رواية قمع المشاعر الفصل السابع وسبعون 77 - بقلم Rozaya1122

قمع المشاعر....  الثالث والثلاثون من الجزء الثاني...
للكاتبة زهراء ( روزايه)...

حبايبي متابعين قصة الارهابي وذات النقاب
حساب الاء بي خلل وراح تنقلهه الكم زينب العبودي
ادخلو على حسابهه وتلكوهه ناشرتهه alabode_05
....

قبس.. احبه وروحي بي واعرف شكد راح اعاني
بفراگه مجرد مايفتح الباب ويفوت اريد اكوم
احضنه بس مااكدر

اعرف اني هم غلطت بهزيمتي وضميت
عنه خبر حملي بس هو اذاني حيل
رغم الشك والضرب الحصلته لو وراهه
مطيب خاطري بشكم كلمه انسه وارجع
مثل اول..

بس زواجه هدمني حطمني للاخير
خلاني انقسمت نصين عقلي رافض نهائي
وگلبي يركض ورا واني دائما قراري
بيد عقلي ..

حجيت هيج وطبيت للغرفه ماانكر
بجيت واريد اشبع منه احس
بعد موالي وراح يصير كلشي حرام
بيناتنه..

بشار اتوسل هوايه واني رفضت
وادري بي ماراح يتوسل مره ثانيه
وراح فعلا ينفذ وعده حته لو راح
يتأذى بس ماراح ينزل نفسه اكثر..

ظليت بالغرفه افتر اسمع ضحك
اموري مبين يلاعب بي ..
بنفس الوقت مقهوره ع ابني شنو ذنبه
راح يتربى بعيد عن ابو ..

باوعت لنفسي بالمرايه خاف مبينه
باجيه وسويت ممه لامير وطلعت
لكيته نفس وضعيته مدد وراسه
ع التكيه مال التخم واموري بالكاع يلعب..

شلت امير خليته بحضني وكعدت ع القنفه
الكدامه وانطيته الممه هو يلزمهه بيده
ويظل يرفع برجله لحلگي عود بوسيهه
واظل ابوس بي..

كلساع ارفع عيني الكاه مركز بالتلفزيون
ابد ماباوعلي ..
شويه وحجيت كتله بشار موصار عيد ميلاد امير
وجنه ملتهين بالبيت ..

بشار.. اااي ماناسي سوي عيد ميلاد وحفله
طلاق بنفس الوقت،!!

قبس.. ليش تحجي هيج تدري بيه شكد
احبك بس انت مره كتلي تذكر بيوم
الي اعترفتلي كتلي الحب موكلشي
الثقه اهم!!

واني ماشفت ثقه بيناتنه مااحملك المسوؤليه وحدك
بس خلينه نحجي ونطلع المضموم بالگلب
اني وياك متعادلين ..

انت ضحيت هوايه واني اتحملت اسوء
الكلام منك وتحملت الاتهامات الباطله
وعندي امل بيوم تنكشف الحقيقه
ونرجع سوه..

بس انت شسويت رحت جبت وحده
عليه بيوم كالت عليه مخبله وياريت
صارحتني وابين نفسي قويه
خليت اليسوه والمايسوه يضحك عليه..

بشار.. وهاي راح انظل طول العمر نعيد نفس
الموضوع منو كالج اني جاي من اوربا
واشوف اشكال التهم ولادليل يبرئج وهم ظليت صامد

واذا اثق بيج لازم امشي مغمض
روحي سولفيلهه حته للماعنده غيره
ع عرضه هم راح يكلج اسوي الاتعس.

كتلج ماناكر زواجي غلط وغلطه جبيره
وراح ادفع ثمنهه طول عمري وغلطت
ماشي واني الغلط راكبني وماعندي
تبرير مقنع..

وانتي شنو؟! انتي الطلعتي من بيتي
وبدون علمي وحامل بابني ومتاكد
حامل وخلتيني مثل المخبل افتر وراج
مدري ادور عليج مدري ادافعلج منو يكولون
مرتك انهزمت!!

وهم عديتهه ومن شفتج من لوعة كلبي
وحبي الج ماكدرت حته احاسبج واخذتج
بحضني وسالتج وجذبتي عليه انتي حامل
وجنتي اطلبين الطلاق ماتدرين هالشي حرام!!

