رواية لأجل من احببت سأكون قوية الفصل الثالث والثلاثون 33 - بقلم امل

#شــجــانـي وكمـت اشـوف
الــدنـيــا بــس لــونــك❤️
شـعــفــت بـيـه وكـمـت
مـاعـيش مـن دونـك😍

🍃🍃🍃❤️🍃❤️❤️🍃❤️🍃🍃🍃

سما توها نازله وصادفت نور كبالها
نور تكتم ضحكتها وهيه تشوف تكشيره سما
نور:صباح الخير
سما ناظرتها بعصبيه:صباح السم بكلبج
نور:😒اسم الله عليه..انشالله بعدويني
سما:الج عين تحاجيني بعد امس
نور:ههههههههههع والله كان شكلكم كيوت ههههههههه
سما:عمه بعينج بدال ما تعتذرين ع الصار بسببج اضحكين بعد
نور:هههههههع فديتج انتي واخوي ..فوكاتها بعد خليتكم تعيشون جو رومنسي😌
سما:مالت عليج انتي واخوج
نور:😒انتي كد هالحجي
سما تكتفت كبالها :كدها ونص
نور بصوت عالي:جوووود تعال شوف مرتك شتكول..جود الحك ع ....
سما حط ايدها ع فم نور:اشششش يا كلبه بسرعه فضحتينه ما ينكال يمج شي
نور:😒حتى تتادبين وما تحجين ع اخوي..الا جود عاد..هسه لو تسبين حويدر وتنعلين ابوه ما همني بس جود لا
حيدر طلع من وراها:وليش انشالله ..انا ولد البطه السوده مثلا..مو اخوج حالي حال جود
نور: ابي اعرف انته منين تطلع بس احش فيك تكمزلي وبعدين ترى😜ما توصل لو ربع غلات جود
حيدر: كالوها الطيب عند ذكره ..وهذا من طيبي 😌و ع فكره مالت عليج عود انا الميت عليج.. مته يجي واحد يلفج وياخذج لبيته ونفتك منج ويتورط فيج
نور:عمه حتى عمه شنو كاعده ع كلبك لو تصرف عليه وكاسره ظهرك مثلا ..اكول لف وجهك مناك  لا ارتكب اجرام

حيدر ضراب راس نور بخفه وتعداها: عود هم تعرف تهدد هيه..احترمي شوي الاكبر منج لا ادبج هنا
نور:😒😏عشتووو ترى اكبر مني بدقيقه فقط..ما تعتبر اكبر مني..نفس العمر يعني..لذلك احترمني حتى احترمك
حيدر وهو ينزل الدرج:المهم اكبر منج حتى لو ثواني

نور تجاهلت حيدر وتدردمه ولفت ع سما:الا وين سريو خرب يومها شكد تخمد
سما:انتي لا تحاجيني
نور:يمه فديت الزعلان ههههههع وبعدين لا تنكرين كانت لحظه حلوه 😉

سما رجعت للماضي بذاكرتها من كانت كاعده وي نور واسراء

فلاش باك

نور غمزت لاسراء حتى تبدي الحجي
اسراء:شنو هاي ضوجه..طلعونه لعبه او فد شي
سما:لعبه مثل شنو
نور:امممم شرايكم نلعب صراحه لو تحدي
سما: ما ادري ماكو غيرها؟
اسراء: اي اي حلوه عجبتني
سما:اي بس اكو احلى منها
نور:لا هاي حلوه..يله سرو روحي جيبي بطل
اسراء:اوك
سما:لو نلعب مثلا لعبه اسم انسان جماد وحيوان احلى
نور:لا نبي هاي..وترى احنه اثنين ع واحد
سما:امري لله..راح العبها وياكم بس من الضوجه مع اني ما احبها كلش..بس يله ع واهسكم

اسراء:هاكم شربوا الببسي بعد مابيه..حاولت اشربه كله ما اكدر انتفخ بطني وياله شربت بس ربع
نور:اوك صبيه بكلاصات واحنه نلعب ونشرب
اسراء:بس لحظه كون من نلعب ووحده يطلعها صراحه لازم تحجي الصدك وبدون جذب..واذا تحدي وماعجبها التحدي فغصبن عنها تسويه مو تكعد تتحجج
نور:اوعدج براس الغالي جود اسويها وما اتراجع وانتوا حلفوا براس اغلى واحد عندكم
سما باستغراب : وليش الحلفان ترى كلها لعبه
اسراء:لا حلفي حتى اصير اللعبه احلى
سما:انا ما احلف
نور:ليش ما تحلفين اكيد ناويه اجذبين مو
سما:انجبي انا ما اجذب
اسراء:لعد حلفي شعدج خايفه
نور باستفزاز:عيب عليج الجذب ..احنه صديقات وما بيناتنه شي يتخبه
سما:كتلج ما اجذب
نور:لعد حلفي😒
سما:اوك اوك براس امي ما اجذب
نور بفرح:وتسوين التحدي
سما:اوك اسويها..انتوا اليوم مدري شبيكم ماخذين اللعبه بجديه زياده عن اللزوم
اسراء:حتى نستانس بس.. حتى يصير اكشن بالموضوع

نور دزت رساله لاسراء "ساليها اساله محرجه حتى تختار التحدي "

اسراء ردت وهمه بوسط اللعبه " اوك بس وبعدين شنو خطتج..انتي بس كتيلي خلي نجبرها تحلف"
نوروهيه تتثاوب وترد ع الرساله" بعدين اكولج كملي هسه "

سما:شبيكم كل وحده تلعب وعينها ع النقال..اذا مالكم خلك خلونه نبطل من اللعبه
نور حطت نقالها بالارض:لالا نلعب
كملوا لعب ونور بس تثاوب
سما:شبيج بس تثاوبين
نور بنعاس:كله منج امس مكضيته كله يوتيوب اطلع اقوى اللقطات الرومانسيه بالافلام والمسلسلات حتى استخدمهم
سما عقدت حواجبها:كله مني؟؟ وتستخدمينهم!! شنو قصدج
اسراء طكت نور بخاصرتها بخفه حتى تستوعب:قصدها حتى تشوفلنه فلم حلو ونشوفه مع بعض ونطير الضوجه..يعني علمودج حتى اطير ضوجتج
سما:احس انكم  ابالكم شي وهسه تاكدت من تركعيج لكلامها
اسراء شهكت بتمثيل:اناااا اركع لها قصدج يعني اجذب
سما:مبين ارتباكج وانتي تحاولين تركعيلها
نور:اهووووو سما لا تكلبينها تحقيق ترى كلها زله لسان..وبعدين ترى كل الكنالج نلعب ما كلنالج ذبي روحج من السطح حتى تكولين نخطط..عكرتي مزاجي ما ابي العب
اسراء:لا لا لخاطري خل نلعب شبيكم ترى ضايجه
نور:اوك لخاطرج بس

