رواية لم اخلق لرجل سواك الفصل التاسع عشر 19 - بقلم ايزابيل

#بقلم إيـزابيـل
#الجزء الرابع عشر
#لم اخلق لرجل سواك
..
بنات ورا العيد البارت الجاي لان كلنا راح ننشغل هالفتره😘😘

وكل عام وانتم بالف الف خيرررر يارب صحه وسلامه ويعوده عليكم ب الامن والامان وراحه البال والمخطوبه تتزوج والما متخرجه تتخرج ووالما عدهه اطفال يرزقهه بالذريه الصالحه

😂😂😂😁😁
..
روح

نايمه ووافرك بعيوني بأنزعاج البك يفتر فوك راسي حاره ومابيه حيل اكوم اشغل البنكه تعبانه حيل حاضنه المخده والغطى مغطي نص رجليه..

ندك الباب، كلبي فز معقوله رجع؟ شلت راسي مثل المسودنه ووكمت افرك بوجهي وامشي طلعت للصاله حتى من الاستعجال غسلت وجهي بالمغسله..

انشف بالمي برداني وواحجي : جايه جايه

الباب تكسرر تكسر فتحته ونصدمت بأبو البيت
بلعت ريكي بملل كال : ها انت روح شلونج بنيتي

هلاو عمو الحمدلله ليش تفاجئت ههه:

_ مو اخر مره قسور كال طالع وبعد مارجع هسه مريت شفت الكلوب مفتوح ف عبالي اجه كلت اجي اسلم علي واتأكد واخذ الايجار..

نصقعت من كال ايجار اها يعني جاي على الايجار
حكيت ركبتي من ورا ووسكتت جان يكول
: انت راح تبقين هنا

هزيت راسي

ليش بنتي ووامج وبيتهه وشلون قابله تخليج وحدج :

كلبت عيوني بضيق : عمو هذا شيء خاص بيه

:مثل ماتردين لعد  من اليوم ابلش اخذ الايجار منج

: منين انطيك؟!

: شنو منين تنطيني؟

: اقصد يعني حالياً ماعندي تكدر تنتضرني چم يوم اكمل المبلغ واجي انطي الك بيدي.

رفع طرف حاجبه :منين تجيبين

كتفت اديه : المهم ادبر وانطيك ماكو داعي اكلك الطريقه

: هاهيه لعد اتفقنه

ابتسمت بمجامله طلع ركعت الباب ورا.. وكفت علي ولزمت ركبتي مخنوكه شلون راح ادبر الفلوس لاعندي وارد ولا معين وليمتى اضل هيج..

كتله هيج حتى يسكت واله اني منين ممكن اجيب

خطرت ببالي طريقه بس خايقه اخطيهه واتندم بس لا ماعندي غير حل..

وهمه اهلي واني اول وتالي راجعه الهم ووغصبا ما على راسهم يتدبرون بعيشتي.. وهيج لا راح اخضع لامي وهم اكسر عينهه وهم افتح طريق جديد لحياتي الي ماعرف لعند يا نقطه راح توكف..

مسحت وجهي وكمت على حيلي افتر خايفه شلون اطلع ووين اندل وشيوديني حصرتني العبره..

لو ما مكطوعه من شجره ماجان صار بيه هيج..
ولا نذليت هاي الذله..

حتى لو ردت اشتغل وين اولي منو يقبل يشغلني
وصالون امي بعد ماكدر ادخله ولا نفسيتي تتقبل
اي شيء يخصهه...

دموعي تنزل من دون ماحس على الهضيمه الي بداخلي..
..
ركضت لغرفتي دورت بجنطتي لحد ما لكيت صوره ابويه كابلتهه وكعدت بس اشهك وواون واناشغ واعاتبه..

بابا مكسوره اني بابا محد الي امي بعد ماكدر اتقبلهه ومستحيل اعيش وياهه واباوع بوجهه كل يوم...

تدري مكسور جناحي وومهشمه وواحس روحي راح تطلع والله اعرف هواي سويت اخطأ بحياتي اعرف تعديت حدود المعقول وي ربي ووي نفسي

بس ندمت ادعيلي مايكون الي دامر بي عقاب من الله اختنكت فركت صدري ووكمت كلت كافي بجي وونوح لازم اسويلي حل مابقى هيج.؟

اني راح اروح للبصره وشيصير خلي يصير..
..
كمت من الجربايه جريت جنطتي الي جبتهه وياي ووفتحتهه مابيهه هواي ملابس ونص غراضي ببعد ببيتنه باوعت للساعه..

