رواية قصص رومانسيه الفصل الأول 1 - بقلم الحساب مغلق

القصه_للكاتبه_سلمى_الخصاونة

ميرا كل يوم بالليل بتحضن مخدتها وبتهمسلها باحلامها ..
بتنام ودمعتها على خدها ..
بتحبس صوت دموعها ..
وبتتهند من قلب موجوع ..

ميرا بنت  عمرها ١٧سنه ماتت امها وهي عمرها ٥سنين .. عاشت بعد هيك حياه كلها وجع وعذاب ..
حياه كلها الم ودموع ..

ماتت امها  بسبب هداك المرض الي صابها فجاه وهي حامل .. ماتت هي والجنين .. وتركت ميرا تتخبط بهالدنيا لوحدها ..

بعد وفاة امها الكل بدأ رحلة البحث عن زوجه جديده لابوها..
هالموضوع ما اخذ وقت طويل يا دوب شهرين وكان ابو ميرا متزوج ..
وجاب ام بديله لميرا
ميرا كانت صغيره ومو فاهمه شي بس تحكي بدي ماما وين ماما

ما بتعرف انه امها راحت بلا رجعه
ما بتعرف انها رحلت الرحله الابديه
وانها بدات مرحلة معاناه جديده وحياه مريره ..

تزوج ابوها من وداد .. وداد كانت تتوقع انه فاتها قطار الزواج  عمرها ٣٠سنه قليلة الجمال ..حادة الملامح
عصبيه ..مزاجيه

اجت عالبيت متل العسكري الي بستعد لاعطاء الاوامر ..
ميرا الطفله الجاهله  بدات برحلة العذاب
..

بتذكر ميرا هداك اليوم الي تزوج ابوها فيه ..
اجت ستها اخدتها ..

ست ميرا : تعالي حبيبتي  راح تقعدي عندي اسبوع ..

ميرا : لا ما بدي ..

ستها : ليش ما بدك ..ما بتحبني..؟؟

ميرا : بحبك بس ما بدي اترك البيت ..

ستها : ليش ؟؟

ميرا : بخاف ماما تيجي وما اكون هون ..

غصت ستها واخدت لحظة صمت طويله
و صاروا عيونها مثل الجمر ..

كملت ميرا : كان في بيبي صغير ببطن ماما .. هدا اخوي
بستنى فيه بجوز ماما راحت جيبه
بدي استناها زمان ما شفتها ..

ستها ضمتها : حبيبتي تعالي عندي عالبيت .. في ماما جديده بابا راح يجيبها عالبيت ..

بعدت ميرا عنها وصرخت : لا مافي ماما جديده .. بدي ماما

ستها : حبيبتي ماما راحت مشوار بس ترجع بتيجي .. وهلا الماما الجديده بضل عندكم ..

ميرا : بس هاي مو ماما ..

ستها : طيب مو ماما ..يلا قومي نحضر شنتتك و اواعيكي عشان تقعدي عندي انا وجدو راح ننبسط معك ..

جهزت ستها اغراضها واخدتها وراحت  وفعلا قعدت ميرا شهر ببيت ستها ..
ستها كان نفسها تخليها عندها وتربيها لانها من ريحة بنتها ..
وراح تعوضها عن فقدانها ..
لكن ابو ميرا رفض وبشده .. واخذ ميرا الطفله البريئه ورجع عالبيت ..

وداد : اهلا ميرا نور البيت ..

ميرا : انتي ماما الجديده ..

وداد : اه  انا ..

ميرا : بس ماما بدها ترجع !!

وداد  بتطلع على محمود  مستغربه ..

محمود : اه حبيبتي بترجع .. يلا ادخلي غرفتك  مع ماما وداد غيري عشان نتغدا ..

ميرا : يلا

راحت ميرا مع وداد ..
وداد كانت بدات بمعركتها ضد ميرا
شلحتها البلوزه  بعصبيه ورمتها عالارض ..

طلعت بيجاما ولبستها اياها وشدتها من ايدها بعنف واخدتها ع السفره ..
ميرا كانت مو فاهمه شو الي بصير بس كانت عارفه انه في انسانه غريبه ومو حنونه دخلت حياتهم ..
انسانه بتعاملها بقسوه ..

قعدوايتغدوا وانشغلت وداد بحالها ونسيت الطفله ..

ميرا : بابا طعميني مو عارفه اكل ..

محمود :تعالي جنبي حبيبتي ..
كملت ميرا غدا وطلب ابوها منها تروح تغسل ..

محمود : لي ما اكلتي البنت ؟

وداد : بنتك مو صغيره ..خليها تتعلم ..

محمود : خمس سنين عمرها هاي طفله .

وداد : بس لسانها اكبر من سنها ..

محمود : هاي طفله مابتعرف شو بتحكي ..
بدك تهتمي فيها وتعوضيها حنان الام ..

وداد : حاضر ..حاضر ..

وداد  حست انه هالطفله عدوتها و كرهتها من اول لحظة..
كانت تعاملها معامله سيئه ..
قدام محمود حنونه وطيبه
وبس يطلع ع شغله ترجع لطبعها الشرس ..

بدأت تعلمها ترتيب وتنظيف البيت وبس اعترض محمود حكت له لا تدخل ..هاي بنت والبنات بكبروا بسرعه ..
بكرا بتتزوج ولازم تكون متعلمه كل شي ..بلاش الناس يحكو علينا ..

محمود بسكت  و بقتنع بكلامها وبما انه قدامه الوضع منيح خلص وداد بدها مصلحة ميرا ..

رحلة عذابها بدات بالتدرج ..اول شي  بدات وداد  تعلمها  تنظيف البيت كانت عطله صبفيه ..
بس يطلع محمود عالشغل تصحي ميرا  وتجبرها تشتغل شغل البيت وهي  تعمل  قهوتها وتقعد تحكي تلفون وتضحك ..
واحيانا ترجع تنام ..

وبداوم المدارس تخليها تشتغل  بعد ما ترجع من المدرسه ..

مرت الايام وكبرت ميرا على هالحال ..
صار عندها اختين واخ ..
بس كانو غير عنها
كانو عايشين بدلال امهم وحبها
وميرا كانت تعاني  العذاب  وفقد الحنان ..

كبرت ميرا وهلأ عمرها ١٧ شاطره بالمدرسه ..
محبوبه من الكل ..
ميرا بنت حلوه ربنا اعطاها جمال  الوجه والقلب ..

من وعمرها ١٣ والعرسان بيجوا يخطبوها لكن ابوها برفض وبشده رغم اصرار وداد والحاحها الا انها بهالموضوع ما اثرت ع محمود ..

وهلأ هي بالتوجيهي قدمت الاختبارات وبتستنى بالنتائج ..
قدمت الاختبارات وهي بتشتغل شغل البيت ..

لكن هي شاطره وواثقه بحالها ..
نامت هالليله وهي تستنى النتائج بكرا الصبح راح يطلعو
اعصابها مشدوده
كل ما تحط راسها عالمخده تقوم تتمشى بغرفتها مره توقف عالشباك
مره تقعد عالكرسي
مره تطلع عالبلكونه

متوتره كتير وخايفه ..
ضلت صاحيه ما نامت ..
راحت تعمل قهوه لابوها ..
لحقتها وداد عالمطبخ ..

وداد: شو مبارح ما نمتي ..

ميرا : ماعرفت انام يا خالتي طول الليل خايفه ..

وداد: من شو بدك تخافي ..

