رواية لبوة على شفا الثار الفصل الرابع والستون 64 - بقلم Leo Alfatlawi

ناي: هسه أقدر أقول سبع من صدق. سماهر: تشمتين مو؟ ناي: وعلى شنو أتشمت قابل أخذ تعبكم كله لو ترك بت عمج لا رجل ولا فلوس، أووه مو هنا المصيبة، بتج اللي راحت بالرجلين حتى أهل ماكو، سبحانك ربي من اتفر الدنيا. عامر: لو يطير لجهنم هم نرده، وأنا أعرف شلون الفلوس أردهم. ناي: شترد؟ الله أعلم بأي دولة. سماهر: ناخذ الجهال ويرد غصبًا عنه.

ناي: للأسف تتنازلي عنهم، ما تقدرين حتى تحكين وياهم، وروح أخوي اللي جنت يمه هسه شعرة وحدة إذا اتحركت من جهالي أحرقكم أنتم وعشيرتكم، وتعرفيني قول وفعل. عامر: شوكت أتنازل عنهم؟ حاسب حسابه الناقص. أبو غيث: موش بكيفهم دحقي يولي، ترحين تقولين لزلمتج الك أسبوع، إذا ما رديت الأملاك ناخذ بزرتك ونطر أركابهم. عمتي: عيش يمه هيج متخورسين ونترككم تعملون اللي تريدوه، وبعدين شأخذ منكم وهيج متخبلين؟

سماهر: أخذ كل شيء يمه، لا خلى بيت ولا مزرعة، حتى المصارف مصفيها زور، كل شيء خلانا هالحديد لا بيوت ولا مزارع، كلها محولها باسمه. أبو غيث: خبري ابنك قدمنا عليه شكو بالتزوير والاختلاس، ومنا وللجمعة إن ما رد نهدر دمه بالعشيرة وناخذ الجهال لنا. ناي: الجهال ما تقدر تأخذهم باسم أمهم والقانون وياها، وابنك عود من تقضبوه تتكاونوا وتهدروا دمه، ضلت يمكم هالشيء، اعمل اللي يطلع بيدك بس كونك قده، لا تجون تترجونا نخلصكم منه.

أبو غيث: القانون هذا عليكم موش عليه، وابنك ما يخوف كلبي موش يخوفني، للجمعة إذا ما رد اللي أخذه راح أجمع العشيرة وأبلغ باللي عمله وأجي آخذ الجهال. قالها وطلع هو وعامر، ضلت سماهر تبكي وتقول: عِش ابن أبوي شقصرنا وياك؟ هاي تالية تعبي تتركني بينهم وحيدة. ناي: آخ كسرتي خاطري بس هم بيتي بتعذرج بلكي تطلعين منا، طبعًا من رخصة عمتي. أم غيث: انعلهم روحة بلا ردة، قومي لج اطلعي، وإذا وصلتي هينه مرة ثانية أتفل بجهرتج.

ناي: عِش يمه موش بنتك أنا؟ أم غيث: لا موش بنتي، ما عندي غير ناي وغيث، وعساكم بأبو الزايد، آخ لو راميكم ومصفي السلف منكم جان قلت صدق ابني سبع وأخذ حقي منكم بالكامل. سماهر: عِش وهو قصر ما خلانا على الحديد، حتى البيوت اللي قاعدين بيها باسمه، على يوم يسحبهن ويخلينا بالشارع. قامت ووقفت تبكي بصوت، تريد تدنق على أمها تترجاها، وعاشق ركض يبشر جدته بالمدالية، دفعتها وشالته تبوس فيه، أخذته ودخلت جوه.

وسماهر ضلت واقفة تباوع بكسرة، أشرت لها يلا. سماهر: تطرديني من بيت أخوي مو؟ لا تفرحين كثير، صح راح بس راد ما يتركني، وقتها أجي وأدوس راسك موش عتبة بيته. ناي: عود ميخالف من يرد، وجان أنطيتوا ورثه بدون شروط، هيج أحسن شسوا لكم من أخذ كل تعبكم وخلاكم بطرد الملابس، بس والله كفو، يلا حبيبة جايه تعبانة، سدي الباب وراكِ. سماهر: يرد لولا هينه يا ناي. درت وجهي دخلت، خليتها وحدها بالطارمة.

مرت الأيام وغيث ما منه أي خبر، وأنا ملازمة البيت، ما تحركت خايفة بأي لحظة عمامي يأخذون الجهال حتى يساومونه بيهم. كم مرة أجه عمي سوى هوسة بالباب وأركان وقف بوجهه. سماهر ما قطعت رجلها، اتخبلت على أخوها، لا تعرفه عدل لو ميت، تريد أي خيط يوصلها له، أخباره انقطعت فد قطعه، الكل مخبوص عليه بس ماكو فص ملح وذاب. كل مرة تجي براسي كلمته الأخيرة: "مناطرك نفس المكان"، شجان يقصد ما فهمت، مع ذلك بديت أيأس من رجعته.

مرات أحس أركان له يد بالشغلة ومغلس، ومرات من أشوفه محتار يفتر ويخبر أرجع أقول لا حاله من حالنا. واقفين العصر يمنا غسق وكرم يقنع برُوَيدة اللي تريد تروح تعتذر من أبوها وتضيع كل شيء سوته، ملينا وإحنا نقنع، صاحت غسق: خلص اتركها كرم، خليها تولي روحي بس قبل كل شيء انسي عندك صديقات. كرم: أبوها راح يطلقها أعرفه، ومحد راح يوقف بوجهه، رويدة بس انطيني فرصة، والله أشتغل حتى بليل ما أنام.

رويدة: كرم لحد متى صار أشهر عايشة عند العالم؟ كرم: ثقي بالله ما قصرت، سويت اللي أقدر عليه وزيادة، بس ما تجي بيدي، ليش تضغطين علي وتذلين بي؟ هاي كلها لأن أحبك وما أقدر أظل بدونك. رويدة: لاااا، لأن أحبك وما أقدر أشوفك هيج تِشمر روحك بدون رحمة بالشغل، وتتحمل فوق طاقتك بس لخاطري كرم، إحنا زواجنا جان غلطة من البداية. كرم: لا مو غلطة، أنا أحبك أكثر من روحي، وداعة أمي وداعة إخوتي، وداعة كل ليلة سهرتها وأنا أحلم بيكِ.

رويدة: لهذا لازم نفترق، إذا بقيت وياك راح أتعبك كرم، مستعدة عمري كله أظل عايشة بغصة ووجع بس ما أتحمل أشوفك عاجز ومحتار وشلون تطلعني منا، والله أموت ما تحس بي. كرم: يعني شنو اللي أفهمه منك؟ رويدة: أرجع لبيت بابا وكلمن يكمل حياته بجهة، حاولنا ما نجحنا ولا راح ننجح. كرم: آخر فرصة انطيني. رويدة: أنا دمرتك كرم، روح رجع أهلك وأنا رايحة لبابا خبرته باكر الصبح أروح.

أباوع له نزلت دمعته مسحها بسرعة، أشر أي وطلع من البيت بدون لا حس، ركعتها راجدي كمشت خدها وقعدت تبكي. غسق: أفشل وأضعف وحدة اتعرفت عليها أنتِ. رويدة: أحبه ناي. ناي: لعددد ليششش ليششش كسرتي قلبه؟ رويدة: بهذلته ولج، ديشتغل شفتين وما ملاحق يطلع لي حتى هوية مو يسفرني ناي، ما نقدر حالتنا ضعيفة راح يموت تعب وقهر.

ناي: شقال لكِ هووو ولج، كل هذا ديسوي لخاطركِ، بس قولي أنا ما أستاهل حبه، والله حرمات واحد مثل كرم بيكِ، قومي ردي لبيت أبوكِ، خلي يبيعكِ لواحد نفس طينتكِ. ردت راسها بحضنها تبكي بصوت، تركت غسق يمها، فتحت الباب طلعت لقيت كرم شوية عن الباب قاعد يم الباب خال راسه بحضنه، صوت شهقته مبينة. رحت يمه حس علي، شال راسه مسح عيونه قام. كرم: قولي لها مثل ما تريد بس لا تروح، أخاف يضربها أبوها، أنا باكر أنا أروح له.

ناي: ما راح يسكت لك، راح يؤذيك. كرم: ميخالف، المهم ما يؤذيها، راح أعتذر منه وأشمر الصوج بي وأطلقها مثل ما يريد، لأن صدق أنا مو رجال وما أقدر أفتح بيت وأصرف على مره. ناي: بس حنية قلبك كافي تسوى الدنيا بكبرها. مسح دمعته باوع لي همس: بس قولي لها خلي تأخذ واحد يستحقها، كون يخاف ويدير باله عليها، وقولي لها والله لو أقدر أجيب سعادة الكون وأخليها بين أيديها ما جان قصرت.

كمشتني العبرة ما عرفت شرد، ابتسم، خلى إيده على كتفي ودار وجهه ومشى، رجعت للبيت دخلت لقيتها بحضن غسق على نفس بجيتها، قعدت يمها بدون لا أحكي، لميت رجلي أحس هم الوقت بقلبي، لا عندي وأساعدهم ولا أقدر أتركهم هيج مكسورين وأنا أدري واحد روحه بالثاني. صار الليل وإحنا وحدة صافنة بوجه الثانية، وعمتي قاعدة تثرم للعشاء يمنا، صوت أركان وهو يصيح: يا الله، ردت عمتي: تعال ماكو أحد. دخل بيده مجموعة جوازات، خلى الجكارة بين أسنونه،

شمر جواز على عمتي قال لها: الأبشارة. عمتي: شنو هذا عمي؟ أركان: حجزنا لكم أسماء لبيت الله أنتِ وأم عاشق. قلت له: ماما ميخالف بس عمتي حرمات بيها. أم غيث: يا المصقوعة عِش تحجين هيج؟ انعلج بالخرس. ناي: شوفي هاي بعدج ما رايحة عمه، لا تتعبين روحك ما توصل عمرتك. أم غيث: امشي أم الحلق الأعوج، ما توصل، قومي دوري زلمتك بأي حضن نايم، وزاتكِ عليه أنتِ وجهالكِ. ناي: ناقص عليمن يطلع؟ أم غيث: شنو ولج؟

ناي: دأقصد على الكلاص منو شرب منه. أركان: وهذا لكِ أخوي رويدة جوازكِ، وحجزت لكِ على فيزا، باكر موعدنا نروح نقابل. شالت راسها تباوع له ما مصدقة، حجت برجفة: شوكت طلعته؟ صغرت عيوني باوعت له، أعرف هذا شغل ابن الأطعة أذنها، بس وين خافي وهيج يشتغل من بعيد وخالهم ورا مخبوصين. رفع حاجبه وخر جكارته ما عاجبته نظرتي، شمر باقي الجوازات على لحن.

