رواية قمع المشاعر الفصل الثامن وسبعون 78 - بقلم Rozaya1122

قمع المشاعر....  البارت الاخير...
للكاتبة زهراء ( روزايه)...

( البارت الاخير طويل وماكدرت انزله كامل
هذا بارت وبعد ساعه او اكثر ينزل البارت الثاني
دااكتب بي ... قراءه ممتعه)
...

مضى على غِيابك الكثير ،
ظَننتُ أني بدأت إعتياد الأمر ،
اليوم راودتني الرَغبة في الحديث معك ،
ترددتُ في الإرسال ،
مُراسلات خيالية  بيني وبينك في عقلي ،
صدى ضَحكاتك يتعالى في مَسمعي ،

أُحب عَينيك ، نظراتها ، رُموشك الخلابه ،
يداك ، شعرك الفاتح ، لون بَشرتك السمراء ،
مَلامحك وطريقة حديثك.

الثالثة مساءاً ؟! أريد النوم ، تراودني في حُلمي ،
الآن قد بدأ الحزن ، ذبُلت عيناي ،
أشعر بإرتخاء أعصابي ،
رغبتي في النووم ، عُمتَ مساءاً ، أُحبك ،
.....

قبس... شتحجي انت ترى باجر نطلگ
ياحقوق تحجي عنهه وليش تحاجيني بهاي الطريقه
يعني اذا مااقبل تجبرني منو كالك اني عبده
عندك وشوكت ماجان تجي ولازم البي رغبتك..

بشار.. ليش اجبرج ماكوشي بالغصب وحته
اذا نطلك باجر شنو المشكله وبعدين انتي ليش
معذبه نفسج ومعذبتني؟! لاتقللين من شان نفسج
انتي مرتي ومابيهه شي اذا كتلج هيج

يعني كلشي بيج يريدني وهاي عيونج تحجي
قبل السانج وتكابرين رحمه لاهلج كافي
تعبتيني واخذتي حقج وزياده!!

قبس.. بشار لا اعذبك ولاتعذبني
خلي هاي الليله تعدي ع خير وباجر
كل واحد بطريق..

جنت مرتجيه ع الميز واحجي تقرب عليه
بخطوات سريعه صار كدامي اباوع لصدره
شلون يتنفس سريع ويصعد وينزل

حاوط خصري بأيده بحنيه وغمر راسه
بركبتي دفعته وميلت راسي
اعرف غايته مثل من خلاني اصير حامل
بامير..

كمت ادفع بي بس اديه مرتخيه
شي بداخلي يريد والشي الثاني
يمنعني ..

بس كمت ادفع بي حيل لاول مره
اقاومه بهاي القوه بس ماتركني
ابد يمكن قره البداخلي يريد وهذا
مجرد ردة فعل...

جان يكتم صوتي بشفايفه
وحركه ايده صارت اكثر جرئه
من اظل وحدي اكول اسوي هيج
واسوي هيج وامنعه بس من اجي للحقيقه
الكه نفسي مسلوبه الاراده..

الحب البيناتنه حب حقيقي نعيشه
بكامل احساسنه ومشاعرنه بلحظه
الي نلتقي ونتعانق ننسه كل الزعل
والعتاب..

اني عن نفسي بهاي الدقايق الي
ياخذني بيهه اسيره بحضنه انسه حته
الايام الصعبه المريت بيهه
انسه ع شنو زعلانه واريد اعيش وياه
بكل جوارحي..

حاولت بكل قوتي اكون واعيه ومنتبهه
خاف يصير حمل ويربطني بي من جديد
جان غامر راسه بركبتي وهو يشم بيهه
واحس انفاسه حاره وادغدغني..

همساته وكلامه الحنين وكلمه احبج
واعشقج جانت مسيطره ع الاجواء
روحي ذايبه بس عقلي منتبه..

حجيت يم اذنه اخذ حقك!! اخذ التريده
وبس, لاتستغل الوضع وتعلقني
بطفل من جديد ؟!!

حسيته جمد وحته شفايفه ظلت مطبوعه
ع رگبتي يمكن لحظات وهو ماانطه اي
ردة فعل !!

رفع راسه وباوعلي جان الضوه مفتوح
من كدما اندمجنه حته ماانتبهت علي
واني متعلمه اطفي باوعلي بعين ذبلانه..