كملوا لعب وتعمدوا يسالونها اساله محرجه عنها وعن جود
وهم فروا البطل واجه ع سما
سما:لا هاي مو حاله شنو هالبطل ما يوكف الا عليه..وكف عليكم مرتين او ثلاثه وانا وكف عليه ست مرات.. ما اريد فري مره ثانيه
اسراء:مو بكيفج ..يله اختاري تحدي لو صراحه
سما (خل اختار تحدي اشرفلي ولا اسالتهم السخيفه)
سما :تحدي
نور ابتسمت بخبث(اخيرا ):امممم كون تحدي قوي
اسراء:اي صح (وهي تلعب بحواجبها) كون شي مخجل وي جود
سما تكلمت بسرعه:لالالا حالي حالكم بتحديكم كتلكم اكلوا فلفل حار او لغمطي وجهج بالطين او هيج شي بس ما اتفقنه شي محرج
نور رفعت جتوفها: ما كنالج لا تتحدينه شي محرج ..كله منج الصوج..المهم (بتفكير) امممم🤔 اتحداج تبوسين جود كبالنه 😈
سما شهقت بصدمه:تشاقين مو
اسراء:😂😂واوووو خوش تحدي
سما:😡لو تنطون ما اتفقنه هيج ..بطلت ما اريد العب
نور:لا عيوني مو من صار دورج تبطلين..كملي التحدي وبطلي حالج حالنه حتى احنه تحديتينه وسوينه التبينه
اسراء:وترى حلفتي بالعزيزه فعيب عليج تتراجعين
سما بتردد:بس
نور:لا بس ولا شي ..يله كبالنه ..وترى مو تحدي صعب ترى هذا رجلج فعادي
اسراء كومت سما وسحبوها يدورون عن جود
اسراء:هذا وين راح
سما جنها ما صدكت:اي مو هنا لذلك مو لازم وامشوا خل ناكل
التفتت تريد ترجع بس نور مسكتها
نور:لا ما حاجه هسه اراسله اشوفه وين
دزتله رساله" وينك"

رد جود بعد انتظار"بالصاله الصغيره"
نور"اكو احد يمك"
جود"لا كلهم طلعوا يكعدون بره علمود الخضره والجو المنعش وانا ما رحت وياهم لان عدي شغل لازم اخلصه"
نور" حلو ظل مكانك"
جود"شكو؟؟شنو السالفه"
نور" شوي واكولك"

نور:امشي بالصاله الصغيره
سما:بنات فدوه بلاها هالموضوع خل نروح نلعب غير لعبه
اسراء:سمسومتي حبيبتي لا اطولين الموضوع ترى كلها بوسه وتخلص
سما:انزين لا ادفعون .. بس بوسه ع الخد وماكو غيرها
نور:يله مبارك ولا ماكو شي بس مو تغلسين ترى راح نظل نراقب
من وصلوا للصاله الصغيره ترددت تدخل بس نور دفعتها
وكان جود ملتهي بالابتوب يكمل شغله ورفع نظره من دخلت نور وناظرها باستغراب
سما بارتباك:احم شلونك اليوم (ياربي شلون راح اسويها شهالورطه)
جود ناظرها باستغرب :الحمدلله
وجود ظل يناظرها وكان باين عليها التوتر وباوع ع ايدينها وكانت تضغط ع اصبيعها باليد الثانيه من التوتر: بيج شي؟
نور كعدت يمه ع القنفه: لا ولا شي  (ياربي شلون انحاش لو شسوي ..كلبي من الحين راح يوكف من التوتر هاي لو ابوسه شسوي.. احسن شي انحاش )

ناظرت للباب وكان مردود وفتحه صغيره بس كانت نور واسراء يباوعون منها ومن شافوا سما باوعتلهم اسراء اشرتلها بمعناة ادني يمه حتى تكدرين تبوسينه ونور اشرتلها ع ركبته بمعناة اذبحج اذا شردتي
سما( ياربي ما ناوين يرحون هذول)

جود كان مره يشتغل باللابتوب ومره يناظرها باستغراب
سما تدنت يمه شوي :شجاي اسوي
جود:اممم شوي شغل توهم خابروني عليه لازم اخلصه ضروري
سما وهيه كلساع تدنه شوي بحجه تشوف شنو بالابتوب:اهااا

اما من جهه نور:لازم احرك الجو شوي😈
اسواء:شراح اسوين
نور بابتسامه جانبيه:راقبي وراح تشوفين
كضت نقالها ودزت رساله لجود "تبي تعرف ليش سما اجت يمك وليش مرتبكه"
جود اخذ التلفون من الطاوله بعد ما سمع صوت رساله
ومن قره الرساله اعتدل بجلسته وناظر لسما ورجع نظره ع التلفون " ليش اكو سالفه وره جيتها"
نور" اي اكو سالفه تبي تعرفها؟"
جود وهوة يباوع لسما بنص عين"احجي بسرعه"

نور" تحديناها بلعبه طبعا بعد ما حلفناها انها لازم اسويها وورطناها..المهم تحديناها انها تبوسك"

جود صنم وهوة يقره الرساله وباوع لسما ورجع نظره ع التلفون عده مرات وما كدر يمنع ابتسامته من الضهور (معقوله؟؟ سما تسويها؟؟ بس اذا صدك فخوش فرصه حتى استغل الوضع انا وعدتها ما اقربلها ولا حتى ابوسها اذا هيه مرادت هالشي.. بس اذا هيه بدت وباستني فهذا شي ثاني يعني هيه البدت (ابتسامه جانبيه بدت تنمو ع وجهه) بس يا ترى سما راح تملك الجرئه وتسويها لو لا!! اتمنى تسويها)

سما(هذا منو يراسله وليش كلساع يباوعلي ويباوع للتلفون ولا الحين يبتسم بعد.. ياربي شسوي الحين لازم ابوسه واشرد وبعدين اكوله عادي انه تحدي لا غير .. بس خل يلهه اول وما يباوعلي )