أركان: من زمان مطلعهن الكم، احسبيها علي يا أخوي بالقرآن ما ناسيكم بس بس مثل ما تعرفين قضية غيث شغلتني، وأنتِ يولي لحن تهيئي تروحين باكر ويانا. لحن: وناي: يولي رايحين بشغل كم يوم، وارد موش سياحه. لعد اشلون انخليها وحدها؟ أخاف يرد عمي ياخذ عاشق. من يردون من العمره، انروح إحنا وحسام، والأزلام يجون مچانه، مانخلهم وحدهم. مانتاخر، بس أسوي وكاله لجود بالمطعم، والعمارت تايشغلهن احسن ماراكدات هيج. ليش اشوكت غيث سواهن باسمك؟

يبه كلام كبار، لا دخلين روحج بي، يله زهبي العشه. كالها وراح دخل، ولحن عوزها تبجي، كالت لعد اني هم ماأروح. ديگلج شغل بنتي لاتلحين، واني ماأكدر اطلع من الحدود، ذوله كلهم بدون جوازات. أركان يسويلهم. استغفر الله يمعوده، خلي الله هاديهم وتاركيهم. عندي لافتح على روحي باب ماراح ينسد بحجة اتريد تشردهم ياخذوهم. أركان يوكف بوجهم، واذا على غيث لاتخافين، بعد مايرجع هاجر.

السافر الله وياه، وجهالي مو يتامه حتى اتاني أحد يوكف بوجه اليتعرضلهم. روحي لحن كافي. هزت راسها وراحت تدربه، جنها بطيخه التراك ضاگها ضك، وأسمع صرختها وراها سكتت. ضحكت غسق كالت انلكفت. وانتي رويده شبيج داده وجهج أصفر؟ مامصدگه، يعني انحلت أزمتنا، راح نروح منا؟ ولج غسق كرصيني. غسق: هههههه ألف مبروك يعمري، تستاهلون. شوفي ربي مايگطع بواحد، بس انتم متسرعين. خلي أكوم أخبر كرم وأبشره.

لوما كرم متصل بي يروح ويا لابوج ماجان ذكر الجواز وجابه، ديگلج من زمان مسوي وناسي، شو جيبي داشوف. أخذته فتحته باوعت وضحكت. ليش دتضحكين؟ الجواز صادر قبل حكم بقضيه ناي. أكيد غيث مسوي. وهل يخفى القمر، رب التزوير. دباوعي الفسفوره اشلون تلمع أكثر من وجهج، وانتي يحلوه ماعرفتي رجلج وين. والله الأخبار يمكم، اني ضاله حالي حال الثوله بس اتصفن. ناي شتعرفين عني، اني أضم عليج؟ ترگج منه، شخبارج انتي وجود؟

اجاني البارحه، ضل يحجي ويتوسل وسوالي البحر طحينة. ليش كارهته؟ ماكارهته، بس قبل اسنين طلبت منه طلب وخجلني، حلفت بوكتها ماراح أحجي وياه أبد حتى لو اعتذر عمره كله. صح ماكلتلي شنو هو طلبج، بس خلي أكلج جود مايتقرب ولايطلب الزواج اله اذا كان متأكد من مشاعره، ونفس الوكت كون متاكد يكدر يعيشها بمستواها لواكثر، وانتي بالنسبه اله هواي مستكثرج على روحه. والله ماحسسته هيج ولا طلبت منه شي.

بس هو يعرف راح يقصر وياج، وأكيد حسب احساب راح يضلمج، لذلك ابتعد لمن كون نفسه وشاف روحه كد المسؤليه يالله هسه فتح الموضوع. لعد ليش ماگلي؟ ليش خلاني أسهر ليالي واني أفكر شنو نقصي حتى ماحابني؟ لوما حابج جان كلج باليمر بي، لان يعرف راح تساعدي. جود نفسه عزيزه ويحبج، مايريدج تتأثرين بوضعه وتقبلين بي بطريقه شفقه، رادج ترضين بي كحبيب وزوج يكمل وياج باقي حياته. موهذا السبب.

لاهذا السبب، هاي اني كدامج شوفي الفوراق الاجتماعيه اشلون حطمتنا، مع العلم المره متتأثر بهالشي، بس هم جانت غصه بكلبي من ينطيني افلوس وأعرف نفسي معتازتهن ماأكدر أرد أيده. البارحه ضل يترجى ويتعذر على كلشي حجاه بذاك الوقت، وكال نتزوج ونروح لتركيا وهناك انكمل حياتنا، وحتى افتحلج مكتب ماعندي مانع تشتغلين، ماأوكف بطريق نجاحج ولامستقبلج. اي بعد شنو؟ تردين الصدگ فرحت، بس من جواي اختنكت. لان راح اتبعدين عن أهلج.

لاابعد عنج، ولج والله اجيبها منا أردها منا، مادااتخيل روحي بدونج. رويده راح تسافر وياج. اي وانتي ضلين وحدج هنا ناي، وبعد ماأشوفج ولااتعارك وياج، يمه غير انتحر. وانتي اتخربين حياتج علمودي؟ صدك تحجين؟ غسق لاتخسرين جود لان ماراح اتحصلين مثله. ولاراح أحصل مثلج، ولج انتي توأمي، ساعه اذا ماشفتج وحجيت وياج اتخبل، ترديني أتركج لخاطر زواج؟ يعني شنو؟ تره جود أخوي ومارضه توجعين كلبه هيج.

أرضه بشرط واحد، ترحين وياي ونعيش هناك سوه نفس العماره، نكمل دراسه سوه. غسق ماكدر اروح بدون اذنه، مااعيد الغلط مره ثانيه. وينه ناااي وينه؟ ولج حلفت جود بمعزتي يحلف يكول ماادري، اختفى محد يعرف عنه خبر من زمان. اشلون اتضلين العمر كله منتظره؟ يمكن مايرد، اشلون يعني؟ أخذت نفس لميت رجليه خليت راسي عليهن. غسق: والله دوم أصفن اكول اشلون كدر يبعد عنج وهو يموت بيج.

أغمض بليل أتخيل راسي على صدره، وصلت بيه أشم عطره بجهاله، وأسولف ويه صوره. معقوله بعده بالعراق؟ لو بالعراق جان اجه حتى لوجان زعلان يجيني، اني ونايمه بدون لاأدري، اشكد صارت بينه مشاكل واشكد أذيته بس مابعد هيج. يمكن هاجر ولحن تدري لان فلتتها من ساع من حجت. أدري حسيت عليها، ماوجعني خبر سفره بكد ماوجعني وداعه، جان اقل من حبنا اصلا باهت مايستحق حتى الذكرى.

ناي خايفه يعرفون عيالج ماموجود، وكتها ياخذون أطفالج، لان منين يخافون بالاخص بعد مارفعوا الدعوه عليه، حتى رجعه مايكدر بعد يلكفوا عالحدود ويروح بيها. يعني شسوي؟ هاي كدامج كاعده عاجزه، لالبالج مرتاحه بس ماواكع شي بيدي. ممم اجتني فكره واليوم اجيبلج مكانه، تركيها وراي، يلا بابا ديتصل، وصل لازم أكوم. فدوه تعالي باجر حتى انروح اندور شغل، اختنگت من البيت.

ميخالف يلا باي بنات، وانتي روشه خففي من الفرحه لاتنجلطين قبل لاتسافرين. كمت وصلتها للباب، سلمت وراحت. رجعت جوه الجهال تلعب يم ماما ولحن يم رجلها بالاستقبال. دخلت للغرفه رويده متصله بكرم تسولف وتضحك. أخذت فوني اتمددت عالقريوله، اكلب ادور شغل بالمكاتب. غصبا عني راحت ايدي على صور غيث. عدلت مخدتي خليتها كدامي، أبوع بيها ابتسمت، ماشتاقيتلي؟ مابرد حضنك بدوني؟ ليش هيج كلبك اتحجر من ناحيتي؟

خليت ايدي على كلبي ماحسيت نبض اله غمضت، أحس بسكينه خفت من هالشعور. فتحت عيوني وكعدت افرك بگلبي، ربي دخيلك معقوله صايرله شي ومحد يدري بي؟ كمت بسرعه، طلعت رحت للاستقبال، دكيت الباب فتحتها لحن كالت خير ناي؟ أركان نايم؟ لاهياته كاعد تعالي. دخلت لكيته متمدد، ايده جوه راسه، شافني كعد، عيونه تعبانه، أخذ نفس كال وداعت علي وعاشق ماادري وينو. اشلون ماتدري وهو كل أسراره يمك؟

أركان والله ماأضوج، كول هاجر بس أريد أمن وأعرف هو بخير. جان ناوي يهاجر ومحضر أوراقو، بس فجأه انگطع اتصالو، لاعرفت عش ولاوين أراضي. يعني شنو؟ معقوله صايرله شي؟ هذا المخبلني، غيث كل هالوكت مايسأل عنج انتي والجهال اشلون؟ جان بالسجن وينطرني بالساعات تايعرف أخباركم، موش بره ويعرف أهلو ماراح يتركونكم بعد العملو. همست بكسره أركان، كلبي مداينبض. مسح وجهه ودنگ. لادنگ أركان، غيث شنو صايرله؟

شال راسه عيونه حمر بيهن حيره توجع المقابل. تركته ورجعت للغرفه، أخذت فوني اتصلت بغسق بلكي حصلت شي، لكيته مشغول. لميت رجليه عيني بالجهال يلعبون ويضحكون بصوت عالي، نزلت دموعي وين أبوكم؟ ليش هيج كلبي يوجعني عليه؟ مسحت دموعي رديت اتصلت بغسق هم مشغول، اتأخر الوقت وهيه ماكو، والنار كلما جايها تسعر أكثر، والحيره القلق أتموت أكبر صاحي. كلها نامت بس صوت حركت أركان يفتر بالطارمه تنسمع، هذا الثاني هم كلبه لاجمه ومايرضه يحجي.

وصلني مسج ماأعرف اشلون أكمش الفون، بعد فتحته صوره لغيث كاعد على طابوريه بطرگ البنطلون بغرفه تعبانه كلش. اجاني مسج ثاني منها كاتبه اشلوني؟ منيلج هاي؟ لكيتها بحساب جود، اتصلت بي بحجت اريد اتأكد ماعندك علاقه، انطيني حسابك، وصار كم ساعه نتعارك اني ويا يالله حصلته، والكفلج هاي الصوره بالمحادثه بس المكان أثار استغرابي. يعني يدري بمكانه وين؟

ماتصور لان سأله اشوكت تروح، وراد غيث بكلمات مامعرفه مبينه شفره بينهم، لان الضاهر حاسب حساب ينلكف من الجهاز. اتعدى مرحله الشيطان بتفكيره، ميخالف المهم موجود أمنت. هههههه لعد سمعي شگايل عنج، سائله عنج وجود كايله كاعده حبابه ومايطلع صوتها، راد بس لاتأمن كلش، هاي تلكيها تتناقش ويه ابليس على مصيبه، وبليس يهدء بيها تاتقلل من حجم الدمار. شوفيلي اشوكت آخر مكالمه بينهم.

قبل اسبوع هاي الرساله جانت، صدك باجر أمر عليج، بابا خبر صديقه عنده مكتب وحجاله عنه، عاد حدد موعد باجر يلتقي بينه. تمام بس خليج مراقبه اتصالاتهم فدوه، بلكي نعرف وينه. ؤك يلا راح يصير الصبح، نعست وهذا نشف ريگي، الجامد الله منطي شكل وشايل منه الاحساس. بعد شيسوي متگليلي؟ تره شلعتي كلبه خطيه.

