفلت الباب وكعدت تستجوب وحده وحده بينه لان شاكه بشي وفاديه كتت الاول وتالي حجتلهه ع سالفه غيث وشجن انتحرت من ورا غيث..

هدى نسخه بشار الثانيه عياط وغلط وعصبت علينه واكثر وحده لاموهه اني لان سترت عنهه وكالت لازم ينحط حد لهاي المهزله وماتظلن تصرفن من راسجن

عده اليوم طبيعي وثاني يوم ماكو شي ثالث يوم من رجعت من الدوام سالت فاديه وين عمه بسمه وبناتهه كالت هدى خابرت عمه بشرى وكالتلهه اريد من عندج طلب صغير اليوم تعزمين بسمه وبناتهه وبيبي وجدو وماما وبابا ومدري شعدهن عليمن متفقات ماندري

قبس.. وهسه منو بالبيت؟؟
... اني وياج وشجن وهدى وصابرين يم اهلهه وماندري هدى شتخطط گلبي لاعب من عدهه
قبس..لاتخوفيني
فاديه.. والله هدى كله تخطيط ومدام سوت هيج عدهه شي ماتريد احد يعرف بي

قبس.. كلام فاديه خوفني رحت صليت وهدى بالمطبخ تسوي عشه تقريبا ساعه ب٥ بعد نص ساعه ويأذن اذان المغرب ويفوت بشار...

تفاجأت بجيته مومن طبعه يرجع هيج وقت بس جان عصبي بشكل حته ماسلمت علي رحت للغرفه وكلبي احسه اوجعني بشكل موطبيعي...

شويه ودخلت هدى للغرفه بس احنه كاعدين وكل وحده بينه كلبهه يدك الف ندري ورانه اليوم مصيبه
هدى.. اسمعن ماكو شي غلط بهذا البيت يصير ونسكت عنه من نسكت مره معناتهه سمحنه للمقابل يدوس علينه
اني حجيت لبشار كلشي وسبب تدخل وائل وسوايته هاي مستقوي بضعفجن يدري بيجن ماتحجن اذا ماحاسبجن بشار اني احاسبكم حجت هيج وطلعت...

قبس.. هي حجت هيج واحس نفسي راح اخرب صدك لوكالو حبل الجذب كصير سالفه غيث وتخبلت عليهه هدى شحال الباقي يمه الحكيلي اخذيني يمج بالنجف...

شجن.. ولج انتي ماماكله الكتله مالته لج فاديه نفسي كامت تلعب
فاديه.. يمج الشباك طلعي راسج من عندج ع اساس اني ماراح انكتل وياج بس نستاهل محد يكدرلنه زلم عليهه العتب نستر من وراهه

مااحسه غير واكف فوك راسنه وهدى ويااا بسرعه شلت رجليه ورجعت ليورا ع جربايتي وفاديه كامت وكفت

بشار.. تعرفن غلطجن موو؟؟ انطني سبب واحد يخليجن تضمن عليه ؟؟
قبس.. كلنه سكتنه ماحجينه

من كدما جان عصبي ماسمع اي كلمه من عدنه اول وحده شجن جرهه من شعرهه من الكرسي كوه توازنت وضربهه راشدي شفت الدم طلع من حلكهه ورجع ضربهه الثاني وهي تشهك من القوه مالته من يمي اذاني طنت ...

وهدى ما ادخلت ابد رادت تدخل فاديه وخزرتهه هدى جان عصبي بشكل وهو يرزل بيهه شكم مره اجيت وسالتج ليش تجذبين عليه ؟؟ موبعينج اني ماتعرفين تحجيلي حته اخذ روحه ؟؟ عندج علاقه بغيث وساكته وخليتينه نزوج اختج اله اخذ روحج هسه وبعدج ساكته بشنو مهددج وساكته انتي الفقيره تلعبين من ورا ظهرنه هيج وتمحين الثقه؟؟

هدى.. عوفهه بشار وسحبتهه من ايده لان راح توكع وهي ماحجت التفت عليه جان يكول وانتي شكم سؤال سألتج وجذبتي؟؟ وعينك عينك وبصلافه تباوعين بنص عيني ودكولين ماادري؟؟

قبس.. اول مره اخاف هيج خوفه كمت ارجع ليورا وهوصافن عليه اذا شجن المريضه هيج ضربهه اني شراح يسوي بيه...

صاح بيه صعدي فوك بسرعه !! من خوفي رجليه ماتحركت صاح اني مو وياج ؟؟؟ بسرعه سويت الدرج طفرتين وصعدت شناوي عليه ليش عزلني وحدي عنهن؟؟

اسمع صوته وهو عصبي ع شجن يحجي وهو مفرفح كلبه بلاول من الخوف ماكدرت اركز بكلامه خليت ايدي ع حلكي وكعدت بالكاع واسمه يكل لهدى احساب قبس يمي الا ازوعهه حليب امهه...

بعدين سمعته صاح بصوت ع شجن وهو يكلهه وين اخذج من ١١ ل٣ تحجين هسه لو اطشر راسج بطلقه ؟؟؟؟

يتببببببع.... احبكم