رواية لبوة على شفا الثار الفصل التاسع والثلاثون 39 - بقلم Leo Alfatlawi

بارت الثامن والثلاثون ***ناي*** ثارت الطلقة ودم سهيلة ترس المكان. ركض غيث عليها، دنّق شالها وصاح: "عباااااا بسرررعه! الكل انخبص، بالي مو يمهم، لأني أباوع السلاح بيد أبو غيث بعده، شكله مثل الفاقد. خفت يرجع لأختي، وبالفعل مثل ما توقعت اندار، ضغط على اسنونه كله لأركان: "بعد لأرميك أنت وياها." أركان صار سد عنها، ضامها ورا ظهره. أم أركان: "ارمي واجتل حرمتو، اغسل عارنه."

أركان: "قسماً بالعز، لأنهي البيت على البي بس فكروا تخدشوها." "ولك جابت العار وبعدك دافع! "ناااااااااااي! ركضت على صوت صرخته، جريتها من ظهره وهو ركض لعمي يتلاوى حتى ياخذ السلاح. سحبتها حيل، ما صار قدامي غير باب المزرعة، دفعتها حيل وطلعت وراها. جريتها وركضت بيها لجهة البحيرة، نص الطريق وكفت، قالت: "تعبت ناي." "يا روحي أخاف يرد، بس شوية ونوصل للشارع، حركي روحج." "ما أقدر، بطني اتشنجت."

"بس تعالي هنا بهاي الجهة، أضمج بسرعة فدوة." "ما أقدر، أقولج." قالتها وشهقت. جمدت على ايدي، كانت ترجف، شفتها بيضة. اخذتها للمكان اللي كنا فيه أنا وغيث، كعدتها، لفيتها بالبطانية وحضنتها، خليت راسها على صدري، بكت. "اشش، محد يوصلج، لا تخافين." "ناي، جان متت." "غير أحرقهم وروح اللي راحوا، بنفس السلاح أصفيهم، ما أخلي واحد بيهم يشم هوا."

"ما سويت شي والله، دخلت غرفة بيبي قالت قفلي البوب بين ما أرجع، بس طلعت دخل عمو سحلني وشمرني يم ريحانة على وجهي، شوفي خشمي يخر دم." "ورجلك الشفيه وين جان؟ "راح يوصل بيبي لبيت عمو أبو حمزة، لأن يردون يروحون يزورون شاهين. وسهيلة كانت تحجي يم عمي ما أعرف شنو، بس عمي أبو أركان بس يبكي وأبو غيث اتخبل." "سهيلة، أويلي يمه، شراح أسوي بيها؟ "ماتت ولج!

"ما تموت، اجت الرصاصة برجلها، لا تخافين، العار ما يموت. بس والله لأنّدمها وأخليها خدامة جوه رجليج، تريد تموتج مو سهلة بت أم عامر القذرة." "ناي، اخذيني منا فدوة، ما أريد أظل." "أخذج بس هدئي، شهالعائلة اللي ما وراها بس المشاكل والموت، أحنه نطلع من نكرة نوقع بالأنكس." "بطني توجعني حيل." خليت راسها بحضني ولفيتها عدل، ضليت أمسح على راسها، الرجفة ماخذتها، خفت لا يوقف قلبها.

متّكئة أحجي وياها وأهدّي بيها، تذكرت ريحانة، كمزت، قالت: "اش بيج؟ "عزة بعينه ولج! ريحانة نسيناها." "لا لا ترحين فدوة! "لحن حبيبتي، هنا ما يجون، مكان معزول، بسرعة أرد." "ناي والنبي أموت، هسه يجون يكتلوني." "إذا ما لحقت، يموتوها ولج خطية تروح ضحية، بس أجيب الفون من غرفتها وأجي، ما أتأخر، بدعة ما هي تحميها." "لا تدخلين جوه، اكو شباج يم المبردة مفتوح، ما بي عازل، دخلي منه، تلقين الفون على الميز."

"تمام، لا تتحركين، خليج متمددة حتى محد يشوفج." ركضت رجعت للبيت لقيتهم ماخذين سهيلة وعمي مستلم ريحانة بالعودة يضرب وأم أركان تتوسل يتركها. خفت أدخل، إذا لاحني يخليني يمها حتى الغثيث ماكو يحميني. رجعت للمزرعة بجهة الغرفة، دفعت الشباج فتحته، طفرت منه، دخلت أباوع ماكو على الميز. وكفت محتارة وين ألقاه، عين بالباب وعين بالغراض. قلبت الغرفة، لا خليت ميز ولا جرارات الكنتور، طشرته، ماكو.

أسمع صوت صرختها أحسها بقلبي، وأعرفهم ما عندهم رحمة بالشرف، إذا ما تموت ما يتركها. رجعت قلبت فراشها وأشوف الفون جوه. اخذته وطلعت من الشباج، صار الحاشية بنص بطني، شوطت روحي. كمشتها وكملت الطفرة، رجعت كوه أمشي، الضوه بعيوني ما أشوف الشاشه، عليت الإضاءة. افتريت بالأرقام، شفت رقم شاهين: "وينك تعال شوف حبيبتك شديسوون بيها؟ ليش هيج تركتها؟ أخذت نفس ورجعت أدور، طلعت رقم أبو، اتصلت بسرعة. خليته على أذني وأمشي،

كم رنة وأجاني صوته كال: "ها يبعد أبوج؟ "عمو، أنا ناااي، ألحق." "خير يبه شصاير؟ "ريحانة راح يموتها عمي." "عش يابه؟ "ريحانة كانت متزوجة شاهين من كم سنة، والله العظيم زواج والعقد موجود شفته بس ما أدري وينه هسه. المهم ريحانة حامل وعمي راح يموتها هي وابنكم، لحقوا عليهم." "أحميهاا يا بوي، ويننن غيث؟ "طلعوا أخذوا أخته، رماها عمي. تعال بسرعة ما أقدر أحميها، ابنكم راح يموت." "جاي جاي يبوي جاييي! أم حمزززززززه!

يا مرة لحكييييي! سديت الفون، وصلت يم لحن كعدت، شمرت الفون، كمشت بطني. "ناي شبيج؟ "الله يحرقهم بنار جهنم! بطني ولج انشقت بالحديدة! "عزة ناي، أنتِ عندج سكر، أخاف ما يوقف الدم." "لا يوقف، ماخذة إبرة، انطيني الشال أشد بطني بلكي ينقطع الدم." "هاج، كمشي ولج، اتشوهت بطنج! "إذا ما شوهت وجهه مكانها ما تسمى ناي، آااخ يمه أكمشها لو لا؟

"كله من حسام، أنا سمعته يقول لعمو، كنت أباوعلهم بس ما أقدر أحجي لأن مهددتني إذا قلت أقولكم تحرش بيه." "لا يا جلاب! مو سهلة بس أنطيني مجال، وهذا رجلي الناقص أخذها وراح يركض بيها للمستشفى، أنوب يريدني أجيب لها عباية، أجيب لها جفن! "ناي، اتركيهم خلي نرجع لبيت بيبي." "أنتِ خبله؟ منو يدخلني غير يهفوني جلاق بعد اللي سويته! "خالي أخاف منه لعد." "بدون لا تخافين، هم ما يستقبلونه أحنه، بنات منبوذات بنتي افتهمي." "لعد وين نروح؟

"لجهنم شعرفني؟ حتى فلوس ما عدنه، وأنتِ يا المفهيه جوازج ما عرفتي تحصليه، هسه مو مال أدوس بطنج هم يلوموني." "قال يم ريحانة هو وفلوس مهرج، بعدين ما أعرف وين صارن." "أخذهن طبعًا، لعد منتظر فهاوتج! يلا بالله وين أروح بيج؟ أخاف يطلعون شرفاء ويردون علينا يسحلونه، عالقة جوه." "نروح لعيالج." "وشلونهم عيالي؟ أنكس من ذوله ألف مرة، عبارة عن جلاب رابطيهم بحبل مال زمايل." "شلون يعني رابطيهم؟

"هسه من يرد الغثيث ورجلك الخبل يعلموج شلون يعني الربط." "خبري بيبي خلي تجي تاخذنه." "لحن شبيج داده؟ تترجفين كل عقلج؟ لعد لو مارة باللي مريت بيه لا محال، جان هسه بعداد الموتى من الخوف! ولج ما يكتلونه، شمسوين قابل؟ "لا يكتلونه، شفتي شلون موتها؟ وهاي بتهم، أحنه حتى محد يسأل عنه ولا واحد يعرف وينه، وينك بابا ليش تركتنا؟ طلعت الحسرة من قلبي. "شجنت تفكر من تركتنا؟ ما تعرف البت ما تعيش ورا أبوها." غمضت ورفعت راسي.

