رواية لأجل من احببت سأكون قوية الفصل الثامن 8 - بقلم امل

ضّمَيِّ شٍعٌرجِ وِأّلَلَهِ أّحٌلَهِ😍
شٍعٌرهِ لَوِ طّلَعٌتّ ذنِبِ😔
صٌيِّريِّ جِنِهِ بِعٌيِّنِ رجِلَجِ💂
صٌيِّريِّ دِعٌوِةّ مَؤمَنِ مَقِرر يِّحٌبِ❤️
صٌيِّريِّ مَخَتّلَفِّهِ بِحٌشٍمَتّجِ🌺
حٌتّى تّلَګيِّنِ أّلَيِّحٌبِجِ مَنِ گلَبِ💘

¸.•♥•.¸¸.•♥•(❤️) •♥•.¸¸.•♥•.¸

سما صحصحت وحاولت تفك نفسها بس ما كدرت.. فكالت بنفسها احسن طريقه للدفاع هيه الهجوم

فمسكت سما شعر ام احمد

ام احمد:اخخخخ يا قليله الادب
سما:جا شعدالج اسكتلج.. والله شكلج متاثره بالقصص انوا مرت الابو تكتل البنت الفقيره وتشغلها خدامه والبنت اظل ساكته وتنفذ الاوامر وهي تبجي.. لا عيوني لا هاي مو عدي بطلي حركات سندريلا ومرت الابو.. ترى انا موفقيره ولا ينوكل حكي اوكي..اصحي ع حالج يا عيوني

ام احمد:حماااره اخخخخ هدي شعري
سما: هدي وانا اهد (الله جان ودي من زمان اتعارك واكول هالجمله.. والحين اجت الفرصه 😁)

وسمع اصريخهم الكل واجوا
ام سما بعصبيه:سما عيب يمه ..هديها بسرعه
سما:يمه هيه البدت اجت وانا نايمه وجرت شعري..خليها تهدني واهدها

وتدخل ابو احمد وكل وحده تركت الثانيه
وبهاللحظه دخلت حنان بعد ما سمعت بالسالفه.. وحاولت تضرب سما بس ابوها مسكها

حنان:انتي شلون تتجرئين وتمدين ايدج  ع امي يا حيوانه يا تربيه الشوارع

سما:احترمي نفسج لا اكص السانج
ام سما:بس كافي اثنينكم
حنان:اعلمج بعدين.. بسيطه

ابو احمد:كافي حنان مهما يكون هاي اختج الجبيره.. لازم تحترمينها
حنان: لا والله جا ليش ما احترمت امي مو هيه اكبر منها

سما:والله امج لو محترمه نفسها جان ما مديت ايدي..بس امج تحط نفسها بمواقف بااااايخه
ام احمد:اكلي تبن لا اكص السانج

ابو احمد:بسسسسس.. عالاقل احترموني شنو واكف بينكم طرطور (وجه نظره لسما وحجه بهدوء) وانتي يا بنتي لازم تعتذرين من عمتج ام احمد.. حتى لو هيه البدت بس لازم تكوليلنه واحنه نوكفها عند حدها مو تمدين ايدج مهما يكون هيه اكبر منج.. يله يا بنتي عفيه

سما:😏انته عايش دور الابوا ومصدك روحك.. ترى انته بالنسبه الي لا ابوي ولا اعرفك اوكي.. مو عدالك اجيت معناتها تقبلتك.. انا اجيت علمود امي.. فمره ثانيه رجاءا لا تدخل بحياتي ولا تكلي شنو اسوي لان انته مو ابوي..يا استاذ محمد

ما حست الا كف اجه من امها.. وناظرت امها بصدمه

ام سما: الظاهر اني ما ربيتج عدل.. شلون تتجراين وترفعين صوتج ع ابوج
ناظرت ابوها بغضب ورجعت نظرها لامها
اشرت باصبعها ع ابوها: تضربين علمود هذا الي تركج وتخله عنج

