رواية لم اخلق لرجل سواك الفصل الثالث 3 - بقلم ايزابيل

#بقلم إيـزابيـل
#الفصل الاول
#لم اخلق لرجل سواك

..
كنت افتش عنك بين الجميع ابحث عن نظره اخيره عن غمره ثانيه تتجمع الاحرف بداخلي وتتمرد لتخرج وتطلق لعنان لقلبك..

الم اقل لك انا لم اخلق لرجل سواك الم اهتف بأسمك بين تاره وواخره.. الم اهمس اترجى قربك

كنت اشعر بمراره بعدك تمزقني لتعيدني ووتحطمني آسر حاضري وومستقبلي لا اريد
التحرر..

آسرك يخطفني من عالمي المضلم ووويجمعني
تحت يدك فوق صدرك لتحبسني انفاسك الدافئه في قضبان حبك..
..
الحياه الهه قواعد بس مو مجبرين نمشي عليهه
ولا مجربين نطبقهه بالحرف الواحد مرات الصدفه متجي مره وحده ولا تكون صادقه بالنظره الاولى..

هواي نتمنى ونريد اشياء مو شيء واحد بس تعكسنه الظروف بغير المتوقع..

زفرت نفس وخليت ايدي جوه حنكي ووبيدي قلم افر بي ووساعه انزل راسي على الكتاب الكدامي ساعه ارفعهه على الصبوره الي مليانه احرف انكليزيه..

دخلت روح صديقتي ماعندي غيرهه هي قريبه عليه كلش واحجيله اصغر واكبر شي وهي هم تتمختر بمشيتهه وايدهه على حلكهه تضحك ضحكتهه الفضيحه..

كعدت بصفي لتفتت عليهه : شبيج شنو هالضحك هذا..

خليت ايدهه على بطنهه : لج جمانه هذا الحارس ابو كرش يتحرش بيه.

عقدت حواجبي :وانتِ شبيج مكيفه

هزت ايدهه بسخريه : عباله اكلبه ووهو ماخلى شيء ماكاله مايدري انه ممخليه مواصفات محدده.

جمانه : اي عيني انت تدورين حار ومكسب..

روح : اي لعد شلون يوم الج ونفرح بيج هههههه

جمانه : دنجبي اني مادور هيج سوالف..

روح : شنو قصدج

جمانه : يعني ماصاحب واطب واطلع من دون علم اهلي لو ينزل كدامي ملك جمال مستحيل امشي بهيج طريق...

خلت رجل على رجل وبعدت خصلات شعرهه لقصير وره ضهره : اي حياتي هذا شيء راجع الج

:دنلصمي

روح : جمانه ليش تحجين هيج؟ مو والله راسج اكسره

دفعتهه من جتفهه : دكلي نعل روووح كافييي اصحييي شدتسووين بروحج انت لج امي حرام ووالله حرام..

روح: وشمسويه ااني!

: لا ممسويه بس مصاحبه المنطقه كلهه ووصورج موزعه على كل بيت عراقي متخافين على روحج انت ِ..

روح ببرود : شهالجذب هذا هو بس مؤمل

جمانه : اي والقبله عباس وواحمد ووذكريني منو بعد اخاف ناسيه..

خنزرت عليه ووكامت وكفت على حيلهه وهي بالرحله : لحد هسه ساكته الج وومتحمله تنجبين ومتدخلين بيه شعليج عسى ما ذب ملابسي بالشارع واطلع مصلخه انت شكووو عود صيري شريفه...

دفرتني ووطلعت تركض ووتنورتهه القصيره مبينه رجليهه ووبياضهن الساطع استغفرالله هاي ابد ممتوب..

اتمنى يجي احد يعلمهه الصح من الخطأ واحد ينتشله ويطلعهه من هل مستنقع القذر..

بس وين اذا هي عائلتهه كلهه فيطي قابل هي شتطلع نبي.

كلت خل اروح اراضيهه قبل لا يدك الجرس وكفت على حيلي وودنكت على جنطتي طلعت لفتي الي مسويتهه الي امي وباكيت العصير دالي..

وطلعت ادور عليهه بالساحه شفتهه كاعده جوه شجره بفيي بعيد عن الشمس مخليه كارتون بالكاع ووممده رجليهه ومنزله راسهه لحضنهه..

وكل شويه خصلات شعرهه لقصير تصير على عيونهه ووتوخرهه ورا اذنهه..

جبت كارتون ووكعدت بصفهه عاكشه وجهه وملامحهه ماتتفسر ودايره صفح..

همست : روح

مجاوبت ررجعت كلت : حبيبتي عمري انت..

روح : وسممم شتردين شكو لاحكتني..

