رواية كسرة قلب الفصل السابع والعشرون 27 - بقلم نور الشمس

مرن شكم يوم وصار موعد كرم يروح يشيل الحديد من رجله بين الخوف والقلق البينه النتيجه الهسه مامعروفه الكل متوتر وكرم وجهه يضحك يصبر على فهد
بويه لاتهتم اتعداهن والله شيجي من الله انعم الله مادام انت وياي ماخاف من شي
دنگ عليه فهد باسه بگصته
..ادري بيك ابن ابوك امخلف اسباع انه مابيكم الگلبه ضعيف وانت عاد الجبير عگال الراس انت اشوفك غير عنهم ضل يشجع بي لمن وصلنه السره ودخلنه
الطبيب قرر يشيلهن الشي المامتوقعينه ينشالن بدون بنج ولاحته موضعي خوفي اكثر ويمكن مااگدر اتحمل بس هم مااگدر اطلع واعوفه
الطبيب راد واحد يسند ظهره ويثبت ايده يعني
صگر حظنه من وره والمساعدين وگفوو اتنوعله مغمض ومتشنج گبل لايبدون
اطرافي ترجف گوه مثبتهن وواگف على طولي نقطة ضعفي كرم من جان زغير ويتمرض للصبح ماانام عيني منه هسه شلون حالي
متوتر كلش
والطبيب يحجي وياه ويشجعه اخر شي گله اسحب نفس واتوكل على الله راح نبدي وبين وحده وحده ننطيك فتره ترتاح بيها
اشرلي گلي خلي شي وصله بحلگه لأن راح يصيح الألم يجبره
بده يفك بالبراغي وبدت ملامح وجهه تتغير واگف يمه انه وصگر حاظنه بده يحرك بالشيش يريد يسحبه
تشنج وجسمه بده يتحرك بس رجلينه مثبتينهن همه
جر الوصله هوه ثبتها بين اسنانه ولزم صگر بقوه لازم ذراعه انه ومثبت ايده هم بس وي كل حركه منه احس روحه تريد تطلع وجهه صار احمر دم انطعن طعن احتاريت شسوي ماكو شي بيدي اسويله اتمنيت اضعاف الوجع بيه ولا اشوفه هيج متأذي
عيني على وجهه الي انطعن طعن صار احمر دم وشرايين وجهه طلعت شكله تغيير وعينه مغورگه بس ماراد تنزل رغم شفت مثل حالته اكبر منه وصاحووو وبچوو
اخر شي الحمار بده يتحول صفار من شال اخر وحده شفته فقد الوعي المساعد انطاني مي غسلت وجهه انتبه باوعلي مبتسم
..خلصوو
..حظنته بعد ابوك خلص كلشي خلص ارتاح جابله صگر عصير وشربه
حاچيت صگر

..ضل يمه طالع دقايق واجي بين مايرتاح ونشوف الطبيب شيگول ونرد لهلنه
تليفوني رن عرفتها شهامه
حاچتني تسأل گتلها انشالن وكلش زين ونشوف الطبيب شيگول ونرجع
الحمدلله ماشافت حاله
اباوع الصگر يضحك وياه من بعيد وهوه لازم ادين كرم يفرك بيهن
ابتسمتلهم شگاعد اتخططون انتم
ضحك صگر

..ابو كرم لاتستلمنه گاعد اگل الكرم شوف ذيج الدكتوره شگد حلوه ونفس الاختصاص لو هيه شايلتهن ماتحس بشي وانت عينك على عيونها بس ابوك حجزلنه يم الدكتور ليش ماادري المفروض تشجيع النساء بلدنا وعدهن كفائه شكوو بيها لو هيه شالتهن الكرم

..هههه انت وسوالفك هاي خليك بعيد عن كرم ماتجوز من سوالفك

..ضحكت على اساس شحصلت هسه انه تنهدت ومن شافني راد يغيير الموضوع يمكن انتبه لحچايته يلله تعالوو نروح للطبيب طلعوو المراجعين الگبلنه

