رواية لبوة على شفا الثار الفصل الخامس والستون 65 - بقلم Leo Alfatlawi

لانك أتيت في الوقت الذي رفضت به الحب، أحببتك أكثر مما ينبغي. ***ناي*** أباوع لغيث، لابس كاسكيته وعلى ظهره جنطته، باوعلي وغمز. أريد أنزل بعد، ما أعرف. رحت ركض وجود وكرم يصيحون وراي، طفرت الدرج طفر، وصلت يمه ضربته بكل قوتي. فقدت، قمت أضرب وأصرخ بوجهه: "الله ياخذك، نسيت حتى اكو عالم يمي، حس بغير حرگة گلبي." ما تحرك ولا منعني، لمن تعبت سحبني لحضنه، عصرني، شهقت: "ليش هيچ سويت بيه؟ "لخاطر متنزل دمعتج على ولدچ."

"ما أذيتك اني، ولك موتتني وراك." ضمني حيل، خلت راسي بصدره وأشهق بقهر ما أعرف فرح، مشاعر مختلطة. دنگ أخذ نفس طويل وباسني، همس: "يكفي يولي وعمه السادة، أضعاف المريتي بي صابني." "لو جنت تحبني صدگ ما تركتني بين أهلك، ولك دمروني." أركان: "بالقرآن اتجذب." وخرت، انداريت لكته واكف يورث بجكارته يباوعلي رافع حاجبه، جريت جنطة غيث، رحت ضربته، صاح: "اني شكووو خبله؟ "الله ياخذكم، تگول ما أدري مووو؟

رجعت ضربته، كمشها جرها من ايدي يضحك، رد سحبني غيث لحضنه. جود كاعد نص كعدة، كامش راسه، ما مستوعب، وكرم واكف دموعه تنزل، باسني من راسي، وخرني فتح إيده وأشرلهم: "تعالوا." اجه كرم حضنه وبجه بصوت، دگدگ على ظهره، وخر مسح دموعه، رد حضنه يضحك. بعد عنه وراح يم جود مد ايده، كله: "گوم." جود: "انعل أبو الصداقة يا أخي، بعد غيث من هالساعة ما أريد أعرفك بعد." "گوم يالناگص، تتزوج وأخوك ميت."

"ابن الكلبببب، إذا أنت مخلصها علينه سجن وموت." ضحك وجره گومه، حضنه حيل، واندار لغسق: "مبروك خويه غسق." "الله ياخذك، مو متت، شرجعك؟ "ول يابه، هذا لسانچ ما يبطل هتر." "من أخلص منك، من أنت عايش بجهنم، ليش خليت ناي هيچ وراك تبچي؟ أركان: "وداعت أبوي ما نزلت دمعة." "أنت الثاني هم انكتِم." "ول جود، اگضب حرمتك لا أفلش راسها براسك." "بس جرب وشوف شسوي، يلا ناي خليّنا نروح، مو كتلك عار ما يموت."

غيث دنگ حك خشمه، وأركان يباوعلها رافع حاجبه، وهيه منطلقة بالتجاوز محترگ گلبها. نزل الكابتن كال: "يلا راح تتحرك السيارة." دگدگ جود على متن غيث، كله: "الحمد لله على سلامتك يخوي." "رفيج الدرب ما گصرت والنعم من أصلك." "يلا يابه خليّنا نصعد بعدين نتعاتب، وكل الي اله حق يم الثاني ياخذه." راحوا صعدوا واني بعدني واگفه ما مصدگه، رد يكمش ايدي، دفعته. "خلّينا نروح واني أفهمچ وين جنت." "أنت فضلت الفلوس علينه."

"لو بحال الفلوس ما خليتهن تحت أمرچ." "تحچي بكل برود ما تدري شصار بيه وراك." "أدري حتى شكد عدد الدموع النزلت من عيونچ." "وهيچ دموعي عندك هينه؟ "لأن أخذت حق كل دمعة حظن دموع ناي، السيارة راح تتحرك، خلّينا نروح." "وليش حتى أروح أضحي بأهلي لخاطر واحد مثلك؟ "لأن اني حبيبچ وهذا گلبچ ما ينبض بدوني." "للأسف توقف من زمان." "ما توقف ولا لحظة، كلما جاي يزيد دگاته." "غلطان."

"الغلط بيچ موش بيه، گلتلچ مناطرچ نفس المجان بس ذكائچ مبين ما تراجع." "أكيد يتراجع من كثر مصايبك وطياح حظك." "دحگي يولي حتى لو أذبحچ هسه محد يحاسبني." "أكيد لأن حضرت جنابك ميت بنظر الحكومة." "عفيه، لذاك نصيحة، گضبي لسانچ تاما أفلعه من أصلو، ويلا گدامي الاستغفر الله تحركت." دفعني گدامه، انداريت، ضربته، كمش إيديه، ضحك وجرني للسيارة، صعدنه يسحل بيه واني أتماطل أريده يتركني، وصل يم جود، كله: "اشتعل أصلك." جود:

"ههههههههه خو ما نسيتها؟ "انعل ذيچ الساعة الصرت بيها شريف وحميتها." "نفس السيارة والساعة بس تغير بسيط صار." "اي بالقرآن اني أريد أحد يحميني هسه." "لا تنخى وتعب روحك، محد يفزعلك، وحتى المكانات مكشوفة وين أنضمك عنها." "ابنيتي اهدي وعمه السادة، فشلة العالم دحگ." صرخت: "هددددد اااايدييه." "اووو شلون شغلة هاي، لبالها صاعدة بگيه." ندار صاح: "كابتن أبو الشبااااب، يمعود، گرب هينه يولي، دحگ هالعطلات من الصبح شنو."

باوعتلته، نزلت دموعي وطلعت الضحكة غصبًا عني، ترك إيديه وجر راسي باسه، گعدت بمكاني، راح شال عليّ يبوس بي، رده وشال عاشق قبل لا يبوسه، كله: "حميتهم الك." "كفووو، شبل من ظهر سبع." "رگعت أبوك بلوكة." "ما أتصور أكبر من بلوكة أبوك." "وطگيت عامر الخبل سبحته بدمو." "يولي، زلمة بالقرآن." كالها وحضنه حيل، فرحان بي. رجعه بمكانه واجه شال هيا، دخلت بكرسها وهو خلاها بحضنه وگعد يمي، أخذ نفس أسمعه يحمد ربه.

استوها تتحرك السيارة وصعدت لحن وأركان وراها، كال: "ما هان عليه تظل عينچ وراها." أشرتلي فرحانة، ضحكت، رادت تجي، سحبها أركان گعدها بالكرسي مالتهم. اتحركت السيارة، خليت راسي على متنه، وخر إيده وسحبني لحضنه، غمضت براحة، عندي هواي أسئلة بس أحس بتعب أريد بس أرتاح. مر الوقت أحنه ساكتين لا هو حجه ولا اني سألت، لمن وصلنا للشمال، وگفت السيارة، كام كرم، اجه يمنه مد إيده، باوعتله ابتسم كال: "اني كرم."

ضحكت بعدني ما مادة ايدي، سلم عليه غيث وعصر چف إيده، كله: "واني -الدليمي." "چان اختاريتلك اسم حلو، هم رديت للحيوانات." "لا يكون ما عاجبك؟ "لا منو كال، وأنتي أم تك غمازه ما بدلتي اسمچ؟ "من توكلها من لحمك هيه تلقائي يتغير حتى شكلها موش بس اسمها." "هاي كل قوتك مراقب أجهزتنا؟ كالها ورد فتح عيونه، كله: "جنت تسمع شحچي ويا رويدة؟ "ديلا عالأساس أملخها بالحچي، انگلِع لك فارغ لسربتك." غسق. -مراقب كل الأجهزة لو بس جهاز ناي.

رفع حاجبه وطلع جكارة. -غيث! -ومرض، نفس واحد الحجي يصير بحض جود، انعدلي أفضلج. عضَّت شفتها وباوعت لجود. أعرف ما عندها شيء بس من جانت تحجيلي على إعجابها بجود من نتراسل. ردت، اتحركت السيارة. أخذت الجواز مالته، فتحته لكيت غير اسم بس العشيرة نفسها. -يعني هسه أنا مو مرتك؟ -الحمد لله. -غيث! -روحه والنفس اللي يصعد وينزل. -ليش موتت روحك؟

-يول عطوني حصتنا، خلوا شروط. يبوي عطونا حقنا، اتأمروا يبه ما رايدين شي احنه، نحمل نفسنا بس حق شاهين لإبنه ماكو. -والما يجي بالطيب نجيب راسه، غيث ليش موتت روحك؟ -هما رادوا هالشي وأنا نفذته. -شلون يعني؟ -دزوا جماعة وراي تاي يقتلوني بس ربك شقفها وطلعني من حلك الموت بأعجوبة. -إشوكت ومنو هما؟ -قبل حكم عاشق من عملت الهويات وتنازلت لك عالجهال، والدزهم أبو شاهين الكلب وذيله عامر الحرمة أكيد. -ليش؟ -بسببج. -أنا شكو؟

-لأن جبتي لي عاشق، وعلي اتسجل باسمي بهيج شي شكلت خطر عليهم. حبوا يزيحوني ويكوشون عالكل مثل ما عملوا ورا ما اختفيت. -أتكوم أتزور وتاخذ كل الورث؟ -هاي أقل عقوبة يستحقوها، وابن أبو اللي يكدر يثبت أنا عايش ويكدر يرد دينار واحد. -ما خفت يصير بيَّ شي؟ -جنت مراقبج بكل ثانية وأعرف تحركاتهم أكثر من نفسهم. ما خفت عليك بكد ما خفت أتقل معزتي يمك. -حاولت ما كدرت.

-بيوم اللي وافقتي على عامر، هديت كل شي ورديت وأعرف وراي مصيبة، بس كلبي غدرني. وكفت آخر لحظة وأنا اسمعك تتفقين عالجوازات. -ليش ما قلت لي؟ -أي واحد يدري بيَّ عايش يروح مكاني، ما راح يرحموه، راح يجبروني أرد لخاطره كبل لا أكمل شغلي. -حتى أركان؟ -وداعتك ما عرف غير من كم يوم. -جوازك شو وصله لألمانيا؟ -جماعة زوروا لي غادي وصوروا لهم حتى تحليل الطلبوا أركان عمله من هينه. -ما خفت تنكشف وتنعرف أنت عايش؟

-محد يكشفني ويعرف غير اللي يحبني من صدك، وذوله معروفون يعطوني روحهم وما ينطون بيَّ، مثل مصيبتي الهتره ما نزلت دمعة وراي ولا لبست أسود. -مو حبًا بيك بس أنا أضوج من الأسود، وعلى أخوي ما بجيت أبجي عليك. صدك لكيت عطرك بكبر عاشق. -مم، رحت تشكره؟ -على شنو؟ -على أحلى هدية. أحسد روحي كل يوم عليها. ما أنام إذا ما اسمع صوتها وتتخيل غمازتها. ما أحس روحي عايش إذا ما تقرص ضحكتها قلبي.

-طول فترة غيابك عايشة بحلم، جنت أخاف أفتح عيوني وألقاك ماهو يمي غيث. -عيونه اللي يشوف بهن. -أوعدني ما تتركني بعد. -أترك عمري وما أتركك. -ولا تقول مشتاق لك بعد أبد. -هههههه تبت بالقرآن. رجعت راسي على صدره، اسمع دقات قلبه وأشم عطره. أمنيتي أدخل بداخله وما أطلع بعد. هيا على رجلي وأنا على قلبه، كل ما يدنك يريد يبوس هيا أقرصه، يضحك ويبوسني مكانها.

وصلنا يم مطعم، وكفت السيارة. نزلنا رحنا للمطعم. ما كفت الطاولة كلنا نكعد سوى، افترقنا الولد وحد وحنا وحد. كعدنا أباوع له شلون يضحك وياهم ويحجي. هيا وعلي كاعدين بحضنه، كل على رجل وعاشق يطفر بين موظفين المطعم. أمنيته يشتغل وياهم، عنده نشاط وطاقة مو طبيعية ما يكدر يكعد لحظة.

اتريقنا عالسريع، طلعنا برا. واقفين كلمن بيده جايه سفري، بين ما طلعوا كرم خال هيا على امتونه وأركان كامش علي راحوا صعدوا السيارة. أجوي جود وغيث وصلوا يمنا، أخذ كوب الجاي شرب منه. -تره مر. -رب الحملتك ما أحمل مرورة جاي. -أحلف. باوع لي وهمس: -ضحكي لج. بوزت، مد ايده قبل لا توصل بطني كمشتها وضحكت. جر شعري بيده الثانية. -متكليلي إشوكت ناوية تتحجبين؟ -لا خلص صدك هالمرة قررت أتحجب. -عجل جذبتي، يلا يولي صعدي.

خليت رجلي استوني أصعد حسيت ايده راحت من خصري. انداريت لقيته مفهي على وحدة تصعد من باب الثانية. ضربته على صدره. -غيث، أقرص قلبك أحسن ما أخذ روحك. -أووو وتعال غير اسمك وطلع جواز ثاني. -لا ما أتعبك، كبل جوه التراب. اندار لجود كاله: -تعجبك إمكانية؟ جود: -الله يكفينا شرها. اصعد يخوي عندك جهال صغار معتازيك. -صدك عاشق وينو؟ -ههههه ذاك كدامك بالسيارة ماخذ مكان المتعهد يوزع مي للعالم.