صعد صوتهم، عرفت أجو أهل حمزة. لميت رجليه، ما أسمع شنو يحجون لأن المكان بعيد بس صوت العيطه تطلع. مرت أكثر من ساعة وأسمع أركان وغيث يحجون، انداريت لقيت جايين اتجاهنه وبيدهم حسام يسحلون بيه. وصلوا يمنا، شمروا قدامنا، أشر لي غيث: "قومي! "بطني تنزف ما أقدر." "ناااااي ودم شاهين أدفنج! قوميييي يا غضب ربي! "ريحانة متزوجة صار أشهر، شفت العقد بعيوني." أركان: "وينه؟ "ما أعرف، تلقيه يم مرتك العار." حسام: "جذب!

"أنت أنجب، وهذا شاربك إذا ما زينت لك ما أطلع بت أبوي. أختي دخل زلم مو تفو عليك يا الناقص، مرت عمك وعرضك! غيث: "ناااااي! ناي، العقد وينووو؟ "ما أعرف، آخر مرة شفته من حجيت ويه شاهين كان بيده لأن شكته ريحانة وشمرته عليه، بس تلقيه ويه أغراضه لو ظل بالمطبخ ما أعرف." "بالقرآن إذا جذبة من جذبج أقص راسج." "وعلى شنووو تقص راسي؟ تائهة يا أخي، طلقونه شنو ابتلينا بيكم؟ ما نريدكم." "انكتِمي واحجي مثل البشرررررر!

ريحانة من أشوكت حامل؟ "من أول زواجهم صار كم شهر، وهاي أختك الشريفة كلها ليش سكتت من دخلت بالموضوع؟ مو الشي اللي يمها تضمه واللي يمنا تشمره؟ "شتقصدين؟ خزرني أركان، باوعت له وسكتت، باوع لأركان ورد باوع لي، أشر: "شنو؟ "ماكو شي، هيج أحجي." "نااااااااي! أركان: "حسام ذب حجي على ناي بس أخذ جزاتو." اندار لحسام، فاتح عيونه وحسام زحف، كله: "والله خالي جذب، والله خالي ما تحرشت." دنّق رفعه من رقبته، صك على سنونه قطع النفس.

ركض أركان راد يفتح ايده ما قدر، ضربه بظهره دفع. ما قدر يهده. الولد صار أزرق وكام يرفس، ما نشوف غير أركان ضرب غيث بوكس بوجهه، وقع حسام من ايده. دنّق فرك وجهه وكام، ببالي راح يضرب أركان بس رجع لحسام، دفره ببطنه اتقيأ وأنطوه، رد ضربه بظهره عدله وضربه بنص وجهه. كمشه أركان كله: "مو تحرش وروح أخوي؟ "آاااركااااان وخر لا بالقرآن أخليك بصفه وأدفنكم سوه! "اهدددي يا خوي راح يموووت! يولي! "أنعل أبوك لأبو أبوه! وخرررر!

" قالها ودفعه وقع بالكاع، رجع دفر حسام سكته بمكانه. اندار إجاني، دنّق جرني من شعري كال: "شلون أتحرش بيج؟ "غيث شعري! "أنعل أبو غيييث! أحجيييييي! "اشتعل خالي على هاي العيون." دفعني وراح له صار أركان بوجهه، كاله: "بس أهدء! بالقرآن جاهل ما يفهم." "زين شاربك يولي! حرامات محسوب على الزلم." "مات يا خووي مات يكفييي! "ما أطقه بعد." "عجل تريد تحتفل وياه بشكله الجديد؟

غيث لا تتسودن، أخذ حقه من شاهين وزيادة لخاطري، ازهر يا خوي ابننا لا تنسى آمنه يمنا." دفع أركان وراح داس على راس حسام. "دحگ يولي، وحق اللي خلق السماوات السبع، إذا بس لمحت عينك رايحة صوبهِن موش مدحگ ولا ذات كلمة، أربطك بالسيارة وأسحل بيك السلف كله ما أتركك لمن تموت." حسام: "أي أي خالي والله ما أكرب لهن أبد." "لا تراويني وجهك، بس ألمحك أعدمك العافية." أشر: "أي" وهو يرجف. "ما طولنا هينه ما تطلع من الغرفة حالك حال الغنم."

"أي أي." "وهاي عيونك إذا وصلت حد حرمتي مرة ثانية أقلعهن." قالها ودفره بنص وبجهة طفى عيونه. تفل بوجهه ودفعه برجله. كام يسحل بروحه يركض للبيت، أجه يمي، رجعت لورا، قلت له: "غيث." "اشتعل أبو غيث على أبو مصيبتج! لا تزحفين لججججج! "وخر غيثثثث! أنا ش دخلني؟ جرني من شعري، ضميت وجهي بسرعة، كعد نص كعدة كال: "شيلي ايديج." "لا تضربني."

"ناي مال تحرش بيج وأركان فرها، شوفولكم زمال غيري، مشوها عليه، زتي اللي ببطنج كله أحسن ما أشوف لوجهج." "وخر عني أول والله ما أحجي تره." دفعني. "الغي ولا تحاولين تجذبين، بالقرآن أعلقج بالنخلة." "أي." أركان أشر لي ودار وجهه بسرعة لأن انتبه له غيث، قام جره من ياخته: "شضامين؟ "غيث لا تطلع قتلة أختك بينا، ذاك أبوك اللي رماها روح له، موش تتسترجل علينا." "أنعل أبوك لأبو أختي، أركان لا تفر السالفة، عيب وأنا أخوك."

"سماهر اللي دبرت السالفة ودزت لك فيديوهات ومقاطع صوتية جذب حتى تترك ناي." "أحلف جاهل قدامك أركان وداعة ابني الما شايف الضوه أسحك بالخوه وأنعل أبو أصلك." "عجل عش طقيت الجاهل إذا تعرفه جذب؟ "موش جاهل ناقص مثلك وعينه رادلها قلع! أحجيييي لك! ثارت طلقة وصوت صرخة، ترك أركان وراح يركض وأركان وراه. لحن: "قومي خلي ننهزم." "أنتِ ثوله؟ هذا شيطان تعرفين شنو شيطان؟ يطلعنا من جوه القاع ويعلقنا." "هو ما تحرش بيج ليش قلتي له هيج؟

"منتبه له يباوع علينا، مو أقولج إبليس متنكر؟ هذا لو كامشه متحرش صدق كان موته." "منو انقتل بعد صوت رمي؟ "عسى ما كلهم، أحنه شكو؟ بس حرمات ما عاقدين محكمة، جان ورثنا منهم." "شنو ضامة أنتِ وأركان؟ "غيث مو ابنهم، لقيط لقوه بالزبل وربوه." "عزة خطية! أنا أقول حلو مو مثلهم، طلع مو ابنهم بس أركان هم بي شبه منه." "هم لقوه بس مو نفس الحاوية، لا غيرها شوية أوسخ." "من هيج أسمر؟

"عفية يعجبني ذكائج استمررري. قومي نشوف كم واحد مات غير صباح معثر هذا." قمنا رحنا للبيت، دخلنا لقينا أم حمزة حاضنة ريحانة وتبكي وأبو حمزة كامش سلاحه وواقف بوجه أبو أركان يقول له: "البت بتنا، ما لك شي يمي." "عجل تاخذها من هين وتحرم شوفتك ليوم الدين." بيبي: "عفية بولدي اتجتلوا! أبو حمزة: "يمه هذا آخر أمل عندي، شايلة ابن شاهين من ريحته، ردت لي الأمل بالدنيا، وليدي راح يرد." أبو أركان: " الجاهل ابن حرام ينزل والبت تنجتل.

بيبي: اتخسى! موش حفيدي اللي يدنس عرضه. ابني مربيته أحسن من تربيتكم السقط. الجاهل حلال ويجي، وأنا أربي مكان أبوه. واللي يقرب صوب ريحانه أخلي جيبه براسه، أنعل أبو بكبره! أبو غيث: يمه، البت بتنا وحنا نريد نقتلها. كافي فضايح، ومالكم حق تحجون. هذا حقنا. : عبنك شريف وعندك غيرة! روح صفي الخيسة اللي تحت بيتك يا الدثو! آخ لو ما غيث واقع بعيني جان محيتكم. تفو عليك! : يمه، لا تظلين تعيريني بيها!