ولج فاتحه ويا كام، حضرته كاعد بالفانيله كوه كامشه روحي لاتفلت مني كلمه وتروح هيبتي، غير يحس ويكوم يلبس، لامخلصها صفنات دايخ بغير مكان، وضحك بالمثاقيل، حمدت ربي مو يمي جان اغتصبته وداعت بابا. امداج دوم كاسره وجهي، ثگلي بنتي عيب، شخليتي للولد؟ اشتعل ابو، كلما جايه يصير أحله، وانوب يحجي بهدوء ورزانه، يشگ كلبي والله أحس روحي ملطلطه يمه. أزيدج من الشعر بيت، يقدس شي اسمه مراءه، يحسسج انتي فد كائن ناردت الوجود.

لذلك مبتعده عنه أحجي وره الفون، لان أعرف روحي اذا لكفته اگله يله ولي نعست أروح أنام، باجر تعالي من وكت ويه طلعه رويده من يروحون خلي يذبوج يمي. انگلعي يلا. سديت الفون شي آمني من عرفت اكو خبر منه، ضليت اتأمل بصورته واقره كلماته ووابتسم، أحسه داخل عقلي يشتغل. رحت بالنوم براحه، كعدت على صوت صرخه يبست عضامي، كمزت ماوخرت حتى الغطه انلف برجليه، وكعت ماحسيت بالألم بكد ماكلبي يريد يطلع على صوت اللطم بره.

كمت ركضت بره، وأشوف عمتي كاعده يم الحايط صافنه، وسماهر شاكه ثوبها. الكل دموعهم تنزل بس أركان كاعد على جهه خال راسه بين ايديه، ويم أبو غيث وأبو شاهين واكفين. أحس الشلل صاب لساني، أريد أحجي ماأكدر، كوه كدرت أنطق شنو الصار، واجاني صوت سماهر وهيه تنحب: راح أخيي يناي راح السبع مات. هزيت راسي بلا. ولك عش يخوي ريحت روحك لخاطر افلوس شفادنك؟

ولك جهالك زغار عينهم بيك، يمه سوده بوجهي اسم الله عليك، شبعت مي يبعد أختك، متت غرگان، يبوووو يبووووو. رحت يم أركان خليت ايدي الترجف على متنه، شال راسه عيونه حمر. لاتكول مات. لامامات، غيث موغبي تايموت هيج موته. أبو غيث: وهذا هو مات وشبع مي، غرگ بالعباره. ماكو إثبات. شتريد بعد إثبات أكثر من هالشي؟ وصلنا غراضو وجوازو وحتى صورتو وهو عالجرف. موش هو غيث؟ مايجازف بروحو ويترك ناي وجهالو وراه، أخوي وأعرفو.

تركهم وراح بسوء نيتو، ماجاي تاأقنعك تروح أتقدم طلب تاينقلون جثتو للعراق، اني راح انصب الجوادر. يابه ياجواااادر؟ كولو يالله خلينا نتاكد، ماوصل بس صور منو؟ عش موتكول دزيت يكشفون على عليه والنتيجه مطابقه. يمكن اكو غلط، اني راح أسافر وأتأكد بنفسي. لاتسافر ولاتتحرج من مجانك، الجوادر تركناهم ينصبون بيها، وجينه لان حضرت جنابك ماترد علينه من نتصل، وهم تاتجي ويانه انقدم طلب يردون جثتو.

نصبوا وحدكم وأخذوا عزاه، اني لاأحضر ولاتحرج من مجاني اذا ماأكضب جثتو بيدي. خلك يطبك وجع، وانتي يلا جيبي الجهال تاناخذهم ويانا يكفون بعزا أبوهم. أركان: ماتاخذون ولاواحد منهم. أركان لاتجبرني أخلي جيله براسك وأخذ عزاكم سوه. اعمل التكدر عليه بالقران، الجهال مايتحركون على جثتي. أبو شاهين: تريد العالم تاگل وجوهنه، شبلاك يبه تسودنت؟ اي عمي تسودنت، ذوله أمانتو عندي، تجيبون جثت أبوهم تاخذهم مجانهم، غير هالشي مالكم شي يمي.

عجل عطيني علي لوهذا هم نسبتو الكم؟ اي النه، ماطولو باسم غيث حالو حال أخوتو، اذا تكدر تثبت عكس هالشي الك حق. اجيناك بالطيب بس طلعت نجس مثلو، اشتعلت روحو وين ماراح، وراح أرفع قضيه إثبات نسب وأخذو من نص عيونك. أبو غيث: حتى الفاتحه ماردت انصبها لان مايستاهل بعد العملو، بس لخاطر أحفادي يخلص العزه، أطلع شهاده وفاتو وأجي أخذهم، خلي واحد يعترض تاأسحگ راسو.

ضحك أركان بستهزاء، نكث عباته عمي، طلعوا مستعجلين، كام راد يطلع كمشت ايده. مات! مو بس دتجذب حتى لاياخذون الجهال؟ لو ميت تلكيني واكف جدامج هيج؟ لعد وينه؟؟ ماادري. لاتكول ماادري، كول ميت ودااجذب حتى يصدگون ومياخذون الجهال منه. غمض وخله ايده على راسه دنگ. حسيت الدنيا ظلمت بعد ماشفت شي، فتحت عيوني بفراشي، راسي يفتر وصوت صراخ سماهر بالبيت مستمر.

انداريت لكيت رويده كاعده من جهه دموعها تارسه وجهه، وغسق كامشه ايدي همست، شفتي اشلون تركني وراح؟ غسق: لاناي والله ماميت، جود يكول ماكو شي وصل لحد الان يثبت انو صدك مات. حسني كلبي من البارحه وكعدت أركان للصبح، أخذت روحي عرفته ضام شي. اي لان وصللهم الخبر بس ماخبرونه، رادوا يتأكدون بس والله لحد هسه ماوصل شي، ذوله بس يردون يكمشون بالسالفه حتى يردون الورث. وين أركان؟ ويه جود وكرم بالسفاره من الصبح.

كلتها بكسره يردون جثته مو؟ لااا والله ناااي كافي لاتفولين، راحوا حتى يشوفون طالع من العراق لو لا، صار اسبوع خبر ماكو منه، همه هم محتارين ميعرفون وين، كومي تره ابنج وكع كلبه من البجي، وعامر بالباب يتهدد يريدهم. يعني حتى خبر صحيح مااجه منه وهيج اتولونه أهله؟ لعد مايعرف أهله شنو؟ اشلون أنطاه كلبه يتركنا؟

غيث مايتركم، وأركان خايف لاأهله الهم ايد بالسالفه، همه خفوا حتى يردون والورث، ناي غيث من جان يقسي عليج حتى تكدرين توكفين بهذا اليوم. ماريد اوكف، أريده هو، ولج غسق والله اجذب من اكول اكدر بدونه، ولج أموووت. وراح تموتين أكثر اذا خذوهم، ناي فدوه كومي، جهالج يكسرون الكلب، وعمتج فاقده، اذا مولخاطرهم لخاطر غيث الي ضحى بروحه حتى يضلون بحضنج.

كولي انتي بحلم وغيث مابي شي، هسه يدگ الباب يدخل ياخذني لحضنه مثل كل مره، يدخلني بين أضلوعه ويكلي مشتاق لضحكتج. كافي ناي بروح أخوج. متأكده مايتركني؟ هو وعدني، وبعدنه ماحققنه حلمنه، ولج البيت الجنه نحلم بي مادخلناله، ولاخلينه جهالنه بحضنه وسهرنه بينهم. رادت تحجي وسمعت صرخت هيا بخوف، كعدت ردت أكوم افترت الدنيا، رجعت كعدت، أحس روحي تنسلب مني.

سندني كمت طلعت، لكيته علي وهيا كاعدين يبجون، وعاشق واكف كدامهم، كامش سجينه يحميهم. شافني اشر تعالي. رحت يمهم كعدت أخذتهم لحضني، ضل عاشق واكف اندارلي كال لاتبجين، اليصل يمكم أطرو بالنص. سماهر: يعمه ميصير هيج، لازم ترحون لبيت جدكم هذا عزه أبوكم. اليصل يم أخوتي أذبحو، وعمه الساده، وانت يلا كومي ولي لعزه أخوج العايش. ولج ناي نصبو الفاتحه والعالم تسأل عن جهالو. أم غيث:

-أنجعل ننصب فاتحتج بيش طالبين ابنيي، ولكم خافوا ربكم أخذتوا عزاه وهو عايش عش بس لخاطر أفلوس، أنتم هم بشر؟ لا والله. -مااااات مات عش ماتردين تصدقين يمه، دخيلج والله مايستاهل عزاه ولا وحدة بيجن بي. خلينا ناخذ الجهال ونروح، والج كلمة مني أول ما يخلص أني أردكم بيدي. -ولك عاشق، يجده إذا قربت صوب أخوتك طر وجهه بالسكينة. أشار عاشق: أي. -أغديلك فدوة، سبع مثل أبوك ما راح لمن ريحهم كلهم بالرجلين. سماهر:

-محد راح غيره هو، الورث راح يصير باسم الجهال ومردهم النا. -هنا الحكي، وعلي عرفت خفيتوا ابني لخاطر تورثون من بزرته، بس وكلام الله لو عرف أحركهم ولا أعطيهم الكم. -ابنك مات. -وين؟ بدعة عنكم. -نفس حالتك ما ترضى تصدق، ضالة تتكاون ويه الجبير قبل الصغير. -تعرفكم من نطفة نكسة وأنتم وراها، آآآخ ييمه وين ضيعوك الما يخافون الله، قومي اطلعي أنعل أبو أبوك النكس. -محد ضيعه، هو ضيع نفسه، وما أروح لمن يرد أركان ويأكد.

-بعد شيأكد إذا أنتم نصبتوا الجوادر؟ ربي طلبتك كون تخليهم حايرين بخبزتهم قبل مبيتهم، كون تظل النومة حسرة بعيونهم وموتتهم بدون جادر ولا عزة. ضمت وجهها بالعباية تبكي وأنا جهالي بحضني، البنات يمي صافنة أحس عقلي متبنج وداخلة بحلم ومنتظرة واحد يصحيني.

خليت رأسي على متن غسق، وجهالي بحضني عاصرتهم، غمضت قلبي خدران حتى نبضه ما أحس بيه، لليل وإحنا على قعدتنا لمن دخل أركان وجود، من شفته مدنق بعد ما سألت عرفت الإجابة هم ما حصلوا شيء. باوعت لعمتي لقيتها شفايفها بيض، لمت رجليها لحضنها ودنقت خلت رأسها بين أيديها. ردت أقوم اختل توازني، سندتني غسق، قمت أخذت الجهال ورحت لغرفتي، دخلت رويدة بيدها صينية قعدت أتعشيهم.

قامت غسق قفلت الباب وأجت يمي، قعدت اتمددت خليت رأسي بحضنها، مسحت على شعري باوعتلها العبرة خانقتني ما أقدر أحكي. همست: صدق راح أظل بحسرة حضنه؟ هيج يظل ذكرى بس؟ -غيث ما ميت. -وينه لعد؟ -الله أعلم هسه، كنت أحكي ويه جود يقول لا طالع من العراق ولا موجود هنا. -يعني شنو؟ -والله هم محتارين محد يعرف، جوازه ما عابر الحدود وبنفس الوقت لقوا جواز بالعبارة الغرقت، شلون محد يدري، ناي فكري بعقل تركي من المشاعر.

