رواية قمع المشاعر الفصل الثامن والعشرون 28 - بقلم Rozaya1122

قمع المشاعر.... البارت التاسع والعشرون..
للكاتبة زهراء ( روزايه)...

( ياحلوين اكو بعد بارت ينزل قبل ١١ بين مايرتفع هذا البارت وطبعا هو هديه الكم ع تفاعلكم الرائع بالقصه وهم هديه للحلوه فطومه لان عيد ميلادهه عيد ميلاد سعيد قلبي Fatima_alsheikh.  وبخصوص الي ماتظهر عدهم القصه احذفوهه ورجعوا ضيفوهه)

....

قبس. صوتج فاديه اكعدي وخلي نتفاهم!!
فاديه.. انتي سدي حلكج ولاتسمعيني صوتج طابختهه انتي وهاي الجبانه ومتونسات عليه وتناقشن ولاعبالك اني انسانه وعندي كياني حقيرات ماتستحن ماكلتن شنو ذنبهه تنظلم بهيج زواج حقير واصير لعبه بديهم؟؟

تدرن كلش زين لا احبه ولا اريده ومجرد زواج تقليدي واكثر من مره اجيتج انتي قبس الجبيره وسولفتلج تعامله ويايه ومايطيقني وكتلج خاف عنده حبيبه وتقنعين بيه مثل الجهال هااااا وصاحت بصوت عالي احجن؟؟ احجي انتي اختي بنت امي وابوي ضحكتي عليه؟؟ تكدرين تنامين وتشوفيني اتخبط بحياة مجهوله والجاي يخطبني حته ينتقم من عندج 

قبس.. فاديه صوتج بس اكعدي ونفهمج ع كيفج لا احد يسمعج؟؟
فاديه .. شتفهمتي؟؟ وليش تخافين من صوتي خاف يسمع بشار كاعدات تخططن انتي وياهه وحدجن وتضمن وتسترن عنه ومستهبلات العائله كلهه شلون انطاج كلبج ياشجن جنت حاسه اكو شي واجذب نفسي شفتج من خطبتي لسه وانتي موطبيعيه وحته لمت نفسي وكلت اني انانينه وضوجت شجن لان راح اتزوج قبلهه افكر بيج وانتي شنو السويتي دفعتيني بنص حفره

غيث يحبج مووو؟؟ وجنتي ع علاقه بي وامه ماخطبتج وضحيلي السبب اختي الحنونه كومي حاجيني لا ابتلي بيج ولو هسه اطلع لبابا واخلي يجي يدوس ابطنج عار حقيره جبانه انتي ماتريدين نفسج هم تريدين تضيعيني وياج؟؟

شجن.. والله ماكدرت اكلج شفتج فرحانه كلت يجوز نصيبهه ماخطبني من ورا احمه وائل مايريدوني بس كلت يجوز تحبي؟؟
فاديه.. هجمت ع شجن احبه مو ؟؟جنت فاقده اضرب بشجن واجر بشعرهه ولابسه شبشب برجلي نزعته وكمت اضرب بيهه وقبس تحاول تسحبني من عدهه

تدرين بامه واخو عارات وانتي تشوفيني اروح للنار برجليه ومامنعتيني ولج انتي اختي تفوو عليج ياجبانته ياضعيفه موتي احسنلج دمرتي روحج ودمرتيني الله لايوفقج ...

قبس.. همزين الكل نايم جان صارت كتلتنه عمل شعبي طلعت فاديه من الغرفه صعدت للسطح ودموعهه تجري وشجن شعرهه منفوش كطعته تكطع واني استاهل الكتله لا وكفت ويه هاي ولا ويه هاي ...

شجن.. ولج قبس ماريد اعيش اريد اموت خلصوني من هاي الحياه مااريد خسرت كلشي حته اختي روحي وراهه فاديه عصبيه خلي تجي تضربني اسوي بيه كلشي بس لاتزعل اني حقيره اني دمرتهم كلهم حته انتي تتدمرين من وراي

قبس.. دخيل الله شكد شايفه بنات ضعيفات وشافن جور الايام بس مثلج ضيعت حياتهه وبعدهه مستمره بالخوف ماشايفه عفتهه وصعدت ورا فاديه لكيتهه مخليه طابوكه وكاعده ع السطح وتبجي بس شافتني صاحت بيه انزلي لا اشمرج منا انزللللي!!!

