رواية لأجل من احببت سأكون قوية الفصل الثلاثون 30 - بقلم امل

#آآآآه
لـو تـعرف معزتـك
جـا عـفت روحـك
#واجـيت
~~~💔❤️💔~~~

فتحت عيونها بصباح جديد وحست جسمها متكسره وهيه كاعده ومتكرفصه بالزاويه وتذكرت كل شي صار وياها وباوعت للسرير وما لكت جود
كامت بصعوبه وهيه تتالم وهيه تفرك رقبتها وتحسها متشنجه بسبب نومتها  واتجهت للحمام وقفلته ووكفت كبال مرايه كبيره ووخرت الجرجف وظلت تناظر الاثار الي بجسمها والبصمات الي خلاها بكل قطعه بجسمهاوظلت تنزل دموعها لا اراديا
( انا عايشه بخوف ورعب ورضيت اني اتفق وي واحد واطي مثل عزيز بس علموده علمود لا ياذيه وهوة الغبي كل الي هامه جسمي ويمشي وره غرايزه وما هامه شنو راح احس وما همته مشاعري وما همه كل توسلاتي ورفضي ..ما اصدك شلون حسيت بمشاعري تحركت لواحد مثله .. جنت احلم بزواج وزوج رقيق وليله زواج مثل كل بنيه تكون خجوله وهوة يقدر هالشي ويحاول يحجي وياي ويطلعني من هالخجل بهدوء وتكون احلى ليلى بحياتي ..مو مثل حالتي مو بهاي الطريقه كانه اغتصاب )

مسحت دموعها وترست الحوض بماي دافي وكعدت بالحوض وغمضت عيونها بالم وبعدين حست براحه واسترخاء (كل الرجال نفس الشي ..كلهم حيوانات .. جنت اظن الرجال اصناف بس طلعوا بالاخير شكثر ما اختلفو فبالنهايه يبون جسم المرأه بس..هذا القاسم المشترك بينهم .. 😏وانا الغبيه من كل عقلي بديت احس بشي باتجاه واحد ما يهتم بيه فقط يهتم لجسمي ..بس وعد مني ما راح اخليه يلمسني لو هالشي عنه موتي..انا الك يا جود..انا من كتلك احب واحد واموت ولا اجيسني جنت اجذب بس هسه صدك اموت ولا راح اخليك تلمسني)

طلعت لفت جسمها ودخلت لغرفه الملابس وبدلت وبيدها منشفه صغيره تنشف شعرها وتوجهت للمرايه تمشط  وتحط مكياج وحطت كريم اساس ع رقبتها حتى لا تبين الاثار
شوي ودخل جود:الظهر راح يطلعون للمزرعه
سما ساكته وبداخلها غيظ وكره وتحاول تمسك نفسها
جود من شاف ماكو رد كمل كلامه: ممكن نكمل حجي امس
سما هم لا رد
جود:ممكن تكليلي شنو بينج وبين عزيز ومن شوكت تعرفينه
سما حطت المشط ع الميز بعصبيه ورادت تطلع بس جود سحبها من ايدها بعصبه:😠انا وي منو احجي
سما سحبت ايدها بعصبيه:لان ما اريد انزل نفسي وارد ع حيوانات
جود مسكها من فكها:احجي عدل ولا تعصبيني زياده وخلينه نحجي بهداوه..شنو بينج وبين عزيز..هوة الي تحبينه مو
سما دفعته:لا ما احب عزيز واكرههه واكرهك هم..انته وعزيز نفس الشي كل الي يهمكم جسمي اثنينكم حيوانات (نزلت دموعها) ليش محد يحس فيني وليش محد يقدر مشاعري

جود يحاول يهدي نفسي:لعد شلون عرف مكان شاماتج
سما وهيه تمسح دموعها:لان حاول يغتصبني مثلك..بس الفرق انه فشل وانته نجحت .. وظل يلاحكنه وحتى انه جان يدخل بيتنه بدون اذن لان احنه بس حريم وخلانه نعيش برعب وهالشي خله امي تخاف منه وخصوصا(وخصوصا بعد ما كتل محمود)

جود:خصوصا شنو
سما:انا غيرت اسمي واسم امي ورجعنه لهلمنطقه الي لكيتنه بيها بسبب عزيز علمود لا يلكانه

جود ناظرها بشك(حاستها مخبيه شي):كوليلي كل السالفه من البدايه وشلون تعرف عليج عزيز

سما انقهرت لان حسته من نبره صوته شاك بالسالفه وما مصدكها بعد السواه:انته اصلا مو من حقك تسال عن الي صار بعد الي سويته

جود:من حقي اعرف كل شي عن مرتي
سما:لا مو من حقك..مثل مو من حقك تغتصبني مع ذلك سويته فلذلك هذا هم مو من حقك
جود:شلون ترديني اصدكج وانتي قبل زواجنه تكولين احب واحد وبيوم زواجنه صدمتيني انج تفضلين الموت ولا المسج علمود التحبينه..اذا مو عزيز التحبينه لعد منو ؟؟

سما:انا كلت هيج حتى تطلكني مثل ما اتفقت وي عزيز وارتاح من كل السالفه

جود:😏وترحين لعزيز مو
سما ناظرتله بعصبيه وكره:ماكو فايده منك ..والحجي ضايع وياك..وانته مو كفوا الواحد يكولك شي لانك دايما مقتنع اني انا الغلط وانته الصح فماله داعي هالنقاش

ورادت تطلع بس جود مسكها وهوة يحاول يهدي:مو قصدي.. كملي وراح اصدكج او ع الاقل احاول

دك تلفونه وكان السكرتير ورد عليه وسما طلعت
خذه ساعات وهوة يتناقش بالشغل
وسده واتصل بسلطان
جود:ليش ما كتلي ان وفد الشركه الي راح نتعاقد وياها راح يجي
سلطان بنعاس توه كاعد:ليش انته رديت!!!..عرفت بهالشي بعد ما طلعنه من عزيز الكلب واحاول اتصل عليك وانته مطنشني
جود:اووووف جنت معصب ومالي خلك ارد ع احد بوقتها..المهم الاكيك بالشركه ونكمل الاوراق قبل لا يجون
سلطان وهو يتثاوب  :اوك
جود:مو تنام..هسه اطلع للشركه
سلطان يفرك عيونه بملل:اوك اوك فهمت

جود تذكر شي :اه سلطان
سلطان:هاا
جود:بالنسبه للخطوبه..ادري الي صار يجوز زعلك..بس ترى والله محد قابل عن الي صار وحتى جدي رزل ام احمد كبال الكل ..وصراحه انا ما ادري شلون

سلطان قاطعه :ولا يهمك انا نسيت السالفه..ماكو قسمه بينه
جود:اتمنه صدك ما زعلت
سلطان:لا اطولها وهيه كصيره..وخليني اكوم ابدل ترى اخرتنه ع الشغل

سد التلفون وراح للمطبخ ولكه سما مسويه الريوك وكاعده ع طاوله الاكل تاكل ..فاخذ توست ع السريع وحط كيمر ومربه وغطاه بقطه توست ثانيه
جود بسرعه وهو ياكل التوست:بسرعه امشي بدلي ..طلع عدي شغل مستعجل ..راح اذبج بيت ابوي واروح للشغل
سما باوعتله بطرف عينها:والمزرعه
جود:ما راح اكدر اروح ..انتي روحي وياهم
سما بصوت ناصي:بعد احسن ما اشوف وجهك
جود باوعلها بنص عين:سمعتج
سما كامت توجهت لغرفتها  وهوة تنهد بملل وراح يبدل ويحظر اوراقه من مكتبه

*****

نور تريكت وراحت بقسم جدها ولكت الهوسه كايمه والجهال صريخ
نور:😳هاي شكو