-يعني طالع تهريب لو لقوا جواز مضروب؟ -احتمال لعبة حتى تسقط الدعوة عليه، وإلا غيث يروح بدون لا يبلغ أركان وجود مستحيل، تركك منهم كان أقلها اتصل بيك وصاج عالجهال. -قال: "ما أناطرك لا تتأخرين علي". -إيش وقت؟ -بيوم الحكم، بس شنو كان يقصد؟ -متأكدين مو بتركيا؟ اتصلوا بجماعته ما واصل، وبالعراق هم ما موجود. -بس قلبي يقول غير هالحكي غسق، دأحس روحي ضعيفة، يعني كنت قوية بيه وأنا ما أدري.

-إذا ضعفتي راح تخسرين حتى أطفالك، ترى خلوا سماهر هنا وعامر حتى لا تنهزمين بيهم، بس تخلص الفاتحة ياخذوهم، ذوله الكنز مالتهم ما راح يتركوهم لك هيج. -محد يقدر ياخذهم. -لا يقدرون، وأنت تعرفين ذوله لا دولة تقدر لهم ولا عشائر، وأملاككم كلهن بأسمهم، بس تطلع شهادة الوفاة راح ياخذوهم. -حتى أذبح روحي وراهم. -وليش تذبحين روحك ناي؟ ما عندنا وقت، الساعات دتمشي بسرعة وهذا مو بصالحك، تركي الحزن على جهة، خلصي أطفالك.

-شلون أخلصهم وهم محاوطيني؟ وين أروح وأنا ما أعرف غيث ميت لو عايش؟ وشلون اختفى بين ليلة ويوم؟ -غيث مو غشيم من سوى لك تنازل بيهم، يعرف أهله أول شيء يفكرون بيه شنو، ولك راح يطلعون شهادة وفاة والأملاك كلها تتحول للجهال وأنت الوصية، وذوله ما راح يتركوكي، تعبهم وأفلوسهم كلهن بيدك صارن. -شسوي؟ نصحيني لأن عقلي بعد ما يجمع ولا أقدر حتى أفكر هالشيء.

-سايريهم، كل شيء يردون وافقي، لحد ما نسوي لهم جوازات ونشرد بيهم قبل لا تطلع شهادة الوفاة. -راح أضيعهم هناك ما أقدر وحدي، هو كنت بروحي وألف مرة ضعت لو ما غيث يخلصني. -إحنا وياك، جود وكرم راح يخلوهم بعيونهم، لا تنسين ذوله جهال غيث، ناي اسمعي مني، والله حادين سنونهم، ما عندنا وقت ترى، تاركينك لأن مشغولين بس يفضون. -غسق أحس روحي مخنوقة.

-حقك والله، هو إحنا أبعاد عنه ومخنوقين مو أنت اللي كنت تضحكين على ضحكته، بس الكسر ما راح يفيدك بشيء، والله الوقت ديداهمنا. -ما راح أقدر لهم، ذوله مو أهلي الخوثان، ولك يطلعوني من جوه القاع وياخذون أطفالي مني بس يحسون راح أنهزم وآخذ كل شيء. -لا نقدر، راح آخذ المستمسكات وأقدم على جوازات. -يروحون للسفارة يشتكون علي خاطفتهم. -أول ما نوصل عندك التنازل مال غيث، تروحين للنفوس تثبتي هناك، بعد ما يقدرون يتنفسون مو ياخذوهم.

غمضت أريد أستوعب اللي أنا بيه ما أقدر، رأسي وقلبي يتسارعن بالوجع، داخلة بدوامة وصراع بين قلبي وعقلي. ندستني رويدة فتحت عيوني أنطتني حباية. -شنو هاي؟ -مهدئ راح تموتين، نامي شوية، فدوة أروح لك وإحنا يم الجهال هسه أنيمهم. -أخاف أنام ويدخلون ياخذوهم. -الباب ما نفتحها وأركان وجود هنا يخافون، وهسه دز مسج كرم قال: "أنا قاعد بالباب أخاف تتغفلون أنا موجود". غسق:

-ناي خذيها والله ما نخلي واحد يوصلهم، أصلاً ما راح أنام بس ارتاحي، والله قلبي يرجف عليك خايفة لا يصير لك شيء. قعدت الجهال كانوا كلمن بفراشه بس عاشق قاعد، ما حاكيته لأن عرفت عينه ما راح تاخذ النوم لمن يأمن علينا، أخذت الحباية ورجعت رأسي بحضن غسق، كامشة جف عاشق غمضت وهو يمسح على وجهي يأمني. مر كم يوم وعيني ما غمضت، قاعدة قدام الباب منتظرة يدفعها مثل كل مرة ويفوت. عمتي وضعها أصعب من وضعي.

أركان والولد يطلعون من الفجر ما يردون غير نص الليل وماكو أي شيء. سماهر ثاني يوم راحت تركت مكانها سهيلة، من كثر التعب والحرقة اللي بقلبي حتى ما بيه أحكي مو أطردها. خلص الثالث وقت العصر لامة رجليها، قاعدة يم الجهال وبيدي فوني متأملة يوصلني مسج لو حتى خبر منه، سمعنا صوت عمي يرعد بره يريدني وأركان صوته وين واصل.

أمنت هيا يم رويدة وقمت طلعت لقيتهم الكل موجودين واقفين، بس أبو أركان قاعد منتجي على عوجيته مبين عليه الحزن، شافني أشر لي تعالي، رحت يمه قام جر رأسي باسه قال: شلونك يا مرت العزيز؟ -هه يا عزيز هذا اللي خفيتوا حتى تنهشون عائلته؟ -هو راح يبوي، واللي يقرب صوبكم اترسوه بارود. -للأسف ما تعود أحد يدافع عني ولا يحميني، من صغري تعلمت آخذ حقي بيدي. -الجهال شلونهم؟

-بخير ما دامهم بعاد عنكم، وراح يظلون بخير لأن ما راح يتحركون من مكانهم. أبو غيث: -مو بكيفك، وهم لا يقولون ظلمناك وخذنا بزرج، جايين نحكي وياك وناخذ رأيك، ولك كل الحرية بالاختيار. أركان: -والخلق السماوات اللي ببالك ما يصير غير وأنا حدر التراب. -أنت تنكتم راس المصايب والبلوة، لو ما كنت مسانده ما عمل هيج، وهي مو صغيرة تعرف شتعمل. قوة وقفت وانتجيت يم الحايط أحس قوتي خانتني، باوعت له بتعب، أشرت: شكو؟

-دحقي يبه، أنت صغيرة وعليك العين والعالم تاكل وجوهنا، أرملة ابنه ضالة مفرعة وحدها ببغداد. -المطلوب؟ -الجهال أول وتالي ناخذهم، بس أنت تردينهم تجين وياهم ونعقد لك على عامر، تردين تظلين براحتك ما نجبرك بس تتنازلين عن الوصاية. أم غيث: -وحق كتاب الله يا غيث تطلع من الجحر اللي أنت بيه وتذبحهم. -عمة لو سمحتي خلي أفهم بالأول، شنو اللي يجبرني أسوي هيج؟ أبو غيث:

-اللي يجبرك كثير منهن: الجهال يختفون وأنت المسؤولة عن هذا الشيء لخاطر تورثين شكو بأسمهم. -حلو بعد. -قضية تزوير أقل شيء عشرين سنة حبس. -وشلون أتزوج يمكن غيث عايش؟ -وإحنا مو يهود نعرف الحلال من الحرام، وعندنا طول فترة العدة وهم قبل لا نملككم ناخذكم لشيخ وهو يعرف شيعمل وشلون يعقدكم. -حلو عجبتني، تردوا له اللي سواه بعامر. أركان: -كملت؟ يلا أتوكل. عامر: -حشم روحك واكضب لسانك لا -لا شنو هو؟

ما تكمل عش انكتت يا الحرمة، أو تعال تاعلمك شلون تخلي عينك على حرمة أخوك. بعده يحكي وعمي صار قدامه راد يمنعه دفعه على عمي الثاني وسحب عامر من ياخته رفعه لفوق ودقه بالقاع، خلى رجله على صدره ووقع له بوكسات، إيش قد راد يوخروه منه ما قدروا، قفل على وجهه حطمه تحطيم. لمن دخلوا جود وكرم يركضون على أصواتهم جروا حيل قوموا وعامر ما مبين منه شيء من كثر الدم. قام أركان ينفث رد دفره بطنه وتفل عليه، سحبه جود قال لهم: يلا بره.

أبو غيث: -عبنك حرمة وما تحشم الجبير. -حرمة ناقص غيره، كلب ابن سبعطعش كلب، هذا الشيء راد لي بس وداعت خويي اللي يوصل حدر ناي أدفنه كائن من يكون. -عجل ناخذ وليداتنا. -الزلمة منكم يتجرأ يمد إيده ويكضب واحد من جهالها. أبو شاهين: -وهم أمنعني آخذ ابن ابني. باوعت لأركان أشر: أني أرده لك. أبو شاهين: -علي تعال يا جدي. وقفت بوجهه. -بعدي يبه، الولد يرد لحضنا، كنا تاركينه لخاطر عمه، هسه من حقه يرد لحضن أهله، عش ضال بحضن الغربة.

-ما تاخذه. -عامر جيب الولد. -وروح أخوي بس تلمسه أروح أشتكي عليكم وألبسكم قضية. -على شنو تشتكين؟ عش ماخذين ابنك ومزورين هويته ومسجليه باسمنا، ترى اكو تحليل وبدل القضية تصير اثنين خطف وتزوير. -عمي بعده صغير، دخيلك والله ما يقدر ينام إذا ما أنا يمه. -تعاااال جدي لا تضل حدك واقف جنك زمال، عامررر جيبوه. جره عامر ما نشوف غير عاشق ركض للحديقة شال طابوقة شمرها أجت براس عامر فتحته بالنص.

شال العصا عمي راد يضربه ركض جود شاله وطلع بره. ظل علي واقف يرجف ويبكي، يباوع لعامر اللي رأسه يجري دم، نزع أبو شاهين جماغه ضغطوا عالجرح وجر علي دفعه قدامه، اندار لي دموعه تنزل همس بكسرة: ماما لا تخليهم ياخذوني. أحسه أخذ روحي، رحت لعمي أبو أركان كمشت إيده قلت له: دخيلك عمي. -يا عمي ابنهم ما أقدر أمنعهم، هم حقه، قبل غيث مانعهم، هسه منهو يقدر يكف بوجهه؟ أبو غيث: -ها شكلتي؟ فضينا؟ أركان:

-كل عقلك عمي من بعد السبع تاخذ هالخنثة؟ -الكلام مو يمك، احكي يبه ترانا نعمل هذا لمصلحتك أنت والجهال، لو ما نخاف عليك ومعتبرينك من بناتنا ما ناخذك لابنا. -كلمة ثانية وداعت غيث أرميكم. أخذت نفس مسحت وجهي هزيت رأسي: بأي. وأركان دفر المحجر مال الحديقة طلع من البيت. أم غيث: -هاي تاليتك ييمه تاخذين هذا النص زلمة؟ أبو غيث: -أنت انكتي، يلا يبه تهيئي تاعتين ويانا. -عندي شروط قبل لا أروح وياكم. -شنو هي؟

-علي يظل باسمي وأشوف ورقة وفاة غيث بعيني، وآخذ عزاه هنا بيت أبوي، ومن أجيكم ما أعيش وياكم، أعزل بالقاط الثاني وعمتي وياي. -عجل اتهيئوا، إن شاء الله ما نطول كلها أسبوع بالكثير ونجيب شهادة وفاته. أبو شاهين: -نخلي علي لك، بس تحولين شكو أملاك مسجلة باسمه باسمنا. -ما عندي مانع حتى أملاك عاشق وهيا أحولهن باسم أبو غيث. أبو غيث:

-هاي هي تفقنا وهذا أركان، لا تخليه يغير فكرك تراه طمعان بالورث يريد يكوش على كل شيء، وراح أخلي يمك حسام وسهيلة، ممنوع تطلعين من هنا تعتازين شيء هم يجيبوه لك. -هاي هي رجعولي علي. تركه أبو شاهين، اجاني يركض حضن رجليا ومسح دموعه بيهن، راحوا. طلعوا وعمتي كعدت بالقاع، رحت يمها ردت أكمش إيدها دفعتني، أنا هم ما حجيت قمت رجعت لغرفتي، الكل ساكت مصدوم من اللي سويته، ولا واحد وصل يمي وكال ليش وافقتي.