ام سما: عدلي اسلوبج  لا يجيج كف ثاني..هذا التحجين عنه هوة ابوج ولازم تتقبلين الواقع وتنسين الي صار

سما ناظرت ام احمد وحنان وشافت نظرت الشماته بعينهم ويبتسمون ع اهانتها.. فطلعت بسرعه قبل لا تخونها دمعتها

ام سما ناظرت الارض بحزن
ابو احمد: ما كان لازم اضربينها كدام الكل وانا اسف لان كل هذا بسببي

ام احمد:تستاهل بنت ما مربايه
ام سما بعصبيه: مو عدالج لان وكفت ضد بنتي معناتها انتي ع حقي.. ادري بيج انتي السبب بكل شي.. بس احذرج اذا تقربتي من بنتي مره ثانيه ترى صدكيني ما راح اسكتلج.. ترى انا تغيرت ما عدت فاطمه القديمه ..واليمس بنتي بسوء اكله بسنوني فاهمه..الا بنتي عاد

ام احمد ناظرتها بغضب  وطلعت ولحكتها بنتها وبدور ونور
ام سما حست بدوخه بعد كل هالارهاق الي صار ورادت اطيح وسندها ابو احمد وجلسها ع السرير

ام سما بصوت متقطع: س ساعدني.. اااروح غرفتي.. م مابي سما ت ت تشوفني

وساعدها ابو احمد ووصلها للدار واتصل ع الدكتور

نور راحت لبيتهم هيه وبدور  وكعدوا يسولفون ع الي صار
ودخل جود توه راجع من الشغل ومن سمع باسمها من ظمن حجيهم ووكف ورجع

جود: شصاير شنو صايره مشكله
نور بدت تحجيله كلشي
نور: ههههع انته لو شايفهم بالبدايه يفطسون ضحك وحده كاضه شعر الثانيه وسما تكلها هدي وانا اهد..حسيتها عوكة جهال

بدور: بس هيه مبينه ما تنكدر وام السانين
نور: اي بس كله من امج ادور المشاكل(انتبهت لنفسها) اسفه مو قصدي

بدور: لا عادي.. امي مو سيئه بس الحين عاميتها الغيره
نور: اي بس اصدكين كسرت خاطري بالاخير من طلعت مكسوره الخاطر

جود تركهم وصعد لغرفته يبدل وهو يفكر فيها (شكل المشاكل ما راح تنتهي من يوم اجوا لهنا.. الله يساعد عمي بس)

اما بالنسبه لسما فهي طلعت من الدار ما تدري وين تروح وما حست برجولها يوم وصلوها لحديقه صغيره خلف البيت وكعدت بزاويه وكورت رجولها لصدرها وحطت راسها ع ركبها وظلت تبجي

سما: اكره هالبيت واكره الناس الي بيه اكرهم كلهم.. من يوم اجينه هنا وامي متغيره عليه بسبتهم.. اريد ارجع لبيتنه ما اريد اظل هنا 😭😭

كان اكو احد يراقبها من شباك دارهم وهو جود وحس بالم بكلبه من شافها بهالحاله ( انا ليش كلبي يعورني عليها من اشوفها بهالضعيف.. يجوز لان تعودت عليها كويه ولسانها طويل)

نزل جود وصاح ل نور
نور: نعم جود
جود: تعاي شوي
وخذها ع جهه وكلمها بعيد عن الكل

جود مسح ع ركبته بحيره وارتباك خفيفي: احم  هذا.. اريد منج شي
نور: امر ادلل
جود: سما كاعده بالحديقه الخلفيه وتبجي اريدج تروحين تحجين وياها وتخففين عنها شوي

نور: اي من هسه بده الحب لان راح اصير زوجتك 😉
جود:شلون عرفتي اني راح ازوجها.. وبعدين انا ما احبها بس خطيه ظاله لوحدها

نور: سمعت جدو يحاجي امي بالموضوع😊
جود بجديه: اذا سمعت انج جاي تتنصتين مره ثانيه اكص لسانج