اسراء وهيه ساده ذاناتها:بعدج ما شفتي شي

كان سلمان ومهدي صريخ وواحدييركض وره الثاني ع ابو يلعبون
وتعده عبوسي يمها وهوة يصرخ بس كان صريخ مال لعانه مو مال بجي او زعل
نور:حتى هالبكه عبوسي..هاي شصاير..شلون تحولوا
اسراء:ههههههع عضهم جلب وانسعروا
نور:لا جد شنو هالتحول امس شحليلهم ونايمين جنهم ملائكه
اسراء:عيني اول ما اجينه جانوا مسطورين من الطياره ودايخين وناموا..وجانوا بعدهم ما متعودين عليكم..وبالمختصر جانوا محترمينكم وخل اكولج معلومه احترامهم ما يطول اكثر من يوم ..وهسه طكوا ميانه وبان وجهم الحقيقي

طب حيدر:ول ول شنو هالصريخ وصل لداري
اسراء:عادي عادي راح تتعود مثل ما تعودنه
زينب بعصبيه وهيه تبدل بنتها:انته وياه عقلوا لا بالنعال كايمه..فشلتونه ع الاقل عقلوا بس من نطلع

كعدت كبالهم بالقنفه:خرررب راسي مصدع..اسراء كومي سويلي جاي

اسراء:😒شنو اشتغل عدك..هاي اختك يمك خل تسويلك
نور:😒اخته مكسره منين بيها تكوم وتسوي..انا اريد احد يسويلي
حيدر:لا الا منج..غير مرتي المستقبليه لازم تكومين بواجباتج من هسه
دخلت بدور وهيه تباوع بصمت وكعدت
حيدر يبسمر:صباح النور
بدور بشبه ابتسامه:هاا!صباح الخير
حيدر:ولج لهسه كاعده كومي سوي جاي
اسراء كتفت ايدينها:انته ما ملاحظ انك عايش الدور هواي..حتى لو شقه ترى مصختها
حيدر ضيق عيونه:تكومين تسوين جاي لو ابتلي بيج
بدور تنقل بنظرها بينهم : اذا تريد انا اسويلك جاي
اسراء:اي رحمله والديج فكينه منه
حيدر:لا الا هيه (ناظر لاسراء وغمزلها)منج يطلع احلى
بدور حست كلبها انكمش وتباوعلهم بانكسار وكامت بسرعه صعدت لدارها

نور باوعتلها بحزن وسكتت ما تكدر اسويلها شي
حيدر شمر المخده ع اسراء:دكومي لا اكتلج هسه..ما احب الدلال الزايد..اعلمج من نزوج اذا ما شبعتج كتل اذا ما اسمعين الكلمه من اول مره

اسراء باوعتله بغيض:كايمه اسوي بس مو لخاطرك لان انا هم اريد اشرب..بس بطل سوالف مال مرتي وبطل هالحركات مال تمثل دور الزوج الحمش

حيدر:حمش منين جايبتها هاي ولج..بس بسيطه اعلمج الحماشه ع اصولها يبت

اسراء راحت للمطبخ وهيه متنرفزه

نور ناظرت لحيدر:اكلك انته تحجي صدك وياها لو تشاقه
حيدر صفن شوي وتعمق بافكار وناظر لنور:انتي شتعتقدين
نور:والله ما ادري..نوبه احسه شقه..نوبه احسك تحجي صدك وليكول صدك راح تزوجها..كولي انته تشاقه لو صدك راح تزوجها..ترى حيرتني تصرفاتك(انتظرته يتكلم بس ظل ساكت فكملت حجي) يعني انتي من تحجي هيج اشوف ملامحك جاده وتحجي بثقه فاشك بس بعدين تظل تضحك من تشوف اسراء معصبه فاكول هذا يشاقه.. ديله احجي صدك تزوجها

حيدر ابتسم :الله واعلم شيصير بعدين
نور ناظرتله بغيض:يعني شفهم من الحجي اي لو لا
حيدر ضحك:فهمي الي تفهمينه..وبطلي فضولج الزايد هذا
نور:😒غثيث ..ما ينوخذ منك لا حك ولا باطل

حيدر طنشها وكعد يلعب بالنقال

****

المهم نسرع الاحداث وجود ذب سما يمهم وطلع للشغل وما اجه حتى ع الغده

نور تكلم سما:ما اصدك راح تخلين جود وترحين
سما:شسويله هوة ما يبي يجي عنده شغل مهم
نور:اي بس انتوا توكم معاريس شلون اتركينه وتجين..اوووف هسه انتوا لازم بشهر عسل يحظي

اسراء بصوت واطي لنور:راح تعبنه وتقنعنه بجدي خالي بلاش
نور بنفس الهمس:اي والله ما يسوه البارحه ما كدرت انام من وقت وبس افكر وادور خطط حتى اجمعهم
اسراء:بله نوريني شجنتي مخططه اسوين وياهم
نور:والله انا بس  فكرت  بس ما لكيت خطه 😅🤓

اسراء:😒جنت متوقعه هالشي..كلت شعجب شغلت مخها ولكت خطه
نور:😒احترمي نفسج ..شقصدج انا غبيه
اسراء بنص عين:لا حشاج

زينب:سروش..ولج تعاي ساعديني ..وتعاي طلعي جنطي وجنطج للسياره
اسراء:اوووف تردين تكسرين ظهري..منين بيه..جنطتج شكبرها وشكثلها..اكلج شنو حاطه بيها..ليكون حاطه الاثاث بيها بالغلط
زينب وتحاول تهدي بتها وجهالها داير مدايرها يصارخون:اهووو سريوو سحيهم لحد ما توصلين مو الا تشيلين .. لا تشلعين كلبي مو كافي الجهال

اسراء: انزين راح اشيل..مصيبه الي تصير عدها اخت جبيره ومزوجه..اتظل بس للكرف حك خواتها ..الك الله يالصغير

زينب:😒هيه جنطه فلا تسوينها دراما..ويلا تحركي بسرعه

اسراء بدت تجرها لبره بصعوبه ومن وصلت يم الباب كان اكو علوه..فهيه ما تنبهت وظلت تسح فيها لمن وصلتلها فعلكت تاير الجنطه بعلوه الباب فاخذت تسحها بالكوه ومو كادره
بهالوقت جان حيدر يم محمد بالسياره يصعد الجنط وهوة راجع شافها وهيه تسحب بالجنطه ومو كادره فوكف يطالعها وهوة كاتم ضحكتها عليها
حيدر:لو تبيضين ما راح اطلعينها 😂😂😂
اسراء:😡انجب انا بروحي تلفانه اعصابي من الجنطه فلو تسكت احسن
ورجعت تجر فحيدر تقدم لها حتى يساعدها وهوة يضحك فمن وصل يمها وصار وراها انفلتت يده الجنطه  ووكعت عليه يعني صار ضهرها ع صدره..بس مو كلش عليه تميل لليسار يعني صارت كانوا جنبه ..فهو كرد فعل مسكها من خصرها حتى لا تتاذه..وهيه من حركته كرد فعل بعد ما طاحتوا التفف بجابنبها حتى تشوف الطاحت عليه وهوه التفت بنفس الوقت وبلعت ريقها من شافت عيونه القريبه وانفها طخ بانفه .. رمشت بعينها بعدم تصديق وتحاول تستوعب الموقف

فبسرعه رادت تكوم بس حست بايده الي ع خصرها فدفعتها وكامت بارتباك :انته انته..انته شجابك وراي
حيدر بابتسامه:ع اساس جاي اساعدج بس شوفي القدر 😉
اسراء حست الدم وصل لراسها  فتكلمت بسرعه: انته شيل الجنطه -وركضت بسرعه لداخل

زينب لاكتها:بعد شيلي باقي الجنط
اسراء وبعدهي مرتبكه وبعصبيه خفيفه:مابي اشيل شي انتي وديهم
زينب ناظرتها باستغراب:فيج شي!!
