رواية لأجل من احببت سأكون قوية الفصل الرابع 4 - بقلم امل

كان جود جالس كبال الغرفه وينتظر الدكتور حتى يطمنه..وبعد دقايق طلع وراحله جود بكل هدوء

جود:هااا دكتور طمني
الدكتور:لا ما بيها الا كل الخير..بس شويه رضوض..بس شكل نفسيتها مأثره عليها..يجوز واجهت مشاكل وضروف خلت حالتها تزيد..بس اريد اسالك..ليش هيه لابسه لبس رجال..حتى لافه لفاف ع صدرها وبطنها حتى متبين معالم جسدها

جود:والله ما اعرف يجوز عندها ظروفها..بس ما اريد احد يعرف انها بنت..اكيد لها اسبابها الخلتها تلبس هيج..واريدك  تحترم هالشي

الدكتور:تدلل استاذ جود..ما طلبت شي..انته فضلك ع راسي..لو تطلب روحي انطيكياها

جود:تسلم يا دكتور..يصير ادخل اشوفها
الدكتور:اكيد بس هيه هسه بعدهي ما صحت..بعد دقايق وتصحى

دخل جود ولكاها نايمه مثل الملاك بس حز بنفسه الجرح الي ع شفتها
جود حاول يلمس وجنتها بس شافها بدت تصحى ووخر ايده

سما:انا وين
جود:اغمى عليج وجبتج للمستشفى
سما بحزن ممزوج ببرود:شكرا
جود:ما سويت شي..هذا واجبي..بس شنو صار وياج

سما:رحت بعت بمنطقه جديده وكانوا يبون انطيهم فلوس كايجار وكتلهم هذا مكان عام ومو من حقكم تاخذون فلوس وصار الي صار

جود بحده:وانتي شكو تتجادلين وي مثل هذول
سما:شنو تريدني انطيهم فلوسي وانا تعبانه عليهم
جود بسخريه:لااا خليهم يضربونج وياخذون فلوسج

سما:لا تتمصخر انا جان لازم ادافع عن حقوقي..لو تريدني مثل الغبيه اروح انطيهم فلوسي التعبت بيها

جود بعصبيه:انتي بنيه مو رجال حتى تتعاركين وتاخذين حقج..انتي اصلا لازم مكانج البيت مو الشارع

سما بسخريه :😏اي مو كلولي كعدي بالبيت واحنه نجيبلج فلوس وانا ماقبلت.. يا اخي شهالذكاء..يعني اكيد لو بيدي جان ما اشتغلت هيج شغله

جود تنرفز من اسلوبها بس سكت وانطاها هدوم جدد:هاج هذول بدليهم بدل هذول الشككو

سما ناظرته ببرود:انته ليش اساعدني..شعجب حضره جنابك..تنازل وحجه وي بنت فكر مثلي وتساعدني هم وتدخلني مستشفى

جود ما عرف شيرد..لان هوة ما يدري ليش ساعدها
جود:عادي مبيها شي..لو اي واحد بمكانج جان ساعدته..مجرد شفقه

سما تنرفزت من رده:خذ هدومك..والله لا يعوزني لشفقه احد

جود:مو وكت كبرياء هسه..اذا طلعتي بهالهدوم المشككة فراح تجذبين نظر..وبعدين اذا رجعتي للبيت هيج راح تقلقين امج عليج

سما(حجيه صحيح..لو شافتني امي هيج يمكن يوكف كلبها)

سما:😒اوكي راح اخذهم بس راح ادفع كل فلس صرفته عليه من يصير عندي

جود:😏 منين تكدرين ادفعين تكاليف المستشفى..هاي مستشفى خاص يعني غالي..وانتي اعتقد ياله كادره تسدين تكاليف الايجار

سما:😒مو شغلك..وبعدين انت منو كلك ادخلني مستشفى خاص..انا بس انغمى عليه ترى ما راح اموت ..جان لازم توديني مستشفى حكومي..شنو هالنداره الزايده

