رواية قسور والمهره شامه الفصل التاسع عشر 19 - بقلم أسيل

طلعت من الغرفه النار شابه بضلوعي الصراحه ما جنت ناوي اخذ نوران بس البرود الي بيها اتجاهي يحرك قلبي محسستني مجبوره تبقه وياي ما تقبل تفهم ولا تقبل افهمها طلعت من الغرفه من كلت الها نوران راح تجي وياي ما صار بوجهة اي تعبير ولا اهتمت بس اهتمت من كلت الها ابوي رايد هل شي وهو جذب كلت الها تحظر ملابسها لجم يوم  طلعت من البيت وره ساعه رحنه معاذ ونوال والأشتر بسياره وانا و شامه ونوران بسياره كلت لنوران تكعد وره وشامه ليكدام اعترضت وشامه كعدت ليوره بدون ما تحجي شي وكالت تريد ترتاح ليوره وسويره وفاروق بسيارتهم بقت شامه مخليه راسها على الجامعه والسماعات بأذنها نوب الطريق كله اباع عليها بالمرايه كل احزان الدنيا احتلت ملامح وجهة دك تليفونها باوعت عليه وسدته اتصلت غيداء بيه جاوبتها وسئلت على شامه باوعت عليها غمضت عينها وكلت الها نايمه سديت التليفون بس طمنتها وكلت الها رايحين نريح وصلنه لبيت المزرعه مالتتنه يبعد من البيت 3 ساعات الطريق مفاتحه حلكها ومغمضه عينها نوران الطريق كله ما سدت حلكها كل شويه اطخني تضحك تضرب ايدي واني استغفر ربي حته لا اشمرها من السياره وصلنه لبيت المزرعه فتحت عينها بس طفيت السياره عدلت حجابها و نزلنه مشت شامه شويه تضحك ويه البنات كبالي تمشي انتبهت عليها خطواتها مو متزنه وثكيله صارت مشيت وخليت ايدي على خاصرتها باوعت عليه وكلت الها

_شبيج راح اخذج

شامه :كعدت بالسياره هواي لهذا احس بدوخه ومنايمه مابيه شي

سندتها لحد ما صعدتهه للغرفه مالتي جانت كبال اسطبل الخيل مشت و فتحت البالكونه بقت تباوع بلهفة على الخيل الأسود وكلت الها

_هاي هي شهرياد

رجعت ليوره بس لزمتها وكعت بين ايدي شلتها بسرعه وخليتها على الجربايه وخرت الحجاب عركانه حرارتها مرتفعه رسلت رساله لحسام يلحكنه واتصل بيه شرحت اله وضع شامه كال مسافه الطريق ويوصل نكعت ايدي ومسحت وجهة فتحت عينها بس انتبهت عليه دفعتني بس شافتني قريب منها وكعدت كالت

شامه :طلكني

بقيت اباوع عليها ضحكت ما اعرف شحجي وياها ما أكدر اتعارك واغثها وهي بهل حاله ولا أكدر ألبي رغبتها طلعت من الغرفه حجيت لحسام الي تريده بقه ساكت ما حجه خلتني بين نارين اجه حسام ما خلته يتقرب منها صارت عصبيه نار وطك خشمها دم معاذ بعده ومخلاه يقترب منها طلع الصبح فتحت الباب نايم بالغرفه الصغيره ونوران نامت بالفراش وانا بالكاع بس فتحت الباب صارت بوجهي باوعت لنوران جانت بثوب النوم ضحكت بأستهزاء ونزلت جوه والله ولا باوعت عليها ولا رغبت بيها نزلت تسولف ويه البنات وتساعدهم بالطبخ صبحت عليهم وكعدت وفاتت نوران ورايه مثل ذيلي لازكه بيه ضربت نوران جتف شامه عود بالغلط وكالت

نوران :أسفه

شامه :على شنو اسفه حددي لان بكتي رجلي لو لان لازكه روحج برجال يعشك غيرج لو لان ضربتني