يومين ومحد يحجي وياي، معزولة وحدي بالغرفة، حاطة راسي عالجرباية وصافنة بحياتي اللي ما ترضى ترحمني. انفتحت الباب دخلت غسق سدت الباب، كالت: يلا. -خلصت؟ -إي طالبينكم لازم هسه نروح. -والجهال شلون ناخذهم؟ -التكسي بالباب، ناخذهم غصب عنهم ما نتأخر، نكلهم نزور أخوك وكرم ويانا، وأنتِ هم سويلي وكالة حتى أشتغل براحتي بعد ما أعتازك. -أخذي ملابسهم غيريلهم بين ما أغير ملابسي. -لا راح أجيبهم هنا حتى هي عركة وحدة من نطلع.

طلعت جابتهم، هي غيرت لهم وأنا تغيرت أتحرك مثل اللعبة بدون شعور، لأن أي غلطة تكلفني هواي وتردني لنقطة الصفر، كافي غيث اللي ما أعرف وين اختفوا. خلصنا، طلعنا صارت بوجهي سهيلة، كالت: على خير إن شاء الله. -رايحة أزور قبر أخوي. -أبوي مانع الطلعة وأكيد تعرفين هالشي. -من أصير بيتكم وتحت أمركم عود تتحكموا، حاليًا ما لكم حكم علي. -خلي أخبر أبوي لا تتحركين. قبل لا تفكر تسحب فونها أشرت لي غسق، طلعنا ركض، اجه ورانا حسام كال: وين؟

-أخذنا الإذن من أركان ما نتأخر. -غير أعرف وين؟ -نزور قبر عاشق ونرد. -أجي وياكم؟ -الصراحة أركان ما يثق بيك وكال لا تاخذونه وياكم. -خلي أتصل، انطري لا تتحركين. طلع فونه وغسق لكيتها مصعدة الجهال، رحت صعدت صاح: ووين؟ سديت الباب، تركته يخابر شفته يحجي بنرفزة، عرفت أركان طابق وياي، قبل لا تخلص المكالمة أشرنا لأبو التكسي حرك.

طلعنا كبل للمحكمة، سويت وكالة لغسق وراها للجوازات، كملنا شغلنا عالسريع ورجعنا، الحمد لله ماكو واحد موجود بس حسام مبين بعدهم مشغولين شلون يثبتون موته حتى يطلعون شهادة الوفاة. دخلت للبيت لكيت عمتي كاعدة قدام البيت، دموعها على وجهها، شافتني رادت تكوم تدخل ركضت عليها حضنتها دفعتني. -لا تصيرن أنتِ والزمن علي.

-عجل هيج تكسريني قدامهم وأنا المزامطة بيكِ وأكول هاي بنتي اللي طلعت بيها بالدنيا، تاليها تخذليني وتخلين راسي بالطين. -شتعرفين عني أنا أخذلك؟ -عجل اللي عملتيه شيتسمى؟ هاي تاليتك من حرمة ابني وبنتي ترحين لهذا الحرمة وكنتِ شريكتي. نزلت دموعي همست: تعبت عمة أريد أرتاح. -وعلي غيث ما ميت. -وينه؟ يلا كليلي وينه؟ خلاني هم يكسر الظهر واختفى، أريد آخذ نفس ما كدرت أكوم وأرد من جديد. -يرد بس صبري.

-حتى الصبر مل مني هلكد ما أنخى، ما ضلت طاقة عندي، عمري خلص وأنا أركض ورا شيء اسمه صبر. -اتلاويتي ويا الوقت وخذتي حقك من حلق السبع، من وصلتِ لحياتكِ رخيتِ، عش يا عمة تدمرين نفسك. -تعبت ومحد حاس بي، حتى وقت للحزن محد أنطاني، آآه يا عمة لو تعرفين ششايلة بقلبي من هم وقهر، أتمنى أغمض ما أفتح بعد. سحبت راسي لحضنها خليته على رجلها وأتمددت. -تمر يا عمة بعدكِ زغيرة والحياة قدامكِ.

-مرات أحس روحي بعدني طفلة، أرجع أكول لا كبرت، أرد أتخيل نفسي بآخر عمري، دأحس روحي بكلهن لأن ما عشت أي مرحلة بيهن بروحي. -انهزمي يا عمة ردي لبلاد الغرب، لخاطر أركان يخلص من همكِ اللي كاضبوه ويتفرغ تا يرد أخوه. -وهو هذا اللي دأسويه بس هم ما مرتاحة، فكري يمكم.

-ما علينا أمكِ بأمانتي وبيتكم راح يظل مفتوح لخطاركِ، روحي إذا بقيتِ راح يضيع زلمتكِ لأن الورث صار باسمكِ، ما طولكِ موجودة ما راح يتركو تا يسيطرون عليكِ ويردون حقهم. -لا تتركيني تعالي وياي. -ما أكدر أترك ديرتي، ما ظل بالعمر شيء تا أتغرب، راح يظل قلبي ودعائي بكل فرض يترجاه ربي بسعادتكِ. سحبت إيدها بستها خليتها على قلبي كامشتها بين إيديا أحسها تمدني بالقوة.

تمر الأيام ولحد الآن بعدهم يدورون ما له أي أثر، ضاعت علينا هم يكولون مو يمنا وإحنا ما محصلين لا جثة ولا خبر بس، وكل يوم يكتشفون مصيبة جديدة مسويها بيهم وميدرون. فوق ما مضيع الورث، تارك وراه دين يكسر الظهر ويردهم لألف سنة لورا. حمدت ربي أمي موجودة وياي شالت مسؤولية الجهال هي ورويدة. أنا عيني بالفون وعين بالباب، خايفة بأي لحظة يدخلون يكولون: يلا، بين ما طلعت الجوازات وغسق حجزت لي عالفيزا روحي طلعت.

خبرتني بليل واتفقنا الصبح نروح للسفارة المقابلة، ضليت محتارة أباوع لعمتي شلون أطلع لأن شددوا الحراسة عالبيت ومنعوا طلعتي أبد. للصبح ما نايمة، ألف فكرة تجي براسي وأكول: ما ترهم راح ننكشف، لمن شفت عمتي من الفجر اتحزمت أخذت شكو ذهب عندها كالت: يلا كومي. سماهر: وين يمه موش كال أبوي ناي ممنوع تطلع لمن تخلص العدة؟ -أنتِ انكتمي بلا نفس، وأريد آخذ جهال ابني لأبو الجوادين يناظر بوجهم تا يرد أبوهم بالسلامة.

-المات ما يصحى ييمه راح. -راحت روحكِ أنتِ وهلكِ كولي آمين، يلا ناي عمة كومي وياي. -لا ناي تظل هنا، أخذي بس الجهال. -لا أشوف تجي وغصبا على الجبير قبل الزغير، قومي لج يلا. قمت عالسريع غيرت تركتها تتعارك وياهم وأسمع أصواتهم، صعدت لبست الجهال طلعت لكيتهم بعدهم، حسمتها عمتي بضرب سماهر على وجهها دفعتها على حسام لطمتهم بالباب. سحبتني طلعنا لكينه غسق جايبة سيارة صعدنا وياها.

موعدنا بالعشرة، رحنا زرنا وبعنا الذهب وطلعنا عالسفارة، كملنا شغلنا رجعنا عالبيت لقينا عمي أبو غيث وعامر واقفين بالباب، ومن جهة ثانية أركان وجود نزلنا، صاح عامر: لا الظاهر أنتِ ما تجين غير بالطك. أركان: كونك زلمة وتعملها. -رجاءً لا تدخل راح تصير حرم... بعده ما مكمل وأركان ضغط على أسنونه وراح اتجاهه عاصر كف إيده، ما أشوف غير بوكس بنص وجهه.

أخذت الجهال ودخلت ركض للبيت، اتلكتنا سهيلة وسماهر بالدعاوى اتولتهن عمتي، وأنا دخلت الجهال للغرفة، قبل لا أقفل الباب دخلت رويدة سديناها كالت: وين جنتي الجو احترك وراكِ. -رحنا نزور. -ناي وقت زيارة؟ ما تشوفينها عالقة وذوله عيالكِ ما ينجرعون، عامر مرتين انكتل. -حيل بوز مهاين ليش انكتل؟ -كال المرة ما تنعدل غير بالطك، وأركان كله هاي أنتَ كلتها وما عدنا حريم هنا غيركِ، سحله ركعه كله من يمي راسي اتفلش. -سماهر خبرتهم مو؟

-إي كالت لهم: لحكوا ناي طلعت أخاف انهزمت، تعالوا ليها محد يكدر يكضبها. -بنتي تركي اللهجة دمرتي أمها، صدك أشوكت تسافرون؟ -ما يرضى كرم كال: ما أتحرك لمن أمن على ناي. -كفو والله هذا الأخ الصدك مو مثلكِ بس تريدين تخلصين مني. -انجبي ناي والله أحبكِ وأخاف عليكِ أكثر من روحي، وأنا هم كلت له ما أروح لمن هي تمل مني تطردني. -وهسه صار وقت طردكِ. طلعت فوني اتصلت بكرم رن، رد: ها نانو أمري خويه.

-بعد أختكِ ما تجي تاخذ مرتكِ تره وگفت على قلبي. -ما أريدها خليها يمكِ طلعت ما تعرف تسوي دولمة. -ماكو إشكال، سووا أندومي وأكلوا عرنوص بين ما تتعلم. -شلونكِ ناي؟؟ نزلت دموعي. -شتكول أنتَ شلون؟ -والعذراء راح يرجع. -ههه كلكم تكولون هيج وأنا شايفة الغير. -غيث ما يتركنا هيج ورا أخونا ونعرفه أكثر من أرواحنا. -وهذا طلعتوا ما تعرفوه وتركنا، المهم اليوم تاخذ رويدة لبيت غسق حجزت لها بالسفارة. رويدة: ما أروح ناي لو أموت والله.