صعدنا، صدك عاشق ويه الولد يتغالب يوزع للعالم. مرينا من يم أركان اللي مبتلي بلحن محتار يعدل بحجابها، لو بها مجال جان ضمها بجنطته، خبل مال غيرة. رجعنا لمكاناتنا وهيا تتنقل من مكان لمكان بين العالم، متعجبين على شكلها وفهاواتها. أما عاشق اتعين يم السايق. رغم طريق طويل بس بكل مكان ذكر جان النه، نباوع له ونضحك لحد ما وصلنا للحدود. شفته التفت لا إرادي تقول حس سارة منتظرته بسيارتها اتحسرت. انتبه رجع عدل كعدته، سحبني لحضنه.

-وداعت جهالي موش قصدي. -شعرفك بشنو فكرت؟ -حق العشرة وذكريات ما أكذب عليك. مرت فترة عليها حبيتها بها بس حبيتها بعقلي موش بقلبي. -أعرف حب القلب يفوق حب العقل، بس اللي بالعقل يضل ثابت. -من يفقد الإنسان عقله يضل ما يفرق بين الصح والغلط، ويذكر بس دقات قلبه لمن جانت تنبض. رفعت راسي. باسني وهمس: -أعشقك يا أحلى مصيبة مرت بتاريخي. -وأخيرًا اعترفت. -أريد ابنيه تشبهك. -خاااااف ربك!

هلكد ما اتلح جهالك صاروا تقول أفرخ بباي، كلها نفس الخلقة. ضم وجهه، انتبهت العالم تباوع لنا وجود غاص من الضحك، خجلت رجعت عدلت كعدتي. -خلصتي فضحتنا؟ -أنت اتنرفزني، عندك اثنين نفس الجهره بعد شتريد؟ -أنا الزمال آخذ رأيك. -غيث أتزوج أنا موافقة. باوع لي بطرف عينه وانجتف ضايج. ابتسمت، رجعت راسي على متنه. -تعرف من أشوفك ضايج مني شحس؟ -مم. -أحس الدنيا كلها تحت أمري، أطير بغير دنيا ما بها بس أنا وياك.

-لهيج ناوية تخليني عمري بطوله منعول أبو أصلي. همست: -أحبك أحبك. -ناي وعمة السادة، كوه كاضب روحي عنك ودحكي هذا إشعجب حرر أسيرته. شلت راسي لقيت لحن جاية وصلت يمنا، قالت لي: -أريد شاحن. -ليش قمتِ؟ جان دزيتي المتعهد الشوفير الجديد عاشق. -ظهري كام يوجعني، قلت أمشي إشويه. -تعالي لج، شلون الأوضاع ورانا صارت؟ -أول ما زوجتك فضحني.

خابر أركان كله: يول يا الذيب طفرت الأمانة. الحمد لله بعده أركان ما متعارك وياي. دخلت سماهر تلطم، تكله انهزمت. عاد كلي قومي غيري وتعالي وياي دندورها بلكي يم صديقاتها لو أهلها. طلعنا تركناها تبجي وتخبر بأهلها. -كلك دندور المهم يعني ما تدري سافرتوا؟ -لا أول ما طلع أركان خبر غيث، كله حاجز لكم وياي واتفق ويا غلق فونه بعد ما فتحه، يلا أريد شاحن. -يم جود. جود: -ويييين يمعودة، تجذب خويه. لا شفت شاحن ولا أعرفه وين.

-يا عزة، لعد وين شهامتك من قلت هذا الشاحن وأنا أشحن لا تتعبين روحك؟ -يمعودة لا تورطيني، وعلي رجلها ينزلني جوه التاير ما عنده مانع. لحن خويه الشاحن يم كرم. كرم: -منو هذا كرم أول مرة أسمع باسمه؟ لحن: -أرركان. هي قالتها واثنينهم انطوها شاحناتهم. صار الليل وعاشق ماخذ السيارة، أفلاحه ملاجه صاحبهم، الكل تصيح عاشق. بس اكتشفت بابني خصلة: عينه تروح للحلوات، يوكف يفهي يمهن قبل لا يطلب الشغلة، يركض يجيبها إلهن.

من الفرحة اللي بيَّ حتى النومة طارت. كل ما أحس ناموا أدفر كرسي جود، أسمعه يستغفر. أخليه ينام وأرجع أدفر. اندار كله: -غيث أكمش مرتك. -انكتم يول. -يابه أريد أخمد تأخر الوقت. -ما تنطمر منهو موصل صوبك؟ -ناي تعالي يم غسق مكاني. غيث: -ما تأكل تبن، وجهك ما ينوكل يمه خبزة تريدني أصبحت بي؟ -لج أم حلك إذا دفرتي الكرسي أسحلك. -بالقرآن ما أقول لك عش ولا عتب، بس كون صدك زلمه وتعملها موش بس حجي.

اندار ضايج، أخذت لي إشويه شفته غمض، دفرت الكرسي قام متنرفز راح يم السايق. اندارت غسق قالت: -كفوو، هسه أتمدد براحتي. -بالخدمة نامي يا روحي. -غيث صديقك زعل قوم يمه. غيث: -انهجبي يولي، خباثتجن بعدنها عني. لا بالقرآن أربط وحدة بالثانية وآخذجن سحل لتركيا. -ناي طلقي وأنا أزوجك واحد براند. -جان حصلت لك واحد بدل ما ضالة تتزنحين ورا أبو الضحكة المثاقيل. -لبالك من تحجي هيج تخوفني، تره عادي يدري شنو أحجي بي. -آها متأكدة؟

جوووود. -لاااا غيث أختك فدوة والله هيبتي تروح. -عجل كضبي لسانك وانهجبي مكانك، وأنتِ أرقدي خلي الزلمه ينطمر له ساعة. صاح لجود رد لمكانه كعد. بس ناموا كرم دفر كرسي غيث وأنا شاركته بجود واشتغل الضحك. مر الليل وحنا ولا واحد نام، خلصناها ضحك وشقة للصبح. أجه المتعهد يوزع الجاي وعاشق كدامه يساعده. وصل يمنا كال: -شتأمرون جاي لو نسكافي؟ غيث: -وين أهلك يول؟ -أبوي راح بالانفجار وأمي تسودنت. -ما عندك أخوة أهل؟

-عندي جد وخذوه الدواعش شوهوا وجهه وذتوه بالجير، إذا عندك مساعدة عطيني أصلحه. المتعهد: -هذا ابنك الله يسلمه. غيث: -قبل لا استشهد. -دخيلك خلصني منه، وعلي حبلني. عاشق: -يلا عمي نظل نحكي، العالم منتظرة. هز ايده الولد وكمل طريقه مستسلم. وصلنا نزلنا. كمشت ايدي لحن باوعت لها قالت: -تذكرين أول مرة أجينا هم نفس المكان؟ -هههههه من ضحكوا علينا وخذوا فلوسنا. -وثاني يوم أخذوك. -لا تذكريني، أسوأ أيام حياتي. غسق:

-أكيد، لعد اللي تعرف واحد مثل غيث شتكون حياتها. غيث: -هذا اللي يجبرك تهفو دفرة تفقدك الذاكرة. -أي بعد أحسن أخلص من معرفتكم. -ومعرفة أبو المثاقيل. -غيييث! -بعد أخوك بطلي تهترين أحسن ما أعدل فجك. يلا كدامي عالعماره الجهال سولكوا من الطريق. جود: -بس دقايق بين ما تجي السيارة. خابرت عثمان يجيب الكبيرة حتى تكفي. أقل عشر دقايق واجت السيارة صدك كبيرة كفتنا. أخذنا كبل للعماره وصلنا نزلنا يمها.

فتح الباب كرم دخلنا. هما راحوا لشقة جود وأركان ظل بالشقة الجوا. فتحنا شقتنا دخلنا. انعصر قلبي، اختلطت علي الذكريات الحلوة والتوجع. حضني من ورا وخلا راسه برقبتي، همس: -وهاي احنا بيتنا الخاص بين أطفالنا. -فرحتك ناقصة، مو جنت تتمنى غير هالشي؟ -ما حلمت غير بحضن الصكعه مالتي وجهالها المخابيل. -وسارة؟ -مرحلة عابرة مرة حالها حال كثير أمور من حياتي. -غيث وداعت أطفالي ما قصدت اكتـ

-قصدتي وتراهنتي تجيبين قلبي حدر رجليك، يا أجمل عوض ربي. -ما ندمان؟ -ندمت على كل لحظة عشتها بدون ضحكتك. دحكي هالقنفة. -جنت واقفة يمها من طلبت مني نتزوج. -تشهد على أول دقة عشق قلبي ينبض بي لكِ. انداريت له كمش وجهي. -ما حرمني من حضن أمي إذا ما أعطاني مكانها، اللي عوضتني عن كل المر وسلبت عقلي كبل قلبي. دنك راد يبوسني دفعته. -بعدك تحبني مثل قبل؟ -إشوكت حبيتك تاتسألين؟ يولي أضحك عليك شبلاك تصدكين؟ -صدك دتحجي؟

-يولي شبيه تسودنت، أحب لي وحدة كل عين شكل وخدها مزروف. ضحكي لج. -حلو، أنت اللي بديت، خليك كد كلمتك. رفع حاجبه. -عاشق علي الكم دقيقتين، ياهو اللي يخربط الشقة أسرع ويكسر أكثر اليوم أنيمه يمي. غيث. -وراس أبوي اليتحرج منكم أزته من البالكون. -وِسفه ديكول أنتم جبناء ما تكدرون تسوون شي. -الزلمة ما يسمع من حرمة. -أني أم مو حرمة، والأم إذا غضبت الله يدخلكم نار جهنم فلشووا. -كل شخط أردّه بوجوهكم.

ردت أحجي، سد حلّكي، أشرتلهم وهمه ما قصّروا، كلمن كمش مكان، تركني وركض لها يكمش عاشق يفلت علي، يرد لعلي يفلت عاشق، أصواتهم وصوت التكسير وين وصل. شلت التحفة، صحت: غيييث! اندار لي، كال: لاا ناي هاي قديمة أبربج. فتحت إيدي وكعت قبل لا يتحرك، شلت الثانية اتخصر، وكف يباوع لي بيأس. اندقت الباب، راح فتحه، صوت جود كله: شصاير؟ -اشتعل أصلك من ورطتني بيها، مرة ودحكت شلون نعلت أهلي غير ينعل أبو عشيرتك وتبطل. -شكو شبيهم؟

-سلامتك بس الضاهر ما عجبهم تصميم الشقة، حبوا يضيفون بعض المسّات. -هههههه يمعود صوتكم صحى العمارة بكبرها. -اله أربطهم ماكو حل ثاني. -الله يكون بعونك، ما عدنه غير الدعاء ونتمى تتخطى. -أتركك من جوم المخابيل اليمي واكضب روحك بس الليلة باجر الحفلة لا تجفص بيها. -يا حفلة؟ -زواجكم، نص كلمة ما أريد اسمع. -غيث اسمع. -انكتم وروح انطمر تا تهير من الفجر عدنه شغل جثير، يلا أنكلع خلي ألحك بلكي ضالة شغلة صاحية. -مشكور. -أنكلع يول.

سد الباب ودنك شال هيا وراح لغرفة سارة، فتحها دخل بيها، تركته ياخذ راحته، لبالي بعدها مثل قبل، بس من طلعت صاحت علي: تعال شوف سريرك يخبل أبو السيارة. رحت دخلت لقيتها مغيرها للجهال، كلها رسوم وألعاب. كل واحد سرير وكنتور بابين ومن جهة ميز مراية، باوعت له وابتسم: -هاي شوكت سويتها؟ -بيوم الشفت هيا. -يعني لو ما صايرة هيا ما جان غيرتها؟ -الصراحة عاشق وعلي ما يسوون واحد يخرب غرفته لخاطرهم. -سمعت عاشق، خو ما حجيت؟

-خلي أثبت لج تعالي هيو. كعد كدامها، كمش إيديها كال لها: يا هو تحبي أكثر أني لو ناي؟ -أنت وناي. -راح أروح أني. -لاا بابا حباب لا تروح، وإذا رحت أخذني وياك. -وأنتم ويامن تروحون؟ علي: -أني أحبك بابا بس آسف ما أعوف ماما. -وأنت يا هتر؟ عاشق: -أحبك شوية بس ناي لا ما أحبها أبد. -يعني تجي وياي؟ -لع ناي يخطفوها إذا ضلت وحدها، أنت لا جنك غول. -لا يا ابن الكلب، اللكمة حرام بجثتك. -ولا منيتك، أني أشتغل وأصرف على ناي.

باوع لي، ضحكت، قلت له: -تره معروفة الولد يحب أمه والبت لأبوها مو بيدهم بالفطرة. كام اجه يمي همس: عجل أني شبلاني؟ -الجهال غيث. -ناموا يولي، تا باجر أخذكم للبارك، علي تنام على ذاك السرير، هذا اليم هيا لعاشق. علي: -عش بابا هيا كل يوم تنام يمي. -جنتوا صغار هسه كبرتوا ما يصير تنام يمك. -عجل موش راح تنام يم عاشق؟ -عاشق أخوها لأن رضعتوا سوه، بس هيا لا حرام ما يصير. -يعني ناي أمي؟ -وأني أبوك يبعد أبوك وعشيرته، ناموا يله.

راحوا كلمن لمكانه، غطاهم، طلعنه سد الباب. -ليش كسرت بخاطره؟ -ينجسر خاطره ولا كلبه. -ما فهمت. -بت الكلب كلما تكبر تحله أكثر، راح يحبها ويكتم مثل أبو وتضل حسرة بكلبه. -يعني إذا كبر ياخذ هيا؟ -موش بعيد، عش تستبعدين حتى هوية طلعت له باسم أبو، تا ما يعيقه بالمستقبل إذا دك كلبه. -يمه هيج أأمن بنتي لابني متروح بعيد ويضل كلبي عدها. -عجل هذا كلبج مر عالكل وصل صوبي توقف. -غيث جاية تعبانة.