ضحك فاروق وضربه معاذ على راسه وسوينه نفسنه ما منتبهين ورجعت من فاتت ضربت جتف شامه ضحكت شامه وعرفت بيها راح تسوي شغله تشيطها للسمه وره ثواني كعدت بصفي نوران والثلاجه وراها مشت شامه فتحت الباب مال ثلاجه كل قوتها وجانت تشرب جاي نوران الضربه الي نضربتها نوران بالثلاجه اذا مو ارتجاج بالمخ صار نزيف ميه بالميه صاحت نوران كامو الولد غاصين بأكلهم وكالت

شامه :يووو مو بقصدي

وعافت المطبخ ومشت طلعت بره لفت الحجاب وبقت تتمشى ب المزرعه لحكتها بس سحبت ايدها صار وجهي بوجها وكلت

_شنو هذا تصرفج
شامه يله اضربني واني اعتذر تفضل يا خد يناسبك اضربني عليه

عينها بعيني كميه الحقد والغل الي بعينها مستحيل كل هل حب والاحساس والمشاعر يتحول لحقد وكره بس الي شفته بعينها عرفت ماكو رجعه عفتها وفتت للبيت ما فتحت حلكي لو بحرف وياها مر يومين شامه توكع تروح بغير عالم وكل بالي يمها معانده ما تروح للطبيب متاكل هواي وهي ونوران معارك جنه راكبين انا والولد خيل وهي والبنات كاعدات جانت ترسم كاعدات هاي التكشر فاكهة وهاي تسولف وتضحك الهوى شويه عالي طار شالها شعرها مفتوح مشيت ونزلت وصحت الها مشت بدون شالها ما حجيت وياها شي كالت

شامه : أمرني بشنو اخدمك

ضحكت على جوابها الرسمي خليت ايدي على خاصرتها وسحبتها لصدري فزت و شلتها من خاصرتها وكعدتها على شهريار جلبت بسرعه بالسرج ضحكت بصوت من خوفها وارتباكها دك قلبي بس شفت ضحكتها وصعدت وراها بقت تلعب بشعر شهريار خليت ايدي على خاصرتها لزمت ايدي كل قوتها جانت خايفه وفرحانه بنفس الوكت وكالت

شامه:ا... اخاف اوكع

_أطمئني انتي وياي

شامه :وهذا الي يخوفني اكثر

مشيت بعيد عنهم رخت نفسها صار ضهرها على صدري حيل تعبانه جانت وكلت الها

_تذكرين وعدتج نجي هنا

شامه :فكر بألي كلته الك ابدي حياة جديده وريحني وياك خلي نطلك

#الكاتبه

أصعب موقف بلحضات الوداع
من تشوف لجنت تبني يتهدم
من تقوي كلبك وانتة مكسور
مامهتم تبين وانتة مهتم ....

#ايهاب_المالكي💜🦋

مرت اربع ايام شامه كاعده ترسم كل الوقت ما تتحرك ولا ترضى تبقه ويه قسور كل مره تكله خلي ننفصل وهو ما يجاوبها تشوف نوران وهي تتمضحك ويه قسور وجسمها يلزك بجسمه وحته عطره الي تحبه غيره كامت متكدر حته توكف لوقت طويل تبقه كاعده اغلب الوكت دايخه  جانت الدنيا ليل خلت جاكيت على جتفها وطلعت تتمشى جانت شهريار بالمضمار تتمشى تقربت من شامه بس تقربت  للسياج انطت تفاحه لشهريار اكلتها وحركت شامه ايدها على رأس شهريار ابتسمت شامه وابتعدت شهريار كامت تركض عبالك تستعرض لشامه تقرب قسور جان واكف وره شامه وكال

قسور :تتفاخر كدامج

باوعت شامه عليه ودارت وجهة تعرف هذا سكوتها مدمره وعدلت الغطوه مشت لزمها قسور من ايدها وسحبها عليه وكال

قسور:شامه كافي الي صار

شامه :ابوس ايدك تعبت كلش تعبت

قسور :لا تفكرين بالطلاك كتلج ما اطلكج

خلت شامه ايدها على صدرها والدموع تنزل من عينها  ضربته على صدره وكالت بعصبيه وهي ترجف