قبس.. كومي فاديه حقج شتحجين بس والله موقصدي اظلمج شجن ماخلتني احجي!!!
فاديه.. كتلج امشي من وجهي لا هسه الم المنطقه عليج
قبس.. نفس عصبيه اخوهه عفتهه ونزلت كعدت ع الدرج شنو من مصايب تهد الحيل ياربي اريد نافذه اطلع منهه راسي اشتم هوه ماكو

شفت باب غرفه عمو انفتح طلعت ام بشار راحت لشجن وشويه وطلعت من يمهه اكبر غلط البنيه تبتعد عن امهه لو شجن مصادقه امهه ماوصلت لهنا وامهه انسانه متفهمه وواعيه بس مادري من ياطينه شجن حته اني ماحجتلي لو ما اكشفهه

اندك الباب واسمع ام بشار وصوت عمه بشرى اجت نزلت سلمت عليهه نزعت عباتهه وطبت اشرتلي بعيونهه عود شبيج؟؟ صحتهه للغرفه وام بشار كعدت هي والحجيه  ...

بشرى.. خير يارب هاي لسه شجن دايره وجهه عمه موحته المات رجلهه عرست مادكليلي شبيج؟؟

قبس.. عمه ساعدينه واكعين بمشكله ؟؟
بشرى.. اني اختك ياعادل شكو ولجن احجن وكعتن كلبي وجوهجن ماتبشر
قبس.. بديت احجي لعمه سالفه غيث وفاديه وشجن ماذكرت سالفه المصخم وائل اخاف من ردة فعل شجن وحده مسودنه خاف تحرك نفسهه وابتلي

بشرى.. ضربت صدرهه صخام الصخمجن وعزاااجن ودفنجن بالنجف برابي..... ادكن ادروب وساكتات راح يصير شهر ع خطبتهه هسه حجيتن اكوم املخجن هسه

التفتت منا ومنا يمهه كتاب فاديه كومي واضربيني بي اجه برجلي حيل اذاني حافته ثكيله صحت اااخ
بشرى.. وجعاااا وكون وكعن اسنونج سن سن انعل عشيره امج هسه ماتعرفين تجين تحجيلي واروح احط رجلي ..... ام وائل منو كالهه بنات عادل لعبه وتضحك عليهن مالهه رداد هذيج الحيه

وانتي الدجاجه العوبه طايحه الحظ مو اختج هي شلون هيج تسكتين ماجريتيهه وكتيلهه ترى هيج وهيج السالفه ماخفتي عليهه تزوج وتنظلم وهو مايحبهه ليش ولج تبقين عوبه ومابيج حظ وبس تبجين ...

قبس.. عمه هسه شوفيلنه حل ندري غلطانين
بشرى.. العيون المطگطگه جنهن عيون عگروك بالگبر وين راح عنج بشار حته يشوي البصل ع .... امداج ياغمه

بعدهه مستلمتني رزايل طبت فاديه بس شافت عمه بجت وبشرى فتحتلهه حضنهه تعالي ياعمه يروحلج فدوه هالعوبات هذني وهذيج ام وائل الحيه يابعد اهلي لاتبجين هسه اروح اشعل ابو ابوهه لا ابو ابنهه

فاديه.. شفتي عمه شسوون بيه اني مامقهوره من ام وائل لان هي حقيره بس مقهوره من اختي وبنت عمي يشوفني مامرتاحه واكعد اشكيلهن اسلوبه ويسكتن شسويت اني حته اختي هيج تجازيني احس كلبي راح يوكف من الالم لو متزوجه وعايشه بالمرار شلون ينامن ليلهن  ؟؟؟

بشرى..اختج غبره مابيهه حظ وبنت عمج بس السان وبوخه اني عمتج اليوم العب بيهه جوله ام الوسخ سليمه العار تدري بابنهه وحاربته مايخطب شجن واجت خطبتج هاي ملاكيه وحده توكفهه عند حدهه خلي اذكرهه بماضيهه وبيهه زود توصل يمج ...

