رواية قسور والمهره شامه الفصل الثالث 3 - بقلم أسيل

#الكاتبه

#ماشالت حقدحتى بغضبها
مثل الغيم بس خير بقلبها

شامه البنوته الجميله الي مثل كل البنات العراقيات أحلامها طاخه نجم بالسمه إلى عدها حياتها واحلامها بجفة والدنيا بجفه..الجمال الي شايلته ينحجي بيه بكل مكان تفوت إله ناعمه جسمها مثالي من كل النواحي متوسطة الطول بيضه مثل قطعه الثلج بياضها على وردي شفايف متروسه وعيون عسليه شعرها اسود ناعم وطويل جوه خاصرتها عمرها ٢٣ سنه مرحه و حركه برائتها طاغيه عليها تحب تجرب كلشي بحياتها هي من الجنوب بس عايشه بغداد من طفولتها امها بغداديه وابوها من الجنوب مهندس معماري تحب ابوها وما ترفض إله اي كلمه صديقها وحبيبها تحبه كلش لدرجه متكدر تنام الليل إذا ما تحضر إله ملابسه وتنسق إله شنو يلبس حته الجواريب هيج وياه علاقتهم صداقه متقبل تتزوج حته ما اتركه بوحده اما اختها غيداء أكبر منها عمرها ٢٦ سنه متزوجه من طبيب علاقه حب بينهم هي دكتوره باطنيه وزوجها طبيب أسنان تشبه ملامح شامه بس عيونها جوزيه وطويله ومتروسه وعدها طفله عمرها  اشهر اسمها دنيه علاقتهم كذلك طيبه وحلوة ونبدي بأحداث القصه وراح نتعرف على بقيه الشخصيات وتفاصيلها

#شامه

سلمنه على غيداء وعلي رجلها وطلعنه رايحين نشوف عمو مصطفى طبعا جان عمري عشر سنوات من شفته آخر مره وتوسلت ب بابا ياخذني اريد اشوف الجنوب إلى يحجون بيهم كل الناس فضول وكذلك اغير جوو ملليت من أجواء بغداد ههه ف حشرت نفسي كال إلى بابا تره يختلفون عن تقاليدنا وحياتنه ولازم لبس محترم وكتله اي اي وأخذت استر لبس عندي الطريق كله بابا يحجيلي على التقاليد وسوالف التقاليد وذكرياتهم فرحانه كلش احب هل معلومات ف بابا جان يسوق بحذر ويعرف بيه كولش اخاف من السرعه من توفت ماما بحادث فجنت أقره بروايه والطريق كله نسولف ونضحك وما حسيت غير غافيه وبابا كعدني كال الي وصلنه فتحت عيني بنشاط المكان عباره عن جنه فتنه بين بساتين كلها نخل ومي شوارعها عبالك جنه تجنن نوب قريبه من الشط تحمست بشكل مو طبيعي اصور وانشر على حساباتي واكتب لحد ما وصلنه يم المي توسلت لبابا ننزل يله وافق مدري من وين فوتنه وقبل لا يوكف السياره نزلت بسرعه وبابا يصيح واضحك عصب عليه نزل و اول ما وكف السياره التفت عليه جنت العب بالتليفون وكتله

_يله ناخذ صوره بابااااا

التفت عدل ومحسيت غير مضروبه بجسم احد وكع تليفوني والتفت عليه ما اشوف غير الطول لزمني من خصري ردت اوكع بقت عيني صارت بعينه عيونه لوزيه سوده ورموشه لحيته وشعره مرتبه بشكل بسيط لابس دشداشه حبريه وبيها مثل الحزام جلد بالجتف وبيه سلاحه عطره يسحر صافن بوجهي نزل راسه بسرعه ورجع ليورة وكتله بسرعه واني اخذ التليفون

_جدا اعتذر بس جنت منتبهة على باباتي

بابا:جدا اسف ابني مابيك شي

الرجال:لا يعم على شنو الأعتذار بس شتسوون هني

بابا:بيت مصطفى

الرجال:لا يا عم بيت الشيخ ضرغام هني

بابا:والنعم منكم وليدي اعتذر يله بنتي مو هنا

_بابا بس خلي اخذ صوره بربك

بابا:ولج بنت الجلب امشي فضحتينه

سحبني ورحنه لبيت عمو طلع بعيد عن البحيره تكئبت وربي تكئبت ونكسرت شاشه تليفوني

#الكاتبه

قسور الرجال الشهم الذكي إلى إله هيبه وابن عشاير ومثل ميكولون متربي بمضايف مهندس معماري عصبي ناار طويل بشرته حنطاويه عيون كبار ولوزيه رموشه طويله خشم مثل السيف معتني بلبسه واناقته وجسمه من نوع كلمته متصير اثنين يعني بين قوسين ابن أبوه ميفكر بالزواج محس اكو وحده تلائمه وأمه تلح عليه وابوه هم بس هو رافض