وكال شنو قصدج؟!
رديت واني بدون مااباوعله كتله انت
مخليني للرغباتك فقط.. سرور هي زوجتك
بالواجهه لان ادور منصب بس اني مدفونه
هنا البي حقوقك!!

رد عليه نفس السؤال شنو قصدج؟!
جاي تنطيني كحق شرعي فقط
وتبرين ذمتج
ماعايشه الشعور وياي؟!

ماكدرت اجاوبه لان احتاريت اذا كتله
عايشه الشعور معناتهه ماسويت شي
وعليمن اطلب الطلاق واذا كتله لااا
هو رجال وتحز بداخله هالكلمه..

اكتفيت بالصمت ونزلت عيني
من عينه ماباوعتله هو بحركه سريعه
بسرعه رفع نفسه من عندي!!

سحب التشيرت مالته جان ع تاج الجربايه
لبسه بسرعه ودار وجهه وطلع من الغرفه..

يمكن اكثر ماتندمت علي هي هاي الجمله
النطقتهه بوقت غير مناسب ماعرفت
اصيغهه بالصوره المطلوبه ..

سحبت الغطه غطيت نفسي
جسمي مكزبر احس بلمساته الحاره
بعدهه ع زندي يمكن خربت ابو اللحظه
من اللساني الفالت..

تعوذت من الشيطان وكمت للكنتور
لبست تراك وكعدت ع جربايه شعري
مفتوح خليت اصابيعي بداخله ودنگت
راسي صافنه بالكاع..

اني ماقصدي اعامله بهيج طريقه
ومثل الي اكله يله اخذ التريده
وخلصني !! اني جان قصدي ينتبه
لايصير حمل ..

ردت اطلع ورا بس ترددت
ظليت هوايه بالغرفه تالي كمت سبحت
ورجعت مشطت وهو الظاهر برا لان ماموجود
داخل البيت..

باوعت للساعه ب١ وليل الشتاء ياخذ الروح
ابد ماحبه احسه موحش
ومنا حسيت جرحته بكلامي ..

غمضت عيني وتخايلت شلون جان مشتاقلي
وشلون جان متلهف حته مايعرف يعبر
عن شعوره وكلساع يهمس يم اذني
اذا حسيتي بالم كليلي..

كمت من فراشي وطلعت ادور علي ماكو
فتحت باب الاستقبال لكيته مدد ع التخم
ومخلي ايده جوه راسه حجيت بصوت
خافت بشااار نايم؟!

بشار.. لااا شتردين
قبس.. بيك شي؟!
بشار.. لامابيه شي وحرك نفسه نزل رجلي بالكاع
وسوالي مكان بصفه طبطب علي وكال تعالي!!

كعدت بصفه افرك بايدي خله ايده
ع فخذي وتنهد جر نفس ممزوج
بحسره لفحتني ريحه الجكاير
ومبين مدخن هوايه!!

بشار.. اسمعيني قبس!! وهذا اخر كلام
راح اكوله بخصوص هذا الموضوع
اني من اختاريتج ردتج زوجه الي وام ابني
مافكرت بيوم اذيج ولايوم استنكفت من عندج..

تدرين بيه اطلع جنت وبالشركه الكل
يعرفج انتي مرتي مااقبل ولا اسمحلج
تفكرين او تحجين هذا الكلام

سرور غلطه وصارت وورقة طلاگهه
وصلتلهه بس ماتقبل تحضر بالمحكمه !!

اني مااجبرج انتي صاحبة القرار
وعدتج انفذ اي شي اطلبي
وحته ع حساب راحتي ..

اخر قرار اريد اسمعه منج
وارجع اكرر اعتذاري  والج الوقت
سنه اثنين لحدماتسامحيني
بس المهم نبقه سوه!!

قبس.. انت تبقى عزيز عليه
وتبقى حبي الوحيد وابو ابني
بس مااكدر اكمل وياك جنت احجي
واني مدنگه..

مااكدر يابشار هاي حالتي شوفهه
حته ماكدرت تكمل وياي لان غثيتك
بكلامي وماكدرت تتقربلي لان ماراح
انسه الصار ولااكدر امثل..

