تحميل رواية «قمع المشاعر» PDF

قمع المشاعر.... البارت الواحد والثلاثون

للكاتبة زهراء ( روزايه)...

‏ردنة نحلم

گالوا أنتم عاشگين!

‏شعاشگين  ؟

‏احنا اصلاً تايهين و ضايعين

ورگد فوگ عيونة تراب السنين...

.....

ام بشار.. يمه وليدي بعدك عريس ولكم ياناس ابني راح من ايدي ابن اخوي كتله وتضرب ع وجهه والجيران كلهه ملتمه تتفرج علينه جنه كلنه كاعدين بالطرمه وصريخ عماتي والفاجعه الحلت بينه خلت الناس كلهه تجمع فوك راسنه..

ام بهاء.. كولي يالله ام بشار انتي المره المؤمنه كومي ادعيله ماكالو ميت هسه بهاء يكول بي روح وتلاحكو كومي داده شوفي بناتج شلون مفزوعات وبيتج مفتوح

ام بشار.. اني وكفت فوك راسنه مغمض عمر ولج داده ابني بعده شباب كتله المايخاف من الله ابن اخوي الربيته كتل ابني  بعدهه تصرخ وفاقده وماتعرف الكلمات التطلع من عدهه واندفع الباب حيل وانشوف صابرين ماخلت لاشعر ولا ملابس

كلنه ركضنه عليهه لان حامل اضرب من خالتي بالف مره امهه وخالتهه لازماتهه بس تريد تدفعهن وتطلع بشارع وصوتهه منبوح وهي تصيح اريد عمر...

صاحت عمه بشرى ومرت عامر وكومه كومتهن من الطرمه كالتلهن هسه يجون ومايقبلون صوتنه بشارع كومن بالبيت وشالن صابرين المنتهيه لازماتهه من اكتافهه ورجليهه تسحل بالكاع..

بيبي تنوح وعمه بسمه لازمه ادين ام بشار فاديه وشجن كاعدات بزاويه ومن كدما مصدومات بس الشهكه لازمتهن وهدى حته ملخت جهالهه تملخ من كدما جانت منهاره

ام صابرين.. هسه ماصار ساعه من خابر صابرين وكالتله اريد اروح لخالتي كالهه روحي واني اجيج المغرب واني وياهه تمشينه ع خالتهه قريبه وهناك وخابرنه ابوهه

ام بهاء.. جيرانه يصيرون بصف بيت وائل تسولف لنسوان وهي النقلت النه الحدث اسمع صوت عياط يم بيت ام وائل بس كلت يجوز وائل كتل مرته لان موجديد علينه هاي الهوسه بس شو الصوت عالي وصوت زلم ويكله اكتلهم اليوم طلع بهاء شافهم واجه صاح الحجي يكول بشار ووائل..

والسمعته من ابني يكول بينهم عداوه وعركه ووائل هو الجاي من الجيش هستوه وماخذ اسلاحه ورايح لبشار يهدد ويصيح بالباب وطالعين وصاير غلط وبشار وعمر ماعايلين حته متعاركين ويه وائل ومارافعين السلاح بوجهه هو لازم اسلاحهه ويتوعد الهم ومفشر عليهم وبشار ضارب وائل طلقه وهو ضارب ع بشار بس جايه بعمر بصدره واثنينهم اخذوهم للمستشفى..

ام صابرين.. لوشماتكون العركه البيناتهم ماتوصل للسلاح بشار رجال رزن وفاهم شلون هيج يتصرف موهالصار دم الشيطان شاطر وعشيره وائل غريبه هم ماراح تسكت اذا مات

ام بهاء.. والله داده كلشي يهون بس خلي يطلع عمر سالم واني هم كلت شعجب تصرف بشار هيج تصرف احنه صار ٤٠ سنه جيرانهم ومن اجينه لكيناهم قبلنه وماطلعت العيبه من عدهم

وعيب ع وائل رجال جبير يعض الايد النمدت اله تدرين ربته ام بشار والله تجي من الصبح شايله صينيه الاكل ع راسهه وادك الباب عليهم دكول خاف مايلحك ع ريوك وائل تالي هيج يجازوهه شوفي المره راح تموت ...

قبس.. الله لايشوفهه العبد مسلم هاي الفاجعه من الواحد يصفن الهه ويكول ليش ماتحجن والكل لامونه ع السكوت وهاي تاليتهه عمر بين الحياة والموت ومرته كلساع ينغمي  عليهه وببطنهه طفل ...

اذن اذان المغرب ويه كل كلمه من الاذان ام بشار تفرفح وتدعي اريد ابني اخذني بمكانه ولا تفجعني وتفجع مرته حته مانتجرأ نخابرهم ونشوف شلونهم طلعت الجيران من عدنه وظلينه بس احنه واجن اخوات ام بشار وكل التجي يبجن لحد مايوكعن ع صفحه

صارت الساعه ب٩ واجه جدو وابو صابرين ام بشار ركضت ع جدو واول مره اشوفه يبجي ويمسح بعيونه ياربي هاي الشيبه مالهه حوبه عندك

الحجي.. كولي يالله يابنتي عمر سبع ومايعوفنه سووله عمليه الطلقه جايه بالرئه وهو منا مدخن وكالو عمليته صعبه ومامنتبه لسه بس خلي ايمانج بالله جبير انتي والده والله يسمع من عندج

صابرين.. جدو الله عليك اخذوني اله

الحجي.. يابويه وين ناخذج المستشفى مكلوبه منا اهلنه ومنا اهل وائل حته شرطه وضباط اجت ع وائل كومي ادعيله

بشرى.. مامات العار مامات وصوب ابن اخوي وعايفي يتباهه وضباط واكفه ع راسه وابن اخوي يعالج بروحه لعنه الله علي وع امه

الحجي.. استغفر الله مو احنه بمصيبه ثلثين الدعاوي ع الداعي مو وكته هالحجي خلي يطلع ابنه سلامات وناخذ حقنه مو بالغلط والسلاح والدم حته الله مايرضى بي..

بشرى.. اليدري يدري والمايدري يكول مركه عدس ابوي عباله عداوه بين بشار ووائل حقك ماتدري بعرضهم انضحك علي وحرموهه من شبابهه

قبس.. عمه شوفي صابرين منتهيه خطيه خلي اخذهه لغرفتهه

بشرى.. ماترضى هسه توسلتلهه دكول ماطب الغرفه اذا مايرجع عمر ياربي شنو هاي المصيبه نكوم من وحده ونوكع بلاكبر ...

قبس.. عمو عادل كلساع يتخربط وبشار ما اجه للبيت ابد مرن ٣ ايام ضبط واحنه مانعرف الليل من النهار من بواجي خاله وصابرين واكثر وحده صابرين بحيث ماحطت الاكل بحلكهه بس المي وتواسيل وصياح علمود ابنج يله اكلتلهه لفه صغيره باليوم الثالث

ونسال عن عمر مامنتبه وعايش ع الاوكسجين والعار وائل الطلقه جايته بفخذه ومزقه الوتر وكلشي مابي طلع من عدهه لا معوق ولا هم يحزنون وطلع للبيت والناس تروح تسلم علي ويكلهم عمر اخوي ماعندي شي وياا اني مشكلتي ويه بشار

بس كل هاي الايام بشار اجه مره وحده سبح وبدل ورجع حته ماحجه حرف واحد وكل الناس تسأل عن شنو العركه ماجابو طاري شجن ابد بس كالو متعدي علينه حته شيخهم اجه ع جدو ونفس الكلام كاله ماجابو طاري شجن ومن نسالهم يكول جدو بشار ماقبل نحجي

بعد اسبوع يله انتبه عمر بس صحته تعبانه حيل اجه عامر وبشرنه ويضحك يكول وين مرته غير گلب الدنيا بالصياح ويصيح جيبولي صابرين اول ماصاح اريد امي وبعدين كام يصيح وينج صابرين شالعه كلبي ومرمرتني ..

من فرحتنه دموعنه تجري ونضحك واخذو صابرين وامه وراحو شافو كالو زين يومين ويطلع بس كون عنايه كامله بالبيت وفعلا يومين وحضرو كلشي حته ممرض جابوله للبيت خاص بي وطلع عمر..

تلكنه عمه بشرى وخالاته هلاهل وعبالك عريس والجكليت ترسن الشارع بي وجدو ذبح طلي ووزعوا ع الفقراء هسه يله اخذنه نفس والباقي مانعرف شراح يصير بس المهم عدت ع خير...

ابد ماتواجهنه اني وبشار رغم شكد خطار وواكفه يامي ياجاي ويفوت من يمي بس لايحاجيني ولا احاجي واصلا وجهه مگلوب بحيث حته عمو عادل من يسولف ويه جدو تبسبس حته لايسمعهم يكولون اعصابه متوتره...

اني رجعت اداوم وضع الشركه هادىء هو يداوم ويطلع نص الدوام ورا شكم ساعه يجي حته اهلهه مايعرفون شي عنه بس بهاي الساعات الي يطلع بيهه وين يروح ماندري...

شجن.. مرات يكولون القوه تتولد من ضعف ومن مواقف صعب تنسي بسببي تأذو اهلي واذيت بنت عمي بس هاهي ماعندي شي مستور واخاف من عنده صحتي وخسرتهه وغيث وانتهى الباقي اعيشه لنفسي فقط

ايدي رجعت طبيعيه بس رجلي نهائيا وكفت كمت اداوم بس بعكازات ماحبيت الكرسي واني متعوده ع الكعازات يعني احسهه مريحه اكثر رغم شكد واجهت انتقادات من الطلاب ومرات يفوتون من يمي مجموعه بنات يأشرن عليه ويضحكن

بس جنت احاول اسيطر ع وضعي واعصابي وما اهتم بس الانسان يتحمل يتحمل بس لازم يجي يوم وينهار واني هيج جنت اضغط ع نفسي ...

بيوم جنه نايمين بليل اني جنت مانايمه بس قبس وفاديه غافيات انفتح باب الغرفه سويت نفسي نايمه بس شفته بشار طب للغرفه وكف يم راس قبس البيهه حاله من تنام مايثبت عليهه غطه شفته غطاهه وطلع بس لا لمسهه ولاشي بس باوعلهه وغطاهه وطلع ..

هسه اكتشفت منو يغطيهه يوميه تكعد الصبح تكول منو غطاني لان تنام بدون غطه وتكعد الصبح تحلف بفاديه وفاديه دكلهه مواني طلع بشار حته اني رجعت علاقتي شبه طبيعيه ويا بس ويه قبس كل واحد بجهه...

تحسنت حاله عمر وكام يكدر يتمشى بالبيت وصابرين مثل ظله تفتر ورا حته مرات يزهك بيهه يكلهه لوميت ولا هاي لزكتج وهي تزعل ويرجع يراضيهه..

اكتشفنه صابرين رغم تصرفاتهه الموحلوه بهذيج الفتره بس متعلقه بعمر موطبيعي حته دكول لماما اني احبه اكثر من عندج وماما دكلهه اي هو الرجال من يتزوج تنتهي امه يجي دور مرته

غيث ماسمعنه اي عنه بس ندري بي ماعاف عمر بالمستشفى ابد واكيد وائل اخو يظل ويا بس كل هذا وغيث مايدري بالصار وياي لان بشار تكتم ع الموضوع...

بيوم من عدهن اجه عمو عامر وكلنه كاعدين وكال عشيره وائل تريد تجي تسوي كعده بحكم وائل هو المتعدي علينه

بشار.. اني رجعتلهم خبر اي كعده مااريد وما استقبلهم نهائيا حق اختي واخوي اخذه بالقانون ومن بين عيونه

الحجي.. بشار ترى هاي عادات لازم يجون ويفصلون

عادل.. بويه بشار بس اعصابك وفكر بيهه ترى اخوك راد يموت خلي يجيب عشيرته ونتفاهم

بشار.. بشنو نتفاهم؟؟ تريد اكعد بنص ديوان واكول خطف اختي واحتمال اعتده عليهه او محاول يعتدي؟؟ لو اكول ضربهه قبل سنتين وعوق رجلهه واحنه مابينه خير ومستقبلي ابيتنه؟؟

مستحيل ينذكر اسم شجن بنص عشيرته وشوفه هالجبان هذا لسه ماحاجي لشيخهم ومحد يعرف السبب مويوميه يجيكم يسالكم عليمن العركه يريد اكعد اشهر باختي يحلم هالخسيس يسكتنه بشكم فلس ويفصل ويطلع منهه

لواني لو هو من الاول ماجنت ناوي توصل لهنا بس هو عار واجه تهدد علينه بنص بيتنه وماردت اجيب الطلقه بگلبه لخاطر جهالهه اليتباجون ورا بس هو من حقده جاب الطلقه بصدر اخوي

عادل.. يعني تريدهه بالقانون وينه القانون الي بالعراق وياخذ حقنه بدون فضيحه..

بشار.. انتم اطلعوا منهه ورجعوا خبر الهم كل اليوكف ويا وائل اضيفه بالدعوه فلت منهه بس مايسكتنه بالفصل وتظل اختي عليهه علامه والناس تسولف بيهه بهذيج السنه بتهم راد ابن خالهه يعتدي عليهه رحمه لدينكم فكروا بعقلكم وعوفو العاطفه مالتكم ...

اني امشي بيهه وارجعه عطال بطال يله ارتاح واكول اخذت حقي والله اذا ماينفصل من وضيفته وهاي نجماته ادوسهن بالقندره مااهدأ ولا راح ابرد بيوم

شجن.. سد الموضوع بشار وبعد ما انفتح ودزو شيوخ وساده بس نفس كلام بشار احنه والقانون ومحد عرف سالفتي لان جان بشار يراقب الكل خاف واحد يحجي بس كالو عداوه بينه وبين بشار ...

قبس.. صار شهر كامل وعين بشار ماتشوفني واني كوه متحمله كلساع اريد اصعدله وانهد بي بس فاديه توكفني

فاديه.. قبس والله اخوي واعرفه ترى طبعه هيج هو هسه متندم شلون مد ايده عليج بس اكو شي اكبر بداخله وهو شلون ياخذ حقنه من وائل يعني باله مشغول عوفي وحده يرجع يعتذر من عندج...

قبس .. اصبر واشوف وين توصل وياا اكلج عمتج بسمه مالهه نيه تشيل مو كالت شهر صار ٣ اشهر؟؟

فاديه.. ابنهه المحروس يدرس وشفتي شلون حقير واذا بالكوفه يكدر كل خميس يجي هياتهه النجف وينهه بس هناك ماجرين بيت هو واصدقاءه وعايف امه

قبس... حتلو بس المفروض تخابره ودكله تعال تاجر بيت وتكعد بي ترى ماكاعد اتحمل فاطمه وفرح

فاديه.. هسه مانحجي خلي تخلص الامتحانات ونحجي لعمه بشرى حته بعد ماعدهه حجه تاخذ بناتهه وتروح تاجر ...

قبس... امج كالت باجر شيلن الفراش وغسلن البيت لان جمعه وفرح وفاطمه ويانه وصابرين تروح لاهلهه لان حامل ماتكدر

فاديه.. بس فراش المطبخ والهول نغسله الباقي اشتروا هاي السنه جديد ونكعد الصبح وهسه تشوفين لليل مانخلص بيت طابقين شيخلصه 

شجن... مواله كله باجر شيلو نص وباجر الطابق الثاني

فاديه ... نظل يوميه مهوسين وعدنه امتحانات عمه بشرى تجيب حوراء وتساعدنه

شجن.. صدك شخبار خطبه حوراء

فاديه.. بعدهه بس حجايه لحد مايتخرجون هاي السنه كالت عمه يجوز بالعطله

شجن.. ثاني يوم اني ماكمت بس خطيه البنات وعمه بشرى من الصبح شالن الفراشات واحنه كله زوالي وثكيلات بحيث كوه يصعدنهن فوك واكثر وحده تعبت قبس لان ماما معتمده عليهه تعالي قبس روحي قبس ...

قبس.. احس ظهري انفتح من النص من التعب تغدينه ومددت شويه والعصر رجعنه نكمل وهدى رجعت لبيتهه ام بشار هي سوت عشه واحنه ورا العشه يله كملنه كلشي حته جنت ناويه بس اسبح انام..

طبيت للحمام سبحت ولبست تراك هو عندي من العام بس شو عبالك سمنانه حسيته ضيك شويه حطيت الخاولي ع راسي وطلعت للغرفه محد اكو مشطت شعري وكمت طلعتلي دشداشه

اني متاكده. قفلت الباب بس ماادري شلون انفتح جنت هستوني نازعه البدي وبس بالقطعه الداخليه وبعدني لابسه بجامه وواكفه بالزاويه وانفتح الباب

صرخت بصوت اطلعي برااا اطلعي!!! وبسرعه جريت البدي خليته ع صدري واريد ادنك اشيل الدشداشه الوكعت بالكاع

فرح.. عزااا هاي شنو جسمج؟؟

قبس.. اطلعي براا انتي واختج ايدي ترجف بس اريد اوصل الدشداشه لراسي ماكدرت

فاطمه.. مشوهه ههههع قبس الحلوه الجميله مشوهه ااوي  جسمج مثل جسم البقره مطكع الله عليج فروح مو مثل بقره بيت ام سامي الي بلبستان..

قبس.. مادري شلون لبستهه بس كل جسمي يرجف لو واحد يضربني طلقه ولا يعيرني بجسمي من كدما ارجف ماتجمع عندي الكلمات بس كمت اصيح اطلعن حقيرات ماتستحن..

فاطمه ... لااا لااا قبوسه الجميله ترجف من ورا جسمهه مايعرف بيج بشار مووو؟؟

فرح.. سرج ابير لاتخافين مانحجي بس نكول ترى جسمهه مشوه عالجوهه لايطلع بابنهه وتخرب نسل العائله

فاطمه.. ااوي راح ازوع شلون تباوعين لنفسج بالمرايه واتتي هيج حطي كريم اساس شي

قبس.. هو هذا الموضوع الخله عندي عقده نفسيه واسلوب تهجمي موطبيعي بحيث انفعل واحس راسي ينمل ومرات اذي نفسي ومااحس وشكد جنت مستره ع نفسي ورفضت كل قسمه وكل زواج ولاحبيت بسبب هالشي...

كمزت على فاطمه سحلتهه من شعرهه ومن كدما جنت عصبيه ماادري بنفسي شلون سويت وشكتلت

فاديه.. جنت بالهول واسمع صوت قبس وفاطمه وعركه كلهه كاعده بغرفه بيبي واني بسرعه ركضت للغرفه واشوف قبس لازمه فاطمه من شعرهه وتسحل بيهه بالغرفه ولازمه بيدهه عوده متينه نزلنه بيهه البرده ولازمتهه بوجه فرح...

اريد ادخل وابعدهه ماكو بحيث وكعت لفاطمه وفرح دك هن هم كفشنهه ويفشرن عليهه بس قبس هجوميه بشكل كمت اصيح ماما جانت تصلي اجن عماتي يركضن وكوه فكن قبس وطلعن البنات..

انصدمت بمنظر قبس جانت ترجف وايدهه ترعش وركضت حشكت نفسهه بالزاويه كلما اريد اتقربلهه تصرخ ادري ببشار فوك بسرعه ركضت صحته جان مكنك بس كتله قبس مدري شبيهه نزل يركض

عمه بشرى ماخلت واحد يشوفهه رغم فرح واختهه يهدن ويتوعدن بس بشار واني طبيت كعد كدامهه مثني وهي تدفع بي وماتحجي

بشار.. حبيبتي شبيج لاتخافين!؟؟

فاديه.. بشار طلعهه من الزاويه شوفهه شلون ترجف سحبهه كوه وهي تدفع بي بس ماتحجي بس صوت اسنانهه وهن يطگن واحد بالثاني

ضمهه بحضنه حيل وبس يريد يفتهم من عدهه وهي لادموع ولاصوت

بشار.. شبيهه ليش هيج حالتهه؟؟

فاديه.. ماادري ع الصوت اجيت ولكيتهه تضرب بفرح وفاطمه وعماتي فكنهه وهيج حالهه

بشار.. اطلعي فاديه !!

قبس.. ادرك كلشي يصير بس اعصابي ترتخي واكوم احجي كلمات مامفهومه لو اسكت اذا جنت خايفه اكوم احجي اي شي بالي واذا جنت احس بامان شويه اسكت وهذا الشي صار هسه وسكتت

بشار.. لزم وجهي وهو يحجي حبيبي ليش هيج ترجفين شسولج؟؟

قبس.. بس اباوعله مااكدر احجي بس انتبه عليه لابسه الدشداشه بالمكلوبي وايدي الحاضنه ايده ترجف

بشار.. ليش هيج لابسه ملابسج احجي شسولج هسه اكوم اطيح حظهن

قبس.. لاول مره من تجيني الحاله ابجي كمت ابجي ضمني لصدره حيل وهو يحرك ايده ع ظهري ويطمني بكلامه...

حسيت نفسي بديت اهدأ واني بحضنه واسمع صوت عمه بسمه برا وهي تصيح وتحجي عليه راد يكوم بس جنت لازمه التشيرت مالته حيل ماخليته

بس هي دفعت الباب وطبت جان دكول والله خوش ابدال ماتعلمهه التربيه حاضنهه وتواسي بيهه هالمجلوبه هاي!!

بشار.. اول شي عيب اتفوتين هيج المفروض ادكين الباب!! وثاني شي اليحجي عليهه معناتهه مسني الكلام جيبي بناتج كدامي حته افتهم عليمن هيج حالتهه وشسون حته تضربهن

بسمه.. تعالن يمه شوف فاطمه شوف شعرهه شلون مهلسته وشلون عاضه فرح متحمله ع بناتي عليمن

قبس.. رغم بعدني من حضنه من طبت عمه بسمه بس ايده محاوطه ظهري وهو يحجي

بشار.. كولي فاطمه عليمن كتلتج قبس

فاطمه.. بدموع اللواكه والحقاره والله ماسوينه شي جانت تبدل واحنه ماندري بيهه من طبينه اني وفرح انصدمت بجسمهه لان اول مره اشوف هيج وهي هجمت علينه...

قبس.. من حجت الحقيره وهي تحجي وفرح اللعينه تبتسم ضغط ع ايد بشار حيل وهو ساكت

بشرى.. شبي جسمهه وموعيب تباوعلهه من شفتنهه تبدل المفروض اطلعن؟؟

فاطمه.. هو عمه ردنه نطلع بس الواحد موبيده ينصدم لو شايفه انتي جان انصدمتي جسمهه مشوه نصه ولان كتلهه هاي شنو ؟؟ هي هجمت علينه وكامت تضرب

فرح.. اي بشار والله موقصدنه نحرجهه بس تفاجأنه حته كالت لاتحجن لان بشار ميدري بي بس شو هي الله يسلمهه ماتفاهمت

بشار.. هي هاي تربيتج عمه جايه وتحجين ع تربيه قبس!!  مامعلمتهن البيبان تندك قبل لايفوتن؟؟ ومايصير يباوعن لاي شخص وهو يبدل عن اي تربيه تحجين بيهه هسه

بسمه.. هسه عوف التربيه وكول شبي جسمهه الضمته عنك؟؟

بشار.. ماضمته عني واعرف بي وهذا الشي خاص بيني وبينهه!!! وهاي احتراما لعمرج جاوبتج لو وحده ثانيه واكفه كدامي وتحاجيني هيج جان غير تصرف الي وياهه

انتن فرح وفاطمه اذا ما احترمتن نفسجن وبعدتن عن قبس ادوس ع راسجن والله ولا امجن تشفعلجن ولا غيرهه احترمن البيت الكاعدات بي واسكت وممنوع وحده من عدجن باي سبب كان تتهجم على قبس لان هذيج الساعه اني الاوكف كدامجن..

وهسه تجن تعتذرن من عدهه كدامي واذا ماعتذرتن هسه اخذجن لعمجن واخلي يعيد تربيتجن من جديد شنو هالانفلات وبعين صلفه وتحجن كدامي بشي خاص انتن موبنات لونسيتن المستحه والعيب ؟؟ وانتي عمه مقتنعه بتربيتهن شلون وحدتهن واكفه كدامي ولسانهه شطوله وعوزهن يوصفن

بسمه.. دفعتهن اثنينهن بعصبيه اعتذرن يله من خوفهن من امهن وجذب لو يخافن مايدكن دروب بس من فشلتهن اعتذرن من عندي وطلعن...

وعمه بشرى طلعت وسدت الباب واني شلت ايدي من فوك ايده الجنت ضاغطه عليهه بقوه واني افكر وين شاف جسمي ويكول ادري!!!

ظليت منصيه راسي وكتله انت وين شايف جسمي حته دكول ادري ودافعت عني؟؟؟

يتببببببع..... متابعه ممتعه

قمع المشاعر.... البارت الثاني والثلاثون

للكاتبة زهراء ( روزايه)...

‏أدري بيهم تعبوچ...

الوادم الغشمه كحل ما كحلوچ

ذبلن عويناتچ الحلوات كلش

يا حريمه شگد عموچ .

...

قبس... انت وين شايف جسمي ودكول اعرف؟؟

بشار.. يعني وين شايفه؟؟ بس موحلو انطي بيج كدامهن واكول اني غريب عنهه مااعرف غير اسمهه قبس وبنت عمي

قبس.. يعني دافعت عني شكرآ

بشار.. من اگلج لاتضمين عليه حته لاتحطين نفسج وتحطيني بهيج مواقف مايفيد الحجي ويوميه يطلع شي جديد برأيج حلو هذا الموقف واني ادافع عن شي ما اعرفه

قبس.. موقصه اضم عليك بس هذا الموضوع مأثر عليه حيل جنت ناويه احجيلك بس يجي الوقت المناسب

بشار.. كام وكف هسه انتي بدلي راح اطلع شويه ومن ارجع عندي حجي وياج تريدين اصيحلج وحده من البنات

قبس.. لا اريد اظل وحدي!!طلع وسد الباب احس دكات كلبي مخربطه وحيل ماعندي وعقلي مشوش كمت طلعت جنطتي اريد اخذ علاجي مع العلم تاركته من يوم الطلعت من بيت عزيز بس هسه احس نفسي مالي حيل لازمه الشريط بيدي ومتردده اخذ لو مااخذ احاول اقوي نفسي وراي حياة واطفال خومااظل اخذ مهدئات

هالمره راح اجاهد هاي الليله وحتلو اظل كاعده للصبح بس مااخذ العلاج من اخذه اظل بس نايمه والاثار الجانبيه تبين عليه يورم وجهي ورجليه لذلك احاول اتركه ...

نزعت ملابسي اريد اعدلهم واباوع ع نفسي بالمرايه بعد ماتاكدت من الباب مقفول بشنو متنسيه امي حته هيج تشوه جسمي حسره عليه البس دلع وصلوخ اصلا جنت اتجنب اباوع لنفسي لان اشمئز منهه جسمي مقسوم نصين جهه بيضه وجهه سوده واكو اماكن بيهه خشونه خاصه يم خصري

لبست ملابسي وفتحت الباب وكعدت اجت عمه بشرى وام بشار بس ماحجن حاولن يلطفن الجو عليه لان ايدي بعدهه ترعش خفيف وادري اكو حجي عدهن ويريدن يسألن شبي جسمج بس من شافن حالتي عافني ...

لشوي وعمه بشرى راحت وشجن وفاديه يقرن واني انتظر بشار يجي تقريبا الكل نام حته عمر اجه وصعد لغرفته واني انتظر شوكت يجي بس ماسالني اي سؤال ضامه ايدي بحضني واغمض عيوني واشتت بالي افكر باشياء حلوه فكرت بخطوبتي وفكرت بماما واجت ضحكتهه كدامي بس اريد ارجع طبيعيه والرعشه تروح ..

جنت مغمضه وماحاسه بوجود اليمي بس فززني صوت فاديه وهي دكلي قبس قبس نمتي؟؟

قبس.. لا كاعده!!

فاديه.. بشار يصيحج اصعدي فوك كلهه نايمه واذا اجت ماما سألت اكلهه بالحمام روحو تفاهموا

قبس.. ماشي كمت اريد اطلع

فاديه.. هوب هوب وين رايحه جنج دشداشة بيبي مال الحصار اكو وحده تروح لخطيبهه وزعلانين بهيج لبس

قبس.. لعد شلبس بيه حيل هسه اكعد ارتب لاخوج

فاديه.. يستاهل اخوي ترتبيله!! ماكتلج خلي مكياج بس لبسي تراك واصعدي وسحبتني من ايدي باوعت لدشداشتي مابيهه شي بس يله خلي ابدل لبست تراك بنفسجي وبجامته سوده ورشيت عطر وشايله شعري كعكه وصعدت..

دكيت الباب ودخلت جان مدد ع الجربايه من شافني كعد بس ارتجى ع الجربايه ومدد رجل وثاني رجل ظليت واكفه بالباب واتذكرت غرفته ماصعدتلهه من يوم الكتله

بشار.. تعالي ليش واكفه

قبس.. كعدت ع حافه الجربايه صرت جانبيه بكعدتي وهو ع نفس كعدته دقايق واني كاعده وحاضنه ايدي الترعش ومرات تلازمني هاي الحاله ايام وهو يباوعلي بس اني ماالتفتت علي

بعدين كام التفتت شفته راح للباب وقفله واجه عليه كعد بصفي ومد ايده ورا ظهري وسحبني لصدره بس خليت راسي ماحضنته بس هو حاضني

بشار.. مايفيد اعتذاري موو؟؟

قبس.. ليش تعتذر انت مسوي شي غلط؟

بشار.. بحضنه ويحجي ماالمفروض امد ايدي عليج ؟؟

قبس.. ومديتهه شنو الراح تغيره!!

بشار.... لزم ايدي الترعش رعشات خفيفه وضمني اكثر لصدره مستعده تسمعيني شراح احجي؟؟

قبس.. هزيت راسي واني ع صدره

سحب نفسه لنهايه الجربايه ارتجي ع التاج مالتهه ورجل نزلهه بالكاع ورجل ثناهه وخلاني بحضنه وراسي ع صدري واني مكتفه اديه مابادلته..