أول ساعة انهزمت طلقتها، ولو عايشة جان فصمت راسها وغسلت. وهاي الخيسة أنا أقتلها بيدي! : كونك أزلمة وتمد إيدك عليها. أبو حمزة: البت بتنا. أنطيتوها لنا حرمة لابني، واللي ببطنها ابننا من نسلنا. أبو غيث: أبو حمزة، هنه كلمتين ماكو غيرهن. البت تطلع تنسى خوتنا. غيث: يابه كولوا يا الله، استهدوا بالرحمن. شاهين أخونا وتربى بينا، ونعرف طينته من شنهي. ما يقرب لعرضه على جثته. أبو أركان: عجل منين حبلت، وأشوكت؟

: من زلمتها. لا تخلي الغضب وحجي الحريم يغلطك بتربات إيدك. الكل يشهد ريحانه رجلها بروس حريم السلف، محد مدحگ وجهه. موش تخليهم يدنسون شرفها. : تعال يبه أركان اسندني. : أش بلاك عمي، شتهاجس؟ : ما أعرف يا بوي، تعبان. أخذوني لغرفة أمي. وأنت أركان يا بوي، هاي أختك مكسورة. لا تأذيها وتحرمها من الهوا مثل أختها. أركان: أفّا يا بوي! موش باطل أعمل هيج. : يكولون عاقدة يعني ما طينت روسنا. أركان، عطيني كلمة موش أروح وتقتلها.

بدعة: حرمة شاهين أمانتي أركان. جده، أنا جنت شاهدة على العقد. راسك عالي يا جده، ما عاش اللي يدنسه. أباوع لأركان، عينه بريحانه. صح محترك من اللي صار، بس بنفس الوقت يباوع لها بكسرة. مهما يكون هاي عزيزته. غيث دقدق على ظهره، شال راسه باوع لها. : عرضك طاهر، وريحانه أنظف من حياتنا. انسى أختك، هاي حرمة أخونا وأمانته. أبو حمزة: وأنا راح أخذها لبيتي. أركان: لا، ما تطلع من هينه.

: البت بنتي، وأنتوا عطيتوها. مالك حق تردون بكلمتكم. غيث: ومحد رد بيها. البت الكم، والجاهل ابنكم. بس عمي، الحرمة تعبانة وعقلها موش يمها، ما تكدر تعين نفسها. : عجل أم حمزة وأسماء يظلن حدها لمن تولد. أبو أركان: نخليهن بعيونه. البيت بيتكم، وإحنا خطاركم. هلا وألف هلا بيك وبعيالك. جده: روح يا أبو حمزة جيب أغراضك. هذا بيتك وذوله ولدك. اقعد على أخيك الجبير حب إيده، عبنك غلطت بحقه. راح عمي أبو أركان لغرفة بيبي، سانده غيث.

ورا أبو حمزة رحنا على ريحانه، دنقنا شلناها للغرفة، بس أش باقي بيها! أسماء جابت مي وعمتي غسلت وجهها وكعدت تمسح بجسمها. أباوع لها لأم حمزة شلون ردت الفرحة لقلبها، من سمعت اكو ابن راح يعوضهم على اللي فقدوه. سبحان اللي ما يترك عبده بدون عوض. أش قد حجيت على ريحانه، ليش غلطت هالغلطة. بس من شفت فرحة أم حمزة عرفت ربي يسر لهم هاليوم وشال شكو خوف بقلبهم حتى يزرع أمل جديد بالحياة. غيرت لها ملابسها ونيمتها.

حضنت غترته وهمست: من يجي شاهين قعدوني. : ميخالف. : سنديني أقوم. : وين تريدين؟ : راح يجي وقت طلعته من المدرسة، الجو حار خطيه. أتلقاه أنطي مي يغسل. : أسماء حضرت له المي. : لااا! لا تخليها. أنا أتلقاه، مشتاقت له. ولج قلبي يوجعني لشوفته. : نامي، ومن يجي أنا أقله ريحانه تريد تشوفك. : قولي له خلي يروح لأبوي يطلبني منه، بلكي يرضى هالمرة. : هسه أقله.

: قال خلي ننهزم. أنا ما رضيت تا أبوي ما يزعل. ناي كسرت قلبه، ترجاني وبكى، بس أنا رديته. والله ما قدرت. : عفيه! هيج كبرتي بعينه أكثر. : أبوي ذله كثير. أبوي كسر خاطره. كل مرة يجي يتوسل ويدنق على إيده، بس هو يرده يقله ما أعطيك. : هالمرة راح ينطيج. أنا سمعته، وشاهين قال خلي ريحانه ترتاح حتى العصر أجي نعقد.

: لا لا، ما أرتاح. قومي جهزيني. ناي قومي جيبي لي شي ألبسه لخاطر أذب الأسود. هو ما يحبه، إي إي هو ما يحبه، دوم يترجاني أنزعه. : باوعي، أنتي نازعة الأسود ومحضرة روحج. بس نامي شوية، ساعة وأقعدج حتى أمكيجج وأحضرج للعقد. من يجي يشوفج يفرح. باوعت لي عيونها تلمع همست: ما يجي أنقتل. ضمت وجه أم حمزة بالشيلة وشهقت. أقدر أتحمل أي موقف، بس هيج قلبي أحسه يوجعني ما أقدر أكمل.

طلعت للمزرعة قعدت. اجت لحن تركض وشعرها مبلل وبيدها المشط. مسحت دموعي. وأخذته منها أمشط لها، لأن أشوفها بعدها ترجف. ما أعرف برد لو خوف، خلطت علينا هيه. قعدت قدامي مشطته وضفرته. لبست الحجاب. ضحكت بعد ما كانت بالشورت القصير تفتر، صارت محجبة وملتزمة هم. أجه غيث يتمشى وصل يمنا. طلع جكارته ورثها. قال: لحن خويه قومي جيبي لي مي. قامت دخلت، وهو قعد مكانها يمي. : عش عيونج حمر. : غيث، أختي جان ماتت اليوم. : ما تموت، موش تاهية.

: جان يريد يضربها، وقعت بأختك. لو ما كنت دافعه، يعني لو ما جنت موجود جان وقعت بيها. : لا تخافين، عدها زلمة يفديها بروحه. محد يتجرأ يلمس شعرة منها. وهذا اللي شفتيه من رفع السلاح بوجهه استسبع لأن شافنا قدامه. وإلا هو يخاف يطقها موش يرميها. : ما أخليها. أخذها وأرجع. لحن جبانة حتى ما تعرف تدافع عن روحها إذا وقعوها بمصيبة.

: لا أنتي بس بعدي، وهيه ما عليها. المصايب اختصاصج يا ولي. وأركان هم يعرفها. راح يعزل لها بيت وحدها، لا واحد يوصلها بعد، ولا هي تدحگ أحد. : وأنت؟ : أنا شنهو؟ : راح نرجع هناك لو نضل لو شنو وضعي وياك؟ : نحصل القتال وهين الباقي. احتمال أردج تظلين يم كرم لحد ما أخلص شغلي وأجي وراج. : وليش ما نضل هنا؟

: لا هنا ما ظل. ولا راح أرد من الأصل. أستقر هناك، آخذ بيت مستقل على البحر. حتى بس أتفكرين تجذبين لو تشاغبين أزتج بيه. لا من شاف ولا من درى. : وسارة؟ : سارة بشقتها موش يمك ناي. : رغم أغلاطها بس ما أشوفك تحاسبها. : شتعرفين عن حياتي ناي؟ : كل خير. : صح. عجل خليك هيج. تركي الجانب المظلم، لخاطر لا تكرهيني أكثر ما كارهتني. : أش قد غثيث. شلون حبيتك؟

: يلا على جمالج حمدي ربج. محصلة لك واحد مثلي. منهو مقلبج جنك بزون غاضب عليه ربه. كل عين شكل. أختك وين ولت؟ : راح تحفر بير وتستخرج لك مي. : من صغرها هيج ثولة لو ورا التحديث انضربت فايروس؟ : تسوى بناتكم. : مم. : استهزئوا وضلوا ركضوا ورانا. ما عاجبكم طلقونا. شكو مكمشين وتقلدون. شلون يخلوني أخذها وأنهزم وأخليهم يـ... بعدني ما مكملة حجي عصر وجهي. : هالمرة حجيتها، الثانية أهفج دفرة عدل بالكبر. ناي، لا تلعبين بعداد عمرج.

