رواية كسرة قلب الفصل الثامن والعشرون 28 - بقلم نور الشمس

روحي يمه الخاطري روحي وارجعيلي سالمه

..مااروح لمن يجي ابوك يمك يمه مو بيدي والله مااگدر

صگر ..يمه حرام والله التسوي بينه حرام تدرين البينه مكفينه الخاطر كرم گومي انه وامي الحجيه ناخذچ كرم ماينخاف عليه

احاچيها وهيه تلوب ماتجاوب وامي الحجيه عصبت وضلت تحچي عليها انتي جاهله زغيره وحايرين بيچ ماجايبه گبل شبيچ يمه تردين تموتين تلحگين خالتچ
من سمعتها هيج گالت زاد خوفي
طلعت بره خابرت فهد

..الوو هافهد وينك انت

..صگر شبيكم كرم شبي خو ماكو شي ليش متصلين علي ماچان يمي تليفوني چنت نازل وهوه بالسياره

..شيخ امي واصله كلش من الضهر الهسه تلوب وماترضا تروح للمستشفى وامي الحجيه تگول عدها ولاده وهيه معانده تخاف على كرم تگول يجي فهد يمه يلله اروح

..خل تحضر روحها قريب انه رجعت ضل بالي يمها وين كرم درا هوه

..اي دره لاتخاف علي سبع صارله ساعه يقنع بأمي وهيه معانده

..وكت عناد هوه ماتخاف على روحها راح اطبك سيارتي بالباب خل تطلع هيه وامي

..اخابر وحده من البنات تجي وياها

..مااريد لاوحده ولا واحد احنه كافين كلشي ماريد منهم محد بيهم يقدر انت ابقى يم كرم وانه اخذها خل تطلعلي هيه وامي

..سد التليفون وچان يحچي بعصبيه عرفت فهد زعل عليهم وهاي اول مره يسويها والظاهر زعله ثکيل بحيث جامع الكل

رجعت الامي يمه گومي فهد جاي ويگول انه اخذها وبس هيه وامي وانه ابقى يم كرم

..صگر مااوصيك بي فدوه

..لاتوصين يمه والله ماخلي وهوه سبع ماينخاف عليه

كرم ..روحي يمه مودعه بألله ماعليه شي اتانيچ انتي واخوي ان شاءالله

..طلعت بعدني بالحديقه وسمعت صوت السياره فهد دك هورن معناها وصل خليت عيني ع السمه جوو كئيب الدنيا تريد تغرب گلت يارب توكلت عليك طالعه ومخليه ولدي امانتك مأمنتك روحي هم ارجعلهم سالمه يارب يگولون دعوة التطلگ ماترد الله يتقبلها لأن هيه بشده ناخيتك وانه بشده ومهضومه اريدك تصبر ابني وتوفقه وتعلي مقامه طالبه كرم وسعادته منك طلبه طلعت وامي وراي تمشي وصكر صعد جنطتي حاچه فهد ووصاه وطلع مافهمت حچوو بس شفت وجوهم ماتتفسر
ردت اصعد يم امي وره فتح الباب اشرلي تعاي هنا
..صعدت وانه اللويه تروح وتجي

.. گواها الله ام كرم شدي حيلچ لاتخافين انه وياچ وكبلي الله

..مثبته اديني ع الكشن من تجيني اللويه اعصر الكشن بقوه واسحب نفس واذبه
خله ايده على ايدي

..رخي رخي لاتتشنجين سهله راح نوصل شويه تحملي

..فهد كررررم جاي احاجي اجتني مغصه قويه جريت نفس وذبيته كرم بالي يمه خاف شو شيسوي

..مايسوي لايضل بالچ وصيت صگر يحاچي بالساني ويگله ابوك هيچ كال كرم سبع ماينخاف عليه

