رواية لأجل من احببت سأكون قوية الفصل الثاني 2 - بقلم امل

لا تغير شخصيتك عشان يحبك أحد او يعجب فيك، لان بعد فترة بترجع لشخصيتك وبيلاحظ التغير اللي فيك ومابتستمر العلاقة، اللي بيحبك بيحبك مثل ما انت✋
‿ٍ➶⁀➷‿➹⁀➷‿➹⁀➷‿➹ّ⁀ً➷

بينما جانت سما رايحه بطريقها للبيت اجه موضف الامن يركض وقطع طريقها
موضف الامن: احم من يوم ورايح مسموح تبيع كدام الشركه

سما رفعت حاجب:وانتوا كل دقيقه الكم راي..هه اي صحيح نسيت احنه لازم نمشي وره مزاج العدهم فلوس😏

موضف الامن:فوكاتها بعد ما عاجبك..لازم تشكرنه لان سمحنالك

سما بسخريه..ههع اي لازم اشكرك ع تكسير العربانه..شوف جرخها نعوج وتمشي بالكوه..بس ارد اعرف شلون نعوجت. لو غرريلا كامز عليها مو هيج
موضف الامن عَصّب:روح منا لا تخليني افقد اعصابي
ورادت سما تروح

موضف الامن:لا تنسى تجي تبيع هنا
ناظرته سما بطرف عين وراحت

***مكتب جود
كان مندمج بشغله.. ودخل سلطان جايب الاوراق
سلطان:تفضل استاذ(جود أخذ الاوراق وهوة ساكت)
سلطان:ممكن أسالك سوال جود..ء اقصد استاذ

جود رفع راْسه باستغرب:اسأل
سلطان:ليش غيرت رأيك ببياع الكيك والجاي..العاده ما يكسر خاطرك هالشكولات ع كولتك

جود:اكو أشياء انت ما تعرفها فلا تسال(يجوز كسرت خاطري لانها بنت بس هيه ليش متنكره بولد..اكيد عندها أسباب قويه..لازم احاول اعرف السبب بلكي اكدر أساعدها وأكسب بيها ثواب)

سلطان: انا اسف ع التدخل..عن اذنك
وكان يريد يطلع وقاطعه جود

جود:لحظه سلطان..اريدك تعرفلي وين يعيش ابو الجاي
سلطان:هااا..ليش

جود رفع حاجب:صاير تسال هواي هالايام
سلطان:أسف استاذ..راح احاول اعرف بأسرع وقت
وراد يطلع
جود:لحظه..انسه الكتلكياه ولا ادور ع بيته..ودور ع الناس الكتلك عليهم (انا شكو بيها هاي..طبها مرض هيه وظروفها..لا ادخل نفسك بشي ما يخصك..هسه انا خل الكه الي يريدهم جدي..لا هنوب شيخلصني منه)

سلطان:حاضر استاذ (وظل واكف)
جود رفع راْسه وشافه بعد واكف ناظرله باستغراب:نعم شكو واكف روح
سلطان:لا بس اخاف تغير رايك😀
جود:لا روح
وطلع

****سما راحت واشترت حبشكلات وراحت للبيت
سما:هلا بخالتي ام طلال..شلونج..شخبارج
ام طلال:هلا وغلا..هلا بنور البيت..هلا بسورها ونورها

سما:احرجتيني خاله..اول مره احد يهلي بيه هيج..
ام سما:شعندج جايه من وكت

سما:😪شفتي شلون امي تهلي بيه..يمه هاي طرده
ام سما:هههههع وجع كل مره اهلي بيج عدل..بس هسه خفت صار وياج شي خلاج ترجعين من وكت

سما:لا يمه مصار شي..بس جرخ العربانه خرب وطاحت العربانه وانكلب الجاي والكيكات خربن..فرجعت
ام طلال:يااااااا حرامات يعني اليوم ما حصلتي شي وراح تعبج كله

سما:الله الرازق يا خاله..وما مقسوملي اليوم ابيع..صدك يا خاله اليوم اظلين عدنه وماكو جدال..ترى حتى اتصلت ع جوجو وكتلها تجي..ولا تفشليني

ام طلال:ما عاش من يفشلج
واجت جوجو وكعدنه نباوع تلفزيون وناكل حبشكلات
سما:الا ما كلتيلي ..شخبار الجامعه..ماكو واحد منا مناه😉