ميرا : خايفه ما اجيب المعدل الي بدي اياه ..

وداد : يعني مو خايفه من الرسوب ..

ميرا : لا لا بنجح

وداد : املي انك ما تنجحي ..

ميرا : الله يسامحك يا خالتي ..

وداد : الله لا يسامحك ..

ميرا : لي ما بتحبني ..

وداد : وليش بدي احبك ..

ميرا : لاني انسانه ..

وداد : انسانه عكرت صفو حياتي ..

ميرا : ولامره ضرتك .. ولا مره حكيت لبابا عنك ..

وداد : ليتك حكيتي عشان اضربك وافش غلي فيكي ..
ليتك اعترضتي عشي عشان  احكي لابوكي ..
رغم صغرك بس قويه ..

ميرا : لا يخالتي انا مو قويه انامكسوره ..

وهم بحكوا سمعوا صوت زغاريد من عند الجيران ..
طلعت ميرا بسرعه  .. النتائج طلعوا
خافت .. بكيت .. حطت ايدها ع قلبها ..
دخلت غرفتها فتحت النت
ما عم يرضى يفتح معها
متوتره .. ايديها برجفوا
اجت اختها  سناء وهي بتحب ميرا كتير حكتلها اقعدي لا تتوتري انا بشوفلك علاماتك..

قعدت ميرا وهي تفرفك بايدها وتشبك باصابعها
ابوها واقف جنبها  بمسح ع شعرها بحنيه  واخوها  سيف قاعد جنبها  وبحكي لها راح تنجحي ..لا تخافي

وداد و بنتها سوسن  واقفين ومو عاجبهم .. سوسن نسخه عن امها وما بتحب ميرا ..

سناء عم تحاول والموقع معلق ما بفتح
صوت الزغاريد بعلى
صوت الطخ بالحاره اكثر
ميرا  صارت تبكي
سناء بتفتح بالموقع واخيرا فتح معها
ميرا حطت ايدها ع عيونها

سناء كتبت رقم الجلوس
طلعوا العلامات

سناء : ماشاءالله ماشاءالله واوووو ميرا مبروك ..

سيف : شو كم احكي ...

ميرا : كم معدلي..

ابو ميرا : بشري يا سناء ..

سناء : ٩٧  ...  ٩٧
يعمري مبروك تستاهلي

قامت ميرا من مكانها صارت تنط مثل البنت الصغيره
حضنت ابوها
ضمت سيف
من غير ما تحس حضنت ودادوسوسن وبوستهم
سناء بترقص لاختها
سيف بصفر
ابوها ببكي
ميرا  اليوم احلى يوم بحياتها
فرحتها قد الكون

ميرا : بابا هذا النجاح بهدي الك  انت شديت ع ايدي وشجعتني ..

ابوها : طول عمرك مميزه .. يلا استعدي لدراسة الطب يا احلى دكتوره..

ميرا : حاضر يعمري

وداد وسوسن  نار الغيره اكلتهم ..

وداد : شو بدها بالدراسه تتزوج احسن ..

ابو ميرا : بس تكمل جامعه بتتزوج .. ميرا امانه ولازم  اوفي فيها عاكنل وجه..

سناء : احلى اخت واحلى دكتوره ..

سيف : بابا خلينا نطلع نطخ لميرا ..

ايوها : بتستاهل والله يلا ..

سناء وسبف ما قصروا مع ميرا رقصو وغنوا وحسسوها بالفرحه ..
وداد بتشتغل من تحت لتحت
سوسن غيرتها قاتله وواضحه
خاصه انها كمان كم سنه توجيهي وهي مو شاطره بالمدرسه ..
..............................................
فرحت ميرا قد الكون .. خاصه بعد ما سجلت بالجامعه طب ..بتعد الايام  عشان تروح اداوم بالجامعه ..

خلال هالفتره  وداد  استغلت ميرا ابشع استغلال ما خلت شغله بالبيت ما اشتغلتها ..

سناء بتساعد ميرا بكل شي ..
لكن وداد ما  بعجبها بتحاول  تبعد سناء عنها ..

مرت الايام .. وميرا  مبسوطه لانه اليوم الي بروح بقرب  موعد دراستها ..
وفعلا  اجا  اليوم الي استنته
اول يوم دوام بالجامعه ..
واخيرا  احلى يوم  بعد طول انتظار اجا ..
جهزت ميرا حالها لهذا اليوم 
واستعدت من كل شي ..
نامت والفرحه  بقلبها كبيره ..
من هلأ راح تبدأ ميرا مرحله جديده
راح تحط رجليها عاول الطريق ..
وتبدأ بعد هالصبر  الي صبرته بتحقيق احلامها ..
وفعلا من هون  بدأ التغير للافضل بحياتها ..

بدأت بالدراسه وهي كلها حماس ..
وخلال هالفتره طلب محمود من وداد تخف ع ميرا من الشغل ..
وفهمها انها ميرا هلأ مو بنت عاديه
البنت عندها دراسه  و لازم تجتاز هالمرحله بتميز ..

طبعا هالكلام ما عجب وداد وسوسن الي وافقوا ع مضض ..
سناء وعدت ابوها تتكفل بشغل البيت وتوقف جنب ميرا وضل معها عطول ..

ميرا مو هاممها شي .. مستعده تعمل اي شي بس عشان تكمل دراسه ..
كانت تحضر محاضراتها  وتسمع بتركيز ..

ترجع عالبيت  تساعد سناء وتدخل غرفتها تدرس ..
ما في مجال لشي غير هيكا ..
استمرت اول سنه على هالحال وما خلي الموضوع من تدخلات وداد ومقالب سوسن ..

وهاي السنه الثالثه لها بالجامعه ..
اليوم اول يوم دوام وهي كالعاده اول حدا بصل المحاضره ..
كانت قاعده  بتستنى دكتور الماده  قاعده عالمقعد و فاتحه الدفتر وبترسم ..
من غير ما تحس عحالها وسمت صورة ام و بنت ..

في صوت حدا  حكى لها .. صباح الخير ..

ميرا : صباح النور ..
وقامت وقفت ..

ريان : مش بدري عالمحاضره ؟!

ميرا : انا بحب اكون بدري ..

ريان : بس باقي اكثر من ربع ساعه ..

ميرا : انا هيك متعوده ..

ريان : لو تمشيتي برا  بتستمتعي اكثر ..

ميرا وهي بتتافف : كل حدا بعمل الي بريحه ..

ريان : اه وبترسمي حلو ..

ميرا سكرت الدفتر .. وما عرفت ترد

ريان : اي سنه انتي ..

ميرا : مو ملاحظ انك بتسال كثير ..

ريان : سؤالي عادي ..

ميرا : سنه ثانيه هلا اسمحلي بدي اروح..

ريان : لا خليكي انا بروح ..

ميرا : اوك ..

ريان : شو اسمك ..

ميرا : يووووو ..

ريان : سؤال عادي ..

ميرا : عنجد زودتها ..

ريان : شكلك عصبيه ..

ميرا مسكت كتبهاوطلعت بعصبيه
وريان وقف عباب المحاضره وهو يتابعها  ..

بعد ربع ساعه رجعت عالمحاضره .. دخلت وقعدت ..
شوي اجوا الطلاب بس ضايل الدكتور يجي ..

