بكل مبالغة وعزة نفس، تعلّمت كيف أتجاوز كل شيء. كيف أنام وبقلبي تعب كبير. أقف على قدمي بشموخ بلحظات اليأس، حتى بأقصى مراحل الضعف أنا دائمًا بخير. أباوع وجان أنصدم بعامر، خالها بحضنه ويبوس بيها. عين بيها وعين بالفون اللي رن وفضحني، رفعته أباوع جود يتصل. ردت أرد، انتبه لي عامر، أجه بسرعة وسحبه من إيدي ودفعني حيل، ما سيطرت ووقعت. فقال: "إيش تعملين هينه يا الساقطة؟ قلت له: "منو الساقطة؟ أنا مو عامر، جيب الفون."
فقال: "أنعل أبو... قلت له: "حدددك! قلتها وقمت، رفعت إصبعي بوجهه وخازرته. فقال: "بعد، أخذي طراگ يا بنت الزنا، لمن تخابرين نص الليالي؟ ياهو اللي تريدين؟ تدخلي لبيتنا وتخزينا." قلت له: "عفية بالبطل، فر السالفة لبالك ما سمعت." قالت سجى: "دخيلج لا تفضحيني." فقال عامر: "وش حدها تفضحج؟ غير أدفنها، وداعت أبوي نفس أنهيها." قلت له: "لا تنهيني ولا أنهيك، أنا مالي دخل بيكم من الأصل، جيب فوني خلي أروح."
فقال: "خلي أدحگ منهو ابن الزنا الثاني اللي يتصل بوحدة متزوجة." قالها ورفعه وضحك: "جود زمال المستقبل مو غيث." قلت له: "لا تتجاوز عامر، أحسن لك، لا تجبرني أراويك وجهي الثاني وأندمك." فقال: "إي بالله، شو خلي أدحگ." "ناي، منا عدل عالسيارة لبيت أهلج، ثواني بعد ما أخليج هينه، سمعتي؟ ولا وداعت بناتي لألبّسج بفضيحة أخليج تتمنين الموت، طلعي بسمعتج أفضل لك."
قلت له: "إي ولا يهمك، رايحة بدون لا تهدد، بس اكو تعديل زغير بكلامك أحب أضيفه، أدخل للبيت، أروح لأبوك أقول له تعال شوف الشرف اللي قتلتني بيه ابنك بالمحارم يجمع بين الأختين." فقال: "ناااااااي! قلت له: "علي صوتك بعد، خلي يلتَمّون، اتسهّل لي المهمة أكثر." قالت سجى: "أبوس إيدج لا تفضحيني، والله يذبحوني." قلت لها: "وأنا إيش كو أفضحج يا بنتي؟
بدل ما تبجين روحي دبري روحج، ترى اللي ما عنده غيرة على عرضه هذا ما منه رجا ولا يعتبر رجال." شال إيده، راد يضربني، رجعت ليورا. قلت له: "حدك منا، تمدها منا أفضحك، وروح أخوي أضيّع دربك، أخليك تحتار إيشلون تخلّص روحك." فقال: "أتهدديني لج؟ قلت له: "ليش لا؟ ما عندي شيء، رجلي وراح وأنا طالعة، خلي أخرب وآخذ حقي من الضرب والإهانات اللي حصلتها منك عليه وعلى أعدائي." فقال: "أدفنج." قلت له: "ههههه، ابني إيش بيك؟
أدفنج وأدفنج شنو؟ تايهة ما راح يسألوك؟ أتركك من أهلي، ترى هنا الكل يعرف أنت تريد تخلّص مني وأولهم أركان، بس جرب تسوي لي شيء وهو راح يشوف شغله وياك." فقال: "أقتلك وأقول انهزمت، ماكو أسهل منها." قلت له: "حيل إيش قد قديم أنت، ودعك من التحديث الما واصلك لسه، متأكد تقدر تسويها؟ فقال: "دقايق أمحيج من الوجود، وفوق كل هذا آخذ فصل من أهلج بدل ما تضحكوا علينا وعطونا وحدة ما مستورة."
قلت له: "تمام، سويها، هياتني قدامك، راويني رجولتك." فقال: "رجال غصبًا على أهلج وأسحگ على راسج." قلت له: "بس لا تتجاوز حتى لا أضرك، وفوني بطل رن، هسه يتصل على أهلك ينبههم عليه لأن قلق ما رديت، راح يطلعون يدوروني، ابني لا تخلي راسك براسي." قالت سجى: "دخيلج ناي، تركج منه بروح أهلج." قالتها وجرت إيدي. قالت: "أبوس إيدج صوتج راح أنفضح." سحبتها، لعبت روحي من قذارتها.
قالت سجى: "ناي بالقرآن ما يرحموني، غلطت وسبحان اللي ما يغلط، هو ضحك عليه." قلت لها: "ما راح أحجي لا تخافين، مو أنا الناقصة وأفضح عرض ناس، رجعي لي فوني خلي أروح راح يجون." عامر. -هاج، إشكد تردين وتسكتين؟ -استر هاليتيمة تره عرض العالم يرد بعرضك، خليها ببالك وأنت صاحب بنات. -مالج شغل بعرضي، بس خلصيني من وجودج وإحنا بخير. إشكد تردين وتطلعين منا؟
-ولا دينار، أصلًا ما يشرفني أعيش بهيج مكان. بس أيأس من رجعة غيث تلقيني رايحة من غير ما تدري. -هههههه هنود ناي، خلي نكشف أوراقنا. أنتِ مالج ورث يمنا لأن ما عاقدة محكمة، لا تنطرين عالفاضي، أخذي القاسمه الله عش تطلعين بالخسارة. -ما أمد ايدي على ورث ولا داعي بدينار اللي يمكم، بس غيث. -ما يرجع، ماتت غيث، ماتت. -عامر إذا سمعتك تقول مات ما راح أقول لك رد فعلي شنو. اسكت، إن جان لا سامح الله أول ما أشوفه قدامي...
قلتها وحسيت روحي اختنقت ما قدرت أكمل، مسحت وجهي ودرت وجهي للحديقة، أخذت نفس مسحت دموعي. -أروح بساعتها ما أظل ولا ثانية. -ظل سنة ما حصلنا جثته. -ما راح أظل يمكم قلت لك، بس خلي يمر كم يوم أتأكد ما منه رجعة أروح. -هاج. انداريت، شمر الفون عليّ، لقفْتُه. مسحت دموعي، ردت أروح، كمشتني سجى تبكي و تباوع لي بترجي. -امني مني بس خوفج منه، الغدر بمرته وبعرضه، لا تتأملين منه شيء. -أنتِ بس لا تحجين لأحد. -ما أحجي، كافي همي عليه.
سحبت ايدي منها ورحت أمشي، تركتهم يتعاركون بينهم. رجعت وصلت للمدخل، ما انطاني قلبي أدخل وهم أصعد للغرفة وما أشوفه. رجعت لمكاني قعدت أباوع للباب. شلت فُوني، اتصلت بجود، رن وما رد، عرفته متصل حتى يطمئن عليّ، و أتذكر هو منطي عهد ما يحجي وياي. خليته بحضني ولميت رجليّ لحضني، كمشت راسي منتظرة أمل ضايع. أسمع خطوات يمي، شلت راسي لقيت عمي أبو أركان. ردت أقوم، قال لأبويه: ضلي مكانك قاعدة.
قعد يمي، مد ايده مسح دموعي، باوعت له وشهقت، أخذني لحضنه وبكى وياي. استغفر ومسح وجهه، باس راسي، عدل قعدته، قال: -عش قاعدة هنا؟ -منتظرته. -يتأخر يا عمي، راح تتعبين. -لو العمر كله أظل منتظرة ما أتعب، بس خلي يرد. -تحبيه؟ -لا. -ههه يا القوية مبين. سكتت. -يا بوي هاي شارتج طلعت بيه. حكت لي ريحانة عالصار، ما عرفت أجي أحميك وأوقفهم عند حدهم. أكيد دعيتي وربي استجاب لأن مظلومة.
-لا عمو، أنا ما أدعي، هاي مو من صفاتي. وحتى لو قلت شارتي، ليش غيث بالتحديد؟ -لأن هو أعز شيء على روحي. خلاج أمانة يمه، يعرف أبوه ظالم، بس أنا مو كفو. ما عرفت أجي آخذك، أخليك يم بناتي وأحافظ عليك لمن يرد. -راح يرجع غيث، ما يتركني، يعرف ما عندي أحد غيره. -عندك ابني من ريحته موش؟ مثلي أنا البقيت بطرّق أركان ومجسور ورا أخوه، بدون سند. راح الجنت متأملين بيه، راح الجان ساندنا وحامينا بظله.
-عمو تره أنا أخذت مخدر البارحة ووقعت، مو حمل. -لا سماهر البارحة خبرت جدتها قالت: عدها لا تقطعين أملنا، هذا آخر أمل لنا بالدنيا. وأنتِ إشلون هيج تجازفين بروحك وتأخذين مخدر؟ -لعد أخليهم يكمشوها ويروح رجلي بيها؟ -بِنت حمولة والنعم من أصلج، وألف رحمة على البطن الشالتج. صدقتي من قلتي أشرف عشيرتكم. -آسفة عمو، والله حجيت ما جان نيتي أصغّرك منكم، بس هو غلط على أهلي.
-ألف رحمة على روح ذاك الأب الطيب اللي ربّا هيج تربية، تسوين زلام مشوربة. البنت التحمل الطّگ وتوقف تتحدى بصلابة، تالا أحد يجيب طاري أهلها، هاي بنت أصل. دحقت بعيونك القوة وعدم الخوف، وهاي الصفة ما موجودة بس ببنت الحمولة الطالعة من ظهر سبع.