جوجو:😪جفاف الله وكيلج
سما:افاااا ليش..معقوله الجامعه شكدها وشكبرها..مابيها واحد زين

جوجو:خيه نصهم جكمين ويلعبون النفس..والنص الحلو بيهم..مايعين واخلاقهم سز ورافعين خشمهم ع ما ادري شنو..شنو مخترعين أنكم حلوين..وإذا يعني انته حلو..شنو ما شايفين حلوين

سما:لا والله ماشايفين..غير الواحد يكول الحق
جوجو:انجبي وخل اكمل محاضرتي..المصيبه مو هنا..المصيبه الاجكم من يكعد يتلطلط ع بنيه حلوه وهيه صدته..وإذا حاول بكل الطرق ولكه ماكو فايده..يروح يكللها..اصلا انتي من حلاتج..اكو احلى منج يموتون بيه بس انا ما منطيهم مجال..دخف علينه يا توم كروز..اذا عندك كومه بنات شعدك جاي تتلطلط ع بنيه..لو بس تريد تفشل روحك

سما:ههههههههع هذا يجوز يعيب عليها لان جرحت كرامته ويحاول يغطى ع روحه وكبريائه بالتفخفخ..امشي بس خل نسوي كيك قبل لا يصير وقت الدوام
وراحوا للمطبخ

ام سما بصوت ناصي:انا لازم اروح بعدين وياج للدكتور..لان جاي تجيني الام فضيعه وبالكوه جاي اتحملها علمود لا تلاحظ سما..بس شكلها لاحظت..لازم أكله يكتبلي مسكنات اقوه

ام طلال وبعينها الدمعه:الله يساعدج والله..وَيَا حظ سما بام مثلج..متحمله كل هالالام بس علمود لا تزعلينها وعلمود لا تحس بالضعف انها ما تكدر اساعد امها وتحس بالعازة وضيم الفقر

ام سما:الله يخليج لا تبجين..ما اريد سما تلاحظ
ام طلال وهيه تمسح الدمعه:اوكي انا راح اتحضر من هسه واروح وياج

****بمكتب جود

جود وهو يضرب المكتب:انا يصير اختلاس بشركتي..وين جنتوا إنتوا..وين عيونكم وما تشوفون هالمبلغ الكبير الي انخلس..عود انا معتمد عليكم وطلعتوا مو كفوا

سلطان وهو منزل راسه:😔أسف استاذ هذا كله خطأي كان لازم ادقق بالملفات عدل
جود:هسه تجيبلي هالحرامي وتمسح بكرامته الكاع وتطرده بره..علمود الناس تعرف انوا مو جود الي ينباك

سلطان:حاضر استاذ(راد يطلع ورجع) استاذ نسيت اكولك..استاذ محمد مريض ولازم نزوره ونسوي الواجب
جود:اي اوكي اخلص شغل واروح

******عند سما
وصلت للشركه وكانت تبيع وسمعت هوسة كبال الشركه وانصدمت من شافت رجال مبهذلين حسن(كان دوم يشتري منها ويشاقيها ودمه خفيف ومطيح ميانه وياها بس بحدود عكس الباقين الي جانوا يطالعونها بتكبر وكانت تعتبره مثل اخوها) وجانوا يجرونه من ربطه العنق مالته كأنه حيوان

ركضت سما لحسن بعد ما دفعوه البودي كارد
سما:هاي ليش تعاملون الرجال هيج..إنتوا ما بكلوبكم رحمه
موضف الامن:انته لا تدخل بشي ما عارفه..هذا حرامي ومختلس مبلغ كبير من الشركه
التفتت سما بتساأل ل حسن
حسن:لا والله ما بكت شي..انا ما ادري عن شنو يحجون..ما شفتهم الا فجأة كلولي انته حرامي وشبعوني دك ومذله

سما:لا تظلمون الرجال..يجوز ما مسوي شي..اسمعوا وجهه نظره وبعدين حكموا عليه

موضف الامن:وانته شكو داحس خشمك..ترى انته حيله بياع..لا موضف ولا شي
سما:حتى لو بياع..الساكت عن الحق شيطانً اخرس..وحسن اعرفه وأحسبه مثل اخوي وخوش رجال..خليني اقابل المدير..اكيد متفهم اكثر منكم

