رواية قسور والمهره شامه الفصل الثالث والعشرون 23 - بقلم أسيل

#قسور

طاك قلبي عليها هاي مرت سنتين وشامه بعيده كل البعد عني يوم الوكعت من الدرج وشفتها بالكاع طلعت روحي والله حتى النفس ضاك عليه وعرفت حامل وهل مات الطفل خليتها ترجع لبغداد ويوم الي رجعت اجتني نوال وسويره حجو الي فرحتها من عرفت بنفسها حامل واكو شي جزء مني صار ابطنها وطلبو مني افهم الموضوع يومها كلنه كاعدين انا وفاروق ومعاذ رفعت راسي وكلت الهم

_من اول يوم فاتت لهل بيت انضلمت وانا اكثر واحد كسر قلبها وضلمتها والله حرك قلبي بأكثر شي جنت رايده كالت الي احررها توسلت الي بس انا وانانيتي دمرت كلشي خلونا هيج مرتاحين

يومها طلعت من البيت عشر ايام كاعد بوحدي بيت المزرعه طفيت تليفوني واي واحد يجي ما افتح الباب ردت ابقى بوحدي وراها رجعت للبيت ما ابين لأحد شي انام بغرفتنه انا وشامه واروح للشغل وارد للبيت ابوي شويه تعبت وضعيته...
جان أصعب يوم مر عليه من جنت توني راد للشغل سبحت وبدلت جنت ناوي اروح لبيت المزرعه وسمعت الباب يندك بقوه فتحت الباب واشوف حسام بوجهي راد يحجي شي وشاف امي سلم عليها وابتسم جذب قلبي نغزني وطلعنه بره يومها كال

حسام :شامه دخلت المستشفى
_شبيها
حسام :رادت تنتحر
_م.. ماتت
حسام :لا لا والله مابيها شي

اتصل حسام على فاروق وكال يجي ياخذنه لبغداد لا هو ولا انا كدرنه نسوق الطريق كله اكول لفاروق يسرع جسمي يرجف لحد ما وصلنه لبغداد نص عمري راح توجهنة بوجهنة للمستشفى لحد ما وصلت كل حيلي راح نزلنه وعرفت بيها توها مسوين الها غسيل معده شفت غيداء وعمي سلمت عليهم وضلينه كاعدين نسولف طلبت اشوفها فتت للغرفه كلبي وجعني من شفت المغذي وجسمها بهل ضعف وجهة تعبان تقربت منها وبست راسها وايدها بقيت كاعد يمها صافن هل بنيه جانت مثل التفاحه شسويت بيها انا فتحت عينها سحبت ايدها وتكلي بالكوة الكلمه تطلع من حلكها اطلع بره ردت احجي وياها كامت ما تكدر تاخذ نفس ودفعتني كل قوتها لحد ما لزمتها غيداء طلعت بره بسرعه طلعني الطبيب وراها كل ما احاول اشوفها تطلع بره البيت ما اعرف بيها وين تروح واخاف يصير شي بيها وراها رجعت للبيت وما عتبت عتبة بغداد كل مره اتصل بابو غيداء وغيداء اطمئن عليها وكل مره يكولون الي شي يحرك قلبي يا متاكل يا حابسه نفسها يا موته نفسها بالشغل وهامله صحتها... مرت اشهر وره اخر مره رحت بيها لبغداد كاعدين كلنه بالديوان نسولف انا والولد فات حسام وسلم كعد بصفي توه راجع من بغداد باوعت عليه وهو هم عرف من نضراتي اسئله على شامه هز راسه ونزله جانو الولد يضحكون ويسولفون شغلت جكاره وكتله

_احجيلي شبيها وجع قلبي

حسام :مو زينه كلش مو زينه

من البارحه ساعه 12 ونص بالليل لحد الأربعه الفجر كاعده على الرصيف بالشارع كبال دجله تبجي وما سكتت والله ولا حجت شي بس تناشغ اخذتها للمستشفى انطوها مهدء ونامت رجعت للبيت صعدت لغرفتها وما نزلت منها ومن سألت شبيها كال عمي طلع سكر بيها

_الله لا يطول بعمري ويأخذ أمانته اليوم كبل باجر

حسام :شيخ ما ماتدري بيها سكر

_الله لا ينطيني العافيه الله ياخذ عمري

معاذ :استغفر الله

فاروق :سمي باسم الله

حسيت بشي دافي على وجهي من مسحت وجهي حسيت دموعي خانت عيوني كلهم نزلو رأسهم جان الشماغ على جتفي وتلثمت بيه هو هذا طبعي كل ما يضيك صدري تلثمت حته لا تفضحني عيوني بس والله فضحتني قبل لا اتلثم هل مره....