بشار.. تذكرين شگتلج بهذيج الليله قبل ما اخطبج اني شنو طبعي؟؟ هو طبع موبيدي اغيره صدكي حاولت ويه نفسي الف مره بس عصبيتي ماقلت بلحظه يجيني الشك مااشوف كدامي لاحبيبه ولا اخت يعني شجن ضربتهه اكثر من عندج وهي مريضه وتستاهل الضرب لان لو حاجيه ماصار هالشي

وانتي نفس الحاله لو ماجاي وسائلج ٣ مرات اكول معذوره بس ياقبس تتعمدين اتجذبين واني اباوع بعينج اني رجال متفهم اكثر من ماشكاك وعصبي لو جايه بيومهه وحاجيتلي ومفهمتني والله العظيم ماسويت هيج جان تصرفت بتأني واسحب اختي وافتهم من عدهه واحاسب وائل يله ارجع احاسبهه

لان عمرهه العصبيه ماجابت نتيجه وهاي النتيجه الطلعت بيهه اركض بالمحاكم من ورا سكوتجن !! وهم لورايحه وحاجيه لامي لبشرى او هدى بس ما اسكت عن هيج شي انتن ماحاسات بي شكبرهه المصيبه لو معتدي عليهه وهسه شجن موبنت بيت تتوقعين بشار هسه كاعد يمج؟؟ جان كتلته بنص بيته واني بالسجن

قبس.. بس اني ردت احجي وهي تتخربط وكالت اكتل نفسي

بشار.. وخلي تتخربط هي ضعيفه انتي شجاج اكول عليج قويه وسباعيه تدرين اول مره بحياتي امد ايدي عليهه بالذات شجن موهاي جانت رغم برائتهه بس جريئه وشخصيتهه حلوه واني اول واحد وكفتلهه وقدمتلهه اعلام حته تحقق حلمهه لان ادري بيهه جريئه بس الصار وياهه خلاهه تفقد ثقتهه بنفسهه وبيهه وماتزداد سوء بضعفهه..

قبس صدكي اتأذيت اضعاف اذيتج من ضربتج بس والله مااشوف كدامي تدرين من خابرتني هدى الصبح اني بالشركه وكالتلي ع سالفه غيث ماتتوقعين العصبيه البيهه بس انتي بالذات ماجنت ناوي اذيج ولا امد ايدي عليج وشفتي شلون صعدتج فوك ردت احاسبج بالكلام مو بالضرب واتفهم موقفج لان تحبين شجن وماردتي اطلعين سرهه

بس الصار من سالت شجن وكالت تدري بكلشي وهو هذا الخلاني امد ايدي عليج ورغم هذا طلعت برا شربتلي باكيت بس حته ابرد ومن اصعد ما اذيج ومن صعدتلج كوه لازم اعصابي وحجيت وياج بهدوء وردت اعوفج لباجر بين مااهدء بس طلعتي من اول اسبوع جايتنه تعرفين بكلشي وساكته

قبس... يلعب بشعري ع كيف بس ابد مارفعت راسي وباوعتله

كتله بشار اذا اكلك ماتصدك شوف عمري الجبته جهاد مايوم واحد مد ايده عليه وعندي مبدأ اليضربني اضربه يعني انت اول واحد تضربني بحياتي كلهه وموبس ضربتني اذيتني واشوفك شلون عاقبتني رجعت تحجي ويه اخواتك واني هاملني

بشار.. ماهاملج عيني عليج بس جنت مشغول بسالفه وائل وكل واهس ماعندي مواريد احجي وياج واعتذرلج اذا اعصابي مابردت مااكدر احجي

قبس.. مبين عينك عليه هو اني اشوفك بالصدفه وحته ماتسال شلونج

بشار.. شمدريج انتي شسويلج اذا فطيره وماتنتبهين !!

قبس.. هاي من اجيت يمكم صرت فطيره والا اني ابن امه اليتعرضلي

بشار .. ليش محد ضاربج مو خابرتيني واجينه اخذناج وانتي بالحمام حابسه نفسي كلتي يريد يضربني

قبس.. ذاكرتك قويه راد يضربني بس ماكدر

بشار.. اي ذاكرتي وياج ميه ع ميه وماتفوتهه تفصيله وحده

قبس.. مبيين!!

بشار.. رفعني حيل لصدره صار راسي يم ركبته بس اشتمتهه غمضت عيني وحبست انفاسي اني جايه هداده وزعلانه مااريد اضعف يمه رغم ايده تتحرك ع زندي واصابيعه تتوغل بشعري وبدت دكات كلبي تفضحني بس مالازم اضعف واضيع حقي ..

بشار.. قبس نمتي شو هدئتي!!

قبس.. لا مانمت بس كلبي ماجاي يهدأ وينسى سوايتك

بشار.. شو تعالي !!

قبس.. بحركه سريعه نيمني وصار فوكاي واخذ شفايفي ببوسه عميقه طويله نسيت بيهه ابو ابوي والكتله والزعله كلهه

رغم مابادلته بس جنت مستمتعه باتقانه وتفننه بيهه وشلون سلب من عندي كامل طاقتي وعصبيتي البداخلي وكل الافكار الشوشت عقلي طارت بلحظه

ابتعد عن شفايفي وخله راسه ع كصتي واني مغمضه واحس بانفاسه المنتظمه وهي تلامس مسامات بشرتي وايده الخلاهه ع گلبي الجان ينبض بقوه ويريد يكسر الحواجز ويتحرر من اظلاعي ...

بشار.. حجاهه بهمس هدي حالج!!

قبس.. الظاهر بين وضعي لان احس بايدي زادت رعشتهه وهالمره مو خوف بس من كد اللهفه والحب وگلبي الينتفض بين اديه وهو يحس بي وكانو حاضنه ظليت مغمضه عيوني ومافتحتهم ابد

بده بجوله عارمه باسني من كل مكان بوجه وهو يهمس يم اذني وين ضربتج ع خدج ويبوسه ويرجع يبوسني من خدي الثاني وكانو مركز بكل مكان اذاني بي لحدمانزل ع بطني وباسني من فوك البدي لان ضربني بيهه...

نام ع ظهره وسحبني لصدره ايده تتحرك بشعري واني خليت ايدي ع گلبه وجنت مستمتعه بدكاته شكد هادئه ومنتظمه وعبالك لحن موسيقى لعد اني ليش هيج گلبي فضحني؟؟

بشار.. شو باوعيلي خليني اشوف عيونج؟؟

قبس.. رفعت راسي وباوعتله وهن مسلهمات وذايبات باسني من عدهن هوايه بحيث مرات احسه اكثر شي يحبه هو عيونه

سألته تحبهن؟؟

بشار.. لاتسأليني هذا السؤال لان ولهان بيهن اريدهن دوم صافيات ونقيات

قبس.. بس انت موعبالك بهاي بوساتك وكلامك رضيتني اني بعدني زعلانه؟؟

بشار.. حقج !! شلون ارضيج ترى اني ضعيف كدام هاي العيون الرصاصيه

قبس.. راح اطلب من عندك شي اذا سويته الي ارضه

بشار.. وهوو؟؟

قبس.. انت تدري بفرح شنو من نوعيه ؟؟ واليوم هي واختهه اذني حيل شوف ايدي بعدهه ترجف ورفعت ايدي ليفوك شافهه اني مااريدهن هنا كافي عمه بسمه تدري بعمايل بتهه وادافعلهه ماتروح تشوفلهه بيت موبعيده عليهن بيوم يتهمني

بشار.. جر ايدي الترعش وباسهه وظل لازمهه جان يكول مااكول موحقج بالعكس كلنه متأذين من وجودهه وفرح من هي وصغيره اني ماارتاحلهه بس شلون اطرد عمتي عيب من جدي!!

قبس.. مااعرف دور طريقه خابر ابنهه يعني شلون عايف امه واخواته بشار والله جاي اموت من عدهن هن يكرهني شفت اليوم شسون بيه بس خلي اكلك شي لوماانت اليوم موجود جان زادت حالتي!!

بشار.. ماحجيتيلي عن اي شي بخصوص هذا الموضوع ؟؟ اذا تحسين نفسج ماتكدرين خلي يولي!!

قبس.. لا احجيلك وبديت افهمهه واشرحله تفاصيل الوحمه وهو يباوع بعيني وباصبعه يحركه ع حواجبي وكصتي

بشار.. لعد ليش ماحاجيتلي؟؟

قبس.. ماادري انتظر الوقت المناسب

بشار.. شوفي ياحبيتي اني بطبعي شديد الملاحظه حيل والشي الاهتمله ادقق بكامل تفاصيله وماانسى اي كلمه تنكال بحقه

من انهزمتي من عدنه ورحنه لجدج بوقتهه تعارك ويانه ووصفج بلقب موحلو لحدالان طابع ابالي واتسائل ليش هيج كال عليهه شو هي جنهه العافيه؟؟

قبس.. كال البگعه مو؟؟

بشار.. عوفج من عنده يروحلج فدوه بس بوقتهه كلت يجوز اكو شي بجسمهه هيج مجرد تخمين هاي الشغله الاولى والثانيه من اخذتج للبيت ومديت ايدي ع خصرج حسيت بخشونه وشفتج فزيتي وهم ظلت ابالي بس ماردت احرجج

وهسه ياحلوتي يابعد گلبي هذا الموضوع حجيتي ينغلق نهائيا اني ماحبيت جسمج حبيتج انتي واي وحده تقلل من شأنج ايدج وياهه وتعالي كليلي واني هم بس افرغ من سالفه وائل اخذج لمركز تجميل حته ماتضوجين منهه

قبس.. بعد احجيلك شي؟؟ بشار اني جنت سابقا مريضه نفسيا ع حياة اهلي بابا الله يرحمه راجع بيه هوايه اطباء وقسم كالو حاله نفسيه بسبب الوحمه لان جانو الجهال يضحكون عليه وقسم كالو عدهه انفصام بالشخصيه لذلك طبعهه هجومي

ومن توفى بابا زادت حالتي وصرت هجوميه بشكل يعني تخيل حته خالو الصغير مره ضربته بسجين وهو نايم وبيومهه رادو يذبوني بمستسفى الامراض العقليه وساجده اخذتني يمهه

وظليت اشتغل واتعالج وشويه صرت احسن بس من اقل موقف لو يذكروني بالوحمه لو بماما انفعل وهيج اصير بس من اجيتكم لحد الان زينه بس هسه لان تاذيت من فرح احس نفسي محتاجه علاجي بس جاي اقاوم

بشار.. لاحبيبي وباسني من راسي اني وياج اخذج لاطباء وان شاء الله اتركين العلاج نهائيا قبس اي شي حجيتي هسه تنسي وماتحجي لاي شخص بيني وبينج فقط

قبس.. اااي بس اني بعدني زعلانه؟؟

بشار.. شطلعت هاي مورضيتج واعتذرتلج بكيفج تريدين ارضيج بغير طريقه

قبس.. جان يحجي جدي لذلك ماكدرت اميز نيته وعبالي صدك عنده غير طريقه كتله ااي شنو طريقتك ؟؟

بسرعه سحبني وخلاني فوكا متت بدمي ماكدرت اباوعله ردت اوخر من عنده ماخلاني بسرعه ضميت راسي بصدره جان يكول هسه اشوفج طريقتي حسيته بده يرفع البدي ليفوك بسرعه صحت لاا لاا رضيت والله...

هي كومه هي كومه هي شرده للباب وهو يضحك بصوت حته انهزمت فشله لايسمعه عمر ويطلع ع صوته نزلت للغرفه البنات نايمات خليت راسي ع المخده وشعور حلو بداخلي حته بسرعه نمت وثاني يوم صادف سبت ظلينه نايمين ل١٠ يله كعدنه

كعدت تريكت ورجعت لمكاني التنظيف ع فاديه هي نظفت وماكوشي اسوي بس الوجوه ماتبشر بخير عمه بسمه گالبه وجهه وبيبي هم وياهه واكيد ع سالفه البارحه..

ولا اهتميت عفتهن ورحت يم شجن تقره بكتاب كالت راح يجون بيت عمو عامر؟؟

قبس.. صدك؟؟ والله جنت ضايجه ع الاقل شويه نلتهي وياهن

شجن.. عمو عامر معزوم هو ومرته يم صديقه عدهم عرس وراح يجيبون البنات يمنه يظلن لليل ويجي ياخذهن

فاديه .. اكول ليش مانخابر عمه بشرى واتجيب حوراء وياهه

قبس.. البارحه عمه هنا مااعتقد تجي؟؟

فاديه .. لا اذا سمعت حوراء بالبنات هنا تجي لان اريد عمه بشرى تخلصنه من فرح واختهه

قبس.. اذا هيج لعد خابريهه

شجن.. اجتي عمه بشرى وحوراء والبنات وشكد ضحكنه وتشاقينه وعمه بسمه وبناتهه ماطلعن من غرفه بيبي وفوكاهه محرضات بيبي خطيه ع سالفه البارحه ..

هالمره الكل موجود حته بشار وعمر واجتمعنه ع الغده سوه وقبس كاعده بصف بشار عمه بشرى هي كعدتهه واشوف فرح حته مااكلت وبس تنافخ والله هاي البنيه مبين وراهه مصايب لاتعد ولاتحصى..

ورا ماكملنه غده وماما كاعده بالكاع وتصب جاي وكدامهه الاستكاين وكلهه تصيح ماما شكر ماما هذا مر !! هذا حلو وهي تسولف اخر شي زهكت بينه يله سكتنه..

بسمه.. بويه اريد تشوفلي حل والله اذا ماشفتولي حل اخذ بناتي واهج وحتلو اكعد بالشارع ولاهاي الحاله

الحجي.. خير يابه منو يمج اشو كاعده بنصنه وبناتج ماناقصهن شي!!

بسمه.. لاناقصهن احترام ترى صح يتيمات وماعدنه بيت بس مو معناتهه ينذلن والجاي والرايح يكفخ بيهن

عادل.. انتي كاعده ابيتي منو مامحترمهن ويكفخ بيهن؟؟

بسمه.. اسال جنتك وبعدهه ماصارت جنتك والبارحه شوف شعب فطومه مهلس وزند فرح مورم من عضتهه اكو هيج جنه تكتل وتعض بعد مانأمن ع رواحتنه ابيت اخونه

عادل.. التفت عليه وكال عمو قبس صدك هالحجي هن هم خواتج !!

قبس.. ااي صدك ضربتهن بس خلي تحجيلك السبب عمه ليش ضربتهن؟؟ تباوع لبشار عمه بسمه وماتكدر تحجي

عادل.. احجي بسمه عليمن كتلتهن

بسمه.. سالفه ماتسولف

بشار.. ليش ماتسولف فاطمه وفرح ماعدهن شي مايسولف موحجن كدامي لو هسه تغير سولفي انتي بس حجاهه بنتر!!

بشرى.. اني احجي ولا اوكف ويه هذا ولا ويه هاي بسمه اختي وبناتهه مثل بناتي بس وحق الله وروح رضا لو بنتي مسويه سوايتهن مال البارحه اكسر ظهرهه وانعل صفحه اهلهه

اسمعي بسمه الام من تسمح لبناتهه مره واثنين بالغلط معناتهه تمادن اني لا جاي اقلل من تربيتج ولا انتقدج بس الحق يقال وتدرين بيه اني ما اسكت عن الحق لو تكوم عشيره كدامي ماتسكتني

ابو بشار سالفه خاصه بقبس وماتريد احد يطلع عليهه بينهه وبين بشار وهي عدهه وحمه بجسمهه لا انت الك حق تدخل ولا اني ولا امه مدام هو راضي ويدري صح لوغلط ؟؟

عادل.. طبعا محد اله حق

بشرى.. وبنات بسمه فتحن الباب عليهه وهي تبدل ويتنمرن عليهه ويقلدن ويضحكن شتريد مثلا قبس تاخذهن بلاحظان طبيعي ادافع عن نفسهه وفوك كل هذا اجن كدام بشار ومصممات يقلدن عليهه عيب يا اختي علمي بناتج البيوت اسرار وموكل انشوفه نروح نحجي بي عيب!!

بسمه.. هاي انتي اختي وهيج حجيتي طبعا مستقويه قبس منا بشار ومنا انتي لعد بعد كولي اخذي بناتج واطلعي

الحجي.. محد طردج بسمه بس من نحجي الحق موتزعلين اني رجال جبير واشوف العداوه والحقد عند بناتج لهاي اليتيمه شيريدن من عدهه

جدي فرح احجي شعندج وياهه ترى كلنه ملاحظين واكثر من مره اسمع كلامج عليهه عيب يابنتي اول شي ماكاعده ابيتج هي ولا متجاوزه عليج والاهم من هذا كله مرت بشار وبمثابه اخوج الجبير ..

بسمه.. كامت تبجي وسوده بوجهي ابوي هيج يقلل من شاني كدام اليسوه والمايسوه كولي اخذي بناتج واطلعي اني لوعندي اتحمل ذلتكم لو ازوجهن لياهو الجان واخلص

بشار.. هسه منو حاجاج ياعمه منو قلل احترام الثاني لو لان حجو الحقيقه زعلتي ؟؟ انتي معززه مكرمه ابيتنه بس كلشي اله حدود بنتج غلطت اوتجاوزت لاتوكفين بجانبهه وتحثيهه ع الغلط

ام بشار.. داده بسمه اذكري الله هسه فاديه وشجن موالنهار كله معارك هن هم اخوات واعتذرن من عدهه لاتظلين تعيدين بالسالفه وتخلين الكره ينولد بيناتهن..

بسمه.. لااني راح اكلف حمايه يشوفلي بيت هم ثقلت عليكم وكامت وبناتهه كامن وراهه مانحس غير بيبي من يمهه تحجي

الحجيه.. موهيج الحجي يابشار هاي عمتك

بشار.. شحجيت حجيه؟؟

الحجيه.. كسرت خاطرهه حته ترضى قبس

بشار.. يعني لازم ارضي بناتهه حته لاتزعل ماكو هيج اذا تشوف بناتهه صح خلي تاخذهن وتطلع اني رجال ياخذني الليل ارجع تعبان لو ارجع اسمع شكاوي عمتي

الحجيه.. صدك بشار بعدك ماتزوجت وهيج تطرد عمتك؟؟

بشار.. ليش تربطين الزواج حجيه شحاجين براسج هالمره بس خلي اذكرج خاف نسيتي فرح واختهه مالهن مكان يمي ومتحملهن لخاطر عمتي ترى ماناسي سالفه الخطوط السوتهه وبعدهه الهه عين وتحجي

الحجيه.. والله تزعل ترضى بس انت ماتحب التحبك تريد تركض ورا التشيل خشمهه عليك مو بنت عمتك وتحبك من زغرهه ليش هيج عفتهه

الحجي.. يامره اليوم بيج شي شوتخوطين بصف الاستكان

بشار.. لاخليهه بله احجي بعد شمدرسيج زين شلون تحجين هيج وقبس كاعده ؟؟

الحجيه.. ومنو قبس !! ذاك اليوم اجت بس فرح تحبك من صغرهه

بشار.. هسه ولا يهمج اطلك قبس واخطب فرح حته ترضه بنتج!!

الحجي.. كومي بشرى اخذي امج ترى لوتسكت لو تكوم تخوط

الحجيه.. اني ياصالح اخوط؟؟ ماتحجي الحق

بشرى .. دكومي يمه مسويلج غسل وتشحيم من الزين وانتي عمه قبس لاتهتمين

قبس.. من كدما متفاجئه ظليت لا اخذ ولا انطي يعني شنو ماقابلين عليه لو شبيهه الحجيه..

عمر.. هايابه مونكلك لاتعتب علينه ليش مانكعد وياكم هاك استلم وقبلهه اجتني عمه بسمه للغرفه تشكي من صابرين ادري بس هي عدهه بنات

عادل.. اسكتوا واتحملو بين ماتلكه بيت اصبرن يبناتي وقصدني اني وصابرين

بشار.. اني راح اطلع محتاجين شي

ام بشار.. ماعدنه مسواك كتبلك قائمه كومي فاديه جيبيهه

بشار.. ماارجع لليل واجيبهن

ام بشار.. ميخالف

بشار.. راح اصعد ابدل اكتبي موتنسين يوميه حاجه

قبس.. كمت للغرفه والبنات هم عجيب عمه بسمه مدري شجاهه

حوراء.. والله لوماما هيج يكولون عليه وتحب جان ذبحتني ووزعتني باكياس زباله هو هذا خطبني الدكتور لو مسويه عليه مراقبه من كل الاتجاهات عبالهه عندي علاقه بي!!

نرجس.. هي فريحه عزيزه امهه من هي وصغيره ادك الدكه وادافعلهه

فاديه.. هاي عمه بسمه بعقلهه شي وتخطط لشي غير معروف بس اذا ما اخليهه اطك وتموت اليوم

نرجس.. شتسووين؟؟

فاديه.. كلشي ما اسوي بس اروح اعدلهه شكم وحده انخطبت وهن اصغر من فرح وشوفيهه اليوم حته عشه ماتتعشه

شجن.. اكلكم اليوم عيد ميلاد ماما خلي انسويلهه بدون متدري نوصي عمر

فاديه.. اني اشتريتلهه هديه وبابا يدري خلي اكتب ورقه شنحتاج ونخلي عمه بشرى تلهيهه

قبس. واحنه مااشترينه هديه!!

فاديه.. اكتبي بورقه هو عمر نتوسله ياخذ صابرين اتجيلنه وياا !! اوكفن خلي اصيحهه

قبس.. كل وحده كتبت هديته ووصينه ع كيك وعصير واحنه هم انسوي حلاوه وتوسلنه لعمر اخذ صابرين وراح يجيبلنه وعمه بشرى شاركت بمهمه تلهيهه وحبستهه بالغرفه بحجه تسولف وام بشار كلساع وصاحت ولجن شنو هاي الريحه !!!

واكفه اسوي حلاوه شعريه وشجن يمي هي وفاديه والبنات يسوون بلاستقبال جان دكول شجن اريد اسال عمه بشرى اكيد تدري برد فعل غيث ع وائل شو محد حجه

فاديه.. سولفتلي عمه بيوم الصارت السالفه هو ظال ويه عمر وشكد متوسل لبشار وعمر يفتهم الصار بس اخوتج حاقدين علي ومايحاجو وماكايليله السبب اخوك بس متعاركين وياا ع سالفتنه شلون يخطبني وهو معتذرلهم بس قفلو اخوتج

ودكول عمه ع اساس هي ام وائل مسولفه لام بهاء جيرانه كايلتلهه غيث يريد يطلع من عدنه مشتري بيت صغير ١٥٠ بقرض من الدوله ويسدد من راتبه وهي بس تبجي علي دكول ضيعنه المايخافن الله عود اني وشجن

ووائل سالفته محد يدري بيهه وبشار حته لعمه بشرى ماحاجيلهه وبعد ماندري بيهم

قبس... خفه وراحه عساهم مايشوفون الراحه

شجن .. اميين..

قبس..سوينه عيد ميلاد لام بشار وكل وحده جابت هديه الهه شكد فرحت وبوستنه دكول ناسيته وحته عمو عادل جابلهه محبس ذهب ولبسهه ويكلهه عبالك لبستج الحلقه كلبي يدك سريع...

الايام تمر طبيعيه وعمه بسمه ادور ع بيت وبناتهه مالنه دخل بيهم وبشار طبيعي ويايه بس مبين علي مشغول بسالفه وائل ورجعت الامور طبيعيه وهادئه

بيوم من عدهن من خلص الدوام طلعت ويه طلعتي شفت ام حسن العامله صعدت بسياره حديثه حيل حته جانت عاليه واكفه بصفي كالت هاي ام حسن يمكن طكت شو كل مره اشوفهه بسياره شكل وهي ام حسن مره كلش جبيره يعني يطلع عمرهه ب٦٠ سنه

صراحه نسيت هذا الموضوع واني بطبعي موفضوليه وكل واحد حر بنفسه يعني ماعندي حب استطلاع ولا اهتميت للموضوع ونسيته بمرور الايام...

ليش مابيوم صدفه نزلت براس الشارع لان جان مستعجل السايق من نزلت صارت بوجهي هاي السياره وام حسن كاعده بالصدر واليسوق هيج رجال تقريبا يطلع عمره نهايه ٣٠ ومن شافتني انتبهت عليهه بسرعه دارت وجهه

عجيب!! شبيهه ام حسن ووين رايحه؟؟ يجوز كرايبهه هذا اوتعرفه يوصلهه بس جنت مقرره احجي لبشار عليهه ماادري ليش ما ارتاحيت للموضوع ابد

وفعلا بليل حجيت لبشار كال ام حسن تشتغل عامله بالبيوت وعادي من زمان حته ناس اعرفهم يجون ياخذوهه ويرجعوهه للشركه حته ضحك كال ولج هي مره جبيره وينهه وين هاي السوالف؟؟

ثاني يوم تعمدت اروحلهه للمطبخ سلمت عليهه وحجيت وياهه ماتخلي عينهه بعين ع الرغم انتي تعينت بالشركه بفضلهه سالتهه شفتج بمنطقتنه كالتلي نفس كلام بشار طلعت لبيت تنظفله وانسد الموضوع واصلا اني نسيته...

عمه بسمه لكت بيت قريب علينه وشالت وكام يبات يمهه جدو وبيبي بين مايجي ابنهه وتستقر واخيرا ارتاحيت واخذنه نفس والبيت رجع طبيعي عساهن لا رجعن

اليوم بشار راح تنقيب بمنطقه فوك بغداد واني خلصت الدوام وطلعت للسياره السايق بعده ماجاي وكفت شويه اني وعاليه بين مااجاهه السايق وراحت واني طلعت تليفوني اخابر السايق اشوفه ليش اتاخر...

مااحس غير سياره طبكت كدامي بسرعه ادنيت ليورا وماباوعت بس صوته وهو يصيح محتاجه شي خلاني ارفع راسي بس ماحجيت بسرعه ابتعدت عن المكان ...

دقايق واجه السايق صعدت بسياره وبلحظه اجه ع بالي نفسهه السياره الصاعده بيهه ام حسن ونفس الرجال الجان وياهه التفتت من الجامه الورا واشوفه لزك بسيارتنه يمشي....

يتببببع... صيام مقبول ... احبكم

المتابعه الحلوه صممت هديه صوره غلاف يترجم حياة قبس !! شكرا عمري Teba_almawswiu

قمع المشاعر.... البارت الثالث والثلاثون

للكاتبة زهراء ( روزايه)...

الليله كلبك مدري عدمن بايت؟؟

وانه كلبي مشتهيك وساگت

حته گلبي الحبگ يعيرني بيگ

واخ لو منك وبيگ الشامت ..!؟

.....

قبس.. طول الطريق كلساع التفت واشوف السياره ورانه ما انكر خفت وردت احجي للسايق بس ظليت ساكته اوصل للبيت واخابر بشار وصلت قريب ع شارعنه احنه فتنه بالفرع وهو طلع ع شارع العام معقوله بيته هنا مثل ماكالت ام حسن ؟؟؟

انطيت الكروه للسايق ابو حسين ونزلت جريت الحبل مخلين حبل للباب حته ماندكه هدوء البيت بس اني الكل نايم والبنات بعدهم ماجايات من الكليه جان شهر الخامس وعدهن امتحانات نهائيه ...

بدلت وغسلت وصليت مااشتهي اكل لان ظل الموضوع براسي اخذت التليفون دكيت ع بشار ماجاوبني خليت التليفون ع شحن وكعدت ليش منطيه الموضوع اكبر من حجمه قابل اول مره اصادف هيج ناس يجوز زاحف؟؟ بس مدري ليش گلبي لاعب منه....

شويه ودك تليفوني كمت اخابر بي وهو ع الشحن

بشار.. هاحبيبي داكه عليه ماسمعته

قبس.. ااي شوكت ترجع

بشار.. ب٤ اطلع وبين مااوصل وازدحام واحنه خارج بغداد انتي رجعتي؟؟

قبس.. ااي رجعت

بشار.. تمام !! شبي صوتج صاير شي؟؟

قبس.. لاماكو شي بس كلت اشوفك شوكت تجي

بشار.. مااتاخر ان شاء الله

قبس.. سديته من عنده ورحت مددت ع جربايتي ماحسيت غير ع صوت شجن وفاديه يسولفن ع الامتحان

فاديه.. صح النوم اليوم جايه من وقت؟

قبس.. ليش هسه بيش الساعه؟

فاديه .. راح تصير ب٤ كومي اكعدي خلي انسولفلج التطورات لوبعد ماتريدين تسمعين خاف هم توكعين بيهه!!

قبس.. يعني انكتل بعد لاااا ماجابته امه؟؟

فاديه.. ع كولت ماما داده خلي انشوف الايام طويله

قبس.. دحجي شكو؟؟

شجن.. اني احجي !! هسه مو اجينه وصار شكم مره كلما نجي نلگه امجد ابن عمه بسمه واكف براس الفرع اني حته سلام ما اسلم علي مدامه اخو فرح اكرهه بس هو عيونه زفره مدري شلون يباوع؟؟

قبس.. عليج لو ع فاديه

فاديه.. يحظي منو يباوعلي كل هذا الوجه السمح والطول جنه نبعه ريحان ويباوعلي وين السكط

قبس.. تقنعيني هسه بالكليه ماكو معجب؟؟

فاديه.. اكو يامرت اخويه بس اني مايعجبوني وع هاي التجربه الفاشله مستحيل اثق اكو واحد ماحاب وابن اوادم ويخاف الله اشو ابن خالي ولعب بينه جوله

قبس.. لا اكو هوايه شباب خايفين الله موهذوله اخوتج ؟؟

فاديه.. هم صدك بيشو ينحط ع الجرح يطيب وعمر الي حبهه من هي بثالث متوسط وشوفي شكد يحبهه ذاك اليوم فوك واسمعهه دكله شكد تحبني ؟؟ وهو يكلهه ماكو كلمه توصف حبج الله يسعدهم

قبس.. اميين بس ماكملتي شجن شيريد من عندج؟؟

شجن.. والله قبس اني حته خلقته مااباوع بيهه هو من جان يجينه قبل يباوع بس مايحجي وياي بس هسه جاي هنا وراح يظل رايح جاي وهو نسخه فرح

قبس.. ليش حكمتي ع الولد بسرعه يجوز رايدج مابيهه شي؟؟

شجن.. وغيث؟؟

قبس.. شبي غيث راح لحال سبيله ومستحيل بعد تنجمعون من باب اخو وائل ومن باب خطيب اختج سابقا

شجن.. اعرف مستحيل؟؟ بس اني ضيعته ومااكدر بيوم افكر بغيره واحب ونفس الكلام الكاله الي اسمعه من غيره لو اني اروح اكول لواحد احبك غير غيث

قبس.. شجن ترى بديتي تتحسنين وشويه صرتي اقوى وهالشي مفرح الكل لاترجعين لقوقعتج من جديد

شجن.. لا لا ماارجع بس اني ماانسه غيث ولااريد اتزوج

فاديه.. من يتزوج هو عود لومي نفسج ؟؟ ترى غيث ماراح يظل بدون زواج وخاصه هو رجال ويفكر جمعتكم مستحيله

وتدرين هو هسه ميت قهر لان اخوتج مايحاجو دكول صابرين عمر يكلهه يوميه بجيني للمحل واطرده عوزه يبجي بس اخوتج قاسين !!!