جود:هههههع😏صدك من كال شر البليه ما يضحك..يعني فوك ما مساعدج..هنوب تلوميني..انا جبتج هنا لان هالمستشفى اكرب..بس مو صوجج صوجي انا الاساعدج..جان لازم اخليج تندبين حظج وما اساعدج من يغمى عليج.. حتى الجلب اوفى من البشر لو تسويله شي بسيط يظل يذكرها الك

وطلع من الغرفه

سما(جني زودتها شوي لا الا هواي..بس هوة هم زودها شنو يشفق عليه..انا اكره شي عندي نضره الاشفاق..امممم بس مهما يكون هوة ساعدني وما جان لازم اسمعه هيج حجي..😳بس لحضه مو جنه غلط عليه من كال الجلب اوفى 🤔..ايا ابن الذين....😒)

****بسياره جود

جود:سلطان اريدك تاخذ كم بودي كارد..وتروح للرجال الي ضربوا ابو علي..وتعلمهم شغلهم واريدك تخليهم يعتذرون منه ويرجعون فلوسه ويشترولة عربانة مدري كشك وينطوهياه بدال الكسروها..بس اريدك تنبهم انوا ما يكولون انوا احنه الجبرناهم ع هالشي..اريد يكولوله انوا همه تابوا

سلطان:حاضر استاذ..بس اكو شي محيرني

جود بملل:هسه تكلي ليش مهتم بابو علي..وانا راح اكلك مو شغلك

سلطان:لا مو بس هذا..انته ليش ما تريد يعرف انوا احنه ساعدناه وضربنه الرجال علموده

جود:وهم راح اكولك مو شغلك..انته ما تعرف شي فلا تسال

سلطان:اوكي استاذ

جود(انا ليش اساعدها..مو انا وعدت نفسي اني ما اتعاطف وي احد وراح اصير مجرد شخص بارد بلا مشاعر..وما راح احب او اثق باحد..فليش اضعف يمها واحس انوا واجب عليه اساعدها..لازم ما تضعف بعد..راح اساعدها بس هالمره وراح ابتعد وما اقابلها بعد)

**** في بيت الجد
بدور:يمه ملل شنو هاي..اريد اطلع
ام احمد:كابلي دروسج احسن

بدور:يمه خلصت دراسه
تدخل ابو احمد وهو توه دخل وسمع المحادثه
ابو احمد :روحي كعدي وي اخوانج وسولفوا

بدور:يبه يعني ما تعرف احمد وحنان..كل واحد كاعد بغرفته ومكابلين نقالاتهم

ابو احمد:لا حول الله..شنو هالعيشه ليكول كل واحد عايش بروحه ما جنه عايشين بنفس البيت .. شدعوه مدمنين ع هالنقال

بدور:اندري عنهم..الحمدلله والشكر ما شايفين نقالات😒..انا راح اروح لبيت عمي احسلي من الكعده لوحدي

ابو احمد: اوكي روحي تونسي..
راحت بدور لبيت جود وباوع ابو احمد لام احمد الي كاعده تعدل بروحها

ابو احمد:شنو طالعه
ام احمد:اي اليوم خطوبه بنت صديقتي ولازم اروح

ابو احمد:لو تكابلين جهالج مو احسن..شوفيهم كل واحد بجهه ومشتتين
ام احمد:اهووو شتريد اسوي.. كل واحد بيهم شطوله وما يحتاجوني هسه ..كافي كبرتهم وتعبت بيهم خلني اعيش حياتي هسه ..وبعدين مو كافي الطبخ والنفخ الي فوك راسي.. كافي تعبت

<مشكله بعض الناس من يكبرون جهالهم بعد ما يهتمون لان علساس كبار وعقلهم براسهم وما يحتاجون احد..ما يدرون ان الجهال اذا كبرت تحتاج عنايه اكثر..خصوصا مرحله المراهقه..يكونون محتاجين احد يوجههم ويعلمهم الصح والغلط وياما اولاد ضاعوا بدرب الغلط وبذنوبهم بسبب اهمال الام او الاب..ماكول بس الله يهدي بعض الناس>

ابو احمد:وانتي شمسويه حتى تعبتي.. ماشالله الخدامه كايمه بكل شي

ام احمد بتافف: يمعود ابوك جايب بس خدامه وحده.. بربك وين تلحك ع هالبيت الجبير وبعدين ابوك مايريد الا طبخنه ما يحب طبخ الخدم..كافي الطبخ يهلك..هسه بس اريد اعرف شنو المشكله لو جبنه خدامه ثانيه

