رواية كسرة قلب الفصل الثاني عشر 12 - بقلم نور الشمس

صگر وكرم اجوو ع السريع وولدي كلهم ..الزغار من شافو ابوهم گامو يبجون
وانه الهسه مامستوعبه الصار
خابرو اخوانهم دقايق الكل فوگ راسي اخذوو الشيخ وطلعوو وهالمره الكل انخبصوو
انه اتنوع بالوجوه اريد استوعب الصار انه وين وصلته ووصلت روحي
امي تصيح يمه فهد عمت عيني يومي گبل يومك من عمري على عمرك بعد خالتك وليدي انت
ابن اختي وابني يمه شجاك شبيك
تبجي وعيني عليها مااعرف شكول وشحچي
شفتها تقربت عليه غمتني وايدها طكت كصتي

..همداج وصلتي الهذا الحال انتي وذيج المكموعه الله لايرضا عليجن ولچ كلها بصفحه وانتي بصفحه خلافه ياهو المييت عليج عزج ودلالج لو ماهوه انتي والماكو سوه لا ابو ولا اخوو ياهو الالج يالغبره

..نزلت دموعي مثل الفاقده وواحد وعاني اي حجي امي رجعني الروحي انه بدونه شنهي وياهو المييت عليه غير معززه بجاها الكل يسمع حجايتي ويتمنى رضاي جاهي من جاها بعده وين اروح ووين اولي
من فكرت هيج فكرت بصوت عالي يمه اسم الله وين يروح ياجاه يادلال هوه اريده هوه وكلشي مااريد اريده سالم وين جنت انه
معقوله گلبي هذا الحبه مارف ولا ذكر حبه الا هيه من خفت افكده يمه كلشي ولا فهد من عرس ماخفت مثل خوفي هسه خواته طبن ودموعهن تصب رباب من الباب تصيح
..يمه اخونه الحنين يسواله مية والي خيمتنه هوه هيبتنه وهيبة اولادنه ولج شيخه شبي

..دموعي تصب ومبهوته واستحيت من روحي ومنهن احساس يكلي انه السبب ضغطت عليه هواي كتلها ماادري خيه ماادري

سعاد گالت اي ماتدرين شمدريج ماصار اخذ عليج مره انكلبتي عليه كلاب غير بت عمنه ونحبج وماننطي بيج والله انتي متعجبه ماصايره هاي مرت فيصل ماخذ عليها وتتفداه تفدي وتحب حته اولاده المن شريجتها

بجيت وكلت بگلبي بدت الملامه بدايتها من احبابي امي واخياتي الجانن ضليجات ازيد مني من اخذ عليه شحال الي مايردوني
شيسوون خل يسوون محد يهمني مثل الجنت بغيبوبه وصحيت مشتاقتله اريده اريد حظنه اريد سوالفه وحنيته عليه
حته عصبيته مقبوله كلشي منه اريد بس لايفاركني
كله مني كابرت هواي بالعرس وضغطت على روحي حته اطلع مامكسزره كدام الناس وكسرت كلبي وخليته يشيل هواي
انه مره مااختلف ع النسوان ليش مابعرسه بجيت ولطمت وشكيت جا ارتاحيت بوكتي وراحت الحسره من گلبي ليش كتمت الحركه بداخلي وعكستها عليه وصار كلبي مييت من ناحيته لمن انصدمت صدمه ازيد يلله
اخخخ مايفيد الندم ربي رايدته منك
نخابر عليهم ومحد يرد لاكرم لاصكر ولا فيصل ولامحمد كلهم رايحين
اجه ابن سعاد گال ابوي وعمامي لحكوهم وعمي احمد هسه راح بعده يحجي وطبت وفاء دموعها عشره عشره
گلبي انخمط يمه
تلكيتها احچي سامعه شي گولي
لطمت وجهه گالت عنده ذبحه ودخلوه انعاش صلاح يگول ادعوله واحمد حته مابدل طلع بهدومه العلي خاف صاير شي ومايحجون
كتلها لا الله لايكولها كلشي مابي ان شاءالله
ضلينه ندعي ربي فدوه بجاهك الخاطر اولاده
گبالي سبع وضرغام يبجون
حته من تصوب ماصار بينه الصار
دخيلك ربي
شويه واتصل احمد على وفاء
عيوني على حلگها شتحجي وشتگول اناشغ وتحاجي
فدوه احمد تحچي صدك لو تجذب عدل يعني
ماتجذب علي
گالت بالانعاش بس الطبيب كايلهم يتحسن بس يرادله عمليه تبديل صمام
لطمت وجهي
..يمه عمليه يفتحون صدره يعني
مر علينه هذا الليل شطوله الصبح كالو منتظرين حالته تستقر يلله يسوونها
ضليت الوم بروحي انه ليش هيج الغيره تذبح وعمت عيوني وخذت عكلي كمت مااعرف اتصرف كل مااشوفه كل همي اغثه واريح كلبي لو باجيه ومطلعه حركتي بوكت العرس ومخليه حبايبي يواسني احسن جا گلبي نظف