قبس.. بعدنه نسولف ونسمع صوت عمه بشرى كلنه طلعنه هي صوتهه عالي ومن تسولف عبالنه تتعارك!!!

بشرى.. ها ارانب عادل تعالن انطني بوسه

قبس.. اني مو ارنب وبستهه

بشرى.. انتي فاره ام اللسان بوخه

قبس.. لا عيوني غلطانه غير خليته يبوس كل مكان ضربني بي

بشرى..وشو مكيفه؟؟ ترى هو صالح نفسه بالبوسات موانتي اذا يبوس كل مكان بعد شيريد

قبس.. عمه؟؟؟ وحجيتهه بزعل

بشرى.. كليله عمه بشرى دكول سوالفه موعليه صالح نفسه زين ولج هذا عاجنته وخابزته طركاعه بعد ماشايفه منه شي

قبس.. ابن اخوج غير؟؟

بشرى.. التفتت وعلت صوتهه هسه اني جايه اعزمكم وتعزموني!!

فاديه.. شلون دبرتيهه

دبشرى.. وين ابوي لعد ؟؟

ام بشار.. يم بسمه هو والحجيه

بشرى.. مو اجه الطلي مال بسمه مايرجعون ولجن وين خليتن امي تروح تنشحن وتجيجن وهي منا شلون تصدك بسرعه

ام بشار.. والله مااحجي اني هي وابنهه عادل كال خليهه شكم يوم

بشرى.. اكلج ام بشار تعالي فهميني الاسبوع الجاي خطبه حوراء وجيرانه حايط ع حايط اول البارحه مات شلون بله عندي بس هاي البنيه ومااسويلهه حفله

ام بشار.. وبيتنه وين رايح كليلهم لاهل الولد نستحي من جيرانه وراح اسوي الخطبه يم اهلي بيت جدهه

بشرى..مو ابوهه يكول نسويهه يم اهلي لوبيت اخوي وتدرين بيهم هاي مرت حماي ما ارتاحلهه وتسمني بالحجي...

فاديه.. شوفي عمه عندي رأي

بشرى.. شنو؟؟

فاديه.. خلي بابا يحاجي عمو ويكله بيتي كدامك وبهالحجي وانتي هم كليله البنات صديقاتهه وبنات اخوك مايحبنهه وهو عمو حباب يقبل

بشرى.. اسمعن بنات عادل وهذنيج سعالو عامر اريد تسون حفله لبنتي كون كلهه دكول عاشووو مو لان ماعدهه اخوات تظل عينهه شابحه سون كوشه وهاي السوالف واني ادفع!!

ام بشار.. هي هم بنيتنه خابري عادل وفهمي وبليل خلي يجيكم وان شاء الله ابو حوراء مايكول وتفرحين بيهه

بشرى.. لعد خلي اكوم اروح البيت فارغ وحوراء عفتهه نايمه

فاديه.. عمه عود رجعيلنه الخبر نشتري ملابس!!

شجن.. طلعت عمه بشرى وشويه واجه امجد جايب بيبي وجدو جنت كاعده بالهول شو هذا اجه وكعد وعبالك البيت بيته وهو بالسنه مره انشوفه

امجد.. شلونج شجن؟

شجن.. زينه

امجد.. رجلج شلونهه؟؟

شجن.. زينه

امجد.. ودوامج

... زين

امجد.. شبيج سؤال وجواب بعدج شايفه نفسج لوماظليتي بتك رجل وعود شوفوني اني حلوه

شجن.. اذا تشوفني شايفه نفسي شكو تقلل من نفسك وتحجي ويايه وتسمع جواب مايرضيك

امجد.. ايبااا صاير عندج السان لوماخلصتي عمرج بالحاله النفسيه

شجن.. لازم اخواتك يوصلنك كل. الاخبار ؟؟ وهسه جنابك شرايد سالتني شلونج جاوبتك ماملزمه اكعد اقصقص وياك حته ترضى وهسه مدام ماعندك شي يمنه الله وياك

امجد.. هيج الحجي بنت خالي هين هذا خشمج يجي يوم وادوسه

شجن.. ع كيفك من ادوسه لاتنكسر رجلك!!!

طلع وهو ينافخ اخو الحيه هم عاجبته روحه اباوع لايدي الضاغطتهه بقوه فتحتهه وسديتهه شلون حجيت هيج ومارجفت وكدرت اجمع الحجي واكوله بدون ماابجي وانفعل يعني اني بديت اتحسن ومالازم اخلي كل واحد يجي يعيرني برجلي واسكتله شكد جنت فرحانه لان كدرت ارده حسيت بانجاز عظيم...

قبس.. صارت الساعه ب٦ وبعد تقريبا ساعه عن الاذان وعبالك انفجار كلنه فزينه طلع المحول مال الكهرباء طك وطفت الكهرباء علينه وننتظر ابو المولد يشغل ماكو؟؟ جدو طلع بالباب واجه كال عاطله المولد خلي عمر يشغل مولده البيت!!!

جان برا عمر رمشتله فاديه اجه شغلهه دقايق وطفت بيهه بانزين ودهن بس الظاهر اليوم كلهه عطلت وراح انظل بدون كهرباء البنات باجر عدهن عطله امتحانهن بين يوم ويوم...

الحجي.. بويه السطح نظيف خلي نصعد بي!!

عمر.. وين نصعد حجي صار اسنين ماشايفي بس من انسوي الستلايت

الحجي.. ايام قبل الناس جانت هيج وقت ترشه وتفرش وتصعد عشاهه وتتعشه وتسولف والگلوب طيبه وتنام وتكعد مرتاح ع هذا الهوه العذب

عمر.. وهسه تريد نصعد للسطح وانام بي ؟؟

الحجي.. شبيك مفزوع جيل هالوكت عدكم عيب ومايصير؟؟

عمر..لاموعيب بس شلون انام مانعرف

الحجي.. هو انت ل١٢ ماتجي خلينه اليوم نكعد مثل قبل كومن يابه شوفنه نظيف والمايريد يصعد اني اصعد وحدي..

قبس.. عاند بعد جدو الا يسوي البراسه وصعدنه بس رشينه بي مي لان هو نظيف وطلعنه حصيره عدهم مال قبل فرشناهه وطلعنه فراشات صارت الكعده تخبل والهوه عذب يسلم ع الگلب ويمر

بس ماتعشينه فوك لا ع الشمعات الشحن تعشينه وعمر طلع وصابرين ويانه شكد جنت مرتاحه بنصهم واليوم الي اخلصه وياهم ينطبع بذاكرتي..

صلينه وكملنه عشه وصعدنه فوك وجدو وعمو عادل يسولفون سوالف قبل واحنن داير مدايره كاعدين بس شيبته تلالي ع ضوه النجوم وهذيج الليله ماتنعاد بالف سنه!!!

سمعنه صوت سياره والباب انفتح اكيد بشار لان عمر اجه وسبقه وفوت السياره شكد يتعاركون ع هاي السالفه يكله اليجي اول واحد هو يفوتهه ...

كمزت فاديه خلي انزل اصبله عشه ونكله احنه فوك كومي قبس ويايه اخاف!!! كمت وياهه وع فلاش الموبايل نزلنه نزلت اني وهي راحت للغرفه !!

فاديه.. روحي وحدج موزين سويتلج درب سوو درب للولد اليوم تلعب جوله!! وتصفك

قبس.. عوبه ظلي يمج اموتج اذا طلعتي

فاديه.. لا شطلع اشوف الماشفته عيني غير تصير بيه هبطه وبعد ما اخلف

قبس.. ضحكت وطلعت جان واصل باب المطبخ وظلمه بس ع ضوه الكمر والنجم

قبس.. الله يساعدك حبيبي

بشار.. ويساعدج حبيبتي!! شو ظلمه ليش؟؟

قبس.. كلهن عطلن فد عطله والشمعات الشحن خلصن وجدو اصر الا نصعد فوك وتعشينه وصعدنه بالسطح.

بشار.. هسه هم وين؟

قبس.. بالسطح

بشار..مممم وبس انتي نزلتي؟؟

قبس.. ااي حته اصبلك عشه

بشار... لا اتعشه بيج لان ميت ميت عليج!!!

قبس.. ضحكت!! وفريت نفسي ايده انمدت ع خصري وسد باب المطبخ برجله وشمر السويج والتليفون ع الكاونتر وخله راسه بركبتي واني الله ذب عليه الضحك لان ادغدغت من لحيته!!

بشار.. بعد فضحينه جاي اقرالج نكته شكد فطيره انتي؟؟

قبس.. جاي اتغدغني بشاااار وحجيتهه بدلع

بشار.. شو تعالي وسحبني من ايدي للهول اجيت اكله فاديه بالغرفه بس عبالك قره البراسي او كال خاف ينزل احد وصعدنه لغرفته!!

قبس..وين وين ؟ لايجون ترى هذوله كاعدين هنااا يسمعونه!!

بشار.. سدي حلكج ومايسمعونه والتهم شفايفي ببوسه عميقه خارت قواي بيهه ولاول مره اكون بكامل طاقتي ولزمته من ركبته وبادلته البوسه رغم قله الخبره العندي بس احتواني بالكامل...

الغرفه ظلمه حيل صعدنه ع ضوه التليفون بس من باسني طفيته لان تليفونه عافه جوه وبس اضوي بتليفوني لحدما تنكطع انفاسنه وناخذ استراحه ونرجع لنفس الشوط بحيث حسيت اشفايفي ورمن بس مايهون عليه ابعده وكانو اريد اخزن هاي البوسات...

مندمجه ويااا لحدما اخذني للجربايه بكلشي احس وبكل حركه تتجول ع جسمي بس ماعندي قدره ابعده اريد اعيش بداخله وهذا الاحساس مااريده يروح لذلك جنت مستسلمه وهو يطبع بوساته ع ركبتي ...

ايده انمدت ورفعت البدي لزمت ايده بس لزمني ورفع اديه اثنينهم فوك راسي حركت رجليه وكتله لااابشار بس كل كلمه تطلع من عندي يسكتني ببوسه عميقه ع شفايفي

مغمضه عيوني واحس بحركه ايده ع بطني وع اللوحمه بالذات بسرعه انتفضت

سحب ايده وطبع بوسات خفيفه ع كل وجهي والحصه الاكبر ع عيوني ورفعني لحضنه وهو جان كاعد واني حاضنته حيل وعبالك راح يطير من عندي...

عيشني احساس قليل الوصف بحقه مثل نمله وتتسلق جبل من السكر وكل مره تنزلق وترجع تعيد المحاوله هيج جنت احس وهو يحاول يعيشني الاحساس بكامل حذافيره...

قبس..رفعت راسي من حضنه يله بشار هسه يفتقدونه روح غسل واني اصبلك عشه

بشار.. ما اريد عشه ورفع راسي وباسني من شفتي بوسه وحده وكال هاهي اتعشيت!!

قبس... كمت ادور ع تليفوني فتحته واباوع لنفسي بالمرايه شفتي ملعوب بيهه طوبه بس ركبتي مابيهه اثر واني ملاحظته اكثر من مره من يبوسني مايخلي اثرات اجاني صوت فاديه بسرعه لوحتله بيدي ونزلت

فاديه.. قره عيناكي يا امي ماكلتي هاي عفتهه جوه

قبس.. امشي ولج خلي نصعد لايشكون وهو يبدل ويصلي ويجي؟؟

فاديه... متاكده يصلي بعد هاي العمله؟؟

قبس. امشي ولج لايسمعنه يريد يصلي يصلي لروحه قابل الي!!

صعدنه فوك وجذبنه كنالهم تعشه طول ماهم يسولفون واني مخليه ايدي گلبي ودكاته سريعه صار شكد ويا وشكم مره باسني وبعده گلبي ضعيف كدامه ..

انتظرته يصعد ماكو سمعنه الباب انفتح معناتهه طلع انتظرنه الكهرباء ماكو كمنه فرشنه وحده بصف الثانيه وكل واحد وهو ومرته بس متباعدين وفاديه فرشت لبشار وكالت اذا مابات برا بس فراش بشار صار بزاويه ويكولن من جنه قبل هو هذا مكانه يعني تقريبا معزول عن الكل....

ظلينه انسولف بفراشنه اجه عمر وصابرين راحت يمه انباوع للنجوم وفاديه تعرف اسماء البعض منهن هاي درب التبانه وهاي العقرب وهذا الدب من جانت صغيره بيبي تعلمهه وحافظتهن...

بشار تاخر كلش هوايه واني نعست وغفيت وهو ماجاي فزيت ع صوت زقزقه العصافير والجو متكشف كمت لميت الفراش ونزلت غسلت وصليت وخليت القوري كعد جدو صله وطلع برا واني ظليت مدده بالغرفه فاتحه الشباك والجو زين...

اتذكرت بشار مانايم ع السطح معقوله بات برا؟؟ صعدت فوك دكيت باب غرفته ماكو فتحت الباب وطبيت جان نايم وفاتح الشباك نايم ع بطنه وبس بلبجامه شنومه بهالحر ؟؟ سديت الباب وطلعت

لجدما صارت الساعه ب٦ ونص كمت بدلت وكعد عمو عادل راح للدوامه وعمر هم طلع كدامي جنت واكفه بالطرمه انتظر السايق وطلع بشار شوكت كعد شوكت بدل ماشفته بس مامتريك

بشار.. صباح الخير

قبس.. صباح النور شو مستعجل؟؟

بشار.. لا مامستعجل بس نمت نومه كسيفه بهالحر

قبس.. ماصعدت ع السطح

بشار.. ماادري كلت انام جوه امشي وياي واني اخابر ابوحسين يجيج الظهر

قبس.. صعدت بسياره وهو خابر ابو حسين كاله لاتجي اني اخذتهه بالطريق وبديت احجيله عن سالفه السياره والرجال الحاجاني؟؟

بشار.. تعرفين شكله؟؟

قبس.. ااي اعرفه

بشار.. هسه من اوصل اشوف كاميرات المراقبه مال الشارع واشوفه منو؟؟

قبس.. وصلنه للشركه بلشت بالشغل ورا ساعه صاحني رحت يمه لكيته فاتح تسجيلات الكاميرا شفتهن ويا ودليته بسياره قرب الصوره كال مااعرفه رجع ع التسجيلات القديمه اغلب التسجيلات تصعد وياا ام حسن!!

خابر السكرتيره كالهه صيحيلي ام حسن واني كاعده يمه اجت هي مره جبيره مامعقوله عدهه شي سالهه بشار بوضوح عن الرجال؟؟

ام حسن.. والله استاذ مااعرفهم بس هو يجي ياخذني انظفلهم البيت بس هو وامه مره جبيره وبيتهم بنفس منطقتكم لان مره شفت قبس بس يكلولهم بيت الاستاذ حكمت هذا الي اعرفه

قبس.. مااخذنه شي من ام حسن وكلنه يجوز من هذوله يتلوكون للبنات وراد يحاجيني وانسدت السالفه واصلا بشار ماعمق بيهه لان سال علي وطلع صدك بيته بنفس المنطقه يعني من مشه ورانه هاي رايح لبيته

شجن.. خلصنه امتحانات واستلمت النتيجه اني وفاديه واثنينه ناجحين من الدور الاول وبيوم من عدهن اندفع باب البيت حيل وصوت ام وائل وهي تصيح وتغلط علينه

ام بشار.. عيب صوتج وين كاعده منا ناس شدكول علينه فوك حگه دگه فوك عمايل ابنج وهسه جايه هاده علينه

ام وائل ... اليوم اخزيج وافضحج انتي وبناتج الساقطات ضحكن ع ولدي شجن تواعد بوائل وفاديه تواعد بغيث وطلعن بريئات ووكعتن بين الاخوه

فاديه.. احترمي نفسج وين شفتيني انواعد بالطليان مالتج والا اكلج اوكفي عليمن انتعب نفسنه وياج خلي يجي صكارج يحاجيج !!

ام وائل.. تهدديني باخوج لوبي خير جان كدرلجن امهات ....ادكن ادروب من وراهم وهم يجون يدافعون عنج ووكعتلنه بذاك الفشار المايلبس علي ثوب..

ام بشار.. صدك ماتستحين خلي بعينج الخبزه البيناتنه لوماغزر بيج الاكل يا ناكره المعروف انتي وابنج اطلعي من بيتي ولاتشوفيني وجهج

ام وائل.. اوكفيلي الا اخليج فرجه كدام الناس وطلعت وسدت الباب حيل واحنه متعجبين ع صلافتهه هاي شبيهه منو يمهه وجايتنه هاده يمكن ربع ساعه وجان اطب علينه هي ووياهه اثنين نسوان من كرايبهه بنات عمهه وجايات هدادات...

الله يحبنه بهالوقت وجاب عمه بشرى وطبت سلمت عليهن عبالهه خطار بس من سمعت العد وام وائل فضحتنه بين الجيران صوتهه شعلوه كالت هدوني عليهه

بشرى. ولج سليمه احترمي كبرتج لا تعرفين شلون الساني يكوم يعد عليج ماتستحين البكدج لازمات السبحه ويقرن قران وانتي حايره تسترين للعار مالتج

ام وائل.. تروحله فدوه ضابط ونجماته تلالي من حقده بشار وغيرته من ابني هيج سوه خلي يضبط اخواته ويجي علينه

بشرى... ولج فاديه اعفطيلي ترى مااعرف!!! اخواته تاج راسج وراس ابنج وعشيرته ماندري ربينه جلب بس طلعتله اسنون عضنه ماتستحين جايه هداده علينه شتريدين بله

قبس.. رغم اني ماادخلت بس من شفت ام وائل والنسوان هدن ع عمه بشرى وفاديه وام بشار تفك بيهن وهاي تكفش وهاي تعض وهاي تفشر مهزله صارت والنسوان ضخمات فعصن عمه بشرى فعص الماعدهه سلاح بس اسنونهه لان ترفع ايدهه تريد تضربهن ماتلوحهن لان طوال وعمه ناعمه ..

يمي الصونده مال الحديقه واتذكر مره ساجده تعاركت ويه نسوان المنطقه والصونده طويله وكفت بعيد وتفر بيهه وخبزتهن خبز واني ع خطه ساجده لزمت الصونده واضرب بيهن هدن عمه بشرى وفاديه ركضت جابت عوده بس من كدما ضربتهن شردن وهمزين مااجتني كتله بس هن مستمرات بالغلط والفشار ...

ام بشار.. خوماتاذيتي بشرى سوده عليه؟؟

بشرى.. كون كسر باديهن من جابتهن جنهن عمليق !!

فاديه.. موتنه عبالك مدربات ع البسط

بشرى.. ولج اني بس اعظ حته اسنوني راح توكع وحده عضيتهه من كرشهه ولاكالت اااخ جنهن متعودات ع الكتل

ام بشار.. الله لايوفقهه يمهه بكاعهه هسه تخابرني ساره وتحجيلي!!

قبس.. مدري نضحك مدري ننقهر ع سالفتنه شلون سوت بينه هاي العجوز المصخمه وصدك شويه ودكت ساره تحب ام بشار حيل لان خالتهه وهي منا شايفه الضيم من وائل وامه

ام بشار..شفتن اكول اجت مسعوره دكول ساره طالعين القاء القبض ع وائل ومتفشل كدام الضباط والجنود شلون هيج بس محد يدري السالفه شنو بس تهمه تعدي ع ابن خاله ...

بشرى.. حيييل بعد ايدي بشار بس هو يكدرله خلنه هالصعلوك هذا يجي يوم ويخيس بالسجن

ام بشار... كلما اتذكر عملتهه هالعجوز كلبي يفور هيج الانسان ينكر الطيب

بشرى.. شعبالج هاي سليمه بعد موتت اخوج قهر !! هسه عوفني منهه اجيت اكلجن الجمعه الحفله يمكم لوانكتل الهه عليهه ام العروس تنبسط

فاديه.. تكبرين وتنسيهه عمه !! هسه نشتري ملابس بس مانلحك عكب باجر الجمعه غير دكولين

بشرى.. والله ابو حوراء لعب بيه جوله ساعه يكول مانسوي وساعه نسوي واليوم صفه نيته وكال هي بس حوري عندي ولازم اسويلهه وعادل كايله بيتي مفتوح وهاي اجيت كتلجن باجر روحن اشترن...

قبس.. وثاني يوم سوينه هجوم ع السوك صادف خميس رحنه العصر لان كلنه دوام ونسحل بصابرين حامل كلساع تتعب وانشوفلهه كرسي تكعد واندورلهه فستان حوامل وهدى تلبس وتنزع لجهالهه صرنه تراب من الفره وشكثراتنه لان بنات عامر ويانه

رجعنه للبيت كل وحده قاست ملابسهه اجه ع قياسهه الا اني طويل حيل وبي كبر لان مالكيت قياس وبس هذا مستور فد ضجت معناتهه راح البس من ملابسي القديمه!!

نرجس.. ليش قبس ترى احنه بيت الخياط وكل العائله تعرف بالخياطه قيسي مضبوط ودزي لمحلات جدو يسوو حتلو الظهر يجيبو هي العصر الحفله

فاديه.. اي احسن فكره !! وشوفي يجي بشار بليل وخلي يخابرهم يدزو بيت الصانع

قبس.. لعد راح اتاكد من قياسه لبسته الهن وشافن شكد يصغرون من عنده وكتبت القياسات بورقه ومن يجي بشار بليل انطي اله...

بنات عامر يباتن يمنه وهن كامن ويه فاديه يسوون عشه واني وهدى كاعدين نقيس بملابس ولدهه وهم بيهن كبر مال مستعجل حته قياساتنه مامضبوطه...

اذن الاذان وكمت صليت وبيتنه هوسه بس اهم شي فرح واختهه ماموجودات جنت بالمطبخ طلعت الخيار اريد اسوي زلاطه وصاحتني شجن تليفوني يدك!!

رحت طلعته من الجنطه ناسيته واشوف ٣٣ مكالمه من رقم غريب و٣ رسائل فتحتهن اول وحده مكتوب ردي والثانيه قبس؟؟ والثالثه والله ليلي ماانامه من شفتج !!

عزاا بعيني منو هذا وشيريد كلت بس يجي بشار بسرعه انطي الرقم وخليت الموبايل صامت حته من يدك ماادري بي جنت مااعرف اسوي حظر شكيت بعزيز بس ادري بعزيز مايعرف يكتب لان امي!!

بعده بيدي التليفون جان تجيني رساله مكتوب بيهه انتي الي ولابشار ولاعشيرته ياخذوج من عندي اني الدوله بيدي واخذج اخذج!! خليت ايدي ع گلبي وماانكر خفت منو هذا وشيريد من عندي..

يتببببع...... متابعه ممتعه

صيام مقبول حبايبي بالنسبه لموعد النشر راح نستمر بين يوم ويوم او كل يومين حسب وقتي يعني باليوم الي عندي ظرف تعذروني مااكدر بس ان شاء الله استمر بالنشر...

وفضلا وليس امرا هذا الكروب تابع الي اني وبعض الكاتبات كل وحده عدهه فيس وتحب تنورنه بي واني الي مصادقتهم ع الفيس راح ادزلهم دعوه اي شي يخص القصه غش ماغش تلكو بهذ الكروب 👎  اذا ماطلع عدكم فوتو ع حسابي تلكو بالمنصه... احبكم

احداث من المستقبل!!!

دَعيني اسألكِ للمره الأخيرة كيفَ حالكِ؟

كيفَ حال الفضة في عينيكِ اما زالَ فاتنآ  كأخر مره رأيتكِ فيها؟؟

كيفَ هو الكُحل على جفنيكِ اما زال له تأثير البنج ؟

فقد كنت اتخدر كلما رأيته يحيط بعينيكِ!!

كيف هو الثلج الابيض في خديك اما زال ناعمآ كاخر مره مررت اصابيعي عليه؟؟

كيف هو القرنفل الاحمر في شفتيك امازال دافئآ كأخر عهدي به؟؟

كيف حاجبيك اما زالا انيقين كما كانا دومآ؟

وكيف هي الشامه الصغيره عند شفتك السفلى اما زالت فاتنه كما كانت دومآ؟

وكيف هي الخدوش الصغيره في يديك؟

اتذكرين كيف كنت اقبلك منها لتشفى ؟؟

وكيف انتِ؟

انتِ كلكِ كيف؟

...

انا بعدك بخير!!

لم يتحول قلبي الى مضخه تافه لانك غادرته!!

ووجهك لم يعد قبلته وصار بامكانه ان يتجه حيث شاء!!

دمي بخير منذ كف عن حملك والجريان بك في كل انحاء جسدي!!

شراييني لاتسأل عنك حين يعبرها دمي ولستُ فيه!!

وخلاياي لم تقل لدمي بحاجه الى اوكسجينك هذا!!!

الشهيق بعدك ليس محاوله غبيه للاستمرار ع قيد الحياة!!

والزفير ليس حارآ كما تعتقد فلم يحرقني جمر رحيلك!!

انا بعدك بخير!!

اميز بين الليل والنهار فليست حياتي كلها ليل بدونك!!

فقد عادت اوقاتي الى رشدها!!

الدقيقه معك كالدقيقه بدونك!

الدقيقه معك ستون ثانيه والدقيقه دونك ليست ستين وجعآ!!

انا بعدك بخير!!

فصولي الاربعه

خريفي اسقط كل اوراقي فلاتحسب ان ماعراني هو غيابك!!

وشتائي لايحتاجك ليصير صيفآ في ثانيه!!

وربيعي ليس ضحكتك!!

وفي الصيف اتدبر امر سنابلي وحدي دون الحاجه لتحصدني نظراتك!!

انا لا اشتاق لك!!

لا اشتاق لصوتك!!

لا اشتاق لعطرك!!

انا لا اشتاق لاصابعك ترسم حدود وجهي وتعلنني دوله مستقله عاصمتها انت!!!

تعال اصدقك القول بعض الاشياء لاتتغير  ولكن علي ان اقول انا حقآ افتقدك !!!

...

هاي الخاطره الطويله بين حبيبين من ابطال القصه عن الاحداث الجايه والفيديو من تصميم عبير شكرا حبيبتي راح ياخذكم ويه القصه واحداثهه المجهولهAbeerAL_Hussnawy

قمع المشاعر.... البارت الرابع والثلاثون

للكاتبة زهراء ( روزايه)...

لاترجع ابد موشرط اعيش وياك

بدونك عايش اني وكلشي ماهمني

صح بعدك بجيت وصح ذرفت دموع

وصح العبره صارت حيل تخنكني

لكن مامتت بس حبك انت المات 

هذا كبالك اني الضحكه رسمتني

عشت وياك امن ماعرفتك هيج

تنطر لحضه عينك ناويه تذلني

ليش بيا سبب ؟؟ حاجيني صوتك وين

برر كل جريمة شوك ذبحتني

جنت اسهر سهر ماعرف مثله الليل

اضل متاني صوتك حته يحضني 

عزيزه دموعي ذيج النزلت بفركاك

يادمعي العزيز بداعتي اعذرني

وكلبي شكد ضلمتك ماقصدت ااذيك

خجلان انه منك فدوه صدكني 

واذا كل جسمي صاحك حته الييه تعود

اترك جسمي اني وانهزم مني ....

...

قبس.. ظليت بقلق رغم مادك عليه بعد بس رساله والبيت هوسه وكلهه تضحك وتسولف وهاي تلبس وهاي تصبغ اضافيرهه بس اني مامرتاحه وبالي مشغول اول مره تجيني رساله هيج ع تليفوني ليش المصايب تركض وراي ..

كاعده ورا العشه وانتظر جية بشار اريد احجيله ويشوف الرقم منو لان الخوف متملكني ومنو هذا اليحجي بهيج اسلوب وهو الدوله ومايخاف وعبالك عنده رهن ولازم يربح بي!!!

صارت ب١٠ اجو سوه عمر وبشار اني جنت بالغرفه بس شفت صابرين صعدت واني صحت فاديه حته تسويلي مجال استحي من ام بشار من اصعد خاف دكول خفيفه  مع العلم ماعدهه هيج وانسانه متفهمه بس اظل استحي منهه..

فاديه..هسه جنت فوك شفته راح للحمام اصعدي انتظري فوك واذا سالت ماما اكلهه بشار صاحهه !!

قبس.. ماشي بس احجي ويا واجي

فاديه.. لاتنسين الفستان مالتج خلي يخابر الولد حته يجي ياخذه يسوو الج باجر مانلحك وخاف تتورطين

قبس.. صعدت لغرفته ماموجود بس موبايله ع الميز وساعته لزمت تليفونه بي قفل ماينفتح خليت الساعه بالمجر وجريت العطر مالته رشيت من عنده واستنشقته بكل احساس ياربي شكد احبه...

رحت كعدت ع الجربايه انتظره مااتاخر شويه وانفتح الباب لابس بجامه وبدي اسو ريع ردن من شافني ابتسم

قبس.. نعيما حبيبي

بشار.. الله ينعم عليج وفتحلي ايده كمت حضنته وباسني من راسي واني بسته من رگبته!!

بشار.. اليوم صاعده بدون ما اصيحج

قبس.. جنت انتظرك من العصر!!

بشار.. شو مو ع بعضج صاير شي عيونج مهمومه

قبس.. شمر الخاولي ع الميز ومشينه للجربايه وهو حاضني واني محاوطته من خصره...

كعدنه ع الجربايه وطلعت تليفوني من جيب البجامه مالتي وبديت احجيله وشوفته المكالمات اخذ التليفون من عندي وهو يقره بالرساله دك الرقم بتليفونه ماطلعله اسم..

بشار.. منين هذا؟؟ تعرفين احد قبل؟؟

قبس.. شعرف هو بس عزيز بشار لو اعرفه جان رزلته لو حظرته بدون ما اخليك تفكر بي بس اني خايفه وعبالك يهدد

بشار.. هذا اسلوب واحد يعرفني وغايته اني موانتي انطيني الرقم هسه اخابر ولد صاحبي بلكي عنده عرف بالشركه واذا ماكو اسلمه للمحامي وناخذ موافقه للشركه

بس المشكله هاي الايام كثرانه الارقام الكلك مابيهه لاعقد ولا اسم هاي الزوار  الايرانين من يجون يبعولهم ارقام بدون عقود ومن يسافر يعوفه ويرجع وياخذونه اهل الموبايلات يبيعو على شكم سرسري ..

قبس... ما اعرف اسوي حظر سويلي!!

بشار.. لا لاتسويله خلي يدز بعد اريد اشوف شلون ياخذج من بشار وشمعرفه اسمي بشار ؟؟ واذا هو الدوله شكو يتختل بالارقام عوفي تليفونج يمي ماتحتاجي هسه!!