-إي ومن هو طلب منج أكثر من بنوتة تشبهج؟ ما لحكت حتى أفلت، دنك شالني وأني أتوسل بي ولا وياه، دخل للغرفة سد الباب، شمرني عالجرباية وكف يفتح قميصه، طفرت: -شوف والمسيح الحي أصرخ وأفضحك. -عملي التكدرين عليه. -غيث فدوة والله عدنه رحمة من الله كافي. -بس وحدة ونقفل. -منو يكول تجي بنية، هسه يجيك خبل مثل عاشق. -شكو بيها الحيل موجود والرزق جثير نجرب بعد. -وأضل أجرب غيث، طفل ماكو وما تتقرب لي إذا ما تحضر المانع.

أشر على عيونه وكمل، ويفتح حزامه. أباوع داير مدايري وين منين أشرد، شفته شمر الحزام واجه وأني كمزت صعدت الجرباية، ردت أطفر من الجهة الثانية، كمشني من شعري دفعني وجه يمي. -فدوة غيث والله بعد ما بيه حيل أخلف. -بس وحدة. -مو هسه، خلي ندخل الجهال للمدارس بالأول. -صوتج يولي. -لااالا فدوة بس اسمع، والله جهالنا زغار راد لهم تعب وهم رحمة هواي. -لو ألف واحد يجون إذا ما صارت بت تشبهج ما راح أبطل. -مو هاي هيا تشبهني؟

-بس عيونها وهم ثابت لونهم، أريدها هيج نسخ ولصق نفس اللون لا سمرة ولا بيضة، لمعة العيون تتغير ويه الضوه، تجيب أكبر راس شفتها تفهي الصاحي. ضربته بصدره. -ذكرتيني، أريدها هتره مصكوعة ما تهاب أكبر زلمة تكف بوجوه. -هسه تعبانة تطلع مطعوجة خليها لباجر. -الصراحة ما أثق بيج، أقل احتمال لباجر حتى الرحم يختفي. كمشت وجهه بسته بخده. -حلفي. بسته بشفته. -ما لحكت حتى أحس بيها. -تنساتي وحملي صعبات، إذا ترضى التعب عليه ما راح اعترض.

دنك أخذ شفتي. كعدت على صوت فتحت الباب، فتحت عيوني، راسي على صدر غيث وأشوف عاشق كدامي بيده الماسحة كال: كومييي. بعدني ألف بجسمي وضرب غيث بكل قوته طفر، الحمد لله لابس بنطلونه، رد يكمشه رد ضربه بصدره. -شبلاك يول؟ -عش نايم يمها. -من هو؟ -كوميييي أنتي وعلي اليوم أفلشج. صعدت الغطة على صدره أكثر، رجعت ليوره ما متوقعة ردة فعله.

راد يضرب غيث جر الماسحة، وهو اتخبل كام يعيط، شمر الماسحة وشاله يريد يسيطر عليه ما يكدر يرافس ويفرفح. طلع بره فضحنه بالصراخ، ما أعرف شلون أكوم وألبس، طلعت لقيت الباب يندك وغيث كاعد يسولف وياه. فتحت الباب دخلوا يركضون، كله كرم: بس لا ضربته ولك؟ غيث: -لا خويه وكع بس بطل ما بي شي. جود: -غير ديرون بالكم عليه، تعورت عمو تعال. عاشق: -جذذذذب ما وكعت بس هذا. سد حلّكه غيث وخزره. جره جود شاله. -شبيك يخوي تخبلت؟ عاشق:

-طلعوووا من هينه روح ما نريدك. كرم: -ضربك عمو؟ غيث: -تركوه خويه خبل يبجي ويسكت وحده. عاشق: -مو خببببل أني كضبتك نايم يم نااااي. غيث: -عاشششق بابا شحجينا؟ -اطلع ما نررريدك. أخذه جود وطلع بيه، دنكت خجلت حتى من نظرة غسق. كرم: -يا أخي غير أتمهله لعد كضبوا روحكم ولطموا وجوههم وأنت مخزينه. -انكتم وطلع اتهير يلا. -نصيحة هذا ابنك ما راح يسكت وكل يوم يشهركم بالعماره، أزوج ويانا كدامه وخلي كدام الأمر الواقع. -كرم أنكلع.

-صدك بما أنه أنتم انفضحتوا العالم كلها اتفرجت، أريد شقتكم، أخذوا الشقة الفوك. غسق: -إذا صعدت ناي فوك أصعد وياها. -وأنتي شكووو؟ غيث: -شايف لك حذاء يتخلى عن قيطانه. -راح أعبرها بمزاجي ما أرد عليك، لأن متربية مو مثلك. -أنعل أبو مزاجك لأبو تربيتك الوسخة، أنتِ لو متربية ما صاحبتي هالشقراء. -ظل اغلط أصلاً هيَ ا -بعدها تحجي وهو اتقدم اتجاهها، طلعت تركض، دفع وراها كرم وسد الباب. ضربته على صدره.

-ترى أنت مصلخ، كان استحيت قدامها. -وإشلونها عاد الخجل، خر من الجانبين. -غيييث. -تفكيرك الوسخ، غيري يلّا زهّبي الزاد بين ما أسبح. -أريد فلوس. -اشتغلت رحمة الله. -يعني شنو؟ -يعني يا شاطرة تروحين تفتحين المطعم وتشتغلين كارسونة مثل قبل أنتِ ورفيقاتك. -قبل جنت وحدي، هسة عندي كوم زعاطيط، إلا أشتغل سلابة يالله ألحق. -والله وجهك يساعد، أخذي المسودنة مالتك وطلعن، خوش بيهن فلوس مال تقفيص.

-ونخلي رويدة على توزيع البودرة، والله خوش شغل. -تعالي وياي أعلمك على أصناف البودرة. -الجهال كعدوا. -أقلها بوسة وذاك أضعف الإيمان. -إذا أكثر من بوسة هالمرة أني أفضحك مو عاشق. أشر إي، أدنيت يمه، دنّگ، عضّني من خدي وهمس: بروح أخيك بالقرآن مشتاق لك. -تعبانة. -اشوكت اجيتك وكلت العكس، خليتني أنعل أبو الشارب لأبو الكلمة اللي انطيتها لك. -صدق غيث تسويها وتخوني؟ -حريم الدنيا ما تجي بشمة من نحرج. همست: أحبك.

-علي بابا، أخذ هيا جوه بين ما أمك تحضر الريوك. راح علي، بس سمع سدت الباب، دنّگ شالني رجع للغرفة. غسق أخذت الشقة اللي قدامي وأركان اللي جوه، لخاطر لحن ما تكدر تصعد. كرم ظل بالفوگ، بس اسمها فوگ لاطش يمنا، الحمد لله مخلصني من مذاوت عاشق.

شقتنا كانت كاملة، بس البنات بعدهن، كلمن استلمت شقتها ترتب وتنظيف بجهة، وأني ضالة بين ثلاث طوابق أتجول كل شوية أساعد وحدة. يومين وإحنا مخبوصين، بالليل نذب روحنا مثل الموتى، البنات يمي والولد يم جود. كعدنا من الصبح، اليوم الزفة، كلمن كمشت مكان عالسريع، كملنا واتريگنا، دننزل ونسمع صوت أركان من جوه صاح: يا أغممممم ارفع. نزلنا عالسريع، لكينا يضب باب العمارة وكرم كامشها من جوه كله: ارفع بعد. -هيج؟ -أكثر. -ياعليييي.

-اترك المعصوم ونزلها يولي موش هيج. هدّها، اجت برجل أركان، صاح: اشتعلت عشيرتك. -أنت كلت نزل. -يول شوية موش تزتها، ارفع أنعل الساعة السودة اللي نخيتك بيها. رفعها شوية. -أكثر. -أكول ياعلي. -دخيل اسمه كرم، اترك الباب غيييييث، أنعل أبوك على هالرفجة. وين تردن يولي؟ لحن: -للصالون. -أي ومنو رايح وياجن؟ كرم: -أني آخذهن. -أخاف هم تكول ياعلي ومن الحماس ولأنك زاتهن جوه تريلة. -لا أندله قريب ماكو يمه سيارات.

-أتوكلوا ناي خويه، استعجلوا ترانا بعد الأذان مباشرة نبلش. -تمام بس فلوس مرتك ما عندها، ترى ما أنطيها. -امشي لك لا أهفك دفره. -إذا ما حرمتك من الميراث ما أطلع مرة الغثيث. -أنعل أبو ورثك لأبو الغثيث اللي خلانا تحت رحمتك، انقلعي لك لا بالقرآن أعلقك مكان الباب. -صدق منو كسره؟ كرم: -ابنك وضرب ابن العمارة اللي قبالنا. -عزه وهسة؟ -أخذه غيث وصديقه التركي وراحوا يتعاركون وياهم ليش مزعجين ابنه. -فوگ ما كتلهم ابنه.

-نكروا وخشوا بعينه. -بلكي يردون الكاميرات ولأنهم ساجنيه هو وابنه وخلصانة فرد مره. غسق: -ثول، كان خليتي بجيبه كيس بودرة. -لا تخافين يطلع كتل بشر ما سجنه تسجنه بودرة، امشن يلّا. رحنا للكوافير، دخلنا الحجز كان مسجل، لبسن بدلاتهن، غسق طلعت جنها ملكانة. رويدة مو قاصرة بس غسق طغت على جمالها. لحن وهيا أركان جايب لهن نفس البدلات، بلشت أم الصالون من وحدة لوحدة ولليل لمن سمعنا سيارات بالباب وفوني يرن، فصلته وكمنا. طلعنا.

رجفة احتلت جسمي وأني أشوفهم اثنينهم بالقوط عرسان، شال راسه جود، لمعة بعيونه، أشرت عالحلقة، ضحك، رفع إيده لابسها. لحن طلعت، اجى راد يكمش غسق، كمشت إيده، باوع لي. -أوعدني تدير بالك عليها. -أخليها جوه عيوني. -ما تزعلها. -إذا اشتكيت لك بيوم لك الحق كلشي تسوين. -ما تكسر قلبها. -ما عاش اللي يوصل قلبها، أنطيها روحي. -مبروك. -الله يبارك بيك يا عز أخت يا أم لعاشق وعلي.

حضنتها وخرت، كمش إيدها، راح للسيارة. راد يدخل كرم، وكفت بالباب. كرم: -شنو ناي والعذرا هي وصيها مو أني. -ورق. -شو ورق ما عندي ولا دينار. -لعد ماكو رويدة. -لا حبيبة أمرورتك تتذكرين من جنت أشيل الشغل مكانك وأمسح الجام. -ما تقنعيني. -أطلبك مرة أخذتي الراتب ورجعتي للعراق، ظليت أشتغل مكانك. -القانون لا يحمي المغفلين. -لا يا مغفلة، تظلين محزوزة وملبوسة.

طلع محفظته، شال ورقة أم المية ليرة، أشرت بعد، عفس وجهه، طلع بعد وحدة، أخذتهن. غمني، دخل أخذها وطلع للسيارة، رحت لسيارة غيث صعدت. -شنهو خلصوا؟ -اي لعد شتريد؟ -عجل وأني؟ -أنت شنو؟ -ماكو وحدة منا منا حتى لو بس الليلة، ول يابا دحگي ذيج الصاروخ اللي طلعت، اشتعلت. -اشتعلوا عشيرتك غيث، اطلع السيارات اتحركت.

باوع لي صفح وشغل لساجدة عبيد، علّى صوته، سحب السقف وانطلق وراهم، خلى الزعاطيط تتخبل وراه بالاخص عاشق، أخذنا الطريق كله يصفر ويردح. وصلنا يم الساحل، نزلنا، كان محضر لهم فرقة. بالبداية شايلين هم لأن وحدنا، بس العرب ما قصروا، التموا وصارت زفة تخبل. أم كرم وأخته هم حاضرات بس شكد كيوت وهادئات، صوتهن ما طلع، معزولات على جهة.

خلصت المعزوفات والركص، ركصوا جوبي، كرم ما يعرف بس جود صار بين أركان وغيث وياهم كم عربي، صارت ولا بالأحلام. لتالي الليل زفيناهم للسيارات، كلمن أخذ مرته وللفندق. رحت يم البحر وكفت، تركت الجهال يم لحن ياكلون. اجى يمي غيث كال: ما تجين نجدد عرسنا؟ -هسة نجدد لعد منو من ساعة كان يدور تغيير؟ -يولي شبيك نفسية؟ -نفسية. -هسة دحكي ذيج دخيل ربها موش مرة قابل دحكتها. -لا أبد.

-مو يلّا استهدي بالرحمن وبعد التفكير المايل من جهامتك وووو. أباوع له عينه راحت غير جهة وتيه حلكه، ضربته على صدره، كمش إيدي وضحك. -لو أشيل عيونك لو أبدل دماغك ماكو غيرها. -عيش ما تبدلين قلبي بالقرآن تعبني. -شوف البحر شكد حلو بالليل. حضني من ورا همس: موش أحلى من لمعة عيونك. -أسأله شكد شكيت له منك. -بوقت اللي تشكي له كان يعد حسراتي ويحسب كمية عشق الحام قلبي لك. -صدق تريد طفل بعد؟ -لا هونت. -ليش؟

-اكتفيت بيك أم وأخت وبنت ورفيقة. -بس. -النفس اللي أشهقه والروح اللي عايش بيها. -برد الجو. -أضمك بضلوعي وأدّفيك بروحي. -خلينا نرجع الجهال تبرد. ثاني يوم كعدنا من الفجر، كلنا منتظرينهم يجون من الفندق، حضرنا الصباحية. غيث وأركان جوه ويه الجهال. ولحن يمي ترتب، انفتحت الباب، دخلوا، ركضت حضنت البنات، أبارك لهن أباوع رويدة تمام وضعها بس غسق الشياطين تتطاير من عيونها، خجلت أسأل.