: دتشاقه غيث، وجهي تحطم. : أنعل أبو شقاج ناي. بالقرآن ما أرحمج. هالفكرة شيليها من راسج. سمعتييي! : ليش أشيلها؟ شنو ظام وتخاف أسويها؟ : ظام قبر أبوك. وموش أنا اللي أخاف. اللي أريده يصير، وراسك أشلعه إذا توقفين بوجهي. : راح تتزوج مو؟ : أتزوج أطلق، ما تدخلين. دفعته وكمت. : شوف غيث، أخاف رجعت لك وسكتت على اللي صار لبالك كل مرة راح أعبرها لك. ولا وروح أخوي. : نااااااااااااااي! : خفت أحلف بروح أخوي لأن تعرف راح أسويها.

: منهو الزمال اللي قال لك أقندر؟ : لا راح تتزوج وأعرف هذا الشي اللي سكت هالهوسة اللي صارت من شوية. بس وروح العاشق لو موتذبحني لو تصلخني صلخ وتشمرني للكلاب، ما أظل وياك. : كونك مرة وتتحركين. : أنهزم وتعرفني أسويها. قام رجعت لورا. : غيث، لا تتحداني. تعرفني ما أخاف أترك مثل ما الله واحد. بس تفكر تغلط غلطة. جرني من شعري وعصر وجهي رفعه

ليفوق حكى من بين سنونه: وعمة السادة يا ناي وروح شاهين، أمحيج من الوجود، أندمج أخليج تتمنين الله ما خالقج. : ميخالف بس ما أظل وياك. : نااااااااااي! ناااي! حسيت وجهي راد يطق هل قد ما ضاغط عليه. لو ما أركان يجي يركض وجرني من إيده جان فلش وجهي كله. شبلاك يا خوي؟ : بالقرآن أدفنها. : تطلع جنها زيبق، لا تراب يلمها ولا مي يغرقها. اقعد يا خوي، صدق كذب. نص متر هيج حارجه دمق. : هاي مرض ما يترك الواحد لمن ينهشه ويقضي حيله.

: استأصلها ولا يهمك. : خبيث ينتشر بس تحدر صوبه. : عجل تفيدنا ننطيها فصلية للطالبنا دم. : حرام يزتها بوجهك من الصبح وينعل يوم اللي طلب منك فدية. تركنا وراح لجهة البحيرة. اندار لي أركان قال: هاي لو الله منطيج طول جان شعملتي؟ : راح يتزوج مو؟ : يا زواج! الناس ناطرة منيتها بأي ساعة. وهاي تفكر بالنغل منهو ابزره. ناي بروح أهلج يكفي المصايب والهم اللي شايله. لا كل كلمة والثانية تذكري بأمه. : شنو الخايف منه لا أعرفه؟

: وقع الثار عليه. : شنو يعني؟ عزة بعيني لعد ما يشرد؟ : إي جاهل ويخاف من الموت. ينهزم ويخلي غيره يشيله. : لعد شنو يموت هيج سهلة عدكم؟ : لا ما يموت. تنحل لا تخافين. بس خلي نكضب الزلمة وننحر راسه حتى نفصل فرد مرة. انداريت لقيته قاعد يدخن يم المي. ورحت وراه. وصلت يمه قعدت يمه. حضنت إيده وبسته من متنه. دار راسه باوع لي. ضميت راسي بإيده همست: والله أحبك وأنت تحرك بقلبي.

: ناي، لا تجبريني أطقج. بالقرآن كوه أكضب روحي لا أذيح. : أنت قلت غصباً عنج. شعرفني شنو لبالي حتتزوج؟ مو تريد تقتل وتنقتل؟ : يعني أموت ولا أتزوج؟ : طبعاً. : هههه خبلة. بالقرآن إذا طلع راسج عقل ما فهمت. أركان: عجل اكو زمال قال لك تفهم؟ وهاي أكبر برهان. منهو يأخذ مثل هاي؟ صدق لحن وينها؟ غيث: -دزيتلها للحبشه تجيبلي مي. -ماكو جوه، هسه اجيت ما شفتها. -الحكومه صدروها يا أخي، كلش ماراهمات لحن والهواش نفس المكان.

-أكل تبن، وين دزيتوها؟ -ابن الكلب، أقوم أترس حلك علف أنعدل لا أعدلك. -أوهووو! ناي، وين أختج؟ -شمرتها بالبحيره، حوريه بحر ويه حصان مزرعه ما تعيش. قلتها واختبأت وراء غيث لأني رأيته أتى. غيث: هوووب ولك ابني، لا يصير له شي. -غيث حرمتك تتجاوز كثير، ولخاطرك أسكت، أكضبها أحسن ما أفلش فجها. -حتى أفلش جهرة أمك، امش يول. -أكضبج لو لا؟ قابل تطيرين؟ إذا ما قصيتو للسانج اللي ما بيه بس العارمه اطلع معتب.

-حتى أقص راس أبوك، أنت زلمه تقرب يمها؟ -غيييث، ما صايره هاي! عطيتها مجال كثير يا أخي، لا تعرف صغير ولا جبير، تتجاوز عالكل وما تحسب حساب، ما يصير. -راده عليك لو علي؟ حرمتي مشاكلها ومصايبها أنا اللي أشيلهم، عش منغث. -تراها ما نتحمل. -يا أخي اكو أحد شاكيلك؟ -غيث، البت ما تنكضب بعد، لا واحد قادر لها، تكف بوجه الجبير قبل الزغير وتحجي بزود، ما تحشم أحد ولا تخاف.

-لبوتي تقول اللي تريده وتمشي كلمتها على أكبر راس، والبي حظ يصدها، بالقرآن أدفنه بكاعه وأحسب الله ما خلقه. طلعت لحن من البيت بيدها مي، شافت أركان، ما عرفت شكو. اجت تركض، اختبأت وراء غيث، اندار قال لها: جيبي المي وسفطي بصف أختج. أخذ المي شرب وأركان راح كعد قدامنا. طلعت كعدت بصف غيث ولحن من الجهه الثانية. بالكاد كنت أتمالك ضحكتي، أباوع لأركان عيونه ناطه، وهاي الثولة لازكه بغيث وماسكه قميصه. همست: غيث، أخذني وياك.

-أفا يبعد أخوج، بدون ما تطلبين، شنو خبل أتركج بيد واحد أغم مثل هذا؟ وروح أخوي، حرامات بيه. -إي إي، طلقني منه متوحش. -لا هيج نتخارب، صح كنا تنكة مزنجره بس بيه شوفه، اتركج من وجهه، دحقي طوله. -كنا تيل بيت بيبي. -اتركج من طوله، دحقي عرض صدره. -مثل تنوركم مال الطين أسود وجاي بالعرض. -يابه خلوه يولي، دحقي شعره، تراه حلو لا تقولين بيه شي. -ناي تقول كأنه عرف ديك لازمته الدجاجه بتفله. -اشتعلت ناي، وجهه، دحقي عيونه.

-وحده أنت عميتها، ضلت بس وحده. -بنت الـ... أستغفر الله، هو طكنييي. -والله أنت من دفعته اجت بعينه، ضل بس وحده، ولا تقولين حلكه عيع، ما أريده بس يعض. غيث ضم وجهه وأركان صاح: هوووب يالعثره! -سمعت يغلط، طلقني منه. -أطلقج يولي، شنو أول مره؟ -إي والله، تتذكر من اجيت أخذتني من بيت خالي وكتلت أخوه باجي؟ الله إشكد حلو أكتل أركان. -بنت الأوادم، تردين تورطيني؟ دحقي شكله هذا مال واحد يقدر يطكه؟

-كتلك وأكلك السر الضامي عليك ذوله الاثنين. -حلّفي. -وداعتك أعرف، ناي كالتلي. اندار لي، قمت بسرعة ركضت يم أركان، قلتله: دخيله يمك احميني. بعدني أحجي ولحن غردت، غمضت عيوني. -أنت لقيط، لقوك بالـ... -بالزبل، قالها وقام، اجى أركان وقف، خلاني وراه. -بعد لك. -دخيله ما تاخذها. -لقيط بنت أنهار، مو هينه، وبالزبل يا الطمر الصحي. -دتجذب إشبيك؟ -عجل خلج وراء الدثو لا تطلعين. رجع كعد وإحنا كعدنا، أشرت لحن: سهله.

لحن: ما تكدرين، غيث يسحلج، تراه هواي ضامه عليج. -إشبيج يا الثوله؟ أنا أختج بعتيني؟ أمداج. أركان، عدكم خيل؟ أركان: عوزج بس خيل تكمل وياج. -والله بنفسي أركب حصان. -عيش ما كفاك اللي راكبته. غيث: لا يا ابن الجحش. -ابن الكلب، لا تسب، وأنتِ لبسي حجابج عدل لا أقوم ألبسج جفن. -أنكتم، بيك حظ بس تهتر، كف واحد منها يعدل فجك. اجت سماهر وبنتها وأسماء. شفت أسماء، قمت بسرعة كعدت بصف غيث وحضنت إيده، دنك حك خشمه، بالكاد كاتم ضحكته.