ب٢ الضهر امي هسه اكيد ب الصالون وبهاء طالع يعني البيت فارغ بدلت بي ربع ووبنطرون كابوي
مشطت شعري بأيديه على الواكف وطلعت..

دورت ب السنادين مالكيت المفتاح هاي شنو؟ معقوله ماخذته وياهه لو قافلينه من جوه..

تذكرت الباب الي فاصل بين شقه قسور ووشقتنه كلت اروح افتحه المفتاح عندي رجعت اركض...
فتحته بس جان على شيء ثكيل اذكر احنه موكفين ورا كومدي صغيره..

بقيت ادفع بهدوء لحد ما نفتح بس مو كله مجال شويه عبرت منه هدوء وضلام كل الاضويه طافيه مواعين على السنك والقوري بعده على الطباخ مخاد القنفه متهوسه بطريقه فوضويه..

دخلت لغرفتي طلعت جنطه صغيره اخذت ملابسي مكياجي تراجي الذهب مالتي جابتهن هديه بعيد ميلادي وطلعت
جذبني صوت جاي من غرفه امي عقدت حواجبي
وتقربت بهدوء لحد ما صار الصوت اعله وكدرت افرزنه صوت بهاء ويا وحده بس مو صوت امي؟!

نرعبت تقربت يم باب الغرفه جان مسدود تقرب
وخليت ايدي على اليده وفتحته ونصقعت بشوفه هالمنضر الي بكد ما صدمني فرحني..

واخيرا كدرت اكشف حقارته جايب وحده على فراش امي وومستمتع بلحضاته الي راح اكلبهه انتقام فوك راسي فورا سحبت تلفوني من ورا جنت مخليته بجيب البنطرون الخلفي..

ووجهت الكامره عليهم وكدرت اخذ كم صوره...
واعض بشفايفي بتوتر مادري شلون البنيه الي ويا صارت عينهه بعيني ورئساً صرخت  ووهو ندار عليه شافني وسع عيونه حار شيسوي يطفر عليه لو يلبس ملابسه.

لزمت الموبايل بقوه وركضت جنت اريد اطلع من البيت وهو يصيح عليه روحححح  يركض ويلبس بملابسه.

نفتح باب البيت ودخلت امي ووكفت بمكاني هو نرعب وراد يرجع للغرفه وهي ضلت صافنه طبعا هو ضل يمشي مثل القنفذ لان ضربتي بالكرسي اله مأذيته..

امي تباوع بصدمه ووموسعه عيونهه على العشره

تمشيت من يمهه ووابتسمت همست واني اجر بالكلام
: يوماً لك ويوماً عليك

ووعبرتهه فرحانه وعبالك طالعه من حرب منتصره

اذا ردت اروح للبصره  المدرسه بعد ماكدر اغيب ؟ وو اني منين اندل بيتهم! اذا ردت اروح..

جنت امشي ب الشارع واحاول الهي نفسي بكم سالفه بس كلبي يم امي هسه شصار بيهه من شافت المنضر اول ماطلعت صوت صرختهه لهنا وصل..

بس عادي هي تدري بي يخونهه ب الملاهي بس متوقعت يجيبهن للبيت عزا بعينه الصلف..
..
وصلت للمدرسه دخلت للأداره الست الي ذاك اليوم نفسهه رزلتني تخزر بيه تباوع من فوك ليجوه لملابسي بعدم رضى..

دخلت على المديره : السلام عليكم ست

رفعت راسهه : وعليكم السلام روح واخيرا قررتي تجين للمدرسه

: ااا لا ست البارحه داومت

جاوبتني بصرامه : بس قبلهه جنتي غايبه شهرررر واكثر

: شدعوه ست مو شهر

: عموماً انت مفصوله اسبوع وناقص من درجات السلوك..

فكيت حلكي مترتين فصل اسبوع واني اصلا جنت ناويه اجي اخذ اجازه يلا صارت من صالحي...

تنهدت ووهزيت راسي : اوكي ست
..
وركضت للشقه كملت كلشي ووذبيت المفاتيح جوه السندانه ودزيت مسج لابو الشقه أنو طالعه منهه.. امي مالهه حس ولا رجلهه عبالك كلشي ماكو..