اجا دكتور الماده ودخل ..
سلم .. هالصوت سامعته ميرا
رفعت راسها وطلعت عليه .. مش معقول 
بدأ يعرف عن نفسه :
انا الدكتور ريان  دكتور الماده الجديد بتشرف فيكم
وان شاءالله بننبسط مع بعض
وبتسفيدوا معي ..

ميرا خجلت وحست بخدودها  صاروا نار  وحست بحمرتهم زادت ..
ارتبكت  وحاولت تخفي ارتباكها..
بدأ ريان ينادي ع اسماء الطلاب وصل عند اسم ميرا .. نادى  ميرا محمود
سمعته ميرا وما قدرت تحكي انا

رجع  ريان حكى ميرا محمود
ميرا محمود
شو غياب من اول بوم
هون استجمعت قواها ميرا وحكت بصوت  خجول  انا .. انا 

لف  بكل جسمه ريان
لف بكل حواسه
ماسك ورقة الاسماء بايديه
وصار مقابلها وكانه انعدمو كل البشر
وانصهر كل العالم
التقت عيونهم مع بعض يمكن ثواني
لكن هالثواني كان فيهم الف حكايه ..

انتبه ريان عحاله وكمل الاسماء
لكن من هون من هاي اللحظه قلبه دق اول دقه ..
وميرا حست انه في لمعه بعيونها
ومشاعر غريبه سيطرت عليها ..

من هون  بدات ميرا تعيش احلى احساس لكن بصمت ..

خلصت المحاضره  وطلع ريان عطول من المحاضره ..
وميرا كملت باقي محاضراتها
بهداك اليوم  كثير خطرلها ريان  بس كانت تحكي بمكن من الموقف الي صار ولانها خجلت ..

روحت عالبيت وهي حاسه حالها طايره وعايشه شي حلو ..
عايشه الحب بصدقه
عايشه مشاعر حلوه
مر شهرين وهي على هالحال ..
ريان كان يهتم فيها غير باقي الطلبه
بس ما حاول يحكي معها
وهادا خلاها تحاول تحد من مشاعرها
ما بدها تتعلق بحلم
ما بدها تعيش حب ممكن يكون مستحيل

كان كثير في اسئله  نفسها تروح عمكتبه تساله لكن كانت تخجل
كثير مرات وصلت لعند باب مكتبه وتراجعت ..
اذا دخلت عنده بفضحوعا عيونها ..

ميرا بدات تحس انها بتحبه  حب كبير
خلص مافي مجال انها تكذب عحالها
هي فعلا بتحبه
بس كيف ممكن تعرف اذا هو بحبها
شو ممكن تعمل

هي  بتحس بنظراته وبتحس باهتمامه
وهاي الفصل قرب يخلص
وما راح تشوفه
قررت تحتفظ بحبه جوا قلبها وتسكت
وما تحرج حالها ..
درست لاختبار الفاينل  وراحت قدمت الاختبار  وخلال هاليوم ريان كان مختلف ..
حست بنظراته اكثر ..

خلصت الاختبار .. سلمت  الورقه وبدها تطلع ..
حكى لها ريان : اذا بتقدري مري علي عالمكتب  كمان نص ساعه ..
هزت براسها وطلعت
وافكارها تروح وتيجي
شو بدو منها  ..
استنت هالنص ساعه كانها استنت الدهر كله ..

كل شوي تطلع بالساعه ..
معقول النص ساعه طويله هيك
عمرها ما انتبهت
حتى ايام ما كانت وداد دايقها ما كان الوقت طويل هيك ..

واخيرا خلصت النص ساعه وقبل ما تخلص بخمس دقايق كانت باب مكتبه
كان مكتبه مفتوح وهو قاعد ..
شافها ..
دقت عالباب ..

ميرا : مرحبا ..

ريان : اهلااا   اهلااا ..

ميرا( بكركبه ) : خير دكتور ..

ريان : تفضلي اقعدي ..

ميرا قعدت وكانت ماسكه كتبها وحاضنتهم ..

ريان : انتي بنت شاطره ..وعلامتك مميزه ..

فتحت عينها ميرا .. وبقلبها حكت هدا نادني عشان يحكيلي هيك !!

ميرا : شكرا دكتور ..

ريان : من زمان حابب احكي معك لكن فضلت ع نهاية الفصل افضل ..

ميرا : ايوااا

ريان : لي حاسك متوتره ..

ميرا : اناا .. لا  لا بالعكس

ريان : طيب حطي كتبك عالطاوله ..

انتبهت لحالها انها حاضنه كتبها .. ابتسمت ابتسامه خجوله وحطتهم عالطاوله ..

ريان : ميرا ..

ميرا : نعم ..

ريان : انا  بدون مقدمات  بحبك ..
بحبك من اول مره شفتك فيها ..

ميرا حست قلبها بدو يوقف
حست بانفاسها بتتصاعد
في شهيق وزفير متواصل عندها

ريان : من هديك اللحظة قلبي تعلق فيك
وعشتي جوا قلبي ..

ميرا ساكته .. بتسمع وكل حواسها بتغني له ..

ريان : معك عرفت معنى الحب وعرفت شو هو الحب
سالت عنك طول هالفتره وعرفت كل شي عنك وبشرفني اخطبك ..

ميرا قلبها طار من الفرحه عيونها بجاوب وبسمتها بتشرح حالها ..

ريان : اه شو رايك ؟

ميرا : انا  اناا

ريان : شو ؟؟

ميرا : انا بتشرف فيك ..

ريان : خوفتني .. اذا  انا  راح ابعث اهلي عشان الرباط بينا يكون رسمي
انا بحبك وبخاف عليكي ..

ميرا : اوك  زي ما بدك ..

ريان : بس بدي رقم ابوكى عشان  احكي نحدد موعد ..

كتبت ميرا الرقم واعطته اياه .. استاذنت وطلعت وهي طايره عن الارض طيران ..

روحت عالبيت  وهي كلها حياه .. حست انه بعد العذاب الي عاشته  الفرح بستناها ..

دخلت غرفتها غيرت اواعيها ..
نادتها وداد : ميرا ولك ميرا ..

ميرا : نعم بخالتي نعم ..

وداد : وينك تعالي كملي عني الطبخه هلأ بيجي ابوكي ..

ميرا : يلا يلا من عيوني ..

وداد : خلصني بلا عيوني و راسي ..

ميرا : انتي ارتاحي وانا بعمل كل شي ..خلص اليوم كان اخر اختبار ..

وداد بتمتم ..الله يريحني منك ..
طلعت ميرا ودخلت المطبخ  كملت جلي وطبخ وهي فكرها شارد بريان .. وقلبها دقاته مليون ..
عيونها كلها فرحه ..
وهي سارحه  سمعت صوت ابوها اجا ..

ابو ميرا : وداد جهزوا البيت اليوم ..

وداد : خير من جاي عنا..

ابو ميرا : ميرا تعالي ..

ميرا : نعم بابا ..

ابوها قرب منها وباسها ع جبينها : كبرتي يا دكتوره  واليوم في واحد محترم من عيله كبيره جاي بخطبك ..

ميرا خجلت وما ردت ..

وداد : شو  ؟؟ مين ..

ابو ميرا : في دكتور حكى معي اليوم  واخذ موعد  عشان يجوا يخطبوا ميرا ..

وداد : ليش ميرا ؟؟ ما  هي ما بدها تتزوج هلأ ..
في سوسن وسناء..

ميرا فتحت عينها  واطلعت ع ابوها بخوف ورجاء ..