اكثر من نص ساعه الطريق خلصته گوه ادعي يامخلص النفس من النفس اخرجني من الضيق الى الفرج يارب بجاهك تبرد گلب كرم الليله وتعدي سلامات اول ماوصلت دخلت وياي امي ماخلوها تفوت بقت هيه وفهد بره ودخلت صالة الولاده اقل الربع ساعه وجبت من سحبوو الطفل اختفه الألم ونسيت كلشي فرحتي واني اسمع صوته نسيت كلشي سألت وانه متلهفه بنيه لو ولد
گالت الممرضه بنيه گولي الحمدلله رزق ربچ تحاجيني وچنها تقنعني ماتدري الفرحه الحسيت بيها گتلها الف الحمدلله لحظات وانه بعدمي ع السديه واجه ابالي كرم يارب بشدتي هاي ويگولون الجايبه بأول ساعاتها محظوره تحظرها الملائكه وتطلع خاليه مم الذنوب اريد ارجع الگه كرم طبيعي ومايصيرله شي
اخذوو الطفله انطوها الامي بعد مابدللها امي وفهد بره اتخيل ملامح فهد من دره بيها بنيه اكيد فرحان
مثلي شگد فرحانه بس فرحتي بيها غصه
ماردت اطول نص ساعه ارتاحيت بيها وطلعت
بالباب چان فهد وامي منتظريني من شافني رغم التعب الي بوجهه وعيونه الحمر مبيين اعصاب انرسمت بوجهه ابتسامه من قربت عليه ابتسم اكثر

..الحمدلله على سلامتچ يالغاليه جبتي وربيتي

..تتربى بعزك ودلالك ان شاءالله

..الحمدلله الله انطاني الي تمنيته اتمنيت ابنيه تصير عندي يگولون المامخلف بنات مايحس بالحنان ولايشوفه

..ابتسمت تعبانه الف الحمدلله ..شسميتها

..لبوه فهد هاي البنت لبوة ابوها

..حلوو الأسم بس انه چنت ناويه اسميها شمس

..ماادري بيج محضره اسم وحته لو ادري هم لبوه احلى

..ابتسمت وانه اتذكر كل مااجيب يسمي ويگلي ماادري بيچ محضره ومن اكله ناويه على فلان اسم يگلي لا الأختاريته احلى
بكل الحالات يسمي الي اباله

رجعنه بالطريق صعدت يم امي تعبانه خليت راسي على متنها وبنتي بحظنها اتذكرت من اطلك الطريق كله تدعيلي ودمعتها مانشفت وانه ادعي الأبني
هيه ام وانه ام غصبا علينه نفكر بأولادنه اكثر
تعبانه ماادري شلون غفيت صحيت على صوت امي

..يمه شيخه گعدي بعد گلبي وصلنه البيتچ ولدچ بالباب عينهم عليچ شوفيهم متانينچ

..فزيت وابالي اردد حچيها عينهم ع الباب متانينج الف الحمدلله من رجعتلهم سالمه

فهد گال حبيبه وصلنه بس ندخل اكليلج معلاگ شويته الچ وانتي بعدچ ماطالعه خابرت الولد وجتبه الي الباب المستشفى لان ماكدرت اطلع واخليكم اكلي وارتاحي ونامي تعبتي انتي الله يساعدچ

ماحاچيتهم مابيه حيل وانه ابالي يانوم يااكل  كرم بس اريد اشوفه

قربت السياره على بابنه شفتهم كلهم علي كرار ضرغام سبع
بس صگر وكرم مو وياهم
نزلت وهمه تلگوني بوسوني كلهم وعينهم على امي شايله البنيه يمه شني جبتيلنه
جاوبهم ابوهم اجتكم اخت وسميتها لبوه وهاي لبوتكم انتوو الاسود ياهو يكربلها وهيه ابينكم
فرحوو كلش وحته سبع فرحان مامبينه عليه غيره
حاجيت كرار

..كرار اخوك وين

..جوه يمه بالصاله گاعد هوه وصگر امتانيچ

..دخلت جوه وانه افكر گبل اليوم چنت من افكر اگول وين اضم روحي من صگر وكرم بهذا اليوم خجلانه منهم بس خوفي على كرم غطه على كلشي هسه لازم انه اوگف وياه واشجعه
دخلت عليهم گام صگر فرحان
..الحمدلله يمه الف الحمدلله على سلامتج وينها لبوه من خابرني فهد والهسه وانه طاير من الفرحه واخيرا صار بيتنه بي بنيه حليوه بس كون تشبهچ