بس متأكده امي طردته ماتخلي اكيددد

زفرت شهيق ورفعت راسي للسما ياربي عيني وساعدني اني رايحه وماندل ولا اعرف احد اريدك
انت سندي ووذخري
..
مريت على محل ذهب بعت التراجي بسعر مادري اذا نغشيت بي او لا الهم اخذت كم فلس جان المبلغ كله ١٢٠ الف

اول ماطلعت امي استلمتني ركع مكالمات وورسائل وينج ادك ب الباب ماتفتحينه روح يمه احاجيج ابوس رجلج اسمعيني قفلت الجهاز وضميته
..
وصلت لكراج بغداد - وركبت السيارات الي تروح للبصره كيه كعدت بالاخير وولطشت روحي ب الشباك..

واباوع على الناس دنيا عصر والشمس طالعه بس اكو هوى بس نسيم حارررر وذول السواق كلمن واكف كدام سيارته وويصبون عرك وويصيحون طالع بصره، نجف، كربلاء... الخ

خطيه كلمن يشتغل على رزقه دنكت راسي لحضني وضليت افكر اخاف قسور ميقبل اذا شافني او يحجي عليه لان قطعت كل هل
مسافه لوحدي..
..
لحد ما قبطت السياره طلعت روحي اتحركنه ووبمجرد ما مشت السياره وجعني كلبي ما مرتاحه..

احس طلعتي غلط ووكلشي سويته غلط ووجان المفروض ما استعجل غمضت بنفاذ صبر ووتجيت راسي على الجامه..

شلون راح اوصل الهم واني كل الي اعرفه بيت فلان ووبيتهم يم شط العرب.. طول الطريق ادعي  الله يسهل سفري ويخلي ببر الامان
..
بعد وقت طويل مادري شكد بالضبط لان خلصتهه نوم بس كال يلا انزلو..
دفعت الكروه ونزلت
..
ضلمه وسواد الليل حالك اشجار تتحرك عكس حركه الرياح وتصدر صوت مخيف صوت جلاب وبزازين جان اكو طريق واحد مبلط نمشي علي ووعلى الجهتين كلهه بساتين.

حضنت روحي بخوف اجيت ابجي عزا بعيني صخام بوجهي راح اضيع هنا شسويت بروحي اني
كلهه بدت تروح والمكان فرغ بقيت بس اني وواكفه بمكاني وابجي..

خطفت سيارره من يمي ركضت ليمهه خطيه جان رجال جبير مديت اله راسي من الشباك...

نصدم الرجال : عمو فدوه هذا شط العرب

: اا لا بنيتي ووينج ووين شط العرب

شهكت ووملامحي نعكشت بقلق : ها يعني شنو تكدر توصلني

: والله طريق طويل وهيج وقت الشارع خطر

:عمو فدوه ابوس ايدك اني مو من البصره وجايه هنا على عمامي اذا عفتني انت اتيهه واحتمال حتى تاكلني الجلاب انطيك شكد متريد..
..
ضحك ووكال اصعدي تنهدت براحه احس الله دزه الي من الفرحه ماعرفت اعبر ركضت صعدت ليوره جان فاتح اضويه السياره والتبريد فورا اجه بوجهي مشه والطويل الطريق احنه نحجي..

:تندلين بيت عمامج حتى اذبج ببابهم

: لا

: شنو لا چا غير عمامج همه يابويه شلون تجين بدون ماتعرفين العنوان

: مو اول مره اجيهم

: شيصيحون الهم بيت منو

: ها مادري بالضبط بس قسور كالي يعرفونه بأسم جدي

: ياهو قسور

: عمو يعرفونهم بأسم حجي عارف

قلص عيونه وويهمس بيت حجي عارف ووبيتهم يم شط العرب بس لا الرجال الي عنده اربع وولد ووثنين بنات ووعندهم كاع وبساتين واحفادهم وولدهم كلههه واصله بالمدرسه

: والله مادري انت شتكول

ها ها عمو عندهم ولد ميت من ولد الحجي اسمه احمد..

: اي اي عرفتهم چا مو كتلج همه

ابتسمت براحه

كال : كبل تدرين بنيتي هنا بالبصره قليل الناس تقبل ولدهه وبناته تكمل دراسه ووتوصل بس حجي عارف جان الله يرحمهه عنده كاع صغيره وويزرع بيهه وويحرث فلاح على كد حاله

بس جان طيب وويحب الناس وويحب كل اهل ديرته حتى من يحرث كاعه المحصول يشاركه وي المحتاج..

ومو بس هيج خله كل ولده يكملون دراسه ويشتغلون ويا بالكاع لحد ما كبروهه من كاع الي اثنين لحد ما صارن بساتين جبيره ووصار الهم صيت..

