رواية لأجل من احببت سأكون قوية الفصل الحادي والثلاثون 31 - بقلم امل

ياااا دربچ..
وحگ ربچ !
آحـبُ:* گلبچ * 😍
يبت عشرين  !
اذا شفتيني ؟
عن عافيتي لٱ تسألين ؟؟ 😊
تراهه العافيه بگربج
ايييي ولج اييي احبببنچ ❤😍
.
.
#وعــلي_بيها_ابتسامه_تريح_المخنوك 😍 #

_____❣️🖤❣️______

سما جانت غرقانه بنص احلامها وهيه لابسه فستان احمر حرير وتمشي ع العشب وداير مدايرها خضره وزرع وماكو اثر لاي اعمار او بيوت..فقط خضره ع مد النظر

سما سدت عيونها واستنشقت الهواء بقوه (الريحه جميله..بس كانوا شامتها قبل ..هاي مو ريحه الطبيعه والورد..هاي ريحه ثانيه ما ادري وين شامتها قبل ..بس تخبل ..من اشمها ما ودي افتح عيني ودي اظل مغمضه واشمها لاطول فتره)
سما وهيه بين النايمه والكاعده وع وشك تكعد ..ابتسمت لا اراديا من شمت عطره <وهيه كل ظنها عطره مجرد عطر شمته بحلم >و دفنت وجهها برقبه جود بس حست بخشونه لحيته فعقدت حواجبها

جود حس بحركتها يم رقبته وكانت ايده ع خصرها فضغط عليه وقربها اله زياده

سما حست بايده ع خصرها ففتحت عينها بتعجب ورجعت غمضتهم من حست بالضوه قوي وعمه عيونها

غمضت عينها وفتحتها حتى تتعود ع الضوه  وحست بشي صلب نايمه عليه وحاولت تتحرك فحست روحها مربطه باوعت تحت لجسمها

وكان جود محاوطها بادينه والفانيله مرفوعه وايده الي ع خصرها داخله جوه الفانيله ورجله حاطها ع رجولها ومقيد حركتها ففتحت عيونها بعدم استيعاب للموقف

رفعت عينها لفوك حتى تشوف الشخص النايم
وطاحت عينها ع جود الي توه  بادي يفتح عينه  وفركهم شوي وطاحت عينه ع عيون سما وابتسم بخفه:صباح الخير

سما رمشت عيونها عده مرات بصدمه وبعدهي مو مستوعبه الموقف:شنو جاي احلم
جود:ليش تحلمين بيه هواي حتى عدالج هسه حلم
سما بدون وعي كرصت خد جود
جود بانزعاج :اه شبيج
سما:يعني مو حلم
جود حط ايده ع خده:لا
سما بعد ما استوعبت كمزت بفزع ودفعت جود ومن سوء حظها كانت هيه نايمه بحافه السرير فوكعت ع راسها من الجربايه

جود كام بسرعه:انتي بخير
سما غمضت عيونها بالم وهيه تفرك راسها:اخخخ يعور
جود مسح ع شعرها:شعدج هيج طفرتي
سما بعصبيه خفيفه:شعدك هنا؟؟..وشوكت اجيت؟وليش؟ وشعدك نايم يمي؟؟
جود:شوي شوي..اول شي خلصت شغل واجيت بالليل وثاني شي..شكو بيها اذا نمت يمج..مرتي ونمت يمها

سما كامت ع طولها:مرتك بحلمك فقط
جود:شوفي شكلج انتي معصبه روحي دخلي اخذي دوش وهدي وبعدين نتكلم
سما باوعتله بغرور :ماكو كلام بينه

جود ما انتبهلها شكالت لان جان يباوع لملابسها (خرررب هاي شلابسه ..ومن اتهور واسوي شي تكعد تلطم وتكول اغتصبتني .. بس لحظه يعني انا جنت حاظنها وهيه هيج لابسه ورجلي ع رجلها العاريه؟؟؟..(غمض عينه ) لا تفكر جود بهالشي ولا تباوع لا صدك هسه اغتصبها عاد شيفكنه .. هنوب ما تسامحني ابد..هوة هيج وشكلها صعب راح ترضه )

****^^
فاتنتي ..
لأنكِ طاغية الانوثة..
أخاف عليكِ مِن جنون رجولتي !
لذلك ارجوكِ ، لاتكوني أجمل .. !✱
ــــــــــــــــــــــــــــــــــــــــــــــــ