..مشيت كرم بالكرسي ودنگت عليه ..ابعد عنك موو خاف اخربك ولك ماكو افقر مني هيه مره طحت بحلك فهد لمن كربسها براسي لامسوي اعيادميلاد ولامفاجئات فقير انت على ابوك

..ههههههه صگر الله عليك لاتفضحني بعدين ذكرتني باچر عيد ميلادها الله عليك حضرت كلشي موو

..كلشي حاضر لايضل بالك كلهن بغرفتك من ترجع نرتب كلشي بس ارتاح انت
دخلنه للطبيب انطاه ادويه وابر وگله ٤٥يوم ابد لاتحاول ادوس عليهن وحته لو وجعنك حكنك اتحمل ولاتجيسهن وهاي الأبر ضروريه حته لايلتهب الجرح
والأهم من كل هذا انت تمشي وترجع مثل اول واحسن بس يرادلك احتمال جلسات علاج طبيعي وره ماتتشافه
فرحنه كلنه والطريق كله امي اتصلت علينه كلنه لمن حاجت كرم وسمعت صوته يلله ارتاحت من رجعنه تلگتنه امي بالجكليت والهلالهل ومخبره العشيره كلها خواتي يمها ونسوان اخوي الكل فرحان
فهد اول ماوصل وصه على ذبايح ذبحهن فده
بيومها مريم موجوده وي اهلها وانه مثل ماطلب صگر حضرت كيكة ميلاد عليها اسمها وشموعها هم وورده حمره وگلاده بحرفها
حضرتهن والعصر من دخل يرتاح رحت رتبت الميز يمه وبهذا الوكت امي كشفتنه فرحت وشجعت كرم بعدها بدت توصي وتهدد بفهد خاف يدري بعمايلكم يايمه توج فرحانه الأبنج وتشجعين ادري تالي تهديدج ينگلب عليه ويطلع ابنكم فقير مساع فهد يكلي ابعد سوالفك عنه وهوه بي كل البله والله سالفة الورد هاي بليلة عرسي مافكرت بيها
ضحكت وگالت چا اتعلم منهم
لا بعد مااريد اتعلم فات وكتهن هالسوالف
..بعد وكتهن مافايت يجيك يوم تسوي كلشي بس من تحب من صدگ
..امي طلعت وانه گلت الكرم انت استعد وانه راح اطلع واشوفلي طريقه اوصلها الك راح اشغل الشموع واطفي الضوه مثل ماتريد حضرتك ماتگلي انت شتباوع وتتعلم
..ههههه مامباوع شي هاي افكاري من كد ماافكر بالحبيبه ودي اسوي كلشي يسعدها

..يابه الله يسعدكم شريد انه اكثر من سعادتكم طلعت من الغرفه بعد ماسندت كرم ع المخاد وبقه متمدد مثل ماراد الطبيب منه لازم دوم يمدد رجلينه وجهه تعبان وشاحب بس مصر يسوي عيد الميلاد
طلعت وعيني على مريم بصف امها صحت زهراء بت فيصل
عمي زهوره گلي المريم تجي تكوي دشداشتي بغرفة كرم تلكاها
راحتلها وعيني منها مرتبكه گامت يمكن تعودت على سوالفي مدري مامتوقعه الي تشوفه خليتها دخلت غرفة كرم وانه رحت يمهم للصاله

كرم..بعد ماطلعت امي وشفتها فرحانتلي بس اخر شي هددت بابوي يمكن تريدني مااخذ راحتي زياده ضحكت على سوالف صگر وطلعت
ضليت افكر هم يجي يوم وتصير حلالي هم يجي يوم واغازلها بعلو صوتي واكلها احبج واخلي الماسمع يسمع شوكت تتحقق احلامي
گطعت صفنتي صوت يدة الباب انفتحت وانه وعيني ع الباب احس گلبي تلكاها خانتني رجليني بس گلبي ماخان ابتسمت بدون مااشعر

..هلا بالي ترد الروح بيه هلا بمريمتي
شفتهه دنگت خجلانه
..شلونك كرم الحمدلله على سلامتك

