رواية قصص رومانسيه الفصل الرابع والثلاثون 34 - بقلم الحساب مغلق

مساء السعادة غالياتي                                                                                                                                                                                               

- اني اسمي هدى من محافظه الكوت من وعيت وفتحت عيني على هاي الدنيا واني حظي قليل والحمدلله على كل حال هذا الي جنت دائما اكوله طبعا اني والدي مستشهد من فتحت عيني واني مشايفته ومااعرف عنه شي بس الي اسمعه  هو استشهد بحرب ايران بالنسبه الي مااعرفه لان والدي لمن استشهد امي جانت حامل بيه وعندي اخت واخوان اثنين واني اصغر وحدة مني بدايه المعاناة لمن والدي استشهد والدتي رجعت لبيت اهلها وبوكتها جدي تكفل بينا والي صار انو والدتي استلمت بيت مال شهيد واجرته وكانت تاخذ راتب وظلت بهاي الفترة ايضا بيت جدي ولكن فترة ومتحملت بعد لان جانو بيت جدي من النوع الي يجوهم خطاطير وناس طابه وناس طالعه وامي مارادت تتحمل هالتعب كامت اجرت بيت قريب من بيت جدي ولكن الامر والي في انو والدتي انسانه انانيه مجانت تفكر بينه وكانت تشوف نفسها بعدها صغيرة وحلوة ومشافت شي من زواجها فجانت تفكر انو هي تعيش حياتها ولهذا السبب مكانت تهتم النا ولاجان عدها عاطفه اتجاهنه مااذكر انو فد يوم والدتي كعدتني مشطتلي شعري الصبح من اريد اروح للمدرسه لو اعتنت بملابسي اني واخوتي اذكر انو كانت مرت خالي الصبح تمشط شعري وهذا كان النقص الي بداخلي وبداخل اخواني كانت ذكريات الطفوله ولازالت  تعصرني من شدت الالم صعب الانسان عندة ام او عندة اب بس يشعر باليتم وهذا كان شعوري  بسبب عدم اهتمام امي كنت اغلب وقتي بالشعر ويوم من الايام وبسب عدم الاهتمام والعنايه تعرضت لحادث وكان بوقتها عمري خمس سنوات جتي بوقتها سيارة تريله واني نضربت ودخلت جوة السيارة وعلى اثرها دخلت للمستشفى اربع اشهر وكان الامل باانو ارجع امشي معدوم بسبب انو سولي ترقيع بقدمي ولكن سبحان الله جبر خاطري ورجعت امشي من بعد معانات اربع اشهر  كانت حياتي بين عدم الاهتمام وبين فقدان الاب وعدم حنان الام وتراكم الظروف خله عندي شي مكسور بداخلي المهم انو الي صار انو اثناء انتقالنه من هذا البيت الي ساكنين بي لغير بيت ولكن  كانت ام الايجار عدها اخ وهذا الاخ كان يجي وياها ياخذ الايجار ويوم عن يوم صارت علاقه بينه وبين امي وكام يكثر بجياته وطلب انو يزوج امي ولكن بيبيتي لمن عرفت كالتلها اذا عرف ابوج يكتلج سدي الموضوع ولكن والدتي مقتنعت بهذا الكلام وجانت تتصرف مثل المراهقات                                                                                                                                                                                                                         ا