احسن الك والي كل واحد بطريق
وسرور مالي علاقه بيهه طلگتهه
او بقيتهه انت كلت هاي غلطتك وانت
عالجهه..

بشار.. ظل ساكت يفرك باديه بقوه
وكال ماشي اني اكدر اجبرج ومااطلكج
وحته اطلبج لبيت الطاعه بس مااريد
اذيج لان الاذيه الشفتيهه كاافي..

باجر اجيب السيد يطلك بس محكمه
مااطلك؟!

قبس.. شنووو؟!
بشار.. السمعتي تبقين بأسمي ومرتي بالقانون
بس نطلك سيد حته تطمئنين ماراح اكدر
اتقربلج وتحرمين عليه بس محكمه شيليهه
من راسج

انتي للموت باسمي مااطلك لومهما حاولتي
راح انفذلج الوعد ونطلك سيد غيرهه ماكو..

اطلع من حياتج والتريدي وكل متطلباتج
توصلج دنك راسه وحجه ومن تردين اطلعين
اخذي الاذن من ابوي !!

قبس.. انت ليش اناني ؟! مستبد
تريد تتملكني بالقوه..

بشار.. اي اناني بيج اني احبج وحبي
حقيقي لا اكدر انسى ولا اكدر ادير ظهري
واتجاوزه تبقين بأسمي ومالج حق تفتحين
حلكج بكلمه

ليش تردين نطلك حته محكمه شناويه؟!
انتي هنا تبقين وفرك وجهه ماكدر يكمل
او بالاحرى الكلام الي راد يكوله وكف
مثل الغصه ابلعومه..

كمت من يمه عصبيه هذا شيريد
اني مستحيل اروح اتزوج غيره
ومستحيل افكر بيوم اخون حبه حته بنظره
بس بتصرفه هذا ثبت شكد اناني..

تعبت من التفكير احتاجيت سناء
بسرعه خابرتهه رغم الوقت متاخر بس ادري
بيهه ماتنام..

جاوبتني وكعدت احجيلهه احس روحي
ضايعه مدمره اريد واحد ينتشلني
من الضياع البي..

حجت كلام حلو سناء وكالت هذا دليل
ع حبه الج وتمسكه بيج انتي عندج ولد
ومن تظلين باسمه بالمحكمه ضمان الج واله

هو من حجه هيج اكيد حاسب احساب
للبعيد عوفي العناد وفكري بمستقبلج انتي
وابنج راح تطلگين وتعيشين لابنج بس
اسم يبقه مرتبط باسمه..

سديته منهه وحضنت اموري ونمت
كعدت الصبح سويتله ريوك وماتريكت
صبيتله ورجعت للغرفه..

هو مبدل ملابسه حضرتهن بالصاله من البارحه
وطالع حته ماسمعت الباب من انسد....

حاولت ارجع انام ماكدرت
ل١١ واجه شفت ويا عمو عادل
من فات اشرلي البسي وتعالي
خلي نفرحج!!

ماحاجيته رحت لبست وطلعت جايب
شهود وكفت بصفه بالاستقبال وحجه السيد
ماكدرت اباوعله ابد كاله ارمي يمين
الطلاق ..

جنت گوه مصبره وواكفه كلساع احس
راح اوكع كمت اشوف المكان يدور بيه

لهنااا وانكسرت السكه الجمعتنه
وماادري شراح يصير بعدهه يكدر
يكمل طريقه لو راح يوكف مثل
مااني راح اوكف بنفس المكان...

مرات اذمه واحجي علي عجيب
القساوه الشايلهه بگلبه بنفس اليوم
بعد ماشفته ماتوقعت راح يجيب السيد
بهيج وقت

جنت ناويه احضنه لاخر مره واشمه
واروي رئتي بعطره بس للاسف
ظلت امنيه عالقه قيد التحقيق..

طلعوا من البيت وظليت وحدي
ماانكر دموعي نزلت بس مااكدر
اكمل وياه ابد مااكدر كلما اشوفه
اتذكر الصار ومن يتقربلي اضعف

حسيت نفسي ضعيفه ومااخذت حقي
احس روحي تعاتبني ع ايام العذاب
الشفتهه شلون راحت هباء ..

