رواية لمْ تكُنْ خطيئَتُنا الفصل الرابع والأربعون 44 - بقلم نورا ناصر

#لم_تكن خطيئتنا
بارت 41
نورا ناصر.

سمية .. ظل يباوعلي ونظراته تكولي ماتصيرلج جارة

بكلبي كتله انت شعليك ..

صد نظراته مني .. واللتفتت لأمير گال والله اني مجاي بسيارتي لأن زيارتي قصيرة هنا كولش
بس هسة ائجر تكسي واوديها للبيت ..

وراح للشارع يباوع على السيارات ..

تقربت من امير وندسته بكتفه نبتت اصابعي  .

گتله بصوت ناصي انه اعلمك من نوصل للبيت ..

اندار عليه بس وجهه وايديه مثبتهن على البنيد.

گال ماتخوفين چلبي ....

باوعت لامان يباوعلي ودار وجهه ..

ظليت اراقبه .. أشر لتكسي وگف اله
حجه ويا شوية وتالي باوعلي حطيت عيوني بعيونه هالنظرات استمرت لحظة وحدة بس حجت عن الاشهر الي ماشفته بيهم حجت حب ضايع  عتب يوجع  اشتياق يذبح ..

أشرلي  براسه وفتح الباب الورة مالة التكسي.
رحت امشي بخجل وفرح ممزوجين ..

دخلت وهو سد الباب .. راح حاجه امير
وبعدهه رجع صعد بالتكسي ..
وحركت السيارة .. تمنيت اروح ويا لاخر الدنيا
بس كون ويا ومايهمني شي ثاني ..

حركت السيارة .. انه كاعدة وراه مباشرة
ظليت اباوع اله بالجامة .. باوعلي شافني
لبس النضارة .. گلت بقلبي ايا خبيث ليش تحرمني
نظراتك .. ليش تمنعني من الحجي وياك على الاقل بلغة العيون.

بس احس نظراته تراقبني .. گمت تدنيت شوية حتى لايباوعلي .. مدام حرمني من عيوونه انه احرمه مني.

وصلنه للبيت ..بس تمنيت مااوصل تمنيت تطول هالمدة الي بيها ويا ..

نزل قبلي وفتح الباب الي ..
وراح يمشي قبلي .. دخل من باب الشارع للحديقة
بدون مايحجي ولا كلمة ..

الوقت مغرب والظلام حل ...
معظم ارجاء الحديقة ظلمة وشوية بيها ضوه ..

يمشي گدامي بكل برود .. مثل قالب ثلج
نرفزني كلش احس راح انفجر ..

تقربت منه بسرعه لزمته من زنده
انفجرت بوجهه بس احاول مااخلي احد يسمع
گتله انت شنووو ماناوي تحجي شييي؟ ؟

وگف ظل يباوعلي واحنه قريبين من بعض كلش
رفع شعره ليفوگ وجر حسرة قوية حيل.

وجه نظرات قوية الي .. گال شنو تردين اگولج يعني اباركلج ع الزواج مثلا؟ ؟

: اي وليش ماتباركلي انه مو اجيت لخطوبتك فرحت  وباركت الك شمعنى انا لو انه اقوة منك وماتكدر تسوي مثلي.

: هه يعني شنو قابل انتصرتي عليه انت لو شنو الموضوع؟

: اي اظاهر  انا اقوة منك واكدر اواجه كل شي بعكسك تماما ..

ضحك باستهزاء .. گال سمية تره اني اعرُف كُل شي.

انصدمت باوعتله گتله شتقصد ..

اندار وراح يريد يمشي.. مديت ايدي  لزمته من زنده
كلت احجي شنو تعرف؟

ضرب ايدي باطراف اصابعه ويحجي بعصبية كال ديري بالج تلزميني مرة ثانية.

ويلله امشي كدامي اروح اسلم على خالو واطلع
لا تأخريني ..

وراح قبلي ..
حجيت بقلبي
من خلخالة الخلخلت عظام خالك ..