اسراء بارتبك:انا!!شفيني..ما فيني شي..ابد هاي انا شوفيني مفيني شي
دخل حيدر وهوة ينكت هدومه: مافيها شي بس انفلتت اليده ووكعت .
زينب شهقت:كسرتي يده الجنطه..هسه شلون ادبر عمري فيها

اسراء ادعت العصبيه حتى تفلت وتصعد فوك وتبتعد عنه:هسه هذا الهامج الجنطه..وما همتج الحماره الي طاحت..ما تكولين يجوز تاذت
حيدر:اممم يجوز طاحت ع شي ناعم وما ياذي ..فماله داعي تخاف عليج

اسراء ما باوعتله بس فرت وجهها بعصبيه وراحت
زينب:شفيها هاي
حيدر:اندري عن اختج دوم معصبه
زينب:جانت شحليلها بس منو اجينه هنا وهيه دوم معصبه..(ناظرت لحيدر بشك)😒ولللك اخاف سويت شي عصبها
حيدر ناظرها ببرائه:اااناااا..افاا ما توقعتها منج..دوم ظالمتني..انا توني طاب وشفتها طايحه
زينب:شدراني بعد..انته دوم تتناكر وياها..كلت اخاف بعد عصبتها..المهم رحم الله والديك شيل الجنط وديهم
حيدر:تددلين مرت الغالي
نزلت الجده وكانت تسند ع الجد وتنزل الدرج
حيدر راح ابسرعه وباس روسهم
الجده:منو انت
حيدر:حيدر يا جده شنو نسيتيني..حفيدج
الجده:ما اذكر عندي حفيد بهالاسم
حيدر:شنو تبريتوا مني وانا ما ادري
الجد:هههه معليه يا ولدي ذاكرتها وكلمالها وتصير اخس من الاول..المهم طلعت الجنط كلهم
حيدر:اي كلشي جاهز بس جود ما راح يجي عنده شغل مهم
الجد:الله يوفقه انشالله..لعد امشي خل نحرك ياله نلحك
وحركوا كلهم باتجاه المزرعه وكان طريق طويل فيهم الي نامو وفيهم الي ظل كاعد ويستمتع بالمنظر ..ووصلوا للمزرعه العصر
وسما تناظر المزرعه بالسياره باعجاب كانت تجنن ومنظر الخيل وهيه تركض داخل السياج زاد جمال
نزل الكل بتعب
اسراء:يمه تكسرت..طريق ساعتين ..يمه مابيه حيل
نور:ولج تعاي ساعديني اطلع من السياره
اسراء:مابيه حيل متكسره
نور:😒نذله..سما حبيبتي ساعديني وجيبي العكازات هم
سما وعينها تتلفت حواليها بعدم تصديق:تجننن ما جنت اظن اكو هيج مكان حلو بس بالافلام
نور:الوووو ممكن احد يساعد
سما انتبهتلها:هااا سوري صراحه منبهره بهالمكان
نور:عادي عادي بداياتنه هم جانت هيج..بس صراحه المزرعه كلمالها وتحله والسر انوا اخوي يعتني فيها ويعشقها ..هاي المزرعه عشق اخوي وجدي اثنينهم يحبونها
سما:اي اخو
نور:اكيد جود
سما:اهااا (سمعت صوت نباح جلب) يمه شنو اكو جلاب هنا ..😰انا رعبي الجلاب
نور:هههههعع بس واحد ..هذا جلب جود..صراحه انا هم شوي اخاف من الجلاب بس مو كلش..بس صراحه جلب جود الاسود يخوف..مو مثل باقي الجلاب..انا هم اموت منه رعب ..تحسينه باي وقت يهجم عليج..احسه مو اليف بس وي جود يتغير ويمد لسانه ويلهث عود شوفني بريئ..بس اذا احنه يكشر عن انيابه وينبح اذا ما ركض وراج

سما:😱خرررب لا تخوفيني زياده..والله الحين ارجع تره
نور:وين ترجعين بعد ..انجبي وكعدي..واصلا الجلب يربطونه اذا اجينه ..فاكيد هسه مربوط
اسراء تشم الهوه بقوه:يا اخي حتى الهوه هنا يفتح النفس..حتى النفسيه والمكتئب يرتاح بمجرد ما يدخل هنا..متحمسه افتر..امشوا خل ندخل بسرعه نبدل ونطلع نفتر..ترى بس اسبوع ظالين وما ابي اضيع ولا لحظه

ودخلوا كلهم
وسما انبهرت من الصاله اول ما دخلت وضلت تتلفت :واووو تجنن صح بيت المزرعه اصغر من بيتكم  بس احلى الديكور والمنظر وكلشي  خيال
اتجهت للشبابيك وكانوا ع طول الجدر وتعكس منظر الحديقه تفتحه وتكدر تطلع للحديقه..صاير كانوا باب زجاجي اكثر من انه شباك

وظلت تدخل بمكان وتطلع من مكان بانبهار
****^

عند حنان:يمه انا راح اروح وي سوسو اشتري بدله حك العرس
احمد:انتي هم حاسبه هذا عرس..انجبي وكعدي وبلا بدله وبلا خرابيط
حنان:😫يمممه فدوه ابي اشتري بدله..شتبي الناس تكول عني عرس اخوها الوحيد وطالعه مبهذله..ابي اشتري بدله واكسسوارت
ام احمد:اوك بس اخذي وياج بدور خل تشتري بدله هم
حنان:اوووه يمه هنوب نتاخر ياله الحك افتر ع بدلتي..اخذيها وياج انتي من ترحين للسوك..وبعدين انا وصاحبتي شداحسها هيه بالنص (اذا خذتها وياي راح تكتشف السالفه واني راح اقابل علاوي)
ام احمد:انزين بله هذره زايده..وولي من كدامي وراي شغل وايد
حنان باست امها بسرعه وبحماس:يسسسس شكرا يا احلى ام
ام احمد ابتسمت

*****

جود ومكتبه متروس اوراق وحالته حاله ..رفع راسه ومسح ع وجهه بتعب:اووووف متى موعدنه مع الوفد
سلطان:بعد ساعتين
