رواية لبوة على شفا الثار الفصل الثامن والثلاثون 38 - بقلم Leo Alfatlawi

ناي قام غيث. أردت أن أقوم لأمنعه، لكن سبقتني جدتي حين قالت له: "اوقف." رد عليها: "جدة لا تعرضي لي." قالت: "ما أعرض لك، روح بفالك يا جدة، اللي كاتبه الله يصير، بس ابنك ما أنوي تودعه." قال: "ابن من هو؟ قالت: "حرمتك حامل." قال: "جدة تراها مريضة بالسكري." قالت: "هاي معثرة، ما تعرف عندها سكر حمل." حسيت برد، قعد. حرك إيده على بطني حركة خفيفة، قشعر جلدي. قال: "كأني أدحج ضحكتك اللي ما لمحتها من وصلت لهسه."

قالت: "يعني بعدها على ذمتي؟ قال: "وأنت زات روحيتك بالموت، لأن عرفت وراء دكتك الناقصة ما ترد لك أم راس اليابس." قالت: "لا راح ترد لي جدة، هالشحنة صارت مزامط، وموش إحنا اللي تلوي ذراعنا وتنوخذ غصبًا عن شواربنا، عيب بحقنا وإحنا ترباتك بدعة." قال: "روحي يا جدة، وإخوتك بظهرك." قالت: "لا إخوتي، محد يقرّب صوب البطاعة، أنا اللي زامطت وأنا اللي أجيبه يا جدة، ما تدزين واحد ورائي."

قال: "أركان تعرفه، ما راح يتركك للموت وياك، ولك حسبالك إذا رحت يعيش وراك هذا الخبل؟ قالت: "يعيش، لا تخافين جدة، ناي وابني أمانة عندك، تاخذينهم وتروحين لغادي، لا تخلين واحد ياخذ ابنها منها." دنج، حسيت لحيته على خدي، أخذ نفس وباسني. وخر، راد يقوم. كمشت إيده. باوع لي. نزلت دموعي. همست: "لا تروح." سحبني لحضنه. دخلت بصدره وشهقت. باسني من رقبتي. قال: "راح يجيك عاشق ينسيك روحك ويغنيك عن الكل." قلت: "بس أنا أريدك أنت."

قال: "لا تزعلين مني ناي، وحق كتاب الله لا حبيت ولا راح أعشق مثل ما عشقتك." قلت: "غيث أموت وراك." قال: "ما تموتين، راح تكملين دراستك وتصيرين شي مهم، أمانة لا تحجين لابننا عاللي سويته بيك، لا تكرهيه بيَّ، زوروني حتى لو بالسنة مرة راضي، بس لا تنسين وجودي." قلت: "قلت لك ما راح أسامحك." قال: "أدري، ولا راح يجي يوم تسامحيني بيه، بس وحق الخالق الكون حبيتك أكثر من روحي، لا بد ما اكو يوم حلو بيننا يشفع لي يمك."

قلت: "ماكو غيث، إذا رحت راح أنتقم منك بابنك، أشمره مثل ما شمرتني، راح أضيعه." ابتسم، سحب إيدي، طلع الحلقة من جيبه، رجعها بإصبعي، دنج باسها وقام. طلعت وراه. كمشتني جدتي. قالت: "لا تدحجين وراه، يردون ما عليهم." قلت: "شلون ينطيك قلبك؟ قالت: "لأن أعرفن دازه موش أزلام لا السبع والذيب راح يردون، إذا موش لخاطر جهالهم لخاطركن." لميت رجلي وبجيت. انفتحت الباب. ببالي رد. دخلت لحن، ركضت لجدتي. أخذتها لحضنها، تشهق بصوت عالي.

قالت لها: "كله من وراك، شكد كرهتك." قالت جدتي: "يرد يا جدة." قالت لحن: "ما يرجع، هو قال لا تتزوجين، راح أركان بسببك، أنت قلت له روح." قالت جدتي: "ههههه ما طول قال لك لا تتزوجين، راح يعاند الموت ويرد لحضنك، عجل وين هو عش ما اجى يودعني لو اكتفى بحضنك؟ قالت لحن: "راح جدتي." قالت جدتي: "ما يروح، يرد يا جدة يكفي، ما يموتون، ولك شنهو مسودنين يتركون طويراتهم ويروحون، ولد وأعرفهم." قالت لحن: "قال ضلن يم جدتي."

قالت جدتي: "عجل شنهو خبله أتيهجن وأنتن شايلات العوض؟ أخذكن وأشم ريحتهم بيكن." ظلينا لوجه الصبح قاعدين. لحن قامت صلت وجدتي تسبح. دخلت أم أركان، أريد دمعة بعينها لو شي يثبت هي خايفة، ماكو. قالت: "تجهزن الريوك عمة." قالت جدتي: "كون نجهز زاد عزاج بخرابة." قالت أم أركان: "يا عيب عمة، فوق ما دزيتي وحيدي للموت." قالت جدتي: "أنا دزيته؟ مو كون البين ياخذك ذبح لوجه الله، قولي آمين."

قالت أم أركان: "يا عيب، عجل موش لمستقبل وليداتنا؟ قالت جدتي: "وينهم ويدلاك اش صفى بيهم؟ قالت أم أركان: "عندنا عامر وحسام." قالت جدتي: "هاي هي جسمتو أنت وأختك، عجل سمعتي يا ملك الموت، لا تفرحين كثير، جايين اللي ياخذون القديم والجديد." قالت أم أركان: "شنهو قصدك عمة؟ خليك حقانية وقسمي الورث بالحق."

أباوع لبدعة على قعدتها، متكئة. ما ردت، بحركة سريعة جرت العصا وهفتها، اجت ترس بوجه أم أركان. كمشت وجهها وقعدت متألمة. تفلتت عليها. قالت: "لحن جدة قومي اشطفي لي العكازة تنكست." قالت أم أركان: "عزززة عمة هاي! قالت جدتي: "ينجعل لها بالشلل والمرض اللي ما منه علاج، قومي جيبيها." كانت قريبة يمي العكازة، سحبتها وأنطيتها لبدعة. وأم أركان قامت وجهها أسود من الغل، طلعت وسدت الباب حيل وراها.

مددت رجليها بدعة ولحن، لفت سجادتها وراحت خلت راسها بحضنها وكمشت إيدها تلعب بمحبسها. باوعت لها وابتسمت. اللي يشوف صلابتها ولا يقول شايلة هيج قلب. أشارت لي: "تعالي." قلت: "لا." قالت: "يا الرعنا، لا تيبسين راسك، احسبي أني أمك، جدتك عيونك مبقعات من التعب." قلت: "أمي ولا يوم نيمتني على رجلها." قالت: "شنهو يا جدة ما تحبك؟ قلت: "لا بس كانت هالثولة مريضة وهي ماخذة اهتمامها." قالت: "عجل من هيج مجلوبة تربيتي بالشارع." ضحكت.

قالت: "انزلي جدة خلي ابني يحس بحنية أهله." قمت يمها، تمددت وخليت راسي على رجلها. الثانية لعبت بشعري. قالت: "أنتن توأم؟ قلت: "لا بس نفس السنة، لحن بالواحد وأنا نهاية السنة." قالت: "مستعجلة أمكن على ضمكن، زتتكن نفس السنة." لحن: "جدتي بناي استعجلت، ماما دوم تقول غلط جيتها وعيشتها." قالت جدتي: "آها، أخذت معزتك من هيج زاقطتي؟ قلت: "لا ههههههه، ربها عاشق، ما تشوفينها مسترجلة؟ ضربتها على راسها.

قلت: "كل من وراها، أمي شمرتني لأن مريضة وقالوا لها راح تموت." قالت جدتي: "حقدت على أمك ناي؟ قلت: "لا والله، صح جنت أتمنى أنام بحضنها وأحس بحنانها مثل لحن، بس جنت أكتفي أباوع لها من بعيد. عاشق ما قصر وياي، عوضني عن كل شي." لحن: "جدتي جان حتى ملابسها يغسلهن من يجي من الشغل، وياخذها ينيّمها بحضنه، حتى من يقعد يغير لها وياخذها وياه." قلت: "ترى لا ببالك ياخذني لأن أمي ما تريدني، لاااا لأن شوية أوكح." قالت جدتي: "قليل؟

قلت: "أي قليل مال طفولة." باوعت لها ضايجة. ضحكت. قالت: "أي كملي." قلت: "أي ياخذني وياه للشغل، وهناك ألعب ويا أصدقائه. كانوا يصيحون لي الفسفورية لأن عيوني تلمع، ما يردني للبيت لمن أتعب وأنعس، وهم من نرجع ينيّمني بحضنه حتى لا أحس أمي تاركتني." قالت جدتي: "وأمك الله يرحمها شبلاها جاهلين ما عرفت تدبرهن؟ قلت: "مو هاي مكمشة على إيدها، بس تبكي وصفرا بيها أبو الضريج." لحن: "انجبي."

قلت: "هههههههه، مرة عاشق جعص وجهها لأن ضربتني، ظلت أسبوع تبكي وضامة راسها مثل النعامة." قالت جدتي: "لعد مثلك كلي أنوثة؟ جدتي والله جان عاشق يسحل بيها البيت كله والشارع، وبابا يضربها وماما هم، وتطلع بالشارع المنطقة كلها تكتلها، تنكث روحها وتقوم كأنما ماكو شي، هي وكفشتها المليانة تراب وسخة تضحك بدون إحساس." قلت: "والله عاشق ما يرضى علي، جان يحضني ويظل يسكت بي، بس هم ما يدرون." بدعة: "تحبين أخيك؟ باوعت لها بكسرة.

قلت: "ذبحوه قدامي." قالت بدعة: "لا تبكين يا جدة، إذا نزلت دمعتك راحت حرتك." مسحت دموعي ولحن شهقت. صاحت جدتي: "رجلك جبيرة." قالت جدتي: "ناي يمه الله يساعد قلبك، موش على مصيبة أهلك لا يا جدة على هاي المصيبة." قلت: "أي والله أول وحدة أنت تحسين بي، مال أقوم أحبك من حلقك." قالت جدتي: "عيع، شلون حلق هو كلو جذب وعرامة." قلت: "يلا عاد صدقت، غيرك يتمنى يحصله."