هذا شنوو يعرف معقولة يدري مابيني وبين امير شي ..

خلاني بدوامة من التفكير وراح وانا اراقبه الى ان طب جوه ..

امشي وافكر الى ان دخلت من باب المطبخ وصعدت الغرفتي .. بدلت ملابسي ..
والتفكير مسيطر عليه يجي امير ويصير خير ..

نزلت جوه شفته گاعد يم عمي بالصالة
احتاريت بين اروح اگعد يمهم وبين لو اروح للمطبخ.

قطع افكاري عمي .. من شافني گال سمية روحي صبي جاي ..

گتله صار ..

رحت للمطبخ شفت قوري ع الطباخ جسته حار
اي بعد احسن مابيه احمي ..

حضرت الستكاين اثنين .. وخليتهم بصينية التقديم
وصبيته .. بس اشو ريحته غريبة مو مثل الجاي
يلله شعليه هم مسوينه شعليه قابل انه.

وديته الهم .. وگعدت يمهم ..
وره شوية اباوع امان شرب شوية وخلاه الاستكانه بالصينية رجعها ..

عمي بيده الاستكان وباوعلي گال هو هذا االجاي الي گتلج علي ماكو يوم گتلج على شي ودبرتي.

جاوبته هسه انت موردت جاي صبيت الك جاي قابل انه مسويته هم مسوينه.

سليمان:  ماعندج غير اللغوة الزايدة دروحي ضوگي شوفي شنو من جاي هذا.

كمت من مكاني اخذت الاستكانه الي شرب منها امان شربته شوية ياااا هذا صدگ مو جاي
هذا نومي بصرة .. شكد فشلة ..

شون اوخر الفشلة .. گتله عمو هو كله نعمة الله.

سليمان '; انه ردت جاي يالمدمغة ..

زينب .. يمعود ماتدري البنية مسوين نومي بصرة
جانت طالعة توها اجت.

سليمان .. اي خو ماعدهه غير الطلعه تبنطرت وطلعت وكل شي ماتعرف تسوي وانت لاتغطين عليها.

سمية .. هذا كله عليه مع الاسف ..

گتله عمو شدعوه عليك والطلعه شعليها وهسه اروح اصب جاااي من جديد مالها داعي هالصيحة.

سليمان .. وفوكاها ماعاجبها ..

امان .. لا تعاي لاتصبين بعد اني اترخص. ..

زينب .. وين رايح ابقى ع العشا يمنه ..

امان .. لا خاله سفرة دايمة ان شاءالله اني وراي باجر سفر لازم انام على وقت.

سمية .. وجعني گلبي من گال راح يسافر شبسرعه رايح ..

رحت للمطبخ  وهو ظل يحجي وياهم ..

صارت ايناس كدامي تباوعلي بنظرات ماتنحزر
كالت اجيتي ويااا؟

جاوبتها اي

بسيارته؟

لا اجينه بتكسي سيارة عمي عطلت بالطريق وامير بقى يمها.

ايناس: - يكول يريد يسافر.

سمية: - لعد هو المن جاي .. ؟!

: رجوان متعاركة ويا رجلها ابوها يكول الها تطلكي وامها تكوللها لا .. وتكول احس نفسي ضايعه خابرته يجي يتفاهم ويا رجلهاا وهو جاي علمود اخته.

سمية:  حجيت بقلبي هنيالها اخته شون عنده مسؤؤلية اتجاهه ويخاف عليها.

ايناس:  اي واجه علمود هجران انخطبت.

: صدك؟ شوكت ..؟

: اي انخطبت سووها بيناتهم يكولون مالها داعي حفلة كبيرة  لان هاي ثاني مرة تنخطب. 

: اي خوش عندج تواصل وياهم.

: اي مهما صارت بيننا مشاكل بسبب انفصال هجران واسلام بس نبقى اهل والدم مايصير ماي.

سمية .. اي فعلا.
كملنه عشا ورحت اريد انام .. شفت امير متمدد ع الجرباية

كتله انت ليش تفشلني كدام امان وتكول عليه مخبلة.