                                                                                                                               كامت امي تتصرف مثل المراهقات والي صار انو هذا الشخص كام يتردد على بيتنا هوايه وكام لمن يجي يجيبنه  يجيب وياة مسواك وينطينه فلوس واحنا جنه اطفال منفتهم شنو الموضوع وظل هذا الشخص كل كم يوم يجي وجانت امي تتحضرله تبدل وتخلي مكياج وتنظف البيت واسوي اكل ومن يجي تحبسنه بغرفه واحنا نخاف نطلع منها لان هي جانت تضربنه وجانت كلش قاسيه ويانه ويوم عن يوم ظل هذا يجي ويبات يمنه وبعدها بفترة امي صارت حامل وبوقتها بيبيتي عرفت وامي كالت لبيبيتي اني مزوجته بالسر هيجي كلاوات يعني  واني اذا مزوجوني ترة انهزم وياة وافضحكم كانت بس تفكر بمتعتها وبراحتها ولا عبالك هي ام وعدها اطفال والمفروض تتحمل مسئوليتهم المهم انو بعد ماامي هددت بيبيتي انو تنهزم وتفضحهم بيبيتي كالت لجدي ولخوالي وخافو من الفضيحه وجدي رجال جبير  ماراد فضايح ومشاكل المهم وافقووو ولكن ولد عم امي اعترضو كالو ليش ياخذها الغريب احنا اولى بيها احنا ناخذة وامي ماوافقت كالت لو هو لولا وظلت مصرة وصارت مشاكل الها اول ماالها تالي واخير شي خوالي اخذو اختي الجبيرة يمهم بحجة يخافون عليها وبقيت اني واخوتي يم امي وبدة يضهر معدن زوجها الحقيقي كام يرفض يدفع ايجار وجان يخليها تطلع وياة للزرع بس هي جانت تحب وتهتم بنفسها علمودة وجانت حتى  تسوي شغلات وياة كدامنه  وجانت تصرفاتها كلش محلوة ومرت الايام وكبرنا وبيت جدي رفضو نبقى يم امي ورحنه لبيت جدي واحد من اخوتي اطوع بااشبال صدام وراح وبقيت اني واختي واخويه ومرت علينا ايام مأساويه بيت جدي جنه حالنا حال الخدم جنه نرجع من الدوام ونكعد نشتغل لحد مانهلك والكل يتشرط علينا وبعدين وصلنا لمرحله ملينه اتفقنا انو ناااجر بيت ونكعد وحدنا وفعلا اجرنه بيت قريب من يم بيت جدي وكنه ندفع ايجار من التقاعد مال والدي الله يرحمه وجان اخويه الصغير يبيع داطلي بالسوك هم جان يجيبنه مصرف جانت تمر علينه ايام نموت من الجوع نظل بلا اكل ونشد الراس بالراس وبرغم هذا جانت اهون وارحم من العيشه بيت جدي ولكن بعد فترة امي فلست وماعدها مكان وكامت جابت غراضها وجتي يمنا واحنا منكدر نحجي امنه بعد وكالت على  انو رجلها يجي مرة وحدة بلاسبوع ولكن طلعت دتكذب علينه وكام يوميه يجي وتعاركنه وياة وطردناه ومفاد لحد مافد يوم اجه ابن عمي وشافه موجود وكله اني موكلتلك بعد لتدخل هنا وصارت عركه بينهم وطلع ابن عمي سجينه وضرب رجل امي وامي حاولت تحامي لرجلها ضربها الها هم هو من ضربهم وشاف الدم انهزم وطلعنه اني واختي نعيط ونصيج بالشارع ولتمو العالم علينه واجوي خوالي ودو امي ورجلها للمستشفى وبعد الي صار العالم اكيد مراح تسكت وظل تحجي بينا فرجعنا لبيت جدي وهم رجعنه للضيم والقهر وبعدين صار السقوط واحنا كبرنا  واحنا كان عدنا بيت مالتي ومال اخوتي ولكن ماكنا نكدر نصرف بي لان قاصرين ولمن كبرنه وبلغنه كدرنه نبيعه ونشتري بيت وكدرنا نااثث البيت بفلوس الفرق مال البيت اما اخويه الصغير فتعين بالشرطه وكام يداوم واني دخلت كليه واختي معهد معلمات وبرغم انو وضعنه شويه تحسن ولكن جنه دائما وحدنا اني واختي ولان كان دوام اخويه على الحدود فيبقه شهر كامل يله ينزل كم يوم واغلب هذا الوقت كنا احنا بوحدنا واحنا بنات والعالم لساناتها مترحم والي زاد انو ولد عمنه رفضو نزوج وجان يعتقدون انو هم احق يينه وكام اي واحد يتقدم ولد عمي يخربطون السالفه ويسون مشكله وكامت العالم تبطل تجي تخطبنه وصررنا مثل البيت الوقف لا طايلين السما ولاطالبن الكاع حلوات ومثقفات بس الكل يخاف يتقرب عليهن احنا عشنه حياة صعبه من طفولتنه ولحد ماكبرنا كان المفروض نعيش طفولتنه ونعيش حياة مستقرة ام تحتوينه اهل اب واهل ام جيدين يفكرون بينا بس للاسف احنا صرنا فريسه سهله ياهو الي جاي يستقوي علينه ورغم كل هذا نكول الحمدلله بس مخلصت مشاكلي وكلمن تنسد باب تنفتح ميت باب واني جانت بوبي كلها تنفتح مصايب                                                               