..ابتسمت وانه اتقدم الكرم رديت الصگر الله يسلمك يمه يوم النفرح بأبنك دنگت على كرم وبسته
اخذ ايدي باسها دنكت عليه مره ثانيه بسته
..شلونك يمه اروح فدوه الطولك

..اسم الله عليچ يمه الحمدلله انه الأروحلج فدوه انطيته اخته بحظنه باسها وشلتها عنه گوه واگفه على رجليني عظامي كلها توجعني احسها مفككه
بس اريد اشجعه
انطيت الأبنيه الأمي حاچاني صگر يمه حضرتلچ الغغرفه المقابيل غرفة صگر لأن فهد ماقبل اودي ع البنات انه والولد رتبنه الجربايه والكاروك
اتشكرته هواي انه ابالي ماانزل ابقى بغرفتي ومخليتهن غراضي فوگ يمي بس زين سوه حته اصير قريبه على كرم
شويه وگال كرم يمه انه اترخص اروح انام اخذت علاج مسكن وتعرفين علاجي قوي
باوعت للساعه بثمانيه الا وانه كل بتلي فوگ العشره
راح صگر وياه وره شويه اجه گال نام
سألته شعجب نام خاف يضل گاعد وحده ويحرگ بروحه

..لايمه بس دره بيچ جبتي شرب فاليوم حبايتين هوه متعمد ينام گبل الزفه خلي زين يسوي
فهد گال انتي هم نامي ارتاحي

گتله مانعسانه عيني ماتاخذ نوم بس اتمددت شويه وبجت الطفله اخذتها الصدري ومثل كل مره من تاخذ صدري وترضع احس بشعور غريب شعور حلوو دعيت ربي مايحرم اي وحده من هذا الشعور
رجعتها الامي خلتها بكاروكها فرشت فراشها يمي وانه على الچربايه امي تحب نومة الگاع ماتريد جربايه ابد وفهد گاعد يمي گتله روح ارتاح گال نامي لو نمتي اروح شويه وسمعنه صوت الرمي الجوو احترگ حرگ عرفناهم زفوو العريس انه احس گلبي وجعني وفهد گمز من مكانه راح الغرفة كرم شويه وطلع گال نايم الحمدلله
مرن يومين وكرم مايبيين عليه اي شي بس عيونه ذبلانه لاهوه يحچي ولانتجرأ نفتح يمه موضوع العرس
اني ثالث يوم گمت البيتي امي تعبانه ورجلينها تأذيها وانه الحمدلله زينه
البنات اجن شويه وراحن من شافن وجه فهد ثگيل عليهن ماطولن وهم ماحچن بهذا الموضوع بس احس صاير شي بينهن وبين فهد مامعقوله يزعل لأن محمد انطه مريم شعليهن هنه
وره ماطلعن فهد حاچه كرم

..كرم بعد تلث ايام نروح اول جلسه بعدك مثل ماوعدتني

..ان شاءالله بويه لايضل بالك بعدني واقوى ان شاءالله

..ابن ابوك ادري بيك ماتخذلني

كرم ..