وره اسبوع طلع لأن محمد ماقابل يسويها هنا گايل نسفره والطبيب ناصحه يسافر احسن
حسيت الموضوع اكبر
طلع من المستشفى وعيني عليه وهاي الايام انه فاقده مااريد بس شوفته
شفته يمشي على كيف عيونه الحاده ذبلانه ودايرهن اسود
لحيته الحلوه الدوم يخففها ويحددها طولانه
مبيين عليه التعب ريت تعبك بيه
شافني من بعيد ومااهتم ولا باوعلي بهاي اللحظه حسيت بروحي خسرته اكثر من يوم عرسه
اخ ياكلبي شتتحمل
منين اجانه عادل ودجله
چنه من نتلاكه عيونه تحجي گبل لاينطق السانّه
الكل التموو عليه ولده بوسهم واحد واحد خواته وبناتهن وولدهن امي حبها براسها
الكل تقدمتله گعد متعمد وگال هلا
بعد مامكمله الحمدلله ع السلامه كال الله يسلمج
سجين وطعنتني بگلبي
الكل عيونهم عليه حسيت الكل يكول اطلعي مارايدج لااتعبينه
طلعت ودموعي تصب
نسوان حماي ماحجن بس كالن الحمدلله على سلامة راعي بيتج
وحمواتي ماحجن بس وفاء ماتعوف هيج فرصه
گالت لازم
..انتي السبب الشيخ عمره ماعايفج بدون سلام الا اكو شي متعاركين
..مالي عين اجاوب بس كتلها لا مامتعاركه شلون اعاركه
كالت جا انتي جابرته يطلك ذيج وگلبه واجعه عليها يمكن ماهان عليه يعوفها

..الدمعه بطرف عيني گتلها لا شعليه انه حالي حالج ماادري السبب

..خوش جا انقنعه يردها ليش يكسر بختها
محد حاجتها ولا انه حچيت
وامي الكل مااصدلها نظراتها تكلي انتي ثوله والصارلج منج
بس انه هم معذوره محروك گلبي ولو مااحبه مااحترك هيج وادري بي يحبني ردت اتعزز عليه ماعبالي هيج يتاذه
الداير مادايري واليحبني كبل اليكرهني يلومني
محد حاس احساسي من واحد تحسه كل حياتك وحبك الاول والاخير تجي وحده تشاركني بي
بعد ماجنت مضرب مثل للكل صرت زوجه  اولى حكي من اتيه رايي بس ندمانه وهاي النتيجه
انه مالي غيره وحته لو الي ابو واخو هم مااكدر اعوفه احبه ياناس والله احبه بس جرحي جبير وغروري بحبه عماني
رغدني اعينه بس انه ضغطت عليه اكثر
بس لو اعرف سره عادل شمسويله وهيه ليش اطلكت وليش ماظل على وعده وياهم

بيومها التهينه بالطبخ والجاي والكهوه والماي الدنيا انگلبت شيوخ وموظفين زغار وكبار كلها تتحمد ع السلامه
صار المغرب كالهم تعبت بعد مااكدر استقبل
جابوه الغرفته بصوت عالي تعمد حاجه صلاح رجل سعاد
گله ابو مهدي اريد اليوم سعاد يمي احتاجها
وباجر وفاء وبعدها رباب استرخص منكم كلكم زلمهن ولد عمي واخوتي لو غرب مااطلب اريد يوميه وحده
دموعي نزلت بدون مااسيطر عليهن حسيت الكل يتنوعولي بنظره خاطفه انتبهلي كمل حچيه
گالهم تعرفون ناس رايحه راده ويرادلهم خدمه وام كرم تتعب بالنهار ماتگدر على سهر الليل ومتابع العلاج وانه علاجي ينوم خاف اتركهن والولد يدرسون ااريد اشغلهم صكر امتحانات عنده
لزم گلبه وفركه حسيته تعب من الحجي