#قسور

جنت واكف صافن على المي وما حسيت بس صوت ومن التفت شفت هل حوريه بين أيدي قسم بالله كل جسمي فهة من شافها استحيت حته من نفسي ولتصرفي مال جهال بين أيدي بيضه مثل المرمر شعرها نازل جوه خاصرتها جسمها ناعمه صافنه بوجهي لابسه ثوبي بلون المشمش ودلع صدرها واضح منه رخيت ايدي هل سئلني ابوها بيت مصطفى وكتله لا وراح وهو يسحب بيها وهي تضحك وتتوسل بيه على صورة وصاحت بسرعه وسحبت ابوها ورجعت ليورة  مشيت بسرعه وصحت على فاروق وركض مشيت وجانت حية  يم السياره ردت ألزم الحيه وسحبتني من أيدي لازمه ايدي كل قوتها وكالت

البنيه: لا لا مستحيل شدسوي انت متعرف شكد خطره
الرجال :ولج بويه فضحتينه
البنيه:شفضحتك هسه إذا كرصته وتسمم ويموت اني وانت نبتلي غير اخاف على حياته

شلت الحيه والتفت الحيه على أيدي رجعت ليورة البنيه وكالت وهي ترجف

البنيه:مستحيل عزاا شون شون
_لا تخافين مو سامه ضيعها خويي
البنيه:ها
_رفيقي اخوي اخوي

بقيت اباوع بوجهة شكد حلوة التفت وشافته يركض صار يمنه وبقه صافن عليها وشكت حلكه الضحكه وكال الها

فاروق :هاي هاو أر يو ولك شهل كيك

وضحك الرجال ابوها وضربته وهي هم بقت تضحك

الرجال : بويه اعذروني هل بنييه راح تجلطني اول مره تجي هنا

_أبويه خليها براحته الضيف على راسنه

لزمت ايدي منن المعصم إلى لازم بيه الحيه وبقت تصورها بقيت صافن على ايدها الناعمه صغيره و ورديه راحت البنيه هي وابوها وره ما تشكرو من عدنه فاروق فهة على البنيه وكلت إله

_سويد الوجه إذا ما كلت لسويره ما اطلع ابن الشيخ ضرغام

فاروق:لااا بروح جدك والله البارحه صالحتها لا بروح غواليكك وشيخ هل بنيه لايكه الك

_لايكه إلي وعينك عليها

#شامه

وصلنه لبيت عمو مصطفى واستقبلتنه عمه صبيحه احلى استقبال تحضني تبوس بيه جانت هي وماما صديقات كلش ايام الطفولة شبعت بجي وعمو مصطفى يسلم على بابا من صدك احلى استقبال جان عدهم أحمد الله يرحم أصغر من حسام ندعم ومات من خمس سنوات جان كسره كلش جبيره بحياتهم خاله لحد هسه منازعه الأسود اما حسام أكبر مني فات للبيت والمسواك بيده وشمرهم بالكاع وصاح

حسام:القزمههه

ضحكت وركضت حضنته علاقتنه اخويه كل ميجي لبغداد يجي يمنه ماكو مكان مياخذني إله ونطلع ونطب سوه واثقه بيه ثقه عميه عصبي نار صيدلاني دفعني وحضن بابا واجتي صبيحه حضنتني وكالت

صبيحه: هيج ولك ناقص تعامل هل تفاحه  هيج
_اي اي عمه شفتي شفتي شسوه بيه احجي احجي فشري عليه
صبيحه:تعاي هنا فدووات عمه لا تضوجين وهل خبيل يغار يغار من دلالك وجمالك وهيج يكول
_اي خبل خبل يغار

ومشه بسرعه ونفش شعري وأمه تصيح عليه وبابا وعمو خربانين ضحك عليه اخذت صوره اني وياه ونشرتها وغيداء تسب بينه وبديت اساعد عمه محضره إلى غرفه خليت بيها اغراضي وبديت اطبخ واساعدها نسولف ونضحك وعلمتني شون اسوي وكل شويه انتبهي على ايدج تخاف عليه عبالك طفله صغيره صارت الدنيا ليل تعبت كلش صعدت للغرفه بعد ما سلمت عليهم سبحت وتمددت دا اغمض عيني ندك الباب ونفتح وجانت عمه صبيحه وبيدها كوب حليب دافي وخلته على الميز وكعدت بصفي وكالت إلي