قالت جدتي: "أخوث من ترك بنات السلف واجى مزنح ورا نص متر مرعوصة، غسلت إيده منه." قلت: "وشرط جبت راسه لحفيدك المفتخرة بيه للقاع." قالت جدتي: "قومييي لج." طفرت أضحك. قلت: "جابت راسه الهترا." قلت: "والله جبت راسه وخليته يبطل شرب ونسوان غصبًا عنه، وهااا لا إذا تعطل دقيقة أنيمه برا، يظل ساعة يتوسل بالباب لو أارضى أدخله لولا." قالت جدتي: "ولك لحن كضبيها وجيبيها ليَه." لحن: تكتلني، تركيها، ما تشوفين؟

شمرها مثل النعال المقطوع، بيبي جوعانة! يخسى الجوع، ناي قومي سويلها شي تأكله. شنووو ناي؟ شكو بدعة؟ لا تستغلين طيبتي وياج، ترى ساكتتلك لأن حفيدج بطني. جرت عصتها، طفرت، طلعت أدردم. صاحت: أسمعج يا الهتارة. صعدت فوق، غيرت ملابسي، نزلت للمطبخ. لقيت ريحانة وشاهين واقفين، هي تبكي وهو يتوسل، يحكي على كيفه. من شافني دنّگ. أدخل لو أرجع؟ ههه لا خويه، خشي هلا بيج. ريحانة: شاهين والنبي أحرق روحي. يولي صوتج!

لا تدري، ولولا هي جان هسه أركان ذابحني. حبيبتي والله ما ترهم، بس صبري عليه، باجر يردون الولد وأطلبج من أبوج قدام الكل. ما أريد شاهين، ما أريد. جدتي كالت اليوم تطلبني قبل لا تروح، يعني اليوم وداعة أبوي تروح منا أحرك روحي منا. أستغفر الله يولي، عقلي. إخوتي بالموت وأني أتزوج! شلون راهمة؟ ترهم لأن ما عدنه غير هالطريقة. إذا ردوا راح تتعرقل السالفة وتتأخر وأني أنفضح. والله أركان ما يرحمني، يذبحني. شحدوه بالقرآن!

أترسوا بارود الي يفكر يلمس شعرة منج. وأني ما أرضى على أخوي ولا أريد مشاكل. شاهين نعقد هسه لو انتهت، الجاهل أنزله وتحرم عليه ليوم الدين. ما أقدر يا أمة الله، ما أقدر، فهميني لا تثولين. عجل روحي، هاي هي، وأني بعد ما أريدج. دفعته وطلعت. مسح وجهه، وكف محتار. أباوع له، لاف الجماغ بصورة حلوة وشكله رجولي مرتب ومبين زلمة صدق، حتى لبست السلاح لايقتله وزايدته جمال. حقها ريحانة ميتة عليه. إندار باوع لي، أخذ نفس وأشر: شسوي؟

كلشي لا تسوي، جيب الشيخ وعقدها ليش مكبر السالفة؟ شفرق اليوم عن باجر؟ تخاف تتعرقل؟ ما عونت تصير، وحقها سنين تنتظر. من وصلت للصدق أنت تعترض؟ يولي شعترض؟ هي ليلة وحدة بس كولي خبله والله بلاني بيها. ترى تحبك، أنتم ليش مستهينين بمشاعر المرأة؟ بالقرآن ما مستهين، ولولا عاچقها ما نفذت الطلبته، وعرف وراه قص أرقاب ما همني لا موت ولا عتاب إخوتي. بس لخاطر أثبت لها شكد أحبها. ما فكرت إذا ما رجعت شيسوون أهلها بيها؟

ما اتركها إذا ما أمنها العقد يمها، وخبرت جدتي بلكت شي. ما فكرت أتحرك إذا ما عطتني كلمة تحميها هي وابني. ما أعرف بس الصراحة أتفاجئت بيك. وحق كتاب الله حبيتها حب طاهر، ما دنت عليها فد يوم نفسي. أدري هي الطلب سولفت لي، بس مو معناتها رخصت روحها. ترى رادتك تتحرك سنين وهي صابرة، هم خلص صبرها. من حقها بيت وأطفال وتكمل ويه التحبه، لو ما تحبك صدق ما سوت هيج.

دخلت ريحانة كالت: تركي وهاي الورقة، أعتبر كلشي انتهى. صوتها وصل لي، شمرتها. والجاهل اليوم أنزله، أرمي اليمين ابن عمي لو يصبوك ذهب بعد ما أصير لك مرة، كافي ذليت روحي كثير. بالقرآن إذا صار لابني شي أذبحج ورا. ما لك شي يمي، روح شاهين الحق إخوتك. يول يييي، فهميييي، باجر أجيب أهلي وأجي أطلبج قدام السلف كله. وأني ما أريدك بعد لا تجي، هذا الحجي تذكر شوكت كلته؟ قبل ست سنين بيوم الطلبت منك تجي وأنت كلت اصبري.

وكتاب الله رحت من هنا عدل لأبوي وفتحت الموضوع وياه، عش مصره غدرت بيج. أي وشنو؟ أجو أهلك بليل يطلبون. جنت طايرة، الكاع ما قاضبتني، كلت ما أقدر على زعـلي. خو ما نسيت كسرتي بذيج الساعة وأني أسمع شلون يطلبني أخوك وهسه كاعد تعيدها. خليت طلقة بصدري حتى آخر زواجكم بين ما تتعودين على حياتج الجديدة.

ما متت، ما متت شاهين. موتتني وما متت، الله ياخذك لو تضل بس أنت بالدنيا والروح بيك هم ما راح آخذك. روح الحق إخوتك جعل الموت نصيبك. دنّگ، هز راسه أي وطلع. كعدت تبجي بصوت عالي، كعدت يمها، كمشت أيديها. راح هم يتخلى عني؟ ترى حقه، إخوته رايحين للموت وهو يتزوج! ما يقدر صعبة.

وأني قلبي لاجمني كاعد أحس الدنيا تفتر وتنعاد بي نفس الموقف، هم أترجيته يستعجل وهو جان يضحك يگلي لا تصيرن عجولة باجر نجي، تالي بيومها بليل أخو أجه خطبني. لعد شبيده إذا أخو نذل يعرف بي يحبج؟ بس هسه تختلف ولج، ديكلج باجر. أخاف يردون وعمي يفر السالفة ويطلب من أخو وترجع تخرب بالزايد. ما صدكت جدتي ترضى، ما طالبة بس يعقدني حتى محد يقدر بعد يحكي.

أنتم متزوجين هسه، أنتي مرته، إن رضوا أو لا غصباً عنهم ياخذج من بين عيونهم. كافي طمع، شنو هالظلم؟ يعني لخاطر كم دينار هيج مدمركم وساحقين عليكم. حاسة من تدحقين حبيبج قدامج وأنتي كل حلمج تشمين عطره وتغمضين بحضنه بس محرومة بسبب التقاليد. شنو شعورج لو تسمعين أمه تكول دورت له على بنت الحلال لازم أزوجه موت بالحياة. هاي هي لعد، يستاهلون الي سويتيه بيهم.

أعرف غلط وأدري خنت ثقة أبوي وأخوي، بس ردت أحس مرة وحدة بدفو حضنه حتى لو متت بعدها. ناي هم يجي يوم ويتحقق حلمنا ونكون بيت واحد قدام الكل. مسحي دموعج، بإذن الله يجمعكم. شاهين ما راح يتخلى عنج، ما شفتي وجهه من كلتيله ما أريدك بعد، لباله صدق، هسه تلكيه متخبل. ما راح يسوي شي، أعرفه أكثر من نفسه، حبه لأركان وغيث أكثر من الي. قومي خلي نسوي ريوك، ومن يجي غيث أني أحكي وياه وأخليه يزوجكم غصباً على خشم أبوه. صدق ناي؟

والله أني ما أحكي وياه ولا ناوية أسويها، بس قلبي ما انطاني أشوفكم اثنينكم مكسورين، الدنيا واقفة ضدكم، حاسة بيكم وأعرف الي يفارق حبيبه شنو شعوره. قامت باستني تضحك ولا تكول هي نفسها الجانت تدعي عليه وتكله انتهت. قمنا سوينا الريوك، ما خلتني أمد أيدي بس كوه عالواهس يالله رضت.

أخذنه الصينية راحنه لغرفة بيبي، لقيناهم كاعدين. بدعة بصدر الغرفة منتجية، بيدها عصتها والثانية سبحتها، تباوع لهم بنظرة شيطانية واحد واحد تقصه، أحسها تدرسهم مو تباوع هيج. أم أركان يم رجليها كاعدة عينها منفوخة، والباقين داير مداير أتكول عبيد. الكل ساكت محد يتجرأ يحكي أحجاية. شاهين يم عمي، جانت عيونه حمر مدنگ، شال راسه باوع لريحانة ورد دنّگ يعصر بسبحته. كعدت يم بيبي، دخلت سهيلة كعدت يم الباب وبتها أجت تركض يمي باستني.

صدق راح يصير عندج ابن؟ منو كالج؟ جدتي كالت لجدو وبيت جدو كلهم راح يجونه اليوم. باوعت لبيبي. ومرض عيونج! لج لأفلعهن. جان وصلتي خبر لمؤذن الجامع يگول للسلف بطريقة وره دعاء التعجيل. أنكتمي لا أكتمج نهائياً، وعش ضامة الخبر شوراج يالمصكوعة؟ بدعة الطفل ما أنطيه، لا تفكرون بي، شيلوه من راسكم، أبني محد ياخذه. منهو كالج ناخذه؟ زلمتج رديله والجاهل يربى بينج وبين أهله. عجل أنتي الخوثة تربين بزرنه؟ شطلعي!

لا أنطيه الكم تربوه مثل ولدكم وهم يكبر ويموت بشغلكم هذا. والله لو أعرف أنهزم وأختفي من الوجود فلا أخلي يصير منكم. كونج مرة وتسويها بالقرآن لو تصيرن حدر الكاع يطلعج غيث. وقتها موش بس ياخذ أبنج، لا يخليج تتمنين الموت وما طايلته. تركت حتى الأكل واتندمت أجيت أصلاً. كعدت على جهة لحن تأشر لي اشش وتباوع لعمي، عرفتها تقصد نبهتيهم على شردتج معناتها ما راح تقدرين. خلصنا الريوك، أستوه دخلوا عمي أبو غيث ومرته وسماهر ورنو.