ابو ميرا : مالك يا وداد هي خضره للبيع الرجال حكى ميرا بالاسم .. شو بتخبصي انتي ..
يلا يلاحهزوا الغدا ..

وداد حست بغيره من ميرا .. وتمنت هالعربس لبناتها ..

كملوا الغدا .. و قامت ميرا وسناء نظفوا البيت كامل ..
وداد وسوسن قاعدات برا  والحقد والغيره  واضحه عليهن ..

مر الوقت بسرعه ..
سناء : يلا حبيبتي ميرا ادخلي جهزي حالك ..

ميرا : يلا بس اكمل  هالشغله ..

سناء : اتركي من ايدك انتي عروس .. انا بكمل ..

ميرا : يعمري يا احلى اخت .. كملي وتعالي ساعدني باختيار شو البس ..

سناء : اوك .. انتي غسلي  وانا بكون كملت وبجي ..

راحت ميرا ولحقتها سناء ساعدتها باختيار اللبس ..

لبست  وكانت مثل الورده ..
رن جرس البيت ..
فتح ابوها .. كان ريان واهله ..
دخلوا  وحكوا بمواضيع كتيره ..
دخلت ميرا ضيفت العصير ..
اهله كثير حبوها ..
وريان كان طاير فيها ..
خطبوها .. ابوها طلب كم يوم  وبرد عليهم ..

بعد ما روحوا  نادى ميرا ..

ابو ميرا : اه حبيبتي ميرا  انا ما بعطي جواب الا  برايك .. الي بدك اياه ..

ميرا خجلانه : متل ما بدك بابا ..

ابو ميرا : انا كنت بفضل تكملي دراسه بالاول .. لكن هالشب محترم ومؤدب ..
ع كل حال  بدي اسال عنهم

ميرا : اه بابا اسال ..

ابو ميرا : بدي اسمع رايك بدون خجل ..

ميرا :نزلت عيونها بالارض ..
بابا  ازا انت موافق انا موافقه ..

ابو ميرا : بصير خير بسال  وبعدين بنرد جواب ..

ميرا : ان شاءالله بابا ..

نامت ميرا  والفرح مسيطر عليها نامت وهي مبسوطه وحاسه الدنيا بدات تضحكلها والحياه تفتح  ايديها لها ..

تاني يوم ابوها حكى مع كثير ناس وسال عن ريان واهله ..
الكل مدح بريان واهله ..
ارتاح ابو ميرا  من الي سمعه عن ريان وقرر يعطي جواب بالقبول ..

رجع عالبيت ونادى ميرا ..
ابو ميرا : ميرا حبيبتي انا سالت والجماعه كويسين الكل شكر فيهم و باخلاقهم بكرا بعطيهم جواب ..

وداد : يعني بهالسرعه ..اسال اكثر ..

سوسن : مو عاساس ميرا مابدها تتزوج هلأ ..

سناء : بس هذا مناسب لميرا .. وميرا بدها ..

ابو ميرا : انا بهمني راي ميرا .. وميرا وافقت ..والباقي ماله علاقه ..

ميرا : الله يخليلي اياك يا بابا..

سوسن ووداد بحاله صعبه الوضع مريب وشكلهم بخططوا لشي ..

سوسن هاي السنه توجيهي بس مو مهتمه و هي ورا خطط امها ..
وطول يومها جاكر ب ميرا ..

ثاني يوم حكى ابو ميرا  مع اهل ريان واعطاهم الجواب ..
تمت الخطبه وكتبوا الكتاب  ..ميرا كانت احلى ورده ..
ريان حاسس حاله ملك العالم
سناء مبسوطه لاختها
لكن وداد وسوسن  الغيره واضحه عليهم
عطول بخططوا
ونظرات الحسد كانت  واضحه عليهم ..

ما توقعت ميرا  انه ممكن يكونو ضدها للهدرجه ..
لكن خطة وداد كانت شيطانيه ما بتخطر عبال حد ..

بعد الخطبه  صار ريان يزور ميرا .. بكل زياره كانت سوسن تكون كانها هي العروس ..لابسه احلى لبس ..ومكياج ودلع ..

وداد : ريان ممكن اطلب منك طلب ..

ريان : تفضلي بخالتي اطلبي ..

وداد : سوسن مو شاطره بالانجليزي وانت ماشاءالله شاطر بتقدر تساعدها شوي ..

ميرا : انا بدرسها ..

وداد : لا حبيبتي ما بدنا نعطلك عن دراستك ..

ريان : ولا يهمك بدرسها ..

وداد : طيب انا وميرا بنجهز الغدا .. وانت ساعدها شوي .. بتعرف توجيهي وبدو دراسه ..

ريان : اوك خليها تيجي وجيب الكتب ..

وداد : سوسن .. سوسن تعالي خلي ريان يدرسك ..

اجت سوسن كانت لابسه فستان قصير وفارده شعرها بس دخلت  ريحة العطر كانت قويه ..
سحبت وداد ميرا وطلعوا من الغرفه ..
وسكرت الباب وراها بحركة  خبيثه ..
ميرا ما خطرلها اي شي
وما فكرت بالموضوع
راحت مع وداد ع المطبخ جهز السلطه بكل براءه ...

بدأ ريان يدرس سوسن بنيه سليمه ..
قعد ع الكنبه  وحط الطاوله فتح الكتاب  صار يقرأ ويشرح ..

سوسن قاعده مقابله وحاطه ايدها عخدها و بتسبل بعينها ..

هو بشرح وبعيد وبزيد وهي عحالها ..
كمل وسالها فهمتي ..
حكت له  اه فهمت الدرس ممتع ..

راحت سوسن عند امها وقعدوا يحكوا بصوت مو مسموع ..
جهزت ميرا السفره وكان اجا ابوها من الشغل ..
نادت ريان وتغدوا ..

واستمر الوضع على هالحال كل اسبوع لازم  سوسن تخلي ريان يشرحلها..

وداد تاخذ ميرا كل مره بحجه مختلفه وميرا قلبها طيب ..
ومستحيل تشك باختها ..

لكن اليوم سوسن كانت  غير كل مره
بس قعد يشرحلها  ريان  وهو بكتب عالدفتر تعمدت تحط ايدها فوق ايدو و بدات تحرك اصابعها ع ايده ..
ريان سحب ايدو بسرعه .. وعمل انه الموقف عادي ..

تطنيش ريان لسوسن استفزها  تعبت معه و هو  مطنش ..
بدها تجذبه لها باي شكل ..

سوسن : ريان انت شب بجنن ..

ريان : انتي الاموره ..

سوسن : عنجد ..

ريان : اه طبعا عن جد انتي متل اختي الصغيره ..

سوسن : لا تحكي اختي ..

ريان : سوسن شوبدك ؟؟

قربت سوسن منه  اكثر  وهو قاعد مكانه .. قربت منه وحطت ايدها ع ايدو

سوسن: انا بحبك !!

ريان : سوسن اعقلي ..

سوسن : ما بعقل وانا معك
قربت سوسن اكثر
وبهاي اللحظة ميرا فتحت الباب حامله صنية العصير ..
وقعت الصنيه من ايديها
لا مش معقول
سوسن وريان
سوسن بحضن ريان
صرخت بصوت عالي
اجت وداد وسناء .. سناء بس شافتهم حطت ايدها عثمها ..
وداد تنفست وكانها انتصرت

ريان قام  و راح عند ميرا ..
ميرا لا تفهمي غلط ..
مسكها من ايدها  وحكى لها ميرا ميرا  اوعي يروح فكرك لبعيد ..