قبس.. لا ما احتاجه راح انزل يم البنات وخلي يمك بس اشحنه مابي شحن رغم جان هادىء بس احسه كوه متمالك اعصابه بس مابين على نفسه

بشار.. اشتريتي ملابس اليوم؟؟

قبس.. اي اشتريت بس الفستان طلع جبير واصلا خرب واهسي وكالن ودي لمحل الخياطه مالتنه يسوو وباجر الصبح نجيبه!!

بشار.. جيبي وينه اكتبي القياس بورقه وهسه اخابر واحد من الولد من يطلعون الصبح يمرون علينه ياخذو ويرجعوا

قبس.. هسه اجيبه الك واجي !!

بشار.. خلي اصلي ما مصلي بعدني وجيبيلي جاي وياج!!

قبس.. ماشي ادلل

نزلت جوه سويتله جاي وصبيتله كوب واخذت الفستان والقياس وانتظرت شويه اسولف ويه نرجس وصعدتله شويه ارتاحيت من كال اني اعرفه ولاتخافين اني جنت خايفه من ردة فعله هو !!

بشار.. تعالي !!

قبس.. مادك؟؟

بشار.. لاا يعرفني رجعت للبيت ماراح يتصل يعرف يختار الوقت الصبح بالشركه ودك العصر والمغرب اني ماموجود لاتتوقعين هذا غريب ابد هذا عايش بنصنه ويعرف رقمج ويعرف تفاصيل كامله عنج!!

قبس.. منو فرح؟؟

بشار.. طكهه ضحكه بصوت والله اتوقعي كلشي فرح وائل فاطمه اعدائج هواي

قبس.. اي من حبيتك صارو عندي اعداء

بشار.. هاا اني السبب ؟؟

قبس.. لعد اني اسنين عايشه ماعندي عدو

بشار.. ليش مو جنه احنه اعدائج وتريدين تنتقمين من عدنه صدك شخبار انتقامج؟؟

قبس.. ضربته خفيف ع صدره بحنيه وحجيت بدلع بشااااااار

بشار.. لزم ايدي اي احجيلي وين انتقامج؟؟

قبس.. هو الي يشوفك يفكر بانتقام بعد

بشار.. ممممم يعني من شفتيني غيرتي رأيج؟؟

قبس.. عجبتني شخصيتك بس ماحبيتك لان شايف نفسك!!

بشار.. قصدج بليد؟؟

قبس.. بعدك تذكرهه هاي الكلمه

بشار.. موكتلج ما انسه اي تفصيله عنج الزغيره والجبيره طابعات براسي ...

قبس.. باجر تجي فرح لاهلا

بشار.. لانخليني اجيب ابو فرح اني وين احجي وانتي وين ربطتي

قبس.. شسوي اغار انت ماشايفهه شلون تباوعلك وعينهه وقحه وبعدهه تنتظرك

بشار.. شنتظر واني مليان بيج لا قبلج ولا راح احب بعدج هيج حب

قبس.. شحدك تحب غير ماتعرفني بعدك كلشي ولا شي خاص بيه لاتشوف هاي قبس الكدامك اسوي العجب واخليك تاكل اصابيعك ندم بس تحاول تزل عينك منا منا!!

بشار.. خوفتني ياحلو !! كومي يله البسي الفتستان خلي اقيسه الج!!

قبس.. شنو ؟؟ قاسنه البنات وهاي الورقه بيهه القياس مضبوط!!

بشار.. ماكو هيج اني قبل جنت اشتغل ويه ابوي وكل فنون الخياطه اعرفهه ولازم هاي الفنون اطبقهه عليج

قبس.. ادري بيك مهندس وكلشي اطبقه عليه بس القياس  اصبعين من الجانب و٤ اصابع من الطول

بشار.. اني ما امشي بالحجي اعتمد على الرؤيه بالعين المجرده هسه تكومين تلبسي لوماكو فستان؟؟

قبس.. تحجي صدك ؟؟ شيلبسني

بشار.. اني البسج رفعي اديج

قبس.. والله الي يشوفك بالشركه يكول الله يساعد مرته لايضحك ولا يعرف يتغزل

وبشار.. وهسه؟؟

قبس.. الله يستر منك لان تغلبني تغلبني!!

بشار.. لعد كومي يله خليني اشوفه عليج لان باجر اكيد ماراح اشوفج اطلع وتريدين اظل اتحسر خليني اشوف قبل الكل!!

قبس.. لعد اطلع ابدل وتعال !!

بشار.. راح انزل اشرب جكاره واجيج الكاج مبدله واخابر الولد يمر عليه ياخذه الصبح واخذ الكوب ويا وطلع..

قبس.. نزل هو واني قفلت الباب بدلت هو مستور حيل فستان طويل بي كصه من الصدر سبعه ونص ردن كيبور وكلشي مابي بسيط بس هو مثل كصه السمكه يرسم الجسم رسم

بدلت وظليت انتظره حسبتله عشر دقايق ودك الباب اني قافلته وكفت ورا الباب وفتحته خاف عمر يطلع لان غرفته صايره مقابيلنه طب هو وقفل الباب

قبس.. ليش قفلته؟؟

بشار.. جانت الجكاره بحلكه وهو يباوع ع طولي وعينه تصعد وتنزل

قبس.. وين تباوع خجلت من نظراته؟

بشار.. يوميه ادعي لامج ع هاي الخلفه وهذا الجمال البتله بي كلبي!!

قبس.. يله شوفه واخذ القياس خلي انزل عيب من خاله!!

بشار... متأكده بس اخذ قياس

قبس.. مشيت كدامه وكفت بنص الغرفه وخليت ايدي ع خصري كتله ليش مانستعجل بالزواج اذا هيج ماجاي تصبر

بشار.. هو هم هيج لان جاي تعذبيني بهذا جمالج شمر الجكاره وتقرب عليه حاوطني من خصري وايده الثانيه انمدت ع قراصتي فتح شعري نزل ع اكتافي وطبع بوسات متفرقه ع وجهي وبعدهه اخذ شفايفي بوسه عميقه وعبالك كل مره يبوسني بيهه مثل اول يوم اجربهه واحساسهه مختلف ..

ابتعد عني وكعد ع حافه الجربايه من جهه الرجلين واني ظليت واكفه واخذ قياسات الفستان ايده تتعمد تلامس جسمي واني ذايبه ولهانه بي وبحركاته

طلعت قياستنه غلط لان اذا اخذ من الجوانب تصير الردت مونظاميه كتبهن بورقه وكال خليهن بعلاكه وانطيهن لامي خاف تظلين نايمه وهو يجي من الصبح ..

قبس.. ماشي بس هسه اريد ابدل !!

بشار.. امري لله راح اطلع هانت ماظل شي وعود كليلي اريد ابدل واني اعلمج

قبس.. ضحكت !! وهو طلع بدلت ع السريع ولميت الفستان وخليته بالعلاكه ونزلت هو جان جوه من نزلت صرت كدامه حركلي حاجبه الايسر مرتين

ابتسمت وفتت للغرفه رغم قلقي والخوف الجنت بي بس ارتاحيت لان توقعته مثل ماكال شكاك وخاف يحملني مسوؤليه الرقم بس جان متفهم ...

ثاني يوم هوسه ورتبنه الاستقبال وكالعاده كلهن راح للصالون بس اني مارحت رغم ام بشار شكد لحت عليه بس ماحبيت اروح لان اني ما اخلي مكياج قوي اهم شي الكحل عندي وهذا متقنته يوم ببطن العين ويوم ع الجفن كل المكياج عندي هيج  اهم الكحل والمسكاره..

هالمره بسمه وبناتهه اجن ويه جيه العروس وكلنه ظلينه وحده تباوع لثانيه فرح هي العروس الصدر والرجلين كلهه طالعه حته ماتكدر ادنك وفاطمه ازيد منهه وعمه بسمه مكيفه ولاعبالك صار لرجلهه سنه من مات شلون نسوان !!!

اجت حوراء من الصالون ملامحهه حلوه وجمالهه عادي بس روحهه حلوه وعمه بشرى اصرت الا اكعد بصفهه وكالت ديربالج تتحركين وصدك لاكمت ولاركصت هالمره ثكيله عفتهه لفرح الجنهه مهرج ولابسه كعب طابقين وتركص وتفر شعر وعبالك كلبهه محروك وجاي اطلعه بالركص...

اجه العريس واني كمت ليجوه بدلت ولبست طويل وحجاب ع راسي وطلعت لكيتهم ياخذون صور ما اتاخر لان استحه شويه وطلع واهلهه هم ورا بنص ساعه راحو ظلينه بس احنه....

كامت عمه بشرى تركص وفرحانه رغم انتقدتهه عمه بسمه ودكلهه شبيج زغيرونه كالتلهه اي زغيره شحامي حمامج بنتي وحيدتي هاي اركصلهه للصبح وعود اذا عرست فرح لاتركصين لاتدخلين !!!

والله عمه بشرى تشفي الكلب بردهه هي وفاديه وصابرين بطنهه لخشمهه وكلساع تصيح بيهه ام بشار وتكلهه بس اهز ركبه ما اهز بطني!!!

سحبتني عمه بشرى كوه وشفتهه شاورت نرجس وفتحت اغنيه اسمر والعيون وساع كتاله

الذهب بسنون الفرك يحلاله

اهواك انه اهواك انه شماعذبيت احوالي 

عيون اليحب ع الغالي...

اني من اركص اندمج ويه الاغنيه يعني مااهتم للكاعدين وهو ماكو غريب وجنت اني وفاديه وعمه نركص لحدماتعبت وكعدت بصفي شجن كالت بشار يريدج !!

قبس.. شوكت اجه وينه؟؟

شجن.. هذاك بالهول كال صيحيهه

قبس.. خاف عرف ركصت

شجن... ضحكت لان ماتدري هو شافهه وعمه بشرى هي كالت خابرو وخبصته كالتله تعال واحنه عدنه باب بين الهول والاستقبال وفاتحي اليوم وهو من اجه خالتي الدكتوره كالتله تعال متع نظرك بهاي الرشيقه وشوفهه شلون تركص!!

قبس.. استغربت شعنده جاي طلعت ادور علي مو بالهول صحت بشار اجاني صوته بغرفه بيبي تعالي هناااا !! رحت لغرفه بيبي كاعد هو وخالته الدكتوره كعدت بصفه وكتله شعجب اجيت؟؟

بشار.. كالولي تعال شوف قبس عبالي بيج شي طلعتي تركصين

قبس.. عزاا وبحركه لا اراديه ضربت ع صدري سحب ايدي حيل وخزرني وهو دائما ينبه ما اسوي هاي الحركه

خالته لمياء.. قبس وين متعلمه هيج تركصين شرقي يخبل

قبس.. هاااا من جنت صغيره اركص وحدي محد

علمني !!

لمياء.. تعرفين امج مريضتي جانت تراجع عندي وجانت كل ماتجيني اشاقيهه اكلهه هاي عيونج من الله هيج وتضحك دكول شعمت عليه غير هاي العيون

قبس.. اي صح ماما كالت لوما عيوني ماجان ابوج سحل روحه عليه لان جان يحبهن بس عيون ماما بعد احلى

لمياء.. صحيح بعد اكبر وانتي رصاصي هي سود حيل ورمشهه طويل

قبس.. طول ماجانت تحجي خالته وهو يباوعلي بتمعن وعبالك عنده دراسه وجاي يدرس كلشي بيه حته خالته استاذنت وكامت

بس كامت اني كمت وكتله بشار بسلا شفتني اركص!!

بشار.. شكول عليج بشرى من وراهه راح اقدم العرس لج انتي سبيتيني سبي

قبس.. اي لعد استعجل بسرعه وضحكت وطلعت رغم راد يلزمني بس هالمره ماحصل غايته

ثاني يوم سالت بشار ع الرقم كال ماتصل ورجعلي فوني وكال اذا دك جيبي الي واذا ماموجود لاتجاوبين اجه الاحد وداومت الامور طبيعيه سناء ماجايه سالت عاليه

عاليه.. ليش ماتدرين موخطيه اخوهه الكاعده وياا هو ومرته وابنه ع الطريق السريع جايين من اهلهه ودايس عليهم لوري ومرت اخوهه ميته ابمكانهه واخوهه وابنه عايشين!!

قبس.. الله يساعدهه ويصبرهم خطيه سناء شكد تمدح بيهه وتحبهم وساكنه وياهم الله يستر من التايهات

بهذا اليوم شكد تعبت لان نشتغل شغل سناء حته لا يحجون ع قصور منهه ورجعت للبيت هلكانه بسرعه نمت...

ونفس الروتين اليومي وبشار ما اجه للعشه وبيبي وجهه ثكيل عليه وعبالك خاطفه رجل فرح وبس تمدح بيهه وعبالك تريده ياخذهه ويعوفني والله لوماحجيه جان عرفت شحاجيهه بس منطيتهه الاذن الطرشه...

جنت كاعده اشوف تلفزيون واجتي شجن كالت بشار يريدج ومبين عصبي من نبره كلامه!! خفت حيل بحيث اريد اكوم حيلي راح اكيد صاير شي !!!

صعدتله للغرفه لكيته كاعد اعرفه من عصبي بس يتصنع الهدوء او مايريد ياذيني صاح سدي الباب وتعالي ! سديت الباب وكعدت كدامه

قبس.. هابشار خوفتني صاير شي؟؟

بشار.. ليش تخافين اكو شي ما اعرفه حته تخافين ينكشف؟؟

قبس.. طبعا ماكو ومو كل مانخاف معناتهه اكوشي بس بالي يم الرقم خاف تعاركت!!

بشار.. لا عوفج من الرقم هالمره اني اريد استفسر منج

قبس.. خير عن شنو؟؟

بشار.. اليوم بالدوام المسائي اجتني ساجده هي جايه عليج وجابتهه السكرتيره عبالهه بعدج اداومين مسائي !!

قبس.. شتريد؟؟

بشار..حسب كلامهه جاي تشوفج !! بس هيج وحده كح... ادبر الف حجه واكيد وراهه غايه

قبس.. خلي تولي تدري بيهه تكرهني تموت مني هسه صرت عزيزه عليهه

بشار.. قبس اني من خطبتج الا اتاكدت من عندج وثقيت بيج وسالت عنج هوايه بس حياتج الي بتكريت ماعرف شي عنهه واني ماسالتج لان صدكتج بس ما اقبل تجي وحده ساقطه مثل ساجده تبيع مثاليات براسي والفضل الج لان ماتسولفيلي تخليني اركع وراج وبلاخير ماتبقه ركعه وتوكعين انتي بهذا سكوتج!!!

قبس.. وحده وحده ولزمت ايده لان جان يحجي بعصبيه واني اخاف من عصبيته بس هدي حالك وفهمني

بشار.... ما انطيتهه مجال وطردتهه بس حاولت تستفزني مره وقحه وادبسزز وهم تمالكت اعصابي وياهه لان سمعه الشركه اهم بس استفزتني من كالت لاتصدك ببرائتهه وتسوي نفسهه خام بهاي العباره كالت

كالت اسالهه عن بيت الضابط فلاح وشكم يوم ظلت يمه وشلون باگته وانهزمت جان يحجي واورده ايده واضحه وصاك ع اسناني وبس يريد يهدي حاله ولو زاله بكلمه وحده ويا جان انعادت الكتله نفسهه

قبس.. شكد حقيرة ونذله حضنت ايده وخليتهه ع كلبي كتله بس هيج كالتلك؟؟

بشار.. بس هيج اني ماسمعت منهه طردتهه بحكم انتي مسولفتلي!!

قبس.. قبل ما احلف بروح اهلي راح احلف بداعه حبي الك ولهفتي عليك اي كلام ينكال من ساجده جذب وتكرهني هي وهيج تطعن بيه

بشار.. منو هذا الضابط قبس وسحب ايده من بين اديه!!

قبس.. اني مريت بمنعطفات بحياتي مواجي كلهه اسولفهه مدامني ماغلطانه اندفن هالشي مواجي احجيهن الك حته تزود بشكك

بشار.. بس اني كتلج اكثر شي اكرهه الجذب ياقبس اموت من البنيه التجذب وعندي قانون التجذب ماتستاهل واحد يصونهه ويامنهه على بيته

قبس.. بس اني مامجذبه اسمعني..

من انهزمت من عدكم وهاي غلطة عمري المتندمه عليهه وسولفتلك اخذتني ساجده من جدي لان راد يتاجر بشرفنه وماكدرلي لان ضربت خالي سجينه هذا انت كله تعرف بي وكتلك جنت مريضه وساجده صح اخذتني يمهه بس خلت نص بطني جوع والله الي وجبه وحده باليوم لو اطلع اشتغل..

وجان واحد من الشغل تاخذني لبيت مال ضابط عنده عائله وبنات بكدي وامه واخته انظف بس ورا ساعتين تجي تاخذني وجنت اروح بين يوم ويوم والفلوس الي احصلهن بس اتعالج بيهن وادرس وانطي لساجده حته تخليني اكل وانام بغرفه وحدي ...

بيوم من عدهن جان عمري ١٨ سنه وهذا الضابط من كملت شغل ومنتظره ساجده كال تعالي اوصلح كتله شكرا عمو وهو رجال جبير كال لادكولين عمو لان اني خطبتج من ساجده ماجاوبته واجت ساجده ورجعت

ومن اجه موعد روحتي الهم ماقبلت وتعاركت وياهه وظلت تقنع بيه احسلي من عيشه الفكر بس اشتدت العركه بيناتنه وضربتهه بالماعون الكزاز وانجرحت ايدهه وخيطتهه وهي بعد سكتت عني ولاشفت الضابط ولا شافني

والله العظيم وروح اهلي وداعتك انت مازاله عنك بحرف اني قبس شفت المر وماسمحت واحد يلمس طرف ثوبي صح جنت مامحجبه لان كلهن خالاتي وبناتهن والبيئه العشت بيهه مامحجبه بس مومعناتهه اني موخوش وتصدك كل كلمه تنكال عني

بشار.. اني لو مصدك ماجاي احجي وياج هسه تعرفين بيه من اصدك شسوي بس موهينه تجي تحجي عليج اني اتفهمت احتمال ينكال هذا الحجي بغير مكان ومنو يدافعلج

قبس.. رفعت راسي كتله هاي اني رغم ما سويت عيبه بس الماضي يلاحقني ويأذيني وماضي امي هو السبب وصلني لهنا جانت الدمعه بطرف عيني بس حاولت قدر الامكان ماتنزل كدامه

ظل يباوعلي وادري بي بين المصدك وبين مامصدك غمض عيونه ورجع راسه ع الجربايه شلون راح نعيش يابشار اذا انت بهالعصبيه والشك والغيره

بشار.. الرقم ؟؟ وساجده!! صارن اثنين ومن تصير الثالثه ما اعرف راح اتمالك اعصابي لولا

قبس.. عرفته الرقم؟؟

بشار.. لااا الرقم مامسجل وكلما اتصل علي مغلق

قبس.. انت بنفسك. كلت ساجده ساقطه يعني تجذبني وتصدكهه

بشار.. مواصدكهه بس كتلك هيج وحده تحجي بكل مكان وما اقبل واحد يذكر اسمج ابد يعني من طبت هيج وحده   تسال عليج والموظفين كلمن يكول هاي بايعه ومخلصه اكلهك خاله مرتي؟؟

قبس... ظليت ساكته هو اني كل خالاتي سكط واني متحمله العار  كمت من يمه وكتله تصبح ع خير اصلا مالي عين اواجهه وكل كلمه يكولهه صح

هو رجال شرقي وكال بلسانه اني شكاك وماضييج ماذيني وما اعرف شلون اتصرف وشلون ابعده وشلون اطمن باله الف شلون وليش براسي بدون جواب؟؟

مددت بفراشي واني افكر بحياتي ومعقوله بشار راح يعاملني مثل بابا من جان يعامل ماما ويضربهه ويهينهه لان هم شكاك وعصبي وماما متحمله وساكته معقوله توصل بيه اتحمل واسكت لان ماعندي احد اروحله وهو يظل عايش بهالعصبيه والشك !!!

غمضت عيني واني افكر وتليفوني يم راسي مخليته اهتزاز بعدني بوسط افكاري وكمزت ع اهتزاز الفون واشوفه رقم غريب لان ذاك حظرته

بسرعه هي كومه وهي ركضه ع الدرج قبل لاينكطع فتحت الباب حيل جان كاعد يشوف تلفزيون

بشار.. اسم الله شبيج مفزوعه؟؟

قبس.. بشار رقم يدك عليه بعدني مامكمله وانكطع الخط!!

بشار.. تعالي اكعدي عليمن هالفزعه هسه يرجع يدك بس جذاب اعرفه ورا هذا الهدوء عاصفه تاخذ الاخضر واليابس !!

كعدت يمه واني اهز برجلي رجع دك بسرعه انطيته اله جان يكول انتي ردي فتحي خط وكولي الووو واسكتي تفاجات بطلبه وما اعرف الغايه من عنده !!!

هو فتح خط وفتح سبيكر بنفس اللحظه وهو لازم التليفون وكلت الوو بصوت شبه حاد!!

اجاني صوت واحد  وهو يحجي دفعه وحده!! كال قبس؟؟ ليش هيج خليتي بالي عليج انتي موكلتي من ينام بشار اخابرك عبالي كشفج!!!!

يتببببع... متابعه شيقه

قمع المشاعر.... البارت الخامس والثلاثون

للكاتبة زهراء ( روزايه)...

اجد نفسى دائما فى حالة انتظار

انتظرك فى غيابك حتى تعود

و استعطف الدقائق و الثوانى

ان تتوقف عند عودتك ...

انتظر كلمات منك تريح قلبى

انتظر بسمة من شفتيك

انتظر حبك الفياض

المتدفق بعد اياااااام الجفاء ..

ف انا فى انتظارك حتى تعود

....

قبس.. من الصدمه الآني بيهه وكع التليفون من ايدي مو بس عيوني مفزوعه كل اعظائي انتفضت واشر براسي بالرفض حته ماكدرت انطق كلمه وحده وادافع عن نفسي الصدمه عكدت الساني..

بشار.. خله ايده ع كتفي اهدي قبس لان ظليت بس اهز براسي  !!

قبس.. حجيت بتعلثم ب بشار مواني !! بس هاي الكلمه الكدرت اكولهه رغم هادىء وما انطه اي ردة فعل وبس يباوعلي بس لو مصيح ومتعارك ولا هذا الهدوء ..

بشار.. ظلي هنا لاتنزلين وبسرعه فتح الباب وطلع من كدماجنت مصدومه ماسمعت كلامه دنكت اخذت التليفون وامشي واشكل بالبطاريه مالته نزلت ورا جان بعده ع الدرج بس ينزل بهدوء وهو حته من يجي مانسمع خطواته ..

التفت عليه شافني اشرلي باصبعه بمعناتهه ااشش اتبعته ع كيف بس كل حيل ماعندي كلساع احس نفسي راح اتخربط بعدنه بالهول جان تطلع صابرين من المطبخ بس شافتنه. صاحت بسم الله الرحمن الرحيم...

بشار.. حجه وياهه بحده شبيج انفزعتي لو ظلمه اكول حقج

صابرين.. هااا لا بس فزيت لان كلهه نايمه واني بالي مو يمي

بشار.. هااا زين لعد

صابرين.. تصبحون ع خير وصعدت حته رغم حملهه جانت تصعد الدرج وهي تتعثر بس انتبهت ع ايدهه شايله تليفونهه..

بشار.. روحي شوفي البنات نايمات؟؟

قبس.. ليش؟؟

بشار.. بدون ليش شوفيهن وتعالي اني راح اشوف الحجيه نايمه لوكاعده!!

قبس.. تصرفاته غريبه حته الخوف البداخلي تلاشه توقعت يصيح يغلط يضرب بس هادىء الى ابعد حد رحت للغرفه فتحت الضوه البنات بسابع نومه سديته وطلعت هو هم طلع من غرفه الحجيه

قبس.. بشار بشنو تفكر؟؟

بشار.. ظلي هنا شويه خلي اشرب جكاره واصيحج حجه هيج وطلع للحديقه واني كعدت ع الكرسي واباوع لتليفون مقفول بيدي منو هذا اليسوي بيه هيج؟ شنو ذنبي ما اضوك طعم الراحه بيوم لشوكت اظل مشلوعه گلب؟

ظليت كاعده واني متوتره حيل ساعه اكول بشار مصدكني وساعه اكول ورا هذا الهدوء راح ينفجر عليه ضغطت راسي حيل وهزيته بهاي الايام الاخيره من كد الضغط والتفكير وتاركه العلاج احس نفسي راح اتخبل

والطبيب كالي اذا مابعدتي نفسج عن التفكير والهلوسه باشياء ماموجوده راح تتنشط عندج الشخصيه العنيفه البداخلج وترجعين تعانين من الانفصام وهذا الشي يدمرج لان نهايته تؤدي الى الجنون واصلا اني بيه حاله نفسيه من الدرجه الثانيه من حياة اهلي وجان الطبيب يشجعني ويكول انتي قويه لو غيرج جان هسه تفتر بشوارع !!

شويه واسمع صوت باب المطبخ ينفتح كمت بسرعه اشرلي اجي طلعت برا وسديت الباب نزلنه كعدنه بالحديقه ع الدرجات جانت الساعه بحدود ١ بليل والجو حار وبوخه احس نفسي منا ضغط ومنا حر راح اخرب وكوه مسيطره ع وضعي..

بشار.. ليش خايفه؟؟ وخله ايده فوك اكتافي!!

قبس.. مصدكني؟؟

بشار.. اشايفه الكدامج زعطوط ويصدك بكلشي مولهدرجه تشغلين نفسج بتفكير موصحيح لو عندج شي ماجبتي واجيتي تركضين!!

قبس.. منو يسوي بيه هيج ؟؟

بشار.. والله ماادري منو؟؟ وغايته موبس انتي اثنينه لان يريد يلوي ذراعي بيج هواي اشياء غامضه يعني شمدري بهاي الساعه انتي كاعده؟ وشمدري ركضتي اليه وجبتي التليفون؟  ولو فرضا عندج شي مايحجي كلامه دفعه وحده وتعمد يذكرني وعبالك يعرف انتي يمي؟؟

قبس.. يعني اكو احد من البيت قصدك؟؟

بشار.. ماادري شفت الحجيه كلت خاف هي وفرح لان دائما ادافعلهه وطلعت نايمه والبنات نايمات بس صابرين كاعده؟؟

قبس.. يعني صابرين؟

بشار.. انتي موطبيعيه قبس اتشوفيني اعرف اشو ترجفين اذا مامسويه شي عليمن هالخوف؟؟

قبس.. اني اكلك عليمن ؟؟ اول شي انت يابشار انت كتلي اني شكاك واني اتعبج يعني تشك بيه احتمال وتاخذني بذنب اني بريئه من عنده!! والشي الثاني هاي سمعتي اليسوي هيج واصل اعلى مرحله بالحقد ومستعد يدمرني وانت خاف تصدك كلشي. ينكال عني؟؟

بشار.. اسمعي قبس اني شكاك صح بس شكي بخصوص الماضي مالتج فقط!! يعني الحاضر انتي كدام عيني ولاتتوقعين من عندي خطبتج اريد اجربج لو اذيج ما خطبتج الا تاكدت من عندج بالحاضر والماضي اكو شي بي بس كلتي اتحملك لحدما اتخلص من عنده!!

خلي ازيدج معلومه تدرين عيني عليج بكل مكان عبالج اداوم وملتهي ومااعرف شي عنج؟؟ حته تليفونج كل شكم يوم ادوره شبي مابي حته ارضى نفسي ومن اسمع شي عنج اني متاكد من عندج واكدر ادافعلج عيني عليج تفتر طول اليوم ومتاكد مثل مامتاكد من نفسي حاضرج نظيف وما اتهمج بالماضي بس هاي بعد عندي شك ناحيته بس مومعناتهه اخذ الحاضر بذنب الماضي؟؟

قبس.. وهسه شراح تسوي هم مثل ذاك الرقم ماعرفناه ؟؟

بشار.. انطيني الخط هسه وباجر اني اشتريلج غيره!! خلي يمي بس لادكولين ابد حته لاخواتي بس علمود اخابرج لا اكثر وسوي نفسج طبيعيه وكانو عندج خط وتخابرين واني راح اعوفه مفتوح بجهازي وانشوف !!

بشار.. انتبهي زين شلون عشتي ايامج قبل حذره من كلشي هسه هم هيج ؟؟ انتي امنتي يمنه لذلك انتبهي وخليني اشوف الرقم منو؟؟

قبس.. هاي فرح يجوز ووائل؟؟

بشار.. انشوف ماكو شي يظل مضموم اني اتوقع وائل اله ايد بالسالفه وغايته مو انتي غايته اني!!  اني وائل تربينه سوه ويدري بيه مايلوي ذراعي غير الشرف والعرض وهذا السوا كله موبس حبآ بشجن بنفس الوقت انتقام من عندي

قبس.. الله لايوفقه اني خايفه حيل وحته ماعندي احد اسولفله غيرك؟؟ شال ايده وحضني صار راسي ع صدره وباسني من شعري وهو يحرك ايده ع راسي !!

بشار.. خلي انقدم العرس البيت الشفتي جان كامل طابق واحد واني ومهندس وياي سحبنه قرض من الاسكان وبديت ابني بالطابق الثاني وبعدنه بلبدايه يعني مانكدر نتزوج بي وهو ماكامل..

قبس.. عادي احنه بالطابق الجوه ويبنون بالثاني

بشار.. لاماترهم اول شي اني منطي لمقاول وثاني شي شلون اني دوام وانتي بالبيت وعمال يمج خلي نتزوج مؤقتآ يم اهلي وبعدهه ننتقل من يكمل البيت

قبس.. اني اريد ابعد نهائيا عن فرح خاف بيوم العرس وتسويلنه سالفه بشار دبر حل فدوه والله جبت عمري كله متعوبه وهسه من بديت ارتاح ضربه ورا ضربه

بشار.. خلي اقدم ع اجازه اذا انطوني موافقه نسافر شهر ورا العرس ومن نرجع نلكه البيت كامل اني هم مااريد اشوف خلقه فرح هاي البنيه موبس عديمه كرامه حته بدت اخلاقهه تتلاشى ومع الاسف وصلت لهاي المرحله

قبس.. غير تحبك؟؟

بشار.. الانسان بدون كرامه مايسوه فلس والحب موكلشي هوايه ناس عاشت حب من طرف واحد واتحملت واكو منهم حته ماحصلو مرادهم بس حافظوا ع كرامتهم

فرح اصغر من عندي ب٥ سنوات ومن جانت بلاول متوسط اشوفهه من ناحيتي خفيفه مع العلم والحق يقال اخلاقهه بالمنطقه وبالكليه ابد لا سوت علاقه ولا طلعت عليهه حجايه موحلوه بس يمنه بينت ع حقيقتهه

قبس.. هي هم كالتلك احبك؟؟

بشار.. اي هوايه كالت واصدهه بس ماينفع مو اكلج ماعدهه كرامه واني جنت استخطيهه سابقا واكول موبيدهه ماتكدر تتحكم بمشاعرهه!! بس من حبيتج وجنت متردد من ناحيتج عرفت شنو الحب من طرف واحد وشنو دور الكرامه يعني جنت ناوي اضم حبج بكلبي للابد ولا اسمح بيوم تصديني !!