وهم ميخالف ردت اكعدج وحدج واضمن حقوقج
بالكامل ولو اطلبين روحي انطيهه الج
بدون ماتردد ع صبرج ورغم بعدني جنت مامكتشف
الحقيقه..

انتي شسويتي هم انهزمتي وابني
ابطنج وعشتي يم ناس غريبه
وجبتي وراح ابني عند وحده ماتخاف
الله لو ماخذته وبايعته شكلتي لنفسج؟!

وهم ظليت ادورلج اعذار وادافه عنج
وتنازلت حته عن عاداتي واسلوبي
الزفت وشكي بس علمود اشوفج
واجمعج بابنج

وجنت ناوي حته اذا اطلبين تحرميني
منه سنه ابدال هاي السنه ماراح اكول
لاااا بس نرجع سوه..

اذا اريد احاسبج احساب حسب
التقاليد جان هسه موبس مطلكج
ومعذبج لااا مخلي طلقه براسج
لان التنهزم هنا يكولون عدهه شي

وانتي انهزمتي بوقت ماجانت التهم
تمطر ع راسي وشكد تحملت كلام
يسم من ناس جنت مااشتريهم بفلس

المهم ياقبس انتي صاحبة القرار
تردين تطلگين هاهي الي عليه
سويته وماراح اقصر وياج
وحقوقج توصلج بالكامل...

قبس.. ردت اناقشه بس سكتت
ماعندي كلام لان اندور بنفس الدائره
شفته شكد متأذي وماادري ليش اخاف
يرتفع ضغطه لو يرجع مثل قبل..

ظليت ساكته وشويه وحجيت
وهسه مانسوي عيد ميلاد لامير..

بشار.. باجر نطلك والباقي قرري
وحدج تسوين ماتسوين مادخلني !!

قبس.. خلي انسويله اول عيد ميلاد
وبعدهه نطلك ع الاقل تظل ذكرى حلوه..

بشار.. اهلي راح يسووله وعزموج
ولو انتي مافتحتي الباب الهم..

قبس.. طبعا ماافتح ولا اريد اشوفهم
اعرف راح دكول تصرفج غلط شلون رديتي ابوي
وجدو وخاله وهم يحبوني بس اني راح اجاوبك..

تذكر من انحبست اشهر بذاك البيت
اكو واحد بيهم كلف نفسه واجه
دك الباب عليه وكال شمحتاجه؟

لادكلي يحجون ويحبوج الحجي
شسوي بي وماشفت افعال
وينه عمو عادل موابوك شلون راح
خطبلك وماكالك حرام هي ماتدري

خاله شلون دزت عليه اساعدهه
وهي تدري بالسالفه وخلتني مضحكه
للكل ودكول وصيتهن ليش ماتدري
بفرح وبسمه شنوو؟!

لا يختبأون تحت كلمه بنيتي
واحنه انحبج وماقابلين ع الصار
بس حجي ومحد كاله بوجهي ماسمعت
كلمه وحده من عمو يطيب خاطري بيهه

هو ابوك ويكدر حته يمنعك
ويكدر حته يزعل عليك
ويكدر يجيني يطيب خاطري
جنت لو اموت بذاك الميت محد يدري
اله تجي من الدوام

الله عليك هم يوم منعتهم من الجيه
الي حته انطي تبرير الهم؟!
بشار.. لااا مامانع احد بالعكس ياريت
جانو قريبين منج جان ماتشبعتي
بالحقد هلكد..

قبس.. خلاص لاطالبني لا باحترام
ولا باكرام الضيف اني لا اريدهم
ولا عندي اهل ...

بشار.. بس هم يردوج ويوميه يخابروني
يريدون يجون واشوفج مامستعده واكلهم
موهسه..

وهسه عيد ميلاد امير اذا سويتي هنا
يجون واذا هم سوو ترحين!!

قبس.. والله لو اعرف احرم نفسي
من الاحتفال باول عيد ميلاد اله مااروح
وذاك البيت ع جثتي ماادخله
حته اذا متت مااريد فاتحتي تصير بي ..

البيت التهمني وضحكن عليه اخواتك
لو يكلولي باب من الجنه ما افوته

لاتذكرني بشاااار لاتذكرني
شماته هدى واستحقارهه
لاتذكرني شلون اذني بنظراتهن وخلني
اروح مدنگه راسي اخاف توكع دمعتي واتفشل..