كعدوا أباوع لها كل شوية تريد تتعارك ويه جود وكوه يسكتها حتى الأكل ما أكلت، خلصنا وهي على هاي الحالة، قمت سحبتها كعدتها يمي. -احكي شصاير بينكم؟ -شوفي وأنتِ تعرفين بربك هذا شغل عاقل؟ -غير كان متلهف عليك. -ناااي شوهني، ببالي صدق عاقل ورزن طلع حتى المسودن أثگل منه. -هه لعد شكد غبية مقتنعة صديق غيث وعاقل. -لا والنوب لكفت رجلك يخبره ويعلمه شلون يصير بريء حتى ما أشك بي عنده علاقة قبلي.

-بس عزه بعينه صدق ولك، هاي رقبتك صايرة بنفسجية شبي هذا ما شايف مرة؟ -إذا ما توبته إلا أخليه أسبوع نايم بالصالة. -عود باجر يلّا يا روحي قومي لشقتكم كملوا الصباحية، خلص الاستقبال يمي ورايد أروح للمطعم أرتبه. -صدق نشتغل بالمطعم يعني ما نفتح مكتب؟ -شتكولين أنتِ هم نشتغل وهم نكمل دراسة بين ما نحصل الشهادة نفتح مكتب. -هم صدق ليش نخلي بيد الغربة هذا حلالنا؟ مر غيث كالها: اي، علي صوتك حلال أبوك. -ما دام باسم ناي يعني حلالي.

أركان: -وين يا مبدعة تجين وتدحگين تعبك بيد من صار؟ -بالقرآن تدفن روحها صدق خبرت أمي؟ -اي باجر يعمرن بحيل الله، تسلم عليك وتكول عينك بعاشق، اقضبوا لا تخليه سارح. -صدق وينه؟ -أخذهم كرم للحديقة قبل ساعة لقيتهم يلعبون طوبة. -خبروا يجيب الجهال تا نروح للمطعم وأنتِ ناي يولي فضي شغلاتك بسرعة حتى نلحق قبل لا يصير الليل.

هزيت راسي وكمت للمطبخ، إيدي أني والبنات خلصنا غسل المواعين بين ما اجوا كرم والجهال كل واحد بيه كيلوين وسخ من الركض. سبحوا وأكلوا عالسريع، رحنا فتحنا المطعم كان نظيف لأن عثمان ما تاركه، بس هم كلمن كمش له مكان ينظف بس جود عالحسابات كعد. أقل من ساعتين ورن فون أركان، رد أسمعه صاح: لا وهسة؟ -خوما مات أحد؟ -لا مو خوش. -وهسة وينهم؟ -الحمد لله أهم شي سلامتهم. -يتعوض. -لا ما أتأخر جاي إن شاء الله. -الله وياكم. غيث: -شصاير؟

-عامر مسوي حادث هو ما متأذي بس كسور وعمي أبو شاهين الضربة صايرة بالحبل الشوكي يكولون احتمال انشل. كرم: -حيييل قصدي لااا. -غيث مالك إيد بيها؟؟ -لا يبا شدعوه شكو مصيبة وكلتوا غيث، الحمد موش وقت ظهور الإسلام كان قالوا أنت قتلت الحمزة. -يلّا يولي لحن تهيئي احتمال اليوم نرد. لحن: -ما أرجع أني. استلمي وعيشي ما تريدين. أركان هوجان ماكو شيء، وأهلك كانوا مشتغليني إكس مربع، مو هسة ناي ماخذة ورثهم ومنهزمة.

بعده ما انخلق اللي يقرب صوبكِ. وأمكِ؟ لا تقولين أمكِ، وهم عليّ ما تقرب لكِ ولا تحكي وياكِ. يعني شنو نرجع لبيتكم مو لبغداد؟ بس هالايام بين ما تصفى ونخلص خطارنا نرد بغداد، وأيش وقت ما ردتِ تجين لهنا أجيبكِ. *** لحن *** رغم السعادة اللي أشوف ناي بيها وأعرفها مرتاحة بعيدة عنهم، بس تمنيتها ترجع وياي، ما أعرف أنانية لو من كثر حبي لها.

أباوع لها تتنقل من طاولة لطاولة تمسح، وغيث كل شوية شمر لها كلمة يعصبها ويرد يقرص خدودها حتى يضحكها. أول مرة أشوف ضحكتها من قلبها من بعد عاشق. جهالها يتطافرون بينهم، شيء بداخلي أمني عليها غطى على قهر بعدي عنها. صديقاتها والولد وياها تقول أخوتها مو مجرد صداقة، شقاهم وسوالفهم شيء أحلى من شيء. حمدت ربي عوضها بعد هالتعب.

لليل وأني عيني بيها أريد أشبع من شوفتها، ما حصلنا حجز لثاني يوم، فرحت خلصته وياهن على البحر، كامشة إيدها أباوع لوجهها، سهرنا للصبح، تمنيت ما يخلص الوقت وأتركها. أعرف أركان يحبني وما راح يخلي أحد يأذيني، بس ناي كانت عندي أعز حتى من روحي، ما تعودت أبعد عنها. لثاني يوم صار وقت روحتنا، غلق أركان الشقة، سلمت على البنات، بوست الجهال، باوعت لناي نزلت دموعي، ركضت لحضنها. ديري بالكِ على روحكِ.

اللي يحكي وياكِ لا تسكتي له، ولا تضمين شيء عن أركان حتى لو هددوج، أي خدش يصير خليه بأذانه، خليكِ لحضن بدعة هي تحميكِ، وسركِ يم عمي أبو أركان لأن رجال عادل ويخاف الله. أم أركان. اشكيها لزوجها مو لأركان، ترى أمه مهما يصير ما يقدر يحاكيها، ديري بالكِ على ماما. قبل لا أولد أجي يمكِ هنا أجيب. إن شاء الله، زوري عاشق وسلمي لي عليه. راح أنطي غرفته للفقراء. انطيها، أخذت أعز شغلة، استكفيت. أركان: يله بويه.

حضنتها ورحت بدون لا أباوع وراي، مختنقة، وصلنا للمطار صعدنا بالطيارة، بعد ما تحملت بجيت، أخذني لصدّره باس راسي. وداعت كل دمعة اللي يقرب صوبكِ أعدموا العافية. خايفة من عمتي لا تموت طفلي. تأمحى عشيرتها، لا تخافين، عرفت هي اللي كانت تنطيكِ الأعشاب، وأخذت حقكِ، بعد ما تتجرأ تقرب لكِ. خلينا نروح لبغداد ليش كل هذا؟

وداعتكِ أحس روحي مربط بالهدوم وعايش بين غربة، لو ما خاطركِ جبير عندي وأشوفكِ مرتاحة ما كان اتحملت كل هالوقت هناك. أركان إذا شفت روحي مرتاحة يمكم ومحد اتعرض لي أظل، بس إذا آذوني ترى أروح. وهذا شاربي مو على وجهي إذا اعترضت، وبسج بجي لأن خدودكِ وردن، دخيل الإسلام لحن اتنقبي. أختنق. لا أني أنقبكِ على الخفيف، دخل ربكِ وبالقرآن اشتعل أبوي. هو يلف الشال، وأني أباوع لوجهه أحسه مو ممتلك بس قلبي، لا عمري بيده.

لا تدحقين كثير لا ما يطلع الجاهل يشبهني. هم صدق أريده يطلع يشبه ناي. شهالفأل الشؤم؟ بطلت يولي دحقي بوجهي. ليش؟ ترى حبابة وحلوة. حلوة ما اختلفنا، بس الكلمة الأولى مالها صلة بيها أبد لا من بعيد ولا من قريب. أركان دأحس الطفل يتحرك. بعدكِ يولي؟ أي، معناتها مثل ناي ماما تقول ناي اتحركت من وكت. يا ساتر، لا هي مبينة من البداية الوباء انتشر بالسلف.

على طول الطريق كامشة إيد أركان خالتها على بطني حتى يحس بالطفل، وهو يخجل أخاف واحد يشوفه، كل شوية ساحبها. وصلنا اتلكانا أبو حضنه وكله بشرني بخير أبو عاشق. أي بخير ودز سلام كثير، شلونهم الأهل من سمعوا الخبر؟ يطبهم حريشة، اشتعل الورث على أهله، أهم شيء سلامته هو وعياله هاي بالدنيا. أبو غيث ما قال شيء؟ اتركك منهم يهترون وينكتمون وحدهم، الزلمة اللي يأخذ كلمته من حلك حرمة ماهو زلمة. آها ما طلق أم عامر؟

لا يبه طلقها، بس سماهر اللي تلقنه، أخذنا الحكي ونسيت أسلم، شلونكِ بويه لحن؟ هلو عمو الحمد لله بخير. دوم إن شاء الله، أختكِ شلونها؟ الحمد لله تسلم عليكِ، وقالت إذا صار لكِ شيء روحيله بس إله. بعيوني أنتي يا بويه وأختكِ على راسي، يلا امشوا. رجعنا ويا وصلنا للبيت لقينا هوسة، المضيف متروس ناس، دخلت جوه اتلكتني أم أركان وسهيلة عفسن وجههن، سلمت فوقاني، أجتني سعادة حضنتني وتحمدت لي على السلامة.

دخلت وياها لغرفة بدعة لقيتها قاعدة بيدها سبحتها، شافتني فتحت إيدها، رحت شبكتها، باستني وشمتني، قالت أوف يا جدة تقول مضيعة واحد من أحفادي. شلونكِ بيبي؟ يا بعد جدتكِ، شلون ابنيج؟ الحمد لله اتحرك. خير إن شاء الله، أختكِ الصقعة شلونها؟ هاا؟ هههههه فرتها بينا الهترة وكوشت على كل شيء. مو هي غيث والله. بالعافية على قلبه، ما طول رادوا أذيته يستاهلون اللي عملوه بيهم. ما ضايجة لأن أخذ الورث؟

حقه وحق أخوته أحسن ما يكون حدر التراب بصف شاهين، فداه الورث وصاحبته. ردت أحكي وصاحوا لها يردوها بالمضيف، مشت إيدها على راسي، ابتسمت وقامت طلعت، دخلت شهد مكيجة ولابسة آخر صيحات المودة، أجت سلمت وقعدت يمي. شنو اتزوجتي؟ أي قبل يومين جابني حسام سكتاوي، بس قال راح آخذكِ يم خالي غيث سفرة أعوضكِ. ألف مبروك، ورنو شنو أخبارها؟ ههههه ذيج وينها بالمطبخ دتحضر لي أعشاب حتى تأذيني، على بالها ما أعرف بهيج شيء. عزه ولا يبطلن.

حيايا، بس حسام قال والله أسحك راسها بس صبري لي، إذا ما خليتها خدمة جوه رجليكِ فلا أنحسب على الزلم. هو ما دخل عليها؟ لا عيع تلعب روحه منها، بكد أمي ومليانة حقد وشؤم، أمها تعلمها على الخبث وهي تنفذ، هسة صافه ويا جدتي أم أركان حتى يخربن بيت سعاد ويسقطني. وسهيلة شو هنا؟ بس اليوم أجت لأن عدنا شغل وخطار، عود أم بيت وصاحبة طبخ. بس يجي أركان أخليه يطردها لو أني لو هي، ما أعيد الغلط.

عفية عليكِ، وأني أشحت وراها رنو لو هي فايدتنا بالشغل. مالكِ شغل أني أقول لأركان يجيب وحدة تساعدنا. أحنا نحكي ودخلت سهيلة، قالت على منهو تهترن حضرتجن؟ محد جاب طاريكِ. انجعلكِ بالمرض ما تقومين، منو ولجن قاعدات وتشتمن ببهاتنا يا الما متربايات؟ عزه منو جاب طاريهم؟ وين يا أركان تعال اسمع حرمتكِ شتقول. دخلت أم أركان صاحت شكو؟ اسمعي يا عمة، أقولها عش تجيبين طاري أبوي تقول لو زلمة ما ضحكت على شاربه ناي وأخذت ورثه.

انعجلع بالسرطان ولج، أزلامنا حريم. وتقول مو طلقكِ أركان؟ شكو راده؟ لو صدق ما عدنا خدامة خليكِ، هاي تاليتي يا خالة أخدم بيت عمي. وين أركان؟ صيحه إليه تاعلمها شلون تهينكِ. تقولي إذا قلت له بحكاية مني أخليه يدوس راسكِ. ولج رنووو ندهي أركان بسرعة. يا خالة أقولها أني بكد أمكِ عيب تحجين هيج تفلت بوجهي. تفوو عليكِ. هي تفلت ودخل أركان صاح شكوووو. يا يمه تعال اسمع شلون تشتمنا حرمتكِ. ما أريد أسمع شيء، دخيل ربكِ ما تملن شر.

سهيلة: اتقولي شكو جاية هنا و -اششش لا تكملين، لبسي عباتكِ وردي بيت أهلكِ، وإذا دحقتكِ هنا أطردكِ بالنص. أم أركان: ولكِ تطرد بت عمكِ لخاطر هاي؟ يمه جاي تعبان، دخيل رببببكِ والعالم تارسة المضيف، ما فارغ مشاكل، وأنتي يلا وينكِ حسسسسام. طلع صاح لحسام وسهيلة قامت تلطم، دخل حسام أشر يله. وين ولكِ تأخذني؟ أنه أمكِ يا المصخم. يمه ما يرضون، شأعمل يعني؟ ولكِ وين أولي؟ تردني لأهلي وتعرف عامر خال راسه براسي بس يطق بي.