وولده مشو على نهجه ف لهذا همه معروفين بسمعه ابوهم...

ابتسم وهو يحجيلي على جدو احس افتخرت
حيل ارتاحيت اله هالشايب..

باوعلي بالمرايه وكال : بس شعجب انه الاعرفه كل بنياتهم محجبات ومايلبسن قمصان طافره...

استغربت شنو قميص طافر باوعت على تيشيرتي الربع ردن وعرفت غايه كلامه..

عدلت شعري القصير ووبلعت ريكي
:كتلك عمو اني معايشه وياهم

هز راسه بعدم رضى
...
من كال يلا وصلنه انزلي راحت روحي بثانيه وحده
..
جمانه

طفرت من مكاني ووكفت على حيلي حسيت بطني نشكت نصين من الوجع هي كمزت ولتفت عليه بسرعه : ياااا جمانه شبيج..

جمانه : ااا تعاي هنا ساعديني ارجع انام

عقدت حواجبهه ووذبت الدشداشه على الكرسي  وواجت لزمتني من زندي وونومتني كالت : شكو كمتي بيج شيء

هزيت راسي ب لا

: محتاجه شيء

: اريد موبايل اخابر اهلي

بلعت ريكهه واجت كعدت بصفي ولزمت ايدي
: جمانه فدوه لكلبج حبيبتي لاتكولين الههم على الخطف مابينه حيل مشاكل..

نترت ايدي منهه : لا اكول الهم وواخليهم يجون يبقون يمي هنا بس يطلع ابني من المستشفى اخذه وارجع البغداد..

باوعتلي بغضب ووعيونهه تزئز عليه عبالك تريد تحجي شيء بس اكو سبب لازمهه ومسكتهه

تنهدت ونزلت راسي عافت حتى الدشداشه ووراحت صدري مكتوم بوجع شلون راح اعرف مكان صادق اني؟ ووشمدريني وين مخلينه...

لزمت بطني بأيدي وكمت بهدوء دنكت ونذبحت الف ذبحه علما اخذت الرقم وضميته....

سمعت صوتهم مجتمعين ب الهول كلت استغل الفرصه بلكي يحجون شيء عن صادق..جريت الشال خليته على شعري ووطلعت هم نصدمو من شافوني جان كاعدين عمام اسعد كلهم وياسين ورواد والبنات..وابو هم..

ابو اسعد : تعاي جمانه بنيتي هنا اكعدي

واشرلي بصفه رحت كعدت تنهد وودار ركبته عليه وباوعلي : شلونج

: موزينه

ام اسعد : انت راح تخبليني غير عمليه شلون تمشين تردين يطك خياطج يلا ترتاحين

جمانه: اختنكت

ابو اسعد : اريد اسألج شيء جمانه واتمنى تجاوبين بوضوح

هزيت راسي باي

ابو اسعد : من خطفوج خوما سووولج شيء

ابتسمت بسخريه : هواي سوولي حبسوني كطعو عني الاكل كتلوني وبفضل الله صمدت ومامتتت

ابو اسعد : يعني بس هيج

استفزني كلامه كلت بنتر
: اييي ليش شيسوون اكثر من هيج هاا؟ كل الي صار بيه بسببكم واذا الي حوبه ان شاء الله الله يطلعهه..

اجه يحجي بس قاطعه دخول شخص رفعت راسي
ولد الاول مره اشوف تقريبا يجي عمري نهايه ال ٣٠ هيج شيء لابس بنطرون نيلي كاوبوي وومخلي مكان الاسلاح برجله

ماعرف شيسموهه بس دائما اشوف الجيش يخلون منهه اسمه گراب يمكن ولابس قميص زيتوني طوخ

انصدمت منو هذا جان رائساً ابو اسعد يكوم وويكله : رهيب تعال وياي

رهيب : بس الولد واكفين بره اجيت اخذ رواد وياسين ونطلع وياهم عيب نعوفهم لوحدهم ََ

لزمنه من كتفه وواشرله براسه وهمس : امشي

وطلعو رواد جان كاعد قريب عليه كتله
: منو هذا؟

: ابن عمي حمزه

نصدمت يعني ابن عم اسعد شو مشايفته كتله
: رواد اريد منك شغله

: خادم

: خادم ربك، اريد موبايل اخابر بي اهلي

هز راسه ووطلع موبايله من جيبه كال : هاج خابري وومن تكملين رجعي

ابتسمت :شكرا والله راح اتعبك بس سؤال اخير اا صادق انتم ليش خاطفي

خزرني :شمدريج انت

: اا سمعتهم هناك يحجون

: لا صادق شاكين بي هو الي ضرب اسعد

رفعت حواجبي وكمت وواني عاصره الموبايل بين ادي دخلت لغرفتي وقفلت الباب رحت كعدت على الجربايه ووسجلت رقم ابوي فورا..

