رواية لمْ تكُنْ خطيئَتُنا الفصل الخامس والأربعون 45 - بقلم نورا ناصر

#لم_تكن_خطيئتنا
بارت 42 والاخير
نورا ناصر.

سمية ... بعد سماعي جملته الاخيرة گعدت على الجرباية وكل مشاعر ماعندي ..

گتله .. روح گوول لابوك هالحجي
خووش .....
خلي يطلگنا انا لو عليه اطلك منك اليوم گبل باجر.

أمير .. انت ليش ماگتيلي هالحجي حتى اكول لابوي وجان ماتزوجنه اعترافج هذا جاي متأخر .

گمت على حييلي گتله شبيك تخربط بالحجي
احنه جنه منفصلين وهو خاطب لو ماعندك علم.

جاوبني:  اي حقه ينفصل عنج انت منو يتحملج .

صحت بوجهه دوولي .. خمطت شالي خليته على راسي وطلعت من الغرفة .. نزلت جوه.
دكيت باب غرفة عمه زينب ودخلت شفتهه گاعدة على المندر الي بالارض وتخابر.

باوعتلي واشترلي اكعد يمها .. مشيت الها يائسة ومحطمة
مليت من حياتي ..

كعدت بصفها خليت راسي بحضنها ظلت تلعب بشعري بايدها والايد الثانية بيها التليفون وتحجي.

اخذتني افكاري لبعيد تمنيت عمة زينب مكان اشواق وامان مكان امير .
ليش كل الي نتمناه مايتحقق ..
زين اذا امير صار رجال وكف بوجه ابو وتم الامر وتطلگنا انه وين اروح اشو حتى بيت ماعدنه.
احس نفسي غرگانه ببحر من التفكير وموجة تودينه وثانية تجيبني ..
شيخلصها يربي .. غمضت عيوني بشدة
رجعت لايامي ويا والي استمرت اشهر
وخلصت مثل الحلم.
تمنيت لو مامخلصة ..
تمنيت الي انا بي هسه كابوس وعلى لحظة اصحى منه واخلص ..

خلصت عمة زينب من مكالمته .. طلت بوجهي
گالت:  شبيها ام لسان مالتي اليوم.

وصلت المرحلة فقدت نفسي القديمة الكتومة والي ماتحجي الي بداخلها ولاتبرر.

بلحظة حجيت الها كل شي ..

انصدمت وتفاجئت .. گالت ياابنيتي الحب مو كل شي تره هاي انه گدامج وعاينيني زين اتزوجت عمج على حب وشوفينه هسه صفينه كل واحد ينام بغرفة انت حاولي تكسبين امير وتقربينه الج .

: بس ياعمه امان مو مثل عمي ابد وانه وامير مستحيل نتوالم.

: ماسامعه ثلثين الولد على خاله ..

: اي سامعه.

: لعد ليش عفتي.

: ماجنت متوقعة راح يخطب بسرعة هيج وثانيا انا سمعت اهله بهاي اذني يحجون عليه بساعتها كلش تأذيت وتحطمت نفسيتي يمكن غلطت وطلعت الحرگة بي وتصرفت بأنانية ويا .

گمت من حضنها لزمت ايدها وحجيت بتوسل وياها

عمه اريد اتطلگ مو هاي الحياة الي اريدها عفية

: شبيدي عليج انا ياعمري وهم جاي اشوف ابني مامرتاح وهم مابيدي عليه شي. 

انتكيت على الحايط حضنت رجليه لصدري.
احس بضياع والم موطبيعي،وماادري شراح يصير بيه بالايام الجاية.

گتلها عمه بلكي باجر توديني لبيت اخوج
اشوف رقية وفاطمة ..

گالت غالي والطلب رخيص ..

: الليلة راح ابقى هنانه يمج انام ..

: ببطن عيني بس كم دوب ياعمري كافي اقنعي بنصيبج ياعيني.

: عمه لا انه ولا هو مقتنعين.

: وهو هم انظلم سودة عليه.

: هو مايحرك نفسه والا وين اكو بنية تنجبر على الزواج بهالوكت بعد مو ولد ومسموحله يسوي كل شي بمجتمعنه.

