رواية لأجل من احببت سأكون قوية الفصل الأول 1 - بقلم امل

بأحد البيوت الفقيره والنصف مهدمه..واهلها بالكوه مرممينها
سما:يمه تعاي آكلي قبل لا يبرد الاكل
ام سما( وهي مريضه وتسند نفسها ع الحايط وبخطوات ثكيله):يمه سما الى متى وانت تشتغلين هالشغله..الي بعمرج هسه بالجامعه يدرسون..وانتي تشتغلين هيج
سما(وهي تلبس الدشداشه والجفيه تلفها ع وجهها وما يطلع بس عيونها):يمه جم مره حجينه بهالموضوع..اصلا الجامعه مصاريفها هواي..منين نجيب فلوس..
ام سما:خليني انا اشتغل..صارلي سنين وانا اصرف عليج..لحد ما تخرجتي من الثانوي..والحين اكدر اكمل وانتي درسي بالجامعه..وانا أتكفل بالمصاريف
سما:يمه شوفي حالتج شلون صايره..انتي بالكوه تمشين من المرض..فشلون تشتغلين..اخخخخ منج يا يمه بس لو تسمعين كلامي وتخليني اوديج المستشفى وانشوف شنو مرضج
ام سما:انا ما بيه الا العافيه بس يتراوالج..يمه ديربالج ع روحج..اخر مره ردتي تنكشفين..لمن تعاركتي وي الولد..يا يمه حاولي تتجنبين العرايك..والله لو انكشفتي محد يرحمج..خصوصا انتي بنت صغيره وحلوه وميت واحد يتمناج
سما:حاضر يمه..اصلا غيرت المكان الي أبيع بيه لاتخافين..بس انتي ديري بالج ع روحج..كلبي ما يطاوعني اعوفج وانتي بهالحال
ام سما:ما بيه شي يله روحي..واصلا خالتج ام طلال راح تجي بعد شوي
سما:همزين ريحتيني..يله مع السلامه (وطلعت لشغلي)
خل نتوقف شوي ونتعرف ع شخصيه سما
سما بنت جميله جدا بس ما تهتم بنفسها ولا تلبس مثل هالبنات..او بالأحرى ما حاصللها تلبس مثل هالبنات..بسبب ظروف عيشتها..لان شغلها يتحتم عليها تلبس لبس ولد..حتى لحد يتعرضلها..هيه تملك كشك صغير تبيع بيها جاي..او جاي وحليب وكيك ولبلبي وهالحاجات الي تسويهم بالبيت..نرجع لمواصفاتها هيه حنطاويه واحلى شي بيها شعرها ثخين واسود وطويل يوصل لحد فخذها..وعيونها وساع وبيها لون رصاصي خفيف وعيونها مكحله من الله وبيهم برائه..وقصيره وضعيفه وعمرها21 ..هيه طيبه وحنونه بس تعرف تاخذ حكها بيدها..والي يدوسلها ع طرف ما ترحمه..واهم شي عندها بهالدنيا هيه امها..لان ما عندها غيرها..وما عندها قرايب غير ام طلال..وهيه صديقه امها وابنها طلال اخوها بالرضاعه..وبنتها جميله صديقتها من الطفوله..بس تكره اسمها فيصيحولها جوجو..وعائله ام طلال..حالتها هم فقيره بس احسن من حاله ام سما..لان ابو طلال قبل ما يموت تركلهم بيت فأجروه وعاشوا بالاحياء الفقيره وهيه تصرف ع جهالها من هالايجار وكدرت ادخل ابنها وولدها للجامعه..وبالكوه مكفيهم الايجار

في بيت احد الاغنياء
ام جود:جود اكعد يمه لا تتأخر ع الشركه
جود بصوت ناعس:كعدت يمه
ام جود:الله يهداك يا ولدي..ليش سهران البارحه وانت وراك دوام
جود:يمه جان اكو شغل ضروري..وكان لازم اخلصه..فسهرت عليه
ام جود:الله يوفقك يا ولدي..يمه نسيت اكولك..جدك وعمك ينتظروك جوه بمكتبه
جود:انشالله يمه
خل نحجيلكم شوي عن هالعائله او بالاحرى لازم اكول الثلاث عوائل
لان جد جود الي هوة ابو علي جان الله  منعم عليه بالشركات والأراضي..وعنده ولدين وبنت
بس جان ما يحب احد من أولاده يبعد عنه فبنى بيت جبير مثل القصر يعني تكدرون تكولون اشترى ثلاث بيوت كبار وهدمهم وبنى هالقصر..بس كان مقسم البيت ثلاث اقسام..جناح لابنه علي وعائلته وجناح لمحمود وعائلته وجناح اله ولام علي..طبعا كان بيت مو جناح  وكل جناح اله بابه الخاص علمود يطلعون الرجال منه بدون ما يحتكون بحريم اخوانهم..وكانوا فقط يلتقون وقت الغده..لان حب كل واحد يحتفظ بخصوصيته (أتمنى فهمتوا قصدي..يعني تكدرون تكولون ثلاث بيوت محطوطه جنب بعض وبيناتهم باب يوصل هالثلاث بيوت ويلتقون وقت الغدا فقط)..وكان ما يحب الخدم..بس بسبب اصرار ام علي حط خدامه وحده تساعدهم..لان البيت جبير ومايكدرون يشتغلون بيه وحدهم
جود عمره 26 و طويل وجميل وعنده لحيه خفيفه زايدته جمال..وجدي ويحب الشغل وروحه وحياته الشغل..وما يحب الطلعه والفرفره وما يحب سوالف الشباب<يعني بالمختصر شايب صغير > وعنده اخ واخت توم وعمرهم 20 واسمه حيدرونور
اما ابو احمد عنده ولد وبنتين..وهمه احمد وعمره 19 وحنان عمرها18 وبدور عمرها 16

