رواية لبوة على شفا الثار الفصل السادس والستون 66 - بقلم Leo Alfatlawi

الأيام والأشهر تعدي من عمرنا بدون لا نحس أو يمكن احنا ما نريد نذكر أي شيء يرجعنا للماضي لأن عوض رب العالمين جبر كل كسر جوانا. بيت دافي، أطفالنا يلعبون بيناتنا. بدل حنان الأهل، عين مساهرة ما تغمض إذا تأمن غمّضت عيونه والضحكة تارسة وجهنا. أخوه ما يحسون براحة إذا ما يشوفون السعادة مالية حياتنا. خوات بروح وحدة ما ينحسب يوم إذا ما ننجَمِع وناكل فد طبق واحنا نشارك الضحكة بينا.

وهاي مرّت سنة ونص على دخولنا لتركيا، بعد ما جنت وحيدة أسعى وراء حلم ضايع، صرت بين عائلة يمدوني بأحلام مالها نهاية. عكس غيث اللي دوم أشوف بعيونه نظرة شوق وحسرة، وأعرفه بسبب بعده عن أهله. جنت أحاول بأي وسيلة أعوضه بس يضل بداخله يحن لهم. الجهال دخلناهم مدارس، جود جان مسؤول عن دراستهم وكرم عن توصيلهم. رويدة ملتزمة بالأطفال الصغار وأني وغسق باقي الأعمال.

إيد وحدة وبيت واحد، رغم ركضنا وتعبنا بس من ننجَمِع على سفرة وحدة يزيل كل شيء واحنا نباوع نتيجة تعبنا تكبر كدامنا. اليوم جمعة، الجو بارد وصوت العصافير ويه ريحة الجاي الصبح تارسة المكان. حاضنة مخدتي دفيانة جوه اللحاف نايمة بعمق، وأحس أصابيع على خدي تدقدق على الكيف وصوت غيث يغني بهمس: نازلي من الجنة وياها أعيش، أتمنى عمري أخلصه بحضنها، ميت عليها. يا محلى ذيج الصدفة خلتني أني أعرفها، روحي عليها متلهفة وبس أحكي بيها.

ضحكت وخرّت إيده درت وجهي، حضني ودنّك خله راسه بركبتي باسني وأخذ نفس طويل كال: أوف يا ريحة هلي. قلت: وفر كلامك حبيبي، نعسانة ما أقوم. قال: يا نبض قلبه لحبيبج، اتأخر الوقت. قلت: بس ساعة وحدة غيث فدوة. قال: يندار غيث وأهله فدوة لهل غمازة اللي خذت قلبي ولك وعمة السادة مشتاق لج قومي. قلت: غيث صار أسبوع منتظرة هاليوم دخيلك صوتك لا الجهال تقعد. قال:

ما أريد أصدمج يا عيون الغيث بس الجهال فجّروا عبوة بالشقة والحكومة راح تزتنا على الحدود. قلت: كرم الله يلعنك. قال: ههههه أخذهم وراح لجود يكملون الخراب غادي. قلت: قوم اقفل الباب وتعال بسرعة قبل لا يرجعون. قال: ومنتظرج يولي غير لعبتها هي. كالها وانقلب عليّ، كمش وجهي بين إيديه دنّك باسني من شفتي دمعت عيوني عرفت ضاع حلم نومة الجمعة. قال: عش يولي تبكين. قلت: والله تعبانة غيث حرام عليك ربي راح يحاسبك. قال:

أكثر من هالحساب ما أتصور اكو. بعد ذاك التمَندل على أجمل ما خلق الله ووقعت بيد وحدة تك غمازة أتماطل للصبح وأشبع دفرات لخاطر بوسة. برطمت. قال: اشتعل كرم ينعل أبو أبوي وتقولين تعبانة. بكيت ضحك ورد انقلب على ظهره، أخذني لحضنه عصرني حيل وباسني. قال: نامي يولي الج ساعة وبعدها وعمة السادة أهفج من البالكون إذا اتنفستي.

مسحت أدموعي، الشهقة بقلبي، استوني أغمض وأسمع باب الشقة اندقت حيل، ضميت وجهي بصدّره يائسة. ضحك بصوت عالي ودخلني زايد بحضنه عصرني، خله راسه برقبتي همس: لو عاطيتني حقي موش أحسن. قلت: بطلت أريد أرجع لأمي. قال: شلون أتخليني أهف أمها باتصال أجيبها بحضن أبوها عدل. قلت: غيث. قال: عيونه. قلت: أريد أنام. قال: أخليج بوحدة من عيوني وأسدها وأفتح الثانية، تظل مساهرة طول العمر بس لخاطر ترتاحين يا روح اللي عايش بيها غيث.

حضني حيل دنّك باسني كام ديغطيني وصرخ عاشق، كمّزتنا اثنينه طلعنا نركض فتحنا الباب. لقينا كرم متربع بالقاع لازم عاشق يتوسل بي حتى يسكت وعلي واقف وراه كامشه من بلوزته وهي لامة روحها بركن الدرج كلهم على فد بجية حتى كرم وياهم. صاح غيث: يول شصاير؟ علي: بابا حباب قله لا يسافر. قال غيث: يول منهو يسافر؟ علي: كروم بابا راح يعوفنا، الله يخليك لا تخليه يروح. قال غيث:

كافي يا روح أبوك ما أخليه ينقلع، وأنت يول شبلاك كأنك جاهل تبكي، قم الله يطيح حظك. كرم: أقلهم والله ما أتأخر أسبوع وأرجع. عاشق: لاااا ما تروح والله أطر راسك بس تعبر الباب غيث، لا تخليه يروح وأني وداعة جدتي ما راح أضوجك بعد. علي: أخلي ماما كل يوم تسويلك دولمة وأني أنطيك جواريب بابا والله. اندار باوع لهيا همست: بعد ما أحبك. وشهقت لمت روحها تبكي يقهر.

هز إيده غيث ودخل، طلعت شلت هيا وكرم شال علي وكمش عاشق دخلنا للشقة، قعد على التخم خلاهم قدامه يمسح بدموعه ما يعرف شيحكي وهم مستمرين يتوسلون. دخل جود بيده جنو يضحك كال: ها ولكم راح يعوفكم ويروح، منو بعد يطلعكم منو يشتريلكم، والله خطية أنتم شلون راح تعيشون بدونه. علي: ما يروح مو كروم، ما تروح قول إي حباب. جود: ولكم يا ما يروح غير حجز حتى لابنه عرنوص، وأنوب دائمي بدون رجعة أني منكم أنتحر. عاشق:

غيييث سكت رفيقك لا أطر راسه. جود: ولك أنت شوكت تتأدب، أطر راسي مو خوش ما طول هيج حتى أني أروح. عاشق: وحق كتاب الله أذبحكم، ولك غيث لا تخليهم يروحون، ولج ناي قوميييي. كالها وكام يطفر من الحرقة. جر كرم لحضنه قله: يضحك عليك ما يروح وأني والله ما أتأخر بس يومين وأرجع. علي: عجل أخذني وياك كرم لا تعوفني هنا. كرم: ما يصير بدون أهلك، والله لو ما أمي مريضة فلا أروح. علي: غيث يجيبها الك تشوفها. علي:

إي بابا جيب أمه يشوفها لا تخليه يأخذ عرنوص ويروح، بابا يظل يبكي إذا ما شافنا لو يأخذنا وياه. عاشق: إي مشتاق لجدتي وناخذ عرنوص تا تشوفه غيث، قول إي لا وعلي أفلش العمارة. أباوع لغيث ابتسم ودنّك على رجلي أعرفه حزت بنفسه لا يقدر يمنع كرم ولا يقدر يروح. نزلت هيا من حضني ركضت له كمشت إيدي قالت: بابا حباب لا تقول لااا، أنت وعدتنا ترجعنا لجدتي. أشر إي، جر راسها باسه وقام دنّك أخذ فونه والجكاير طلع سد الباب وراه.

باوع لي جود قال: راح يروح غيث. قلت: لا فدوة لحقه لا تخليه، والله يروح بيها بس يوصل العراق. كرم: بطلت ما أروح، خابري ناي قولي له راح يحول لها فلوس منا وأظل على اتصال وياهم. جود: أني أروح وراه، هاج لزمي جنو وأنتم سهلة إذا ما رجعت شلعت أذاناتكم. عاشق: عش يابه. جود: أنعل أبو أبوك كم مرة قلنالكم لا تقولوا له رجعنا، أبوكم ما يصير يدخل للعراق. عاشق: عجل أنخليكم وحدكم تروحون، انفجرت عبوة تموتون منو يدفنكم. جود:

اشتعل أبوك حيوان وعمرك ما تصير بشر، انتظر دقايق وراجع لك. هذا لسانك إذا ما شلعته أطلع ما أفتهم، وأنت كرم عينك بيهم لا تخليهم ينزلون للشارع بالاخص هذا الساقط. راح أعبرها لك لأني متربي. انعل أبو تربيتك، شفتها البارحة من كاتل الأبو وابنه. وعلي جنت ناوي لك نية إلا أتوبك بها، بس أخ بيك بخت، بكرم ضمك عني. يجذب يول ما طقيتوا، أنتوا عش ما تصدكوني.

ابن الكلب مسبح بدمه ويقول يجذب. لك عاشق وعلي بعد حتى أبوك ما يلزمك عني. أنوب أحبسك بغرفة حالك حال الجلب حتى أكل ما أنطيك. لا بعد ما أطق أحد، يكفي هذا ربيته هو وابنه وعطيت درس به للمنطقة لخاطر يعرفون منهو أحنا وما يقربون صوبنا. يا درس يا منطقة؟ كم مرة سمعت هالجملة منك وما تمر ساعة إذا ما تسوي الأنكس منها. ولك أبوك راح يتخبل ساكن المراكز والمستشفيات من وراء طياح حظك. عجل يشتمني وأسكت له؟ عيب وأنا ابن غيث الأنباري.

لا أنت مغسول حظك ما تصير لك جارة. كرم إذا اتحرك من الباب اتصل عليه حتى أرد وأعلمه الحكي شلون يصير. عاشق باوع له بتكة عين وكرم رد: لا ما أخلي ينزل بعد. وهسه أخذهم كلهم للساحل، جيب غيث وتعال هناك نتغدى. تمام، يلا أنا أترخص. عاشق: أرخص من هيج شتصير، اثنين بربع. هو قالها، وجود شمر جنو عليه بعده ما متحرك، وعاشق فتح باب الشقة طلع يركض ويصيح: غسق لحقيني! هز إيده جود وطلع وراء يضحك.

اندار كرم يباوع لي مبتسم يرمش بعيونه براءة. أشرت شكو. شنو مسوية اليوم غداء؟ كرم طيرت النومة وطيرت رجلي، اطلع قبل لا أبتلي بيك. والدولمة منو يسويها؟ يا أخي شنو ابتليت بيك؟ مو عندك مرة، فوت حالي. لعد ما دريتي مو طردتني؟ أكيد، أصلاً متفاجئة شلون لسه متحملتك بالشقة وياها. لا يا بذات والبلوز اللي جبته قبل سبع سنوات هيج نسيتي؟ اطلع كرم ولا تجي هنا بعد، أحنا راح نشيل. ما تصير لك جارة، محزوزة وملبوسة.

أي عفية، أنا مو خوش آدمية. أزعل وياي فد شهر، وإذا سنة أكون ممنونة منك. يعني ما تسوي لي دولمة؟ لااا. يلا أصلاً ما أحبها، منو يأكل دولمة بعد؟ بس ردت أختبرك. عفية وأنا خسرت الاختبار، يلا قوم أخذ الجهال وروح لشقتك لا ترد بعد. زين إذا جبت لك بعد بلوزة أتسوي لي؟ لاااا كرم لاااا. ضلي مجرودة بملابس الغثيث، مو وجه خير.

جر هيا وعلي وطلع رافع راسه على الأساس زعل. ضحكت رفعت جنو عضيتها من خدها، برطمت كزكزت عليها، جنها تفاحة نفس جمال أمها وهدوء أبوها. حضنتها حيل وأخذت نفس منها، أمنيتي آكلها. شلتها وقمت غسلت وجهي، صبيت استكان شاي خليته على الميز، رحت طلعت الخبز والجبن. دا أخلي ودخلت غسق صاحت: آي والله ميتة جوع! حلفي. انجبي وجيبي كوب لك وقلي بيضة بعد، دا أقول لك ميتة جوع.

غسق بتك والنهار كله على قلبي، ورجلك غداء وعشاء هم بيتي شقتك أكثر الوقت، رويدة ترتبها، أنتي شنو منفعتك بالحياة؟ طاقة إيجابية بس معرفتي، وجودي بينكم كافي. وين محصلين وجه مثل وجهي الجميل اتصبحون به؟ أنا شلون تعرفت عليكم؟ البركة بالغثيث، خلص خالك منك وشمرك علينا. حمدي ربك حاملينك أنتي وخلفتك وضالين وياك لسه. هم صدق عاشق بشقتك؟ لا دخل يركض وقال: لحقي رجلك قبضته يخابر وحدة. حتى ما لحقت أسأل وينه لأن طلع طلقة على شقة رويدة.

دخيل الله هالطفل مزروع بالجذب، وين الولد يخابر؟ طلع محتار وراء غيث لأن حضرت جهاله سووا له عزة ولطم من الصبح حتى يردون ويه كرم. اشقد قال له جود بسكوت: روح وتعال لأن الجهال متعلقين بيك ما يخلوك تتحرك لا تحكي قدامهم. حتى يتخبلون إذا اختفى فجأة، والنبي يا علي بعد ما أشوفه يضل يفتر مثل المخبل بالشارع يدوره، وهيا يصير بها توحد، وعاشق هذا قضية وحدة يصبح ماخذ جوازه وطافر تهريب يدوره بالدول. وأنتي ما اشتقتي لأهلك؟

ليش أجذب عليك، والله قلبي لهفان عليهم، بالأخص لحن، اشقد مشتاقة أحضنها وأسمع فهاوتها من تحكي. أنا هم والله كلش مشتاقة لماما. لعد ما تولين؟ عزة وأتركك هنا وحدك وأقعد الصبح ما أشوفك، يمه غير أموت! أستغفر الله ربي العقل، ولك خطية أمك هو أسبوع بس خلي تشوف بنتك.