-أبوي جان عازف ناي صح على قد حاله، بس صاحب وقفة، ينطي بروحه لخاطر صاحبه، يوقف بوجه الظلم والغلط ما يهمه نفسه، ما يعرف الخوف شنو. تعرف من رادوا يذبحوه إشكد ضربوا حتى يدنّق ويذلّوه بس ما رسخ لهم، ظل يباوع لي مبتسم، ما انحنى، مات بشجاعة. -وأنتِ بنت أبوج، امسحيها بوجهي يا بوي. قالها وسحب راسي باسها، رد قال: لا تشيلين بقلبك على أخوي تراه عصبي والحريم مشوشة عقله. -ماكو بقلبي هسه بس غيث.
-قومي يبه، ادخلي آكلي لك لقمة لا توقعين. -لا عمو صايمة. -يبه يا صيام هذا؟ الدنيا ليل، صح مسيحية بس هم ماكو هيج بدينكم. -لا عمو هذا نذر. -تتعبين وتملين، وهو ما منه ردة. قالها وقام، اختل توازنه، قمت كمشته بسرعة، وقف عدل، دقدق على متني وراح أشوفه إشلون يمشي منحني ظهره، راح للحديقة الجوة حتى يظل وحده. أحس غيث ابنه مو ابن أخوه، هيبته وصلابته كلها نهدت بثواني. عكس أبو غيث كامش المضيف ولا تقول اكو شيء، يكرهه على كره أمه.
أخذت نفس ورجعت قعدت أرسم بالقاع بإصبعي ومغمضة. رن فُوني، شلته لقيت جود يتصل، رديت: هاي جود بشر؟ -شكو على شنو أبشر؟ -لقيته غيث. -شنو منو غيث هذا؟ -شنو منو غيث، الله عليك احجي قلبي خلصان. -وين نلقاه يا معودة؟ وينك أنتِ؟ بعدك مكانك قاعدة بنتي، قومي ادخلي جوه، غيث لا تحجين بعد بيه، راح بأعماله السودة. -جود بغلاة محمد عليك، غيث يمك مو؟ -شنو يمي بنتي؟
لا تبليني هسه أهله يقولون هو الخاطفه. الحمد لله من خلصنا منه يا أخي جان غثيث، خرب يومه. شهقت بصوت. ضحك قال: شبيك لج ليش تبكين؟ المفروض أول وحدة أنتِ تفرحين خلصتي منه. -وين غيث؟ -راح وأيست منه، غرق بالماي. سديت الفون لأن قلبي أحسه يريد يوقف، صوته وطريقة كلامه مبينة موجود يمه. اتصلت بأركان، فصله. رديت اتصلت، رد قال: شكو ناي؟ -أركان غيث وين؟ -بجنطة السيارة، للأسف لقينا بس رجله، يفيدونج لو أذبهن بالماي؟
-الله ياخذك ولك وينه؟ -أنجعلج يا الجسر أنتِ وزلمتج، يولي لا تتجاوزين حتى لا أفصم راسج. -شوكت تجي؟ -وين نجي؟ منو أنتِ بس ذكريني بيج، بس لا الورّطتني بالسلاح. همست: يمك هو. -لا والله، روحي شوية وأخبرج، ولا تحجين لأحد بروح أخيج، يشغلونه وعدنا كثير أمور كون نفضها قبل ردتنا. -لا لا. سد الفون، دنّكت عالقاع سجدت. ركضت للبوري شربت ماي، قطعت صيامي.
رفعت راسي للسما: ربي ما أعرف إشلون أحمدك، والله أوفي شكو نذر عليّ، دخيلك راح يوقف قلبي. اتسندت قعدت ما أقدر أوقف من الفرحة، بعد ماكو بلساني غير ألف الحمد لله والشكر. أتذكرت عمي ما قدرت أضم عليه، خطية. قمت رحت للحديقة، لقيته مدنّق على رجله و يشهق بهدوء. وصلت يمه خليت ايدي على متنه، باوع لي ودقدق على ايدي. كمشت ايده: -رد غيث. قام كوه حجه بصوت يرجف: بروح أبيج.
أشرت وبكيت، حضني وقام يشهق بصوت عالي بدون لا ينتبه. بعدين حس باس راسي وخر عني، مسحت دموعي، رافع راسه للسما يشكر رب العالمين. -عمو لا تقول لواحد، ما أعرف شنو عندهم. -متأكدة عايش؟ عايش؟ سمعتي صوته؟ -إي والله عمو عايش، جود خبرني هو وأركان، بس لا تحجي لأحد. -لا لا ما أحجي، بس أحضر الذبايح، إي أحضر أحضر. -عمي فدوة لا يصير لك شيء، دترجف. قعد عالكرسي بفرّك بقلبه، باوع لي: -روحي ندهي أبو كاظم.
-أخاف أحد يسمع، تعال أسندك، روح لغرفته وصيح. أشر: إي، وقام كامش ايدي، وصلته لمكان الحادقجي ورجعت لمكاني قعدت منتظرة دخلته. مرت أكثر من ساعتين وماكو خبر. مرتين خابرتني سماهر تقول: ادخلي، رفضت أسمع بجيتها وصوتها الراح، بس ما قلت لها لأن ما عرفت شنو لغزهم من طلبوا أسكت. صارت الأربعة الصبح وعيني ما غمضت بالباب. مدنّقة و أسمع صوت هورنات. شلت راسي وأشوف سيارة دخلت، ما أعرف إشلون أتحرك انشليت.
قمت نزل أركان صاح: ها يا ول، بعدها زليخة بالباب مناطرة، ما مليت من هالقعدة؟ أشرت له إجه. -لا للأسف ماكو، لقينا بس جهامته بالنهر، تركناها للسمج نكسب ثواب بيهم. نزل جود من الصدر والورا كرم، هو ماكو. رجعت قعدت، دموعي نزلت، أشوف جود وكرم فتحوا الباب سندوا لهم أحد، نزلوا من السيارة، اشتغل الرمي. ما أعرف إشلون أقوم وأركض. بدون شعور قمت وركضت وصلت له، ضحك فتح ايديه، سحبني لصدره. بكيت بحضنه، ضغط عليّ حيل وباسني.
-الله ياخذك ليش هيج سويت بيه؟ -ول يابه استوني راد من الموت. شلت راسي ضحك ومسح دموعي باس راسي، همس: هاي ناي تبكي عليّ. -اجيت أموت وراك، قلتها ورديت لحضنه أشهق. -دخيل ربك بسك لج، هاي لو ميت جان شعملتي؟ -اسم الله لا تقول هيج، قلتها وضربته بصدره. صاح: آااخ، كمش ايدي وعصر نفسه. -إشبيك غيث؟ -اشتعل أصله، ما بيه شيء يولي شنهو ما تخافين صوت الرمي، أوو نسيت فاقدة الأنوثة. باوعت له كمش ايديه بسرعة ويضحك.
-وعمة السادة متصوّب لا تطقين. رجعني لحضنه، بسته من صدره. سحبني أركان قال: موش كافي العالم واقفة، بعدي لج. ما رديت، دخلت زايد بحضن غيث وضميت راسي، ضحك عصرني حيل وباسني. على صوت الرمي طلعوا أهله، أبو أركان سانده الحادقجي. وسماهر تركض وتنجبج بقلبيتها تصرخ: ولك لبالي دخلوا تابوتك، ولك غيث رجعت. وخرت عنه حضنته، تضحك وتبكي بنفس الوقت، كمشت وجهه بيديها اتبوس بيه، ما مصدقة أخذت راسه لحضنها تشتم بيه وترجف.
عمي ما كمل الطريق قعد بالقاع. ترك سماهر وراح لعمه، كوه دنّق كامش صدره، حضنه وعمي قام يبكي بصوت عالي يصيح: ولك غيث، ولك عش هيج يا بوي، ولك قتلتنا وراك. -هههه ردت أجرب معزتي يمكم. -أنعل أبوك لأبو معزتك ابن الزمال، تجرب بالموت؟ أنعل شيب الخلفوك وين وليت؟ -يم عزرائيل نسوي حصائية بالخونة وناقصين المرجلة. -بسك ارقد كافي، ما ضلت قوة، ولك إشلع من روحي وأدفن، انهجبوا يا بوي قضيتوا حيلي. -الله يعطيك الصحة والعمر الطويل.
-وينكم يا بوي الذبايح؟ وأنت لا تفوت جوه خليك هنا. -ما أقدر وداعتك تعبان. جود خويه وينك؟ ركض جود دنّق، سنده، قومه وإجه كرم ضربه بظهره، اندار باوع له. كرم. -شبيك؟ لا تباوع هيج لا أفلشك هنا. -هاا يول، تجرب؟ -بس لا تصرخ، لاهفك كف. دير وجهك، أنعل شكلك. وخر أيده من متن جود وسحب كرم من ياخته، ضحك شبكه كرم وبجه. -هاااا ول، على شنهو البجي؟ كافي يخوي. وخر ومسح وجهه. -لا تكول بس الحرمة تبجي، مو هاي ناي بجت؟ -لا هاي حقك.
همست: الله يلعنكم مفشليني. ضحك ومد أيده أشرلي تعالي، رحت سحبني لحضنه باس راسي. أجن الحبابات سلمن، جان أيد حاضني بيها وأيد يسلم من بعيد. مبين يعرف غلهن وحقدهن شنو، اكتفه بالهلا لمن أجه عامر جان بهتان وصل ووكف صافن. غيث: هاا يخوي شبلاك؟ -هااا ما مصدك رجعت؟ -للأسف عندي حساب بعدني ما مصفي، أجلت روحت اشوي. -هاا؟ -تعال كرب يول، اشبيك صفرت؟ أجه سلم، اتصافح أباوع عصر يده حيل ورفع حاجبه، همس: مردودة. وترك أيده. رد أركان
دك دك على متن عامر وكله: -أربز لك، لا ترجف، شخليت للحريم؟ -شنهو شنهو قصدك؟ هاا وين الذبايح؟ عش أتأخرتوا؟ -مكتفين بذبيحتنا الجبيرة. -هااا هسه هسه أستعجلهم غيث تعبان. -يول لا يصيرلك شي، هدي يخوي كلنا إلها. اتبلعم بصعوبة واندار راح مرتبك يستعجل بيهم يذبحون. أجت رنود طشت جكليت على راسه اتهلهل وتبجي. ركضت شبكته، شفته طول، كرصته من ظهره، وخر عنها. رنو: ما شبعت منك. -يا بعد خالج، بعدي، تعبان والعالم مخابيل موش حملهم.