نور خافت لان تعرف اخوها جدي مو مثل  حيدر تناكره
نور:انشالله
ورادت تروح
جود: سمعي
نور باوعتله
جود: عود حسسيها انج رحتي من نفسج.. مو تكوليلها اني كتلج خوش

نور: ليش بالعكس اذا درت انك خايف ع مشاعرها راح تنعجب بيك وتحبك☺️

جود: محد طلب رايج اوكي وانا ما اريدها تحبني اوكي.. هاي خرابيط الحب بس بالتلفزيون وماكو بالواقع اوكي..(عقد حواجبه بعصبيه) والله اذا سمعت انج حسستيها بس مجرد تحسيس اني انا الكتلج راح تشوفين

نور:انزين بس لا تعصب..شبيك بس اربعه وعشرين ساعه بس عاكد النونه.. يا اخي ابتسم.. مراح تخسر شي

جود ناظرها بعصبيه
نور:اوك اسفه اسفه يا كلمه ردي بمكانج🙊

وراحت نور ل سما
نور: ليش الحلو يبجي
سما مسحت دموعها ورفعت راسها وناظرتها ابرود

نور بابتسامه:عيونج حلوه تخربيهم بالدمع ليش.. الله واكبر عليج

ابتسمت سما وظلت ساكته

نور:شرايج تروحين تغسلين وجهج وتبدلين لان راح يحطون الغده ووره الغده ترحين وياي البيتنه ونكعد سوه

سما:اوكي..انا سما وانتي شسمج
نور:اوه سوري نسيت اقدم نفسي😅..انا  نور

سما: عاشت الاسامي
نور: وانتي العايشه يله بسرعه روحي

سما راحت لغرفتها وكان جود يتابع الي صار ومع كل ابتسامه منها كان يبتسم لا اراديا.. وظل يتابعها من مشت مع ابتسامه ع وجهه وانتبهت نور اله وابتسمت ابتسامه خبيثه وجود من شاف نور تناظره كشر بوجهها ودخل غرفته

نور اجت ل جود:اممممم تكول ما احبها وانته تطالعها وتبتسم.. انعل ابو دارك صارلي سنين مكابلتك ما فكرت تبتسم بوجهي.. وهاي الي ما تعرفها طاكها تبسم علمود بسمتها

جود ببرود: خلصتي 😒
نور:يعني ما ادري خل افكر اخاف اكو شي نسيته
جود:طلعي بره
نور: افااا
جود رفع حاجب واشر ع الباب

نور: انزين لا تطرد انا اطلع بكرامتي
وطلعت ورجعت مدت راسها وكملت

نور:بس اصدك تجنن كافي عيونها كافي شعرها..كلها بصوب وشعرها بصوب..اووويلي ع شعرها.. خلفله عليه شعري ما يوصل جتفي .. يا...
ما كملت كلامها يوم شافت نظراته الحاده وحواجبه المعقوده فخافت وطلعت وطبكت الباب بسرعه

جود:( معقوله انا جنت ابتسم من اشوفها لو هاي تبالغ.. انا اصلا ليش طلعت اشوفها.. ليكون صدك مثل ما كالت نور.. لازم من يوم ورايح اقلل احتكاكي بيها وما راح احجي وياها وما راح اساعدها بعد اليوم.. لحظه مو كاني كلت قبل ما اساعدها وساعدتها 😑..انا ما ادري من اشوفها زعلانه كلبي ما يطاوعني.. لا بس هالمره صدك ما راح اساعدها.. لان ما اريد اكرر نفس الغلطه واطب بمتاهه المشاعر.. )

عند ام سما

كانت في حاله صعبه وظلت تتقيا مع بعض الدم وتشعر بالدوار

ابو احمد اتصل ع جود : الوو جود ساعدني عفيه .. ام سما كلش مريضه والدكتور يكول لازم نوديها للمستشفى.. بس هيه معنده ما تريد تروح