أولاً هاي مو بنتي جنتك لا تفرين السالفة وتلبسيها برأسي، وثانياً جود ما يقدر يترك المطعم، ولا عاشق يقول هذا حرك إذا غفلت عنه يسوي مكسورة، شلون أتركه أسبوع وأهله مخابيل يكتلوا ما يتحملون مذاوته. آها طلعنا أحنا السبب مو أنتم تتعاجزون من السفر، تسممي بين ما أنيم جنتي على قولتج حتى نلحق نسوي دولمة. هم دولمة ناي، ترى العمارة راح تشتكي علينا هلقد ما تشتم ريحتها. ولك خطية كرم مشتهيها. هو شوكت ما اشتاها؟

وبعدين مو عنده مرة ليش ما تسوي له؟ وين البرياني اللي قال لك عليه جود؟ بطلي غيرة، والبرياني من الليل سويته بس أحمي، ورويدة هم يالله عليها عرنوص اتقول زيبك بس أذانات وما يقعد فوق رعصته، حاملة هم الجهال النهار كله اتلبس وتغسل. صدق شنو سوت ويه أهلها؟ أهلها طماعين ما يستاهلون عندهم هيج بنية، لا هامهم بنتهم بعيدة ولا شلون عايشة، أهم شي الراتب يوصل بوقته. غيث بعده يدز لهم؟

والله راد يبطل قال: كرم أولى بهن. بس أنا قلت له لخاطرها ما صدقنا أبوها يرضى عليها ويسامحها، استوها ردت ضحكتها، واعتبره راتبها مال المطعم نفسه اللي كانت تأخذه. ترى غيث ما ابتلى بأهلها وأبوها طماع وكلب. أعرف حتى هيه تشكي منه، بس ما يخالف يظلون الأهل عزوة ودنحصل رحمة من المطعم، مكفينا ويزود. هاي نامت الثولة. ماكو ثولة غيرك، وخلي يجي عاشق يسمعك تقولين ثولة حتى يعرف شلون يكتمك.

والله حظ عندها بت الصخلة، شلون راح تاخذ واحد. أي ملاك مصور، عفية ولد، أتريد لك صفة زينة ما بي. والله غيث قال: إذا ما انعدل ما أنطي جنو لو ينط. وأنتم شكو؟ غصب عنها تاخذه، غير عاشق ما أزوجها لو تموت بنتي، وأنا حرة لا تدخلون. ولي لك عود حملت بها، صدقت هيه أم، ومنو هذا عاشق اللي كاتلة روحك عليه؟ واحد صايع حتى دينه ما يعرفه. وين شايفت لك بشر لابس صليب ويحلف بعلي ويصلي امجتف؟

ههههه حتى جود يقول: نتيجة صداقتنا التمت بعاشق جامع بين الطوائف، عندها حظ اللي تاخذه سبع وعقليته متوسعة. مثل حظ أمها من خذت أزك واحد بعشيرته. ثگيل ثگيل شق قلبي. والله احتار وياك، تضحك وتتغزل بك قلت اتعلم من غيث، شاركك يومه وشكا لك قلت يتخيلني صاحبه، عاملك بهدوء وحنية قلت حاسبني طفلة وما أفتهم. حقك ما تحسين بي، غير ماخذة الأنباري.

بنتي هذا الأنباري صاحب خبرة بين قوسين أبو بنات، هلقد ما مار بعلاقات وسخة صار أستاذ بالشغلة، قام يعرف شتريد المرة قبل لا تحكي ويتقلب ويه مزاجها. وهذا النوع شيطان ما تقدرين اتلزمين عليه لزمة، عكس جود نظيف خام تقدرين اتشكليه على إيدك. يا أختي ممل ممل، شايفه من وحدة تقعد الصبح بدل ما يحضنها يشبعها عضات يخلي وردة يم رأسها تقول شهيدة. وأنوب يشغل أغنية هلقد ما هادئة أتخيل روحي دا احتضر. تركي أنتي موجه نعمة.

حرمات أعوفه حلو، وبعدين ليش دتحيليني ما طولك هيج تركي غيث. مشكلة محد يتحملني غيره. أي والله صدق ناي محد يتحمل مزاجنا وخلقنا المزفتة غيرهم. قومي ودي جنو بين ما أطلع المخضر. قمت خليتها بقريولة هيا ورجعت للمطبخ، اتريقينا على على السريع وطلعنا المخضر. كل وحدة لزمت شغلة، أقل الساعتين كملنا كل شي، خلينا عالنار. جهزنا أغراض الطلعة.

راحت غسق لشقتها وأنا لغرفتي، فتحت الكنتور طلعت تي شيرت، صارن قدامي ملابس غيث الجديدة. زغرت عيوني، شيصير إذا أخذ واحد؟ شنو يصير راح يحيط أكيد. وإذا عيط قابل أول مرة، قلتها وسحبت تي شيرت لبسته. وقفت يم المراية ابتسمت: خرب بغيرته ابن الأطعة أذنها، والله ذوق عنده. رفعت شعري كباية، خليت ميكب خفيف، باوعت لروحي حلوة لعد ليش هذا يعيب عليه. دخلت أصبعي بخدي الثاني، والله إذا صارن غمازتين أصير أحلى بس شيقنعه أسوي وحدة لخ؟

لعد على منو يضحك بعد غير مسويك محتوى للتنمر. قطع تفكيري صوت رويدة عالدرج اتصيح: هيا لا توقعين، ولك علي تعال أخذ يوسف خلي أنزل الجنطة. تركت وجهي ورحت شلت جنو والجنطة طلعت سديت الباب. وأشوفها كامشة هيا وعلي بيده ابنها، رأسه يتلولح ضال بس أذانات وعيون تزرزر، شافني كشر فاتح حلقه من الأذن للأذن جنه أبو. طلعت غسق انطيتها بتها ورحت شلته، قام يصفق فرحان، عضيته من خده ضحك الفطير. شلون ولك آكلك.

رويدة: تركي وشوفي شنو ناسين بعد. ما ناسين شي، بس ليش ملبسة هيا هلقد؟ باردة الدنيا واستوني مسبحتها أخاف تتمرض، وذاك الهيلق شلع قلبي ما يرضى يلبس غير البلوزة، عكس علاوي بعد عمري لبس وهو ساكت. يلا هسه أجيب له قميصلة. ليش حبيبتي عندك بعد ملابس لهم بشقتك؟ هاا. ووجعاً نزلي، جبت قميصلة وياي وملابس لهيا أخاف اتوسخ. وأنتي غسق بتك شنو لبستيها؟ غسق: مو أنا ناي غيرت لها وملحفها كلهن يمك ما عندي. أنتن هم حاسبات روحكن أمهات؟

أمداكن شاطرات بس بالخبث والعركات. غسق: ترى بطلنا بعد ما نتعارك. لعد على شنو البارحة راح غيث للجامعة؟ هاا سوء تفاهم ويه طالب، ناي اتشاقيت ما تحمل شقة وصاح بوجهه، شلون قابل أعوفه. لا كملي الشقة وهفي اطراگ، بس أريد أفتهم غيث شلون سكت لكن. ما ردت حكت ظهرها وأنا فركت خدي، ضحكنا رويدة هزت إيدها شالت الجنط نزلت قدامنا. دا أنزل وانتبهت لعلي بدون مشمر، صحت له: أوقف أنت وين مشمرك؟ علي: ماما بس لا تعصبين على كيفك وإني أقول لك.

فقالت: شنو ما أعصب؟ وين وديته؟ مو قلت لك ممنوع تطلع بدونه! فقال: مو هي تبرد خطية، وهي ما تحب مشمرها ينغز، لبستها مالتي دحقي شلون خدودها حمر. فقالت: لا حول الله أنت راح تجلطني بالمفهية، مرض روحك لخاطر الثولة لا تزعج. فقال: لا تقولين ثولة وهي طفلة ما تتحمل، أنا صقر ما علي. فقالت: لا والنعم، أنا أشوف تاليتك مثل خالك ضال بطرك الاسم تسحل بيك المفهية، انزل يلا أبو القلب الرهيف.

نزل قدامنا كامشها، نزلت وراهم لقيناهم صاعدين كلهم، وكرم واقف باب السيارة. لفيت يوسف عن البرد صاح كرم: أذاناته نانو. فقلت: لفيته عدل لا تخاف، صعد علي وهي لا يوقعون. فقال: شو يوسف بس جاروبة واحدة لابس، وين جاروبته الثانية؟ فقلت: عزة كرم، وخر عني راح تسوون بيه عقدة أنت وابنك، ولك شنو تاكلوهن؟ خرب بيومكم! فقال: غلي غلي شيسوي بعد ربي بيج أكثر من عرنوص. فقلت: بس للتوضيح عرنوص ابنك مو ابني، وتعال صدق ليش محترق؟

منو عدكم بالعائلة هيج لونه؟ باوع له وصفن عاقد حاجبه، أخذ له شوية قال: تذكرين الأفريقية اللي صعدت ويانا بالدلمش؟ فقلت: كرم وخر عن طريقي خليني أصعد. دفعته وصعدت، مو طبيعي هالولد. قعدت بصف غسق، الجهال صاروا ورانا يهوسون، وعرنوص بحضني يصفق ويضحك وحده. وقفته على رجليه وهو ما صدق قام يهوس وياهم، عوزه يطير. وصعد كرم حرك السيارة، طلعنا للساحل، الحمد لله الشمس طالعة والجو دفه شوية.

وصلنا نزلنا، وعاشق وعلي نزلوا الأغراض والكراسي مال الجهال شمروهن وانطلقوا للألعاب. كرم شال هيا وراح وراهم. خلينا الجهال بالكراسي وفرشنا استونا نقعد، وندستني غسق شلت راسي أشرت: شكو؟ فقالت: باوعي وراك. اندرت وأشوف غيث واقف أيديه بجيوبه، ويمه اثنين شباب شكلهم مو قانوني ضخمين ولابسين أسود يسولفون وياه. قالت غسق: شنو رد رجلك للشغل؟

فقلت: ما أعرف صار له كم يوم دا أشوفه يلتقي بهيج عالم، بس لا ما أتصور يخاف على جهاله ما يرجع. فقالت: شكلهم مافيا يخوف. فقلت: يلا على الأساس هو شكله ملائكي، دباوعي الوشم الجديد وين مسويه، أخاف عايزة رقبته تصخم. فقالت: لا والله حلو كلش عجبني، حسيته صدق قاتل مأجور، حرمات ماخذة وحدة مثلج. فقلت: أمداج، على الأساس أنتي ماكو هيج وأخذج جود، هم زين جنك ضفدع أجرب.

فقالت: أي والله دوم أحس حضنا من السما، والله عاقب سوء نيتهم بينا. فقلت: هههههه دصبي الأكل قبل لا تروح الشمس، وين هذا كرم؟ فدوة رويدة خابري خلي يجيب الجهال بس تبرد بعد ما يأكلون. أشرت: أي، وطلعت فونها دتخابر. أجه جود قعد مسافة عنا، شال يوسف يلعب بيه. دقايق وأجه غيث قاله: زت الجاهل وقوم ناخذ فره غادي بين ما يزهبون الزاد. فقال جود: وين يمعود ما تشوفها صايرة لحم؟ فقال غيث: ول يابه عجل عش جايين؟ شلت راسي باوعت له بسرعة،

بدل الحكي قال: غير لخاطر نشم هوا البحر. فقلت: اقعد غيث دا أصب الغدا ودير بالك على روحك لخاطر لا أحرمك حتى من شوفت وجهك مو بس البحر. فقال: شبلاج يولي نفسية؟ اللي يسمعك يقول مخلصها بنوات وملاهي وأنت ما تقوم! فقلت: غيييث! فقال: حبيبتي سوي لي مجال شوية أريد أقعد. ادنيت قعد، شال أيدي تمدد وخلى راسه بحضني، طبق رجل والثانية مدها بالكاع، طلع فونه يقلب. خليت أيدي بشعره، قلت له: منو ذوله اللي جانوا وياك؟ فقال: منهو يولي؟

فقلت: رجعت لشغلك غيث؟ فقال: لا وعيونج بس اكو شغلة كلفتهم بيها قبل كم يوم أجوا ياخذون كم معلومة لخاطر يكملوها. فقلت: بالعراق لو هنا؟ فقال: اتركج من هالسالفة، شلونج بالدراسة؟ فقلت: ما ضل كم شهر وآخذ الماجستير. فقال: حلو وبعد شنو ناوية؟ فقلت: أكمل. فقال: لحد من؟ فقلت: حلمي أدرس قضاة. فقال: بس بالعراق ما معترف بيها. فقلت: وأنا شنو عندي بالعراق؟ اتجنست هنا وهنا مسموح للمرأة تدرس أي مجال تريده. رفع راسه باوع لي وضحك.

فقلت: ليش دا تضحك؟ فقال: بنتي المشاغبة، كلما تكبر يكبر حلمها وياها. فقلت: عاشق قال راح يجي يوم وتصيرين شي مهم، وشكو واحد جنتي خايفة منه راح يحسب حساب لاسمك قبل لا يقوله مو يوقف بوجهج. فقال: من أول يوم شفتج عرفت بيج كدها، بنت أبوج ما تهابين ولا تحنين راسج، كلمتك حتى لو غلط تمشيها على أكبر راس. فقلت: خايفة بعد هالتعب ما يقبلوني هنا. فقال: أدخلج أحسن جامعة بأي دولة تريديها. فقلت: ما راح تضوج لأن أنشغل عنك؟

فقال: راح أكون وياج بكل لحظة، بظهرج سند وقدامج درع، أخليج بين ضلوعي أحمل كل تعب عنج. همست: أحبك. فقال: أوف دخيل رب هالكلمة، أدفع نص عمري فدا لخاطر أسمعها. فقلت: وليش نص حبيبي؟ فقال: لخاطر النص الثاني أحمل خبالج الما راضية ترحميني منو يا عيون حبيبج؟ شنو عندج بالتقسيم قبل يومين؟ فقلت: منو قال لك؟ شنو مراقبني؟ فقال: شنو تقولين أنتي؟ وجهج ورعونتك تسوى الواحد يترك شغله ويضل يلتح وراها.

فقلت: ويقول لك ليش تتجاوزين وتطولين لسانك؟ من زين شكلك وتعيب؟ شايف روحك أنت لو أوصف لك؟ فقال: ما يحتاج، من شوية وحدة وصفت لي وشلونها غير أطق بالكاع. فقلت: جان رحت وياها للشقة حتى تشوفك عدل وتكمل باقي أوصافك. فقال: والله لو على قبل عش أجذب، جان رحت بس الله لا يبليج ربي زتني بوحدة نعلت أبو أصلي، كرهتني بصنف الحريم بأجمعها، توبتني بالقسم. فقلت: وهاي الوحدة شنو الجابرك عليها؟

فقال: قلبي قلب ابن قلب دخلها وقفل بابه وسوى منشن لعيوني، ثبت الصورة وأنطى تاك لبقية الحواس تسوي مشاركة وتغلق التعليقات. فقلت: يعني تحبها؟ فقال: لااا. فقلت: قوم غيث من حضني. فقال: ههههه وعمة السادة أعشقج. فقلت: بس لا تحلف. فقال: وأنتي لا تضيعين السالفة، شنو شكو رايحة هناك؟ فقلت: دزيت ناس تسأل على الرجال اللي طلعني من المافيا وين صار، وعرفت مريض تارك الشغل حالته تعبانة بيته هناك رحت له. فقلت: ما خفتي ترحين وحدج؟

فقال: قبل جان ما عندي أحد ورحت، مو هسه أعرف وراي سبع يفديني بروحه. فقلت: ويروح السبع ما قالوا لك السبع اشتعل أبوه وهو يلتح ورا اللبؤة مالته ما محصل غير المشاكل منها؟ فقلت: لعد ما يتركها؟ فقال: غبية ما تدحكين واحد تارك ما خلق الله من جمال وضال يتزنح ورا وحدة بتك غمازة. فقلت: شوف ذيج وراك شلون حلوة. فقال: ماكو أحلى من الهترة مالتي. فقلت: مو تقول شالعة قلبك؟ فقال: بس أحبها.