-شنهو خالو؟ -سلامتك يولي لا تلجميني. رادت ترجع تشبكه، جريت أيده كمشت بيها، ما رد جان كوه كامش ضحكته يحك بخشمه. جابوا الذبايح. طبك دشداشته أركان وسحب الذبيحة جوه رجلي، طلع ناوشوا السجينة. جنت أني من جهة وجود من جهة الثانية. صارت عيني بالسجينة من خلاها على ركبت الذبيحة، راح بيه الوكت لذيج الساعة رافع عاشق من شعره وينحر بركبته. فززني غيث وهو
ياخذ راسي دفنه بصدره همس: لا تبجين، راح يجي يوم ونفس الوكفة توكفيها وبيدج تنحريهم. -صدك غيث؟ -دحكي عليهن وتعلمي كضبة السجينة وكوه الكلب. انداريت أباوع شلون سطروهن يذبح، وحدة ترفس يشمرها ياخذ الثانية وراها. لمن خلصوا كام مسح أيديه بدشداشته وأجه. أركان: بعدي يولي، يله عالجوه، العالم راح تدخل وأنت أيدك اتسند علي لا تضغط على جرحك. وخرت سند غيث هو وجود. أبو أركان: عالمضيف يبه، استعجلوا.
-أي يبه تامر، سماهر يخوي دخلي الحريم جوه وسوي مجال للعالم. -تامر يخوي، أخذوا بين ما يصلخون الذبايح انخش تحت. -تركوا كلشي، مجانوا الأزلام تطبخ، ما أريد خيال وحدة منجن هينه يله. أشرت أي، أخذوا كوه يمشي للمضيف لأن على صوت الرمي والهلاهل التمت العالم. أباوعله وأحس كلبي يريد يطير وأني أشوفه كدامي يمشي ما بي شي. وصلوا للمضيف تركتهم ورحت للداخل. دخلت لكيت هناء كدامي: -لا تفرحين زايد تره بمناسبة رجعتوا هديتوا أسماء.
-بنتي تركيني والتهي بمصيبتج. -شنهو قصدج لج؟ -انتظري المفاجأة، كلشي بوقته حلو. -موش أقوى من مفاجآت مهر أسماء، زتج بالشارع، نصيحة دبريلج مجان من هسه. -ما يحتاج عود أكعد وياج. -شتهترين أنتي؟ اكفي وأحجي مثل البشر خلي نفتهم. -بنتي لا تستعجلين على رزقج وهاا صدك، أخذي حب ضغط حتى لا تنفجرين. حركت أصابيعي ودخلت أضحك للصالة. أسمع رجع الضرب من جديد، شومنو أجه جديد يبارك لأن رجعن هلهلن.
رحت صعدت فوك، دخلت للغرفة باوعت وضحكت، شلون جان الصبح حالتي وهسه شنو، ألف الحمد لله ربي. رحت أخذت تراكي ورحت للحمام سبحت عالسريع. لفيت شعري وطلعت نشفته. رجعت لفرشتي اتمددت مرتاحة، انفتحت الباب دخلت سماهر. -شنهو ما تنزلين؟ صيامج ما راح تكطعيه؟ -لا والله ما أشتهي، معتازة نوم ميتة نعس، الحمد لله من رجع أريد أغمض. -ناي موش وكت قال وقيل، كضبي لسانج، الزلمة استوى جاي من الموت مخيط من فوك لتحت، أي انفعال تسوء حالته.
-مو طفلة أني ولا ما أفتهم، أعرف اشوكت أحجي واشلون أخذ حقي. -ناااي، الزلمة راد كوه واكف على رجليه مطلعين البارود ومخيطي بدون تخدير نازف نص دمه، أي خبر يوگع من طوله ما يتحمل، هدي يمه الله يهديج. -خالة والله تعبانة وعيوني كوه أفتحهن، كلش مو وقت هالحجي وهم أميني ما راح أحجي مثل ما تردين، نسيت كلشي اكتفيت برجعته. -الله يكملج بعقلج، دكومي نزلي أكلي لكمة. -بعدين بس أرتاح اشويه بعد ما بيه أتحرك.
-ولج خطية جوه وحدة كال صعدي وراها شوفيها وين أخاف تزت روحها من الشباج خبله هاي، كومي يمه ولج يومين بلا أكل. -شسوي نازلة هو بالمضيف، خليني هنا من يدخل للصالة أنزل. -لا هو راح يصعدوا الولد ما يرضى ينام جوه بس يكمل سلام عالعالم، لا تنامين حتى أجيبلكم الأكل تاكلون. -تمام. هيه طلعت وأني كمت لبست الترواكة مال التراك، خايفة عليه أوكع من الجوع، ما تدري ماخذة كومة أبروفات مو أول مرة هاي. انتبهت لفوني يضوي
شلته لكيت مسج من ريحانة: كرة عينج برجعة غيث. -الحمد لله ربي ما قصر. -ناي أركان يكول لا تحجين أي شي لغيث هسه. -ليش؟ -يكول راح تفتر السالفة ونضيع جتّال غيث بسبب هالشي وحقها مردود من هالشارب. -تمام لا أصلاً مقررة ما أحجي لمن يتشافى خطية تعبان. -أي بعد أختج والله ندري أذوج جثير حتى أبوي ياكل بروحه بس صبري وداعة جدتي ما راح يسكتون وراج أزلام تجيب حقج لحدر رجليج. -هاي هي مثل ما تردون. -يله يا عمري اتهيري زلمتج راح يصعد.
-أنتي جوه؟ -أي استوني أجيت ويه أمي، يله ندهوا عليه. سويت سكرين للشاشة وحذفت الرسائل، رجعت الفون مكانه، ضليت كاعدة منتظرة وهو ماكو. مرت بالساعة بديت أغفي وأسمع صعدوا والهلاهل ورا. كمت فتحت الباب لكيت جود وأركان يسحلون بي كوه ما كادريله. وصلوا للغرفة كوه دخلوا، تمدد عالجرباية خلوا مخد وره ظهره كال أركان: أني أظل يمك ناي انكلعي جوه. -خاف ربك، تره صار يومين كاعدة بالحديقة جني ضفدع متيه مستنقعه. -ناي بدون لغوة نزلي.
-أحلف لا بالبالك تخوفني بصوتك. -يولي كضبي لسانج لا بالقرآن أهفج دفرة أردج عدل حدر الترك ويه ربعج. -أخاف ما ترضه ومو أني اللي انشمر بالترك ويه البزازين. -صدكّتي من هاي عيونج أتكول أبليس الله ساخط حظه. -غيييث أسمع شلون يتنمررر، رد عليه لو اتخليني أرد. رفع حاجبه كال: لا ردي يولي. غيث: يول شصابكم تراني تعبان. جود: حل النزاع واختار واحد يظل يمكم. أركان: طبعًا أني مارادلها حجي، نزلي لج.
غيث: أكل تبن لا واثق من كلامه، انكلع يول. -لا يا ابن الزمال أنعل شرف أبوك ناقص ما يصيرلك جاره. كالها وطلع يتعارك ويه ذبان وجهه. أجه جود ضرب متنه كاله: تنذكر ما تنعاد، حمد لله على سلامتك يخوي. -وين اتريد لك؟ -والله تركت المطعم هيج وحتى الشقة مفتوح فواتيرها من شدهتي حتى ملابسي ما غيرتهن. كرم: غير هاي أم تك غمازه خبلتنا تسحب بالنغفة وتصيح: غييث بابا، اشبي صار بي سهال وما عندي حفاضات.
غيث: كرم أنت بالذات ترد لتركيا ما أريد ألمح شكلك. -لا أريد أشوف نبع الحنان صدك ولك جود أمك دخلت هنا بعد ما طلعت هم سألت عنها لو ما معتازها؟ -أي مو هيه قوطية معجون، كرم حبيبي انزل نام جوه. -لا عيب عدهم حريم أخاف وحدة نازعة راسها، صيحي يا الله. جود: لا عدنه واسطة هنا أخذها وانزل. -نانو أمشي صيحي ياااالله كرم راح ينزل. دخلت سماهر بيدها صينية أكل خلتها. -الوالد منتظركم. جود: لا والله عذروني لازم أروح.
غيث: انجب وانزل تحت، باكر لو بعده بالكلش نروح سوه. -لا يا معود، جرحك بعد. -عليها أجل، لا تروح، خليك الصبح تجيني أريد أسبح. -تمام، قاعد ما أنام أنا، شوكت ما احتاجيتني خبر أصعد لك. طلعوا، سديت الباب وراهم، باوعت لغيث ابتسم وفتح يديه، ركضت لحضنه، حضني وأخذ نفس طويل، بس حسيت بيه متألم، ردت أوخر شدد حضنته. -راح تتأذى، أخاف ينفتح الخياط. -صدك ناي بجيتي وراي؟ -لا حتى ما ضجت. -مم ولا اشتاقيتي لي؟
-أبد، أصلاً مو على بالي، قضيتها نوم ولعب رياضة. ورفعت راسي أباوع له، ضحك وباسني. -وين كنت كل هالأيام؟ -خفتي بدوني؟ رجعت راسي على صدره، غمضت ما رديت، أخذ نفس من رقبتي وباسها على كيف، همس: أول وحدة اجيتي على بالي من دحقت الكمين. -على شنو يظل بالك؟ تموت أرجع لخالي. -لأطلع من قبري وأورج أنتي وخالك. -من تعرف هذا الشغل خطر وتعرف ما عندي أحد غيرك، ليش هيج سويت؟
-موش خطر، اكو مستخنث ناقص وغبي راد يخلص مني، بس ما اجت بيده عدل. -غيث خلي نرجع فدوة. -اكو أحد قرب لك؟ -لا. -ناي لا تجذبين، أحكي، قالها وكمش حنكي بيده ورفع وجهي، أشر: إي. -لا بس افتقدتك، ما قدرت أتخيل أكمل حياتي من دونك. باس راسي ورجعه لحضنه، همس: ما راح أتركك، بس إذا عرفت أحد مأذيك وما قايلتلي راح أتخارب وياك. -محد أذاني، بس ردت أتعارك وخفت أنبسط ما أقدر لهم. -آها، افتقدتي الحارس الشخصي مال حضرة جنابج؟
-ليش بيك فايدة غير هالشي؟ -حالياً أجذب عليك لو أقول لك إي. -شلون ضربوك ومنو اللي كلب الخبر عليك؟ -يولي لا تتجاوزين، الكلب ينقضب. -شاهين شلون نفذ وحده؟ مو جان وياك بالسيارة؟ -ما قدر ينهزم لأن إصابته أقوى، وجان لازم نعبر النهر وهو تعبان، اضطريت أخفيه بمكان وزت روحي لأضيع مكانه، والحمد لله وقع بيد ناس أجاويد، جان راح. والناقص من عرف شاهين بعده، قال لك غيث عايش، راح بلغ اللي بباله، غبي مثله، وأترك أثر ورائي.