كلهم كالوله شگد ماتريد اذا تريد احنه نبقه يمك تشكر منهم وراحوو بقت سعاد من طلعوو گالت ولج ليش
..ليش شايل بكلبه عليج شمسويه عمره كله مامسويها
..دموعي نزلت كتلها ماادري يعاقبني يمكن
..اي عليش يعاقبج

..اختنگت والعبره تكسرت بصدري گتلها سألي

..كالت اصبري هسه تعبان وراه عمليه وسفر كلشي ينسي بمرور الايام يحبج مايكدر بدونج لاتخافين
حجيها ريحني وماادري بالجاي شني

مرن يومين واجت وفاء ورباب وكلهن سألني حته وفاء الي ادور عليه الزله كسرت خاطرها وصبرتني
ابد ماشفته بس من يطلع يغسل يلمحني ويوخر عينه وسبع  على طول يمه

بهاي الفتره محمد وده اوراقه الدكاتره بره وقررو يسفرونه اللبنان يسووله العمليه
كملو اجرائاتهم وتحضيراتهم  وثار يوم الموادع
روحي غابت وعيني عليه شلون يحظن جهاله ويودعهم
باس راس امي وحظن ولده واحد واحد خواته كلهن وانه مطرفه على جهه مااريد اتفشل حته ذيج شخصيتي احسها ضاعت اذا بعيونه مايشوفني انه شني بعيون غيره محمد يروح وياه
وصه فيصل على كرم والولد وكله العشيره والناس شيحتاجون انت مكاني تعرف كلشي مايحتاج اوصيك
هوه قريب ع الباب وانه بزويه صايره ماردت اسلم خاف يفشلني لو خاف اضوجه وهوه تعبان ووراه سفر
تقدملي بس ملامحه جامده ماكو نظرة رضا اطمنّي
جر راسي علي وباس راسي شهگت وبچيت العبره طلعت بجيت هواي حسيت گلبي يريد يطگ ماكدرت احجي بس گتله ترجعلنه سالم مسح راسي بيده
ووصه كرم

..دير بالك على امك.واخوانك ..صكر امك امانه يمكم
دار على سعاد ورباب ووفاء
..هالله هالله بيها عينجن على امي وام كرم
جاوبنه ترجعلهم سالم ومحد غيرك يباريهن
خطه بره الباب امي بيدها طاسة ماي ذتها وراهم
گعدت على حيلي ابچي
وهنه يصبرن بيه
ماارتاحيت الا لمن وصلوو
مايرد على اي اتصال الي
يتواصل وي الولد
عرفت منهم ثاني يوم عمليته الصبح
مر عليه الليل شطوله
خلصتها صلاة ودعاء اتوجه الربي بس كون يرجع سالم
الفجر اجتني رساله مااهتميت من الشركه يجوز دوم تجيني رسايل من الشركه
ضليت ادعي الساعه سبعه كمت اشوف تليفوني اخابر محمد اعرف دخلوه لو لا

فتحت الرساله جانت من رقم مامسجل قريت الرساله

..كاتب اذا باقي بگلبج ذرة محبه الي بريني الذمه وديري بالچ ع الولد ربيهم مثل ماجنت اريدهم
سبع عينج عليه عزيزي هذا
وكرم مثل ماتشوفيني شوفيه ارفعي كدره بين اخوته وعمامه خلي هوه زلمتج وجبير اخوانه كلشي بيده بس بالمعقول لايظلمهم ولايتركهم
اقره وابجي شهگت بصوت عالي وبجيت
وانتي مبرية الذمه محلله وموهوبه
على صوتي اجت امي وحجيتلها گابلتني وبجت
وره ماسكتت كوه خابرت محمد كال حضروو وراح يدخل من يطلع انه ابلغكم مرت علي الساعات جنهن سنين
للساعه تسعه خابر
ايدي ترجف والكل يمي حته خواته اجنه من الصبح
جاوبت وصوتي مخنوك

..ام كرم ابشرج الف الحمدلله العمليه نجحت وهسه بالعنايه بس يصحا هم اخابركم

..الله يبشرك بالخير الف الحمدلله

..امي هلهلت وفيصل كال وديت على ذبايح فده الوجه الله الفرحه نستني همي
مااريد شي بعد سالم اشوفه وكلشي مااريد
اجه صكر متلعف سوده عليه جان يمتحن