للعصر اجت عمه بشرى والظاهر تدري
اعتذرت ماكدرت تجي لعيد ميلاد اموري
وجابتله هديه مافتحت موضوع بشار ابد
ولا اني اكدر احجي بي ..

بهذا اليوم احس روحي مذبوحه
وروحي متقطعه الى اشلاه
اشتاقيتله واريده كل يوم هيج
وقت واكفه اسوي عشه ويجي
صوته وضحكته هو واموري..

كلساع اداري دموعي عن لا ابجي
واكول اني اختاريت هذا الطريق اني اتحمل
عواقبه وهي الاشتياق والحنين..

تعشينه اني وياهه وكعدنه نسولف
فتحت موضوع شجن وكالت الوضع يم
بيت عمج موتمام غيث لاجاي يمل ولايكعد
كام يوميه يدز مجموعه ع عادل..

بعدنه انسولف سمعنه الباب اندك
كامت عمه فتحته واني رحت للغرفه البس
حجاب طبت وصاحت تعالي قبس
بس شجن جابهه عمر وراح..

طلعت سلمت عليه واخذت اموري
تلاعب بي وكلساع تباوعلي
بنظره ندم..

بشرى.. شصار بسالفتج عمى اقتنع وابوج
يكول بشار رافض..

شجن.. البارحه بابا اجه سألني كال مااريد
اوكف بطريقج غيث خطبج وامجد هم رجع
خطبج وانتي صاحبه الاختيار

كتله بابا امجد مابي قصور بس قبل رفضته
وهسه هم وسكتت وهو افتهم اني موافقه
ع غيث بس بشار ماقبل..

قبس.. وفاطمه؟!
شجن.. طلكهه بعد هوسه وسالفه شكبرهه
واخذت كلشي الغايب والحاضر وحته منطي
فلوس لبسمه حته تسكت

قبس.. هو كالج؟!
شجن.. اني مااحجي وياه واصلا من يوم خطوبته
مابينه حديث بس ساره مرت وائل تجي
وتحجيلنه

قبس.. وانتي اكيد موافقه ع غيث؟!
زين شلون واهلهه نسيتي وائل وامه
اخذيهه نصيحه اذا الاهل
كرهوا الجنه ماراح تنسعدين ..

قبس.. ام وائل اجت هي وخالاتي واعتذرت
هوايه وكالت اني مالي علاقه هو بيته وحده
وخلي يحسبني ماموجوده..

ووائل مريض حيل حته مايطلع قليل
وبنته. عمرهه ١٥ اجت ساره تبجي
دكول اجو عليهه ناس ويريد ينطيهه
لأبن صديقه يكلهه احسن من ماتكبر
مدري شيحس؟!

قبس.. الله يسعدكم
شجن.. انقهرنه ع طلاكم ليش ماانطيتي فرصه
قبس.. واني محد انطاني فرصه ادافع عن نفسي
انتهت السالفه لاتحجين بيهه

شجن.. الله يهديكم
بشرى.. قبل يومين رحت لبسمه كلت اختي
الجبيره وحرام عليه لازم اوصلهه اشوفهه
صلة رحم

ولجن غير طار عقلي فرح ذاك الجمال والجسم
هذا امجد شمسوي بيهه صايره جنهه قلم
ابو المساحه ووجهه شخوط شخوط

دكول بسمه مااكدر احميهه منه من كد الكتل
كامت باليوم اليجي امجد تحبس نفسهه يوم
كامل تخاف تروح حته للتواليت

وفوك كل هذا اي واحد يتقدملهه مايوافق
يكلهه طول عمرج راح تبقين كاعده هنااا
وهسه اطلكت فاطمه وكملت السالفه

بسمه رادت تزوجهن وتخلص كعدن
ع كلبهه اثنينهن امجد متخبل يكلهه
بسببج دمرتيني ودمرتي بشار وغيث..

وهي جبيره موصغيره فرح ويمكنهه
راح تظل بدون زواج

قبس.. هاي ضريبه افعالهه رب العالمين اسمه
الحق وهذا هو الحق مهما يعلى صوت الباطل
لازم يخفت ويرتفع صوت الحق..

فرح اذتني حيل واذت شجن وعمه بسمه
جانت شريكه بسوالفهن وتدري غيث يريد
شجن وراحت مشت بدرب الحرام حته تلزك
فاطمه هسه شحصلت ؟!