-وعلى الأساس ما تركت، ترى شبعت مخدر سطرني يوم كامل. -يطبك طويحيل، اكو زمال يخلي أحد ينبش بغراضه؟ شلون تخليهم يفتحون الخزنة يعرفون شنو بيها؟ -إيش عرفني؟ عامر دز رنو قال لها تجيبي لي الهوية حتى أخبر وآخذ جوازي وياي، كنت بحالة ما أعرف نفسي بيها، أباوع لجاكيتك وأتذكر الـ 15 منو يوفيهن مكانك؟ كنت أحكي وهو يشم بشعري ويبوس خفيف، سمع: بطل. باوعت له، رفع يده: بطلت. -لا اليوم بلاش. -الحمد لله، قلت طاح حظي،
أخذ نفس وهمس: كثرن عليك يبن بوي، إي وين خليتي البودرة؟ -بالبالوعة، هسه تلقي الصراصير والجريدي كلهم يطوطحون. صدق وين رحت بعدين؟ -والله كل اللي أذكره وصلت للجرف، آخر نفس فتحت عيوني لقيت بدوي وياه، شلون بنات يصحن الميت بقبره. -اترك البنات وكمل، من قعدت ليش ما خبرت؟ -ولج قعدت على سيخ حامي بصدري يطلعون الجيلة بعدها، خلولي شي أسود سطرني بمكاني، ما صحيت غير اليوم الصبح. -خبرت أخوك؟ -لا تقولين أخوك، ما عندي أخ غير أركان.
-وجود؟ -هذا رفيق العمر السند. -عيع، شلون أخ؟ يا أخي غثيث نفسك، طبعك ما ينبلع. -شلون تجبرني أعفس خلقتها؟ -إيش بيك تحوص؟ مضايقتك أوخر؟ -لا والله أحس روحي مزنجر. -تقوم تسبح؟ أساعدك؟ -ولج زلم ثنين طاح حظ آبائهم يا الله صعدوني، أنتي كطف جكارة تساعديني؟ لو تكسبين بيه ثوب وتساعديني بغير شي أكون ممنون، قالها وسحبني، باس شفتي.
-غيث والله فشلة، تسجل بشهادة الوفاة سبب الوفاة ناي، كمين وهوست ما متت، تموت بذيج الشغلة اللي حتى عامر الحرمة تقدر لها. -عامر وحرمة؟ أحكي ناي، إيش بيه؟ إيش أسمع من غيرج؟ -ما بيه شي، مو يمي أصلاً، بس هو مثلك يدور بنات. -يدور بنات؟ همم حلو، منهو هاي أخت جود؟ وهاي حذائها براس عامر؟ أسماء وهاي عقلها موش يمي، سجى، خرب بيك يا الناقص. -إيش معنى ذني ذكرتهن؟ -لأن ذني مكرسات عدنا، والعلاقة يا الذكية رادلها وقت. -خبرة حضرتك؟
-بس صيت وسمعة، تاليتي وقعت بوحدة كل عين شكل. شلت راسي باوعت له. -أخاف اكو مشتاق لك، سويتي بيه رعب. -هالمرة مو هواي، يومين بدت يزيل النحس شوية. رجعت راسي بحضنه، إحساس يختلف، المشاعر مو بإيدينا، بدون لا تحس تلقي شي بداخلك ينبض. كل شي بيه جان يجذبني ويخليني أتعلق بيه غصباً عني. إيش قد حاولت أكتم اللي بداخلي ما قدرت، كنت مفضوحة بتصرفاتي، قلبي ينبض ويا دقات قلبه. حرك شعري قال: نمتي؟ -لا طارت النومة. -فركي لي راسي يوجعني.
رفعت روحي أخذت رأسه خليته بحضني، عرفته يريدني ألعب بشعره مو يوجعه. دخلت أصابعي بداخل شعره وظليت أحركهن على الكيف، أخذ له أقل من عشر دقايق حسيت بيه رخى نام. حضنت رأسه حيل، بسته وغمضت، استوني أنام انفتحت الباب حيل، قمزنا اثنينه. دخلت أسماء وقفت متصنمة. -آسفة، لبالي غيث بالمضيف نايم. -إي وحتى لو كان بالمضيف، شلون تفتحين الباب هيج؟ -مو قلت آسفة؟ إيش صار قابل؟ وين داخلة؟ إيشو مريض ونايم، سودة عليّ، وإيش بيج تصارخين؟
صدق بلا ذوق. -إن لم تستحي فافعل ما شئت، لج شنو نوعج أنتي؟ هم داخلة الغرفة وهم تحجين كلام أكبر من راسج، تعالي بعد أخذي لك راجدي مني. غيث: يولي صوتج. -شنو ما تسمع أنت؟ لو مركز بس وياي؟ أسماء: غيث اتركك منها، أريد أحكي وياك على انفراد ما طول دقايق. -تفضلي أسمع. -قلت لك شي خاص، ما أريد أحد يسمع، شي مهم. قبل لا يحكي قلت لها: ما أطلع، يعجبج تحجين بوجودي تمام، ما عجبج بلكي تتفضلين برا لأن نريد ننام. غيث: ناي إيش بيج يولي؟
تخبلتي؟ -شنو تخبلت؟ تريدني أطلع من غرفتي حتى تحكي ويا زوجي شي خاص؟ وين صايرة؟ وبعدين مو أخوها مريض عندهم؟ شنو اكو هي ضالة ببيتنا؟ غيث: بيتنا؟ قالها رافع حاجبه. هاي نظرته صحتني لزماني. عرفت روحي أتماديت بأحلامي، وأنا كلي خلق وحدة بس تجيب لهم الطفل وترد منين ما اجت. دخلت على صوتنا سماهر قالت: شنو اكو؟ إيش صوتكم طالع؟ غيث: ماكو شي خويه، روحي. أسماء: خالة ترضيها؟ أنتي أريد أحكي ويا غيث شوية، ناي تطردني من بيتكم.
-يا ع صدق؟ ولج ناي تطردين خطاري؟ -آسفة خالة انفعلت، هسه أطلع، خذوا راحتكم. قمت ردت أطلع، كمشني من تي شيرتي راد يرجعني، طلعت بطني، دا أغطيها. قال: شنو هذا بجسمج؟ سماهر. -ها خويه هيج هاي؟ -شنهو هيج كربي، منو طاكج؟ -اني طكيتها يخوي، رادت ترد لأهلها، واني ضايجة عليك حجيت، ردت ماكو منها قفلت، صرخت بوجهها كامت تجاوزت عليه، ماشفت غير فقدت وطكيتها. -تجاوز شنهو أهلج؟ منهو؟ يومين غبت كل هذا سويتي؟ لج من شنهو مخلوقة انتيييي؟
كالها انتجه وكام، اجه جرني من شعري كمشت اديه، اريده يهدني حجه من بين سنونه: -كم مرة نبهتج؟ -اتركها اعتذرت مني بعد ماتعيدها. -سماااهر اخذي اسماء وطلعي. -ولك اتركها شلعت راسها، جرحك راح ينفتح. كالتها وجرتني. هو كامش شعري حيل وهي سحبتها مفاجأة، حسيت شعري اتكطع بيده، طلعت الصرخة لا إرادية كال ومرررض. دفعني انضربت بالميز اجت بخاصرتي، وكفت عاصرتها. -دحگي لج وحگ كلام الله لأدفنج انتي وعايشه بس اسمع بيج متنفسة، موش متجاوزة.
اشرت أي واني افرك بخاصرتي كامشتني العبرة. -عمرج ماراح تصيرين مثل البشر. سماهر: -كافي يخوي وانتي طلعي يلا يولي لغرفتي، لاتردين هينه بعد. اخذت فوني وطلعت من الغرفة. اشكد استحقرت نفسي من شفتها متخصرة يم الباب وتتبسم، ردت انزل لكيتها هوسه. دخلت لغرفة سماهر، سديت الباب كعدت عالجرباية. صافنة بروحي لميت رجليه نزلت دموعي. حيوانة اني حيوانة عمري ما أصير بشر، ليش؟ لأن مومن مستواكم.