فاديه.. اني مااريده اريد افسخ من عنده ولايشوفني وجهه وبس يجي بشار اكله عليهن؟؟
قبس.  لا فاديه الله عليج لاتحجين والله يذبحني
بشرى.. خفتي ام عيون مووو ؟؟ منين تخافين انتي دخل يجي وروح اخوي وولده الا اخلي يعيدج من جديد

كالج ترى اني شكاك وما احب التجذب واريدج تريحيني وتبعدين الشك عني لا انتي اجيتي وصخمتي وجهج وخليتي يثب هو ع حق بشكه ادكين ادروب وتضمين خفتي ع شحن طبهه طوب عدهه ام مثل الورد ماحجتلهه ماراحت حجت لاختهه الجبيره اني عمتهه عبالهه بسكوتهه حلت مشكله لو دمرت روحهه واختهه

عمه فاديه انتي تريدي لولا؟؟
فاديه.. لا مااريده اريد افسخ ؟؟
بشرى.. كومي خابري يله شنو لعبه احنه يحب شجن ويجي يخطب اختهه كون كبر لهلزلم العارات بس شوارب ومابيهه خير قلة بنات ابن سليمه جاي ع بنات اخوي وتنتقم ؟؟

فاديه دكيت علي كالعاده مايجاوب اباوع لشجن مدنكه وماحجت وكلبي يفور عليهه ظليت ادك علي هوايه يله رد
غيث.. الوو هااا فاديه عندي شغل؟؟

فاديه.. اسمعني كلمتين وروح لشغلك تجي تفسخ الخطبه اليوم لا افضحكك فضيحه واخلي الجبير والزغير يتفل بوجهك ياناقص حرامات تنحسب ع الزلم  اني تضحك عليه انت وامك واخوك الطلي؟؟ وتجي تخطبني حته تنتقم من اختي ؟؟ عندك علاقه سنين باختي وجاي تريد تزوجني شكلت لروحك ماتخاف الله لو المهم ترضه ذاتك وترضه الطلي اخوك لان منعك من شجن غيث لاتحجي ولاتجاوبني اذا ما اجيت هالمره صدك اخلي اخوتي يسوون بيكم العجب موعبالك شجن التحبك وتخاف وتسكت؟؟؟

سديته وشمرت التليفون بس كلبي مابرد حته ماسمعته شكال رغم اسمع صوته من اغلط ولا جنت منتبهه ع نفسي شحجي احس روحي انغدرت وحسيت بنفسي رخيصه انخطبت وفسخت وراح تظل هاي العلامه عليه من ورا غباء اختي...

بشرى..خلصت هسه ويه غيث اروح لسليمه اشعل عشيرتهه وافضحهه فضيحه كفار قريش  واجي وانتن اكعدن هنا وصوتجن ما اسمعه فاديه عمه تعالي وياي عندي شغله وياج..

قبس.. طلعت فاديه وعمه واني اباوع لشجن ماحجت ولا نطقت حرف واحد بس ايدهه المريضه جانت ترعش ولازمتهه الشهكه وزين متحمل هلكد كلبج

طلعت برا بس بيبي وام بشار كاعدات وكلساع يسالني شبيهه بشرى كتلهن مابيهه وفاديه صعدت للسطح شويه واجت عمه من الباب نزعت عباتهه وركضت للصحيات شر البليه مايضحك دكول عفت العركه واجيت ما اتحمل بعد

كعدت بالمطبخ كل كعدتهم هي تسولف واني اباوعلهه اريد تكوم تحجيلنه بس مطنشتنه لحدماصار المغرب ومن طلعت ركضت وراهه للباب كتلهه شسويتي كالت بس ريحت كلبي وغسلتهه واجيت سوالف نسوان خشنه مالج دخل...

فاديه ماتحاجيني ولاتحاجي شجن تعشينه واني وصابرين كملنه الشغل واسمع ام بشار تصيح ع فاديه وشجن وتدعي ع نفسهه من كدما مشبعاتهه قهر بس لحدالان اي خبر عن غيث ماكو وماادري شمنتظر مايجي يفسخ...

اباوع لساعه ب١٠ بليل وليل الشته طويل وماتمشي الساعه ولاعمر ولا بشار طلع عمو من غرفته يصيح بس اني هيج اكو بيت مايلفون بي لابعشه لابغده يكعدون ويانه

ام بشار ..غير عدهم شغل؟؟
عادل.. ياشغل لحد ١٠ اكو واحد هسه يشتغل عمر موعنده مره وين لنصاص الليالي وبشار دوامه يخلص ب٨ وين يروح اولادج موتوني لاالجبير ولاالصغير يريح الكلب

عمر يداوم بشركه اهليه وب٢ يخلص دوامه مرات يجي للغده ومرات يروح لمحلات الخياطه بس هسه ب١٠ وين اكو محلات والجو بارد وبشار اصلا محد يعرف شي عنه ونادرا مايكعد ويانه ياكل لومعزوم لو شغل !!