جود: جايك عمي بس لحظات
وبسرعه البرق اجه لغرفه ام سما
جود تقدم لام سما
جود:خاله ليش ما تردين تروحين للمستشفى شوفي حالتج شلون صايره

ام سما تحجي بصعوبه وهي تحس راسها ثكيل
ام سما: م ما اريدبنتي تعرف اني مريضه.. ل لو طلعت ه هسه وشافتني هيج فراح تعرف مرضي

جود: لخاطري خلنه نروح واذا ع سما انا راح اتصرف واطلعهم من البيت وانتوا طلعوا

وراح جود لنور:نور اريد تسويلي شي
نور:ماشالله شنو اليوم يوم الطلبات وانا ما ادري.. كول يا اخوي شعندك
جود: ابي اطلعكم للسوك واغديكم ع حسابي بس ع شرط تقنعين بنات عمج كلهم يجون وياج اما اذا ابحدج فما راح اوديج

نور شكت الكشره: صدك..احلف .. احلى طلب والله( ونطت ع اخوها وباسته) احلى اخو والله

جود ابتسملها بتوتر:( يارب يمشي كلشي بخير وترضى تجي ويانه سما)
جود:اريدج تشترين لسما ثياب جديده لان ثيابها كلها قديمه.. واكيد لو انا كتلها ما راح تقبل بس اذا طلعت منج فما راح تكول شي.. ولا تكوليلها انا كتلج.. لان لو درت مني ما راح تقبل تاخذ فلس لو مدري منو يجي

نور: وليش ما تقبل منك بالذات
جود: لان واحد ما يطيق الثاني تكدرين تكولين شعور متبادل
نور:😉متاكد انته ما اطيقها

جود رفع حاجب:هاي الي راح تخليني اكنسل الطلعه
نور:لالا فديتك كلشي ولا الطلعه.. والله انته احسن اخو بالدنيا

طلع حيدر من وراها: اهاا وانا طايح من عينج مثلا
نور: انته فالح بس تتعارك ومطلع عيني الله يساعد التاخذك.. اما جواد حبيبي فكلشي اريده يجيبه لي.. اشك انو اكو بنت عندها اخو مثله.. يا بختي فيك

حيدر: طيح الله حظج كولي اني طايح من عينج وفظينه
نور: اي طايح ونص اممم 😜

اجه يريد يضربها وختلت وره جود: لا عاد الا نورتي لا تفكر حتى اجيسها

حيدر: اي اي دلعها.. محد كوه عينها غيرك.. بس بسيطه انا الج. < المره ماتت وهمه بعدهم يتعاركون 😑>

جود: يله كافي عرايك وعندكم نص ساعه تقنعون بنات عمكم وتبدلون وتجون

حيدر ونور: حاضر

جود:لحظه.. اذا سما كلتلج اسال امي بالاول  كليلها انا سالت امج ورضت وما كالت شي وهيه الي وصتني اشتريلج هدوم.. فهمتي

نور: اي خوش فهمت
وراحت ركضت والبنات كلهم وافقوا بسرعه بس سما رفضت بالبدايه بس نور قنعتها بسرعه وراحت كل وحده تبدل

سما خلصت تبديل وراحت تشوف نور ولمن دخلت لبيتهم لاحظها جود وانتبه انها ما حاطه الحجاب عدل وطالع شوي شعرها

سما من شافت جود انصدمت بس حاولت تطنشه وتكمل طريقها بس جود قطع عليها الطريق وتقرب لها وهيه حست بخوف ورجعت لوره

سما بخوف:ش شتريد
جود ما رد بس قرب لها وصار وجهها في وجهه  <او بالاحرى لازم نكول وجهها في صدره هههع لان كصيره وبالكوه رافعه راسها وتباوعله واعتقد راح تنكسر ركبتها>

تقدم لها ومد ايده وكلب سما ظل يركع لان خافت يسوي شي بس تفاجات من شافته يعدل بحجابها وناظرت بعيونه بتفاجأ وحست بارتباك من نظرته

