رواية قسور والمهره شامه الفصل الرابع 4 - بقلم أسيل

هيج دقيقه تذكرت بابا غيداء براء بابا راح يزعل عليه.... وما حسيت بس أحد لازمني وطلعني بالكوه اخذ اشهك بقيت اكح باوعت بوجهة نفس جان الرجال نفسه اي والله نفسه حاضني بين ايده وخر شعري من وجهي سبح وساعدني اطلع بقيت اكح كعدت وخلاني ادنك ضربني على كيف على ضهري وكال

_سويره عباتي بالسياره جيبيها الميه بارده
سويره:تأمر شيخ قسور

جسمي كله يرجف رفعت راسي ابتسمت قريب كلش مني شعره ينكط مي وجسمه معضل وكال

قسور:انتي بخير يوجعج شي

هزيت براسي مثل الفاهية صافنه بوجهة اي ثاني مره ينقذ حياتي ضحك ونزل راسه والنبي فشلني درت وجهي بسرعه

#قسور

مريت انا وفاروق للبحيره كتله نكعد هناك نشوي ونسولف شويه مخنوك عاد هو كيف الموضوع بيه اكل وصلنه وشفت كوثر و وسويره معقولة متواعد وياها الكلب وهل كيف وشفت هل بلوة من تمشي بنص المي وتكوللهم ما تعرف تسبح ما تعرف البحيره بيها حجار وغميجه وساعه الساعه تزلك وتغرك صحت الها التفت وابتسمت اول مشافتني وأشرت إلي هيج ثواني فاتت غاصت ب المي ركضت بسرعه وفتت للمي سحبتها وصارت بين أدي ترجف بالكوة تاخذ نفس رفعت رأسها تباع عليه صدرها وركبتها باينات جنها مرمر ترجف جمالها ما ينوصف طلعتها من المي تكح وضربته على ضهرها الثوب لزك بجسمها وبين كل تفاصيل أنوثتها وكلت لسويره تجيب عباتي من السياره راحت بسرعه واجتي خليتها على ضهرها ولفيت جسمها بقت صافنه بوجهي ضحكت ودرت وجهي وهي هم وكالت بالكوة تطلع الأحرف من بين شفتها الورديه

البنيه:ش..شكر..ا

_هدي نفسج انتي بخير اخذي انفاسج

كعدت عدل وكلت لكوثر تجيب مي بصندوك السياره ويطلعون بقيه الأغراض راحن وبقيت كاعد بصفها وكلت الها

_شنو اسمج

البنيه:ها

_ انتي بخير لا تخافين الحمد لله عدت بخير بس انتبهي مره ثانيه لا تجازفين هيج

البنيه:اي..أي صح اسفه

_صار خير اسمج شنو؟

البنيه:شأمه وانت قسور مو

_اي صح

اجوي البنات وسويره تسولف لفاروق إلى صار وهو الضحكه شاكه حلكه اجه سلم على البنيه منزل راسه وقمه بالأخلاق كدام سويره فرشو المكان وخلو الأغراض وكلت الها

_تره كل هل أخلاق لأن خاطب سويره ويحبها ويخاف منها تزعل

ضحكت والتفت عليه وسلم ايدها ترجف جانت فوتتها ب العبايه وكالت

شامه:تصدك واضح من عيونهم العشك خلي اكوم لا اتأخر يرحون يقلقون بابا وعمه

كامت وأنا هم مكدرت توكف عدل وكعت على صدري بقيت انا متجمد وهي هم راسها على صدري وحاضنها كل قوتي بحضني والله مو قصدي هاي رده فعل بس قلبي يتراجف ومشت كوثر و سويره ورجعت كعدتها على كيف

_شبيج يا بنت الناس ناخذج للدكتور
شامه :لا لا بس رجلي شويه

كشفت كوثر عن رجلها مورمه وصايره حمره خلت سويره ثلج عليها توجعت وكالت

كوثر :اتصل

شامه:لاااا ديربالج احد يعرف وربي يحرمني من الهوة هسه اصير زينه واتحرك شويه ارتاح اسفه راح ازعجكم شويه

قسور:استغفر الله شهل كلام

كوثر: لعد خلي نحجي ويه خاله نكوللها بيت ساره عازمتنه حته لا يضل بالها

اتصلت وبدت تحجي ويه عمتها وكل شويه توخر التليفون حته لا تبين جذبتها ما تعرف تجذب كعدنه ناكل تصرفاتها وحركاتها برائتها سحرت قلبي بحيث من تحجي صافن عليها اول مره قلبي يميل بهل طريقه لبست عبايتها والحجاب رجلها صارت زينهه وتشكرت مني هواي وراحت امنتها يم سويره ما تعوفها لحد ميوصلون لباب البيت الليل كله هي أبالي ما كدرت اشيلها من بالي نمت وكعدت وخيالها ضحكتها وما اعرف الله شضام إلى مر يومين قلبي لايب عليها وخايف صار بيها شي الجو بارد صار كاعد بنفس المكان الي كعدنه بيه وما سمعت بس صوتها رجف قلبي انداريت عليها