سلموا أصلاً ما قمت، ضليت عالقريولة كاعدة. أجت سماهر باستني من وره خشمها. بالمبارك يا مرت أخوي. سكتت ما رديت. من شوكت حامل؟ ما حاسبة. ما عرفتي ولد لو بنت؟ كل الي يجي هلا بي. طلاقكم باطل. باطل لو صحيح ما أرد لأخوج، وباجر حاجز أرد لتركيا. موش هي بكيفج، تركيا تنسيها. أبوي حكى ويا غيث وراح ناخذج ويانا تكملين حملج يمنا لبين ما تولدين. أي وبعدين؟ تنطينا الجاهل وتولين وين ما تردين. مشتريني أنتم؟

أي مشترينج، والجاهل النا، واليوم يرد غيث يعقد على أسماء حتى الجاهل يتسجل باسمها. شهالفرعنة العدكم؟ ليش متخيلين العالم هيج ضعيفة وخاضعة الكم؟ شوفي خالة وروح أخوي الي ما فد يوم حلفت بي جذب، إذا غيث عقد على أسماء لا راح تشوفوني لا أني ولا ابنكم، لو أعرف أموته ببطني هم ما أنطي الكم. قوية وعين صلفة. قوية ما مترباية، كولي التريديه ما يهمني، وتعرفيني زين كد كلمتي. موش هي بكيفج، أخاف لبالج راح يسكت عنج ويعبر الصار؟

لا حبيبتي بس حتى ابنه يجي للدنيا وياخذوه يزتج وراها. وأني هيج غوثه أظل أتصفن؟ غوثه عرمه، الجاهل أبنا واليوم يزوج أسماء. كونه صدق رجال يسويها وأني أعلمه. تعلمين منهو ولج؟ أخوج أعلم أخوووج، ومو بس أعلمه لا أسحل بي ما خلق الله من قيعان. لا لبالج أخاف وراح أظل أتبجبج، لا غلطانة، أنه أخت عاشق رب الذبحوا أهلي كدامي ودمعة ما نزلت مني ولا رف لي جفن. أجي أخاف منكم أنتم؟ أنتم منووو أصلاً؟ هينه يا ناي.

أم عاشق لو سمحتي، مرت جبير العائلة وصاحبة الخير الي أنتم بي كله. لا لبالج ما أعرف ليش قاتلكم أبني وميتين حتى تحصلوه. عفية بالسباعية! وهذا الخير أخذ أزلام منا كثيره، من تالي نضيعه لوحدة ما معرف كرعة أبوها منين مقتول لأن مرتد. ما شفت روحي غير أشيل الدولكة وأشمرها هي ومايها عليها. بي بخت وكعت بصدرها مو براسها، جان شلعوا راسي بس بردت قلبي من خوفتها وخليت الكل يطافر يتأكدون من سلامتها. كمشتني ريحانة كالت: كل عقلج؟

أي والي يجيب طاري أهلي أسحكه مو بس أفلش راسه. سماهر: خلها على راحتها، وداعة أخوي لو ما حامل جان فعصتها بس هينه يرد غيث وأعلمها إذا ما خليته يتوبها. بس لا تحمين كلش، الي يسمعج يكول صدق. لو ما حلفانج بكتب الله جذب والسالفة الباطلة الركبتوها براسي جان لسه ما شفتي وجهه بعد مكابلني بتركيا ومنتظر شوكت أرضى عنه. عضت أيدها وأسماء كمشتها. عمة اتركيها لليل ورد غيث وهو يتولاها. رفعت أصبعي البي حلقة. منو الي يتولاني بس لنفسه؟

الشمرت الحلقة بوجهه أربع مرات يخليني أنام يلبسني إياها ويبوس أيدي بلكي أسامحه عالسواه. سماهر: من كثر السحور المشربته. كلمن يشوف الناس بعين طبعه. لحن: ناي أخذتي إبرتج؟ لا أريد الطفل يطلع مشوه. سماهر: حتى أشوه وجهج، ولكم صعدت ضغطي، زتوها بره. هي ييي، يشمرون منو؟ ترى هاي كلها حلال أبني المفروض أني الي أقولها بس لا صدق أني مترباية. رنو: قصدك أمي ما مترباية؟ أنا قلت هيك؟ إيشلون عالم باطلة! اتقول لك شي غصبًا عنك.

ناي، لا بالبالج، أنا أمي وأسكت لك؟ أقوم أمسح البيت بيك. صدق سنونج ركبتيهن دائمي لو متحرك؟ إذا ما خليت خالي يشمرج بالشارع للجلاب ما أطلع شريفة. وليش للجلاب؟ اكو من اللي ينتظر ومتلهف بس حتى أباوع له، عاد ربي مركز حظي بالزلم، وين الزين والبنات ميتة عليه يتمنالي الضحكة. رادت تقوم، كمشتها سماهر كعدتها. تريدنا نطكها حتى تفر السالفة علينا؟

تركيها، ما ضل شي إذا ما بجيتها بدل الدموع دم، ما جان كل كلمة كالتها ما أطلع أخت غيث وهذا ابنها يكون مقابل الكالتو. تمددت ورفعت رجليها على الميز مال افرش، وريحانة كوه حاصرة ضحكتها. همست: بالقرآن جنت منتظرتج من زمان. بس أريد أعرف ليش كلبت علي؟ جانت اتحبني، لا تقولين ورث، مو هذا الشي. سمعت غيث بيوم الرد من كل لك راح أجيبهم وأخليك تذبحهم مثل هالغنم،

قالت لك: هاي اتضيع أخوي اللي سيطرت عليه بهالشكل وخلته حتى يشاركها بثارها. دخلت سهيلة راحت لأختها شاورتها، وسماهر باوعت لي وضحكت، نغزني قلبي. كعدت يم أسماء همست لها، وأسماء انشك حلقها من الأذن للأذن. ريحانة: الله يستر. ليش يدباوع لي ويهمسن؟ ولج أخاف اتفقن يقولون لغيث على الغلط والحجي. لا تعرفين غيث إذا سمع ما يصدق، وحتى لو فكر يحكي راح أتركه، وهيك يروح ابن أخوها، هيه ما تجازف، أصلاً ما راح توصله خبر.

انفتحت الباب ودخلت أم أركان بس عيونها بكصتها. قالت: ريحانة تهيئي راح يجي الشيخ. عش يمه؟ راح يملجوچ على شاهين. سهيلة: وأسماء لغيث، حلوة الدنيا من تفر هههههههههههه. ريحانة: وأنا ما أرضى ابني بيتي على بيت غيري. سهيلة: وأنتِ شكو؟ جدتي خبرت غيث وخلته يطلبها بلسانه من عمي، وبالليل من يرد بالسلامة يملجها. أسماء: يرد بعون الله، ربي يحمي ويرد لي حضني سالم بعد بيتي.

هلهلت سماهر، قامت أسماء باستها، وأم أركان دخلت جرت ريحانة، قامت طلعت وياها وعينها بي، لمن طلعن وسدت الباب باوعت لي سهيلة وردت هلهلت بصوت عالي. رنو: خالة انسوي عرس لخالي. طبعًا بعد هذا العزيز اشلون ما نسوي له؟ سماهر: وأخيرًا وافق، دخيل ربي نذري أوفي بيوم الدخلة. سهيلة: بالمبارك يا مرت خوي، والله لأترسج ذهب من فوق ليجوه. أسماء: هههههههه الله يبارك بيكِ، ما رايدة غيث كافي، والله لأخليه بعيوني يمه، ما مصدقة.

هههههه لا صدقي، وهذا الأسبوع الزواج قبل لا يرد تركيا. عجل وأنا أظل هنا؟ لا خيه، شجاه يترك حرمته هنا، أكيد ياخذج وياه. غمضت سويت روحي مو وياهن ولا مهتمة، بس جذب قلبي يغلي بالأخص من أسمع ضحكة أسماء بفرح وهن اشلون يخططن لزواجه. اشويه وأسمع الهلال برا، مبين كملوا العقد وصوت ضرب بالجو. قمنا طلعنا لقينا عمي أبو غيث شايل السلاح يرمي، وشاهين يضحك طاير من الفرح يباوع لريحانة اللي مو أقل منه بس خجلانة مدنكة.

صبروا وربي ما ضيع صبرهم، جمعهم بالأخير. طشت جكليت أمه عليهم وهلهلت، دنق باس راسها. وسلم على الزلم راح لبيبي هم باس راسها. مشكور يا جدة. ربي يهنيك يا بعد جدتك، انجعلك من أصحاب البخت وتملي البيت جهال. أبو حمزة: يلا يبه روح لخيك. لااا ما يتحرك وليدي عريس، اتركوا الشغل كافي غيث وأركان. يمه ما عليه، شنهو أول مرة وبعدين هيك غيث راح ينقص من حصتنا. ما يعملها غيث، زلمة موش ناقص مثلكم.

وأنا ما أرضى أحد يتصدق علي، ابني يروح يشارك بالتسليم ويجيب حقنا من حلق السبع. شاهين: ما يرضى غيث، قال خليك يم الأهل أحميهم. ما علينا، عندنا زلام كافية، ولا تخلي يدحك شكلك من بعيد وخش بين الزلام وخذ حقك، هذا ناوي ياخذ كلش لو هالمرة. بيبي: من اشوكت عملها تايعملها هسه؟ ولكم أنتم شنهو من بشر؟ زتيتو بحلق الموت وبعدكم تخونون بي. أبو غيث: اللي زتيتو ابني، والحلال اللي تحجين بي حلالنا حتى لو كان باسمج تراه تعبنا.

أبو حمزة: وابني هم يروح تاناخذ حصتنا كاملة، يمه من بعد إذنك، هذا ابني وأنا بكيفي. باوعت لها صار وجهها أحمر، رفعت عصتها ودكتها بالكاع سكتت الكل. دحكوا واسمعوا عدل، هذا آخر تسليم والورث راح يتوزع بين أحفادي بالتساوي. أبو غيث: شنوو يمه؟ ومرض! انكتم!

كلمة ثانية أخليهم يسحلوك ويزتوك بصف أخيك، نص كلمة ما أريد أسمع، ومثل ما قلت الشغل واكتفينا، اللي يريد يشتغل يطبوا سطعش وجعة يولي لغاد هو وشرو ويزت روحه بجهنم، أحفادي محد يكرب صوبهم. أبو أركان: يمه فداج الورث الحلال، وأنا هذا رأيي من البداية. أبو حمزة: ما تقررين وحدك، هذا شغلنا من أحنا وجهال ومتعودين عليه، ما نقدر نبطله.

بيبي: عجل ما طولك ما تقدر اتزنح روح للموت عساك ما رديت، اللي عندي قلته واللي أسمعه معترض أسحب شكو حلال عنده وأنعل أبو اللي يكف بوجهي. خلص يمه على أمرك، بس خلي شاهين يروح تانتقاسم بالعدل، ما يضل كله بخت حفيدك وهم يحمي أحسن ما تظلين خايفة. ما أخافن على السبع عبن أعرف شدازه، بس حتى ما تقولون فرقت بينهم راح أزتهم فد زتة وربي الحافظ، وأنت يا جدة خذ حرمتك بيت أهلك وروح ورا أخيك بلكي تشبع طمع أبوك.