الدنيا جانت تفتح باب وتسد باب وماكو باب تنفتحلي تبرد كلبي المهم                                                                                                                     الي صار انو يوم من الايام كنت بفاتحه مال ابن عم والدي وجانت اكو مرة منزلت عينها من عليه وظلت تباوعلي عرفت انو هاي كرايب والدي  الله يرحمه سلمت عليها المهم  انو بعد كم يوم وصل كلام انو هي تريد تخطبني لابنها وبوكتها حجت ويه بيبيتي وبيبيتي كلتلها على مشكلتنا وشلون انو ولد عمي معارضين نزوج وياهو الي يجي ويسوله مشكله  وعلى حياتنه الصعبه وهي كالت مومشكله احنا نحجي ويه ولد عمها ونقنعهم اني عرفت انو ولد عمي راح يسولي مشاكل  وكلت لبيبيتي ولكن هي كلتلي بيبيتي شوفي الولد واقتنعي ونرد خبر للعالم وبعدين من يتقدمون نشوف شلون نقنع بيت عمامج طبعا اني كنت اداوم كليه مرحله اولى اجه الولد للكليه شافني جان شكله مو حلووو بس جانت شخصيته واخلاقه حلوة الولد كعد تكلم ويايه هو طالب بمعهد اسلوبه وكلامه عجبني وايضا شفت نظرات عيونه جانت فاضحته وعرفت انو كلش نعجب بيه وجان السانه معسول المهم سولفنه واني اقتنعت بي وظليت الليل كله افكر بي وجنت كلش فرحانه متوقعت راح يكون اكو شخص بحياتي يهتم بيه يقلق عليه انسان احس وياه بمشاعر لان دائما جنت اتمنى يجي انسان يعوضني عن كل الي مريت بي كانت احلامي بسيطه مثلي كنت احلم باانسان يسئل عليه من اغيب من اتمرض اشوف نظرات القلق الي بعيونه انسان يقلق اذا اكلت اذا مااكلت اذا مانمت يشيل همي كنت اريد عائله زوج واطفال واهتمام كنت اطمح لهذا الشي  المهم. مرت ايام واجه والد جابر الولد الي تقدملي اجه وخطبني ولكن ولد عمي طردو وكالوله ماعدنا بنات للزواج روح منا طبعا بهاي الفترة صارت علاقه بيني وبين جابر وجانت بينا اتصالات وكلما جان يحجي ويايه يدوخني بكلامه  جنت احس نفسي اروح لغير دنيا ومرة خابرني كلي هدى اني بعد مااتحمل اني من اشوفج اعصابي تتعب ويوميه ابوس بيد ابويه واكله سوي اي شي حتى يقبلون بيت جد هدى حتى ازوجها واهلي يكلولي ها حبيتها حب من اول نظرة ويضحكون عليه ومايدرون بنار كلبي وكلي  هدى اني احبج ومااكدر اعيش بدونج اني عندي استعداد انهزم وياج واني  جنت دايخه بكلامه يمكن حبيت بي الشي الي جنت فاقته بحياتي حبيت اهتمامه اصغائه الي  وداتما وجان لمن يتكلم ويايه جان كلامه هالكد ماحلو يدوخني ويخليني اروح بدنيا من الاحلام جان يكلي اني اريد منج اجيبلي ١٢طفل واني جنت اضحك عليه اكله ليش عيني شكوو وجنت اكله اجل الموضوع لان اني ادرس ومااريد يضيع تعبي وجان يجاوبني ويكلي ولاتهتمين اني اساعدج اني  ويكلي اني امج واني ابوج جان يقنعني بكلمتين وجان  دورات يجيني للكليه ونتمشى انا وياه وهو جان بس يباوعلي ويبتسم وصلت المرحله بحبي اله لاتصدق بيوم الي مااسمع صوته اتخبل