موضف الامن:😏لا والله..استاذ جود مو فاضي لاشكالك
سما:اليوم ما اروح اذا ما شفته..هسه انته كله شراح تخسر..بلكي يطلع احسن منك ومتفهم..صدك انته شسمك..
الموضف وهو نفس الي كلب الكشك:اسمي مصطفى..مع اني متاكد انه ما راح يوافق..بس راح اكوله علمود اثبتلك هالشي وافتك من لطشتك

سما:يله
وراح لجود
مصطفى:استاذ هذا بياع الجاي خبص الامه يبي يشوفك
جود عقد حاجب:(هاي شتريد) خليه يدخل(وعيونه بالاوراق)
مصطفى:هاااا
جود رفع راسه:شنو انصمخت..كتلك خله يدخل
مصطفى:حاضر استاذ

وراح سما
مصطفى:يكول خل يدخل
سما:😳صدك قبل ..قصدي احم مره ثانيه اسمع الكلام من اول مره..ناس ما تفهم😎
وفرت وجهها بغرور وراحت سما ودكت الباب ودخلت
سما:السلام عليكم استاذ..ممكن احجي وياك بموضوع اختلاس حسن😊
جود رفع حاجب:وع اي اساس انتي تدخلين بسوالف الشركه <ع اساس اللكافه😁>

سما طنشت حجيه وكملت:اول شي اسلوبك بمعاملت حسن..ترى عيب تهينونه كبال الموضفين وتسحبونه كانوا خروف اذا هوة صدك مختلس فالشرطه هيه الي تتولى امره مو انته..وثاني شي جان لازم تسمع وجهه نظر حسن..لان يكول انا ما اختلست شي..فمايصير تحكم عليه بدون ما تسمعه

جود كام وتقدم ووكف كبالها:اول شي..بطلي لكافه..ثاني شي مو بنت الفكر الي تعلمني شغلي..لو يجوز معجبه بحسن

سما:احترم نفسك(ورفعت يدها تريد تضربه بس جود كض ايدها)
جودوالغضب يطاير من عيونه:مو جود الي ينمد ايده عليه..والله لو ما بنت..ولا جان علمتج شغلج..
سما انتبهت انه كشفها وارتبكت:انته شلون عرفت..قصدي شلون حكمت اني بنت
جود بكذب:مبينه من عيونج عيون بنت..وبعدين ترى حاره وانتي متلثمه بالشماغ..ترى هذا الشي يثير الشبها..اما تصرفاتج وكلامج فمبينه رجال وما بيج انوثه.. مبينه بنت فقر

سما بعصبيه: اذا العنده فلوس وغني يصير متسلط ومغرور وما يحترم مشاعر الناس ويدوس عليهم بكل فرصه يلكاها..وبارد وما عنده احساس وانسانيه مثلك..فالحمدلله اني فقيره...انا عندي اكون فقيره وبنت فقر ع كولتلك..احسن من ما اكون ظالم واظلم الناس نفسك..عالاقل انام ع المخده وبالي وضميري مرتاح

وحاولت تفلت ايدها الكاظها بس جود ظل متمسك فيها وجرها بدون قصد وصارت بين احضانه ووجها طك بصدره بحكم كصرها وسما رفعت وجهها وشافت عيونه المركزه عليها بتفاجأ وهوه من شاف عيونها سرح بعيونها الرصاصيه..اول مره يشوفها عن قرب وترك ايدها بسرعه

وهيه بسرعه وخرت والارتباك واضح عليها وهوة جان بارد وما باين عليه الارتباك او هذا الي بينه لها..وحاول يوخر الارتباك

جود:😏بنت فكر..شفتي واحد غني فبسرعه كلتي خل اصيده واطيحه بشباكي وظليتي تتلزكين

سما بعصبيه:عن قله الادب..اول شي انته الي سحبني مو انا الي لزكتلك..يعني هم اكدر اكول انته الي لكيت بنت فقيره وما وراها احد..فكلت خل العب فيها..بس انا الحمدلله ما راح اكول هيج لان انا تفكيري مو معفن مثلك<ع اساس يعني ما كلتي هالحجي خخخخ>