نرجع للقصه
جود:طلبتني يبه (متعودين يصيحون لجدهم يبه)
ابو علي:لكيت البنت.الي كتلك دور عليها
جود:والله حاولت يبه بس مالهم اثر
ابو علي وهو يضرب المكتب بيده:شلون ما لكيتهم..واحد بمركزك ما يكدر يلكه ناس عاديه مثلهم..شكلي جنت غلطان من سلمتك كل شركاتي
جود:يبه انا جاي ابذل كل جهدي..وإنشالله الكاهم
ابو احمد:كله بسببي انا..ما نكدر نلكاهم ..لان الله جاي يعاقبني..انا من يوم الصار وانا ضميري يأنبني
ابو علي:هذا الشي مقدر ومكتوب ومو بسبب احد..وإذا جان بسبب احد فأكيد بسبب مرتك ام المشاكل
ابو احمد:بس هم انا السبب لان ما كدرت امنعها من السوته..وحتى من دريت بالي سوته..ما سويت شي بسبب جهالي..والله لو ما جهالي جان طلكتها من زمان
ابو علي:كافي مانريد نعيد الماضي..جود روح لشغلك وحاول تتوصل لنتيجه بأسرع وقت
جود:اوكي مع السلامه
وطلع ولأكه امه:تعال تريك يمه
جود ومبين ضايج:مو مشتهي يمه.   وطلع
نروح ل سما او كما يسمونها ابو علي
كانت تبيع كدام الشركه وبنفس الوقت وصل جود وشافها تركها وصعد لمكتبه
جود:سلطان..هذا من شوكت يبيع هنا(يقصد سما)
سلطان:صارله اسبوع
جود:أبعده من هنا..لان مو حلو بحق الشركه..يجون ضيوف ويشوفون هالواجهة هيج شكولات
سلطان:حاضر استاذ
بنفس الوقت طلب موضف من سما انوا يجيب اربع شاي لداخل الشركه وفعلا راحت حتى توصلهم
وبنص طريقها بالشركه قاطعها موضف الأمن وضرب الصينيه الي بيها الجاي ووگعت وطاح شوي جاي ع أيدها وتاذت
سما(طبعا هيه تثخن صوتها ع أساس انها رجال):اخخخخخخ شبيك اثول متشوف.. هسه ياهو يدفع فلوس كل هالجاي
موضف الامن:اجتنه أوامر من رئيس الشركه انوا تشيل كشكك وبعد ما تبيع كبال الشركه
سما:شنووو!!بس ليش انا شمسوي.. (فكرت شوي ونطقت قرارها بسرعه) عفيه خليني اقابله..يجوز اكدر اقنعه
موضف الأمن:ههههع والله ضحكتني..يعني من كل عقلك يقابل شكولات خايسه مثلك..يمعود هذا رجال مشغول ومايقابل الا واحد بزنس مان مثله
سما:احترم نفسك..وبعدين مو انته تقرر اذا يقبل لولا
الموظف بنضره غاضبه:ترى انطيتك وجه زياده ..يله انقلع بره (ودفعها وطاحت ع الارض)
وكامت سما وطالعتله بغضب:هسه ليش تدفع مو جاي نحجي مثل الاوادم..اووووه نسيت أنكم همج وحيونات مو اوادم..تفووو ع هيج شكولات زفره
موظف الأمن عَصّب ورفع أيده يريد يضربها بس دنكت وشردت وما تدري وين تروح..بس تريد تشرد منه ومايضربها
وموضف الأمن بلغ الموضفين الأمن علمود يدورونها..وهيه ضلت تشرد وسمعت موضف جاي باتجاها..امشي خل ندور هناك..فراحت بسرعه ودخلت بالغرفه المقابيلها وحمدت ربها انوا الغرفه فارغه
بس هيه ما كانت فارغه..خل اشرحلكم الغرفه الدخلتها هيه غرفه الاجتماعات الخاصه ب جود..وهيه متصله بمكتب جود من خلال باب مضلل يعني الي بغرفه الاجتماعات مايشوف شنو الموجود بالمكتب وراح يضن الباب مجرد مرايه كبيره..بينما الي بالمكتب يشوف كلشي بغرفه الاجتماع(اعتقد شايفين هالشي بالافلام من الشرطه تحط المجرم بغرفه ويشوفونا من خلال الزجاج بس هوة ما يكدر يشوفهم..هنا نفس الحاله ومستخدمين نفس الماده بصنع الباب..أتمنى وصلت الفكره)
سما قفلت الباب  واتصلت ع جوجو
سما(وبعينها الدمعه):عمه بعينهم وعين مديرهم الاحول المغرور..رافع خشمه لان هوه غني
سمع جود الحجي..وتعجب منو هذا اليحجي وتوجه يم الباب وشاف الولد الملثم هوه يحجي
سما:تصدكين رادوا يضربوني بسبب مديرهم الغبي..طاح حظهم هانوني بس علمود أبيع جاي..هسه انا بشنو ضارتهم حتى ما يردوني أبيع كبال الشركه..هسه انا بايعه فوك روسهم..(فتحت الشماغ لان انخبص من دفعها وحست بشعرها انفتح ورادت تعدله..وانساب شعرها لاخر ضهرها وع وجهها.. وكعدت ع القنفه ورفعت دشداشتها وطلعت بجامعتها الورديه وحطت رجولها ع الطاوله ..وهنا كانت الصدمه ل جود..ماصدك الي يشوفه..بنت مثل القمر متنكره بشكل ولد..حس روحه جاي يحلم وغمض عيونه وهز راْسه بعدم تصديق)
سما:اخخخخخخخ لو يطيح مديرهم الخايس بيدي..الا اطحنه طحن..الغبي راح يكطع  رزقي(رفع جود حاجبه وضل يباوع بصمت وكملت سما حجي)..انا ليش حظي مصخم ووين ما اروح انطرد..يعني انا منين الكاها من المؤجر الي مكعدنه بخرابه ويبي ايجار عالي..لو من الي كلساع جاحتيني والي يتعرضولي كلساع ..لو من امي المريضه (نزلت دمعه لمن جابت سيره مرض امها).............لالا انا ما ابجي..بس أيدي تعورني لان البغل ألبره ذب ع أيدي الجاي..يله اتصل عليج بعدين
وسدت الخط  وانسابت دموعها..وظلت تبجي بشكل هستيري وبدون صوت
سما بصوت متقطع:ياااربي متى اخلص من هالذل والمهانه..تعبت والله تعبت..مشتهيه يوم واحد أعيش مثل باقي البنات
كامت بسرعه ومسحت دموعها (وضربت خدودها):انا ما راح ابجي بعد ابد وخصوصا كبال احد..انا قويه وما راح انكسر ابد(وضلت تسوي شهيق وزفير حتى تهدي)
ولفت شعرها  وشماغها عدل وفتحت الباب بشويش  وما شافت احد وطلعت
جود حس بتأنيب الضميرلان هوة السبب بالي صار اتصل ع سلطان:لا تتعرضون لأبو الجاي..وجيبلي الشخص الي  راد يضربه
سلطان:حاضر استاذ