جود:اوك نلحك انشالله..المهم يوسف كال عرفوا منو الي حرض ع كتل الممرضه وجاي يراقبونه..ابيك تروح تشوف يوسف وتاخذ كل المعلومات عنه وتجيبها .. هوة كالي يبي يقابلني وينطيناهم بس مالي خلك اكابل وجهه..(ضغط بايده ع جبينه وغمض عيونه وفتحهم ) واي نسيت.. قبل لا تجيب البيانات ابيك تخلي واحد من جماعتنه يراقب هذا ابراهيم وتراويه كل البيانات عنه وما ابيه يغيب عن عينه ثانيه ..واي اجر يبيه مو مشكله

سلطان:المن مو كلت الشرطه تراقبه
جود:احتياطا اخاف يغيب عن عيون الشرطه ع الاقل ما يغيب عن عينه..بس ما اوصيك ابي تختار واحد نبيه وخبره
سلطان: ولا يهمك..بس انطيني رقم يوسف حتى اتفق وياه وين نلتقي
جود:اوك..(انطاه التلفون)هاك اكتبه

خابر ع يوسف واتفقوا ع مطعم يم الاسواق
وهوة جاي يصفط شاف سوسو وحنان باوعلها شوي وراد يروحلها بس تراجع (البنت رفضتك وانتهه المواضع فلازم اتجنبها احسن شي ..لان صارت مو نصيبك 😪)

*****
فوت...! هسة براحتك☹️✋
ماصد عليك😞
اللــــﮧ مايقبل..!✖️
لأن مو مالُتْـــــــي😔💔

****
راح دخل للمطعم وسلم ع يوسف
يوسف:ماكان له داعي لهلعزيمه..حتى لو بالسياره ومتفقين ترى ما اطول السالفه ..ما كان لازم اتعب نفسك
سلطان:والله مو علشانك بس انا فاطس جوع حتى غده ما تغديته ..جود هلكنه هلك حتى نخلص الشغل بسرعه فما خلانه نطلع باستراحه الغده

يوسف:ههههههه قصفت ام الجبهه..وانا عبالي علمودي وعايش الدور

حطوا الاكل كبالهم:وصل الاكل بس ولا نفس .. (فرك ادينه ببعض وطالع الاكل بعشق )ما احب اتناقش وكبالي الحب
يوسف:ههههههع اكل عيني اكل..طلعت ابو كرش وممبين عليك
سلطان وهو ياكل: يوم تشتغل عد جود ويجوعك وكتها راح تحس بالمنسرد والميت من الجوع

يوسف:هههههههع الله يعينك

******
سوسو:وصل حبيبي انا راح اطلع وبعدين ارجع عليج ووصلج لبيتكم
حنان:اوك حتى علاوي حبيبي ما بقه شي ويوصل
سوسو:اوك لعد باي
طلعت وشوي ودك تلفون حنان  ووصفتله المكان الموجوده بيه واجالها
علاوي:هلا والله بهالطول هلا بعمري
حنان بخجل:هلا فيك
علاوي حاول يمسك ايدها:مشتاقلج موت
حنان سحبت ايدها بسرعه:علاوي شبيك منا الناس
علاوي:طز بالناس شعلي بيهم..صارلي هواي مشايفج ومشاعر المشتاق ما تكضها الناس
حنان نزلت راسها بخجل
علاوي:امشي خل نروح المطعم وناخذ راحتنه هنا ازدحام شوي..نكعد بمكان عوائل ومحد يمنه

مشى وهيه وياه ودخلوا بالمطعم الي بيه سلطان 
سلطان جان ياكل ولمح حنان داخله وي ولد وغص بالاكل
يوسف ينطيه كلاص ماي :صحه صحه..ع كيفك وانته تاكل لا يصير فيك شي
سلطان ما رد عليه وعينه عليهم 
ويوسف قبل لا يوصلون لجناح العوائل فتح الطريق لحنان:النساء اولا
مشت حنان كباله وهوة باوعلها بنص ابتسامه وباوعلها من فوك لتحت ودخلت ودخل وراها

#####

شفته اویاچ و اعیونه کلن طولچ
شفته اویاچ او غمس عینه بهدومچ

یااااااا سمره
یااااااا سمره

الشرف صندوگ لتوزعین مفتاحه
مو کلمن گلچ انا آدم نطیتي اچفوفه تفاحه

#######

وكل هذا تحت نظرت سلطان الي شبت النار داخله وتكلم بعصبيه:يوسف روح
يوسف:خير شكو
سلطان:كتلك روح قبلي..عندي شغله ارد اسويها واطلع
يوسف:شنو هالشغله
سلطان رفع صوته:يوسف وصلت الامانه وخلصت فروح وفضنه
يوسف:اوك اوك بس لا تعصب رايح

سلطان ناظر ليوسف وهوة طالع ودفع لحساب واتجه لمكان حنان وعلاوي ومن وصل يمهم سمع صوت ضحكاتهم وضغط ع ايده (كون مجرد شبه وتطلع مو هيه وانا غلطان ..بس صوتها نفسه..لا معقوله هيه تسوي هيج وتطلع من هذول البنات الي تواعد الشباب)

دخل ببطء ويحاول يشوف ملامح ووصل يم طاولتهم فانتبهت حنان للشخص الواكف يم طاولتهم فرفعت عينها وحست كلبها غاص من الخوف من شافت عيونه التجدح شرار
سلطان وبالكوه متمالك نفسه:منو هذا
حنان الخوف عقد لسانها وما كدرت تنطق
علاوي بلا مبالاة:منو انت اصلا
سلطان كانوا يتاني الاشاره حتى ينفجر فمسكه من ياقته وجره اله وناظرله بعصبيه وصريخ:انته سد بوزك ومالك دخل
دفعه ليوره وطاح ومسك ايد حنان وجرها وراه  وقبل لا يطلع من جناح العوائل وكف وهد ايدها من استوعب الامر وان الناس راح تفكر بغير شي اذا شاف ولد كاضها من ايدها وساحبها وراه وراح يحجون عليها وتخرب سمعتها

سلطان:امشي كبالي وولا حرف نتفاهم بالسياره
مشى سلطان ومشت وراه بخوف وهيه تفرك ايدينها (يمه شورطت روحي بيه..هسه اكيد راح يكول لجود ويفضحني..ياويلج يا حنان..رحتي فيها)
سلطان ركب السياره وهيه ظلت واكفه كباله
سلطان بعصبيه:بسرعه ركبي السياره شمتانيه دعوه مثلا😠

حنان كمزت من الخوف وراسا صعدت بالسياره بخوف (هوة ليش معصب..انا لا اخته ولا شي ..الحمدلله مو اخته)