امير .. اي وما مجذب.

سمية .. اخخخ والله مالي خلكك الليلة.
ويلله وخررر عن الجرباية اريد انام.

امير .. خمدي جوه انا انام اليوم هنا.

سمية .. اووو حتى حجي مااشتهي احجي وياك.
فرشت جوه وتمددت ..
اتذكرت كلام امان ورحت يم امير
كتله اكلك انت كايل شي كدام احد على انو احنا مابيننا شي.

ارتبك شوية گال هاا اي بس اخوتي.

گبيت بوجهه انت ماتستحي ماتخجل شون تروح تكللهم بلله كالوا كداام احد.

صاح شبيج على كيفج وبعدين انت شهالسؤال؟

نترته .. ماكوو شي بس ايناس جاي تلمحلي ..

كال .. هاي هم يراد الها واحد يضبها اله اكول لوعد عليها يكص لسانها.

صحت عليه .. والله اذا گتله سوالفك كلها تلگاها يم عمي.

: دوولي لا عبالج اخاف تره شبعت من تهديداتج.

;- لعد اخرب بينك وبين انصاف.

:- ها يلله خمدي.

:- انت هم اخمد من كون خمدت عليك طابوگه.

:- طابوگه على راسج ان شاءالله ..

:- على راسك انت والله ..

:- اكلج سمية صدك مرة كلت لامان سمية لسانها طويل اجت تصيح عليه كدام ربعي كال انه احاجيهه هو شنو جان يحاجيج بالتليفون؟ 

سمية: -  عزااا شون سؤال؟  گتله اي هم جنه نحجي بالتليفون.
:- يعني هيج مجرد حجي. ؟

:- اي مجرد حجي لايروح بالك لبعيد.

          ... صفا ... 

جانت عمتي ماموجودة أخذ راحتي باللبس لان اذا هنا هيه استحي منهه ..

لبست كيمونه سودة بيها نقشة على الصدر لحد البطن وشورت جينز  ازرگ ..

خليت مكياج فتحت شعري ونزلت جوه اروح يم اسلام .. دورته شفته گاعد بالصالة على القنفة وبيده تليفوني يدور بي ضجت من تصرفه رغم ماعندي شي اضمه عنه بس طبعه شكاك.

وابد ماراح يتغير .. المهم مابينت اله انزعاجي
اريد اجاري اريد اعيش كافي نكد وهم.

شافني طلع من التطبيقات الي هو داخل عليها
طفاه وخلا على الطبلة اشرلي على رجلي اكعد بحضنه.

ابتسمت اله ورحت يمه گعدت بحضنه حوطت رقبته بأيديه شميتها وبستها ..
خله ايديه على رجلي يداعبني وانه اضحك
ويهمس بأذني احبج صفاوي ويعض بشحمة اذني  تزيد ضحكاتي ..

دار وجهي علي .. گال تتواصلين ويا امج؟

جاوبته اي ..

مااحب تتواصلين وياها ابد.

اسلام هايه امي ومن باب بر الوالدين لازم اسأل عنها خاصة وهي هالايام مريضة كلش.

سحبني من اكتافي نومني على ايديه مثل الطفلة
ويلزم شفتي بأصابعه.
گال انا شنوو اگوول انت گولي صار.

أريد احجي نزل وجهه عليه وكتم انفاسي ببوسة
على شفتي مااكدرت حتى اتنفس منها ..

سمية ... مرت ايام .. يوم منهن.
سمعت اجت النا عمتي اشواق راحوا الكل يسلمون عليها بس انا بقيت بالمطبخ.

جاي اشرب جاي ولازمة تليفوني واسولف ويا صفا
سمعت صوت عمي يم راسي

كال كومي على راسج ريشة ماتكومين تسلمين على عمتج.
خليت تليفوني وگمت على رجلية ورحت سلمت عليها ردت عليه بس اشوفها تعبانة حييل.