سما انتبهت لسكوته الي طال فباوعتله فشافته مركز ع ملابسها ونظراته تفترس جسدها (هذا شبيه ) باوعت لملابسها وفتحت نظرها بصدمه  وبسرعه تحول لخجل فدفعته بسرعه وطاح ع السرير
سما وهيه تركض للحمام:لااا تباااوع
جود ابتسم وهوة مركز عيونه عليها الى ان دخلت للحمام

سما سدت الباب واسندت عليه وهيه تتنفس بسرعه (لا والحظ هسه الا يجي بالليل..هنوب الا البس هاللبس [تذكرت ليله البارحه من فتحت الجنطه ولكت غير الهدوم الي حاطتهم وكانت اكثرها هدوم نوم وبجايم قصيره مع هدوم طلعه فساتين وهيج شي بس ماكو هدوم النوم الحطتهم .. بوكتها ما اهتمت لان هيه متعوده تنام ببجايم برموده وما راح تفرق اذا لبست بجايم اقصر مدام وحدها]

سما(منو الغير الهدوم انا تعمدت حطيت بجايم طويله 😤😤..لحظه معقوله نوير او اسراء بس هيه كانت وياي دوم..لحظه اختفت شوي من دخلنه للحديقه الخلفيه🤔..خل اواجها واتاكد)

سما باوعت لهدومها وهيه واكفه كبال المرايه
رفعت الفانيه وقربتها من انفها وسدت عيونها وشمت عطره بهدومها (خرررب لزك عطره بهدومي ..بس الاعتراف بالحق فضيله ..عطره يجنن )

خذت حمام وطلعت مالكت جود فنزلت ولكت جود كاعد يم جده وجدته وابوه
سما:صباح الخير
الكل:صباح النور
سما:وين البنات
ام جود وهيه توها داخله:متنبلات ما راضيات يكومون..اخخ شبعت منهن مرتين صعدت كعدتهن ويرجعون ينامون
سما:راح اشوفهم

كان بالطابق الاول غرفه الجد والجده وغرفه ام جود وابو جود وغرفه لعمتهم وغرفه لابو احمد وام احمد بس فارغه وغرفه كيان ومرته وانا وجود
وبالطابق الفوك كان غرف نور وزينب وجهالها واسراء وحيدر وبعض الغرف الفارغه للضيوف

صعدت لغرفه نور وفتحت الضوه
سما وهيه تحرك نور:نوروه ..نويرررر..الووووو..ولج كومي

نور لا حياه لمن تنادي
سما:نوير اخر تحذير تكومين لو تشوفين

سما صرخت وكمزت ع الجربايه يم نور:صرصوووووور..يمه
نور كمزت وهيه نص فاتحه عين وجلبت رجلها بالبطانيه ووكعت ع خشمها بالكاع ورجلها بعدهي معلكه بالجربايه
<يعني صار نصها بالجربايه ونصها بالكاع>

سما:😂😂😂😂😂اخخخخخ بطني 😂😂 ما اكدر
نور وهيه مسكت خشمها بالم وبعدهي مخترعه وتتلفت:وين وين وين الصرصور
سما  الي بعدهي تضحك:😂😂 ماكو
نور باوعت لسما شوي تحاول تستوعب:يا كلبه يا واطيه .. طاح كلبي

سما باوعتلها وهيه اتكوم:الظاهر اليوم الطيحه العالمية من السرير
نور:ليش منو طاح
سما:انا هم قبلج طحت (وصفنت شوي)
نور:😈شسويتوا ولكم حتى طحتوا من الجربايه
سما:انطمي كتلج انا طحت مو اثنينه
نور:ههههع ما ادري حاسه جود بالموضوع

سما:هههههه امشي امشي بس خل نكعد الخبله الثانيه
نور وهيه تكعد ع الجربايه:روحي وانا بعدين اجي وراج
سما وهيه تمسك بفانيله نور من جهه الرقبه وتسحبها: لا عيوني مو عليه..قديمه هاي مسويتها انا من قبل وارجع انام ..فامشي كبالي يله
نور وهيه تحط الشال ع جتفها وتمشي كبال سما وراحوا لجهه غرفه اسراء

