رواية #قصة_هديل الفصل التاسع عشر

علي بقه بالمستشفى اسبوع اني اروح للبيت بس اغير ملابسي وارجعله وراهه طلعنا وره شهر ونص فك الجبس والحمدلله حالته تحسنت بس نفسيته تعبانه من التشوه الي بوجهه مصطفى اخو علي كله ما طول كمت خلي بس المده تصير شهرين ونروح لايران نسوي العمليه التجميليه وراه 3 اسابيع راحو لايران علي وراح وياه مصطفى واخويه علي بقو هناك شهر كامل وبيوم العمليه شصار بيه فاتحه كاميرا ويه اخويه علي ومصطفى لحد ما خلصت العمليه طولت 4ساعات ونص ما خليت لا دعاء لاقران لحد ما خلصت ومن فكه البنج يلا تشاهدت اني بهاي الفتره رجعت للكليه كله فايتني العالم راح تسلم بحوث التخرج واني كلشي ممسويه طول الشهر واني اقره وامتحانات والبحث هلكت.....

صديقاتي راحن واشترن قاط التخرج واني بعدني يا تخرج المهم علي طلع سالم واني حلفت ما اروح لصوره التخرج اذا مو علي ويايه; وبهاي الفتره عمي وخالتي يوميه يجونه لان بقو وحدهم بلبيت حتى مرت مصطفى رايحه لبيت اهلهه .....

رجعو من ايران شحجيلكم ع علي صاير بعد احلى من قبل خشمه يجنن اني شفته هيج مدري اهلهل مدري اكمز امي تكلي ولج استحي اخوانج وابوج منا خالتي كلتلهه من شنو تستحي علي خطيبهه كافي خلي البنيه تفرح صارلهه 4 سنين الهم اكلهه اكل جان عمي كال يلا هسه شوكت نسوي الخطوبه اني شنو كلبي راد يوكف بابا كال البنيه بنتكم وهيه بكيفهه اني بلعت لساني اريد احجي ما اكدر خالتي كالت ولج متحجين هستوج صوتج يلعلع وتكمزين ماما كلتلهم يصير خير ان شاء

الله بس مو هسه بعد يومين ع صورة تخرجهه وهيه حتى قاط بعدهه ما مشتريه جان علي يكلي كومي هسه نروح نشتري امي ماقبلت كلتله لا خاله انت تعبان من السفر اووووف امي 😏😏😏😏 جان كالت يلا كومي بدلي مريم تروح وياج واحمد ياخذهن ويجيبهن ايه كالت اخذوني وياكم كتلهه يلا رحنا من العصر ما رجعنا لحد الساعه 11 بليل وتتلكانه نبع الحنان دك رزايل الجهال مخبلين امي سيوفي وملوكه ....

خابرني علي كلي هااا كلشي كامل كتله كلشي كملت بس مسكه ورد ما لحكت اوصي عليهه كال معليج هاااي خليهه عليه اجه يوم صوره التخرج من الساعه 4 الفجر كاعده شكد لابسه قبل ومخليه مكياج بس عمري ماشفت نفسي حلوه مثل هذا اليوم هم فرحه تخرجي وهم علي ويايه ساعه 8 دك عليه علي كال اني بالباب نزلت لكيت اهلي جوه امي طشتلي جكليت وهلهلت ابويه باسني من راسي يمعودين المكياج واني شلوني ولا ابجي لكيت علي واكف لابس قاط ورباط وبيده الورد خررررب

احساس مو طبيعي الورد طبيعي ابيض وشكم ورده صغار وردي كتله وين لكيت الورد من الصبح كال الورد للورد هذا جبته من الليل وخليته بالثلاجه 😂😂هااا نسيت اني جان القاط مالتي نيلي والقميص ابيض ع اوف وايت والشال وردي الجنطه سواريه والحذاء تكرمون نيلي ساده يعني نزاااااكه رحنا اني وياه واخذنه كووومه صور وبيوم حفله القاعه هم اجه ويايه وعائلتنه كلهه اجتي 3 ميوزه بس النه حتى سيوفي اخذنا وحيل تونسنه بعدهه خلصت امتحانات والحمدلله نجحت

وبدت سوالف الخطوبه والمهر والحنه والعرس ...

ما اطولهه عليكم بس اني بالعرس لبست حجاب لان سويناه بالقاعه وعلي عزم اصدقائه بس الحجاب فدشي يجنن وحيل نازك وناعم ... اما البدله احزروا منين ؟؟

من خالتي سهاوي اني وياهه صممناهه ورسمناهه وهيه خيطتلياهه بس شنو تجنن تكطع القماش وصينا توصا تطريز يدوي الشغل جان تحفه علي جان لابس قاط كحلي وطالع كلش كلش حلو اجتي الزفه وكلبي يدك يدك يدك بابا كام يبجي كله هديل امانه عندك كله بعيوني هدوله وعمو باس ابويه وتشكر منه وبعدين رحنا للقاعه ومن دخلنا شغلو طلي بالابيض طلي يازهره نيسان والناس جانو كلش هوايه زين ما وكعت وعلي هوه الي غنه بالحفله منحتاج مطرب 😂😂 الاغاني الهادئه هوه غناهه والهوسه والطربكه دي جي وهم غنالي زغيره جنت وانت زغيرون وهم بجيت ههههههههه جان كلشي حلو حسيت ربي عوضني عن كل دمعه بجيتهه

كلمه شكر،،،،،،

شكرا لكل الي قروا قصتي وتفاعلوا وياهه وانتظروهه بفارغ الصبر شكرا لكل تعليق لكل سمايل لكل نقطه كلمه شكرا كلش قليله بحقكم واسفه اذا ضوجتكم وبجيتكم دموعكم حيل غاليه عليه من اقره اي وحده كاتبه ولله بجيت جنت اتمنى ادخل لصاحبه التعليق وابوسهه واكلهه اسفه لان نزلت دموعج حبيتكم كلكم وحبيت طيبه كلبكم بس مو غريبه احنا هيج العراقين كلوبنه رهيفه ومشاعرنه صادقه ودمعتنه سخيه تنزل ع اي شخص نحس بمعاناته ربي يوفقكم ويسعدكم وليشوفكم مكروه وان شاء الله كل بنيه تحب وتنحب وتزوج الي يستحقهه ويقدرهه

الى كل وحده قرت قصتي احب اقدملهه شي صغير من تجربتي ...... لاتيأسين من رحمه الله لا تسؤين الظن بالله الله ارحم واكرم من انه يخيب ظنج تمسكي بأيمانج صلاتج راح تحميج من كل مكروه من كل وساوس الشيطان دعائج ينجيج من كل مشكله انتي جوهره حافظي ع نفسج حتى وان حبيتي لياخذج الحب لتصرفات بعدين تندمين عليه

اهلج اهم ناس بحياتج ربوج وتعبو عليج لتزلين راسهم خلي دائما مرفوع ارضي ربج و امج وابوج وشوفي الله شلون يرضيج اتمنالكم حياة سعيده مليانه حب... اسفه اذا طولت عليكم وشكرااااا هديل 🌸