قبس.. نكول لاهلك ع العرس؟؟

بشار.. لااا هذا حلكج تسدي وماينطق حرف واحد ومد ايده ع شفتي الجوه سحبهه باصابيعه ع كيف!!!

قبس.. اااوي!! لعد شلون اجهز؟

بشار.. اني احجي ويه امي وبشرى ومن اتجهزين تخليهن يم بشرى

قبس.. شنو بايگه بوگه غير اريد اتهنى

بشار.. تتحملين النتائج انتي؟؟ مانتزوج الا اعرف الرقم منو؟ وخاف تطلع فرح ومن تشوفج اتجهزين تخبث اكثر وخاصه هسه وائل مايعرف شلون يتصرف من ورا المحكمه؟؟

قبس.. صدك شو سالفه وائل سكته وحته عمو مايحجي بيهه؟؟

بشار.. عمج من يحجي بسالفهه يخربهه لان كلبه طيب اني ما احب عصبيتي تغلبني واخسر كلشي دائما احب اتأنى بلاشياء لحدما الكه طريق صحيح بدون مطبات؛؛

قبس.. ذاك اليوم اجتنه ام وائل نسيت اكلك وجابت نسوان وياهه وتعاركن ويه عمه بشرى

بشار.. كرصني من خدي حيل ادري سولفتلي امي وانتي ماسمعت من عندج!!

قبس.. اااخ ع كيفك ويه خدي !! نسيت والله هسه يله تذكرت وبعدين تعال اني شعليه قابل البلبل الفتان مالتكم الشغله تخص اهلك هم يحجولك

بشار.. ااي ام اللسان بهاي صدك!!

قبس.. عبالي هم تريدين تحاسبني؟؟ دكلي ماسجنو؟؟

بشار.. لا بعده اكو امر اعلى من عنده كلما يروح التبليغ يسترله والمحامي هلمره كال اني اروح للاعلى منهم وابلغهم

قبس... شوف شلون مطمطين السالفه عن الكل حته غيث ومرته مايعرفون

بشار.. بعد وائل شايفه شكد نذل وشكم جندي مأذي ظلت ورا المحكمه صح اريد اشوف مسحول بس دائما آمن بمقوله بالتأني السلامه وبالعجله الندامه...

كومي يله نامي الوقت تاخر انطيني الخط وباجر اذا ما الج خلك لا اداومين وهذا الموضوع يبقه بيناتنه لازم اعرفه منو ؟

قبس.. لا اداوم فشله سناء باجر تجي واني مارحتلهه ع وفاة اخوهه طلعت الخط من التليفون وانطيته اله !!

بشار.. يله حبيبي كومي نامي ولاتفكرين باي شي اني افكر بمكانج ولاتخافين اي شي يصير تعالي احجيلي حتلو اعصب عليج بس ادافع عنج وما اقبل هاي العيون تبجي

قبس.. تسلملي حبيبي يله راح انام تصبح ع خير وكمت من يمه بعد ماباسني من خدي وحضني وطبيت جوه اسمع طكه الجداحه والظاهر راح يبقه كاعد..

كلامه طمنب وارتاحيت شويه مددت بفراشي ونفضت الافكار كلهه من راسي مثل ماكال عوفيهه وراي اني افكر بمكانج استسلمت للنوم وسط ضجيج دماغي وتضارب الافكار عندي..

كعدت على صوت شجن وهي تكعدني قبس قبس!! اكعدي الساعه ب٦ ونص موعندج دوام؟؟

قبس.. شلت نفسي من الفراش واحس اعظامي متكسره ماشبعانه نوم سالتهه شعندج كاعده؟؟

شجن.. صليت ومااجاني نوم وطلعت بالحديقه يم جدو وهسه اجيت كعدتج شبيج مريضه ؟؟

قبس.. لا مابيه شي

شجن.. الفجر من كعدت صليت ردت اكعدج بس شفتج غاطه بالنوم كلت تلحكين تصلين من تكعدين والمكيف مفتوح بارده الغرفه ثلج رحت توضيت ورجعت لكيت بشار يغطي بيج ومخلي ايده ع شعرج عبالي بيج شي

قبس.. اكول منو مغطيني؟؟

فاديه.. وهي من جوه فراشهه وعبالنه نايمه جان دكول وانتي باليتني بلوه يوميه تساليني ماعندي شغل وعمل اغطيج وكولي بشار موزين اذا حته غطه يوميه يجيج لعد شكد مداريج!!

قبس.. عوبه شكعدج بس ماادري ما احس نومي ثكيل وحته ما احس بالبرد والله عبالي انتن تغطني

شجن.. لا مو احنه اني دائما اشوفه يجي يغطيج واليوم من شافني عادي ولاحجه بس كال كعديهه ب٦ ونص وطلع

قبس.. اكول خوما يطلع من عندي شي ؟؟

شجن.. لا انتي لابسه تراك بس مرات من افز والكاج مامتغطيه لو بجامتج مرفوعه للركبه لو ظهرج شويه طالع من عنده

قبس.. عزااا بعيني وهسه جايه دكليلي ؟؟

فاديه.. ديله هو انتي بس بغداد عندج شايله روحهه منيلج تضاريس رشاقتج مبالغ بيهه مابيج لحمه خطيه اخوي بس اعظام يلكه

قبس.. هسه ماالحك خلي اكوم اصلي وابدل واني اعلمج من اجي هذا جسمي الرشيق انتي بنفسج تتمنين تصيرين مثل جسمي وتقلدين علي ست فدو

فاديه.. بس ماعندج تضاريس احنه عراقيين نحب الحدود والتضاريس والسهول والهضاب بس اخوي مايشوف سوده عليه ع حجايه بيبي انت تحب اليشلع كلبك وماتحب الكاتل روحه عليك

شجن.. كومي قبس هسه تتاخرين من ورا هاي ام اللسان وهسه ترجع تنام ولانفع ولادفع

فاديه.. لج الدجاجه العميه دكولين عليه فاهيه هسه مابيه اكوم خلي اكعد واني اعلمج جانت لافهه نفسهه باللحاف مطلعه بس عيونهه وتحجي

عفتهن متعاركات وحده تعير الثانيه بلقبهه وكمت غسلت وتوضيت كملت صلاه وع السريع بدلت بعدني البس بالشال وصاحت ام بشار اجاني السايق كلشي ع السريع حته مالحكت اتريك طلعت اركض من الغرفه

ام بشار.. هاج اخذي هاي اللفه اكليهه بالسياره وهذا الكوب السفري خليتلج بي جاي وسديته لاتنجوين

قبس.. بستهه من خدهه الله يخليج الي ياخاله ويطول بعمرج

ام بشار.. الله ينور طريقج ويبعد عنج كل مكروه روحي يوم تاخرتي فدوه لهالعيون الماينشبع منهه

قبس.. انطيتهه بوسه بالهوه وطلعت شنو من انسانه مثل مانكول ذهب مصفى مايوم حسستني اني ما انتمي لعائلتهم من جيتي يمهم لحد الان واحسهه امي وبحنيتهه واكثر راح اظل اكل باصابيعي ندم على هذيج السنين الضيعتهه واني اكرههم واحملهم المسوؤليه...

اكلت لفتي وشربت جاي بالسياره من نزلت ذبيتهن بالحاويه وطبيت بوجهي للحمامات غسلت وعدلت شالي طلعت الحمره خليت منهه بناتيه وماتبين لان من تحجبت اني من ذاتي تركت كلشي رغم بشار ماحجه بس نهائيا ما اخلي مكياج غير الكحل والمسكاره وحمره بلون الشفه للترطيب...

رحت للغرفه لكيت سناء جايه سلمت  عليهه ونصبتهه مناحه واني اريدلي حجه هي تبجي واني ابجي حيل متأذيه على مرت اخوهه وكعدت تحجي شلون صار الحادث وابن اخوهه عمره شهرين حايره بي تكسر الخاطر...

ماخليناهه تشتغل اني وعاليه نشتغل بمكانهه جنه مندمجين بالشغل واجت السكرتيره كالت لجنه من الوزاره انتبهو ماعدنه شي وكل شغلنه تمام. واكثر المشاكل التصير والاغلاط من دوام المسائي بس قبل مانبدي يوميه ندقق يله نبدي نشتغل...

شويه وانفتح الباب بيهم ٤ زلم كبار ونسوان اثنين لابسات تنورات قصيره وعجايز شعرهن اصفر شايلات كل سجل شكبره حته خفنه من عدهم هالمره حادين علينه بس وحده من عدهم حاجت السكرتيره كالتلهه بس صيحولنه استاذ بشار !!!

واحنه واكفين مثل الاصنام وهذوله الشياب فد عيون زفره يگصون بينه وحده وحده حته وحده من اللجنه صايره كدامي يمد راسه من وراهه حته يباوع !!

اجه بشار بس شفته ابتسمت ياربي شلون بيه وعبالك اول مره ينبض گلبي بشوفته كل شعور ويا احسه انولد من جديد اناقته وعنده جاذبيه وكلامه شكد هادىء

ماقبل ع وكفتهم كالهم موكلكم تفترون ع الشركه عدنه موظفات مابيهه داعي وسحبهم برا وظلن بس النسوان دققن شويه وطلعن

سناء.. هذني منين جايبيهن جنهن كفشه بيبيتي من تخلي حنه

عاليه.. شلون تشبيه رجليهن بالكبر والبكدهن شبع مي ورد وهن مطلعات السيقان

سناء.. شبيج تلكيهن عوانس مثلنه

عاليه.. لا ولج متزوجات نسوان كبار

سناء.. وحق ربج عوانس مبينات يختي وحدتهن عينهه شابحه ع ريحه الرجال مثلي ومثلج

عاليه.. وشوكت نتزوج احنه

سناء.. موعيب هالحجي شنو زواج اكعدي سبحي واستغفري ل٤٠ مؤمن ومؤمنه احسنلج ياعرس ياصخام فاتنه القطار وانكسرت السكه ...

قبس.. رغم حزنهه بس ماتكدر اذا ماتحشش ضحكنه وياهه صارت الساعه ب١٢ كمت للحمامات تذكرت ام حسن كلت خلي امر عليهه اشوف شكوماكو بس طبيت كتلهه هلاووو خاله ام حسن جانت تخابر بسرعه سدته

ام حسن.. هله بنتي قبس تعالي اكعدي

قبس.. شلونج خاله هالايام ما اشوفج

ام حسن والله يابنتي شحجيلج وكعتلي بورطه شكبرهه

قبس.. كولي اساعدج

ام حسن .. لا خاله محد يساعدني غير ربج

قبس.. خير يارب سولفيلي محتاجه فلوس كولي ام حسن

ام حسن.. يابنتي قبس اني مره وحيده وماعندي غير بنتي الارمله ومايهون عليه ادور شغل واني متحمله المسوؤليه تذكرين ست ميامين سولفتلهه وضع بنتي وكالت اني اساعدج واخذتني لبيت اشتغل بي ويداروني بلاكل وينطوني شعدهم ملابس بس يايمه تورطت

قبس.. منو هذوله؟؟ وليش تورطتي؟؟

ام حسن .. ذاك اليوم السالني عليهم استاذ بشار هيج بيتهم بمنطقتكم يجي الرجال ياخذني انظف وارجع وحفيدي اسم الله عليج جري اذنج عنده تليف بالكبد ويحتاج عمليه وست ميامين تدري كامت جابتلي فلوس من ابو البيت ابو السياره نفسه السالتيني علي وسوينه العمليه وعبالي مسويهه لوجه الله

وهسه يكلي لوترجعين الفلوس لو تنطيني عليهن ارباح واني كمت اشيل راتبي ادفعه ربح وطردني من البيت ما انظف بعد وورطتني هالمره وكتلهه ست ميامين هيج يكول دكلي لعد شعبالج ماكو مساعده بدون مقابل...

قبس.. طلعت من ام حسن واكو فكره براسي معقوله يضغطون عليهه بغير شي وام حسن ماكدرت تحجي لان خلصتهه بواجي رحت بوجهي لبشار استأذنت وطبيت جان يشتغل ع الحاسبه

وكعدت احجيله بالتفصيل وهو صافن عليه ويسمع من عندي كتله سمعتني وين راح بالك؟؟

بشار.. اي اسمعج بالي يمج همزين كتيلي خلي انشوف ميامين منيلهه هالرجال وتشغل عنده وتستغل الناس الفقره ولاتنصلح ابد!!

قبس.. يله خلي ارجع للشغل

بشار.. خابرت ابو حسين كتله لاتجيهه اني ارجعج

قبس.. ليش ماعندك دوام مسائي؟؟

بشار.. عندي بس حجزتلج من البارحه بمركز تجميل خلي اخذج للفحص حته يحددون موعد ليزر

قبس.. صدك؟؟؟ حجيتهه بفرحه

بشار.. اي صدك بس نتفق !!

قبس.. ع شنو؟؟

بشار.. اشوفهه قبل ماتسويهه

قبس.. يمه منك ماطير طير بضباب لاعيوني ماتشوفهه هواني اريد اخلص منهه!!

بشار.. موبكيفج!! هسه روحي كملي البيدج ومن اطلعين كليلي او ظلي انتظريني بمكانج

قبس.. طلعت من يمه واني فرحانه واخيرا  راح اخلص من عدهه يارب كون كلهه تروح والبس بدلات العرس كلهن صلوخ ودلع وما اتقيد بلبسي بالمناسبات ولا من نتزوج اظل استحي منه من اي لبس ...

انتهى الدوام واجاني للغرفه طلعنه سوه اول مارحنه للمطعم تغدينه وبعدهه اخذني للمركز ننتظر الحجز مالتنه شويه واجه سرانه دخلنه اني ويا سوه بلاول كعدت احجي للدكتوره عن الوحمه وكالت كومي اشوفهه كمت وياهه رجعت البرده وشافتهه

الدكتوره.. هسه كلامي راح يكون ويه زوجج قبل لايكون معاج انتي حابه تزيليهه وعندج اراده قويه وهذا الشي ينفع بالعلاج بس خلي انطيكم هاي النقاط

اول شي الليزر راح يكلفكم هوايه لان حجم الوحمه كبير!! والشي الثاني والاهم الوحمه البصدر نزيل جزء من عدهه ومااكدر اتعمق قريب الخلايا لان خاف من العواقب لان هاب منطقه حساسه حيل وماتتحمل ضربات ليزر قويه والوحمه يحتاجلهه ضربات قويه حته تنشال والراي الاول والاخير الكم..

قبس.. باوعت لبشار ما اعرف شكول المبلغ الي طلبته هواي وجلسات كلش هوايه

بشار.. هاهي حددينه موعد وان شاء الله نجي

قبس.. انطتنه الموعد الاسبوع الجاي واني ساكته بس صعدت بالسياره التفتت علي

قبس.. بشار ما اريد شفت شكد تكلف

بشار.. وهسه اني ماصارف وابخل عليج

قبس.. انت ماتقصر بس مكلفه وهذا المركز غالي شدعوه

بشار.. ماسمعتيهه شكالت وحمه من الكتف للفخذ وماكله نص من بطنج وظهرج طبعا تكلف

قبس.. مااريد اني اجمع رواتبي واسوي هسه احنه عدنه بنيان وانريد نجهز للعرس؟؟

بشار.. شنو هالحجي قبس عندي لوماعندي اكلج خلي انسويهه ونخلص ليش تنحرجين منهه ومسببتلج قلق نفسي محد يدري بس اني وياج اني اخذج للجلسات لاتحجين

قبس.. وتجهيز العرس لسه مابدينه

بشار.. الجمعه اطلعي جهزي ذهب مشتريه بس ملابس ومن تكملين تجهيز انحدد اليوم

قبس.. وصلني للبيت وراح صابرين يم اهلهه ولكيت فاديه تحجي شنو يوميه تروح وتعوف مواعين العشه وتلافيآ للمشكله اني اغسلهن

مرت الايام عاديه وكلما اسال بشار عن الرقم يكول بعد!!

طلعت جمعه وسبت جهزت وعفتهن يم عمه بشرى ومحد يدري بس عائلتهم وبعدنه مامحددين الموعد بيومهه اجه عمر وكال وائل بالسجن ورافعين بي كتاب الفصل من الوظيفه وهذيج امه تعد علينه!!

ام بشار.. شلون فصلوا ماتفهمونه انت واخوك تشتغلون من ورانه

عمر.. وشدري اني ؟ حالي من حالج ياخذوني اشهد ويرجعوني للمحل هو ابنج يمته يحجي بس شعليج سحله سحله والله هاي تبرد الگلب اكثر من الكتله مالته ع الاقل تنداس كرامته ومحد يحترمه

قبس.. بيومهه الباب والتليفون ماسكتو شكد اجت ناس ع جدو وعمو عادل وعامر يمنه يريدون بشار يتنازل لاول مره اتاكد عدنه قانون بالعراق بس كالو القاضي رجال شريف ...

التهوا بسالفه وائل يوميه واحد جاي وشيخ فلان والسيد الفلاني وبشار مايقبل حته يكعد وياهم ويتناقش واصر ع موقفه وترك وائل هو والمحكمه حته كال حتلو طلع من السجن بس المهم ينفصل ودائرته تدري بي واحد عار ومتستر بنجماته

بيوم من عدهن واني ايامي ماتمر مثل العسل لازم اضوك المر بيهه ولازم اتلوع وهاي الدنيا لعبه بيه طوبه تسحلني منا وتخليني اوكف ع رجليه وترجع تشمرني من اعلى مكان...

جانت عصريه وكاعده يم البنات ويحجن شيشترن للعرس وهذا الوقت مستحيل يرجع بي بشار لان دوام بس تفاجات من سمعت صوته بالهول ظليت كاعده ماطلعت واكيد هسه صعد لغرفته...

مندمجين بالسوالف وانفتح الباب اشوفه كدامي وهو بملابس الدوام وبنفس عصبيته بسالفه شجن صاح ع اخواته يطلعن واني ع كعدتي ياربي يوميه هبطه !!

قبس.. بشار خير شصاير؟؟ شمر عليه ورقتين جان صاك ع اسناني ويحاول مايطلع صوته حته لايسمعون اهله..

قبس.. كمت وكفت وما انكر خوفي رغم مامسويه شي بس من عصبيته خفت سالته شنو هاي؟؟ لزمني حيل من ايدي جان يكول اني اسالج شنو هذني!!

جريت ايدي من عنده حيل وشلت الورقتين اول وحده فتحتهه عقد زواجي بعزيز ومخلي دائره ع التاريخ استغربت شجاب العقد؟؟

فتحت الورقه الثانيه التاريخ مالتهه قبل تاريخ زواجي من عزيز قبل شهرين نزلت عيني اقره بالورقه ويه كل كلمه گلبي يريد يطفر من صدري!!!! احس مثل الواحد رمو من جسر عالي وظل معلك لاهو المات وارتاح ولااكو واحد يكدر يساعده!!!

يتبببببع... متابعه ممتعه

قمع المشاعر.... البارت السادس والثلاثون

للكاتبة زهراء ( روزايه)...

وأذا ألتقتْ عَينُ الخَليل خَليلِها ،

وسطَ الحُشود ليس للنطق ثَمن ،

تكـفي تعـابيرُ الـوجوهِ كـأنها

أنهارُ شوقٍ فاضَ مِن فرطِ الشجن ..

...

بشار.. احجي ليش انفزعتي لهدرجه اني مغشوش بيج وادافعلج واطلعين هيج مسويه حاجيني قبس قبل لا اجرم بيج !!

قبس.. باوعتله بس نيران الدنيا كلهه مجتمعه بعيني كوه لازمه اعصابي بلاول كلي منيلك هالاوراق هاي؟؟

بشار.. ويهمج منين؟؟ احجي قبس وجرني حيل من ايدي صارت عيني بعيني ابد ماخفت ومااهتز شي بداخلي مدامني ماغلطانه جنت احجي واباوع بعيونه صايرات حمر من العصبيه ولزمة ايده عبالك قطعه جمر ومعلكه ايدي بيهه

قبس.. اول ورقه عقد زواجي وما اعرف منين جبته وشنو المناسبه وعبالك اول وحده تطلك!! والورقه الثانيه جيب التهمني هيج تهمه مااسمح لكان من يكون ولا حته الك تشك بشرفي

جريت ايده حيل من عنده وماتركهه ضغط اقوه ع زندي حته تأذيت ورفعني ليفوك احس كتفي راح ينخلع بس ماكلت ااخ الوجع البكلبي اكبر ولانزلت عيني من عينه ولارجفت بالحجي

بشار.. اني اشك بشرفج؟؟ انتي عرضي ورقه مختومه ومكتوب بيهه فحص عذريه قبل شهرين من زواجج وبعدهه تزوجتي زواج كسيف وبدون مهر شفسرهه هااي؟؟ لاتختبرين صبري لان لازم نفسي كوه عنج والله ياقبس وحق محمد اذا لاسامح الله وطلع اكو شي ادفنج يم امج وانعل ابو حبج احجي بسرعه!!!

قبس.. عوف ايدي كتلك عوفهه وتلاويت ويااا ودفعته من صدره تركهه!! حرامات قبلت بيك وحرامات اكول عليك تسندني وانت من ورقه اجيت تشكك بيه وبعيني دكولهه واعرفك مامصدكني

بشار.. لاتلغين !! كل هذا وما ساندج هاي وكفتي كدامج واني لازم اعصابي عنج شنو هاي؟؟ لو اكعد اتخايل هيج موقف جان تخايلت اضرب واسب وفوكاهه مااهتزت من عندج شعره وبعدج مابررتي !!

شوفي قبس ماتفرق عندي لان من الاساس مطلقه يعني هيج هيج ماراح يبين عندي انتي بنيه قبل عزيز ورا عزيز !! بس اختصرلج الطريق منا هم اريحج وهم اني ارتاح وكل واحد يروح بطريق ومدام انتي بنت عمي وواجب عليه اتعامل وياج بعاداتنه!!

فبس.. صدك ماتستحي والله ماتستحي وماعندك ذره احترام تبيع حب ومثاليات براسي واكول اااي صدك يحبني ودكلي قبل عزيز وبعد عزيز ماتفرق شكالولك عليه اني وحده ساقطه ؟؟ تشك بيه هيج شك وتوكف بوجهي ودكولهه وماتهتز

عليت صوتي وكمت احجي حجي لسه مااتذكره شنو بس مجرد اريد ابرد ناري واني افكر بس شلون يكدر يشك بيه وهو يحبني رفعت اصبعي بتهديد كدامه واني منفعله ايدي رعشت وهو يذكرني منين اجيت وشنو الماضي والبيئه العشت بيهه وشنو خالاتي وبناتهن كمت ما اسيطر على حركه ايدي ولااكدر اتحكم برعشه اعصابي من واحد يعيرني بهيج موضوع اتمنى يضربوني ويطلعون دمي ولا تصيبني هاي الحاله!!

من كدما منفعله مااعرف شخربطت بالحجي بس اصبعه اشر بي بتهديد وواكفه احاسبه ع شكه بشرفي ما احس غير يلزمني من اصبعي حيل حسيت طك بيده وجرني علي ولزم فكي كلما يضغط اكثر تشوغ روحي ورغم كل هذا ماوكعت دمعه من عندي بهيج مواقف اتمنى لوتنقذني دموعي ولا ابين بهالصلافه كدام هيج عصبيه!!

بهالاثناء انفتح الباب امه بس شافته صاحت بشاااار عوفهه عوف البنيه شو وخر عنهه وجرتني من عنده حته ارتديت ليورا ردت اوكع

ام بشار.. تحجي صدك؟؟ بأي حق تمد ايدك عليهه لو استقويت عليهه لان ماعدهه احد؟؟

بشار.. اطلعي يمه بروح اهلج ولاتدخلين بيناتنه اطلعي خلي افتهم منهه هالرعنه هاي!!

ام بشار.. حدددك بشار!! وحق الله وروح ابويه اغضب عليك ليوم الدين ومااكول عندي ولد وخر عنهه شتريد من عدهه هاليتيمه هاي اكو مشكله تنحل بالتفاهم موهيج

بشار.. خلت تفاهم هي خلت حجي !! جان من عصبيته يريد ابده يلزمني يكطعني وصل يرفع ايده عليه يريد يضربني ولوينزلهه من ذاتهه لو توكف امه بوجهه اخر شي ضرب مرايه الكنتور حيل خليت ايدي ع اذاني وكعدت بالكاع وامه كامتله تهدي بي وطلعته برا واسمعه يكلهه لاتدخلين عوفيني اني وياهه!!!

قبس... كعدت بالكاع وساده اذاني وصوته يردد براسي اني ينضحك عليه ويطلع عزيز مستر عليج وقبله ضاحكين عليج وضغطه ايده ع فكي وزندي احس مكانهه نمل!!

ام بشار.. رجعت للغرفه بعد ماهدته وطلع واعرفه مايهدأ ولايبرد وهاي العصبيه بعدهه باوله ولازم اعصابه وبعده ماانفجر

تعالي يابنبتي ادعي علي واكول كسر بايده شلون  مأذي فكج وحضنتني واني لا ابجي ولا احجي بس احس عقلي بده يتلاشه ماكو فكره براسي غير بس دوائر بيض تكبر وتصغر هي مستحوذه ع عقلي اريد احجي اريد اكلهم اني بريئه اني بعدنه بنت بيت بس الساني مثل كل مره انعكد وكل همي وكل تفكيري يصب ع رعشه ايدي شلون اوكفهه!!!

بسم الله الرحمن الرحيم وبدت تقره ايات ع راسي وراسي ع صدرهه احس نفسي بديت اهدء بس ايدي ماهدأت ولا عقلي كدر يسيطر على وضعه بس كلبي احسه خمد وعبالك تعب من الجوله الجان بيهه!!

ام بشار.. هدي حالج حبيبه لاتخافين اني امج والله اوكف بوجهه لو مو بشار بس فهميني شكو؟؟ احجيلي لاتظلين ساكته مااقبل يمد ايده عليج باي سبب ؟؟ قبس يوم تسمعيني وتلعب بخصلات شعري واني مغمضه عيوني!!

انفتح الباب وفاتن فاديه وشجن وهن مستغربات ويسألن ماما شكو شبي بشار حته طلع يسوق سرعه لايسوي حادث وشبيهه قبس!!

ام بشار.. روحن منا واذا سالت الحجيه كول تعارك ويه امي لاتجيبن طاري قبس ماعوزنه شماته!!

فاديه.. وهو عليمن هيج سوه بيهه شيريد من عدهه!!

ام بشار.. لاتتدخلن واطلعن منا روحن كملن العشه ولاعينجن شافت ولا اذنجن سمعت يله كومن بسرعه !!

فاديه.. ع كيفج ماما تحسسينه بنات جيرانه ام بهاء هي هم اختنه ونحبهه غير نعرف شبيهه!؟

ام بشار.. فاديه لاتلحين كومي الله يرضى عليج خابري عمتج بشرى كليلهه هسه تجي هذا بشار مايحجي وراح يظل ياكل بروحه عاد هي تكدرله صديقته بلكي تهدي!!

فاديه.. ماشي ماما وانتي قبس اني اكول عليج قويه مااتوقع هيج يأذيج بشار ترى هو عصبي اتذكري شكد حنين من يجي يغطيج يوميه!!

ام بشار.. كومي ولج لا ابتلي بيج

فاديه.. كمت بس احجي هذا السطر حبابه ماما!!

ام بشار.. فااااااااااديه

فاديه.. العفو ماما طلعت بس شلون لازم اعرف !! طلعت وهي ادردم

ام بشار.. شو يوم اكعدي وخلتني كدامهه اسمعيني يابنتي بشار مايشبهنه ابد وابني واعرفه اذا ماالشي قوي ومأذي مايمد ايده وشوفي شلون جرح ايده وكسر واذه نفسه بس حته لايأذيج ويتحكم بعصبيته ولازم الشي المأذي ينحل بالتفاهم موبهيج حاله

قبس.. خاله ابنج اذاني دمرني كلما حجه وعيرني باهلي اني مومثلهن اني جبت عمري كله اكل ماشبعانه بس حته لا يدنس شرفي واسمع واحد يعيرني ليش خطبني اذا حاسبني من هذني الموخوش..

ام بشار.. حشاج بنتي هو عصبي ومايعرف شيحجي من يبرد ينتبه ع نفسه ويتندم وتشوفين حنيته وصدكي لو ما الموضوع مأذي ما حجه هيج مو ادافعله بس اني امه واعرفه

قبس.. راح احجيلج لان ماكدرت احجي اله مدري شصار بيه وماكدرت افهمه خاله مدري منو جاي ومنطي عقد زواجي من عزيز وقبل شهرين هم اكو عقد مدري منين مكتوب بي قبل زواجي عود اني متعرضه لفحص عذريه وطالعه موبنيه وهو مفكر زواجي من عزيز للستر لان ماطلبت مهر

ام بشار.. ضربت صدرهه حيل ياداده عزاا العزاني منين هالحجي وصدك متعرضه لهيج؟؟

قبس..دنكت وحجيت حقكم هيج تفكرون بيه لان اني من بيئه وسخه بس مومعناتهه اني مثلهم اشتغلت خدامه واني مراهقه وماكو واحد ماعرض عليه الزواج وما انطيت نفسي جنت افكر بيوم ارجعلكم واثبتلكم اني مومثل خالاتي

خاله اني متزوجه من عزيز بس ع الورق لا متقربلي ولا لازم شعره من عندي !!!

ام بشار... شنووووو!!؟؟ ع كيفج قبس شتحجين شنو ورقه شنو ع ورق رحمه لاهلج فهميني!!

قبس.. مثل ماكتلج خاله وبديت احجيلهه كل التفاصيل اني اسولف. وهي دموعهه تجري اخر شي حضنتني وهي دكول فدواتك ربي ولج قبس انتي بنيه صحيح السمعته لو اذاني تجذب؟؟

قبس.. لا خاله صحيح بس انفعلت وماكدرت اوضح لبشار

ام بشار.. غلط اكبر غلط يوم المفروض من اول يوم حاجاج دكليله ليش هيج معذبته ومخليته ياكل بروحه بشك ويفكر بالماضي تعرفين هاي شكبرهه عنده وهو هيج يقره والله مدري شلون لزم نفسه وما ضربج !!