شامه:اكدر اكعد وياك

_هلا والله تفضلي يا بنت الناس المكان كله الج

ابتسمت وكعدت بصفي بس هل مره وجها مغبر بقت كاعده يمي كبال النار صافنه على النار وعيونها مدمعه وكلت الها

_شصاير جن باجيه

شامه:لا

هزت رأسها والدموع تنزل بدت من عينها قلبها مهموم ووكع الشال على جتفها صار هوه وحرك شعرها كمت فتحت السياره ورجعت مخليه ايدها على وجها بس كعدت فزت وباوعت بوجهي وكالت بصوت مبحوح

_م..مو رحت

_اروح و اعوف قلبج مهموم بس جبت هل نستله

خليتها كبالها ضحكت واخذتها ضحكتها والدموع بعينها و خشمها احمر وبدت تاكل لان اخر لقاء حجت بيها وعرفت تحبها وكلت الها

_شبيج ليش قلبج مهموم؟

شامه:طلعت الثانيه على القسم هل حيوان أحمد تغلب علي وربي غشاش وانا شفته بعيني غش وما كلت لأحد عنه لأن حرام وهسه يطلع الأول واني تعبت كل السنه

بجت رجعت تمسح بعيونها بايدها تنهدت وهي تاكل بالنستله ابتسمت وكلت الها

_هيج تحبين الدراسه

شامه :بداية أحلامي الشهاده اريد اسافر اروح لأماكن جديده بلدان جديده اريد أزور أماكن جديده تعرف قسور هيج اريد ابقه حره ما بيوم احد يسجني

_وإذا تزوجتي؟

_اني ممفكره حاليا بالزواج بس الاكيد من أحب وانحب واتزوج راح تكون أفكاره متقارب واكيد زوجي حيدعمني ويسندني صح راح يكون هناك تنازل بي بس مو عن كل أحلامي مثلا إذا فكره السفر لأماكن هواي صعبه اختار كم مكان وإذا مصار اكيد راح تكون عندي احلام ثانيه مثلا مرسم صغير أعلم بيه الأطفال الرسم واخليهم يحبون الفن اريد مكتبه صغيره هيج غرفه بيها مكتب ومرسم هواي تصاميم أبالي هواي احلم ما أريد بيت وحدي لأن اكره ابقه بوحدي اخاف

عالمها وردي بعدها مشايفه شي من الحياه إذا هي الدرجه خلت قلبها ينكسر لعد من تعرف نص أحلامها ما ممكن تتحق والعالم شكد قبيح شون حينكسر قلبها بقت تسولف وانا هل بنيه سحرتني يعني كل هل فتره رفضت الزواج لأن ماكو وحده ملت قلبي والحين هاي الطفله إلى شايفها ٣ مرات أخذت قلبي وعقلي وياها

#الكاتبه

مثل فكره الأستلقاء بعد يوم متعب مثل هطول المطر بعد أيام طويله جافه كان هكذا تأثير وجودك معي مريح دائما ليتني أخبرتك بكل هذا يومها قبل أن تكسر ما بداخل صدري

مرت ايام وزادت اللقاءات بينهم زاد تعلق گلب قسور بشامه إلي شوفته عالم يختلف عن عالمه قسور إلى جان رافض فكره زواجه وارتباطه تغيرت بالكامل وشامه إلى جانت تفكر الزواج سجن بدت تفكر بيه استقرار ظنونهم جانت حلوة مثل أي شخصين بهل دنيا وظنو الحياة سعيده وممكن يجمعون بنفس البيت وبدون مشاكل فقط لأن هاي رغبتهم وقرارهم ...

اللقاء الأول

بعد ما بجت كدامه وانطاها نستله حته يرضيها اتفقو يجون بعد يومين نفس المكان ونفس ألوقت اجت بيه متأخره تركض بس شافها وكف جسمه كله رجف وكفت كباله وابتسمت بالكوة تأخذ نفس هو ابتسم مثل المراهق وكالت

شامه :كوثر هزمتني من البيت

ابتسم وهو يخاف عليها مثل روحه بس يريد يعرف أكثر إذا توافق بيه إذا ممكن تغير بعض من حياتها علموده ما نظر الها نظره خباثه لو شهوة رايدها حلاله وكعدت كباله وهي ترسم سئلها شترسم تكله ولا شي بقت ترسم هو هادئ رفعت راسها ولكته صافن عليها استحت وسدت الدفتر وباوعت عليه ابتسم وجان هذا أو سؤال يحسسها بأهتمامه