بعد ماطلعت امي اجه صگر گال فهد وصاني اكلك هالحچي بالسانه
يكول ادري بي يحب والرجال من يحب يحب بكل مشاعره بحيث الحبيب يمتلك احساسه وجوارحه
كل هذا ادري بي وادري بأبني رحال بس من توصل يم الكرامه ماننسى الحب ولانكدر نمحي بس نكدر نتناسه والجرح مرات مايشفى لمن ينچوي خل يچوي جرحه ويطيبه بس يخلي اباله كرامته وكرامة ابوو برگبته مااريده ينكسر ولااريد يگولون ابن فهد سوه هيچ من راحت محبوبته البنيه توكلت خلها تروح البيت رجلها بالوحه الأبيض اول وتالي بنت عمه وشعر شاربه هيه لاينطي بيها ولايفضحها بسبب حبه
بوكتها حچيي ابوي دخل عقلي هذا هوو شريد اسوي بس احساس صعب والمطلوب مني اصعب بوكتها تفكيري بامي شغلني ومن خابرونه وجابت بسلامه فرحت بس رحعتلي افكاري ورجعت النار الي بصدري خليتها توصل قريب للبيت شربت حبوب مسكن ومنوم بس شفتها وارتاحيت ونمت
بيومها گعدت الفجر هدوء الكل نايم وحشه بروحي تذبح
اجت ابالي الأفكار انه وهيه انتهينه بعد اليوم هيه بحظن غيري دعيت ربي يسعدها جواد خوش ولد بس هوه عصبي اعرفه انه وهيه هادئه مايلوكلها غيري استغفرت ربي وكملت دعائي الها ربي يسعدها ويهنيها ادعي واحس غصه ابلعومي گوه ابلع ريكي
بعدها لتصرفت عادي رغم الوحشه والتفكير الذابحني
صار موعد الجلسه
ولازم نروح المركز المحافظه هناك مركز العلاج الطبيعي
رحت وانه عازم امشي على طولي وادوس على كل الم ماكو اقوى من الم گلبي اريد اشوف ابوي كرم ابنه رحال يعتمد عليه يعالج روحه بروحه يخيط جروحه مهما كان كبر الجرح
طلعنه وي طلعتنه من بابنه صادف يوم سادس ليلة السابع العرسهم بعاداتنه تجي العروس زواره الأهلها
ولأن همه مو بعيد علينه جايين مشي
شفتها من بعيد بس قرص وجهه طالع
دنگت راسي حيل وحليت ايدي على عيوني مااريد اشوفها مااريد اخلف وعد الگطعته الروحي وعدت روحي مااشوفها طول العمر بعد مااريد اشوفها للموت لمحتها ودنگت
شفت ابوي انتبهلي
لحظات ونسيت كلشي من تعديناهم التافت ركبتي غصبا عني شفت ظهرها وطولها
زادت جروحي وانه اعاتب رزحي ليش ماركزت بعيونها بوجها العرس لايكلها مغيرها زايد حلاها ذبلانات عيونها بعدهن يلمعن لو شافني
گطع تفكيري صوت ابوي گال

..لاتفكر بويه هاي شدتها وهاي ايامها الحب مهما تسعر ناره البعد يبرده ومن تفكر وتشوفها هيه باسم غيرك وحلاله نفسك الجانت تهواها تجزها