همست: أحضني. -ناي، عقلي يولي. -والنبي أخزيك وأقوم أبوسك قدامهم، وشرط من شفتك. -أنعل شرفج. -هو إيش ضال بشرفي من أخذتك؟ لسه أنت وابنك كلمن ماخذ جهه. غيث، أحضني حبااااب. -عينه لغيث يولي، والله زحمه، ما راهمه أخوي قدامي. جریت إيده، دخلت جواها، انتجه راد يسحب إيده، كمشتها عضيتها، ضحك وعصر أصابيعي. كعدن كلهن، ضلت رنُّو واكفه محتاره، ما ضل مكان. صاح لها غيث. همست: إذا خليت إيدك عليها أفرعطها بنصكم. -خبله، بنت أختي هاي يولي.

كمشت إيده الثانية، سويت روحي ألعب بحلقته، وهو هم سايرني، عرف إذا ما أمنعه أسويلي مصيبه. اجت كعدت يمه ولحن قامت راحت يم أركان كعدت. أسماء: صدك لحن، قالوا رادوا يكتلوج؟ -إي والله، خلى السلاح براسي، لو ما ملحك أركان جان متت. هسه الموته مو مهم، خفت أموت وأنا مو نظيفه. أركان: وييين يولي؟ يبه هذا حلكج خليه بس للأكل، وأنتوا رحمة لأمهاتكم لا تحجون شغله ولت. سماهر: ههههههه، لا تخافين نغسلج. -وأنتوا إيش عرفكم كم مره تغسل...

ما كملت، بسرعة سد حلكها بيده. غيث: عجل هيه حظوظ، عالم مطموره بالمزرعه ضاله بس تدحك، وعالم ضاغطه دكمة التكرار. سماهر: إشلونها سهيله يا أخوي؟ أركان: ما أعرف، أخوك أخذها. غيث: تركتها يم عامر وأمها يمها، ما بيها قز القرط. سماهر: أركان يا أخوي، البيت فرغ وراد له حرمه تكضبه، سهيله تسكطت وريحانه الله يعينها، وهاي مفهيه ما تعرف تمشط. أركان: والمطلوب؟ -بناتنا كثيره، أخذلك وحده تساعد أمك تكضبلك حلالك.

-حريم الفلاليح كثيره، تسد المكان لحد ما تقوم سهيله ونردها تخدم حدر رجلينا حالها حال العبده. أسماء: عمّه، خلي سنة أخوي تطلع فرد مره حتى تسويله عرس، خطيه كل زواجه هيج بدون زفه. غيث: وعش لسنته يكفي الأربعين، إيش تقولين؟ -هم صدك، هو راح بعد، الحزن ما يرده. -لحن، أخيه، تردين عرس لو تروحين تزورين قبر أخوج؟ باوعت له، أحسها كمشتها العبره، ما كدرت تحجي، نزلت دموعها. ابتسم وأركان سحبها لحضنه باس راسها.

-دحكي الفرق بينجن حتى تعرفن عش كاضبيهن بروحنا. سماهر: دموع تماسيح ومبينه معزتهن عدكم، واحد حتى حلقة ما خال بيدها ومنيمها عالحصير، والثاني اشتراها بمهرها حتى تخلف له. -أم عاشق عيوني، مهرها يا أخوي لا تبلشين حتى لا أجلطج وأطلعج بالخساره. أسماء: شنو بس لا كلكم هيج؟ تراني من هسه إذا ما مهري يخلي السلف كله يتحجى بيه ما أرضى. ضحكت، قلتلها: هسه حصلي رجل وبعدين تشترطي. -همم، كلش بوقته حلو. حضني غيث، قال: تقومين نتمشى غادي؟

-لا ما بيه حيل، وخلي أفهم إيش تحجي هاي. -يولي تهتر، مالج شغل بيها. دخلت راسي بحضنه، همس غيث: لا تكسريني. -ما عاش اللي يكسرج يولي، يندارلج غيث وهلو، فدوه لضحكتج، خلهم يلغثون ويقررون براحتهم. -ليش هاي دتباوعلي هيج؟ والله دتحرك قلبي. -يول لا تخليني أقوم أدوس راسها وتخارب ويه عمي، دحكي الزلمه، التسودن بنات أنهار إيش عملتن بحالنا؟

انداريت، لقيت أركان يلف بورده ناعمه، سواها على شكل محبس، واجى كعد يم لحن، رفع إيدها خلاها بإصبعها وباس إيدها، قالها: ما لقيت أترف منها غيرج. -حلوه. -أكبر عرس وبدله وأحلى غرفه تاخذيهن من هالشارب. -تراه مو بنفسي والله ذني السوالف. -حقج يولي، ومهرج باسمج بالبنك، خالو من أول يوم دخلتي بيه غرفتي، وبس تخلص الهوسه الج هديه، حملج ما ناسيها. شهقت، قلتله: شنو منين حبلت؟ باوعلي رافع حاجبه. غيث: شنو هالتسيب؟ شنو هالإنحطاط؟

بنت حدثة تضحك على عقلها وتحبلها، إشلون صدك ناقص؟ أركان: انكتم يول، اترك الخلفه وارفع إيدك وياي، خاف تطلع على خالتها، وين أنطي وجهي من العالم؟ -بالقرآن، إلا تشيل من هنا، تخزيكم، ما تخلي جار صاحي ولا جاهل ما طكه. -هه، ما حزرت يول، تاخذها لابنك؟ -عش يابه، ناقص ناي وابنها، مكفين وطالعين لذاك الصوب، كلمن يحمل بلواه. باوعت لحن، ضحكت بقهر، قمت حضنتها، همست: والله ما ردت أضوجت، ما قلت.

-مبروك يا عمري، يجي بالسلامه ويتربى بعزكم. -هههه، راح يصيرن ثنين ناي. أركان: استلم، أنوب حتى الاسم. -تراه حنصير 3، حتى شاهين الله يرحمه قال إذا بنيه ناي وإذا ولد غيث. -ههه، بالمقابل يولي. باوعت لغيث، أشر: مالج شغل. رجعت كعدت يمه، سحب راسي باسه. -وداعت هالعيون اللي لحد هسه ما أعرف شنو لونهن، ما ألمس مره غيرج، عطيتج كلمه للموت ما أرد بيها. أسماء: بس ابن أخوي اسمه حمزه، وإذا بنت أسماء.

-إذا عالاسم سهله، خوفج الشكل أنوب، خطيه عمي يبتلي باثنين بايرات. سماهر: يصير خير مرت أخوي، وندحك وقتها الحجي إشلون يصير. غيث: حبيبتي، اتريقتي؟ -لا والله. -عجل ما جعتي؟ -ميته جوع بس نسيتوني والله. -إيش تريدين أطلبلك؟ سماهر: وعش تطلب لها والزاد تاس البيت. -هم صدك كلامج ذهب. أركااان يا أخوي، جيب ذاك الخروف اللي ذبحوه. أركان: أحلف غيث، انضب وروح لحلالكم أكرم منه.

-بالقرآن أمدك وأنحرك مكانه، قوم وجيبه لهنا بين ما أجيب سكين حاده. قام راح للبيت وأركان لمكان الحلال، جر طلي من إكرونه. سماهر تطحل وأسماء تأكل بأظافيرها، رنو مثل الخبله تضحك. طلعوا برا بيبي وأولادها ويه غيث يسولفون، يضحكون، مبينه ردت علاقتهم. ركضت لحن كمشت دشداشة أركان، راح وراها أبو أركان سحبها لحضنه وباس راسها، بجت، قالها: امسحيها بوجهي يا بويه. غيث: وعش بوجهج؟ معوز وجه ابنك من كثر المسح راحت ملامحه، خلها تكمله.

-أنت انكتم وأكرم بحلال غيرك. -عمي ابني جوعان. -يخسأ الجوع، الحلال كله حدر رجليكم يا بوي، بس المعلاك لحفيدي. -أخذوا اللي تريده، أعرف حرمتي وين نساتها ومتعتها، تلقطي عليه يولي. رحت يمه، مد الطلي، شده إيديه هنه ورجليه، سحك عليهن، قال: تعالي. وقفت يمه، سحبني، خلى السكينه بداية. -لا أخاف. -قوي قلبج يبه. -لا لا غيث والله أخاف. -ما طولني بظهرج ما أسمع هالحجي، يلا لا وعمة الساده أمدج مكانه.