ابو احمد:انتي تدرين ابوي تفكيره قديمه.. ويحب المره تكون سنعه وهيه تكوم بواجبات البيت مو الخدم..واصلا حمدي ربج انه وافق يحط هالخدامه

ام احمد: افففف اليشوفنه يكول عايشين بنعيم وما نشيل الريشه من الكاع وما يدرون انوا ابوك بخيل.. كل هالمضاهر بس للحسد وبالحقيقه احنه ما مرتاحين

ابو احمد بعصبيه:عاد حدج ترى مصختيها كلشي ولا ابوي.. ابوي عمره ما قصر ويانه ..انتي ليش ما يبين بعينج .. الحمدلله مسفرج لاحسن الاماكن وملبسج احلى لبس واي سياره تردينها بس تاشرين عليها يجيبها بعد شتردين..تذمينه بس علمود خدامه انتي.....

قاطعته ام احمد:بس بس رجاءا لا تبده بمحاضرتك هنوب اتاخر عن الحفله من وراك..باي

ابو احمد(يارب شورطني بهالمره لسانها يلوط اذانها وما تحترم..يجوز هذا عقابي لان فرطت بفاطمه وهيه جانت شايلتني من الكاع شيل وعمرها ما اشتكت من شي... اخخخخ يا فاطمه ياريت الزمن يرجع ليوره جان ما فرطت فيج)

راح ابو احمد لمكتب الجد
ابو احمد:يبه مو كانوا جود تاخر..كان لازم يجي من زمان ويطمنه اذا هي او لا

ابو علي:الغايب عذره معه..اكيد الحين يجي

*****
ام سما من طلع جود اتصلت ع ام طلال وكلتلها تجي..ومن اجت كلتلها كل شي

ام طلال:وهسه شناويه تسوين
ام سما:لازم اكللها كل شي..بس ما اعرف شلون ابدي

ام طلال:شرايج انا احجي وياها
ام سما:بعد احسن والله لان هذا هم كاعد ع كلبي

وبعد لحظات دخلت سما وحاولت ما تبين تعبها وهي تكلم جوجو
سما:ولج سكتي ميته جوع..ارد اشوف شمسوين اليوم الا طحين بالغده

جوجو:هههههع لعد لو تدرين شجاي اكل الا اسويني الا طحين
سما:ولج شجاي تاكلين من وراي

جوجو تحرك دمها:جاي اكل بيتزا ويم يم شكلها بيشهي ومن اجرها تسوي اغرائات ..من الجبنه سايحه وتنمغط.. يالله ما اكدري اصبر سدي التلفون حتى اكل

سما:😱😱يالخاينه تاكلين بدوني..زعلت بعد ما احاجيج
جوجو:هههههع سوري بس ماكدرت اقاوم من شفتها

سما:لا عيني ما اسامحج..تدرين الا بسالفه الاكل ما اسامح
جوجو:هههههع اعرفج ام بطين

سما شافت ام طلال
سما:هلا والله بخالتي..(وردت تكلم جوجو) بعدين اكلمج..باي..
ام طلال:هلا ببنتي..اجيتي بوقتج اريد اكولج شي..تعاي بالغرفه خل نكعد وحدنه

سما:هلا فيج خالتي..تفضلي كولي
وراحوا للغرفه

ام طلال:اممممم انتي ما تسألتي ولا مره عن ابوج؟
سما:ما يهمني اعرف عنه..لان احنه لو نهمه جان ما كطعنه

ام طلال:مو يجوز عنده ضروف..ما تسالتي شنو سبب انفصال امج عن ابوج
سما:انا خفت اسال امي هنوب تزعل..ففضلت اسكت

ام طلال:راح اكولج كل شي
سما ناضرتها بتركيز وما كالت شي..فكملت ام طلال حجي

ام طلال:تدرين كان ابوج يموت ع امج وكانوا مزوجين عن حب..وكل واحد جان يشوفهم يحسدهم ع حبهم.. وكان فرحتهم اكبر يوم ولدتي