شاهين: لا جدة إذا ما أجيب زفة تلوق بمقدارها شرط تسد السلف ما آخذها. عجل حضر نفسك باكر تتعطل أكثر ما نعطيها. هههههه باكر إن شاء الله يجون أخوتي وأستلمها من إيد أركان غصبًا عن شاربه، يلا هسه ادعي لي. أم حمزة: دخيلك عمة وليدي عريس لا تخليه يروح. أبو حمزة: وشعنده اليوم باقي؟ روحي حضري مهره وغرفته، باكر نجي ناخذها.

بيبي: هاي هيه مثل ما أمرت يا الجبيرة، روح يا جدة يحفظك الرحمن قبل لا يبلش التسليم، ولك مني اليوم أحلى غرفة وأحسن جهاز ما يكون خاطرك إلا طيب من هاي العين. ضحك وراح باس راسها وحضنها، رد سلم على عمي أبو أركان قال له: بالقرآن لأخليها بعيوني يا عمي. قول وفعل، لو ما أعرفك زلمة راح تصونها ما أعطيتك. قدها إن شاء الله. يا شاهين إذا بنتي ردت بيوم زعلانة ما أردها وهاي قدام أبوك. تاخذ حقها من هالشارب.

مودع بالله يا بوي روح خليك بين أخوتك. سلم واندار لريحانة ضحك أشر بإيده وطلع يربط بحزم السلاح على متنه. ركضت ريحانة حضنتني تضحك وتبكي سوى. ههههه ألف مبروك يا عمري تتهنين. ناي ما مصدقة ولج، وأخيرًا انجمعنا. ربي يديمها وتشوفون جهالكم قدامك. نذر علي إذا هاي بنية ببطني أسميها ناي، وإذا ولد غيث. وغيث شنو فوق ما راح يتزوج علي؟

هههههه جذب اتفق ويا شاهين بس مشو شغلتنا كله لك أختك ماخذها، عندي شيطانة بالقرآن تنهشه، لا تجي وتعتب، رد شاهين وروح أخوي أم عاشق براس حريم السلف كلهم. لحن: يعني اليوم آخر يوم وياي؟ ولي لج نايمة بحضن أركان وتبكي على فراقي. بيبي: يلا يا جدة همن أرويحتجن حتى تحنن أختجن، أنتِ أم شاهين روحي جيبي لها بدلة. أم شاهين: بدل الوحدة أجيب سبعة بعد هاي مرة العزيز. سهيلة: وعش عيني شنو؟ أول عرسها موش أنا زوجتوني هيك؟

بيبي: وأنتِ حاسبة روحك مرة سهيلة؟ انكتمي لا بالقرآن أخلي مثل ما أخذج يزتج بيت أهلك. أم أركان: حقها عمة. انجعلك بالمرض اللي ما تقومين منه، لحنن جدة ندهي لي الزلمة الواقف حدر الباب. أبو أركان: قولي يا الله يمه ما تفتهم هاي مسحيها بوجهي. عجل أقبضها وأكتمها أحسن ما أكتمكم سوى. أم أركان! تلكطي على رجولها حبيها واعتذري. اجت تركض خايفة دنقت جرت إيديها تريد اتبوسها، دفعتها تفلت علي وصاحت: يلاااا كلمن لشغلها.

راحوا يركضن، صار عندي فضول منو هذا اللي قالت صيحوا وشنو يكدر يسوي اللي هيك خافوا، بس قفزتني من صاحت: نااااي جدة عقلك يتعب من التفكير، اتركي الشيطنة وتزنحي ويا أختك ساعديها. إبليس خرب يومج. نااااي! إي بيبي رايحة. البنات كلمن تركض بجهة يردن يلحقن، والزلم طلعوا يحضرون برا ويعزمون باكر للعرس. صعدنا فوق لغرفة لحن، دخلت ريحانة ويانا ما تعرف من الفرحة شتسوي، قالت: مثلجن أريد. هههههه اشلون مثلنا؟

ولجن قلبي راح يوقف، ناي سوي لي مثل البارحة من نزلتي هيك مكياج وشعر مسرح، بالقرآن غيث راد ينجلط وهو يدحك عليكِ. لحن: أنا أسوي لك أظافيرك بس أريد فون. شتسوين بي؟ أتصل بأركان فدوة. لا يا معودة هسه يسويها هوسة إذا عرف، خليه يجي وجدتي تقوله بطريقتها. ما أقوله بس دا أطلب منه شي. ما يرد خيه، ترى عينهم بالطريق حتى يأمنون روحهم بهيك وقت. بس أجرب إذا ما رد أسده، يلا فدوة.

هاج خيه خذي بس استعجلي حتى أخبر شاهين يلحق يقول لأبوه يختار الغرفة بيضة، أخجل أقوله أنا. أخذت الفون اتصلت أول دقة رد قال: ها يولي. شوفن مو هياته رد. إذا على بت قلبي ما رد عجل عليمن أرد. أركان. عيونه أمري لي. أريد بدلة للعرس. خرب بيكِ يولي، بعدني ما متت يا عرس؟ لا لا قصدي بيبي محتفلة لأن ناي راح تجيب لهم الحفيد. حفيد ومن ناي؟ خير إن شاء الله يولي، اكو فلوس يمك بالكنتور بس منهو يطلع يشتري لك؟ ناي. هيه

قالتها وأسمع صوت غيث صاح: يا صخااام وين اتريد الهترة؟ أخذت الفون قلت له: هيي هيي أنت. هيي مو هنا يم عاشق ما ضل لليل كثير. لا تنسى مطلقني. ولا تنسين تنورت البارحة والبطن، أووويلي شوكت يجون الزمايل وأرد لك تاعلمك اشلون تطلعين رجليك، أركان يا خوي روح لغادي يم السيارة. مبروك على الزواج قالوا طلبت بت عمك. إي بالقرآن دحكي حظي، نسواني كلهن بلاش وحدة أحلى من الثانية. راح أحضر فرشتك بإيدي.

سلمي لي جهنم ترحب بكم، منهو يمك يولي؟ حبيبي كلها قاعدة لا تفشلني فدوة. مشتاق لك وعمة السادة. لعد ارجع لي. الله كريم المكتوب يصير، ناي أمانة الله سامحيني لا تخليني أموت بحسرتي. إذا مت ما راح أسامحك والله. شهقت وهو سكت أسمعه اتحسر، أخذ له اشويه وهمس: أعشقك يا نتيجة أعمالي السودة. أحبك يا مصيبة قلبي. صوت أركان بعيد صاح: غيييييث وصلووووا. همست: مودع بالله ومحمد وعلي. سامحيني ناي. لااا.

ضحك بس صوت ضحكته بيها كسرة، سد الفون. رجعته ولميت رجلي دموعي تنزل. ريحانة: وصلوا؟ مم أسمع أركان عيط له. بلكي جماعتهم قصده عليهم. ما أعرف اشوكت الله يتوب عليهم من هالشغل. ما يتوبون ما طول عمامي معترضين، أجيال مستمرة من جدادي الشغلة، كم مرة أبوي تعارك ويا عمامي حتى يبطلون بس هم ما يرضون، وحتى جدتي استوها طخ راسها جانت معاندة بس من دحكت غيث جازف بس بروحه عرفت راح تفقده. لحن: -والبدلة لعد منو يجيبها؟ شو ما فهمت شي.

ريحانة صفنت عليها، وأنا حتى دموعي نشفت من كمية الثول اللي عايشة بيه. الزلم بالموت، وهيه محتارة منو يشتري لها. انفتحت الباب دخلت سماهر وأسماء، قالت: شكو وجوهكم مجفية؟ لحن: غيث اتصل بناي قال لها: افتحي كام، دا أشوف شلابسة، راح أموت بحسرتي بس هيه ما رضت. -اتصل غيث؟ -لا، أنا اتصلت بأركان، داريد. قبل لا تحجي ندستها، لأن طلبها يفشل مو وُقته. -اه اه، أريد أسأله وين المنشفة؟ ضربت قَصتي وريحانة ضمت وجهها. سماهر: شنهو خالة؟

-هاااا، الشامبو خلص ووو هو ناسي مفتاحه. -شمالك يمه؟ -ناي قامت تبجي، وأنا نسيت شنو حجيت وياها. قمت رحت للحمام، إذا ضليت شوية أقتلها. دخلت غسلت وجهي، طلعت لقيت أسماء تعدّل بريحانة، تركتها وقعدت على جهة أباوع لأسماء، حلوة وزغيرة، يمه إذا أخذها والله أموت. غيث أبو النسوان ويشوف هاي قدامه، غير يوقع على وجهه. للعصر والناس مخبوصة، بيبي خلتهم كلهم يتراكضون، محد يدري ليش هيج مستعجلة على العرس.

الفلاليح كمشوا البَرّة، حضروا الكراسي ونصبوا الخيم والقدور مال الطبخ. أبو حمزة وعامر اللي ما باقي بيه شي صاحي بس رجليه يمشي عليهن، اشتروا غرفة أخذوها لبيتهم ينصبوها. عمي أبو أركان ولا تقول بنته العروس، لا حاسب شاهين ابنه فرحان أكثر من أهله، وبما أنه هو الشيخ وبيبي بيتها، العرس راح يصير هنا. أم حمزة جابت البدلات كم شغلة للريحانة، قالت لها: بعدين طلعي أنتي ويا جهزوا، ما لحقنا.

ريحانة هل قد ما حلقها مفتوح من الضحكة ما تعرف ترد. لبست البدلة وقفت، خلت إيدها على قلبها، قالت: ولجن قرصني. لحن: أعضك، القرصة ما تفيد. -ما مصدقة يعني اليوم يحنيني، وباجر أنام بحضنه قدام الكل، ما خايفة، حلالي. -عيع والله، للصبح ما يخليك تنامين، وراح تظلين تبجين على أيام العزوبية. -أنام شنهو؟ مسودنة؟ نذر عليّ أسبوع ما أغمض عيوني أقعد أدحك عليها، حتى هو نايم، ربي ما أعرف شلون أحمدك. -فونك يضوي منو يتصل؟

شالته فتحته، قرأت شي وضحكت، خلته على قلبها. قلت لها: شاهين مو؟ -ههههههه يقول لي: وفيت بالوعد يبت عمي. -دزي له صورة وأنتي بالبدلة. -لا أخجل. -ولي لج تخجلين؟ جيبي أنا آخذ لك صورة. جريت الفون أخذت لها صورة وسويت إرسال، إله ثواني وتم الاستلام، طلع جاري الكتابة. -إندار فدوة ونذر لأم جهالي. كتبت: أم جهالك شنو؟ -هههههه معشوقة عمري ونظر عيني وريحانة روحي، دخيل ربك لا تنزلين قدام البنات هيج وروح أخوي أغار.