جود ناظرها ببرود:شعرج بس جان طالع
سما باحراج:ما جنت ادري شكرا

جود حس بالارتباك من نظره عيونها بس ما بين هالشي عليه لانه شاطر بتصنع البروده

جود:😏 اي صدكتج..كولي اريد اجذب انتباه ولد بالطلعه
سما:احترم نفسك احسلك وتفكيرك التافهه خليه لنفسك

جود ناضرها بعصبيه:لا تخليني اعصب ترى لهسه ما جربتي عصبيتي
سما خافت من ناظرت عيونه الحاده وسكتت ورادت تمشي

جود:ترى انتي هسة محسوبه من عايلتنه فلا تحنين لايام الفكر وتتصرفين مثل قبل وتحجين وي الولد..ترى انتي هسة صرتي بنت عز ولازم تتصرفين ع حسب هالشي

سما:انته شقصتك ليش تكرهني..شسويتلك.. كل هذا علمود تنكرت بولد.. ترى انا ما تنكرت الا لاني جنت محتاجه..لو ما العازه جان ما اشتغلت هالشغله..(بدت تتجمع الدموع بعيونها) انتي تدري بالي مرينه بيه حتى اضطريت اشتغل هيج؟؟ طبعا لا.. فرجاءا لا تتفلسف وانته ما محطوط بهالضروف..

جود:جنتي تكدرين تشتغلين شغل ثاني مو الا تتنكرين بولد..بس انتي عاجبج تحجين وي ولد

سما طاحت دمعتها وابتسمت ابتسامه جانبيه:😏مو كتلك ما انحطبت بظروفي فلذلك تتفلسف

<هواي ناس من يشوفون مشاكل غيرهم يظنونها سهله وحلولها سهله وان الشخص الثاني مكبر مشكلته ويجوز يكعد يستهزء وينطي حلول سهله.. ما يدري انها بعينه سهله لان هوة ما نحط بنفس الموقف..يجوز لو ينحط بنفس الموقف يشوفها كبيييره ومالها حل >

جود باوع لدمعتها وجان وده يمسحها بس مسك نفسه(انا ليش متناقض جانب فيني ودي يساعدها وينجذب لها وجانب فيني يكرهاا وبس يجرحها..هسه انا شنو مشاعري بالضبط احترت والله.. بس لازم اختصر الطريق واتجنب اي مشاعر لا كره ولا حب.)

سما( انا شلون فكرت انه صار طيب من عدل حجابي.. صج اني غبيه ..هه😏 نسيت ان المغرور والمتعجرف لازم يرجع لاصله😤..انا لاز..)

قاطع تفكيرها وببرود:انا كتلج اذا تصرفتي تصرف غلط ويمس كرامه العيله راح تشوفين شي ما يسرج

سما:انته حرام الحجي وياك.. وانته مو من حقك تحاسبني..انته ع اي اساس جاي تكلمني هالكلام

جود كرب منها وهمس بكل ثقه :ع اساس اني زوجج المستقبلي
ابتسم ابتسامه جانبيه ومشى

وسما وكفت متسمره ومصدمه وحست بقشعريره بجسدها بسبب همسه وبحه صوته المميزه
( هوة كال زوجج المستقبلي لو يتراولي..لالا ما معقول اكيد يريد يخوفني ..اي يريد يخوفني😅.. اصلا ما حاجه اخاف انا ما راح اخذ هالمغرور.. بس لحظه امي كلتلي ان ولد عمج طلبج ليكون هوة 😳.. لالا يجوز ولد عم ثاني .. اي ممعقوله حظي مصخم هيج.. بس هوة لو غيره انا ليش خايفه ..ارفضه وينتهي الموضوع)

صحت ع حالها وراحت لنور حتى تستعجلها وخلصوا وطلعوا وشافت خواتها راكبات وجود واكف يم السياره