بشرى.. الله بالمرصاد بقت اسراء ال......
كون نسمع خبرهه..

قبس.. ليش وميامين اصلا هي اساس البله
وتلكيهه هسه تنعم بالنعيم

بشرى.. ولج ماكالج بشار موطلعت عليهه ملفات
فساد وحته تصوير موزين ويه واحد بالبرلمان
وانشر ع المواقع وفضيحه شكبرهه

قبس.. كولي والله؟! شوكت هاي
بشرى.. والله سولفلي من رحنه لتركيا بالطريق
كال ردت اقدم بلاغ ع ميامين وماعندي ادله عليهه
بس الله راد ينصر قبس وشكو واحد اذاهه
اخذ نصيبه...

عدهه علاقه بواحد من الطاگين بالبرلمان
وملفات تزوير وتهم ع مدراء باطله
وتعين يالفلوس ومن انشر الفيديو هي وياه
اكو اطراف ضدهم ومثل مانكول نارهم
اكلت حطبهم

كام واحد يشمر التهمه ع الثاني لحد ماوكعوا
وتاليتهه ميامين انطردت من الوضيفه
وصورهه فضيحه بعد مالهه عين تطلع
ومخليه ومسافره للخارج ورا خالتهه

قبس.. الله يبهذلهه هالفاسقه هاي
لاتحبه لاتريده بس بسبيل تصير بمكانه
وحاربته بيه عرفت شلون توكعه..

بشرى.. احسله خلي يروح بالبصره
ويبني نفسه من جديد مثل مابده اول
مشوار وعندي امل راح يرجع اقوى من قبل..

شجن.. البارحه اجه اخو سرور ع بابا
بشار مويريد يطلك وهي ماتقبل واجه
اخوهه يشكي يكول ليش ذل اختي
اذا ميريدهه شكو خطبهه

وماما ماتحملت كالت اله اطلع ارزله
وطلعت كالتله اختك بالخطوبه راحتلهه
عمته وفهمناهه السالفه وبقت مصره

وبشار راد يفسخ الخطبه وانت بنفسك
جبت ولد عمك واجيت تتوسل
ميصير ومااطالب بحقوق موهاي كلمتك
شنو هسه التغير ؟!

وظل اخوهه يحجي بوضعهه هي ميصير
عدهه اطفال واكو عدهه اعداء يشمتون بيهه
ماتريد حقوق ولا تطلب منه شي بس خلي يبقيهه
ع ذمته ..

وماما خابرت بشار وكالهه لا اطلك
بس سرور فد وحده ملعبه خابرت ع ماما
كالتلهه بس افوت للقاضي ويريد حجة طلاق
اكلهم ماتقربلي وافشله كدام الكل ..

وماما تهسرت شكد رزلتهه وجاوبت ماما
خلي يبقيني ع ذمته لو يتقرب ويطلك
كدامه حليين..

وماما مكدرت تحجي لبشار بس بابا
راح وحجاله ورايحلهه لبيت اهلهه
متعارك وحته متضاربين هو واخوهه

وكايلهم مدام هيج الحجي وانت بنفسك
اجيت تتوسل بالخطوبه لاطلكهه وجبت وياك
جماعه اله اخليهه معلگه وخليهه يمك

وهسه سرور يم اهلهه ومانعرف
المصير شنو؟! القاضي ميطلكهه
اذا هي مموافقه وشي ثاني بس يطلك
لازم يتقربلهه ومبينه عليهه صدك تفضحه
وزحمه بحقه...

قبس.. لايطلكهه كلوله بس لايتقربلهه
عادي خلي تعيش يمكم مثل ماتريد
بس لايتقربلهه عمه بشرى كليله الله عليج

بشرى.. وشعليج انتي هو رجال ولازم يحتاج
المره انتي حرمتي علي يروح يدور حرام لو يصبر بعد
فوك السنه ونص

ترى اكو نسوان ضاله ويطلعن بشكم فلس
بس تدرين بي مايمشي بدرب الحرام
ولو يبقى طول عمره بدون مره..

قبس.. قصدج يتمم زواجه بيهه
بشرى.. صح احنه مانحبهه بس من نجي للواقع
هذا حق هي ماتخلف وهو رجال ماعنده مره
يظل كابت بداخله عليمن يعاشرهه وخلص...