جود سوه روحه يكمل شغل بس باله ظل كله يم سما

سما اخذت نفس عميق( يله مدامه لاهي..يمه رجولي ظلت تطكطك من الخوف شلون راح انحاش(اخذت نفس ثاني حتى تهدي روحها) يله ميرادلها شي)
وقربت شوي يم جود وبكل جرئه تملكها غمضت عيونها وباسته بسرعه ع خده ورادت تشرد بس جود مسكها من ايدها
سما شهقت من سحبها وقربها منه: انا..هيه ..قصدي انا مو قصدي كل الموضوع انه....
كان جود يباوعلها وما يسمع شتحجي وبدون ما يتاني تبريرها سمح لاصابيعه تتخل بشعرها وسحبها اله وحط شفايفه ع شفايفها وقبلها بقوه وما انطاها المجال حتى ترفض او تحجي
وسما حطت ايدها ع صدره حتى تبعده بس هوة سبقها وضمها اله بالايد الثانيه وتعمق بالقبله

بهالوقت كانت نور سدت الباب:احم اعتقد انوا احنه لازم ننسحب الحين
اسراء:ليش لو مخليتنه نشوف شوي
نور:ووجع ما تستحين
اسراء:انزين  .......
نور واسراء كعدوا ع القنفه بالصاله الجبيره الي هيه مفتوحه ع الصاله الصغيره

#الصاله الصغيره بيها بابين واحد ع الصاله الجبيره وواحد ع بره يعني المزرعه

اسراء وهيه تباوع للباب :يله صارلهم اكثر من خمس دقايق ليش ما طلعت سما
نور:ووجع كاعده تحسبيلهم خلي اخوي ع راحته
اسراء راحت حطت اذانها ع الباب:وماكو حس معقول كل هاي بوس ما طلعت..
نور:استغفر الله دكعدي وخليهم ع راحتهم ..هسه تطلع ونعرف السالفه منها ونشبع عليها ضحك
اسراء:نويره صوت امج شكلها دخلت عليهم
نور كمزت:هااا😧

اما يم جود وسما فبنص اندماجهم  دخلت ام جود عليهم :شجاي اسوون

جود تركها بسرعه وسما كمزت بسرعه
سما:خالتي ..انا ..هوة..قصدي انا معلي
جود وهوة يمسح ع شواربه وحلكه :هلا يمه شجابج
ام جود:شقصدك يعني ما تريدني اجي
جود:لا يمه مو هيج بس قصدي توكم رحتوا..ما امداكم ترجعون
ام جود:رجعت ردت اجيب اغراض من المطبخ.. بس ما ظنيت راح اشوف هالشوفه وهنا..شنو قله غرف ..ما تعرفون ترحون غرفتكم ما توقعتها منك يا جود
سما:خاله انا معليه هوة البده
جود كعد بهدوء وحط رجل ع رجل:اي ذبيها عليه ..بله انا شعليه مو انتي جيتي تحرشتي
سما شهقت:انااااااا
جود:اي انتي..مو انا جنت كاعد اشتغل هنا وكافي خيري شري  وانتي جيتي بستيني
سما:الموضوع مو هيج..انا
جود:جاوبي باي او لا مو انتي اجيتي وبستيني بالاول
سما:اي بس
جودالتفت لامه: شفتي يمه هيه البدت  (رجع لالتفت لسما) لو كايلتلي انج يعني تردين هسه.. جان ما مانعت بس ع الاقل نصعد فوق

سما بفهاوه:شقصدك شريد
جود بخبث ونسه امه: تعرفين ذيك الشغله
سما فتحت حلكها بصدمه وصار وجهها طماطه : لا مو هيج..انا ..نور هيه ..وشسمه اسراء ....
جود كاتم ضحكته عليها وقاطعها : اسف شكلج انحرجتي من امي اسف اسف نسيت ان امي موجوده واكيد تستحين اني احجي هيج يم امي
ام جود:كافي انتوا شجاي تحجون صعدوا فوك وفضوها وبلا فضايح هالمره انا دخلت المره الثانيه الله يستر يجوز احد من الجهال وميجوز هيج يشوفون
وتركتهم وطلعت

سما: انته شلون تحجي هيج يمها
جود تقربلها بخبث: ليش كلت شي غلط؟ انتي الي تحرشتي ..اكول شرايج صج نصعد فوك 😉
سما:انته كلت ما راح تقربلي الا برضاتي فشلون اسوي هيج وتبوسني
جود:اي صح بس انتي السمحتيلي يوم بستيني.. يعني انتي تبوسين ع راحتج بدون ما اسمحلج  وانا لا
سما تراجعت ووجها صار ما يتفسر من الخجل :شوف انته فاهم غلط ..كل الموضوع مجرد تحدي
جود تكتف وبابتسامه لعوبه: تؤ تؤ محاجه اطلعين اعذار مثل الجهال..ترى مو عيب اذا مره رادت رجلها ترى كلش عادي فلا تستحين

سما:لحظه هسه راح اثبتلك  وراح اجيبلك نور واسراء
وراحت للصاله الجبيره ولكت نور واسراء الي كاعدين ببراءه كانهم ما سمعوا شي
سما وهيه تسحبهم وادخلهم يم جود:تعالوا واحجوله كلشي
جود غمز لنور بدون ما تحس سما
نور:عن شنو نحجي
سما:عن التحدي
نور وهيه تلكزها بخفه :اي تحدي ..ما اذكر عدنه تحدي..اسراء تذكرين اكو احد تحدانه او فد شي
اسراء:نو ما ادري عن شنو تحجي
سما وشوي وتتخبل: لا مو من صجكم 😧 (راحت يم جود) شوف ترى اكيد يتشاقون او مسوين فيني مقلب بس صج صج كان تحدي اني ابوسك فقط صدكني

جود كام وقرب منها وتكلم بهمس :اذا تبيني اصدكج راح اصدكج مو مشكله بس لا تخجلين.. واذا تردين اتانيج بالغرفه هم 😉

وهالمره اسراء ما كدرت تكض ضحكتها ع شكل سما وطكتها ضحك:😂😂😂😂يمه ما اكدر اكمل
ونور من شافتها تضحك ما كدرت تمسك نفسها هم :😂😂😂😂خرررب شوفي وجهج يفرط ضحك منا حمرتج مخربطه ومنا وجهج صار احمر وملامح وجهج صارت تكسر الخاطره