جمانه : ولج ياحبي انت تدرين ماعندي غيرج من اول ابتدائي لحد هسه خامس ادبي واني ووياج واحد طلعتنه طبتنه دراستنه حجينه تتوقعين اني اريدلج الشر..

جاوبتني بأنفه : اي وشتردين هسه

تنهدت : اعذريني اذا قسيت وياج بالكلام..

روح : على نفسج عبالك متضايقه ههههه عادي حجيتي او ماحجيتي شسويلج.

تنهدت : يعني مزعلانه

روح :تؤ

خليت اللفه ووالعصير بحضنهه : اكليهن اليوم ماشفتج اكلتي شيء ولا تقربتي للحانوت..

دفعتهن : شكرا مجوعانه

ووكامت تنكت بقميصهه الابيض ووتنورتنهه النيلي ووراحت تركض زفرت نفس كلشي ولا زعلهه انتحر اذا ما حاجتني لو ابتعدت عني

والله اختنك اذا عافتني لو زعلت مني رغم هي طبعهه جاف وياي وابد اذا زعلت متسوي هيج ووتركض وراي حتى تصالحني
بس تموت عليه وودائما تكلي كومه عندي صديقات بس ولا وحده مثلج..

لحكتهه للصف كعدت على الرحله
خليت كف ايدي على ايدهه ووحجيت بقهر
: لج عوفي هالسوالف حبي والله حرام الجاي تسوينه ووداعتج مامنهه كل فايده بس اثم

حطيت رجل على رجل وبتعالي : اثميج جمانه متكليلي اذا هسه ما متعت نفسي شوكت امتعهه

: تعبت من الحجي وياج

درت وجهي عنهه اوف نهكلت واني احاول اقنعهه الصح من الخطأ وهي مثل المطي يطب منا ويطلع منا والله هي حبابه واني حيل احبهه بس تصرفاتهه تجبرني انفرهه مو مال عمرهه ماكو واحد اليضبهه.

امهه بوادي ووهي بوادي احسهه عايشه وحيده رغم هي بنص مجتمع ولو هو شلون مجتمع..
خطيه تحجيلي تكسر كلبي.

بس هذا ميبرر الهه افعالهه الشنيعه

خلص الدوام ووخليت جنطتي بكتفي ووطلعت حيل متحمسه اليوم ووبودي اركض ركض لان ناي اختي اليوم تجي تزورنه..

ووانه امشي بالطريق شفت زياد ابن خالي سلم عليه ووكال شخبار دراستج سلميلي على ابوج.

ضليت شويه احجي ويا وكملت طريقي وصلت وودكيت الباب نفتح َوتفاجئت بضي اختي الثانيه هم موجود حضنتهه : هاي شنو انت هم هنا

غمزتلي بطرف عينهه : اي حبي شلون ما اجي اليوم اهم يوم بحياتج ووالمفروض اني اكون موجوده
..

عقدت حواجبي بأستغراب نسيت اليوم شكووو؟
اخواتي ناي متزوجه دكتور اسمه تيمور وعندهم بنيه ووضي ماخذه ابن عمه لتيمور واصف ووهم عندهم ولد..

واخذتي الثالثه ووهي اكبر ووحده بعد اخوي احمد ايلول متزوجه عراقي عايش ب الخارج..

خليت ودخلت للصاله لكيت امي تحضر بالكيك والعصير وخابصه روحهه ناي مبدله وكاشخه..

عقدت حواجبي :هاي شكو?

ناي : لج عوبه امشي بدلي اسبحي صخمي.

عقدت حواجبي : اي ياعيني غير تحجيلي شكو

ناي :هههههه غير الناس راح يجون يشوفونج..

تذكرت هذا ابن عم ابوي ابنه مو جاي كاعد ببغداد وعايف العماره شايفني واني اروح للمدرسه ومحاجي ابوي عليه..

جمانه: ناي اني مموافقه اريد ادرس

ناي : دشوفي الولد اكعدي ويا وبعدين نتفاهم

هزيت راسي ب اي ووتمشيت لغرفتي سبحت ودخلت عليه ضي تكلي بدلي حيجون.

طلعت اتراك البسه خمطته من ايدي
: تطلعين الهم بتراك حتى عيب..

وراحت فتحت جنطتهه الي بصف جربايتي ووطلعت فستان وردي شيفون ووجوا بطانه..
وبي شريط اسود على الخصر ووشده على الركبه.

لبسته وومشطت شعري ووضفرته ضفيره راخيه مكيجتني ناي مكياج خفيف
..
وكعدنه ننتضرهم وصدك شويه وواجه باوعت عليهم من الشباك طبكن ثنين سيارات سوده ووبيضه عاليات نزل منهه رجال جبير لابس دشداشه ووعليهه ستره مرتبه وويا مره جبيره قصيره على راسهه عبايه..