تذكر شلون جنت اكعد يمك بنص الزلم
وهنه وحدهن ماوحده كالت خطيه
مرت اخونه ومن كعدت يمهن بسمع اذني
سمعت هدى دكلهن اسكتن اجت!!

اني الي اكلت كتل من عندك وضميت
سر اختهن ولسه لو يرجع نفس الموقف
مااحجي واحافظ ع سمعتهن بس اني
شنو القدمنخ الي غير الشماته..

كمت ارفع بصوتي انفعلت حيل
حته امير صافن بوجهي
ونفسي صار ضيق بس تذكرت
مقتطفات من المريت بي شلون اكمل
شلون اعيش،؟!

بشار.. كااافي فززتي الولد كل واحد اخذ
نصيبه سدي الموضوع وكومي نامي وجيبيلي
غطه وياج اريد انام..

قبس.. باجر خلي انسوي عيد الميلاد
وراهه نطلگ بس المهم اول عيد اله
احنه يمه..

بشار.. ظل صافن بعيوني جنت واكفه
وشايله امير غمض عينه وحجه بقلة صبر
شلون راس يابس الله بلاني بي..

قبس.. تصبح ع خير عفته ودخلت للغرفه
غيرت ملابس امير وخليته بحضني انومه
وافكر باجر اسوي عيد ميلاده
اريد اعيش شعور العائله المتفاهمه اول
مره واخر مره ...

كلساع افز اكوم اباوعله نايم بالصاله
وايده ع عيونه مرات اكول خلينه
هيج بس المهم اسمائنه مرتبطه
ومن ارجع للصار افضل البعد احسن النه..

ثاني يوم كعدت سويتله ريوك وهو يغسل براسه
بالمغسله خليتله الجاي ع الميز واجه كعد
تريكت وياه واحنه ساكتين ..

شويه وكال الاسبوع الجاي راح اكوم
اداوم بالبصره ؟!
قبس.. فتحت عيني متفاجئه ليش؟!

بشار... اجتني ترقيه قبل مااسافر الج
واباشر مدير بام قصر ومالي حق انقل اله بعد
سنه مثل التنسيب.

قبس.. وشلون اداوم؟ يعني نفس منصبك السابق
بس بالبصره هالمره..
بشار.. اااي واداوم اسبوع ب٣ ايام اجازه خميس
وجمعه وسبت

قبس.. دنگت وكتله واحنه منو النه؟!
بشار.. ترى بالحالتين ماراح ابقى يمكم
من نطلك ميصير اجي وابات لذلك ياقبس
لازم شويه تتنازلين وتقبلين بأهلي ع الاقل
يجي ابوي لو امي يباتون يمج ...

بيتج بعيد عنهم وانتي وحدج صعبه
شلون امن عليج !!
قبس.. مااريدهم عادي اظل وحدي
اقفل الباب ومانطلع لحدما تجي..

بشار.. ولشوكت يوم لوعشره ترى راح
تعيشين طول العمر وحدج شويه شغلي عقلج
هذا المحجر من نطلك حته جيتي اشوف ابني
زحمه مااريد تطلع اي حجايه سبق وكتلج
انتي عرضي وبنت عمي قبل لاتكونين زوجتي..

قبس.. ما افوت لبيت اهلك افهمني
اكره ذاك المكان تريدين اجذب واتصنع
مااكدر ..

بشار.. ابقي ابيتج هم يجوج
قبس.. ماريد عمر ومرته ولااخواتك
بس عمي وخالتي خلي يجون وهذا الشي علمودك
لان الفتره السابقه عانيت بشغلك ونزلت من وضيفتك
حته تعوض هسه ..

بشار.. مشكوره ماتقصرين دومج تفكرين
بيه
قبس.. تقلد مووو؟!
بشار.. وين مقلد هاي فوك مااثني عليج..؟!

قبس.. شوتحجيهه باستهزاء مبين تقلد
يله هو سوي زين واشمر بالشط كل هذا
الصبر والتحمل وماعاجبك ..

بشار.. بكيفج فسري ع هواج وكام
راح يلبس سترته عيب ورا شكد مستفز
الواحد المثله هسه ينوح راح يطلك
امداك كلبي شبيك تركض ..