دخلت نور وانبطحت يم اسراء وتغطت
سما:هيووو انتوا اكعد وحده وتنام وحده..يله امشوا خل نشوف الحديقه ..احنه ما جايين حك النوم
اسراء:اهووووو ياله حلمت حلم حلوو وي واحد صاااك هسه الا تكاطعوني لمن وصلت لجزء الاعتراف .. توه جاي يريد يكلي شي واجيتي نكيتي عليه
نور وهيه مغمضه وتضحك ليكول سكرانه: هوة اعتراف بس من نوع اخر.. يجوز يريد يكولج رجاءا لا تحلمين بيه وتخليني اشوف هيج جهر خايسه مثل جهرتج هههه

اسراء رفست نور ووكعتها:اخخخ شبيكم عليه هاي من وراها انكسر خشمي وانتي تكسرين ايدي.. شنو ناويات تكسروني وتكعدوني ع كرسي .. عاد صبروا علما ازوج وورطوا الرجال بيه

سما تكتفت:المهم مدام كعدتوا ..ارد اعرف ياهو بدل هدوم الجنطه
نور وسما كعدوا عدل وتربعوا ع الجربايه وادعوا البرائه :اي جنطه..ما اعرف اي جنطه تقصدين
سما بعصبيه: تتغيبون حظره جنابكم..ماكو غيركم جنتوا يمي من حظرت الجنطه 😡
اسراء اشرت ع نور:هيه بدلتهم انا معليه
نور شهقت:ايا خاينه بسرعه بعتيني

سما ناضرتها بعصبيه:ليش سويتي جديه
نور تصنعت عدم الاهتمام:مجرد مقلب
سما:عابتلج..هسه شلبس بله من وره مقلبج ☹️
نور:هسه محسستني كاعده وي واحد غريب..ترى رجلج الي وياج فعادي لبسي يمه هالشي وفرحي اخوي شوي .. (ناظرتها بششك مصطنع) انتي ليش ما تردين تلبسين بدلات نوم يم اخوي؟؟ اكو شي صاير بينكم وانا ما ادري عنه

سما ناظرتها بارتباك:اا لا مو هيج بس ما ارتاح بالنوم ببدلات النوم..متعوده ع البجايم
نوربابتسامه خبيثه :اي خليتلج بجايم نص الفخذ..مريحه جدا
اسراء:فضونه..شنو ناويات تتجادلن اليوم كله..امسوا خلونه نزقنب ونستكشف المزرعه
نور:اي صح واهم شي صخلتي ما شفتها فديتها 😍😍😍
سما :بس اكلكم الجلب مربوط مو..ترى اذا ما مربوط ما اطلع منا
نور:لا تخافين. همه كلما نجي يربطونه..فاكيد هسه مربوط
سما:الحمدلله لعد امشن ناكل ونطلع

نزلوا حدر وشافو جود ناوي يطلع بس وكفه جده
الجد:وين رايح
جود: يم الحصونه ما شفتهم من اجيت
الجد:اجل الموضوع ..تعاي شوي اناقش الشغل ومشى الجد كباله للمكتب

سما:الله يعينك جود حتى هنا ما تفتك من الشغل
جود باوع لنور وابتسم وباوع لسما الي فرت وجهها بسرعه حتى ميلاحظ انها جانت تباوعله ودخلت قبلهم للمطبخ

جود تنهد ولحك جده
نور:اووف لازم نسوي شي..شوفيهم والله خطيه اخوي حتى متريد تباوعله..اموت واعرف شنو السبب وره هالشي
اسراء:امشي خل ناكل حتى الواحد يكدر يفكر
اتجهوا للمطبخ

نور:راح اسويلي سلطه احسن من هالريوك مالكم
اسراء:بعدج ع الرجيم
نور:ولا راح اتركه..بعدين هالاكل الصحي احسن من هالدهون الي باكلكم الي تضر الجسم
سما:لو شما تكولين ما تكرهيني باكلنه..صح بيه دهون تسمن او تضر بس ما احس اني ماكله اذا ما اكل  تمن او فد شي من اكلنه الدسم الي ما عاجبج😒
اسراء:ممكن اسدن حلكم وتخلونه نبلع

*****

كانت حنان كاعده ع كرسي كبال الشباك وسرحانه بفكرها وتباوع لبره الشباك بانكسار واضح ع ملامحها

تعدت بدور وشافتها ع حالتها واجت يمها وباوعتلها باستغراب
بدور:حنان شفيج
حنان غركانه بافكارها ومو يمها
بدور جرت كرسي وكعدت يمها وحركتها:حنان شفيج ما تردين
حنان باوعتلها :هااا ولا شي (وردت عينها ع نفس المكان)
بدور:لا فيج شي مو عوايدج تكعدين جذيه مصفنه..العاده لو مكابله التلفون وما يطيح من ايدج لو طالعه وي صاحبتج..شصاير حتى مالج خلك حتى التلفون