سما اول ما شافت جود: (شلون يباوع عمه بعينه .. اربعه وعشرين ساعه عاقد حواجبه ونظرته حاده وتخوف..تحسين يريد يكتل احد.. خرررب ليش يباوعلي هيج شمسويتله ..ليكون هوة الي راح يوصلنه..اللهم طولك يا روح..شلون راح اتحمله)

وراحت تريد تكعد لكتهم كلهم كاعدين وره فناظرتهم بصدمه وتوجهت لنور

سما: نور فدوه كعدي كدام..عفيه
نور:ما اريد.. اريد اكعد وياكم
سما مدت البوز:لعد راح ارجع وما اروح وياكم

جود سمع حجيهم:نور عيب تخلين بنت تكعد كدام انتي اختي ولازم تكعدين من كدام..يله كدامي تحركي
نور:انشالله

سما:(اول مره يكول شي مفيد ويفيدني بشغله..العاده بس رافع خشمه ومغرور)

جود:انا ما راح اروح وياكم
نور بزعل:ليشش انت وعدتني تشتريلي كل الاريدة

جود بابتسامه ومسك وجهه بحنيه: وانا عند وعدي وهاج كرتي واشتري كل التردين.. بس الفرق الوحيد انوا حيدر راح يوصلكم

نور استانست من كالها انو راح ينطيها الكارت بس رجعت عبست من سمعت باسم حيدر

نور:اهووو حويدر هسه ما يخلينه نشتري شي.. يكعد يحن فوك روسنه

حيدر: حويدر بعينج..اصغر عيالج حويدر..صيحيلي حيدر عدل

جود بشقه: اذا ازعجج بس دكي عليه واجي اكسر راسه

حيدر: 😳عود صدك تحجي تكوي راسها عليه.. وكدام البنات بعد لا والله راحت هيبتي.. بطلت ما اريد اوديهم

جود: يمعود تعال شبيك ما تشاقه ابد.. يالله روح وصلهم ودير بالك عليهم

سما:(طلع عنده جانب جيد وي اخوانه وانا ما ادري..بس اكيد شوي ويكلب هذا شكله طباكات)

حيدر وصلهم وكضوها طول الطريق سوالف وشقه

وجود راح اخذ جده ولحك عمه للمستشفى
كان الكل منتظر بره الغرفه وابو احمد رايح جاي من القلق
جود بهدوء ورزانه: ياعمي تعال اكعد متفيدك الروحه والرده بشي
ابو احمد: ما اكدر ما اكدر

طلع الدكتور وراح ابو احمد بسرعه للدكتور
وجود وابو علي كاموا بهدوء وراحوا وراه
ابو احمد:هااا طمنه
الدكتور:والله ما ادري شكولك..بس حالتها صعبه ومتاخره وحتى العلاج الكيمياوي يجوز ياخر موتها كم شهر بس ما راح يفيد وياها

ابو احمد بحزن:انزين ابدوا بعلاجها.. بلكي يصير شي وتبقه عايشه بلكي اصير معجزه

الدكتور: بس المريضه اصلا رافضه العلاج..ومصره تاخذ مهدئات للالم والدوخه وتريد تطلع

ابو احمد:لا شنو مو بكيفها تطلع..دكتور يصير ندخل
الدكتور:اي تكدرون..واتمنى تقنعونها تبده بالعلاج

ودخل جود وابو علي وابو احمد كدامهم

ابو احمد جلس يمها وكض ايدها:الحمدلله ع سلامتج يالغاليه..شلونج هسة
ام سما:الحمدلله ع كل حال
ابو علي وجود تحمدولها السلامه هم
ابو علي:ليش ما تردين تتعالجين يا بنتي

ام سما:اذا تعالجت فالكيمياوي راح يهد حيلي وما راح اكدر احظر خطوبه بنتي
جود:يا خاله انتي تعالجي وصدكيني الخطوبه راح اتم ع احسن وجه

ام سما:لا ، اريد اشوف خطوبتها بعيني..اريد اكحل عيوني وانا اشوفها ابدلتها وي خطيبها..صحيح يجوز ما راح اشوف عيالها بس  عالاقل من اشوفها ابدلتها راح ارتاح..اذا ما احضر عرس نور عيني ونظرها ما راح ارتاح

