رواية قسور والمهره شامه الفصل الحادي وثلاثون 31 - بقلم أسيل

قسور :بنيه قلبي أنا هنا ما عفتج يمج

#قسور

فتحت عيني الضوه قوي فات الدكتور سلم عليه وداس دكمه وفاتت ممرضات جسمي كله يوجعني وكال

الدكتور : حسام وصاني عليك هواي و حسام وليدي وأفضل طالب عندي خليتك بعيوني شيخ لان مو بس نسيب حسام لا...  لأن ابوك الله يرحمه برحمته الواسعه اله فضل علي انا و أهلي ما انساه للموت انت جان بينك وبين الموت شعره الطلقه قريبه من قلبك اله هيج شعرايه وحده بس الله لطف بحالك ورجعك بخير وعافيه امك داعيه الك قاومت لان حاب الدنيا

_لا والله ما حابها بس وعدت مريتي ابقه وما اعوفها اشكرك دكتور فضلك ما انساه ابد والله

جان يسولف وياي وهو يفحصني احس بوجع بصدري مو طبيعي طبعا اذا الطلقه فاتت بنص صدري بس طلع الطبيب كلهم فاتو اله شامه ماكو امي تبجي وتحظن بيه معاذ مخلي رأسه يم ايدي خليت ايدي على راسه وحركته وكال

معاذ:من عمري على عمرك خويه الله لا يشوفني شي يأذيك بيه ولا بيك لا تحرك روحي انت سندي بهل دنيه ما الي غيرك

_اسم الله يحفظك الرحمن ابو الأشتر لا تحجي هيج

كحيت احس صدري خنكني ادور عليها بين الوجوه فاتو الكل يسلمون عليه وراها فاتت غيداء ضربتني توجعت وصاحو بيها كالت بعصبيه

غيداء :لعد بس هو يحرك قلوبنه

ضحكت ساعدوني اكعد شربت عصير واكلت شوربه حته اشرب الادويه يسولفون ويايه و اللواء ليث تخبل من عرف بيه تصوبت وطلع كل المتورطين بالقصه هاي والتهديدات الي وصلت بخصوص شامه لأبوها من محمد و شربت الادويه غيداء والبنات كل شويه طالعات وفايتات من فاتو كلت

_شامه ما تريد تشوفني زعلانه مني

وجوهم تغيرت كلهم كعدت على حيلي نزلت رجلي بالكاع وايدي على صدري صار شي بيها نغزني قلبي وكلت

_بيها شي

غيداء :لا مابيها

أشرت لمعاذ يقترب مني ما أكدر احجي احس بوجع واقترب وكال حسام

حسام :شامه من رحت الها البارحه بس شافتني عرفت الي صار حاولت افهمها بس وكعت وضربت راسها بالميز صعد الضغط وخلاها تروح ب غيبوبه صار الها 24 ساعه فاقده الوعي

_اريد اشوفها بسرعه ساعدني اوكف

فاروق :خلي اجيب الك كرسي متحرك

ما قبلت بس جسمي ما يعيني ابد هواي خسرت دم اضطريت اكعد لحد ما ترجع عافيتي رحنه لغرفتها فتت لزمت ايدها بستها اكثر من مره جان راسها ملفوف وجها تعبان وأيدها بارده غطيتها عدل اجتي غيداء تقره بالفحوصات هسه جابو كل الفحوصات و التحاليل وكلت الها

_بعد ما تكعد لو تكعد كولي الحقيقه

غيداء :وداعه بابا تكعد ان شاء الله لان عدها رده فعل بس شي بسيط وخله امل عدنه تكعد ساعه الساعه وهذا بأيد رب العالمين.... شنو هاي

_شنو

غيداء :هاي تحليلها موجب

_شنو يعني

غيداء :شامه هاي حامل

ضغطت بسرعه على دكمه بصف الجربايه وخرت المغذيات بسرعه من ايدها فتحت عين شامه وضوت بيها وكالت اكو استجابه