فقلت: مم صدقتك، المهم الرجال عرضت عليه مساعدة ما رضى، قال بس دبري لي شغل، عاد انطيته العنوان مال المطعم وقلت لجود عليه. فقال: تمام، شنو سويتي بشغلة الولد اللي دزيته لك؟ فقلت: كملت بس ما أسلمها إذا ما تسلمني أتعابي كاملة. فقال: مو انطيتج اللي طلبتي؟ فقلت: لا حبيبي قليلات، طلعت الشغلة متعبة. فقال: بنت الـ -استغفر الله -ولج فاتحة مكتب بفلوسي وتقفصين علي حالي حال الزمايل الباقية، شنو هالرعونة اللي أنتي بيها؟

فقلت: غيث لا مجاملة بالعمل، وبعدين وراي عائلة أنا لازم أدز لهم فلوس. فقال: يولي بيج شي أنتي؟ أمج وكلنا حقها عليج بتعبج، أختج شنو شكو تدزي لها؟ ترى زلمتها ما يرضى. فقلت: مو بكيفه، أدز وأضمهن الها يم ماما حتى تحس عدها ظهر وتضل شايلة راسها قدام زوجها، حتى قبل لا يفكر يضوجها بالمستقبل يتذكر بيت أبوها مفتوح وراتبها ينتظرها بيه. فقال: حلو، حولتي فلوس لأمي.

فقلت: أي حولت لأركان من زمان ووصل لها. شنو سويت بشغلة العمارة شنو ما رديت لي الجواب؟ فقال: شغلتها تعبانة وراها مصايب. فقلت: ولا يهمك، كملها وأنا وياك إذا لزموك أنا أطلعك. فقال: والله أنا أشوف تاليتي أنا وياج بنفس الزنزانة. ضحكت ورفعت راسي، صار قدامي علي قاعد على المرجوحة وعاشق قدامه متخصر يباوع للجهال بس يريد واحد يقول له انزل حتى يسويها اطلابة. ندست غيث رفع راسه. فقال: ههههه هذا شاهين وهذا أنا.

فقلت: هيج جنت توقف وتحمي؟ فقال: قضيت عمري أتكاون لخاطره تالي عطاني عمره وتركني لحالي. فقلت: يمه اسم الله على وليدي. فقلت: وبالنسبة لعاشق عادي؟ فقال: يقدر ياخذ حقه مو مثل هذا بعد عمري قلبه الطيب، واقع بين جهالك مستغلي، هاي شالعة قلبه وذاك يخلص دروسه براسه كل كتابه شمرها عليه أنوب يجبره يكتب له، حضرته ملتهي بالعراكات.

فقلت: مشكلة ما أعرف على من طالع هالولد، أيش قد يتعاقب من كثر الطق حتى الخوف بعد ما يحس بيه، احتاريت شنو أعمل وياه. فقلت: منو تحب أكثر علي لو عاشق؟ فقال: والخلق الكون نفس المعزة، والأعز منهم أمهم اللي خذت روحي بغمازتها، صدق ولج وين غمازتك الثانية؟ فقلت: عزة رجعنا. فقال: ضحكي. فقلت: غيث كلش مو وقتها. فقال: ضحكي لج. ضحكت شلت راسي، راحت ضحكتي وأنا أشوف كرم جاي يسحل بعاشق من أذاناته،

وصل يمه شمره على غيث قاله: هذا بعد ما أخذه وياي. فقال غيث: شنو شكو يولي شنو عامل؟ فقال عاشق: كلشي ماكو الله وكيلك، بنت أعرفها من عمارتنا أشرت لي، رحت لها شفت شنو تحتاج، عجل تناديني وأردها مو عيب؟ فقال كرم: جذب والحمزة ما صاحت له، مرتين منعته بس درت وجهي أنزل هيا لقيته واقف يمها يتوسل مثل الزمال تجي تلعب وياها وأمها تباوع له وتضحك، خزاني. باوعت له حك قصته دنق قلت له: وين اكو بنات بعمارتنا شنو ما شايفتهن؟

فقال عاشق: اكو بالطابق السادس قاعدة ويه جدتها، مو بنت بعلي قمرية. فقلت: حلو جود خويه من باجر تفرغ الشقة كلهم عدنا صيانة بالعماره. فقال عاشق: عششش هاا عشش يابه أطردهم؟ ما تخافين الله؟ فقلت: ابن الثولة شنو جابك على مخافة الله؟ أنت واحد صايع زايعته القاع، ما تقول لي شوكت تنعدل؟ فقال: أنعدل وما أقرب يمهم، بس لا تطرديها من العمارة بروح أهلج.

فقلت: خوش حكي ما أطردهم بس باجر أروح لمدرستك أقول لها على اللي صار لنشوف شنو ردها. فقال: لاااا لا راح تزعل وبعد ما تحكي وياي، قلت لك ما راح أقرب يم شقتهم. فقلت: ولي لك، وأنت جود سمعت هاي قدامك مصاحب اثنين، بعد لا تنطي بنتك مو خوش آدمي. فقال جود: منو منطي جنو؟ شنو أسولفها واحد معدل مو مهتلف مخلصها يركض ورا البنات. فقال عاشق: وراس جدتي أحرقكم حرق، هاي مالتي والزلمة بيكم يوصلها، وعلي أذبحكم.

فقلت: ابن الطرقه شنو ما تشبع؟ كل اللي تشوفها تريدها، ما تقول لي على من طالع؟ دنقت باوعت لغيث رفع حاجبه باوع لنا، ورد عينه للفون سوى روحه ما يسمع. دفعته وخر قعد يضحك، جر عاشق لحضنه يبوس بيه ويقول له: يول جايب لي العين والأثر ما تركد. فقال عاشق: يول أمها صاكة. فقال غيث: اشتعل أبوك اليوم ناوي تنيمنا بالشارع.

تركته يدغدغ بيه وعاشق ميت ضحك، صبيت الأكل خليته وصلت للدولمة كلها باوعت لغيث هز أيده نزل عاشق من حضنه وطبق أردانه شال القدر قلبه. غمض عيونه كرم قال: الله أخيرا راح آكل دولمة. فقالت غسق: والله ما تستاهل اللي يسمع يقول حارميك. فقال كرم: أنتي أنجبي وأيدك شيليها، جود اكمش مرتك لا أرفسها. فقال جود: وعلي ألبس الصينية براسك، ارجع لورا واكمش خلفتك المحترقة لا يوقع بالصينية. فقلت: غيييث طرده من العمارة سمعت عيب على ابني.

فقال غيث: كملتوا، انكتموا وقربوا الزاد، خلي نتزقنب. كرم: يعني ما فارقة وياك عيب على ابني. يابه انطي هيا، يعدل النسل بيها. علي: هيا مالتي، اليقرب منها أوره ور. قصدي جنو. عاشق: لخاطر أحرق العمارة بيكم. اشتعل أبوكم، أزوجه أمي بس انكتموا رحمة للإسلام. عاشق: إي وعلي أحسن من أبوك. عاشق تعال بابا. وعلي طقني كرم، سويلي لفة من يمك. ما طقك، قرب وفهمني أش وقت تبطل تهتر وتحكي كلام أكبر من راسك. بعد ما أحكي، آخر مرة.

سمعتها كثير منك ومن أمك، أعرف ربي جاي يطلع مصايب أعمالي السودة بيكم، تعال رد أتسمم ما أطقك هالمرة، بس أنوب قبل لا أسمعك تتنفس أفلع راسك. ما أهتر بعد بس ليكدام ترى باجر ما نروح للمدرسة. عش يابه ما تروح. عاملين إضراب لأن المدير عيّط على المس مالتنا. المدير عاط بالمدرسة أنتَ شكو مسوي إضراب ابن السطل. عجل نخليها مكسورة الخاطر هيج.

عاشق بوجهك على البحر، ألقف اللاين بسرعة، لا وعمة السادة أهفك دفرة أطلع شكو سوادين ربي بلاني بي من جهامتك. أباوع لعاشق عفس وجهه، راح زعلان لأن هانه كدامنا، ضحك جود كام وراه راح، وصل يمه دنك شاله، قاله: اتركني ما أرد. هذا أبوك ومحد يزعل من أبو. عجل قله بعد لا يهيني لخاطر لا أقول شقاضب عليه. باوعت لغيث قلت له: شمسوي غيث؟ دنك كمش راسه قال: أني جبتها لروحي، بس ومحمد ما عملت شيء، عش ربي جازاني هيج.

بس لا تحلف لا ربي يقلبها بينا. كملتي؟ عطيني المي ونقلعي يم رفيجتك. بعد خو قول أنتِ طالق. خلي أحصل شيخ وأنعل أبو الما يطلقج ويزتج بالشارع أنتِ وجهالج. هاي إسطنبول بكبرها ما بيها شيخ. على قسمتي كلها بطلت، بس هينه نرد للعراق ويصير خير. ماكو لحن تقول أركان فر العراق بكبره هم ما حصل. عجل خليجن نخفض أذنوبنا بيجن، وأنت خويه عش رجعتوا روح زته بالبحر. جود: يظل يركض ورا الحوريات البحر ويخزينه، أخذه أشمره من برج العمارة أفضل.

يقضب شباك الطابق السادس ويسويلنا بلوة. نرده لجدتك أتشلع أذانه. هههههاي يحب حفيده أم حاتم. هاك الزم ابنك ولا تشيل هم، تجي التنسي عشيرته وتمشي على الطريق المستقيم. إي ومحمد قالها، أخذه منه عاشق، وباوعلي، شفت بعيونه نظرة خلت كلبي ينبض، ابتسم وحضنه، بوسه من خدوده. دنكت أكل، كل واحد أتكفل يوكل طفل، خلصنا، أجوا اثنين غير ذولاك بس نفس الضخامة، هم لابسين أسود، أشروا لغيث، راح الهم، وكفوا يم البحر يسولفون، راح يمهم جود.

كرم أتمدد خلى عاشق على بطنه وعلي بصفه يسولف وياهم، ورويدة جرت هيا، لبستها قمصلتها، أنطتها الفون، قعدتها يمها، شالت جنو خلتها بحضنها أتنيم بيها. اليشوف خوفهم وحنيتهم عليهم يقول ذوله جهالهم مو جهال أصدقائهم. لمينه أني وغسق السفرة ورجعنا الأغراض، مددت رجليَّ وغسق خلت راسها على متني، فتحت الفون أنراجع، وعيني بعاشق أشلون يباوع لأبوه وجماعته، أتحسه يدرس تصرفاته، أشرت له بأيدي، كطع صفنته، كام أجه يمي،

كعد نص قعدة قال: يولي منهو ذوله؟ جماعة أبوك، مالك شغل بيهم، لا تتقرب عليهم. بس ذوله يحموني. شنو يحموك ما فهمت. ذاك الأسبوع جنت دا أعبر وأجت سيارة سريعة، دحقي ذاك الأسود أجه يركض، شالني قال: ابن الأنباري لماذا أنت متهور؟ قلت لأبوك هالحكي. إي، قال: لا تخاف ذوله رفاقي. غسق: مو قلت لج خال عين وراهم بكل مكان. جود يعرف هالشي. إي، مرة قلت له يقول هو يعرف شنو يشتغل لا تدخلين. بعد خايف من أبو سارة علينا.

هم قلت له يقول أبو سارة ما يتجرأ يوصل لا لناي ولا لجهالها، يعرف غيث يمحي، بس هو هلكد ما شاف حوادث هنا يخاف على عائلته لهيج منبه جماعة عليهم. عاشق: أني من أكبر أصير مثل غيث، حلو أسوي وشم وعضلات وألبس أسود، أخلي البنات كلها تلتح وراي. أهم شي ركز على البنات، عفيه ابن السبع، كوم عاشق من يمي لا أدفرك. أشبلاج يولي تعيطين، خليني أكمل. ما أريد أسمع صوتك، كوم.

كام عافس وجهه، كعد يم كرم وعلي، أجه يمي عرفته نعس، لفيته بالغطا وحضنته، خلى راسه على صدري، رجعت أقرأ وهو يلعب بالعلامة مال التيشيرت. ظلينا لتالي وقت، ناموا الجهال والجو برد، رجعنا للشقة. الولد دخلوهم للغرفة، أني رحت للمطبخ أنظف الهوسة التاركتها. رتبت المطبخ استوني أطلع دخل جود، شمر الكوب وطلع، أخذته غسلته دا أرده دخل كرم، فتح الثلاجة طلع ماعون بي حلاوة، أخذها منه وشمر الماعون.

استغفرت وأخذت غسلته، وأسمع غيث دخل فتح الفرن، غمضت، صاح: تعالوا اكو أكل ضال. شلت السجينة، أنداريت لكيتهم يردون يدخلون أشرت: اطلعوا. أشبلاج يولي جوعانين. سد الفرن غيث بسرعة. جود: يابه شبيج أحنا أنظف المكان. خليكم مكانكم خلي أخلص البشرية منكم وبعدين نظفوا. بعدني ما متحركة سد غيث باب الفرن برجله، وجود رجع ليورا، كرم قال: والحمزة فكرة غيث هاي. اطلعوا كلمن لشقته، ما أريد أشوف وجهكم أسبوع كامل.

كرم: غيث سمعت خو ما حجيت، هاي كدامك هم طردتنا. جود: ما تحكي أش بيك ساكت. صحت: أخذوا وياكم واطلعوا. غيث: اشتعلت أبهاتكم، ارتاحيتوا؟ هاي انطردت وياكم. دفع جود وجر كرم من ياخته، فتح الباب شمرهم وسده، باوعت له رفعت السجينة، قال: لا تشوفيلج غيرها. لا تستهان بيها. هاي حدها تزرفين بيها خدج الثاني وتزتيها. غيث تعبانة والله. إي وأنتِ أش وقت قلتي غير هالحكي. غيث. عيونه، النبض العايش بي، قربي يول. باجر. أعرفه عيد ميلادج.

لا لا باجر. ما لحكت أكمل لأن شفته أجه، شمرت السجينة وركضت، جان أسرع مني، لقفني من شعري ودنك شالني، دارني لحضنه، قال: كملي. والله تعرفني أني أشكد أحبك. رحمة الله والديج. شنو رحمة الله والديج. عجل هالتجدي شأرد عليه. غيث أسمع خلي نتفق اليوم أتخليني أنام وباجر أعوضك. لا حبيبي اليوم نسهر وباجر نحتفل وبعدها نصبح بتعويض مال الخسارة وبعدها. انتحر. عش يولي اكو واحد مضوجج. إي، الأنباري. يندارلج الأنباري وهلو فدوة ونذر.