انفتحت الباب دخلت سماهر كالت زين من فرفحتي روحه. مسحت وعيوني ودنكت. -نااي دخيل بختج لاتبلشين خلينه فرحانين، البت عدها سالفة اترخصت على شنهو انخبصتي، لاتنزلين دموعج. -على شنو أبجي؟ على اخوج ومنو هو أصلاً واقهر نفسي عليه. -ناااااي لاتتجاوزين، كضبي لسانج لاكصو الج، شصار بت عمه دخلت تتحمدله عالسلامة، لاتضلين كل دقيقة متكاونة وشالعة كلبه، قبل لاناخذج تذكرين شكلتلج اني؟
-أي مالي حق بكلشي، عبارة عن آلة اجيبلكم طفل واولي بطريقي، متذكرة؟ واني بعدني على اتفاقي وياكم، أول مااحبل ماراح تشوفون وجهي، كافي تهينون بيه. -اووو دخيل الله من الفجر نكرة، لاتبجين وتفكرينه خلينه نشتم هوى. -مواني الفكر ولااني النحس الي أنحسكم، خالة خافي ربج لاتحرين كلبي أكثر تره اني بشر، وهم لاتخافين بيتكم هذا الكاتلين روحكم عليه ماادخله حتى لاافگره بوجودي ولا أوصل يم اخوج بعد.
كمت طلعت من الغرفة احس العبرة كامشتني، صار كدامي غيث كاعد يفرك براسه، واسماء بعدها تحجي ويا، تركتهم ونزلت سمعته صاحلي مارديت. نزلت جوه بدون لااباوع أحد ولاحجيت، طلعت كبل للحديقة ماريد دموعي تنزل واتفشل. وصلت للحديقة الخلفية مابيها أحد، بعد الفجر استوه طالع. احس نفسي مخنوكة، رحت يم البوري غسلت وجهي، اصحي ناي اصحي شدتسوين بروحج، ولج أول مايصير الطفل تنطردين. ولج ليش اتخليهم يهينوج؟
ليش هيج اتخليهم يسمعوج حجي وتزغرين نفسج؟ موبيدي والله حسيت شي بداخلي. ولج هانج وكلج باستهزاء بيتنا، ولج جان ديقصد اصحي عرفي روحج انتي منو. كعدت عالمصطبة، ضميت وجهي بديه بجيت بقهر، حسيت إيد على راسي شلت، لكيت أبو كاظم الحدقجي كال عش يبوي تبجين. -ضربني وطردني. -عش هيج؟ اشسويتي؟ -لأن ماعندي أهل، لأن مومن مستواهم. -عندج كرامة وعزة نفس، عندج شرف وگلب نظيف، ذني كافيات يخلنج فوك الكل. -عمو قهر كلبي كال حيوانة متصيرين بشر.
-تسوين أهلو كلهم، كافي بت معدلة وصانته بغيابه. -مومنه الغلط مني، اني حلمت حلم أكبر من مستواي وعشت بواقع وتخيلت روحي بي وهو مو من حقي. -ماغلطتي، ذني كلهن من حقج، يجي يوم يعرف قيمتج ويجيج يتوسل ندمان. -مااريده بعد، كرهت نفسي اني صدك مو بشر من خليته يهيني ومن سمحت لروحي أفكر بي وهو مو الي، من اتحملت القهر وذليت نفسي بس حتى ماانطي بي.
-لابشر وبت أصل، تراني موجود وادحگ واسمع كل الصار، كومي تعالي وياي الشمس راح تطلع وأخاف يجون هينه الشباب. كمت ويا رحنه جهة المشتمَل مالته، جانت اكو مرجيحة زغيرة رحت كعدت عليها وهو دخل لمكانه، اشويه وطلع بيده لفة. -ولو موكد المقام بس أكليها يبوي وجهج أصفر. -لاعمو الحمد الله كلها نعمة الله. -اسويلج جاي؟ -لابس مخدة أريد انتجي راسي يوجعني. -تفوتين جوه تتمددين، اني رايحلهم يعتازوني.
-لاهنا كافية المرجوحة والهوا حلو بس كون محد يجي هنا. -لامحد يصل صوب المجان، أخذي راحتج. خلّه اللفة يمي وراح دخل جوه جابلي كوشة وراح. خليت الكوشة وتمددت، أخذت اللفة لكيت خبز وخيار، ضحكت صدك طيب النفس نعمة مايمتلكها الكل. أكلته وشلت فوني اباع بي وينكم ماكلتوا اشصار ابتنا، ميتة عدلة، رجعت ويه خالي انقبرت، لو بس أعرف شنو الغيركم ارتاح. لو انتم من البداية هيج واني مجنت اشوف.
رجعت الفون، أكلتلي لكمة وعيوني بدت ا تقفل وحدها بعد ماكدرت أقاوِم، تركت اللفة يمي أباوع للسما لمن رحت بالنوم. حسيت أحد يغطيني فتحت عيوني لكيت جود ابتسمت. -ليش نايمة هنا؟ -الجو حلو حبيت أغير. -شصاير بينكم؟ -ماكو شي، هو راد ياخذ راحته بالغرفة تركته. -كلش ماخذ راحته، تره هو الدزني يريدج مايكدر ينزل، كومي وشنو هذا يمج؟ كالها وشال اللفة. -جنت دااكل ونمت. -ناي شنو ديصير وياج ليش ماتحجين؟
-ماصاير شي، شنو يعني يصير أكثر من الااني بي، كاعدة شابعة إهاين وضرب، منتظرة اشوكت يصير طفل حتى ياخذوا ويخلوني أروح. -غيث ضربج؟ -موبس هو جود، جسمي اتشوه من الضرب، تهموني بشرفي شتموني هانوني ذلوني. -ليش ساكتة؟ -شسوي يعني؟ اني ماخذة منه افلوس مقابل طفل، ولو فكرت أرجعهن عمري كله أشتغل ماراح أوفي ربعه دينه، ماكلة تبن ومتحملة اشوكت يصير حتى اتحرر منه. -غيث ميفكر هيج. -أي من ضربني الصبح وشمرني بره الغرفة ميفكر؟
من كلي حيوانة ماتصيرين عمرج مثل البشر ميفكر؟ من بالغلط طلعت كلمنه بيتنا مني باوعلي باستهزاء وكرر الكلمة حتى ينبهني مايفكر؟ جود كوم دخيلك لايجي أحد يشوفك يمي وهم يسوولي مصيبة جديدة. مارد كعد مقابيلي خال راسه بين اديه. -شبيك جود؟ تره والله عادي صارت عندي بعد مااضوج. شال راسه باوعلي كال غبي وميستاهل اضفرج. -هههههه بس لا تصدك التحجي، اشوكت تروح؟ -لو العصر لو باجر. -تكدر تكله أرجع وياك؟
يعني هو مريض ماراح أستفاد مني، بلكي يقبل أرد وياك؟ والله تعبت هنا بعد مااتحمل. -نااااي شنووو ميستفاد منج؟ لج بنتي شنو ليش حاسبة روحج هيج رخيصة؟ -هو هذا الصح ليش ماتريد اتصدك؟ تره اني هنا حالي حال الجارية، وأكبر دليل هذا وضعي، ضاجت بت عمه مني شمروني بالحديقة حتى لاأزعجهم، صار كم ساعة محد سأل ويني. مارد كام رد يروح، كمت بسرعة كمشته كلتله بداعتي لاتسوي شي والله ردت أفضفض حسيت روحي راح أختنگ، لاتخليني أندم وبعد مااحجيلك.
-ماراح أحجي شي، ردي مكانج تخلص ماتضل هيج. راح واني رجعت لمكاني، تمددت لميت رجليه، اشويه رن فوني لكيت غيث فصلته. دز مسج ماقريته، خليته جوه الكوشة وعدلت نومتي، الشمس بدت توصل يمي حارة كلشي. كمت رحت اكو مكان يم شجرة كعدت يمها، خليت راسي عليها، وضحكت على روحي بالشته أدوّر مكان ختلة حتى أدفه وأحتمي من المطر وبالصيف أدوّر مكانات يحميني من الشمس. يمكن عمري كله راح أضل هيج ماراح أرتاح.
كمشت مداليتي وغمضت بعد بس أنت منتظر مني أحرر روحك. فتحت عيوني أراح أحرر روحك حتى من أجيكم أكدر أباوع بوجوهكم أكلكم سويت العليه ماقصرت بشي. شلت فوني أباوع بي دخلت على صفحة لحن. اتصلي أسألي حتى جذب بس حسسيني الي وجود عندي أحد خايف عليه. ماما شنو من گلب شايله؟ والله اني بنتج ليش هيج تعامليني؟ لج ماما والله اشتاقيتلج، معقولة ماكو موقف واحد يذكرجن بيه شي مر يحنن گلبج عليه؟
اسمع خطوات قريبة، شلت راسي لكيت ريحانة وصلت يمي كعدت. -ذبت سمها سماهر فرگتكم ارتاحت. -مافرقتنا بلعكس صحتني. -ناي اتحبين غيث؟ -ماعرف أحبه لو ماخذته سند، بس الي أعرفه هو موالي من البداية وعمري كله ماراح أكدر أباوعله، فرق بينا من السمه للگاع التقينا بطريق غلط، طلبه ماردني بس جان باتفاق نفذ العليه بقى لازم أسوي العليه حتى كل واحد يرد للطريقه. -لاهاي عرفت اشلون تلعبها صح وهذا الفكرت بي من البداية بس دواها جدتي.