: انت مو شفتي عمج من يعصب؟

: اي.
:لعد سكتي ولاتلومينه بعد ..

... يوم ثاني الصبح وجان الجو حار اخذتني عمه ورحنه لبيت مناضل .دخلنه سلمنه عليهم بوست الاطفال رحمة وفراس الصغير

رحنه للمطبخ  نساعد فاطمة بالطبخ
انه وعمه زينب .. ورقية تحوس وتنضف كالعادة

گتلها فاطمة انه اريد اتطلگ ومصره واريدج وياي انت مو گلتي مااتخلى عنكم.

اجت كعدت يمي كالت وانه على وعدي طالما الطلاق مايضرج ويريحج انه وياج بس عمج شوون؟

: نتطلگ ونخلي امام الامر الواقع وهو من كيفه يسكت.

زينب :.. شگلج عمج يسكت؟ سابع المستحيلات ..

سمية ..  خلي ينباع البيت وناخذ حصصنه ونأجر او نشتري بيت على گدنه ونگعد بي بدون علم عمي  ومانگوله وين گاعدين وبعدهه نتطلگ علما يمر وقت وهو يقتنع وينسى ..

فاطمة .. انه وياج سمية وعيوني الج بس شون اذا عرف مكانه عمج.

: هسه انتوا شبيكم خايفين منه شنو ماكو زلم توكف بوجهه والله انه خلصت طاقتي وبعد مااتحمل ياعالم اريد اعيش حياتي بعدني ببداية العشرين واحس عمري بالسبعين ومسجونة بسجن ماجاي احس بطعم الحياة ابد شنو ذنبي عايشة ويا واحد يكرهني واكرها.

زينب .. يعني شنو تردين تسوين الماسوينا احنا

: اي اشتكي عليه عند الشرطة واذا ماسوو حل ائجر جماعة اخليهم يكتلونه لو يدعمونه يكسرونه ..

زينب .. يا صخام ولج سمية صدك تحجين هذا عمج والظفر مايطبع من اللحم  شون تسوين هيج انت مهما يكون هو يريد مصلحتج.

:والله اطلعه للظفر واگطمه هم بعد على هالعم هذا. 

واحنا جاي نتناقش طبت ام فاطمة ووياها الاء جنتها سلمت علينه ..

عاد احنه غيرنه الموجه .. تشكلت وظلت تساعد وتسولف وتضحك ويانه الي عرفته مأجر الها مناضل شقة قريبة من هنا ..

صبوا الغده .. گعدنه على السفرة ..
وكعد مناضل ويانه عن يمينه الاء وعن يساره رقية
ظلن يوكلن بي صاح بيهن ولجن اندبلت بطني منجن لاتخلوني اطگ الثالثة ..

ظلوا يضحكون  .. ضحكت وياهم بس ماجاي احس بطعم السعادة بالضحك فعلا الي يضحك مو شرط سعيد.
تونست وياهم ضحكنه وسولفنه ...

صار العصر طلعنه منهم واحس الكل عايش حياته بس انه ميته .. حتى فاطمة صح ابوي مات وعافها بس هي هم ملتهية ويا ابنها تجيبه منا تودي منا تبوس بي وتلعبه وكل شوي تبدله شكل ..
امومتها راح تخلص وراح ترجع لدوامها وتخلي يم رقية وامها ..

رقية هم فرحانه وي بنتها وويا زوجها والبيت الي كاعدين بي هم كله الها وكله نضيف وكامل ومرتب تحتار شنو تنضف وشنو ترتب بي ..
مناضل مأثثه الي من الفوك للجوه .. ويحبها وكله يكول اكعدها عن يساري على صفحة القلب لأن هنا مكانها ..
زوجته حققت غايتها وكاعدة بشقة مثل ماطلبت تريد تكعد وحدها ومرات تجي يمهم وعلاقتهم صارت حلوة وواحد متقبل الثاني ..

گلت لعمه زينب خلي اروح اشوف صفا بدربنه البارحة من رجعنه منها جانت تعبانه كلش.