عفيه أهل أشكد تفدي بيهم. غير يغزر يولي، ماخذلي وحدة تقول أزلمه يابه حتى لو كان أزلمه هم جان رف قلبه وأجه للطريج كد ما أصرف غزل. تعبانة والله. أقلها حق التيشيرت الي لابس توا. ترى هذا تيشيرتي. قولي والله. أني ما أحلف، ما تريد أتصدق بكيفك، يله نزلني. ويجيك كلب ابن كلب يكلك لا تخونها. دمعت ضحك وأخذني لحضنه، عصرني وهمس: يولي وعمة السادة أشهقج ويه النفس. رفعت راسي أباوع لعيونه، بهن لمعة، حضنته من رقبته همست: أحبك.

ابتسم ودنك على شفتي... مر كم يوم وغيث يطلع من الصبح ما يرد غير بليل، دائماً أسمعه يخابر برموز، أكثر الحكي ما أفتهمه. بس الي أفتهمه يوصي ناس وناس يدليها مكانت، مرتين سمعت اسم عامر وأبو حمزة بالسالفة، خفت رد لشغله القديم، بس من أذكر حبه لأطفاله وكل ما يحضن علي ينعل ذاك اليوم آمن. كرم قرر يرجع يشوف أهله وجود وياه، أتفاجأت بقرارهم بس ما حجيت، همي الوحيد جان الجهال، أعرفهم يتخبلون بالاخص عاشق كلش متعلق بيهم.

قعدت العصر على صوت المنبه، شلت الفون وقت جية الجهال من المدرسة، قمت غسلت وجهي وغيرت ملابسي، طلعت دقيت الباب على غسق، فتحته قالت: بس أغير لجنو ما أتأخر دخلي. راسي مصدع، مسوية جاي. إي اكو بس أحمي، رويدة وين. ما سمعت صوتها يمكن ماخذة عرنوص ورايحة للمطعم، يله فضينا.

راحت وأني دخلت للمطبخ حميت الجاي، صبيت بالكوب أخذته، وكفت يم الباب أشرب وعيني تتنقل بين الأغراض، كلشي مثل ما هو ما متغير شي، ابتسمت ونتجيت أباوع أشكد الي ذكريات هنا. صار الباب كدامي مر شريط دخولي أول مرة هنا، غمضت أتخيلت غيث من فات يركض وشالني للغرفة. شعور أول حضن وأول مرة نفس يختلط بينا. فتحت عيوني أنداريت هنا أول مرة وكفت أطبخ وكرم يمه يسألني على جواريبه.

باوعت للقنفة وضحكت وأني قاعدة وجود يقنعني ألبس هواي قبل لا أطلع لأن الجو بارد. أخذت نفس، سارة وهيه داخلة لازمة غيث من ضهره وتضحك على ضحكته. بين كل هذا أني ذيج الطفلة المكسورة الحاملة حلمها بين أيديها، وعينها بالوقت أخاف يغافلها ويسرقه منها. منين أجيت؟ شنو جان حلمي؟ وين وصلت؟ فززتني غسق أتقول يله.

مسحت عيوني، رجعت الكوب وطلعت وراها، قفلنا الشقة، نزلت فتحت باب العمارة، صاروا كدامي كلهم واقفين يسولفون، انتبهي عاشق أجاني يركض، وصل يمي كعد على ركبته وقدم لي وردة قال: كل عام وأنتِ أحلى أم بالدنيا. ضحكت ونزلت دموعي، دنكت قومته وحضنته، أجه علي فتحت أيدي دخل حضني قال: أحبج أكثر من الدنيا هاي. وأني أحبك أكثر من روحي. دحقي ماما شنو جبتلج. وخرت فتح جف أيده الصغيرة، بيها صليب ناعم، أخذتها ورجعت حضنته.

قمت باوع لي غيث وفتح أيدي، ضحكت ورحت حضني وقال: لو أجمع أمنيات العمر وأقدمها بين أيديج أكون مقصر، حرت شنهو أجيب لج ما لكيت غير أسر نبضات قلبي يمج. أنت وجهالي أحلى هدية ربي عوضني بيها. كرم: كل عام وأنتِ بخير حاتتنا. هههه وأنتَ بألف خير كروم. جود: ربي يجعل كل أيامج سعادة يا أجمل أخت ربي رزقنا بيها. شنو هاي عود مسوي لي مفاجأة أتعايدوني بباب العمارة وأنوب بدون هدايا. جود: شنو تتمنين ناي؟ باوعت لغيث، ابتسم، گال: تم.

-شنو هو التم؟ شعرفت شنو أريد؟ -أعرف بت روحي شنهو تريد قبل لا تفكر بي. -غيث. -عيونه، امشي يولي، وأنتم اطلعوا قدامنا نتلاقى غادي. أشر لهم جود على سيارته، الكل راح صعد. رفعت راسي لغيث، عصر إيدي وگال: يله. سحبني، رحت وياه، فتح الباب، صعدت وأنا كلشي ما مفتهمة. اندار صعد من جهته، سد الباب ودنگ شغل أغنية، عدل ظهره، حرك طلعنا وهو يدندن وياها، عينه بالطريق. أخذ له ثواني ودار وجهه إلي، على نبرة صوته وهو يگول:

"أنا عايش عمري لأجلك، لا تظن بيوم أزعلك المهم عني أنت ترضى، وما تفارق عيني لحظة ومرة أبوسك، مرة أشمك أنت طيري وصعبة غيري اللي يفهمك من أحضنك تنسى حزنك، تنسى همك مرة أبوسك، مرة أشمك... ابتسمت، قرص خدي ورد عينه بالشارع يسوق ويدندن، وغمضت عيوني، أجذب روحي وأدعي. هالمرة غلط، ما أعرف شنو أمنيتي، لحد ما وصلنا للمطار. گلت له بكسرة: لا غيث. -انزلي يولي. -راح يأذونه. -حتى أمرّع أبهاتهم. -ما يخليك عايش والله.

-لا تخافين، صفيت كلشي وصار الوكت نرد ديرتنا. -إشوكِت؟ -من أشهر اشتغل بيها أنا وأركان وفضينا كلشي، رديت حتى جوازي القديم، بس جنت مناطر هديتك تكمل، من بلّغوني تمت حجزت. -يا هدية؟ -اللي ترد الضحكة اللي ما شفتها بعيونك من ذاك اليوم. -شنو بعد غيث؟ -يا عيون غيث، ما ضل كثير وتعرفيها، يله انزلي. -يعني هاي هي راح نرد مرة لخ بين أهلنا، ماكو غربة؟

-لخاطر أرميج وأشعل أبو الفكر بيها، هو أسبوع مالج غيره، أنعل أبو أبوي بين ما حصلت لكم إجازة. ضحكت ونزلت دموعي، سحبني لحضنه، عصرني حيل وهمس: ما أريد أدحگ دموعك مرة ثانية، لا بحزن ولا بفرح، لخاطر ما أگول ما تستاهلها لأن موش زلمة، عطيت كلمة ما تنزل دمعتها ونزلت. وخر راسي مسح دموعي أشر: هاا. -هاي آخر دمعة تنزل مني. -باسني وگال: يله انزلي. فتحت باب السيارة، نزلنا لقيت الولد ينزلون بالجنط، شافني عاشق

اجا يركض ويصيح بصوت عالي: ناااي، راح أرد لجدتيييي. ضحكت على فرحته، وصل يمي، دنگت شلت حضني، گال: أحبك هواي. -أوف وأخيرًا اعترفت. -لا يعني موش هواي، بس على گد السفرة. غيث: -وأنا يول؟ -أنت لااا، بس أحب أمك. -لا يا ناقص، ما تصير لك جاري، أظل بذات وضايعة بوجهك حتى لقمة الخبز، أنزل وأنتم يله فضونا، جود على الجوازات وكرم على الجنط، استعجلوا ما ضل وقت. دخلنا أحس روحي طايرة ما مصدقة، أتمنى أغمض أفتح عيوني وأنا بحضنهن.

غسق ورويدة مو أقل مني فرحة، أعرفهن مشتاقات لهلهن بس علمود لا يحسسني ويكسرن بخاطري ما يرحن، حمدت ربي عليهن لأن بالفعل حسيتهن خواتي. صار الوقت صعدنا الطيارة، الجهال حجزهم جان مزدوج، علي بينه، عاشق يم جود، وهيا يم كرم. گعدنا دا أربط الحزام، واجت المضيفة، أباوع لها حلوة كلش، تفتر تتأكد من مكانات المسافرين، انتبهت لعيونها تروح وتجي على غيث، ضربته بصدره حيل، صاح: آااخ ولزم إيدي. -عيونك غيث والله أفكسهن. -شعامل يولي؟

-دنگ على فونك، إذا لقيتك شايل راسك أهفك كله، وهيه ألزمها أمرّعطها بنص الطيارة، يعني أخزيكم. -واحد ربي عاطي جمال وگلب واسع، عش تحرمين باقي خلقوا من هالنعمة. -غيييث. -ههههه، عيونه ونبض گلبه الغيث، ولج گلبي مثل گلب يعقوب عندو إشگد ولد ومجلب بيوسف. -بس لا تحلف. -يولي عش ما تصدقين من أحلف؟ -أصدقك من تكون شنو جنت ضام بفونك وحلفتني ما أشوفه؟ -اتأكدي لو ما يوجع گلبج ما أمنعج عنه. -صورة سارة مو؟ -العشرة الغلط ما تنذكر.

-حلفتني بروح عاشق يعني فيديو له وهو يذبحوه؟ -خذتي حقه بداعتي يمك لا تبجين. أشرت: أي، ودنكت. كمش وجهي رفعه د يحجي وعگد حاجبه: -شبي وجهج؟ -شنو؟ -شو اضحكي. كمشت إيده لأن أدري راح يخليها على بطني حتى أضحك، عصرتها وأنا أسمع عاشق يگول للمضيفة: عش تفترين يولي؟ -ما عندي كرسي. -آفا! گوم جود خليها تگعد. غيث دنّگ گوّه كاتم ضحكته، وجود گال له: -لا يا كلب، و أنوب يريدني أنطي بنتي.

ضحكت المضيفة وكملت طريقها، دقايق وبدت تتحرك الطيارة. أخذت نفس براحة، سحبني غيث لحضنه، أخذ نفس طويل وباسني. خليت راسي على صدره وغمضت، أتخيل فرحتهن من يشوفني راجعة بينهم مرة ثانية، بالأخص عمتي. مر أكثر من ساعتين بس صارن علينا سنة بسبب الجهال، كل دقيقة وتنعوصت هيا، ساعة أريد مي وكومت كرم، ساعة للحمام، آخر شي نعست وخرت ابنه من حضنه ونامت مكانه.

عاشق استلم جود، شگد يحب يتلاشه بيه، وذاك يحب رده يشمر له حجي، وعاشق ينتفض خبصوا الطيارة. قريب نوصل صار هدوء، انداريت لگيت عاشق بحضن جود لافه بقمصلته غافي. شگد يتجاكرون بس واحد يموت على الثاني. غسق بنتها بكرسي عاشق وهيه خالة راسها على متن جود مغمضة، ما أسمع شنو يهمس إلها بس ضربته بطنه، ضحك وباسها من راسها. شكلهم حلو، تگول طيور حب وبحضنهم غراب.

علي بعد عمري بدون صوت، ظل يباوع بالفون لمن تعب، خلى راسه على متني، كمش أيدي وغفى. وصلنا، گعدنا الجهال ونزلنا، وقعنا الجوازات وخذنا الجنط، طلعنا بره المطار لگينا أبو غسق واقف، دنروح انسلم وإجانا صوت واحد صاح: -حي الله بالسبع! انداريت ووقفت وأني أشوف مسلحين... *** لحن: صلاتي چانت بمثابة حياة جديدة إلي، أحس سعادتي مرتبطة بيها، من يوم الي نصحني عمي ألتزم لحد هاي اللحظة، كل ثانية تتغير حياتي للأحسن.

من كثر شعوري بالراحة والاطمئنان العايشة بيها خايفة يكون حلم، آخذ لي دقايق أغمض وأرجع أفتح عيوني حتى أتأكد؛ مثل كل يوم ما أشوف غير أركان متمدد صافن عليا، وخال شاهين على گلبة ينيم بيه. غلّقت القرآن خليته على السجادة ودنّگت سجدت سجدة الشكر، همست بگلبي أترجى الي عوضني بيهم يحفظهم إلي، فززني أركان وهو يگول: -يولي موش چنچ طولتي بالسجدة؟ -دا أدعي أركان لا تقاطعني. -بس لا تدعين عليا يا دگات گلبو الأركان.

-لازم تعرف روحك اليوم مضوجني. -دخيل ربچ يولي، الفجر توه طر والملائكة ترفرف، لا واحد منهم على حظي يگضب له دعوة من دعواتچ الحلوة ولنا مطير هامتي. -لعد اسكت خلي أدعي ربي يرزقني بعد طفل. -آفا! چنچ على طفل تعالي يولي، أنعل أبو و أمه الي يخلي بنفسچ. شلت راسي ما مصدّگه، باوعت له گلت له: -الله عليك تگدر؟ -شنهو يولي؟ -هاا دا أقصد يعني تگدر تسوي. -شهالسمعة المزفتة يولي، شنهو الي ما أگدر له؟ -أنت مدا تفتهم عليا.

-خليتي بيها فهم! سحگتي بأم الرجولة لحن، گومي يبه. -لا الله عليك، يعني رضيت نسوي طفل؟ -منهو گالچ أني ما راضي؟ گومي بنيتي عدلي فرشت هالرعن، أنعل أبو أصلي خلي أردّه مكانه، وبعد لا تخلي ينام بالنهار. -مو أني هاي بيبي تگول خلي يشبع نوم حتى يظل مساهر يدحگ ظلام الليل ويقوي گلبة بصوت الذيابه. -اشتعلت جدتچ. -عز أركان مو بيبيتي ها، بيبي بدعة بيبيتي تگول نيمي من الغروب وخلي جوه راسه فلوس حتى الصبح لا يخترع من صوت الديج.

-حي الله النشامة، يبه فضيها خلي ألحگ أنطمر ساعة. گمت لميت السجادة، خليتها على جهة، رحت عدلت فراشه، كام شاله خلاه بيه، رجعت لفراشي دخلت بيه، إجه يمي خلى أيده على بطني، كمشتها، رفع حاجبه أشر شنو؟ -شنو شنو أركان، أستوني طالعة من الحمام. -موش تردين چاهل لو أني غلطان؟ -متچذب عليا. -يولي ما چذب عليچ من گبل. -أي هواي، ودوم أظل أبچي لأن سعاد وشهد يظلن يضحكن عليا. -حلّفي. -و النبي. -لاه لاه عجل عش ساكتة ما تگولي لي.