-لا راح ترحين حتى نسافر سوا. كرم: الله عليكِ راح تسافرين؟ -هو أنا رايحة بس شوية تعديل بطريقة الكلام مكان ما أسافر انهزم. اجاني صوت جود وهو يكول: هسه أمنت عليها يعني ردت طبيعية. -ها جود شقصدك؟ -بعد أخوكِ ما أقصد شيء. -لا قصدت وما طول هيج حجيت حجز السيارة عليكِ. -تأخذيهن من عيوني بس ديري بالكِ تره مو سهلين يكمشوكِ وقتها حتى أطفالكِ ياخذوهم ونكول صدك راح غيث بعد ما يرد.

-ما حاملة همهم، هنا أكدر أدبر روحي بس هناك محتارة شلون راح أدبرها. -لا هيج زعلت منكِ. كرم: ناي والحمزة بس تعالي حتى شغل ما نخليكِ تشتغلين، أنا وجود نشيلكم فوق روسنا، والعذراء لو توصل نوكلكم من لحمنا ما راح نقصر. -لو ما أعرف وراي أخوه ينشد بيهم الظهر ما تحركت. جود: ناي شلون تطلعين؟ -اتفقت أنا وعمة راح أقدم موعد العمرة حتى نطلع بنفس اليوم، لأن راح يكونون مشغولين بيها. -تمام يم غسق الخبر الحجز مو؟

-عاد أنتَ بس تريد تتصل بغسق خوش حجة. -يلا هي شلونها عاد نفس الخبال؟ -جود سوي لها عرس لا تاخذها هيج خطية. -هنا؟ -ما طول كلت هنا يعني ماكو، تره صاحب الهينة تخلى عنه وطفر ما يستاهل كل هالتضحية. -روحي ناي يلا وهدئي أبوس إيدكِ ما نريد مشاكل بس هالايام تمضي وتصير سوالف. -وأضيفها لكتاب مسيرت حياتي. أسمع حسرته ضحكت وغلقت الفون. رويدة: ناي أقدم وأظل يمكِ والله قلبي ما ينطيني أترك الجهال. -ما عليهم أنا يمهم، كم يوم وألحككِ.

-لا ما تكدرين لهم وحدهم، وهذا عاشق باوعي شلون يتلاصص إذا واحد حاجاكِ راح يفشخه وتالي ينضرب. -كون صدك يضربوه وروح أبوي أحركهم. -ميخالف أظل يمكِ قبل السفر بيومين أروح، وهم أخجل من بيت غسق أحس روحي غريبة عكس هنا أحس بين أهلي. -على راحتكِ يا عمري، لعد غيري لهم وغديهم لأن تعبانين حتى ينامون. عاشق: أنا أريد ألعب طوبة ما أنام. -أنتَ لو تختفي مثل أبوكِ كان عشت بخير.

-عجل منهو يدافع عنكِ صدك ضايع الخير بيكِ، أنوب من يتكاونون أهفهم بطابوكة وحدة تكفي. -يلا بالله يعني ما يصير تصير مثل باقي البشر، بس أريد أفتهم على من طالع هيج ماذي؟ رفعت راسي لكيت غسق تباوع لي صفح، ورويدة فاتحة عيونها. حكيت شعري أضيع الحجي، اندكت الباب فتحتها لكيت لحن عيونها حمر. -شبيكِ من وياكِ؟ -ناي فدوة أروح لكِ اجه عمي أبو شاهين وطالبكِ، لا تردين عليهم والله يأذوكِ، أركان ما يكدر يرد عمامي.

-خايبة طيري أنتِ وعمامكِ، الأكبر منهم سحلتهم ذوله الحثالة ما كدر لهم، وهاي أنتِ تبجين لخاطر هيج؟ -ناي بروح عاشق. -لحننننن كم مرة كتلكِ لا تجيبين طاري؟ -روحي اتعاركي بعد حلفتكِ أنا. دفعتها ورحت لكيتهم برا واقفين وعامر خشمه عاصره بالجفية، شافني عمي كال: تعالي أوقفي هنا تا نفهم، وأنتِ وين تصفى وياكِ؟ -ليش دتحسسني أسيرة يمكن تره مو من حقكم تحبسوني ولا لكم حكم علي.

-لا النا حكم ونجسر راسكِ هم، ما طولكِ من حريمنا تصيرن مثلهن ما تتحركين غير بشورنا وما تطلعين بدون محرم، اللي كان مسيبكِ راح. -همم حلو يعني دتكول أترك شهادتي وأتنازل عن وظيفتي وأعيش تحت رحمتكم للخدمة بس؟ عامر: إي عجل شرايدة؟ نخليكِ تفرفرين براحتكِ؟ غصبا عنكِ تركدين ونفس ما نسمع لكِ، وإذا تحركتِ رجليكِ نكسرها. -ليش متخيلين المرأة مخلوق ضعيف وعايشة بس حتى تخضع لأوامركم؟ -لأن ربي خلقها بهاي الصورة.

-هاي بنظركم بس خلي أنطيكِ نصيحة، لا تستهانون بقوة ولا مشاعر امرأة، لأن إذا غضبت ما راح ترحم أحد. يقول الإمام علي عليه السلام بأحد المعارك: (أتيتكم برجال يحملون قلوب النساء) تدري ليش؟ لأن يدري الله خالقهن بقلوب حجر وقوة ما يعلمها غيره. أبو شاهين. -نصايحج توفّريها الج، وبعد طلعتج اليوم ما تضلين هينَة، تجين ويانا. -وأني كلت شرطي وأنتم وافقتوا، أتصور عيب زلم مشايخ يردون بكلمتهم. -وحنّه كلنا ما تطلعين، وإنتي جسرتي كلمتنا.

-ما رحت مكان، رحت زرت وهم كل فترة أروح، وابن أبو الـ.. يمنعني. عامر: إنتي هم حاسبة روحج مرة وكاعدة تحجين؟ -لذالك أنت تسكت من يحجون الرجال. أني حجيتها وهو شمر الجفية، إجاني سحبني أركان خلاني ورا ودفعه من صدره كله: ويين يول؟ -أركان كاعد تسمع؟ -ما سمعت غلط بشي، عجل هم حاسب روحك زلمة؟ بالقرآن أزغر جاهل عدنا بشواربك. -هاي بعد ما تطلعين وحجاب تلبسين.

-أتخسى واحد مثلك يفرض رأيه عليها، الأكبر منك ما جبره يجي، أنت حلگك يلزگ تريد تكضبها بعد لغادي لأدفنك. أبو غيث: الشهادة عالأسبوع تطلع، باجر ترحين ويانا تسوين وكالة لأبو شاهين بالأملاك تانشتغل، عش ضال الشغل واكف. أبو شاهين: وعش ما تجين ويانا فرد مرة؟ ما فارغين رايحين راجعين وضالين كاضبين حراسة عليها أربعة وعشرين ساعة. -ها شكلتي يبه تجين؟

-لا ما أتحرك، شرطي واضح من البداية، وحتى وكالة ما تصير قبل صدور شهادة الوفاة لأن لحد الآن بالنفوس حي، ما يصير أتصرف بأملاكه قبل إعلان وفاته. عامر: أملاك منهو؟ صدقتي روحج؟ تراهن أملاكنا وهو زوّر وذني كلهن ترديهن ورجلج فوك راسج. -ما راح أرد مولان ما أعرف لو خايفة، بس أتعلمت تجاهل السخيف أكبر إهانة. ضغط على أسنونه راد يتحرك، كمشت ظهر أركان خزره بطل. همس أركان: أركدي وكضبي لسانج، لا أندارلج أني أحطم وجهج.

-أحميني لا تتحرك من مكانك. -يولي بالقرآن إذا ضليتي تهترين أهفج دفرة أجيبج عدل بحضن الي نعل هلي بيج. ضربته بوكس بضهره، مسح وجهه وأخذ نفس، أتخصّر يباوعلهم بيأس. أبو غيث: يعني ما راح تجين اله دحگين الشهادة؟ عجل سمعي الراح أكوله، هذا آخر إنذار الج إذا تحركتي من الباب مرة ثانية ناخذ الجهال غصبًا على أكبر راس بعشيرتج.

أبو شاهين: وإنتي بويه سماهر تضلين هينة إنتي وسهيلة ما تتحركين، وحسام والشباب بالباب بس تتنفسين تخبرين الولد لا تغفلين عنها، وإحنا ما نطوّل للأحد بحيل الله تطلع ورقة وفاته، كونها تعترض وما ترد ويانا وقتها نعرف شغلنا وياها. سماهر: تامر يا عمي بعون الله ما تبطي وتتعرقل بيدكم الشغلة ونرد حقنا من الغرب. طلعوا وأركان وراهم راح يزتهم، ضلت سماهر تباوعلي بشماتة. ضحكت. -عش أتضحكين على أصخام وجهج؟

-لا عليكم والله، شوف ربي شلون فرها بيكم، صدك جذب بدون تعب زط بط أملاككم وأحفادكم تحت سيطرتي. -ما يطوّلن كثير، كلها أيام وكلشي يرد مكانه. -صدك هيج إختفاء غيث ما فارق وياج؟ -أخيي أخذ نص حيلي بس من أذكر خلصنا منج وراح تصير بأسم واحد تستاهلي يبرد دمي. -مم هم صح صدك، ما بشرتيني بتج دخل عليها رجلها لو خالها بس للشغل؟ -شي ما يخصج. -هاا يعني راكنها حالها حال القندرة الرايح موديلها؟

لا والنوب حتى بيت ما عندكم منتظرين أني أحن عليكم وأنطيكم مكان تعيشون بي. أووف يا غيث ما أعرف أترحم عليك لو أكول ربي يطوّل بعمرك على هاي الشغلة. -ربي ياخذج. -ههههههاي، والورث يروح لماما، والنوب تصير مكافش بين أهلج ياهو اليتزوجها أسرع، أستغفر الله ربي. -هانت يا بنت المسيحي، كلها أيام وتردين تحت رحمتنا إذا ما طلعت شكو فاينة من عيونج ما تسمى بت أبوي.

راحت دخلت وأني رحت للحديقة كعدت بالمرجوحة، حركتها برجلي، هزيتها وغمضت أحس برودة الجو تدخل بريتي، عقلي يجمع ويطرح يحزر ويحل وحده لمن فززني صوت المي. فتحت عيوني لكيت أركان فاتح بوري الحديقة يغسل إيديه من دم عامر، خلص كام نكثهن عليه كالب وجهه. -أريد أخذ علي وأروح لكبر شاهين. -بسج مشاكل، تراج تعّلتي أبو أمي. -تره من حقه يزور أبوه ويتعرف عليه حتى لو جان ميت، بس راح يحس بقوة. -مكتفي بيج ياااا يا حرمة أخوي.

-هههههه ياهو منهم ممكن أتحدد؟ -حددته بزيارتج لضريح الشريف اليوم. -تره صدك رحت زرت. رفع حاجبه. -تره عيب، ربي كائل بكتابه إن كيدهن عظيم، وتريدني أروح أضيع روحي لخاطر واحد مسجل غلط بالهوية ذكر. إجه دفعني دناني كعد يمي، أخذ حسرة ودنك على رجليه اتجه. -وينه؟ -ما أعرف وداعت لحن، اختفى مالو أي أثر، ناي بداعة الخوة شناوية تعملين؟ -الحياة متراهنة تجيب راسي للكاع. باوعلي.