..الله يسلمچ الغاليه كرم هسه بخير بعد ماشافج شاف العافيه
اباوعلها خدودها حومرن وماجاوبت شي كوه طلعت منها دومك بعافيه

..سدي الباب وتعاي مابيه اگوم حبيبه لايجي احد يشوفنه
سدت الباب وتقدمت
..كل عام وانتي بخير وصحه وسلامه جريت نفس كل عام وانتي حبيبتي وروحي وعمري كل عام وانتي الهوه والضوه
اتمني امنيه حته اطفين الشموع
شفتها غمضت وگالت اتمنيت انت اتمنى
..امنيتي اشوفج بالبدله البيضه هاي امنيتي اكثر من كلشي اتمناه حته اكثر من رجليني
دنگت خجلانه شفتها حيل ارتبكت گتلها روحي وكيكتچ تجي وراج للبيت اشوف طريقه اوصلها الچ
طلعت وخذت عقلي وياها فرحان والدنيا ماسايعتني
اجه صگر اتشكرته وطلبت منه يوديها جنه هوه الماخذها الها لأن تهتم بغراضه مرات ودايما ينخاها
ماگال شي ضحك وراح وهوه يهز بأيده

شيخه ..
شگد مافرحانه اشوف فرحتي بعيون امي وخوفها عليه كل شويه توصيني بهداوه يمه شغلج على كيف ماطاير الشغل والبنيات يمج يعيننج يمه غير من فرحتي وهم يلله الحگ ع الشغل لاتهتمين ماعليه شي ان شاءالله وكملت شغلي ماحاسه
برغم تعبي والفره والخطار وانه حامل بس فرحتي بكرم ماتنوصف مغطيه على كل تعب صعدت الغرفتي بالليل بعد ماراحوو خطارنه چان فهد صاعد گبلي تعبان ويريد ينام من الفجر همه طالعين وگبلها بليله مانايم يفكر بوضع كرم
صعدت ومااريد اطلع صوت اخذت ملابسي وسبحت ورجعت تمددت على جهتي بالچربايه اريد اخلي ظهري احسه يريد يطگ على كيف گلت اخخ يمه
حسيته دار علي
..سلامتچ من الاخخ الله يساعدچ تعبتي ربي يجازي تعبچ وتشوفين كرم على طوله يمشي

..امين يارب انت گاعد وانه كل بالي نمت وعلى كيف اتحرك

..لا چنت نايم من فتحتي الباب حسيت.. باچر موعد دكتوترتچ روحي وشوفي روحچ چنچ متغيره وجهج ذبلان خاف عندچ فقر دم حته تعالجي

..ان شاءالله

رحت ثاني يوم وشگد حاولت الطبيبه تعرف جنس الطفل ماگدرت گالت ساد رجلينه صحكت هاي جي اخذت رخصه من فهد مابيين كبل كلهم يبينون گالت بلكي بالثامن لو بشهرچ يبيين
جهزت شي يرهم ع الولد والبنيه وشي بسيط لأن تعبانه ومابيه افتر وصگر هوه الاخذني ومتانيني بسيارته
من صعدت وحاجيته يمه هاي الوصاك فهد تعوفها خو مابعدكم تحچون

..اي يمه نتخابر

..ليش يايمه مو گالك عوفها

..يمه اكو سوالف مابيه اسولفهن ماعندي شي انه بس شي تعودت عليه بس والله ماكو مشاعر مني الها وماضاحك عليها گتلها لو روحي تصير بيج مستحيل اتزوجج انتي وهيه باقيه

..خاف انوب تحبها وتضيع روحك وتتعذب

..مصدگه انه احب شبيه يمه لاحب ولازواج بعد خليني هيج اكمل كليتي وافتحلي مشروع خاص بيه بعدها اطلع اسافر اتونس محد اله يمي لااريد مره ولاشلعة گلب

..الله كريم يمه بس انه ماحچيت من كيفي فهد وصاني احاچيك تبعد عنها لا يأذيها گال اوصل لهلها اذا بقه وياها

