رواية #قصة_هديل الفصل السابع عشر 17 - بقلم غير معروف

رجعت ويه احمد للبيت بس هذاك اليوم شكلي كله متغير حتى ماما وايه ومريم كلولي اليوم اكو ابتسامه بوجهج كتلهم تونست ويه جهال خالتي
بس مريم وايه ما اقتنعن واخذني تحقيق حجيتلهن كلشي وبقن يدعن بلكي من يرجع علي الحال يتغير ..امين يارب
رجع علي سافر بس هالمره رجع يخابرني ويحجي ويايه جان يفتح كاميرا ويشوفني الشقه الي كاعد بيهه وساكنين وياه اثنين اصدقائه ويشوفني المكتب مالته بالشغل وبيوم المناقشه مالته ظل فاتح كاميرا وجان الي يصور اخو مصطفى بيومهه ظليت بس ابجي شكد جنت مفتخره بي ومن خلص مناقشه كلي هديل لج مكانج يمي مو وره الكاميرا كتله هذا قدري شسوي
اني جانت عندي فتره امتحانات امتحنت والحمدلله نحجت بقت سنه واتخرج اوووف شفت من الكليه اسوء ايام حياتي بيهه
علي وره شهرين رجع بقينا يوميه نحجي عالموبايل ومن اروح اخيط يم خالتي سهى نتشاوف بهاي الفتره بين مده ومده يجون ناس يتقدمولي اني بدون ما اطلع وبدون ما اشوفهم ما اقبل وين اكدر اقبل وعلي ماخذ كلبي وعقلي كلشي بيه ملك اله
بده الدوام والسنه الاخيره بلكليه علي كل يومين لو 3 يجيني ونطلع نتريك لو نتغده سوه من رجعلي احس روحي رجعتلي الدنيا صار الهه لون مو مثل قبل كلهه سوده بهاي الفتره مريومه حامل
كالوا باجر العمليه مالتهه اني رحت وياهه جابت ولد يجنن; سمينا يوسف من خلصت العمليه والحمدلله مريومه والطفل طلعوا بالسلامه علي خابر عليه كال اطلعي راح اجي عليج طلعت وياه ورحنا اتغدينا من رجعت اني ينزلني شويه بعيد عن بيتنه ويه ما نزلت من سيارته واشوف بابا كدامي كال اطلعي كدامي للبيت بس النار تطلع من عيونه علي راد يحجي وياه كله شغل سيارتك وروح منا بعد ما اريد اشوفك ويه بنتي; واذا ابوك رفع مسدس بوجهي فاني اخلي طلقه براسك وهديل خطبوهه مني واني وافقت وانت راح تنتهي من حياتهه راح علي واني طبيت للبيت اول ماوصلنا للطرمه ضربني راشدي معقوله ابويه هيج يسوي بعمره ما مد ايده عليه اني ظليت ابجي وطبيت للبيت ايه شافت الموقف اجتي ع ابويه عمي انت شسويت وظلت تصيح اني قفلت الباب واصرخ ايه ادك بالباب وماكو علي يخابر عليه ضربت الموبايل ع المرايه مال ميزتواليت وتكسر ايه خابرت ع علي اخويه الحكولي خاف هديل يصير بيهه شي بهذاك الوكت صدك ردت اسويهه واكطلع شرايني بالشضايا مال المرايه اجه علي وكسر الباب اني املخ بنفسي وما احس صارت عندي حاله انهيار عصبي
علي يدك ع ايه كلهه انطيني هديل احجي وياهه كلتله عوفهه هديل عمي ضربهه وراح تتخبل صارت عدهه حاله انهيار من وراكم رادت تنتحر ولحكنه عليهه
علي رايح ومتعارك ويه ابو وصارت مشكله جبيره
بليل تقريبا ساعه 10 اسمع امي تتعارك ويه ابويه تكلي كافي خبلتو البنيه حسبي الله عليك وعلى اخوك هاي تاليتهه وصلت وياك للضرب اني بعد ما اتحمل اخذ بنتي واطلع من البيت ويه مايحجون طب عليهم علي اخويه كلهم بابا الحك علي ابن عمي مسوي حادث والولد بالشارع يكولون يمكن ميت اني سمعتهم واني تخبلت علي مات من وراكم امي لازمتني كتلهم وخرو ولله اليوم احرك روحي واروح للنفط واهلي يركضون ورايه علي كال لج بعده ما ميت ولله بعده كتله اني سمعتك كال بس ما متاكدين امشي اخذج للمستشفى ونشوف رحنا اني وامي وعلي وبابا كال جاي وياكم كتله شكو جاي مو كافي مات من وراكم ما اعرف شلون طلعت شنو لابسه امي خلت العبايه ع راسي ورحنا وصلنه لكينه خالتي كاعده بالكاع وصيااح وبجي اني شفتهه هيج واني ما ظل عندي عقل كعدت وياهه بالكاع خاله فدوه كليلي علي ما مات وينه علي كالت علي يكولون مايصبح بالعمليات صارله 3 ساعات
عمي يدك ع راسه ويصيح اني السبب وبابا يبجي; كتلهم هوه كلي ميوكفون سويه الا ع كبري ارتاحيتو هسه واصيح واعيط ابويه كال لامي وخري بنتج منا كافي العالم كلهه تباوع علينه
خالتي تباوع عليه وتكلي هدوله لعابه علاوي احجي وياه اني ادري بي يسمعج واكفه ع باب العمليات وابجي مرت كدام عيني كل ذكرياتنا وطفولتنا وضحكاتنا علي وين رايح وعايفني انت عمري كله كل دقيقه بعمري الك تعال قبل لتروح اخذ ذكرياتك من عندي تعال اطلع من طفولتي ومراهقتي وشبابي علي انت محفور بكل جزء مني اني عايشه علمودك انت اذا رحت واخذت عمري وياك اني ع شنو اعيش فدوه لتتركني بس ارجعلي ووعد مني اعوف كلشي وما اعوفك ....تره مو بس انتو تبجون اني اكتب وشابعه بجي .....تاااابع