شلت المواعين خليتهم بالسنك
جنت اغسلهم واني معصبه
طريقة كلامه تخلي الواحد يفور
حته مايباوعلي من يحجي..

جنت دايره ظهري واشيل واضرب
بالمواعين وصوت الخواشيك
حسيت بايده التفت على خصري حيل وسحبني
علي صار ظهري لزك بصدره..

ايدي كلهه زاهي ماكدرت الزم ايده
ويتوسخن ملابسه بس حركت جسمي
بردة فعل وكتله شووو وخر ايدك شيسموهه
هاي..

بشار.. حيل ضغط ع خصري وحجه يم
اذاني اهلي يجون بليل ع عيد الميلاد
دزيلي رساله بالتحتاجيهم وصيري
عاقله بس هاي الليله..

قبس.. ترك خصري وهو يعدل بالرباط
التفتت علي احس اثر ايده لسه
من كدما لزمني قوي كتله مشكور

ضاع الحجي بحلكي حته هو ابتسم
شافني فاتحه حلكي ومتحضر عباله
اتعارك تالي ماطلعت مني غير هاي الكلمه

طلع وقفل الباب واني رحت رتبت
البيت وين اروح عجبني انام بمكانه
اموري نايم كلت استغل الفرصه
انام ع ريحته..

تغطيت ببطانيته الناعمه الله شلون
دفوا وعطر بيهه مخبوط عطره المفضل
وجكاير سلطنت ع الاخر اشم بيهه
ومبتسمه..

جنت ماناويه اغفه بس مدري شلون
اخذتني النومه ومااحس غير حركه
ع خدي دغدغت بشرتي بسرعه فزيت
واشوفه ثاني ركبه وبعده بملابسه
ويحرك اصابيعه ع خدي..

قبس.. هي فزه هي كومه ع حيلي
واني ادور عذر شراح اكله ليش نمت بفراشك
تعلثمت بالحجي كتله هاي شنو رجعت؟!

بشار.. نسيت محفظتي هنااا شبيج فزيتي
وشلون تنامين هنا وتعوفين امير وحده
لوكاعد وينزل من الجربايه ويتعور

قبس.. وين نايمه هاي هسه غمضت عيوني
متشوف فزيت بسرعه
بشار.. صايره كلش لوتيه وتراوغين بالحجي
منين متعلمه هالدرب هذاا..

قبس.. كلت خلي اكسب الموقف لصالحي حجيت
بحديه وانزعاج وانت شكو تتلمس ببشرتي
ماشايف واحد نايم لو تستغل الفرص..

بشار.. هاي اني لوانتي الاستغلالي!!
اني رجال واضح الي اريده اسوي بس انتي
شعندج نايمه بفراشي موتردين تطلگين
ودكولين مااطيق وجودك شعندج لافه نفسج
لف بالبطانيه وحاطتهه ع خشمج..

قبس.. غير بارده !! شبيك تفسر ع هواك
بشار.. كام وكف وهو يعبي قميصه وكال كومي
لامير شوفي اكو مثل سامعته
زعلان و........ مصطلح هاي انتي !!

قبس.. حجه هيج وراح للمطبخ اخذ محفظته
وطلع صدك ميستحي مايخجل
مايرتاح اله يفشلني شلون جنت غاطه بالنوم

رحت لاموري بعده نايم مايكعد لل١٠
كعدت يمه وصافنه شلبس اليوم
وشلون ارتب لعيد ميلاده ..

رحت للاستقبال اباوع شلون ارتبه
اخلي الميز هناا ومحتاجه قماش افرشه
ع الميز اكيد مااكدر اطلع
اخذتلي شويه ورحت دزيتله رساله
قائمه شطوالتهه من كيك من عصير
من كرزات واخر شي ختمتهه وياك حفاظات
لاموري..

كعد اموري بدلته والتهينه ساعه نلعب
واني سويت غده صارت ب٢ اجه
كلشي ماجايب وياه اني هم سكتت
بس كلساع واريظ اساله وينهن..

بدل وصلى وكعدنه تغدينه
ماتحملت كتله شو كلشي ماجبت
من القائمه الدزيتهه الك

بشار.. دزيتهه لابو حسين هو يجيبهن
اني مالحكت راح اخذ امير للحلاق ارتب شعره

قبس.. لااا عوفه هيج حلو شوفه شلون لايگله
بشار.. موهوايه بس يرتبه حته يصير احلى
قبس.. سكتت وبالي ماعندي ملابس شلبس
كلهن قديمات..