ميرا بتبكي .. خلته يحكي وراحت ع غرفتها ..
وداد : كان حكيت من اول بدك سوسن ..

ريان : سوسن احكي الي صار ..

سوسن : شو احكي كل شي  واضح ..

ريان : يا جماعه  والله ما بقلبي غير ميرا وما بحب غير هي ..

وداد : خلينا نلفلف الموضوع ..

ريان : شو تلفلفي .. بنتك فرضت حالها علي ..
غير ميرا ما بتزوج ..

ميرا واقفه ورا باب غرفتها بتبكي و بتسمع ..
محتاره تصدق الي بتسمعه والا تكذب الي شافوه عيونها ..

ريان  خلاهم وراح ينادي ع ميرا ..
ميرا  ما قدرت تردعليه ..

ريان : ميرا مشان الله اسمعيني .. والله الي بالك ما صار ..

وهم  بهالوضع والكركبه  اجا ابو ميرا وسيف من برا ..
شافوا الوضع متكركب ..

ابو ميرا : شو في ؟؟

وداد : لا لا مافي شي ..

ابو ميرا : ريان مالها ميرا ؟؟
سناء شو في

فتحت ميرا الباب وطلعت تبكي حضنت ابوها وهي بتبكي بقوه ..

ابو ميرا : شو في ؟؟

سوسن بكل وقاحه : بابا ريان بدو اياني  ووو

ابو ميرا : ولك اخرسي شو هالحكي ..

وداد : شو تخرس كلنا شفنا ريان شو كان يعمل ..

انهارات ميرا اكتر وزاد بكاها: بابا ما بدي اتزوج خلص ..

ريان : والله يا عمي هالحكي ماصار ..

ابو ميرا قعد عاول كرسي وحس بغصه قويه ..

وداد : بنلفلف الموضوع وبتزوج ريان سوسن وخلص ..

ريان : لا تظلموني انا مو هيك .. قلبي مافي غير ميرا
ومستحيل اخونها
ميرا حبيبية عمري وقلبي
ميرا صدقني

قام سيف وقف : بابا ريان ما عمل شي

وداد : انت ما كنت هون ..

سيف : ماما انا سمعتك انتي وسوسن وبعرف شو خططتوا ما توقعت تنفذوا بهالسرعه ..
سكتت احترام الك ولاختي ..
بس انه ضروا ريان وميرا لا
ميرا اختي وطيبه  حرام نظلمها ..

قعد ريان عالارض واخذ نفس طويل
سوسن هربت ع غرفتها
وداد  واقفه وهي خايفه
سناء بتهدي بابوها وميرا ..

ابو ميرا : حمدالله الي انكشفت الامور 
وربنا وقف معك يا بنتي ..
وداد بضلي بهذا البيت عشان اولادك
وسوسن  حسابي معها عسير ..

قوم يا ابني يا ريان اخذ خطيبتك واطلعوا اقعدوا برا ..
ورتبوا اموركم للزواج ..

مسك ريان ايد ميرا  و طلعوا برا ..
قعدوا نشفوا دموع بعض
تاسفوا لبعض .. زرعوا حب جديد وتعاهدوا عهد جديد ..عهد الحب الاقوى والثقه  الي كلها حب 

لملم ريان ميرا وحضنها بحب الكون مسك ايدها وشد عليهم بقوة ..

ريان : ميرا اوعي تشكي في .. انتي حب الكون عنك ما بتخلى .. وغيرك ما بتمنى ..

ميرا : سامحني لكن الموقف كان صعب ما تحملت اشوفك هيك .. طول عمري بحالي ويوم قلبي حب كنت اول من دخله ..
حبي الك مابشبه اي حب انت اب واخ وام وصديق انت حياتي ودنيتي ..

ريان : بوعدك عنك مابتخلى ..

ميرا : بحبك ..

خلص هاليوم الي كان صعب ..اليوم الي كشف نوايا مخبيه ..
روح ريان .. ميرا  كانت حاسه بغصه من اختها الي تصرفت هيك ..
وخايفه من وداد الي ولا مره رحمتها
ومنحرجه من ابوها  ..

وداد كانت بغرفتها وهي نار قلبها بزيد وما تعلمت من الي صار ..
لازم تنتقم من ميرا ..
لازم ضل قويه .. وترجع تكسب جوزها ولانها مكاره وخبيثه بدات تشتغل بلئم اكثر ..

طلعت من غرفتها وراحت عالصاله كان ابو وميرا وميرا قاعدين هناك ..
قربت وداد من جوزها  وقعدت تحت رجليه وحكت له ..

وداد: حبيبي محمود سامحني انا اسفه ..

ابو ميرا : لا تحكي معي الي عملته فضيحه ..

وداد : الشيطان شاطر .. ميرا بنتي وبتمنى لها كل الخير ..

ابو ميرا : لا تبرري انتي غلطتي غلط كبير ..

وداد : حبيبتي ميرا سامحوني .. انا بمرتبة امك ..
انتي بنتي وحبيبتي وبتمنى لك السعاده ..

ميرا : قومي يخالتي قومي  انا ما بزعل منك ..
بابا خلص عشاني 

ابو ميرا : انا انحرجت قدام ريان .. تصرفكم مخزي ..

وداد : خلص يعمري حقك علي .. ميرا حبيبتي  احنا بنحبك ..

ميرا : بابا خلص غلطه صغيره ما بتمحي الكون ..
يلا انا رايحه اعمللكم قهوه وانتو تصالحوا ..

ابو ميرا : عشانك يا ميرا .. وانتي يا وداد اوعي انتي او بنتك يتكرر هالتصرف ..
وسوسن ما بدي اشوفها والا بقضي عليها ..

وداد : امرك ..امرك .. بس خلص  سماح ..

راحت ميرا عملت قهوه ..
وداد ابتسمت ابتسامة مكر وخداع ..

وداد : انا بدي اروح انادي سوسن تعتذر منك ..

ابو ميرا : ما بدي اشوف وجهها منيح ما ذبحتها ع عملتها ..

وداد : معلش  سامحها وسمعها كلمتين حلوين ..لا تخليها تغار  من ميرا وتحط حطتها ..

ابو ميرا : طيب ناديها هالغضيبه ..

راحت وداد ع غرفة  سوسن كانت سوسن قاعده والحقد بتقطر منها
و سناء بتدرس ..

وداد : سناء روحي ساعدي ميرا بالمطبخ ..

سناء : حاضر ماما ..

وداد : قومي بوسي ع ايد ابوكي واطلبي السماح ..

سوسن : ما بدي مابدي ..

وداد : قومي اسمعي مني ..

سوسن : ما بدي اسمع شوفي لوين وصلت ..

وداد : ولك في خطه جديده .. بس اسمعي مني ..

سوسن : عنجد ماما .. ريان راح يكون الي ..

وداد : الك طبعا .. في خطه اذكى من خطتنا الاولى ..

سوسن : شو هي احكيلي ..

قربت وداد منها : اسكتي ولا نفس بعدين بس ما يكون حد بالبيت .. ما بدنا ننفضح مثل المره الماضيه ..
اهم شي اكسبي ميرا وتغيري ..

سوسن : طيب .. مثل ما بدك ..

طلعت وداد و وراها سوسن حاطه عينيها بالارض ..
قربت من ابوها باست ايدو واعتذرت منه ..
بس اجت ميرا حضنتها واعتذرت ..