_شنو حامل بطفل

غيداء:ثواني وناخذ الها سونر ونتأكد

اجت الممرضات والطبيب وبدت غيداء تحجي وياهم اخذوها من الغرفه فحصوها اباوع عليهم من الجامه مال غرفه التفت عليه غيداء تضحك والدموع تنزل من عينها ضحكت امي وطلعت غيداء وكالت

غيداء :مبروك أن شاء الله يارب تصير اب حامل وهسه بلشت بإسبوعها الثالث

_شون راح يتحمل جسمها وهي بغيبوبة و والطفل ياخذ عافيه جسمها

غيداء :راح اكون صريحه وياك خلال يومين او 3 اذا ما كعدت راح نحاول يا نخليها هي الي تبقه بهل دنيا او الطفل راح يكون قرارنا صعب وانت راح تضطر تتخذ قرار

_شامه اختار شامه وراح تبقه لحد متفتح عينها عسى ما منا ل سبعين سنه ما تعوفني ولا انا اعوفها تروح

مسحت غيداء دموعها بس شافت ابوها اجه مبتسم مر يومين على غيبوبتها طلعت انا وحسام اشرب شي راسي راح ينفجر ما كدرت اكمل الكهوة اريد ارجع الغرفه يمها كلت لحسام نرجع ورجعنه اقتربنه من الغرفه وسمعنه صايح جسمي كله نشل احس بحركه صارت بصدري وكعت الكهوة من ايدي رجعت ليوره لزمت بحسام بس لا صار بيها شي هذا صوت البنات مشينه وكفت يم الباب وشفت شامه فاقده تبجي وتريدهم يوخرون منها التفت عليه كل جسمها ارتخى مشيت بسرعه وخرت براء و غيداء رادت تكوم ما خليتها خليت راسي فوك راسها وكلت الها

_ هنا ما عفتج يمج أششش

خلت ايدها على وجهي شكد مشتاق لوجهة خلت شفتها يم خدي وقريبه على شفتي وكالت بصوت مبحوح وتشهك

شامه :اني ميته م.. مو

_من عمري على عمرج لا تحجين هيج

شامه :عبالي م.. متت شفت الدم عرفت عرفت بيك

_تصوبت بصدري بس ما متت انا كتلج راجع ما تخلصين مني

ضحكت وشهكت والدموع من عينها تنزل واجه الطبيب وفحصها انطاها فيتامينات وادويه لازم تلتزم بيها من كلت الها حبله وراح نصير اب وام ما صدكت لحد ما شافت بعينها بقت بس تضحك ومجلبه بأيدي متقبل اتحرك

#الكاتبه

تراه اليوگع بالعشگ سالفتة مفضوحة
يوكف ع المرآية ويضحك لروحة🖤🔥

رجعو للبيت بعد اسبوع إلى أن عدت شامه مرحله الخطر وقسور تحسن هم مرت اشهر هواي وصار تغييرات هواي بحياتهم وره شهر ب الضبط من طلعة قسور و شامه من المستشفى بتاريخ

بتاريخ
202! /5/5

تقدم حسام لبراء جانت خالتها رافضه فكره تفارق براء بس براء فاجئت الكل باصرارها على حسام وحسام كل طلبات خالتها وفرها الها بس بيت وحدها ما يكدر يعوف امه وابوه واصلا براء جانت رافضه الفكره مال عزل لوحدها بس صبيحه حته ترضي خالة براء وتأكد الها هي مشتريه براء بمي عينها كالت الها راح تعزل الطابق الثاني الها كله وافقت اخيرا خالتها بس الدموع ما توكف من عينها من سمعة هلهولة ام حسام بالنهايه خاله براء خلصت عمرها تربيها وتعبانه عليها ومعتبرتها بتها وما قصرت بشي عليها اما حسام الكاع ما لمته من قرو الفاتحه يريد يكمز يحضنها ومعاذ لازمه بالكوه حته لا يفضحهم من فاتت تقدم الكهوة ولابسه ثوب اوف وايت وحجاب زهري مكياجها بسيط بقه مبتسم وهو صافن بوجها قدمت لقسور وكالت على كيف

