رواية #قصة_هديل الفصل الخامس عشر 15 - بقلم غير معروف

بقيت ع هاي حاله الحزن والبجي ومنعزله وحدي ويوميه اصير اسوء وصلت مرحله ما احجي ويه اي احد اروح للدوام ساكته ارجع للبيت منعزله بغرفتي اهلي يحجون ويايه وميفيد بهاي الفتره اهلي خطبو مريم لاحمد صارت خطوبه رسميه وراهه بدو تحضيرات العرس والجهاز جانت مريم تجيني تتوسل بيه حتى اطلع وياهم تكلي انتي دائما تختاريلي اشيائي ما اكدر بدونج مره رحت وياهه تسالني ع الالوان منو الاحلى كتلهه مريم اني ما اشوف الوان اني الدنيا كلهه سوده بعيني كملو كلشي وتزوجو واني ولا الي صوت كرايبنا ياهوه الي يشوفني يكل لامي وديهه لساده يقرون عليهه خاف بنتج متلبس بيهه جني ...لكم ياجني اني متلبس بيه علي من ساسي لراسي اووووف ياربي
اجتي فتره الامتحانات وطلعت دور ثاني نص المواد واكعه بيهن بيه مابيه شديت حيلي وامتحنت ونجحت كله طلعلي مقبول الحمدلله من عبرت مرحله
طول العطله اني حابسه نفسي لا شايفه احد ولا احد شايفني علي ولا مره خابر الف فكره تجي براسي خاف نساني خاف تزوج خاف حب وحده غيري راسي يريد ينفجر من التفكير بي

مره اجتنا خالتي الصغيره اسمهه سهى اني كلش احبهه احسهه قريبه عليه هاي خالتي عدهه مشغل مال خياطه وهيه اختصاص تصميم ازياء يعني خياطهه ع مستوى
كالت هدوله خاله ولله حاسه بيج بس انتي اذا تبقين هيج راح تتخبلين خاله انتي داخله بمرحله اكتئاب هذا الشي الي دسوي بروحج لو بي فايده اكلج خليج هيج بس ماكو فايده كتلهه خاله ماكو حل جربت اطلع من هاي حالتي بس ماكدرت كالت; لا الحل موجود صح ماراح تنسين بس راح تلتهين شويه كتلهه شنو ...كالت تعلمي خياطه وهاي عطله طويله عريضه كتلهه خاله اني وين وانتي وين كالت معليج بس تعالي ويايه احنا عدنه مكينه بالبيت مالت ماما طلعناهه ونظفناهه وخاله خلتلهه زيت وشغلتهه وكالت باجر اجيج واجيبلج ويايه برده واقمشه وتبدين باشياء بسيطه ...اجتي ثاني يوم وجابت اقمشه وبردات وعلمتني شلون اطلع الباترون وافصل علي وظلت كل فتره تجي تعلمني اشياء بالبدايه جنت اي شي يخرب عندي ما اصلحه بالعكس اكمش المكص واذب حركتي بالقماش ..بس بعدين حبيت الشغله وكل ما اخيط فستان جنت اتخيل البسه بخطوبتي اني وعلي وتالي اي احد يجينا انطيهيا لو انطي لايه لو لمريم بس اكثر وحده اخيطلهه ملوكه بنت اخويه علي حيل احبهه جنت من اشيلهه اذكر علي من جان يكلي تصير عدنا بنيه ونسميهه رنس ...اوف ياعلي بقت بس ذكريات
رجع الدوام ورجعنا نداوم اني ومريم صرت ثالث كليه بس شكد جنت كارهه الدوام ما الي واهس لا للمحاضرات ولا لحجي البنات شكد جانو يجون شباب من قسمنا او من باقي الكليات يريدون تعارف او علاقه مريم جانت تكلي هديل انطي فرصه لنفسج بلكي تبدين حياة جديده كتلهه مريم كل عقلج يدخل بحياتي احد وره علي والوث حبنا الطاهر مستحيل .......بالبدايه لما نزلتلكم الاجزاء الاولى من قصتي يعني لما جنت طفله وبديت احب علي هواي بنات كتبوا بالتعليقات هاي اذا بالسادس ابتدائي وهيج لعد شسوي من تدخل كليه.... (بالمناسبه اني اقره كل تعليقاتكم بكل البيجات الي نشرت قصتي ادخل ع هاشتاك قصه هديل ويطلعلي كل النشر وكل التعليقات وتعليقاتكم كلش كلش تسعدني وخاصتا اهتمامكم وتلهفكم للقصه واروح فدوه لدمعاتكم ) تدرون اني شسويت من دخلت كليه حافظت ع حبي جنت اخذ حذر ع نظرتي ع ابتسامتي ما انطيت مجال لاي احد يلوثني الجامعه مع الاسف عباره عن فخ للعلاقات صح مو الكل بس الاغلبيه اكو حالات حب حقيقي وزواج بس شكد 1 _2 _3 بالميه حتى لو 10 بالميه والباقي كله لعب 4 سنه الشاب يلعب بعقل البنيه ويأملهه ويرسملهه احلام وتالي يتزوج الي تختارهه امه للاسف هواي بنات يوكعن بهذا الفخ مو لان هيه مامؤدبه او اهلهه ما مربيهه بس هيه حبت ووثقت بهذا الشخص العديم الرجوله ماكو بنيه شريفه ادور لعب كل وحده حلمهه تحب شخص وهذا الحب يكون بدايه زواج وتاسيس عائله اني مو قصدي ابيع مثاليات براسكم بس هذا واقع حال
نرجع للقصه ...
راح يصيرلي سنه اني ما سامعه صوت علي ولا شايفته احس نفسي عطشانه لصوته لضحكته ولسوالفه وياي حياتي بدون طعم بدونه جنت منتظره شهر الثاني يجي بلكي بعيد الحب يحن عليه حتى لو بس رساله خلي يعاتبني يصيح عليه اي شي قابله بس كون احس بعده يفكر بيه يوم 13 بشهر الثاني ظليت لازمه الموبايل وفاتحه الحاسبه بلكي يارب يدك صارت ساعه 12 وهوه ماكو طلع الفجر وهوه ماكو صليت ودعيتله وجنت دائما اردد هذا الدعاء خالتي سهى علمتنيا (ياجامع الناس ليوم لا ريب فيه اجمع بيني وبين علي ) ثاني يوم الساعه 3 الظهر فاتحه فاتحه الحاسبه دا اكلب بالفيس دك عليه مكالمه فيديو ما اعرف شلون جنت مرتبه اولا مكفشه لولا اصلا ما باوعت لنفسي ما صدكت افتح المكالمه من شفته ما اعرف شصار بيه هوه لازم الكيتار ويدك بي ويغني ما نسينا يا حبيبي ما نسينا حبنا وينه ياحبيبي حبنا وينه مرت ايام العمر شفنا لوعات وهجر ....تااااابع