-أحسها تختبر صبري بطريقة بشعة، ما كلك عندي إعتراض على قسمتي، بس حضي دمرني. -الله كريم تفرج. -كلتها من يوم الطلعت من هذا البيت، مرت أشهر وسنين بس ما شفت حرف واحد من الفرج. -طلعوا شهادة الوفاة وإذا ما رحتي وياهم راح ياخذون علي. -محد ياخذ أبني غير واني جوه الكاع. -راح يعملون تحليل ويضيعوج. -هذا ابن أخوك ليش أحسك هيج ضعيف؟ -أخوتي كسروا ظهري، كل واحد راح بجهة وجبرني أعيش بعدهم بس حتى أحمي جهالهم. -سويتو الفيزا؟

-من زمان بس ما أكدر أتحرك. -ليش؟ -لا وتحجي بكل صلافة، لأن حضرت جنابج الكسيف أغفل دقيقة تعملين فاينة أكبر من جهامتج، يولي بالقرآن خليتني أفر بذاناتي محتار شلون أكضبج. -شوف شلون ظالمني. -ناي كومي لأهفج دفرة. -أتصور أنت بيتي وكاعد على مرجوحتي بس أضل أني أم الأخلاق. -أنعل أبو أخلاقج لأبو اليوم الجابني عليج. إحنا نحجي واجت لحن كالت: شكو صوتكم وين واصل؟ هم تتعاركون؟

-تعالي سمعي زوجج شيريد يسوي حضرته، يريد يتزوج يكول أتورطت أختج فاهية وثولة بس ما أكدر أطلقها لأن حامل. -صدك أركان؟ -لبالج بس هيج؟ لااا يكول طفلة وبياضها مقزز جنها ملاك متيه موقعه. باوعتله وبرطمت. أركان: يولي تجذب. -أحلف أجذب وما كلت ثولة وفاهية بغلاة أمك؟ ما كلت جنها طفلة؟ عصر وجهي وحجه من بين أسنونه: بالقرآن إذا ما نهجبتي ونكتمتي لأفلق راسج. هزيت راسي أي، دفع وجهي وراحلها، كمت بسرعة.

-شفتي شلون ضربني، كال كله أنعل الساعة الورطتيني بيها. إندارلي طفرت رحت ركض جوه، خليته يتوسل بيها وهيه كل عقلها تبجي. دخلت لكيت رويدا واكفة يم عمتي تترجه بيها وعمتي زعلانة، رحت يمهن أشرت شكو. رويدة: والله ما جنت أقصد ناي، كليلها شكد أعزها وشلون حاسبتها أمي. عمة: لو جنتي حاسبتني أمج ما تردين إيدي. -خالة والله أعرفج ما تقصرين وحاسبتني بنتج، بس إنتي هم ما عندج. -ولج بت الطركة، شاكيتلج؟

كلتلج ذني كم دينار تسوين بيهن الورقة مال السفر وتجهزين روحج. -عندي كلشي، وفلوس الفيزا دبرهن كرم. -رويدة لساني بعد ما يخاطب لسانج، ولي من يمي. -لاا فدوة أروحلج، كلشي ولا إنتي، راح أخذ فلوس الفيزا ميخالف بس ذنيج هواي إنتي بعازتهن. -المن رايدتهن غير لبنياتي؟ عجل إنتي موش حالج حال ناي، وأني بنتي ما تطلع من بيتي إذا ما أكون مجهزتها أحسن جهاز. -والله عندي كلشي والشي الي أعتازه بعدين أشتري.

-رويدة يمه العروس إذا عتازت تكسر روحها وتطلب من زلمتها لو تروح لأمها وهيه مرفوعة راس. -أكيد لأمها. -عجل أني منهو؟ موش أمج؟ أخذي يبعد أمج، تاروح اليوم أجهزلج كم شغلة تاخذيها وياج. باوعتلي أشرت أخذي، مدت إيدها خجلانة أخذتهن وحضنتها تبجي. سكتها صوت غسق ورانا داخلة وهيه تغني: مريت بديار الولف لأن ولفي غايب. عمة: أيي الله جابج كربي أم الولف. -هاا خالة شكو؟ والله ما سويت شي، خلصت شغلي بالمحكمة وعدل على بيتج. -عجل عش خايفة؟

تعالي ما أطكج. -ناي سمعتوا شي؟ صاير شي؟ هزيت راسي بلا. اجت وهيه خايفة تحامي بإيديها، وصلت يم عمتي جرتها من أذنها كالتلها: عش وراه الزلمة وراج؟ -يا زلمة منهم؟؟ -لاا النوب كثرانين زلمتج يولي. -ما حجيت ويا والله. -عش رايحلج وطاردتيه؟ -كذاااب والله ما طردته، آآآ أذني عمه. -وعمة التعم عيونج كولي أمين. -يمه اسم الله عليه أن شاء الله هو.

-إنجعلج بالخرس يا المصكوعة، غسقان الولد باجر يجي لأبوج تا يحدد موعد زواجكم، إذا رفضتي موش بس أذنج أفلقها لأراسج أبعده عن جسمج. -عمه ما يرضه يسوي عرس ترضين؟ وخرت إيدها وعيونها لمعت. -والله آسفة ما قصدي، بس كلتله أنتظر ليش مستعجل، من يرجع ونتزوج بس هو مصمم اله هسه. -يمكن ما يرد يجوز صدك، تخلي طول عمري مناطرج ييمه، إرضي بقسمتج، أني ما يهونلي تنكسر فرحتج بس ما أكدر أضغط عليه، هو هم رفيج عمره.

-أدري والله تره غيث أخوي قبل لا يكون جود زوجي. -عجل لخاطر غيث ما يرضه هيج، رفيج دربه متعذب، إرضي بي ييمه يحبج خطية، وداعت عاشق لو ما روح أني وآكله يتزوج ما جان إجاكم بس أني ضغطت عليه تا أأمن أدز أحفادي بديكم. -هاي هيه مثل ما تردين، زواج مع وقف التنفيذ. -إن ما لج بالوجع، ولج بت الصكعة، إنعدلي لا أعدلج. -شبيهج؟ عود أنطي بوسة كل يوم، غير هيج مالكم يمي. -تفوّ ما تنعدلين، منهو رفيجتج؟ أمداجن ما يصير براسجن خير.

رفعت حاجبي أشرت تعالي. رجعت ليورا ما عدها مانع تركع راسي براس غسق، غمتني وراحت للمطبخ. ضلينا بالغرفة نسولف ونرتب بأغراض رويدة حتى نعرف شتعتاز، أباوعلها ما مصدكة فرحانة وهيه إتباوع الفلوس بيدها، عمتي هم ما مقصرة خوش غمده مطيتها. دخلت لحن شفايفها منفوخة تمسح بوجها كالت: أساعدجن؟ غسق. جان: ساعدتي نفسج وخلصتي روحج من حصرته؟ ولي، انتِ شلون تدخلين علينه هيج؟ ترا خجل. هييي، ليش تحسسيني داخلة غرفة نومكم؟

ترا جنتوا بالحديقة. روحي كليله نعرف بيه زلمة وبطل بهيج سوالف، بس خلي يدور مرة ثانية مكان بيه حظ يحصرج بيه، ترا اكو عالم الجفاف كاتلهم. رويدة: عزّه! شفتيهم؟ أنا هم البارحة شفتهم. أي لعد شهمهم؟ تقول عتوي تشرين، وين ما حصل مكان حصرها، ولا تقول اكو عالم وياهم بالبيت. ناي طرديهم. لحن: انجبي، ما يسوي شي بس يبوسني. وهاي قليلة؟ ناي، ترضيها إحنه عالم محرومة وهي تتنعوص وتدفع بيه حتى يبطل عنها؟

والله صعدت عندي، اجيت انطيج راجدي وأثبتج بمكانج مال المرض، ليش تشلعين كلبه؟ وهو قصر عالأساس؟ شوفي خدي وانتي تعرفين قوة الراجدي. وبعدين انتي مو عندج رجل، شكو تحسدين؟ وينه هااا؟ وينه؟ اشو ضحكته بالمثاقيل من كثر الثقل يحسسني راهبة كدامه. عن حلفت الله مرة كمش إيدي وكلت هاي اتسهلت راح يدخل بالغميق. رويدة: أي وشنو سوى؟ الله وكيلج، رفع إيدي اشتمها باسها وصفن بوجهي، خلاني اشك بروحي ماكلة ثريد واشتم زفرة.

حلفي ما أكلتي باجة بيومها؟ غسق: ناي، آخر مرة أكلنا باجة شوكت؟ انعل شرفج فضحتينه! بعد كليلهم ناكل بصل أخضر ولطمي بالأنوثة. أي والله مشتهية سمج زغار جوه الشمس وبصل أخضر. لحن: أنا أسويلكم هسه، أقول لأركان يجيب. انداريتلها: وليش أركان؟ كولي لحسام، وإيدج أكسرها إذا سويتيها انتي. خلي الخدامات اللي خاليهم حراسة عليه يسوون. أي والله، همزين اجن، أقلها شالن الشغل، خلصت.

غصبًا على أبوهن، وإذا شفت البيت بيه أثر وسخ أمسحه بروسهن. يلا روحي قبل لا يخلص الظهر، خلي نلحق عالشمس. راحت وأنا رجعت أرتب بالغراض، همست غسق: ناي، يقول جود نروح طيران. لا، سيارة. ليش؟ خطية ما عنده، وإحنه أربع نفرات من غيركم. تمام، شوكت؟ ترا الفيزا ما تتأخر. بيوم اللي تروح عمتي للعمرة حتى أكدر أطلع. اندعي هسه كون تطلع قبل لا تطلع شهادة وفاة غيث. يمه اسم الله على كلبه، إن شاء الله شهادتهم قبله. كل عقلهم ذوله؟

باوعتلها بكسرة: غيث يحبج أكثر من أنو يجازف بالموت. لعد وينه؟ مو خلصت روحي. ولج حتى اشتياق ما ألحق أحس بيه من كثر خوفي لا يجي الوقت وأشوف صدق جثته كدامي، وياخذون أطفالي. محد ياخذهم، ما ضل شي راح تخلص. بس عينج بسماهر، ترا مراقبتج أربعة وعشرين ساعة. من دخلت لكيتها تتخطى يم الغرفة تريد تسمع شتحجون. طبعًا لأن أملاكهم كلها يمي، إذا صارلي شي يروحون بالرجلين. أوف، بس أتمنى أشوف شكلهم من تنهزمين.

اندعي كون لا تشوفين شكلي وهمه ياخذون أطفالي قبل لا أسويها. يلا رويدة، ذني كملن، سدي الجنطة وانطيني الثانية، أرتب الغراض الباقية حتى باجر ترحين ويه غسق تشترين الباقي. كمت أحسب للأيام بالساعات. بليل عيني ما تاخذ النوم، أسهر على فيديوهات غيث وصوت ضحكتها، وآخر كلمة تردد بالي: "مناطرج بنفس المكان". وبالنهار ويه الجهال كامشة حراسة عيني بيهم، خايفة بغفلة ينوخذ علي مني.