..تنهدت يمه فهد شيريد مني لايوصل ولاشي البنيه مامأذيتني انه احاچي وافهمه مافاهم شي هوه

من رجعنه حاچيت فهد وكتله اعترفت اهلها هيج رايدين منها وهيه رافضه كلشي وتتعذب گال ونتيجة هاي شني وره هالسوالف وحجيكم شني بنيتك تتزوجها يعني
..لا والله ابد مابنيتي اتزوج اصلا واكيد لو ردت مااتزوج نبأ بس انه اريد اساعدها

..شلون تساعدها انت شعليك بيها ليش تورط روحك وتورطنه

..مامورط احد البنيه اهلها يجبروها ع الموزين وابالي اسفرها للخارج واساعدها ولو بشي قليل حته تخلص من اهلها وسمعتهم وتبني حياتها بعيد عنهم

..انت هواي تحلم الافلام مأثره عليك ولك ياسفر يادنيا انت شلك غرض بيها

..فهد خليني براحتي مامأثر عليكم بعد شعليك انت عود من اجيبلك ورطه اتبره مني
عفته وگمت اني مو ذاك صگر ادري اتغيرت ولازم يتعودون علي مادام انه مامأذي احد منهم ولامسويلهم سالفه عوجه ماالهم حق يفرضون علي
وصدگ بديت اقنع نبأ تبني حياتها بعيد عن اهلها حته تخلص من ابتزازهم وسمعتهم
جانت ترفض لو نسافر سوه لو مانسافر
كتلها انه مو الج حته لو بقيتي مستحيل احبچ مااگدر مو بديه واذا حبيتج مايتغير شي بس عذابي يزيد الي سويته اعتبري رد جميل الچ والمحبتچ وماراح اتركچ ابقه اساعدچ واتواصل وياچ
گالت سنتين اكمل دراستي واطلع وانطيتها العذر بس بهالسنتين منو يگول يتركونها ومنو يكول تبقى مقاومه وياهم
ضليت على اتصال بيها
وبعده الدوام مابادي عطله طويله ماطلعت بيها ولاتونست كرم الطبيب قرر لازم يبدي جلسات علاج طبيعي مرتين بالاسبوع وجهاز تدليك نشتري اله بالبيت على طول ندلكله
امي شيخه دخلت بشهرها وتتعب انه والولد نساعدها مرات ننتبه حته على فهد مايكلفها شي هوه يسوي الي يريده بنفسه حته مايكلفنه وننصب عليها نشوفها تخجل تصير حمره وبس تضحك تنطينه واهس للنصب بس من يطلع فهد نستغلها من يجي فنه اليوصلها وينصب عليها يصير القصف علينه تفليش من فهد
بيوم جنه كلنه متجمعين ع الغده وكرم قريب علينه گاعد على كرسي وصينيته على رجلينه
فهد ..گال اليوم كاظم ابن عمي خطب مريم لجواد ابنه ومحمد وافق
كلنه صارت عيونه على كرم طاحت خاشوگته من ايده كسرت طرف الماعون
فهد گال الله الله. بدلوله ماعونه خاف بي كزاز
شيخه ..فهد وانطاها محمد الهم
..اي انطاها جواد مهندس وموظف بشركه بالبصره ويريد يتزوج وياخذها وياه ابن خالها ومن عمامها مو غريب ليش ماينطيها
صكر.
عيني على كرم بعده صافن مبهوت گتله فهد كرم رايدها وهيه رايدته شلون انطاها يعني

..باوع الكرم والشيخه من شوكت هاي

شيخه..من زمان بس راد يطلع السادس يلله

دفع اكله وگام وانه ليش ماادري ليش تاصرفون بكيفكم بنيه شابه اتاني لمن حظرته يكمل
من كلتوو هيه تريده معناها حاجي وياها وبينهم لقاء شيخه مع الاسف عليچ مو هذا ضني بيچ
صكر..شيخ عوف العتب وروح گللهم مريم الكرم