..يمه صدك زين بشروني الجهال بره

..اي يمه الحمدلله

كرايبنه اجو يتباركون
وصرنه نحضر الجيته
البيت والديوان تجهيزات الطبخ
مر اسبوع وهوه بده يتحسن حاجه امي وخواته وولده كلهم طلبهم بالاسم بس انه ماطلبني تجرأت وخابرته حته لو هوه مايريد انه اريد

خابرته وگلبي يدك بين المقهوره والمستحيه وبين شعور الحب وشعور المذنب والهسه ماادري انه ظلمته لو مظلومه
لو احنه الاثنين انظلمنه
خابرته من تليفون كرم خفت مايرد على رقمي

..الووو

..بچيت وكوه حجيت فهد الحمدلله على سلامتك يابعد اهلي اروحلك فدوه انه وولدي وعشيرتي

..الله يسلمج لاتبچين شيخه انه زين الحمدلله احسن بهزاي انتي شلونج الولد خو ماتعبوج

..بس فراگك متعبني اريد رجعتك سالم وكلشي مااريد

..الله يسلمچ الله يخليج

..سلمت عليه وسديته اجاباته مختصره ماكدرت اطول بالحچي

وضل يوميه يتصل بولده كلهم وامي وانه لا
ماهمني خلي على راحته بعده مجروح مني هواي جرحته من يرجع افهمه وادري بي مايگدر يعوفني هذا هيج من حرگة گلبه
مرن عشرين يوم على السفر
تحسن وصار يطلع ويودي صور الولده اشوفه وعيوني ماتشبع منه يوم عن يوم اشتاقله اكثر المشكله مايخابرني ابد
واهل دجله اجو مرتين وراه وفيصل مفهمهم فهد.مسافر يسوي عمليه
خفت ترجع علي من جديد وخاف افقد من اشوفها غيرتي تعميني مااعرف اتصرف من الغيره
اجه فيصل گال فهد بعد اسبوع يرجع 
بدينه نحضر تعب نفسي وجسدي احس كلشي بيه يوجعني رغم فرحانه برجعته بس تعبانه واضوج من اذكر الصار بينه
بيوم باقيله يومين
گعدت الصبح من نومي شربت ماي احس الماي يطيح من حلكي
يا شبيه لزمت الكلاص عدل بس ماادري ليش يطيح
طلعت صبحت عليهم
شفت امي وصكر يباوعون الي
صگر گال يمه شبي حلگج
..شبي مابي شي
..شوو شوفي
امي تباوعلي گالت يمه شتحسين
..يمه ماكو شي شبيكم
رحت اسوي الريوك وهمه عينهم عليه اباوع بالمرايه مابيه شي
شويه واجت حوراء بت حماي هيه ومريم يساعدني
اثنينهن نفس الحچايه
..ياعمه شبي حلگج
شكيت بروحي رحت ع المرايه مايبين شي
امي عيونها دمعت يمه شو تعاي يمي شبيج لاتخافين
..لايمه ماخايفه بس شتشوفون شبي حلكي

..ماكو شي تعاي بس شو غمضي عينج

..غمضت

..لاتخافين ماكو شي

ضليت كلساع اباوع الروحي شفت حلكي صدك معووج
وره الضهر صار العوج واضح انگلب وجهي گلاب
صارت عيني ماتغمض عرفت صار عندي شرجي
شلل العصب السابع
مافكرت بشي بس لو شافني فهد شيگول
من اجن نسوان حماي وحمواتي شافني كلساع وحده سايله ليش هيج شجاج رادن فيصل ياخذني طبيب مارضيت مااريد
ضاجن حيل
كتلهم بس يجي عود اروح
بس صؤت اتلثم لان حيل وجهي اندار جهالي ضاجوو وكرم الدمعه بطارف عينه
بده الخدر يوصل حته الايدي ووجهي انشل ابد لاحاجب يرفع ولاعين ترمش وحلكي كله مجرور الجهه
صرت اخووف من صدمتي حته مابجيت ولاانطيت ردة فعل ابد
صار اليوم الاجه بي فهد
شفته اجه من الشباك السيارات والناس والذبايح
من دخل للبيت خفت يشوفني ويرعب لو يكرهني يمكن بعد مايشوفني هوه اصلا كاره طبعي وانوب شكلي انگلب هوه كرب يدخل وانه شردت

يتبع ..

البارت بدون مراجعه اي شي تقرون غلسوو 😒