براء :شيخ فنجانك شامه سوته اني معليه

قسور:مخليه شكر زياده

براء:ملح زياده وتكول الي يحبني يتحملني

ابتسم قسور واخذ الفنجان واخذ حسام الكهوة وبقت واكفه بالباب وشامه وراها باوع الها بطرف عينه ابتسم وشرب الكهوة ما تغيرت ملامحه ابد أشرت اله يوكف ما وكف لحد ما خلصها وما شرب مي أشرت اله مقبل بقه مبتسم قرو الفاتحه وهلهلن النسوان وحددو الحاظر والغايب وطلبت منه غايب كتاب قرأن وحجه وافق وكال

حسام:الغايب مالتها 100 مليون

بقو صافنين بوجهة مصدومين بهل رقم الغريب وهي هم ما اتفقو هيج وكال

حسام :لا مو لان احبها بس حته ما اطلكها طول عمري تبقه حرمتي

شامه:يااااا فال الله ولا فالك

براء :ها تكول هيج اريد خمسين مليون حاظر

حسام :اشلع عيوني الج وصدك اخليلج بس ذهب بخمسين مليون (خايبه ب العافيه عليج يا ام عباس رايحه الها ههههه على فكره بنت عمي من أخذها الي يحبها خله الها خمسين حاظر وخمسين غايب و ما أخذ الها ذهب اخذ الماس الها ب العافيه عليها والصراحه تستاهل لان تتخلى بنص الكلب ف المغزى من كلامي حبيباتي تره الي يحب من صدك يسوي المستحيل حته تصيرين اله مو يكعد يتحجج عليج ابو راس المربع 😂) نرجع للقصه

حددو يوم الخطوبه وتلبيس الذهب والعرس وحددو العرس بس للاصدقاء المقربين والعائله وراح يسوونه بغداد احسن الهم...

قسور وشامه سلمو على الكل وشامه حضنت غيداء وابوها قسور كال الهم حاجزين بالفندق حته للبيت مراح يرجعون الي عدهم بغداد من سأله ابو غيداء ليش ميريد يكعد بالبيت او يجي يمهم كال اله

قسور:لا لبست الثوب الأبيض ولا صار الها عرس ولا فرحت بشي فمسوي الها مفاجئه اريد انا وياها نبقه نسولف بوحدنه شوي

كل واحد راح لمكان سويره وفاروق رادو يكعدون بفندق بس ماقبل لا قسور ولا معاذ ولا فيروزه خلوهم اله يكعدون وياهم بيتهم على النهر بالجادريه وصبيحه وابو حسام كعدو بيت ابو غيداء فيروزه كالت لصبيحه تجي وياها بس كالت الها تجي ويطلعون ويكعدون سويه بس ابو حسام يرتاح يم بيت ابو غيداء وميريد يحرجهم حسام الليل كله يحجي ويه براء ويتفقون على الأماكن وشهر العسل والبيت شوكت يبدون يأثثونه وأما قسور وشامه من طلعوو من بيت براء باوع عليها وكال

قسور :طالعه جنج العافيه

شامه :اي شنو الجديده حلوة اهبل بس سمنانه

قسور:كلشي لايك عليج

شامه:اهووو تضحك عليه اكول ليش مشربت مي هيج تحبني بحيث خلصت الكهوة كلها بدون ما توكف ولا ثانيه

قسور :احبج؟

ركن السياره باوع عليها وهي هم الشارع جان شبه فارغ خله ايده على وجهة سحبها وخله شفته فوك شفتها وباسها معافها لحد ما ضربته على صدره حته يبتعد تريد تاخذ نفس ابتعد بالكوه اخذت نفس باس كصتها جان صدرها يصعد وينزل بسرعه نفسها سريع وكال