أوديكِ يم أمكِ. أمي لقمة كوه مدبرتها يم أخوها، ضالة بس للذل، ربي لا يوفقكِ غيث، وإن شاء الله كل دينار أخذته يعافيتكِ. يله يمه. يبووو يبوو وين أنطي وجهي، وخالة أبوس إيدكِ دبريني بالقرآن أنظلم ببيت أبوي، تعرفين سماهر تكرهني. روحي يمه وأني أردكِ غصباً عن شاربه، وإذا ما خليت حرمته تخدم جوه رجلكِ ما تتسمى أم أركان.

جرها حسام أخذها وهي تبجي، ظلت أم أركان تذب حكي، أشرت لي شهد لا تردين، وأني هم ما اهتميت، صعدت لغرفتي نمت تعبانة. مر الأسبوع والناس ما تخلص ولا حكي عمتي يخلص، كرهتني بعيشتي ورنو بعد أكثر، شكو شغلة ما بيها خير شمرتها براسي، تعالي اشتغلي، أني هم أشتغل بسكوت ما أريد مشاكل لحد ما نخلص ونرجع بغداد. قاعدين على العشاء، شهد يم حسام تقول بلابل حب يهمسون على الكيف. أجت سعاد خلت الأكل وقعدت يم عمي، قالت وين أركان؟

أبو أركان: عنده جماعته بالمضيف يبطي. عجل خلي أعمل له قهوة جاي. لا القهوجي موجود، اقعدي أكلي. أم أركان: أي دير بالكِ تخليها تتحرج. أستغفر الله ربي. حكيت ويا أركان؟ على شنو؟ على سهيلة. كل عقلكِ أنتي؟ ترجيه وشيليها من أذنكِ. وعش يمه؟ أني أريد بت أختي يمي مرة جبيرة محد يخدمني غيرها. عندكِ رنو. رنو: وعش عيني أني خدامة؟ بويه عيب هالحكي هاي جدتكِ. جدتي تخدمها حرمتكِ، عجل شنو شغلها هنا؟

حرمتي لو أعرفها مقصرة كان إليكِ حق تحجين، بس يا بوي شايلة البيت على ظهرها وما فتحت حلكها. أم أركان: يطبها مرض محد طقها على إيدها، وبعدين تحمد ربها قبل كانت تخدم بالبيوت وين محصلة هيج بيت. أم أركان هالمرة تجاوزتي، الثانية أكتمكِ. بيبي: كانت تخدم وكلنا خدمنا أهلنا قبلها، وهي ربي عوضها لأنه بت خير، بس خوفكِ على اللي راح تخدم لخاطر تعيش. والله ابني وزلمتي بعدهم يشمون الهوا ما يقصرون علي شيء.

أبو أركان: الظاهر أنتي كبرتي وبديتي تخرفين وما تقدرين تضبين لسانكِ من اللغوة. بعد خو قوم طقني. وأدوس راسكِ، انهجبيييي لا أترس حلككِ تبن. الله يأخذها أم السحورة سودنتكِ. لا حول ولا قوة إلا بالله، ما نخلص اليوم، وأنتي يبه عش ما تأكلين؟ شهد: عجل جدي ما دريت. خير بويه؟ عمتي سعاد حامل. شنو؟؟؟ سعاد: بعدني ما متأكدة. وعش ما قلتي؟ باجر من الصبح ناخذكِ للمستشفى. بيبي: لا حامل وأعرفها من زمان ومناظرة هي تفرحكِ، بس باينها خوثة.

سعاد: والله جدة ما متأكدة، أخاف أحكي وتفشل، قلت من أتأكد فرد مرة وأحكي. أبو أركان: الحمد لله ربي تقومين بالسلامة يا يبه. بيبي: قرت عينكِ يا يمه، إن شاء الله تخاوي أركان ولو كبر بس يظل الأخو عزوة وسند. أي بالقرآن ربي كريم عطاني وأني بهذا العمر. بعدكِ صغير يا يمه، وهذا الأجباره تالي صبركِ بعد وراه كثير جهال يردون حق تعبكِ وكسرة اللي راحوا. إن شاء الله. أم أركان: كل عقلكم فرحانين؟ ما استحيْتَ تخلف أنتَ وحفيدك.

عش يبه، أخجل؟ شنهو زاني؟ ربي دخيل اسمه، دز لي رزق بدل ما أشكره أخجل. لا تخبلني، شتقول العالم تخلف من بنت الفلاح؟ والفلاح وبنته براسك أنتِ وأهلك. جثير حملت وقلت ميخالف لخاطر العيشة، بس تصل هينه لا كلمة مالها ثاني، لو أني لو هي. المطلوب يا بنت الخير؟ تنزل الجهال وتحفظ مي وجهك قدام السلف وتطلقها، أظل ما أعمل كل هذا أرجع لأهلي.

يا مكبر الباب قدامك، هوينا خلصينا من شرك، لا أنتِ حرمة من بيتك ولا لسانك مال بنت شيوخ وترفع راس زلمتها، ولا أنتِ القاضبة خطارك بالهلا عش ضالة. هيك يا أبو أركان؟ هاي تالي عمري تطردني من بيتي؟ ومن السلف إذا ما تحشمتِ وصرتي بنت عالم قاضبة لسانك، أطردك بالنص القاضبني عنك أركان عامل خاطر له. من يومي بنت عالم غصبًا على أكبر شارب، ولساني شرف سلف بكبره، وراح تعمل اللي طلبته.

خوش حجي، ولو عيب عليّ بهذا العمر أعملها، بس أنتِ طالق وهاي الثالث، قومي ردي لأهلك تاتتعلمين التربة صدق. يمه طلقتني! يبووو! ولك تحرمت عليك! لا دخل الله ودخلك، وين أولي؟ حسام قوم جدي خذها زتها يم أخوها. يا أخوي ما عنده ياكل، أبوس رجلك بالقرآن نفس ما تسمع لي، تعرفني أهتر من أضوج، دخيلك ردني. يبه اتحرمتي استغفر الله، قومي ستري نفسك ولي لأهلك.

يبووو عمة أبوس رجلك احكي وياه، ما رايد شي بس يخليني يمكن يم بيتي وعيالي، أتركهم هيك؟ بيبي: موش بيتك هذا، بيت سعاد، والعيال عزوتها، عبنها تستاهل، مرة حوك. لا لا بالقرآن أموت، لا تعملوها، هذا تعبي وبيتي بنيته وكملته بروحي، دخيلكم، يمه لحقيني عش ما تخافون الله. عفيه لحرمة ابني، إحنا عالم ما نخاف الله، يلا قومي فارقينا، أنعل أبو خيرك لأبو اليوم اللي دخلتك بي للبيت.

عش عمة سنين وأني أخدم تحت رجليكي وصاينة زلمتي، أبوس رجلك بالقرآن أموت يمه، هذا تعبي، كل حاجة بالبيت شريتها بروحي وأخاف عليها أكثر من بزرتي، تردين أروح وأتركهن لهاي؟ وهاي صاحبة كل هالخير وعيالها راح يكونون صاحبين هالبيت وأخوه أركان. يبوووو، أشقق هدومي أبوس رجلكم، ولك يممممه أركااان تعال لي. أباوع لعمي أشر لحسام، جرها وهي انجنت، قامت تلطم على وجهها اتخبلت.

من قهرها طلعت بره اتملخ بروحها، اشقد رادوا يهدوها ما قدروا، لمن أغمى عليها، دخل أركان يركض، شالها هو وحسام للمستشفى. يومين والبيت هدوء، بس رنو أحس قوتها ضعفت، قامت اتخاف بس تشتغل. سعاد صدق كامشة البيت، تقول فراشة مو مرة، من خفتها ولسانها ينقط عسل، تستقبل الخطار ذاك الاستقبال، وعمي تتلقاه من الباب، شايلته بالصلوات، رجعته صدق عريس.

لحد ما طلعوا أم أركان من المستشفى، راد يجيبها أركان للبيت، رفض عمي، تالي أخذها يم أم عامر يم أخوهم. بالبداية ظل بخاطره، بس من شاف فرحة أبو وهدوء البنت هو هم ارتاح، حتى فكرة بغداد لغيتها، بالاخص من ماما ما فارغت لي مخلصاتها زيارات هي وأم غيث وطايرة بعيشتها الجديدة، وغيث يدز بهالفلوس إلهن وهن مستمرات بالطلعة.

مرت الأشهر، شهر أحلى من شهر، البيت صار جنة، وقت العصر نخلص شغل نطلع للمزرعة، نقعد يم البحيرة لتالي الليل، حتى عشانا بره. أجواء اتجنن والضحكة تارسة المكان، وأركان جان حاسبني طفلة هيك خايف عليّ، بس عيبه الوحيد الغيرة، ألف يا علي يالله ياخذني للدكتورة، أمنيته يحبسني. دخلت بالتاسع، قاعدين بغرفة بيبي نسولف ونقلب الملابس اللي جهزتها للطفل، جبنا طاري الولادة، رد قال: حجزت مستشفى خاصة يم دكتورة عملية.

بيبي: عش يمه البنت ولادة طبيعي. لا أخاف ما تتحمل. يمه اشبيها ما تتحمل؟ حدثة بعدها بعز قوتها. قلبها أخاف يتعب من الألم. موش قال لك الطبيب ما عليها؟ هذا زمال جده، من الأخير ماكو طبيعي وحجزت لها بمستشفى وحددوا الوقت. وأكيد حريم. لا أفا جده، عجل هالقرون لمن خالِهن؟ غير تاكشف حرمتي على زلام؟ أنت منهو عطاك حرمة؟ ولك طويرة دجاج ما أعطي لخبل مثلك. مشكور جده. أخويه رنو أمك خبرت تقول عش ما ترد عالجهاز.

رنو: وعش ما تجي هي لو ما صدقت خلصت مني. تعرفين الأوضاع تعبانة بينها وبين أبوي، لا تحمليها جثير تراها تعبانة. عجل خليها، موش عملت كل هذا لخاطر الفلوس تستاهل. تريدين أوديك يم جدتك أم غيث كم يوم؟ يا ريت والله. تمام تهيري تا أوصلك العصر ويه لحن. سعاد: وأني هم وياها والله ضايجة. من عيوني تهيرن. هو يحكي وأني حسيت شي طق بطني و أجاني الألم، صرخت وأركااان. شكو يولي؟ راح أمووووت. بيبي: صلوا على محمد، البنت ولادة، الحق يجده.

يعني شأعمل؟ شأعمل؟ ولك كوووم استعجل. وييين أروووح جده؟ أنجعلك بالصرع يا المخبول، ثولتني بصوتك، تقول كلب مزارع، ولك خذ حرمتك للمستشفى، وأنتِ سعاد يجده تهيري هديمات الجاهل تاتروحين وياهم.

رجع الألم أقوى ما تحملت، صرخت وهو طفر بعد ما يعرف شيسوي، كلما يزيد الألم أبكي، وهو يزيد خوفي بتوتره، من كثر استعجاله حتى ماما ما لحقنا نخبرها، لفني بالعباية وشالني للسيارة، أخذني للمستشفى، الطريق كله كامشة دشداشته، كلما تجيني الوجعة أجرها وهو وياي يقطع النفس ويسحبه، لحد ما وصلنا. نزل شالني للداخل، قال لهم عملية، اشقد رادوا منه أصر، وأني كامشة بإيده خايفة، تالي دخلوني على مسؤوليته، دنق باس راسي قال: يمك أني لا تخافين.

خابر ماما خليها تجي. ميخالف بس لا تبكين، يلا يا روحي مناطرك هينه لا تتأخرين عليّ. أركان خايفة. يا بعد أركان وطوايفه، أتوب بالقرآن هذا وأنعل أبو لأبو اللي يقول لك بعد رايد. لا تروح خليك يمي. يمك يولي بالباب ما أروح، بس هدئي لحن بروح أخيك، وعديني ترجعي لي بالسلامة. خايفة. لا يولي لا تحكين هيج، بالقرآن ما ظل حيل يحمل بعد. ما تقول اشتعلت ناي عرفتني عليك؟ اشتعلت روحها كل ما تهل وتغيب. ضحكت، دنق باس راسي وطلع،

ضربوني الإبرة وأني أردد: ربي إني مسني الضر وأنت أرحم الراحمين، لمن رحت بعد ما أحس. فتحت عيوني، حلقي مر وراسي يفتر، الصورة مغوشة، رجعت غمضت، أسمع أصوات بس ما أقدر أميز، اشوية وبدت توضح، فتحت عيوني، أركان واكف كامش إيدي، حركت إيدي انتبه لي، ضحك ودنق باسني، همس: الحمد لله ربي. سعاد: الحمد لله على سلامتك خيه، موتينا وراك. شنو جبت؟ ولد جنة فلقة قمر، يلا بعد فاقت خذ ابنك كبر بإذنه. لسه ما كبرت.

أنعل أبو الخلفه لأبو اللي يفكر بيهم بعد، يولي منطمرة ساعتين عش من دون البشر. ما أدري يمكن نعسانة لأن ما نمت البارحة. استلم ما تفرق بين البنج والنوم، وينو الجاهل؟ عطيني خويه. خليه أشوفه يشبه ناي. تا زته من الجام وروح أخوي، يولي كل هالتعب والضيم تالي تريده عالصگعة؟ عش يولي بيش طالبتني. لعد لمن يشبه؟ ما أعرف والله، شكله غريب ما مبين. شود أشوف. بس أكبر لحظة.