-صدك شو مااجت؟ -ماتواطن بيت عمي، تكرهم شلع قلع ولو موغيث جان صفتهم من زمان. -عززه تكتلهم؟ -هههههه لاموتكتل بس تفلع اذن كل واحد اتخلها بيدو وتزتو بمجان مگطوع تايتربى عدل. -داحسها جبروت مومرة صدك وين عايشه؟ -عدها بيت بس هي موش بي عايشه بغير مجان. -اشلون يعني؟ -ماعرف اشلون أفهمج. -موماتعرفين بس كولي ماكدر أحجي لأن المكان هذا ملجى للولد من يتوازون ينضمون بي وهم بضاعتهم هناك يخلوها. -شعرفج؟
-مرة لگفت غيث وهو يحجي ويه أركان عليه. -ههههههه عجل سمعي أركان شگال لجدتي من سألت عنج؟ كاللها لاتخافين عليها البت تلعب ويه ابليس. -لو صدك جان عرفت أخلص روحي من خالي بدون لادخل روحي بهالضياع. -صدك شنو الجبرج تختارين هالطريج؟ عش مارحتي لعمج غصبا عنو يحميجن؟ -يايحمينا؟ ولج مرة تعبت لحن وضاگت الدنيا بينا حيل، خابرته ماما وترجته يجي ياخذها للمستشفى رد أحنه متبرين منكم وياريت تموت حتى يقل عددجن. -الله يلعنه وبعدين شسويتن؟
-جانت آخر قطعة ذهب ضاله يم ماما، باعتها وراحت للطبيب بدل ماتعالجها اشترتلها موبايل ورجعت لأن الدكتور كال حالتها ميؤوس منها، لل١٨وتروح سوو شنو الي بنفسها. -الله يساعدكم وهي اشلون اتحملت هيج تسمع؟ -تحملت غصبا عنها حتى الموبايل الي اجت فرحانة بي أخذه خالي وانطاها موبايله القديم. -الله يحرگه حتى الحرك قليل بحقه وامج اشلون سكتت؟
-هههههه أمي جانت مركزة وياي ماعرف ليش تراقبني أربعة وعشرين ساعة كامشة إنذار على أبسط الأشياء، مرة أخذت الفون من لحن أباوع فلم ركضت لخالي كالتله إجه، أخذ الفون بدون لاأنتبه شاف البي كتلني كتلة صلخني صلخ. -لازم الفلم موزين. -لاجنت دابحث اسهل طريقة للقتل بدون ترك أثر. -ههههههه عجل تستاهلين. -انحرمت يوم كامل من الأكل بالإضافة للكتلة وحرماني من كمشت الفون نهائيآ، لبالهم راح أبطل. بالعكس فتحوا عيني ونبهوني على غير شي.
رحت بگت فون سامر وكل ليلة أفتحه وأبحث على شي وأتعلم شغلات جديدة لحد ماتوسع فكري وكدرت أنهزم. -ماكشفوا يمج الجهاز؟ -لاافتحه بالختلة وسامر هم عرفه عندي ماحجه كال انباك بالشغل، جاب غيره وهو هم فگر مثل ماخذته جان رحت بسببه وگعت بمصيبة مااعرف اشلون ربي نجاني وطلعني سالمة من ذاك المكان، بالمناسبة فونج يضوي. شالته باوعت بي وابتسمت. -شاهين. -مم كاتب مالله هداج وتذبين الأسود.
-دنكت ترسل، ادنيت يمها أباوع كتبت من تطلبني من جدتي. شاهين: -يولي وعيونج بس أخف عطيني مجال. -عجل اتحمل وبعدين الأسود شضارك؟ -ماخفت من الموت بگد ماضاك صدري وگلت حتى من حزنها راح انحرم تضل لابستو باسم أخوي موش الي. -من عمري على عمرك. -اندارلج فدوه ونذر لاتحجين هيج. -اشوكت تحجي ويه أبوي؟ -هالاسبوع بس أكدر أتحرك، أول مجان أروحلو هو بيت بدعة، وماأطلع إذا ماتخليج بأسمي. -شاهين. -يابعد هلو وطوايفو كولي يعيون شاهين.
-من هسه أگلك إذا اتزوجنه وصار عندي ابن مانطي لجدتي وتربي مثلكم. -اشلون أعطيها ابن روحي يابه؟ حتى جاهل مارايد ماطالب من ربي بس يخليج من نصيبي. -الجرح بعد يوجعك؟ -گلبي اليوجعني بلحظة من خشت الجيلة بصدري وتخيلت دموعج تنزل لخاطري حسيت الدنيا ظلمت تندمت عالساعة الي اعترفتلج بالعشك. -لو صدك اتحبني جان عرفت ماأخليك اتموت وحدك بس الضاهر قل حبك وبديت تنسى شتعاهدنا. -جان بطلت كل ليلة أحلم بيج يولي، صرت أعشك النوم بسببج
-ريحانة. -ها يعمري؟ -صدك يجي يوم ودحگ راسج على صدري؟ ادنيت عنها لأن دخلوا بالغميق، ضلت اتراسل ويا فجأه كامت عرفتها راح اتخابر لأن اتجهت للحديقة الثانية. دنكت عالفون أكلب بي، ماكو دقايق وانسحب من إيدي شلت راسي لكيت أركان واكف كال عش يتصل متردين. -ماشفت الاتصال جنت نايمة استوني كعدت. -كومي غيث يريدج. -منو غيث هذا؟ -ناي اتكومين لادفرج. -بس جرب وشوف شراح أسوي.
-استغفر الله يبه الزلمة مريض مايكدر ينزل، ناي خويه مووكت زعلج عدكم شي حلوه بهدوء موجدام العالم كلش ماراهمه هيج. -هو طردني والمكان الي انطرد منه مااردله على كص ركبتي. -وروح أخوي أكصها بيدي، نااي سوادينج خلي على صفحة، تزعلين يطبج مرض بس ردي مجانج، كملي زعلج غادي العالم بدت تجي. درت وجهي صاح شطالبه فهميني خلي اعرف شصخم على راس أهلج. -مارايده شي تركوني يااخي عتقوني، موسماهر هي واخوها مايردوني بعد شكو داخلة.
-انعل أبو سماهر على أبو غيث على اليوم الجابوج هينه، ناي يبا لغة تفتهمين كولي خلي احجي وياج، يول العالم راح تجي وهاي كعدتج ماراهمه، أول ماراح يسألون عنج وين العطلة مالته. -من الأخير شرايد؟ دخلة للبيت ماأدخل. -اشتعل أصلك غيث كالها وتصل ثواني واسمعه يكله من انعل أبو أبوك، متكلي منين جبتها هاي -راكبة راسه -ماتعرفها شتريد، زعلت الخنزير عالاذرة -بالقرآن ماكو غير اله أكتلها وأخلص، دروح انعل شرف أهلك. اتخصر يباوعلي.
درت وجهي واتجتفت. اسمع كرم اجه كال نانوو. انداريت لكيته جاي مبتسم، وصل يمي دنك خربط شعري سحبه أركان. -وييين يول إيدك لاالبسها براسك. -تره هاي أختي نفس الدين. -عود من تودعون روحي غادي يم نبيكم سوه هينه افلش جهامتك بس أدحگ مكرب صوبها. كمت كلتله إيدك شيلها عنه. -بعد تعالي هفيني بطراك. -اني مترباية ماأمد إيدي عالاكبر مني. -يعني العمر گاضبج زلمه حرمة مايهمج، ماكو فرق يمج. كرم:
-ناي بداعت الخوة والله تعبان يريد ينزل كوه كامشه جود، زعلانة حقج لاتراضي بس صعدي وخليج على زعلج باقي محرج وحده كاعد فوك. باوعتله. -واذا أكلج لخاطري؟ اشرت أي ورحت اسمع أركان ورانا كال: -زلمه طول بعرض صار ساعة الغي مثل الزمال ساحكتني وهذا أبو اذان بكلمة كومج. وكفت غمضت بسرعة كمشتني كرم همس اخذي على كد عقله لاتردين خليج انتي الجبيرة. -ديتنمر عليك. -مايفتهم تركي فشلة أحنه خطار ماراهّمه تضربي.
باوعتله وضحكت وهو يهز راسه بأي مغمض عايش الدور. وصلنه جو هو راح للمضيف واني دخلت للمطبخ، لكيت الهوسه مال العالم صايرة خنكة اشكبره البيت وكو ماخذهم. هناء واسماء واكفات يدكن اسوالف ويضحكن وصلت يمهم كالت هناء: -اي وشكلج غيث؟ اسماء: -كال هذا بيتج محد يكدر يكلج جلمة عسى ما تضلين العمر كلو. -الله يحفظه يعني خبر أبوج؟ -لاخالتي سماهر كالت اني اخبر عمي واكله نعتازها ويه البنوات خلها. -يوم الاشوفج منور بغرفته وماليه حضنه جهال.
تركتهن يكملن لغوتهن وصعدت للغرفة، فتحت الباب لكيت بس جود واكف يم الميز يكلب بالعطور. دخلت بطل رجع العطر. -وين صاحبك؟ -صاحبي؟ المهم بالحمام استوني دخلته. -وانت شكو اتخدمه عنده أهل خلي يخدمو تره مامجبور بي. -يلا هو اليوم أرد خلي أكمل جميلي وياه، انسوي العلينه بلكي يغزر. -لو تحط طن ملح ميغزر، بيت كامل تريدلك واحد بيهم شريف ماكو. اشرلي وراج. انداريت لكيت غيث واكف بالباب.
راح جود سنده وجابه للجرباية كعده، دخلت للحمام غسلت وجهي اسمع يكله خلك لاتروح كلتلك باجر انولي سوه. -غيث العالم تجيكم وانت جرحك اخضر بعد. -ماعليه بس خابرت المحامي. -اي تكدر باجر الصبح ترحون للمحكمة تعقدون جوازاتكم وهوياتكم هسه أروح أوديهن إله. طلعت كلتله ياعقد اذا تحجون عليه تره ماأعقد محكمة اني. جود. -وليش ما تعقدين حضرت جنابج؟ -شنو ليش جود؟ هيج طلاقنا راح يصير صعب، أقلها السيد هو يمين وتفض الشغلة.
غيث: روح خويه، وديهن، مالك شغل بيها، تهتر وحدها. طلع جود، باوعت لغيث. -ترى ما أعقد. -ناي، روحي طالعة، لا تخليني أقوم ألطمك بكف، أفلش سنونج، انكتمي أفضلج. -ليش أسكت؟ ترى مو عبدة عندك، هم إلي حياتي أريد أعيش، خو مو أظل عمري وياك محبوسة. -وين تردين تعيشين؟ ويه منو؟ -عسى ما أرد لخالي، هذا الشي رادلي، أنت الك طفل يمي، أسوي وأروح. ضغط على أسنونه، انتجه راد يقوم، فلتت إيده رد كعد، صاح آآخ وكمش صدره متألم.