قسور:مو بس احبج لا اعشك الهوة الي تتنفسينه

شامه:الله لا يحرمني منك

قسور:ولا منج

لبسها حزام الأمان وكمل سياقه لازم ايدها ميقبل يعوفها اخذت صور ونشرتها باس ايدها شغلت الراديو ولزمت تليفونه حته تكلب بالأغاني شعنده وشافت محمل اغنيه وحده بس كالت اله تحبها بثاني لقاء ألهم (وعدتك ان لا أحبك _ماجده الرومي) شغلتها باوعت عليه الطريق كله تباوع على وجهة ومبتسمه وهو هم وكالت

شامه :تدري شكد احبك

قسور:شكد

شامه:بكد الدنيا بحجم هل كون بكد السمه بكد النجوم

هي تشرح اله مثل الطفله تأشر اله وهو يباوع على تصرفاتها ويضحك وصلو للفندق نزلت عدلت حجابها وشالت جنطتها ضمت بطنها جانت شويه كبرانه بالشهر الثاني صارت مخلي ايده وره ضهره وفاتو لفندق بابل من الفنادق الراقيه بغداد ومختار أغلى جناح وهم يمشون طلعت سوسن لابسه قاط احمر وفانيله ستن مطلعه نص صدرها وشعرها صابغته احمر مغريه طالعه وشافت قسور والضحكه ترست وجهة واجتي تسلم عليه وتضحك شامه واكفه وره قسور التفت ولزم ايد شامه وسحبها وكفت بصفه بقت سوسن تباوع على شامه بصدمه ما تصورتها هيج حلوة ومرتبه وكال

قسور.. هاي حبيبه قلبي ومريتي شامه وان شاء الله ام وليدي لو بنيتي

وخله ايده على بطنها سلمت شامه ردت سوسن السلام بأرتباك وجهة كام ينطي الوان واستأذنت مشه وبعده لازم بيدها باست ايده من زنده وهم بالمصعد ضحك وضربته على ضهره على كيف فاتو للغرفه وشامه الضحكه شكت حلكها من شافت الحلويات والاكل والورد الي تارس الغرفه ورد احمر وابيض واكو علب على الميز وكالت

شامه :ألي الي اشوفهم

قسور :اول شي فوتي غسلي وغيري ملابسج وناكل يله

شامه :اوكي

وكالت بحماس رادت تمشي سحبها لحضنه ورفعت راسها وكال وهو يباوع بوجهة

قسور :نسبح سوه

شامه :ل.. لاااا

ضحكت وراحت سبحت وطلعت من الحمام تنشف بشعرها ولابسه بس ثوب نوم اسود حرير بارز بطنها وصدرها المتروس وشعرها رطب وعايفته مفتوح مشه ولزم تليفونها وانطاه الها بقت تباوع عليه شافته عصبي وكالت ب ارتباك

شامه :شكو

قسور:فتحي التليفون

شامه :ش

قسور:حبيبتي فتحي

كالها بعصبيه شويه فتحته اله واخذ التليفون فتح الانستا وطلع صوره نشرتها قبل ساعتين الها بس شفتهة وركبتها طالعه بس بشكل مغري هي ما متقصده باوعت عليه وكال وهو يطلع التعاليق و واحد كاتب الها (شون شفايف تذبح ذبح مال بوس ) ومسح الصوره وضرب الولد بلوك وكال بشي من العصبيه

قسور:احنه زلم نغار على نسوانه وانا ما ارضى حرمتي تنشر هيج اذا تردين سوي الحساب بس للمقربين مو يجي اي واحد يتفرج على حلالنه ما ارضاها ولا تنشرين هيج صور بعد هاي شفتج بس انا الي ابوسها وامصها الي وحدي بس وهذاك الناقص لو ما وياج بالقسم والله لامسح الكاع بيه شقاه هذا مو ويه حرمتي اني فهمتي