اعرف كلشي عنها بس ما اعرف داخلها شونه شبيها شسوي  عرفت بيها تشتغل بمكتبه زيدت الراتب عسى ولعل اتبطل خايف عليها وهي فاهيه وترفه وما فاهمه الدنيا عدل اما نوران ما اتكرب صوبها وأكثر من مره رادت تتكرب مني بس تشمئز نفسي منها ما اتخيل وحده بحظني غير شامه ولا شفتي اطخ شفه وحده غير شامه اي انا هيج تخبلت بحبها تتواصل ويه ابوي وامي بين يوم ويوم وتسولف واشغل كامره وياهم ويبقون ساعات يحجون ويتواصلون انا اسمع حجي وصوت ابوي وهو يضحك ويهددها اذا ما تنجح يكسرها بالعصى وهي تضحك وتكله الأولى راح تطلع وهاي كل مره نختم يومنا ب ٩ هي تنزل كاعده بالفراش وبأيدها كوب حليب و G. N ما تكتب شي تنشر مشاريعها شغلها رسمها مرات وجبات أكلها وهاي مرت سنتين شامه ترفض تشوفني وما حاولت اضغط عليها بعد ابد لسلامتها....

اليوم انا بيت المزرعه ما كدرت انام زبردج و شهريار تزاوجو وصار عدهم مهره تسحر القلب سميتها كهرمانه بقيت كاعد واشوفهم يركضون بهل برد الساعه اربعه ونص شفتها نشرت فتحت الستوري وقريت الي كاتبته نغثيت كلش منايمه وبعد جم ساعه عدها امتحان ومناقشه  بحث و الأكثر من هذا قلبها موجوع وما بيدي اسوي شي الها غمضت نزلت ستوري شربت جكاره وزبردج و شهريار كبالي وكتبت

" لم أعد اعلم كيف لي أن أحميكِ.. لكنني استودعك الله بكل حين وثانيه"

"نامي بنيتي "

هاي اول تلميح الي تبين بيها تعبانه جانت ما تكتب شي ابد بس هل مره كتبت وحسيت بيها مخنوكه وضايجه مدري من آخر تعليق لوحده اسمها زينب ما كدرت ابقه ساكت والوجع جايس كلبها مكدرت انام اتصلت على حسام وكتله مشينه لبغداد اريد اشوفها وما احسه بأقل من نص ساعه يمي وطلعنه لبغداد  الصبح بالعشر كتله نروح للجامعه اشوفها هناك وصلنه ومشيت للمكان الي تكعد بيه هي وصديقتها براء ولكيتها تتعارك ويه زينب و واحد مسحت الكاع بيه تقربت منها وهي محاسه بيه التفت بعصبيه نضربت بصدري رادت توخر بس سحبتها لحظني وكعت الأغراض من ايدها وكالت اسمي باوعت علي رجعت ضمت راسها بصدري ارتخى كل جسمها شلتها بحظني بسرعه ومشت براء بسرعه شالت أغراضها تباوع عليه بصدمه وكالت

براء :انت.. انت قسو.. ر

_انتي براء اكيد

وهزت راسها ضحكت على فطاريتها نفس ما وصفتها الي شامه باوعت على الولد ما اعرفه منو وكلت اله

_انا مراح  اعتبرك ند الي لأن أكدر ادوسك بطرف قندرتي مرتي بعد عنها احسن ما اتلفك وره الشمس

بقت هل اسمها زينب فاكه حلكها وهو صار وجهة اصفر ومشيت و ورايه براء وبسرعه شافنه حسام فتح الباب مال سياره كعدتها وفتحت الحجاب من ركبتها وكال

_شبيها شصار بيها منو وياها

براء:منايمه ولا ماكله شي من البارحه التهت بالشغل والامتحانات ونست أكلها وصحتها واكيد دواها هم خلص وما اشترت

بقه حسام صافن عليها وهي تحجي وابتسم بوجهة وهي صارت حمره من المستحى فتحت شامه عينها باوعت عليه ونزلت راسها جنت قريب منها عفتها و رجعت ليوره انطيتها مجال نزلت من السياره لزمتني بسرعه و وكعت بحظني رجعت كعدتها نكعت براء ايدي مي ومسحت وجهة  وهي صافنه بوجهي وكلت الها

_عازمكم على الغده انتي وبراء

شامه :ل.. لا شغل.. شغلي

براء :رجلج يمج وتكولين شغل ثانيا اليوم صيانه اكو وهاي شوفي من البارحه ملتهية بدون أكل ولا راحه واني جوعانه ما تريكت من وراج