قبس... كلام عمه تيزاب وينزل عليه
مجرد ماتخيلته وياهه تخبلت مدري
شصار بيه اكيد راح يتمم زواجه مواليوم
باجر ...

هاي الليله ابد مانمت اول شي هو مموجود بالبيت
وشي الثاني سالفة سرور كعطت نياط كلبي
كلساع اباوع ع التليفون اكول اخابره
والعن الشيطان..

ثاني يوم الصبح اجت خاله ام بشار
وكالت اجمعي غراض بشار راح يروح
للبصره..

ياربي شكد صعبه هاي الايام
رحت للغرفه طلعت الجنطه ارتب بيهم
ودموعي تمطر ع خدي

كل قطعه ارفعهه اشمهه حيل واتنمى
ارتبهم بكلبي يعني هاهي حته ريحته
بعد ماشمهه..

فتحت علبه جبيره ورتبت ساعاته
كلهم وعطوره اريد اخلي شي
يمي احتاجه اريد يوميه اغفه وانت
ريحتك تضرب براسي..

خليت قميص وتشيرت وساعه
ماانطيتهن وضميتهن ويه ملابسي
كملت وطلعت انطيتهم لخاله

انتبهت ع عيوني شكد باجيه
بس كالت الله يصبركم لا انتي
ولاهو راح تنسون..

اخذتهن وطلعت ابو حسين واكفلهه
واخذت امير وياهه كالت يريد يشوفه
يعني اني شنوو؟! مايريدني

شكد بجيت بهذا اليوم لاشفته
ولاسلمت علي لليل جابولي امير
وهو الفجر يروح للبصره..

داز علاكه كل شي احبه من نساتل
وجبس وعصير وبالعلاكه لفة فلوس
مصرف..

عمه باتت يمي وشجن راحت
ومن هذا اليوم بديت اعيش
ايامي متشابهه اكعد الصبح انظف
واتريك ومرات مااسوي غده
لان وحدي مااشتهي ..

مر اسبوع ع انفصالنه يوم تجي عمه
ويوم خاله ويوم عمو يباتون يمي
وبالنهار يرحون..

بيوم منهن خاله موجوده فرشتلهه يمي بالغرفه
مع العلم عمو جاب جربايه بالغرفه الثانيه
بس متقبل تنام بيهه دكول بالكاع خليني..

دك التليفون جنت ابدل لاموري بعده
بس بالشورت باوعت لتليفون مكتوب
بشاار ..

احس كلبي رفرف مثل جنح الحمامه
فتحت الخط وطلعت برا الغرفه
اجاني صوته هادىء حيل نسخه من
صوته قبل الزواج من جان يجنبني..

قبس.. هلووو بشار شلونك
بشار.. الحمدلله انتي شلونج امير شلونه؟!
قبس.. زينين
بشار.. منو بات يمج؟!
قبس... خاله..

بشار.. سكت
قبس.. واني هم ساكته وانفاسه احسهه
وصلتني سالته شلونه دوامك؟!

بشار.. زين وفرولنه سكن واني عندي
شقه ل٢ يخلص دوامي والعصر اروح
للميناء ارجع ورا الاذان ..

قبس.. واكلك شلون؟!
بشار.. جاهز اكل انتو هومااحتاجيتو شي
يمج ابو حسين بس خابري ..

قبس.. لا عمو عادل اتسوكلي البارحه
وامير صاير وكيح يريد يطلع برا وخطيه
عمو يوميه يجي ياخذه شويه..

بشار.. ديربالج علي ترى صار حرك ويمشي
لا يتعور
قبس.. ان شاء الله ردت اساله شوكت تجي
بس ظليت ملصومه

بشار.. يله اني اروح تصبحين ع خير
قبس.. وانت من اهل الخير..

سديته واني اباوع ع الشاشه معقوله
هيج دار بيج الزمن ياروحي؟!
بعد ماجنتي مرته وروحه ويشبعج غزل
لو بعز مشاكله تاليتج شكم كلمه مثل الغريب

اتاذى هوايه جان رجال مرتاح
من دخلت بحياته عذبته بالحب
ولو متزوج زواج عادي جان هسه
مرتاح..