-مو ذاك اليوم گلت لك، كمشت أيديه ورجعت شبعتني راچديات. -هاي شوكت؟ -من عضيتني بخدي. -يا خد منهن؟ -هذا شوف بعده الأثر بيه، والله أستحي حتى أطلع كل اليشوفوني يضحك. -لاااه مو خوش سالفة، گربي تا أعدلچ الخد الثاني لخاطر بعد محد يضحك عليچ. -آااركان. -گولي يولي. -تعبانة والله. -آفه آفه بعد شعلي أبوي وگولي تعبانة، أثبتي لچ. ردت أدفعه كمش أيديه، درت وجهي كمشه ثبته، برطمت گز على سنونه گال: -والملائكة أكرطچ لا تعملين هيچ.

-لعد وخر. -عش لا تأمرين، گالها و دنّگ عض شفتي... مو تگول صار كم سنة ويا نفس اللهفة مال أول ليلة، شگد يحاول يلزم روحه ويضغط على نفسه حتى لا يأذيني، ما يگدر أعرفه يحبني، بس المضوجني منه ما يمل ولا يعرف شنو التعب، يريدني بكل وقت وما يتركني إذا ما يشوف الدمعة بعيوني. باس شفتي حيل ونگلب على ضهره، سحب باكيت الچگاير من الميز أخذ وحدة ورثها، لميت الچرچف على جسمي، باوعت له بحقد عض شفته گال: -عش يولي لازم ما رضيتچ عدل.

-من أگول لك چذاب ما ترضى. -أهاا عش چذاب شعملت؟ -مو گلت نسوي طفل؟ -لاااا عجل غير أتذكريني، شوف نسيت يالله بعدها بأولها گربي. -أركااان ط لگنني. أشر على عيونه وسحب نفس من چگارته نفخه بوجهي، بچيت لأن أعرفه ناصب عليا، ضحك، گمت للحمام رجعت سبحت وأحلف أطلعها من عيونه. لفيت المنشفة طلعت لگيته واقف يخابر يم الشباچ أسمعه يگول له:

-يخوي كمل كلشي، دزيت الزلام اليوم لو باچر بالأكثر يسحلوا من جهامته. باچر بحيل الله ناخذ المشية لعشيرة الـ... -أي علاء الدين گضب القضية. -لا يضل بالك يا السبع ما طول جدتي خلت أيدها أعتبرها كملت. -خلي نگضب الزلمة وكلشي هيّن. -تمام عينك بناي لا تلگف الخبر وراس أبوي تضيع كلشي هالخبلة. -ههههه إبليسسس خرب يومها هو هيچ ما خالصين منها أنوب قضاة تريد غير تلعبنا على الحبل. -مودع بالله يخوي. سد الفون اندار گلت له:

-شنو ناي شبيها؟ -إبليس متنكر بلبس الملائكة، تركيها وتعالي گولي لي شدعوه هلگد تضوين؟ -أي همزين ذكرتني، تعال دا آخذ صورة لأيدينا حتى أنشرها ستوري. -عش لأيدينا يولي هنه گُرون گُرون، زتي هالمنشفة ونگف على المراية، أنشري اليعجبچ خليتي بيها ستر. -أركاان فدوة. -أشعلچ روح أركان كل ما تهل وتغيب، يبه إذا أنجاب طاري اسمچ أنجن، موش ترديني أخليچ تنشرين صورة لأيدچ. -أنت ضمها بأيدك ما تبين بس أظافيري.

إجه حضني من وراي، خلى راسه برگبتي باسني على الكيف وهمس: -أعرف هالسوالف بنفسچ وتضوجين من أمنعچ، بس وراس أبوي الدم يصعد براسي، أمنيتي أضمچ بضلوعي ما أخلي الهوا يمر بيچ، موش بيدي مسودن بيچ، دخيل نبيچ إذا تعزيني تركي هالشي، لا تگربين حده. -بس أني ما أحبك. -ولا أني أطيگ شوفة وجهچ، يله روحي نشفي شعرچ لا تتمرضين. -بسببك أتبلل يعني شنو؟ -شنو؟ -يعني أنت تنشفه وتمشطه. -حلّفي. -و النبي.

-اشتعلت ناي بس أني ابن سطعش حذاء، جبتها لروحي، من تعرفها إبليس مسخوط حظه شلون أقتنعت تعطيك شي يريح گلبك. -أركاان. -أنعلچ أبو أركان لأبو راحته، گربي يولي عطيني المنشفة، عرفتها ما بيها نومة من دحگت أبنچ يلتح وره الچلب. رحت يمه أخذ المنشفة لفها على شعري، نشفه جر المشط، أخذني للجرباية گعد وگعدني گدامه يمشط على كيفه.

يعاملني كأنما يعامل طفلة، وهذا الشي الي يزيد حبه بگلبي، شگد أشلع گلبة وشگد أغلط أبد ما يحاسبني، بالعكس ياخذني لحضنه ويحچي وياي بطريقة يحسسني بيها بحنية وخوف بابا عليا. ضفّر شعري بخربطة، سحب ضفيرتي باسها وجرني لحضنه لفني بالغطه خلاني على صدره عصرني، همست أركان. -يا لهفة أول نفس بالدنيا. -أنت مو عندك سلاح ليش أخذت بعد واحد من بيبي شتسوي بيه؟

-مناطر إبليس تجي لخاطر أفرغ باروده بيها وأزته بالنهر، لا من شاف ولا من دره، بت الشاذي تگول ورث أبوها، تنگط علينا تنگيط بالفلوس، تنعل أبو أصلي يالله توقع على ورقة ما تسوه دينارين. -غير ورث أطفالها وحق علي تخاف عليه. -ما تخاف عليه، تعرفنا ما نگرب له، بس هيچ صلافة وطياح حظ تحب تذلنا، تعجبچ إمكانية ومحمد فول مواصفات. -لو ما هيه ما چان شفتني ولا أتزوجنا.

-الحسنة الوحيدة التشفع لها يمي، ولو ما تعرف روحه ما دبرها ما نختني ولا خلتني أدحگ ظلها. -تره والله حبابة وتحبني أكثر من نفسها. -بس لا تحلفين لخاطر الله لا يبلانا بمصيبة ومحد يحبچ بگدي، لا هيه ولا الخلّوچ تدحگين نور ربچ. -شلون عرفت تحبني أكثر منهم؟ -لو موجود بذاك الوكت التعبانة بيه چان وحق راعي الخيمة الزگه عطيتچ گلبي بدون لا أفكر، وما أخليچ دقيقة وحدة تعانين بيها. رفعت راسي باوعت له همس: -أحبك.

-يولي ستري على نفسچ ما ضل بيچ مكان صاحي تا أعضچ منه. -بس خفف ضغط تره أنت چاعصني بحضنك. -وين حتى موش يمچ، دحگي شگد مسافة تفرگ بينا. -عز أركان حتى ما أگدر أتنفس حختنگ. -كافي يولي أريد أنام، يله غمضي. عفست وجهي ورجع راسي على صدره ودنّگ أخذ نفس طويل باسني وضغط عليا أكثر، حسيت أضلوعي طگطگت بحضنه، غمضت يائسة ما بيها مجال لو مريض لو مريض. گعدت الصبح على صوت سعاد تضرب على ضهري، بعدت أيدها وجريت اللحاف غطيت راسي، گالت:

-گومي ولچ صار الضهر جدتي نشدت عليچ. -گولي لها أحفادچ نعلوا عشيرتها ما خلوها للصبح تنام، كامشيها مناوبة. -هههه گومي دحگي شاهين شعمل بريحانة شبعها عضات. -يمه بس لا شهد گتلت أبني. -لخاطر جدتي تعلقها بالسگف، لا رادت تحچي گالتها گضبي بتچ الفاهية لا تخليها تگرب صوب الفرخ مرة ثانية. -يلا حتى لو سگطها هو بعدين ياخذها غصبًا على أبو.

-وأبني منهو تاخذه، تره أبنچ گاضب البيت بكبره كل الي يلگفه ينهش لحمه، حتى خطار بعد ما يجونا بسببه. -ولا راح يجونا بعد وحتى أبني ما راح يعقل، خالته لسه بهذا عمرها إذا لزمت واحد تعضه. -گرت عيني بيچ، گومي ييمه يله سويت لچ ريوگ لخاطر نطلع للوهاد، أنتِ تشوين السمچ وأني أسوي خبز طابگ عمچ مشتهي خطية. -هذا عمي ما يگعد راحة ما يشوفچ تعلب روحچ من السمچ، خلي ينتظر تولدين ويشتهي على راحته. -ياع وترديني من هذا وأگطع؟

-عزه هم ناويّة تخلفين بعد؟ لا فدوة سعاد كافي اثنين، بعدچ صغيرة أرتاحي شوية. -راحتي بشوفة ضحكته وهو يراگب ولده يكبرون گدام عينه، ولچ گومي صدگ خلي أسألچ. گمت فركت وجهي عرفت بعد ما بيها نومة، گعدت يمي گالت: -شكو بين أركان وشهد؟ -ما أعرف ليش شنو الصاير؟ -صار أسبوع كل يوم يدزها لبيت أبوها الصبح ياخذ له كم ساعة ويدز حسام يجيبها.

-الله أعلم بس دا أحس يدبرون مصيبة، صار كم يوم إتصال لليل ونهار ويه غيث ودوم يدخل يم بيبي يسدون الباب. -سمعت طراطيش كلام بس ما متأكدة، بينا الحچي ما يطلع. -شكو أحچي؟ -گاظبين الولد الي داز واحد يگتل غيث من راح بيها شاهين بذاك اليوم. -ليش همه مو گتلوا؟ -أي گتلوا الي گتلو، بس الراس الچبير الي زتّه ما عارفيه، چانوا ساكتين هالمده مناطرين يسقط حق الدعوة، وبالأخص من خذوا مشية لهل المگتول وتنازلوا عن غيث.

-أي أعرف سمعت أركان يسولف بهيچ شي، حتى المحامي الي ناي چانت تدرب عنده كامش القضية وفتحها مرة لخ، بس ليش؟ -على الأكثر عارفين منهو الراس الچبير الي چان ناوي يگتل غيث، وگعت بشاهين، إذا أنگضب معناتها غيث يرد لحضن جدتي بعد ما عليه خطر. -يمه شيخلصه من عمامي، و النبي يگتلوه ما يخلوه عايش، بالأخص هسه عايشين بالفقر حسرة عليهم الدينار وهو هناك متنغنغ بفلوسهم.

-وهو موش غشيم هذا السبع، خال كلشي باسم ناي حتى لو صكوا ما يلوحهم ولا دينار، وهيه ما يگدرون يتحارشون بيها لأن أنتِ الوريثات من بعدها، مسوي تنازل حتى عن أطفاله، تالي ما يتأذون، لاعبها صح. -ما أعرف والله بس إن شاء الله ما عليهم، صدگ أم أركان البارحة سمعت صوتها بالليل شتريد چاية؟ -لا يا ناقصة يعني چنتي گاعدة وما نزلتي!

المهم إجت تريد ترد لأن متكاونة ويه أم عامر وجدتي طردتها گالت لها ردي وعود أركان يشري لچ بيت زغير تعيشين بيه. -شنو شعورها من شافت بطنچ عالية؟ -سكتي أول ما دخلت شلت أبني ولتحت يم أبو أركان، هو ما چان منتبه إلها، أخذوه مني يلاعبوه وأني خشيت بحضنه بحجة ألاعبه ويا. هيه دخلت شافتنا هيچ وهيه شالت روحها ودگتها بالگاع.

-حيل والله كلما ما أريد أتشمت بس من أذكر شلون چانت تعيرني ما عندي أهل وتصلخني بالعصة وتشمرني بيت الحيوان أحقد. -عجل لبالچ ربچ يزت الظالم بحجار، فدوة لاسمه أخذ حيف كل واحد منا، والبارحة إجت شهد تگول أبوي گاظب سهيلة طاگها طگ لمن منهيها، لأن معيرته بهناء گالت له همزين خلصت أقلها حصلت زلمة ترس حضنها ولد وفلوس، موش حرمة خاتلة بالبيت بس تفتر مثل المسودن ما يگدر يرد حگه. -أبشرچ أركان رضى أروح لزواج رنو.

-هاي البشارة الحلوة، أي خطية نروح نوگف وياها لأن أمها زعلانة عليها ما عدها أحد، حتى شهد گالت أروح مهما يكون بت عمتي. -كل عقلها أمها بعدها زعلانة عليها يعني لو ما متنازلة عن الحاضر چان لسه ما مطلگها حسام وضالة معلگة. -بينا الحچي أركان عطاها حق أبوها كامل بالسكوت وگال لها خليچ يم أهل أبوج ونكري محصلة منه شي لمن ياخذچ زلمتچ، تره أمچ طمّاعة وما تخليچ تعرسين لخاطر الفلوس.

-تتهنى خطية هم أنظلمت بسبب هالعادات، يله گومي بيبي هسه تلگيها مخبلها شاهين. -مثل العسل على گلبها خالتو ومگضبتّه چريدة تعلمه شلون يطگ الچلاب بيها. -عزه راح أتخبل أبني أكثر ما هو مخبل، خلي ألحگ. -هههه لا تخافين، أبو يمه واقف ميت ضحك وهو يدحگ أبنه شلون يلتح وراهن ما يخاف. -هو الأبو مخبل أكيد يفرح. -مبين الأخبال من هذه رگبتچ. -ههه على الأساس عمي عاقل، شو زيحي دشداشتچ شوية خلي أصدگ.

-ولچ سكتي، گال على الثوب الخذيتِه منچ يموت عليچ، جيبي منه چثير وعطاني فلوس. -خوش قبل العرس أروح لماما بغداد ما أخلي ثوب نوم ما أجيبه إلچ، خطية خلي يعوض الحرمان الچان عايش بيه. -فدوة لتراب رجلي، ربي يهني ويعطي الصحة، والله من فرحني بالغرفة الچان نفسي بيها حسيتُه صدگ يحبني وعاملني مگدار. -عمي حبّاب ماكو منه، ربي يحفظه إلنا، يله داده گومي نزلي قبلي بينا أغيّر ملابسي.

عصرت خدودي وگامت طلعت، فركت وجهي عفيه ما ضلن بنفس واحد كل اليجي ياخذ مراد بيهن. گمت لبست وغسلت وجهي، رتبت شعري شلون ما چان لأن طويل صاير كلش ممل. نزلت رحت لغرفة بيبي لگيتها گاعدة وبحضنها شاهين وشهد وأركان يمها يحچون على الكيف وفاتحين كام عرفته ويه غيث، أني هم ما دخلت تركتهم رحت للمطبخ أتريگت وطلعت ويه سعاد أساعدها. مر شهر والأوضاع أتخربطت بعد ما چانت هادئة كلش، أركان مخبوص إتصالات ومشيات هو وأبوه.