جرته الفون مني، كتبت له شي ما خلتنا نشوفه، ظلت تأكل بأظافيرها، لمن وصل مسج منه قرأته وضحكت، باستها وخلته على قلبها. دخلت أم حمزة، قالت: خلصتن؟ -إي خالة، بس جنتك تراسل بشاهين، تتحايل عليك. -ههههههه خلي تتحايل، راضية، غير هاي بنية روحه وحلم عمره. -يعني كلكم تعرفون يحبها؟ لعد ليش هيج ظالميهم؟ -هو بكيفي يمه؟ سنين وأنا أدحك دمعته بعينه، ظالة آكل بقلبي ما بيدي شي، غير أنذر وندعي، وهاي الحمد لله صارت من قسمته.

ركضت شبكت أم حمزة وبجت، ثواني وخرتها عنها، مسحت أدموعها وباستها بقصتها، ضحكت. -صرتي جنتي ومرية العزيز، ما أريد أدحك دمعتك. -عمة ما مصدقة والله. -الحمد لله، دخيل اسمه ما قصر، يلا خلي ننزل صار الليل وأخياتك راح يجن. كمشتها من إيدها نزلتها لغرفة بيبي، وعلى طول الطريق تهلهل. دخلنا قعدنا، الناس تصفق فرحانة، وأنا أصفن، قلبي يم غيث، بهيج أوقات لساني ينعقد، حتى دعاء ما أعرف أندعي.

ما أعرف عقدة بيه صايرة، ما أعرف هذا الشي طبيعي. بيبي مو أحسن من حالي، متّجِة على عودتها و صافنة. والنسوان تهوس، ولا كأنما اكو شي، متعودات على هيج أجواء والشغلة عادية عندهن. تمددت لحن خلت راسها بحضني، مسحت على شعرها، باوعت لي. -شبيك داده؟ -تعبانة ولج. -من الركض ما تقعدين. -لا ما أعرف روحي رايحة. -بس نروح آخذك للطبيب، أخاف قلبك تعبان. -خلي يرد أركان وآمن حتى أروح. -تحبيه؟

-ما أعرف، مرات أحس أحبه ومرات لا، يمكن مو حب، لأن حباب وياي هيج دأحس، بس هم أمشي وياك ما أعيش بعد بعيدة عنك. -أركان راح يخليك تروحين؟ -مو بكيفه، أنا ما أظل هيج، كل ما يروح أموت وراه، ما أعرف يرد لو لا، أنتي شلون متحملة صار لك هل قد ويه غيث؟ -تحملت كل الصار، وقفت وياه وقفات محد يسويها، تالي جزاني بطلاقي وشمري بالشارع. -بس هو يحبك والله، من رد وكنت أخابرك يقعد يسمع وعيونه تصير حمر،

حتى بيبي تقوله: أنت مريض بيها ما راح تتشافى إذا ما رديتها لحضنك. -ما أرجع له بعد، منتظرة يرد بالسلامة وأروح، السواه مو قليل، عيشني أيام تمنيت أنام ما أقعد بيها. -ما كان ينام لحد ما أجيت هنا، والله كل ما أقعد بالليل أنزل داريد أشرب مي ألقاه قاعد، صدق ولج مرة لقيت فونك بيده يقلب بالصورة مالك. -عزة! إيش وصله لإيده؟ بعته على صديق سامو، ومن أقول شيطان يعترض. -نانو شوفي رنو شلون ترقص هههههه. -خرب بيك، اسكتي فضحتنا.

-شلون قتلتها وهيه بيها اثنين منك؟ -ولج غير سحلتني، يا قتلتها بيه بخت بالدرج دفعتها. -وغيث ضربك؟ -ما يضربني، بس مرة ضربني راجدي طفى عيني قبل وفاة ماما، وبعدها ما عادها أبد، صدق ذكرتيني ولج، ريحانة مرة عامر الثانية شصار عندها؟ ريحانة: ماكو نزل الجاهل، أختها شمرتها من الدرج من درت بيها ولد. -عزة! وهسه منو ظلت باسمه؟ -ولا وحدة، أمّه

تريد الثانية تقوله: ذيج خلفتها بنات، وهو يحب هناء ما يريد سجيوه، وظال لا هاي ولا هاي ينام بالمضيف وحده. -هناء وينها؟ -بالبيت ما رضى عمي تاخذ البنات وتروح، قال لها: ظلي. -وضعها شلون؟ -ردت مراهقة مكياج ولبس، حتى بناتها مالها شغل بيهم، أم عامر مبتلية هي وسميرة، وعامر مثل الزمال بس يزاقط، يخاف من أمه يطلق حرمته الثانية. -ذيبة والله حييل. -صدق جدتي تدري؟ قلت لها على الحمل.

-عرفتها تدري من استعجلت العرس، ماكو هيج خطبة وزفة بيومين، يلا الحمد لله. -آخر مرة أخلي شاهين يروح، وأنتي هم شرطي على غيث تردي له مقابل يترك شغله، بروح أهلك إذا غيث شال إيده الكل يبطل. -ما أرد له لو ينصب ذهب. -عيش خيه استقري هنا وأخيتك يمك، عيش مبهذلة روحك ببلاد الغرب. -هاي البلاد لقيت بيها دفو وحنية ما لقيتها عد أهلي.

-لا موجودة بحضن غيث، لا بالبالك بعد ما درى أنتي حامل يتركك، شيليها من راسك لو يعرف يربطك ويكضب سلاحه ويظل مناطر على الباب تا يمنعك. -من أنطاه قلبه يتركني ويعرف ما عندي غيره؟ هذا بعد ما أرجع له ولا آمن روحي وياه. أسماء: بسجن، إيش قد تلغثن، وأنتي ريحانة قومي ارقصي ويانا. أجت أم حمزة قومتها، هيه تهوس وريحانة تفتر بالبدلة فرحانة، ضحكت على ضحكتها، ربي يسعدها. ضوى فوني بحضني، شلته لقيت مسج من كرم،

فتحته كاتب: ها حاته شخبارك؟ -هلو كرم. -مختفية؟ قاتلة لك واحد وخاتلة أكيد. -لا والله بس قلبي يم غيث اليوم التسليم. -قلبك وغيث، ممم طردتونا وشتتونا بالبرد وحنة وأيتامنا ورجعتوا سوة نواقص. -ما رجعنا بعدنا والله، بس يظل أبو ابني. -شلون أبو ابنك؟ ما تتوسط لي يرضى عني وأنا الطرف الثالث اللي ما لي دخل بالموضوع أصلاً. -هههههههه ما زعلان منك أصلاً. -طبعًا لعد مستفاد الغثيث، كل ما يضوج من شغلة يسبني. -جود ما اتصل؟

-إي اتصل اليوم سأل عنكم، ردت أعرف مكانه ما رضى، بس قال بخير، صدق قلت له: غيث حامل، اه قصدي مرت غيث حامل. -مم شرد؟ -فرح والله وقال: ابتعد لا تظل لسلامتك، شيقصد؟ -قصده ابنه يطلع كيوت وحباب وأنت تخبله. -أهاا، صدق لج اتصلت بك لأن اتصلت بالغثيث ماكو مغلق من البارحة ما داخل نت، شعنده؟ -وأنتي مراقبة النت؟ اتصلت لا ما فاتح، إيش قد فايخ مثل هذا؟ أعطي حظر من الحياة كلها.

-مو دأشوفك حضرتي وحضرتينا ويا، بحال ما أريدكم ولا أريده، اطلعوا من حياتيييي، تالي خاتلة بيته وتحجي وياي لا وتسأل على الحلقة المفقودة. -لأن غبية، وإلا أنتم معرفتكم هم. -هاي أمي تسلم عليك، تقول: قبل لا تردين مري علينا، تريد تشوف وجهك المزروف. -من عيوني، أحنا نرد سوة أمر عليك هم أشوفها وهم نحجز. -لا ما يحتاج، غيث راح يحجز لنا للآخرة، ناي حبيبتي أخيتي الحلوة أم تك غمّازة، ما طولك رديت لغثيث راح أحضرك لسلامة جمال وجهي.

بعدنا نحكي ونسمع صرخة بنص البيت. طلعت النسوان تركض. أريد أقوم ما أقدر، فوني وقع. دخلت رنو تلطم وعمي أبو أركان بيده عقاله ودشداشته كلها دم، وصل يم بيبي قعد قدامها يباوع لها بكسر. -منهو المات ولك؟ -قتلوه يمه، راح للموت برجليه. -منهو أحجييي؟ -قلت له لا تروح راح يقتلوك يمه، ضاع حق رباي. -قتّالكم تعرفوه؟ -ما أعرف يمه، بس ابني راح، شلفايدة؟ نايم بين إخوته سابح بدمه.

-قوموا كلهم، لحد يرد يروحون يجيبوا لي حقه، يلا يخشون بيتي، لا وروح ابني أرميهم كلهم. -يتقاتلون الباقين. -لو كلهم لو ما يردون ناقصين واحد، عندي مكانهم، دزهم يجيبوا لي راس القاتل ابني. شال مسدس، أريد أفرزن مال من هذا؟ غيث لو أركان لو شاهين؟ عيوني من كثر الدمع ما أشوف بيهن، أمسح وأرجع أفتحهن على وسعهن. لحن وقعت من طولها، البنات قاموا يتصايحن. بيبي. مرض ما أريد يجيبون دمو وصيّحن براحتجن.

وأنتِ قومي لا تبچين، خذي البگوا وروحوا، لا تردّوا، عسى ما يتكاتلون كلهم، أريد دم وليدي الليلة. قام عمّي عثر وگع، رجع انتجه، قام گوه منحني، طلع. سحلت روحي يمها. منو؟ لا تبچين، جاهلج لا يصير لو شي وينتهي نسل وليدي. قومي لخيتج لا يرفسن بطنها ويروحن فرخها. غيث مو؟ ولج خيتج راح يدوسنها، يروح العوض! قمت ركضت لحن، شلت راسها بحضني، دگدگت على وجهها، فتحت عيونها، همس أركان. أشرت ما أدري وبچيت.