..رايح انه وبعدين نحچي اشوف شلون حلها
طلع فهد وكرم گاعد على نار
كلساع وكلي هسه حسيت بعازتهن رجليني ولك بيه نار اريد اطلع اريد افتر
كتله هسه تنحل من صالحك صارت
رجع فهد وجهه مايتفسر
طوول وهوه يباوع الكرم ومابينه واحد اتجرأ وسأله
گال

..كرم لو گتلك الخاطر ابوك تعوفها وتنساها تنساها لو لا

توجهت انظارنه بين كرم وفهد

..بويه غير اعرف ليش مااكدر انساها مو بيدي

..واذا گتلك كرامتك وكرامة ابوك مربوطه بيها

..شلون يعني

..يعني عمك رفض ينطيها الك وماقدر روحتي اترجيته يأخر الموضوع لمن اتأكد من السالفه المانعته ما وافق واول مره اخوي يرفض طلب الي ومو طلب عادي يدري بيك انت شني بالنسبه الي

شيخه..وليش يرفض غير نعرف ليش همه نفس العمر خل اتاني سنه سنتين شكو بيها

..ماادري شلون حجيت جنت صاير اعصاب كتلها رفض بسبب الحادث يگول احتمال عنده عجز احتمال مايخلف ليش تفوتها قسمه زينه واحنه مو متاكدين

شيخه..وهوه صدگ اكو هيج احتمال

..نسبه قليله

كرم ..ليش ضامين علي

..مو اكيد بويه لايضل ابالك والله الطبيب طمني على حالتك وگال اتخطى كلشي خطر

كرم ..شگد النسبه الي تمنعني من الزواج والخلفه

..مو هواي وماكو شي مااله علاج

..انطيني النسبه حته اعرف ليش ضامين علي

..٤٥بالميه

صگر ..الكل انصدم وكرم صدمته اقوه خبرين بوكت واحد ماادري فهد شلون حجه بدون تفكير شفت امي بجت وكرم گال لو عشره بالميه مااورطها وياي حجي عمي صح خل تتوكل الله يوفقها
كمت من كرسيي نسيت وضعي وگفت حسيت سهم ضرب رجلي صحت
اخخخ احس الوجع بكلبي اكثر من جسمي
طحت شفت ابوي ركضلي سندني وگعدني ع الكرسي ماحجه شي عيونه متروسات دمع
صحت صگر تعال وصلني الغرفتي نسيت مااگدر اگوم
وصلني صگر وبقى يمي حاول هواي يحچي وياي بس بالي مو صافي ولااكدر اركز اضوج عليها لو على روحي

سويت روحي نمت عافني صگر وطلع
اول مره تنزل دموعي فرغت كل وجع بيه بس ماعزلت روحي خوفي على امي اكثر
خاف تتاذه وهيه تعبانه ايام مرت مافتحت الموضوع وياهم ولاهمه
بيوم اجه صگر كال كرم ابوك رجع گلبه يوجعه اطلعله قنعه يروح الطبيب ماجاي يسمع من احد
..ليش شصاير
..جريت نفس كرم انت قوي وهسه ثبتلي انت اقوى حته من فهد ابوك سمع بعقد الجماعه باجر واليوم اجوو عزموو

..يعني صدگ راحت مني ومن باجر تصير حلال غيري شلون بيه صگر گلي شيخلصها وياي ماادري شلون متحمل واحجي وانام واگعد

..انه شحچيت جاي اكلك ابوك اتخربط من سمع خايف عليك روح حاجي خل يراجع للطبيب

..اروح بس اريد اشوفها اخر مره

..انسى كرم انه محمد ماوصلت بيته ولااوصل وابوك حته المشيه مايحظرها باجر
انساها ادري صعب بس تتعود ابوك وعافيته اهم

اخذني صكر للديوان شفت ابوي گاعد من شافني گال هلا هلا بيك بويه تعال شلونك

..انه زين الحمدلله ابو كرم شخيرك ليش ماتراجع الطبيب تريد تشلع گلوبنه امي بالها يمك وهيه تعبانه احير بيكم انه بروحي