عزمت عمه بشرى الصبح وكالت ليش
ماادري اروح اشتريله هديه وكالت اجي
ويه بيت عادل..

رحت للكنتور فتحته صافنه كلشي ماعندي
بس ملابس اموري حضرتهن واني ظليت
اختار هذا وارجع اشمره..

جنت كاعده وصافنه انفتح الباب
باوعتله جان سابح تقرب ع الميز
مشط شعره ويباوعلي من المرايه

بشار.. شبيج صافنه؟!
قبس.. مابيه شي..
بشار.. اطلعين وياي نشتري ملابس
لاموري
قبس.. هزيت راسي موافقه

كمت بدلت وطلعنه اول مااخذني للمول وكال انزلي
اشتري لنفسج بالاول وبعدين نروح لقسم
الاطفال

ابتسمت بوجهه معقوله حس بيه
وعرف ماعندي شي البسه لان ماطالعه
ومامشتريه صار هوايه ..

افترينه شويه اشتريت فستان طويل
مشجر لونه بنفسجي تقريبا شتوي
وردنه تلث ارباع وبي كصه
واموري هم اشتريتله قاط كامل ولون
التشيرت بنفسجي فاتح ..

صعدنه بالسياره وهو ساكت وامير
يسولف بحضني كال راح اوديج للبيت
وارجع اخذه للحلاق ...

وصلنه للبيت بين مااجه ابو حسين وهو
اخذ امير وطلع واني ظليت ارتب بالميز
وحضرت كلشي وعشا كال اني اجيب
وياي ركضت لنفسي بالمرايه اباوعلهه
شلون صايره..

حاجبي ماشايفه خيط من ولادتي لسه
واصلا هن مبعثرات كلشي مايفيدهن
كعدت عدلتهن مابين بيهن تغير بس
سويتهن بالقلم ..

رحت سبحت وسويت شعري عفته مفتوح
هو قصير يادوب يوصل لكتفي وسرح
كملت كلشي شلته بالقراصه وكلت ورا العشه
ابدل واتمكيج ..

رغم ادري بس عمو وخاله راح يجون
بس متوتره صار سنه ونص واكثر ماشايفتهم
ولا حته سامعه اصواتهم..

اجه بشار هو وامير معدل شعراته
اخذته سبحته وبس يصفك ويهز براسه
بشار هم محدد اللحيه ومعدل شعره

تأدبي قبس لاتباوعين انتي
موتردين تطلگين بس كلساع اسرق
نظره لو من صلى لومن مدد كمت احفظ
تفاصيله وحركاته كلهن..

تعشينه ع السريع وبدلت لامير طلعته يمه
وكتله اروح ابدل عينك علي ترى مشعوذ
خاف يتعور..

رحت للغرفه قفلتهه اريد اخذ راحتي
كعدت كدام الميز اول ماكحلت عيوني
مثل قبل اخلي الكحل ببطن العين
وهالمره خليت بالطرف كحل ابيض
كبرت عيني بعد اكثر..

خطيت حواجبي والمسكاره
وخليت حمره لونهه غامق
ماادري ليش مستغربه شكلي يمكن
لان صار هوايه مامخليه مكياج..

كمت لبست الفستان قياسه مضبوط
رغم جسمي الضعيف بس عندي مفاتن
انثويه بارزه

لبست كعب عالي ولبست
سوار وحجل سحبت الحلقه لبستهه
ردت اعيش عيد ميلاد امير بكل تفاصيله
وابقى اتذكره دائما..
...

شجن... الحال بالبيت مايطمن بعد جية قبس
وبيوم الخابر بشار وكال لماما قبس اجت ويايه
ماانسه ذاك اليوم

ماما وكفت بالطرمه وكامت تهلهل وركضت
للمحل اشترت جكليت ولزمت التليفون
خبرت الكل بابا ركض اشترى طلي بسرعه..

منتظرين جيتهه حته هدى وفاديه اجن
خالاتي موجودات سرور متدري اجت
صدفه لان تدري يجي اليوم بس متدري
بقبس ..