اتعلقت بي كلش واني محرومه من حنان وحب وعاطفه وفجاءة اجه انسان قدملي كل هاي الامور المهم انو ابو رد  اجه خطبني وهم طردو ولد عمي وعدت مرات  اجه لحد ماأيس واتصل عليه جابر كلي هدى اول مرة اشوف والدي فاقد الامل بشي لهل الدرجه كلي اني داتعذب بدونج وتالي شلون راح تخلص كتله والله ياجابر ماادري دخلي نصبر شويه بلكي الله وتفرج ومرت السنه ومصارت اي تطورات ولكن بعدها  انو اخويه وخوالي كالو هذا الولد رايدج ومصر عليج وهوايه اتقدملج  كم مرة  اجه وهذا يحبج ورح يسعدج واحنا راح ننطيج واله وزوجوو والي يصير خلي يصير وخلي نشوف شيكدرون يسون ولد عمج وصارت السالفه عناد وتحدي واني رفضت ماردت العالم تتكاتل بينهم علمودي وخفت على اخويه وقررت اضحي بحبي وفعلا خابرت جابر وكتله اني اسفه جابر اعذرني مااكدر استمر وياك واحنا مانكدر نزوج روح شوف طريقك وعيش حياتك...

   ......
   
                                                                                                                       كتله بعد مااكدر اظاهر رب العالمين مكاتبنه قسمه خلي كل واحد يروح بحاله وسديت التلفون وظليت يومين ماااحجي وياة تخبلت حتى دواام كمت مااداوم وامتحانات جانت عندي كمت مااجاوب وماااكل وماااشرب نفسيتي كلش تعبت من ورة جابر وبعدها بكم يوم دزلي خبر وياا مرت اخوو انو يريد يحاجيني كالتلي حاجي ترة جابر تخبل علمودج وصدك خابرته وحجيت وياة وكام يحجي ويصيح ويكلي شلون تسوين هيج بيه متعرفين اني بدونج اموت كتله شسوي ماطالع بيدي شي كتله وضعي تعبان كلي لعد مافكرتي بوضعي اني مافكرتي بيه وظلينه نحجي وعاتبني هوايه وبعدين كلي حسبينه احنا مخطوبين وخلينه نظل نتحاجه لحد ماتفرج وفعلا استمريت احجي وياه لحد ماصار تغير والي صار انو اخويه بالدوام كالوله اشتكي على هذا ابن عمك الي ديهددكم وسوي تفاصخ من العشيرة وكول هذا لاابن عمي ولااعرفه واخويه فعلا سو هيج وخله محامي وبعد معانات طويله خلصنه من ابن عمي وكدر جابر يتقدملي ويخطبني وصرت خطيبته واني ماصدكت نفسي حسيت نفسي داحلم متصورت الي جنت اتمناة راح يصير وحلمي راح يتحقق وبعد مدة اني وجابر عقدنا ومابقه غير اليوم الي نزوج بي وبهاي الفترة اختي نخطبت ومرت الايام وبديت اجهز لعرسي برغم الفلوس الي انطانياها لعرسي كانت جدا قليله ومتسد احتياجاتي بس مهتميت جنت مفكرة الحياة الي راح اعيشه  وياجابر راح تنسيني كلشي اتصورت انو الحب يتغلب على كل العوائق اختي ازوجت قبلي لان الي خطبها كان مستعجل واجه اليوم الي ازوجت بي جنت فرحانه وحاسه الدنيا ماسيعتني اصورت انسدت باب بحياتي جانت تحمل كل الالم والتعب والحزن اصورت هاي الباب. نغلقت مصورت الدنيا هم مراح تنصفني الي صار انو بعد ماخلصت الحفله ورحنه للفندق جابر كان طاير عقله وكل شويه يكلي ممصدك صرتي الي وممصدك هالليله انتي تنامين يمي بس اني لمن بدة يتقرب مني كمت اشعر بضيق وحسيت اريد اختنك وكلما يحاول يلمسني اني اصرخ ماااعرف شنو الموضوع وهو بعدين ضاج وعافني ولمن اهله سئلو كال كلشي تمام واني ايضا لمن سئلوني كتلهم كلشي تمام الحمدلله مرت تقريبا ثلاث اشهر واحنا على هالحاله كلما يتقرب مني اني ابتعد عنه احس شي مربطني مكانت تصير علاقه كامله بينه
....                     