سوسن : انا اسفه يا اختي مو قصدي بس انا صغيره وجاهله ..

ابو ميرا : يعني ضروري نغلط عشان نتعلم ..

ميرا : خلص بابا حصل خير ..احنا عيله وبيت واحد ..

سناء : حمدالله الي هدي الوضع كنت ع اعصابي ..

ابو ميرا : سوسن شدي حالك بدي معدل عالي ..
يلا كل وحد عدروسه ..

كل واحد دخل غرفته ..
نزل الليل  الي عتمته مثل قلب وداد
ونامت ميرا وهي مبسوطه مو عارفه انه في افعى بتستعد للسعها ..

ثاني يوم كل واحد راح ع دوامه ..
وداد لبست وطلعت عالسوق وراحت عالصيدليه ..

وداد :  صباح الخير ..

الصيدلي : اهلا صباح النور ..

وداد : عندي بسه مريضه وهالبسه تربت عنا والمرض الي عندها معدي .. وعاز علي ارميها بالشارع ..
بدي دوا  يريحها

الصيدلي : دوا شو ؟؟

وداد : دوا يموت البسه !؟

الصيدلي : ما بقدر اساعدك .

وداد : بترجاك ساعدني والله هالبسه بتحزن ..
كل ما ارميها بترجع واولادي متعلقين فيها ..

الصيدلي : اسف يا مدام طلبك مش عندي .. هون صيدليه للبشر ..

طلعت وداد من عنده وهي تفكر وين تروح  .. تفكيرها اللئبم ساعدها كالعاده ..

راحت ع محل مبيدات حشريه
وطلبت منه سم للحشرات  وفعلا اشترت السم ورجعت عالبيت  بسرعه ..

دخلت المطبخ وبدات تحضر بالغدا ..
وكالعاده ميرا بترجع اخر واحده بحكم محاضراتها ..

خلت غدا ميرا  ع جنب وحطت من السم رشه صغيره .. بدها تموتها عالبطئ .
وخلت علبة السم  بحافظة السكر وخبتها ورا القهوه ..

ميرا بالجامعه كانت كلها حياه ونشاط ..
كملت محاضراتها وراحت عند ريان  عشان يروحو مع بعض ..

ريان : ميرا احنا لازم نتزوج بسرعه ..

ميرا : مو اتفقنا بعد التخرج ..

ريان : ميرا ما بقدر اجي ازورك مثل اول ..

ميرا : لي بس احنا تصالحنا ورجعنا احسن من اول ..

ريان : لا يا ميرا انتي الطيبه .. اوعي تثقي ب  وداد ..

ميرا : لا تخوفني ..

ريان : حبيبتي ما بدي اخوفك بس ودادوسوسن فعلا بخوفوا ..
والي عملوا  ما استوعبته .. بدك تنتبهي لحالك ..

ميرا : بش هم تغيروا !!

ريان : ميرا انا اكبر منك و مر علي كثير ناس وبقدر احكم عالناس ..
اهم شي نعجل بموضوع الزواج .. انا خايف عليكي ..

ميرا : والله ما بعرف خليتني اخاف ..

ريان : خليكي حذره ..خلال هالفتره ..
واذا بتوافقي بنتزوج ع نهاية الفصل هذا يعني تقريبا كمان شهرين ..

ميرا : كثير بدري كمان شهرين ..

ريان : انا بحبك وبدي اياكي تكوني معي باسرع وقت ..
بدي اضل اطلع بعيونك
واعيش معك الحب يعمري

خجلت ميرا  ونزلت راسها بالارض .. نزلو شعراتها ع عينيها ..

قرب منها ريان ورفع شعرها عن عينيها
ومسح بايدو ع وجهها وحكى لها : الله لا بحرمني من هالوجه ..

وصلها ريان ورفض يدخل .. كان الوقت متاخر ومو حابب هالفتره يشوف وداد ..
وطلب منها تفكر بموضوع الزواج ..

دخلت ميرا البيت وافكارها متشتته من كلام ريان ..
دخلت تغير اواعيها  واسترجعت بذاكرانها حياتها مع وداد
ذكرت كيف وداد طول هالسنين بتعاملها
دائما كانت لئبمه معها
كانت تحرمها من كل شي
ما كانت بدها اياها تدرس
ولا مره حبتها
معقول تغيرت مره واحده

كلام ريان صح لازم انتبه منها ولازم  اتزوج واطلع من عندها ..

طلعت من غرفتها وراحت قعدت بالصاله مع ابوها ..

ابو ميرا : ليه ما دخل ريان ..

ميرا : مشغول والوقت متاخر ..

ابو ميرا : تغديتي ..

وداد : ما تغدت هلأ بجيبلها تتغدا ..

ميرا : لاخالتي انا مو جوعانه ..

وداد : كيف مو جوعانه .. هلا بسخنلك خليكي انتي فاعده مع ابوكى..

راحت ودادتسخن الاكل  وكانت حطت رشة سم صغيره ..

بالصاله ميرا فتحت مع ابوها موضوع الزواج ..

ميرا : بابا ريان بدو نتزوج خلال شهرين ..

ابو ميرا : اه بصير  اذا انتي بدك ما في مانع ..

ميرا : انا متردده ..

ابو ميرا قرب منها : انت عيوني بس الزواج  افضل وهمسلها انا خايف عليكي من وداد ..

ميرا : بس يا بابا

هون وصلت وداد حامله صنيه الاكل ..

حطتها عالسفره
وداد : يلا حبيبتي تعالي تغدي ..

ميرا : يسلمو خالتي يلا جايه ..

قامت ميرا تتغدا وكانت فعلا شبعانه بس ما حبت  تحكي لخالتها ..
قعدت عالسفره ومسكت المعلقه وقعدت تفكر بكلام ريان وابوها
قلبها بدا يخاف
وحاسه وداد فعلا متغيره بشكل كبير ..

اكلت اول لقمه .. رن تلفونها .. كان ريان .. خلت الاكل ودخلت ع غرفتها تحكي معه ..

وداد ما عجبها
قامت حملت الاكل ودخلتلها اياه عالغرفه ..
ميرا ضلت تحكي مع ريان وما اكلت بعد ما كملت كلام مع ريان .. طلعت صنية الاكل رجعتها عالمطبخ وعشان ما تزعل وداد كبت الاكل بكيس ..

و جلت الصحون وحطتهم ..
دخلت وداد شافتها بتجلي بالصحون عرفت انها اكلت الغدا ..ضحكت ضحكتها الشريره وطلعت ..

هالمره نفذت ميرا منها .. لكن لسه الايام طوال ..

قررت ميرا توافق عالزواج وثاني يوم  حكت لريان انه خلص بتزوجو خلال شهرين ..

ليلتها اجا ريان سهر عندهم واتفق هو وابوها ع امور الزواج ..
ودادتفاجئت  وما عجبها ..
سوسن  حقدت اكثر .. ريان انتبه لنظراتهم .. ولاحظ حقدهم ..

وداد بدات تفكر بسرعه ما بنفع هدا السم هلا اذا بتحطه بجرعات كبيره راح تموت ميرا وراح تنكشف وداد ..
لاذم تفكر بخطه ثانيه
لازم تتحرك بشكل اسرع ..

قامت سوسن دخلت غرفتها لحقتها وداد ..

وداد : مالك قمتي هيك ..

سوسن : انا بحبه راح اموت اذا بتزوجها ..