طلعت الفيزا بس ما أكدر أتحرك لأن البيت محاوطيه وكل يوم جاينا وتكَب عركة للستار ويه أركان، واللي يوكع بيها عامر ينكتل. لحد يوم بيهن فلتت أعصابه على أبو شاهين، خنقه لأن جاب شهادة وفاة غيث بيده وأعلن موته. من يومها وعمي قرر أروح وياهم لو ياخذ الجهال، بس عمتي اترجته ينطيها يومين بيوم اللي تسافر ياخذنه حتى لا ينكسر كلبها.

كعدنا من الصبح، رتبت جنطها وأباوعلها ودموعي تنزل. ما أعرف شلون راح أفارقها بس ما عندي حل غيره. بيوم وليلة حسيتها هي أمي. سماهر لمت غراض الجهال وملابسهم، صعدوهن للسيارات. خذتهن سهيلة وراحت ترتبهن يمهم. عمتي كاعدة يم ماما، خالة الجهال بحضنها تبوس بيهم، مكتفية تباوعلي وتبتسم. أعرف كلبها ينزف من القهر، مو سهلة عليها بس فضلت سعادتي على نفسها.

لتالي الليل صار وقت روحتهم، صعدوا جنطهن بسيارة أركان. صحت لحن اللي جانت تبجي بهدوء، اجتني، دخلت قفلت الباب، كالت: ناي لا ترحين. هاي بيدج حلها. شلون؟ والله أفديج بروحي. تسوين روحج متخربطة وما تخلين أركان يوصلهن، كون الحرس. ليش؟ راح أنهزم. شهقت، سحبتها لحضني: ما راح أروح، بطلت. لا روحي ناي، ما عليه أنا. كافي خلصتي عمرج تركضين لخاطرنا، بعد انتبهي لروحج. مو هينة عليه أترككم بس دتشوفين.

ولا أنا أكدر أعيش من دونك، تدرين مرات أحس بروحي أحبج أكثر من أمي. روحي ناي، ربي يكتبلج بكل خطوة سلامة. حضنتها، أخذت نفس طويل منها. ندكت الباب، مسحت دموعي، فتحتها دخلت عمتي حضنتها وبجيت. وخرت عمتي، كمشت وجهي همست: أريدج قوية وتحافظين على روحج كبل بزرتج. لا تكطعين بيه. أجيج يعمه، بس روح من هينه ولا تطخين راسج للأنحاس، أخذي حقي وحقج وحق ابني منهم. ديري بالج على ماما، هاي أمانتي يمج.

أخليها بعيوني، لا تخافين. وبيتج يظل مفتوح بجاهج وخطارج، نستقبلوا بريحة أبوج. بس أستقر أدز عنواني حتى تجيني. ديري بالج على روحج يعمه، أريدج قوية مثل ما عرفتج. هزيت راسي ودموعي ما ترضى تبطل. دخلت سماهر صاحت: شكو يمه؟ ترا تأخرتي راح يطر الفجر. لحن: ما أعرف شبيه بطني، دتوجعني. ياع شبلاج؟ هسه ما بيج شي. فدوة صيحي أركان، أخاف هم أسقط. لج ناي، لحكيني. راحت تركض تصيح لأركان، وأنا كمشتها وديتها للاستقبال، خليتها عالتخم.

دخل أركان قال: شصاير؟ ما أعرف، بطنها دتوجعها. أكيد إذا ما تستجن وتركد دقيقة وحدة. كومي آخذج للمستشفى. لا خليها هسه بلكي ترتاح، إذا تعبت أكثر آخذها. عجل شلون؟ منهو يوصلهم؟ عمه: ما علينا عمه، خليك يم حرمتك. إحنه الولد يوصلونه، أهم شي البنية إذا سقطت هالمرة ترا يصعب حملها بعد.

ضل محتار عينه بلحن وعين بعمتي، هي تقنع بيه ولحن تبجي خايفة. كوه قبل أركان يخلي الحرس يوصلوهم. راح زتتهن. أنا ما كدرت أطلع، أصعب شي بالحياة عندي هي فقرة الوداع. خذوهن الحرس وهو رد يم لحن. تركتهم كمت طلعت وسديت الباب وراي. رجعت صارت غرفة عاشق كدامي. فتحتها ودخلت. ما كدرت حتى أباوع بيها بس فتحت الجرارة أخذت الفرجة والطوبة وطلعت قفلتها وراي. رجعت للغرفة، الجهال مغيرتلهم سماهر. ضميت غرض عاشق بالجنطة وغيرت ملابسي.

كالت سماهر: مالج نية تلبسين أسود؟ ألبس أسود على واحد عايش؟ وين صايرة؟ هم كالت عايش ورايحة غادي. أقلها بس كدام العالم وهذا بنطلونج ما راهم. هذا الموجود، ما عاجبكم ما أروح. مو هي بكيفج، ترحين غصبًا عنج. وباجر تروحون تسوون وكالة بكل شي، حضروا الأوراق والمحامي. سهلة. اشو مستهزئة؟ سماهر تعبانة وروحي خالة، أريد أنام ساعتين حتى أولي وياكم للمهجوم بيتكم، بلكي تطلعين منا.

هذا لسانج هينة، ما ضلوا كثير وينبتر. وانطمري ساعتين وأكعدج تانرد لعزوتنا بدل الخرابة اللي كأنها وجهج الكاعدين بيها. كوه سكتت، ما أريد تتطور وأخرب كل شي. أول ما طلعت قفلت الباب. اتصلت بغسق، أول رنة ردت: وينج يمعودة؟ استوني خلصت، شوكت تجين؟ صار ساعة واقفين أنا وجود براس الشارع ويه بابا. تمام، بس ينامون ما أطول. أول ما أرمش عليج تعالوا للباب، ما أكدر أمشي بيهم كلهم سكارى من النوم. أوك، جود يقول حسام بعده بالباب.

هسه ينام، زتت جدته ما يطول. يلا ولي لا أحد يسمع. سديته وراحت كعدت عاشق، أشرت اشش. عجل عش مكعدتني؟ عاشق، اسمع شراح أحجي. بس يصير الصبح راح يجون أهلك ياخذوك. محد ياخذني منج، غيث قال ضل يم أمك احميها. ما نكدرلهم، أبوك ما هو يحمينا ولا أنا أكدرلهم. عجل آخذكم وأنهزم. هسه أقول صدق أنت ابني. عاشق، راح أعتمد عليك، أنت الجبير. كولي يولي، شأعمل؟

راح أكعد علي، تكمش إيده وتركض للشارع، تلقى هناك جود منتظرك. تصعد وياه بس عينك بأخوك، أخاف أحد يتعرضلك بالطريق لا تخليه ياخذه منك. لا تخافين، كدها عجل. وأنتي وهيا؟ بس ينامون الهوش اللي عدنه، أجيب هيا وأجي وراكم. هز راسه بأي. كعدت علي، أباوعله مبرطم نومته عزيزة. خدوده نازلة كمشتهن وبسته. خلى راسه بحضني. يلا ويلوموني شلون سويت هيج لخاطره. كوم ماما علي. نعسان.

ضليت أحجي وياه عالكيف، بس بجى خايف عكس عاشق واقف بالباب مستعد حتى يتعارك مو بس ينهزم. كوه هديت علي وكومته، لبسته حذائه وعاشق ما قبل أدنق على رجلي لبسها هو وكمش خدودي باسني، ضحكني. كمت طلعت لكيت سماهر سوتها تتحوص متمددة بالغرفة تريد تنام، صاحت: وين ناي؟ الجهال تريد للحمام، قومي وديهم. عجل شبيه مكسرة ما توديهم أنتي؟ امشوا ماما. بس بالاسم عدكم أهل.

أحجي وأندعي عيني بالباب، أخاف ترد بكلامها وتقوم. الحمد لله ما اهتمت للحجي. وصلتهم للحمام البره، فتحت الباب عالكيف، تأكدت حسام ماكو. أشرت لعاشق: يلا. كمش إيد أخوه وركض. قريت آية الكرسي ونفختها وراهم. سديت الباب ورجعت جوه. طبقت باب غرفتي حيل حتى تتأمن رجعت. اتصلت بغسق، رد جود: الله يلعنج. أخذ الجهال واسكت. أويلي كون ألزمج هسه وأعلمج شلون تطلعيهم بليل.

أدري بيك ما راح ترضى وراح تجي، وإذا سمعوا السيارة كلها تتطافر، هيج أحسن شي. ولي عن وجهي، طيح الله حظج. سد الفون بوجهي حتى ما خلاني أكمل. لبست هيا حذائها. انتظرت نص ساعة، فتحت الباب عالكيف، هدوء ماكو أحد، مبين خمدوا. رديت شلت جنطتي على متني، شلت هيا طلعت عالكيف. وصلت لباب البيت، فتحته وأشوف حسام كدامي. وقفت متصنمة ما أعرف شكول. غلبني وقال: يلا استعجلي قبل لا يكعد عمي. فتحت عيوني على كبرهن:

مو وقت صدمات دخيلج، استعجلي هسه عمتي تكعد. حتى الكلام اختفى من لساني هنا، ما أعرف منو صديق ومنو عدو. طلعت أمشي بكل سرعتي وصلت للسيارة، فتحت الباب غسق صعدت سلمت. انطلقنا. كلتلها: ما تعرفون منو شافني؟ جود: حسام هو نفسه اللي جاب الجهال لهنا. هذا أشعده وشعرفه أريد أنهزم.

أكثر واحد وكف بجانبه وساعده غيث. من شاف الجهال طالعين عرف راح تنهزمين، تراه مو شهامة بس راد يرد لجداده اللي سوى بيه بدل ورثه اللي حرموه منه وزواجه من بنت سماهر. وين رايحين؟ بعد هواي عن السفر. نروح أي مكان بين ما نخلص الوقت ويجون كرم ورويدة. انطيني هيا، نيمي علي مكانها. أخذ هيا ونيمت علي. ضل عاشق خالي راسه بحضن غسق. أكثر من ساعتين ونص نفتر بالشارع حتى نخلص الوقت. أباوعلهم وأحمد ربي بيهم.

حفلة عرس ما سووا بسبب اللي صار. أصلاً حتى لحيته طولانة وحالته تعبانة. خالي هيا على صدره يبوس بيها وخايف عليها تقول بنته مو بنت صديقه. طلع النهار، رحنا للمنصور. وصلنا للسيارات، نزلنا. أخذت الجهال رحت للسيارة، تركت غسق تودع أهلها. صعدت الجهال صار كرم كدامي كاعد. عيني لا إرادياً اجت على المكان اللي تعرفت بيه على غيث. باوعت بكسرة. حسيت إيد على ظهري، انداريت. جود ابتسم وأشر: يلا.

أخذت نفس ودخلت كعدت الجهال، حاجز لهم مفرد بالجهة الثانية. وأنا حجزي بالنص بين جود كدامي وكرم وراي. حطيت هيا وكعدت. خليت راسي عالكرسي، عيني بره. الضو توه يطلع ونسمة الهوا الباردة تدخل بالقلب. رغم برودها ما هودت الجمر الموجر بقلبي. وينك؟ كلتها وغمضت بيأس. خليت إيدي على كلبي أريد بس أحس بنبضه. تعدى الوقت، بلشت العالم تصعد والشمس دخلت من الجام. كمت أعدل البردة وأشوف بره قريب عالسيارة.

غيث لابس كاسكيته على ظهره جنطته، باوعلي وغمز.