ردت غمضت عيونها، عصرت راسها بحضني. أباوعلهن كلهن خاتلات يبچن بهدوء، صوت ماكو بالبيت. العرس اتحول عزه. ريحانة حاضنة روحها ببدلتها ودموعها تنزل برجفة بس صوت ونتها. سماهر صافنة. أم أركان خالة راسها عالباب فاقدة. بيبي بقوتها گاعدة مثل الجبل ولا تگول اكو شي، تعصر بالعصا وتاخذ النفس بحرگة. أحس روحي بهتت، خليت راسي على راس أختي وغمضت. لليل روحنا خلصت، ممنوع حتى البچي، ما يرضون الناس تجي، محد يستقبلهم.

لمن صوت ضرب بالجو صار، قامت بيبي گالت صيّحن ييمه. بده صوت الصراخ، دخلوا اثنين شايلين تابوت، خلّوا بنص البيت. صاحت النسوان وصوت اللطم قوم البيت. كلها طلعت حتى لحن، بس أنا ما گدرت، رجليّ ما تعيني. لمن سمعت بيبي صاحت: يا جدة زفوا أخيكم عريس. قمت طلعت، لگيت غيث لاف الشماغ ومتربع يم التابوت، وأركان من الجهة الثانية ضام وجهه. ريحانة ببدلتها گاعدة يمه، كامشة التابوت وتعتب.

تگله بصوت مكسور: نزعت الأسود، قوم لبست البدلة، شاهين عجل ما جبت موتك إلا هسه. عجنا الحنة متانيتك تجي تحنيني موش تجيني محمل. موش أنا حلم عمرك وتگول سنين أتمنى هذا اليوم، عجل هيچ استعجلت تركتني بدلة عرسي. ولك گووووم، گلتلي جاييچ انتظريني شاهين، قوم يا روحي. رادت توخر عن وجهه، كمشها أركان. بس أدحك وجهه تغير بعد العرس لو بعد ذيچ نظرته نفسها من يدحگ بوجهي. كافي يا خوي.

بلكي يدحج دمعتي ويقوم، إي يگوم، ما ينطي گلبه يتركني ببدلتي، أبوس إيدك يا خي بس أميل الجفن، لا يمممه اسم الله يا جفن، يمه ولك شاهين. غيث: شيلووواا يلا. بيبي: زفوا أخيكم ييمه وين فرشتوا لفوا بيها. قام غيث باوع لبيبي بنظرة كانت كفيلة تفسر هواي أشياء. دخلوا شباب شالوا وصارت الهلاهل والضرب. طلعوا من البيت. وريحانة تخبلت، تضرب بأركان تريد تطلع وراه. وأم حمزة تسحف بالگاع وراها بيدها جيس الچكليت.

رجعت گعدت لأن ما أگدر أكمل، الدنيا سودنت وأنا أسمع صوت صرخاتهن بحرگة، غمضت عيني ما حسيت بعد. لتالي الليل گعدت، لگيت روحي بحضن لحن، همست وين غيث؟ الحمد لله صحيتي، وگفتي گلبي صارلك كم ساعة غايبة عن الوعي. غيث وينه ولج؟ بره گاعد يم أركان بس ممنوع واحد يوصل يمهم، هسه نطاچ الإبرة وطلع. دفنوا؟ خطية، زفوا للگبر ولج ناي، بدل ما يصيحون قاموا يهللون ويطشون چكليت على التابوت. ريحانة وين؟ ما أعرف إش بيها بس تضحك.

گعدت لگيت بيبي على گعدتها منتجية على عصتها، وأم أركان متمددة لافة راسها تبچي بهدوء. قمت طلعت من الغرفة، الشباب تارسة البيت كلمن گاعد بجهة، لاف وجهه بالشماغ وخال سلاحه يمه. النسوان اللي تبچي واللي تعبانة ملخّة وجهها واللي هدومها مشگگة. أم حمزة بنص البيت متربعة هي وأبوه، خالين دشداشته ومگابليها يونون. غيث گاعد جماعة على متونه ومدنگ ويمّه أركان گاعد، شال راسه عيونه حمر دم.

صاحت أم حمزة: عريس أخيكم يييمه، لا تبچون هلهلووواا. دنگ خلّى راسه بين إيديه وبچى بصوت عالي. أركان: ما ظل للصبح چثير يا عمة وهلهلي براحتچ. شفيد دمه راح؟ بدل دمه اللي أخذناه أجيبلك بعد دم عشر زلام. انكتل وهو يدافع عنك يا غيث، راح وأخذ الرصاصة بصدره بدل صدرك ولك، هم وصاچ عليه، هم گالچ أمي لا تبچين؟ أبو حمزة: بسبب أمي لو خالته يروح ويا غيث من البداية كان حماه، ما راح وليدي.

أم حمزة: راح عضيدكم ييمه، دفنتوا بإيديكم ورديتوا من غيره، ولك أركان ويا من بعد تتجاكر؟ وأنت يا غيث بعد بيمن تنتخي ويا من تتلاوى وتتسابگ عالضحكة؟ غيث دنگ، صوت البچي يطلع من نص گلبه. وأركان مثل المرة قام ينحب. الدنيا فرت بيّ، ما حسيت غير وأنا بغرفة بيبي بحضن غيث وجه الصبح صاير. گاعد منتجي أمچتف، رافع راسه يباوع للسگف. وبيبي ولا متحركة يمها سماهر. كمشت إيده، انتبهلي حچه صوته رايح گوه ينسمع، گال: شتحسين يولي؟ ما بيه شي.

ردت أقوم، افترت الدنيا، رجعني لحضنه. بيبي: قيسي السكر خاف بعده مرتفع حتى تاخذها للمستشفى. سحب الجهاز وأخذ إصبعي ثقبه، قاس السكر. بعده مرتفع. عجل قوم خذها. ما أگدر، المنطقة مطوّقة، اللي يطلع يرمون. عجل تخليها تموت؟ إذا طلعت تموت. گالها وسحبني گعدني، ضمني بحضنه، ظل يمسح على راسي. غمضت، الدنيا تفتر، دخلت لحن گالت: شلون صارت ناي؟ غيث: ما بيها شي، أركان رد؟ إي يم عمي، بالغرفة ديحضرون أسلحة. الحريم منهو منهن هينه؟

بس البنات ماكو أحد، كلها ودوها لبيتكم. وأنتِ ليش ظليتي؟ ما أروح وناي هنا. بيبي: عجل مثلكم خوّثان، تركتوا أخوكم يموت وأنت ردّيت. ضغط على سنونه راد يحچي، حضنته بسرعة ودخلت راسي بصدره، أخذ نفس وسكتت. غنيمكم موجود يا جدة، طلع حرّتك بي. غنيمي كان ناوي موتي، والبارودة كانت بصدري بس آآاخ. يمتى تنصبون الجوادر؟ ما ننصب جدة. عجل تخلون خيكم بدون فاتحة؟ نجيب راس اللي كتلو وناخذ عزاه. موش كتلتوا، بسكم يا جدة. دخل أركان وأبوه،

گال: أخذها للمستشفى يا عمي. لا، صحت، منا لساعة ما صارت زينة، أنا أخذها، لحن سدي الباب يا خوي. أبو أركان: اللي كتلتوا موش من عشيرة الـ عجل لمن تابع؟ للـ -، وكان جاي متقصدك. شاهين شو وصله بذيج اللحظة؟ جدتك دزته وراك حتى يحمي ظهركم. وأنا ما أعرف أحمي روحي منتظركم تگضبون ظهري، ليش يا عمي ضيّعتوه؟ أركان: ما ندري بيه جاي ورانا، كان حميناه ويا زلامنا، فجأة لگيناه يزت روحه جدام غيث.

أبو أركان: كملتوا التسليم أنتم وصار هالشي لو قبله؟ إي يا بوي، من ردينا عارضتنا سيارة. غيث: متابعين جايين وراه لأن المكان أمنتو ماكو أحد. احتمال واحتمال اكو من الدازهم بهذا الوكت. غيث: عرفتوا منهو سمعوا بيه تزوج؟ لا أبو الحلال، لا أبو هلو، لا أبو الخير اللي ما گاضبين منه بس الدم. بيبي: آخر عملية زتّوا شكو سلاح وبضاعة بالبحر، بس بالبداية جيبولي دم ابني. سماهر:

عش نترك شغلنا، شنهو أول واحد يموت عدنا ناخذ ثارنا ونكمل حالنا حال البقية. أبو أركان: كافي يبوي رحمه لأهلج كافيييي، دم شاهين يمي أجيبه وانتهى الشغل لا غيث ولا أركان يروحون بعد. -خايف من الموت يعمي؟ -ما خايف، ما خايف بس كافي، خلص حيلي وأني كل يوم دافن واحد، بنتي تسودنت وهاي تصحى دقيقة وتروح بالساعات، ناخذ بزلامهن وننطي للموت راح يصفون.

-ما يصفون الراحوا، يجون مكانهم، البنات كلهن شايلات، وغيث يعقد بـت عمو أركان، يندار لسهيلة وأبو حمزة ياخذ دم ابنو مكانكم. قام غيث طلع، قمت وراه لأن اختنقت، حتى فرعون قلبه أنظف من قلبها. لقيت البيت فارغ صدق، بس زلم بره كلمن بيده سلاحه. رحت لغرفة ريحانة، جانت قاعدة لامة رجليها حاضنة چماغ شاهين. قعدت يمها، شالت راسها باوعتلي وضحكت. -باجر العرس. -أي يا قلبي، انطيني هذا اللي بيدك.

-لا هذا مال شاهين، انطانياه قبل لا يروح للمدرسة حتى أغسله، بس أني ضميته وقلت له ضاع حتى كل يوم أشم عطره بيه. -أخاف يخلص عطره، ضمي لعد. -لا ما يخلص، أني أخذت عطره من غرفته هههههه. عصرت نفسها همست: راح يجي أخوه ياخذني، لا تخليه. -لا شاهين ما يخلي أحد غيره ياخذك، بس انطيني هذا أضمه حتى لا يشوفوه بيدك وياخذوه منك. -حنيت، دحقي أيدية، حدري هينا تا أحجيلج، لا تسمع سهيلة، قال بس أخلص امتحانات أتقدملج. -أي غيث هم قال.