قسور:انتي حابه لو راغبه بأحد

شامه:ش..شنو

قسور:انتي تحبين احد گلبج هاوي احد بالكليه بغداد يعني

شامه:لا لا وانت

قسور:قبل لا بس الحين اظن گلبي مال ومحد ميله من قبل بس هل وحده

وكفت بأرتباك وكالت إله راح اتأخر وجمعت أغراضها ومشت بسرعه حته ما سلمت عليه وصاح الها بعد يومين نفس المكان ضحكت..... وهل مر يومين قسور يخلص شغله ويه أبوه وينتظر اليوم يخلص دقيقه دقيقه حته يشوفها وهي هم تخلص يومها ويه ابوها وحسام وعمتها وتنتظر يخلص اليوم حته تشوفه راحت للمكان باليوم الموعود وجان لقائهم الثاني قصير

اللقاء الثاني

بقت كاعده تأخر عليها هواي وهي بقت تباوع على الساعه  وكفت وجمعت أغراضها والتفت وشافته يمشي عدلت حجابها ومشت ومدنكه رأسها حته لا تفضحها ملامحها ومرت من يمه وكالت إله

شامه:مع السلامه

صوتها جان مخنوك لزمها من ايدها وسحبها وكعت الأغراض من ايدها ونضربت بصدره رفعت راسها صارت عينها بعينه ونترست دموع وكالت

شامه:كلش تأخرت وأريد ارجع للبيت

قسور:الله يكصر عمره إلى خله هل عيون تبجي

شامه :اسم الله

قسور:حكج على راسي بس لا تزعلين

شامه:مو مهم زعلي

رفع ايده جان متردد يمد ايده على وجهة لو لا بس نزلت دمعتها مسحها بأصبعه وخله ايده على وجهة غمضت عينها ومالت راسها على ايده بقه يحرك ايده على كيف وجهة بارد وكال..

قسور:الديوان جان بيه ضيوف وما كدرت اتركهم عيب

شامه:لا تتركني انتظر وحدي

خلت ايدها فوك ايده لزمتها وضغطت كل قوتها أخذت نفس ونزلت ايده ابتسمت ومشت ....
ويومها لا هي نامت ولا هو... هي تفكر بلمسه ايده وملمس ايده على خدها وعطره إلى سحر قلبها وخلاها الليل ما تنام وهو... يفكر برجفه جسمها ودموعها وهو لازمها ولأن خله الدمعه تنزل من عينها ....هل مر يومين مثل الجمر بقلوبهم راحت لنفس المكان وهو هم مشت ما لكت احد كلش حز بقلبها خلت ايدها على گلبها وفكرت ميريد يشوفها كحت والتفت وشافته ينزل من سيارته ابتسمت وهو هم بس شافها تقرب منها وكعدو سويه مدت ايدها إله بس شافت النستله بيده ابتسم وانطاه الها وكعدو بمكانهم غمضت عينها وأخذت نفس والحجاب جان على جتفها كحت وجانت الكحه بصدرها وكال

قسور:مريضه

شامه:ش..شويه متشوف وجهي

قسور:اي شفته احمر مخليه مكياج لو شنو

شامه:هههه يا مكياج مصخنه هاي من اصخن تكسب خدودي وخشمي من الصخونه

خله ايده على وجهة نزلت راسها مبتسمه بخجل وكال

قسور:لج مثل الجمر صايره اخذتي شي دوه

شامه:اي اي

قسور:بسببي؟

شامه:اكيد لا بس هو لأن تعبت شويه

قسور :بسببي واضح من صوتج متعرفين تجذبين

شامه:وربي لأن نقهرت شويه تمرضت بس اصير زينه لا تخاف

قسور:خليج هنا راجع الج بعد خمس دقايق

اتصل بفاروق طلب منه يجيب ادويه ويلاكيه يم البحيره دقايق وجاب إله كل الي يريده تشكر منه وراح شافها واكفه قريبه من البحيره مجتفه ايدها مشه وعباته بيده خله الدوه بالكاع وخله العبايه على جتفها وحضنها شهكت بس بقه حاضنها كل قوته رجفت من الخوف وكال

قسور:اعذريني والشاهد الله ما امسج بسوء بس خلي قلبي يبرد

شامه:ل..لا قس..وربي.... اني..مو..موهيج

قسور:اي رايدج حلالي

التفت إله بقت صافنه بوجهة وضحكت وكالت

شامه:تره مصار النه أقل من شهر

قسور:اي هل كم لقاء ما كدرت اشيلج من راسي شوفي انتظرج اللقاء الجاي وإذا جان شي بكلبج إلى تعالي وإذا ماكو لا تجين