بيبي حتى شاهين هملته ساكنة المضيف والزلم داخلة طالعة عليها. عمي أبو حمزة كل يوم الصبح يجيبوه بس شكله متغير مثل الخايف، بس يتسنّط يظل متگتر بعربانته يتسنّط لمن يصير الليل ويرده عمي أبو غيث. أني ما أدخل بمشاكلهم، ملتهية ويه سعاد وشهد يا نشتغل يا ندور بالبيجات ملابس للعرس. گاعدين بالمزرعة نسولف والجهال تلعب گدامنا، لا والله شاهين يعض بأزهرو وريحانه وعمي يحامي منه، ما نشوف غير دخلت سماهر تركض وتعثر وتصيح:

-دخيلكم لحگوونااا! كام عمي گال: -شكو يبه؟ -عامر گتل سهيلة وانهزم. -شنهوو گتلهااا شتلغثين أنتِ؟ -گتلها يعمي راحت أختييي. -عش گتلهااا وأبوج وينووو؟ -أبوي تسودن يعمي تركتُه مجابلها ويصارخ. -لاه و لك أركااان الحگ يبووووي. كام أركان أخذ سلاحه وركض وعمي وراه حتى بدون نعال طلع يركض من شدته، إجت گعدت گدام بيبي تلطم تگول لها: -گتلها يجده گتلها ماتت أختييي. -إنجعل نار جهنم جزاتها.

-عش يجده عش، موش هاي حفيدتچ عش هيچ گلبچ محجر وكارهتها. -هذا حق دم ريحانة، الريحتها بدم بارد لبالها الدنيا تدوم لها، نفسه الي دزها لخاطر تگتلها گتلها بيده. -لا عامر ما يعملها أخي وأعرفه بس هاي إبليس الخذت كلشي وانهزمت لبلاد الغرب شعلت النار بينهم. -مداسها بروسكم فداها الحلال والسلف بكبره، گومي لا تبچين ببيتي ردي لبيت النجس أبوج أبچي غادي. رادت تحچي زمخت بصوت گمزّتنا كلنا، گامت مكسورة ضمت وجهها بالشيلة تبچي وتمشي گوّه،

گالت شهد: -أبوي راح يروح بيها. بدعة: -يطبوا أطويحيل لا تبچين يجده، صح عزيز عليچ بس ما يستحق دمعة لأنُه ناقص غيرة وعرض لحمه نجس. -يمه أختي هناك هسه تتخبل. -لا تخافين، وأنتِ سعاد عمة لتحي ندهي لي جسار خلوه يجيني بسرعة. راحت سعاد تركض وإحنا شلنا الجهال، باست شاهين وأخذت نفس منه وگالت: -أخذي يجده عينچ بيه لا تغفلين عنه. -أي بيبي. -وخبري لي الهترة شوفي لي الشبل والصگر شلونهم اليوم السبع ما خبرني أخاف صاير لهم شي.

هزيت راسي أخذتُه بأيدي الثانية لأن أزهر بأيدي، دخلنا جوه صافنة على بيبي ما انهزت شعرة منها ولا تگول أحفادها، همها الوحيد ذوله الثلاثة. گعدت بغرفة شهد تبچي على أبوها و تباوع لي گالت: -هسه حسام يكرهني لأن گتل أمه. -لا حسام زلمة ما ياخذچ بذنب أحد. -ولچ بسببي أني الطشيت الخبر بس عمي غيث گال لي ما يصير شي بس أحچي لخاطر نگضب الچاتل. -شنو حچيتي ولچ؟ -ما حچيت بس گلت عمي غيث عرف چتال ريحانة وراح يرد ياخذ حقها.

-عزه بعينه شيطان مناك ويحرك العالم هنا بيده، بس ما أستبعد هاي فكرة ناي لأن محد يدري سهيلة إلها أيد بالسالفة غيرها. -أصخام الصخم وجهي راح ينخرب بيتي. -ولچ شبچ حسام يموت عليچ، صح يحب أمه بس كاره أهله، لو تعرفين شلون چان شابع گتل وظلم من چان عايش بيدها هيه وأمها. -مالي ذنب والله ردنا بس تطلع السالفة تا نعرف منهو الچاتل.

ظلينا گاعدين للعصر حتى غده ما سوينا، محد إله نفس ياكل، بيبي دزت جسار أخذ بت عامر وداها يم خواتها عد هناء. صار الغروب وماكو أي خبر، گاعدين واحد صافن بوجه الثاني لمن دخل حسام يرعد بصوته يصيح: -شهددد! گامت ركضت انضمت وراي، دخل وجهه أحمر عيونه طالعة، گال إلها: -شعملتي؟ گلت له: -بس إهدأ حسام، تره ما إلها ذنب كل السوته گالت لأبوها غيث راح يرجع لأن عرف گتال ريحانة، شعرفها أمك الچاتلتها وأبوها راح يسوي هيچ حتى لا ينكشف.

-ولچ أمي ماااتت مااااتتت أمييي. گالها وگعد على الچرباية كامش راسه يبچي بصوت عالي مثل الطفل، رحت يمه خليت أيدي على راسه گلت له: -الله يصبرك. -على شنو يصبرني ولچ، واقف ما أعرف أبچي لو أضم وجهي من الفشلة، ولچن لحن أمي وخالي چتالين عمتي. -لعد شنو ذنبك أنت يا عيني؟

-مدحگة من فچار دمك من دمك نفسه، وكلام الله گاعد صافن بالمستشفى گال الطبيب البقاء بحياتك، ما أعرف أبچي لو أضحك، ضال أدحگ بوجهه مثل الفاقد عقله ويريد يميز أهله منهم. دخلت بيبي گعدت يمه، أخذت راسه لحضنها عصرته گالت: -أبچي يجده لا تكتم بگلبه، هاي أميمتچ حتى لو چانت نجسة تظل إلها حق عليچ. هيه حچت وهو ما صدگ بچى من گلبة، أشرت طلعن، طلعنا رحنا للمطبخ يم سعاد گعدنا.

نصبوا الفاتحة وتكتموا على الخبر بين العالم، ما گالوا غير عامر تعارك وياها وهو شارب گتلها بدون لا يحس. عامر انهزم الكل يدور عليه ماكو، بس اسمه صار بالدولة والمحامي علاء الدين لزم القضية. مرت الأيام أجواء حزن مهما يكون وشما صار تظل إلها ذكرى بينا غصبًا عنه حزنه.

أركان أخذ بيت زغير لأمه لأن صارت من الروس بينها وبين أم عامر، بالأخص من اكتشفت جهال أختها الچتلوا بنتها، أخذت توتة وراحت عاشت بيه. وأركان وحسام ما تركوها يتناوبون عليهن ما خاليهن يعتازن شي لا مصرف ولا أكل. صار أربع أشهر على وفاة سهيلة، رنو أتزوجت سكتاوي، محد راح لعرسها؛ عمي أبو غيث أتمرض نهار وليل نايم محد يعرف علّته شنو، وختمها بزعل بعد حتى ما يحچي لأن سمع بيبي تگول لعمي أبو أركان:

-طهر أزهر كافي حزن ما تستاهل نحزن عليها أكثر من هيچ... ... اليوم گاعدين من الصبح نستعد للطهور، الكل إجه حتى سماهر وأم وأم أركان، بس ما إلهن صوت متگترات يخافن من بيبي، بس نظرة الحقد واضحة عليهن بالأخص من دخلت أم غيث وماما وگامت بيبي استقبلتهن ودخلتهن يمها گعدن. ماما صحتها رجعت مثل أول كلها نشاط والضحكة ما مفارقة وجهها، وأم غيث كل شوية عاصرة أيدها تهمس لها: -سدي بوزچ لا أهفچ طراگ.

گوّه ألزم ضحكتي هيه سايگة عليها وماما ما مصدگة عدها صديقة تطلعها وتعلمها. أم غيث كلها شيطنة چنها أبنها، گاعدة منتچية تضحك ويه بيبي وتسولف لها على ناي شلون صايرة صاحبة مشاريع، وترد تتخازر ويه سماهر مخازر وذيج تطحن. وترجع تندار تسأل سعاد: -شلون الحچي وياچ؟ وسعاد تگول لها: -طاير بيه وبجهاله. وتخلي أم أركان تشيل روحها وترگعها بالگاع. شلت شاهين من الگاع خليته بحضن ماما لأن ما خلى واحد كل اليمر يضربه، باستُه گالت:

-يمه وكاحة ناي. أم غيث: -غدي شچابه للغالية. -ياا أم غيث والله نفس الصلافة ذيچ هيچ چانت مجلوبة بزغرها. -شلون راح تخليني أهفها على حلگها ولچ كم مرة گلت لچ لا تحچين على جنتي؟ -يله من زين جنتچ چنها جني مسودن. -ولچ لحن گضبيني لا أگتل المفهية وأخش السجن بيها. دا أحچي وقاطعتني أم شاهين وأسماء بدخولهن، گعدت يم عمتي وهنه راحن لبيبي سلمن؛ أسماء دنّگت على أيدها باستها گالت: -شلونچ يجده؟ -يا بعد جدتچ بخير أبوج وين؟

-ما إجه تعبان ظل بالبيت. -أها تعبان لا عجل خلوه يرتاح زين، بس چان إجه بين أهله يشبع عينه منهم. -شقصدچ جده؟ -ما قصدي يجده وسلامتچ، لا تخافين راح يشبع راحة بگد الچان ناويها لأحفادي. -جسار بالباب گال اتصل بالجدة ما ترد گولي لها خليها ترد. -جيبي الجهاز خالتو غادي بسرعة. گامت راحت يم الكنتور شالتُه أنطته لبيبي وهيه گعدت يم أمها تباوع لي بكره. بيبي طلعت بره تخابر وأم غيث ضربتني على ضهري صحت: -آااي. أم غيث:

-هيه هاي الجملة الچابت روس أحفاد بدعة. -صدگ على طاري أحفاد بدعة، نانو فتحت مكتب وصارت صاحبة اسم وكذا. -أعرفها عرمة والي براسها تعمله، هذا الأغم ما يگدر لها بس ينبح. -هههه أي والله خابر أركان يگول له إمكانية تعجبچ فتحت المكتب بفلوسي وما تعمل لي معاملة إذا ما تاخذ مني مقدمة حتى خصم ماكو، أنوب أعرفها تقفص بس إذا أنت سبع أحچي ومحمد تخش بعينك. -مال إبليس للشيطان. -لا أبشرچ أبنهم طلع أضرب منهم أثنينهم.

-بعد جدته يخبرني يشكي لي منهم يگول ما يعطوني أكل ويطلعوني أجدي بالبرد وإذا اعترضت يزتوني بالبالكون. -تره يچذب لا تصدقي. -عجل منين يطلبها من الهترة أم نص متر لو من أبو الي تفكيره يخلي حتى إبليس يخجل من نفسه. ظلينا نسولف شوية ودخلت بيبي، باوعت لأم شاهين وأشرت إلها أي ذيچ دنّگت مهضومة، ابتسمت بيبي وگعدت أخذت نفس براحة لزمت عصتها وانتچت بهيبة حسيت اكو شي صاير. فززتني أم غيث وهيه تگول:

-لا تفكرين چثير مو زين عليچ، تركيهن وبشريني ما حبلتي. -والله عمة كل يوم يضحك عليا وبعدين ما يسوي لي طفل. -لا هذا حيال بعد لا تخلي لمن يگضبچ شاربه ويحلف بيه. -أي هو هم هيچ حسوي. -وإذا عطاچ كلمة ورد بيها تركيه خلي يولي. -أمم أگول له يطلگني حتى يخاف بعد يعيدها. -أي يعمه صيري وكحة هذا مستغلچ لأن هتر ومالاگي واحد يضبه. هزيت راسي أي. -الله يشعلچ يا أم عاشق شلون جبتيهن بطن وحدة. ضحكت ماما وردت تبوس بوجه شاهين.

ظلينا لليل نسولف ونضحك ولمن دخل أركان گال: -گوموا استگبلوا خطاركم يااابه... **ناي** انداريت لگيت ولد مسلحة، انداريت للمطار صار بعيد علينا ما نلحگ حتى نرجع له، جريت جهالي خليتهم وراي وجود وكرم صاروا بوجهي. راح غيث وگف گدامهم گال له: -عرفناك بذات وتعمل أطهور بغياب خويك، بس مال تستگبل استگبال نواقص لا هاي چبيرة. طلع أركان من بينهم گال له: -شعدك رديت لك؟ -مشتاگ لخوي وريحة ديرتي. ضحك وغيث فتح أيديه إجه يمشي بسرعة،

حضنه وغيث عصره همس: -أركان توه ما نور السلف يخوي. -مشتاگ لك بگد رحمة ربك. -عجل چذبت مشتاگ للي خذوه بغدر من بينا. -موجر نار محتام گلبي يخوي. -عينه بالدرب مناطر جيتك لخاطر تاخذ له أبنه. -ما أگدر يخوي، گالها وحضنه حيل وبچى بصوت، وهاي أول مرة أشوفه يبچي هيچ، عرفته مشتاق له بس يخجل يوصل گبره لأن بعده ما راد دمه. دگدگ على ضهره گال له: -اليوم قبل طر الفجر نزور گبره. وخر مسح دموعه وضحك بس ضحكته بيها كسرة.

هز راسه واندار إلنا گال: -يابه حي الله من چانا. راح جود وكرم سلموا عليه باوع لي. -شلونها الذيبة؟ -ههه بخير ما طولكم بخير، شلونهم الأهل؟ -مناطريچ بالسعف يرحبون بطلة چهرتچ الرحمانية. -حلو يعني الطريق بعده خطر والاختيالات منتشرة. -حلّفي عمي وكتاب الله ما شايف هيچ لچاعة، تهير العبوة بيدها وتسأل عن مكان الانفجار. -أسبق عدوك بخطوة. -لكي تعتم الرؤيا وتوهمه بالانسحاب؛ هههه نورتي ديرتچ يا أخت عاشق. -منورة برجالها.

-يالله يابه اليوم الكل يمّنا يتفضل. جود: -... بيت عامر والله تعبانين. -ماكو عذر، ترحون وياي ترتاحون ونگوم بواجبكم، وباچر تگفون معزبين بمضيف خويكم تستقبلون خطارنا. -لا اليوم نرد لهنا، نشوفهم ونرتاح، وباچر والله من الصبح احنه والأهل يمكم. -هلا تسبگ هلا، اخذوا راحتكم، الحمد لله على سلامتكم. قالها واندار للشباب، قال لهم: -يبه جيبوا السيارات واخذوا الجنط.