شامه:كتلك اعتذر لان طولت ايدي وهذا جان اكبر غلط بحياتي سويته انا اعترف جان اكبر غلط بكل عمري ما ادري غلطت غلطت والله عمري وحياتي ما فكرت امس لو أشك برجولتك ما اعرف فقدت اعصابي كلامي جان مال زعطوطه وانت هسه كسرت مو بس خشمي كسرته قسور كسرت قلبي وكلشي بيه كمت ما اعرف شون اتصرف كلشي... كلشي بيه يوجع قلبي كاعد اموت المكان والبيت كلشي يخنكني ويكتلني كلشي بيه بده يموت تخيل تخيل حته كمت انسى اكل ما أكدر انام اموت... اموت الف مره من اشوفكم سوه من اشوفك من صحتلك عدي صرت اخاف منك أكثر مكان بهل دنيا جنت احس بيه بأمان كمت اخاف منه وما أريده يقترب مني خلي نبقي شي ينذكر بينه وكل واحد بطريقه والله ما اريد شي بس اريد ابتعد ما اشوفك ولا اشوف شي يذكرني بهل مكان

قسور :ما ماس شعره من رأس نوران

شامه :افهمني ما... ما أكدر.. ما أكدر ابقه هنا كلشي... كلشي يضغط على قلبي  الله يخليك ابوس ايدك

قسور:كتلج لا ما اطلكج متصيرين لغيري فهمي هل شي

شامه:راح اموت هنا حررني الله.. الله يخليك افهم ما اريد ولا أكدر اطيقك ليش تضل ويه انسانه ما تريدك

عافها ومشى سودت الدنيا بعيونه حس بغبنه وقهره ما تنوصف غلطان هو هم غلطان ويعرف هل شي بس سكت وما كال شي غروره وكرامته جانن فوك كل شي بس هل غرور والكرامه راح يخسره حب حياته .. رجعت البيت جانت مشتهيه عنب اكلت منه هواي لدرجه كيلو ما شبعها صعدت بقت كاعده على الجربايه بقت صافنه على نفسها كامت بسرعه فتحت الجنطه وطلعت التليفون ناسيه اخر مره شوكت اجتهة العاده من شافت اخر موعد صار شهرين ونص بقت صافنه دورت بالجنطه لكت اختبارات حمل وكتها غيداء جابتها الها هديه تضحك عليها ف ضمتهم شامه حللت أكثر من مره وطلع خطين فطلعت حامل بقت صافنه ضحكت و بجت فاتت نوال وسويره وشافوها تبجي راحت سويره تجيب إلها مي ورجعت شربته بالكوه وكالت

سويره :شبيج لج راح تموتين

انطت الاختبار لسويره ضحكت سويره وكالت

سويره :يول انتي حامل

شامه:وربي ما دريت صار شهرين ونص من اخر مره اجتني بالقرآن هسه... هسه وعيت على نفسي اكلت كيلو عنب وربي... وربي ما جنت ادري ادوخ وتلعب نفسي هسه تذكرت غيداء من ضحكت علي وجابتهم الي يعني... يعني هسه اني وقسور يعني اكو شي من قسور ابطني

ضحكت لأول مره نست كل الوجع والتعب تمشت ونست كلشي ضحكت والدموع تنزل من عينها والبنات رأسا دمعو وياها ونوال تهدي بيها وكالت وهي لازمه بطنها

نوال:شوووف اجاك يا ابن عم تسند ضهرك بيه لو بنت عم بس ها من هسه هاي لأشتر اذا بنيه و راح ينهب وياها خيك ومن هسه راح تصير المصايب كلها براسك

ضحكت نوال وسويره وشامه هم مسحت دموعها وفاتت تغسل وجهة طلعت  وكالت

نوال :شنو شنو تكولين لقسور

شامه:ما ما اعرف راح يفرح يعني... تتصورون راح يسامحني سمعته حجي مسموم قبل شويه صحيت ما اعرف اكول اله لو لا اضم الموضوع

نوال :يابه رب الي يسامح راح يصير اب شتصورين مثلا مخبله تضمين هيج شي عليه طول عمره ما يسامحج