كالت ميخالف .. دخلنه الهم سلمنه عليهم وگعدنه
صاحتلي صفا رحت يمهه بالمطبخ تسوي العصير
بقت عمه زينب يم عمه امتثال ..

گتلها هاا شونج بعدج تعبانة؟

گعدت على كرسي ميز الطعام
وخلت ايديها على خدها ودموعها نزلت

كالت وصوتها مبحوح بالبجي

والله بعدني ليل نهار ابجي واسلام محتار بيه
متكئبه وبس افكر بفراس عبالك البارحة مات

: حاجي اسلام كليلة خلي يوديج القبره زوري بلكي ترتاحين.

: خاف يعصب عليه مالي خلكه فوك ضيمي وين اروح ووين اوليي.

لا مايعصب لازم يعذرج انت بحالة استثنائية ومشاعرج مرهفة وجياشة لان حامل وهيج راح اتعبين وتتعب نفسيتج ومو زين على البنوتة

: بس اخاف! !

: لاتكولين اخااااف ابد حاجي اليوم واذا رفض او زعل شراح يسوي خو ماراح يگص راسج.

اجاني صوت عمه زينب ييله سمية لاتتأخرين ورانه رجعه للبيت ..

اشرت لصفا يلله لان من الصبح طالعين خاف عمي يحجي علينه.

مسحت دموعها واخذت العصير ورحنا يمهم ..

كعدنه شوية سولفنه وبعدين رجعنه للبيت ..
شفنه عمي كاعد بالهول .. سلمنه ودخلنه

صاح عليه سمية روحي صبي جاي
مدري منو كايله انو انه چايچية ..

رحت للمطبخ حميته وصبيته ورجعت للهول
شفت سمير ابنه الزغيرون طب للهول
يمشي ويعدل بشعره صفنت عليه هذا شنو المتغير بي ..

حطيت الجاي يم عمي .. لحظات وعمي صاح على سمير
تعال تعال هاااي شنو وشمسوي بشعرك ..

ضحك سمير وظل يباعد شعره عن وجهه مثل البنات
كله يابه سرحته وصبغته يم الحلاق ..

انتبهت عليه صدك شعره مصبوغ لون چكليتي ومسرح ونازله گذلته لحد حنكه ..

اندار عمو سلمان لزينب .. كال الها هي هاي خلفتج
هم فرحتي من كالولج اجاج ولد !! !!

رد باوعله گله انزع حزامك وانطينيا 

باوعت لبنطرونه بنفخه وحده يوصل للركبه

جاوبه مالابس حزام ..

گام على حيله ولزمه من كفشته .. وصاح على حسن ابن مؤيد يناوشه المگص وذا يصيح ويتوسل وعمه زينب تصيح عوفه عوفه هو يزينه ..

اخذ المگص وكصكصه كله .. وذاك بعد شويه ويصرخ لو ما الخوف جان شگ هدومه ..

رحت للغرفة واكول سليمان يراد ازين شواربه مره ثانية لأن مايجوز من سوالفه ..

صفا ..
بعد ماطلعت سمية من يمنه تشجعت احجي لأسلام وظليت اخطط بداخلي شنو احجيله ..
وشنو اكله .. وهيج اقنعه.  ..

خلصت تحضيرات العشا ..
صعدت فوگ .. سبحت وطلعت. صليت المغرب
وخلصت .. لبست لبسة حوامل  بنفسجية طوخ قماشها فانيله بارد ربع ردن وبيهه خط ابيض ع الردانات .. طولهه فوك من الركبة عليها كصة جوه الخصر ومن جوه عريضة .. لبست جواها ستريج ابيض لحد الركبة .. تجنبا  لنظرات عمتي تباوع علية من اللبس شي قصير وتدور وجهه مثل المعاجبهه.

نزلت جوه احضر العشا على السفرة .. وافكر شون افتح الموضوع ويا اسلام .. شفته دخل بس شفت عيونه خفت وتراجعت عن  كل مخططاتي ..

واكفة على السنگ ابتسمت اله بخوف .. اجه حضني من وره .. وباسني برگبتي...