لزم شفتها بأصابيعه على كيف رفعت راسها والدموع تنزل من عيونها شهكت وكالت بأرتباك

شامه :م.. مو مو قصدي اسوي هيج والله تعرف اني ما اسوي شي

بس شافها شهكت خله ايده على وجهة وباس عينها بسرعه وباس كصتها وكال

قسور :اسف... لج حبيبه قلبي اني اسف لا تبجين والله مو قصدي الله ياخذ عمري

شامه :ل.. لا اسم... الله بس والله مو قصدي

قسور :لج فهمي يا بنتي واثق بيج من السمه للكاع والله وغلاه عيونج وغلاه إلي ابطنج مو سالفه ثقه بس اغار... اغار شبت بقلبي نار من فكرت احد يسوي هيج لشفتج لو واحد يضوكها غيري اغار اغار

ضحكت والدموع بعينها باس شفتها وركبتها ترك أثر ضربته على صدره ضحك وكال

قسور : كلشي احبه بيج مو عصبي عليج بس اغار

شامه :يعني اكيد تغار عليه غير حلوة

قسور :فدوه لهل حلك

كعدو ياكلون خلصت بسرعه أكل حته تشوف شنو جايب الها مثل الطفله بعيد راس السنه من يفتحون الهدايه تبقه متحمسه فتحت اول علبه لكت بيها الوان ماركه

Prismacolor Premier
و Black Widow
و LYRA's Rembrandt Polycolor و
Faber-Castell

جايب الها كل أنواع الألوان الي جانت تسأل عليهم وتتصل بالمكاتب وتوصي عليهم اذا يكدرون يحصلون الاصليه الي بيها ضمان من الشركه التفت عليه والدموع بعينها كام بسرعه وكعد كبالها حضنته وكال

قسور:اروح فدوه لهل عيون لا تبجين اضحكي

شامه :كله من وراك هرموناتي تخربطو

فتحت العلبه الثانيه جايب الها حجول ذهب وضحكت لان بيهم اجراس وكال

قسور :خبله ياهو الي اسأله عليهم يكول هاي قديمه

شامه :عمه فيروزه هي تكول كل دكه ب الخلخال تخلي رجلج يدك قلبه الج

قسور :لج اني عايش الج وعلمودج خبلتي

شامه : منو كال

لبسهم الها بقت صافنه عليه وكامت وكفت وتحركت حته يطلع صوت الحجل وبسرعه لزمها وكعدها وكال

قسور :الطفل سويتيه عصير ابطنج

طلعت لسانها وعيبت اله وضحكت وفتحت العلبه الثالثه جايب الها تليفون جديد ضحكت وباست خشمه وكالت

شامه : اعتبرها رشوه شنو السبب بس لا تريد تزوج

قسور:اي اريد

شامه :ش.. شنو

قسور :اي والله اريد ازوج

شامه :ل.. ليش بشن.. بشنو مقصره وياك

قسور:اريد اتزوجج اريدج تلبسين ثوب ابيض ثوب العرس اريد أتقدم الج حالج حال براء وبقيه البنات ما اريد اخلي شي بنفسج

شامه :كل.. كل هذا ما يهمني بكد ما يهمني انت يمي و وياي

قسور :زين بس لبسي الثوب الأبيض لا تخلي بنفسج

شامه: وغلاه عيونك وداعتك اصلا ولا أبالي هيج شي

ضحكت وباسته من ركبته اكثر من مره فتحت التليفون وخلته على الشحن وانطته اله حته يشغله الها فتحت العلبه الرابعه لكت بيها مفتاح وسند قرت الورقه مخلي بيت بأسمها وكالت

شامه :ليش ليش سوي هيج بيه

قسور :قبل لا تفكرين اي تفكير انا كل واحد بالبيت اله أملاك وضامن مستقبله وهيج انا ردت ارتاح والله واخلي شي من حلالي بأسمج