كمشت السكينه، مجرد شوفتها قلبي طلع من مكانه من الخوف، صار ورائي عصر إيدي. بيبي: ولك تسودن البت غيث؟ يا جده إيش بلاك؟ -ما تتسودن تتعلم. -يا ول جاهل من الهبطه يروح. -ما عليه جددده، اتركي البت لا تخوفيها، يلا يولي سمي، راح أطلع لسانه، انحري بسرعة. -أخاف غيث والله. -نااااي يلا. طلع لسانه، خليت السكينه، فهت إيدي، خفت غمضت، كمشها وأخذ السكينه. -راد لج بعد كثير، ميلي لغاد.

أخذت نفس، ارتاحيت، عزه بعيني وأريد أذبح بشر، هو حيوان ما قدرت. وقفت على جهه، ذبحه وأركان ذب دشداشته وكف صلخه وكطع لحمه، خلوا منقلات وفرشوا بالشمس. كعدت بدعه بالصدر، خلوا من الصفحتين مخاد يمها، خلت عصتها بصفها وكمشت سبحتها تسبح وتباوعلهم بهيبه. وعمامي داير مدايرها هما والأولاد. اجى حسام وجهه منفخ، ركض كعد بسد جده. غيث: قوم لك. أبو غيث: أنا ندهته، عش هيج حاجزوه بالغرفه، تقول جاهل، إيش بلاك يبه وياه؟

-هذا ممنوع يروح لبيتنا، إذا دحكت شكله غادي أفلع راسه. -عجل أمه غادي، غير يضل يمها. -حتى أمه طلعوها من الجفن ويجيبوها هينه، بيت زلمتها أولى بيها. بيبي: بشر يا ابن العوجه، ما الله أخذ المسمومه أمك؟ حسام: لا جده، زينه، طلعوا الرصاصه وسدها خالي عامر، قال: تايهه. -مم، حظ ما اجت بقلبها وتخلصنا من شرها. أم أركان: اسم الله على أم أحفادي. -أنجعلك أنتِ وجنتكِ فد عزة، العتب على السبع ما نحرج مجان الذبيحة.

-عيش هيج عمة تساويني بحيوان؟ -إي والله صدقتي عيش أنكس اسمو بيج. أنتِ أخس وأوطأ من هيج مخلوق. غيث شمر على المهفة على حسام، أشر له على المنقلة، بسرعة كعد وهو مدنك يهفي. كل ما يستوي شيش ياخذه، ياخذ منه كم وحدة ويجيب لي الباقي، وأنا متربعة يم لحن ناكل سوى. -نانو، إشكد حلو من تحس اكو من ساندك ويخاف عليك، من إشوكت فاقدين هالشعور؟

-ما أريد هالشعور ولا حابته، خلصت عمري أسند نفسي بنفسي وتعودت، اللي يريد يسندني صدق يساعدني أجيب دم الخلانه بدون سند. -أركان راح يسوي لي عرس بس تطلع سنة شاهين. -وابتكم وين تخلوها إن شاء الله؟ -أكيد يمك، لعد مو أنتِ خالتها؟ -وخلخاله اللي تخلخل أضلوعج! مو عندي عاشق خلي أدبره. -هو يلعب ويه خطيبته حتى يتعود عليها وياخذها بالمستقبل. -بعد جيبيها أشيلها بطني فرد مرة حتى يتعودون من هسه، لحن قومي لا أدفرج.

-نانو حبيبي والله بنفسي أصير عروس. -لحن عرسي بعيد عني، لا توصلين يمي لا أنتِ ولا خلفتج، خلوني أرتاح شوية. -بره منك ومن وجهك، وأنا أريد أنطي بنتي جنّة إلك، عيع عمة كلبة أنتِ. كمشتها من شعرها جرتها، قلت لها: شنو ولج؟ أركان: ناااااي! تركتها ومسحت على شعرها، ابتسمت. أبو أركان: يبه لحن قومي استقبلي جدتكِ.

اندارينه لقينا بيبي أم بابا جاية، كامشها واحد من ولدهم يمشيها، ركضت لحن حضنتها تبكي. عرفت عمي أبو أركان داز عليها حتى يجبر خاطر لحن بعد اللي صار. الحمد لله من الله يسّر لها هيج أب حنون مكان أبوها، وهيج زوج حنون يعوضها عن عاشق. أبو أركان: عجل يبه ما تقومين تسلّمين عليها؟ -ما أعرفها عمو. -عيش يبوي موش جدتكِ؟ -لا ما عندي أهل بس بابا وعاشق واتذبحوا.

-أستغفر الله ربي يرحمهم برحمته، ما يخالف يولي خطية، دحقي عليكِ بكسرة، قومي لخاطري، ولو بعد اللي عملتوه ما أستحق أقول هالشي، بس يبوي الشيطان غوى حتى سيدنا آدم، أنا البشر الضعيف ما يقدر عليه. -لا عمو حقك كل اللي سويته، بس لحن ترى أضعف من إن تتدافع عن حقها، كانت تباوع لك بكسرة ما عندها غيرك. -أعرفن يبوي، وهاي بنيتي مكان ريحانة، والله يهدي أبو غيث، هذا الزلمة يدحق كل الحريم على طاري حرمتو اللي خزتو.

-اتركك من أبو غيث عمو، والله ريحانة. -لا تحجين، يكفي اللي تطين راس أبوها، ما تتسمى بنت هاي لحن اللي تقولين أضعف مخلوق، انهزمت وخلت العقل يتسطر وتبوس أيادي حتى ما تصير دمايه، بس حتى ما تسوي شي يمس سمعتها. -ما يخالف عمو، البنت بدون سند أبوها تنكسر، لا توقف أنت والوقت ضدها، خطية غلطت بس غلطتها ردت الضحكة لوجه أخوك بعد ما كان ميت. -وكسرت أبوها قدام إخوتو وأهلو، قومي يبوي خطية جدتكِ عينها فيكِ.

هزيت راسي وقمت، رحت يمها دنكت بستها، حضنتني وبكت. وخرت أيديها حتى ما حجيت وياها، رجعت كعدت يم بدعة، وهي خذتها لحن كعدتها شوية عنه وكعدت بصفها حاضنة أيدها، باوعت لي قالت: شلونج بيبي؟ -بخير مداتشوفين. -إن شاء الله دوم. مبروك، كالت لحن حامل. -امم، بعاشق أريد، تذكرين لو هم مثل أخته مكروه؟ -والمسيح الحي، كلكم أحبكم نفس المحبة. -بس لا تحلفين، وهاي أخذنه اللي يقدّرنه ويسندنا، وما ظل شيء، وأرد عليكم واحد واحد، آخذ حقي منكم.

-بعدج قلبج أسود؟ -عمره ما صار أبيض، ما راح أرحمكم. ولدج أوقفهم سره هم وحفيدج، أخذ حق كل دمعة نزلوها من عيوني. -خالج السبب؟ -خالي حسابه حساب الآخرة، أدخله بجهنم من أوسع أبوابها. -من يوم يومج وكحة ومحد يكدرلج. رفعت حاجبي، انداريت لقيت غيث إيديه بجيوبه، واقف يضحك. دنكت، عصرت إيدي بدعة، باوعتلها ابتسمت، حسيتها مدتني بالقوة وأيدتني على اللي قلته. همست: -بنت أبوك مرة بألف رجال.

-راح آخذ ثارهم، وأسحك شكو واحد جاب اسمهم بالعاطِل. -وقتها بس أقول: صدق هاي لبؤة السبع، وما خطيت من تراهنت عليها. -سنديني. -بظهرج يا جدة، اذبحِي وأنا أنصب الجوادر، ويوم العزا أقضبج هالعكازة. -العكازة إلها أهلها. -وما يقضبها غير اللي يكون كدها، بنت بقوة السبع ونباهة ذيب. -ما راح أكون مثلج. -راح تخلينهم يترحمون على أيامي. -اللي ذاق الكسر ما يعرف غير الجبر. -واللي عاشر الظلم يدحك الرحمة عدو يا أم عاشق.

سكتت، رجعت أباوع لبيبي شلون حاضنة لحن وتسولف بفرحة. البنات كلها تباوعلها وتضحك، لأن بدون حجاب، عود حاطة فوطة بس بنطلون حصر والصدر دلعة، وهي مستمرة تنصح بلحن تصير هادئة وتسمع كلام رجلها، واللي يتعرضلها لا ترد عليه. رجعت باوعت لبدعة شلون قاعدة رزنة، متكيه على عصتها، مدكدكة كلها بالأخضر، زايدتها هيبة، تباوع بشينطة للقاعدين، كل شوية خازرة واحد خالته ما يندل دربه.