شلون تسكتين عن هيج موضوع مهم اني يمج لوجايه حاجيتلي واني افهمه بس فهميني شلون تسكتين ومتحمله الشك والقهر عليمن وانتي انظف واشرف وحده شافهه بحياته!!

زين لو بيوم العرس وعرف موراح يضوج وتروح من عندج فرحه هاي الليله لان راح يكلج ليش عفتيني اتعذب بنار الغيره والشك والتفكير مامقبول من عندج هذا التصرف !!

قبس.. لاتلوميني ماادري بعد لزمت ايدي الترجف وهي اطبطب عليهه انفتح الباب عمه بشرى عثرت بالباب رادت توكع !!

بشرى.. يووو لو واكعه ومكسوره شمحصله من عدكم جبتوني اركض بهالمغرب شكو ولجن وحده وجهه يبشر بخير ووحده معبسه وعيبت بحلكهه

ام بشار.. تعالي بشرى اكعدي واسمعي وبشار عليج لان صاير نار مايتفاهم وحته ماقبل احاجي وطلع وماادري بي وين!!

بشرى.. غير تحجن موشلعتن گلبي شكو شصاير؟؟

ام بشار.. راح احجيلج اني وسولفتلهه السالفه كلهه ورفعت راسهه بيدهه شوفي فكهه شلون متاذي وايده شلون طابعه وايدهه ترجف من طلع لسه!!

بشرى.. اكلجن انتن مسويات بيه الكاميرا الخفيه هاي ام عيون صارلهه سنه يمنه وماحجت هيج موضوع وتنتظر تسويله مفاجئه بليله عرسه ؟؟؟

سوده بوجهج ولج غبره ثوله الف مره كتلج لاتضمين علي وكتلج شكاك بخصوص الماضي مالتج ولان يحبج اتجاوز موضوع طلاكج وقرر يرتبط بيج وانتي يوميه مخلصتهه بوس وحضن وماكايلتله ولسه مايدري؟؟

ام بشار.. هسه حجيتلج حته تلوميهه صار بعد وماحجت ومدري منو جايبله هيج بلوه مزوره هيج الناس ماتخاف ربهه

بشرى..تتوقعي اذا عرف بقبس يسكت؟؟ شبيج ماتعرفين ابنج وبعدين هو رجال يشوف ورقه اثبات  فحص كدامه تاكد هي موبنت لو يصدك حجيهه؟؟

ام بشار.. ناخذهه للفحص حته يتاكد ؟؟

بشرى.. لعد عبالج راح. يسكت اسمعي قبس هاي السالفه ماتنبلع لو تثبتيله انتي بعدج بنيه ونكول لكل اهلنه ويفرح بعرسه وبيومهه ترفعين راسه لو منا وكل واحد يروح بجهه واني اكلج بشار مايتقبلج لو تصير روحه بيج اذا ماتثبتين صحه كلامج!!

قبس.. تريدوني افحص مامصدكيني!!

بشرى.. انتي بنيتنه وهاي اني وامه نبوسج من راسج وباستني بس هو رجال تتوقعي يقتنع بعد هالورقه خلي نفسج بمكانه تصدكين الحجي لو دليل بغض النظر عن الورقه من اجت مزوره مامزوره تهمه الج بس اني انصحج لان بشار اعرفه واني ويا متقاربين بالعمر مايفوت هاي السالفه ويدوس ع كلبه ومايرحمه الا يتاكد ولاعبالج يظل بحجي النسوان يريد دليل وجربتي وشفتي من يانوع يواجه ويمشي بدليل

وصدكي ياقبس لو وحده جايه وحاجيتله هيج تهمه عليج جان شكهه بنص وما انطه بيج بس الدليل هو الكسره تذكرين سالفه الخطوط وجان ماثاق بيج وبعدج جديده وشلون وكفلج لان هو عنده مبدأ جيب دليلك واصدكك

ام بشار.. هاهي هسه يجي ونحاجي ومن باجر ناخذهه للفحص استغفر الله واتوب اليه الله مكتوبلي افحص ببناتي ذاك اليوم شجن واليوم قبس الحمدلله ع نعمه الستر!!

قبس.. فكره الفحص!! وفكره بشار يتوقع اني مو خوش وجان الماضي مالتي قذر وفضل من عزيز ستر عليه!!  والحاله الهستيريه الي اني بيهه واحس دماغي راح يوكف بس من الدوائر السوده والبيضه براسي حته عيوني كامت تغوش واحس الرعشه كامت تسري بكل جسمي هاي الحاله جنت امر بيهه من جنت صغيره واظل يومين تحت المهدئات والابر حته وصلت مرحله بدون شعور وزينت نص شعري بمكينه بابا وخربت شعري!!!

شجن.. مدري شصاير ماما وعمه بشرى ماطلعن من الغرفه وبيبي بس تسال ونكلهه ماكو شي نعرفهه ماتضم السالفه وتبوك لسانهه عمه بسمه وتحجيلهه فاديه سوت عشه واني طلعت صليت بالحديقه وعمر وبشار ماكو وحته بابا بعده ماجاي

كملت صلاتي وكعدت اسبح بالسبحه اندك الباب صحت منووو!؟؟ محد رد عليه كمت ع العكازه وصرت ورا الباب كلت منووو؟؟

اجاني صوته اااي اعرفه رف كلبي قبل كلشي قبل ما اذاني تسمع كلمه اني!! نبض كلبي نبضات سريعه ومثل اليريد يطلع يتلكا اخذت نفس ومخليه ايدي ع صدري بس الباب حاجز بيناتنه!!

غيث.. شجن شلونج؟؟

شجن.. هوكال شجن لو رجلي الصاحيه حسيتهه ارتخت ولزمت الحايط لا اوكع عين على باب المطبخ لا احد يطلع واذني يم الباب اريد اسمع صوته بعد بكلبي اكول ياروح شجن وعمرهه شكد مشتاقه لهاي البحه البصوتك

زينه انت شلونك؟؟ جنت احاجي من ورا الباب؟؟

غيث.. بعدج ماكو لون؟؟ صحتج شلونهه؟؟

شجن.. الحمدلله

غيث.. بشار موجود؟؟

شجن.. جاوبت باستغراب لاااا ؟؟

غيث.. اذا اجه خلي يخابرني عندي شغله ويااا يله مع السلامه

شجن.. اسمع خطواته ابتعدت من الباب واخذ روحي ويا ضربت خفيف ع صدري اريد گلبي يهدأ !! بس ماسالتنه شيريد ؟؟ هم مو مايتحاجون شو جاي يسال عن بشار؟؟

طبيت جوه واجه بابا وعمر وتعشينه وعمه بشرى يمنه وبشار ماكو وقبس ماطلعت من الغرفه ولافه نفسهه ودايره وجهه ع الحايط بلاول عبالي مصخنه خليت ايدي على كصتهه مابيهه شي بس ليش ترجف هيج؟؟

شجن.. قبس قبس؟؟ شتحسين ليش هيج ترجفين بردانه؟؟

قبس.. لااا مابيه شي اطلعي عوفيني وحدي

شجن.. براحتج !!

ما اعرف شبيهه ووضعهه فدمره صاير وعمه تنتظر بشار وكلساع تخابره ومايجاوب ماما هم مدري شبيهه حبستنه اني وفاديه بغرفه بيبي ممنوع اطلعن ولهن الحجيه وظلينه كاعدين كلشي مانسمع ولا انشوف !!

كاعدين اني وفاديه نسولف ونفسر شبيهه قبس وليش هيج ماما تتصرف وماتريدنه نعرف شويه واجت عمه سلمت ع بيبي وكالت راح اروح يوصلني بشار واخيرا اطلق سراحنه بسرعه طلعنه ركض ع قبس!!

ع نفس نومتهه وبس فتحت الضوه صاحت سدي بصوت عالي حته فززتني هاي ابد موطبيعيه اليوم سدينه الضوه وطلعنه ووحدتنه ببالهه الف سؤال ورا ساعه رجع بشار تلكيته اني كتله اجاك غيث ماحاجاني بس هز راسه وصعد والله متاذي ومدري شصاير؟؟؟

طبينه للغرفه انريد انام حاولت شكد اريد احاجيهه بس ما انطت اي ردة فعل واصلا ما التفتت ومكرفصه نفسهه !!

فاديه.. قبس مانكدر انام وانتي هيج كومي احجيلنه احنه مو اخواتج

شجن.. اي قبس والله مانكدر انام كومي سولفينه

فاديه... تذكرين ذاك اليوم انكتلنه كلنه وهسه احنه مستعدين انشيل الكتله وياج لان نعرف الكتلع توجع وداعتج...

قبس.. عوفني وحدي اذا تحبني عوفني لاتحجن الله عليكم لاتصيحون مااريد اسمع صوت

فاديه.. براحتج نامي ارتاحي بس لاتاذين نفسج ترى محد يفيدج

شجن.. تاشرلي فاديه كومي وين تريد بيه هاي الخبله كمت وياهه ورحنه للاستقبال طلعت موبايلهه من بجامتهه ودكت ع عمه بشرى!!

بشرى.. الوو ها ولجن خير خوماصار شي الساعه ب١٢

فاديه.. عمه احنه بشاربج المامحفوف احجيلنه شصاير؟؟

بشرى.. طيح الله حظج تبقين مابيج خير فززتني عبالي صار شي انعل ابليسج خلي اجي الا اشلع شعراتج

فاديه.. شعليهن وحده وحده بس احجيلي ما انام اليوم شصاير عليج الله وفاتحه سبيكر

وبدت عمه بشرى تحجيلنه واحنه ويه كل كلمه نمكز بلاستقبال يمكن لو احسبهن عشر مرات احنه نوصل للركن ونرجع وماالحك بفاديه تالي ذبيت العكازات وكعدت وجريتهه تكعد حته نسمع

بشرى.. ولجن سوده مصخمه بشار متاذي حيل متخبل عليهه لايكدر يأذيهه ولاحته يكدر يكعد وياهه ويفتهم حجيت اني وامه وياا وفهمنا بس تدرن باخوجن يتفاهم؟؟ اصلا وصيت عمر كتله لاتخلي يروح وحده من العصبيه حته ضغطه مرتفع نحلف ونقنع مايفيد وحته مايناقشنه بس يكول اسكتن لاتحجن بالموضوع!!

فاديه.. وهسه شلون ماكو حل المفروض يفرح؟؟

بشرى.. مادري الاورقام لاكيهن بسيارته وماملحك ع الولد الشامرهن يكول عبالك مراقبني بين مانزلت للمحل اجه يركض شمرهن وراح بدراجه !! وجاي يموت يريد يعرف منو الي اله ايد باذيتهم شيريدون من عدهم  ولاحكيهم ع حبهم!!

وهسه كتله عمه حته ترضه نفسك ويروح الشك من عندك ناخذ قبس للفحص نفحصهه واتاكد بان البنيه بريئه وبالعرس تثبتلك برائتهه وانت هم ادور منو هيج سوه بيهه ودمرهه وتهمهه؟؟

شجن.. عفت فاديه تسولف وكمت شنو هاي الناس ذئاب ناس تنهش بناس دخيل الله شنو من قابليه عدهم شلون ينامون وهم مأذين بشر ...

ثاني يوم قبس ماداومت وماما مكابلتهه وكاعده والبنيه مانعرف شبيهه لاتاكل ولاتحجي واصلا ماتفتح عيونهه تريد بس ظلمه ماتريد تشوف ضوه وبشار حته مااجه عليهه وطلع للدوام من الصبح!!

مر اليوم مثل ماهو واصلا البيت كأبه بليل كاعدين بالهول ونزل بشار من غرفته بوجهه لغرفتنه ظلينه كاعدين خليهم بلكي يتراضون!!

قبس.. كلبت الجنطه  ع حبايه ماكو مادري وين راح شريط الحب احس نفسي راح اتخبل موفكره وحده افكار هوسه براسي وهوس والالم يعصر روحي وبس افتح عيني ادوخ !!

جنت نايمه ومنطيه ظهري للحايط سمعت الباب انفتح واجتني لفحه العطر مالته توقعت راح يتقرب راح يعتذرلي؟؟ راح ياخذني بحضنه ويكلي اني اسف بس مثل ماطب رجع طلع هالشي اذاني حيل

دمر اعصابي كعدت ع حيلي كمت اشلع بشعري ابدي اكل لحمي بس حته ارتاح كرصت فخذي وماحسيت هيج احس نفسي وصلت لمرحله ماكمت اتقبل اي شي وماكو شي يخفف المي!!

مرن يومين ع نفس الوضع وضغطت ع نفسي حيل وكمت من مكاني طلعت للمطبخ جانت الساعه ب١١ الظهر لكيت ام بشار تطبخ بس شافتني عافت البيدهه واجتني!!

ام بشار.. ماردت اضغط عليج شلون صرتي؟؟

قبس.. خاله اخذوني للفحص

ام بشار.. ليش؟؟

قبس.. احسن حته يتاكد ليش يظل ياكل بروحه وعباله عندي سوابق

ام بشار.. لا حشاج بنتي !! بس هو مايقبل ناخذج؟

قبس.. شنو مايقبل؟؟

ام بشار.. حجيت وياا البارحه وكتله باجر اخذهه للفحص ماقبل كال ممنوع تاخذيهه ؟؟ بس ماادري شجاا هو متأذي اكثر من عندج وماجاي يشاركنه بشي !! لايكول مصدك ولايكول لاا

وعمتج بشرى هم كالتله ع الفحص ودكول صار عصبي كالهه لا ماتروح ولاتحجن بهذا الموضوع كدامهه خلي يرتاح ويرجع طبيعي  !!

قبس.. ماعرفتي منو دازهن؟؟

ام بشار.. بيومهه ماعرف بس البارحه مخابرته ساجده كايلتله ع الخير لكيتهه ملعوب بيهه لو باعت بعقلك حلاوه بان هي بعدهه بنيه ويكول بسرعه سدته وداك ع الرقم مغلق ؟!

هو ماحجالي حجه لعمتج بشرى وهي كالتلي يكلهه شريد اسوي وائل رجال ولعبت بي لعب هاي شريد اسويلهه وهي مره ساقطه!!

قبس لاتلومي ترى بشار يحبج ولومايحبج ماشارد عنج بس حته لا يأذيج كون اشوفج باكيتات الجكاير شكثرهه من كدما شارب بهذني اليومين والله حته كلبي نار علي نزلتهن من غرفته طار عقلي يمكن الليل كله يحرك بروحه حته لاياذيج موطبعه هذا ابد جان من يعصب بنفس اللحظه يحل المشكله ويهدا بس وياج يتحمل!!!

قبس.. كمت من يمهه وماشفته ابد وحته صوته ماسمعته ثاني يوم بدلت واخذت جنطتي وطلعت حاجتني ام بشار خاف ماالج خلك كتلهه لا زينه!!

صعدت ويه ابو حسين وكتله لاتاخذني للشركه اخذني لبيتي القديم الرجال ماحجه وكال مو استاذ بشار كتله يدري !! اليوم لو اني لو انتي ياساجده

كتله اوكفلي براس الشارع لاتروح ونزلت بنفس الدربونه الطلعت منهه بهذاك الليل وكلت مستحيل امر بيهه بعد رديت امشي بيهه دكيت الباب اكثر من مره مافتحت دنكت رفعت السرگي وفتحته وطبيت!!

امشي بالطرمه مالتهه واحس حته الهوه اليحيط بيتهه مونظيف الظاهر شافتني وطلعت وهي لابسه استغفر الله ثوب قصير يفضح مايستر من صباحية الله !!

ساجده.. هله بست الحسن شلون جابت رجلج لازم المهندس عافج واجيتي ادورين لحمه من جديد !! ترى خلصنه حته عزيز ومانندله وين منين انجيبلج ؟؟

قبس.. شكد ساقطه انتي وكح... ماالومج لان امج واخواتج كلكم نفس الزباله بس مومعناتهه لازم شكو واحد عرفج اطمسين راسه بالخيسه مالتج!!

يمج اني بكاعج تدرين بيه يوم عشره اني طالعه من عندج شتريدين من عندي وهيج تاذيني تخابرين يوميه لبشار وتلفقين حجي كليلي شرايده فهميني ماتتقين الله ع ساعه ياخذج شتقابلي بيا عمل ؟؟

ساجده... لاتهميني تعالي اكعدي وافهمج كلشي ومن احجيلج روحي تلاحكي حياتج لايخربوهه المايخافون من الله!!

قبس.. طبيت جوه للهول محد بالبيت لعد عليمن كاشخه ولابسه عبالي رجلهه العار هنا جابتلي مي اشرب مااخذته كالت اوكفي خلي ابدل وراحت للغرفه تبدل واني كاعده ع نار اريد افتهم شتريد تحجي!!!

يمكن عشر دقايق وطلعت لابسه دشداشه وكعدت كدامي كتلهه اي احجي ساجده شتريدين من عندي تعرفيني كلش زين اني ما انتمي للبيئه مالتج وافضل الموت وما انتميلهه بيوم

ساجده.. لا قبوسه راح تنتمين غصبا عنج ولج من صغرج واني حصلت كومه فلوس من عندج وتضيعيهن عليه ادورين كرامه بس هسه انتي اجيتي برجليج ماالج حجه؟؟؟

قبس.. كمت وكفت وصحت شتقصدين جان اطكهه ضحكه شعلوهه وما احس غير اثنين زلم يطلعون من غرفتهه وبس بالملابس الداخليه وهي كامت تريد تقفل الباب واني اصيح ساجده تخبلتي!!!

يتقربون عليه واني ادور منفذ اطلع من عنده هو هول وبي بس باب منين اطلع وواحد لازملي الباب وواحد من الجهه الثانيه دخيلك ربي اني بكابوس ساعدني ياالهي....

واحد من عدهم هجم عليه لو صرخت صوت كلت هسه ابوحسين يسمعني ويجي وهم يضحكون واني افرفح بنصهم...

هاهي شرفي الجبته احافظ علي كل هاي السنين والبارحه اريد اثبته لبشار وخليته يطمن وماقبل افحص لان ثق بيه!! وبعد ما الكل عرف بيه هسه راح اخسره هنا واطلع كدام بشار جذابه ومن بنات الليل!!!

مثل المتمسك بطرف حبل ضعيف ويسحب بيه بشار بس حته اطلع من المستنقع الوكعت بي!!  واخاف التفت واباوع للظلام الدامس جواي وفجأه ينقطع هذا الحبل ويروح بشار واني اغوص بالظلام واصرخ ومحد يسمعني !!!

يتبببببع... متابعه شيقه

قمع المشاعر.... البارت السابع والثلاثون

للكاتبة زهراء ( روزايه)...

( شكرا على لهفتكم وتعليقاتكم الحلوه اعذروني البارت موقصير بس ركزت ع قضيه قبس والجاي هو تكمله لهذا البارت!! اعتذر ماكدرت ارد ع الرسائل لان الخاص مال الواتباد والفيس حيل مزدحم ومالحكت ... احبكم)

....

انني انبهر لنفسي  بكل مرة اقع فيها

واقف لوحدي دون ان امسك بيد احد

لكنني وللمرة الاولى احتاج شخص استند عليه

احتاج ملجئ ...يحتويني حينما تهب العواصف

لانني واعتقد هذه المرة لم اقع فحسب بل كسرت

.....

ابو حسين.. اهدي بنتي شصاير ليش هيج حالتج ياستار ياربي هسه طبيتي جنج ورد عمي اخذج للمستشفى شنو هذا الدم على ملابسج بويه احجي وياج بيج شي؟؟

قبس.. لا لااااااا وصرخت باعلى صوتي وكمت اضرب براسي بالكرسي مال السياره!!

ابوحسين.. لا اله الا الله وطلع تليفونه خابر ع بشار استاذ والله مااعرف شبيهه اخذتهه لبيتهه القديم وتاخرت جوه وشو طلعت ملابسهه كلهه دم وبس ترجف وتصرخ حته خفت لا الناس يشوفوهه!!!! هاااا يابيت اخذهه ؟؟ بيتك اي اندله استعجل استاذ خاف يصير شي!!

قبس.. وين ماخذني لاتاخذني نزلني هنا ااااي هنا بشارع نززززززلني روح نزلني!!!!

ابو حسين ...يابويه ع كيفج راح تموتين ايدج شبيهه ترعش عمي قبس اسمعيني دخيلك ربي راح تموت البنيه!!

وكفت السياره اباب البيت الاخذني علي جان واكف ينتظرني بس شفته لو شفت كدامي كابوس فتح باب السياره يريد ينزلني واني ادفع بي وصرخت عوفني وحط ايده ع حلكي وجرني حيل جان الباب مفتوح كبل فوتني ليجوه

بعده هستوه يريد يحجي ويسالني واجت عينه ع الدم التارسني ورجليه ماكدرت اوكف عليهن بسرعه كعدت بالكاع مايطلع صوتي ولا اصرخ بس عيوني مفتوحه بالفراغ يعني هاهي اني انتهيت اني خسرت كلشي شلون راح اعيش!!!

بشار... ابو حسين شبيهه ليش هيج نكعانه بدمهه وين جانت رحمه لاهلك فهمني شبيهه؟؟

ابو حسين..والله يااستاذ مااعرف كالت اخذني لبيتي القديم وكتلهه والاستاذ شلون؟؟ كالت يدري وطبت وتاخرت ومن طلعت ماتكدر تمشي!!  ركضت ووكعت بنص الشارع والدم تارسهه وصعدتهه حته لاتشوفهه الناس وبس تضرب براسهه بالكرسي وتصيح لاااااا وهاي خابرتك وجبتهه الك وهي حالتهه تخوف!!

بشار.. من رخصتك ابو حسين لاتروح انتظرني بالباب ودنك عليه وشالني من الكاع الوسخه ملابسي انترست وسخ لان البيت بي بناء وهو بملابس الدوام وقميصه ابيض اشوفه شلون صار بي دم!!

طببني للهول اي ردة فعل ما انطيت اي ايعاز ماصدر مني لا صرخت ولابجيت بس عيوني مفتوحه بالفراغ واتخيل بالموقف الصار بلحظه صرخت بصوت اني انتهيت!!! واحس نفسي بديت اختنك..

بشار...اهدي قبس ع كيفج اخذي نفس شو حيل اخذي لازم اديه وكاعد بالكاع وبس اشهك ومختنكه!! فهميني قبس احجي شوداج ع ساجده شنو هذا الدم؟ ليش هيج حالتي احجي وهزني من اكتافي..

قبس.. عوفني لاتلمسني ودفعته حيل راد يوكع جانت عيونه تحجي قبل السانه يمكن عمره ماعاش ولا راح يعيش هيج موقف الخوف هذا حاير شيحجي وشينطق باله الف فكره ويخاف يسال خاف ينصدم!!

بشار.. تعالي شو وجريت راسهه اريد احضنهه هجوميه بشكل كوه ثبتت اديهه وصحت بيهه كافي قبس خليني افهم شبيج ؟؟

قبس.. وخر عني وخرررر لاتلزمني ايدك عني !!

بشار.. احجي شبيج شو حبيبتي لاتخافين ولزمتهه من وجهه المايتفسر ولونهه مخطوف احجيلي شصار اكو احد سوالج شي ؟؟ حجاهه وهو يبلع ريگه !!

شجن..اليوم قبس داومت مع العلم وضعيتهه مو تمام بس اصرت الا اداوم بس طلعت قبس تقريبا ب٨ جان تجي عمه بسمه وبناتهه وصابرين اجتي من اهلهه والبيت صار ماينطاق منين ماتلفت تشوفلك حيه ومسويات حزب والمشكله بيبي وياهن ويحجن ع هذا وذاك!!

خابرت هدى كالت اني جايه وجهالهه وكحين اليوم مانكعد لحظه من الركض وراهم !! كمت ويه ماما للمطبخ جانت الساعه ب١٠ الصبح دك تليفوني اني من يجن اخلي بيدي اخاف يسون دكه مثل هذاك اليوم باوعت للرقم بشار!؟

شجن.. هلو بشار..

بشار.. منو يمج؟؟

قبس.. بس ماما؟؟

بشار..اطلعي برا حاجيني!! بدون محد يدري روحي جمعي ملابس لقبس من كلشي وخلي وياهم غطه خفيف ودزيلي قميص الي !!  ومن ادك عليج طلعي العلاكه للسايق واذا سالوج كولي بشار خابر يريد ملابسه!!

شجن.. شصاير شبيهه قبس؟؟

بشار.. مابيهه شي شويه مالهه خلك ومااكدر اجيبهه للبيت لان يمنه خطار شجن اياج تحجين حرف واحد افتهمتي ؟؟

شجن.. اااي اااي افتهمت

سديته وركضت للغرفه سالتني ماما شعنده كتلهه يريد من ملابسه يوديهن للكوي !! بس ماانكر خوفي وصوته ابد مايبشر بخير مفزوع وعبالك قبس بيهه شي!!

خليت تراك وملابس داخليه وشال وخليتلهه شرشف ثخين اجمع بيهم واسولف ويه نفسي هي مو بالدوام شصار بيهه بس يله مدام هو يمهه مانخاف لان هو احرص من عدنه عليهه!! شويه ودك عليه طلعت العلاكه لابو حسين بس بالي يمهم شصاير ؟؟

ابو حسين.. هاك استاذ هاي العلاكه وهذا العلاج الوصيتني علي!!!!

بشار.. مشكور ابو حسين ممنون من عندك

ابوحسين.. لا استاذ هي مثل بنتي والله شاهد عليه قمه بلاخلاق بس مااعرف شبيهه اني راح اروح وطمني عليهه

بشار.. ان شاء الله بس الصار لاتحجي بي لاحد ولو اعرف معدنك شنو بس بيناتنه خليهه!!

ابوحسين.. اطمئن الله شاهد لاعين الشافت ولا اذن السمعت مع السلامه بس تحتاج شي خابرني

قبس.. كاعده ع الكاع البارده اديه احسهم مرتخيات ومابيه اشيلهم رجليه عبالك واحد ذاب ثقل عليهن ومكسرهن شحجي شريد اكول معقوله اني بهالغباء واروح برجليه للتهلكه؟؟؟

بشار... فات وسد الباب وشمر علاكه جبيره وكعد كدامي يله احجيلي بس اني وياج ؟؟ قبس باوعيلي ورفع راسي باديه اثنينهم مهما يكون غلطج احجي اني وياج لاخر لحظه ما اتخلى عنج تسمعيني قبس!!

جان يحجي بنبره اقرب للعصبيه بس من حالتي ماصيح ولا شفت هذاك الوجه الثاني بس جان ضاغط ع نفسه واوردة ايده كلهه بارزه!!

اباوعله واني مفزوعه ...كلشي خسرت خسارتي هالمره اكثر من كل مره بقيت اباوع على الحيطان وعلى كلشي حبي واحلامي راحت خلص بعد ماكو اي حياة الي!! صرخه بداخلي محبوسه مااكدر اطلعهه وعيون بشار كبال عيوني وبيهه الف سؤال والخوفه البيهه ماينوصف!!

من شافني ساكته وبس اباوع كام وكف خله ايده على راسه.. وضغط راسه  حيل بقبضة ايده وتنفسه صار سريع وواضح حجه بصوت اقرب للصياح بس جان يحاول يكتم صوته وغضبه بعد مامل من عندي وماحصل جواب!!

قبس شصايررررررررر  ؟؟تقرب عليه اول مره اشوف الخوف والهلع الهاي الدرجه بعينه!! قبس!! قبس باوعيلي شصاير احجيلي طمنيني لاتعذبيني!!

بقيت مثل المفزوعه بس اباوع فاتحه عيني وحسي ميطلع

لج قبس جاووووووبي لتخبليني ااااااااحجي شصار ؟؟

باوعت علي والخوف والدموع وكلبي يريد يوكف والكلمات متطلع من شفتي  وهو يباوع مخترع يريد جواب مني

بشار... شوووداج فهمييني انت لشوكت تبقين هيج رعنه ومتعرفين تتصرفين؟؟ احجي يله اني وياج لاتخافين 

قبس.. احجي بكلمات متقطعه وكوه تجمع عندي الكلمه وتطلع ببشار اا اااني كتلته بيدددي بشاااااار !!! وصرخت بعلو صوتي

باوع بصدمه  وفتح عينه بكل وسعهن

شدتحجين قبس ؟؟ كتلتي منو؟؟ دنك عليه حيل هزني كتلتي منو؟؟ سوالج شي ؟؟ احجيييي

خليت ايدي على ايده..... واباوع علي بخوف 

بشار....منو الي كتلتي

قبس.. راد ياخذ شرفي وكتلته وبجيت  كتلته ...كتلته

ونزلت دمعتي مثل الي هسه استوعبت الي صار

احس كل جسمي يرجف  والخوف مااعرف شلون اوصف شعوري تحطم كلشي بداخلي انتهيت

هو بقه صافن بعده ممستوعب الكلام الطلع من عندي!!.....باوع علي بنظره يأس وفقدان امل وحجه بنبره هادئه حيل بس بالحقيقه من اثر الصدمه ماكدر حته يطلع عصبيته!!

بشار.. سوالج شي؟؟

قبس.. لاااا لااا محد كدر يلمسني بس كتلته مات اني كتلته اااي اني شوف هايه اديه كلهه دمه وملابسي كتلته اني !!!

بشار.. ليش رحتي قبس!!ليييش فهميني وانت تعرفين قذارتهم قبل ما اطلع للدوام بنص ساعه مريت عليج شفتج نايمه وخابرت امي واني بالطريق كالت مااداوم ومطمئن عليج ابيت اهلي شلون هيج تسوين وين عقلج جان مافكرتي بيه؟؟ كليلي شحصلتي؟؟

قبس.. بجيت بعلو صوتي واني اباوع علي دموعي وخوفي واضحات عليه وايدي ترجف.ردت اعرف ليش هيج تسووي بيهه وشهكت !!

بشار.. احجيلي احدددد طخج احجي الله عليج اكو احد لمسج احجي قبس اروحلج فدوه احجي حته حسيت عيونه من الصدمه لو من الالم الحس صارن حمر حيل!!

قبس.. هزيت راسي لاااا

بشار..احجيلي الصدددك قبس؟؟

قبس.. والله محد اخذ شرررفي والله!! والله اني كتلته حته لايلزموني بشار اني مجرمه مو؟؟

جرني لحضنه حيل صار راسي برگبته ودموعي بللتهه هاي المره الاولى ويمكن الاخيره السمعت بيهه دكات كلبه شكد جنت اكول هنياله يسيطر على نبض گلبه من نلتقي بس هالمره دكاته تفوق الف نبضه من عندي بوقت الخوف والحب !!!