شامه : عمرك طويل بس تره اذا تركتني ما اعيش وراك

قسور:كولي يا الله وفتحي العلبه الاخيره

فتحتها وبيها مفتاح وعقد البيت الي خططو يسونه ميتم ومرسم بأسمها وكامل بس باقي الأثاث هي تختار ضحكه وكمزت بحضنه وباسته من شفته بكل لهفه شالها وخلاها على الجربايه وما بعد عنها لحد ما ضربته على صدره ابتعد وانحنت كام منها بسرعه وكال

قسور:أذيتج ش.. شبيج

شامه :ل.. لا وجع خ.. خف... اخ قسور

حست بوجع لويات اذتها اتصل بغيداء وجانت تبجي شامه وشرحت الها الوجع وخايفه على الطفل فكالت غيداء وهي تضحك عادي هاي تقلصات الحمل وارتاحت شامه من سمعت بهل شي اقترب قسور منها وهدئها خايفه على الطفل ونامت على صدره .....

بتاريخ..
202!/7/8

صارت شامه حامل بشهرها الرابع.. بعدها مرايحه تاخذ سونر جانو كلهم كاعدين سويره وفيروزه وصبيحه ونوال وجانو كاعدين ياكلون فاكهة ويكرزون حب شامه روحها صايره بالركي وجانت بطنها جبيره صارت فكالت

نوال:شنو مناويه تفرحينه بجنس الطفل متريدين تحضرين اله جهاز

شامه :م.. ما اريد

نوال : اهوووو بعدج تفكرين بحجي العالم

صبيحه :يا حجي

فيروزه :شكو

سويره :ذاك اليوم من اجني النسوان وصديقاتج بقو يحجون يفرح الشيخ بوليد وشامه خايفه تجيها بنيه وما يفرح قسور بهل شي

فيروزه :يمه شهل تفكير هاي انتي مسودنه مو

شامه :بس بالنهايه لو يجي ولد راح يفرح قسور بيه اكثر من البنيه

قسور :منو كال شحلاتها بلسان الناس اجه ابو ملاك هلا بأبو الدكتوره ملاك بويه وانا اشيل خشمي وانغر ببنيتي ويكولون هاي بنت الشيخ قسور هاي الي راح تمرمر قلبي مثل امها ومن تجي تشكي الي وجع قلبها احرك الدنيا والي وجع قلبها من تكلي بويه اريد هيج شي والله انطيها ماي عيني وروحي فداها ومن افوت لمكان وهي وياي رافع راسي بيها ليش ما اريد بنيه والله لاكلج انا نفسي ببنيه حليوه تشبهج وعسى الله يخلي اول خلفتنه بنيه والمهم بصحه وعافيه هاي فرحتي انا كتلج حجي النسوان هذا يتعبج

شامه يعني م.. مراح تضوج اذا أجتي.. بنيه

قسور : ولج راح اكوم اكسرج

ضحكت وخلت ايدها على بطنها وهو يباوع عليها مبتسم وسعيد راح يصير أب ويجي طفل من الانسانه الي عشكها...

202!_10_19

شامه صارت حامل بشهرها الثامن وصدك طلع احساسها حامل ببنيه فرح قسور من كل قلبه بس هي بقت اكو حزه بقلبها لان تحس لو ولد راح يفرح صدك بس هي عبالها يمثل حته لا يقهرها سويره صار عدهم ولد وسموه ذو الفقار وحسام وبراء تزوجو وراحو بشهر عسل لدبي... شامه جانت كاعده بغرفتها بطنها صايره مثل الطوبه حملها كلش نحس وتعبت هواي بيه بس جانت منتظمه بأكلها وصحتها وادويتها تأخر قسور بالرجعه للبيت جان عنده شغل وشامه جانت تحس بوجع ويزداد شويه شويه وجع غريب بقت كاعده منتظرته فات للغرفه و وكفت ومشه باسها وخلت راسها على صدره استغرب بقه حاضنها وكالت