حنان:اوووف بدور خليني بحالي مالي خلك شي
بدور كامت:انزين ع راحتج بس شوكت ترحين تشترين البدله ..انا راح اروح وي امي اليوم اشتري تجين ويانه
حنان بدون ما تباوعلها:لا مالي خلك
بدور:لعد شوكت تشترين ترى ماكو وقت ..بعدين راح ننخبص بتحضيرات الخطوبه والتنظيف وما راح نلحك نطلع نشتري
حنان بدون نفس:اووووف بدور لا تحنين فوك راسي..عود كولي لامي تشتريلي اي بدله مالي خلك اطلع
وكامت من مكانها خذت تلفونها ع الطاوله وصعدت غرفتها
بدور وهيه تباوع ع اثر اختها باستغراب:لا اكيد فيها شي هاي..ولا من متى وهيه تخلي احد يشتريلها هدوم ع ذوقه وخصوصا عرس
هزت جتفها بعدم مبالات وراحت تبدل

******

سما وهيه تتمشى بالمزرعه وي البنات وتناظر حواليها باعجاب:واوو انتوا دوم تجون هنا..لو بس بالعطله
نور:كلما صارتلنه فرصه نجي بس اكثر شي جود يجي هنا من يضيك خلكه ويعتني فيها
سما عقد حواجبها بانزعاج (جود جود جود وين ما اولي يحجون عن جود..انا احاول انساه وهاي كلساع مذكرتني)

سما صحت من افكارها ع صرخه اسراء بفرح :ووجع شفيج
اسراء وهيه تصفك بحماس:شوفي شوفي الارانب يبوووي يجنننون😍😍😍
سما باوعتلهم بنفس الحماس:واووووو 😍😍 عشق..شوفي شوفي هذا الابيض جاي يمنه راح اكضه ما اكدر اقاوم

سما تسللت ع كيف وحصرته بزاويه ومسكته:يممممه ناااعم يجنن 😍😍 ما ودي اهده
اسراء:صبري صبري لا تهدينه خل اصوره ..حطيه بالكاع بس حصريه بزاويه حتى لا يشرد

طلعت تلفونها وظلت تصور سناب

نور:كافي خنكتوا الارنب هدوا..بلوه ابتلش بيكم
سما:انجبي اول مره اشوف ارنب عن قرب خل اشبع منه..يبوووي شوفي خشمه  (قربت خشمها من خشمه)يمه كنتش
نور دكتلها صوره بهاي الحركه:ههههههع شنو جاي تلاعبين جاهل لو ارنب

سما:والله احلى من الجاهل كيوووت ما اكدر اقاوم
اسراء:صبري صبري بس هالصوره
نور:يله مصختنها تعبت من هالوكفه وانا بالكوه امشي وي العكاز
سما نزلت الارنب :باي ارنوبي
نور:امشي امشي الله يهديج

اسراء:امشن خل نروح جهه الاسطبل
نور:يله

راحن وكانت منطقه واسعه مسيجه وهادين الخيل فيها
سما:انتوا الخيل دوم مهدوده
نور:لا بس اكو اوقات يطلعونها فيها ..حتى يركضون ويلعبون وياخذون راحتهم خو مو دوم يحبسونهم بالاصطبل

سمعوا صوت نباح من بعيد
سما تناظر حولها بخوف:عندي احساس مو زين راح يصير.. صوت الجلب ما يبشر بخير
اسراء بضجر:راح تخوفوني وياكم من الجلب من كد ما تحجون بيه
نور وهيه متسنده ع سياج الاحصنه:كتلج مربوط بالاسطبل والاسطبل بعيد عنه فشنو الي يخوف