سما تباوعلهم بفهاوه والتفتت لجود لكته يضحك بخفه

نور:😂😂شوف بعدهي ما فهمت..ترى جود يدري بالتحدي 😂دزيتله رساله اول ما دخلتي 😂😂

سما:انتي..وانته ..وانتم يعني جنتوا تستعبطون عليه 😡😡 صدك ما تستحون
نور واسراء:😂😂😂
سما:عمه بعينكم لا اضحكون.. وانته جنت تدري مقلب وفشلتني وي خالتي ..هاي عود انته الجبير

جود كعد ببرود : اي وشصار يعني.. وشنو الفشله بالموضوع ترى مرتي

سما: انته 😤😤 انته😤
جود رفع حاجب:اي شبيه انا
سما بقهر: انته..لا تطاق
اسراء ونور:😂😂😂😂😂اخخخ بطني
سما ضربت رجلها بالارض: وسم كافي ضحك انتوا ما تنطاقون
وطلعت من الغرفه وهيه ميته قهر  كلما حجت كلما يزيد ضحكهم

جود من طلعت حط ايده ع عيونه وظل يضحك : تعتقدون زودناها وياها لو لا
نور:والله مو بيدي ما كدرت اوكف ضحك ع ملامح وجهها 😂😂.. تدري من الضحك حتى نعاسي طار 😂

ايند فلاش

نور:يله سمسومه قلبي كافي زعل.. اسفه بعد ما اسويها
سما:جذابه من عيونج ..كل مره تكولين ما اسويها وترجعين اسوين فيني مقالب.. تذكرين سالفه الحصان خليتي جود بالكوه يصعدني وياه والحصان عنفص علينه ورفع ايدينه ووكف ع رجوله وبغينه نطيح لو ما جود كض عدل

نور:😂😂😂😂عنفص مره وحده 😂😂بس شكلج جان تحفه  من شبكتي جود وضليتي تصيحين حتى من هده الحصان ضليتي شابكه جود وما هديتيه الا لمن نزلج من الحصان 😂😂😂😂

سما وهيه تضرب نور: وتضحك بعد تضحك..هنا اليقهرني ضحكج..تدرين ضحكج وانا معصبه يقهرني اكثر من المقلب نفسه 😡😡

نور:😂😂😂😂مو بيدي انا بنيه فرفوشه ما اعرف الا اضحك
اسراء وهيه تنزل من الدرج :خير اللهم خير من بدايه الصباح وانتي تضحكين
نور:😂😂😂شسوي مو بيدي هاي بعدهي زعلانه ع سالفه امس😂😂وشكلها راح اطلع المقالب الماضيه
اسراء: 😂😂😂سكتي لحد امس  وانا كلما اريد انام اتخيل وجه سما وافطس ضحك 😂😂😂😂😂 لدرجه حلمت بحلم واحنه شاخطين بالحلم ونضحك وكعدت وانا اضحك ع  الحلم بس جد جان حلم يضحك

نور:شنو حلمج بله خل اضحك وياج😂
اسراء : ما ادري والله نسيته بس اذكر انه مضحك 😂😂😂
نور:😂😂😂😂من صجج توج كاعده بسرعه نسيتي
اسراء:شسوي انا اذا ما فكرت بالحلم اول ما اكعد انساه وانا اول ما كعدت امي حاجتني ونسيته 😂

سما:انتوا شاربين شي 😑
اسراء:😂😂اي حشيش صيني 😂😂
نور: ولا مضروب بعد 😂😂
اسراء: خطيه ياهو ضاربه 😂😂
سما ضلت تضحك ع الواهس: شبيكم..انتوا تخبلتوا😂😂
نور: والله ما ادري شكلها اجتنه الحاله مالت الضحك 😂😂😂

هاي اسراء👆🏻
****

اما جود فطلع يتمشى ولكه محمد منبطح تحت ظل شجره

جود:صباح الخير
محمد كام من سمع صوته:صباح النور هلا استاذ جود
جود:هلا بيك اكعد ليش كمت
محمد رجع كعد وكعد جود يمه

محمد: ما جنت متوقع مزرعتكم هيج حلوه ..ماشالله مبين معتنين فيها حيل
جود:اي جدي يحبها حيل وتعب عليها لمن سواها هيج.

محمد: حرامات بسرعه طار هالاسبوع وما حسينه فيه
جود:اي الايام الحلوه تخلص بسرعه وراح نرجع للشغل

محمد:لو امددينها شوي
جود:ما نكدر اول شي عرس احمد ياله نلحك عليه  وثانيا الشغل ما اكدر اتركه اكثر من هيج

محمد:يوو نسيت عرس احمد
جود بعد سكوت:امممم مره كتلي انك جنت ناوي تسوي مشروع انته وصديقك من كنت تدرس بره
محمد:اي صح

جود:وشنو المنعكم
محمد:راس مال ماكو وترى الشركه اذا الواحد يريد يفتحها لازم عنده راس مال كبير وانا وصديقي ع كد حالنه والحمدلله

جود:اممممم وبعدكم ناوين تسوونه
جود:اي بس اذا توفرتلنه فلوس
جود:ممكن تحجيلي شوي عن مشروعك
محمد:اكيد.......

****

سوسو وهيه تروح وترجع بغرفتها بتوتر: ياربي شسوي اكيد هذا علاوي ناوي ع شي والا ليش طلب مني الا ادز الصور من تلفون حنان لرقمه ..ليش ما قبل ادزهم من رقمي اله.. ياربي سترك بس لا يسوي شي للبنيه .. من يوم غافلت حنان وخذيت تلفونها ودزيتله الصور وانا احس بتانيب الضمير ..سامحيني يا حنان بس والله غصبن عني.. حطني بموقف لو انا لو انتي .. سامحيني بس لو فضحني جان اكيد اهلي ذبحوني

دك تلفونها وكمزت من الخوف مسكت التلفون بايد مرتجفه ومن شافت رقم حنان توترت
سوسو:ياربي بس لا علاوي سوه شي لها او هددها