..تنهدت لايضل بالك من باجر اروح مابيه شي والله اهم شي انت شلونك

..زين ماعليه شي اول جلسه بعد يومين اريدك وياي

..بدون ماتكول اكو يوم عفتك وحدك حته بهاي اعوفك

بيوم العقد جان عندي امل ترفض يصير شي يخربها وساعات اكول خل تتوكل قسمتها زينه وهيه مو قسمتي
بس جان موت ع البطيء
بيومها الضهر چنت احاول اقنع امي تروح وهيه رافضه ردتها بس تشوفها وتهنيها نيابه عني
جنت اقنع بيها مااقتنعت ضلينه گاعدين هيه صافنه عليه وانه عيني عليها اليوم حيل ذبلانه اكيد تفكر بيه
ساعه مو اكثر وامي گالت جيبولي امي من بيت محمد يمكن اليوم عندي ولاده
راح كرار صاحها واجت قنعناها تروح للطبيب ماقبلت مو هسه بعد وكت اباوع بالوجوه اكو شي ضامينه عني
الكل متوتر وخايف ابوي ماموجود جان مسافر الي عرفته متحجج بمشيه خارج المحافظه حته مايروح للعقد ويحظره ومايريد عمامه يزعلون منه
گلت الصگر خابر عماتي يجن وياها
گال ملتهيات ابيت محمد
.ادري هوه عقد ساعتين ويخلص صيحوهن خل وحده تجي يمها
..امي يمها لاتخاف مايجن هسه وخاف ابالهم على غير شي وتصير طلايب
شويه وسمعت الرمي شفت صگر ارتبك
حسيت بشي مو طبيعي واحد وگلي اليوم زفتها مقشمريني بالعقد وبس اكول الدنيا مخبوصه بيومها حته السمه مغيمه مثل گلبي
گتله صگر احلفك بروح امك اليوم العرس موو

..اي كرم اليوم العرس ارتاحيت شكوو تحافني انت حير بامك الماترضا تعوفك بالها يمك اذا ضلت تموت

..طلعني بره اشوفها
اريد الزفه تمر من يمي
راح يطلعونها مشي للباب يلله السياره تاخذها يعني اگدر اشوفها

..انت تخبلت كرم ليش تعذب روحك
ولك قنع امك تروح طالع مايجي گبل ساعتين

..بس طلعني واقنعها بس خليني اشوفها وصل صوت السيارات والرمي اطلعني لو اطلع زحف والله

..اطلعك بس والله تتعذب

..بيوتنه صايره سوه بمساحه جبيره من گاعنه بيتنه وبيت عمي محمد واثنين العمي فيصل كلهن سوه وبينهن مساحات بس سياجنه واحد وبابنه واحد بعد مسافه اكثر من ستمية متر عن بيوتنه السياج والباب
يعني من تطلع لازم تمر منه
طلعت بالباب الوجع الي بگلبي ماينوصف وكل مااتذكر ينعاد نفس الوجع
وصلو وضلوو فتره يلله طلعوو متگاودين وهيه مامبين منها بس البياض
اتذكرت اتمنيت اشوفها بالأبيض بس عبالي تلبسه الي
بعد ماواصلين يم بابنه لمحتها من بعييد وكلت الصگر طببني جوه
وصلت البيت خاوي ماكو اي شي يوصف حالتي اخواني وامي وحبوبتي كلهم بعيونهم نظرة حزن الكل يدري بيه والكل يدري اليوم العرس عبالهم ماراح ادري بس احساسي جان اقوى
شفت امي تلوب وعينها مني
وصلني الها كرم حاجيتها ودموعي تنزل يمه ماعليه شي روحي والله مايصير بيه شي هيه راحت ومارايد من الله بس انتي ترجعيلي سالمه ان شاءالله
والله مااسوي شي ولاعليه شي الله يهنيها ويسعدها

يتبع..

مساء الخير حبايبي البارت اكثر من الفين و٦٠٠كلمه تقريبا
بدون مراجعه سمعوو القصيده توصف حال كرم