اسراء:طيرتوا فرحتنه بشوفه الاحصنه..شوفوهم شلون يخبلون وهمه يركضون ..تصدكون حلمي اصعد واحد
سما:انا هم مشتهيه اصعد واحد بس اخاف
اسراء:😒اكلج انتي اكو حيوان ما تخافين منه
سما:يوو حقي اخاف بله زكطني او صعدت فوكه وذبني غير ينكسر ظهري
نور:انا مره صعدت واحد بمساعده جود طبعا بس شعور حلووو انج ع حصان ويركض فيج ..سما خلي جود يصعدج وياه بحصان
سما:😒مستحيل
نور:😈شرايج اخليج اصعدين وي جود بالحصان والله فد شي رومانسي 😉وراح تتونسين
سما:😒مو بكيفج..مابي هالرومانسيه شكرا
اسراء ناظرتهم بخوف:بنننات يتراولي لو هذاك الجلب يم الاسطبل😅
سما ناظرت بخوف:😨مو كلتي مربوط
نور:😰 وانا شدراني كل مره يربطونه..شوفن لا تخافن وتركضون مثل الحراميه هنوب يركض وراكم لان هوة عشتو يحرس المزرعه فخل نرجع بهداوه
(التفتت وهيه تتكلم وما لكتهم يمها التفتت وراها بتعجب ولكتهم يركضون)😱خاينااات (التفتت لكت الجلب من بعيد يركض بجهتهم)يمممممه
(حاولت تركض وراهم بس هالشي صعب هيه ورجلها المجبسه ووكعت) ولكم ساعدوني

سما وكفت مسافه عنها من سمعتها وحاولت ترجع تكومها بس من شافت الجلب يقترب رجعت ليوره وركضت وصرخت:اسفففه

نور بخوف:يااا كلبه ساعديني (باوعت للجلب بخوف ومن شافته قريب حيل ما كدرت تكض روحها وظلت تبجي وتذكرت حجي زينب عن الجنانوه)يمه بس لا يطلع بيه جني 😭😭😭 طيح الله حظج يا زنيب ع هالقصص

وزاد بجاها من وكف الجلب يمها وظل ينبح
من جهه ثانيه كان محمد شايل اكل للاحصنه وشاف اسراء تركض وتعدته وراحت لجهه البيت ونور وراها تركض ووجها ما يبشر بخير
محمد:هاي شكو
سما وهيه بالكوه تاخذ النفس :الاسطبل ..الجلب..نور
محمد عقد حواجبه:شبيها نور
سما بصعوبه:طاحت ..والجلب هناك
محمد ما صبر يسمع منها باقي الحجي وراح لجهه الاسطبل وشاف نور تبجي ومنكمشه ع نفسها والجلب ينبح يمها وراح الها يركض ووكف كبالها وحاول يرفع راسها وخايف صايرلها شي من الطيحه
محمد بقلق:بيج شي ..تعورتي بمكان
نور رفعت راسها وعيونها متروسه دموع وهزت راسها بلا
محمد ما قاوم وحط ادينه ع خدودها ومسح دموعها باصابيعه وهيه ظلت تباوعله بصدمه ونست الجلب

محمد:لا تبجين .. دموعج تعور كلبي
نور باوعت لعيونه وصنمت
بس قاطع هالتواصل بالعيون والهيام الي بينهم نباح الجلب
نور من سمعت نباح الجلب شهقت وتمسكت بردان محمد وبخوف:وخرررره وخررره
محمد باستغراب:شنوووو
نور من شافت الجلب قرب لها زياده بدون وعي تقربت لمحمد ومسكته من قميصه بجهه صدره ورجعت الدموع لعيونها وهيه مركزه ع الجلب :وخرررره
محمد ظل يباوعلها بصدمه وهوة يشوف وجها القريب من وجهه بس سرعان ما راحت ملامح الصدمه وظل يباوعلها بسرحان وكانه يبي يرسم شكلها بعيونه حتى لا ينساها من تبتعد

اما هيه فعيونها ع الجلب الي تباوعله بخوف بس من شافت انها تكلم محمد وهوة ما انطه ردت فعل فباوعتله والتقت عينها بعينه القريبه كلش فصنمت من الموقف والي خلاها تصنم اكثر ايد محمد الي حاوطت كتفها فبلعت ريقها من شافت محمد اقترب اكثر وانفه لامس انفها وانفاسهم صارت مشتركه
بس الجلب كانه ما عجبه الوضع وظل ينبح وطلعهم من جوهم وعالمهم الي غطسوا بيه ونسوا الحولهم والوضع الي هم فيه

نور حست ع روحها وحاولت تبتعد عنه ودفعته بخفه ومسكت عكازها وحاولت تكوم بس ما كدرت (يالله ساعدني رجولي مو شايلتني ..لازم ابتعد عنه ..احس روحي راح اموع هنا من الخجل لو ظليت اكثر )