سوسو ردت بتوتر:الوو
حنان:هلا والله سوسو شلونج
سوسو:زينه
حنان:سوسو فيج شي ..من امس وانتي مو ع بعضج ..من رحت اسويلج عصير وبس رجعت وانتي حالتج حاله وطلعتي بسرعه  بدون ما تكولين شي وشكلج متوتره ..فيج شي او الاهل فيهم شي
سوسو:هاا! لا ماكو شي بس تعبانه شوي
حنان:سلامتج قلبي ماتشوفين شر
سوسو:الشر ما يجيج..حنون الا علاوي شخباره
حنان:اووف لا اذكرين هالحمار يمي بعد اليوم..ما ابي اسمع باسمه
سوسو:يعني ما يدك عليج او يزعجج
حنان:جان يزعجني بس صارله يومين ماله حس شكله ايس اني ارد عليه..اخيرا افتكيت منه
سوسو( لو تدرين شنو يخططلج ما جان ارتحتي هيج)
حنان:سوسو وين رحتي
سوسو:موجوده..الا اختج وبيت عمج متى يجون
حنان:لا تكولين اختي..عمه بعينها ولا ابلعها من يوم شفتها وهيه بس ادور عرايك..والله لو ما امي موصيتني ما احتك فيها ولا اتعارك ولا جان فركت خشتها بالكاع
سوسو:شعجب امج صارت زينه وياها
حنان:ما ادري من يوم ماتت امها وهيه وصتني ما اعاركها شكلها كسرت خاطرها لان صارت يتيمه ..بس والله ما اسكتلها اذا سوت شي او اطاولت ع امي اذبحها
سوسو:يمكن..اكلج امي تصيحني بعدين اكلمج باي
حنان:بايات (هاي شبيها احسها مرتبكه ليكون صايرلها شي بس ماتكول.. مو مهم اذا رادت تحجي تجيني من كيفها)

****

دخلت زينب وبنتها بيدها وولادها وراها
نور كامت تلكت منها بنتها:يمه فديت البنات ..يمه فدوه..شعجب ساكته العاده لو خامده لو فاكه حلكها واصارخ اول مره اشوفها هاديه
زينب: وجع لا تحجين ع بنتي والله تخبل..تعاي شوفيها بالليل تكعدلج تسهرلج للصبح بس اسولف وتناغي فديتها بس كلش مو وكت سوالفها وانا مطفيه..البارحه نومتني بالخمسه صليت ونمت
سما:شعجب لعد كعدتي من وقت
زينب وهيه تاشر ع اولادها:هوة انا اكدر انام وهذول الفيران فوك راسي..كعدوني وكعدوا اختهم وياي من وره صريخهم

نور:الله يعينج ع هيج خلفه لو انا مكانج جان جدعتهم بزباله ..ما اتحمل جهال وكح انا.

نور ما حست الا بسلمان طكها بحجر بالنباطه ع عينها:اخخخخ عيني يا احول

سلمان باوعلها بحقد: لا تعايبين علينه..اصلا الله يعين جهالج عليج

سما ماكدرت تمسك ضحكتها
نور:ايا كلب اذا ما ربيتك (حطت البنت بحضن سما) مسكي مسكي
سلمان  من شافها كامت راسا شرد بره ونور وراه
نور:وين تروح مني انا الك..لو ما رجلي جان علكتك بالبنكه 😡

زينب طالعت لسما وهيه تلعب بنتها: الله يرزقج بالاحلى منها
نور رفعت ادينها لفوك:امين يارب والله بيتنه فاهي ومن زمان ما سمعنه صوت جاهل فيه يارب يرزقهم بدرزن جهال ويملون علينه البيت
زينب: زين لعد انا تعطفت عليكم ومليت البيت بجهالي..الله يرزقج بمثلهم
نور صرخت بصوت عالي:لاااااا
زينب اخترعت:ووجع شبيج
نور:لا رحم الله والديج الا مثل جهالج ما نبي
زينب:😒وشفيهم جهالي بله
نور: وتسال بعد هوة انتي جهالج ينجرعون!! والله عفاريت مو جهال..شاكين الكاع وكايلين نباع ..الله يخلي المزرعه الخلتهم يسرحون بيها وفاكينه من شرهم..ربي يرزقها بجاهل بالضبط مثل جود فديته من طفولته رزه صحيح عصبي بس راكد فديته .. (باوعت لزينب بنص عين) تعلمي هيج ادعي مو تبلشين الوادم بادعيتج وتورطينهم بجهال مثل جهالج

سما تحاول تغير الموضوع:الا سروا شبيج صافنه
اسراء:هااا لا ماكو شي

حيدر توه داخل وبيده كهوة وبالايد الثانيه ايباده وع ركبته حاط السماعات :اكيد مشتاقتلي وجاي تفكر وين راح الحب؟؟ ترى جنت اسوي كهوة خخخ
اسراء:يا ثكل دمك  ( صح جنت افكر بيك بس بغير شي كلساع اذكر من حيدر حجه ع خطبته كبال الكل وانا طلعت من شفت روحي غلط بس ظليت بره اسمعهم..ما راضي يروح كلام امي وجدي من كالوا ع حيدر من جان صغير جان يكول الا ازوجها واكسر راسها.. معقوله يزوجني لهلسبب يعني مو حبا بيه.. لا مو معقوله بوكتها جنه صغار وما اعتقد يعنيها..وليش لا يجوز صح  .. اصلا منو يكول يحبني شو من يحجيها جايبها ع ضحك وشقه وحتى من ارفضه يضل يضحك يعني ما ماخذ السالفه جد)
حيدر:ادري مو من كلبج 😉
اسراء:الا من كلبي يا دعايه اوريو 😂😂😂
نور:لا اذكريني بدشداشته ..كلما اذكرها عليه افطس ضحك كلش ما تلوكلك الدشداشه
حيدر:انا شعلي كله من هالسكرتير الفكر كتله اشتريلي دشداشه حلوه راح مشتريلي دشداشه زركه.. انعل ابو ذوقه الخايس

نور:😂😂😂بس الله ع المطنزه من نزلت بيها
سما :ترى حلوه عليه الدشداشه بس هيه لونها مو حلو (جود بوكتها جان لابس سوده جان طالع يخبل بيها)

فلاش باك

اول ما نزل حيدر من الدرج وجان الكل كاعد بالصاله وكلها ظلت تباوعله واول وحده ضحكت عليه هيه اسراء