گال شونها ايوته .. ؟!

انداريت عليه باستغراب

گتله منوو ايوته هااي ..؟!

اخذني من ايدي كعد على الكرسي وكعدني على رجلينه.

كال ديري بالج لا تمرديني ..

ضحكت كتله اصلا مازاد وزني هواي هسه انا ببداية الشهر الخامس ووزني 68 ..

رد .. لان كاضيتها بس بجي وماتاكلين واموته ايوته من الجوووع ..

: بس انه مااريدها ايات اريد اسمها نبأ ..،

رفع حاجبه گال شمعنى نبأ ..

ارتبكت منه ومن نظراته گتله عاجبني ..

دنگ راسه رفع ملابسي من يم رجليه
فوت اصابعه بالستريج من يم ركبتي
كال هاي شلابسة ليش تحصرين بطنج  بالستريج
هسه تأذينها ..

طبت عمتي بسرعة طفرت من حضنه ..
گالت على كيفج على كيفج بنيتنه  ابطنج هسه شصار بيها.

اسلام : .. اي والله هم حاصرتها بالستريج وهم تگمز بيها صفا تره بنيتي اريدها.

باوعتله وضحكت. ورجعت كملت شغل ..

تعشينه وخلصنه رحت اغسل مواعين وبقى  گاعد يم امه ويسولفون.

خلصت انا ..  واريد اصعد فوگ صاحني تعاي گعدي يمنه ..

حجت عمتي .. لا خليها تروح تصعد تتمدد خطية تعبت.

كال خليها تتمدد هنانه يمنه وراح للغرفه الثانية جابلي مندر وكعدت عليه ومديت رجليه

اجه يمي گال تمددي لزمني من اكتافي ومددني يباوعلي ويغمز بتك عين ويعض شفه ..
ضحكت اله ..

گعدت يمهم شگد يسولفون هو وامه ..
وانا فكري يم ذيج السالفة شلون راح اقنعه يوديني ازور قبر فراس.

بقيت يمهم اذا سألوني اجاوب اي او لا
واذا ضحكوا اضحك وياهم مثل اطرش بالزفة ..

بعدها نعست عمتي وراحت نامت ..
اخذني وصعدني لفوگ

گال صايرة ثگيلة راح اسويلنه غرفة جوه
لان مابيج تنزلين وتصعدين. ...

وصلنه للغرفة گال يلله نزعي الستريج ..

ضحكت گتله نشبت ويه الستريج
اخجل من نظرات امك ولبسته ..

تدنه يمي خله ايده على راسي
گال صفاوي لازم تتعلمين
بالليل نگعد يم امي خطية تضوج وحدها
مو رأسا تصعدين فوگ ..

هزيت راسي بقبول گال يلله بدلي ..

بدلت ورحت يمه ..
هو متمدد ومخلي ايد جوة راسه والثانية
بيده الموبايل ..

عافه ولزم ايدي .. حسيت محتاجه اكوله بهاللحظة
خليت ايدي على حلگي وظلت الدموع تنزل ..

گام من نومته .. وحضني ورجع نومني على ايده
دفنت وجهي بصدره وايدي على عيوني وشهگت
بچي ..

ظل يسكت بيه ويتوسلني احجي
صفا بس احجي مقصر وياج انا! !

رفعت راسي اباوع لوجهه گتله ماتضوج اذا اكولك ..

بس احجي شبيج يطبني طوب انه مو سبحتيني بدموعج ..

رفعت جسمي وكعدت على جرباية وهو بعده متمدد وحجيت اله كل شي ..

وانا مدنگه. كعد ..مد ايده خله اصابعه جوة حنكي  رفع راسي .. وكعد يحجي ومركز عيونه عليه

گال ..  صفا انه عقلي جبير الرجال خير وطيب وانا هم عاشرته جان جيرانه وصديقي
هسه مات والله يرحمه ويوم من الايام جان زوجج وبالحلال ومابيها شي اذا تزورين قبره .. انا مؤمن بانه المراه بالاخرة الها اخر ازواجها بالدنيا وانت الي بالدنيا والاخرة
انت ماي وانا گاع وبدون الماي الگاع تمووت
انت حب طفولتي ومراهقتي وشبابي وحياتي
انت الي صبرت علمودها واعتزلت كل النساء.