كعدت يمهم من باب الاحترام .. ولو مااحترمها.

سالها عمي على رضوان شلونه.

جاوبته: - والله ياابو مؤيد حرگ گلبي حتى ماكلي على خطوبته راح سواها ابيت ابو وانه بيوم الحفلة يلله عزمني ضاع بي التعب والربه ضاع.

سليمان: - يلله لاتضوجين البركة بأمان حضرتي حفلته وان شاءالله تشوفين عرسه.

اشواق: - وين ياابو مؤيد.

باوعتلي بقهر وانكسار وگالت خليهه سكته.

عمي ظل يلح عليها تحجي
انه حسيت على روحي اخذت الصينية وباوعت لايناس مدام موجودة بعدين تگلي شبي امان.

كتلني الفضول ورحت للمطبخ خليها تحجي اذا انه موجودة مستحيل تحجي.

كعدت بالمطبخ انتظر الى ان اجت ايناس تسوي ممه لابنها.

كمشتها كتلها شبي امان.

ضحكت وحجت عمتي اشواق تكول مفشلهم ويا بيت عمه غالق موبايله ومسافر والبنية تشكي وتبجي تكول مايهتم الي وهو كايللها هذا الموجود عجبج اهلا وسهلا ماعجبج الباب يفوت فيييييل.
وصايرة مشكله بين ابو وبين عمه بسببه والبنية تكول بعد مااريد وتريد تفسخ الخطوبة.

صفا ..
وعدني اسلام نطلع نتعشه بره ..
بدلت لبست فستان محجبات .. نيلي وبي صدرية ذهبي.
وفيونكه بالظهر ذهبية.
خليت مكياج خفيف .. وطلعنه.

گعدنه بالمطعم كل شوية ولد يباوعلي.

ظل اسلام يخزر بية

كتله شبيك.

كال كله منج شهاللبس ليش مالبستي عباية
وشدعوة هالكد خاله مكياج.

جاوبته مو طلعت هيج كدامك من البيت ليش ماحجيت عليه اله هنا تحجي.

اسلام .. اشش اسكتي ولا كلمة يلله امشي نرجع للبيت.

صفا .. طلع كدامي معصب وانه امشي وراه ودموعي يوكعن مني ع الكاع من كد غزارتهن ياربي شسويت هسه انه.

هو يمشي ويلتفتت الي .. كعدت يمه بس ابجي
ظل يسوق ويستغفر.

كال يلله سكتي بس انا اغار عليج انت تجذبين كلمن يباوعلج وانه مااتحمل.

صفا .. بس كلي انت شترييد هاا تجومني وتخليني باطار لو تحبسني بقفص تره تعبت منك والله انه ماكايلتلك طلعني انت كلت.

اسلام .. يلله  ماصار شي هسه اخذج لمكان ثاني.

: ماريد وديني للبيت بعد اتوبة اذا اطلع وياااك.

; كاافي ولج اعصابج.

: نزلنيييي.

: شكووو شبيج ولج.

: نزلنييي هنانه راح اتقيئ.
نزلني وانطاني علاگة احس مصاريني طلعت
غسل وجهي ورجع صعدني بالسيارة.

يلزم ايدي واهدهه منه.

وصلنه للبيت الليل كله مانمت بس لعبان نفس عندي.
وهو محتار شنو يسويلي.

يوم ثاني اخذني للتحليل.
وطلعت حامل ..  ..

سمية .. طلعت من الغرفة شفت عمي واكف يم باب غرفة ايناس ووعد ويتسنط عليهم وهم ذكول جاي يتناكرون ..

شكد مايستحي هسه مرة ورجلها بلله بينهم موضوع خاص انت شون تروح تسمع الهم.

لحظات ودگ عليهم الباب ..  كاللهم اطلعووووا.

طلعوا وظل يحقق وياهم.

بجت ايناس كلتله عموو كل اسبوع يسافر ومسوي عبادان بصرة عشار وحتى صديقات ايرانيات عنده.