ركضتله، دنكت عليه، شال راسه وباوعلي. -صارلك شي؟ أصيحلك جود؟ كمش إيدي، سحبني يمه حيل، ضميت وجهي. -من أنعل أبو لأبو ذاك اليوم الجمعني بيج. -إيدي غيث، ومحد كلك أصعد نفس سيارتي. -زمال ابن زمال، قضيت عمري أول طيران، قسمتي الكشره ودتني للبر، دحقي ناي، خلي أكون واضح وياج، مزاجي موش كل وكت يتحمل تصرفاتج. -يعني شنو؟ -تجاوز، طولت لسان، تصرفات رعونية، تنسيهن، أظن اتحملتج كثير، كافي. -غيث مو غصب هو، ما أريد أعقد.
ضرب إيدي بعدها عن وجهي وعصره حيل. انجعص حلقي بس عيوني مفتوحة، أباوعله فاتحتهن على كبرهن. -من أهفج بطراك، اكو زمال يعترض؟ هزيت راسي بلا. -عفية، كالها ودكدك على خدي، هسه يحبابه تنعدلين ولسانج كضبيه أحسن ما أبتره الج، وخبثج وفري لنفسج، تركي جود لا تحيليه. هزيت راسي بأي. -تنقبرين هينه، ممنوع تطلعين، ومرة ثانية من أتصل لو أدز أحد وراج تجين ركض، وحق كتاب الله أرفع من شعرج وزتّج من السطح. هزيت راسي.
-عفية بالبطلة، أريدج دوم هيج متخورسة بس تأشرين. رمشت بعيوني. -لا تعملين هيج حتى لا أعميج. اندقت الباب، دفعني، فركت وجهي، دخلت سماهر بيدها صينية. -ها يخوي، دزيت وراي؟ -إي تعالي، وأنتِ قومي اختفي من جدامي. سماهر: ها الله هداج ورجعتي وحدج؟ ما رديت، قمت كعدت بالجهة الثانية مال الجربايه، خلت الصينية كدامه. -أتريك وأحدر جوه، العالم مناطريك. -ما أكدر أريد أنام تعبان، خلي أبوي يعتذر. -يمه، نزلو قريوله بالمضيف نام غادي.
-شنهو طفل نفاس وين ما جان أنام؟ يول بيج شي؟ -عجل شلون مرتين أبوي ندهني كال خلي ينزل. -هههه أبوج الحنين يزتني بيده للموت ويتسقبل ضيوف، سلامتي، كالها وسحب نفس. -يخوي لا تضوج، الحمد لله من رجعت، أكل يلا. وأنتِ ناي يمه ما تجين تاكلين؟ رادلك عزيمة. -شكراً خالة، أكلت جوه. -شأكلتي ولج؟ صارلك كم يوم لكمة ما خليتي بحلقج، قومي. -والله أكلت يم الحارس سويلي لفة. -هو الحارس شعده حتى يسويلج لفة؟
درت وجهي واتمددت، شايفين روحهم فوق البشر، إذا مو مفطح مثل السم الياكلو، مو نعمة الله تسمى. -ناي يمه قومي أريد أحجي وياج. -خالة بعدين أريد أنام، راسي ديوجعني. غيث: قومي جيبيلي تيشيرت، هذا القميص خنكني. ما رديت، غمضت. سماهر: مو يحجي وياج؟ قومي. -أني مو خادمة جايبيني حتى أخلفلكم وأولي؟ خلي أذكرج إذا ناسية. كلتها وقمت، أخذت ملابس ودخلت للحمام، سديت الباب. أسمع قامت وراي للكنتور.
رحت فتحت الدوش، علقت ملابسي، انتبهت ما جايبة المنشفة، دا أفتح الباب وأسمعها تكله: أني أساعدك يخوي، لا تقدر روحك، هاي زعطوطة ما تفهم، بت رعنة ما تنعدل. -لا تركي، هسه أخابر جود، أريده فرد مرة يغيرلي الضماد. -يا عجل موش أركان موجود؟ خلي أندهه يجيك، مو كلو جود خطية للصبح مناطرك تعب. -أخيي هذا لا يتعب ولا يتعاجز مني. -شقصدك غيث؟ -تعرفين قصدي سماهر كلش زين. -إذا على طكة ناي والله عـ...
-لا تحلفين خويه، تركتها أمانة يمكم، لا بالبالج من طكيتها قدامك صدكت بالكلتي، لابس لخاطر أجر أذنها ما تعطي بنفسها بعد، وهم أدحق وين توصل وياج. -والله يخوي ما ردت مشاكل، عجل ما تعرف معزة ناي بقلبي؟ والله مثل ما أعز بنيتي. -بتج للصبح نايمة بالحديقة ما تسألين عنها؟ كم يوم ضلّت بدون أكل؟ ما تعرفين عنها شيء؟ لا تقولين حالتي وتعبانة. بنتك كانت بحضنك بنفس الدقيقة اللي كانت بيها ناي قاعدة تدحك بالباب مناطرة رجعتي. -بس اسمعني.
-ما أريد أسمع أي شيء. بس أعرف ما قصّرت وياكم بشيء، حرمتي أمنتها يمكم ورحت زتيت روحي بالموت لخاطركم. هيج تسوون بيها؟ -هيه لسانها طويل وأبوي ما تحمل، تعرفه عصبي وهي الله يهديها انهدّت بيه. -اطقوها وتهينوها؟ لو ميت جان إيش سويتوا؟ -والله أستسمحها أبوي بعدين. -بعد إيش؟ لمن صلخها وذلّها؟ لمن جسرها عيش؟ يخوي هيج هاي، وأني من طلعت وصيتج بيها، فوق ما ظلمتوها ارتكبتي عليها. بس موش هينة يبت أبوي.
-لا دخيلك لا تقول بت أبوي. ولك أنا أختك غيث، وداعت بنتي اتكاونت وياه. والله ما رضيت. غيث أنت اللي طلعت بيك من الدنيا، لا تخلي مثل هاي تخرب خوتنا. -شنهو مثل هاي؟ سماهر وزني كلامج يخوي، لا تخليني أسمعج شيء ما يعجبج. وشنهو تكاونتي؟ إذا أنتي داخلة وراها ومهددتها لا تقولي. -عمّت عينها نوت الخراب بعد إيش قالت لك؟ -ههههههههه استغفر الله. قومي سماهر اطلعي أريد أنام، ولا تفتحين السالفة تمازغر من مقدارج جدامها.
-إيش راح تعمل غيث؟ -راح أريحكم من هاي الهوسة كلها وأعقدها محكمة. -غيث إيش ناوي؟ -كل خير. قومي سماهر تعبان أريد أنام، أخذي زادج وياج، ما أريده. -لا يخوي لا تقول هيج. ولك أنا ربيتك بيدي وتعبت عليك هيج تجازيني؟ -جازيتج بكل خير وما قصّرت وياج. -ولك أنا جبتها بيدي هيج تالي تفضلها عليه؟ -ما فضلتها عليج ولا راح يجي يوم أسوي هيج، وبنفس الوقت أنتي مو صاحبة فضل عليها لأن بيج وبلياج هي لي.
-راح تخسرنا كل شيء، لا تتسودن يخوي استهدي. -الخاسره حلالي مالكم شيء يمي. -لاااا غيث والله راح تندم، هاي موش كفو تصير حرمتك. -لو ما أعرفها كفو تسوى رؤوسكم ما أخليها باسمي. سماهر كلمة ثانية بحقها تعرفين إيش أعمل؟ أسمعها بجت يمكن رادت تحضنه ودفعها، لأن قال لها: جرحي لا يلجم. اطلعي سماهر تعبان. سمعت سدت الباب عرفتها طلعت. منين عرف كل هذا؟ معقولة جود؟
لا جود ما يعرف هددتني ولا يعرف أني بدون أكل، حتى ضربتي ما قلت له منو ضربني. عزا شيطان هذا، حتى وهو ميت يدري إيش يدور بالبيت. شلت رأسي باوعت لأجواء الحمام، خفت خال كاميرات كل شيء يطلع منه هذا. سبحت عالسريع، أجيت أريد ألبس منشفة ماكو. لبست ملابسي على شعري اللي يصب مي. طلعت للكنتور فتحته لقيت بس فستان قصير ضال. طلعته وأخذت المنشفة، رديت للحمام نشفت ولبسته. أنوب يومين بدون أكل، سمنانة أكثر ما شايفه بشر يسمن عالقهر.
طلعت رحت للمراية رفعت شعري، صار العطر اللي كان بيد جود قدامي. شلته اشتميته، حلو عطره. ردت أرده قال غيث: خلي، منو ترى ماكو فرق. ما رديت، عرفته يقصد لأن رجالي رجعته مكانه. -غيري ملابسج لا يفوت أحد. -ما عندي، هنه ثنين اتراكات أخذتهن من رنو وهسه شمرتهن بالغسالة. -وشنهو بحلقج عظم ما حجيتي؟ -جنت أرملة لمن أقول؟
-جان رحتي سجلتي بالرعاية تحصلين راتب بدل هاي رعونتج ولسانج الفالت بدون فايدة. تركي اللي بيدج وتعالي ساعديني خلي أغير ملابسي. همست: ما تستاهل أساعدك. هو هم احترم نفسه ضل يتماطل ويه القميص، بس مبين من النفس تعب لأن اتصلخ وضل ينفت مدنق. كسر خاطري رحت سحبت التيشيرت. -موش ما أستاهل إيش تساعديني؟ -أعاملك بأصلي. -هههههه ناي. وبالقرآن أتمنى أقولج كلمة حلوة بس خايف من العواقب. -وفّرهن لسارة راح نرجع.