بشار.. كومي غسلي كومي؟؟ سحبني من ايدي ماكدرت اكوم رجليه مثل الخيوط ماتعيني وايدي رعشتهه فضيعه ماكدر ولا لحظه اسيطر عليهه !! سندني هو وذبيت كل حملي علي واخذني للحمام

اكو كرسي كله صبغ سحبه وطببه للحمام وكعدني وهو ثنه رجليه كدامي ولزم اديه وباسهم !! واني اباوعله معقوله ياربي خسرت كلشي واني جاي اجهز لعرسي معقوله راح انحرم من عنده بسبب غلطه من عندي؟؟؟

فتح المي الجو صيف وحار بس اني بردانه حيل ولحظات استوعب الصار ولحظات اكول لابعدني بحلم هذا كابوس اني من اتخربط اشوف كوابيس بس للاسف ياريت كل اوجاعنه تكوم احلام ونصحه منهه !!

عافني وطلع والمي ينزل على جسمي واني كاعده وين وصلت نفسي ليش مافكرت؟؟ شلون اخطي هيج خطوه وحدي؟؟ كوه سندت نفسي وكمت رجليه مدري شجاهن من الهبطه لبست وطلعت جان كاعد ع الدرج بس شافني كام واجه سندني اكو فراش جبير كعدت علي ولفيت نفسي بنص من عنده شعري ينكط مي ع وجهي وهو كعد كدامي وصافن عليه!!

بشار.. هسه تحسين نفسج احسن؟؟

قبس.. هزيت راسي اااي

بشار..سولفيلي يله بالتفصيل حته اكدر احلهه قبس بالتفصيل وشدد ع هاي الكلمه!!!

قبس.. بديت احجيله ومن وصلت لحدما طلعوا من الغرفه ماتمالكت نفسي كمت احجي وابجي بس ايده التمسح بدموعي وكلمته التردد باذاني لا بنيتي لاتبجين اني وياج احجيلي واني بظهرج لاتخافين؟؟

اني من طلعت من بيتنه حطيت سجينه بجنطتي اني اعرف ساجده عايشه وياهه واعرفهه تستفزني بالكلام ودائما بتعاملي وياهه اشيل السجينه كلت بس تحجي اهدده حتلو اضربهه!!

ومدري منين جايبه هذوله واحد منهم من شافني كمت اصرخ بصوت عالي واغلط عليهه واكلهه حرام عليج تاذيني واني بعد شهر عرسي كال ساجده احنه مامتفقين هيج على بنت بيت اكثر من مره كايلين البنات مانريدهم!!!

ساجده.. اسكت اذا ماتريد انت خليهه لغيرك وتحاجي بالثاني وهذا قذر حيل جان مصمم يتقربلي بس ذاك ماقبل وكام يحجي وكالهه اني راح اروح !!!

من شفت ماكو منفذ والباب مقفول ومنين اطلع بنص اثنين زلم وساجده وحدهه يرادلهه قوه اني لابسه جنطتي بركبتي وايدي عليهه وبس تقربلي وراد يلمسني طلعت السجينه ضربته بصدره ومن خوفي سحبتهه حيل لان صياح ساجده والوياهه مااعرف شصار بيه!!

هذا الماقبل هو فتحلي الباب وشردني من وكع الكتلته وساجده كامت تصيح وتريد تلزمني هو منعهه وفتحلي الباب وكال انهزمي ولزم ساجده ويتلاوه وياهه والسجينه بيدي حرت وين اوديهه حطيتهه بجنطتي وطلعت اركض لابو حسين!!

بشار.. شسويتي ؟؟ ليش رحتي بدون علمي مو بعينج اني؟

قبس.. ردت اتعارك وياهه واثبتلك اني بريئه لان ماصدكتني كل الصار بسببك انت شكيت بيه؟؟

بشار.. لاادافعين عن نفسج وتبررين غلطج بغلط اكبر كام يحجي بعصبيه !! اني رجال تعرفين شنو رجال منو يقبل ياحيوان يجيبون ورقه وكامله ومختومه من طبيبه معروفه بان متعرضه لعمليه فحص وثبت الفحص انتي مو بنت ؟؟ ورا شهرين متزوجه بدون مهر !!

منو ضاحك عليح وكايلج اني عديم غيره ولازم اجي اخذج مثل المسلسلات واطبطب ع ظهرج واكلج ممكن تكليلي صدك لوجذب ؟؟ ورغم هذا وشكد جنت فاير ودمي محترك هم اجيتج صح عصبي بس لاجرحتج ولاضربتج بالبدايه تكدرين من اول سؤال تكليلي تعال اهدء واكعد افهمك وفرحيني واحجيلي الضامته عني!!

انتي شسويتي كمت تصيحين وعبالج اني جاي اتبلى عليج دليل كدامي وانتي اخذتيني بصياحج واني الدم صاعد براسي وكل هذا طلعتيني من طوري ماحجيتي عليمن تلفين وادورين ؟؟ موتشوفيني متعلعل كدامج فرحيني لو لازم تثبتين نفسج وعود اني قويه استلمي هاج هاي المصيبه الوكعتي نفسج بيهه؟؟

ابد لاتربطين العصبيه بالثقه وعبالج من اجيت اسالج واني عصبي ماعندي ثقه بيج؟؟ ابد ياقبس والله لو ادري وحاجيتلي جان سحلت ساجده سحل بس اني دائما اخر من يعلم وبعدين تلوميني ليش جرحتني وليش اذيتني واني مااعرف كلشي ادافع بدون مااعرف ؟؟

حلون هاي المشكله الصارت وامي وبشرى واحتمال اخواتي كلهه عرفت تدرين بيه شكد احبج وشكد محافظ عليج ومستعد اتحمل اي كلمه تنكال عليه ولا واحد يجيبج بالموزين!! شايفه لوحاجيتلي شلون ارفع راسي بيج واخلي الكل يحسبلج الف حساب ورغم هذا الصار ماقبلت اوديج فحص لا اثق بيج بس ردت نفسي ابرد موبكيفي هاي اعصابي مااسيطر عليهه!!

وهسه شسويتي صخمتيهه بالزايد لو صاير شي شنو موقفج انتي؟؟ تريدين تثبتيلي انتي بريئه والكاج العكس شنو الموقف الي راح اخذه!!! ليش هيج قبس الف مره موصيج لاتصرفين من كيفج تعالي احجيلي وعوفي الباقي وراي!!

اني اركض اريد اعرف منو الي داخل بحقد ويريد يدمرنه وانتي تلعبين من وراي شايفه هذا الليل صار ايام اني ماغمضت عيني بس اريد اربط الاحداث واعرف منو السوه هيج وانتي مخليتني اهمش وحدي!!!

قبس.. ماعندي كلمه اكولهه اي شي مااكول اني مااستاهل اعيش حياة حلوه وبيهه كرامه المفروض الانسان مايفكر ولايطمح للبعيد كل واحد يعيش حسب بيئته!!

بشار.. لاتلغيين!! اسمعي قبس بس اني وانتي نعرف بالسالفه وهسه ساجده بلغت عنج ماتفوتهه وهاي اذا ما ورا ساجده واحد يساعدهه هيج خطط مال واحد محترف دزت هيج بلوه حته تجيهه وادمرج!!

الموضوع انحجه بهذا البيت يندفن هنا وابوحسين عليه اني افهمه بس ياقبس وحق الله اذا نطقتي حرف واحد انسي بشار سمعتي ؟؟ هذا الموضوع تمحي نهائيا من بالج واذا سالوج اهلي كولي تخربطت ..

هسه تاخذين علاج مهدء وتنامين هنا لمن تكعدين مرتاحه يله اخذج للبيت هناك بسمه وبناتهه ومااريد احد يشوفج بهاي الحاله!!

قبس.. واذا اجت الشرطه مو ياخذوني؟؟

بشار..لزم ايدي الترعش.. محد ياخذج اسمج ماينذكر نهائيا حته كدام اهلي ماينحجي هذا الموضوع

قبس.. شراح تسوي؟؟

بشار.. اخذي علاجج ومددي خليني اخابر واشوف بس انطيني السجينه وينهه جنطتج وبعدين منو كال مات؟؟

قبس.. لا وكع بسرعه وساجده كامت تصيح مات

بشار.. استغفر الله وفرك وجهه بعصبي اخذ الجنطه وبدل قميصه وشمره وغسل اديه وانطاني علاجي وخليت راسي بالكاع ومددت اشوفه يخابر ومااعرف ويامن لان بديت انعس !!

بالي ماغافي بس مغمضه عيوني واسمعه يحجي ويه واحد يكله حاول بكل الطرق اسمهه ماينذكر ماادري دبرهه من يمك شكد مايريدون ادفع بس حاول ماينذكر اسمهه!!

غمضت عيني العلاج الظاهر بعد مايشتغل لان عيوني تغمض وعقلي وكلشي بيه بحاله معركه ناس تاكل بناس !!

جان صوت التليفون عالي وعباله غفيت وخاصه البيت فارغ الصوت واضح حيل!! كلامه اجه صب باذني وهو يخابر صديقه ويكله هاهي سامر  المهم ماينذكر اسمهه اني اشيلهه بمكانهه كول اني ضربته حول الدعوه عليه!!

سامر... تخبلت انت تعرف شراح تخسر بشاار لاتصير ارعن تخسر تعبك كله ويروح منصبك ولك انت هسه مدير اكبر شركه بالوسط وتمول لكل المحافظات والكل يشهدلك وعن قريب تترقى باكبر منصب وانت تريد تفوت سجن ؟؟

بشار.. لعد ادخلهه هي؟؟ سامر اذا اكو قضيه وسجن اني اشيلهه مستحيل اخلي واحد يعرف بالصار سااامر اياك يطلع حرف واحد من عندك؟؟

سامر.. سده سده خلي اخابر ع المركز  اشوف وصل تبليغ مدكلي شجاك انت الماتحب اكبر واحد راح تضيع مستقبلك بالسجن علمود حبك؟؟

بشار.. شو اسكت رحمه لاهلك شوف وخابرني!!

قبس.. كعدت ع حيلي عيوني كوه مفتحتهن وصحت بشاااار بشاااااار اجه ع صوتي احسه ضايع بس خوفه عليه مسيطر بهاللحظه!!!

بشار.. لاتحجين ولاتسالين ترى روحي بخشمي!!

قبس.. انت تفوت بمكاني للسجن وتخسر منصبك؟؟ بشااار اروحلك فدوه لاتسوي هيج!!

بشار.. مو وكت اناقشج هسه ولاحالتج تسمح موكتلج نامي ارتاحي بعده يحجي جان يدك التليفون بسرعه كمزت ووكفت ع حيلي ولزمت ايده

بشار.. هاسامر

سامر.. واصل تبليغ قبل نص ساعه وراح احوله عليك رهمتهه ويه الضابط  تحضر بشار ساعه ويطلع امر القاء القبض واحسب حسابك بس تحط رجلك بالسجن انسه كلمه استاذ بشاااار!!!

.

.

.

يتببببع ... متابعه ممتعه

قمع المشاعر.... تكملة السابع والثلاثون

للكاتبة زهراء ( روزايه)...

قبس.. بشار الله عليك لاتسوي هيج هاي جريمة قتل وتنسجن بيهه وتخسر كلشي بسببي اروحلك فدوه لاتخليني اعيش طول عمري اعاني من تأنيب الضمير كول قضيه دفاع عن الشرف واني اتحملهه لاتسووي هيج!!!

بشار.. شوتعالي وبطلي بجي عيونج ورمن تعالي واخذني من ايدي واني بس اشهك ارتجى ع الحايط ومدد رجلي وجر راسي خلا ع رجله بس وجهي علي اباوعله !!

شوفي قبس خلي اشرحهه الج من كل الجوانب!! اذا كلت قضيه دفاع عن النفس وحتلو ماكو دليل ضدج او شهد شاهد وياج لازم تاخذين الحق العام وهو ست اشهر شلون ترضيهه اني امشي بطولي وانتي نايمه بسجن شو كليلي شلون؟؟

هاي وحده والشغله الثانيه بس افهميني وفكري بعقلج بعيد عن العاطفه شراح تحجي الناس بابا احنه بمجتمع قذر منو راح يكول دافعت عن نفسهه؟؟ كلهه راح دكول شوداهه لبيت ساجده وهو يعتبر بيت دعاره وشيسوون اثنين زلم قبس محد راح يباركلج ع شجاعتج كلهه راح دكول جذب وابن عمهه ستر عليهه

وراح الكل يباوعلج بالعين الزغيره وبالمستقبل تصير عدنه عائله وصدكي ياقبس يظل عار ويلاحكج طول العمر ومثل ما انتي هسه ضايجه من ماضي امج وتحسين هو السبب بالوصلج لهنا هم راح تصير عدنه بنيه وهم يذكرولهه بيوم امج سوت هيج وتجي تعاتبج!!!

قبس.. كلامك صحيح بس انت بشار مستقبلك يروح انت تطمح للعالي وتريد تترقى باعلى منصب لو بسببي تخسره وهم راح يشمت بيك وائل شلون ترجع موظف عادي وانت ٥ سنين مدير وكله هذا بسببي !!

بشار.. هسه اكعد الومج لو انتقم من عندج ياقبس الشيطان شاطر وماكو انسان معصوم عن الخطأ كايلج قبل انتي عرضي ولو صاير هالشي ويه شجن جان نفس التصرف سويته اضحي بنفسي ولا اضحي بسمعتنه

ااااخ ياقبس اااااخ من عندج يومين بس ماحاجيتج يومين مااتحملتي وتصرفتي من راسج!! بالوقت الردت ارفع بي دعوه ع ساجده واسحلهه سحل لان الرقم الهه طلع واكو تصوير الهه بيوم الجتي بي للشركه هذني كلهن جان دليل يخلي ساجده تتوسل لان لاعدهه فلوس تدفع ولازم تاخذ جزاتهه شسويتي بس كليلي ؟؟

قبس.. سويت غلط طول عمري ما اسامح نفسي اني ساجده عايشه وياهه سنين مايوم تجرأت وجابت رجال للبيت هي تطلع للبيوت يعني مستحيل يخطر ابالي هيج سالفه

بشار.. هسه ع العموم خلي نرجع للبيت صار ١٢ الظهر ومثل ماكتلج ماتحجين ابد عوفيهه وراي والله يحلهه

قبس.. شلون حولت الدعوه شلون يصير؟؟

بشار.. هي مبلغه عليج بلاسم بس سامر كال تعال سلم نفسك وكول اني الكتلت لان عدهه عداوه ويانه وتهمتنه وتدرين من شنو خايف؟؟

قبس.. من شنو؟؟

بشار.. خايف من بصماتج صح مالزمتي بس بصماتج تطلع ع كل البيت لزمتي الباب واثارج ع الكاع خاف ساجده ماتفوتهه وتثبت دليل عليج !!! كومي شو خلي انروح اوصلج ومناك امر ع المركز لو احجي وياهه

قبس.. بشااار وبجيت كمت كعدت كدامه وحاوطت وجهه باديه الله عليك لاتعوفني وسامحني اني السبب دمرتك اني حطمت مستقبلك اوعدني بشار مثل كل مره من تحلهه هسه هم تحلهه وترجعلي ونتزوج

بشار.. ياحبيبي وجر راسي لحضنه تحسسيني رايح للجبهه ترى ماكو شي ما اله حل واليجي من الله هله بي المهم انتي عندي سمعتج وصحتج اهم شي عندي تخلص وتصير سوالف

هسه كومي يله خلي اروح ادور ساجده واشوف سامر شيكول كمت ويا لميت الملابس بعلاكه شلت قميصه ضميته ويه ملابسي وطلعت اكدر امشي طبيعي بس داخلي المتأذي عيوني مورمه ايده الحاضنه ايده برعشه مستمره..

صعدت بالسياره وصافنه ع الجامه وهو يسوق والجكاره بيده كلساع يدك تليفونه من الشركه لو من الوزاره من اسمع صوت اليحجي ويا وهو يكله استاذ!! تشتعل روحي وترجع تنطفي مكانته وقيمته واحترامه بسببي..

وصلنه للبيت ونزل وياي كلساع يكرر عليه ماتحجين والي يسألج كولي تخربطت وبسرعه نامي حته ماخلاني احجي واساله وين تروح وشتسوي لان احسه كوه مسيطر ع اعصابه..

شجن... جنه هستونه انريد انصب الغده واجه بشار وقبس اني اول وحده كمت اشوفهه انصدمت من شفتهه تعبانه حيل تمشي بدون روح بس سلمت وطبت جانت كلهه كاعده بالهول وبشار صعد لغرفته ..

طبيت وياهه للغرفه اخذت الجنطه من عدهه والعلاكه ماقبلت فتحت الكنتور وضمتهن وقفلت الكنتور وخلت المفتاح عدهه عفتهه ومددت ع جربايتهه ودارت وجهه للحايط

شجن.. قبس بيج شي ليش هيج حالتج؟؟ وبشار شبي شو مبين معصب خوماتعاركتو

قبس.. مابيه شي شجن شويه تعبانه فدوه خليني انام واي واحد يسالج كولي متخربطه

شجن.. ماشي نامي احسنلج ماتشوفين فرح واختهه بس ماتاكلين شويه؟؟

قبس.. لا ما اشتهي ..

شجن.. سديت الضوه وطلعت سالتني ماما عليهه كتلهه متخربطه رادت تروح تشوفهه كتلهه نايمه وفرح تحوس تريد تكوم تشوفهه شبيهه لان الكل انتبه ع حالتهم من طبو اثنينهم مو ع بعض..

بشار نص ساعه ونزل حجه ويه جدو علمود المحلات واجارهن لان جدو خبص نفسه اكو مشكله صايره وكاله بلكي تمر عليهن كاله ميخالف من يصير مجال امر واشوفهن!!

طبيت قبله للغرفه كلت اكيد هسه يجي عليهه بس ردت اساله شبيهه لان كلهه كاعده ماكدرت اساله وماما عبالك لاحظت خبصتي وكلساع دكلي شبيج ؟؟

شويه وفتح الباب جنت كاعده ع الجربايه وهي غاطه بالنوم حته ايدهه شامرتهه فوك راسهه بتعب !!

بشار.. هاااشجن خوماحجيتي شي؟؟

شجن.. لاماحجيت بس هي شبيهه؟؟

بشار.. تخربطت بالدوام لان متعاركين اني وياهه وتعبت عينج عليهه ابد لاتلتهين عنهه حته من تروح للحمام عينج وراهه

شجن.. ليش لهدرجه متاذيه؟؟

بشار.. تعرفين حالتهه النفسيه وخاف تسوي شي

شجن.. ماشي لاتهتم!! تقرب عليهه مسح ع راسهه وباسهه من گصتهه وطلع ولله اخويه موطبيعي اكيد صاير شي !!!

قبس.. غطيت بنوم عميق من العلاج لان اخذت جرعه زايده فزيت ع صوت صريخ عالي لو اني احلم لو فعلا صوت خاله فتحت عيوني واني اباوع ع السكف وكدرت اميز صوت خاله وهدى وهن يصرخن بصوت عالي..

كمت من فراشي اتعثر بخطواتي وخاصه وضعي هذا مامتوازنه اريد اوكع امشي والزم بالكنتور وبالحايط لحدما وصلت الباب وعيوني مغوشه بس عقلي هو الصاحي..

طلعت من الغرفه واشوف بقله وضوح الهول مملي بس منو الكاعد ماجاي اميز احس عيوني بعدهه نايمه بس اجاني صوت خاله وهي تصيح ولج قبس تصخمتي وتعزيتي !! كدرت استوعب الصار وعبالك واحد وشمر عليه مي بارد ثلج وفززني كل هذا واني جنت فاصله ولا اتذكر اي شي صار وعبالي مثل كل يوم من انام الظهر من ارجع من الدوام..

ام بشار.. يمه ابني شمعه بيتي منين اجتك هاي المصيبه

بسمه.. يازلمتنه يابشار يالعاقل شلون تسوي هيج اكيد متوهمين مو هو؟؟

شجن.. هذا اليوم ولاينسي اتمنيت اني رجال واشيل كلشي عنه ولا اخلي اخوي يروح مانعرف شصاير بس بعد مانامت قبس وهو راح للعصر ودك التليفون مرت عامر حجت ويه ماما ومافهمنه شكالت بس ماما كامت تصرخ وتصيح بشار

كلنه ركضنه ع صوتهه بلاول جانت منهاره وكوه كدرت تحجي وكالت بشار كاتل واحد وهسه بالسجن بحيث بيتنه انكلب عزات مثل يوم الجابو عمي رضا وعائلته ميتين

جدو طلع يركض وعماتي گلبن البيت وبيت عامر كلهم اجو احس نفسي جاي احلم وهسه شويه واكعد ويروح كلشي بس للاسف موحلم من شفت بابا مدنك ويبجي ويمسح بلحيته البيضه

ام بشار.. اريد ابني عادل اخذني لبشار هو مو جاهل ويسوي هيج ابني سبع ومثقف ورزن مايكتل نفس لا متوهمين هذوله المايخافون الله هيج بلوه بتهمهه اااي اني امه واعرفه مايسويهن بشار..

عامر.. اذكري الله ام بشار ترى هو رجال مو عمره ١٥ وتبجين علي هذا قضاء وقدر والله كاتب ع كصته ينسجن بعد مايفيد البجي والنوح يعني هسه انتي تفاولين علي بالشر مايصير اختي استهدي بالرحمن..

بشرى.. تعالو فهمونه مو رواحتنه احتركت شصاير وشلون كاتل تحجون صدك بشار يكتل ويفوت سجن دخيلك ربي شنو من مصيبه وحلت علينه!!

كومي فاديه جيبي مي ابوج راح يتخربط اليوم الاكشر علينه ربي لطفك ورحمتك!!

عامر.. عادل مايصير عود هاي انت الجبير شوف حالتك راح تموت شجاك يا اخويه قوي حالك وصبر عائلتك لازم اكو حل وشفت سامر كالك والله ازين شاربي اذا ما ثبتت برائته

ام بشار.. شنو برائته ابني مجرم لاتحجي هيج عامر

عامر.. استغفر الله الواحد مايعرف شيكول

بشرى.. احجي ابو نرجس شصاير ؟؟

عامر.. والله يابشرى ماندري دك عليه عمر اخذني بالصياح عبالي ابوي مات وهو يكلي الحك !! والله ركضت بدون شعور واني مااعرف وين وكل ضني مات ابوي !!

اسوق واخابره شكو جان يكلي تعال للمركز بشار مسلم نفسه جريمه قتل لااديه ولارجليه ساعدني مااستوعبت كلامه لحدما وصلت واني اباوع ع جماعته الواكفين وعمر كاعد بالكاع بالتراب ومدنك راسه !!

حجيت ويه سامر المحامي وكال هسه اجي افهمكم بس اسلم اوراق واجي اباوع لجماعته شلون شخصيات واكفه وتالي جبيرهم وهيبتهم بالسجن وبجريمه قتل ؟؟؟

عادل كلساع يتخربط وانكعه بالمي وبالواسطات خلونه نفوت جوه علما اجه سامر وفهمنه

سامر.. ياجماعه اهدو والله مايصير الحجي راح يموت

عادل.. خليني اموت بس كلي بشار يرجع للبيت!!

سامر.. عمي اذكر الله بعده ماصار ساعات من فات للسجن خلونه انشوف شغلنه ونطمنكم

عمر.. احجيلهم السالفه

سامر.. اجه تبليغ للمركز بجريمه قتل واحد من عشيره .... وماذكرو منو القاتل !؟ وللظهر خابرني بشار وكال اني كتلته واريد اسلم نفسي

عامر.. منو هذا؟؟ وين كتلع وشلون؟؟

سامر.. ابو نرجس عداوه بيناتهم والجماعه اليشتغل وياهم يهددون بشار والظاهر متجاوز ع عرض بشار وانتم تعرفونه من ناحيه العرض شلون يتخبل وصاير مجادله بالحجي وضاربه سجينه بصدره وجايه بكلبه وميت بمكانه

عادل.. يابويه يابشار ياحزام ظهري شلون تتهور هيج

سامر.. عمي لازم تعرفون شي راح اكلكم بس حاولو تسترون ع الموضوع لان بشار كال وصيهم مايحجون!!

عادل.. بعد مصيبه!؟

سامر.. ساجده كرايب مرته الهه ايد بالموضوع وهي صار شكم مره ادز رسائل وتهديد وسوالف ماصخه وقبل يومين عرفنه الرقم الهه وبشار راح يريد يتفاهم وياهه وهناك صارت العركه يعني جريمه القتل ببيت ساجده

عامر.. يارب يارحيم!! هاي فوكاهه اذا سمعت كرايبنه شيكولون رايح لكح... عمي يذبوهه براسه ويطلعو من اليدرون متعه

سامر.. اني حجيتلكم حته تسترون ع الموضوع والباقي احنه نحله اني خابرت ع محامي جبير وقديم واعرف بهاي الامور وابو صديق بشار قاضي بالبصره وهم عنده معارف هنا وخابرنا كال باجر اجي والتقي بالمحكمه وانشوف لازم تنحل بكل طرق

وحته اذا اخذ القانون مجرى مانريد يتأذى مستقبله ويروح بيهه لان وزاره النفط وزاره حساسه حيل وكون المدير البيهه يكون مثالي هاي تعليماتهم والباقي ع الله

بشرى.. سوده بوجهج ساجده شعدهه ويه بشار

بسمه... شعدهن يعني غير من ورا قبس هي اجت وجابت الضيم والفكر والعار وياهه

عادل.. بسمه ثمني كلامج قبل لاتحجي التحجين عنهه مرته ولو هنا جان عرف شلون يجاوبج

بسمه..  ليش حجيت جذب مو سنين عايشين واحنه ناس مستورين وبيت حجي صالح معروفين من امهه لطخت سمعتنه وراحت سنين اجت بتهه كملتهه وانهزمت وغطت سنين ورجعت دمرت بشار ليش ادافعولهه؟؟

ام بشار.. مو وقته هالحجي عيب بسمه حقدج ع قبس ضمي بكلبج هاي مرته وتبقه مرته وشمايصير مانسمح واحد يهينهه ماصار ساعات من طب للسجن شديتي حزامج عليهه!!

بسمه.. من حركه كلبي واالا بشار وين يعرف ساجده وشنو المشكله البيناتهم لو قبس بالنص وراح دافعلهه ومدامكم كاعدين خلي اكلكم خاف ماتدرون

سالفه وائل وهذيج العركه من وراهه بس هو سترلهه وماحجه مو طلع وائل يراسلهه ومن لازمهه بشار هد ع الولد وسحله بالمحاكم ومن نحجي نطلع موخوش!!!

هدى.. يعني انتي تشوفين هذا الوقت مناسب حته تصفطين هيج حجي عيب استحي شويه ابدال ماترفعين ايدج بالدعاء للعشتي بخيره ولحدما مات رجلج وبشار كل شهر يدزلج مصرف يكول خطيه رجلهه شغله موشي وهسه تذمين بي وبمرته  لو هنا يقبل ع كلامج اشوفج اول الشامتات ولا فوكاهه تشوفين حالنه ينبجي علي وانتي منطلقه !!!

بسمه .. عيب عليج انتي كبرتي وتجاوزين عليه ودكليلي ما استحي وكدام ابوج ماعندج احترام؟؟

هدى.. خليت الاحترام للجبير لليعرف يحجي ورجاءا عمه ماعاجبج وضعنه ومشكلتنه اكعدي ابيتج وسدي الباب عليج ومالج علاقه بينه واذا تريدين تشمتين اشمتي يم ام وائل

عامر.. هدى كافي شنو هالحجي شوفي ابوج شلون حالته وهي عمتج!!

هدى.. اعذرني عمي بس عمتي مو اول مره تتهجم ع قبس ولاتنسه هي بنت اخوهه يعني العار التحجي علي هذا راجع عليج والبنيه اشرف من الشرف وهي كاعده تتهم هيج تهمه من واحد نذل لو تكعد ابيتهه احسن مانسمع حجي يسم البدن واحنه بمحنه...

كامت هدى بعصبيه وبسمه كامت تحجي بس محد اهتملهه اخذت بناتهه وطلعت وهي تصيح اني يطردوني من بيت اخوي من ورا قبس!!!

اباوع لقبس اذا الحايط حجه هي حجت بس عيون مفتوحه ع وسعهه ومبين اثر الصدمه عليهه لا بجت ولاصيحت وتوقعت دكوم لعمه بسمه تنهد عليهه بس ع سكتتهه وبس تباوع وعينهه تتنقل على اليحجون!!!

هاي الليله لصبح مانمنه وبابا كلساع يتخربط واول مره اسمعه يبجي بصوت ينحب بي وجدو الليل كله يصلي هو وبيبي وعمر اصلا مارجع للبيت عمو عامر يكول بجه بجي لو ميت ابو ماباجي هلكد جان مستند بكلشي ع بشار...

بشار موبس اخونه وحاله حال الاخوه من احنه وصغار وهو يخاف علينه ومدللنه من جان هو بلاعداديه واحنه جهال بالعيد ينطينه عيديه من شغله ويفتر علينه كلنه ومايوم ضوج واحد ودائما يتعامل بعقله وشكد مرينه بمواقف ويحلهه بدون مشكله

عادل.. اااخ يابويه ياكسرة ظهري والله موبس ابني هو!! هو اخووي وصديقي من عمره ١٧ سنه واني اخذ الشور من عنده ماكو مشكله ما اجيت وحجيتهه اله وهو يحلهه ويكلي صحتك اهم عوفهه عليه

ومن احجيله ارتاح انام ليلي رغد لان اعرفه يفكر بعقل شلون هيج يتصرف ويغلبك الشيطان يابشار شلوووون وينك اريد احجي وياك اريد تسولفلي مثل كل مره من تحس نفسك مهموم وتجيني تكعدني من النوم واطلع وياك للحديقه وتسولفلي...

اخر مره كعدت وياك وحجيتلي التحس بي من اجيت وكتلي يابه اني احب قبس واحس نفسي ضايع وضحكت وياك وكتلك هاي انت الجبير وكعت ومحد سمه عليك ؟؟؟

ام بشار.. كافي عادل كافي موزين عليك ابنك سبع يطلع منهه وان شاء الله الله ينصره ع اعدائه ولو كمنه مانعرف العدو من الصديق

كوم نام موزين عليك السهر شوف حالك شلونه كوم حبيبي لايصير بيك شي وين ننطي وجهنه

عادل.. عوفيني كاعد هنااا شلون اغمض عيني وهو بالسجن وتلكي يحرك بروحه تعلميني بي هسه شرب جكاير المساجين كلهه !!