..دنگت بدون مااحاجي وانه افكر بكلامه
وصلنه المركز وانه عازم
خلصت اول جلسه بعذاب الموت شفته بعيني
رجعت تعبان الطريق خلصته نايم
من وصلت وشفت لهفة امي تسوه عندي الدنيا كلها
عندي قناعه وثقه بربي الله اختارلي طريقي وانه واثق بأختيار ربي الي
انه فاقد حبيب وغيري عنده بس فاقد لهفة وحنان الأم امي تكفيني
بوكتها بديت ارجع شويه وياهم طبيعي ضحك وشقه مانسيت بس اتناسيت
وحاولت اسوي اليطلع بأيدي واتعالج بس حته اثبت كرامتي وكرامة ابوي اقوى من كلشي
ايام واجت الجلسه الثانيه وجانت اصعب وبقن الي اربع جلسات اول يوم ارجع مييت تعب اخلصها نايم ابوي انشغل وياي امي رغم بعدهي تعبانه شايله همي والبيت واخواني هيج اشياء تخليني ماافكر بأنانيه وافكر بس بروحي سعادتي مرتبطين بيها هواي اب مثل ابوي مشاغل عنده هواي مسؤوليات بس مايوم انشغل عني
ام مثل امي باصعب حالاتها تفكر بيه
لازم اكون گد وعدي الهم وتبيين ماكو شي يكسرني
مرت ايام جان الصديق الصدوق الي صگر بير اسراري اعتبره نفسي اشكيله كلشي يدور بداخلي يتألم وياي يصبرني ويختمها بموقف يضحكني
ايام مرت وي العلاج الطبيعي بالمركز واخواني الي يتناوبون على حهاز التدليك الي بالبيت جنت اتحمل بس حته امشي على طواي وابدي مشواري واكمل دراسة منهج الصف السادس علمي
الحد اليوم الي مشيت بي خطوات چان احلى يوم مو بس الي الاحبابي كلهم بهذا اليوم صادف عمر لبوه شهرين اول خطوات بالبيت بمساعدة العكازه مشيتهن الها كل مره يجيبونها الي هالمره اريد انه اتعناها لبوه ماخذه عيون ابوي جرتهن طويله يجن على صفار وباقي تفاصيل امي
من اشوفها افرح بس بقت ذكرى الي صارت بذاك اليوم كل مااشوفها يمر طيف حلوو نسمة هوه بارده الروحي التجويني اتخيل بيها ملامحها ولمعة عيونها وخجلها من تشوفني
بعد مابديت امشي وقرر الطبيب استمر على جلسات بس اقل جنت امشي بواسطة عكاز
بس المهم على طولي بعد هذا اليوم عمامي يتواجدون ماكطعوو من ابوي والديوان رغم ابوي وجهه ثكيل عليهم بس مارادوو يبينون كدام العالم اكو زعل انه مازعلت على عمي اكوو جرح سببه الي بس موقفه اشوفه صح مايريد بنته تتأذه بيوم حاجيت ابوي يترك الزعل شلون يريدني انسى وهوه ماناسي جاوبني ابوي بشي ماجنت متوقعه
گال انه مازعلان على بنته من حقه ينطيها انه زعلي على حچايته عنك بوكتها كتله اصبر عليه كم شهر نسويله تحاليل ونودي طبيب اذا صدگ بنتك بيدي ازفها جاوبني مااتاني سمج بالشط
جان مامقدرني ولامقدر روحتي اله وانه متاكد لو حچايتي هاي حاچيها الفلحنه لو الناس غربه مايردوني
اخواني نسوو تعبي الهم وركضي بوكتها حته عمك وعماتك سادندنه رغم هذا همه يعرفون غلطهم وجاي يواصلون ويحاولون وياي بكل طريقه انه ماطاردهم ةلا ابيين كدام الناس مالي شغل بيهم بس يمته مااشوفك انت عكس الكالوو بوكتها نفسي اطيب وارضا عنهم كلهم
ضليت افكر بالدراسه وصدگ يومي كله اقره ايام تمر وانه ادرس امي ماانشغلت عني ابد رغم زادت مسؤوليتها وزاد وكت انشغالها بس اشوف الكلشي مخليه وكت وجان اولى اهتماماتها ابوي يجي تعبان لو يدخل غرفته دقايق يطلع مرتاح الي بينهم شي عجيب
جنت افرح بشوفتهم واكول يمكن المثل امي ماكو بعد انقرضن
صكر رجع الدوامه وانه بديت ادرس سادس
ودخلت دروس تقويه رغم مو بحاجتهن كلش بس جنت احس المسأله الوحده المااعرفها تاثر علي
بيوم الضهر وخابروو فهد جان المتصل ابو دعاء خبره دعاء باجر موعد عمليتها ولازم صكر يحظر حته ياخذه بنفس اليوم هنا امي زاد عليها نفر فوك لبوه الي جان عمرها خمس اشهر

ابوي خابر فهد وگله بس اطلع من الدوام اجي
اجه بيومها بالليل بدل واتعشى وطلع للمستشفى ابوي راح وراه گال مااخلي بهذا اليوم وحده بس جانو يمه جماعه اخروه
الفجر اجونه وجان بايد صگر شاهين
صاير عنده ولد ومسمي شاهين
بوكتها كلنه تفاجأنه شلون امه انطته من اول يوم كلنه متوقعين ماتقبل تنطي  فطرة الأم تمنعها
سالنه صگر والجواب ابد مو ع البال

يتبع ...

بارت غير متوقع لعيون متابعيني الغوالي بس غلسو ع السحك ممراجعه ولاكلمه
ها وتره طويل واكثر من الفين ١٨٠ كلمه