_شعرج مبلل يا بنتي
_اي يا عمه حاره ماكو اي مشكله

كامت لزمت الخاولي والفرجه مال شعر وكعدت وريه تذكرت من جنت طفله تسوي هل شي إلي وره وفاة ماما بدت تمشط شعري ونشفته زين واني اشرب الحليب وبقينه نسولف على حياتي وعلى غيداء واشوفها الصور وظفرت إلي شعري قرت إلى سوره ايه الكرسي ونمت وهي تلعب بشعري جنت مفتقده كلش هل حنان والدفو مفتقده لمسات امي وحنانها وخاصا غيداء من تزوجت فراغ كولش جبير صار بقلبي كعدت الصبح بس شميت ريحه الخبز اويلي من الصبح نزلت بسرعه وبعدني بالبجامه بس غسلت وجهي ولميت شعري ونزلت شفتها شبعتها بوس وهي تخبز و يمها بنيه شابه تعرفت عليها اسمها كوثر تجي تساعد عمه بالبيت حبابه وبديت اكل وما حسيت بس ضربه على راسي من وره فزيت وجان حسام وكال

حسام:بقي النه مو امي تطبخ وانتي تعلفين
_عمهههههه ديضربني

سويت وجهي حزين وبرطمت شفتي وجان تنزع النعال وتشمره عليه وكالت إله

صبيحه:ولك انا كتلك ما تتكرب منها هي سرسري كواد تعال اذا انت تسبع على حبيبه قلبي كبالي تعال تكرب صوبي اله اشكك نصين

_حل

وبقيت اضحك ومتشمته بيه وهو يضحك على امه كعدنه بالحديقه نتريك وحته كوثر بقينه كاعدين سويه نضحك ونسولف وبعدين كل واحد راح بالشغل بالبيت وحدي كاعده ضايجه وكلت لكوثر شون اكدر اروح للمي إلى بالقريه وكالت إلى على طريق فرحنه سويه خليت حجاب على راسي و عبايه أخذت من عمه صبيحه ما اعرف البسها وكل شويه اتعثر بيها وكوثر تضحك وشافتنه بنيه شكد حلوه سبحان الخالق سمره متروسه وحواجبها جنها سيف وعيون سوده وكبار وعرفتني عليها كوثر وكالت إلى سويره اسمها كل الي طلع مني

_لج دخيل الله الجمال السومري كله بيج متصيرين مودل ارسمج ؟

سويره:ياااا ههههه ترسمني انا وين من وين حلوه لج شوفي جمالج والله عبالي روسيه كوثر الجمال كله هذا من وين

وأشرت عليه وكالت الها كوثر وين رايحين ومنو اني وكالت هي هم تجي ويانه ماعندها شي وبديت اتعرف عليها مخلصه سادس وتاركه الدراسه لأن تعتني بأمها الجبير وهي الوحيده لأمها كعدنه كبال البحيره تجنن نزعت العبايه والحجاب لابسه ثوب جنت نص ردان اسود وبيه ورد ناعم جوه الركبه ودلعته دائريه وكوثر جانت صافنه وسئلتها عن قصتها وكالت

كوثر :امي جانت مدرسه هني انا اصلي من الجنوب وتعودنه على العيشه هني عاد تمرضت امي وانا اشتغل يم خاله صبيحه حته اكمل دراستي واعين امي

عرفت بيها سادس وخاله متقبل تروح تشتغل عد احد غيرها لأن تخاف عليها وهي متكفله بكل مصاريفها ومصاريف دراستها  بقينه نسولف واني ارسم بسويره سديت الدفتر ومشيت رفعت الثوب وفتت بالمي وضحكت والبنات يضحكون يكولون إلى ارجع بس مو بالي وصاحت سويره

سويره : تعرفين تسبحين

_لا والله بس مو عميق المي من ما اروح بعيد وجنت امشي انطيتهم ضهري وما سمعت بس صوت رجال مو غريب هل صوت

الرجال:المي غميج رجعي يا بنت الناس

التفت ونفسه إلى لزم الحيه شعنده هنا وكتله بأرتباك

_هااي لا ما روح بعيد

وما حسيت نفسي غير طامسه بنص المي اريد اخذ نفس ما اكدر هيج دقيقه حسيت نفسي نكطع اريد بس ارفع راسي واشم هوة

⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️⚜️

هلا هلا بكوكيزات قلبي بارت شويه خيف انزل بارتين بالأسبوع يوم جمعه وبعد حددو يا يا ثلاثاء يا أربعاء تريدون 😁😁

واذا شفت تفاعل منكم انزل ٣ بارتات ب الاسبوع

لا تنسون تصويت و تعليق لطيف 🙏🖤