امشي مرفوع الراس بي والله رافع راسي!! شايفه من يجيني واحد ويمدح بي كدامي هيج افتخر بي بهذا عمره واسمه يلمع بكل مكان

شجن .. هدى كومي لبابا سمعي راح يصير بي شي جانت عمه بشرى وعمو عامر هنا وبحجون علي هسه هو وماما واحد يرفع وواحد يكبس

هدى.. راح اكوم اتوسلهم بلكي ينامون وانتن هم نامن ترى باجر اكيد يسمعون الكرايب وكلساع الله بالخير

فاديه.. ياريتني رجال والله اروح اشك ساجده نصين ونص اشمره بالزبل ونص احركه هالساقطه هاي!!

شجن.. اكيد اذته وهيج راحلهه مايسويهه ويغلط ويهد ع مره بس اكيد سوت شي جبير

فاديه.. الساقطه عجوز النار ياربي احشرهه بالدرك الاسفل هالقذره هاي!!

قبس.. ليش راح وماسلم عليه؟؟

شجن.. يمه فززتيني عبالي نايمه !! لا سلم عليج مثل كل مره اجه تفقدج وباسج من گصتج وطلع ووصاني عليج بس عبالي لان متخربطه ماعبالي صاير شي؟؟

قبس.. اني السبب؟؟

فاديه.. انتي شعليج خاف سمعتي كلام بسمه وتأثرتي ترى هدى اخت بشار وازيد من عنده شفتيهه شلون سحلتهه وبعد وبعد هسه تشوفين اخذيهه انتي بحمايه هدى منا لمن يطلع بشار تنگلب عفريت يصير عدنه بشار رقم اثتين!!!

شجن.. بس هالكلمتين كالتهم ورجعت لحالتهه صافنه لوتغطي راسهه بعز الحر وطافيه الكهرباء وتتغطه بالبطانيه الثكيله كلساع اكول يجوز اختنكت...

ثاني يوم اجن خالاتي ونصبنهه مناحه ويه ماما واحنه دموعنه والسانه يلهج بالدعاء بس هذا النكدر علي وبعده كل اخبار ماكو المحامي مستلمهه وكالو يحضرون بلأدله ليوم المحاكمه ...

اجه عمر روحه بخشمه بحيث سالته ماما سؤال صاح اعلى منهه وكال واصل الخبر للشركه واليوم جايين اثنين من الوزاره وحاجين ويه عمر كايليله احنه ويا لاخر لحظه ومانتخله عنه وجايبين واسطه من الوزاره وطابين ملتقين بي

شويه ارتاحينه من ناحيه الشركه بس هو. شلون اذا انحكم وهو عريس ملتهي بغرفته واحنه فرحانين ونقرر شنلبس وشنسوي تالي يضيع كلشي بلحظه ولحدالان مامصدكين السبب ولا بابا كدر يهدأ

وقبس حالتهه لاسوء من يوم الجابهه ماخلت اكل بلحكهه وعايشه ع المي والعلاج شكد حجينه وطبت ماما وعمه بشرى حجن كومه وماجاوبتهن عبالك داخله بصدمه قويه...

مر اسبوع كامل واحنه مامرتاحين حته الاكل اليفوت بحلكنه نحسه مثل السم وغير الخطار وكرايب جدو كلساع واحد جاي وعمر وبابا وعمو وسمعت حته غيث وياهم ليل نهار يركضون يدورون ياقاضي ويا محامي زين !!!

جنه كاعدين العصر ويمنه خالتي وبناتهه المتزوجات وكلهه ساكته عبالك اسم الله عزااا عدنه وحده تباوع بوجه الثانيه وقبس كاعده بصف ماما ومكرفصه نفسهه بس تباوع ماتشارك بالحجي..

اندك الباب!! راحت فاديه تشوف منو نسمع صوت وحده عالي كامت هدى عبالنه خطار تريد تتلكا طبت وحده استغفر الله رغم اول مره اشوفهه بس القذاره تنكط منهه

ساجده ... ماتعرفوني اكيد اني ساجده خالة قبس وجايه احجيلكم هالحجايتين واروح !!!

يتبببببع.... متابعه شيقه...

قمع المشاعر.... الثامن والثلاثون

للكاتبة زهراء ( روزايه)...

اسفه ع التاخير هسه اجه نت جان فاصل...

أكاد أبكي من فرط الحنين ، من شدة الوحدة ، من الأشياء الثقيلة التي تجثُم على صدري وتنام كُل ليلة معي..

....

ساجده ... اكيد ماتعرفوني اني ساجده خالة قبس وجايه احجيلكم هالحجايتين واروح !!!

بشرى.. وشجابج علينه مانتشرف وحده مثلج ادوس عتبه بيتنه احنه ناس معروفين باخلاقنه مانتشرف بجيتج هيج بيوت عاليه عليج..

ساجده.. اشرفتو واذا ماشرفتو ابنكم تحت رحمه ايدي تريدن تسمعن الحجي لو زلمتكم يروح!!

ام بشار.. شعندج احجي؟؟ وقبل لاتحجين بهذا عمرج اتقي الله من جانو يكولون ساجده عبالي بعدج شابه وادورين بس هيج عمر وادمرين عوائل وتهجمين بيوت

ساجده.. هسه شلون ما احجي ترى مابالعه كلامكم غصبا عليه اجيت حته مادكولون خاله قبس ماساعدتنه وافترت تريد تكعد ع التخم

بشرى.. لالا كتلج مانتشرف بيج وحته كعدتج بمكانه قذاره ذاك كرسي واكعدي جان اكو كرسي بباب الهول نصعد علي للشي العالي وعمه بشرى استلمتهه!!

ساجده.. شو ماتعرفين تحجين والله لو مابيتكم ومجبوره اجيت جان علمتج ساجده منو؟؟

بشرى.. منو ساجده ؟؟ مايحتاج تعلمينه اسمهه يلمع بكل مستنقع !!

ساجده.. زفرت نفس جنهه ثور ومدري شنو الجابرهه تتحمل الاهانه وكلام عمه حته توقعت هيه تهجم على بشرى وتضربهه وقبس حاشكه نفسهه بصف ماما ماتحركت ابد ولاحجت بس علامات صدمه وذهول مرسومه على وجهه

جرت الكرسي ساجده وكعدت بوسط الهول صار ظهرهه ع باب المطبخ واحنه كلنه ع كعدتنه ماكمنه ولاتلكيناهه وعمه بشرى كوه لازمه نفسهه وهي مبينه مجبوره ع الجيه لان انهانت وماحجت!!

ساجده.. اسمعني!! ابنكم بالسجن وراح يخير وظيفته ويروح مستقبله وحته مدير راح يعينون جديد وهاي الاخبار كلهه عندي وعبالكم تسترون ع الموضوع لا اني اشهركم شهيره اخلي سمعتكم ع كل اللسان !!

الحجيه.. الله ماتخافي شنو من مره انتي شمسويلج حته هيج تأذي مو الله فوكاج واحنه مسلمين بيد الله وندري برجالنه شنو والله اعلم ورا هاي السالفه شنو من قصه؟؟

ساجده.. لازم ماحجالكم عن القصه بس عمي رجال وابن رجال سبع ابنكم خرب كل مخططاتي بس اني راح اعيد من جديد وماعندي شي فارغه ارجع ويا من الصفر الا ادمره

ام بشار.. اتقي الله حسبي الله ونعم الوكيل بيج حسبي الله!! ليش هيج تأذي واذا تكرهين قبس هي يتيمه وبنت اختج شنو هاي العداوه؟؟؟

ساجده.. ماجايه اشرحلج اخر كلامي عدكم اختياريين لو تنسون ابنكم وحق الله ما اتنازل لو تنكلب السما ع الارض وحته شهود تزوير عندي واخلي ينحكم مؤبد!!

ام بشار .. شتريدين؟؟

ساجده.. لووو يطلك قبس ؟؟ لو يدفعلي ٨٠ مليون بس هذني الكدامكم وفلس ما انزل ومن باجر اسحب الدعوه واجيب شاهد زور واطلعه !!ماتريدون بكيفكم

بشرى.. انتي صاحيه لو عشره الالف مايدفعلج لان فلوس الحلال عمرهه ماتضيع للحرام ولمثل وحده مثلج!! وقبس كطنه وشيليهه من اذانج هذا بيتهه ومرته حلم ابليس بالجنه هذني سوالفج

ساجده.. انتي عمته ؟؟ نفس الطينه انتي ويا اكيد راح يوصلكم الحجي رحتله للسجن وما استقبلني ورحت ثاني يوم وهم رفض يستقبلني ومتكبر عليه ويستحقرني ابن اخوج ومصيره بيدي هو ومرته

هدى.. شعبالج لعد انتي ادكيتي برجال وراح يعلمج احنه شنو لان انتي طول عمرج تندكين بزباله وتهدديهم بس هسه جنيتي ع نفسج وهاي تهديداج حطيهن بجيبج !!

ساجده.. يعني ماقابلين؟؟ وصلوله هذا الحجي كلوله دكول ساجده اله ٣ ايام مهله اذا مااختار افضحه ويعرف شيقصد بالفضيحه !!

هسه اني حجيت العندي وماسمعت صوتج قبوسه وتعبانه خاف مصدومه؟؟ ضحكت باستهزاء هسه راح اروح وارجعلكم بعد ٣ ايام اخذ الجواب لايلعب وياي لان ذاك الوقت هو بسجن وسمعتكم اخليهه ع كل اللسان وقبس ارجعهه منين ما اجت اذا مارجعتوهه انتم؟؟

شجن.. خلتنه نشتعل بنار من كلامهه وجاي تهدد شنو من مره شنو من نذاله وحقاره بعدهه تحجي ومخليه ايدهه ع الكرسي متحضره تريد تكوم وعينهه ع قبس وعبالك تهددهه بعيونهه!!

اجت عيني ع فاديه الواكفه باب المطبخ وبيدهه عمود خشب متين وصارت ورا ساجده !!!

فاديه.. خلصتي لغوه عبالج ماكو زلم بالبيت واجيتي تلغين يمنه وهي حجايه هي ضربه عمود على ركبه ساجده اجه ع اكتافهه !!

صاحت ياكح... وكامت من الكرسي مدنكه راسهه ومخليه ايدهه ع الضربه وهي تفشر بس مالحكت تستقيم وتوكف ع طولهه فاديه ضربتهه الثاني وكعت بالكاع!!

كلنه كمنه نتراكض وهي الفشار مايلبس علي ثوب وعمه بشرى ركضت للحمام جابت الماسحه وتگابلن عليهه هي وفاديه دك بالعوده الخشبه البيد فاديه متينه ضربتهه ضربه ع رجلهه خلت ساجده بس السانهه عامر

فرح وعمه بسمه وبشرى وفاديه كل وحده لازمتلهه لو نعال لو ماسحه موتنهه تموت ماما كامت تصيح ولجن راح تموت ونبتلي شسويتن وهي ماتكدر لاتكوم ولاادافع بس ترافس جواهن

قبس واكفه بالزاويه وبس ترعش توقعنه دكوم تهد وياهن بس يمكن ماعدهه طاقه ومتاذيه بشكل موطبيعي سحبتهه هدى من ايدهه وطببتهه للغرفه !!

ابتعدن عنهه بعد مابردن كلوبهن بس فاديه مابرد كلبهه كل دفره تضربهه اكول هاي مواختي انگلبت وحش وركضت ع الجداحه وجابت بطل نفط تكلهه اليوم مااطلعين منا كبل للنجف اوديج لاحرامات النجف ارض مقدسه بزباله اذبج

تريد ترفع نفسهه ساجده ماتكدر بس تغلط وتفشر وتون وتهدد اني اعلمكم والا ادمركم!!

فاديه.. شوكت ادمرينه من تروحين للنجف منو كالج اليوم اطلعج عدله هاج شوفي وفتحي بطل النفط وتقربت تريد ترشه عليهه وساجده كامت تزحف بالكاع وتتوسل لااا عوفوني اطلع وماتشوفون وجهي

فاديه... جاي وتهددين واستقويتي عبالج نسوان وحق الله احركج ومايرفلي جفن وخليهه ابالج شوفينه الواكفين احنه تربات صكارج البسجن وخاف عبالج نسكت هالمره كسرنه رجليج المره الثانيه اخليج فحمه!!

شالت جنطتهه وهي تمشي تترنج كلساع تريد توكع وشردت وعمه بشرى تفلت وراهه وسدت الباب

ام بشار.. ولج فاديه عوزني فضايح هاي الساقطه هسه تتحلف بيج وتروح تشتكي هسه تسوي تقرير طبي!!

فاديه.. دائما بشار يكول مدامك ع حق لاتخاف وابد لاتخاف من من واحد ماشي بطريق الحرام لان مصيره التهلكه

واني ما اخاف منهه تحمد الله ماحركتهه كلبي فاير عليهه جاي تهدده سجوده عبالهه هي تايهه خلي تظل طول عمرهه تذكر الكتله

خاله لمياء.. صدمتيني فاديه منين جايبه هاي الوكاحه ماعرفتج هاي انتي الفقيره !!

فاديه.. وكحه ع عماتي شفتيهن شلون كامن وياي فزعن وانتن بس تباوعن اكول ماما عليمن طلعتوا العائله كلهه مسالمه

ام بشار.. شجن كومي شوفي بنت عمج انفزعت سوده عليه هاي الطفله شوكت ترتاح ..

هدى.. انطيتهه علاجهه خليتهه تنام رغم شكد رجفت مثل السعفه بس بسرعه غمضت عينهه نامت علاجهه قوي!!

الحجيه.. ولجن هسه تشتكي عليجن وتروحن بالسجن!!

بشرى.. اي نفتح هناك غرفه بس لبيت صالح وكثرن النه اكل ترى اجوع ولجن

لمياء.. نزول عليج بشرى متقبله الموضوع ولامهتمه هاي هسه تسوي تقرير طبي وراح تاخذه دليل ضد بشار وانتن زدتن الطين بله ولو يدري مايقبل راح دكول اجن وتعدن عليه وضربني!!

هدى.. ماتكدر اني سجلت صوتهه وهي تهدد بينه بس بدت تحجي فتحت تسجيل وخلي يجي عمر وننطي يودي لسامر حته يستغلون هاي النقطه بان هي عدهه عداوه وورطت بشار

لمياء.. تحجن صدك؟ منيلجن هاي الافكار بنات عادل شلون اجه ابالج تسجيل

هدى.. خاله احنه تربات رجل من ربانه وعلمنه حته من يجي هيج يوم وموقف نعرف نتصرف

شجن.. صافنه ع اخواتي شلون يحجن بقوه شبيه اني مومثلهن وما اعرف اخذ حقي لومن خابرني وائل فاتحه تسجيل موجان اخذو حقي ليش هسه استغل وضع بشار ويمشي بطوله وامه بس تشمر بالحجي...

ظلينه نسولف للمغرب وراحن خالاتي وبسمه وبناتهه دكن اقامه يمنه رغم الرزاله الاكلنهه بس مامهتمات اباوع لفرح الجوه عيونهه اسود من السهر ومبين التعب والحزن عليهه ومرات اشوف عيونهه مورمه

فاديه.. قبس قبس!! اكعدي باركيلي بمعركه النصر

شجن.. عوفيهه نايمه ليش تكعديهه!!

فاديه .. ولشوكت تظل نايمه متعلمه عليهه سباعيه جنهه ذيب بس هسه تاكدلي هي دجاجه

شجن.. قبس اكعدي وكعدت يم راسهه العب بشعرهه

فاديه.. قبقب ياحلو اكعدي شجاج هيج صرتي ولج احنه وياج وشحده الي يأذيج كومي عاد وسحبت الغطه من عدهه!!

قبس.. عوفوني طفو الضوه!!

فاديه .. كومي قبس والله لويشوفج بشار مايقبل وجان جر اذانج قبقوب اذكرج بالكتله الجماعيه الحصلناهه

شجن.. لج عوبه مالكيتي غير هاي الذكرى

فاديه.. الله بس خلي يطلع ويكتلنه قابلين.. تلكين قبس تكيف لان ورا الكتله تحصل حبشكلات

قبس.. مشتاقتله حيل اريد اشوفه

فاديه.. نطق ابو الهول واخيرا من سمعتي حبشكلات وبوس كعدتي

قبس.. مشتاقتله

فاديه.. راح اسميج مشتاقتله من راح لسه كلما اسالج دكليلي مشتاقتله لعد شكد مغزر بيج البوس عمي بوس مالح يغزر

شجن.. لج اسكتي لاتسمعج ماما شدكول تحجين بالبوس

فاديه.. والله ومحنه اخويه هسه قبس تموت ع البوسات اشوفهه تتختل وتصعدله هسه يجي ويشبعج بوس وحضن وانطور بعد بالحبشكلات!!

قبس.. مااحس باي مشاعر بس تانيب الضمير واشتياقي لبشار حته جيه ساجده رغم صدمتني بس ما انطيت رده فعل ولاجنت خايفه تمنيت تحجي حته اني انال جزائي ولا بشار..

شجن.. دزينه مقطع التسجيل لسامر ومحد يرضه يحجي نسال بس يكولون بعد ثاني يوم موعد الزياره وراحت ماما وعمه بشرى لحد الظهر واجو

بشرى.. الحكني بكلاص مي دخيل الله السجون ممليه شباب مثل الورد

فاديه .. احجي عمه شفتو شلونه

بشرى.. يابعد اهلي جنه ورد محدد اللحيه طالع عريس

هدى... لاتسمعج قبس وضحكت هدى ودغت قبس بس انريدهه تضحك

بشرى.. والله يسلم عليجن وحجيناله ع ساجده وكال سباعيات

فاديه.. شعباله احنه من انطك نوجع ع كولت ولد وياي بالكليه

بشرى.. بعده سامر وشكم واحد ويا متكفلين بالقضيه يكولون ان شاء الله خير لاتخافون شويه اطمئنينه من شفنا احنه دخلنه وجبه النسوان وورانه الزلم كال عامر شوفي شكد واكفين ولجن كلهه قوط وشخصيات جماعته سوده عليه ياعمه..

هدى.. وبعد ماكال شي معقوله مانسيتو شي؟؟

بشرى.. اول ماسالنه ع قبس كال شلونهه صحتهه ديربالكم عليهه لاتزعلوهه!!

قبس.. اسمع وابجي دموعي توكع بحضني واني مدنكه

بشرى.. تعاي ام عيون من طلعنه اخر شي كال بوسيلياهه من عيونهه!!

وجرتهه عمه بشرى وباستهه من عيونهه وهي بس تشهك !!

ام بشار.. لاتبجين قبس مايقبل كال ازعل عليهه لان كناله. ماتاكل ولا تحجي

بشرى.. لا هي تريد جرع بوسات كل سبت اروح اجيبلهه جرعه واجي اخليهه تاكل الاخضر واليابس..

قبس.. مسحت دموعي هو زين خوماضايج؟؟

بشرى.. والله زين ويكول مااحس بالوقت من كد الزيارات واسطات دك يجون جماعته يشوفو وكلهم عدهم مناصب ويجو بكل وقت !

صدك قبس كال كليلهه اذا تريد خلي اداوم

قبس.. ويني وين الدوام ما احط رجلي بالشركه الا يرجع مدير

بشرى.. بكيفج هوكال براحتهه

شجن.. شويه ارتاحينه لان سامر طمنه علي

بشرى.. والله هالسامر لو شما نسوي مانجازي يركض الولد منا ومنا وعبالك اخو

فرح.. بلكي يخطب فاديه

فاديه.. بله ماتسكتين عرب وين وطنبوره وين؟؟ عقلج مابي موضوع غير زواج وخطوبه وحب اذا هيج شاغلج الزواج تزوجي وخلصينه!!

بسمه.. شكالتلج وانهديتي؟؟

فاديه.. لادكلي حته ما انهد احنه بيا حال وفرح تحجي هيج وبعدين شنو بلكي اشافتني تخرجت وظليت

ام بشار.. كافي فاديه مالنه خلك المشاكل خلي اكوم اسبح متت حر وصبن غده جدج عنده علاج خطيه!!

كمنه للغرفه وهدى هي تصب غده وقبس شويه رجع الدم بوجهه جانت جنهه شبح!!

فاديه.. شفتنهه شلون تلغي

قبس.. عوفيهه يمعوده هو منو سامر تعرفو

فاديه.. اصلا سامر مو من بغداد وقصته طويله وبشار صديقه حيل وساعده هوايه لذلك يحبه

قبس.. شنو قصته؟؟

فاديه ... اني اتذكر جنت بالمتوسطه وبشار حجالنه قصته سامر من ديالى ابو رايح بحرب ايران وبعد ماراجع وناس دكلهم مات وناس دكلهم عايش وهو عنده بس اخت وربتهم امهم يم عمهم واهل امه كلهم بالخارج يعني عنده بس عمام !!

من ماتت امه ورا فتره جابرين اخته يريدون ياخذوهه لابن عمهه وهي بعدهه بالابتدائيه وسامر ماخذ اخته ومنهزم جاي لبغداد

يكولون شكد مدورين عليهم ومالاكيهم خطيه جان عايش يم كرايب امه ومن كبر ويشتغل طالع وحده ودرسوا سوه هو وبشار واثنينهم طلعوا هندسه بس هو طلع بالبصره وماعنده امكانيه يدرس ومحول قانون!!

ولحدهذا اليوم عايش بس هو واخته وخلاهه تدرس وكملت وجان بشار يساعده شيشتري لنفسه يشتري لسامر يعني اخو الثاني..

قبس.. وعمامه مالگوهم ببغداد؟؟

فاديه.. ورا سنين طويله يله لگو بحيث ماكدروله لان جان معتمد ع نفسه وكال مستعد انكتل وما اخليهم ياخذون اختي يزوجوهه لان بعدهه صغيره

شجن.. الله يحفظه هوايه وكفلنه حته بسالفه وائل

فاديه.. اي خطيه الله يوفقه

شجن.. للعصر يوميه يجونه خطار لو وحده من الجيران اسمع من خلال الحجي غيث ويه عمر وراجعين يتحاجون بس وائل اخباره مكطوعه وحته مايجونه ولامرته تخابر بحكم زعلانين وهسه اكيد متشمتين بينه

اجن اثنين نسوان متوسطات بالعمر ماعرفناهم بس كالن احنن موظفات ويه قبس واجينه انشوفهه جانت قبس نايمه كعدتهه كامت غسلت وراحت للاستقبال بس شافتهن كامت تبجي

قبس.. سناء شفتي الصار بشار راح يروح من ايدي!!

سناء.. كولي يالله والله كلوبنه محتركه علي وحته واهس للشغل ماكو

عاليه.. كلنه ندعيله والله يوميه بصلاتي ادعي الله يفك عنه

قبس.. شلونهه الشركه هم جابو مدير؟؟

سناء.. لحد الان ماجابو المعاون مستلم ابمكان بشار بحيث اندك شغل ليل نهار تخيلي نطلع ب٤ والمسائي ب٩ حته مايلكون عدنه نقص

ومدري ياحقيره وماكو غير مياميين اكيد تتبع اخباره اجتنه لجنه اول البارحه وكالو اجتنه معلومه بان ماكو مدير واكو اخطاء وتخيلي دققوا ملف ملف ومالكو شي والله الموظفين كلنه شادين بالشغل حته لايتفشل

وحجو ويه المعاون وكالوله مدام ماكو خطأ انت استمر بين مايطلع المدير حسب كلامهم بان هم راغبين بي يبقه مدير وكالو هاي التهمه ماتأثر علي تصير مشاكل عائليه بس سمعته بين المدراء نظيفه

قبس.. ظليت احجي وياهن هم ماتاخرن سلمن عليه وراحن واني يوميه المغرب اختنك واحس الدنيا قبل ماتظلم تظلم بعيني الم بروحي ياكلني جنت انتظره يوميه من يجي واتلكا صار اسبوع غايب عن البيت...

هدى.. اني مامرتاحه لفرح

فاديه.. شلون

هدى.. ما ادري صح تحب بشار ومتاذيه علي بس مامرتاحه لنواياهه اتجاه قبس لان تضوج منهه

فاديه.. قابل شتريد تسوي

هدى.. يمعوده كلشي تسوي

اسمعي فاديه عينج عليهه راقبيهه صايره صلح هي وصابرين وتصعد يمهه بالغرفه ساعات ولجن هذني بنات عمتي الغيره العدهن تهجم بيوت انتبهي عليهن!!!

فاديه.. كاعدتلهن ركبه ونص شعندي شغل عمل وخلي يجي عمر واكله حته يمنع صابرين خاف يقشمرنهه ويسونهه مثلهن !!

هدى.. اني ماحجيت كدام شجن خاف تتاذى لان اعرفهه بعدهه تحب غيث بس تدرين ام بهاء شدكول

فاديه.. شدكول؟؟

هدى... دكول بنات بسمه دائما اشوفهن يم وائل وصايرات صلح ويه ساره وام وائل مسويه الدرب سكه لبسمه اكيد عدهن شي

فاديه.. قصدج ع غيث؟؟

هدى.. اي اشك بفاطمه تريد غيث لان عمه بسمه البارحه بس تمدح بي اكيد عدهن شي ماكدرن لبشار يجوز يكدرن لغيث !!

فاديه.. طبهم مرض هم نفس الصنف تفيد بسمه ويه ام وائل..

هدى.. شكد نصحتهه فرح وكتلهه بهاي تصرفاتج حتلو ينوي يحبج بشار راح يكرهج رادت تحصله بكل الطرق

فاديه.. والله هي عديمه كرامه وتشوفه كدامهه شلون مهتم بقبس ويحبهه وماادري شتترجى

ولا فوكاهه بالجديد عمه بسمه صايره ماتنطاق وعينك عينك صايره علني هي وبيبي يحجن ع قبس!!

هدى .. اني هنا اريد اشوف بلكي الله وتحجي والنبي الا اشرهه ع الحبل ناكرات الجميل تدرين بابا لسه يدزلهه مصرف وهذاك ابنهه المدلل مايشتغل

فاديه.. شلون ابن عاد!!

هدى.. خلي اكوم اغسل ملابس

فاديه.. اني راح اقره قران قبل لا اانام!!

شجن.. الوضع مثل ماهو ماكو شي جديد مر الاسبوع الثاني وبشار بالسجن ع كولت بابا نفس حكومه بحيث حته المحكمه جر وعر وحددو موعد المحكمه بعد عشرة ايام..

واحنه ماخلينه لادعاء ولاتسبيح ماكوشي ماسوينا وساجده انقطع خبرهه وما اجت بعد ومدري شصفه بتهديده النه !!

الباب مايسكت لحظه لو زلم ع جدو لو نسوان علينه بحيث من المي والجاي ملينه وصابرين الله يسلمهه ماتتحرك ابد وواكعه براس فاديه والعرايس فاطمه واختهه بس يحجن ع الرايح والجاي لعبت نفسي من عدهن...

جان يمنه خطار وزلم هوايه بلاستقبال واني وفاديه بالمطبخ هي كملت الاستكاين والجاي على النار وصاحتهه ماما واني كاعده ع الكرسي..

اشوفه من الشباك لاهلا ولامرحبا بس ولا اكوم بس يحجي ارده فتح الباب وطب

امجد.. السلام عليكم

شجن.. هلووو

امجد.. هيج يردون السلام

شجن.. شتريد؟؟

امجد جاي اخذ الجاي شبيج تتعاركين ؟؟

شجن.. سلمت كتلك هلو بعد على شنو اتعارك هسه تجي فاديه تصبلك وصحت فااااديه!!!

امجد.. ليش ماتكومين تصبين انتي بعدهه رجلج ماتساعدج؟؟

شجن.. موشغلك هذا تريد الجاي هسه تاخذه

امجد.. شبيج انتي شايفه روحج فد شي لان حلوه مثلا ترى هذا جمالج ولاشي بسبب رجلج

شجن.. منو كالك اني حلوه؟؟ وبعدين مامنتبه ع نفسك انت عديم ذوق بين كلمه وكلمه كلت رجلج !!

امجد .. لازم تحسستي من الموضوع

شجن.. لااا اني مقتنعه بوضعي بس انقرفت منك لان من اشوفك مدري شيصير بيه حته غثيان

امجد... والله وطالعلج السان شجن افندي بس يله ماعلينه انتي حلوه بكل حالاتج ويباوعلي ومبتسم!!

شجن.. اني لومنك وواحد يكلي مقرف وتسوي غثيان ما اطب للبيت بس انتم يمكن عدكم وراثه بسالفه الكرامه الممسوحه!!

امجد.. شتقصدين ولج وصاح بيه!!

فاديه.. تقصد انت واخواتك نفس الماركه عدكم الكرامه معدومه

امجد.. اشو انتن....

فاديه.. قاطعته انتن شنو؟؟ جرب تحجي اسمع امجد صح الجبير بالسجن بس عدنه الثاني هسه بتليفون واحد اخلي يگلب البيت ع راسك ولاتندك بينه وخاصه شجن مو ماعدكم شغل وعمل انتن واخواتك بالينه بلوه فكو عنه عاد وهاك هذا الجاي اخذه وياريت من تجي ادك الباب مطبخنه موخان جغان!!!

امجد. شال الصينيه وهو عصبي يصير خير اني الجن وانتي شجن بعيني!!

فاديه.. دروح بابا وسدت الباب وراا

شجن.. سمعتي؟؟

فاديه.. اي كلب عابت لهالخلقه اريد اعرف هاي الحقاره منين جايبيهه ابوهم ورده الله يرحمه بس طالعين ع عمتج بسمه!! وعمتج بسمه طالعه ع خالتهه يكولون تنكط حقاره وجانت مخربه العوائل

شجن.. خلي يولي بس يطلع بشار احجيله علي !!

فاديه .. اذا ظل هيج يضايقج احجي لعمر هو يوكفه عند حده!!

اليوم كاعدين من الفجر كلهه لازمه القران وتقره وبابا وعمر راحو للمحكمه گلوبنه مثل النار وقبس احسهه وصلت لاخر مرحله كعدت بالكاع ماتكدر تكوم رجليهه عبالك انربطن وبس تبجي ع ساعه يدك التليفون ولو يبشرونه لو ينگلب بيتنه مناحه

رغم تقريبا صارله شهر بالسجن بس من كد الواسطات قربو موعد المحاكمه هوايه ناس ادخلت وننتظر الفرج صارت الساعه ب١ وماكو خبر واحنه متلوعين

ب٢ ضبط دك تليفون عمه بشرى جان المتصل رجلهه بسرعه جاوبت!!

بشرى.. ها ابو حوراء بشرنه راح نموت!! مانسمع شيحجي بس ردة فعل عمه وملامح وجهه ماخلت علينه حيل!!

مانسمع بس شهكه بشرى وهي تصيح لادكولهه يايمه سوده بوجوهنه ولك عمه بشاااااااار وين جانت مضمومه الك!!!!.

.

.

يتبببببببع.... متابعه ممتعه