كبر، أباوع له واقف يهمس بإذنه والضحكة مالية وجهه، يباوع لي بلهفة وخوف، حمدت ربي على هاي الهدية، صدق حسيت ربي عوضني بعد اللي شفته. خلص نزله، خلاه قدامي شهقت. شكو يولي؟ هذا عاشق نفس لونه ودورة وجهه حتى طبرة حنكه. بيها الخير أخوك اشلون جان، لا تقولين مثل ناي. لا هادئ هسه ناي تحقد عليّ وتقوم تكرهني. عش يولي؟ لأن ابنها ما يشبه عاشق، وابني يشبهها، عزه بعيني أركان. شكو يولي؟ أبدلوا لو اشلون؟

لحن يبه البنج بعده شغال بيك، تهترين بدون عقل، ردي نامي. بس أبوسه. لا تنفتح عمليتك، لا تتحركين. وين ماما؟ طالعة لسيدة زينب ويه عمتي، يومين ويرجعن بس أمنتها. بقينا أربع أيام بالمستشفى، سعاد وياي وأركان ما تركني ولا لحظة، بليل يسهر على ابنه يفتر بي لأن الظاهر أخذ شكل عاشق وأخلاق ناي. أركان يفتر يباوع لي صفح، بسرعة أغمض عيوني أخاف يعيط بيّ. بالنهار ناي تتصل، اشقد حاولت تشوفه أتحجج نايم لأن أدري بيها راح تضوج.

الدكتورة تقول طلعوا وهو مجلب يحجز بعد، لمن قمت أقدر أتحرك يالله رضى نطلع. رجعنا للبيت، عمي محضر الذبايح وعازم الدنيا كلها، فرحان جاه حفيد، بس أتراجع بعد يومين من بقائي بغرفة بيبي، من كثر الرعصة مال شاهين لا ينام ليل ولا يسكت بالنهار. الكل مخبوص بس يريدوا يسكت وهو صوته مو تقول طفل، أنفاس واصل للشارع، طلع العاشر لو طلعت أرواحنا. استوني نيمته خليته بكريكه، باوع لي أركان أشر: ها؟ همست: نام. اتمدد عالجرباية بتعب. رحت يمه

خليت راسي على إيده همست: بعد بس واحد و وأطلقك وأنعل أبو لأبو أمه اللي يفكر يردك. يا عزه اشبيك؟ قومي لك منين طلعتي لي أنتِ؟ من عائلة كلكم مخابيل، عش يبه تورطوني وياكم. تره بس ناي مخبلة عندنا. الله يلعنها ويلعن الساعة اللي تعرفت عليها، اشتعلت روحها. أخذ ابني وأروح منا. مروتك سويها. ما أروح كذب. أعرفك عجل دعاء أمي وين يروح؟ صدق اشلونها؟ خربت على روحها بإيدها، وهسه ندمانة تأكل بإيديها. ما يرجعها عمي؟

شيرجع تحرمت وعمك حصل لحم أبيض وناعم، مستعد يذبحنا عكس القبلة يا يريدها. تره حبابة سعاد. وأنا أشهد بنت حمولة. وأني؟ بنت قلبي. لا تحب شاهين أكثر مني. إذا هو القلب فأنتِ النبض، ما حبيته بس لأنه منك، دخل روحي. أركان. عيونه. سبحت ووو شعرك ما لحقتِ اتمشطي أعرف، قومي يولي جيبي المشط، فوق هم وطلايب السلف على طياح حظ ابنك، أريد بدل ما أنام أقضب المشط وأقعد أسرح. لعد أقصّه؟ تا أقص راسك، قومي يولي. ما بيّ حيل أقوم، بعيد الميز.

مسح وجهه وقام، ذب تي شيرته، جاب المشط وقعد وراي يسرح شعري، مرات ينكسر خاطري عليه من أشوفه تعبان، ما يهون عليّ أخليه يمشط، بس أحس بإحساس حلو من أشوف صبره ويقعد يسرح ويباوع لي بحب، أروح غير عالم، بالاخص من يضفره وياخذني لحضنه وينام. البيت بعد ما كان مشاكله ما تخلص، هسه صار ماكو أحلى منه. شهد هادئة وحبابة، وسعاد حاسبتنا بناتها، هي تشتغل ما تخلينا نمد إيدينا، صح جابوا اثنين يساعدنها بس اتعودت تشرف على كل شي.

بيبي عاشت ويانا، ظل ابنها المعوق بمكان مجهول محد يعرف بي غير غيث وأركان. فارشينا وقت العصر بالمزرعة، شاهين كبر صار عمره بالأشهر، ما ينزل من حضن بيبي وهي هم طايرة بي، نست حتى الورث والظلم، عينها بيها تقول شاهين الجبير رد لحضنها مو ابن أركان. شهد يمي قاعدة نلعب طاولي، وسعاد تضحك علينا لأن نعصب وماخذين الشغلة جدية. دخلوا عمي وأركان وراهم حسام، أسلحتهم على متونهم، أجوا يمنا دنق أركان شال شاهين يبوس بي ويلقف فرحان.

موتت الملك شهد، قلبت الطاولي لأن ثالث مرة أخسر، ضحك عمي قال: بعدكن على خبالكن؟ بيبي: اتركيهن يهوسن، عجل سوادينهن وين يزتنه؟ شهد: جدو هي اتزاغل. كذب عمو هي ما تعرف تلعب. عمي: بين الصدق والكذب نحكم. اشلون؟ قومي لحن تعالي يمي تانلعب أني وياك وندحق الحق وين. بيبي: لا بالله، هذا الجبير. ولك أركان، يجده لا تفر الجاهل هيج استوه راضع. أركان: جدة تركي شاهين ودحقي جبير السلف شيعمل.

: جبير السلف لو أعطي مجال يتسابق حتى ويه شاهين على حضني. أشوف الزلمة كلما جايه يرد للخلف. عمي: هههههه عجل أخليهن يتمالخن. قومي يبه. أخذتها وكعدت يمه، بلشنا نلعب وأركان يضحك طابق ويه أبو وحسام وياي ياشرلي شسوي والمن أحرك لمن أخذت الكيم. قفزت من الفرحة. ضحك كال: لا بطلة، صح بيها إمدادات بس عفية عليج. : شعليها؟ : طلبي الج التردي. : تعزمنا على بيتزا. شهد: وفنكر جدو. : أركان جيبلهن اليردنه كم لحن وشهد عدنه.

اليوم مر بكد ما مرتاحة بيه وسعيدة، أتمنى يطول ما يخلص. بكد ما انظلمنا ويأسنا من حياتنا، بكد ما ربي عوض صبرنا وجبر خاطرنا بأهل حنيتهن تفوق حنية أهلنا. أباوع لأركان شلون يلكف بشاهين ويضحك، نزلت دمعتي. رفعت راسي للسما أحمد ربي وأستغفر على كل ساعة يأست بيها وبجيت من قلة الصبر. أنطى شاهين لبيبي واجه يمي، دنگ مسح دمعتي وباس راسي. : ليش تبجين العمر وهلو؟ : لأن الله رزقني بيك. : ول يابه عجل أني شعمل؟ : سويلي بعد طفل.

: قومي لأهفج دفره أردج بحضن أختج عدل. ضحكت. كعد يمي أخذني لحضنه وأنتجه على الشجرة. : شنو حلمج لحن؟ : أي شيء أقوله تسويه حتى لو غالي. : ترخصلج الروح. : أظل بحضنك وتحبني كل يوم أكثر. باوعلي وابتسم، رجعت راسي بحضنه. : أعشقج يا أول نفس أخذه بلهفة. ***ناي*** راجعين أني وغسق من الجامعة، بدينا سجلاتنا. دخلنا للمطعم أتلگانا كرم كال: يلا كلمن شغلها. : وين غيث؟

: انخطف ناي، لا تتحججين. الماسحة بانتظارج، وأنتِ يا الشيخة على المطبخ. المواعين من الصبح تصيح وين غسق؟ غسق: جود، ترضى أجي تعبانة ويدخلني على المطبخ؟ جود: أي أرضى، على المطبخ يلا. وأنتِ ناي على المسح بسرعة. إلكن ربع ساعة إذا لقيت أي مخالفة تنرفضن. : نااااي خلي أنطلقهم. : والله أحنا المستفادين، ياريت تخلصنا. : عزه اليسمعك يكول ظالميكم. : كولي لا حتى الطمك كف أعدل وجهج. : شبيييك هااا شبيك؟

: غسق ملابسي صار أسبوع ما مغسولة، متقوليلي اشوكت ناوية تغسليهن؟ : نسيتهن باجر. : تمام، والمواعين المطبخ مقلوب. : اليوم عليك، البارحة غسلتهن أني. : لج كم مرة قلتلج ابتعدي عن ناي لاتتعلمين جذب؟ : ما أكذب وناي شاهدة، ها ناي مو غسلتهن البارحة؟ أشرت: أي. : آخ ربي منين جبت هالبلوة على راسي، تركج من المواعين، اشوكت تنظفين الشقة مو حتى قمنا نوزع للجوارين تراب من كثر ما خزنّا؟ : اووو جود لو عرفت الزواج هيج ما أتزوج.

قلتها: أمشي حبيبتي، ذوله ما وراهم بس المغثة. دخل غيث مدنگ على فونه، على إيده قمصته. كعد على طاولته، دقائق واجت وحدة شعرها أصفر دخلت لابسة أو ما لابسة تقريباً مصلخة بهالبرد. وصلت يمه، قام سلم عليها وسحب الكرسي، قعدت وقعد هو. طلب قهوة وبدأ يسولف وياها وأني على وقفتي صافنة. ندستني غسق. : خلي أشوف وين توصل. : توصل لداخل ذيج الغرفة، ربع ساعة تطلع حامل. : صدق هذا قدامي قام يجيبهن؟

: أمشي أني أهفه كله وأنتِ أنطي دفره بين رجليه، هيج ننهي. : هم تظل عيونه يباوعلهن بيهن وإيده يقرص بيها. : نكهربه بطاقة قوية نشله. : عقله يظل يتخيلهن. : نرگعه هاون براسه نهستر عقله. : إحساسه ياخذه لعطرهن. : ناي نضربه طلقة ونخلص منه. : ماكو غيرها بس لا يروح شهيد وتالي يتوله حور العين هناك. : لج باوعي شلون يباوعلها، هذا مو طبيعي مريض بشيء اسمه مرة. : شحنيني بعد.

: إذا تأخرتي شوية راح يلطشها على الميز ويعضها، ولج روحي شوفي منو هي. رحت يمه، أتجتفت. باوعلي قام راد يسحبني يمه، دفعته وجريتها من خيط فستانها، قومتها. : منو هاي؟ : ناااي، العميلة الجديدة. : أهااا وأنت عملائك يختلفون عن البشر لازم بنية وشرط حلوة. : بدون خبال تركي البنت. : ما تنعدل لو ألف سنة وهاك أشبع بيها. تركتها ورحت، صار بوجهي كرم أنطاني ماسحة. : هاج وتوليهم. : ميسون حرمان أوسخ إيدي بهيج أشكال.

: طلقي خلي يولي عيشي وياي، والله أدلج. أني أجيبلك مخضر وأنتِ سوي دولمة. : كرم وخر لا أركعه بيك. : مو وجه نصيحة. أخذت سجلاتي، ردت أطلع اعترض طريقي غيث. : وخرر غيث. : يولي اعتذرت منها وكنسلت الشغل وياها. : بس اعتذرت لااا قصرت جان أخذتها لحضنك. : والله من ناحية الحضن فعندها حضن حضاري ما يتفوت، بس أني خوش ولد أهلي تعبانين عليه. : لا عجبتني غيث، وخر لأركعك بالسجل وأفشلك قدام موظفينك.

: خليتي بيها فشلة، تعودوا كل يوم قابضتني بالسان الينقط عسل والإيد الخفيفة. : من سوالفك العوجة لو مثل باقي البشر جان سويت وياك هيج. : لو مثل باقي البشر ما جان دحقت بجهرتج، ولج أنتِ لا وجه ولا أخلاق. عضيت إيدي ودفعته طلعت وهو وراي يضحك، نزلت الدرج جرني. : إيدك. : أوصلج. : أرد مشي مالك شغل بيه. : أي وتعالي بليل قولي تعبانة، تازتج من البالكون. : يمه أني منو دعا عليه؟ : ماريد أصدمج بس أمة عيسى ومحمد بأجمعها.

: غيث ترى مليت، تعرف شنوو مليت، كرهت روحي بسببك. : اليسمعج يكول رادتلك وجه الصبح بيد بطل والثانية بنت. : هم إلك يوم تسويها، بالك مستبعدتها. : لاه لاه وسفه هذا ظنج بيه مع الأسف. : ترى دتحرك قلبي بأسلوب ردك أكثر من قبح فعلك. : ههههههههه يولي أعصابج. : بس أريد أعرف من شنو مخلوق وهالمرض البيك اشوكت تشفى منه؟ : بس اهدي، أخذي نفس عميق، استرخي ودحقي هالحاته الوراج ول ياببببه. ضربته بصدره، قمش إيدي وطكها ضحكها.

: شفيت غليك ارتاحيت. : تامن أجيج بليل لا تظلين تتشرطين. : غيث وروح أخوي إذا سمعت بس مو شفت متعامل ويه عميلة أنيمك باب العمارة حتى مو داخلها. : أي بالقرآن كلش معوزة حنان هسه شايفه شيجن ورا الوحدة أوف يابه صواريخ موش حريم. ضميت وجهي. دندن: أضم حبك وسط روحي أموت أني عليك أنت. نبض قلبي إلك وحده فد عيونك إلك دكته. : كملت. : يولي العده كنز مثلج ما يدحق على حلال العالم. : غيث والله تعبتني.