-بكل شيء عانديني سوي أي شيء، أتحمله منج بس سارة لا تدخليها بقائمتج. -ما شايفها أصلاً ليش حتى أدخلها بقائمتي؟ لا تأكل هم. -لا والله راح آكل تبن. إيدج على كيفج. -غيث هذا مو جرح طلقة. -أي مال عملية. -سويت عملية؟ -زرعت قلب ثاني. -جان خليته باليمنى ليش هم باليسرى؟ -إيش أسويلج إذا أنتي دخلتي وقفّلتي ما تتحركين من مكانج، اضطريت أزرعه هينه. ردت أقوم كمش إيدي. -كرهتيني ناي؟ -ما حبيتك حتى أكرهك.
بعد ما حاجي، انفتحت الباب دخلت أسماء. أني هم ما رديت، كمشت وجه غيث وعضيته من شفته. شمرت كيس بيدها وطلعت بسرعة. ردت أوخر كمشني من شعري وأخذ شفتي بين سنونه. دفعته ردت أحرر روحي، عصر وجهي بيده ثبّته أكثر. أحسها يملخ بيها مو يبوس بيها. ما بطل لمن اكتفى من وحده. وخرت أمسح بشفتي ضايجة. -حيل! لو شالعها كل عقلك يولي، إشلون هيج تعملين جدامها؟ -مرة ثانية أسحلها وأحبسها بالحمام حتى تتأدب وما تدخل.
رفع حاجبه همس: اكو شعواط بالجو. -إشكد واثق من روحك أنت! وبعدين شنو شمرت هاي؟ قمت فتحت العلاكة لقيت لفات شاورما. باوعت له: -شنو هذا؟ -أوووو هذا كرم. هسه يذل أبهاتنا بيهن وتعالي يا طلابة فضي. طلعت لفة ورجعت لفراشي قال: جان جبتيلي وحدة وياج. -ذيج العلاكة تكدر تخدم نفسك. حك خشمه عرفت روحي راح أنسحل. قمت جبت اللفة الثانية أخذها. -روحي غسلي حلقج، شفتج طلع دمها. رحت غسلتها وطلعت لقيته فوني يضوي. رحت أخذته
لقيت مسج من كرم كاتب: أكلوا ما طولني موجود ربي يحميني ويخليني خيمة عليكم. غيث: -كرم مو؟ -هههههههه أي كرم. -دخيل رب كرم أنا. تعالي ناي بس وعمة السادة ما مشتاق لج جذب هيج بس قربي. -قصدك نحس أني؟ مو أي لعد خبر الحبابات خلي يصعد لك أحسن. -زمال ما تدحك واحد عنده عشر عصافير تاركهن وراكض ورا أغراب. رحت كعدت أكل بلفتي وراسل بكرم أتشكر منه رد: تركي الشكر على جهة ما يفيدني، تعرفين إيش رايد مكانهن؟ -أغسل جواريبك أعرف.
-ولج منيلي؟ غير خليتي عينج ضاعن بقت بس تك. -ترى قضيت عمرك بتك كرم وهم كل فردة شكل. لا تشمرها بعيوني وهذا صاحبك دا يريد مي أجيب له؟ -هفي راجدي لا تجيبيله خليه يولي. -أخاف أنسحل. -لا ما يكدر جبان. ولج هذا واحد بوخة ترى أصغر واحد بمنطقته يضربه. -دا يباوع لي كرم. -دخلي أصبعج بعينه طلعي من حلقه. -ما يوصل مسافة بعيدة. -طلعي من خشمه. -عيع لا أطلعها من عينه الثانية.
-ولج نبتلي بيه أنوب تعالوا كودوني ودوني للبار وشوفوا ياهي الحلوة منهن. -هم صدق أترك عيونه أدخل أصبعي بالثقب اللي بصدره. -حيييل هسه إشكد تلقين بنات بقلبه شوفي تركيهن كلهن ركزي لي على سارة، طلعيها بظفرج وقصعيها هي جنها قملة. -وإذا انتبه؟ -نقول له شربت زايد تيهت المكان وراحت للبنكرياس طلعت ويه البول. -كرم حبيبي فاهم وظائف الأعضاء غلط. -هو اللي يصاحب مثل أشكالج إيش يذكر؟ أستوني خاسر لفة تعال جد وتعب وأصرف على حلوقهم.
-غيث شاف الرسالة. -حبيبي غيوث الوردة خو ما معتاز لفة ثانية بس اطلب والحمزة خادم أنا. ضحكت، عدل رأسه غيث يباوع لي. سلمت ورجعت الفون. كملت أكل لفتي لقيته صافن، أشرت بيدي قدام وجهه. -شو صار لونهن خضر؟ -لأن لابسة أخضر، إيدك وخرها دا أنام. ما رد اتجتف وغمض. دقايق وأسمعه شخر. باوعت له لقيته غاط بالنوم، شعره نازل على عيونه. عدلت مخدتي وخرت شعره على كيفي، مشيت إيدي على لحيته. إشلون دخلت قلبي بهالسرعة؟ شنو منتظرني وياك؟
هم راح تتعبني مثل اللي قبلك وأطلع بكسرة، لو راح تصير لي سد أحتمي بظله؟ أتحرك وخرت إيدي وغمضت بسرعة، سويت روحي نايمة. نام صفح دخل رأسه بحضني وخله إيدي على شعره، حضني من خصري ردت أدفعه همس: بروح عاشق لا تبعديني تعبان. مر أسبوع ما رضى عمي نرجع لتركيا لأن خطار طالع، خطار داخل. سماهر شدت وياي فد شدة اعتبرتني أنا السبب الزعل اللي صار بينها وبين غيث.
قامت تحاسبني على كل شيء ودائمًا تطلعني أنا الغلطانة، حتى بعد ما ردت علاقتها بيه. كرهت وجودي وكل إشوية عاضة أصبعها تقول: إشلون دخلتج بيتي، كون يرد بيه الزمن. وأكثر الأوقات أسمعها تقعد تنصح بيه: لا يستعجل ويعقدني، وترد ناطة من ما يعبرها. هناء وأم عامر صافات فد صفة ينبشن بس يردن يطلقني، بالأخص من سمعن راح نعقد محكمة قبل لا نرجع لتركيا بعد ما يشوفن طريقهن.
أسماء ساحلة روحها فد سحلة، قبل لا غيث يطلب أشوف الحاجة قدامه خالتها. أتباوع لحلقه وظالة عود ويه رنو نفس العمر وتتسلى. أهلها يومية يجون العصر بس هي داقّتها إقامة حتى تبات. علاقتي بغيث كلما جايها تقوى وأتعلق بيه أكثر. اكتشفت بيه خصلة أنه يشتغل بهدوء، ينطي الأمان وعلى ثانية يفجر قنبلة يخليها كلها تتراكض.
صح جنت أتعلم منه هواي شغلات خاصة عدم التسرع ودراسة المقابل قبل لا تنطي الثقة. دوم يعلمني إشلون أكون قد نفسي ونسى شيء اسمه خوف. بس بنفس قلبي يغلي وحسب الدقايق إش وقت أحبل وأتركه. من أقعد بليل وأسمعه يسولف ويه سارة ويتغزل بيها. أحس النار بيه مو بيدي غصبًا عني، إشقد أريد أبعد نفسي وأسيطر على مشاعري ما أكدر. أعرفه يحبها. مو بس حب لا يعشقها، وأكره نفسي لأن حبيته بس ما جنت أسيطر على دقات قلبي ولا على اللي يحس بيه.
قعدت الصبح من وقت لأن اليوم يفتحون الخياط من غيث. قمت لقيته ما هو نازل. قمت غسلت وجهي نزلت، البيت هدوء. بره يتريقون والخطار هم بدأ يخف بس العصريات يجون. رحت للمطبخ ردت أسوي لي شيء أكله، وصلت غرفة سميرة دا أعبر استوقفني صوت هناء تحجي على كيفها، على بالي بالبداية ويه سميرة بس من سمعت أسماء تقول لها: ما معبرني ولج، عرفتها قصدهن غيث. هناء:
-ما ياخذج لو تموتين، ولج غيث مقلب بنات الدنيا كلهن بيده ما يورط روحه بوحدة تكظه وتحصره هينه. -عجل إيش أسوي يلا نصحيني؟ -فتح الخياط الصبح، هسه ما بيه شيء بعد وحامي خلي رنود تصيحه هينه وشوفي شغلج. -رنود منو تقول ترضى؟ -تقبل لأن من دحكت جود نظراته لناي من كانت نايمة بالحديقة، أجت متخبلة. سمعتها تبجي وتقول لأمها: ساعة كاملة أراقبه قاعد يمها صافن عليها ما يهون يقعدها، وأمها كوه سكتتها حتى لا يتخاربون غيث وجود.
-تمام هاي صارت من يمنا. وإيش أسوي إذا دخل؟ لا تقولين أغوي، هذا ما يباوع لعرضه لو تقصين رقبته. -غبية لا، ملخي ملابسج وصرخي عود متحركش بيج. هو يخاف من أبوج راح يضطر يسد السالفة وعمي يجبره يتزوجج. -غيث يخاف من أبوي؟ من إش وقت؟ -تركج من الخوف، يخاف على سمعته لأن ما معوزه. هو إشلونها سمعته عاطلة من أمه؟ راح يسد السالفة، وإذا بيج خير خلي أبوج يطلب مهرج طلاق ناي لو ما يسدون السالفة. هيه تحجي وغيث صاح ناي.
انداريت لقيته واقف ويا عامر، بس عامر عيونه حمر وجهه أزرق يرجف. -هاااا غيث رايد شيء؟ -إشكو هينه واقفة؟ -لابس ردت أدخل أسأل هناء وين الخبز دا أريد أتريق. -ندهي هناء وينها خلي تجي. على صوته طلعن هناء وأسماء حلوكهن شاكّاتهن من الأذن للأذن يباوع لي، قالت له: ها خويه رايد مني شيء أمر؟ غيث: -ما يأمر عليج ظالم بس موش أنا اللي رايدج، زلمتج الطالبج. قالها ودقّ دق على ظهر عامر. هناء: -شنهو عامر قول يا عمري اطلب. عامر:
-أنتي طالق طالق طالق
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!