اتكيت عالنخلة، لميت رجلي، أراقب حركاتها، عجبتني شخصيتها، تمنيت أمتلك جزء من قوتها ونباهتها. مر وقت أسمع بيبي تقول لحن: -هذا حقجن يا بيبي. -ما معتازين والله. -لا، ليش؟ يصير بخت عمج ومرته ياكلون بيه. -شوكت طلعوا؟ -من جانت أمج، طلعوا راتب أبوك، وكاموا يستلمون بيه، عاد أخذته منهم صار شهرين، وهذا الرقم السري، كلتلهم: دا أبيع بيه أركان، حتى يخافون، بسرعة انطونيا. أخذت لحن الكارت، وأنا قمت رحت أفتر، أجه غيث وراي صاح: -هوب!

أم عاشق، يولي حدج هينا ذيج موش إلنه. -لا حبيبي، ما أروح بعيد هنا. -عيون حبيبج، بالقرآن مشتاقلج، والشوق طلع من نص روحي. -بيبي حتكعد حراسة للصبح. -اشتعل أصلها لجدتي، اليوم أسطرها بوحدة أخليها تغني يا حارمني. -عزه غيث تموت. -ما تموت، صل وعمة السادة راح تجلطني وهي صاحية. تعالي يولي، خو ما ضليتي بنفس زمال هينا. -ماكو أحد، صدق وين حرسكم؟ -قاضبين المنطقة، خو موش يجون يحرسون عيونج المشقلبة.

-غيث، والله هالكد ما تتنمر، ابنك راح يطلع مطعوج. -عش يولي! موش ابني، أكيد يطلع عليه. -اشكد ثقتك عالية، أموت من الضحك إذا طلع يشبه بيبي. -نزلي يولي، خلي نسوي غيرو، مشي عمي يأشرنا، خلي ندحك شرايد. بالليل فرشت يم بيبي، رنو واسماء يبسبسن ويضحكن، عرفتهن على نومتنا، لأن بيبي مصرة نظل لحد ما يلقون القاتل، والله أعلم بعد شهر لو سنة، محد يدري. دخل أركان، جان مسلح، دنك على راس الجدة باسها، وشمر السلاح، كعد يمها، أشرت: -بشر؟

-هانت، ما ظل شي ونقضبه. -عجل أخيك وين؟ -بره يرتاح شوية ويجي. -شبلاه يا جدة، شنو تعبان؟ باوعلها، عيونه صارت حمر، حجه بكسرة: -فقدنا بينه يا جدة. -آخ يا جدة، صرتوا تمشون بوحدكم، ما جانوا خالي بينكم. -احتاجيتوا اليوم يا جدة، نسيتوا ماكو صرت أتلفّت حولي أدوره. -ما نسيته، بس تجذب روحك، راح أخيك حدر التراب، راح شاهين أبو الضحكة الحلوة، راح عضيدكم اللي تستندون عليه. ولك أدحك بالباب، أمتى يا دخلو عليه مثل كل مرة.

-كسرنه بموته، تركنا بدون وداع. -رحتوا للمخزن، دحكتوا غريضاته، فقتوا ما جانوا، بلكيت تارك شي، تجيبوا لي أشتم بيه عطره ويهود جمر قلبي. -رحت ونزلت حدر المخزن، اتلكاني ولدج، سأل عنه يا جدة، ذبحني من بجه. -آآخ يا جدة، شاهين بعده صغير عالموت يا يمه، رحت مكسورة فرحتك. أجاني طاير يكلي: -جدة، عمي وافق، عطاني بنته يا جدة، ما مصدق راح آخذها لحضني، بعد ما أسهر أتأمل، راح أنام مرتاح. سودة بوجي، أثاري جان يقصد نومة المقابر.

خلى راسه بين إيديه وبجه بصوت عالي. دخل غيث عيونه حمر، غترته على متنه، شمر مسدس على جدتي، مسحت عيونها وشالته عصرته. -عش جبته يا السبع؟ -خليه يمج جدة، وروح اللي دفنته حدر التراب، ما راح يعبر هالاسبوع إذا ما أخذ دمه، وبسلاحه نفسه. -أخيكم عينه بيكم، مناطر حق تعبه وعشرته بينكم، شيل الرحمة من قلبك، وخلي إيدك بإيد أخيك، وآخذوا حق عضيدكم تاتغمض عينه براحة. أشر إي وطلع، كام أركان مسح وجهه وباس راسها وراح وراه.

تعدى الوقت وهنه قاعدات يحجن عالكيف ويضحكن، لمن دخلت أم أركان كالت: -ها عمة، تطلبين شي قبل لا أنام؟ -طالبة عزرائيل يسير عليج الليلة، وين أم حمزة؟ -قاعدة ويه ريحانة، ما أعرف البنت لا ترضى تنهجب ولا تركِد، كل شوية وقاضبيها تريد تنهزم تقول شاهين مناطرني. -تأخرت كثير. -الحمد لله تسودنت قبل لا توطي روسنا. -جايج دورج هانت، زلمتج وينو؟ -مقابل المضيف ودمعته على خده، يدحك مكان شاهين اللي تركه فارغ.

-لا حول ولا قوة إلا بالله، انقلعي من أريد شي، البنات يمي. أسماء: -إي أحنا يم جدتي، أخذي راحتج عمة. -عجل قومن افرشن تاتنامن يمها. -وغيث؟ -ينام يم أبو أركان بالمضيف، عش ضال وحده نايم. -يلا رنو قومي افرشي، أنا هم مشتاقة لجدتي، أريد أنام يمها، هاي هي عمة فدوة، أخذي فراش لغيث افرشي بالمضيف، وأحنا راح ننقل فراشنا هينه. هزت راسها وراحت، عيني بيهن شلون فرحانات يفرشن ويباوعلي بشماتة.

كملن فراشهن وراحَن جوه رجلين بدعة، كعدن يسولفن وياها، طلعنها من أجواء الحزن بظلن يسألن عن أيام زمان، شلونها الحياة وهي تجاوب، بس كلامها كله صارم، مبينة من زمن هذا طبعًا مو جديد. تمددت، صارت الـ11 وعيني ما تاخذ النوم رغم ما نمت البارحة. أحس صوتهن براسي يدق، دقايق وأسمع صوت غيث بره وهو يخابر سارة، أخذله بالعشر دقايق ودخل، بيده كوب چاي يشرب بيه، كعد مكنك، شافته بيبي صاحت: -قومن جيبيلي چاي. غيث:

-هاج جدة ما أريده. رنو خالي سويلي قهوة. -عش يا جدة، هسه يجيبلي، عليك بالعافية. -لا راسي مطبل، ما يصحيني غير القهوة. جدة: -يلا قومن لمن زبالتجن، ولا تحنّن ع المطبخ. وأنتِ جدة ناي قومي افرشي لزلمتج، خليه يرتاح. خلى الچاي كدامها، أخذت تشرب، ورنو وأسماء شالن الدواشك وطلعن قالبات وجهن يسون قهوة، راح وراهن، قفل الباب ورد اتمدد مكنك يدك سوالف ويه سارة. درت وجهي، غطيت راسي، شوية وأجه يمي، خلى راسه بركبتي، دفعته.

-كمل حجي وياها؟ خلى الفون كدام وجهي، مكالمة ويه أركان مدتها ساعة، استوه غالقها. وداز مسج: -والله جدتك إذا ما تأمّن ما تنام. خليك صاحي، لا أصعد أسحل أبوك وأربطه ويه الحلال. -شنو شعوره من تكله حبيبي؟ -من كثر ما سب أبوي، رادوا يحولون هويته للقطيع. -غيث إيدك! -ولج، أيامي اللي بقت تنعد وأنا ضال بس أدحك بحسرة. -صوتج راح تكعد. -هههه قديمة، قربي لج. -عزه غيث انطيتها منوم! -عجل شعمل؟

إذا اتفرعنت ناي، بالقرآن إذا ما تثبتي، أهفج بإبرة أخليج أسبوع بمكانج تعدين بطليان الأحلام. اندريتله، دخلت بحضنه، بكد ما مشتاقتله، أمنيتي أفوت بين بضلوعه. بالبداية على بالي متلهف لقربي، بس بعد ما شفته يوزع بوساته بشوق على جسمي ويشم بعطري، عرفت ما جان رايد قرب، لا مشتاق لحضني ونومتنا القديمة. صح يتعامل وياي بهدوء، يخاف على ابنه، بس ياخذله شوية وما يسيطر، يرجع غيث لسوالفه ولعنفه لحد ما كمشته. -شكو ولج؟

-ترى ابنك صار راسه مربع من التجعص. -أنعل أبو ابني ناي، ثبتي لا اطلع ضيم الأشهر من عيونج. -غيث راح أصرخ. -أخذي راحتج، هو مفضوح الصبح من يجون ويلقوها مطمورة بلا نفس. ناااي إيدج شيليها لا تدفعين. -انجعصتت غيث، انقطع النفس. -انجعليج ما شهقتي النفس، إيدج يوليي -الباب تندك، قمت لقيتها نايمة على صدره وهو ذاب روحه، تقول جان بجبهة. كعدت، بسته من خده، فتح عيونه، سحبني ردني لحضنه وغطاني. -غيث الباب. -تركيهم.