: لخاطر تحسين شلون وارتني وروح حاملج. : جبت الجهال. : لاهسه رايح يلا تعالي وياي. : عندي شغل. : يلا على الأساس إذا تركتي راح تموتين جوع. : ما آخذ من فلوسك، هذا الشغل الوحيد حلال أوكل منه جهالي. : ما اختلفنا، وطفري محد يدري همه يخلصوا. انداريت لقيتهم صدق ملتهين، رحت بسرعة صعدت وياه بسيارته طلعنا للجهال خاليهم معهد تعليم لغة. وصلنا نزلنا دخلنا جوه أتلگتنا هيا تركض، دنق شالها وشمرها ليفوق وهي تضحك الفطيرة.

اجه علي كله: عجل وين عاشق؟ : يم الأبلة. : شيعمل؟ : ديساعدها يرتب الكتب وياها. : ابن أبوه كفووو. باوعتله. : لا تفهمين غلط، قلبه رهيف يحب يساعد العالم. : غيث ابتعد عن ابني. : يلا شلونوه هسه، روحي إذا مالقيتي حاصر المدرسة وواقعلها يتعضعض أطلع ما أفهم على طاري اجه وراج. انداريت لقيته سودة عليه شايل الكتب على قلبه وينفث ورا السنيورة، راحت أخذتهن من إيده خليتهن إيدها. : هالمرة شفته هيج، مرة ثانية أشكيج للمؤسس.

: هو طلب يساعد. : هو طفل ما يفتهم، أنتِ شنوو؟ شلون محملته كل هالوزن؟ نعطي فلوس حتى تعلمون أطفالنا لو تكربون عليهم؟ : ترى مسافة مو بعيدة. : قريبة لو بعيدة، إذا بس سمعت مرة ثانية مشارك بعمل صغير مو هيج عدل للمؤسس وهو يتصرف وياج. : تمام هاي هي. : وأنت يلا يابو قلب الرهيف. جريته شمرته على أبو. همس لغيث: متوحشة. : تاتعذروني. : طلقها. : موقّعتني على كمبيالة تجيب راسي. : عجل شلون نخلص منها؟

أشرت: تعااال يمي وأني أقلك شلون تخلصون مني. طلع يركض، أبو شال أيديه قال: خو ما حكيت أني؟ : لا جينات أبوي ذني ديطلعن بيه، يلا غيث. رجعنا للشقة، دخلت شمرت أغراضي وعلى المطبخ. صاح غيث: ناااي الجهال. : أي غيرلهم ملابسهم وافتح الشاشة الهم. : بعد ما تريدين أنظفلك الشقة وتكلك عش تخوني؟ : غيثثثث. : عيونه الريموت ماكو. : يمك تلقيه شغله واطلب خبز ما عدنا للعشة. : عاشق هسه يجيب. : عاشق إذا نزل ما يصعد لليل، خبر كرم يجيب بطريقه.

إيد بالطبخ وإيد بالمواعين، أحس هدوء صاير لكشني قلبي. طلعت لقيت غيث كاعد على القنفة قابض حزام والكل كاعد بالكاع يباوعون إجباري. أمنت رجعت كملت طبخ، غسلت المواعين الوسختهن. استوني طلعت لقيتهم ماكو بالصالة، رحت للغرفة لقيت هيا نايمة. وغيث خال علي وعاشق يشرحلهم على الحرام والحلال وشلون إذا شافوا وحدة يغضون البصر، وذوله فاتحين عيونهم وآذانهم وهو مستمر يشرح بضمير لمن قاللهم: هسه دحكوا جود يمشي وعينه للكاع. عاشق: -وأنت؟

-حتى كرم أيقونة للشاب الصالح. -وأنت؟ -أريدكم تصيرون مثل عمكم أركان، كلكم شهامة، أزلام ينحلف بروسكم. -وأنت؟ -ابن الكلب شجلبَت؟ -صدق أكو وحدة قاعدة بالعمّارة مالتنا بالطابق الخامس؟ -شلونها؟ -قطعة موش مرة. -نصّي صوتك لا تسمعك الهَتْرة أطيرها، بس شعجب تاركتها ساكنة هينه؟ -ما تدري، لأن عمتها عايشة هينه، وهيه إجت صار يومين. -متزوجة؟ -لا، طالبة، لأن عدها كتب، بس هاااي رفيجتي لا تأخذها.

-ابن الصقعة تتزاود وياي، انكتم، وإذا سمعتك تحجي بالحريم أنوب أطرّك طر. -عجل أقول لناي تطردها. -تاهفك دفره أعدل فجك. هزيت إيدي وطلعت يائسة من حالتهم، رحت لشقة جود لقيت غسق تنظّف، ساعدتها بكم شغلة، رتّبنا عالسريع، هيه دخلت تسبح واني رجعت للشقة، لقيتهم كلهم نايمين. طفيت الأكل، دخلت للغرفة، غيث شامر روحه نايم بتعب، حقه من ركضه ورا البنات.

أخذت ملابسي، دخلت للحمام سبحت وطلعت، نشّفت شعري، رحت يمه قعدت أباوعله، الله جامع شكو جمال خال بي. حرّكت شعره ع الكيف، فتح عيونه سحبني لحضنه، تمدّدت خليت راسي على صدره، باس راسي. -زعلتك اليوم؟ -مو جديدة، كل يوم تزعلني. -يولي، بالقرآن ماكو بعيني غيرك، ترى أتهزّل وياك. -مم، صدقتك. -هاي مشكلتك دوم تظنين بيه السوء. -يا سوء، أنت حتى هالكلمة قامت تخجل من روحها بسبب تصرفاتك. -اضحكي لج. -صدق دتحجي؟ اني محترق قلبي وأنت تضحك.

-شعملك إذا أنتِ خبلة تغارين حتى من روحك. رفعت راسي، باسني من شفتي، وخرت. -اكو وحدة قاعدة فوق شقتنا، بس وروح أخوي موش اني قعدتها، وأول مرة اسمع بيها قبل شوية من عاشق. -خو هذا جاي يطلع النسخة المصغرة مالتك. -كون يصير زلمة وما يخلي على روحه لزمة ولا يعطي كلمة تطيح حظه لباقي عمره. -يعني تريد تقنعني من أنطيتني كلمة لهسه ما تقربت لغيري؟ -لا ناي، أتهزّل وياك، وجدامك أي، بس وداعة جهالي ما عملت شي وراك ولا فكرت حتى أعملها.

-وإذا حللت من الحلفان تروح. -ما أخاف منك، خايف من ربي، عاطيني الجنة بيدي، وأعرف أقل غلط مني يحرمني منها. -وإذا حرمك، ترى اكو أحلى وأزغر يتمنن بس تحجي وياهن. -واني ما أتمنى غيرك، من اول ثانية شفت بيها بالسيارة قلت هاي نصيبي ومستعد أنطي روحي وما أخلي غيري ياخذها. -بعتني واشتريتني ورجعت بعتني ورديت اشتريت. -وجنت مستعد أظل طول العمر أبيع وأشتري لمن تركدين وتهجبين بحضني. -تدري مستكثره هالشي على روحي.

وخر شعري عن وجهي، أشر لي. -طلبت من ربي بس الراحة، أنطاني الراحة والاستقرار والسعادة، جنت أحلم أنام بأمان، هسه من كثر الأمان أتمنى ما أغمض عيني، أريد أظل بس أباوعلكم. -أذيتك كثير. -حبيتك أكثر. -اكو شي بعد تتمنى يتحقق؟ -بيت دافي، أطفال حلوين، زوج ماكو بقلبه غيري، بعد شنو؟ -أدخلج بحضني أكسر عظامك بين أضلوعي.

مرت الأشهر وحياتنا كلما تتقدم تحلى، والسعادة تكبر، بالأخص من حملن غسق ورويدة، والكل منتظر أولادنا الجدد حتى تكبر عائلتنا أكثر بعد. كل الوقت مجتمعين سوى، ما نفترق ولا لحظة، بس بليل وهم من الفجر ينزل كرم يدق البيبان علينا حتى نلتم للريوك. اليوم محتفلين بمعرفة جنس الجنين، رويدة ولد وغسق بنية. قعدنا من الفجر على صوت تفلّش باب الشقة، فتح عيونه غيث قال: بيش الساعة؟ -ستة. -كرم، الله يلعنك. -اتركه هسه يمل ويروح.

-كله ابن الطرقة وليت بالثنتين، شلحقت تنطمر. ضميت راسي جوه المخدة لأن صوت الدق يصحي الميت، وهو مستمر بدون إحساس، لمن قاموا الجهال فتحوا الباب، ثواني وباب الغرفة اتكسرت وصوته يقول: كومووووواا. غيث: اشتعلوووو. -غيث، أحسب للأربعة وأدخل. -يلا شلون الغباء يصير بعد؟ لا هيه على وجه ثلاثة ولا هيه خمسة، استغفر الله. -نااااااااي. -ومررررض، كرم، أخذ الجهال وجهك عالمطبخ، سوي ريوق. -راحت رويدة تحضره، قوموا ناي، الدولمة طبختيها؟

-كرررم، ارحمني، دخيل ربك، أنعل أبو هيج رفقة، ابن الصخلة البارحة موش للثنتين قاعد على أفادي تلف بيها أنت والصقعة، لو الثول فخر يمك؟ -خليك نايم ناااي، تدرين البارحة وين جان غيث؟ بعده يحجي وطفر غيث، فتح الباب أسمعه يرزل بيه ع الكيف. تركته و قمت رحت للحمام سبحت، طلعت لقيته واقف يم الميز، أجه حضني من ورا، دنّك باسني من ركبتي. -روح اسبح دانتريك.

-لا يروح بالك بعيد، رحت لقبر سارة، اكو حسبة خانقتني ما ارتاحيت لمن زتيتها يمها. -غيث، ميتة ما يصير عليها غير الرحمة. -ما ظلمتها، عملت كل اللي جان بخاطرها، عش هيج ردتها الي بغدر. -حقها، اني أسوي الأكثر، تجي وحدة تاخذ حبيبي مني مو بس أبيعها لا أذبحها وأقطعها وصل. -جذب ما تعمليها لأن بنت أصل ودمك نظيف، ندمت على كل لحظة من عمري مرت واني أدحك بوجهها ومتغاضي عن عملها الأعوج، خايف ربي يردها بهيّا.

-عدها أخوها يفدوها بنفسهم، وأبو وخوال يحمها بروحهم، غيث فدوة لا تجيب طاري الماضي كدام الجهال. -شي صار واندفن بمكانه، ما راح ينذكر غير طاري حبنا. باسني وقال: الحقي على الخبل فلّش المطبخ. طلعت للمطبخ صدق، لقيته متربع عالميز وهيا بحضنه، وعلي وعاشق يمه، كوه فاتحين عيونهم يتثاوبون. رويدة واقفة تسوي الجاي، تخصرت صاح: شكوو، فوق ما أخرتونا، متنا جوع. -كرم، ترى عدكم شقة أنت منتبه لروحك؟ أربعة وعشرين ساعة ساكن هنا.

-امشي لج، شيسوي رب العالمين بيكِ، وجه مزرف وعيونه شريرة. -غسق قعدت؟ -إي من الفجر قعدتهم. -مفتخر بالإزعاج حضرتك؟ -غير اشتاقيتلكم، لعد شسوي؟ صدق اكو فيلا عارضيها ع البحر، ليش ما نشتريها ونسكن سوى؟ -لااا دخيلك، حتى الساعتين بعد ما ألحق أنام إذا قابلتك. -محزوزة وملبوسة، ظلي بالغل مالتك وهم راح أقول لغيث نشتريها، تعبت من الصعدة والنزلة. -ربي الصبر، روشة حبيبتي، هدرتي الدولمة؟

-إي أول ما دخلت خليتها عالطباخ، بقى بس الكبة أخذتها غسق دتقلي بيها، كرم قوم جيب الحافظات بالشقة ظلن. -شمسوين ريوق؟ -هيا ته مخلمة وبيض سلق لغيث. -هذا مسوي رجيم بس الصبح، هسه يصير الظهر يأكل حتى القدر، كرم جيب خبز ودبة مي كبيرة حتى ما نحتار هناك. طلع كرم ماخذ الجهال كلها وياه تقول راح يحرر الأندلس مو يجيب حافظات، دخلت للمطبخ داشيل الأكل، قالت: اني أودي بس روحي صيحي جود وغسق. -هسه يجي كرم يصيحهم بطريقة.

-بعدكِ ما تدخلين شقتهم إذا همه بيها سوى. -لمن تقوم تثق بي وتقول شنو طلبت منه وليش تركته كل هالسنين. -مو يمك الشغلة. -ترى أعرفها يمي وأدري شنو هيه، بس حلفتلها ليش ما تصدق. -هيه هم طلبت منه يحلف ما يحبك، بس هو رد: إذا حلفت معناتها انتهت العلاقة بينا لأن مو اني أخون صديقي وأخلي عيني على زوجته. -وعلي هاي هيج شلعت قلبه. -لا كالته: خليك لا تحلف لأن ما أردلك بعد لو تصير نبي. -لعد شلون ردتله؟

-هههه تنازل ورد حلف انو يحبها الها، وأنتِ ما يشوفك غير أخت، بس فدوة لا تقولين الها السمعتي، ترى والله خجلت وأمنتني ما أجيب طاري الحجي كدامك. -اعتبري روحك ما حجيتي، والحمد لله انجمعوا، يلا راح يجون، استعجلي فدوة. أشرت إي، شلنا المواعين وطلعنا خلينا الريوق، صدق دقايق ودخلوا بدون لا يدقون الباب. الكل التم عالسفرة مثل كل يوم بالكاع لأن بعد الميز ما يكفي.