اسراء:😂😂😂😂😂 اكلك شنو شركه اوريو دافعتلك فلوس حتى تسويلها دعايه

نور:😂😂😂اي والله شهيتني بالاوريو
حيدر:انجبي انتي وياها شنو ما شايفات لون ازرك
ام جود:معليك منهم يمه..طالع تخبل
حيدر:اي فديتج يمه
اسراء باوعتله بطرف عينها وكاتمه الضحكه:كالوها والله.. الشاذي بعين امه غزال
حيدر: وانتي مرتي القرده 😂
اسراء باوعتله بعصبيه وسكتت
سما:😂😂😂والله محد يعرف يسكتها غيرك
حيدر:اي بعد توؤم روحي شلون ما اعرفلها
اسراء:اي اي احلم واريد وبنشوف وين توصل باحلامك
حيدر:توصل لحلقه وبدله بيضه وبعدين تعرفين الباقي 😉 لان راح اجربينه
اسراء:انته حرام حتى الواحد يناقشك 😡

حيدر:😂😂😂😂 لعد ليش تناقشيني كل مره.. الا سما وين جود
سما:ما ادري تركته يبدل ونزلت للمطبخ
نور:طلع بره وكعد يم جدي يتكهوة😂😂😂خو تعرف مكان جدي المفضل حاط دله واستكاين وعايش جو قبل..وجاي يتانون ولد ابو جبار يجي حتى يدليهم ع مكان مزرعتهم
حيدر:ليش جدي ما يدلها؟ جم مره يروحلها
نور:هيه بعيده وينساها.. الا روح شوف جود طالع صاك بالدشداشه
حيدر:عمه بعينج مشتهيتج مره تمدحيني مثله
نور:😂😂انت هم اخوي الصاك بس ما احب امدحك بوجهك اخاف ترفع خشمك
حيدر بتمثيل وهوة يرفع خشمه لفوك وينفخ صدره:ههههع اي جذيه من الاول

سما تهمس لنور:متى نزل جود
نور:قبل شوي..شفتيه بالدشداشه
سما:لا
نور:فاتتج خطير
سما:طكني الفضول راح اروح اشوفه
نور:بس ديربالج شوي ويجي ولد ابو جبار دربالج يلمحج
سما: لا من بعيد

وراحت للمكان الدلته عليه نور وشافت جود وهوة رافع رداناته ويكهوي جده وبعدين صب لروحه كهوة وكعد وكبل ما يشرب شي منها شاف سما من بعيد وباوعلها بعصبيه ليش اجت من هالناحيه وخزرها حتى ترجع

بس الفاهيه ظلت مفهيه فيه وتباوعله ولشماغه ولكل تفاصيل لبسه لحدما طفح فيه الكيل وكام لها وراح لجهتها بسرعه وسحبها وراه بعيد عن مكان الجد

جود:انتي مجنونه..ليش اجيتي منا..هسه يجي الرجال

سما:اي شفيك معصب ترى بعده ما اجه
جود:اخلصي شتردين
سما:ما اريد شي بس ردت اشوف المكان
جود:دخلي داخل ولا اشوفج جايه هالصوب لان هالمكان بس للرجال وجدي يستقبلهم منا..واذا شفتج ماره بالغلط منا احش رجولج حش.. حمدي ربج ولد ابو جبار ما جاي وما شافج ولا جان يا ويلج

سما:انزين..انته ما تعرف بس العصبيه والتهديد
جود بعصبيه:استغفر الله بعدهي تهذر..ددخلي وفضيها

سما دخلت وهيه تدردم: لازم يرزل ما يكدر نوبات احسها متعته انه يرزل فيني ..بس طالع حلو حتى خزرته حلوه..فديته من يعقد حواجبه بعصبيه انسه حتى سالفتي .. خرررب شجاي اهذر انا خل اروح اكل اشرفلي

ايند فلاش

لبس جود ووضعيته👆🏻

نور:بس المحيرني انته ما انتبهت للون الدشداشه من انطاكياها
حيدر:شدراني جنت بوكتها منثول بالشغل ومنصمط ابو ابوي حتى ما فتحتها من الجيس..همزين جود رجع للشغل وكلشي صار تمام وافتكيت وراح ارجع للدياحه

نور بصوت واطي:وترجع للبنات😏
حيدر :اششششش سكتي لا تسمعج وتصدك هيه بس بنته وحده وعاويه وتسلليه فقط وما تحبني بعد تريد بنك متنقل كلساع تكول حبيبي دزلي رصيد ماعدي
نور باندماج:وادزلها
حيدر:خل اطير شنو شايفتني خروف..هوة مو ع قيمه الرصيد جاي نصرف دك اليهد بس ما احب احد يستغفلني ويستغلني..اذا ابي ادز فادز من كيفي مو استغلال
نور وهيه ادك ع ضهره:عفيه باخوي السبع
حيدر:احم شعدالج لعد

دك تلفون ام جود وردت: الوو... وعليكم السلام يا هلا ومرحبا.. الحمدلله بخير وانتي شلونج وشلون العيال... الحمدلله .. نتشرف فيكم والله..اي حياج باي وكت.. اي انشالله اشاور ابوها واردلج خبر ..مع السلامه.

حيدر:منو يمه
ام جود والفرحه مو سايعتها :هاي ام راشد..واخيرا صار الي ابالي
نور وكلبها كارصها:شقصدج يمه
ام جود: اليوم خطبتج مني وكالت اذا موافقين نجي نخطب رسمي
نور( لالا ومحمد؟ مستحيل ): بس انا مابي ازوج الحين بعدني صغيره
ام جود: يا صغيره ترى بس هالسنه وتتخرجين ..شعدج بعد
نور:بس ما ابيه هوة
ام جود: هوة انتي وين شايفته..شوفيه وبعدين حكمي
نور: ما ابي اشوفه
ام جود بعصبيه:مو بكيفج والله..ماعندج حتى عذر مقنع انج ترفضين
حيدر:يمه هدي شوي هسه خل نسال عنه وبعدين تناقشوا
ام جود:ولد صديقتي واعرفهم..ناس والنعم منهم
نور كامت وخذت عكازاتها:زواج ماني مزوجه
وطلعت وهيه تسمع تدردم امها وراها
ام جود:وليش بله شناقصه الولد بس كليلي.. ولد عز وجاه والكل تحلف باهله
حيدر:الله يهداج يمه كو جذيه التفاهم

سما ( ياربي منين اجه هذا بعد..يا ترى اسوي شي لو ملازم..لا لازم اسوي شي بس شنو.. اي محمد)
سما نكزت اسراء بخفه:تعاي وراي
اسراء:اوك
طلعت سما وطلعت وراها اسراء بشوي
*******

جود:اممممم صراحه عجبني مشروعك وطب دماغي..تدري من زمان جان ودي افتح فرع ثاني لشركتنه بس بفكره جديده .. والحين انته اوحيتلي بالفكره..(بتفكير) شرايك نشتغل شراكه🤔