بعده عمو يصيح ويتعارك ويه ام بشار طب عمر صاح عمو وتعارك وهو يجاوبه ببرود وين اني غير يم جماعتي اكعد بالبيت شسوي؟؟؟

خطيه عمو من كدما اليوم عصبي حته ضغطه ارتفع منا سالفه شجن ومنا عشيره وائل باجر العصر تسوي كعده  كوه سكتته ام بشار واخذته وبعد الجبير لسه ماجاي

انتظرته ل١١ ونعست ونمت وهو ماكو ثاني يوم كعدنه اني وفاديه ماتحاجيني هي اجاهه الخط واني وراهه بشويه طلعت حته واهس بالشغل ماعندي كملت البيدي وسناء وعاليه جمعولي المحتاجات توقيع واخذتهن ورحت اريده يوقعهن واني ماشايفته من البارحه الظهر من باسني...

دكيت الباب ودخلت جان يشتغل بالحاسبه سلمت وكعدت لابس نظاراته نزعهن وباوعلي ورجع دنك ع الاوراق..

قبس.. شلونك؟؟
بشار.. ششوفين؟؟
قبس.. البارحه انتظرتك وتاخرت؟؟
بشار.. اي
قبس.. بشار لاتحجي ويايه هيج انت تعرف شكد احب شجن وماردت اخذلهه كالت لادكولين لبشار؟؟

بشار.. ليش كالتلج لادكولين؟؟ لان تعرف هالشي السواا وائل غلط وماتريدني احاسبه انتي لوجايه حاجيتلي راح افتهم السالفه ابدال ما يوميه رايح للجامعه ادور ع دليل وعرضولي التصوير واشوف اختي يسحل بيهه ورجلهه ماتساعدهه ليش تسترله وساكته؟؟

الله ينطي الولد احمد اجاني للشركه وحجالي بالتفصيل وشلون ضاربه هالحيوان ومستحي من عدنه ويكول حفاظآ على سمعه شجن ماسويتهه عشائريا يعني الغريب استحى وابن خالي فضحهه وبعدهه تسترله

اني لحدالان مراعي وضعهه الصحي لان الطبيب كال حالتهه النفسيه تؤدي الى عواقب وخيمه بس خلي تصير زينه واني اعلمهه وانتي وياهه يجوز بعد ضامه عليه وماادري؟؟

قبس.. سكتت شحجي ياربي عساني لادريت اخاف اكله واخسر بشار اذا كتل وائل يروح ينسجن وياما سمعت قصص بالثارات والكتل راحت كومه شباب

بشار.. انطيني الملفات اوقعهن؟؟
قبس.. لاتظل زعلان عليه والله جاي اموت قهر البيت يخنك وانت ماكو وخليت الملفات كدامه

سحبهن يدقق ويوقع بيهن واني كمت افتريت صرت بصفه خليت ايدي ع اكتافه ودنكت بسته من ركبته ميل راسه بابتسامه خفيفه..

وقعهن وكال اخذيهن وكفت وخليت ايدي ع خصري كتله يعني تطردني ؟؟؟
بشار.. ااي اطردج لان هنا مكان عمل
قبس.. ومن بستني هنا وقفلت الباب مومكان عمل؟؟

بشار.. هسه شتريدين ابوسج عود بلبيت
قبس.. منو كالك ميته ع بوستك خليهه الك وهاي وحده وياك عبالك انساهه
بشار.. هو اني ما اريدج تنسيهه!!!

قبس.. اخذتهن وطلعت والله بليد!!  بله هذا شلون اراضي ومبين قافل زين هو مو باسني بالمطبخ وراضاني شو بعده زعلان والله عمو عادل وامه حبابين وع نياتهم بس مدري عليمن طالع؟؟

بعد ماكمت من مكاني وهاي تعليماته حدي اله بس او لصحيات كملت دوام ورجعت وهو مارجع استلم المسائي وهاي ميامين ماشفتهه اليوم ونسيت اساله عليهه ..