                                                                                                                 ومجان يجبرني بالعكس كان متفهم ومشت ايام واني بدت مرحلت عذاب جديدة ويا اهل جابر بسبب انو اني بديت اداوم كليه وارجع الظهر فكامو يضوجون ويسولي مشاكل وكانو دائما يكلوله لجابر مرتك متحجي ويانه عازله نفسها اني جنت احاول اوقات فراغي وياهم اكضيها ولكن اني جنت طالبه اداوم ولمن ارجع اشوفهم عايفين اماعين كومه اكعد اغسلهن وابدي ارتب غرفتي فمجان عندي وقت ودورات كام يكلي جابر انتي ليش عازله نفسج عن اهلي جنت اكله والله ماعندي وقت وصارت هوايه مشاكل وصدك الي ماعندة حظ لو وين ميروح يبقه ماعندة حظ وفجاءة حسيت بنفسي مريضه وكنت بيت اهلي واختي شكت بنفسها حامل فرحت وياها للمختبر واصرت امي انو اسوي تحليل حمل وللعلم امي رجعت كعدت بالبيت مالتنه ولمن رجعت جان عدها اطفال اثنين وهي كلما تفلس وعدها مصيبه تجينه ذب حملها علينا المهم انو اختي طلعت موحامل واني طلعت حامل ماجنت فرحانه لان مااجنت هالكد علاقتنه الحميميه اني و زوجي قويه المهم كنت حامل وجابر مافرح مثل متوقعت ولكن كللهم لااهله انو هدى حامل وكيفو اهله ولكن بدت مرحله من الالم جديدة وهو انو الطفل كان مهدد بالسقوط طلبت مني الدكتورة انو انام على ظهري ومااتحرك وفعلا ظليت عشر ايام بيت اهلي نايمه ولكن فجاءة حسيت بوجع ودم نزل عليه ولمن وعيت للموضوع عرفت انو الطفل وكع ورحت للدكتورة كالت لازم اسويلج كورتاج بسبب انو الجارة باقيه وسويت عمليه وبقيت بعدها بيت اهلي كم يوم ورجعت لبيت اهل زوجي بس بعد ماالطفل وكع انكلبو عليه فد كلبه والي دمرني انو جابر تغير كلش ومرة اجه كلي اريد احجي وياج كتله اي كلي اني مااريدج اني  راح اطلكج والحاضر والغايب انطيجياة كتله ليش هيج تحجي كلي انتي تعرفين كتله شعرف كلي انتي مسويه علاقه ويا واحد قبلي كتله انت شدتحجي كلي اي السمعتي كلي شوفي لو تبقين هنا اعاملج موعاملت المنحله اخلاقين او تروحين لبيت اهلج واني صعب اروح لبيت اهلي بعد كل هذا الي صار والتحدي بين خوالي وبين بيت جدي اهل والدي والمشاكل الي صارت بسببي صتصعبت السالفه وخفت على اخويه وعلى الحجي الي راح يطلع عليهم بالمنطقه من اطلك اني وهما ماناقصين فكعدت وسكتت وعشت ايام مرة جانو اهل جابر يضوجون مني بسبب دوامي ومجانو يحجون ويايه تعبت كلش وعشت مأساة وتحملت جنت اظل اشتغل لحد مينامون لان ميقبلون اصعد لغرفتي ولمن جانو ينامون جنت اصعد اقرة بحيث لمن اروح للدورام بكوة امشي من التعب انما جابر مارس كل انواع الضغوطات عليه يضربني ويحجي عليه ويهيني المهم بعد الاسقاط الي صار ويايه راجعت دكتورة وكالتلي صاير عندج داء القطط وانطتني علاج لمدة اربع اشهر وماشفت فرق رحت لغير دكتورة كلتلي انتي ماعندج داء القطط والعلاج الي اخذتي اثر عليج سوة عندج تكيس وضعف توبيض وكلت