_اذا متريدين تجين كولي وهذا هو خلي ارجعج للبيت حته يطمئن قلبي واصلا اني راجع بالليل ما ابقه هواي هنا لا تخافين راجع للديره

شامه :خ.. خلاص ن.. نروح أجي وياك.. وياكم

صعدنه و براء صعدت ليوره شامه جانت ورايه كاعده أكدر اشوفها ب المرايه وحسام جان يسوق وكالت

براء:اكيد انت حسام

حسام :اي صح

براء:انت الي جنت تاكل اكل شامه وتبقيها جوعانه حجت الي عنك هواي

ندار حسام وضحكت شامه ضربته على جتفه حته يباوع ليكدام بقه يحجي وكال

حسام :لا تصدكين بكلشي تكوله جذابه

براء:والله اني ما صدكت لان اعرف هي تاكل الأخضر واليابس

براء مبينه بنيه كلش حبابه ومؤدبه طبعها ينحب وصلنه للمطعم ونزلت شامه فتنه وهي راحت للحمام تغسل مشيت وعفت حسام وبراء كاعدين على الميز بقيت واكف قريب من الحمام وطلعت من الحمام فزت بس شافتني  بقت صافنه عليه مشيت مديت الها ايدي وكلت الها

_استندي عليه

لزمت ايدي ترجف وبعدها الحلقه بأيدها مشينه وكعدنه طلبنه اكل هي منزله راسها هادئه اكثر من المعتاد حسيت خنكتها من خليتها كبال امر الواقع ردت بس افتح حوار وياها وكلت

_شكم امتحان بعد الج

شامه:خلصت بس منتضره التقييم

_شتصورين تقييمج

شامه :اتوقع ممتاز اذا اليوم ما خربطت شويه ب الامتحان لهذا قلقت

_واثق راح تكونين كد المسؤوليه

شامه:اتمنى هذا

باوعت على حسام وبراء وهم مندمجين بالسوالف والحجي ابتسمت باوعت عليه جنت صافن بوجهة اريد اشبع منها نزلت راسها شربت مي جانت تاكل ما طخيت الماعون بس اباوع عليها نفس جمالها لا والله صارت احلى بس التعب احتلها والوجع استوطن بقلبي الكعده كلها ايدي جوه حنجي وصافن بوجهة ودك تليفون براء جاوبت وجانت خالتها وكالت

براء :اني استأذن وان شاء الله اشوفكم مره ثانيه بس ضروري نلتقي مو بس هل مره

شامه:هاي خاله مو

براء:ايي اليوم عدها موعد ويه طبيبها ونسيت

رادت اطلع فلوس لزم حسام ايدها وبقت صافنه وصارت حمره وارتبكت وكال

حسام :عيب هل تصرف

شامه :رجعي فلوسج احسن متاخذين كفخه من واحد بيهم مو نفس كروبنه وياخذون وثانيا انت ايدك من ايد صديقتي

وضربته وضحكت شامه و براء أشرت اله يكوم يوصلها رفضت بس اني اصريت وكلت اله نلتقي بيت شامه وراح يوصلها بقينه كاعدين بدون ما نحجي شي خلصت اكل وانا اكلت شي خفيف دفعت الحساب و كمت اني وياها السياره عند حسام وكلت الها

_خلي ناخذ تكسي

شامه:لا

_لعد

شامه:بيتي قريب منا نمشي اذا.. عادي ع.. عندك

_بعد احسن اشوف شويه بغداد بس انتي تعبانه

شامه :لا مابيه شي

مشينه وجانت قريبه مني أصابع ايدها صارت حمره وخشمها هم نزعت سترتي و وكفت كبالها خليت الستره على جتفها ولبستها الها وسديت السحابه ضحكت وباوعت عليه وجنت بالكوه كاتم ضحكتي وكلت الها

_ عبالك مخبله

ضحكت ونزلت راسها تمشي بصفي وخلت ايدها بالجيب ومشينه بقت واكفه التفت عليها وطلعت ايدها من الستره وكالت والدموع غركت عينها مشيت بسرعه الها خليت ايدي على وجهة وكلت الها

_راح ارجع ما ابقه بغداد لا تبجين ابوس ايدج لا تقهريني لا تبجين هسه راح ارجع بس خلي اوصلج للبيت واطمئن عليج

🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤
اسفه لان طلع مني هل شي ولأن كلت الكم راح أوقف القصه بسبب التصويت
هذا هو بعد بكيفكم تصوتون لو لا هل شي راجع الكم وان شاء لله يعجبكم البارت
وصديقاتي واخواتي الي كتبو كل كلمه حلوه الي شكرا هواي ☺️