ومن شافت الهوسه ابتسمت وكالت شصاير
شجونه؟!
شجن.. متدرين موقبس اجت خابر بشار
وكال اجينه واخيرا التقت بابنهه..

انگلب وجهه بسرعه انصدمت صدمه
يمكن مامتوقعه او جانت مطمئنه قبس ماراح
ترجع بحيث تبلع ريكهه وصافنه بوجهي
تريد تتستوعب كلامي

شويه وحجت ليش وين لكاهه؟!
شجن.. هو يدري بمكانهه بس جانت حالتهه النفسيه
تعبانه وماكدر يكلهه ع ابنهه وطلعت يم سناء
سرور.. انتي متاكده لوتشاقين ويايه؟!

شجن.. ليش اتشاقه شبيج تفاجئتي
اولهه وتاليهه راح ترجع لابنهه
سرور.. كعدت ع الكرسي ودنكت راسهه
وجهه صار اصفر وضاجت حيل ..

كامت كعدت بالغرفه واحنه مهوسين
وكلساع نتصل بيهم مغلق لحدما خابر ع عمر
وكاله تعال ..

فرحتنه ماتنوصف والله بدون مبالغه
بس الكل جان فرحان حته جدو وبابا
عينهم ع الباب ويكولون خلوهه تحجي
وتغلط وتضرب بس خلي تبرينه الذمه..

بس صدمنه عمر من راح بسياره بشار
ورجع وحده تلكته ماما تسال وين اخوك؟!

عمر.. ماقبلت قبس ورحت وصلت عمه
بشرى وهاي اجيتكم وبشار اخذهه لفندق
ماتقبل لاتشوفنه ولاترجع لبيتهه..

ام بشار.. ليش ماخذتني وياك يجوز
اوكع عليهه واتوسللهه وترجع
عمر.. شمدريني ماراح تجي اصلا
وكفت بعيد عني وانطتني ظهرهه ماشفت حته وجهه..

شجن.. شعور مؤلم شعور الخيبه مؤلم
ماما ضمت الجكليت وبابا تشكر من الرجال
الجان واكف حته يذبح الطلي ..

هدى وفاديه مدنگات بالكاع وساكتات
ماحجن بس الهدوء عم بالبيت وكلهه
ضاكت الشعور شلون ننتظر وفرحانين
وشلون رفضت تشوفنه..

رحت بالغرفه سرور كاعده وصافنه
رغم مابدر منهه اذيه بس حسيتهه
مافرحت ويمكن حته جانت تدعي بكلبهه
كون ماترجع ...

ثاني يوم اجه بشار علينه سلم ع ماما
وسرور جانت بالدوام شكد توسلنه بي
خلي انشوفهه وكال مابيدي شي هي حته
الي رافضتني بس علمود ابنهه

مر اسبوع واحنه نتوسل ببشار يوميه
ومايقبل يكول عوفوهه ترتاح
واموري اشتاقينه اله من سافر لسه ماشفناه..

بيوم بابا كال امشوا انروحلهه حتلو
تطردنه وكلنه رحنه وكفنه بالباب
دكينه هوايه طلعت صاحت منو جاوبهه بابا
ونسمع صوت طبكه الباب الجوه

ظلينه شكد اندك ومافتحت تاكدت
قبس ماتريد تلمح خيالنه
ورجعنه بنفس الخيبه مال ذاك اليوم..

اليوم عيد ميلاد اموري وبشار حجاهه
بصريح العباره كال بس امي وابويه وجدي
بس اني لزكت بماما كتلهه حتلو تعوق
رجلي الثانيه اروح

بدلنه وطلعنه ورا العشا بعدنه بالفرع
وانشوف سيارة اخو سرور جايبهه
وجاي من شافتنه نزلت صعدت يمنه
وكالت وين رايحين..

ام بشار.. لقبس عيد ميلاد امير ولاتزعلين يمه
تدرين بيهه ماتريد تشوف احد حته احنه راح
انروح وهي ماقابله.