وداد : بعيد الشر عنك هالغضيه تموت عنك ..

سوسن : ماما شو اعمل ..

وداد : خليني افكر ..

سوسن : ما ضل وقت ..

وداد : عارفه عارفه .. بفكر ..

سوسن : ماما مو قادره اشوف ريان جنبها ..

وداد : هاي البنت غصه بحياتي طول العمر ..

سوسن : قلبي موجوع من حبه ..

وداد : للصبح بتكون طلعت معي خطه ..

سوسن : يا ماما بسرعه بسرعه ..

رجعت وداد قعدت معهم  جسم بس فكرها كان مشغول شو تعمل ..

هالزواج ما لازم يتم ..
ريان لازم لسوسن .. وداد ما بتخلي قلب بنتها موجوع ..

وفجاه لمعت فكره شيطانيه براسها ..
ولازم تنفذها ..
قررت تطعن بشرف ميرا
قررت تشكك ريان بميرا
وتخلي ريان هو يتركها ..

نامت وداد وهي تفكر بخطتها وترتب بافكارها ..
ثاني يوم قامت الصبح  وحكت مع اختها واختها كانت شريره مثلها ..
حكت لها كل شي واختها شجعتها
وكان الي بدو ينفذ ابن اختها
بدئوا بنسج  خيوط خطتهم اللعينه
نسيوا انه ميرا انسانه ومن حقها تعيش
اعطوا نفسهم الحق بس بالحياه ..

اتفقوا ع المكان والزمان والتنفيذ
كان الجو بداية الشتا .. وكان الليل ينزل بسرعه ..
خلال هالفتره بدات ميرا جهز للزواج
كانت تطلع الصبح ترجع المسا
احيانا تروح معها سناء
واحيانا تطلع من الجامعه

مر تقريبا شهر  وكان خلص هذا هو يوم تنفيذ الخطه ..
كانت ميرا بالسوق لحالها
العروس كانت تجهز لزواجها وكانت مبسوطه
وبهذا اليوم حجزت فستان العرس
كان فستان حلو كثير
وسعادتها قد الدنيا
تاخرت بالسوق .. رنت عليها وداد

وداد : وينك تاخرتي ..

ميرا : لسه بالسوق هلا بدي اروح ..

وداد : تاخرتي اليوم و نزل الليل ..

ميرا : يلا جايه ..

وداد بصوت مسموع لابوا ميرا : عيب تتاخري اكثر الدنيا ليل ..

ميرا : تاخرت بالجامعه ..

وداد بصوت اعلى : ارجعي بسرعه لحالك برا ..

ميرا : حاضر خالتي ..

طلعت ميرا من المحل و روحت بتاكسي .. قبل ما تصل بيتهم ب عشر دقايق لازم تنزل وتمشي مشي لانو السياره صعب تدخل ..
نزلت ميرا  وهي حامله الاكياس  بايد وبايدها الثانيه كتبها ..
كان الجو برد
وعتمه كثير
وهدوء مريب
مشيت بخطوات سريعه
فجاه من غير مقدمات طلع واحد قدامها لابس  ع وجهها ..
وقف مقابلها

ميرا خافت ..وهو قرب منها .. حاولت تهرب منه .. ما فدرت

ميرا : مين انت ..شو بدك مني

ما رد عليها قرب منها اكثر

ميرا بتبعد وهو بقرب ..
ظلت تبعد لوصلت  لزوايه  وهو قرب اكثر منها .. ميرا حست انها ضاعت .. بدات تصرخ ..
قرب منها وحط ايدو ع ثمها
شالت ايدو وصرخت بصوت اعلى
لكن بهاللحظة اختفى كل البشر
وكانه الكون  تلاشى
صرخت اكثر .. وقعوا الاكياس من ايدها
وكتبها صاروا ع الارض

قرب منها و مسك اواعيها  شالهم عنها وهي بتصرخ
وهو بشد باواعيها وهي بتعاني وبتصرخ
انعدمت الرحمه والانسانيه
ميرا بلحظة تحولت من السعاده للتعاسه
بتصرخ ودموعها دم
والجزء الفوق من جسمها بدون ملابس
واخيرا حدسمع صوتها
واخيرا  حد اجى من بعيد

بس شافو المجرم هرب
وميرا قعدت تلملم بحالها
وتستر بحالها
كانت جارتهم وبنتها

ميرا حبيبتي مالك  شو في
لا حول ولا قوه الا بالله
مين عمل فيكي هيك
قومي قومي
ميرا كانت بحاله هستيريه
بكى مستمر وكل جسمها برجف
اخدت جارتهم جاكيتها ولبستها اياه
واخدت كتبها واغراضها ومسكتها من ايدها .. واخدتها عبيتهم ..

وصلت عبيت اهل ميرا
رنت الجرس .. فتحت وداد.. الي كانت تستنى ومحضره ردةالفعل ..

شافت وداد ميرا 
صرخت وداد باعلى صوتها ميرا ميرا
يا فضحيتنا
شو هدا .. شو عامله
وقعدت تصرخ باعلى صوتها
قام ابو ميرا شاف ميرا بهالوضع جن جنونه ..

طلعت سناء شافت اختها انهارات
ميرا  وقعت من بين ايدين الجاره عالارض
ركض ابوها وحملها و قلبه بنزف دم عليها
و وداد ع صراخ وحكي طالع نازل
دخلوا ميرا غرفتها  وقعدوا يصحوا فيها لكن ما صحيت ..
وكانت تتنفس بصعوبه
عطول اخدوها عالمشفى

دخلوها وعملولها فحوصات كامله .. ميرا تعرضت لتحرش وهالشي عمللها انهيار ..
اعطوها ابرة مهدئ..
ابوها سال الجاره شو الي صار حكت له الي شافته ..

وداد عشان  تنجح خطتها حكت مع ريان ..
اجا ريان وبس شاف وضع ميرا انهار
قعد وحط ايده ع راسه
وما عرف شو يعمل ..

وداد كل شوي بتضرب كف ع كف وبتحكي انفضحنا .. انفضحنا بالحاره ..
الدكتور طلب من الكل يروح لانها راح تنام لبكرا ..
الكل روح وضلت ميرا نايمه بالمشفى بدون ام تحضنها
وبدون اخت تساعدها
وحيده بين جدران الالم  والظلم  سيطر عكل شي ..

ثاني يوم من الصبح راح ريان عندها
كانت لسه نايمه ..
دخل عالدكتور وسال عن وضعها وشو صاير معها ..

شرحله الدكتور الي صار وفهمه انها كانت بحالة دفاع عن النفس ..
والبنت شريفه ..
و وضحله الدكتور انه اي ردة فعل سلبيه هالفتره بتاثر عليها ..

ريان نزلت دمعه من خده عوضع ميرا ..
راح عندها قعد جنبها .. مسك ايدها وقربها من انفاسه ..
صحيت ميرا  خايفه
صحيت تبكي
صرخت لكن بس شافت وجه ريان  سكتت
ريان هو الامان الوحيد بحياتها ..

بدها تحكي لكن ريان حط ايدو عثمها وحكى لها مو وقته تحسني وبنحكي بعدين ..

اجوا اهلها وبس شافها ابوها صحيت  فرح كتير ..
الدكتور  : لازم نحكي مع الشرطه ..

ابو ميرا : ليش ..

الدكتور : البنت تعرضت لعملية تحرش  ولازم الشرطه يحققوا ..