شهگت لا هي ضحكه ولا هي بچية ..

حضني وبوسني
گال مو الطريق طويل وخاف تعبين وانت حامل؟

گتله انه هسه تعبانه اكثر ..

يوم ثاني وداني للمقبره .. زرنا قبر ابوية غسلنا بماي ورد
وكعدت انه اقرا سورة يس ..

وهو توضى ببطل ماي وصلا ركعتين
يم القبر ..
ورحنه القبر فراس وهم نفس الشي
راح اسلام  ظل يصلي ..
وانه ظليت اقرا قرآن.

خلصت وحاجيته
گتله انه جايتك ووياي بنتي الي گتلي عليها

رجعنه للبيت ارتاحيت شوية گلي سميهه نبأ انت الي راح تطلگين بيها وتولدينها والحمل الاكبر عليج

خلاني اطمئن على امي بعد بتر ساقها بعملية جراحية بسبب مرض الگنگري
ومتواجدة يم زوجها بغير محافظة

وهيج مرت الايام يوم مر ويوم حلو
محد مرتاح من هالدنيا
بس نگول الحمدلله رب العالمين ..

..

سليمان: - اگوول زنوبة زوج النعل هالايام اشوفهم ينامون كل واحد بغرفة مووو؟

زينب: - والله دنيا مو جنت تصيحلهم صنف المهندسين.

:- صنف القنادر طلعوا  عبالي اوادم والله روحي صيحيلهم يلله ..

سمية .. مثل ما صاح النا رحنا ..
نزل امير من فوك وانه طلعت من غرفة عمة زينب

وكفنه اثنينه مقابيله ..

هو كاعد مترهي على القنفة.
كال خيركم شصاير وياكم شو كل واحد بغرفة.

امير باوعلي وجر حسرة شكبرها
ونوب باوع اله .. گله يابه انه مااريدها واريد اطلگها

صاح بي انچب زعطوط الفاهي الاثووول.

امير .. بصياح گتلللك ماااريدها ..

جان اكو فوانيس مال فيكة وزينة على الطبلة
تناوشهم عمي وشمرهم عليه .. وحدة منهن طخت بزندة. ..

ظل يصيح حيييل راح اطلگها وشتريد تسوي سوي وانه طالع من البيت وخلي بيتك يفيدك.

وسواها صدك ويريد يطلع من البيت وركض وراه عمي مالحگ عليه راح يركض ولزمته عمه زينب وتهدأ بي دفعها واللتموا كل الي بالبيت.

رجع باوعلي گلي وانت خاتون خو ماعندي اضافة بعد. 
گتله انت ظلمتني بهذا الزواج خلي يطلگني عيشتيش هاااي.

بصياح .. تردين تديحييين هاا تردين تصيعيييين.

گتله بصياح انت ظالم ظااالم ..

اجه يريد يضربني وكفت بمكاني ماحركت ساكن خلي،شما يسوي يسوي هنا وكفت الحياة عندي ماعاد جسمي ذا اهمية الي.

صارت بيني وبينه عمه زينب گلتله لا خطية يتيمة عوفها

كتلها عمه عوفي خل يضربني بلكي يرتاح حتى يخليني اتطلگ ويطلق سراحي.

صاحت بيه عليج بروح ابوج سكتي.

وهو مستمر يتقدم وولده واكفين يتفرجون
والجهال يصرخون.

وبيني وبينه عمتي تريد توخره وتدفع بصدره وهو يخزرها ويصيح بوجهه وخري وخري
ماترضى.

سحب عمتي شمرها بكل قوته وبساعة عصبية
لزگهه بميز التلفزيون صرخت ووكعت.

الكل راحولهه يركضون وانا من بينهم وعمي
نسى كل شي.

اشوف الدم يكت من راسها وفاقدة

بلحظتها ظل عمي يدگ على راسه
ويصيح زنيبه زنوبة ..