سرور.. خليني اروح خاله بشار مثل ماهو
زوجهه اني هم زوجي وصار ايام ماشايفته
اني مالي دخل ولامأذيتهه تتقبل الوضع
حالهه حال الالف النسوان

ام بشار.. مامجبوره تتقبل الوضع انتي اجيتي
ع رجلهه صح خطبناج بس انتي تدرين جنت اصدكج
بس هسه لاااا عبالي صدك بناتي قشمرنج بالحجي
بس طلعت بشرى جايتج وطاردتهه

لاتلفين بالحجي وانتي جبيره وفاهمه كولي
اني اريده وجنت حابه اكون ضره عليهه
وعادي اهجم بيتهه اعمره المهم تزوجين

اني هم مره مثلج وهوايه نسوان نزلن
ضره على ثانيه بس باسباب وطلعن
حته احسن من الاولى بس انتي بالخطوبه
حذرتج عمته وراد يفسخ ورحتي لعمامج وسويتهه
سالفه

سرور..دارت وجهه ع الجامه وكالت صار
بعد مايفيد اللوم

شجن.. جان بابا يسوق ماوكف وصلنه لبيت
بشار وخايفه من ردة فعله وفعل قبس ع جية
سرور بس احنه فاهيين شنسويلهه انزلهه بالشارع..

فتحلنه الباب بشار من سلم علينه وشاف سرور
تفاجىء بس سكت قبل لانطب صاح بامي ليش
جبتي سرور يعني اني الزك السالفه وانتو تفتحوهه

حجتله ماما بس عصب كالهه جان رجعتوا
لوماجيين اساسا تدرين بقبس
هذا الموضوع محطمهه وانتي بعز فرحتهه
جبتي سرور

ام بشار.. هااا تحملني اللوم شتدري من تزوجتهه
ماراح يتواجهن وتعرف سرور عديمه كرامه
شسويلهه اجت ولزكت ..

فرك وجهه بعصبيه واشر فوتوا لان بس اني
وماما رزلنه وهو فات من المطبخ..

كعدنه بالاستقبال البيت حلو حيل تصميم
حديث حته احلى من السابق وهي مرتبه الميز
والكيكه ع شكل صيصان وكله بالاصفر التزيين..

كاعده وعيني تراقب سرور كصت البيت كص
مرات اكول صدك لاكالو الانسان موبالشهاده
دكتوره عليهه العتب واحسهه تشحط بكلشي
يخص قبس..

شويه وانفتح الباب فاتت قبس شايله
اموري كلنه وكفنه من كالت السلام عليكم..

لابسه فستان بنفسجي مخصر ع جسمهه
وفاتحه شعرهه وكالبته صفح الكحل الي بعينهه
يجيب التايه رغم ضعفانه وتعبانه بس
حيل حلوه طالعه..

ماتفاجات بوجود سرور توقعتهه راح تنصدم
بس جانت طبيعيه حيل ركضت ماما حضنتهه
وتبجي انطت امير لبشار وبادلت ماما الحضن
بس مابجت عينهه مفتوحه ورمشهه شامخ
مااهتز..

سلمت على جدو وباست ايده
شفت دمعه لالت بعين جدو..

تقربت ع بابا سلمت علي وبابا حضنهه
وباسهه من راسهه وكالهه قرة عينج
بابنج يابنتي..

اما اني سلمت عليه سلام عادي جدا
حته ماباستني بس مدت ايدهه صافحتني
وسرور جانت بصفي واكفه هم سلمت عليهه
مصافحه ..

وراحت كعدت بصف بشار وامير
بحضنهه هو وامه نسخه مستنسخه
عينه عليهه كلنه وعبالك عروس وجايه
من الزفه...

سرور كلساع ترفع راسهه تباوعلهه
وترجع تنزل عينهه بس هزة رجلهه
ادل ع توترهه ...

بابا وبشار حجوا بسوالف عاديه
ماما اخذت اموري بحضنهه مشتاقيله
وكبران وصاير وكيج يضرب بماما
...

قبس.. من بدلت ظليت بالغرفه استحي
اطلع احس نفسي عبالك لابسه مشلح
سمعت صوته يصيح قبس وينج نمتي..

اخذت نفس وطلعت شبيه مستحيه
فتحت الباب مديت راسي اتختل
جان كاعد بالكاع وامير يلعب بالمكعبات

بس شافني صفن عينه تصعد وتنزل بسرعه
حاير وين يثبتهه حته ربكني من حركه
البؤبؤ مالته..

سويت نفسي احاجي ع امير
كتله خوما دمر ملابسه لان هسه
ع جية ...

بشار.. عوفي امير وتعالي شوفي گلب
ابو امير مريض يمكن صار عندي خفقان
وارتفاع بضغط الدم شو تعالي !!!