مرات اوصف نفسي مثل الحصى
من نشمرهه ببركة ماء راكد وصافي
وبس تلامس الماء تعكر صفو وتخلي
خابط..

هاي اني هيج حياة بشار جانت صافيه
مثل الزلال ومن دخلت بحياته
عكرت هذا الزلال وخليت الخسارات
متتاليه علي....

كامت تمر الايام والحال مثل ماهو
كل يومين يتصل دقيقتين يسال عن
اموري ويسده

ع اساس ينزل كل جمعه وسبت ومااجه
ومن خابرته خالهه كالهه عليمن اجي
وتعب الطريق شعندي عائله واشتاقلهه؟!
....

شجن... اخر مشيه جانت شيخ من غير عشيره
وبيومهه اجه حته بدون موعد واسمعه بالاستقبال
حجه كل بالقران وبابا مايكدر حته يجاوبه

من طلع بسرعه خابر ع بشار
جنت اسمع بالقسمه والنصيب ومااصدكهه
بس هسه شفتهه بشار سكت وكال لبابا..

اني تعبت من نفسي ومنكم!!
انت ابوهن وموجود لاتسألني بعد
غير هالكلام ماحجه ..

ماما كالت اعذروا موسهله علي
الخساره وجاي يتلوع لايشوف مرته
ولاابنه صعبه علي بعد ماجان يشوفهه
يوميه هسه محرمه علي..

سألتني ماما موافقه ع غيث
هزيت راسي وسكتت ماحجت
شي بس كالتلي الله يسعدج يابنتي..

رجعوا الخبر لغيث ومن كدما جان مستعجل
وخايف لايغيرون رأيهم ثاني يوم
دز خالاتي واتفقوا ع المهر جانت ماما شتحجي
يكلولهه حاضر ..

بس جانت فرحتي ناقصه واني اشوف
اخواتي هدى الدموع بعيونهه حمزه ملت
من عنده ويوميه ويه وحده وصار يخابر كدامهه
ويكلهه مايعجبج روحي لاهلج

وفاديه منتظره يجي يطلكهه
ومنتظره بشار يجي حته تروح تتنازل
عن حقوقهه مقابيل حريتهه

لذلك شكد جنت اتمنى غيث بس كلشي
يجي بعد خسارته طعمه مو مثل قبل

اليوم خطوبتي وبدون حفله بس اهلي
وكالعاده قبس رفضت تجي وبشار
جان موجود هستوه جاي من البصره

بس عمه بشرى موجوده وساره وام وائل
ماشفت فرحه بعينهه وكلشي صار
غصب عنهه ..

واكف يمي يلبسني بالحلقه وايدي
ترجف شعور غريب احس نفسي
مقسومه نصين نص فرحان وطاير
والنص الثاني يتذكر يوم زواجه وخطوبته لفاديه..

حاولت اطرد الافكار من راسي
وصبيت كل فكري وياه
شويه وصاحت عمه خلي انعوفهم وحدهم..

بس طلعوا وانسد الباب حضني حييييل
وهنااا مثل الي صحاني وخله مشاعري
صحت من سباتهه ..

حضنته وشددت اكثر جان يهمس
الحمدلله الحمدلله صرتي الي!!

بوسني من راسي ومن خدودي
ولزم ايدي وكعدنه ع التخم..

راد يحجي وكال اني اعتذر
وخليت ايدي ع شفايفه كتله
الفات مات علينه بالجديد

اني وياك هسه بادين من الاول
الراح انتهى لاتفكر بي ولاتذكره
كدامي..

ظلينه انسولف وهو يحجيلي
شلون تعب وشلون يوميه يروح
للناس ويكول اخر مره كالي الشيخ
اذا ماانطوك اني اطردك لان تعبتنه..

حمدت الله الف مره وشكرته
كلشي صار مثل لمحة البصر
مرات الي انريده ونتمسك بي
ونعاند مايصير
والي انتركه ورا الله يصير وبراحه

واني من اول يوم بده غيث يدز ناس
اني حته تفكير ماافكر كلما يجي
براسي اكول اعوفه ورا الله هو اعلم بالصالح

والحمدلله انجمعنه بعد معاناة طويله
بيومهه حددنه موعد للعرس كال شهر كافي
عليج حاولي ترتبين امورج ماتتحمل تأجيل..