اجوا الشباب أخذوا جنطهم، سلمت على البنات وجود للمرة الألف توصيني على عاشق وكرم، قعد يحچي وياهم على الكيف وهمه يأشرون "إي"، باسهم وقاموا سلموا وراحوا، واحنه صعدنا ويه أركان. شغل سيارته وحركها، طفر عاشق، كله: -اني أسوق. أركان: -أهاا ولك أخاف تزتنا حدر تريلة. -لا أعرف، عجل مادريت غير قمت أشتغل تكسي؟ اسأل غيث منهو يوصل رفقانو لشغلهم كل يوم. -أهاا عش تشتغل تكسي؟ النهبتوا أمك ما كافيكم؟

-عجل مادريت غير سلبونا، ناي صابها شرجي وغيث صار بواب وكتلنه الجوع، تالي گضبت السيارة اني گمت أشتغل. -ناي شرجي؟ وغيث بواب؟ لا عجل صدگت؟ أتلقط عليه يول. اندار فرحان، قعده أركان بحضنه، سلمه الاستيرن وهو طاير، غيث سحب علي خلاه بحضنه لأن بعده يغفي، ضم وجهه بصدره ثواني ورد نام. ظلت هي كل دقيقة تسأل: -شوكت نوصل؟ وأرد: -هسه. لمن سمعت غيث قال: -گضبتوا. سديت حلگها حتى أعرف على شنو يحچون، رد أركان: -من البارحة بالمركز. -اعترف؟

-إي مثل ما گلت عمي الشريف زاتوا، بس هو زمال، داز له واحد أخوث بأول هدف خطاه واجى بشاهين. -شاهين يدري بس ما لحگ يحچي، لأن دخلته عليه چانت سريعة موش مال دفاع. -أكيد سمعهم وهمه يتفقون بساعة وصلنه، لأن مرتين اتصل علي وما رديت، لبالي يريد يندل مكانه بيومها وصيت الربع يغلقون أجهزتهم. -مرتين نواها ومرتين شاهين يعطيني روحه بيها ويصدها عني. -لخاطر تحمي ابنه من بعده.

-هذا ابني أركان، بروح أخيك لا تحچي جدام الجاهل هيچ، كبر وكام يحس ويفرق، خلوه ناسي. -لحد ما غيث لازم تخليه يزور أهله. -خليه يكبر شوية لخاطر ما ينجسر گلبه بكل مرة يسمع عاشق ينده لي بيها "يبه". -الينوجع يكف بصلابة، والينكسر يقوى. -ما طول رأس يشم الهوا، غير الضحكة ما تمر على ابن شاهين، وحگ الخلق السماوات السبع، اللي يفكر يقرب صوبه أمحي من الوجود. -عجل اتوكل. -افااا، قبل لا أصعد السيارة عطيت إشارة للشباب.

-حي الله ابن العم. -تحي ودوم بزلامها. هيرتوا السلاح؟ -كلوا جاهز، مناطرين ردتك. أخذت نفس، شيء بداخلي ارتاح من سمعت غيث هيچ يحچي، يعني محد راح يتجرأ يقرب منه ولا يگدرون حتى يداعون علي. تذكرت المدالية اللي جابها لي، طلعتها من جيبي أباوع لها، صليب ناعم، ضحكت بستها ولبستها. وصلنه للبيت نزلنا، صارت عيني بعين غيث، أجذب إذا أگول ما خايفة، بس من ابتسم ومد إيده راحت كمشتها، باوع لي أخذ نفس وقال: -يله. لحن.

بيبي تركت عصتها وگامت، والكل گام متفاجئين، انداريت لگيت غيث لازم إيد ناي على آخر كشخة، واقفين بهيبة وبثقة، تحس صدگ واحد ساند الثاني. قالت بيبي: -هلا بأحفادي وراعيين المكان، هلا بجسارين هامات العدو، هلا باللي ما يهابون الموت. ضحكوا اثنينهم، فتحت أديها، راح غيث حضنها. باوعت لناي نزلت دموعي، ابتسمت ركضت حضنتها، عصرتني حيل شهقت، أخذت نفس طويل مني قالت: -أوووف يا ريحة اللي راحوا. -لبالي بعد ما تريدين ولا راح أحضنج هنا.

-تتذكرين شنو گلت لك بيوم دفنت أهلي؟ -ما أتركچ لو يظل آخر يوم بعمري. -وهاي رجعت. اجت ماما وخرتني وسحبتها لحضنها، حضنتها وبچت وباستها، وخرت مسحت دموعها قالت لها: -لا تبچين يا أم عاشق، رجعت. -من دون إخوتك دوم شالعة گلبي. -ههههه حتى تكثر معزتي يمك.

بچت ماما ردت حضنتها، صارت عينها بأم غيث، باست ماما وخرت وقفت، تحس هواي حچي بينهن، ابتسمت بكسر وأم غيث أشرت لها تعالي، ركضت حضنتها، خلت رأسها بحضنها وبچت، وأم غيث بچت على بچيتها. ثواني واجى غيث جرها، قال لها: -تراك فاهمة غلط يولي، ذيچ أمك. أم غيث: -انگلّع لك لا أطر رأسك يا المعفن. -استلم، وإنوب تگول لك "عش محد يحترمك". -غويثون بعد لغاد، رد لحضن جدتك.

-راد بس هيچ جدام الغربة أسلم لخاطر أكتم نفسهم ما أعطيهم مجال للشماتة. -أهاا إذا هيچ أتلقط عليه. ضحك وهي ضحكت، سحبته لحضنها، اللي يسمع حچيهم ولا يگول هيچ واحد مشتاق للثاني، راحت ناي يم بيبي وقفت خجلانة، أخذت نفس باوعت لها وبيبي رافعة حاجبها. ضحكت وقالت لها: -بدعة گلت لك لا تتحديني. -هتره ولگعة وما يصير لك جاره. -اللي يسمعك يگول ناهبة هلالك. -ههههههه كربي جدة، فداك الحلال وصاحبته. دنكت شبكتها همست:

-تتهنين بي يبعد جدتك. -شلونك بيبي؟ -ما غمت عيني، مناطرة ردتكم لحضني، نذرت روحي فدا لتراب رجعتكم. -وهاي رجعنا. -نورتي ديرتك ومكانك جدة. استوها توخر عنها ودخل عمي أبو أركان يركض، قال: -ولك يا السبع رديت يا عمي؟ راح غيث حضنه، كله: -شعمل؟ دحكت العشيرة سابت من بعدي، گلت خليني أرد أضبهم. -أحط رجلي بنص السلف اللي أنت تضبه؟ -چان خليت رجلك بغير شي وگضبت روحك يا أبو أزهر. -لا يا سايب يا ابن السايب، عمرك ما تنعدل.

-هههههه ترباتك عمي. -يا عيون عمك، الحمد لله على سلامتك يبويه. -الله يسلمك، بالمبارك عليك الخلفه الجديدة. -انكتم لا أكتمك نهائيًا، وأنت بويه ناي شلونك؟ ناي: -الحمد لله عمو بخير. دخلت سعاد تهلهل وطش چكليت، وشهد ركضت لعمها شبكها، قال لها: -طگج الحرمة؟ -لا عمي بس بعده زعلان وما يحچي وياي. -أسحگ جهامته وانعل أبو أبوه. تركتهم يحچون، رحت كمشت إيد ناي، ضحكت وسحبتني لحضنها، همست: -راح نرجع من جديد نعيش سوا.

-ما افترقنا حتى نرجع. -بعد ماكو تعب ولا هم. -خلصت قصتنا ويا ما ظلت بس الأيام الحلوة. -أبشّرك غيث البارحة نفذوا الحكم باللي قتلوا أهلنا. وخرت باوعت لي، عيونها مليانة دموع. -جبتها بتعب، أخذتي كل حق إلنه، خليتينا بمكان چنا نحلم نعيش بي، تستحقين من يگولون بت أبوچ. -هسه أگول لعاشق غمضت عينه براحة. -باچر العصر نروح نزور گبره. -وأوقف گدام بابا أگوله ذوله عائلتك اللي أمنتهم عندي.

-أگوله فتحت بيتك، ردت هيبتنا بين العالم، خلتنا نمشي واحنه رافعين راسنا، رفعت اسمك على صدرها وخلت الكل يسولف بي. -أخذوا عاشق منك حتى ينهون اسمك، ردينا بثلاثة صگور مكانه. دارد وقاطعتني سماهر بصوتها وهي تگول: -هيچ يا خويه، سلمت على الكل وصلت لي حتى شلونك ما هونتها بي. أباوع لغيث قاعد يم بيبي وبالجهة الثانية أركان، اندار لبيبي يسولف وياها ما مهتم للي قالته. -ولك اني أختك، ما كفاك اللي عملتوه حرمتك بينا؟

عش هيچ يا ابن أمي حتى لو غلط ما استحق كل هذا منك. جرتني ناي قعدنا يم أم غيث، وغيث طلع باكيت الچكاير سحب وحدة وأشر لأركان شمر له جداحة، دنّگ ورثها أخذ نفس نفخه. -هاي هيچ ما موجودة جدامك حتى ما ترد؟ وين غيث اللي چان ما تغمض عينه إذا ما يأمن أنام. غيث: -الله يرحمه چان خوش زلمة، صح الخبر چان مفاجأة وحگكم تنصدمون، بس چان عملته فاتحة تليگ بمقامي وتعبي، موش يومين وتشيلون الچوادر والله زحمة. -غصبًا عني يا خوي.

ما رد، اندار لأم شاهين اللي خالة علي بحضنها تبوس بي، قال لها: -شلونك يا عمة؟ -عايشة يا بعد عمتك بخير ما طول ابن ابني مرتاح. -حقچ اليوم يصلچ، صح طولت چثير بس چنت مناطر علي يكبر لخاطر ما ينسى هاليوم. بدل ما تنزل دمعته بذكرى أبوه يضحك مفتخر. -ما فهمت يا عمة شتحچين؟ -سلامتك عمة، إي عمي شعملت ويه عشيرة الــ... أبو أركان: -قالوا مالنا حق يم غيث فجار دمنه معروف. -يعني اتنازلوا؟ -إي وأخذت عطوة كم يوم بين ما أنفض الشغلة.

أسماء: -شنو يا سالفة؟ بس لا تودون أبوي للموت؟ عش عمي ما كفاكم اللي عملتوه بينا؟ بيبي: -انكتمي، وإذا سمعت نفس أسحگ رأسك. -عش جدة موش هذا ولدك؟ واني شنو وين أروح بعد ما قعدتيني هالسنين كلها؟ -إي سهلة، واحنه بعدنا على كلمتنا، يأخذون أبوك من هينه، وأنتِ تصيرن باسم غيث من هينه، مو يا السبع؟ قالتها وباوعت لغيث، دنّگ يحك بخشمه، همس: -جدة راح تدخل قضاة، دخيل ربك ستري علينا. أبو أركان: -أهاا صدگ يا عمي؟ ناي:

-إن شاء الله عمي، كملت ما ظل شهرين وآخذ الماجستير، بعدها بعون الله هدفي القضاة، بس منتظرة العمر شوية يتقدم حتى يقبلوني. أركان: -أهاا يعني العمر گاضبك؟ -شتگول أنت؟ اكو شي يگدر يمنعني؟ -لا افا، مشهود لك، وأنت يا السبع اتعلمت تغسل أماعين؟ غيث: -إي بنفس الوقت اللي اتعلمت بي تغسل ملابس، انكتم انوب يحچي بزود وهو وجهه طاير نصه من الطراگات. قالها واندار لي غازرني، قال: -كم مرة نبهتك ما تطگيه؟ -والله ما أضربه. -حلفي. -والنبي.

بيبي: -أنچعلكم بالچدر، غربلتونا بين الغرب، الله يخزيكم. إي يا غيث شوكت ناوي تولي؟ -ويه طر الفجر. -ما خايف يا جدة؟ -افااا، وانه ولدك، گبل حرمتي چانت تلميذة وأحچي بزود، موش هسه صارت أستاذة. شالت رأسها ناي باوعت له، غمز لها وهي ضحكت. أباوع لسماهر وأسماء من كثر الغل ما تحملن نزلت دموعهن، وعمي أبو أركان ضحك، قال: -والنعم منها ومن أهلها، بت أبوها، لبؤة من ضلع سبع.

رن فونّه، طلعه من جيبه باوع له عاگد حاجبه، أباوع له مسح وجهه گوه يتصنع الجدية، حمحم ورد: -گول يبه... لا شوكت... يله جايين خلّك بالمركز... مودع بالله. بيبي: -خيرك يمه؟ -أبو حمزة ماخذيه الشرطة. -عملتها يا السبع؟ غيث: -الله وأكبر، تواني واصل حتى چگارتي ما لحگت أكملها، آووف شگد ظالميني. -أهاا گلت مظلوم، اممم خوش عجل، گوموا اگفوا لعمكم. -اني تعبان جاي من السفر. -أهاا وأنت أركان؟ أركان:

-اني چگايّري خالصة، ما أگدر أطلع بدونها. -ولك سعاد عطيني التفگه اللي وراك. هي تحچي واثنينهم طفروا طلعوا بسرعة، طلع وراهم عمي أبو أركان، بچت أسماء، قالت: -راح أبوي. بيبي: -ندهوا لي جسار. أم شاهين: -لا دخيلك عمة، ما ظلت عندي غيرها. -عجل كتميها، لا وحگ دم اللي راح غدر أخليها حدر الدرج مكان عمها، تخلص باقي عمرها لمن تعفن. أم أركان: -يظل أبوها وعزيز عليها.

-أم أركان، لك دقيقتين إن لميتي العقارب وانگلعتي بيها الخير، وإن اتأخرتي ثانية هذا حد يومك. بعدها تحچي وطفرت أم أركان وسماهر جرت أسماء اللي تبچي، قاموا طلعن بسرعة، انتچت ماخذة راحتها. سعاد: -لخاطر أحباب گلبك يا جدة، بسك دم، هذا گضبوه خلي أهل المكتول يأخذون حقهم بالسجن منه، خلينا نعيش كم يوم مرتاحين بدون ثارات. أم غيث: -شيريحها بدعة إذا ما تغط لجهامتها بالدم. بيبي: أنتِ موش جنتي منهزمة يا المصگوعة، شرجعج؟

حضي رجّعني، عجل هو اليدحگ مصايبكم هم الو نفس يعاشركم؟ أكوم آخذ جنتي وأحفادي وأروح. كمي أنعل خيرج. عجل ما كوم وهاي على إفادج. قالتها وتربّعت، عدّلت قعدة عاشق بحضنها اللي كان يباوع لبيبي بطرف عينه، ضحكت ناي. بيبي: أي يا الهترة ضحّكينا وياج. تريدين الصدگ؟ جنت أحب شخصيتج وأتمنى أصير مثلج، بس بعد هالحجي اتراجعت. عجل خلّج مثبتة على كلامج.