ابو علي:لعد راح نقدم الخطوبه وراح نسويها عكب باجر..باجر راح يجي ابو جود وتكمل فرحتنه

ام سما بابتسامه ذابله:مشكور ما قصرت.. اريدك تكمل فضلك واطلعني من المستشفى.. ما اريد اظل هنا

ابو احمد: مستحيل انتي تعبانه
ام سما:ما اكدر ما اريد تنتبه عليه سما يله بسرعه خل نرجع

ابو احمد:بس..
ام سما قاطعته:لا بس ولا شي..اذا ما تريد اساعدني انا اطلع لوحدي
وحاولت تكوم
ابو احمد:اوكي اوكي هسه اجيبلج الكرسي
وخذاها للبيت

عند سما والبنات

نور:واووو شوفي هذا.. سما اخذيه راح يطلع عليج يجنن
سما طالعته باعجاب بس نزلت راسها:وكالت لا ما اريد

نور:صارلنه ساعه نفتر وكلما اكولج ع شي تكولين ما اريد..ترى لا تستحين احنه مو غرب حتى ما تاخذين شي..فلوسنه واحد..وترى  امج وصتنه نشتريلج

سما:صدك امي كلتلج..لعد امشي نشتريلي كل الهدوم المساع كلتي عليها
نور:هههع يله
وكملوا سوالف ومشترة

ورجعوا للبيت
دخلوا البيت وهمه يسولفون
سما:شفتوا هاي المسكينه الي طاحت بالسوك والله فطست عليها ضحك

حيدر:وين ما شفتها
سما:فاتك نص عمرك شكلها يفطس ضحك.. بس بنفس الوقت كسرت خاطري

نور:كسرت خاطرج وهيج..خطيه بس طاحت انتي طكيتيها ضحكه كدام الكل والبنيه تفشلت اكثر وخجلت من شافتج تضحكين

سما:ههههههع والله مو بيدي ما كدرت اكض روحي

قاطعهم جود:احم سما تعاي يريدنه ابوي ابو علي
سما:اوكي
وراحوا لمكتب ابو علي ولكته هو وابو احمد وامها واستغربت من هالاجتماع

الجد:انا صحتلج حتى اكولج خطوبتج ع جود بعد يومين

سما:😳هااا اي خطوبه واي جود..ليكون تقصد هذا
جود بالكوه ماسك اعصابه:هذا عنده اسم

ام سما:ادري صار كلشي بسرعه بس هذا احسن لج.. وجود اعرفه خوش رجال ومؤدب

سما ناظرته بحقد: اي تعلميني باخلاقه(ووجهت نظرها لهم) بس انا ما وافقت حتى تحددون يوم الخطوبه
ام سما:وليش ترفضينه شنو بيه عيب..ماشالله جود كامل والكامل الله.. اي وحده تتمنى بس ياشرلها

سما:وانا مو من هالوحده.. ما اريد اعرس كيفي مو غصب هو

ابو احمد:يا بنتي ..انتي تكولين هيج لان ما تعرفينه بس هوة ولدنه ونعرفه والله ماكو بمثل اخلاقه ورزانته

سما ناظرته ببرود:بس انا ما طلبت رايك
ام سما:سما احترمي ابوج لا يجيج كف ثاني الظاهر هذاك الكف ما فادج

سما بعصبيه:يمه شبيج عليه من يوم اجينه هنا وانتي كالبه عليه واحسج ما تحبيني..وضربتيني علمودهم.. وانتي عمرج ما ضربتيني.. وهسه تردين تغصبيني عالزواج..ليش يمه ليششش..لو تموتيني ما اخذه
.
.
.
.
اسفه ع التاخير بس هالايام عندي دراسه وراح اتاخر بالبارت الجاي اكثر.. فعذرونه واندعولنه ننجح ونفتك