محمد:شراكه؟ شقصدك
جود: يعني تصير الك نسبه بالشركه
محمد:تتشاقه وياي مو
جود:لا انته فكرتك عجبتني وميصير اخذها واطبقها تعتبر بوك وحرام فاحسن شي انطيك نسبه بيها وتشتغل وياي ..بس نسبتي راح اصير اكبر منك موافق
محمد:مجاي استوعب بعدني ..ليش اصير شريك وياك وانا ماعدي ولا فلس
جود: شوف منك الفكره ومني الفلوس..وانته راح ادير الشركه وانا مشرف عليك لاني ما راح اكدر ادير شركتين سوه (انتظر يتكلم محمد بس ظل ملتزم السكوت) كول تم وبس مابيه حيل اشرح اكثر
محمد بفرحه: اوك مع اني للحين ما مصدك ..بربك مو مقلب
جود:ههههههع لا
محمد بشك:اكلك خو ما جاي تسوي هالشي صدقه او رد جميل او فد شي

جود:لا شدخل هاي بهاي لو مثل ما تكول جان دفعتلك جم فلس وفضيتها ..خبل انا حتى اورط روحي واخليك ادير شركه اذا انته ما تستحقها..بس الحق يقال انا راح اجربك بالبدايه بس اذا شغلك مو مضبوط فاسمحلي راح اشيلك من الاداره حتى لو كانت فكرتك ...لا تكول ما حذرتك ..هااا موافق
محمد:اكيد ههههه بس ميصيرتتراجع عن كلامك
جود:عيب عليك مو ولد ابو جود الي يتراجع عن كلامه
محمد:والنعم والله منك ومن الوالد

دك نقال جود وكان يوسف
جود بدون نفس: الوو
يوسف:السلام عليكم
جود:عليكم السلام..امر بغيت شي
يوسف:امممم مدري شكلك ..مدري منين ابدي
جود عقد حواجبه :شنو شصاير كول
يوسف: اول شي تذكر هذا القتل الممرضه وكتلك استخدم نفس الماده الي موتت ام سما
جود:اي اذكر
يوسف: طلع وراه بلاوي زركه وطلع وي عصابه اتاجر بالمخدرات والسلاح والها علاقه بالارهاب لان تبيع السلاح لاي جهه تدفع فلوس وما همه ارهاب او غيرها ..وتدري منو رئيس هالعصابه
جود:منو
يوسف:ابو عزيز
جود:منو؟؟
يوسف:نسيته ! ابو عزيز..صالح رجل امك القديم
جود:.....
يوسف:وياي؟؟ جود تسمعني
جود:هاا اي وياك بس شلون صار هيج.. اذكره حده سكير وياله عضو صغير بعصابه شسواه رئيس عصابه
يوسف:هذا الي ما ادري فيه..بس تدري عزيز الي دزيتلي رقمه وكتلي اعرف كلشي عنه طلع ولده عزيز
جود بصدمه:عزيز نفسه
يوسف:اي
جود بايده مسح وجهه بعصبيه:تعتقد صدفه انوا عزيز يعرف العايله واحتك فيهم
يوسف:مع انك ما كتلي تفاصيل سالفه عزيز وبشنو زاعجك بس ما اعتقد صدفه..بس ديربالك منه ترى مو هين..ومتهم باكثر من جريمه وبكل مره يطلع مثل الشعره من العجين .. واقل جرايمه الكتل والاغتصاب بس ولا مره انسجن دايما يطلع بسبب قله الادله

جود وهوة يتمشه بعصبيه ويرجع شعره لوره :بعد اكو شي
يوسف:اي اكو شغله كلش مهمه
جود:كول
يوسف:احمد ولد عمك
جود:شبيه
يوسف: واحنه نراقب ابراهيم شفناه مره دخل بشقه مشبوها كلها شرب وفسق ومخدرات ..و
جود:اي كمل
يوسف:شفناه دخل نفس الشقه
جود بصدمه:متاكد احمد ولد عمي
يوسف:اي متاكد والي حاطهم يراقبون يصورولي كل واحد يحتك بابراهيم وصورلي احمد ومتاكد انه هوة
جود:بروح ابوك تاكد كبل لا تحجي متاكد بنفس الشقه دخل..يعني نفس الشقه الدخل بيها ابراهيم
يوسف:اي متاكد
جود:انزين شنو علاقته فيهم..وشورطه وياهم وشلون
يوسف:للحين ما ادري..بس كافي دخل وكرهم او احتك فيهم ولو من بعيد فهذا خطر بحد ذاته .. الحك عليه يا جود وحاول تبعده عنهم

******

احمد وهوة توه فاتح الباب وجاي شارب وحالته حاله
وهوة يسد الباب انطبك بقوه وطلع صوت
احمد التفت للباب:اشششش لا تكعد الاهل وتفضحنه..عاد لو كعد ابوي محد يفكنه من الخيزرانه ههههه نروح وطي انا وياك

ظل يمشي مثل الاثول ودعم بالكرسي
احمد يكلم الكرسي وهوة يطوطح:شوي شوي شفيك تدفع..امشي بشويش محد طاير

ومشه وهوة يلتفت ودعم بالطاوله ورادت توكع المزهريه بس لكفها بسرعه وبالكوه يتكلم :شسالفه احد مصلطكم عليه حتى تفضحوني

ام احمد:احمد وي منو تتكلم
احمد:اششش يمه لحد يكعد غيرج..جنت اكلم الاخون " وياشر ع الكرسي والطاوله"

ام احمد:يمه فيك شي..ليش تتكلم جذيه
احمد يباوع لروحه:شفيني ..مافيني شي جني البخت
ام احمد قربت منه بشك:احمد! شارب شي انته
احمد حط صبعه ع شفايفه بتفكير: يمكن مو متاكد
ام احمد:حسبي الله ع عدوينك شمغبر انته ..تعال بسرعه تعال قبل ما يصحه ابوك
احمد:وين يمه
ام احمد سحبته:امشي وانته ساكت
خذته ودخلته لغرفته وهوة منتكي عليها ومن الدوخه طاح وسحبها وياه
ام احمد:اخخخخ حسبي الله ع ابليسك كسرتني ..حسابي مو الحين حسابي من تكعد..هاي عرسك مابقه عليه شي وانته جذيه لا والله شكلك راح تفشلنه بالعرس
احمد كام: لا تحجين عن العرس..مابي هاي الخبله تصير مرتي..اذا جدي يبيها هلكثر يا اخي خل يزوجها هو ويفضنه
ام احمد: انا صرت اخي..امشي بس امشي وكافي تطوطح