دموعي  حجبت عني الرؤيا
ماتستاهل احبها جانت جاي تدافعلي
ماردتها تدافعلي انا ردته يضربني

سمعت ولده يدعوون عليه ولأول مرة
اخذوها للمستشفى وماخلوني اروح وياهم.

متت خوف من عمي خاف يرجع يأذيني
ويطلع الحرگة بية ..
خابرت صفا ارجف وابجي ..

گالت راح نجي عليج انه وإسلام
لبست وحضرت اغراضي وطلعت انتظرهم.

اجو اخذوني وطلعنه ..
وبس ابجي على زينب وعلى حضي...

تأنيب الضمير عذبني لو ساكته
جان هو هم سكت عني لو شاردة للغرفة
لو لو ولو لو زرعوها طلعت ياريت وعلى هالمنوال
راح يخلص العمر وماشفت منه شي حلوووو ...

ظليت يم صفا .. وايناس اجت ويانه بطلب من رجلهه
اسلام يروح ويجي من المستشفى يجيب النه خبرها
كال تعبانة كلش خياطات براسها وايدها مكسورة
وتسأل عنج.

كتله اريد اروح اشوفها بس اخاف من عمي.

كال ولدها نقلوها لغير مستشفى مايدري بيها هو
من طالع من المستشفى للبيت يرتاح
ناقلينها ومرت مؤيد رايحة لأهلهه
سمير مودينه يم بيت جده ..
وكلهم مقاطعين سليمان.

رحت زرتها شبعتها بوس بگد ماجانت تبوسني واضوج.
بجيت يمها گتلها كله بسببي لساني عم عليه.
گالت ابقى احبج واحب لسانج.

طلعت من يمها .. خابرني امير
كال حتى نتطلگ! !!

گتله يوم سعيد وعيد

گال اذب وراج 7 حجارات.

گتله اسوي حفلة طلاق واركص واغني.

گال اذبح طلي ..

گتله ياااا راح تذبح روحك ..

گال انجبي وتحضري ..

رحنه للمحكمة گاعدين ننتظر دورنه

گتله  الله هيج واگعد الصبح ومااصبح بوجهك

گال الله وانه انام على جربايتي طول بعرض وارتاح منج ومن صياحج .. مامصدگ كرصيني كرصيني.

كتله كوون بطابوگه هسه.

حصلت على طلاقي .. وارتاحيت
احس انولدت من جد وجديد ..

بقيت يم بيت اسلام .. بيوم سمعنه عمي اجه يصيح اخذتني صفا وصعدنه فوگ وقفلنه الباب عرفت صار عنده علم بالطلاق ..

اسلام وكف بوجهه وهدأوو شيريد يسوي اكثر.

گال الهم  ابيع البيت وماانطيهه حصتها.
ويهدد ويغلط وووو ...

بقيت فترة اخاف اطلع ظليت محبوسة

وامير مسافر غير محافظة عند صديقة
حسب قول اسلام ..

مرت فترة بعد الطلاق .. فاطمة أجرت شقة يم اهلها  واخذتني يمها ..
بعدها شفت اتصال من رضوان .. جاوبته

سألني اذا محتاجة شي ..

گتله اريد اشتغل ..

گال محتاجة فلوس انه ادزلج.

لا مامحتاجة بس اريد اتعلملي شغلة مااريد اصير عالة على احد.

كال ميخالف اشوفلج ..

ورة ايام رد خابرني گال اكو شغل بمذخر ادوية اذا تردين.

گتله ميخالف واجه عليه وداني واشتغلت ..

شغل متعب ابقى بالساعات اسفط بالادوية وغير الفرة على الصيدليات حتى اتفق وياهم بتوزيع الادوية كمندوبة ..

مرات ارجع للبيت ظهري واكتافي يوجعني
بس اللعب ويا فراس الصغير ارتاح ..

عمي ماتركنه يومية تهديد ووعيد
بس اخر فترة سمعت بي مريض.