بلكي اروح لغير دكتورة تعالجتي ومرت الايام وصرت مرحله رابعه وصارت هوايه امور تعبتني اكثر واذتني اكثر جنت اني ونسوان حمويني اثنين وحدة منهن طلعت بيت وحدها وبقت وحدة وهاي الوحدة اتسويلي مشاكل لان اروح للكليه وارجع وبعدها صارت حامل وكامت متقبل تتحرك وكلشي وكع براسي حتى خبز كمت اخبزلهم وانظف دورات مااعندي وقت للصلاة وبعد فترة شويه جابر صار احسن ويايه وكمت اريد طفل وظليت من دكتورة لدكتورة وماكو فايدة والسنه الاخيرة بكليه صارت دماررعليه علما خلصت وتخرجت ودورت تعين ومالكيت وصار خمس اسنين لاتعين ولاطفل وبهاي الفترة زوجي جان يشتغل عامل هو حداد ومرة كلي بيعي ذهبج وخلي نفتح محل واني اعوضج بعدين وفعلا بعت الذهب وانطيته الفلوس وفتح بي محل وسبحان الله صار خير من الله وحالته تحسنت واشترالي ذهب واشترة سيارة وجان يضم الفلوس يمي جمعت جمعت لحد مشتريت قطعت كاع صغيرة وسجلتها بااسم امي كلت ماادري باجر شيصير علااقل هاي ضمان وهمين مرت سنتين ومابقيت دكتورة ودكتور مارحت يا دكتورة يكلولي عليها اروحلها وهمً ماصار عندي حمل...

                                                                                                       طبعا سافرت  عددت مرات وسويت عمليات  علمود الحمل وانتظرت النتائج وهم مصار حمل سبحان الله شكد ردت وشكد حاولت بس ماصار عندي طبعا بيت اهل زوجي جانو يعيروني بهذا الشي لان للاسف اخوتي هم الاثنين ازوجو ومصار عدهم بس اختي صار عدها اطفال مع العلم ماعدنا وراثه بهذا الموضوع بس الله مقاسمنه المهم انو مرت عشر سنوات على زواجي وعلى عذابي وعلى انتظاري لفرحه صغيرة ولكن كل صدمه اكول اجتازيتها وتعديتها تجيني الاكبر منها طول هاي الفترة اني كنت بيت اهل زوجي ومتحمله كلامهم ومتحمله اخدمهم وكلشي اسوي مايعجبهم المهم انو مرة صارت مشكله بين زوجي وابوو وجابر كال بعد مااتحمل ماابقه وياهم بالبيت وكمنه وطلعنه  من البيت ورحت لبيت اهلي ظليت عشر ايام و بهاي الفترة كانت عمتي مسافرة بس رجعت خابرت على جابر وراحلهم وماااعرف شصاير بينهم المهم احنا اجرنه بيت ورتبته وكعدت بي الي تغير انو اهل جابر سمعت بيهم ديعمرون البيت وديصبغون وديااثثىون واني من جنت كاعد يمهم غرفتي جانت بالشته اذب عليه مي من السكف المهم اني كلبي كام يلعب من جابر لان مرة اجه كلي حضريلي جنطه داسافر ويا امي اني هم حضرتله الجنطه وراح تقريبا بالاسبوع اكثر ولكن لمن رجع دائما سرحان باله مشغول اني كام يشوفني عبالك اخته مو مرته وميتقرب مني ابد ولايهتملي ومر شهر علىى وكمت اشوف رقم دائما يدك عليه وكاتب عليه اسم ولد وكنت لمن اسئله يرتبك ويغير الموضوع مرة مرتين تكررت هاي السالفه  ومرة هو بالحمام واتصل هذا الرقم واني قتلني الفضول كلت خلي اجاوب جاوبت كلت الووو سمعت صوت بنيه سديته واخذت الرقم خزنته بتلفوني المهم  طلع واني رحت لبيت اهلي