قبس.. كلشي مابيك موهاي عيونك مثل
الصگر كوم يله بدل لايجون..

كام من مكانه وسحب ايدي بسرعه للغرفه
ماراد كدام امير جان اكو كلينس ع الميز
سحب وحده ومسح حلكي بحركه سريعه
وطبع بوسه عميقه ع شفايفي..

گلبي كام يدك باذاني يمكن حته اذني
العاطله اشتغلت وكمت اسمع نبض كلبي
بيهه

اختنكت ومايقبل يوخر ادفع بي من صدره لزم اديه
اثنينهم ومستمر بنفس الحركه شح عليه الهوه
وفعلا اختنكت دفعته حيل..

كمت اتنفس سريع مااكتفى رجع سحبني
من ايدي وحضني حييييل حسيت
گلوبنه تعانقت من جديد
واضلاعنه تشابكت وانغلقت عليهم..

فززنه صوت امير يبجي بسرعه
عفته وركضت اله لكيته كاعد وحده ويبجي
لان شافني ماموجودين وظل وحده..

شلته اسكت بي وبشار ظل بالغرفه
ربع ساعه وطلع مبدل ويلبس بساعته
واندك الباب الظاهر اجو..

راح فتحه واني سويت ممه لاموري
وكعدت ع الجربايه يرضع بيهه
سمعت خطواته تقترب وعيني
ع الباب وكف يمي ويلعب بشعر اموري...

رفعت راسي وحجيت اجووو؟!
بشار... اااي اجو بس !!
قبس.. بس شنو؟!

بشار.. سرور جايه وياهم
قبس.. انتفضت من مكاني حته وكعت ممه امير
وكتله تعمدت تعزمهه انت شنو من بشر شنو
انت ؟!

لزمني من خصري وايده الثانيه ع حلكي
وامير بحضني صرنه اثنينه بحضنه
ويباوع بعيوني ويحجي

ماادري بيهه والله وهي يم اهلهه
وامي دكول تلگتنه بالشارع الصوج
باهلي اطردهم ؟!

قبس.. ساد حلكي ماكدر اجاوبه
وعيوني ذبلانه وناسي روحه
عضيته من ايده حته يبتعد

بشار.. اااخ
قبس.. وخر اريد احجي روح كلهه
قبس ماتريد تشوفج
بشار.. لاطلعين لعد امي تجيج هنااا

قبس.. كمت اتنفس سريع تعوذت من الشيطان
الى متى تظلين مهزمه اولهه وتاليتهه لازم تتواجهن
وراح تلتقن هوايه لازم ارضه بالواقع..

كتله هاك امير خلي اعدل نفسي اني
اريد اطلع وافوت بنص عينهه هاي
الوقحه لوشنو رأيك اروح اعضهه واشلع لحمهه
موكالت اني بيه حاله نفسيه وماعليه حرج
خليني اشوفهه الخبال ع اصوله..

بشار.. ضحك!! ودكولين موعنيفه
قبس.. خزرته ورحت للمرايه عدلت شعري
باصابيعي وطلعت ..

اول ماطبيت ماانكر كلبي يدك من التوتر
بس قويت حالي سلمت عليهم وكعدت
جانت كاعده كدامي وبعيني شفتهه شلون
تباوع ع بشار كل شويه وترفع راسهه ..

شفت بعينهه نظره حسره!!
وهي تباوع لامير ماادري ليش انقهرت
عليهه لان شعور صعب وهي تدري بنفسهه
ماتخلف ولاعدهه زوج انقهرت حيل..

خليت اموري بالكاع حته تشيله
بس سبقتهه خاله واخذته هي وشجن
يلاعبن بي..

كصينه الكيكه واخذنه شكم صوره
واحنه سوه رغم الوضع البي بس
جنت فرحانه...

انطوا الهدايا لاموري وراحوا
هو تعب اخذته غيرتله ملابسه
وبسرعه نام..

جنت بعدنه هستوني اريد اكوم ابدل
وهي فتحه هي قفله باب الغرفه
التفتت علي وكتله شكوووو؟!

بشار.. انتي مرتي وعليج حقوقج
واليوم لو تفوتين لسابع ارض اخذ
حقي اخذه؟!!!!

.
.
يتبببببع... احبكم