سلطان حرك السياره قبل لا يشوفها احد وياه لان المكان مزدحم وباي لحظه يطلع احد عرف : منو هذا
حنان ناظرته بخوف:هذا ..هذا
سلطان: 😏حبيبج مو لو واحد عادي مضبطته والله يستر اذا ما اكو احد قبله
حنان  تجمعت الدموع بعينها من الرعب: لا والله ما اضبط احد انا..هوة بس هذا ويحبني ويريد يزوجني
سلطان وفول:انتي غبيه لو تتغيبين..لو يحبج ويريد يزوجج جان ما طلع وياج بالاماكن العام وخاف ع سمعتج..بس انتي حماره لان وثقتي بواحد هيج واطي..يلعب عليج يومين وياخذ اليريده ويترك

حنان وتحاول تخبي خوفها:لا تغلط وانته ما تعرف السالفه..هوة يريد يخطب بس بس عده مشاكل عائليه هوة يحبني وراح يخطبني
سلطان:هه 😏وانتي صدكتي..اخخخ شكد غبيات البنات..لج بابا دفهمي يلعب عليج..من تفتحين طاري الزواج اكيد راح يطلعله ميت عذر ابوي مريض او ابوي ما يقبل او حالتي الماده متساعد..حتى يماطل الى ان ياخذ اليريده
حنان: لا تكعد تحجي هيج عليه..اذا انته تفكيرك وصخ فمو كل الشباب مثلك
سلطان كض بريك وضرب ع السكان بعصبيه:لج انتي غبيه متفهمين.. هسه خذاج مطعم مره ثانيه راح يكلج نروح لشقه..اعرف هالشباب التعبانه 😠

حنان ناظرته بخوف بس تشجعت وبلعت ريقها وقررت ترد عليه:انته تكول هيج لان رفضتك مو وتحاول تشوه سمعته كبالي لانك تغار

سلطان حرك وهوة يضحك وضحكته متروسه قهر اكثر من ضحكه سعاده:اغار من منو واغار ع منو..اذا هوة فمايسوه نعال ابو صبع..😏اما انتي فمن شفتج وياه فطحتي من عيني وكلت بكلبي شلون انجذبت لهيج وحده س....(سكت ما كمل وغمض عيونه حتى يهده وما يرتكب بيها جريمه)

حنان ما كدرت تكتم اكثر ودمعت عينها من شافت نظره الاحتقار بعينه وسكتت
وسلطان من شاف دمعتها وسكت وما تكلم  ووصلها بعيد شوي عن بيتهم:نزلي هنا حتى لحد يشوفج وياي
حنان ما باوعتله وبنبره حزن:ما راح تكول لجود مو
سلطان سكت شوي وبعدين رد بنبره هاديه:ما راح اكوله بس انتي انتبهي لنفسج ولا اطيحين بشباك واحد واطي..واذا ما مصدكتني انه واطي فمو مشكله..بس اخذي احتياطج ولا اطلعين وياه وكليله اذا يريدج يجي يخطبج من بيت اهلج شوكت ما يكون مستعد بدون طلعات.. وشوفي ردت فعله
حنان فتحت الباب ونزلت بدون ما تباوعله ما تريد تشوف نظره ثانيه تحسسها انها منحطه

نزلت بسرعه ودخلت لغرفتها وقفلتها عليها وظلت تبجي وشوي ودك عليها علاوي
حنان:الووو
علاوي:هلا حبيبتي خوفتيني عليج..منو هذا ووين خذاج وشصار
حنان:هذا واحد من معارفنه وما صار شي
علاوي:الحمدلله الي عدت ع خير
حنان:علاوي بعد ما اكدر اطلع وياك بعد الصار
علاوي:ليش حبيبتي والله ما اكدر ما اشوفج اموت بدونج
حنان:اذا تحبني صدك تعال اخطب واصير الك طول العمر
علاوي:ما اكدر حبيبتي والله ظروفي ما تسمح هسه
حنان:اي عادي انا ظاله ببيت اهلي من تسمح ظروفك تعال اخطب (احسن شي اسوي مثل ما كال حتى اتجنب الفضايح)
علاوي:اي اكيد اخطبج بس ما اكدر اظل بعيد بدونج
حنان عصبت:انته ما تفكر الا بنفسك ..ما تفكر بيه هالمره الله ستر وبس سلطان شافنه مره ثانيه بله اخوي او ابوي شافنه والله يذبحوني

علاوي:انزين عندي حل
حنان:شنو
علاوي:خل نتشاوف بشقتي..ولا تخافين ترى محد بيها..وصدكيني ما راح المسج بس نكعد ونسولف براحتنه بدون محد يشوفونه ولا نظل برعب..هااا شرايج

حنان ظلت منصدمه وما كدرت تحجي (معقوله صدك طلع واطي..معقوله يلعب عليه مثل ما كال (نزلت دمعه من عينها) وانا مثل الغبيه ادافع عنه وهوة جان يلعب بمشاعري )
علاوي:الوو حبيبتي وين رحتي
حنان:لا تكولي حبيبتي بلسانك القذر يا حقير يا واطي
علاوي:هاي شبيج.
حنان:اذا دكيت ع رقمي مره ثانيه يا ويلك..وكلشي انتهه بينه يا كلب..شنو مفكرني بت شوارع يا حمار يا قندره..بانت حقيقتك الوصخه
وسدت التلفون بوجهه وظلت تشهق من البجي
(انا شلون جنت هيج غبيه وانخدعت بيه ..يا فشلتي كبال سلطان..هسه اكيد فكرني وحده سافله اكيد ..بس هم لو ما صار هالشي ولو ما شافني جان ما فتحت عيني وجان علاوي كمل لعب عليه ..بس والله فرق بينه وبين علاوي..علاوي دوم كان يحاول يكض ايدي ويلتقي بيه كبال الناس وياجل بالخطوبه ..بس سلطان غير من مسكني بعصبيه وردنه نطلع من جناح العوائل هد ايدي كبال الناس..اكيد خاف ع سمعتي..والاهم من هذا من شافني وعجبته اجه ودك الباب مو مثل هذا الواطي اجه من الشباج.. حرامات خسرت واحد مثله علمود واحد وصخ مثل علاوي.. يجوز هذا عقاب من الله او يجوز انا ما استاهل واحد مثل سلطان.)