شامه :أسفه لان

قسور :لأن شنو

شامه : مكدرت اجيب الك ولد حالك حال البقيه

لزمها من جتفها رفعت راسها وكال بعصبيه

قسور:انتي من كامل عقلج تحجين لج وغلاه ابويه وراس امي وداعتج انتي وداعه هل بنيه الي بعدها مجايه تره والله الكاع ما لامتني راح اصير اب وجايتني طفله ومن اكثر انسانه حبيتها وعشكتها بهل دنيا والله منتظر تجي لهل دنيا بفارغ صبري ورايدها تجي بخير وسلامه وانتي كل تفكيرج انا مقهور لان جايتني بنيه لج هذا اختيار الله والسبب الثاني انا المسؤول عن جنس الطفل مو انتي واذا مقهوره جايتنه بنيه ذبي اللوم عليه مو عليج

شامه:لا... لا والله مو قصدي شي بالعكس فرحانه

قسور :لعد سكتي ولا تفتحين حلكج بهل موضوع مره ثانيه

سحبها وكعدها بحضنه على الجربايه وأيده على بطنها وحركها على كيف ضحكت شامه وخلت راسها على صدره وكالت

شامه :لا تحبها اكثر مني

ضحك كعدت عدل خله ايده على ضهرها حس اكو بيها شي وكال

قسور :شبيج

شامه :هيج ولا.. ولا شي بس خلي اغسل وجهي

كامت مشت كم خطوه خلت ايدهة على الميز وانحنت كام قسور خله ايده على ضهرها وكال

قسور :تشنجات مو لا تخوفيني

شامه:ق.. قسور اخ.. نزل.. نزل مي الراس.. بعد بعد وكت اني بعدني بالثامن اه قسور اه

كامت تبجي كعدها قسور فتح الباب وصاح على نوال بصوت عالي تجي لغرفته ما يعرف شيسوي يرجف ثواني وفاتت نوال وراد يفوت معاذ ودفعته بس شافت شامه بثوب النوم والدم على رجلها ومي الراس نازل وصاحت بمعاذ يحضر السياره وبسرعه فوتت شامه غسلت الها ولبستها ثوب والعبايه فوكاه لفت راسها بشال وجانت تبجي وتهدي بيها نوال شالها قسور ونزل للسياره مرت ساعات هواي نزفت شامه واحتاجت نقل دم وجابت بنيه مثل الكمر بيضه مثل الكطن ناعمه شافها قسور هو والبقيه بالخدج لان بعده نموها مو كامل بجت فيروزه وصبيحه من شافوها قسور طك قلبه عليها ما كدر يبتعد من الجامه صافن على بنته يريد بس يشيلها بس مقبلو يخافون عليها لان جهاز مناعتها ضعيف صورها عيونه تغوش من الدموع يرجف من الفرحه من شافه معاذ كال اله

معاذ :تحس جنك ملكت الدنيا من صرت اب

قسور:والله ما مصدك اريد بس اخليها على صدري واشم عطرها

معاذ :ان شاء الله كلها جم يوم وتنام بحضنك وحضن امها...

202!/3/9

مرت اشهر صارت ملاك بس هي وبس بحيث كل الأحفاد انسو وكل اهل البيت نسو نفسهم بس ملاك المدللة وقسور مغركها بالذهب والملابس والالعاب شكلها يشبه شامه وقسور عيون عسليه وشعرها بيه خيط شكار وبيه لويه وناعم بيضه ومدبدبه شفايفها ورديه وعينها لوزيه شون عيون قسور ماخذه جمال ابوها وامها بس عصبيه نارر تضحك شامه كل ما تعصب وتباوع على قسور وتكول