-غيث أبو البنات، كل يوم أبوي يقبضه يم أم حاتم يحب جنتهم، راح يسود وجوهنا. -الله يخزيك يا غيث، ريحانة حبيبتي عيونج تعبانة، وشاهين راح يزعل إذا شافك ترضين على زعله. -لا لا. -لعد نامي شوية حتى ترتاحين. هزت راسها بأي، قمت أخذت مخدة بسرعة خليتها يم راسها، اتكومت مثل الطفل، غطيتها، كمشت إيدي قالت: دحقت ضحكته بالتابوت. حضنتها بجت، بجيت على بجيتها، أتذكرت وقفته الصبح بالمطبخ وهو يحجي وياي.

-قال ما أتركك، قال أحبك، ناي راح يرجع مو؟ هزيت راسي أي ودموعي تنزل. -لحقي على غيث، قولي له لا يدفنوه حدر التراب خطية، ما لحق يفرح بقاط العرس بلكي يرد يقوم. -ما يدفنه هذا أخوه. -أي ما يموت أعرفه، عجل منو يقبض المضيف ويه أبوي ومنهو يأدب زلامنا؟ -لا ما يترك أبوك، نامي ريحانة. -ناي ما خلاني أركان أدحق شكله بالتابوت، غطاه عني، أتوسلت بس ردت ألمح شكله لآخر مرة، لاااا ردت أضمه بروحيييي، يمه شاهييين وينو؟ شهقت، ضميت وجهي.

-لا لا ناي ما يتركني، يعرفني ما أعيش من غيره، ولج اليوم الحنة تدرين؟ يصيحلي شنو؟ ريحانة روحي. -وإنتي صدق ريحانة روحه. -عجل عششش تركنييي، دحكييي بيد أمه شنو؟ ولج ناااي هاي دشداشته اللي راح بيها، دحكي الدم تارسها، ولج قتلووا شاهين راح ناي، خذوه وما رضوا ياخذوني يدفنوني وياه. أحس روحي اختنقت، أتخيلت روحي مكانها وهذا اللي تحجي عنه غيث، غمضت. -موش قلت له لا تروح؟

والله قلبي لاجمني، بس هو قال لا أرد وعطاني كلمة ما يتركني للموت، عجل عش ردوا بتابوت؟ -مو هو هذا. -لا أني دحقت وجهه حتى لو كان لافي، أني أعرفه هذا شاهين الروح العايشة بيها، دوم يعاندني حتى أزعل وهو يضحك، بلكي هالمرة هم هيج ويرجع يقول: جنت أتهزل وياك ردت أشوف معزتي يمك. -هو ديسوي هيج حتى يشوف معزتك يمه، لا تبجين حتى من يرجع يشوف وجهج حلو، نامي فدوه أروحلك.

أشرت أي وغمضت، ضليت أمسح على راسها وأقنعها راح يرجع ودموعي تنزل غصبًا عني، أمسحهن حتى لا تحس ويردن ينزل بدون شعور. شوية واختفى صوتها، وخرت إيدي لقيتها غافية من التعب وحاضنة الغترة، أخذتها على الكيف فتحت عيونها، رجعت جرتها وغمضت. مر أسبوع، حالتهم أسوء من أول ساعة، الصبح نقعد على صوت بجي الزلم. نسوان ماكو بس سماهر وسهيلة يخدمن الزلم. فاتحة ما سووا، حتى ما اشتكوا قالوا طلقة تايهة، محد يعرف شمحضرين، حياتهم كلها قتل وظلم.

بيبي رغم تبين قوية تالي ما تحملت ووقعت، نيموها مستشفى. بالليل نايمة، انفتحت الباب دخل غيث تعبان كوه يمشي. شمر سلاحه والغترة، أجه يمي جنت نايمة على القريولة مال بيبي، سحب إيدي وخله راسه بحضني واتمدد، غطيته ضليت ألعب بشعره. -اليوم أجه جود وكرم. ما رديت. وخر راسه باوعلي. -شعّرفهم وإحنه ما خبرنه أحد؟ -ما أدري غيث. -ناي إنتي آخر ضحكة بقيتلي، لا توجعين قلبي بيج.

-لا أوجع قلبك ولا أوجع قلبي، كلمن اختار طريقه، ما أكمل وياك بعد، ضالة هنا لخاطر ريحانة بس كم يوم أرجع. -شلونها ريحانة؟ -عقلها خل. -لو جنت بمكانها هم يصير لك هيج؟ -لا طبعًا، أصلاً جنت أدعي عليك طول الوقت بس إنت مجلب بالدنيا. -ناي تعبان. -عساك ما ارتاحيت عمرك كله ولا شفت النوم. -ما أغمض عيني ولا عرفت الراحة من ذيج الساعة وداعة ابني.

-لا تحلف بيه، هذا ابني وحدي، مالك شي بيه، راح أحرمك منه وألوع قلبك مثل ما سويت، أني ما أثق بيك غيث. -دخلتك مكان وخليتك تعرفين أسرار أهلي ما يدرون عنها، سلمتك روحي واتحملت أسوء أنواع الوجع بس حتى أرضيك، حبيتك بوقت كاره بيه حتى نفسي. -لعد ليششش ليش هيج سويت؟ غمض ورجع راسه بحضني. -كرهتك بقد ما حبيتك، عمري ما راح أسامحك. -على ذاك صوت بجيك أستاهل كل اللي تسويه بيه. -ما بجيت وراك ترى، أصلاً ما ذكرتك. -أدري.

-هم قدرت تنام وأني مو يمك؟ ما رد سكت. -من تركتني رجعت تسهر ويه البنات مو؟ -أناطر الليل أناطر، أحسب له بالثواني تا أروح لطفلتي، آخذها لحضني وأضل مساهر للفجر خايف عليها من البرد، أتمنى أضمها بروحي. -خنتني غيث. -اللي يحب من قلبه ما يخون. -بس إنت وجعت قلبي، قلتها وشهقت. دخل راسه بحضني حيل همس: بروح أخيك لا تزوديها، وحق كتاب الله ما ضل حيل يحمل كل هذا الوجع. -شلون انطاك قلبك تطلقني وأني أتوسل بيك؟

-مو هين اللي سمعته، أول مرة بحياتي أتمنى الموت وخايف منه بنفس الوقت، خايف تظلين وحدك. -تركتني. -بالي هين البعد عنك، بس طلعتي من الباب حسيت قلبي صار نصين، الثانية تمر وراك بعمر، طلعت وراك مثل الخبل أفتر أدورك، كل ثانية أخلي إيدي على قلبي أسمع نبضه، أريد بس شي يآمني عنك. -ربي راح ياخذ حقي منك. -أخذوه، أخذوه من حيلي، أخذ أخيي مات بحضني قدام عيني. قالها وأسمع شهقته.

حضنته وبست راسه، اتندمت حجيت وياه هيج، هو جاي يرتاح وأني ذكرته. عصرته حيل قلت له: جذب كل اللي قلته، والله ما دعيت ولا ربي عاقبك، هذا يومه وهسه بالجنة هو لأن راح غدر. -راح وهو يدافع عني، الرصاصة جانت بقلبي أخذها مكاني. -ربي انطاك عمر لخاطري، يعرفني أموت ما أقدر أكمل وراك، صدق اليوم جنت أم حاتم سلمت عليك. شال راسه باوعلي، ابتسم واستغفر مسح وجهه.

-عزة غيث صدق تحجي، أي شي يتنفس تركض وراه، ما يهم زاحف ماشي طاير المهم أنثى. -لو هيج ما ظليت ألح وراك. -غيث. -عيونه، مشتاقلك يا مصيبة غيث. عدل نومته، أخذني لحضنه، خله راسه برقبتي، أخذ نفس طويل باسني ورجع راسه. دخل إيده جوه تيشرتي حركها على بطني. -ابن الكلب هينه خاتل وأني أفتر ورا أمه أدور طريقه أردها بيها. -ما أرد لك.

-عجل غير تربيتي وأعرفك راسك يابس، خفت أتقرب ضليت مثل اليتيم أدحق من بعيد على العيد، وأمه تساهر ويه السكران تنصح ما تدري هو مشتول مثل الزمال مناطر نومتها حدر المطر. -شنو سكران شعّرفك؟ -عش يابه وين ساكنة حضرتك موش بحارة الـ -لولا؟ -أي. -عجل كلها سكارى ومتشردين، لا تسألين. -ولو ما مصدقتك بس أمشيها، صدق قالوا شافوا فوني بيدك؟ -منهو قال لك يا زمال وشنهو يولي، مصنوع حصرًا لحضرة جنابج قطعة وحدة؟ -بنت الـ

-استغفر الله، يولي يا نص السعر، جهاز قامز جدو من قبره، وأنوب شبعت سب إنتي تبيعين لو تشتمين بيه؟ زغرت عيوني همست: شعّرفك غيث؟ -مبينة ذيج وينها واضحة، إنتي بدون طلاق كل شوي قابضك تسبين، أنوب طاردك شتتوقعين تكتبين بيه شعر؟ -شقتك نظفت وردت مرتبة مو؟ -كل عقلك أدخلها وإنتي ماكو، قضيتها شوارع ويم جماعتي مثل الطارديه أهله. -لعد والصفرة وينها عنك صدق شخبارها؟ -مو زينة، قامت تاخذ علاجات مضاعفة. -ما تموت لا تخاف عار. سكت ما رد.

-دتقول اسم الله إن شاء الله إنتي، أعرفك واحد حرمات بيك التعب وتضييع الوقت. -نكد نكد، أجيت نص ساعة أرتاح بس إذا إنت زلمة اقبض أعصابك ويا ناي. قام قعد يريد يروح، حضنته بسرعة رجعته همست: مشتاقة لحضنتك اللي تخنقني بيها. -كل ليلة أحطم أضلعك بحضني بلكي الصبح تقعدين تعبانة وتذكريني. -شنو؟ -تخاطر يولي. -آها، سحر المثقفين، شغلة فاشلة والله، كل ليلة أنام براحة حتى اسمك ما أذكره. حك خشمه وابتسم. -بالك أجذب؟

شنو هالثقة اللي شايلها؟ لو عندي ربعها جان هسه أني ملكة. رجعت راسي بحضنه، احترك قلبي ضربته بصدره، كمش إيدي. -شبلاك يولي؟ -بالك أجذب وكاتلة روحي وراك. -هههههه استغفر الله يولي، منهو قال؟ -داتضحك غيث. -عيون غيث، لا تتحركين شعلتي أبوي، صحت شكو شيطان براسي وإذا طلعت الصبح وسبحت يرموني. -ههههههه شقد عيب يكتبون بشهادة الوفاة سبب الوفاة -موته وطياح حظ، دخيل هالضحكة اللي تشيل شكو حزن من قلبي. -شتكول ابنا حيطلع لمن يشبه؟

-راح تبين منو يحب الثاني أكثر. -أني ما أحبك. -شعور متبادل، عجل طلع يشبه كرم نفس أذاناته. -كل يوم يخبرني يسأل عن صاحبه. -هذا أخوي موش صاحبي. -راح أرجع وياه. -أني أحجز لك. -لجهنم موو؟ غيث أضل وياك وأنسى اللي سويته مقابل تترك شغلك، غيره وروح أهلي ما ضل، أني مريضة وحامل ما بيه هبطات، أقلها اتعلمت على بعدك بعد ما يهمني. -خلف الله على الشوربة. قعدت زغرت عيوني همست: يا شوربة أبو عاشق؟ -وإذا بنية هيا؟

-لا راح أسميها عشق، لأن صارت بوقت جنة صدق واحد يحب الثاني. رجعني لحضنه همس: بس من يكف نبضه ذاك الوقت تحجين هالحجي، وراح أترك الشغل، كافي اللي خسرته بس آخذ حق شاهين. صار أسبوعين عن موتة شاهين، وعمي أبو أركان لحد الآن نقعد على صوت بجيته الصبح، لأن أكثر واحد متعلق بيه. الزلم كبار صغار الكل مسلح ويفتر، لا ليل ينامون ولا نهار يقعدون، كامشيها مناوبات بس يردون يكمشون القاتل.