-عيب غيث، بس نشوف منو. -يكعدون جدتي الصلاة، ما يدرون قاعدة تصلي ويه الملائكة. -لعد شيل إيدك دا أنام. -منو قالج تكعديني؟ -لا لا غيث فدوة، والله تعبانة. -أمم تدللين. قالها وخلى راسه بركبتي عضني. -غيث غيث آآآ، انشلعت. -صوتج يولي. -وخري لعد. -ضحكي ولج. -يا لعد ما دريت. -إي غمازتج اختفت من الجفاف، ضحّي يولي. سديت حلكي. -حلو عجل، خليج هيج. حسيت إيده اتسللت لبطني، وحدها طلعت الضحكة، عض شفته ودنك يعضض بخدي. -غيث غيث بس اسمع.

شال راسه أشر: -شكو؟ -شنو حنظل هنا؟ ليش ما نروح لبيت أهلك؟ -ما أكدر أروح، خطر المكان. لا باچر آخذلي غرفة، مبينة مطولة الشغلة. -إي اشتريلي غرفة جديدة. -حلفي هذا وجهج مال غرفة؟ -شو كلها تشوفني حلوة بس أنتَ، شنو فلمك؟ -ثولان، وين جمالج؟ حتى أنوثة ماكو، خو الإحساس هاي شغلته تعبانة. -بعد بعد. -فتحي عيونج حيل، خلي أدحك شنو هاي، عش اتغير لونهن. فتحتهن وباوعتله، دنك باسني وعصر وجهي، كز على سنونه قال: -دخيل ربج، مال قرط.

وخرت إيده. -غيث. -عيونه. -جوعانة. -وعمة السادة، مال أهفج كله وأنا الزمال مناطر تكوليلي مشتاقتلك أحضني. -إي اشتاقيتلك وحضنتني، بعد جعت. -وأنا هم جوعان، ثبتي يولي. -بإبداعة ابنك، ما لمست غيري كل هالفترة؟ -لا وكتاب الله، نفسي بعد ما تتقبل وحدة غيرج، أحس متعتي ولهفتي بس يمج. -بلا ما أجه القدر عدل ويانا وما انجمعنا، اشكد راح تتحمل؟ -بكد ما تتحملين، شوكت اتفكرين ترحين بحضن غيري؟

-ما أروح العمر كله، ولا راح يخطر على بالي هالشي. -عجل شفرقني عنج؟ عود لأن صاحب علاقات جنت، ما راح أتحمل، ترى القلب انربط والعقل قفل، ما راح يستقبل أي شفرة غير شفرته. -يا خوفي يضربك فايروس وتفرمت، وأطير أنا وشفرتي.

-غلطت مرة وأكلت روحي ندم، الدقيقة اللي تمر بألف سنة، دخيل الله بالقرآن، أجيت أنجن وراج، ألبس التيشيرت أتخيلج من تلبسي، أوقف عالمراية أدحك مكانج وأنتِ تاخذين المشط، أنام أدور عطرج بالمخدة مثل الطفل المضيع أمه. -تستاهل، كل يوم أدعي عليك. -أنسي ناي، بروح أهلج. خلى راسي بحضني، بسته وهمست: -والله أصلاً ما أذكر، وحتى من تركتني ما زعلت منك، اللي يحب ما يكره ولا يذكر من اللي يحبه بس الخير. -وعمة السادة، أعشقج

-لفيت روحي بالچرچف وهو كام لبس، شمرلي ملابسي لبستهم. رد كل شي لمكانه، رتب الغرفة عالسريع وأجه كمش وجهي باسه حيل وراح بيبي. شال راسها، دكدك على وجهه، ماكو. غسل وجهه هم ماكو. كام للفون، اتصل، ثواني وأسمع كله: -يولي هاي ماكو ولا طكة -لا وعمة السادة نص حباية -أكل تبن وتعال قبل لا يكعد عمي -لا لا بإبداعة الخوة فشلة -أركان بالقرآن أصعد أسحلك جدام حرمتك، انضب ونزل يلاا لك. سد الفون ورد لبيبي يدكدك على وجهه.

شويه ودك الباب، أركان راح فتحها، دخل بسرعة طلعت، أخجل أباوع بوجهه بعد مصيبة غيث، شيكول هسه. صعدت لحن، دخلت لغرفتها، لقيتها مبطوحة على وجهه، مبينة جانت بحضنه، لأن نومتها عوجة وخدها أحمر شفتها منفوخة، ساحلها سحل وكاعدلنه ع الغلطة ابن الأطعة أذنها. اشعلت روحك كرم خليتها بحلكي. أخذت ملابس منها ودخلت للحمام، سبحت طلعت. لقيتها تتمغط، شافتني لفت روحها بالغطة، كالت: -شكو هنا؟

-انچبي وقومي انطيني شي أنشف شعري، هسه يلكفوني ويشهروني، تقول جنت ويه واحد بالشارع. -منين لي سشوار؟ أوقفي وفري راسج مثل المروحة هو يبس. -أنعل شكلج. -هذا شكلي اللي ما عاجبج للصبح كاعد أركان يبوس بي. -تف عليج وعليه، ولج قومي جيبيلي من غرفة شريجتج المعفنة. -حسام نايم بيها. -لعبتي أروح اتسلى بي. -لا لا ناي خطية مات من الكتل، ما ظل شي صاحي بي. -لعد قومي يلا.

وقفت أنشف بالخاولي، علما قامت لحن ولبست وراحت نشف شعري، وحدها شلت ذيل حصان، اجت تتثاوب كالت: -هاج. -نشفي بي. -استغفر الله لحن، وخري من وجهي. -أنتِ دوم مستعجلة، صدق سمعت عركة جوه. -شكو؟ بس لا بيبي ماتت، عزه بعينك غيث. نزلت أركض، دخلت لغرفتها، لقيتها قاعدة تفرك براسها وهمه قاعدين يتريكون. دخلت كعدت وياهم، كل شوية وكالت: -راسي دايخ يا جدة. غيث: -جدة ضغطج صاعد، كم مرة قلنالج لا تجثرين أجل.

-ولك ما أكلت بس البارحة لحمات شوي. -ما طالع من نفس أركان لهيج تمرضتي. أركان: -غيث شلونك؟ -أكل تبن وانكتم. أجه حسام يركض قال: -جدي أبو حمزة والشيخ السلف اجو، يريدكم بسرعة، تعالوا. قاموا طلعوا يركضون، ردنا نقوم صاحت: -ولا وحدة تتحرك. ظلينا بالساعتين وهمه بالمضيف، أصواتهم ساعة تصعد وساعة تختفي، بالأخص غيث وعمي أبو حمزة، مبينة مصيبة جبيرة، لمن سمعنا عمي أبو أركان قال: -يا الله. جدة: -تعالوا يمه ماكو أحد.

ودخلوا للغرفة كلهم، بس غيث جان وجهه محتقن وأركان مو أقل منه، عينه بيه. جدة: -بشروا يمه لقيتوا؟ أبو أركان: أَي يمه ابن الـ... جابوا اسمه الأَزلام. عرفتوا الناقص غيث وأركان، اليوم تجيبون راسه، وباچر تنصبون الجوادر تاخذون عزة أخوكم. أبو حمزة: محد ياخذ دم ابني غيري، موش أنقص من مگدار إخوته، بس حتى يبرد دمي. تعرف الياخذ الدم وراها يردون ياخذون راسه مكانه. أعرفن، وما ضل شي تا أَضَل لخاطره. ولدي وراحوا.

سماهر: الثار واگع على غيث. وأني راح أشيله مكانه، كافي ابني دفنته حدر التراب بعز شبابه. جدة: وحريمك يمه يضلن بدون أَزلمة؟ لا، الحرمة ترد لأخوتها، وأسماء راح يعقدها غيث هسه...