سما:ثاني شي..ع شنو اتملزكلك مثلا..انته واحد مغرور ورافع خشمك وبارد ودعله..صراحه الله يعين التاخذك..راح تعيش بعذاب..راح ادعياها بكل صلاه الله يصبرها عليك(ورفع أدينها بالدعاء بسخريه وبطريقه مضحكه)

جود تفاجا بطوله لسانها وما عرف شيرد..وكال اي شي خطر اباله

جود:هيووو انتي..من كل عقلج انا اطل بوجهج..وبعدين انا خليتج كبال شركتي لحد هسه لان اشفقت عليج لان بنت وفقيره وكلت اكسب بيج ثواب..فلا تخليني اطردج من كبال الشركه

سما:😏اصلا ما اتشرف اظل بشركه ظالمه وتحكم ع الناس بدون ما تسمعهم وما تكول يجوز يطلعون مظلومين..بس الصراحه لا عتب ع الاسلوب الزفت لموضفين الامن ..اذا انته مديرهم

وطلعت سما وطبكت الباب بقوه
جود:وعمه
سما بصوت ناصي:اليعميك
وراحت خذت الكشك ومشت تدور غير مكان تبيع فيه

جود(خررررب بنيه لو دلاله..البنات بالعاده..صحيح خاينات بس كلهم رقه وانوثه..بس هاي من اي كوكب جايه..حتى بنات الفكر من اشوفهم يحاولون يصيرون رقيقات بس ما يكدرون طبعا..بس هاي اصلا ما كلفت ع نفسها تصير رقيقه....)
قطع تفكيره دخول سلطان
استاذ:لازم نروح للمستشفى
جود:اوكي يله

*****نروح لام سما كانت عند الدكتور

الدكتور:لازم نبده العلاج الكيماوي حالتج كلمالها وتتاخر

ام سما:ما اكدر هسه
ام طلال:لشوكت تاجلين الموضوع
ام سما:ما اكدر اخلى سما تعاني بمرضي..بنتي وأعرفها..راح تحاول بكل الطرق تعالجني..ويجوز تدين علمود العلاج..وانا اول تالي ميته..فماله داعي اتركها بديونها

ام طلال:بس...
قاطعتها ام سما:لا بس ولا شي..ودكتور..انطيني بس مسكنات رحم الله والديك
الدكتور علي:اوكي..هذا العلاج.جيبي من الصيدليه وتعالي اكلج ع طريقه علاجج
ام طلال:مشكور دكتور
وراحوا الصيدليه

****عند جود
وصل للمستشفى بس ماانتبه وما نزل من السياره ويفكر بكلام سما،وباحتمال انه ظلم حسن
سلطان:وصلنه استاذ
جود:هااا..اي،سلطان اريدك تسوي تحقيقات وتتاكد اذا حسن هوة فعلا الباك لو اكو احد وراه،وذب السالفه بيه

وراح اتحمد لاستاذ محمد وبطريق خروجه شاف ام سما وأم طلال..وكانت ام سما جايتها كحه قويه وأم طلال تمسح ع ظهرها وتسمي عليها وطاحت جنطه ام سما وما انتبهت..واخذها جود

جود:يا خاله..هذي جنطتك (وجهها مو غريب علي)
ام سما بصوت ضعيف من التعب:مشكور يا ولدي
جود وهو يتاملها:العفو
وتركهم وهو يفكر..
جود:سلطان..انطيني صوره الي يدور عليهم جدي(م/جود منطي نسخه لصوره المرأة الي يدور عليها جده لكل رجاله)
أنطاه سلطان الصوره وهو ساكت

جود:هيه هيه هاي اخيررررا..شكد انا غبي وما انتبهت..سلطان انته ومصطفى..روحوا بسرعه ولحكوا المرأة الي راحت بهالجهه..ابي تعرفون عنها كل شي..شسوي بالمستشفى ووين بيتهم وكلشي..فهمتوا

مصطفى وسلطان:حاضر استاذ
وراحوا يدورونها
.
.
.
.
.
م/ للتوضيح فقط ()هاي الاقواس حجي الشخصيات بينها وبين نفسها، او توضيح الاحداث بالروايه
اما هاي<>فهي كلام تدخل الكاتبه بالروايه الي هي انا 😌
.
.
أتمنى تعطوني رأيكم بالقصه حتى لو سلبي..لان النقد يخليني اعدل أغلاطي وأحسن كتابتي