هااا لا تكليلهم ندهولي جسّارة، للعلم جسّارة يستلم راتبه مني، يعني هسه أنتي المفروض اتخافين مني. انتجت باوعتلها بصلابة، أخذتلها شوية وضحكت، قامت ناي قعدت يمها، سحبتها بيبي لحضنها، باست راسها قالتها: أتراهنت عليج من أول ساعة حكالي عنج السبع، وهاي كسبت الرهان. كتلج ما راح أصير مثلج. وكتلج راح يترحمون على أيامي بوجودج. ما أذّيت واحد.

بدل العز اللي عايشين بيه صاروا يترجّون الفلس مثل العبيد، والجان اللي يغلط يرتاح بالموت صار يكملها بذل بالسجون. متصافين بس كلمن بطريقه اللي ترضي ضميره. حرمة السبع ما تكون غيره لبوة مثلو. قمت قعدت يمها، قلتلها: وأني؟ أنتي الملاك اللي ربي عوضني بيه بدل بنات إبليس وعشرتهن اللي ما وراها بس الخراب. الله يحفظج النه بيبي.

خليت راسي على صدرها، شكد أشوفها قوية وكلمتها صارمة بس ويانه تختلف، أعرفها تحبنه على محبة أحفادها وتعلقهم بينه. ظلينه قاعدين، ناي مدنّگه على فونها، خاله رجل على رجل تراسل وتبتسم، ما هامها أكبر واحد. وبيبي تباوعلها بفخر، تحسها هيَّ هاي اللي راح تكمل مسيرتها وتنتشل تعب عمرها من الضياع.

صار الفجر وحنه مستمرين نسولف، ولا كأنما اكو عِندهم ابن بالسجن، بالعكس فرحانين، حتى أم شاهين تحضن بعلي وتسولف وياه عالكيف وهو يرد، تضحك تحضنه وتباوع لناي، عرفتها تسأله عنها وشلونها وياه. عاشق مراقب بيبي، يباوعلها بتك عين، تحسه يدرسها وهيه منتجة تباوعله بمكر، شكلهم يضحك. استوها الشمس تطلع ودخل غيث يرمي وأركان يضحك بصوت عالي، طلعنه كلنه، صاح عمي أبو أركان: بسكممم.

غيث: ورب العباد لو اتنخلني باردو هم أحتفل، تعااال بابا علييي. راح علي يركض، اتلكاه أركان شاله، أجه غيث سحب أقسام، كمش إيديه خلاهن عالسلاح، قاله أرمي. علي: عش بابا. زرنا أبوك وقال خلي علي يرمي ويسمع السلف بكبره رد حق دمي. ضحك ورمى، وأم شاهين هلّهلت، صح بيها كسرة لأن اللي انسجن أبو، بس شاهين أعز جان. ركض عاشق كمش بيبي بدعه، قاللها: خليني أرمي جدة. وعش تجيني ما تروح تطلب من أبوك.

غيث يخاف من ناي، وناي ما ترضى تخاف عليه بس تخاف منج، إذا أنتي قلتي هيه تسكت. آهاا منو قالك هالحجي؟ أني أسمع غيث كلما يتكاون ويه ناي يكلها: وعمة السادة رنة وحدة لبدعة تفلع أذاناتج. وهيه شترد؟ اتكله: خابرها تاكلها شتصخم من وراها وبدل أذاناتي تفلع راسك. أغراب يقل لأغراب وجهك أسود، تعال يجدة أني أعطيك سلاح وأرمي للصبح. طفر فرحان، راحت طلعت مسدس، خذته بره، اتلكاها غيث، قالها: ها جدة.

هذا السلاح هدية لشبل يرمي بيه هسه وتضموه، من يكبر تعطيه إلو. خو ماكو شي جدة هذا سلاحي. انكتم لك سلاحه، أكضب يجدة ودحگ عدل لأبوك لخاطر تتعلم بسرعة. علي: وأني جدة؟ ولج سعاد جيبي سلاح شاهين عطيه للصگر. راحت سعاد تضحك جابت مسدس انطته لأركان، سحب أقسام وقعد يم علي، خله إصبعه ورفعه ليفوك، رمى وضحك. عاشق بحضن غيث يسحب أقسام ويكمش إيده عدل، يرمي ويضحك بصوت عالي، تريد واحد منهم ينز لو يبين عليه أثر الخوف ماكو.

همست ناي: مو بيدهم، الطبع غلاب والدم يحن. دخل حسام قال: أجه المطهرجي جدي. أبو أركان: أخذ أزهر يبعد جدك، وأنتم كلكم عالمضيف، اللي يسأل شنهو هالضرب ردوا لخاطر الطهور. طلعوا وإحنه رحنه للمزرعة، فرشنا، الكل التم، طلعت بيبي بره، ما أسمع شنو حچت ويه جسار بس هو قاللها: اللي يكرب صوب البيت أنخله. عينك بأزلام أبو غيث وبنته تراهم أنجاس. السبع والذيب طشوا الشباب يحمون المجان.

ما ينغلبون تربات إيدي، وأنت يجدة هم خليك نبه لا تغفل. أشر على عيونه. ردت طلعت ويانه قعدت، خلينا داير مدايرها مخاد، انتجت تباوع لعائلتها فرحانة بلمة أحفادها، كلها أزغار تركض قدامها وتلعب. سعاد حضرت الأغراض الطبخ وأم شاهين وياها. عمتي أم غيث يم ماما يمهن ناي يسولفن، وكل شوية عمتي ضاربة ناي على راسها، تكمشها تباوعلها بغضب وترد تحجي وهم تنكفخ لمن قامت قالت: كافي عمة ابنچ سقط شسويله؟ ولكم كضبوها جيبوها لهنا. هاي شبيهج؟

غير أتشاقه، ليش ما تتحملين شقه؟ ضحكت، انداريت لقيت غسق ورويدة استوهن يدخلن، ركضت سلمت عليهن، أحضنهن ويردن هنه يحضنني، ما مصدقين هلكد ما وحدة مشتاقة للثانية. أجن سعاد وشهد سلمن عليهن، دخلتهن يم الأهل، شافتهن ناي اللي بعدها واقفة تبرر، صاحت: أي همزين أجيتن، تعالن حلفن ابنها صايع. اندارت عمتي خازرتهن، أشرت: أحجن. غسق: يمته غيث؟ وين اكو منه؟

رويدة: غير تخليه عالجرح يطيب، الولد عينه بالكاع ويساعد المعتاز، ذاك الشاب اللي ينحلف براسه. غسق: غير يصيحوله سيد غيث هلكد ما متدين. سعاد: ههههه حميتي زايد، سيد سني هاي قوية. لا مو هو يحلف بالأئمة فعادي ترهم. أم غيث: تعالي غسق عمة. شنو عمة؟ تره خطار ما يصير تكتليني عيب قدام الباقين. ما أطگج قربي. والله ما سويت شي، وجود مدللته وجنو أغيرلها أربع مرات باليوم حتى سألي رويدة. رويدة: أي. أم غيث: أي مو تعالي أنتي هم.

لا جذب عمة والله، أني مبتلية بجهالهن، وناي يوميه تطرد غيث بليل بس لأن يتأخر دقيقتين، وغسق ضربت جود بالمخدة ونيمته بالصالة لأن باسها بدون لا يكلها حبيبتي. بعد شمصخمات أحجي. ذاك اليوم ناي... بعدها ما مكملة وناي ركضت، وغسق شمرت بيتها على سعاد ولحقتها، ضحكت وأخذت جنو، رحت يم بيبي قعدت، ورويدة أجت سلمت على بيبي وقعدت خانسة يم عمتي، جرتها باستها وقالتلها: لا تتعلمين منهن، يمي الجذب. لا عمة أبد والله.

بعد أمچ وعطيني هالگطف أبو أذان، عش هيج ضعفان غادي بس عيون مگنبصة؟ من الوكاحة وعاشق ما يخلي يثبت، نهار وليل يلعب بيه. ابتسمت وخذته من إيدها تبوس بيه وهو يهوس ويصفق. دقايق ونسمع صعدت أصواتهم بالصلاة على محمد وصوت ضرب بالجو صار، عرفناهم طهروا، صح بيناتنا بس حتى يردون الفرحة لقلب عمي، هواي حزن. طلع المضمد دخل عمي شايل ابنه، طشت جكليت سعاد على راسهم، وأركان وغيث ميتين ضحك عليه.

عدلت حجابي، دخل جود وكرم سلموا وراحوا قعدوا يم عمتي يسولفون وياها. ردت ناي وغسق بس واقفات بعاد، قال غيث: خير شعاملات؟ ناي: غيث صدگ أني مضوجتك؟ لا أفَا أنتي. شوفي عمة هاي قدامج. غسق: وأني جود كللها شلون مداريتك. ضحك جود وحك خشمه مدنگ. شوفي عمة حتى من كثر الدلال يستحي شيكلج. أم غيث: تعالن يعمة، أني هذا الشهر يمكم وأعلمج شلون تمشن عدل، يمه غيث حضرلي الشقة الجوه. اعتبريها جهزت. وأنت أركان عمة ما تذبح، شمناطر؟

الجهال جتلها الجوع. أركان: شأذبح بعد؟ ظل بس ابنچ ما ذبحته. غيث: لا يا ابن الطرگه. أبو أركان: أنجعلك بالثول، ولك منهو الطرگه؟ أوو عمي دحگت هالجاهل بيدك، نسيت أنت نفسك أبو هالطور. الله يخزيك غيث، انكتم لا أقوم أسحگ راسك وأروح لأبوك زعلان راضي. عمي يا أبوي أني زلمه ميت صارلي سنة ونص. وأنت أركان عش ما رحت تعزم عمك؟ فوتوا حالي، بعدني حزنان على أخوي هذا السبع، السبع موش قليل. ومحمد مغسول حضكم، فلا تنعدلون.

شد حيلك بزرتك الجديدة إن شاء الله يعوضك بيهم. غيث: ولك بعد شيشد؟ بسنة وحدة زت اثنين، جدي بمراهقته ما دبرها. انزرع العقال عمي وقام وهمه ركضوه لزموا من إيديه يضحكون. **ناي** كملوا شطف اللحم جابوا، ما رضى أركان سعاد تطبخ لأن حامل خطية أو جذب، خاف عالمفهية مالته تتقرب للنار أخاف تموع أكثر ما هيه مايعة. رفع دشداشته شدها على خصره، وغيث نصب القدور، قاموا جود وكرم وياهم قعدوا يقطعون اللحم.

أركان وقف على قدر التمن، وغيث على قدر المرگ. الجهال يم بدعة خالتهم داير مدايرها وتحجي وياهم بهيبة وهمه يتسنطون بتركيز. واقفة يم لحن شايلة شاهين أبوس بخدوده، وغسق يمي تصور بيهم تضحك، قالت: الله نانو شكلهم حلو وهمه يطبخون. شكلج أول مرة تشوفين زلم تطبخ. أي والله وأركان مبين متمرس، شوفي شلون قلب التمن بسرعة. لأن دوم يطبخون بالأخص المناسبات والأعراس. لحن: نانو باوعي ماما شلون فرحانة تسولف ويه عمتي.

الحمد لله ردت ضحكتها وانجبر خاطرها. ما أعرف شلون أشكرج ناي. على شنو؟ باوعتلي ودمعت عيونها، لازمتها العبر، همست: على كلشي. ضحكت وحضنتها. جرتني غسق قالت: تره أغاااار. ههههه والله نفس المعزة. رويدة: شنوو لعد وأني؟ اللي أسلمها جهالي وأني مغمضة هاي موبس أختي، لا ما أشوف نفسي بدونها. ربي يخليج النه، ما حسيت بطعم الحياة غير بوجودكم يمي، كل ما أقعد الصبح وأشوف جهالكم يلعبون قدامي أشكر ربي هيأ ذاك اليوم اللي تعرفت بيه عليكم.

لحن: نانو أركان قال من تروح ماما الكم إحنه هم نجي وياها عود يعوضني مكان عرس رنو وكذا. راح أنتظركم. رويدة: عالأساس مبتعدات وحدة عن الثانية وراح تصير لهفة، شحال لو ما أربعة وعشرين ساعة فاتحات كام وكل كم شهر مجيتين علينه. لحن: غيورة راح أجي وهالمرة أظل شهر كامل. غسق: "إي ونطلع نفتر ونشمر زلمنا ونسهر بالليل بشقة ناي." باوعتلها وكلتلها: "وشكو شقة استغفر الله؟ "مو انتي أم الكل والقلب الحنون؟

"لا قلبي مزفت، واللي توصل يمي أدقچها." "بره منج، ولي يله، كل يوم يم وحدة نسهر." هيه تحجي وصاح كرم: "نانو! سكت أركان بكفخة على راسه، حكها وكال: "خويه ناي عرنوص بچى شيلي." ضحكت، انداريت لكيت عمتي تسكت بي، وحسام وشهد خالين هيا وريحانة يسولفون يمهن. علي كامش ايد بدعة، وعاشق واقف قدامها يحجي بجدية على الأساس شخصية وكذا، وهيه كوه كاتمة ضحكتها وتأشر "إي" حتى تزيد ثقته.

وقريب منها أبو أركان منيم ابنه بحضنه يضحك وياه، وسعاد تضحك على ضحكتهم. انداريت لغيث خال ايده على متن جود، يباوعون للطبخ، يحجي على الكيف وجود يضحك مبين مخربه. كرم كامش المصفي واقف يم أركان يباوعله منتظر الأوامر، وأركان متيه روحه عيونه تروح وتجي على المفهية، تقول راح تطير بالعجّة ويه علاليق الوسخة. اجيت أروح أهفه، كله حرگ قلبي يحبها أكثر ما غيث يحبني. انداريت أباوع لغيث بضوجة، لقيته عينه بيه، رفع ايده خلاها على قلبه،

غمزلي وهمس: "وعمة السادة أحبج." ضحكت. أني ناي الألجي، ذيج الطفلة اللي چانت تمتلك أحلام بسيطة مثل أي فتاة بعمرها، تكدر تحققهن بدون سعي، فجأة تلاشت وضاع كل أمل. بعد ما كنت أحتمي بظل، صار ينطلب مني الحماية، وأني أضعف من أنو أحمي نفسي. حاولوا يكسرون أجنحتي بشتى الطرق، وگعت، تألمت، بچيت، عالجت جروحي بنفسي أكثر من مرة، وكل مرة جنت أحس بالضعف بس ما سمحت لشخص يشاهد انكساري.

دست على وجعي، سندت نفسي بنفسي، اتقدمت أول خطوة الي بطريق الظلام، رغم عتمة المكان وألم الأشواك ما توقفت، استمريت لمن شفت النور اللي حققلي أكبر من حلمي. وهاي أني اليوم واقفة بين عائلتي اللي كل شخص أحسه بمثابة حياة جديدة اليه. أباوعلهم السعادة مالية روحهم وصوت الضحكة تنبهني أنو رب العالمين عوضني أكثر من ما جنت أتمناه منه، وأن القوة عمرها ما كان إلها علاقة بالأجناس.

وهنا نختم للمرة الثانية، وراح تكون النهائية إن شاء الله.