وثنين شباب واحد منهم لبسه عادي قميص ووبنطرون ووعلى عينه نظاره شمسيه مشفته.

بس الثاني اناقته فول وومرتب نفسه على اخر حبايه ستره ماروني ووقميص وبنطرون اسود..

هو ضعيف ووطويل بس شكله حلو ووعيونه خضر المسافه من الشباك مو بعيده واكدر اشوف كولشي..

بلعت ريكي يمكن هذا اسعد اني حتى مشايفته
تراجعت ليوره ضي تخابر بزوجهه وبيدهه ابنهه
تهز بي لان يبجي.

باوعت الهه بنظرات توتر سدت الخط وواجت ليمي لزمت بأديه : شبيج حبي.

بلعت ريكي : خايفه

: من شنو اذا متردين الولد كلش عادي ابوي مافد يوم جبرنه على شيء..

هزيت راسي بـ اي

مسحت على زندي وحاولت تطمني بنظراتهه
: لعد لتسوينهه قصه واهدي وبيني نفسج طبيعيه..

زفرت نفس بهدوء طلعنه اني وياها جانو كلهم كاعدين بـ الاستقبال حشكت روحي بصف ناي بعد ماسلمت بصوت عالي..

الولد ابو الستره راساً صارت نظراته عليه ويبتسم
اكلني اكل بعيونه الي لونهن يخطف القلب عجيب
لا هو اخضر لا هو ازرق..

اني هم عيوني عسلي بيهن خضار وواضح بس مو مثل عيونه وجمالهن

رجع ضهره للتخم بابا ووكال بصوت عالي
: والله نورتونه ووشرفتونه جنه محتاجين هيج جمعه من زمان..

ابتسم ابن عم ابوي الي يصير ابو اسعد الي جاي يخطبني..

: فعلا صارلي هواي ماشايفك وونصدمت بيك ووبناتك الله يخليهن شمعات..

ابتسم ابوي واشر علينه ووحده وحده..
: هاي بنتي ناي متزوجه دكتور تيمور ووالي بصفهه ضي زوجه ابن عمه وجمانه ان شاء الله بنتكم وجنتكم..

خله ايده على صدره الرجال
:والله يشرفنه وويعلي مقامنه انه ماصدكت من كالي اسعد وكيفت والكاع ما ساعتني كتله ولك عينك ما طاحت غير عالصح ووبنات ابوهن ذني والنعم منهن ومن تربيتهن..

: الله يعزك

امه تباوع عليه من فوك ليجوه اشرتلي بأيدهه عود تعاي تحمحمت بفشل وتمشيت بخطوات بطيئه..

كعدت بصفهه ضلت تتلمس بشعري ووتبتسم
وتربت على فخذي..

رجعت جرت خصله من شعري نصدمت ووصحت
: اخ

ضحكت هي والكاعدين كلهم
: هههههه ردت اشوفن طبيعي لو صناعي عبن نسوان هسه ماكو بيهن وحده حقيقيه كله لاستيك

اسعد : لا مبينه البنيه حلوه ووطبيعيه..

خجلت حيل ونزلت راسي لحضني وحبست اديه

احمد اخوي جان كاعد
: ولك اسعد لا تستعجل انتظر تصير بالحلال وتغزل براحتك لا اكوم افلشك..

: ههههههه

تنفست بهدوء اشرتلي امي بمعنى كومي للمطبخ
ورحت جبت صينيه العصير والكيك ورجعت للأستقبال..

بعدني واكفه بالباب وواسمعهم يحجون..
: والله ياخويه ولد سلطان ماضن ناوينهن خير يعاينون النه والشر بين عيونهم..

اسعد : دخل بس يفكرون يحجون كلمه وعلي افرك حلك اكبر واحد بيهم..

امه صاحت : اسعد انت تسكت كله من وراك خطبت بنتهم ومانطوهه الك ضليت َمعاديهم وتسوي الهم مشاكل..

ابوي كله:مايصير هيج يابني ماكو قسمه غير تستهدي بالرحمن وتعوف المشاكل..

اسعد : عمي الموضوع اكبر من هيج مو علمود مره بس همه مشترين الطلايب

حجه الولد الي اجه وياهم بتنهيده
: همام كل يوم دازلي تهديد ويكلي ابنكم اذا ضل بالعماره نفجره..

بابا عقد حواجبه :منو همام؟

: ابن سلطان اصغر واحد بين اخوانه همام الدين عمره ٣٢ سنه قبل جان صديقي بس هسه من صارت العداوه كام مايباوع بخلقتي..

استغربت هاي شكو وشو اهلي يدرون وساكتين معقوله قابلين ينطوني لهيج واحد مشكلجي..