بس الي ما حسبوا حسابه انوا بعد ولادتج صارت مضاعفات وصار عند امج نزيف واضطروا يشيلون رحمها ومن هنا بدت المشاكل

ابوه الي هوة جدج ضل يلح عليه حتى يزوج ويجيب الولد لان بسبب تفكيره القديم محد راح يسنده بس ولده واما البنت فمجرد ضيف وراح تتزوج وتروح

ابوج رفض بالبدايه بس للاسف ابوج شخصيته ضعيفه كبال جدج..لان جدج محد يكدر يرفضله طلب

وبنفس الوقت جان جدج حاط عينه ع مشروع ابو خلود ومحتاج يدخل فيه حتى يكبر شركاته وعلشان يقوي علاقته بابو خلود كال لولده يزوج بنته

وراح يضرب عصفورين بحجر واحد..منها يدخل بالمشروع وتكبر الشركات ومنها يزوجه ويخلف ولد يسنده..وكان هذا انسب حل بالنسبه لجدج.. وامج ما عارضت ولا كالت شي مع انه الضره تحر بس شافت ان هالشي من حقه وكتمت وجعها بكلبها واخفته بابتسامه

بس المفاجاة جانت انوا بنت ابو خلود من سمعت انوا محمد مزوج..اشترطت يطلك زوجته ياله تقبل بيه

حمود بالبدايه رفض لان امج مالها احد وهي وحيده بهالدنيا..اذا طلكها وين تروح..بعدين هوة يحبها

جدج حاول يقنعه انوا مصلحه الاهل اهم وانوا يطلكها فترة ويحاول يقنع مرته الجديده بعد الزواج انوا يرجعها

وفعلا سوه ابوج هالشي وطلك امج وازوج الجديده وجابتله الولد وحاول يقنعها يرجع مرته وكالها علمود بنتي مو علمودها وخذاها باللسان الطيب

ورجعها بس ياريتها ما رجعت لان هيه اشترطت عليه يسكنها بغرفه خارجيه قديمه كانوا حاطينها للكراكيب

انصدمت امج من حطوها بهالغرفه وبالبدايه رفضت..بس ابوج قنعها انها حل مؤقت وراح يحاول يقنع مرته انه يسويلها جناح خاص بيها

استحملت الوضع بس الشهر صار شهرين وهيه بنفس الغرفه والمشكله زادت يوم خلود ضلت تعامل امج مثل الخدم وكان يوم تتاخر بالنوم تدخل عليها الغرفه مدرعمه بقوة وتصارخ عليها

امج ما استحملت هالذل وبيوم تعاركت وياها وخلود كلتلها انها قبلت ترجع هنا حتى تخليها خدامه لها وتخلي بنتها اذا كبرت خدامه لولدها طول العمر

امج ما استحملت هالحجي وكالت ل حمود انوا يا اما تحطنه بمكان عدل لو انوا يطلكها.. وكان ابوج بين نارين

بس الجد تدخل وقنعه انوا ما يفرط بخلود لان هيه ام الولد.. وانوا امج ما عندها احد ومردها بترجعله وهيه تتوسله بعد وخاصه انوا يكدر ياخذ البنت منها وما راح تكدر تبعد عن بنتها وراح ترجع

وفعلا حمود مشى ورى كلام ابوه.. وكل ظنه ان امج راح ترضه بالامر الواقع بس امج كرامتها ما سمحتلها انها تبقى وخصوصا ان تجريحات خلود زادت لها

فاخذتج وشردت من كلشي.. لان تعبت وما كانت تريدج تعيشين بمذله وياهم.. لانج لو بقيتي وياهم وبمذلات خلود..فراح تكسرج وتضعفج هالمذله

كانت تكول الفقر ولا اشوف بنتي ضعيفه ومذلوله وحاولت تربيج احسن تربيه.. بس

قاطع كلامها بجي سما وراحت تركض لامها ودخلت غرفتي وحضنتها

سما:كل الي صارلج بسببي..لو ما انا بنت كان ماصار الي صار لو ما انولدت جان ما صارت عندج مضاعفات وما شالوا رحمج ياريتني ما نولدت ولا صارلج كل هذا