ابو ميرا بطلع ع ريان وريان بطلع ع ميرا وميرا بتستنجد بعينها بابوها ..

ابو ميرا : والله يا دكتور ما بعرف هذا خطيبها وهو بقرر ..

ريان  : اذا ممكن خليني مع ميرا  اسمع منها واذا هي بدها تطلب الشرطه انا ما بعارض ..

طلع الكل من الغرفه وضل ريان مع ميرا ..
حكى معها بهدوء و سمع منها الي صار ..
قلبه وجعه عليها ..
كانت تحكي وتبكي
وكل كلمه بغصه
دموعها نار متل الجمر
وقلبها برجف
ونبضها  مره بعلى ومره بوقف

كانت خايفه  وتحرك بايدها
تأشر بحركات  كلها خوف
مسك ايدها ريان وضمهم بين ايديه  حضنهم  بحب الكون ..

رن جرس عشان النيرس تيجي ..بس اجت طلب يعطوا ميرا ابرة مهدئ..
اخدت الابره و خلال  خمس دقايق نامت ..

طلع  وكان ابوها و وداد  برا..

ريان : عمي احنا ما بدنا نقدم شكوى  الي صار خلص صار .. بدنا نطوي هالصفحه ..

ابو ميرا : والله بصير شغلات غريبه .. تعبت وتعب قلبي من  وجع هالبنت ..

ريان : توكل عالله يا عمي ..
رن تلفون ابو ميرا  راح يحكي بمكان هادي ..
استغلت وداد الفرصه..

وداد :  هالبنت  غريبه يا ريان ..

ريان : مين قصدك ..

وداد : ميرا !!

ريان : لي ؟مالها

وداد : يومهاتاخرت كثير وبصراحه بس حكيت معها كان في صوت ..!!

ريان : صوت شو؟؟فهمني

وداد : صوت شب!!

ريان : شوبتحكي انتي ..

وداد : خلص انسى ..

ريان : شو انسى ؟؟

وداد : اذا ابوها بعرف بذبحها وانا ما بدي اضرها ..عندي بنات ..

ريان : انتي بتحكي جد ؟

وداد :ريان انا مالي غرض اكذب ..وبصراحه اكثر شفتها من الشباك واقفه مع واحد ..

ريان : لا تحكي هيك .. ميرا اشرف من الشرف ..

وداد : مين الي كان معها ؟ وليش تاخرت
يعني اذا هي دكتوره  ما بتغلط !!

ريان : حرام عليكي تظلميها ..

وداد : ما بظلمها انا بحكي الي شفته ..

ريان : يخالتي مشان الله  لا تحكي هيك ..

وداد : انت حر .. لاتصدق

ريان :  احلفي يمين بالله ..

وداد : اه بحلف لاني صادقه ..
وحلفت وداد يمين كاذب
حلفت ضد ميرا
حلفت ونسيت انه ربنا كبير

ريان حس حاله بدو يتفجر
حس الدنيا ضاقت فيه .. ما عرف شو يعمل ..
استأذن وروح
وداد تقريبا نجحت خططها .. وميرا انظلمت ..

مر اسبوع وريان ما زار ميرا .. طلعت من المشفى ..
رنت عليه  تحجج بالاختبارات وانه مشغول .. وطلب منها يتاجل عرسهم شوي حتى تهدا نفسيتها ..

وافقت ميرا لكن كانت حاسه انه ريان تغير ..
وداد مبسوطه وسوسن بكل مناسبه بترن ع ريان بحجة تساله شغله ..

وصلت فيها تمر عليه عالجامعه ..
كانت ممثله بكل شي ..
لكن هو ما استجاب لمحاولاتها ..

مر تقريبا شهر ..ميرا ضعفت اكتر وتعبت ..
اجلت الفصل وما قدمت اختبارات
اعتزلت غرفتها ..

بيوم الصبح كانت قاعده ودادوسوسن..

سوسن : ماما شو رايك اعملك قهوه ونشوف شو بدنا نعمل بالغبيه الي جوا ..

وداد : انتي تعمليلي قهوه .. كم الك ما عملتي ..

سوسن : يلا ماما بدك ؟؟ بدي اعملي نسكافيه ..

وداد : اه روحي اعملي ..

راحت سوسن عملت قهوه  اخدت الحافظه الي فيهاالسم فكرته سكر وحطت منه نص معلقه  وغلت القهوه واخدتها لامها ..

قعدت تشرب نسكافيه و وداد تشرب القهوه ..
اكلت شوكلا وشربت قهوه ..

وداد : مو حاطه سكر ..

سوسن : لا حطيت ..

وداد : شكلها ساده ..طعمها غريب

سوسن :يمكن لانك بتاكلي شوكلا .. اشربيها لحالها ..

وداد رجعت شربت ..
طعمها غريب

سوسن : مالك ماما يعني بدي اسمك ..هههههه

بس حكت هيك سوسن ذكرت وداد السم

وداد :انتي من وين حطيتي سكر ؟؟؟

سوسن : من المرتبان الي ورا علبة القهوه !!!

وداد : شووووو
ولك شووو
اخ اه يا ويلي

سوسن : شوووو

وداد : راح اموت
ركضت عالمطبخ  تشرب حليب
حاولت تستفرغ ما نفع  مر دقايق اغمى عليها ..
طلعت ميرا عالصوت ..
شو في شوفي
حكوا مع الاسعاف ونقلوها ع المشفى ..

راحت ميرا معها وحكت مع ابوها ..
دخلوها العمليات وعطول غسيل معده ..
السم نسبته عاليه بجسمها ..
ممكن تعيش وممكن لاء
طلعت من العمليات ودخلوها العنايه المركزه ..

وداد بين الحياه والموت مره بتفتح ومره بتغمض ..
استرجعت ظلمهالميرا ..
قدرت تحكي وتطلب يحكوا مع ريان
الكل استغرب شو بدها بريان
اجا ريان  ..
وداد طلبت  ريان وميرا وابو ميرا ..
دخلوا عندها الغرفه
كانت تحكي بصعوبه
كل حرف ياخد وقت منها
بصعوبه لجمعت الكلمات
وحكت لريان وميرا كلشي عملته

ريان واقف مصدوم
ميرا  دموعها جوابها
ابو ميرا ما تمالك حاله و طلع برا ..

كملت حكي وداد
ميرا انا ظلمتك من وعمرك خمس سنين وطمعت فيكي
كنت بدي كل شي الك لسوسن
جبت السم الك وربنا رحمك
السم الي جبته الك انا اخدته
انا  قتلت نفسي
سامحوني سامحوني
وداد  بتحكي بصعوبه
جهاز القلب بطئ
تنفسها شبه وقف
الاجهزه  صمتت .. وداد راحت
وداد ماتت
ماتت بشر اعمالها

ميرا بكيت دمعة حزن ع وداد ودمعة فرح لانو ربنا انصفها ..

ابو ميرا استغرب كيف هالانسانه كانت عايشه معه ..
تفرغ لصلاته و حياته ..
ميرا وريان تزوجوا وبنوا عيله من الحب والحنان ..
سوسن  صار معها انفصام شخصيه
سناء وسيف نجحوا بحياتهم لانهم كلهم خير ..

مات الشر وانتصر الخير
مهما الظلم بطاول لكن الخير اطول
ومهما الشر بستمر بس حبله قصير ..
الظلم برجع لصاحبه
والطيب ما بنظلم
فقط نستعين بربنا ونوكله بامورنا  وهو بحسن التدبير ..