تغيرت نظرتي علي ميه وثمانين درجه دخلت وبيدي الصينيه امشي وانطيهم لحد ما وصلت ليمه وقدمت اله..

وبالصدفه اجت عيني بعينه اسمع كلام وواشوف واقره يكول النظره الاولى اذا رجفت المقابل ووموعت كلبه ووفقدته عن العالم المحيط ف هذا الحب الاول هذا النصيب.

بس ماشفت كل هذا من باوعت بعيونه صح اجتني رهبه من قوتهن وولمعتهن وخجل بس ما
سرحت ولا فصلت..

رجعت لمكاني وهمه راحو كالو باقين بغداد يومين ونريد الخبر منكم باجر..

ابوي وصه امي تحاجيني ووانطيتهه رفضي ماريد اكمل دراسه ووبعد عمري صغير كالت بكيفج اني هم مارتاحيت للولد مشكلجي وامه مدري شلونهه

وخابرناهم ثاني يوم وانطينه الرفض ابو زعل وكال جنت حاب تصير بينه قسمه.. بس الله يقدم الي بي الخير
. َ.
وجان بيومهه عطله ووداومت ثاني يوم اول ما وصلت للمدرسه لكيت روح ترجف وخايفه ووجهه مكلوب اصفر..

نصدمت اول مره اشوفهه بهالحاله : شكو حبي؟

روح : لج اجه واحد البارحه دخل علينه تكول عاصفه وحتلتنه وعلى اساس هو ابن عمي..

محد سلم من لسانه لا اني لا امي لا رجل امي كلنه بهذلنه ورزلنه وليش مادري وسحلني يريد ياخذني ويا للبصره يكلي حبوبتج وعمامج منتظرينج..

بس اني وكفت بوجهه وماسمحت اله..

عقدت حواجبي : وهسه شنو المشكله

: لج يخوف يخوف وميخاف من اكبر واحد بحيث بصيحه ووحده خلس امي ولج هاي اني الي اكبر رجال اوكعه بنظره خزرته عطت بوجهه ماكو يكلي وولي مالي حجيي وي الزعاطيط.

: شكده؟

: ماعرف يمكن عمره ب الثلاثين جمانه خايفه ياخذني للبصره انتحر والله ماريدد عفيه ماريدد والمشكله أجر بيت بصف شقتنه وكعد بيهه..

: شسمه

ذبت حسره طويله ووخلت ايدهه على صدرهه بتعب : قسور

لزمت خصلات شعرهه ورجعتهه خلف اذنهه
: لتهتمين حبي قابل شيسويلج؟

: اخاف يطول وويعرف بعلاقتي بمؤمل لان مبين مينضم علي شيء ينبش جد جدي..

: مشكلتج هاي

دفعتني بغضب هههه حاره الدنيا بوقتهه كامت تهفي على وجهه ومايعه روحهه هي هاي متتحل تكول نستله بس تخلينهه عشر دقايق ب الحر تموع

خدودهه نكلبن حمر من الشمس ووعركت ركبتهه نترست قطرات مي وورغم كل هذا عيونهه ونظراتهه الصلفه ماتغيرت..

شكد تعجبني شخصيتهه رغم عندهه هواي اخطأ بس ما ينزل راسهه اكبر واحد ووعندهه كبرياء فضيع وفارضه شخصيتهه ع الصف كله.

بحيث اني اتباها بصداقتهه خلص الدوام ووطلعنه اول معبرت الشارع صار بوجهي اسعد واكف منتجي على سيارته على بنيد ووبيده نظاره ََ

تقرب يمي : شلونج

: الحمدلله بخير

: احم عندي سؤال وحقي هذا طبعا

: اسأل

: ليش رفضتيني

: علمود دراستي وو..

: اني اخليج تكملين دراسه بس اقبلي جمانه لو ادور بغداد كلهه مالكه مثلج دخلتي كلبي ووتربعتي بي.. شتردين اسوي الج بس أمري.

نزلت صدريتي بخجل ووماعرف شحجي جنت شبه مقتنعه بس متردده من سمعته..

: ان شاء الله خير

: يعني توافقين

بلعت ريكي : ماعرف

: هههههه انطيني كلمه وحده

: الله كريم

: جمانه اني حبيتج ودخلتي كلبي ووالله ادللج وومايرد السانج شيء اخليج فوك راسي بس اقبلي.

ابتسمت : مو..

بعدني ما مكمله جان ينسحب من ياخه قميصه من ورا وينشمر بالكاع وينام فوكا واحد يضرب بي ويصيح : ما اطلع ابن سلطان اذا ما شكيتك وصلتين.. يتبع
..
بارت تعريفي بس 😍

لتنسون التاك وشاركو القصه وي اصدقائكم

🖤🖤🖤🖤🖤
ايزابيل