رواية لأجل من احببت سأكون قوية الفصل الثالث 3 - بقلم امل

الأمرُ ليسَ بكثرةِ الموجودينَ حولك ..إنّما بمن يأتيكَ دونَ أن تُناديه ..ومن يحتضِنُكَ .. دونَ أن تُخبرهُ أنّكَ تتألّم ...!
‿ٍ➶⁀➷‿➹⁀➷‿➹⁀➷‿➹ّ⁀ً➷

في بيت عائله جد جود كان الكل مجتمع
ومحمد(ابو احمد) صافن

بدور:يبه شبيك كله صافن..بيك شي
ابو احمد:لا ولا شي

الجد ابو علي:محمد تعال للمكتب..وبدور اذا اجه جود كليله خل يجي للمكتب

بدور:اوكي جدوا
حيدر:هاي شعدها بدوره كاعده لوحدها
بدور:☺️جنت كاعده وي ابوي وهستوه راح للمكتب وي جدوا

حيدر:اهووو رجعوا لاجتماعات المكتب..محسسيني هذا برلمان مو مكتب..ويجتمعون حتى يقررون اسرار دوله وما يخلون احد يتقربله

بدور:شعليك بيهم..خلهم ع راحتهم..يجوز يحجون بالشغل
حيدر:اكص ايدي اذا شغل..دشوفيهم شلون متسترين عالموضوع، هذول اكيد عدهم سر

بدور:يا خبر اليوم بفلوس..باجر يصير ابلاش،اخرتنه راح نعرف شنو سر هالاجتماعات
حيدر:اي صح،الا اكول......
دخلت نور مدرعمه
نور:حويدر الخايس،ليش ماكل ككاوي،انا جنت حاطته بالثلاجه،انته متى تبطل سوالفك الخايسه هاي..شي مو مالك لا تجيسه..شنو الصعب بكلمه لا تجيسه😠

حيدر:هاي شبيج معصبه هلكد، كل هالعصبيه علمود ككاو،هسه من اروح اشتريلج الاحسن منه بس فكينه من شرج. شوي ويطلع دخان من ذاناتج من العصبيه

نور:غصبن عليك تشتريلي..والله اذا جست ككاواتي الا افكس وجهك بوكسيات

حيدر:يمعوده انا لخاطرج اكلهم..علمود لا اسمنين،دكافي اكل شوفي راح تنبطين وكرشج واصل متر كدامج جنج وحده حامل

نور شوي وتبجي: انجب مو سمينه..اعرف سوالفك تريد تفرها عليه وتطلع انته المصلح الاجتماعي

بدور قاطعتهم:بس كافي شنو هاي.هاي انتوا دوم هيج،انا جنت اتمنى عندي اخت توم بس من شفت عرايكم بطلت

حيدر:اي والله الواحد يتورط ويحصل اخت توم مثل هاي
نور:انجب😒
بدور:انا راح انام واذا اجه جود كولوله جدي يريده
نور:اوكي

****** عند سما
سما(اوووووف هسه وين الكه مكان ابيع بيه..انا اصلا ليش حشرت روحي ورحت اتعاركت وياه..صدك انا اجيب المشاكل لنفسي.. هسه لو واحد ثاني دره اني بنت جان الله واعلم شجان سوه ويجوز جان فضحني..زين منه سكت..بس هم هوة شدعوه هلكد مغرور.. يا اخي غروره ينرفزني..كافي افكر بيه ..شي راح وكضه ،خل ادورلي مكان وانا منجبه احسن)

***جود وصل للبيت ودخل لمكتب الجد
جود:السلام عليكم
الكل:وعليكم السلام،هااا بشر
جود:انا شفت وحده تشبهها ودزيت ناس جابولي كل المعلومات،بس الغريب انهم مغيرين اسمائهم، والام بيها سرطان والبنت مكمله بس ثانوي وتشتغل وتصرف ع امها

ابو احمد انتفض:😳فاطمه بيها سرطان..لالا ما معقول اكيد معلوماتك غلط..يعني انا صارلي سنين ادور عليها ويوم الكاها تطلع مريضه وراح تموت،مو كافي انا ظلمتها هنوب الزمن يظلمها