غيث وأركان يردون وجه الصبح آخر نفس مالهم خلق يحجون ويه بشر. بالليل أنام يم بيبي بالقاع، ما ترضى نروح لبيت أبوه، الأيام تمر وغيث بده الشوق يسيطر عليه، صح بالنهار يفتر والقهر ماخذ من حيله بس بالليل يظل يحن، بالأخص من يرد تعبان يريد بس شغلة تهون عليه وتنسيه شوية من حزنه. يخلي راسه يم راسي، بالبداية يمشي إيده على شعري ياخذله دقايق يتقرب أكثر، ياخذ نفس طويل مني، بعدها يسحبني لحضنه يطبع بوساته على الكيف وما نسمع غير ضربة

العصا مال بيبي وصوته تقول: انضبوا لا أقوم أكسركم. غيث: بالقرآن بس أحضن جدة قولي يا الله. -وشنهو ما عاجبك الحجي يا أبو النسوان؟ زتها لغاد لا أقوم أكسركم وأتوبك صدق. -تراها حرمتي جدة، قلت أتوب بس مو هيج حرام وراك حساب. -انطم، جعلك قبلي بالحساب. طلعت راسي من البطانية. -بدعة، رجلي لا تدعين عليه. -ولك اقبضها جيبها لجاي هالعرنة. ضم راسي جوه البطانية وردني لحضنه قالها: هاي حلمانة موش صاحية.

-عجل خليها بحلمها وأني قاعدة كون أقابضك تحبها أكسر فكك. -تعذيييب جدة هذا تعذيب، تخليها بحضني وأضل بس أدحق. همست: غيث عوفها هسه، أنطيها منوم أسطرها أسبوع ما تقول. -انجعلك نمتي ما صحيتي. طلعت راسي، الدعوة تتلف بدعة. -تفوه عليك وعلى الوحش النايم يمك. -أتجاوزك بأخلاقي. -طاح حظك وحظ أخلاقك الساقط يا ساقط يا مرت الساقط. -بدعة لو تنامين لو تخلينا نروح لبيتنا، ابنا راح يطلع معوز حنان تالي يظل يعبر على بنات الجيران يخزيكم.

-عفن أمه ناي العرمة وأبوه غيث، الخزي على منو يطلع ناقص ابن نواقص. ردت أقوم كمشني غيث همس: أمسحيها بوجهي. رجعت نمت أباوع لها صفح. بدعة: قومي هفيني طراق. -لا عيب كبيرة وأني مترباية. -أنعل أبو تربيتك يا بنت الشوارع. -بنت شوارع ولا ضالة بلا رجل. -وشلون رجل ما ضالة بنفس حرمة؟ همست: خزيتني، هسه شرد بالله؟ غيث: عواد الفلاح. -صدق عمي أبو أركان يشبه عواد الفلاح. غيث ضرب قصته وبدعة قعدت شالت عصاها قالت: شنهووو ولج؟

طفرت طلعت بره وغيث يضحك بصوت عالي. رحت قعدت على الدرج. أجه أركان يريد يصعد قال: شكو هينا؟ -قتلني غيث وطردني قال: ضلي بره احرسينا ترضاها؟ -عش شعملتي؟ -كلشي ماكو لأن فقيرة. -أي لا بهاي صدقتي، قومي نامي يم أمي باردة لا تتمرضين. -خو أنام يم أختي شنو أمك؟ -بالقرآن أمدك من الشباك وتقولها بفكها الأعوج أختي هي، شلونها أختك ضاربها ثول ثلاثي الأبعاد؟ -عزة لحننننن تعالي اسمعي. -صوتك، أنعل شرفك غيث، قعدت العالم.

طلع غيث بطانية على متونه. -شكو يولي؟ -ديقول جنك بزون مشلوع ذيله، وجهك مو مال غرفة روحي نامي بالزريبة، ترضاها؟ أركان. فري فري، دخيل ربي، ألف الحمد لله حرمتي موش هيج. سمعت غيث؟ الله يعينك، شمسوي بدنياك متقلي؟ هز إيده وصعد فوق. غيث مدنق يورث الجكارة، أخذ نفس ونفخه عليه. وين أوديج متقلي لي؟ والله مظلومة، الكل مستغلني ويصنف عليه. حدري يولي.

فتح البطانية ورحت دخلت جواها، إيده حضني. طلعنا بره، قعدنا يم البحيرة، مد رجل وعكس الثانية، قعدني بحضنه ولفني بالبطانية. دخلت بصدره، عصرني حيل. رفعت راسي، ضحك. عاجبك من انطردنا؟ منو هذا عواد؟ جدي، جان مرافق أخته. هههههه طلعت مورث. عصر وجهي، همس واكتفيت بلبوتي. دنج أخذ شفتي بلهفة، بالبداية برقة بعدين اتعمق، حسيته جرحها، ودفعته. وخر يتنفس عالسريع.

دنج على خدي يمشي شفته ويطبع بوسات خفيفة، نزل لرقبتي. حسيت بشوقه رغم الوضع اللي بي، بس من يوصل يمي ينسى روحه ويفقد السيطرة. ما تركها لمن صحت غيث، قامت تحركني. بطل، رجعني ضمني. خليت راسي على صدره وغمضت. انتجه عالنخلة، عدل قعدته حتى أخذ راحتي. بسببي انطردت. إذا كل طردة هيج، جعل محد ينطرد غيرنا. راح تتعب. جان تعبت من قعدتج بنص قلبي. مو أحنا اثنين؟ هسه صدق غيث راح تحب ابنك أكثر مني.

الكل بعدج يروح غيث، الأهل والابن والدنيا بكبرها. شلون عرفت عيد ميلادي؟ جنت ناوي أسويلج حفلة تعوضج عن زواجنا اللي صار بالدفرات، بس مامقسومة. يلا نعوضه بابنا من يجي. اشوكت اشتريت البيت؟ أوه سالفته طويلة، صاحبه طلعت عيونه لأبوي يالله حصلناه، واعترض ما رضى يبيعه، جبنا له كثر عالم يتوسطون، يالشافعات رضى. ما راح أدخله لمن آخذ بثارهم. اشوكت نرجع لتركيا؟ بس تفض السالفة ونقضب القاتل نرد. صدرك حار.

مشعول جده بالمصيبة النايمة عليه. ظلينا للفجر قاعدين، عينه ما غمضت هالقد ما واحد مشتاق للثاني، نسينا نوم الليل رغم برد الجو بس أحضانه جانت كافية تغنينا عن دفو أي مكان. صار الصبح، عصر وجهي باسني، قال: يلا ما بيها بعد قعدة، قومي ندخل. شيلني ودخلني. حتى يزتونا بغرفة الحلال. قومي يولي لا يجي أحد ويدحجج نايمة بنص حضني. حبيبي تره أني مرتك، مو جنت أم حاتم.

يا سالفة الما راح تفض ناي، من الأخير دحقي هالبيوت اللي حدرنا، بنواتهم كلهن متحارش بيهم. لا تجين كل اشوية مكتشفة سالفة وصارعة راسي بيها. وفرحان حضرتك؟ طلعت حوبة العالم، أخذت لي حرمة مع وقف التنفيذ، ضال بس أدحج. كل ما أكلها مشتاق لج، أحسب حساب شهر أكل تبن وراها. إحنا نحكي وصوت لحن صاحت: لا عموووو! وياها صرخة وحدة. قمنا ركضنا جوه دخلنا. وأشوف لحن واقعة، طالع دم من خشمها.

وريحانة بطرق الثوب الخفيف بنص البيت قاعدة حاضنة شماغ شاهين بس كلها دم. سهيلة واقفة تباوع بتشفي الهن، وعمي أبو أركان قاعد خال رأسه بين إيديه. أبو غيث شال العودة راد يضرب لحن، ركض غيث كمشه صرخ. بعددد لك! غيث: هدي يبوي، غير نفتهم شكو؟ ما نفهم، ينجتلن وينغسل عارنا تالي عمري بيتي يتنكس. غير نعرف شصاير، ولحن شوكت لحقتوا دخلوها بمشاكلكم. سهيلة: عجل منهو اللي كان يدخل شاهين؟ سنين وأني كاضبة البيت، هم دحقتوا شي صاير؟

روحوا شوفوا الحمل اشقد صار له وتأكدوا. لحن: عمي والله ما أدري على شنو دتحجون. ما تعرفين مو؟ أني راح أعلمج شلون تنكسين بيتنا وتدخلين زلام على بت أخوي. سهيلة: جان شاهين عايش وردت أقول لأركان بس ناي فرت السالفة وخلت أركان يطكني، وطلعتني أني المصوجة يبوي. وروح أزهر ما أقدر أحكي، ظالة أكل بروحي وأبكي على شرفنا كل يوم يتمرمط بالطين أخاف أحكي. وأني اللي راح أنظف الشرف من هالخيسة. دفع غيث طلع سلاحه.

اللي يتحرك أخلها براسه، خلكم مكانكم. دخل أركان من بره وقف متفاجئ ما مفتهم شكو. سحب أقسام عمي، ركض أركان جر لحن خلاها ورا ظهره. اندار على ريحانة، وجه السلاح كلها بثواني هو ضغط عالسلاح وغيث دفعه عن ريحانة. ما سمعنا غير الطلقة ثارت وصوت صرخة سهيلة ودمها ترس المكان.