دكيت علي مره مرتين يلا جاوب احس روحي ردتلي ووشعرت ب الامان لا ارادياً..

: الووو بابا

:جمانه بابا شلونج

بجيت بسرعه : ليش هيج بابا ليش عايفين ولا تسألون عليه مو بنتكم اني مو من دمكم ولحمكم معقوله ما شتاقيتولي ما هز مشاعركم غيابي..

: على كيفج بنتي ليش تبجين شلونج هسه شخبارج شصاير

: موزينه اني ليش عايفيني وماتسألون ولا تخابرون

: شلون ما نخابر ذيج الفتره ندك تطلع النه ام اسعد نسألهه عليج تكول بخير جمانه وكل ما ندك لو نايمه لو وي البنات ونخابر على موبايلج مغلق..

صدمني يعني جذبو عليه زين ليش غمضت عيوني بتعب ومسحت دموعي : اني جبت

: صدك شوكت وخوما بيج شيء ابنج شلونه

: الحمدلله بخير تعالو للعماره اخذوني اريد ارجع لبغداد

:ان شاء الله هاي امج وياج

انطاني امي خابرتهه وسلمت عليهه ضليت هوايه احجي وياهم لحد ما رواد دز طفل عليه يريد الموبايل.. وقبل لا انطي اله قررت افتش بي بلكي الكه شي يساعدني..

احس ضميري مارتاح شلون راح انطي مكامه لهمام جوز صحيح هو القتل اسعد بس اسعد ما قصر اغتصب اختهم ووشمرههه بباب بيتهم وبعدين اذا راد يتحاسب صادق ف القانون هو الي يحاسبه..

دخلت على الواتساب هواي محادثات وي اصدقائه
بس لفتني اسم رهيب ومحادثته ويا فووا دخلت..

ضليت اكلب على السريع لحد ما استوقفني كلام رهيب يكوله (تعال بمنطقه ** احنه ب المخزن القديم ووهو ويانه)

اكيد يحجون على صادق اي ماكو غيره بلعت ريكي وطلعت من كلشي وغلقت الجهاز وانطيته للولد الي واكف يباوعلي..

غمضت عيوني وبقيت اردد ب اسم المنطقه بيني وبين نفسي
..
لليل وصلني العشه للغرفه ماكلت بس شويه وكمت للشباك باوعت كلهم مجتمعين ووماعرف شيحجون بس عندهم همه وواحد يركض منا وواحد منا..

شلون هيج يكدرون يخطفون وويقتلون ويدكون ويرمون بدون لا احساس ولا ضمير شهالتخلف..

بقيت كاعده وبس اريد انام ماكو ثاني يوم الصبح كعدت على صوت ابوي وامي ردت اكوم بس ماكدرت بطني حيل اذتني يمكن لان البارحه تحركت..

قررت وكلت هاهيه اخابر همام اكله على كل الي صار واخذ ابني من المستشفى ووارجع لبغداد..

جنت راسمه هيج ووماتوقعت تنضرب مخططاتي
..
دخلت عليه امي اجت عيني حضنت راسي ووباستني وودموعهه عشره عشره ووتكلي شلونج ليش هيج صار بيج..

بعدني توني داحجي قاطعنه صوت ركضه وورمي ووشخط سيارت نفجعت امي فورا ركضت على الشباك ووتهمس : يمه اسم الله شصاررر

باوعت : ها يمه شكوو

: اندري ذول شو حركتو سياراتهم ووولا واحد بقى

كمت ارجف ضليت بس ابلع بريكي شويه ودخلت هدى بنت عم اسعد الجبير امه كضتهه وتسأل بيهه  : شكووو شصارر

: يكولون صادق ماكو بيت سلطان ماخذينه

عضامي كامت تطلك وحده بالثانيه عزا شمدريهم اني اصلا بعدني ما حاجيه

هدى : راح ينهجم البيت فوك راسنه خاله.. يتبع
..
شنو رأيكم ب الاحداث 😁😁

البارت الجاي راح تنحل هواي اسأله  واغلب الاحداث راح تنسرد الجمانه ف ترقبو..
🖤🖤🖤🖤🖤
ايزابيل