شامه :ماخذه عصبيه هذاك الرجال

وقسور يضحك يباوع عليهم ويقره المعوذات يخاف من نفسه لا يحسدهم هلكد ما فرحان بيهم وتارسين الدنيه عليه صبر وتعب وصارت الهم الف مشكله بس الله عوضهم وانجمعو سويه وعاشو احلى عيشه بين أهلهم وناسهم عاشو بسعاده

#بعد مرور سنوات تغيرت حياة الكل نبدي

بقسور وشامه

صار عدهم ولد وسموه ضرغام على اسم ابو قسور وأصغر من ملاك بسنه عشك شامه وقسور يوم عن يوم يزيد شامه كملت ماجستير بأمتياز وقسور طلب منها تكمل دكتوراه فرحت لان جان سند الها والميتم الي جان حلمها صار معروف والكل يمدح بيه مخلصه وقتها هناك تدرس وتشتغل ويه الطلاب ما تركت الرسم ابد فتحت الها معرض بغداد اكثر من مره وكل الأرباح والتبرعات جانت تستغلها وتخليها بالميتم حته يتكبر ومينقص الأيتام ولا شي....

براء وحسام

صار عدهم تؤم ولد وبنيه الولد سموه احمد والبنيه نسمه مثل المخابيل عايشين حياتهم ونسه وسفر وضحك يعوفون الجهال على صبيحه وابو حسام ويسافرون حسام فتح مذخر ادويه وصيدليه ومرات براء تساعده وعايشين بسعاده

اما معاذ ونوال

صار عدهم ولدين الأشتر الجبير و عيسى الصغيره نوال تستغل وقت فراغها ادرس الطلاب ويه شامه وتساعدها بالميتم ومعاذ مخلص وقته شغل بين بغداد والبصره لزم مشاريع هندسه ومخلص وقته هناك

سويره وفاروق

صار عدهم اربع جهال ٣ ولد وبنيه الجبير ذو الفقار و حيدر وعمر ودينا فتح فاروق مطعم جان هذا حلم وقسور ساعده بيه هواي قسور ما يفرق معاذ من فاروق رابين سويه

اما بأن و نوران اختفو ما ألهم اي أثر ومحمد انسجن وتعفن بالسجن

تمر الأيام وتمر السنين وبمرور الوقت هذا تتغير الحياة بشكل فضيع نخسر بيها احباب نخسر بيها أصدقاء ناس نحبهم هي هاي الحياة يوم ضدك ويوم وياك يوم حلوة ويوم مره لهذا دائما تركو وراكم أثر طيب خلو الناس الي تذكركم تذكركم بخير خلو ذكريات حلوة عيشو يومكم حته اذا جانت الحياة صعبه وقاسيه وياكم حاولو تشوفونها اكثر من منظور لازم يكون امل وسعاده بمكان ما من بزوايا من زوايا الحياة هاي.....

الحياة كلش گصيرة
استغلو كل اللحظات بيها
لا تأجلون شي ،
لا تأجلون اللمات الضحكات
لا تأجلون شوفة عزيز عليكم
عيشوهن لحظة بلحظة
الموت البعد الفقد اذا اجو
مراح ينتظرون من عدنا انو نودع احد ولا
وينطونا فرصة ابد راح يخطفون منه الشخص ويخلونه نعض اصابعنه ندم لهذا استغلو الفرص وعيشو حياتكم...

#النهايه 🦋

#2021/8/8

🦋🦋🦋🦋🦋🦋🦋🦋🦋🦋🦋🦋🦋🦋🦋🦋🦋

فراشاتي وبناتي وحبيباتي وصديقاتي الجميلات احب أشكركم على كل كلمه حلوه كل تعليق جميل على كل ضحكه ضحكناها سويه شكرا لان انتو بحياتي شكرا لان صرتو اهلي وعائلتي الثاني 🦋

واعذروني اذا قصرت بحقكم 🥲😔

وانتبهو على نفسكم هواي انتبهو ع صحتكم وربي يحفظكم ويحرسكم

وان شاء  القدر ربما سأعود لكم بقصه جديده 🦋😍