لان هو جان يروح يبقه بيت اهله وجان هوايه يروح  يمهم المهم لمن وصلت لااهلي خابرت على هذا الرقم كتله الو كالت الو كتلها ليش تخابرين على رقم زوجي جان تضحك كلتلي اي غير داخابر على رجلي وسدت التلفون اني تخبلت وكمت اعيط واهلي التمووو عليه وسولفتلهم الموضوع وبعدها ظليت اسبوع بيت اهلي وراها اجه هو واخته واخته كلتلي هو صبر عليج عشر سنوات وهو يريد طفل وانتي بعد عرفتي هو مزوج وانتي تكدرين تبقين بيتج وهي بيتها وانتي بعد بكيفج اني حرت شسوي والسالفه مو مال ارجع لبيت اهلي لان العيشه وياهم هم ماتنحمل خليت ورجعت  للبيت وخليت همي وجعي بكلبي وسكتت ورة فترة سمعت بمرته حامل وكام يجي ويذبلي بهل الحجي واهل زوجي طايرين بيها وطلعت هاي الفترة الي جان يغيب بيها عني جان يحضر للزواج  وحتى الكاع الي اشتريتها خلاني ابيع حتى يزوج بفلوسها وكل هذا واني مثل الاطرش بالزفه المهم بعد فترة مرته جابت بنيه والدنيا ماوسعته من الفرحه واني انهملت الى ابعد الحدود المصرف بكوة ينطيني وكام اغلب وقته الها وللطفله وصار عمري٣١سنه واني لاطفل لاوظيفه لاااستقرار لاسعادة ماعندي هدف بالحياة يمكن قصتي مو رومانسيه ومختلفه عن القصص الباقيه ولكن بداخلي الم وصرخه لو اصرخها يمكن تصحي الاموات اني موذنبي انو يكون حظي بالدنيا قليل مو ذنبي ربيت يتيمه وكبرت بالمشاكل والفكر والقهر و الحرمان وموذنبي انو امي انانيه امي الي كلما دكت الجرة بالناقوس وحست باانو هي بعازتنه اجتنه وموذنبي اني يتيمة مشاعر لحد هذا عمري وبعدني احس باليتم بعدني احس انو اني فقدت كلشي بحياتي  كلشي جميل ممكن كان يضيف نكهه لحياتي الانسان الي اصورته راح يعيشني بجنه طلعه عشكه نار وطلعت عشرته دغش الشهادة الي اصورتها راح تفيدني تاليتها تعلكت بالحايط والاطفال الي جنت اريدهم والي جنت اتمنه اعوض بيهم حرماني هم ماشفتهم وتاليتي صفيت بس بعذابي ويخوفي من باجر شضاملي                                                                                                                               

خلصت قصتنه حبيباتي بكل قصه معنى وعبرة والم وحب وكبرياء وبعض القصص تحمل بداخل كل كلمه صرخت وجع وبهاي قصتنه البسيطه والقصيرة عذاب امراة هي شجاعه بصبرها ولكن حزينه بقلبها وبكثرت الاوجاع نحنو نتالم بشدة ونصمت وعيوننا تفضح المنه اقول لها انتي شجاعه لذلك لاتحزني الله يبتلينه ونحنو علينا الرضى بالقدر اصبري فاان الله لايضع حق الصابرين ان الله معكي والله يسمعكي والله اعلم بوجعي اني اتمنى لكي حياة جيدة ولاتيئسي وكوني على يقبن ان من جرحكي ومن اذاكي  ومن جعل منكي رخيصه ومن جعلكي تبكين ومن جرح قلبكي سوف يحاسب على دموكي انا كااامراة وقدر عظمت صبركي على المحن فليكون الله معكي وتحية حب واحترام لكل امراة صابرة ومكافحه وقويه برغم ماتحمل في داخلها من اوجاع

تحيتي لكم جميلاتي

ودمت بخير