هاي حنان👇🏻

****

خلصوا اجتماع وي الوفد وطلعوا
جود:اخخخ تكسرنه
سلطان كان صافن وعاقد حواجبه
جود:انته شبيك اليوم صافن وحالتك حاله..ما عجبتني حتى بالاجتماع
سلطان هم ساكت
جود حركه:هيه شبيك
سلطان:هااا شكوو
جود:احجي شصاير وياك
سلطان:ماكو شي بس تعبان وجوعان
جود:لعد تعال وياي للبيت نطلب بيتزا هناك..البيت فارغ ومحد بيه وضوجه
سلطان:مو مشتهي مو جوعان
جود رفع حاجب:توك تكول من الجوع مزاجك متعكر
سلطان:بعدين اكلمك هسه اريد اروح ارتاح
جود:اوك ع راحتك

جود رجع للبيت بعد ما طلب بيتزا واشتره ببسي
شوي ووصل الطلب وكعد حتى ياكل
وبنص الاكل تذكر الي صار امس وي سما فحط شريحه البيتزا ع الصحن وغاص بافكاره(يا ترى انا غلطت بالي سويته واجيت بصريخي وسويت الي سويته بدون ما افهم السالفه بس هيه هم بالغت شنو اغتصاب ترى كلمه جبيره  بس انا اصلا مجنت ناوي اسوي شي وياها بس من وكعت المنشفه حسيت مخي وكع وياها وما فكرت بشي..يعني بالاول والاخر انا رجال وما اتحمل الي شفته كبالي بس هالشي مايسمه اغتصاب مو 🤔..يعني بالاخير هاي حقوقي واخذتها ..صح الطريقه غلط بس تبقه حقوقي ومو من حقها تمنعني بس فضولي كتلني شصار بينها وبين عزيز معقوله مثل ما كالت بس اذا صدك فليش يلاحكها لهلدرجه لو مجرد بنت حاول يغتصبها جان لكه غيرها وما لاحكها هالسنين..  اووووف لازم افهم الموضوع بالتفصيل ..راح ادك ع هذا شسمه طلال وغصبا عنه يكولي الموضوع)

دك عليه  ورد بصوت ناعس:الووو
جود:هلا طلال ممكن تصحصح شوي اريدك بموضوع
طلال مفتح نص عين:شنو
جود:اريد تحجي سالفه عزيز بالتفصيل..بعد ما اكدر اتحمل لمن توصل
طلال بعدم تصديق:هسه
جود:اي هسه ولا اطلعلي اعذار
طلال:اوك وراح احاول اختصر لان دايخ كلش
جود:اوك امري لله
طلال : بدت السالفه من جانت بالثانويه تدرس..وجانت بدت امها تتعب وما تتحمل الشغل بسبب كبر سنها وبسبب بدايه اعراض المرض.. المهم حاولت ادور شغل بس مستحيل احد يشغلها وهيه بهالعمر وحتى شهاده ثانويه ماعدها ..بس فجاة اجت تكول لكيت شغل بشركه وهذا الي صدمنه شلون؟؟ وكالت عن طريق بنيه وياها بالمدرسه هيه ما تعرفها عدل بس اجت وكلتلها انا اكدر اوضفج بشركه بواسطه..وعرفت بعدين بعد فوات الاوان انوا عزيز هوة دازها المهم..اشتغلت بالشركه وي عزيز..عزيز جانت هاي شركه ابوه بس سوه روحه موضف عادي حتى يشتغل وي سما بنفس الغرفه ويحاول يخليها تحبه..وللحين مو فاهم ليش عزيز استهدف اختي بالذات وسوه كل هالهوسه وبوقتها ما جان يعرفها ولا يحبها وليش تعب نفسه حتى يخليها تحبه..المهم ما ابي اطلع من الموضوع..بس المشكله بدال ما يخليها تحبه الظاهر هوة حبها او بالاصح صار هوس اكثر من الحب..وصار بشتى الطرق يحاول يخليها تحبه بس سما جانت تنفر منه وتحاول تصده دوم بس بوكتها ما جان يتجاوز لان ما جان يريدها تكرهه ..وبنفس الوقت جان (سكت دقايق بتفكير وبعدين تكلم) جان صديقي محمود يحبها ويموت عليها وكان يشوفها من بعيد بس عمره ما كلمها

جود:وفخور بنفسك تكول صديقي يحب اختي..ما تستحي انت😠 (ليش بحياتها وايد رجال يركضون وراها 😤😡اخخخخ راح تبط مرارتي هالمره)

طلال:اول شي انا ما جنت اعرف بوقتها انه يحبها بعدين ياله عرفت  وثاني شي الحب مو عيب وترى الولد ما كلمها ولا تجاوز بالعكس اجه وخطبها..بس سما رفضته مو لان بيه عيب او ما عاجبها بس هيه كانت مستبعده فكره الزواج ما جانت تبي تزوج وتترك امها وحدها..وحاولت امها بيها وايد لان رجال حالته الماديه زينه وحلو المظهر وخلوق فماكو سبب ترفضه

جود بغيض:انته مو كلت تختصر الموضوع..المن كاعد تمدحلي بيه ..اختصر الموضوع ولا تذكر تفاصيل ممله مثل هيج

طلال ابتسم لان عرف انه يغار بس بسرعه انمحت الابتسامه ورجعت ملامحه للجديه وقليل من الحزن ارتسم عليها: بس سما ما غيرت رايها تحت اي ضغط حتى انا كلمتها وما فاد فتركناها ع راحتها وما حبينه نضغط عليها زايد ..بس محمود كان مصر عليها وما قبل يتخله عنها وكان كلما يشوفها تروح للشغل كان يروح وياها بحجه طريقه نفس طريقه وكان يحاول يكلمها بس سما كانت صعبه تغير قرارها او بالاحرى عنيده وما تغير تفكيرها علمود احد ..بس هوة ما كان يمل وكان كل يوم يظل يمشي وياها لمن توصل للشركه حتى لو ما جانت تعطيه وجه فهو ظل مستمر وما مل (وتوه يبي يتكلم جود بس طلال سبقه)ولا تكول ما تستحي تخلي اختي تمشي وي رجال يلاحكها وكبال الناس وسمعه ومن هالكلام..ترى انا ما جنت ادري ..ما دريت الا بعد (سكت وما كمل)
جود انتظر رد بس ماكو فبادر بالسوال:الا بعد شنو

طلال بنبره حزن:الا بعد ما انكتل محمود ع ايدين عزيز
جود عقد حواجبه بصدمه:شلون
طلال: عزيز لاحظ محمود الي كلساع يوصلها ومن يقترب وقت يخلص الدوام يظل يتانيها لمن تطلع وويوصلها لبيتهم وهالشي حرك الغيره عده وجان دوم اول ما تدخل سما يسوي مشكله ويصيح منو هذا وليش دوم وياج وهيه تجاوبه وانته شدخلك ومو من حقك تدخل ..بس هيه بالواقع هم انزعجت من محمود وحاولت تعصب عليه وتخليه ما يجي لان مو حلوه رايحه وراده ووياها ولد بس محمود يكللها مو علمودج جاي هذا طريقي وهيه تعبس بوجهه بانزعاج وتروح  عنه

مع الوقت زادت المشاكل وعزيز بده يتجاوز حدوده واعترف بحبه الها بس هيه صدمته بالرفض وبقوه وكبال الموضفين كلهم وهالشي خلاه يفول منها فطلع وخله احد رجاله يمشي كل الموضفين بدون ما تدري سما الي كاعد بالمكتب وحاول يتقرب لها بحجه يحبها بس هيه صرخت عليه وضربته راشدي بس هالشي عصبه زياده وظن انوا احسن طريقه حتى يتملكها هيه يغتصبها  فراح تضطر تخضعله حتى يستر عليها
بنفس الوقت كان محمود واكف بره وتفاجا من الموظفين يطلعون دفعه وحده وسمع موضفين يتكلمون مع بعض عن سما ويكولون خطيه شكلها راح تروح ضحيه لعزيز والثاني يكول مو لازم نكول لاحد يساعدها !! خطيه سما بعدهي صغيره ومتستاهل الي يصير لها والاول يرد عليه ويكله من كل عقلك احنه مو كد عزيز وابوه والله برمشه عين يطيرك من الدنيا اذا يريد..اذا تبي تجازف وتكول لاحد عن السالفه او تبي تبلغ عليه فطلعني من السالفه

محمود سمع حجيهم فماكدر يتحمل ودخل حتى يتاكد وتسلل بين الموضفين الي جاي تطلع بكثره فما انتبهوله الحراس فدخل الشركه وهوة يمشي بشكل عشوائي وما يدري وين المكتب  بس سمع صوت صريخ سما ركض باتجاه الصوت ولكه(سكت)

جود ببرود وهوة يضغط ع علبه الببسي بقهر: كمل شنو لكه
طلال بتلعثم:لكه عزيز يحا ..يحاول يعتدي عليها وكان جاي يحاول يمزق هدومها وجاي يحاول يبوسها وسما تحاول تبعده بشتى الطرق بس مجانت تكدرله  (غمض عيونه وسكت من سمع صوت تكسير من جهه جود )
جود بعد ما كلب الطاوله بالي بيها:ابن**** ذبحه ع ايدي ما اطلع حفيد ابو علي اذا ما دفعته الثمن
طلال:اكمل لو ...