ابوعلي:اهده يا ابو احمد،بعدنه ما متاكدين ، يجوز مو هيه نفسها فاطمه..جود اريدك تروح وتتاكد اذا هيه لو لا

جود:حاضر يبه
وطلع ولاكه نور وحيدر يتعاركون

جود:شبيكم اربعه وعشرين نكره
نور:جود شوف هالحمار ضربني
حيدر:اي تستاهلين ليش لابسه شورتي

نور:شدعوه هوه كله شورت
حيدر:وليش لابسه اهدومي..هوة انتي تلبسين هدوم بنات وتكشخين وبالكوه تنهضمين..مو هنوب تلبسين هدوم ولد..تصيرين جنج ابو حمدي البواب ما بيج ذره انوثه

نور طاحت دمعتها:ايا حمار اكرهك وامداك وامده شورتك هسه انزعه(وطلعت للقاط الثاني)

جود:احسن هيج زعلتها علمود شورت..امشي كبالي راضيها
حيدر:شدعوه هلكثر حساسه..هسه انا شكلت..امشي خل نشوف نهايتها وي هالخبله

وصعدوا لدارها وطب حيدر بدون ما يدك الباب
نور:وجع دك الباب
حيدر:محاجه ادك..الا تعاي صدك زعلتي علمود كلتلج لا تلبسين هدومي

نور:لا لان عايبت عليه وكلت ما عندي انوثه..ترى اكثر شي يجرح المرأة..هي من تشك بانوثتها

جود تذكر سما ومن عايب ع فقرها وعايب ع انوثتها
جود وهو صافن:يعني هذا الشي يزعجكم اكثر شي..ليش يعني..جنت اظن ان اكثر شي يزعجج انوا اذا احد عايب ع سمنج وكلج كافي تاكلين

نور:لا هذا ثاني شي عندي.بس بالنسبه لكل النسوان اهم شي عدهم انوثتهم..يشبه لمن نكولك انته ما عندك رجوله..شراح تحس!..اكيد راح تعصب وودك تكتل الشخص الكبالك..لان اهم شي رجولتك

جود(معقوله جرحتها هلكثر من كتلها ما بيج انوثه..بس هيه ما بجت مثل نور..بالعكس ظلت قويه وظلت تعارك..)

جود:انزين كل وحده تبجي مثلج اذا كلنالهم ما عندج انوثه
نور:مو شرط..اكو يزعلون ويخلونها بكلبهم وما يبينون زعلهم
حيدر:وانا الله بلشني باخت ام دميعه..ليش ما صرتي من النوع القوي الي ما يبجي

نور:لا والله..تبيني اضمها بكلبي وهنوب يصير فيني شي من القهر..لا عيوني لا اهم شي نفسي

جود(معقوله هلكد زعلتها علمود قللت من انوثتها 😏انته شتحجي هوه انته خليت كلام جارح ما كلته بقت عالانوثه هيه..يجوز هسه تكرهني..وخل تكرهني انا شعلي..اصلا ما احب ادخل بتعاطف وي احد..وهسه ماكو فايده من التفكير بهالشي هيه راحت وبعد ما راح اشوفها والله يوفقها بحياتها...)

وراح يبدل حتى بعد شوي يروح لبيت فاطمه ويتاكد اذا هيه نفسها الي يدورون عليها

****عند سما
واخيرا لكت مكان وكان بيه هواي ناس وكلها ظلت تشتري منها وهيه فرحانه كلش..بس كالعاده الحياة ما تخلي احد يفرح..اجت بجهتها شله تعبانه وعاله المجتمع

رئيس العصابه:انته منو كلك تبيع هنا
سما:وليش يعني ما ابيع هنا..مكان الحكومه وياهو يجي يبيع هنا
رئيس العصابه:لا عيوني..لازم تاخذ اذني..كل اليبيعون هنا ماخذين اذني ويدفعون فلوس ياله يبيعون..واسال اي واحد عن علاوي وراح يكولك منو اني

سما:لا والله..مو بكيفك وليش ادفعلك..هذا المكان مو ملكك..يعني احنه ياله نحصل الي يكفينه مو هنوب ندفعلك