وراد ينام ع القنفه
ام احمد سحبته:مو هني تعال للجربايه

وبعد عناء وصلته للجربايه وطاحت وياه ع الجربايه

ام احمد كامت:اخخخخ ضهري.. ما اكدر امشي
طلعت من الدار ولاكتها حنان:هايمه شفيج كاضه ضهرج
ام احمد:لا ولا شي..الا وين ابوج
حنان:ما ادري توني كاعده تبيني اصحيه
ام احمد بسرعه:لالالا خليه
حنان باستغراب:اوك

ام احمد:الا وين بدور
حنان:ما ادري توني شفتها طالعه من غرفتها اكيد راح تسويلها جاي او كهوة يصحصحها
ام احمد:اوك انا راح اطلع عازميني صاحباتي اذا كعد احمد مع اني ما اعتقد يكعد الحين..بس اذا كعد كليله لا يطلع ابيه بموضوع ..وهاج اللسته مال نواقص البيت..جنت ناويه انطيها للحارس يروح يشتريهم بس بعد ما صعدت بعد مافيني حيل انزل

حنان:مدام نزلتي فليش صعدتي بدون ما تنطينهيا
ام احمد:وانتي شكو .. انطيهيا وانتي ساكته
حنان:اوك اوك

*****

جود دخل للصاله:راح نروح الحين كل واحد يروح يجهز نفسه
ام جود:ليش شصار مو ع اساس الظهر نتغده ونروح
جود:صارت عندي شغله ضروريه ولازم نروح ..فلذلك يله كل واحد يبدل وينزل غراضه ..وانا راح اكلم جدي
ام جود: اوك

****

اما يم بيت ابو احمد فنزل شاب ومعاه جنطه سفره

الشاب وهوة يرفع نضاراته ويحطها ع راسه:هذا اكيد بيت ابو احمد هيج العنوان يكول واكيد سما هنا

دخل وفتح الباب الخارجي وما لكه احد فدخل للحديقه وكعد يتاملها :حلووو ..جميل
توجه للباب الداخلي ودكه

بدور جانت بالمطبخ:منو يدك الباب معقوله الحارس..العاده يدك تلفون
حطت شال ع راسها وطلعت  وشافت شاب متوسط الطول وحنطاوي ويملك لحيه خفيفه وشوارب وكفشه حلوه ولابس لبس سبورتي

طلال👆🏻

بدور:تفضل..شلون دخلت وشلون الحارس سمحلك
الشاب:والله ما ادري ما شفت احد يم الباب لذلك دخلت المهم هنا بيت ابو احمد مو
بدور:اي وصلت منو رايد
الشاب بابتسامه بشوشه: هنا سما
بدور ناظرته باستغراب: من وين تعرفها ومنو انت
الشاب:هاا سوري نسيت اعرف عن نفسي انا طلال اخو سما بالرضاعه
بدور بابتسامه:اخو جوجو؟
طلال:اي انا ..منو حضرتج
بدور:انا بدور اخت سما
طلال: تشرفت ع فكره اسمج حلو ع صاحبته
بدور:عفوا؟
طلال:لا ولاشي ما كلتي هنا سما
بدور:لا والله رايحين مزرعه
طلال: متى ترد
بدور:ع اساس اليوم بس شوكت ما ادري (باوعت لشنطته) شنو توك جاي مطار
طلال: اي ما شفت حتى الاهل ..ع اساس كلت اول وحده اشوفها وافاجأها هيه سما بس شكلها هيه فاجأتني ههه
بدور:هههه يله مصار شي..ما بقه شي وتجي
طلال:يله عن اذنج اروح اشوف الاهل علما تجي سما وارجع..بس طلبتج لا تكليلها ع جيتي خل افاجأها
بدور بابتسامه: اوك مثل متريد
طلال : مع السلامه
بدور:الله وياك

دخلت بدور وراحت دورت ع حنان ولكتها بالصاله تشوف تلفزيون (احس حنون متغيره هواي..صايره تكعد ويانه واطالع تلفزيون بعد..قبل كله مكابله التلفون حتى ما تكعد يمنه ولو بالاسم حتى تلفزيون من نحط ع فلم ونجمع ما تكعد ويانه)

بدور:حنون ..الحارس وينه
حنان:امي دزته ع اغراض وراح وبعده ما رجع
بدور: وامي وين
حنان:طلعت
بدور: وابوي وين
حنان:ما ادري هم يمكن طلع
بدور:شالقضيه كلهم طالعين.. والله هالاسبوع ضوجه بدون نور وسما شوكت يجون

****

هلو شلونكم
مشتاقتلكم والله
اسفه ع هالغياب بس تدرون مرحله رابعه خلصت من البحث واجت امتحانات كورسات هنوب الامتحانات برمضان وطاح حظنه والله يستر من النتايج
فدوه ادعولي حاطه ايدي ع كلبي وخايفه من النتيجه..كون انجح وافتك

***
اكو فد ملاحظه كلساع فد واحد يسالني عن لهجتي فكلت اتكلم هنا احسن من ما كلساع ارد ع شخص شخص

انا صح عراقيه بس لهجتي شوي قريبه ع الكويت بس ترى مو جاي اقلدهم بس انا لهجتي هيج بالحياة اليوميه وحتى اهلي يحجون هيج وجاي احاول احجي عراقي بحت بس مجاي اعرف

والي يسال ليش ما احجي عراقي عدل فهذا لاني اصلي من الزبير وقريبين ع الكويت فلذلك لهجتنه تميل الهم وهذا بالاضافه انوا عدنه كرايب من الكويت فهذا الشي خله لهجتنه مخلوطه بين الكويت والعراق والسلام ختام
اووف تعبت وانا احجي 😅

نسيت اكلكم اذا اكو اي خربطه بالبارت وما مترابطه وي البارتات القبل فعذروني فهذا لاني نسيت الروايه مثلكم مو بس انتوا نسيتوا 😅 وصراحه تعيجزت اقراها من البدايه فقريت اخر بارت بس
وانشالله اذا خلصت الروايه فراح ارجع عليها اعدلها
هيه بس خل تخلص وتفكنه 😂 انا انشلع كلبي بيها مو بس انتوا