نزلت سما ولكت كالبين العربانه ومنجفي الجاي كله..شالت العربانه وراحت وهي تتحسب عليهم

إجه موضف الأمن:طلبتني استاذ جود
جود:اي انته الي ضربت الي يبيع الجاي
موضف الأمن:نعم استاذ..حتى كلبت عربانته حتى بعد لا يجي مره ثانيه
جود:حلو وتفتخر بعد(فجاءه ضرب موضف الامن) اذا ما رحت  وتسامحت منه..وإذا ما لكيته باجر موجود بنفس مكانه اعتبر نفسك مطرود
موضف الامن:بس استاذ انته طلبت
جود:انا كتلك اضربه!!..انا كتلك هينه وأكلب عربانته؟؟
موضف الامن(نزل راْسه):لا استاذ
جود:يله روح

****في بيت ام سما
ام طلال:لهسه ما كلتي ل سما عن مرضج
ام سما:لا وما راح اكللها..لان اذا كلتلها راح تحاول تعالجني..وتصرف مصاريف مالها داعي..وانتي تدرين انوا ماكو فايده من العلاج وانوا أيامي معدوده..بس المشكلة مو هنا..المشكلة شلون راح اكللها الحقيقه الي ضامتها عنها من سنين..ما راح اكدر اكوللها..اذا متت انتي كليلها
ام طلال (ودمعتها بعينها): لا تكولين هيج..انشالله تكومين بالسلامه..وانتي الي راح تكوليلها الحقيقه
ام سما:تضحكين عليه لو ع روحج..انتي تدرين ما باقيلي غير هاليومين..بس الله يخليج اريدج دوم تظلين وياها..وخصوصا بعد ما تعرف الحقيقه..اكيد راح تواجه مشاكل..مع أني ادري ببنتي قويه وراح تكون كدها..وما راح تكون ضعيفه مثلي وتشرد..بس هم اريدج تحسسينها انوا اكوا احد يساندها
ام طلال:سما بنتي الثانيه والله شاهد أني ما افرقها عن بنتي جميله
ام سما بابتسامه صفره:تسلميلي..والله انا بدونج ما ادري شجان صار بيه
.
.
.
.
.
يتبع