شامه :خ... خايفه يعني يرجع ممكن يأذيني يرجع وميريده... كسررقلبي

كامت شامه حست بدوخه لزمت الحايط البنات رادو يكومون كالت الهم

شامه:ابقو خلي اشوفه احجي اول ووياه

طلعت شامه الكاع ما لامتها خايفه وبنفس الوكت حستها اشاره من رب العالمين شي ممكن يعوضها عن كل الي صار شي ممكن يغير قسور وما رادت تخلي الطفل يتعذب بينها وبين ابوه جانت تمشي خلت ايدها على بطنها وعيونها متروسه دمع ما حست بس واكعه من الدرج للكاع 15 بايه درج بقت تباوع على السكف نفسها نكطع وبهل أثناء وكف قسور جان كاعدين بالاستقبال كلهم ونهايه الدرج يصير كدام الاستقبال وشاف شامه وكعت بالكاع البنات بقو يصيحون نزلت ساره بسرعه وصاحت على نوال تنزل على كيف لان حامل ركض قسور خله راسها بحضنه باوعت على ساره مكدرت تحجي ولا تاخذ نفس وكالت ساره وهي تبجي وترجف نوال كاعده على الدرج جسمها نشل مكدرت تكمل بس شافت شامه بالكاع وكالت

ساره :هي هي... يمكن... شيخ خذوها للمستشفى... يمكن حامل

شالها قسور بسرعه جان اكو دم بالكاع خلت ساره ايدها على حلكها  مرت نص ساعه وصلو لأقرب مستشفى اخذوها بسرعه الدكاتره وطلبو طبيبه نسائي قسور ما يكدر يكعد جسمه يرجف وره ساعه طلع الطبيب وكال الهم صار عدها نزيف ووكع الطفل وجسمها اصلا جان ضعيف وقله تغذيه نقص ب الكالسيوم كعد قسور بالكاع بقه ساعه صافن على الباب محد حجه وياه كلمه البنات بقو يبجون كام فات للغرفه لكاها فاتحه عينها والدموع تنزل من عينها وجهة اصفر تقرب قسور منها وكعد بصفها باوع عليها وخر شعرها من وجهة مسح دموعها وباس راسها دارت وجهة للشباك متريد تشوفه وكال

قسور:حرمتيني من أكثر شي ردته بهل دنيه منج لهذا اني راح انطيج حريتج بس ما اطلكج راح اوديج لبغداد بس تبقين حرمتي لآخر يوم بعمرج وما تصيرين لغيري ومحد يمس شعره من راسج ما دامني اجر النفس ومن اموتن الج الحريه تاخذين الي تردينه والي يهواه قلبج ومن هل يوم وجهي ما تشوفينه بعد

تقرب منها باسها يم شفتها وطلع بدون ما يسمع حرف منها وبلغ نوال وسويره يجمعون أغراضها وامنها يم حسام يوصلها لبغداد وانطاه فلوس وكال اله

قسور:كل شهر راح انطيك مبلغ توصله وتنطيه لشامه واذا ما رضت بأيد ابوها تخليه بعدها حرمتي وانا الي اصرف عليها وكل فلس تحتاجه اني الي يخبرني بيه مو ابو غيداء وانا بعد امنتك يا حسام

طلع قسور فاروق يحجي وياه معاذ يحاول يهدي بس وصلت للنهايه ركب سيارته وطلع اسبوع كامل هو كاعد بيت المزرعه وكلهم يكولون لابوه وأمه راح يرجع لبغداد علمود الشغل ودراسه شامه ما حجو الي صار وهي وكعت الطفل خافو على ضرغام لان مسوي عمليه بالجديد بس كالو اله وكعت من الدرج سلمت عليهم قبل لا ترجع لبغداد بقت تبجي الطريق كله تبجي نقهر ضرغام هواي وفيروزه هم بقت تبجي وعدتهم شامه ترجع تزورهم بالعطلة سلمت على صبيحه و سويره وفاروق نوال هواي بجت....