كل ولده تاركينه وحتى عمة زينب
وكاعدين بيت وحدهم وهو تاركي وحده

بدأ الدوام وبلشت اداوم مرحلة ثانية الي ماكملتها..

جمعة وسبت اشتغل بالمذخر او مرات مندوبة على الصيدليات  ..

فد يوم مطر والمغرب خلصت شغل
طلعت من الصيدلية.راح اتبلل ..

لفيت الكوت زين .. باوعت قيطان حذائي مفتوح
الارض كلها ماي ..
دنگت اشدهه .. حسيت انحطت مظلة على راسي
اجاني عطره حسيت بي .. باوعتله انترست عيوني دموعي لااراديا بجيت.

‏"كيف أخبرك أنك فرصتي الأخيرة للنجاة، وأن حبك قابعٌ بي، لا نهاية له ولا خلاص، وأنك الأمان لشخصٍ مضى طوال حياتهِ قلقًا، وأنك ضياء روحي وكل أشيائي، وأن يديك حضن يحول بيني وبين أحزاني، ولامنفى منك إلا أنت."

حسيته بلع ريگ .. كال نحجي؟ 

هزيت راسي اي بس اكول للسايق ..

رحت للسايق فتحلي صندوگ السيارة

خليت كارتون الادوية ..

گتله روح انت راح اروح ويا ابن عمتي.

گال ماشي براحتج ..

رحت امشي باتجاه امان بهدوء ..

واخذني للسيارة .. دخلنه ..

گتله شعجب جيت جاي تصالح اهلك ؟

باوعلي گال لا  اجيت اشوف خواتي اهلي خذلوني بما فيه الكفاية بس اخواتي مالهن ذنب.

شوكت تتزوج ..

فسخت

ياايا والبنية شنو ذنبها

تعرف احبج خواتي حاجين كدامها ومية مرة كتلها اني اعتبرج اختي ومن راحوا امي وابوي يخطبوها وافقت شبيها غبيه لو ماعدها عقل!

حرك السيارة

كال اجيت اشوف وحدة مجنونة ماادري تحس بيه ماادري لا.

شون عرفت مكاني هنا.

تجيني اخبارج اول بأوول ليش تعبين نفسج وتشتغلين لهيج وقت والدنيا ماتتأمن.

شيريد يصير اكثر من الي صار!

لاسمية لاتگوولين هيج بطلي واني ادزلج فلوس شكد ماتردين.

مااريد فلوس من احد اريد اشتغل وبس اريد اثبت للكل بانه انه قوية ومحد اله فضل عليه.

اعرف انت قوية انت بمية رجال ..

وصلنه يم الشقة وگف السيارة .. الدنيا ليل وفاطمة تخابر گتلها جاية ..

اندار علية گال اني باجر مسافر

دنگت .بجيت. رفع راسي گال اشر على اوردته الي بأيده
كال باعي هنا مايجري دم هنا انت تمشين مكانه

اشر على صدره كال انه مااتنفس هوا اتنفس حبج

زدت بالبجي .. لفني من اكتافي وخلاني على صدره باسني على راسي ..

لزمت بملابسه حيل وبجيتتت ..

گال اريدج قوية اقري زين ديري بالج على نفسج ولو ميحتاج اوصيج.

هزيت راسي اي اي ..

گال احبج مرة جاية راح اجي بضروف احسن.

يريد يبوسني على خدي وخرت باوعتله
كتله لازم انزل .. كال اوكي وضحك ..

كال بس اوصل لتركيا اخابرج
ودعته ونزلت ..

لكيت فاطمة غاديه نار عليه
كتلها لاتخافين ماكو شي

راح ادخل اسبح
دخلت سبحت وطلعت

دك تليفوني رضوان
وصله خبر ماجيت ويا السايق
وظل يحقق وياي
كتله جيت ويا امان
وسديته ..

بعدها ..

خابرني امان من وصل تركيا ..

استمرت اتصالاتنا رجعنه مثل اول بس اكو خوف  ومااعرف وين بعد راح تودينه وتجيبنه الدنيا ..

انتهت .. القصة حقيقية وان شاءالله قريبا اكملها للاخير 
تحياتي الكم 💜