جود بحده وانفاسه ثقلت من العصبيه:كمللل
طلال: محمود من شاف هيج ما كدر يتحمل وعصب وبعد عزيز وضربه وسما مسكت قميصها بقوه ولبدت وره محمود الي سال سما بعصبيه منو هذا..وعزيز جاوبه ببرود حبيبها.. حبيب وحبيته سوه انته شدخلك بالنص..سما حاولت تبررله وتكوله جذاب وهوة يلاحكني وحاول ياخذها بالقوه لان ما مشت وياه

عزيز ناظر لسما:محاجه تبرريله لان ما راح يطلع منا عايش
سما جمد الدم بوجهه وقبل لا تحجي كلمه شافت محمود هجم عليه واشتدت العركه بينه وبين عزيز وسما واكفه وما تعرف شتسوي من الخوف
وفجاه عزيز طلع سجينه مطويه صغيره وغرسها بجسم محمود
سما فتحت عيونها بصدمه من شافت الدم وظلت تصارخ وتطلب المساعده بس كانت الشركه فارغه واجو الحراس ورزلهم عزيز لان شلون دخل بدون ما يشوفونه وكللهم ينطفون المكان ويرمون جثه محمود بعيد وتجاهلوا صريخ سما

طلال تنهد بحزن:ما راح اطول عليك واذكر تفاصيل الموضوع واذكر حاله سما شلون صارت دخلت بحاله صدمه ..المهم حاولنه نقدم شكوه وبما انوا سما شاهده ع الوضع فكنه واثقين بسجنه ..وفعلا راحت شهدت عليه ..بس الصدمه انوا عزيز طلع مثل الشعره من العجين بسبب واسطاته ومعارفه القويه 😏.. بس المشكله انوا بعد كل هالشي عزيز ما تركها بالعكس اول ما طلع بالليل راح لبيت سما وامها وبطريقه ما ادري شلون كدر يدخل هوة ورجاله للبيت بدون كسره وتوجه لغرفه سما الي نايمه وما تدري عن شي وحست باحد يمسح ع شعرها ففتحت عيونها بثكل وما تكدرتتخيل صدمتها من تشوفه والرعب الي تشوفه
عزيز بنبره تخوف:سمعت انج شهدتي عليه
سما وعيونها تدمع ومصدومه وخايفه :انا انااا
عزيز:لا تتكلمين سامحتج ..اصلا اكو واحد يزعل من مرته المستقبليه
مسك ايدها وسحبتها بسرعه ودفعته من فراشها: اطلع بره بسرعه
حتى امها من تدخل يرد عليها ببرود وترحيب مصطنع ويكللها
عزيز:هلا بعمتي المستقبليه ..انطيني ايدج خل ابوسها
ام سما وهيه تحتضن بنتها :اطلع بره بيته لا اتصل في الشرطه
عزيز:😏ما تكدرين اسوين شي..وبعدين زواجنه راح يتم رضيتي ولا لا ..حاولت اجي بالطيب بس بنتج مو مال طيب فغصبن عليكم راح يتم هالزواج واشوف منو اليمنعني
ام سما:ماعدنه بنات للزواج فاطلع بره
عزيز:عمتي لازم تفرحين لان واحد غني مثلي راح ياخذ بنتج (يناظر حواليه بقرف)ويطلعكم من هالبيت الكحيان وعيشه الفكر العايشينها
ام سما:عمه اليعميك انشالله..لا تكول عمه ومحد شكالك عن عيشتنه..احنه عاجبتنه هالعيشه

عزيز وهوة يطلع:احسلج ازوجها بشرف لا اخذها بالقوه واخليج ما تكدرين ترفعين راسج

كان دوم يدخل بيتهم بدون اذن وبهذاك الوقت خلاها تعيش برعب وتخاف حتى تنام لا يجيها ويسويلها شي وكانت ما تكدر تنام الا بحضن امها وما كامت تنام بغرفه لوحدها والكوابيس ما تفاركها..وحتى انا (نزل راسه بخجل من نفسه)حتى انا ما كدرت اسوي شي او امنعه ..كان يجي هوة ورجاله وما اكدرلهم ما راح تكدر تحس بالضعف الي حسيته بوقتها فما كدرت افكر بحل غير اني اغير اسمائهم وارسلها لمحافضتكم..اول شي ام سما ما رادت ترجع لنفس المحافظه الي نحاشت منها هيه وبنتها بس بالاخير قررت تروح حتى لو ابوها راح يلكاهم وياخذ بنته منها..حست نار ابوها وفراكها ولا يضيع شرف بنتها ..صح الي سويته تزوير ولو درت الشرطه راح انسجن..بس ما لكيت غير هالحل

وعاشوا جم سنه بهالمحافضه قبل لا تلكونهم بس بهالجم سنه تغيرت هواي اشياء سما تحسنت حالتها وصارت اقوه او هذا الي تحاول تبينه بس صدكني سما للحين تحاف منه وتجيها الكوابيس بين فتره وفتره بس مو مثل قبل..لا تخدعك بقناع القوه بس تره هيه جبانه وهشه.. ويجوز راح تلكه صعوبه انك تخليها تثق فيك وتحبك.. ويجوز حتى لو حبتك ما راح تصارحك لان ما تثق باي رجال ..بنظرها كلهم نفس الشي

جود سد التلفون بدون ما يكول حرف وتوجه وصعد سيارته بسرعه وساق باقصى سرعه للمكان الي بيه عزيز ومن وصل نزل بسرعه وعصبيه وتوجه للداخل  ودخل بسرعه بدون ما يسمع كلمات الحارس الي يحاول يفهمه
ومن دخل انصدم ما هو عزيز
جود بصدمه ناظر للحارس الي بوجهه كدمات:وين عزيز
الحارس بلع ريقه بخوف:هوة ..الي صار..يعني
جود بانفعال:تكلممم
انتفض الحارس وتكلم بسرعه:انحاش..اجو رجاله وضربونه وخذوه
جود مسك بياقه الحارس:الله يلعنكم ..ما منكم فايده