رئيس العصابه:😏راح اعلمك شلون بكيفي..(اشر ع عصابته)علموا شلون بكيفي..وخلوه عبره لغيره حتى لا يتحدوني
ودفعوا عربانته وكسروها وصله وصله
سما بخوف:لاااا وخروا عنها  الا الكشك..انتوا ما تخافون الله..وتقطعون ارزاق الناس
توجه علاوي لها:والحين اعطينه الفلوس لو راح تلحك عربانتك

سما خافت بس تصنعت القوى: مو كافي الي سويته..اذا اخذت فلوسي انا بشنو راح اشتغل..(وناضرتله بتحدي)لو تذبحني ما انطيكياهم يا كلب يا عاله المجتمع

علاوي:انا اعلمك شغلك(وضربها كف ودفعها..وركلها ابطنها عده ركلات خلتها تحس انوا روحها راح تطلع وكانت متمسكه باللثام خايفه يطيح وتنكشف وهو من تعب من الضرب شك جيب الدشداشه واخذ الفلوس

علاوي:هذا عقاب الي يتحده علاوي😏..لو من البدايه سامع الكلام كان ما صار الي صار..

وتركوها وراحوا وهي حاولت تكوم بالكوه وجانت تحس مصارينها تتكطع وحاولت توصل للبيت

****عند جود

وصل لمنطقه بيت ام سما بس ما كدر يدخل بالسياره لان الطرق ضيقه بهاي المنطقه فاضطر ينزل ويروح مشي لبيتهم هوة وسلطان ووصل بيت ام سما ودك الباب وطلعتله ام سما

جود :السلام عليكم
ام سما:عليكم السلام
جود:ممكن احجي وياج بموضوع
ام سما:كول ابني
جود:ممكن ادخل لان الموضوع طويل وما يصير اكوله بالباب

ام سما:تفضل ابني
طلب من سلطان ينتظره بره ودخل للديوان
ام سما:شتشراب جاي عصير
جود:ما ارد اتعبج خاله مبين عليج تعبانه..بس كلاص ماي
راحت جابت ماي واجت

ام سما:تفضل
جود:مشكوره خاله  فاطمه

ام سما من سمعته يكول اسمها راسا وكع الكلاص من ايدها وناضرته بصدمه
جود:يعني انتي فاطمه او لازم اكول ام جيهان
فاطمه:انته شلون تعرفني..محد هنا يعرفني بهالاسم

جود:معقوله ما عرفتيني يا خاله..انا جود ولد علي
ام سما ناضرته بصدمه وفرحه:انت..معقوله..تغيرت هواي..ما عرفتك..شلونك وشلون امك

جود:الحمدلله كلنه بخير..حتى عمي محمد
ام سما وتحولت نضرتها للانزعاج:لا تذكر اسمه..انا ما راح اسامحه ابد ع السواه

جود:بس هوة نادم ع كل الي سواه وصارله سنين يدور عليج..اترجاج سامحيه ورجعي لبيت جدي..وبعدين انتي مريضه وعلاجج محتاج فلوس ومبين انوا حالتكم مو كلش(وعيونه تجول في المكان)..وبعدين بنتج من حقها تعيش بين اهلها وسندها..اذا مو علشانج فعلشان بنتج

ام سما بتفكير:راح افكر بهالشي..بس ماريد بنتي تشوفك او تعرف اي شي عن موضوع ابوها لان اريد تسمع الموضوع مني وما اريدها تتفاجأ..وما اريدك تكول لاحد مكاني علمود لا يجون وتشوفهم بنتي.

جود:حاضر خاله..وهذا رقمي اذا ردتي شي كوليلي..وانا استاذن
ام سما:مشكور ولدي..وسلملي ع امك
جود:يوصل يا خاله ولا تكومين انتي تعبانه..انا اطلع لوحدي..مع السلامه
ام سما: الله وياك

ام سما:(انا لازم اكولها كل شي  وارجع لبيت ابو علي لان اذا مت ما اريد بنتي اظل وحيده..بس منو يكول توافق بنتي واعرفها ما راح توافق..بس لازم اقنعها مو بكيفها.. لان هذا الشي كله لمصلحتها..لو علي ما جان رجعت بعد الي صار..)