محمد حاول يطرد الجلب بانزعاج(هسه وقتك انته😤) فابتعد الجلب عنهم شوي

من شاف محمد انها ما تكدر تكوم فحاول يساعدها وما يدري انه زاد حالتها سوء وخلاها تخجل زياده من حاوط خصرها بايدينه وكومها بكل سهوله بس هالشي خلاها تقترب منه اكثر بسبب ايده الي ع خصرها بس هالشي الظاهر عجبه لان ابتسم بفرح وهوة يباوع لوجها الخجلان وما تباوع بعينه

ونور حاولت ما تباوعله بس انتبهت لابتسامته وحاولت توخر توترها بعصبيتها بس فشلت بهالشي وبان الارتباك وسط عصبيتها وهيه تمسك ايده الي ع خصرها وتحاول تبعدها: وخررر ايدك..منو سمحلك اتحط ايدك ع خصري ..انته ماتستحي

محمد ابتسم: بعدج تغطين ع خجلج بعصبيه الظاهر ما تغيرتي ..بس لمعلوماتج جنت احاول اساعدج فقط

نور وهيه تباوع للارض وتلهي روحها وهيه تنكت الفستان من التراب وبصوت واطي : بس انته تغيرت وصاير اكثر جرئه ولمعلوماتك ما طلبت مساعدتك

محمد زادت ابتسامته اكثر لدرجه بانت سنونه من سمعها: امممم افهم من كلامج اخيرا عرفتيني ..صارلي فتره ظال عدكم وانتي ما تعرفيني كلت معقوله نست صديق طفولتها

نور :يجوز لو كايل انك انته محمد نفسه ابو زورو😒جان ما صعبت الموضوع
ومشت وخلته بس محمد لحكها وكانه لكاها فرصه يحجي وياها لاطول فتره ممكنه

محمد:معناتها بعدج تذكرين اخر لقاء
نور اذكرت القلاده ومن باسها ع خدها بوسه بريئه قبل لا يركض بسرعه ويبتعد وخدودها صاروا ورديات من اذكرت السالفه وفضلت تسكت احسن

محمد من شاف تعابير وجهها وشاف وجهها الابيض الي كساه اللون الاحمر ففهم انها تذكر فابتسم بسعاده وهوه يمشي جنبها:انزين بعدج محتفظه بالقلاده
نور حطت ايدها ع القلاده وكانت لابستها ومخبيتها تحت ملابسها وحاولت ما ترد عليه وتمشي بسرعه

محمد حاول يفهم ردها من خلال حركاتها وتعابير وجهها والظاهر نجح وعرف انها لابستها وظل يبتسم :تدرين انج اليوم ككتاب مفتوح وفهمت انج لابستها
نور باوعتله بصدمه وبسرعه وخرت نظرها وانغاظت من ابتسامته: تدري انك تبط المراره لانك دوم تبتسم

محمد:ههه شسوي مو بيدي فرحان..من احجي وياج لا اراديا ابتسم
نور ناظرتله بتشتت وكانها غرقانه بالتفكير بس بسرعه نفضت افكارها وبعدت نظرها عنه وابتعدت عنه

محمد وكف مكانه وهوة يباوعلها من بعيد:راح يجي وتبادليني الشعور..اتمنى هالشي قريب
ابتسم والتفتت وراح باتجاه الاسطبل

كل واحد راح بجهه وما انتبهوا للشخص الي يراقبهم وحلكه مفتوح من الصدمه
سما:😳شنو جاي يصير هنا😧 لازم اعرف كلشي

بعد ما محمد راح عن سما لجهه نور
سما حست بتانيب الضمير لان تركت نور ولحكتهم وظلت واكفه بتصنم من بعيد وهيه تشوف الي يصير

مو بس هيه شافت هالشي الواقع حتى مصطفى شاف هالشي..بس مو من البدايه مثلها.. لحك بس ع اخر مقطع

نور ركضت صعدت لغرفتها وما ردت ع صياح اسراء وهيه تكلمها ماتبي احد يشوف ملامح وجها الي تكشف كلشي

كعدت ع سريرها ومسكت الكلاده وابتسمت ( يا ترى شفهم من تصرفاته..يحبني مو ..لالا  لا تاملين روحج وايد هنوب ينكسر كلبج )

.
.
.
هلووو شلونكم
صراحه البارت ما كمل بس ما حبيت اطول عليكم اكثر وكلت انشره

المهم اريد اسالكم عن شي
الاشعار الي احطها تقرونها؟؟يعني تعجبكم؟؟ لو ما حاجه احطها ..اتمنى تكولون رايكم بصراحه لان اذا مو مهمه فماله داعي اضيع وقتي وادور شعر احطه