دفع الحارس ودفر الكرسي الي يمه بعصبيه وطلع

*****

عند عزيز الي عالجه الطبيب ويمه ابراهيم
ابراهيم:كتلك لا تروح مبين فخ..بس لاااا انته ما راضي تشوف ولا تسمع بس سما راح تلتقي بيك..الحمدلله اني خليت احد يراقبك وعرفت الي صار

عزيز وهوة يون من الالم..يحس جسمه تكسر وما يكدر يحرك اي عضله:اخخخخخ الله يطيح حظه الكلب عسى ايده الكسر انشالله ما خله مكان بجسمي صاحي..خذه عصه مدري حديده وهبده هبده..يضرب وبس..اخخخ يمه  زين ما متت.. كلت يمكن هاي نهايتي..همزين اجيت قبل لا يكتلني

ابراهيم:هاي علمود تصيرلك درس وما تروح بتهور علمود ست الحسن والدلال سما كلتلك تعال

عزيز حاول يكوم بعصبيه بس حس كانوا سجاجين تدخل كل جسمه ورجعه لوضعيته بالم:ااااه يمه..سد بوزك ولا تجيب سيرتها ع لسانك..والله لو مو انا بهالحال جان كسرت راسك

****
عند سما والعائله كانوا يتعشون

وصفنت جود وخطر ابالها جود (يا ترى الحين شجاي يتعشى ووي منو ..خطيه اكيد ظال لوحده..عاد ياريت ياكل شي صحي هوة حتى غده ما تغده..(حاولت تنفض هالافكار من راسه) انا ليش افكر فيه اصلا بعد الي سواه لازم اكرهه وما افكر فيه )

نور:وين راح بالج..اكيد يم الحب اخوي😉
سما ابتسمت ابتسامه صفره وكملت اكل
اسراء:اوووف حتى ما افترينه بالمزرعه ..ظلينه بس نفتر بالبيت ونرتبه ونطلع اغراضنه من الجنط ونكعد نسولف
نور:😒كله من اختج ..لهتنه بقصص الجنانوه وخرعتنه والله كزبر حتى جسمي😖
سما :اكلكم عود صدك الجني يدخل بالبزونه السوده واذا ضربتي هالبزونه راح يدخل بيج مثل ما صار بالبنيه الي سولفت عليها
اسراء:والله ما ادري صج مدري خرافات..بس احتياطا راح ابتعد عن اي بزونه سوده
سما:اكلكم سوال يدور ابالي
نور:شنو
سما:هسه البزونه السوده وعرفنه يدخل بيها جني..انزين جلب جود هم اسود مثل ما كلتوا..معقوله هم يدخل بيه جني لو بس البزونه
نور:هيووو انتي لا تخوفيني
اسراء:اهووو غيرن هالموضوع ترى السالفه صارت كسيفه
نور:بس ترى سوال منطقي 🤔

سما:انا راح اخمد حتى اكعد من الصبح ع زقزقه العصافير..الله جاي اتخيل المنظر مال المزرعه وي زقزقه العصافير يصير خيال

اسراء:لعد حتى انا راح انام
نور:وانا ابقى لوحدي وي الجنانوه ..خل اولي حتى انا

سما طبت لغرفتها وبدلت لبجامه مثل هاي 👇🏻 <مابيه حيل اشرح 😁>

******
عند جود ركن السياره يم البحر كالعاده كلما يريد يهدي نفسي يجي للبحر ويظل يباوعله لمن يهده ويروح

ظل ع هالحال لمن صارت ب ١٠ بالليل ورجع للبيت وكان هدوء وصنطه
جود تنهد بملل:اليوم كله ما شفتها.. يا ترى فكدتني لو بالعكس مستانسه انها ما راح تشوفني

انسدح ع الفراش وظل يباوع للسكف بملل  وحاول ينام ما كدر:اوووف ضوجه وقهر..هسه لو كاتلي عزيز جان ارتحت نفسيا ع الاقل

تكلب بالسرير يمين وشمال بس ما كدر ينام
جود كام من الجربايه :هسه كلهم بالمزرعه شعدي انا كاعد هنا لوحدي ..الشغل وخلص واذا ع الاداره يتولاها سلطان علما ارجع

اخذ الجنطه الي جان محضرها قبل لا تتكنسل روحته وخذه سترته من الجربايه وطلع واستغرق ساعتين ووصل بال ١٢ وفوك واتصل ع حيدر حتى يفتحله الباب

حيدر فتح الباب وهوة يتثاوب :هسه ما تعرف تجي الصبح..شعدك طالع بهالليل متخاف تتسلب .. (ناظره بنظره لعوبه) لو اخاف ما كدرت تظل بالبيت ومرتك هنا😉

جود دفع حيدر ودخل:ممكن تسد بوزك وتوخر
حيدر:ترى مرتك خلينها بغرفتك الي كلما تجي تظل بيها
جود ما رد عليها ودخل للغرفه وشافها نايمه بهدوء وشعرها متناثر بعشوائيه بس زادتها جمال تقدم وجلس بطرف الجربايه وبعد بعض الشعرات عن وجهها وحطها وره اذنها ونزل باصابيعه ع خدها ومرر اصبعه ع شفايفها

جود بهدوء : اسف ع السويته ووعد مني راح اخلي البسمه دوم مرسومه ع هالشفايف..راح احاول ع الاقل ..بس ياريت اظلين ع هالهدوء حتى من تكعدين

كام وبدل ملابسه ولبس فانيله نص وبنطرون قطني ورجع اتجه للجربايه ونام جنبها وتغطه وتقرب منها وحظنها من الخلف يعني ضهرها يصير ع صدره

وطبع قبله ع راسه ودفن وجهه بشعرها واخذ نفس عميق كانه يبي يتنفس عطرها ونام

***
انتهى البارت

برايي ما حاجه اكول اسفه ع التاخير..اكيد تعودتوا عليه مو 😁

واتمنى يعجبكم البارت
ترى كتبته ونص عيني ع التلفزيون جاي اشوف المسلسل
ونص عين بالتلفون