كمت اطلع ويه ماما اجهز ومرات رجلي تتعب
تطلع هدى بمكاني اتمنيت قبس تطلع ويانه
بس غير المبروك ماسمعت منهه وماقبلت تطلع...

سمعنه هوايه كلام من بسمه واني خربت
حياة بتهه وطلكتهه من رجلهه واني
واني...
...

قبس.. كام كل اسبوعين ينزل يومين
يجي من الباب يشوف امير ومرات ياخذه
وياه ولليل يرجعه

بشار مايخلي عينه بعينه ابد
دائما اكول رجع نسخه من جان
ابن عمي وقبل لايعترفلي وفعلا
صرت اتمنى النظره من عنده..

ممقصر ويايه بأي شي لا اني
ولا امير بس ينقصنه حنانه
وحبه التعودنه علي

هي هاي الحياة ماتكمل بكلشي
لازم انضحي حته انعيش براس
بارد

يجوز تذموني والسويته غلط ولازم
انطي فرصه بس ماكدرت الصار لسه
يحفر بجروحي ماكدرت انسه
ليليه اتذكر وضعي وشلون افتريت بالشوارع
ع مكان يأويني...

صارت ايامي بدونه كلهه ليل
المصبرني امير اباوع لضحكته
واكول ميخالف الله عوضج بي...

عزموني ع خطوبه شجن ومارحت
تجي خاله لو عمو هالايام يباتون
يمي بشرى يمهه حوراء عدهه ولاده ومتكدر تجي..

بشار مر علينه يوم السبت العصر
جانت خاله يمي هي وشجن انطانه مصرف
ومتسوك النه مسواك كامل واخذ اموري شويه
ورجعه جنت جوه اسوي عصير

من رجع مالحكت علي ركضت اريد البس
حجاب واطلعله بس هو منطي امير لخاله ورايح
بوقتهه خنكتني لعبره لهدرجه مايريد يشوفني..

كمت اتذكر كلامه قبل لاننخطب جنت اساله
ليش ماتتواجد هوايه وليش من تجي
حته متباوعلي ...

جان يكول اني اجاهد ويه نفسي
حته لااضعف كدامج ويه الكل شديد
بس وياج اوصل لاقصى مرحلة الضعف
صورتج متربعه ببراسي..

اتعوذت من الشيطان وارجع اذكر نفسي هذا اختياري
ولازم اقبل بأي ردة فعل من عنده

بس موبيدي مشتاقتله واريد اساله
شلون عايش وحده بالبصره ولا صديق
ولا انيس ...

اني وحيده وانت وحيد
شلون كدرنه نبتعد كل هالبعد
وشلون جاي نقاوم احس بس اجسادنه
تقاوم التقارب بس ارواحنه متعانقه
ومتشابكه ومابيهه مجال ينفتح التشابك..

صار شهرين ع انفصالنه وعبالك سنتين
مفارگته ماتوقعت هيج راح انحرم حته من
شمة عطره

يوميه اطلع قميصه وادفن راسي بي
اشمه بكل قوتي لحدما ينكطع نفسي
واخلي ع وجهي وانام .

يوميه لازم اسوي هاي الطقوس
ابوس ساعته وتشيرته
احضن قميصه واشمه
افرشه ع مخدتي وانام علي احسه
موجود وياي..

بيوم منهن جنت انظف وامير يلعب يمي
وسمعت الباب مال المطبخ
يندك بالسويج اعرف هاي دكته..

رحت غسلت ولبست شالي
وامير ركض كدامي بس فتحت الباب
حضنه وشاله يبوس بي..

هو بالدوام اليوم ثلاثاء المفروض
دوام بس شوكت اجه وليش ماادري؟!

سلمت علي شلونك ابو امير
رد عليه وهو يبوس باموري
اشرتله بيدي تفضل ..

بشار.. لا ماكاعد بس بدلي بسرعه اريد اخذج للمحكمه
قبس.. هو كال هيج كلبي نغزني يعني حته
محكمه راح يطلگني ناوي يمحيني!!

قبس.. حجيت واني ابلع بريگي ليش
شكو بالمحكمه؟!!

.
.
يتببببببع ... انتظروني اكمل البارت وانزله احبكم ...