وعد مدنگ وساكت .. صاح عليه روح جيب الجواز مالتك.

دخل جابه وطلع خلا بيد ابووو.

گال يلله هاي هيه فضت راحت ونزل جوه

كام وعد ضرب ايناس على راسها بينما هم جاي يدخلون للغرفة وكلالهه هاا ارتاحيتي هسه.

ظليت اهز بيدي عمي ابدال مايكول الوعد طلعهم ونسهم خطيه مرتك وابنك.

اخذ الجواز منه عباله هو حل الموضوع مايدري راح يأجج المشاكل بينهم اكثر.

صفا .. مرت الاشهر ووصلت للشهر الخامس
رحت اسوي سونار حتى اعرف جنس الجنين
الدكتورة كلتلي بيج بنية طگيت بجي.

رحت لاسلام كوة احجي
صعدنه بالسيارة وانه اشهگ بجي قرأ السونار
كال شبيج تبجين بيج بنية واكيد هسه تطلع حلوة مثلج والحمدلله والشكر على تمام الخلقة.

بس هو مايدري ليش ابجي ..
رجعت للبيت  خابرت سمية
كتلهه تكدرين تجين اشوفج.

سمية:  اي حبيبتي راح اكول لعمة زينب تجيبني.

بقيت انتظرها على نار اجت سلمت على عمه  اخذتها
وصعدت فوگ الغرفتي
كعدنه على الجرباية
كتلها سمية انه بيه بنت.

سمية:  فدوه ياالله صلوات على محمد ..،

صفا .. طكيت بجي ظليت اشهگ

: ولج خيرج شبيج شدعوه هالبجي هذا

: مرة كاعدين انه وفراس على الشط فاتت بنية كال هاي بتج كتله بس بنتي وبنتك همين ماجاوبني ولا كانه يسمعني معقولة يقصد على هاي الي ابطني.

سمية .. لا شسالفة هو منين يدري بس هيج كالها على فطارية.

: لا اكيد هو اتنبألي بيها. 

: لا شهالحجي هذا مايعلم الغيب غير الله.

: سمية انه تعبانه ولج اريد بيت يلمنه بيوم نكون بي تعبانين ونريد نرتاح نلتم انه وانت ورقية وفراس اخوي وفاطمة ليش هيج مطشرين وماعدنه بيت للعائلة مثل كل النسوان يروحن بيت اهلهن.

: اوووف صفااا عفية ولج انه شنو اكول لا رجال  مثل الاوادم لا اهل وعمي موتنه كاتم على نفس،الكل بالبيت كولي يالله وحمدي ربج مكتوب علينه هذا كله شنسوي.

: الحمدلله.

: اسلام شونه وياج؟

: حجيت الها علي صار بالمطعم قبل كم شهر.

: تردين احجي وياااا؟

: لالا يمعودة مالي خلگ عركه.

: يلله عمه زينب تصيحلي ديري بالج على نفسج وعلى البنوته.

سمية .. رجعت من يم صفا ورأسا صعدت للغرفة
شفت امير وبيده المدالية الي بأسم امان.

رفعها بوجهي صاح كال هاي شنووو؟

خمطتها من ايده صحت بوجهه كتله مايخصك وانت منوو سمح الك تلعب باغراضييي هااا. ؟!

امير .. هاي المدالية شفتهه عند امان مرة بسويج سيارته شجابهه عندج.

سمية .. بگتهه من عنده. 

: وشمعنى هي تبوكينها من عنده احجي بينج وبينه شي؟ ؟

سمية:  انفجرت بوجهه ايييي مليت هللللكت جنت احبه ويحبنيييي ارتاحيت هسسسه.

امير .. سمية بعد ماراح اسمح  تبقين على ذمتي ابد

للحكاية بقية.

هلو بنات بسبب الحاحكم وتشوقكم للقصة نزلت هذا البارت بسرعه وكتبته بسرعه غلسوا ع الاخطاء الي بي.

باجر جمعة ناخذ استراحة ونكمل يوم السبت
😘💜