***عند جود
طلع من بيت ام سما وتوجه لسيارته وقبل لا يوصل لسيارته سمع صوت احد يبجي

جود:اوكف هنا شوي ولا تجي وراي
سلطان:حاضر استاذ

تقدم جود لمكان الصوت ووصله لبيت بزاويه المنطقه مهدم وصغير وهو عباره عن دار وحمام وما ساكنه احد لان شوي ويطيح

دخله وتفاجأ من شاف سما بزاويه وشكلها مبهذل وشفتها مجروحه وعلامات الضرب باينه عليها..وهيه لابسه الشماغ وبس وجهه طالع وتبجي بصوت يكطع الكلب وهيه حاظنه رجولها

جود بخوف :شبيج..هاي شصاير بيج..منو ضربج
سما وهي منهاره وتبجي وتشهك:انا ليش هيج يصير بيه..انا وحده فاشله وما اعرف اسوي شي عدل.. حتى امي مع انها مريضه ومحتاجه علاج بس ما ترضه تروح للمستشفى لان تدري ببنتها فاشله وما راح تكدر ادبر مصاريف علاجها.. احاول اكون قويه علمود امي لانها مالها غيري.. بس ما جاي اكدر.. اظل طول الوقت خايفه لحد يكشفني ويصير مثل ما صار قبل(حطت ايدينها ع اذاناتها وضلت تهز براسها) لا لا تذكرين لااااا ما ابي ارجع للماضي

كانت منهاره وتبجي بشكل يوجع وتهذي وجود مع انه ما فهم قصدها بس كان كلبه يتقطع ع كل شهكه تطلع منها وكسرت خاطره وكان وده يسوي شي يخفف المها بس ماكان عارف شيسوي

جلس مقابيلها وحاول يهديها
جود:اهدي وفهميني منو السوه بيج هيج (بقلق)وسووا لج شي
سما طالعت بعيونه بحزن: لا همه عبالهم ولد والله انا ما سويت شي..انا بس بعت وهمه اجوا ضربوني لان بعت بمنطقتهم

جود:منو همه واي منطقه
سما ما ترد وجانت تحس بدوخه
جود:يا بنت شبيج ردي ع...
ما كمل كلامه وشافها انغمى عليها فراستا كضها وحاول يصحيها

جود:يا بنت ..انتي بخير (شهالغباء اكيد مو بخير)
رفع اللثام وغطه وجهها وشالها وطلع
سلطان:منو هذا استاذ..هذا مو ابو علي ابو الجاي..شبيه استاذ
جود:بلا حجي زايد واسبقني للسياره وشغلها لازم نوديه المستشفى
سلطان تقدم:استاذ خلني اشيله عنك

جود:لااااا بعد ايدك عنه وروح سوي الكتلك ولا تعصبني..ما تشوفه مغمى عليه لازم نوديه المستشفى..شنو ما تفهم
سلطان:حاضر استاذ بس لا تعصب

وراحوا بسرعه للسياره وطلب من السايق يشغل السياره..وجلس سلطان من كدام وجود وسما من وره وكان مخلي راسها بحضنه
سلطان:لو كاعد انته كدام ومخليني انا اكعد وياه من وره كان احسن..لان اعرفك متحب هالشي و.

جود بعصبيه:اسكت احسلك ترى قافله عدي
( شلون يتجرئون يضربون بنت ما عندهم رحمه..الا اعلمهم درس هالكلاب(كور ايده ع شكله قبضه وكان يضغط عليها حتى يخفف غضبه)
كعد يتاملها وشاف دموعها المحفوره ع وجهه وتحولت نظرته لحزن وحاول يمسح دمعتها

جود:يله بسرعه ما وصلنه
سلطان:هاي احنه شوي ونوصل

ووصلوا المستشفى وشالها جود ودخلها للمستشفى ورفض احد يدخل وياه علمود لحد يكتشف انها بنت واستقبلوه الممرضات ودخلوها وحجزلها جناح كامل علشانها
.
.
.
بنات ليش ماكو تفاعل..اذا مو حلوه القصه كولوا حتى لا اتعب نفسي واكمل