رجعت للبيت صليت وتغديت فاديه تعاملهه طبيعي ومامبين عليهه مقهوره بس ماتحجي ويانه وشجن كاعده ع الجربايه  واني واكفه اعلك بملابسي انفتح الباب فرح واختهه لاهلا ولامرحبا

فرح .. هلو بنات خالو شلونكم
فاديه.. جنه بخير
فرح.. لا لا حرام فدو شبيج زعلانه خاف غيث مو زين وياج؟؟
فاديه.. منو غيث؟؟ لازم ماتدرين هيج زباله ماتنفعني وراح افسخ

فاطمه... وووي شنو هاي مالحكتي تفرحين شنو الاسباب حياتي
فاديه.. روحي اسالي ام وائل او خلي اختج تسال وائل تدرين بيهه علاقتهه قويه بي كله خطوط ومراسلات

احتقن وجه فرح بس هيج عقارب ماشايفه وحده ترفع وحده تكبس
فاطمه.. حرامات ماشهدنه هاي الاحداث رحنه نغير جو يله حبي فدو ولايهمج
فاديه.. لج فاطمه اطلعين من يمي لا امسح بيج البيت مسح واخذي اختج من وجهي

فرح.. عوفيهه فطومه الظاهر كولش مقهوره حقج فراك الحبيب موسهل؟؟
فاديه.. اي انتي اعرف مجربته من خطب بشار شفتج لميتي هدومج وطفرتي

قبس.. من حجت فاديه بسرعه طلعن واني ع وكفتي صاحت فاديه بسبب منو هاي الزباله تعيرني؟ بسبب اختي وبنت عمي ؟؟ اني انذل هيجي كدام هيج شكول زفره ويشمتن بيه بسببج ياشجن ؟؟؟

ماحجت شجن ولاجاوبت ومن البارحه ماسمعنه صوتهه طلعت فاديه واني طلعت وراهه فرح وفاطمه عدهن عيد وطايرات طير مدري شبيهن

الكعده ماجليهه بسبب بشار عنده شغل وعمو رجع يصيح ولكم راح بخبلني شوره من راسه لا يكول ابوي لاعمي ضاربنه بعرض الحايط ...

صبينه عشه ورحت اصيح شجن لكيتهه نايمه عفتهه رادت تكوم امهه تكعدهه كالهه عمو خليهه تنام علاجهه منوم كملنه عشه وصابرين غسلت مواعين والكل كاعد بالهول واني رحت للغرفه باوعت لساعه هم يله تكعد شجن عدهه علاج

كعدتهه مره مرتين ماكو هزيتهه ماكو شلت الغطه عنهه اطرافهه ثلج واصابيعهه زرك اهز بيهه والخوف ماخذني شجن شجن اكعدي ماكو اي حركه ركضت للهول عمو الحك شجن ماتتحرك

كلهه اجت للغرفه حاولو وياهه ماتحركت ابد عمو سوده عليه اشوف دموعه نزلت ويصيح خابري الولد بنتي ماتت وام بشار مخليه راسهه بصدرهه وتبجي وتصيح..

ماينلام عمو بيهم لابشار ولاعمر بالبيت جدو طلع يشوف سياره والبنيه ماتت اجه جدو يصيح يله بسرعه غيث ياخذهه شالهه عمو وراحت امهه وجدو واحنه ظلينه انلوب عمه بسمه دكت ع بشرى كالتلهه وكالت مناك رجلهه راح يروح

بعدني ادك ع بشار دك هو عليه كال بيا مستشفى اخذوهه عمه بشرى مخابرته كتله خابر ع غيث وياهم لان عمو ما اخذ تليفونه من الخبصه...

كاعدين وهاي التدعي وهاي التبجي وفاديه ملخت نفسهه بحضن بيبي وفرح واختهه ياكلن بالمطبخ ولاهامهن تاكلن زقنبوت

كلوبنه نار ومحد يطمنه تالي صابرين خبصت عمر من كدما خابرت وجاوبهه يصيح كالهه محاوله انتحار وسده حته ماعرفنه زينه لولا

كامت عمه بسمه وفاديه يدكن ويلطمن وبيبي وياهن گلبنهه مناحه مانحس غير هدى فوك راسنه وعويل جهالهه ويبجون ع بجيهه وتصيح وين امي عنهه وانتحرت ليش مااحتويتنهه بشنو مرت وكرهت حياتهه وذبت اللوم باهلهه !!