قسور طفه كل التليفونات وقفل الباب وما استقبل اي احد يعرفون بيه بالبيت بس ما يطلع الهم عشر ايام كاعد بالبيت والليل كله مكابل شهريار لو يدرب عليها ويلعب رياضه يشغل نفسه بكل شي وينام بنفس الغرفه الي بقت بيها لكه دفتر رسمها فتحه وطلعت اول رسمه لكوثر قلبها بعدين أدين جانت تشبه اديه بالضبط الحلقه الساعه قلب الصفحه وشاف عيونه ملامح وجهة بعدين قلب الصفحة ضحك والدموع ترست عينه جان يسألها شترسمين تكله ارسمك وشعرك شايلها طوبه ويضحك بس مو جان يقره ويدخن تكعد كباله ترسمه قلب الورقه رسمتها تغيرت هواي صارات تخوف كلها بنات وشخابيط وحوش حسها تعبر عنها وعن المشاكل قلب الصفحات ايده ترجف جان يشوف شهريار نزلت دموعه مسحها بسرعه وقلب الصفحات رسم شهريار و وياها خيل مزرعه بصفنه خيل فارسي اصيل لونه ابيض  نهزم مره واجه لشهريار قلب الصفحه وشاف شهريار و ومهر صغير حز بقلبه للحظه حسها متقصده تحرك قلبه بس بعدين اتضح التاريخ قبل متوكع من الدرج بيوم الي نهزم بيه الخيل صاحب المزرعه طلب يزاوجوهم والمهر اله بس هو عاند جان رايد الها خيل عربي أصيل بس بعد ما شاف هل رسم حس نفسه هو الي مفارقهم سد الدفتر وخلاه ويه أغراضه...

رجع للبيت ومرت أشهر اجى عيسى للدنيه بخير وعافيه دزت شامه لعيسى هدايه ترست غرفته بحيث ضمت بالمخزن هلكد ما مجهزته مال عشر سنين دائما تحجي ويه فيروزه وفيروزه تبجي وتكوللها ترجع البيت بقه فارغ وضرغام يتعارك وياها يكلها تعوفهة البنيه عدها امتحانات وكاعد تحظر تدرس ماجستير لأنها الأولى بالجامعه وفرحان بيها...

ابد ما حجو لا قسور ولا شامه من يوم الحادث ونوران تنام بغرفه وهو بغرفته ينطيها فلوس وكلشي بس مايمس شعره من راسها وجانت بين يوم ويوم نوران رايحه للسوك وماخذه فلوس وتريد ذهب لو ملابس وبيوم شافها فايته لغرفته هو وشامه وتلبس ذهب شامه كسرها تكسر وطلعها وجانت صاحبه مشاكل من فاتت للبيت بس ادور مشاكل

مرت سنه قسور اهتم بشغله وهي خلصت كليه وقدمت ماجستير اما غيداء طلعت حبله بولد رجعت علاقتها شويه احسن تسولف ويه ابوها وتضحك من يجي حسام هم تسولف وياه من يجي تبقه صافنه بعيونه عسى ولعل يحجي شي يبرد قلبها بس ماكو والأكثر من هاي حركة قلبها من قرت رساله كوثر ما كدرت تحجي ولا تصرف شي كلهم غلطو بحق بعض دز ضرغام هديه لشامه ومن فتحتها لكته داز بيها بشت اسود ومطرز بخرز وخيوط ذهب ثكيل جان اتصلت بيه تضحك وتسولف وياه تضحك تموت عليه وكالت و وعدتهم بس تخلص امتحانات تجي...

والحقيقه هي طاك قلبها على قسور الي جانت اتابعه بس على الانستغرام ينشر لقطات وصور بس ميبين لا شكله ولا يخلي احد يعلق مرات ينشر صور شهريار والفرس الإيراني اسمه زبردج وعرفت بيهم تزوجو وفرحت بهل شي وهي جانت تنشر أيامها وانجازاتها بس هم ما تنشر صورها بس تنشر شغلها ورسمها متكتب شي بس تاريخ او ملصق ابد متنشر كتابه....
وهاي مرت سنتين على هل حال والمسافه كبرت بينهم وصار رجوعهم لبعض شبه مستحيل يكون ...

صار عكـــس الراده قلبـــي
وهـــل بچيـــت 😔

ولكن لا نعلم لعل اللقاء قريب....

🦋🦋🦋🦋🦋🦋🦋🦋🦋🦋🦋🦋🦋🦋🦋🦋🦋

هلأ فراشات حياتي 😌
هاااا شونها نهايه الجزء الاول 😌

آول شي تعاوفو قسور وشامه 😁🤝

حبيت انشر صور الرسمات القريبه من القصه ✊🏼

الجزء الثاني ابقيه هنا انزله لو انزل قصه جديده للجزء الثاني فتهمتو قصدي لآن آني ما افتهمت شكتبت 😂🦋