اللقاء الثالث

وهل مر اسبوع مشافها شبت نار بقلبه من قهرته كل يوم كام يجي بنفس المكان ينتضر وماكو وحته فاروق كام ميكدر يحجي وياه من العصبيه صارت الدنيا ليل نهار ما تحمل وجع قلبه واجه فاروق كال بسرعه

قسور:ما أريد اسمع شي خليني بوحدي

فاروق:اي شيخ مكلت شي بس خليني ارافكك صار يومين من كاطعين مهر انا وسويره وانت مباركت النه

قسور:حقك علي خويه

وبقه يباوع على النار وفاروق اول مره يشوف صديق عمره بهل شكل بقه لازم علبه بيده وكال

فارروق:هديتي

قسور:جانت لشامه بس خذها ما تغلى عليك وعلى سويره

كام وضرب جتف فاروق والتفت وشاف سويره وشامه وكال بعصبيه ومراضي على جيتها بهل وكت وهل طريقه

قسور:رجعو للبيت شعدكم هنا الوقت ليل فاروق وصلهم

مشه لزمت بيده وسحب ايده بعصبيه خزرها رجعت ليورة ومشه وكعت بحضن سويره وبسرعه سويره كالت وهي تسندها

سويره:انا كتلج لا تطلعين من البيت وهيج حالتج والشيخ راسه يابس وزعله ثكيل

سمع حجيهم والتفت عيونها مدمعه وكال

قسور:شبيها

شامه:رجعيني اسفه ..تعبتج وياي

قسور:شبيج

شامه:رجعيني ..حبابه

وكالتهة بخنكه شهكت وبدت تبجي لزمها قسور من أيدها وسحبها وبقه يباوع عليها ذبلانه وكالت بعصبيه بين شهكاتها

شامه:مكدرت..مكدرت اكوم من الفراش ..مكدرت اجي اسفه جنت..جنت اريد اجي

سحبها لصدره غمض عينه بقت تبجي بحضنه وهو حاضنها كل قوته اخذ نفس من ركبتها وكالت

سويره:جانت مو بوعيها الصخونه أكلت كل صحتها حته جانت ماتعي وين هي

بقت بحضنه لحد ما هدئت كعدو يم النار هي وسويره وقسور وفاروق بصف سويره لزم ايدها ولبسها سوار ناعم وحرك ايده على العلامه وهي جانت تباوع على ايده وكالت

شامه:انفنتي

قسور:بدون نهايه راح اصارح اهلي بهل موضوع نجي نخطبج إذا موافقه

سويره:يااااا ياااا شيخ شكثر منتضره هل يوم

ابتسمت شامه وهزت برأسها ضحكو وبارك فاروق و سويره الهم رجعت للبيت وهو هم من كثر السعاده مكدرت تغمض عينها وتنام وتحس ملامحها راح تفضحها ونزلت صوره السوار بيدها على حسابها وكتبت انفنتي بدون نهايه وكلشي بده بجمال هل عباره ...هو كال لأمه فيروزه وابوه ضرغام وأخوه معاذ الكاع ما لمت أمه وهلهلت بس مكال الها بعد منو جان منتضر اللقاء حته يكول الها شوكت يجي بقت تفكر بيه هل يومين وهو خطط هوواي شنو راح يسوي إلها بقه يفكر وهي بين ايده وحضنه وحلاله وأم بيته وجهاله وهي تفكر شون راح يتقدم الها وشنو العرس وشونها خطوبتهم وراح تصير عروسه الشيخ وبدت تقره عن التقاليد حته بدت تغير لبسها علموده والحجاب مينزل من راسها حته ترضيه بس هم الاثنين نسو هم عراقيين والعراقيين ما تكمل وياهم فرحه إذا ما تكسر قلوبهم وتفرقهم...ومثل ما كال

🧿🧿
حسين علي المطوري
راح اختفى شلون السراب الليل
كلمن بدنياه..
احلالك وإحلالي...
ونتفق مانتلاكه مو بس وجوه...
لا اجي ابالك ولا تجي ابالي....
🧿🧿

(من قريت هل شعر الدموع ما وكفت من عيني مدري ليش احس جنت احب ومضروبه بوري 😂😂)

💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜

هلاااااا وغلا حبايب اول شي اشكر البنوتات على تعليقهم الجميل وتصويتكم كذلك شكرا الكم 💓😣

ثاني شي اكو بنوته لطيفه كالت اريد صوره قريبه مشابهة للأبطال حته تتخيلون الأشكال ف شنو رأيكم بهل مقترح

وكذلك تره الي تشوفون القصه هواي بس تصويتكم قليل 😣😣