اباوع لهدى لو عايشه ويانه جان احتمال غيرت شويه واحتوت اختهه لان احسهه عدهه مسوؤليه اكثر من امهه الي عدهه مفهوم التربيه بس ...

صارت الساعه ب١٢ ابن هدى كال خالو بشار اجه طلعت تلكيته عاف السياره برا واكفه بالطرمه وبارده ثلج خله ايده ع اكتافي وكال فوتي لاتبردين ..

قبس.. بشار شلونهه شجن عمر يكول انتحار؟؟
بشار.. ااي ماخذه كميه هوايه من علاج الاعصاب مالتهه وهسه انتبهت وحولوهه غسل معده ..
قبس.. عززااا شلون هيج تسوي ماخافت تموت
بشار.. هو اني اسال شنو الوصلهه لهنا حته تنتحر جان يحجي ونمشي لحد ماطبينه وتلكنه كلهه تسال وكالهن زينه انتبهت..

صعد وصاح قبس تعالي اجت عيني ع فرح لو يوكع بيدهه تكوم تفترسني حته هدى شافتهه وخزرتهه والله محتاجه هدى يمنه يمكن تعيد تربيه الكل...

صعدت ورا لكيته هستوه نازع القميص وظال ابدي ردن  اسود من شافني كعد ع الجربايه وكال اخر مره اسالج تدرين بشي يخص شجن؟؟
قبس.. لا بس هي حالتهه هيج من سالفه وائل

بشار.. تعالي فركيلي ضلعي يوجعني تعرفين ؟؟
قبس.. اي اعرف نام ع بطنك واني اسوي الك ومد اديك تمدد ع الجربايه وكمت ادلك بضلعه اني اعرف اسوي اذا متشنج وهو من كدما يدنك ع الاوراق هيج يصير

باصابيعي افركله من ركبته لحد نص ظهره بس من فوك الملابس اجاني صوته فوتي ايدج جوه البدي بلاول ترددت لان كلبي يدك سريع واحس اديه ماتشتغل بعد مديت ايدي ع ظهره وكمت ادلك بضلعه

بشار.. ايدج بارده؟؟
قبس.. هااا
بشار.. شبيج مرتبكه ترى هو ظهر
قبس.. انت كله عندك هو ظهر وهو صدر!!!

مد ايدك لاتتحرك لان حسيت بمكان التشنج وكمت افركله بيهه تتحرك جوه ايدي العصب حته هو كال حيل ولج شويه صار احسن كال كافي نزلت التشيرت وكام فر ايده وسوه هاي الحركه مال يرجع اديه ليورا..

ليش احس ورا هذا الهدوء عاصفه الهه اول مالهه تالي رغم شكله ونبرة صوته وكلامه اقصى درجه من الهدوء مع العلم خوفه ع شجن بس كلشي مامبين علي...

قبس.. انزل محتاج شي؟؟
بشار.. لا مامحتاج بس من ايدج استكان جاي
قبس... ادلل بين ماتسبح اجيبلك نزلت خليت القوري ولكيت عمر وجدو جايين وعمو وخاله ظالين يمهه كالو زينه بس يغسلون بمعدتهه وحته احتمال باجر مايطلعوهه...

كل واحد راح لغرفته وهدى باتت يمنه واني اخذت الجاي و صعدتله انطيته اله وكتله باجر مااداوم ونزلت ثاني يوم رحنه لشجن زينه ومنتبهه بس جسدهه تعبان

محد اكو بس ام بشار وعمو واني وفاديه مانحس غير وائل وامه وغيث اني جنت كاعده بصفهه لزمت ايدهه ضغطت ع ايدي حيل وهو يتحمد بالسلامه شكد ناقص ويلعب ع جرحهه وخوفهه

عيني ع غيث الي ماشال راسه ابد والحزن مخيم علي واحد ضايع وااحد مستلذ بضياع اخو

بعدهم هستوهم كعدو ومانحس غير فاديه تنزع حلقتهه وانطتهه لام وائل

فاديه.. هاي حلقتكم ومن باجر يجي ابنج يطلك ولا اريد اشوفكم ولاتشوفوني....

يتببببببع ..... انتظروني

مشاركه توصف حال غيث وشجن من Teba_almawswiu. عاشت ايدج التصميم يخبل حبي