ام سما بابتسامه وباست راس سما وهيه بحضنها:بالعكس يا يمه..انتي اجمل شي صار بحياتي.. وبعدين هذا الشي مقدر ومكتوب ..اذا مو بسبب عقمي فبسبب شي ثاني راح يزوج

سما بغضب خفيف :اي صدكتي يمه لان هذول الاغنياء اهم شي عندهم الفلوس..وما يحترمون الا العنده فلوس..والفقير الي مثلج يدوسون عليه علمود الفلوس

ام سما:الماضي راح وما نريد نحجي بيه.. المهم الي اريد اكولج  انوا واحد من قرايب ابوج اجه وكال انوا ابوج نادم ويريد يرجعنه عنده

سما:😏هه مفكرنه راح نرجع عنده بعد كل الي صار..حامض ع بوزه..اصلا هوة لا ابوي ولا اعرفه..لو

ام سما قاطعتها ببرود: بس احنه راح نروح عنده

سما بصدمه:😳يمه من كل عقلج تحجين..تردين ترجعيله بعد كل هالمذله

ام سما:اي لان انا تعبت من هالدنيا وانتي لازم تشوفين ابوج وتعيشين وي عائلتج وي اخوانج..وتحسين عندج سند..لان انا فشلت اقدملج اي شي

سما حضنت امها:يمه لا تكولين هيج..انتي امي وانتي ابوي وانتي سندي..وما احتاج شي في هالدنيا بس انتي

ام سما ناضرتها بحزن وظلت غصه بكلبها شلون تفهمها انها مدايمتلها ومتدري باي لحظه تموت

*****بمكتب الجد
الجد عقد حواجبه:شنو تفكر..جان لازم ما تجي الا ورجلك ع رجلها..مو بكيفها

جود:يبه مو كلشي بالقوه..لازم تجي برضاها حتى نعيش براحه..القوه ما اجيب بس مشاكل

ابو احمد:كلام جود صح..بس انا اريد احاجيها ..ممكن توديني باجر لبيتها

جود:يستحسن ما تروح هسه..لان كالت ان بنتها ما تعرف شي عنك وتريد تفاتحها بهالموضوع وتشوف رده فعلها

ابو احمد بفرح:تتوقعونها تشبهني لو تشبه امها..والاهم يا ترى راح تسامحني من تعرف اني تركتها هي وامها علمود وحده

جود:عمي اكيد راح اسامحك..لان انته الظروف جبرتك وما كان بيدك

ابو احمد بحزن:الا بيدي..كان بيدي اكتفي بيها..بس علمود الولد تخليت عنها..الولد الكان المفروض يشيلني بكبرتي..بس شوفه ما كادر يشيل نفسه مو هنوب يشيليني..لا فالح بدراسه ولا شغل..كاضيها بس هياته ومحسب البيت فندق ما يجي بس بالليل للنوم

الجد: حمود كافي لا تذب اللوم ع نفسك..الملام بهالموضوع هوة انا بسبب تفكيري

جود:شبيكم كلبتوها حزن..المهم هسه لكيناهم وراح تعوضونهم عن كل شي

الجد وابو احمد:انشالله نكدر

*****عند سما

سما:يمه لا تحاولين..اصلا انا ما عندي ابوا وحسبته ميت طول عمري وراح يظل ع طول هيج

ام سما:يمه فهميني انا اريد مصلح...
سما قاطعتها:لا تفهميني ولا افهمج روحه ما اروح ..واذا تردين تروحين علمود الفلوس فروحي لوحدج لان انا كرامتي اهم من الفلوس

ام سما سكتت وراحت اتصلت ع جود وكالتله كل شي
ام سما:والله يمه حاولت بيها بس ما تقبل تجي وياي.. وتكول مدام تركني وانا بعازته وانا صغيره فهسه مو بعازته وانا كبيرة

جود:خاله خليني اجيلكم باجر احجي وياها..بلكي اكدر اقنعها
ام سما:اوكي يا ولدي حياك
.
.
.
.
.
سامحوني ع التاخير بس دوام وما اكدر انزل بسرعه