اتريّقنا ع السريع وصار الركض صاعدين نازلين بين الشقق نحضر غراض الطلعة. جود اشترى سيارة عائلية لأن سفراتنا كثرت، خصوصًا وقت الصيف. وصلنا للساحل فرشنا المفرش، والولد خلوا المنقلة يشوون الأكل. كرم كدامنا يلعب طوبة ويه الجهال، اتصلت لحن فتحت كام قالت: وينك من البارحة ماكو؟ -مو اتصلت بماما قالت باجر تجي لحن، استغربت قبل أربع أيام أنتِ يمهم شكو جاية كل يوم؟

-مرت حسام تريد تشتري غراض، اجيت وياها هم أخذ كم شغلة، وعمتي عزمتنا عالغدا اجينا، صدق ما بشرتك شهد حامل؟ -ألف مبروك، الله يتمم بالسلامة، شخبار رنو؟ -بعدها يم أمها مصرة عالطلاق. -ما يطلقها، هم خطية شكو خالها؟ -هو يريد يطلق بس سماهر طالبة مبلغ كبير عود تعويض، فهو قال: خليها معلقة لمن تتنازل وتتوسل بس حتى أطلق. -أسماء شلونها؟ -ظالة تخدم بأبوها الساقط، تتحفظ وترد على جهة، وأنوب أمها هم تعبانة ما رضت تستقبلها،

قالت لها: ما أقْدَر لكم اثنينكم، خليك يم خوالي. -الله يلعنها بعد شكو ماكو؟ -ماكو شي، هدوء، بس عامر أبوها راح يعرضه على طبيب نفسي لأن أحواله ساءت بالزايد بعد الحادث، بالأخص من عرف هناء صار عدها ولد. -حييل، ربي لا شماتة، هو وين عايش؟ -يمه وسهيلة متكفلة بي، دتقول لك يقوم ويقعد يكتل بيها، قبل كم يوم كاسر إيدها، وإذا منعوا ما يخلوا يضربها يقعد يبجي مثل المخبل. -عدلة ربي فدوة لاسمه، لعد أبوها وين ما يعالجه؟

-يقول ما عندي فلوس، النهار كله يدعي على غيث هو وسماهر لأن أحوالهم تعبانة، راح العز كله، ظالين عالراتب اللي يدزه غيث، يا دوب يكفيهم أكل، راد يرد للشغل القديم. -بس لا أركان وحسام يردون؟ -لا طبعًا محد يرضى، وبيبي قالت: بسكم ما ظل بالعمر تانخلصو بالفقد، عطاكم كلمن حقه، قعدوا وانكتموا، واللي يريد يولي يشتغل يروح بروحه، لا يقرب صوب أحفادي.

-عفية ببدعة، صايرة تعجبني، اتركيهم منهم، ولك ماما راح تجي عالعطلة هيه وعمة، تعالي وياها. -إي قال أركان: نروح وياهم لأن عنده شغل ويه غيث، نظل شهر يمكم. -هذا الخبر حلو، قولوا قبل لا تجون بكم يوم حتى أنظف شقتكم، وين عمه؟ أنطينيها داحجي وياها. أنطتني عمتي وأشوف طفل بإيدها يشبه عاشق طبقة الأصل، رادت تأخذه لحن، قلتلها: انتظري، هذا منو؟ -ها؟ -شاهين؟؟ -إي ناي والله ما لي شغل، هو طلع شكله هيج. -شلون طلع هيج؟

أركان شايف عاشق لو أنتِ تفكرين بي أكثر مني؟ -أبد والله، حتى ما شايف صورته واني مو على بالي. -لعد ليش ما طلع ابني يشبه لحن، خلي أنبدل اني وياكِ، أنطيك هيا ونطيني هذا. -ليش خو عاشق أنطيني. -لا عاشق شايل اسمه، أخذي هيا تشبهكِ فدوة. -يعني ترديهم كلهم الكِ، الشكل والاسم، ولي ناي روحي خلفي ما أنطي ابني. سديت الفون باوعت لغيث. غيث: لا تعبين نفسكِ يجي يشبه أخوته. -لا بلكي يطلع شبه عاشق.

-هالمرة يطلع شبه كرم ما يقبل غلط، استجني وركدي، حمدي ربك ع العدك. رجعت الفون، بقدر ما فرحانة وأخيرًا صار عدنا شبه عاشق، بقدر ما العبرة خنقتني عرفت ربي ليش ما خلى واحد من أطفالي يشبهه. قاعدين نسولف، كرم كدامي متمدد خال راسه بحضن رويدة، وعاشق على بطنه يلعب بأذاناته. وجود واقف يشوي، يمه غسق تتشرط شلون يستوي، يغافلها عالثواني يأخذ بوسة من خدها، تضربه وتمسحها بتشيرته وترد تكمل حجي. علي على جهة محتار بهيا يلعب بيها،

ندسني غيث قال: دحكي تلوميني عش قلت له هاي بنت عمك. -بي صفات هواي من خاله أركان، كلما يكبر تبين رصانتنا وثقله أكثر، عكس ابنكِ تريدلك صفة زينة بي ماكو. -ما أعرف هالولد على من طالع. -مشكلة، يلا الحمد لله من علي طلع يشبه أركان حتى يخلصني من الثولة الثانية، يظل عندي بس الأرعن. -الأرعن يفر يفر آخر شي تجي الي تقضبه من إذنه ودخله للإسلام من جميع الأبواب، تعلمه على دينه. -شقصدك متندم؟

-على حياتي السابقة إي والله، ناي شتقولين ربي هم يغفرلي؟ -ليش شمسوي؟ -قولي شنو اللي ما عملت؟ ما ظلت شغلة عاطلة ما دخلت بيها. -ما جنّا ناويين نأذي أحد، همه جبرونا. طلع ورقة من جيبه قال: وقعي هينه ودحكي عدل إذا التزوير باين. -شنو هاي؟ -توكيل لأركان حتى يشتغل براحته أحسن ما ظل الشغل راكد. -أنطيته حصته؟ -حسام وأخته أخذوا حصتهم، وأركان حقه وزيادة. -وعلي؟ -أكبر حصة إله، سجلت له كل دينار من حقه. -أكثر من عاشق وهيا؟

-إي لأن حق حمزة صار لحرمته، وحق شاهين يعني ذني اثنينهن لعلي. -بس حق حمزة لأبوه. -أنطيه مرض على أفاده، منهو زت حمزة للموت غير طمع أبوه، ما له حق يمي، ذني حق علي. -وعامر أنت سويت بي هيج؟ -اللي يخلي عينه على حرمتي يندفن حدر التراب، بس حرامات بي الموت، خليه هيج متعذب أفضل. -وأبو شاهين لأن راد يموتك؟ -رفع إيده وجان ناوي يطقكِ. -بس ما ضربني. -نزل دمعتكِ. -غيث لخاطر جهالنا كافي بعد لا تأذي العالم.

-لا هاي هيه نويت التوبة بنية صادقة. -سماهر ما أنطيتها حصتها؟ -عطيتها حصتها لأمي مكانها، حق وقفتها قدام جدتي واتهمتها باطل. -صدق من اجت عمتي أول مرة قالت لها: لا تخربين بين الإخوة، قصدها على كلام سماهر. -اتهمت أمي أدحك لعمي أبو أركان بالختلات، وشهدت زور قدام جدتي، من ذاك الساعة جدتي كرهت قعدت أمي بينهم لخاطر لا تخرب الإخوة. -بس حتى أم عامر ترضى عنها وتساعدها تأخذ اللي تحبه، عيع شقد بيئة، شحصلت؟

-لا يولي أحلامها فوق، جانت مفكرة تقضب مكان جدتي بس فرّت بإيدها، اتركيهم منها ودحكي عاشق شلون يجر بأذانات الأثول. -صدق من ردوا أهله للعراق ترى زاد مصرفهم، زود أجرته خطية. -لا تخافين يكرف من المطعم ويروح بدون لا يستأذن، يعرفني ما أحاسبه، واني هم ما أسألهم بعد عن الشهرية، تاركه إياهم خلهم يكونون نفسهم بي. -تحبهم أكثر من أهلك؟ -لأن همه أهلي بالفعل، منهو وقف حدكِ من رحت؟ اتركِ من لحم كرم المعفن اللي جان ناوي يوجعكم منهو؟

ضحكت ورجعت راسي بحضنه منتجية، اجت غسق بيدها شيش طاووق قعدت يمي، أخذت منها أكل وياها، شافت الورقة أخذتها تقرا بيها، قالت: غيث اكو رقم ملعوب بي. -ياهو؟ -الستة متحولة تسعة ترى مبينة. -هينه نعدلها، بعد اكو شي باين؟ -لا كله تمام، يلا تسبحون لو نحضر الغدا؟ -لا، نروح شوية ويبرد الجو، الجهال يبردون، يلا بابااا عاشق علي قوموا. -هيا هم أخذها خطية. -خلي جود ياخذها وأنت كرم عين بعاشق، يلا بابا علي تعال وياي.

قاموا ذبوا تشيرتاتهم والبناطيل والجهال وياهم، بس هيا لبستها غسق مايو، شالها جود وراحوا. أباوعلها يجنون، بالأخص عاشق طبقة الأصل جسم أبوه خشن والمدالية الصليب بصدره. علي كامش إيد غيث ويطفر فرحان، ألف رحمة على روحكم ريحانة شاهين من تركتولي هيج هدية. فززني من صفنتي طفل ويه أمه يدورون بالحاوية. انتجيت أباوعلهم وأضحك، رجع الشريط بيه لوقفتنا اني وبيارق. غسق: شكو تضحكين؟ شوفي ذوله الكدامك، اني جنت اشتغل هيج.

رويده: الله يرحم بيارق ماندليني كبرها. لااا، مرات اصفن لو صاعده السيارة ونخيت غيث بذيج الساعة، اشلون جانت حياتي. غسق: جان ماتعرفنا عليج ولا شاركنا أحلى أيام سوه ولا كدرنا نضحك على ذوله الصاكين وناخذهم. ولا أخذت ثار أهلي. ناي، ابنك تره حجزته لبنتي. اخذي حلال عليج. حتى لو طلعت بنتي مو حلوه تره ما تتراجعين. عليمن تطلع مو حلوه، اشو انتي وأبوها اتجننون ومن زينت ابني اترشرط، كولي خلي الله يهديها وترضى أكون ممنونة.

غصبًا على أبوها ترضى واخذ الشقة الفوقنا يگعدون بصف كرم حتى كرم يلتهي بيهم ونخلص منه. رويده: أي حقج، مقابله ناي باب بباب، لعد مثلي شامراتني فوق؟ وييين فوق ولج؟ اشوفج بشقتي أكثر من رجلي، يابه فكونا حتى خصوصية ما ضلت عدنا. انجبي غصبًا عليج وانتي ناي، نريد مفتاح ما نضل كل يوم ساعة ندك بابكم الصبح. باوعت لغسق وضحكت. كومن خلي انشوف اشلون د يسبحون. قمنا رحنا عالبحر، جود يلكف بهيا بالمي، وعاشق صاعد على متون كرم يهوس.

غيث مبتلي بعلي يعلمه عالسباحة. اجتني رشة مي بوجهي، كمزتني، مسحته انداريت لكيت غسق بنص المي تضحك. دنكت طبكت بنطلوني سحبت رويده ودخلنا وراها، صار اللعب والهوسة. طبشت وطفرت وأصوات ضحكتنا الطالعة من قلبنا، الولد من جهة يلعبون ويه الجهال واحنا من جهة السعادة الي بقلوبنا تملي الدنيا بكبرها. لمن انهد حيلي، تركتهن وطلعت كعدت عالجرف. طلع غيث غالق إيده وصل كعد يمي كال: دحگي هالحورية كضبتها. صدك دتحجي؟ وداعتك.

فتح إيده أباوع مثل الكزازة مربعة فسفورية، ركزت أكثر شفت صورتي عاكسة. حورية؟ بتك غمازة، ضحكي يولي. باوع ذيج اشلون حلوه. ضحكي لج. ياا لعد مادريت غير وكعت غمازتي بالبحر. مد إيده، كمشتها بسرعة وضحكت، ضحك على ضحكتي سحبني لحضنه باس راسي وعصرني. ضلينا كاعدين انباوعلهم اشلون يتشاقون ويضحكون، أحس بفرحة ملت روحي، زالت شكو سواد وتعب مريت بي.

هاي اني بين عائلتي بعد ما جنت وحيدة اتمنى اغمض وما افتح عيوني، صرت أكره حتى النوم أريد أعيش كل لحظة ما أريد افوت ثانية من عمري بدونهم. رفعت راسي للسما ابتسمت، عاجزة ما أعرف اشلون أشكره. وبالصبر تنالون أمنيتكم المنشودة التي كنتم بصدد تحقيقها طوال السنين التي خلت. بالقوة وعدم الاستسلام إلى اليأس تحقق كل ما تريد تحقيقه. لهنا تنتهي روايتنا. واصار الوقت نودع أبطالنا. راح نشتاق لتضحيات ناي وضحكة غيث. لبراءة لحن وعشق أركان.

لهدوء رويدا وروح كرم المرحة. لصداقة وحب غسق وجود ووفائهم. شيطنة عاشق وحنية علي. صبر أم غيث. إن شاء الله تكون القصة أعجبتكم. انتظرونا بقصة جديدة قريبًا إن شاء الله. الكاتبة: leo Alfatoawi